\id COL - Madak Bible [mmx] -Papua New Guinea 2011 (DBL 2015) \h Kolosi \toc2 Kolosi \toc1 Kolosi \toc3 Kl \mt1 Kolosi \mt2 Lovoang At Ne Pol // Ti Limixin Nunu To Kolosi \imt1 Levelinga Loklox Axasep \imt2 Lamaares 62 A.D. \ip Pol gak lok at loogu xokoxo to Rom, la neni ga malagan i na lovoang la ga raba ne Tikikas mi ne Onesimas min la duga lok ka i la duga raba limixin at lotu min to Kolosi. Lavasuun at na lovoang i lok keretna. Ne Pol gak lok at loogu xokoxo mumu Lagale Lavavang la ne Epapras gat pas parav i la ga tong i rin do lentaba luvuttadi mo diga tong levelinga xaxarang at lotu tinedi limixin nunu to Kolosi. Mo levelinga xaxarang atdi ga lok keretna. Lentaba lubungangelo mo nedik ata lotu parap di. Lara ne Iesu mo ik lok petpes, la neni xopmen na lok ngan ne Moroa, ketla i lok ngan lubungangelo. Pol ga ronga i na la neni ga malagan i na la ga lox aonon i xusu ti lox asuusu laxaxarang ap mo leveloklox ase xaxarang. \iot Lengkot silok keneng at na lovoang \io1 \ior 1:1-2\ior* Lavapaase momo at ne Pol. \io1 \ior 1:2-14\ior* Pol ga emi asu aleng mi limixin boro Kolosi. \io1 \ior 1:15-23\ior* Lempapaase mumu lisisilok at ne Iesu Karisito. \io1 \ior 1:24–2:5\ior* Lempapaase mumu leven gugu at ne Pol. \io1 \ior 2:6–3:4\ior* Limixin me Kolosi dina sok tixirixes levenanasa xaxarang. \io1 \ior 3:5–4:1\ior* Leventaangas nunuan ti limixin nunu. \io1 \ior 4:2-18\ior* Lempapaase loklox alolos mi lavapaase abeese ren. \c 1 \s1 Lavapaase Axasep \p \v 1 \x * \xo 1:1 \xt Ep 1:1\x*Nenia ne Pol, lun pavang at ne Iesu Karisito, Moroa ga soxolik ka ia xuren, la ne Timoti bok, neton dik. \p \v 2 \x * \xo 1:2 \xt Ro 1:7\x*Nema ma malagan na lovoang tinemi limixin nunu dom Kolosi. Nemi limixin at ne Moroa la mi nunu ruturun at ne Karisito. \p Letaba nabalamu la lenmila tinemi boro at ne Moroa ne Temen dik. \s1 Lisingising Ti Tong Loklox Avukat \p \v 3 \x * \xo 1:3 \xt Ep 1:15,16\x*At levesingising atnama ma tong loklox avukat amisik ti ne Moroa, ne Temen Leeme Silok atdik ne Iesu Karisito. \v 4 Mila maga ronga i do lununu atnimi saparap ne Iesu Karisito i tu tuxuruxun, la lorooro atnimi i umsu mi labalamu saparap limixin nunu. \v 5 \x * \xo 1:5 \xt Ep 1:13,15-16; 1 Pi 1:4; Ro 1:13; 1 Ti 3:16; Kl 4:12; Pm 1:23\x*Na lununu la labalamu atnimi i nemen lolos at lorooro atnimi, mila mi ngangais mi lomomo ri mo leveloklox anarong i nemen tangais nimi ro vana at laxalibet. Mo leveloklox anarong miga ronga vam i ap mo levenaleng diga vavang mi levelinga ruturun tinimi, mo levelinga ni Lagale Lavavang. \p \v 6 Na Lagale Lavavang i ruuna laxampipisik solo la i sat kaka limixin at na lavatbung menemen axap kusu dina nunu at ne Iesu Karisito la dina lok leveloklok i nunuan. La kerepmo bok Lagale Lavavang i pisik kantubu atnimi, ga ruka i ap mo laaleng miga ronga i la miga ven kibis letaba nabalamu at ne Moroa, mo letaba nabalamu i ruturun tinotno. \p \v 7 Epapras ga anasa nimi mi nom letaba nabalamu. Neni lagale laradi i gugu eburu minema la ni laradi ruturun i lok lugugu at ne Karisito ti lok tooro nimi. \v 8 Neni ga tong i rinama do lorooro atnimi i umsu mi labalamu, Loroonan Kaala ga suxa aumsu nimi min. \p \v 9 \x * \xo 1:9 \xt Ep 1:9,16,17; Pl 1:9\x*Maga ronga i nom, kuren la kopmen mana xap mi lisingising tinimi. Ma sing ne Moroa, kusu na suxa aumsu nimi mi lakleklen at lavavara ren, la kerepmo minaba ruuna ka lodoxoma avukat keneng at lorooro atnimi. Mo lodoxoma i ravasu boro at Loroonan Kaala. \v 10 \x * \xo 1:10 \xt Pl 1:27; Ep 2:10\x*Ma lok levesingising kerepmo kusu lorooro atnimi na epovo mi lavavara at Leeme Silok la kusu mina lok lempanga naba lox amomo i. Nom lempanga i lok keretna, lorooro atnimi naba pisik asu leveloklok nunuan solo, la nemi minaba lok kaka lakleklen at ne Moroa. \p \v 11 \x * \xo 1:11 \xt Ep 1:19; 3:16\x*La minaba ruuna ka bok lolos, mo i laa boro vana at lolos silok at ne Moroa kusu mina tu tuxuruxun at lununu atnimi la mi noxo subu kot kantubu. Minaba umsu mi lomomo, \v 12 \x * \xo 1:12 \xt Ep 1:11,18\x*la minaba tong loklox avukat ti ne Temen dik, ni ga lok nimi xusu mina epovo rinotno ri ruuna ka loxot atnimi ap mo luunun ni ga lox agagas li vam i ri limixin teren to xeneng at Linintoo i umsu mi laxasep. \v 13 \x * \xo 1:13 \xt Lu 22:53; Ep 2:2\x*Neni naba raba nimi mi nom, mila ni ga lox aroo su dik basinge lamain lolos at ne Satan, la neni ga lox arooro dik kusu tana vubeles at Linintoo at ne Nitna, mo ne Moroa i balamu i. \v 14 \x * \xo 1:14 \xt Ep 1:6,7\x*Keneng at ne Iesu, Moroa ga un ka amlong dik, la ni ga doxoma xepe bok leveloklok kakapmek atdik. \s1 Iesu Neni Lamgomgo \p \v 15 \x * \xo 1:15 \xt 2 Ko 4:4; Jo 1:18\x*Karisito neni lampoovo at ne Moroa nedik kopmen tana reven tu ren. Neni lanat meren avot, la i silok tinedi levempanga ne Moroa ga rudum li di. \v 16 \x * \xo 1:16 \xt Jo 1:3,10\x*Moroa ga rudum li levempanga xeneng at lolos at lekngen ne Nitna. Levempanga axap to vana at laxalibet la de xopok at lavatbung menemen, lempanga dik ta reven di la lempanga dik dixo epovo ta reven di. Ni ga rudum li bok leventoonan eburu mi lubungangelo, la luvuttadi amgomgo atdi la limixin lolos kerepmo dik lok to vana. Moroa ga rudum li nom lempanga axap keneng at lolos at lekngen ne Nitna kusu dina lox aurut laasen at ne Nitna. \v 17 \x * \xo 1:17 \xt Jo 1:1; 8:58\x*Karisito ga rooro avot ti nom lempanga axap, la neni lusu auru atdi. \p \v 18 \x * \xo 1:18 \xt Ep 1:22-23; Gu 26:23; Li 1:5\x*Neni Lamgomgo at lotu ren kerekngan lavatlak at laradi, ni Lamgomgo at labantuxu ren. Neni lavasuun at lorooro maxat, la neni lara avot ga roo xat amlong basinge lanmet. Ni ga lox i xuren kusu neni xusuk naba ruuna ka lixitkis silok ti levempanga axap. \v 19 \x * \xo 1:19 \xt Jo 1:16; Kl 2:9\x*At lodoxoma axa at ne Moroa do ne Nitna, naba venaxa ka ren. \v 20 \x * \xo 1:20 \xt Ep 1:10; 2:16; Ro 5:1; Ep 1:7; 2:13; 1 Jo 2:2\x*La at lodoxoma bok at ne Moroa do, ne Nitna naba lok lumulum kantubu at ne Moroa la limixin axap, nedi limixin mede xopok at na lavatbung menemen la nedi limixin to vana at laxalibet. Karisito ga lok lumulum mi lada ren, mo ga sen su ro vana at laxaba. \p \v 21 \x * \xo 1:21 \xt Ro 5:10; Ep 2:12; 4:18\x*Gano migomgo miga nemen paxalom basinge ne Moroa, leveloklok atnimi la lodoxoma atnimi ga lok kapmek la kerepmo migak lok ngan limixin munepen min. \v 22 \x * \xo 1:22 \xt Ep 2:14-16; 5:27\x*Ketla monga, Moroa ga lok lumulum eburu minimi mumu mun lanmet at labantuxu at lamdak teren, kusu lorooro atnimi nan manton tino ap mo laaleng minaba tu saxaven to melamgo ren. La taxakapmek noxok lok bok ba atnimi la tara noxo lok li bok ba nimi at lavapaase mumu loklok kakapmek. \v 23 \x * \xo 1:23 \xt Ep 3:17; Ib 3:14; Mk 16:15; 1 Ti 3:16\x*Naba lok kuren mo do mina tu tuxuruxun at lununu atnimi la kopmen tara naba sat kaka nimi basinge lununu atnimi saparap Lagale Lavavang. At nom mun Lagale Lavavang la nia ne Pol a tong asu i ngan lasaxaruki at ne Moroa. La na Lagale Lavavang mo di vavang min ti limixin axap at na lavatbung menemen, ni levelinga nemi miga ronga i. \s1 Lugugu At Ne Pol Keneng At Lotu \p \v 24 \x * \xo 1:24 \xt Ep 3:13\x*La nanga nia a lok momo mumu levesongsongot tarak nia ap kiv i ti lok tooro nimi. La kerepmo a lox epovo levesongsongot no ne Moroa ga lok katling i ria kusu na lok tooro limixin at lotu min, mo i lok ngan labantuxu at ne Karisito. \v 25 \x * \xo 1:25 \xt Ep 3:2,7-8\x*La aga lok ka na lugugu ngan lasaxaruki ti limixin at lotu. La ne Moroa axa ga soxolik ka ia rin kusu ana paase asu levelinga at ne Moroa rinimi, la a noxo ke xepe toxot teren. \v 26 \x * \xo 1:26 \xt Ro 16:25-26; Ep 3:3-5,9-10\x*Moroa ga lox alipe mo levelinga basinge lavaola axap diga nemen gano, ketla melemu ga lox asuvos i ri limixin teren. \v 27 \x * \xo 1:27 \xt Ep 1:18; 1 Ti 1:1\x*Moroa ga soxovo li i do na lox asuvos Lagale Lavavang ti limixin teren. Mo levelinga i lok ngan lapnovos silok la i lox asuusu lisisixam at ne Moroa. Mo levelinga i lok keretna, Karisito nabat kis esogo eburu mi limixin kopmen di me Judaia la nedi bok dinaba ruuna ka loxot at lasinorong teren. \p \v 28 \x * \xo 1:28 \xt Ep 4:13\x*Nema ma vavang mi ne Karisito ri limixin. Ma vaase aronga di la ma anasa di mi lakleklen at ne Moroa kusu nedi axap dinaba ruuna ka luruptuvuk manmanton kerekngan ne Karisito la kopmen taxakapmek atdi. La dinaba nemen kuren se ap mo laaleng dinaba tu ro melamgo at ne Moroa. \v 29 \x * \xo 1:29 \xt Ep 3:7,20; Pl 4:13\x*Ti lox empana na lugugu, nenia a gugu lolos, mi nom lolos ne Karisito i vetaba min tia la i gugu keneng tarak. \c 2 \p \v 1 Ana tong axasep nimi do nia a gugu lolos ti lok tooro nimi eburu mi limixin nunu boro Lodisia eburu minedi bok kovisi dina epen etang minia. \v 2 \x * \xo 2:2 \xt Ep 3:4,18; Kl 1:26\x*Lavavara rak i lok keretna. Lununu atnemi axap na nemen lolos la mina tu eburu mi labalamu ela kusu lorooro atnimi na umsu mi laxasep silok, mo i lok ngan lapnovos silok tinimi. Ap mo mun langas nemi minabaklen lodomdoma lipe at ne Moroa, la mo lodomdoma lipe neni ne Karisito. \v 3 \x * \xo 2:3 \xt Ais 45:3; 1 Ko 1:24,30; Ep 3:19\x*Neni mun lengki ti suang mo lodomdoma lipe, kusu limixin dina epovo dinaklen ka mo lodoxoma la lakleklen silok at ne Moroa. \v 4 \x * \xo 2:4 \xt Ro 16:18; Ep 5:6; Kl 2:8\x*A malagan na levelinga rinimi, kusu tara noxo xarang arup nimi mi tevelinga xaxarang, keke i do i reng nunuan mene nga. \v 5 \x * \xo 2:5 \xt 1 Ko 5:3\x*Nia a tong i na rinimi mila nenia xopmen anak lok eburu minimi. Ketla a nemen eburu minemi keneng at lodoxoma rak, la a momo do mi tu buru la mi tu tuxuruxun at lununu atnimi keneng at ne Karisito. \s1 Keke Mo Leventaangas Linga Kopmen Boro At Ne Moroa \p \v 6 Nemi miga siam kaka ne Iesu Karisito ngan Leeme Silok atnimi, kuren la minat kis esogo eburu min. \v 7 \x * \xo 2:7 \xt Ep 2:20-22; 3:17\x*Minam tebeng lolos teren la lununu atnimi na tu tuxuruxun teren kerekngan mo diga lox ase nimi min kuren. La mina umsu mi loklok ti tong loklox avukat ti ne Moroa. \p \v 8 \x * \xo 2:8 \xt Kl 2:3\x*Mina lok tatao avukat nimi kusu teta noxo lox asoogong nimi mi leventetere xaxarang, kopmen tavasuun teren. Mo lakleklen i laa boro at leveloklox ase at limixin mun la boro bok at leveloklok mede xopok at na lavatkangka, kopmen boro at ne Karisito. \p \v 9 \x * \xo 2:9 \xt Jo 1:14,16\x*Lampenaxa at ne Karisito i lok ngan mun ne Moroa. Neni ga lox asuusu nom leveloklok de xopok at na lavatbung menemen ngan laradi. \v 10 \x * \xo 2:10 \xt Ep 1:21-22\x*La nemi bok miga lok ka vam nom leveloklok at ne Karisito, neni Lamgomgo ri lubung angelo eburu mi limixin lolos atdi. \v 11 \x * \xo 2:11 \xt Ro 2:29\x*Nemi miga lok ka loklok katling at ne Karisito, kopmen mo loklok katling ua limixin di rivit kepe lengkontuxu at laxamdak lixilik atdi. Ketla mo loklok katling at ne Karisito i ngan mira lok kepe vam lorooro maut mumu mun lugugu at ne Karisito. \v 12 \x * \xo 2:12 \xt Ro 6:4; Ep 1:19-20; Kl 3:1\x*Se nemi miga lok ka lesep susu, i lok ngan ta do miga vutup at lamaaut eburu mi ne Karisito la ap mo lesep susu bok nemi miga xatu kaxat amlong eburu mi ne Karisito keneng at lununu atnimi la lolos at ne Moroa, mo ga lox aroo xat ne Karisito basinge lanmet. \p \v 13 \x * \xo 2:13 \xt Ep 2:1,4-5\x*Ganoxa nemi miga lok ngan laxampanga met mene, atla migak lok leveloklok kakapmek la mi goxovisi na lok kepe lorooro maut. Ketla ne Moroa ga sar asu nemi ri lorooro eburu mi ne Karisito. Moroa ga doxoma xepe leveloklok kakapmek axap atdik. \v 14 \x * \xo 2:14 \xt Ep 2:14-16; 1 Pi 2:24\x*Neni ga lok kepe vam mo lovoang lolos eburu mi leventaangas linga ren mo ga paase axasep laxakapmek atdik. Mo lovoang ga lok ngan lavanga loklok pe kantubu atnedik mi ne Moroa. Moroa ga lok kepe i at loxonaleng ne Iesu ga uu ro vana at laxaba. \v 15 \x * \xo 2:15 \xt Kl 1:13\x*La ne Moroa ga volo kepe laxalolos at laxantoonan kapmek la laxanamgomgo xaxarang keneng at lanmet at ne Karisito to at laxaba. Neni ga lox asuusu i do dinaba lok kaka lainmangan silok. \s1 Nemen Mita Mumu Asu Leventaangas Gamasa At Na Lavatkangka \p \v 16 \x * \xo 2:16 \xt Ro 14:1-12\x*Kuren la ixok mokso do tara na ila mumu loklok atnimi mumu mo leveluxa mi anan i la levengkadan mi inin i, kopla mumu larapeluxa at ne Moroa kopla mumu larapeluxa loklok katling ti lagaaling i vot maxat kopla ti laaleng kaala. \v 17 \x * \xo 2:17 \xt Ib 8:5; 10:1\x*Nom lempanga axap i ngan lamamau mun at lempanga mo naba vot melemu. Ketla ne Karisito ni luruturun teren. \v 18 Ixok mokso do tara na tong i rinimi do mixo epovo kusu mina lok kaka leveloklox anarong at ne Moroa. Laradi xerepmo i lok poovo i do i lox asi aleng lorooro ren. I nua i do i ruuna laasen silok mila i lotu saparap lubungangelo la mumu bok levesilimet teren. Ketla i ruuna loklok papavas la i mumu asu mene lodoxoma kopmen tavasuun teren boro at na lavatkangka. \v 19 \x * \xo 2:19 \xt Ep 2:21; 4:15-16\x*La ira xap tim tebeng lolos ne Karisito, neni lavatlak at labantuxu. Karisito xa neni imgomgonga na labantuxu, la labantuxu im tem saga mun at lavatlak. La mo do labantuxu na repes boro at lavatlak, neni ixo epovo rinotno na suu maraanu. \p \v 20 \x * \xo 2:20 \xt Ga 4:3-5,9; 1 Ti 4:3\x*I lok ngan ta do nemi miga met eburu mi ne Karisito la miga sepmus basinge mo leventaangas at na lavatkangka. Tila ba nemi mi mumu asu i nom kerekngan limixin mede xopok? Mi mumu asu na levelinga keretna, \v 21 “Nemen mita long tu at na. Nemen mita dem pinga i na. Nemen mita rebeng ka i na.” \p \v 22 \x * \xo 2:22 \xt Ais 29:13; Mt 15:9\x*Na levenngas linga i tu katling levempanga gamasa mun la naba xap gamasa mene mila kopmen na laa boro at ne Moroa. Nedi boro at lodoxoma at limixin mun. \v 23 Di ven tai mo leventaangas do i ruturun mila nedi di mumu asu i, di lotu amisik, la dik lok poovo i do di lox asi aleng lorooro atdi la dik lox asi aleng labantuxu atdi.\f * \fr 2:23 \ft Anai ni lotu xaxarang la diga lox i na lempanga ri lok poovo i do nedi mo luvuttadi nunu ruturun.\f* Ketla mo leventaangas kopmen na lok tooro di kusu dina ke xepe leveloklok kakapmek at labantuxu. \c 3 \s1 Leventaangas // Ti Lorooro Nunuan \p \v 1 \x * \xo 3:1 \xt Kl 2:12; Mk 12:36; 16:19; Ep 1:20\x*Nemi miga lok kaka lorooro maxat, i lok ngan ta do miga roo xat amlong basinge lanmet eburu mi ne Karisito. Kuren la lebelen nimi na ngaongao ri mo lempanga boro vana at laxalibet, no ne Karisito it kis ap mo loxonin orong teren saparap lekngen tino at ne Moroa. \v 2 \x * \xo 3:2 \xt Mt 6:33\x*Mina lok li alolos lodoxoma atnemi ap mo lempanga la mina ke nom leveloklok mede xopok at lavatkangka. \v 3 \x * \xo 3:3 \xt Ro 6:2; 2 Ko 5:14\x*Mila lorooro maut atnimi gara met pam, la lorooro maxat atnemi i nemen avukat mi ne Karisito saparap ne Moroa. \v 4 \x * \xo 3:4 \xt Pl 1:21; 1 Ko 15:43; 1 Jo 3:2\x*Karisito, ni lavasuun at lorooro ruturun atnemi, la do neni naba ru asuvos, kerepmo nemi bok miba ru asuvos eburu min la minaba ruuna ka lagale lisisinang teren. \p \v 5 \x * \xo 3:5 \xt Ro 6:6,11; 8:13; Ep 4:19; 5:3-6\x*Kuren la mina lok kepe leveloklok kakapmek i nemen atnemi, kerekngan loklok kakapmek maxamang at lixitkis epot, loklok kakapmek at labantuxu, lodoxoma liplivi tik lok laxakapmek, lavavara rik lok laxakapmek, la loklok ti belegaao, mo i lok ngan nom loklok ti lotu parap levempoovo moroa. \v 6 Na leveloklok naba lox asuusu lebelemamao at ne Moroa mo naba vot. \p \v 7 Gano lorooro atnimi ga umsu mi nom lempanga, la migak lox amisix i. \v 8 \x * \xo 3:8 \xt Ep 4:25-31; 5:4\x*Ketla monga nemi mina lu xepe mi na leveloklox axap, lumukmusak, lebelemamao, lodoxoma xapmek, loklok ti lox asi tara mi levelinga, la lavapaase xapmek. \v 9 \x * \xo 3:9 \xt Ep 4:22,25\x*Nemen mita ekarang ela kantubu atnimi, mila nemi miga lok kepe vam mo lorooro maut eburu mi leveloklok teren. \v 10 \x * \xo 3:10 \xt Ep 4:24\x*La miga sang ka lorooro maxat, mo ne Moroa ik lox amaxat amisix i mi lakleklen teren kusu miba lok ngan lampoovo at ne Moroa, Lanat Tuntudum Li. \v 11 \x * \xo 3:11 \xt Ga 3:28\x*La ti lusuusu ba ren keretna, kopmen bok ba leme Grik dina lok petpes ti leme Judaia, leme Judaia la nedi kopmen di me Judaia, limixin etaba, limixin at lamain, limixin saksaxaruki la limixin di nemen gamasa mun. Legesa Karisito mun ik lok la i suxuna lorooro atnedi axap. \p \v 12 \x * \xo 3:12 \xt 1 Pi 2:9; Ep 4:2,32\x*Nemi lavaanat soksoxolik at ne Moroa la neni i balamu nimi. Kuren la, mina siga ka lebelen tuntun, labalamu, langsangan loklok ngangao, loklox anare la loklox atnaasan. \v 13 \x * \xo 3:13 \xt Ep 4:32; 5:2\x*Mina mulus kaka nedi limixin di vamigis nimi la mina doxoma xepe laxakapmek atnedi di lok laxakapmek tinimi. Mina doxoma xepe laxakapmek atnedi kerekngan Leeme Silok i doxoma xepe laxakapmek atnimi. \v 14 \x * \xo 3:14 \xt Ro 13:8-10; 1 Ko 13:13; Ep 4:3\x*La lara lavanga bok mo i silok ti nom levempipisik nunuan at lorooro, ni labalamu. La mina lox aumsu nimi mi labalamu mo naba lok eburu avukat limixin axap. \p \v 15 \x * \xo 3:15 \xt Pl 4:7; 1 Ko 12:13,27; Ep 4:4\x*Mina ke limila na suxuna lorooro atnimi, mo limila ne Karisito im taba i. Mila ne Moroa ga ro xaka nemi kusu mina nemen keneng at limila ngan legesa bantuxu. La amisik mina tong loklox avukat ti ne Moroa. \v 16 \x * \xo 3:16 \xt Ep 5:19\x*La mina ke levelinga at ne Karisito na nemen atmatkun keneng at lorooro atnimi. Mina umsu min mo do mina lox ase la mina vaase axasep ela nimi mi lakleklen at ne Moroa. La minak pixan ti ne Moroa mi lengkompixan at ne Devit la lengkompixan at lotu la lengkompixan emi asu. La lorooro atnimi na umsu mi loklok ti tong avukat saparap ne Moroa. \v 17 \x * \xo 3:17 \xt 1 Ko 10:31; Ep 5:20\x*Levempanga axap mi lox i la mi vaase i, mina lox i at laasen at Leeme Silok ne Iesu. La mina tong loklox avukat ti ne Moroa, ne Temen nedik mumu leveloklox anarong at ne Karisito. \s1 Loklok At Lixitkis Koetemen \p \v 18 \x * \xo 3:18 \xt Ep 5:22\x*Nemi lavakin. Minang tonga res at levendoxoma at lavatlok atnimi mila na loklok, ni loklok at lavakin di nunu at Leeme Silok. \p \v 19 \x * \xo 3:19 \xt Ep 5:25\x*Nemi lavatlok. Mina balamu lavakin atnimi, la nemen mita metlaat tidi. \p \v 20 \x * \xo 3:20 \xt Ep 6:1\x*Nemi laxamdak mi laxaalik. At lorooro axap atnemi, minang tonga res at luvuttemen nimi mi luvutnen nimi. Do mina lox i xuren, nom loklok naba lox amomo Leeme Silok. \p \v 21 \x * \xo 3:21 \xt Ep 6:4\x*Nemi luvuttemen laxamdak mi laxaalik. Nemen gat mita lox abulu laxamdak mi laxaalik atnimi. Lavanga dina lok tuntun aleng. \p \v 22 \x * \xo 3:22 \xt Ep 6:5-8\x*Nemi lavasaxaruki. Minang tonga res at luvuttadi amgomgo atnemi at levempanga axap. Kopmen do ap mo mene nga loxonaleng di reven tatao nemi kusu mi vara i do dinaba ven lenget luruptuvuk nunuan atnimi. Ketla mina lok lugugu atnimi mi lomomo at lebelen nimi la loklok ngangao saparap Leeme Silok. \v 23 Mo do lavanga salai mi lox i, mina gugu ren mi lorooro axap atnimi, kerekngan tai do mi gugu at Leeme Silok la kopmen ti laradi mun at na lavatbung menemen. \v 24 Mina xasep do Leeme Silok naba raba nimi mi leventamtaba, i ngan luunun tinimi, mila nemi mi gugu ri ne Karisito, neni Leeme Silok atnimi. \v 25 \x * \xo 3:25 \xt Ro 2:11\x*La limixin bilinga axap naba lok ka luunun naba epovo mi leveloklok kakapmek dik lox i, mila ne Moroa i viila limixin axap mi legesampoovo mene nga. \c 4 \p \v 1 \x * \xo 4:1 \xt Mas 25:43,53; Ep 6:9\x*Lavaeme amgomgo, minak lok tatao nunuan lavasaxaruki atnimi la loklok nemi minak lox i rinedi na lox avukat. Mina lox i xuren mila nemi bok mi ruuna Leeme Silok no vana at laxalibet. \s1 Mina Ngising Amisik \p \v 2 \x * \xo 4:2 \xt Ep 6:18; Pl 4:6\x*Mina ngising amisik, la levesingising atnimi na ruturun mene nga, la mina tong loklox avukat ti ne Moroa. \v 3 \x * \xo 4:3 \xt Ro 15:30; Ep 6:19; 1 Ko 16:9\x*La mina ngising bok tinema kusu ne Moroa naba suang lumusmaragu nade rinama ti paase asu Lagale Lavavang mumu ne Karisito, gano mo Lagale Lavavang ga nemen alipe. La nenia a nemen at loogu xokoxo mumu mun i mo Lagale Lavavang. \v 4 \x * \xo 4:4 \xt Ep 6:20\x*Mina ngising ne Moroa do nia ana valas axasep nunuan levelinga ren kusu limixin dina xasep teren. La levelinga at ne Moroa naba xasep kerekngan ne Moroa i vara i. \v 5 \x * \xo 4:5 \xt Ep 5:15-16; 1 Ts 4:11-12\x*Mina ruuna ka loklok nunuan at lorooro atnimi rip tuvuk avukat saparap nedi nom kopmen dina nunu. La mina gagas at levenaleng axap ti tong asu Lagale Lavavang tidi. \v 6 \x * \xo 4:6 \xt Ep 4:29; 1 Pi 3:15\x*Levempapaase atnimi nap tavasu nunuan amisik kusu tik lox amomo limixin. La mina gagas do minaba vorang avukat limixin mi levelinga at ne Moroa. \s1 Levelinga Xavaxap \p \v 7 \x * \xo 4:7 \xt Ep 6:21\x*Netak orong ne Tikikas, ni laradi i ruturun at lugugu ren la lasaxaruki eburu minema at lugugu at Leeme Silok. Neni naba raba nemi mi lavapaase axasep mumu ia. \v 8 \x * \xo 4:8 \xt Ep 6:22\x*La nenia aga lox aonon i udom saparap nemi, kusu ti lok kaxat lomomo atnemi la na tong i do nema mo map tuvuk kereva. \v 9 \x * \xo 4:9 \xt Pm 1:10-12\x*Neni ba emu eburu bok mi ne Onesimas, neni laradi ruturun la netak orong. Neni at libinam tadi atnemi. Nedu dunaba tong asu lempanga salai mo it pot nade. \p \v 10 \x * \xo 4:10 \xt Gu 19:29; 12:12; Pm 1:24\x*Aristakas, mo i nemen eburu minia at loogu xokoxo, i lox aonon bok lavapaase momo ren. La ne Mak, lovopno at ne Banabas bok kuren. Nemi migara lok ka vam lavapaase axasep ti siam abeles ne Mak dola ni na mu langas uto atnemi. \v 11 Josua, laasen bok teren ne Jastas, i lox aonon bok lavapaase momo rinimi. Nedi na lavantun mene boro Judaia kantubu atnedi di gugu eburu minia rik lok ka limixin uto at Linintoo at ne Moroa, la dik lox amenemen ia. \p \v 12 \x * \xo 4:12 \xt Kl 1:7; 2 Ti 4:10-11; Pm 1:24\x*Lavapaase momo rinimi boro at ne Epapras, lara at libinam tadi atnemi. Neni lasaxaruki at ne Iesu Karisito. Neni i ngising lolos amisik tinemi, i ngising ne Moroa ri lox alolos nemi kusu mina tu tuxuruxun keneng at lununu atnemi kerekngan limixin mukun la minaba xasep aleng at lodoxoma at ne Moroa. \v 13 Na nenia a tong asu langsangan lugugu ren tinimi la ti limixin bok to Lodisia la to Irapolis. \p \v 14 Lentangas orong atdik ne Luk, leeme loklok tatao anmeres, nedu mi ne Demas du lox aonon lavapaase momo rinemi. \v 15 Mina lox aonon lavapaase momo rak ti luvutneton dik mo di nemen to Lodisia la ti mo latkin ne Nimpas, la tinedi limixin lotu mo dit pot etang amisik to at loogu ren.\fig Loogu limixin nuunu digat pot buru amisik.|alt="house by village entrance" src="hk00232b.tif" size="span" loc="Col 4:15-16" copy="BFBS (Knowles)" ref="Kl 4:15" \fig* \p \v 16 Melemu do mina us axap na levelinga i nemen keneng at na lovoang, mina xasep bok do mina us box i ro xeneng at loogu lotu to Lodisia. La mina us bok mo lovoang, luvutneton dik me Lodisia dinaba raba nimi min. \p \v 17 \x * \xo 4:17 \xt Pm 1:2\x*La mina vaase bok ti ne Akipas keretna, “Una lolos kusu una lox epovo mo lugugu Leeme Silok ga raba u min.” \p \v 18 \x * \xo 4:18 \xt 1 Ko 16:21\x*A malagan i na lavapaase momo mi lakngak akmokso. Lavapaase momo rinimi boro at ne Pol. Nemen mita domampe i do nenia ak lok de at loogu xokoxo.\f * \fr 4:18 \ft Pol ga sok mene lavapaase momo, la lara vetpes ga malagan levelinga ne Pol ga vaase i min.\f* \p Mo letaba nabalamu at ne Moroa na nemen amisik eburu minemi.