\id HEB - Madak Bible [mmx] -Papua New Guinea 2011 (DBL 2015) 
\h Ibru 
\toc2 Ibru 
\toc1 Ibru 
\toc3 Ib 
\mt1 Ibru  
\mt2 Lovoang Ti Limixin Nunu Me Ibru  
\imt1 Levelinga Loklox Axasep  
\imt2 Levenmaares 67–69 A.D.  
\ip Se ne Iesu ga urut uto vana at laxalibet, lavantun sangaun mi lavalimo levenmaares ga men pe i la lara laradi ga malagan i na lovoang tinedi limixin me Judaia, diga so asen bok di do leme Ibru. Laradi ga malagan i na lovoang kopmen neni goxo malagan li laasen teren. Na limixin me Ibru nedi diga nunu at ne Iesu, la lentaba luvuttadi diga lox asongot di la diga doma i do dinamlong ti loklok at lotu atnedi me Judaia la dina ke xepe lununu atdi keneng at ne Iesu Karisito. Laradi ga malagan i na lovoang tinedi ga vaase pe di do nemen di guta mu asu i na. Mila ne Iesu Nitna ne Moroa neni mun i silok ti ne Moses. Ne Iesu neni lamgomgo ruturun at lotu, neni im gomgonga nedi luvuttadi di lok leven gugu at lotu. Lara langas mo ga nemen kusu ti sev amet lempanga mi lavanuet kangkedek atdi xusu dinam taba min ti ne Moroa. Anai ni lenep at lekabus migomgo, ketla ne Iesu ga lok kepe mo loklok. Neni ga vot at na lavatbung menemen kusu ti lok pes laxakapmek basinge dik, neni ga met la ga raba labantuxu ren. Laradi ga malagan na lovoang ni ga lox axasep na langas tinedi xusu nedi di noxo repes basinge ne Iesu, ketla dinam tembeng atmatkun teren.  
\iot Lengkot silok keneng at na lovoang  
\io1 \ior 1:1-4\ior* Moroa ga tu asuvos min tidik keneng at ne Nitna.  
\io1 \ior 1:5–2:18\ior* Karisito neni i silok tinedi lubungangelo.  
\io1 \ior 3:1–4:13\ior* Karisito neni i silok ti ne Moses.  
\io1 \ior 4:14–7:28\ior* Karisito neni i silok ti lubungmaasa.  
\io1 \ior 8:1–9:28\ior* Lekabus maxat ne Karisito ga lox i, ni i silok ti lekabus migomgo.  
\io1 \ior 10:1-39\ior* Karisito ga raba lorooro ren at legesa xonaleng ti limixin axap.  
\io1 \ior 11:1-40\ior* At lununu mun nedik tabat kis aulis.  
\io1 \ior 12:1–13:19\ior* At lurutu alolos atdik, nedik ata nunu la ta ronga res at ne Karisito.  
\io1 \ior 13:20-25\ior* Levelinga loklox abeese.  
\c 1  
\s1 Nitna Ne Moroa I Silok Ti Lubung Angelo  
\p
\v 1 Ganoxa ne Moroa ga vaase ri lavalabat atdik at levenngusno atnedi lavaeme vapaase ali, at levengkonaleng getgesara la at leventaangas axap.  
\v 2 \x * \xo 1:2 \xt Mt 21:38; Jo 1:3\x*Ketla at na levenaleng melemu at lovotpot at ne Iesu, Moroa ira paase nga ridik limixin nunu at lungusno ne Nitna. Neni ga soxolik ka i xusu naba ruuna ka levempanga axap, la keneng at ne Iesu, ne Moroa ga rudum li levempanga axap.  
\v 3 \x * \xo 1:3 \xt 2 Ko 4:4; Gu 2:33-34; Kl 1:20; Ib 8:1\x*Ne Nitna i lox asuusu lisisixam at ne Moroa la ni lampenaxa rinotno ren. Ne Nitna ik lok tatao levempanga axap at na lavatbung menemen la mo levempanga i mumu asu levelinga ren i lolos aleng. Neni ga lok langas ti limixin kusu dina dadat basinge laxakapmek. Melemu at na, neni ga xis saparap lekngen tino at Loorong Silok ne Moroa to vana at laxalibet.   
\p
\v 4 \x * \xo 1:4 \xt Pl 2:9\x*Kuren la neni ga ruuna ka lixitkis silok mavana at lubung angelo, kerekngan mo laasen neni ga ruuna ka vam i, ni laasen i silok tidi.  
\v 5 \x * \xo 1:5 \xt Gu 13:33; Ib 5:5; 1 Let 17:13\x*Moroa goxo vaase ri tara ta angelo do,  
\q1 “Nenu ne Nuruk. Ningina nia a lok ngan ne Tamam.” \rq Sam 2:7\rq*  
\m La ni goxo vaase mumu taangelo xeretna,  
\q1 “Nenia ana lok ngan ne Temen, la neni na lok ngan ne Nuruk.” \rq 2 Sml 7:14\rq*   
\m
\v 6 \x * \xo 1:6 \xt Ro 8:29; Sam 97:7\x*La at loxonaleng ne Moroa ga riki asi lamdak avot teren ude xopok ti na lavatbung menemen, neni ga lok,  
\q1 “Lubung angelo axap tarak dina lotu saparav i.” \rq Lal 32:43\rq*   
\m
\v 7 Moroa ga vaase mumu lubung angelo la neni ga lok,  
\q1 “Neni i lok lubung angelo ren di lok ngan laramera manman, la lavasaxaruki ren di lok ngan laxao at lavanga i mam.” \rq Sam 104:4\rq*   
\m
\v 8 Ketla neni ga lok ti ne Nitna xeretna,  
\q1 “Nenu ne Moroa, lixitkis orong taram naba nemen amisik la kopmen texavaxap teren. Nenu unabam gomgonga limixin taram mi lodoxoma manmanton la levelinga ruturun.  
\v 9 Nenu u vavara aleng ti loklok manmanton la u xopara ri laxakapmek. Kuren la Moroa, ne Moroa ram ira suxa aumsu vam u mi lomomo i silok aleng, mo i volo lomomo atnedi larapen tangas taram.” \rq Sam 45:6,7\rq*   
\m
\v 10 Neni ga lok bok ti ne Nitna xeretna,  
\q1 “Nenu Leeme Silok, ganoxa at lereot uga rudum li lavatbung menemen mi laxalibet mi lukngam.  
\v 11 Na levempanga uga rudum li di, naba sonao la dina lok ngan lempanga gamasa, ketla nenu unaba rooro amisik. La dinaba rem teterek ngan labantamon.  
\v 12 Unaba vegun pes di ngan labanmo mikmidi, la ngan lavanga singsiga unaba soxun kepe i, ketla nenu xopmen unak lox ekun lodoxoma ram, la kopmen bok taxavaxap at lorooro ram.” \rq Sam 102:25-27\rq*   
\m
\v 13 Moroa goxo vaase ri tara atnedi lubung angelo xeretna do,  
\q1 “Unat kis de saparap lakngak tino, se nenia ana lok limixin munepen minu, na ngan loxot burubut ti luxangkedek taram.” \rq Sam 110:1\rq*   
\m
\v 14 \x * \xo 1:14 \xt Sam 34:7; 91:11\x*Lubung angelo nedi leventoonan avukat mun, dik lok tooro ne Moroa. La neni ik sak tiki di rik lok tooro nedi limixin ne Moroa ga soxolik ka vam di xusu dinaba lok kaka loklox arooro.   
\c 2  
\s1 Minam Tebeng Lolos Lununu Atnimi  
\p
\v 1 Nitna ne Moroa ga raba dik mi loklox arooro, kuren la minam tebeng lolos lununu atnimi mumu mo levenanasa miga ronga ka vam i, kusu mi noxo soronga basinge mo lununu.  
\v 2 \x * \xo 2:2 \xt Ga 3:19\x*Lubung angelo diga raba ne Moses mi Laulis Linga la ixo epovo do tara na los polo i. Do nege ga ronga xepe i xopla goxo mu asu i, neni ga ba lok ka losongsongot ga epovo at loklok teren.  
\v 3 \x * \xo 2:3 \xt Ib 10:29; 12:25\x*La kerepmo bok do nedik ata ronga xepe Lagale Lavavang, ixo epovo do nedik tana sepsu basinge lebelemamao at ne Moroa. Leeme Silok neni avot ga ruka lavavang at langas ti loklox arooro, la nedi luvuttadi vavang diga ronga xaka mo levelinga ren, la diga lox amuar i ridik.  
\v 4 \x * \xo 2:4 \xt Mk 16:20; 1 Ko 12:4,11\x*Moroa ga lox asuusu box i do mo levelinga ren i ruturun mi leveloklok katling la levempanga sangsangu la leventamtaba at Loroonan Kaala, ne Moroa gara epes pam limixin teren min, ga epovo at lavavara ren.   
\s1 Iesu Ga Ravasu Ngan Limixin  
\p
\v 5 Moroa goxo lok li lubung angelo xusu dinam gomgonga limixin ap mo lemenemen move naba vot melemu, na nema ma paase mumu i.  
\v 6 Ketla limixin at ne Moroa dinabam gomgonga limixin axap kerekngan lara ga tong i keneng at Lovoang Kaala. I lok keretna,  
\q1 “Limixin nedi lempanga salai, la uram doma mu solo di? Nedi lempanga gamasa mun, ketla uk lok tatao avukat tino di.  
\v 7 Nenu uga raba di mi lolos pana at lempanga axap. Ketla lolos atdi i lixilik mun ti lolos taram ne Moroa, la uga lox anarong di mi levenasen silok la lisisinang nunuan.  
\v 8 \x * \xo 2:8 \xt 1 Ko 15:27\x*Uga lok katling di xusu dinam gomgonga levempanga axap nu ga rudum li i.” \rq Sam 8:4-6\rq*  
\m Ne Moroa ga lok li levempanga axap maxopok at loklok tatao atdik, kopmen goxo ke xepe tavanga. Na lingina kovisi nedik ata ven i do levempanga ik lok maxopok at loklok tatao at limixin.  
\v 9 \x * \xo 2:9 \xt Pl 2:8-9\x*Ketla nedik ata ven kibis i do ne Iesu neni ga ruuna lixitkis silok tinedi lubung angelo. Ne Moroa ga lox asi lixilik mun i maxopok atdi xusu na xip lumumuat at lanmet ti lox asuusu lodoxoma at ne Moroa do limixin axap diba lok ka lorooro avolo. Kuren la lingina Iesu ira lok ka vam lixitkis silok la limixin dim taba asinorong i.   
\p
\v 10 \x * \xo 2:10 \xt Ro 11:36\x*Gak mokso do ne Moroa, neni ga rudum li levempanga axap la ik lok tatao bok di, do neni na ke xepe ne Iesu xusu neni na xip laxasongsongot kusu na lox agagas avukat ti lugugu ren. Kuren la neni ga ruuna ka laasen do Luntoo Avolo la ga lok ka bok buaang limixin kusu dina ruuna ka loklox arooro.  
\v 11 \x * \xo 2:11 \xt Mt 25:40; Mk 3:35; Jo 20:17\x*Ne Iesu eburu minedi limixin ni ga lox adadat di, nedi dik lok keneng at legesa xitkis koetemen. Kerepmo la ne Iesu neni i lok momo aleng ti tong di do luvutneton.  
\v 12 Neni ga lok ti ne Moroa,  
\q1 “Nenia anaba tong asu laasen taram ti luvutnetak la anabak pixan emi asu minu ro melamgo at lovotpot buru atdi.” \rq Sam 22:22\rq*   
\m
\v 13 La ne Iesu ga lok bok,  
\q1 “Anaba nunu saga at ne Moroa kerekngan di.” \rq Ais 8:17\rq*  
\m La ga lok bok,  
\q1 “Nenia na, ak lok eburu mi limixin ne Moroa ga raba ia midi.” \rq Ais 8:18\rq*   
\p
\v 14 \x * \xo 2:14 \xt Jo 12:31; 1 Jo 3:8; Li 12:10\x*I ruturun do nedi luvuttadi mun, la kerepmo ne Iesu ga vee radi xusu at lanmet teren neni naba sele utut kepe lolos at ne Satan, mo ik lok limixin kusu dinak marat at lanmet.  
\v 15 Ketla ne Iesu ga lox asepmus di basinge loxokoxo at ne Satan, mila at lorooro axap atdi xeneng ap mo loxokoxo, digak marat at lanmet.  
\v 16 \x * \xo 2:16 \xt Ais 41:8-9\x*La na nedik ta ven kibis i do neni goxo vot ti lok tooro lubung angelo, ketla neni ik lok tooro nedi di ruuna lununu ngan ne Abaram.  
\v 17 \x * \xo 2:17 \xt Pl 2:7; Ib 2:14; 1 Jo 2:2; 4:10\x*Kuren la na lavasuun teren la neni ga vee radi at lorooro axap teren ngan luvutneton kusu neni na ravasu ngan laradi ga umsu mi lebelen tuntun. La neni ga ravasu bok ngan laradi ruturun at lugugu at lamaasa gomgo ri ne Moroa, la ga ravasu ngan laxaavuk kusu ne Moroa na doxoma xepe laxakapmek at limixin.  
\v 18 Neni xa ga xip lumumuat at loxonaleng ne Satan ga lok tong pen i, ketla ne Iesu goxo subu. Kuren la neni i epovo na lok tooro nedi di ekip tangarang mi leveloklok tong pen.   
\c 3  
\s1 Iesu I Silok Ti Ne Moses  
\p
\v 1 \x * \xo 3:1 \xt Ib 4:14; 6:20; 7:26; 8:1; 9:11; Kex 12:7\x*Luvutnetak mi luvurinuk. Nemi bok lavaanat soxolik at ne Moroa mo ga ro ka vam nimi ngan limixin teren. Kuren la mina doxoma mumu ne Iesu, neni Lun Pavang la Lamaasa Avolo. La na nedik dira nunu ren.  
\v 2 Neni ga ruturun ti ne Moroa mo ga soxolik ka i ri lugugu ren, kerekngan ne Moses ga ruturun ap mo levenaleng neni gak lok tatao limixin at ne Moroa.  
\v 3 La ne Iesu ga ruuna ka laasen i silok ti ne Moses, kerekngan mun laradi gugu gu, neni i ruuna laasen silok ti mo loogu neni i lox i.  
\v 4 Na i ruturun mila levenabung mixin getgesara di ruuna lara laradi ga lok li di. Ketla ne Moroa ga lok li levempanga axap.   
\p
\v 5 \x * \xo 3:5 \xt Kex 12:7\x*Moses ga ruturun ngan laradi gugu ri lok tatao limixin at ne Moroa la neni ga paase asu levempanga mo naba vot melemu.  
\v 6 \x * \xo 3:6 \xt Kl 1:23; Ib 3:14\x*Ketla ne Karisito i ruturun at lugugu ri lok tatao limixin at ne Moroa xerekngan lanarong i lok tatao libibinat teren. Do atam tebeng lolos lununu atdik la tana ngangais mi lomomo ri lomlong teren, i lox asuusu i do nedik limixin at ne Karisito.   
\s1 Loklok Mamana  //  Ri Limixin At Ne Moroa  
\p
\v 7 Nedik limixin at ne Karisito, kuren la nemen mita ronga xepe levelinga ren. I ngan levelinga at Lovoang Kaala, Loroonan Kaala ga vaase i xeretna,  
\q1 “Mo do mina ronga laxaka at ne Moroa lingina,  
\v 8 \x * \xo 3:8 \xt Pas 17:7; Kex 20:2-5\x*mi gutak lox ametarauat lebelen nimi ngan lavalabat atnimi diga ronga xepe ne Moroa ap mo levenaleng ne Moroa ga lok tong pen lununu atdi ro at lamatbin.” \rq Sam 95:7-8\rq*   
\m
\v 9 La ne Moroa ga lok keretna,  
\q1 “Lavalabat atnimi diga edak minia go la diga lok tong ia, keke i do diga ven levempanga silok nenia aga lox i ridi at lavanuet sangaun maares.  
\v 10 Anai lavasuun teren la nia aga bele songsongot tinotno mi limixin ap mo loola. Aga lok keretna, ‘Lebelen di i onon petpes amisik basinge ia, la diga ronga xepe levempapaase ali rak.’  
\v 11 \x * \xo 3:11 \xt Kex 14:21-23\x*Kuren la aga belemamao nedi la ga lok laxakaape matmatkun tinotno xeretna, ‘Dixo epovo rinotno xusu dina beles ap mo loxot loklox amas tarak.’” \rq Sam 95:9-11\rq*   
\p
\v 12 Luvutnetak mi luvurinuk. Mina lok tatao avukat nimi xusu xopmen tara atnimi noxo ruuna taxakapmek la loklok ting tonga xepe levelinga at ne Moroa keneng at lorooro ren, la kerepmo na sok tixirixes kepe ne Moroa, Luntoo Avolo.  
\v 13 Ketla at na levenaleng nemi move mi rooro ren, mina epang aru xusu laxakapmek noxo solo arup tara atnimi la lebelen nimi na repe ri levelinga at ne Moroa.  
\v 14 \x * \xo 3:14 \xt Ib 3:6\x*Nedik tat kis esogo mi ne Karisito mo do nedik tam tebeng lolos lununu se at laxavaxap at lorooro atdik, kerekngan nedik taga nunu ruturun ap mo levenaleng taga lok kaka lununu maxat.  
\v 15 \x * \xo 3:15 \xt Ib 3:7-8\x*I lok ngan Lovoang Kaala i tong i do,  
\q1 “Mo do mina ronga laxaka at ne Moroa lingina, mi gutak lox ametarauat lebelen nimi ngan lavalabat atnimi diga ronga xepe ne Moroa.” \rq Sam 95:7-8\rq*   
\p
\v 16 \x * \xo 3:16 \xt Kex 14:1-35\x*Nege di nom diga ronga laxaka at ne Moroa la melemu diga ronga xepe i? Nedi mo limixin me Israel, ne Moses ga lam asu ka di boro Isip.  
\v 17 \x * \xo 3:17 \xt 1 Ko 10:10\x*At lavanuet sangaun maares diga lok laxakapmek la diga raba rulu ne Moroa. Kuren la ne Moroa ga musak di la buaang atnedi diga remet eteke mun to at lamatbin.  
\v 18 \x * \xo 3:18 \xt Ib 3:11\x*La ne Moroa ga vangpe do di noxo vubeles tinotno ri mo loxot loklox amas teren, mila diga ronga xepe levelinga ren.  
\v 19 Kuren la nedik di ven i do buaang atnedi di goxo lox epovo i xusu dina vubeles mila di goxo nunu at ne Moroa.   
\c 4  
\s1 Loklok Amas  //  Ti Limixin At Ne Moroa  
\p
\v 1 Lumusmaragu move i rem suang kusu ti pubeles ti mo loxot loklox amas teren. Kuren la mina lok tatao avukat nimi xusu teventaba atnimi di noxo subu kot ti mo loklox amas.  
\v 2 Nemi bok miga ronga Lagale Lavavang kerekngan nedi diga ronga i. Ketla mo lavavang diga ronga i, goxo lok tooro di mila di goxo nunu ren.  
\v 3 \x * \xo 4:3 \xt Ib 3:11\x*Monga nedik dira nunu vam, i lok ngan ta do tara vubeles pam ap mo loxot loklox amas kerekngan ne Moroa ga tong i do,  
\q1 “Kuren la aga belemamao nedi la ga lok laxakaape matmatkun tinotno xeretna, ‘Dixo epovo rinotno xusu dina beles ap mo loxot loklox amas tarak.’” \rq Sam 95:11\rq*  
\m Ketla lugugu ren gara xap pam ga ruka i at luruntudum li at na lavatbung menemen.  
\v 4 To xeneng at Lovoang Kaala ne Moroa ga vaase mumu laaleng sepsev avanuti mi na levelinga,  
\q1 “At laaleng sepsev avanuti, Moroa ga lox amas basinge leven gugu axap teren.” \rq Lur 2:2\rq*   
\m
\v 5 La ap mo levelinga a tong pam i, ga lok bok keretna,  
\q1 “Dixo epovo rinotno xusu dina beles ap mo loxot loklox amas tarak.” \rq Sam 95:11\rq*   
\p
\v 6 I ruturun do leventaba move dinaba vubeles ap mo loxot loklox amas. La nedi gano diga ronga Lagale Lavavang, di goxo vubeles teren mila diga ronga xepe levelinga at ne Moroa.  
\v 7 Kuren la ne Moroa ga lok katling bok lara laaleng, ga tong i do ningina. La at leventaba levenmaares melemu at lavatpasu at leeme Israel boro Isip, neni ga vaase at lungusno ne Devit kerekngan levelinga neni ga tong i gano, ga lok keretna,  
\q1 “Mo do mina ronga laxaka at ne Moroa lingina, mi gutak lox ametarauat lebelen nimi.” \rq Sam 95:7,8\rq*   
\m
\v 8 \x * \xo 4:8 \xt Lal 31:7; Jos 22:4\x*Do ne Josua gita raba di mi loklox amas ap mo levenaleng neni ga lam abeles limixin uto Kanan, Moroa xopmen gixo vaase bok ba melemu mumu taaleng petpes, kusu nedik taba lok ka loklox amas teren.  
\v 9 Loxonaleng ti vubeles to xeneng at loxot loklox amas at ne Moroa move i rem suang ti limixin teren.  
\v 10 \x * \xo 4:10 \xt Ib 4:4\x*Do tara i ruuna loklox amas at lorooro ren, neni ira on basinge vam lugugu axa ren at na lavatbung menemen. I lok ngan ne Moroa ga lox amas basinge lugugu ren.  
\v 11 Kuren la mina raba axap lodoxoma atnimi xusu mina vubeles ap mo loklox amas la kopmen tara noxo subu kot la na mu asu lampoovo atnedi leme Israel, diga raba rulu ne Moroa.   
\p
\v 12 \x * \xo 4:12 \xt 1 Pi 1:23; Ep 6:17; Li 1:16; 19:15; Jo 12:48\x*Lenavolo at ne Moroa i ruuna lorooro la i lolos aleng. I lok ngan lavarise ing sengsen evan, mo i tara xoxorop laranin etudum la laramomodong atdik. La kerepmo bok levelinga at ne Moroa i pubeles uto xa xeneng at lodoxoma la lorooro atdik kusu na lox asu leveloklok kakapmek. Kuren la nedik toxo epovo xusu ata lipe at lemeren ne Moroa, neni ikleklen levendoxoma atdik la levesumsuma at lebelen dik.  
\v 13 Kopmen tevempanga at na lavatbung menemen axap i epovo na nemen alipe at lemeren ne Moroa. Neni ne Pen Axasep la i reven leveloklox axap at limixin dim doma i xopla dim suma i. La neni naba lok li limixin at lavapaase mumu mo leveloklok.   
\s1 Iesu Neni Lamaasa Avolo  
\p
\v 14 \x * \xo 4:14 \xt Ib 3:1; 10:23\x*Nedik di ruuna Lamaasa Avolo, neni ga urut pam uto vana at laxalibet, la monga it kis saparap lekngen tino at ne Temen. Neni ne Iesu, Nitna ne Moroa. Kuren la nedik atam tebeng lolos mo lununu atnedik tagara ruuna ka vam i.  
\v 15 Mo Lamaasa Avolo atdik, neni i epovo na suma rooro dik at leveloklok tong pen mila neni ga suma bok laxaloklok tong pen ngan dik. Ketla neni xopmen goxo lok taxakapmek.  
\v 16 \x * \xo 4:16 \xt Ib 10:19\x*Kuren la nemen dik guta marat kusu tana vot pasa ne Moroa mi levendoxoma atdik mila neni i umsu mi lebelen tuntun la nedik tanaba ruuna ka letaba nabalamu ren la loklok tooro do nedik atak pakes tin.   
\c 5  
\p
\v 1 Lavamaasa amgomgo axap Moroa i soxolik ka di xantubu at limixin kusu dina ru katling di at lugugu at ne Moroa. Dim taba leventamtaba ri tong loklox avukat ti ne Moroa la diplavang bok mi levempanga mi lavanuet kangkedek ti vung kimit laxakapmek at limixin.  
\v 2 \x * \xo 5:2 \xt Ib 4:15\x*Lamaasa gomgo im suma leveloklok tong pen, kuren la i epovo do ni na suma rooro nedi di lok laxakapmek mila kopmen dinaklen i do mo levempanga i lok kapmek.\fig Lamaasa gomgo i lok lugugu ren.|alt="Priest offers sacrifice burnt offering" src="cn02093b.tif" size="col" loc="Heb 5:1-3" copy="Cook" ref="Ib 5:1-3" \fig*  
\v 3 \x * \xo 5:3 \xt Mas 9:7; 16:6\x*Ni lavasuun teren la lamaasa gomgo naba lok laplavang mi levempanga ri laxakapmek axa ren, la ri laxakapmek bok at limixin.   
\p
\v 4 \x * \xo 5:4 \xt Pas 28:1\x*Kopmen na epovo do tara na lok ka mo lugugu mi lavavara mun teren, ketla ne Moroa xa naba soxolik ka i ngan neni ga soxolik ka ne Aron.  
\v 5 \x * \xo 5:5 \xt Ib 1:5\x*La ne Karisito bok kopmen goxo xip ka mo lugugu silok at lamaasa gomgo mi lavavara ren. Ketla ne Moroa ga lok tin keretna,  
\p “Nenu Nuruk, ningina nia a lok ngan ne Tamam.” \rq Sam 2:7\rq*   
\m
\v 6 \x * \xo 5:6 \xt Ib 6:20; 7:1,17\x*La at loxot petpes at Lovoang Kaala Moroa ga lok bok tin keretna,  
\p “Nenu Lamaasa Avolo ngan ne Melkisedek, la kopmen taxavaxap at lugugu ram.” \rq Sam 110:4\rq*   
\p
\v 7 \x * \xo 5:7 \xt Mt 26:39-46; Pl 2:6-8\x*Ap mo levenaleng ne Iesu ga rooro ren at na lavatbung menemen, neni ga sing eburu mi lerengteng silok ti ne Moroa do na lox arooro i basinge lanmet. La ne Moroa ga sepo lisingising teren mila neni ga lox asi i maxopok at lavavara at ne Moroa.  
\v 8 I ruturun do neni ne Nitna ne Moroa, ketla mo losongsongot neni gap kiv i, ga lox epovo i xusu na mu asu lavavara at ne Temen.  
\v 9 Kerepmo la ne Moroa ga lox agagas li i, la neni ga vot ngan ta lavasuun at lorooro avolo rinedi ding tonga res teren.  
\v 10 \x * \xo 5:10 \xt Ib 5:6\x*La ne Moroa ga lok li i ngan Lamaasa Avolo ngan ne Melkisedek.   
\s1 Nemen Mita Subu Kot Kantubu  
\p
\v 11 Ma ruuna laxalinga solo mumu ne Iesu atla neni Lamaasa Avolo. Ketla naba lolos ti soxomus asu na levelinga rinimi mila lodoxoma atnimi kopmen na gagas ti lok ka na levenanasa.  
\v 12 \x * \xo 5:12 \xt 1 Ko 3:1-3\x*At na levenaleng i epovo do mina lok ka lugugu ri anasa limixin mi levelinga at ne Moroa. Ketla kopmen mina epovo mila move mik pakes kusu tara na lox ase amu manga nimi mi levenanasa avot at levelinga at ne Moroa. I lok ngan ta do nemi move mi lok ngan lubung kadede, di tus at luvutnen di. Kovisi mina epovo kusu mina anan leveluxa lolos.  
\v 13 Lara do i rooro mi ladan tus at nenen, i ngan laxadede. I lok ngan ta do nemi xovisi mina ven kibis levempanga i lox avukat la levempanga i lok kapmek.  
\v 14 \x * \xo 5:14 \xt Ro 16:19; Pl 1:10\x*Ketla tinedi dira mukun pam at lununu atdi, di epovo dina ven kibis levempanga i lox avukat la levempanga i lok kapmek, mila di xoxonom kaka amisik levelinga at ne Moroa.   
\c 6  
\p
\v 1 Kuren la nemen mitam tebeng mun mo levenanasa miga lok ka avor i. Ketla mina lolos ti lok kaka levenanasa at ne Karisito kusu mina lok ngan limixin mukun. Mina ke be mo levenanasa avot, i lok keretna. Laanasa mumu loklok ti leeng basinge laxakapmek kusu mo laxakapmek noxo lox asuusu lanmet. Laanasa mumu lununu ri ne Moroa.  
\v 2 \x * \xo 6:2 \xt Ib 9:14\x*Laanasa ri lesep susu. Laanasa ri loklok ti sa li levengkikngen mavana at teventaba rik lox anarong di; laanasa ri laxakatu kaxat basinge lanmet. La laanasa ri lugugu at ne Moroa ngan laradi rongtonga linga at laaleng ete.  
\v 3 Do ne Moroa na mulus, mina ke be na levenanasa la mina lok kaka be mo levenanasa mumu.   
\p
\v 4-6 \x * \xo 6:4-6 \xt 1 Pi 2:3\x*\x * \xo 6:4-6 \xt Mt 12:31; Ib 10:26-27; 1 Jo 5:16\x*Nedi limixin diga ronga Lagale Lavavang la diga nunu ren la digara suma vam lomomo at lorooro avolo la digara lok ka vam Loroonan Kaala, la digaraklen pam lorooro nunuan ne Moroa ga vaase ali min ti limixin, la digara ven pam ne Moroa ga lok levempanga sangsangu. Do mo limixin dina raba rulu ne Moroa, ixo epovo xusu dina leeng basinge mo laxakapmek mila ap mo mun loklok i lok ngan ta do nedi xa dira vaxarem amu manga ne Nitna ne Moroa ro at laxaba, la kerepmo dira lok li manga i at lainmangan to at lemeren limixin.   
\p
\v 7 Lavapaase poovo mumu i na loklok i lok keretna. Laxantaamang do larakabu it pot amisik teren la i lox asuusu levempipisik nunuan naba lok tooro nedi di gugu i, la mo laxantaamang naba ruuna ka loklox anarong at ne Moroa.  
\v 8 \x * \xo 6:8 \xt Lur 3:17-18\x*Ketla do livin gagas mi laxampivilis kapmek kusuk mun na suu ap mo laxantaamang, mo laxantaamang i lok kapmek axap, la i nemen maxopok at lebelemamao at ne Moroa, la kopmen bok ba tara noxotlo tevempanga go.   
\p
\v 9 Larapen tangas tarak. Ma paase lolos tinimi ketla nemen mita doma solo i nom, mila ma nunu ruturun do leveloklok i nunuan naba ravasu atnimi, mo levempanga naba lox asuusu i do mira lok ka vam loklox arooro.  
\v 10 \x * \xo 6:10 \xt Ib 10:32-34\x*Moroa neni Laradi Manmanton la neni noxo domampe leveloklok nunuan nemi miga lox i, la mo labalamu nemi miga lox asuusu i at laasen teren ap mo levenaleng miga lok tooro limixin teren la move mik lok tooro di.  
\v 11 \x * \xo 6:11 \xt Ib 3:14\x*Nema ma vara i do nemi getgesara mina lox asuusu leveloklok kerepmo se at laxavaxap at lorooro atnimi, la kerepmo minaba ruuna ka ruturun mo leveloklox anarong mim doma ngangais tin.  
\v 12 Ma xopara i do mina molo at lununu atnimi ketla mina mu asu loklok atnedi lavalabat atnimi diga tu atmatkun amisik at lununu atdi la digat kis tangais mo leveloklox anarong ne Moroa ga paase ali min tidi.   
\s1 Lavapaase Ali At  //  Ne Moroa Naba Soorun  
\p
\v 13 Ap mo laaleng ne Moroa ga lok lavapaase ali ren ti ne Abaram, neni ga vara i do na lox amumuat levelinga ren. Ketla goxopmen tara ga silok tin kusu neni naba vangpe min. Kuren la neni ga vangpe xa mi laasen teren.  
\v 14 \x * \xo 6:14 \xt Lur 22:16-17\x*Mo lavapaase ali ren ga lok keretna, “At laasen tarak nia anaba lox anarong u, la livipisik li ram dinaba umsu aleng.”  
\v 15 La ne Abaram gat kis atnaasan mun la ga ngangais ne Moroa, se ni ga lox asoorun mo lavapaase ali rin.   
\p
\v 16 \x * \xo 6:16 \xt Pas 22:10-11\x*Do tara i vara na vangpe, neni na vangpe mi laasen at laradi i silok tin, la mo lavangpangpe naba lox amuat levelinga ren. Lavangpangpe i epovo ri lox axap leven ekarakat.  
\v 17 La ne Moroa ga vara i do limixin teren dinaklen tuturun i do neni naba lox epovo levelinga ren tinedi la dinaba ruuna ka leveloklox anarong neni ga vaase ali min tidi. Kuren la neni ga lox amuar i mi lavangpangpe.   
\p
\v 18 \x * \xo 6:18 \xt Kex 23:19; 1 Sml 15:29\x*Legepu vanga mo ik lok kusu na lox amuat levelinga ren, i lok keretna. Lavapaase ali ren la lavangpangpe ren, la ixo epovo do ne Moroa na xarang limixin. Kuren la ne Moroa ga lox i na xusu na lox alolos lununu atnedi diga on basinge laxakapmek kusu dina rebeng kaka mo levempanga nunuan ne Moroa ga vaase ali min.  
\v 19 Nedik takleklen i do ne Moroa naba lox asoorun levempapaase ali ren. Kuren la lebelen dik nat kis aulis ngan lesepang it kis aulis do di sepkaa alis i ro xopok at lavaruat. La kerepmo bok i epovo do nedik tana xis esogo mi ne Moroa no vana at laxalibet. I lok ngan gano lamaasa gomgo ga vubeles at loxot i xaala aleng, mo loxot gak lok to melemu at lavatbantamon silok to xeneng at loogu laplavang.  
\v 20 \x * \xo 6:20 \xt Mas 16:2-3,12,15; Ib 5:6\x*La kerepmo bok ne Iesu gamgo ridik uto vana xusu na lok lugugu ngan Lamaasa Avolo kerekngan ne Melkisedek, la lugugu at Lamaasa Avolo noxo xap.   
\c 7  
\s1 Melkisedek Neni Lamaasa  
\p
\v 1 \x * \xo 7:1 \xt Lur 14:17-20\x*Na leeme ne Melkisedek, gano neni loorong to Salem la neni lamaasa at Leeme Avolo ne Moroa. Neni ga ekip tangarang mi ne Abaram at laaleng ne Abaram eburu mi limixin teren digamlong boro at leesep no diga sep kepe leventaba lavaorong la limixin atdi. La ne Melkisedek ga lox anarong i.  
\v 2 La ne Abaram ga raba ne Melkisedek mi loxot i sev asangaun ap mo levempanga neni ga lok kaka i ap mo lavaorong.  
\p Avot, lavasuun at laasen ne Melkisedek do, “Loorong at loklok manmanton.” La laasen bok do loorong boro Salem i epovo mi levelinga xeretna, “Loorong at lenmila.”  
\v 3 \x * \xo 7:3 \xt Sam 110:4\x*Nedik kopmen ataklen leretere at ne temen mi nenen la leretere at lavalabat teren, la dik taxoklen i do diga visix i la ni ga met lingisa. La kerepmo Nitna ne Moroa i lok ngan ne Melkisedek, mo i nemen amisik ngan lamaasa.   
\p
\v 4 Mina doma i do ne Melkisedek ga silok aleng. Ataklen i do neni ga silok mila ne Abaram, temen nedi lubung mixin me Israel ga raba i mi loxot i sev asangaun ap mo levempanga ni ga lok kaka i at laaleng neni ga esep eburu mi lavaorong. Mo loxot ga lox avukat aleng.  
\v 5 \x * \xo 7:5 \xt Kex 18:21\x*Laulis Linga i tong i do livipisik li at ne Levi mo digap kip lugugu ngan lavamaasa, dinak lok ka loxot i sev asangaun boro xa at limixin atdi, keke i do nedi axap mun livipisik li at ne Abaram.  
\v 6 Na laradi ne Melkisedek, neni goxopmen livisik li at ne Levi, ketla neni ga lok ka loxot i sev asangaun boro ap mo lempanga ne Abaram ga lok ka i ap mo lavaorong. Ni mo lara ga ruuna ka lavapaase ali boro at ne Moroa. Ni lavasuun teren la ne Melkisedek ga lox anarong i.  
\v 7 La i ruturun aleng do lara i silok, neni na lox anarong mo lara i lixilik tin. La kerepmo ne Melkisedek ga silok ti ne Abaram.   
\p
\v 8 La nedi limixin me Israel diga raba loxot i sev asangaun ti lavamaasa. Mo lavamaasa di goxo rooro amisik, ketla ne Melkisedek nedik kopmen ataklen i do neni ga met, limixin di lok do move i rooro.  
\v 9 I epovo na tong i do ne Levi la lavamaasa melemu ren, dik lok kaka loxot i sev asangaun boro at limixin me Israel. Nedi xopmen na silok ti ne Melkisedek, mila lurubuno di ne Abaram ga raba ne Melkisedek mi loxot i sev asangaun.  
\v 10 I epovo ana tong i xuren mila ap mo laaleng ne Abaram ga raba ne Melkisedek mi loxot i sev asangaun, i lok ngan ta do ne Levi mi lavamaasa melemu ren diga raba ne Melkisedek mi loxot i sev asangaun, keke i do luvutnen di goxovisi na visik di.   
\s1 Iesu Neni Lamaasa Ngan Ne Melkisedek  
\p
\v 11 Limixin me Israel di goxo epovo do dinan manton tino basinge laxakapmek mila xopmen di goxo epovo xusu dina mu asu rinotno leventaangas la levelinga at lavamaasa mo digak lok at libibinat at ne Levi. Mo leventaangas, ni lavasuun at Laulis Linga, ne Moroa ga raba limixin me Israel min. Kuren la limixin digak pakes ti lamaasa vetpes kusu na vot, la giba lok ngan ne Melkisedek. Neni gitoxo lok ngan ne Aron mi lavamaasa at libibinat at ne Levi.   
\p
\v 12 La ne Moroa ga soxolik ka Lamaasa vetpes kusu na lox adadat limixin basinge laxakapmek. Kuren la neni ga lox ekun Laulis Linga mi lekabus maxat, mila do tara na lox ekun leventaangas at lavamaasa, neni na lox ekun bok Laulis Linga.  
\v 13 La mo Lamaasa vetpes, neni ne Iesu la neni at libibinat petpes la goxopmen tara ap mo libibinat ga ruuna ka lugugu ngan lamaasa.  
\v 14 \x * \xo 7:14 \xt Lur 49:10; Ais 11:1; Mt 2:6; Li 5:5\x*I xasep do Leeme Silok atdik, neni at libibinat at ne Juda, la ne Moses kopmen goxo tong i do teventaba at na libibinat naba ravasu ngan lavamaasa.   
\p
\v 15 La levelinga atnama mumu lekabus maxat i xasep aleng mila lamaasa vetpes kerekngan ne Melkisedek gara vot pam.  
\v 16 Laulis Linga i tong i do, nedi mun at libibinat at ne Levi, di epovo xusu dina xip ka lugugu ngan lavamaasa. Ketla ne Iesu ga lok ka mo lugugu at langas petpes. Neni ga lok ka i mila neni ga ruuna lolos silok la kopmen taxavaxap at lorooro ren.  
\v 17 \x * \xo 7:17 \xt Ib 5:6\x*I lok ngan ne Moroa ga tong i at Lovoang Kaala, levelinga ren i lok keretna,  
\q1 “Nenu unaba nemen amisik ngan lamaasa kerekngan ne Melkisedek.” \rq Sam 110:4\rq*   
\p
\v 18 Moroa ga vaxaxis ase Laulis Linga at ne Moses mila goxopmen ta tololos teren la kopmen ta goxo epovo ri lok tooro limixin.  
\v 19 \x * \xo 7:19 \xt Ib 9:9\x*Laulis Linga xopmen goxo epovo na lox adadat limixin basinge laxakapmek. La ne Moroa ga lok li langas maxat, i lox avukat ti Laulis Linga la maxeneng ap mo langas maxat, i epovo do tana xis esogo mi ne Moroa.   
\p
\v 20 La ne Moroa ga vangpe do ne Iesu na xip ka lugugu at lamaasa, ketla ne Aron la lavamaasa melemu ren diga xip ka mo lugugu. Ketla goxopmen tavangpangpe at ne Moroa ridi.  
\v 21 \x * \xo 7:21 \xt Ib 5:6\x*Ketla ne Moroa ga vangpe do ne Iesu na lok ka lugugu ngan lamaasa at laaleng ne Moroa ga lok tin keretna,  
\q1 “‘Nenu unaba nemen amisik ngan Lamaasa.’ Leeme Silok ne Moroa ga vangpe vam kuren, la neni noxo lox ekun lodoxoma ren.” \rq Sam 110:4\rq*   
\m
\v 22 \x * \xo 7:22 \xt Ib 8:6; 12:24\x*Moroa ga vangpe xerepmo, kuren la ne Iesu neni i lok ngan losoksoxoba pe ri lekabus maxat, mo i nunuan aleng ti Laulis Linga.   
\p
\v 23 Buaang atnedi lavamaasa amgomgo diga lok lugugu mila diga vekukun mi lugugu do lara ga met.  
\v 24 Ketla ne Iesu, kopmen taxavaxap at lorooro ren la kerepmo neni nabak lox amisik lugugu at lamaasa.  
\v 25 \x * \xo 7:25 \xt Ro 8:34\x*Kuren la neni i epovo na lox arooro rinotno nedi di vot pasa ne Moroa, mo do dina sep sogo at ne Iesu mi lununu. Mila ne Iesu i nemen amisik saparap ne Moroa la i ngising i xusu na lok tooro di.   
\p
\v 26 \x * \xo 7:26 \xt Ib 3:1\x*Lamaasa gomgo xerepmo i lox epovo lavakpakes atdik. Luruptuvuk teren in manton tino, neni xopmen goxo ronga xepe levelinga at ne Moroa, goxopmen taxakapmek gak lok teren. Ap mo levenaleng neni ga nemen de at na lavatbung menemen, neni goxo vubeles ti laxakapmek eburu mi limixin kakapmek. Melemu ne Moroa ga lox anarong i ro vana at laxalibet.  
\v 27 \x * \xo 7:27 \xt Ib 5:3\x*Neni xopmen goxo lok ngan mo leventaba lavamaasa amgomgo, nedi xa digaplavang amisik ti laxakapmek atdi, la ti laxakapmek bok at limixin. Ketla ne Iesu ga lok laplavang ti laxakapmek at limixin axap, ni ga lok legesa laplavang mun, at laaleng ni ga raba lorooro ren kusu na uu nop loklok atdik.  
\v 28 \x * \xo 7:28 \xt Ib 5:1-2\x*Maxeneng at Laulis Linga luvuttadi diga lok lugugu ngan lavamaasa amgomgo, la lorooro atdi goxo manton tino xerekngan ne Iesu. Ketla ne Moroa ga raba limixin mi Laulis Linga, la melemu ni ga vangpe do ne Nitna na lok kaka lugugu at lamaasa gomgo, luruptuvuk teren naban manton tino amisik.   
\c 8  
\s1 Iesu Neni Lamaasa Gomgo At Lekabus Maxat  
\p
\v 1 \x * \xo 8:1 \xt Ib 1:3; 3:1; 10:12; 12:2\x*Lavasuun at na levelinga atnama i lok keretna. Nedik ta ruuna lamaasa gomgo xerepmo, mo it kis at lenep tino at loxonin orong at Loorong Silok ne Moroa, to vana at laxalibet.  
\v 2 Neni ik lok lugugu at ne Moroa ro xeneng at loxot i xaala aleng mo ik lok at loogu i xaala la i ruturun, kopmen limixin di goxo lox i, ketla ne Moroa xa ga lox i.   
\p
\v 3 Nedi axap, lavamaasa amgomgo dip kip lugugu xusu dina raba ne Moroa mi leventamtaba la levempanga laplavang, la kerepmo bok i epovo do Lamaasa gomgo ne Iesu na ruuna tavanga xusu ni na raba ne Moroa min.  
\v 4 Do neni gik lok nade at na lavatbung menemen, neni gi toxo ruuna ka lugugu ngan lamaasa mila leventaba luvuttadi mo gik lok pam kusu tim taba leventamtaba ngan Laulis Linga i tong i.  
\v 5 \x * \xo 8:5 \xt Kl 2:17; Ib 9:23; Pas 25:40\x*Nedi di gugu ro at loxot kaala nade xopok at na lavatbung menemen, na loxot kaala neni lampoovo mun ap mo loxot kaala no vana at laxalibet. Ni lavasuun teren la ne Moroa ga vaase aronga ne Moses at laaleng neni ga lok do na xip loogu kadis at ne Moroa. Ne Moroa ga lok tin keretna, “A vara i do una xip avukat na loogu ngan lampoovo nia aga lox ase u min to at lakaana Sinai.”  
\v 6 \x * \xo 8:6 \xt Ib 7:22; 9:15\x*Ketla mo lugugu ne Iesu ga lok ka i, i lox avukat ti lugugu at lavamaasa mede xopok, i ngan bok lekabus maxat i lox avukat ti lekabus migomgo. La leveloklox anarong at lekabus maxat i lox avukat ti leveloklox anarong at lekabus migomgo. La ne Iesu neni lavasuun at lekabus maxat, ni ga lok lumulum kantubu at limixin mi ne Moroa.   
\p
\v 7 Lekabus migomgo goxo epovo na lox axis eburu ne Moroa mi limixin, kuren la ne Moroa ga lok lekabus maxat.  
\v 8 Moroa ga ven kibis i do lekabus migomgo goxo epovo mila limixin diga soogong aleng. Ni ga lok,  
\q1 “Mina ronga i na. Laaleng mo naba vot la nia anaba lok lekabus maxat mi limixin tarak to Israel la limixin tarak at libibinat me Juda.  
\v 9 Mo lekabus maxat ba lok petpes ti lekabus migomgo, mo nia aga lox i eburu mi lavalabat atdi ap mo levenaleng nia aga lam asu di boro Isip. Nia anaba lok lekabus maxat mila di goxo ruturun ti lekabus migomgo, la nia aga raba rulu di.  
\v 10 \x * \xo 8:10 \xt Ib 10:16\x*Nenia ne Moroa, mina ronga na levelinga. Melemu nia anaba lok lekabus maxat mi limixin me Israel. Mo lekabus naba lok keretna. Nia anaba lox adoxoma di mi Lenavolo rak, la anaba malagan i keneng at lebelen di. Nia anabat kis esogo midi la anabak lok tatao di ngan limixin tarak.  
\v 11 Kopmen bok ba tara naba anasa lentangas teren kopla neton mi levelinga keretna, ‘Unaklen ne Moroa.’ Mila nedi axap dinaba xis ekilen eburu minia. Nedi limixin silok la nedi bok limixin kopmen tevenasen silok atdi.  
\v 12 \x * \xo 8:12 \xt Ib 10:17\x*Nia anaba doxoma xepe laxakapmek atdi la nia noxo domangke rinotno bok ba at laxakapmek atdi.” \rq Jer 31:31-34\rq*   
\p
\v 13 Moroa ga soxot na lekabus do lekabus maxat, kuren la Moroa ga ke xepe lekabus migomgo mila kopmen bok ba tugugu ren la i auret do na sonao axap.   
\c 9  
\s1 Leveloklok At  //  Lekabus Migomgo  
\p
\v 1 \x * \xo 9:1 \xt Pas 26:1-30\x*At lekabus migomgo Moroa ga raba leme Israel mi leventaangas kusu dina mu asu i ri lok leven gugu xeneng at lotu, la diga bak kangkan loxot silok ti lotu saparap ne Moroa.  
\v 2 \x * \xo 9:2 \xt Pas 25:23-40\x*To xeneng teren diga xip lara loogu kadis. La keneng ap mo loogu kadis diga lok legepu xonnep gu. At loxonnep gu avot diga lok li loxot kusu lababao nak lok teren, la loxonin eburu mi levengkongkide gak lok bok teren, mo levengkongkide di etaba min ti ne Moroa. Na loxot diga soxor i do Loxot Kaala.\fig Loxot Kaala no keneng at loogu kadis.|alt="Holy Place" src="bk00278b.tif" size="span" loc="Heb 9:1-2" copy="BFBS (Knowles/Bass)" ref="Ib 9:1-2" \fig*  
\v 3 \x * \xo 9:3 \xt Pas 26:31-33\x*To melemu at na loxonnep gu, ni lenep gu i sev agepura. Diga soxor i do loxot i xaala aleng tino. Lara lavattamon ga merem to xantubu ri lox epeseves mo lunep gu.   
\p
\v 4 \x * \xo 9:4 \xt Pas 16:33; 25:10-16; 30:1-6; Kex 17:8-11; Lal 10:3-5\x*To melamgo at lavattamon lara loxonin laplavang mo gak lok, diga lox i mi logol la digaplavang go mi levempavaxan una ga so mavak. La to xeneng at loxot i xaala aleng tinotno, lara lobokis bok mo gak lok, diga vop pe i ro maxeneng la maxamang teren mi logol. Mo lobokis ga lok katling lekabus ne Moroa ga lox i eburu mi limixin teren. To xeneng ap mo lobokis lara lavanga lukluxa mo gak lok, diga lox i mi logol, la keneng teren diga lok li levengkoluxa ap mo leveluxa limixin me Israel diga anan i ro at lamatbin. Diga so asen i mi lamaana. Lakdak bok at ne Aron no ga suudun, gak lok go xeneng eburu mi legepuxon uat no ne Moroa ga malagan li lasangaun Levenaulis Linga ren.\fig Lobokis kaala no xeneng at loxot i xaala aleng.|alt="Ark" src="ark2b&w.tif" size="col" loc="Heb 9:3-5" copy="Melody Carlson" ref="Ib 9:4-5" \fig*  
\v 5 \x * \xo 9:5 \xt Pas 25:18-22\x*To mavana at na lobokis luvanga raptava (cherubim) at ne Moroa mo dugak lox asuusu lisisixam silok boro vana at laxalibet. Duga tu puvung mo loxot, ua lavamaasa diga sep susu i mi lada at levempanga mi lavanuet kangkedek atdi xusu ne Moroa na doxoma xepe laxakapmek at limixin. Ketla monga nia xopmen na epovo kusu ana re axap na levempanga.   
\p
\v 6 \x * \xo 9:6 \xt Kex 18:2-6\x*Melemu at na, do digara lox agagas li vam na loogu kadis, lavamaasa diga ruka ba i kusu dina lok leven gugu atdi. Diga pubeles uto xeneng mun at lenep gu avot at levenaleng axap ti lok lugugu atdi ngan lavamaasa.  
\v 7 \x * \xo 9:7 \xt Pas 16:2-34\x*Ketla lamaasa gomgo xusuk mun neni ga pubeles ti mo loxonnep gu maxeneng tino, mo loxot ga xaala aleng tinotno. Neni ga vubeles go at leges aleng mun keneng at legesa maares. Neni goxo pubeles gamasa, ni ga ba pubeles axa eburu mi lada at levempanga mi lavanuet kangkedek. La neni ga lok letaba mi mo lada ti laxakapmek teren la laxakapmek bok at limixin do digara soogong pam, ketla di goxoklen i do mo levempanga ga lok kapmek.  
\v 8 \x * \xo 9:8 \xt Ib 10:19\x*Loroonan Kaala i lox ase dik, mumu na lavanga do langas povolo uto saparap ne Moroa goxovisi na rem suang, ap mo levenaleng loogu kadis move ga tu.   
\p
\v 9 \x * \xo 9:9 \xt Ib 10:1-2\x*Anaa lavanga ni lampoovo mun ti na levenaleng ti lox asuusu i do leventamtaba la levelaplavang diga etaba min kopmen goxo epovo na lok kepe loklok mamangan at laxakapmek atnedi diga etaba mi mo levempanga.  
\v 10 \x * \xo 9:10 \xt Mas 11:2,25; 15:18; Kex 19:11-13\x*Mo leveloklok ti laanan la liinin la leventaangas ti sogos panga, mo leventaangas ga nemen mun kusu mo limixin dina mumu asu i se at laaleng lekabus maxat ga vot.   
\s1 Lada At Ne Karisito  
\p
\v 11 \x * \xo 9:11 \xt Ib 3:1; 10:1\x*Ketla ne Karisito ga vot ngan Lamaasa Avolo xusu na lox agagas leveloklox anarong at lekabus maxat, ne Moroa im taba limixin teren min. Neni xopmen goxo vubeles at loogu kadis mede xopok. Ketla neni ga vubeles uto xeneng at loxot i xaala aleng la i lox avukat aleng no vana at laxalibet. Mo loxot limixin kopmen di goxo lox i mi levengkikngen di. Lavasuun at na do mo loxot kopmen nak lok de at na lavatbung menemen la ixo epovo nedik ataba ven i mi levengkatli atdik.  
\v 12 Karisito xopmen goxo lok kaka lada at lubulumaxao la at lavatme la ga vubeles min. Ketla neni ga vubeles mi lada axa ren ti mo loxot ga xaala aleng no vana at laxalibet, la ga lok letaba min at legesa xonaleng mun. Ga lox i xuren kusu na un avolo dik mi lada ren la dik atanaba ruuna ka lorooro avolo.   
\p
\v 13 \x * \xo 9:13 \xt Mas 16:3,14-16; Ib 10:4; Kex 19:9,17-19\x*Lada at laxanme la laxanbulumaxao la laxakup at lanatpalak bulumaxao diga kotos i, lamaasa gomgo ga sep susu limixin min, nedi nom diga lok laxakapmek kusu dina dadat to maxamang mun.  
\v 14 \x * \xo 9:14 \xt 1 Pi 1:18-19; 1 Jo 1:7; Ib 6:1\x*Ketla na loklok at lekabus migomgo kopmen na epovo mi mo loklok ne Karisito ga lox i. At loklok tooro at Loroonan at ne Moroa Iesu ga raba xa i ri ne Moroa ngan laplavang avolo, goxopmen taxakapmek teren, kusu na lox adadat dik basinge laxakapmek mo naba lox asuusu lanmet. Kerepmo i epovo do ata mu asu lavavara at ne Moroa, Luntoo Avolo.   
\p
\v 15 \x * \xo 9:15 \xt 1 Ti 2:5; Ib 8:6\x*Kuren la Karisito, neni laradi ga lok lumulum kantubu at limixin mi ne Moroa, la at na langas neni ga lok lekabus maxat. La nedi ne Moroa gara soxolik ka vam di, dinaba ruuna ka leveloklox anarong neni ga vaase ali min tidik, la mo leveloklox anarong naba nemen amisik. Karisito ga met ngan laxaavuk kusu na lox asepmus limixin teren basinge laxakapmek diga lox i ap mo levenaleng diga mumu lekabus migomgo.   
\p
\v 16-17 Do temen lara i auret na met, neni i epes laxamdak teren mi levempanga ren. Ketla nedi noxo ruuna ka soso mo levempanga do neni move i rooro. Se do ne temendi na met, i epovo ba do mo laxamdak dina ruuna ka mo levempanga at ne temen di.  
\v 18 Ni lavasuun teren la lada at lavanga mi lavanuet kangkedek do ga met pam, ga lox amuat lekabus migomgo.  
\v 19 \x * \xo 9:19 \xt Pas 24:3,6-8; Mas 14:4,6\x*Ne Moses ga tong asu vam levenngas linga at Laulis Linga ri limixin axap, neni ga lok ka lada at levempatnat bulumaxao, la ga lok eburu i mi ladan. La neni ga lok lavanga sep susu mi lavatkabinim sipsip diga lox amemele i la mi levengkakan una at luuna isop. Neni ga lok ka lada min la gap sep susu lugun linga at Laulis Linga la limixin bok.  
\v 20 \x * \xo 9:20 \xt Pas 24:8\x*Moses ga lok keretna, “Na lada neni loklok katling at lekabus no ne Moroa ga tong i do ata mumu asu i.”  
\v 21 \x * \xo 9:21 \xt Mas 8:15,19\x*La at nom langas neni ga sep susu loogu kadis la levempanga axap diga lok mo lugugu at ne Moroa min.  
\v 22 \x * \xo 9:22 \xt Mas 17:11; Ep 1:7\x*I ruturun aleng do levempanga axap diga lok mo lugugu min, diga lox amaxat di mi lada xerekngan Laulis Linga i tong i. La do lada noxo sen, Moroa noxo doxoma xepe laxakapmek at limixin.   
\p
\v 23 \x * \xo 9:23 \xt Ib 8:5; 10:1\x*Kuren la ga epovo do limixin dina lox adadat mo levempanga at loogu kadis mi lada at levempanga digaplavang min. Ketla mo levempanga at loogu kadis ni lampoovo mun ap mo levempanga no vana at laxalibet. Ketla mo levempanga ruturun no vana at laxalibet gak pakes ti lada at ne Karisito. La mo lada ren i lolos aleng ti lada at lavat bulumaxao, la mo lada ren ik lox agagas li mo loxot tidik.  
\v 24 \x * \xo 9:24 \xt 1 Jo 2:1\x*Karisito goxo lok lugugu ren to xeneng at loxot kaala limixin diga lox i. Mo loxot ni lampoovo mun ap mo loxot tuturun no vana at laxalibet. Ketla neni ga vubeles to vana at laxalibet kusu na tu ro at lemeren ne Moroa la na ngising i ri lok tooro dik.  
\v 25 Neni ga vubeles uto vana at laxalibet, kopmen tim taba amisik lorooro ren ngan lamaasa gomgo ga pubeles amisik mi lada uto xeneng at loxot i xaala aleng at levenmaares axap, ketla mo lada xopmen lada axa ren.  
\v 26 Do ne Karisito gita mumu mo loklok, neni gitaba suma amisik losongsongot, ga ruka i at lavakpaxaru kaxat at na lavatbung menemen. Ketla at na levenaleng kavaxap, ne Karisito ga vot gesara mun kusu na raba lorooro ren ngan laplavang ti lok kepe laxakapmek la ti lox arooro dik basinge lolos at laxakapmek.   
\p
\v 27 \x * \xo 9:27 \xt Pl 3:20; Ib 10:10; 1 Pi 2:24\x*Limixin axap dinaba met la melemu at na, Moroa naba lok li di at lavapaase.  
\v 28 La kerepmo ne Karisito ga met gesara mun ngan laplavang kusu na lox adadat buaang limixin basinge laxakapmek atdi. La neni nabamlong bok sev agepura, kopmen ti met nop bok ba loklok atdik. Ketla, neni naba lox arooro rino nedi dit kis tangais i.   
\c 10  
\s1 Karisito Ga Raba Lorooro Ren  
\p
\v 1 \x * \xo 10:1 \xt Ib 8:5\x*Laulis Linga at leme Judaia ni lampoovo mun ti mo leveloklox anarong at ne Moroa mo naba vot. Laulis Linga ni xopmen mo leveloklox anarong. Kuren la mo leveloklok tiplavang diga lox amisix i at levenmaares axap, goxo epovo rinotno xusu na lox adadat nedi diga vot pasa ne Moroa kusu dina lotu saparav i.  
\v 2 Do gita epovo na lox adadat di, na loklok tiplavang to gita xap pam. Mila mo langas i epovo giba lox adadat tinotno limixin, la kerepmo di gitoxo epovo na suma lainmangan bok ba mumu laxakapmek atdi.  
\v 3 Ketla mo levelaplavang ga lox adoxoma mun limixin mi laxakapmek atdi la kerepmo digam suma lainmangan.  
\v 4 \x * \xo 10:4 \xt Ib 9:13\x*Mila ixo epovo do lada at laxanbulumaxao la laxanme na lox amaxat limixin basinge leveloklok kakapmek atdi.   
\p
\v 5 Kuren la ap mo loxonaleng ne Karisito ga lok do na si ude at lavatbung menemen, neni ga lok ti ne Moroa xeretna,  
\q1 “Nenu u xovara solo ri levelaplavang la leventamtaba, ketla ugam doma gagas kusu una riki asi ia la anaba vee radi ngan limixin kusu anaba raba u minia ngan laplavang.  
\v 6 Nenu uxo ngising ti levempanga mi lavanuet kangkedek kusu limixin dina kotos asonao i ro vana at loxonin laplavang, kopla ri levelaplavang ti ves kepe laxakapmek.  
\v 7 Kuren la aga lok tu keretna, ‘Moroa rak. Nenia nga na. Levelinga mumu ia i nemen keneng at Laulis Linga. O Moroa, nia a vot pam kusu ana gugu mu asu mun lavavara ram.’” \rq Sam 40:6-8\rq*   
\m
\v 8 Avot be ne Iesu ga lok keretna, “Nenu u xovara solo ri levelaplavang la leventamtaba, la levempanga mi lavanuet kangkedek kusu mana kotos asonao i ro vana at loxonin laplavang, kopla ri levelaplavang ti ves kepe laxakapmek. La u goxo lok momo mi na loklok.” Keke i do Laulis Linga at ne Moses ga tong i do limixin dina mu asu mo loklok.  
\v 9 La neni ga lok bok, “Nenia nga na. Nia a vot pam kusu ana gugu mu asu mun lavavara ram.”  
\p Kerepmo la ne Moroa ga lok kepe mo leveloklok tiplavang megano la ga lox ekun i mi mo laplavang i sev agepura, ne Karisito xa ga lox i mi lada ren.  
\v 10 \x * \xo 10:10 \xt Ib 9:12,28\x*Ne Karisito ga mu asu lavavara at ne Moroa, la neni ga raba lorooro ren ngan laplavang at legesa xonaleng mun kusu na lox adadat limixin basinge laxakapmek atdi.   
\p
\v 11 \x * \xo 10:11 \xt Pas 29:38\x*At levenaleng axap lavamaasa diga tu ro xeneng at loogu kadis la digak lok lugugu at lotu. At levenaleng axap diga etaba mi leges asen panga laplavang mun. Mo levempanga goxopmen tinotno na epovo xusu ti lox adadat limixin basinge laxakapmek atdi.  
\v 12 Ketla Lamaasa Avolo ga etaba mi legesa laplavang mun ti laxakapmek, u ningina la amisik bok. La melemu neni ga xis to saparap lekngen tino at ne Moroa.  
\v 13 \x * \xo 10:13 \xt Ib 1:3; Sam 110:1\x*Ga ruka i ap mo laaleng neni ga ngangais ne Moroa na lok li limixin munepen min na ngan loxot burubut ti luxangkedek teren.  
\v 14 Karisito ga raba lorooro ren ngan laplavang. Kuren la ni ga lok langas kusu limixin dina dadat amisik la nanga ne Moroa ik lok kepe laxakapmek at limixin di nunu ren.   
\p
\v 15 Loroonan Kaala bok i tong asuusu i na. I lok keretna,   
\q1
\v 16 \x * \xo 10:16 \xt Ib 8:10\x*“Melemu nia anaba lok lekabus maxat mi limixin tarak. Anaba buradong levelinga rak keneng at lebelen di la nia anaba lox adoxoma di mi levelinga rak.” \rq Jer 31:33\rq*   
\m
\v 17 \x * \xo 10:17 \xt Ib 8:12\x*La i lok bok,  
\q1 “Nia a noxo domangke rinotno bok ba at laxakapmek atdi.” \rq Jer 31:34\rq*   
\m
\v 18 La do ne Moroa ira doxoma xepe vam laxakapmek at limixin, kopmen dinak pakes bok ba ri lok laplavang kusu ti lok kepe laxakapmek.   
\s1 Langas Maxat  //  Tim Taba Lorooro  
\p
\v 19 \x * \xo 10:19 \xt Ib 4:16\x*Luvutnetak mi luvurinuk. I epovo do ata vot pasa ne Moroa ap mo loxot i xaala aleng, mila ne Iesu gara suang pam mo langas mi lada ren.  
\v 20 \x * \xo 10:20 \xt Mt 27:51; Ib 9:8\x*Mo langas neni langas maxat im taba lorooro, Iesu ga suang pam i ridik ap mo laaleng neni ga raba labantuxu ren kusu na uu at laxaba. Lavattamon silok to xeneng at loogu kadis ga ru katling labantuxu at ne Iesu la mo lavattamon ga rem lais tubu, i ngan ta do ga suang mo langas tidik.  
\v 21 La nedik ta ruuna Lamaasa Avolo, neni Lamgomgo ri limixin at ne Moroa.  
\v 22 \x * \xo 10:22 \xt Mas 8:30; Isi 36:25; Ep 5:26\x*Kuren la mina vot pasa ne Moroa do lebelen nimi iran manton pam la lununu atnimi irat matkun pam la lebelen nimi xopmen tusumsuma xapmek teren mila ne Moroa ga lox adadat pam nimi kerekngan di gos labantuxu atdik mi ladan i nunuan.   
\p
\v 23 \x * \xo 10:23 \xt Ib 4:14\x*Minam tebeng lolos lununu atnimi ri mo leveloklox anarong mo naba vot mila ne Moroa naba lox asoorun levempapaase ali ren.  
\v 24 La mina doxoma ka teventaangas kusu mina lox axatu lebelen nimi ri elok tooro ela la lorooro atnimi na umsu mi labalamu la leveloklok i nunuan.  
\v 25 \x * \xo 10:25 \xt Ib 3:13\x*Nemen mita ke xepe mo leveloklok tit pot buru ri lotu, kerekngan leventaba atnimi dira ke xepe vam i. Ketla nemi xa mina epang aru xusu lununu atnimi naba lolos. La mina lox amisix i na, mila laaleng ete i auret na vot.   
\p
\v 26 \x * \xo 10:26 \xt Ib 6:4-8\x*Do tara atnimi ga siam ka vam luruturun at Lagale Lavavang, ketla iramlong ti laxakapmek, i lok ngan ta do i raba rulu ne Moroa la kopmen tavanga laplavang bok ba kusu ba lox arooro i.  
\v 27 \x * \xo 10:27 \xt Ais 26:11\x*Ketla neni naba suma mun lanmarat silok at lebelemamao at ne Moroa at laaleng ete mila laxao bokbolot mo naba anan limixin di munepen mi ne Moroa.  
\v 28 \x * \xo 10:28 \xt Lal 17:6; 19:15\x*Do tara ga los polo Laulis Linga at ne Moses, la do tegepu radi xopla tavantun tuvuttadi diga venemet mo laradi ga lok laxapmek, neni gaba met etaba mun.  
\v 29 \x * \xo 10:29 \xt Pas 24:8; Ib 13:20\x*Kerepmo la do tara na sok kepe lununu ren at ne Iesu, i lok ngan ta dola i vas axangka ne Nitna ne Moroa, la neni i lok lada at ne Iesu ngan ta lavanga gamasa. Mo lada at lekabus maxat ga sen kusu na lok kepe laxakapmek teren. La ira vaase vupu vam ti Loroonan Kaala, mo i lox asuusu letaba nabalamu at ne Moroa ridik. Do tara na lok na leveloklok kakapmek, neni naba lok ka loklox asongot silok.  
\v 30 \x * \xo 10:30 \xt Ro 12:19; Sam 135:14\x*Ataklen i do ne Moroa xa ga lok keretna,  
\q1 “Nenia xa anaba sepo laxakapmek at limixin.” \rq Lal 32:35\rq*  
\m La ga lok bok,  
\q1 “Moroa naba vaxaru limixin teren at lavapaase, mo do dina soogong basinge levelinga ren.” \rq Lal 32:36\rq*   
\m
\v 31 Naba lok kapmek aleng do tara na ekip tangarang mi lebelemamao at ne Moroa, Luntoo Avolo.   
\p
\v 32 Mina doma amlong ti mo levenaleng miga lok ka avot lununu. Ap mo levenaleng miga ekip tangarang mi levenmumuat la leveloklox asongot mumu lununu atnimi. Ketla miga tu atmatkun la mi goxo subu.  
\v 33 \x * \xo 10:33 \xt 1 Ko 4:9\x*At lentaba levenaleng diga sok taba nimi mi laxalinga xapmek la diga lox asongot nimi ro melamgo at limixin axap. At leventaba levenaleng bok miga ru eburu mi nedi diga xip mo levesongsongot.  
\v 34 \x * \xo 10:34 \xt Mt 6:20; 19:21,29\x*Miga balamu nedi digak lok at loogu xokoxo la miga lok momo mene nga do limixin diga sak paxat ka levempanga atnimi mila migaklen i do nemi xa minaba ruuna ka lapnovos i lox avukat aleng no vana at laxalibet, mo lapnovos naba nemen amisik.   
\p
\v 35 Kuren la nemen mita soxope lununu atnimi. Do minam tebeng lolos teren, Moroa naba raba nimi mi leveloklox anarong i nunuan aleng.  
\v 36 \x * \xo 10:36 \xt Lu 21:19; Ib 6:12\x*Do mina suma levenmumuat at lorooro atnimi, mina tu atmatkun at lununu atnimi xusu minaba ruuna ka mo leveloklox anarong ne Moroa ga vaase ali min tidik, mo do mina mu asu lavavara ren.  
\v 37 Kopmen noxo lox abao la Lanarong nabamlong kerekngan ne Moroa ga tong i xeretna,  
\q1 “Mo laradi diga tong i do naba vot, neni naba vot tuturun, neni noxok lok sila.  
\v 38 \x * \xo 10:38 \xt Ro 1:17; Ga 3:11\x*Ket do nege laradi do luruptuvuk teren in manton tino, neni naba ruuna ka lorooro avolo, mo do neni nat pas eburu mi lununu. La do neni na raba rulu ia, labalak noxo lox avukat tin.” \rq Abk 2:3,4\rq*   
\m
\v 39 Ketla nedik kopmen na lok ngan nedi di raba rulu ne Moroa la dira seeve. Ketla nedik ta lok ngan nedi di nunu at ne Moroa la dira ruuna ka vam lorooro avolo.   
\c 11  
\s1 Limixin Diga Nunu At Ne Moroa  
\p
\v 1 \x * \xo 11:1 \xt Ro 4:18; 2 Ko 5:7\x*Lununu neni loklok tim doma ngangais ti leveloklox anarong ne Moroa naba raba limixin teren min. La lununu ik lox aklen dik ti mo levempanga nedik kopmen ta reven tu ren.  
\v 2 Kerepmo la ne Moroa ga emi asu minedi lavalabat atdik gano, mila diga ruuna lununu.   
\p
\v 3 \x * \xo 11:3 \xt Lur 1:1; Sam 33:6; 2 Pi 3:5\x*Nedik ta ruuna lununu, kuren la ataklen i do ne Moroa ga rudum li levempanga axap mi levelinga ren, la ataklen i do levempanga nedik di ven i mi levengkatli atdik ga ravasu at levempanga nedik goxo ven i.   
\p
\v 4 \x * \xo 11:4 \xt Lur 4:3-10\x*Abel ga ruuna lununu, kuren la neni ga raba ne Moroa mi laplavang ga lox avukat ti laramtaba at ne Kaen. Abel ga ruuna lununu, kuren la ne Moroa ga emi asu min la ga raba i mi laasen do laradi manmanton, ap mo laaleng ne Moroa ga siam ka leventamtaba ren. Lununu ren move i ngan lampoovo ridik kusu ata mumu asu i, keke i do neni ga met pam.   
\p
\v 5 \x * \xo 11:5 \xt Lur 5:24\x*Enok ga ruuna lununu, kuren la neni goxo met, ketla ne Moroa ga lok ka i uto vana at laxalibet. Limixin diga puse rin la di goxo vuse ka i, mila ne Moroa ga lam ka vam i uto vana. Avot at na, Moroa ga emi asu min, mila loklok teren ga lox amomo i.  
\v 6 La mo do tara xopmen tununu ren, ixo epovo ni na lox amomo ne Moroa, mila do tara i vara na vot pasa ne Moroa, neni na nunu do ne Moroa mo i rooro la neni i epovo naba lox anarong nedi lebelen di i ngaongao xusu dinaklen ne Moroa.   
\p
\v 7 \x * \xo 11:7 \xt Lur 6:13-22; 7:1; 1 Pi 3:20; Ro 3:22; 4:13\x*Noa ga ruuna lununu, kuren la at laaleng ne Moroa ga tong i rin do laraan naba vot, ni ga ronga res la ga lok lavatmon silok kusu na lox arooro nedi loxoetemen. Neni ga ruuna lununu la kerepmo ga lox asuusu i do loklok at limixin ap mo levenaleng ga lok kapmek. La neni ga ravasu ngan laradi manmanton at lemeren ne Moroa mila neni ga ruuna lununu saparap ne Moroa.   
\p
\v 8 \x * \xo 11:8 \xt Lur 12:1-5; Gu 7:2-4\x*Abaram ga ruuna lununu. Kuren la at lara laaleng ne Moroa ga tong i rin do na on basinge lemenemen teren kusu nat pas ti lara lemenemen to vaxalom. Moroa ga vaase ali rin do neni naba raba i min melemu ngan lemenemen tino rin. La ne Abaram ga ronga res teren la ga vas kaxat, neni goxoklen i do mo lemenemen gak lok ua.  
\v 9 \x * \xo 11:9 \xt Lur 26:3; 35:12,17\x*Neni ga ruuna lununu la ga lox araut lemenemen tin ap mo loxot ne Moroa ga vaase ali min tin. Ketla ap mo lenep neni ga nemen ngan laradi xadiong, gak lok mun at loogu kadis. La melemu ne Aisak, nitna ne Abaram, la ne Jakop, tubuno ne Abaram dugak lok bok at laraogu kadis. Nedu bok duga ruuna mo lavapaase ali boro at ne Moroa ngan ne Abaram.  
\v 10 Neni ga ronga res mila neni gam doma ngangais ti mo lemenemen silok, bak lox amisik la ne Moroa ga lox agagas mo lemenemen silok ti limixin teren.   
\p
\v 11 \x * \xo 11:11 \xt Lur 18:11-14; 21:2\x*Abaram ga ruuna lununu, keke i do gara sioxo vam, la latkin bok teren ne Sera goxo epovo do na visik, ketla nedu duga visik lara lamdak. Kuren la ne Abaram ga ravasu ngan ne temen mo lamdak, mila ne Abaram ga nunu do ne Moroa naba lox asoorun lavapaase ali ren.  
\v 12 \x * \xo 11:12 \xt Ro 4:19; Lur 15:5; 22:17; Lal 10:22\x*La ne Abaram, neni lasioxo rinotno nga, ketla ga buaang aleng livipisik li ren, ga umsu aleng ngan laxampenti mede vana la laxangkaneng to loxon, nedik taxo epovo ri exes di, na livipisik li ga ravasu at na legesa radi mun.   
\p
\v 13 \x * \xo 11:13 \xt Lur 23:4; 1 Let 29:15; Sam 39:12; 1 Pi 2:11\x*Nedi axap luvuttadi diga ruuna lununu at lorooro axap atdi se at loxonaleng diga met. Nedi goxo ruuna ka mo levempanga ne Moroa ga vaase ali min tidi. Ketla diga ven avaxalom ka mo levempanga la diga momo ka i, keke i do di goxovisi na ruuna ka i. La diga siam ka mun lorooro alua at na lavatbung menemen.  
\v 14 Limixin di paase xerepmo, i lox asuusu i do temenemen aulis gove di puse rin.  
\v 15 Do nedi gove gitam doma amlong ti mo lemenemen no nedi diga on basinge i, nedi ro gitamlong pam ti mo lemenemen atdi.  
\v 16 \x * \xo 11:16 \xt Pas 3:6,15; Mk 12:26\x*Ketla lodoxoma atdi move ga vara ri temenemen avukat tinotno, mo lemenemen ik lok to vana at laxalibet. Kuren la ne Moroa i lok momo xusu dina soxor i do ne Moroa atdi mila neni ga lox agagas lemenemen tidi.   
\p
\v 17 \x * \xo 11:17 \xt Lur 21:12; 22:1-14; Ro 9:7; Je 2:21-22\x*Abaram ga ruuna lununu, kuren la ap mo laaleng ne Moroa ga lok tong pen i, neni ga ronga res la ga raba ne Aisak ngan laplavang. Abaram neni mo laradi ne Moroa ga vaase ali rin do livipisik li ren naba umsu aleng. Ketla melemu manga ni ga gagas kusu naplavang mi mo legesa nitna.  
\v 18 Ne Moroa gara tong pam i rin do, “Aisak neni laradi naba lox asilok livisik li ram.”  
\v 19 \x * \xo 11:19 \xt Ro 4:17\x*Abaram gaklen i do ne Moroa i epovo na lox arooro luvuttadi met. Ketla ne Moroa ga sep pepe i la ni goxo sev amet ne Aisak. I lok ngan ta do ne Moroa ga lox arooro ne Aisak basinge lanmet.   
\p
\v 20 \x * \xo 11:20 \xt Lur 27:27-29,39-40\x*Aisak ga ruuna lununu, kuren la neni ga lox anarong ne Jakop mi ne Esao mi levelinga mumuat mumu mo levempanga naba ravasu at lorooro atdu la at livipisik li bok atdu melemu at levenaleng at lanmet teren.   
\p
\v 21 \x * \xo 11:21 \xt Lur 48:15-16\x*Jakop ga ruuna lununu, kuren la neni ga lox anarong lumdak at ne Josep la ga lotu saparap ne Moroa, ap mo loxonaleng neni ga sox auru i mi lakdak teren, mila neni gara sioxo vam la ga auret levenaleng kusu neni na met.   
\p
\v 22 \x * \xo 11:22 \xt Lur 50:24-25; Pas 13:19\x*Josep ga ruuna lununu, kuren la ga auret ti lanmet teren, neni ga vaase ali do at tara taaleng limixin me Israel dinaba vas kaxat basinge lemenemen Isip. Neni ga vaase ali bok at limixin teren kusu dinaba xip ka levesi ren do dina vas kaxat uto Kanan.   
\p
\v 23 \x * \xo 11:23 \xt Pas 1:22; 2:2\x*Temen ne Moses mi nenen duga ruuna lununu, kuren la duga lipe ne Moses at lavantun gaaling melemu at livipisik teren. Mila duga ven i do mo lamdak goxopmen lamdak gamasa, ketla lamdak ga lok petpes tino. La du goxo marat at lavapaase lolos at loorong, ga tong i do dina sev amet axap levengkadede remes at limixin me Israel do dina visik asu di.   
\p
\v 24 \x * \xo 11:24 \xt Pas 2:10-12\x*Moses ga ruuna lununu, kuren la neni ga silok, la ni ga xopara i xusu limixin dina soxor i do lamdak at loolik at ne Parao.  
\v 25 Ketla neni ga vara i xusu na xip laxasongsongot eburu mi limixin at ne Moroa la neni ga xopara i xusu na lox amomo lorooro ren mi laxakapmek, mo naba xap asonao mun.  
\v 26 \x * \xo 11:26 \xt Ib 10:34-35\x*Moses ga doma i do ik mokso do neni na lok ka lainmangan eburu mi limixin teren at lugugu at Lanarong. Mo lainmangan ga lox avukat aleng ti lapnovos boro Isip, mila neni ga reven ti mo luunun move ne Moroa naba raba i min.   
\p
\v 27 \x * \xo 11:27 \xt Pas 12:51; 14:13,14; Ro 1:20; 1 Ti 1:17; Ib 11:1\x*Neni ga ruuna lununu, kuren la neni ga vas kaxat basinge lemenemen Isip la goxo marat at lumukmusak at loorong me go. Ketla neni ga tu atmatkun at lununu ren, mila neni ga ven kibis ne Moroa, mo limixin di goxo epovo na ven i.  
\v 28 \x * \xo 11:28 \xt Pas 12:21-30\x*Moses ga ruuna lununu, kuren la neni ga tong i ri limixin me Israel kusu dina sep ka tevempatnat sipsip la dina saba li lada ap mo laxasipsip to at laramusmaragu at laraogu atdi. Na loklok ga lok kaxat mo leluxa diga soxor i do Lovovolo Pe. Diga lox i na xusu mo laangelo sepsep noxo sev amet lavaanat meren at limixin me Israel. Ketla Moroa ga riki i do na sev amet lavaanat meren at limixin me Isip.   
\p
\v 29 \x * \xo 11:29 \xt Pas 14:21-31\x*Limixin me Israel diga ruuna lununu, kuren la diga vas korop Laras Memele, digat pas mun at laxangka mesemes. Ketla at loxonaleng limixin esep boro Isip diga lok tong pen i xusu dina vas polo, laras gak mit di la diga xong axap.   
\p
\v 30 \x * \xo 11:30 \xt Jos 6:12-21\x*Limixin me Israel diga ruuna lununu, kuren la lara langas uat lolos mo ga tu xangkan lemenemen silok Jeriko ga rebubuxup si ukopok. Mo lavanga ga vot melemu at lavanuti aleng limixin me Israel digat pas kangkan mo lemenemen.   
\p
\v 31 \x * \xo 11:31 \xt Jos 2:1-21; 6:21-25; Je 2:25\x*Raap, latkin ngarangat ga ruuna lununu, kuren la neni goxo uu eburu minedi limixin boro Jeriko diga ronga viribang. Mila neni ga lok tooro luradi esep at leme Israel mo dugakling lemenemen at laaleng ne Josua ga riki du xusu dunakling mo lemenemen Jeriko.   
\p
\v 32 Aba tong ka bok ba lavanga salai? Nia xopmen ana epovo xusu ana vaase bok ba mila loxonaleng kopmen na epovo kusu aba tong asu axap lorooro atnedi loxongkulao nunu kerekngan ne Gidion, Barak, Samison, Jepita, Devit, Samuel, la leventaba vetpes bok eburu mi lavaeme vapaase ali.  
\v 33 \x * \xo 11:33 \xt Dan 6:22\x*Diga ruuna lununu, kuren la leventaba atdi diga sep kepe levenabung mixin, leventaba atdi diga lok tatao limixin atdi mi loklok manmanton, la kerepmo ne Moroa ga lok tooro di xerekngan neni ga vaase ali min tidi. La leventaba atdi, lavamolon diga lu arup midi uto at laramet laion la lubunglaion di goxo epovo na anan di, mila ne Moroa ga vamngus lubunglaion.  
\v 34 \x * \xo 11:34 \xt Dan 3:23-27\x*Leventaba atdi lavamolon diga lu arup midi uto xeneng at laxao ketla laxao goxo epovo na rin di. Leventaba atdi diga ves avolo levemparise sepsep at limixin esep. La leventaba atdi levengkot atdi ga molo ketla ne Moroa ga lox alolos di. La leventaba diga ravasu ngan luvuttadi lolos tino, kuren la diga xala xepe limixin esep boro at levengkot petpes.  
\v 35 \x * \xo 11:35 \xt 1 Lav 17:17-24; 2 Lav 4:18-37\x*Leventaba lavakin diga ruuna lununu kuren la leventaba atnedi digara met pam, ketla ne Moroa ga lox arooro amlong bok di.  
\p Leventaba atnedi luvuttadi nunu, diga lok ka losongsongot kapmek tinotno. Lavamolon diga lok mo leveloklok ti lok kepe lununu atdi, ketla diga tu atmatkun la diga siam ka mo laxanmumuat. Mila diga nunu do melemu dinaba lok ka lorooro avolo.  
\v 36 \x * \xo 11:36 \xt 1 Lav 22:24-27; Jer 20:2; 37:15; 38:6\x*Lavamolon diga lok kalise xapmek leventaba atdi la digak pixis kapmek tino di, la diga koxo alis leventaba bok la diga lox abeles di at laraogu xokoxo.  
\v 37 \x * \xo 11:37 \xt 2 Let 24:21\x*Diga lu amet leventaba atdi mi laxanuat, la diga soo xorop avu leventaba atdi mi lempasoo, la diga sev amet leventaba atdi mi lemparise.  
\p Leventaba atdi luvuttadi nunu diga siga mun levenbantuxu sipsip la levenbantuxu me. Mila kopmen tevempanga singsiga avukat atdi la di goxo ruuna tevempanga at lorooro atdi. Diga xip laxasongsongot la lavamolon diga lok kapmek tinotno di.  
\v 38 Lavamolon diga doma i do mo limixin nunu diga lok kapmek aleng. Ketla at lemeren ne Moroa nedi limixin manmanton, la ixo epovo do dina nemen at na lavatbung menemen. Digat pas tangtagap to at lamatbin la to at levempatkaana la diga nemen to xeneng at laxantabuang la at laramamara ro xeneng at laxangka, mila goxopmen taramenemen atdi.   
\p
\v 39 Diga ruuna lununu, kuren la ne Moroa ga emi asu midi. Ketla tara atdi goxo lok ka mo leveloklox anarong at lekabus maxat ap mo levenaleng diga rooro ren. Mo leveloklox anarong ne Moroa ga vaase ali min ti limixin teren.  
\v 40 Moroa ga lox agagas lekabus maxat kusu neni na lox adadat dik. La kerepmo bok neni ga lox adadat nedik eburu minedi na limixin digap kip laxasongsongot.   
\c 12  
\s1 Moroa Ik Lox Aleeng Limixin Teren  
\p
\v 1 \x * \xo 12:1 \xt Ro 7:21; 1 Ko 9:24-25\x*Buaang nedi lavalabat atdik no vana at laxalibet mo di reven dik ngan laneelen di reven lekampoovo. Kuren la mina ke xepe levempanga axap mo ik lox angtang lununu atnimi la mina ke xepe bok laxakapmek mo nemi mik sak kikixin teren. La minak sixit eburu mi lolos ap mo lekampoovo ne Moroa ga lox agagas i rinimi.  
\v 2 \x * \xo 12:2 \xt Ib 1:3\x*Lodoxoma atnimi na tu atkatla at ne Iesu, neni lavasuun la lurutu kaxat at lununu atdik. Neni ga siam ka laxasongsongot la lainmangan at laxaba mila ni ga doma mun mo lomomo neni naba ruuna ka i. La nanga neni it kis at lenep tino at loxonin orong at ne Moroa.  
\v 3 Mina doma mumu mo laxasongsongot limixin kakapmek diga lox i rin. At na loklok neni lampoovo rinimi, xusu nemi mi noxo molo la mina noxo doma abulubun.   
\p
\v 4 At na levenaleng mira raba rulu vam laxakapmek la mira tu atmatkun, ketla limixin kakapmek kovisi dina sev amet teventaba atnimi.  
\v 5 Nemen gat mita domampe mo levelinga loklox alolos, i ngan laradi i anasa ne nitna min. Mo levelinga i lok keretna,  
\q1 “Nuruk, nemen gat uta doxoma abulubun do ne Moroa, Leeme Silok na lox aleeng u do u lok laxapmek. La nemen gat uta bulu ap mo loklok,  
\v 6 \x * \xo 12:6 \xt Li 3:19\x*mila Leeme Silok ik lox aleeng nedi, neni i vavara aleng di. La do neni na lox asongot nimi, anaa i lox asuusu i do nemi mi lok ngan laxamdak tinotno ren.” \rq Ler 3:11-12\rq*   
\p
\v 7 \x * \xo 12:7 \xt Lal 8:5; 2 Sml 7:14\x*Mina tu atmatkun tip kip levesongsongot mi lomomo mila ne Moroa i ke xepe mo levenmumuat kusu na vot saparap nimi ri lox aleeng nimi. I lok ngan bok nade xopok at na lavatbung menemen, luvuttemen laxamdak di lox aleeng laxamdak atdi, do di lok tavanga i lok kapmek.  
\v 8 Limixin axap di lok leveloklox aleeng. Do ne Moroa ixo lox aleeng nimi, anaa i lox asuusu i do nemi xopmen laxamdak tuturun teren, ketla nemi mi lok ngan mun laxamdak mexalanga.  
\v 9 Lara lavanga bok, nedik axap di ruuna luvuttemen dik, mo diga lox aleeng dik la nedik ga lok ngangao atdi mumu mo loklok. Kuren la i lox avukat aleng do mina siam ka mo leveloklok at ne Moroa, ne Temen nimi. Neni ga rudum li dik la leventoonan atdik la kerepmo atanaba ruuna ka lorooro avolo.   
\p
\v 10 Luvuttemen dik diga lox aleeng dik at leventaba levenmaares mun mumu lodoxoma atdi. Ketla ne Moroa i lox aleeng dik kusu ataba vee radi avukat la ataba lok ka mo loklok teren in manton tino.  
\v 11 \x * \xo 12:11 \xt Je 3:17-18\x*Na leveloklok kopmen na lox amomo dik ketla i lox asongot dik. Melemu at na leveloklok, lorooro atnimi naba lox asuusu loklok manmanton la lenmila do mina siam ka mo loklox aleeng.   
\p
\v 12 \x * \xo 12:12 \xt Ais 35:3\x*Kuren la mina raba axap levendoxoma atnimi xusu mina mumu lavavara at ne Moroa. La minaba lok ka levempanga neni ga vaase ali vam min tinimi, kerekngan laradi i lox alolos labantuxu ren kusu tik sixit at lekampoovo.  
\v 13 \x * \xo 12:13 \xt Ler 4:26\x*Mina lok tatao avukat lavatpas atnimi, xusu do teventaba atnimi mo lununu atdi xopmen na lolos, di noxo soxope axap lununu atdi at ne Karisito. Ketla dinaba ven mo leveloklox avukat atnimi, la dina mu asu i la kerepmo lununu atdi naba lolos.   
\s1 Lavanga Mina Ronga Xepe Ne Moroa  
\p
\v 14 \x * \xo 12:14 \xt Sam 34:14; Ro 12:18\x*Mina lolos kusu mina nemen at lumulum eburu mi limixin axap, la mina nemen manmanton, mila do tara noxo ruuna loklok in manton tino, neni noxo ven ne Moroa at lorooro melemu.  
\v 15 \x * \xo 12:15 \xt Gu 8:23\x*Mina lok tatao avukat nimi xusu tara atnimi noxo sok tixirixes kepe letaba nabalamu at ne Moroa la na seeve. La nemen nimi guta ke xepe teventaba atnimi dina lok lekarakat la dina lox asubu lununu at limixin, kerekngan lara laradi i sev amet limixin.   
\p
\v 16 \x * \xo 12:16 \xt Lur 25:33-34\x*Mina lok tatao avukat nimi xusu tara atnimi noxo vubeles ti loklok i lok kapmek maxamang at lixitkis epot la kerepmo na lok kapmek lara kitkis epot atnimi. Kopla na lok ngan ne Esao, neni goxo lok ngangao at ne Moroa. Neni ga xip kepe laasen silok do lanarong, mila lavaanat meren digak lok ka loklox anarong at luvuttemen di. Ketla neni ga xip kepe mo loklox anarong kusu ni na lok ka levempanga anan mun ti labantuxu ren.  
\v 17 \x * \xo 12:17 \xt Lur 27:30-40\x*Nemi miklen i do melemu bok ba neni ga lok do na lok ka amlong mo loklox anarong, ketla ne temen ga sok tixirixes kepe i. Neni goxo epovo na lox ekun lodoxoma at ne temen, keke i do neni ga reng mu mo loklox anarong.   
\p
\v 18 \x * \xo 12:18 \xt Pas 19:16-20; Lal 4:11-12\x*Do mina vot pasa ne Moroa, mi noxo ven mo levempanga limixin me Israel diga ekip tangarang min at lavatpas atdi boro Isip. Diga vot to at lakaana Sinai la ne Moroa ga sep pepe di do di noxo long tu ren. La diga ven mo lakaana, laxao silok ga anan teren, la lamain silok mi lusugao ga vung kimir i. Langsangan lamanman eburu mi leretepaavat la lavanga ga mam to ap mo lakaana.  
\v 19 \x * \xo 12:19 \xt Pas 20:18-21; Lal 5:22-27\x*La diga ronga lerengteng at luru la diga ronga laxaka at ne Moroa. Diga ronga i na, la diga marat aleng la diga sing i xusu noxo vaase bok ba tevelinga ridi.  
\v 20 \x * \xo 12:20 \xt Pas 19:12-13\x*Di goxo epovo na ronga ne Moroa mila diga marat aleng at levelinga ren, ni ga lok keretna, “Limixin axap gi noxo long tu at na lakaana, la do tavanga mi lavanuet kangkedek teren na los polo na levelinga rak, limixin dina lu amer i.”  
\v 21 \x * \xo 12:21 \xt Lal 9:19\x*Diga ven i mo lavanga la diga umsu mi lanmarat, kuren la ne Moses ga lok, “Nia a marat aleng, kuren la a dede.”   
\p
\v 22 \x * \xo 12:22 \xt Ga 4:26; Li 5:11\x*Ketla nemi mi goxo ekip tangarang mi tevempanga xeretna at lovotpot atnimi saparap ne Moroa. I lok ngan ta do mira vot pam to saparap lakaana Saion la lemenemen Jerusalem, neni lemenemen at ne Moroa, Luntoo Avolo. Mira vot pam ap mo lemenemen i umsu aleng mi lubung angelo, kopmen tara i epovo ri exes di, mo dik lok buru la dik pixan emi asu saparap ne Moroa.  
\v 23 \x * \xo 12:23 \xt Lu 10:20\x*La mira vot eburu vam mi limixin nunu nedi lavanarong at ne Moroa, mo ga malagan li vam levenasen atdi ro vana at laxalibet. Mira vot pasa bok pam ne Moroa, neni laradi rongtonga linga at limixin axap. La mira vot pam saparap labaroonan atnedi limixin mokmokso no digara met pam la ne Moroa ga lox adadat pam di. La nanga dik lok to vana at laxalibet.   
\p
\v 24 \x * \xo 12:24 \xt Ib 8:6; 10:22; 1 Pi 1:2; Lur 4:10\x*Mira vot pasa vam ne Iesu, neni ga lok lumulum ti lekabus maxat kantubu at ne Moroa eburu mi limixin, la mira vot pam ap mo loxot ne Iesu ga semla li lada ren to melamgo at ne Moroa ngan luunun ti laxakapmek at limixin. Mo lada ren i lox avukat ti lada at ne Abel, mila lada at ne Abel ga lox asuusu lebelemamao at ne Moroa ketla lada at ne Iesu i lox asuusu lumulum.   
\p
\v 25 \x * \xo 12:25 \xt Ib 2:1-3; 10:26-29\x*Mina lok tatao avukat nimi xusu mi noxo ronga xepe ne Moroa, mo i paase rinimi. Moroa ga paase ri lavalabat atdik to Sinai, ketla buaang atnedi diga ronga xepe levelinga ren la diga ekip tangarang mi lebelemamao ren. La kerepmo bok, do nemi mina ronga xepe levelinga at ne Moroa no vana at laxalibet, ixo epovo do mina sepsu at lebelemamao ren. Mila levelinga ren tidik i mumuat aleng ti mo levelinga neni ga raba di min.  
\v 26 \x * \xo 12:26 \xt Pas 19:18; Sam 68:8; Aga 2:6\x*Ap mo levenaleng Moroa ga paase ri lavalabat atdik to Sinai, la lavatbung menemen axap gang nengne. Ketla melemu neni ga vaase do,  
\q1 “Abangma gesara bok na lavatbung menemen eburu mi laxalibet.” \rq Aga 2:6\rq*   
\m
\v 27 Na levelinga do “gesara bok,” i lox asuusu i do ne Moroa naba sele utut kepe axap levempanga neni ga rudum li di at na lavatbung menemen la laxalibet bok, kusu mo levempanga neni i vara i do nak lok, naba nemen amisik.   
\p
\v 28 Nedik ata lok ka lixitkis at Linintoo ren mo noxo xap. Kuren la ata tong avukat ti ne Moroa la ata lotu ruturun saparav i. La lorooro atdik na umsu mi langsangan loklok ngangao saparav i,  
\v 29 \x * \xo 12:29 \xt Lal 4:24; 9:3; Ais 33:14\x*mila ne Moroa atdik neni laxao sesele utut.   
\c 13  
\s1 Levelinga Xavaxap  
\p
\v 1 \x * \xo 13:1 \xt Jo 13:34\x*Mina balamu ela nimi mila nemi limixin at ne Moroa.  
\v 2 \x * \xo 13:2 \xt Ro 12:13; 1 Pi 4:9; Lur 18:1-8; 19:1-3\x*Nemen mita ke xepe loklok ti lok maraose mi luvuttadi xadiong. Leventaba diga mu asu na loklok, ketla di goxoklen i do diga lok maraose mi lubung angelo at ne Moroa.  
\v 3 \x * \xo 13:3 \xt Mt 25:36; Ib 10:34\x*Mina lox asuusu labalamu atnimi rinedi limixin nunu di nemen at loogu xokoxo, i lok ngan ta do nemi bok mik lok eburu midi at loogu xokoxo. La mina lok tooro limixin nunu mo dip kip losongsongot mumu lununu atdi, mila nemi bok migap kip levenmumuat kerepmo.   
\p
\v 4 \x * \xo 13:4 \xt Ga 5:19,21; Ep 5:5\x*Nemi axap mina mu asu avukat loklok keneng at leepot la mina ke loklok ti elongka mila nedi di mu asu loklok ti elongka, Moroa naba lok li di at lavapaase, eburu minedi bok limixin di los polo levelinga at ne Moroa mumu loklok keneng at leepot.  
\v 5 \x * \xo 13:5 \xt 1 Ti 6:8; Jos 1:5\x*Mina ke xepe loklok ti vavara solo levempilas la mina lok momo mi mo levempanga mi ruuna i, mila ne Moroa ga lok keretna,  
\q1 “Nia noxo on basinge rinotno nimi la loklok tatao rak kopmen tinotno noxo xap.” \rq Lal 31:6\rq*   
\m
\v 6 Kuren la i epovo do ata tong tuturun mo levelinga kerekngan Lovoang Kaala i tong i,  
\q1 “Leeme Silok neni Laradi Loklok Tooro rak, la nia xopmen a noxo marat at lempanga limixin kapmek diba lox i ria.” \rq Sam 118:6\rq*   
\p
\v 7 \x * \xo 13:7 \xt 1 Ko 4:16; Ib 6:12\x*Mina doma loklok at luvuttadi amgomgo atnimi gano, mo diga vaase nimi mi Lagale Lavavang at ne Moroa. Mina doma lununu diga ruuna i at lorooro atdi se diga met, la mina lok ka lununu xerepmo.  
\v 8 \x * \xo 13:8 \xt Ep 4:14\x*Diga nunu do ne Iesu Karisito ixok lox ekun levelinga ren. Levelinga ren ga soorun gano la i soorun lingina la naba soorun bok melemu.   
\p
\v 9 \x * \xo 13:9 \xt Ro 14:17\x*Nemen gat mitang tonga nedi di lox ase nimi mi levenanasa vetpes, mo ba sar asoogong nimi basinge lununu atnimi at ne Iesu. I lox avukat do mina lok ka letaba nabalamu eburu mi loklok tooro at ne Moroa xusu mina lox alolos lebelen nimi. La mina ke xepe mo leveloklok at Laulis Linga mumu leveluxa salai ri anan la leveluxa salai kopmen ti anan. Na loklok noxo lok tooro lorooro atnedi di mumu asu i.  
\v 10 Ketla nedik ta ruuna Laradi Loklox Arooro. Ni ga lox epovo luunun ti laxakapmek atdik la kopmen toxot at na rinedi di mumu asu lekabus migomgo.   
\p
\v 11 \x * \xo 13:11 \xt Mas 16:27\x*At leventaangas at lekabus migomgo lamaasa gomgo ga lok ka lada at levempanga mi lavanuet kangkedek la ga vubeles min uto xeneng at loxot ga xaala aleng. Mo lada ga lok ngan laplavang ti laxakapmek at limixin. Ketla diga lok ka mo levempanga mi lavanuet kangkedek la diga rin asonao i ro maxamang at lemenemen.  
\v 12 \x * \xo 13:12 \xt Mt 21:39; Jo 19:17\x*La kerepmo ne Iesu bok ga xip losongsongot to maxamang at lemenemen silok Jerusalem kusu na lox adadat limixin basinge laxakapmek mi lada xa ren.  
\v 13 \x * \xo 13:13 \xt Ib 11:26; 12:2\x*Kuren la mina xis esogo mi ne Iesu, la minap kip lainmangan kerekngan ne Iesu gap kiv i ap mo laaleng neni ga merem at laxaba ro maxamang ap mo lemenemen.  
\v 14 \x * \xo 13:14 \xt Ib 11:10,16; 12:22\x*Mila kopmen temenemen tino ridik nade xopok at lavatbung menemen. Ketla nedik ta ngangais ti mo lemenemen ne Moroa ga lox agagas li i ridik.   
\p
\v 15 \x * \xo 13:15 \xt 2 Let 29:31; Sam 50:14,23; Ose 14:2\x*Iesu ga uu ngan laxaavuk tidik, kuren la ata emi asu amisik mi ne Moroa, i lok ngan laplavang atdik tin la i lok ngan bok livipisik atnedi di nunu at laasen teren.  
\v 16 \x * \xo 13:16 \xt Pl 4:18\x*La nemen mita domampe loklok tik lok lununuan la loklok tim taba panga nedi dik pakes, mila anaa leveloklok i lok ngan laramtaba atdik ti ne Moroa la neni i momo ren.   
\p
\v 17 \x * \xo 13:17 \xt Isi 3:17; 1 Ts 5:12\x*Mina ronga res at luvuttadi amgomgo at lotu la mina mu asu levelinga atdi mila nedi di lok tatao nimi la ne Moroa nabakling lugugu atdi, mo do diga lok tatao avukat nimi. Mina ronga res atdi xusu diba lok momo mun at lugugu atdi. Do mina ronga xepe levelinga atdi, na loklok ting tonga xepe naba lok li lumumuat mavana atdi la naba lok kapmek lununu atnimi.   
\s1 Levempapaase Avit  
\p
\v 18 \x * \xo 13:18 \xt Gu 24:16; 2 Ko 1:12\x*Mina ngising amisik ne Moroa do neni na lok tooro nama. Nema xopmen mana ruuna tusumsuma xapmek mila maklen i do lebelen nama ip sepsen tino, la ma vara aleng i do mana ruuna luruptuvuk i nunuan axap.  
\v 19 A vara i xusu anamlong soso uto atnimi, kuren la at langsangan lavavara rak, do mina sing ne Moroa ri na lavanga.   
\p
\v 20 \x * \xo 13:20 \xt Sak 9:11; Ais 55:3; Jer 32:40; Isi 37:26; 1 Pi 2:25\x*Moroa at lumulum ga lox arooro amlong Leeme Silok atdik ne Iesu basinge lanmet. La at lada ren neni ga vaxaru kaxat lekabus maxat mo naba nemen amisik. Neni laradi loklok tatao atdik ngan laradi i lok tatao lubungsipsip teren.  
\v 21 A sing ne Moroa do na lox agagas li avukat nimi xusu minaba mu asu lavavara ren la neni na gugu at lebelen nimi xeneng at loklok tooro at ne Iesu Karisito. Ata lok mo levempanga neni naba momo ren la ata emi asu min la na leemi asu rin noxo xap. Tuturun.   
\p
\v 22 Luvutnetak mi luvurinuk. Nia a sing nimi do mina siam ka levelinga rak keneng at na lovoang. Na levelinga kopmen na baalom solo, i xubulik mene nga.   
\p
\v 23 A vara i xusu minaklen i do neton dik ne Timoti diga soxomus asu vam i boro xeneng at loogu xokoxo. Do neni na vot pasa soso ia, nema eburu manaba vot pasa nimi.   
\s1 Lavapaase Momo  
\p
\v 24 A lox aonon lavapaase momo rak ti luvuttadi amgomgo atnimi la ti limixin axap at ne Moroa. La nedi bok limixin nunu boro Itali di lox aonon lavapaase momo rinimi.   
\p
\v 25 Letaba nabalamu at ne Moroa na nemen amisik eburu minemi axap. I ruturun.