\id 1PE - Madak Bible [mmx] -Papua New Guinea 2011 (DBL 2015) \h 1 Pita \toc2 1 Pita \toc1 1 Pita \toc3 1 Pi \mt1 1 Pita \mt2 Lovoang Avot At Ne Pita \imt1 Levelinga Loklox Axasep \imt2 Lamaares 65 A.D. \ip Pita ga malagan i na lovoang la na lovoang gat pas tinedi limixin nunu mo diga epeseves at lengkot axap at lavatbung menemen. Na limixin nunu diga nemen at lengkot petpes ngan limixin me xadiong. Ise ne Pita gak lok to Rom, neni ga malagan i na lovoang. Limixin nunu diga ekip tangarang mi lentaba leveloklox asongot boro at lagavaman boro Rom mumu lumumu asu atdi ti ne Iesu Karisito. Pita ga vara i xusu na lox alolos di kusu dina tu atmatkun keneng at lununu atdi. Pita ga vaase aronga bok di mumu loklox arooro atnedi, la mumu bok ne Iesu la dina tu atmatkun amisik at levenmumuat kerepmo, la mumu bok lomlong at ne Iesu, kusu nedi diba doma mumu i na lempanga. Neni ga vaase aronga bok di mi leventaangas i nunuan ua ik mokso xusu ti limixin nunu at ne Iesu Karisito dina mu asu i. \iot Lengkot silok keneng at na lovoang \io1 \ior 1:1-2\ior* Lempapaase momo. \io1 \ior 1:3-12\ior* Lavapaase axasep mumu loklox arooro at ne Moroa. \io1 \ior 1:13–2:10\ior* Lixitkis atdik eburu mi ne Moroa. \io1 \ior 2:11–3:12\ior* Lorooro at limixin nunu. \io1 \ior 3:13–4:19\ior* Ataba ekip tangarang mi levesongsongot mumu lununu atnedik. \io1 \ior 5:1-9\ior* Lentaba lempapaase bok mumu limixin nunu. \io1 \ior 5:10-14\ior* Loklox anarong la lavapaase abeese. \c 1 \s1 Lavapaase Axasep \p \v 1 \x * \xo 1:1 \xt Je 1:1; 2 Ti 1:15\x*Nenia ne Pita lun pavang at ne Iesu Karisito. Nia a malagan na lovoang tinemi limixin soksoxolik at ne Moroa. Mi lok ngan limixin kadiong ti na lavatbung menemen la mik lox epeseves to at levennep taba ro Pontas, Galesia, Kapadosia, Asia, la Bitinia. \v 2 \x * \xo 1:2 \xt Ro 8:29; 2 Ts 2:13; Ib 12:24\x*Ganoxa, Moroa ne Temen dik ga doxoma ali i do ni na soxolik ka nimi ngan limixin teren la na lox adadat nemi mi Loroonan Kaala ren, kusu minaba ronga res at ne Iesu Karisito, la neni naba lox adadat nemi mi lada ren. \p Letaba nabalamu ren la lenmila na umsu xeneng at lorooro atnemi. \s1 Lodoxoma Voovo \p \v 3 \x * \xo 1:3 \xt 2 Ko 1:3\x*Leemi asu ri ne Moroa neni ne Temen Leeme Silok atnedik ne Iesu Karisito, mumu mun lebelen tuntun silok teren tinedik. Neni ga lox arooro xaka amlong ne Iesu Karisito basinge lanmet kusu ti raba nedik mi lorooro maxat. La nai, ik suxa nedik mi lodoxoma voovo ri lorooro avolo. \v 4 \x * \xo 1:4 \xt Kl 1:12\x*La nedik ta epovo xusu tana ven tu at laaleng ua tanaba lok kaka levenapnovos at leveloklox anarong no ne Moroa i gagas li i ri limixin teren to vana at laxalibet, kusu mo leveloklox anarong noxo lok kapmek la na xap gamasa. \p \v 5 \x * \xo 1:5 \xt Jo 10:28; 17:11\x*La ne Moroa i gagas li i rinemi limixin nunu la neni ik lok tatao nemi mi lolos teren kusu ti loklox arooro, mo ne Moroa naba lox asuvos i at laxavaxap at na lavatbung menemen. \v 6 \x * \xo 1:6 \xt 1 Pi 5:10; Je 1:2\x*La mik lok momo aleng at na lavanga, keke i do mi ekip tangarang lixilik bok be mi tavanga i lox abulu nemi mumu buaang leveloklok tong pen ik lox asongot nemi. \v 7 \x * \xo 1:7 \xt Jop 23:10; Ler 17:3; Ais 48:10; Sak 13:9; Mal 3:3; Je 1:3\x*Ketla anaa levempanga it pot ti lox asuusu mun i do lununu atnemi i lolos. I ngan bok leven gol ni i epovo xusu dina lok kapmex i, din tin tong pen box i ro at laxao. La lununu atnemi, neni lavanga i silok aleng ti logol, neni dinaba lok tong pen i xusu ti long lenget ka i do i lolos kopla kopmen. Melemu minaba ruuna ka leemi asu, la lasinorong eburu mi loklok ngangao at laaleng ne Iesu Karisito naba ru asuvos. \p \v 8 \x * \xo 1:8 \xt Jo 20:29; 2 Ko 5:7\x*Nemi xovisi mina ven tu ren, ketla mi vara aleng i. La monga mixo ven tu ren, ketla mi nunu ren. La mi umsu mi lomomo i silok aleng, la neni mo lomomo nenia axo epovo xusu ana mii poovo i mi tepanga, mila i silok aleng tinotno. \v 9 \x * \xo 1:9 \xt Ro 6:22\x*Lavasuun teren keretna, nemi min tuuna xaka loklox arooro xeneng at labaroonan atnemi, mumu mun lununu atnemi saparav i. \p \v 10 \x * \xo 1:10 \xt Mt 13:16-17\x*La luvuttadi vapaase ali diga terea mumu avukat tinotno levelinga mumu mun i na loklox arooro. Nedi diga vaase ali mi letaba nabalamu no ne Moroa im taba nemi min. \v 11 \x * \xo 1:11 \xt Sam 22; Ais 53; Lu 24:26-27\x*Diga puse i xusu dinaklen kaka rinotno loxonaleng at lovotpot at ne Karisito la naba vot kereva. La digam doma vupuse do Loroonan at ne Karisito no gak lok keneng atnedi, ga paase ali mi levesongsongot ne Karisito naba ekip tangarang min. Neni naba ru pavaa mo levesongsongot, la melemu ren neni naba lok kaka langsangan lisisixam. \v 12 \x * \xo 1:12 \xt Ep 3:10\x*Ne Moroa ga raba asu na levelinga rinedi na luvuttadi vapaase ali xusu nedi di noxo gugu xusuk tik lok tooro nedi xa, ketla ti lok tooro nemi, at loxonaleng diga vaase mumu mo levelinga. Anaa nemi mira ronga xaka vam i at luvuttadi xipkip linga di vaase asu Lagale Lavavang mi lolos at Loroonan Kaala boro vana at laxalibet. Neni na Lagale Lavavang lubung angelo bok di vara aleng i xusu dinaklen i. \s1 Lavapaase Asu At Lixitkis Kaala \p \v 13 Kuren la mina lox agagas levendoxoma atnemi ri lok mo levempanga ne Moroa i vara i. Mina lok tatao avukat luruptuvuk atnimi la mina lok li axap levendoxoma atnemi pana at lorooro avolo, no minaba lok ka i at laaleng ne Iesu Karisito na ru asuvos. \v 14 \x * \xo 1:14 \xt Ro 12:2; Ep 2:3; 4:17-18\x*Minang tonga res at ne Moroa, la nemen gat mi gutam lomlong ti mo lavavara xapmek miga ruuna i gano at levenaleng migak lok at larangtangku. \v 15 La levempanga minak lox i, minak lox i eburu mi lorooro axap atnemi nan manton tino. Atla ne Moroa neni ga ro xaka nemi, neni in manton tino. \v 16 \x * \xo 1:16 \xt Mas 11:44-45; Mt 5:48\x*I ngan Lovoang Kaala i vaase xeretna, “Mina lok ka loklok in manton tino mila nenia an manton tino.” \p \v 17 \x * \xo 1:17 \xt Mt 6:9; Ro 2:11; 2 Ti 4:14; Li 2:23\x*La minaklen i do ne Temen nemi no vana at laxalibet, no nemi mi ngising tin, neni i viila mumu luruptuvuk at limixin la i viila mumu loklok atdi mi legesampoovo mun. Kuren la mina raba axap lorooro atnemi at na lavatbung menemen eburu mi loklok ngangao saparav i. \v 18 \x * \xo 1:18 \xt 1 Ko 6:20\x*La nemi miklen luunun, ne Moroa ga un kaka amlong nemi min basinge lorooro etaba ga ravasu at lavalabat atnemi. La mo luunun ixo epovo xusu tara na lok kapmex i, ngan lisiliva xopla logol. \v 19 \x * \xo 1:19 \xt Gu 20:28; Ib 9:12-14; 1 Pi 1:2\x*Ketla ne Moroa ga un ka nemi mi lada, ni luunun silok at ne Karisito kopmen taxakapmek teren la kopmen bok tibira at Lanasip at ne Moroa. \p \v 20 \x * \xo 1:20 \xt Gu 2:23; Ep 1:4\x*Avot ti luruntudum li at na lavatbung menemen, Moroa ga soxolik ka i xusu ti lok lugugu ren la neni ga ravasu at na levenaleng kavaxap kusu ti lok tooro nemi. \v 21 \x * \xo 1:21 \xt Jo 14:6; Ro 4:24; 5:1-2; 10:9\x*La at na mun langas neni ga lox i la nemi mira nunu at ne Moroa, no ga lox arooro amlong i at lanmet la ga raba box i mi laasen silok. Kuren la lununu atnemi la levendoxoma voovo atnemi i tu rinotno at ne Moroa. \p \v 22 \x * \xo 1:22 \xt Jo 13:34; Ro 12:10\x*La monga, mira ronga ka vam levelinga ruturun la kerepmo lorooro atnemi ira dadat pam la labalamu ruturun i ravasu at lorooro atnimi ti luvutneton nimi. Kuren la mina ebalamu ela mi lorooro axap atnemi. \v 23 \x * \xo 1:23 \xt Jo 1:13; Ib 4:12\x*Mila miga ruuna xaka livipisik amaxat la na lorooro maxat noxo xap ngan laradi at na lavatkangka, ketla naba nemen amisik. Na lorooro ga ravasu at levelinga at ne Moroa la na levelinga i rooro la naba nemen amisik. \v 24 \x * \xo 1:24 \xt Je 1:10-11\x*I ngan Lovoang Kaala i vaase xeretna, \q1 “Limixin axap di noxo nemen abao ngan levempivilis. La lampeneves atnedi na xap ngan levempusuvus aaxa. Levempivilis naba mang, la levempusuvus naba subu su. \v 25 Ketla levelinga at Leeme Silok, ne Moroa ik lox amisik la kopmen taxavaxap teren.” \rq Ais 40:6-8\rq* \m Na levelinga neni Lagale Lavavang nemi miga ronga xaka i. \c 2 \p \v 1 \x * \xo 2:1 \xt Ep 4:22; Je 1:21\x*Kuren la mina lok pes laxaloklok kakapmek basinge nemi. La nemen bok ba mita xaxarang, kopla mina lili aage levelinga, la mina reven peves, kopla mina lox asi tara mi levelinga. \v 2 \x * \xo 2:2 \xt Mt 18:3; 1 Ko 3:2\x*Ketla minak lok ngan laxamdak mumulum, no di vavara inin amisik levendan tus at loroonan. Do mina inin amisix i, minaba mukun at lununu atnimi la minaba lok kaka lorooro avolo. \v 3 I ngan Lovoang Kaala i tong i xeretna, \q1 “Nemi xa miga long terex i do lebelen tuntun at Leeme Silok i lox avukat.” \rq Sam 34:8\rq* \s1 Luuat Too \p \v 4 \x * \xo 2:4 \xt Mt 21:42; Ais 28:16\x*Mina vot parap Leeme Silok, neni Luuat Too no limixin diga lu xepe min do goxo epovo ri lok tugugu. Ketla ne Moroa ga soxolik kaka i ngan luuat, luunun teren i silok aleng la i epovo ri lok tugugu. \v 5 \x * \xo 2:5 \xt Ep 2:21-22; Pas 19:6; Ais 61:6; Li 1:6; Ro 12:1\x*Nemi bok mira lok ngan pam larauat too rip kip gu, la ne Moroa xa i xip loogu laplavang minemi, kusu nemi minaba gugu ngan lavamaasa at ne Moroa. La minam taba i mi leventamtaba at loroonan mo ne Moroa naba siam kaka i xeneng at ne Iesu Karisito. \v 6 \x * \xo 2:6 \xt Ro 9:33; Ep 2:20\x*I ngan Lovoang Kaala i tong asu levelinga at ne Moroa xeretna, \q1 “A soxolik kaka luuat i ruuna luunun i silok aleng la anaba lok li i ngan luuat ti lemesuluk at lemenemen Saion la do nege na nunu ren, neni kopmen tinotno noxo ruuna ka lainmangan.” \rq Ais 28:16\rq* \m \v 7 \x * \xo 2:7 \xt Mt 21:42\x*Mo luuat neni i silok at levendoxoma atnemi limixin mi nunu ren. Ketla tinedi dixo nunu ren, i lok ngan Lovoang Kaala i lok keretna, \q1 “Mo luuat luvuttadi xipkip gu diga sok tixirixes kepe i, ga ravasu ngan Luuat Kis la lugugu ren i silok aleng.” \rq Sam 118:22\rq* \m \v 8 \x * \xo 2:8 \xt Ro 9:33\x*La loxot bok at Lovoang Kaala i vaase xeretna, \q1 “Na Luuat Kis naba lok limixin kusu dina sak kikixin la naba lox asubu nedi.” \rq Ais 8:14\rq* \m Dik sak kikixin atla xopmen dina nunu at levelinga at ne Moroa. Anai i epovo mi lavavara at ne Moroa rinedi. \p \v 9 \x * \xo 2:9 \xt Ais 9:2; 40:20-21; 1 Pi 2:5; Ta 2:14; Gu 26:18; Ep 5:8\x*Ketla nemi lavaanat soxolik ka. Nemi lavamaasa at Loorong Silok, la nemi lubung mixin melemelengan la nemi limixin at ne Moroa akmokso. Neni ga soxolik ka nemi xusu minaba lox asuusu leven gugu nunuan teren. Neni ga ro xaka nemi boro xeneng at lamain bonot la uto xeneng at laxasep maraanu ren. \v 10 \x * \xo 2:10 \xt Ro 9:25\x*Ketla avot at na, nemi goxo ngan limixin at ne Moroa, ketla amonga nemi mi lok ngan limixin teren. I ngan bok gano nemi mi goxoklen lebelen tuntun at ne Moroa, ketla amonga, mira ruuna ka vam lebelen tuntun teren. \s1 Lavasaxaruki At Ne Moroa \p \v 11 \x * \xo 2:11 \xt Sam 39:12; Ga 5:17,24; Je 4:1\x*Larapen tangas orong tarak. A sing nemi mi lodoxoma axap tarak. Nemi mi lok ngan mun limixin kadiong de at na lavatbung menemen. Kuren la mina ru asepsu basinge leveloklok kakapmek at labantuxu, atla neni na leveloklok i vesep eburu mi labaroonan atnemi. \v 12 \x * \xo 2:12 \xt Mt 5:16; Lu 19:44\x*La minap tuvuk avukat at lemeren nedi lavamolon. Mo do dina sok taba parang nemi mi toloklok kakapmek, nedi dinaba ven kibis ba leveloklok nunuan atnemi la dinaba emi asu mi ne Moroa at laaleng potpot teren. \p \v 13 \x * \xo 2:13 \xt Ta 3:1\x*Minang tonga res atnedi axap luvuttadi amgomgo, limixin di lok katling di, mila Leeme Silok i vara i xuren. Minang tonga res at loorong at lenep kangka atnimi, neni lamgomgo at limixin axap. \v 14 La minang tonga res bok atnedi luvuttadi amgomgo at levennep silok, loorong ik sak tiki nedi xusu dina lox asongot nedi dik lok laxakapmek la dina emi asu minedi dik lok luvukat. \v 15 \x * \xo 2:15 \xt 1 Pi 3:16\x*Mila ne Moroa i vara i do minak lok leven gugu nunuan kusu minaba sep pepe levelinga gamasa at luvuttadi rangtangku. \v 16 \x * \xo 2:16 \xt Ga 5:13\x*Minap tuvuk avukat ngan limixin sepsepmus at ne Moroa. La nemen gat mita se bopbop pe laxakapmek atnemi mi leveloklok sepse at lemeren mun at limixin. Ketla minap tuvuk ngan lavaanat saxaruki at ne Moroa. \v 17 \x * \xo 2:17 \xt Ro 12:10; Ler 24:21; Mt 22:21\x*Mina lok ngangao bok at limixin axap, la mina balamu limixin nunu. La mina lok ngangao at ne Moroa la at loorong bok. \s1 Lampoovo At Losongsongot At Ne Iesu \p \v 18 \x * \xo 2:18 \xt Ep 6:5\x*Nemi lavasaxaruki. Minak lok mu asu levendoxoma at lubung amgomgo atnemi la mina lox asu rinotno loklok ngangao atnemi rinedi, kopmen do mina lok ngangao xusuk atnedi di lox asuusu lebelen tuntun tinemi, ketla tinedi bok do di tu mi loboat. \v 19 Moroa naba lox anarong nemi do dina lox asongot nemi mumu mun loklox avukat atnemi na mu asu lodoxoma ren. \v 20 \x * \xo 2:20 \xt 1 Pi 3:14,17; 1 Pi 4:14\x*Ketla mi noxo lok kaka loklox anarong do dina sep nemi xusu laxakapmek nemi miga lox i. Ketla do mina lok ka mun i at loxonaleng mina lok loklox avukat la dina lox asongot nemi xusu nen, Moroa naba lox anarong ba nemi do mina tu tuxuruxun at na levenaleng di lox asongot nimi. \p \v 21 \x * \xo 2:21 \xt Mt 16:24; Jo 13:15\x*La ne Moroa ga ro xaka nemi mumu i na langas at losongsongot, mila ne Karisito axa ga suma losongsongot tinemi la ga lok taba nemi mi na langas, kusu minaba mumu asu lenaim teren. \q1 \v 22 \x * \xo 2:22 \xt Jo 8:46\x*“Neni goxo lok bok tekakapmek, la teta goxo ronga asu bok tekaxarang ga ravasu at lungusno ren.” \rq Ais 53:9\rq* \m \v 23 \x * \xo 2:23 \xt Ais 53:7; 1 Pi 3:9\x*At loxonaleng diga paase aksaksa rin, neni goxo vorang di mi teloklok bok kuren. La at laaleng neni ga lok kaka loklox asongot, neni goxo lok tepanga. Ketla neni ga lok li levendoxoma axap teren at ne Moroa neni Laradi Rongtonga Linga la na lugugu ren in manton tino. \v 24 \x * \xo 2:24 \xt Ib 9:28; Ro 6:2,11; Ais 53:5\x*Ne Karisito axa neni ga xip leveng kakapmek atnedik keneng at labantuxu ren uto at laxaba kusu nedik tanaba sepmus basinge loklok kakapmek atnedik la ata rooro tik lok leveloklok ik mokso. La nemi mi lox avukat pam mumu mun laranin kooxing teren. \v 25 \x * \xo 2:25 \xt Ais 53:6; Isi 34:5-6; Mt 9:36; Jo 10:14\x*Nemi miga lok ngan laxasipsip diga soronga. Ketla ananga, migaramlong pam kusu mina mumu asu Lamgomgo atnemi la neni Laradi Loklok Tatao bok at lorooro at loroonan atnemi. \c 3 \s1 Lara Koenasun \p \v 1 \x * \xo 3:1 \xt Ta 2:5\x*At na mun langas bok la nemi lavakin minang tonga res at levendoxoma at lavatlok atnemi, kusu do tentaba atnedi do dixo nunu at levelinga at ne Moroa, loklok mun atnemi naba lok nedi la dina nunu. La ixo epovo bok do minaba vaase axa toxolinga ri lok kun levendoxoma atnedi. \v 2 Dinaba ba gili mun lorooro atnedi mumu mun loklox avukat la loklok ngangao atnemi rinedi. \p \v 3 \x * \xo 3:3 \xt 1 Ti 2:9\x*Nemen gat migutak lok kaka leveloklok tooro me maxamang kusu ti lok nemi mina milik maraanu, ngan langas mik lox i at levengkabinim at lempatlak atnemi, kopla levenpun mi vonga i la levesingsiga ming siga i. \v 4 Ketla lorooro atnemi nak milik maraanu la mina umsu mi loklox atnaasan i lok nunuan aleng. Neni mo loklok i silok aleng ti ne Moroa. \v 5 Naba lok ngan lavakin manmanton megano digak lok li levendoxoma atnedi at ne Moroa la diga sisinang amaraanu nedi mila diga mumu asu levendoxoma at lavatlok atnedi. \v 6 \x * \xo 3:6 \xt Lur 18:12\x*Ne Sera gak lok kerepmo. Neni gang tonga res at ne Abaram, la neni ga toro rin do leeme silok teren. Nemi miba lok ngan laxaalik teren do minak lok luvukat la mi noxok marat at tepempanga. \p \v 7 \x * \xo 3:7 \xt Ep 5:25\x*Kuren pam la nemi bok lavatlok, mina ekilen ela mi levempakpakes at lavakin atnemi la minaklen avukat box i do nedi dixo ruuna tololos solo la mina lok tooro nedi. Mina raba nedi mi loklok ngangao mila nemi buru axap minaba ruuna xaka lorooro, ni laramtaba boro at ne Moroa. Mina mu asu i na levelinga xusu, kopmen tekarakat naba lok pe levesingising kantubu atnemi lara koenasun eburu mi ne Moroa. \s1 Losongsongot Mumu Leveloklox Avukat \p \v 8 \x * \xo 3:8 \xt Mt 5:44; 1 Ts 5:15; 1 Pi 2:23\x*Ti lox axap na levelinga xeretna, nemi axap mina ruuna legesa doxoma eburu mi legesa sumsuma xeretna. Mina doma mumu nedi di ruuna levenmumuat. La mina ebalamu ela ngan nemi loxoeton la mina lox asuusu lebelen tuntun tinedi la mina lox asi nemi. \v 9 Nemen gat miguta vorang laxapmek mi laxapmek kopla mina vorang lavapaase kapmek mi lavapaase kapmek bok. Ketla mina vorang i na leveloklok mi loklox anarong, atla loklox anarong neni lavanga ne Moroa ga xaape xusu neni naba raba nemi min at laaleng neni ga ro xaka nemi. \v 10 I ngan Lovoang Kaala i vaase i xeretna, \q1 “Do nege i vara i xusu na ruuna lorooro nunuan, la i vara i xusu neni na ven levenaleng avukat, neni na ke xepe lavapaase kapmek, la na axav i at laxaxarang. \v 11 La neni na ke xepe laxakapmek la nak lok luvukat, la neni na lolos ti lok ka lenmila keneng axap at lorooro axap teren. \v 12 Leeme Silok i reven tatao limixin manmanton la ing tonga res at levesingising atnedi. Ketla ik sok tixirixes kepe nedi dik lok laxakapmek.” \rq Sam 34:12-16\rq* \p \v 13 Nege naba lox asongot parang nemi do levendoxoma atnemi naplivi rik lok luvukat? \v 14 \x * \xo 3:14 \xt Ais 8:12-13; Mt 5:10; 1 Pi 2:20; 4:14\x*Ketla do mina lok kaka loklox asongot mumu loklox avukat mi lox i, minaba ruuna xaka bok leveloklox anarong. Kuren la nemen gat miguta marat at teta, kopla mina bulu. \v 15 Ketla keneng at lorooro atnemi mina lok ngangao at ne Karisito, atla neni Leeme Silok. Mina gagas at levenaleng axap ti porang levesusue at limixin at levenaleng dina susue nemi mi levendoxoma lolos atnimi saparap ne Karisito. \v 16 \x * \xo 3:16 \xt 1 Pi 2:12\x*Ketla mina vaase ridi mi lumulus la loklok ngangao, la lorooro atnimi nak lok nunuan. Do dina paase xapmek mumu lorooro avukat atnemi keneng at ne Karisito, dinaba mangan at levelinga kapmek nedi di paase i. \v 17 \x * \xo 3:17 \xt 1 Pi 2:20\x*I lox avukat kusu mina xip kaka losongsongot at leveloklox avukat, do neni lavavara at ne Moroa xuren, la kopmen do at leveloklok kakapmek. \p \v 18 \x * \xo 3:18 \xt Ro 6:10; Ep 2:18\x*Karisito ga met gesara mene nga ri ru korop ti laxakapmek axap atnimi. Neni laradi manmanton tino ga met ti rukun levesongsongot ti limixin di lok laxakapmek, kusu ti lam kaka di uto saparap ne Moroa. Diga sev amet labantuxu ren, ketla Loroonan Kaala ga lox aroo xat amlong i. \v 19 La at lorooro xat at loroonan teren, neni ga vavang ti limixin, labaroonan atnedi gak lok at loxokoxo.\f * \fr 3:19 \ft Na lemenemen di so asen i do Edesa.\f* \v 20 \x * \xo 3:20 \xt Lur 6–7\x*Nedi labaroonan at na limixin digang tonga xepe ne Moroa at levenaleng neni ga ngangais atnaasan nedi at levenaleng ne Noa ga gugu lavatmon teren. Keneng teren ga lavanuan mun nedi diga roo su basinge laraan, \v 21 \x * \xo 3:21 \xt Ib 10:22\x*la ga lok ngan neni lampoovo at lesep susu, ananga nemi bok mi roo su ren. Ni xopmen do rit gos kepe laxakapmek at labantuxu, ketla neni laxakaape mi lox i ri ne Moroa mi lodoxoma avukat. La neni na i lox arooro nemi mumu mun lorooro xat amlong at ne Iesu Karisito, \v 22 \x * \xo 3:22 \xt Mt 22:44; Ep 1:20-21\x*la neni gara urut pam uto vana at laxalibet, la amonga it kis saparap lekngen tino at ne Moroa. Neni Lamgomgo at lubung angelo axap eburu mi luvuttadi loklok tatao la limixin lolos boro vana at laxalibet. \c 4 \s1 Lorooro Maxat \p \v 1 \x * \xo 4:1 \xt Ro 6:2,7\x*Karisito ga suma losongsongot at labantuxu ren, kuren la nemi bok mina ru lolos ngan mo levendoxoma neni ga ruuna i. Mo do nege i ekip tangarang mi losongsongot at labantuxu ren mumu lununu ren saparap ne Karisito, i lox asuusu i do neni ixok lok bok ba xeneng at laxakapmek. \v 2 \x * \xo 4:2 \xt 1 Jo 2:16\x*Kuren la mina ke axap lorooro atnemi at na lavatbung menemen kusu mina mu asu lodoxoma at ne Moroa, la kopmen lavavara kapmek mun at limixin at na lavatkangka. \v 3 \x * \xo 4:3 \xt Ep 2:2-3\x*Levenaleng mo gara xap pam migak lok laxaloklok kakapmek mo kerekngan luvuttadi at lamain di vavara nak lox i. I ngan loklok kakapmek at labantuxu, loklok kakapmek maxamang at lixitkis epot, la levereven peves, liinin kadan lolos, lengkot mamangan, la laplavang ti laxampoovo vanga, ni laxapmek bok no i bilingot tinotno. \p \v 4 Limixin no dik lox amisik at na laxakapmek, di sangu rinotno at loxonaleng nemi mixo emu minedi rik lok mo leveloklok i lok kapmek. Kuren la di paase aksaksa mumu nemi. \v 5 \x * \xo 4:5 \xt Gu 10:42\x*Ketla nedi dinaba raba levelinga loklox axasep atnedi ri ne Moroa mumu laxakapmek diga lox i. Neni laradi i gagas kusu na viila limixin axap di rooro la nedi bok diga met pam. \v 6 \x * \xo 4:6 \xt Ro 8:10; 1 Ko 5:5\x*Neni ba na lavasuun teren la ne Iesu ga vavang bok mi Lagale Lavavang ti limixin diga met pam, atla neni naba viila axap limixin mumu mo leveloklok diga lox i at lorooro atdi. Ketla Lagale Lavavang gat pas tinedi xusu labaroonan atnedi naba roo la dinaba epovo ri rooro avolo ngan ne Moroa. \s1 Laradi Loklok Tatao Avukat At Leventamtaba At Ne Moroa \p \v 7 \x * \xo 4:7 \xt Ro 13:11-12; 1 Ko 10:11; 1 Jo 2:18\x*Laxavaxap at levempanga axap, monga i auret. Kuren la levendoxoma atnemi na xasep nunuan la mina lok tatao avukat levempatpas atnemi, kusu miba epovo na lok levesingising. \v 8 \x * \xo 4:8 \xt 1 Pi 1:22; Je 5:20\x*Mavana at levempanga axap, mina ebalamu ela nemi mi lorooro axap atnemi atla labalamu at limixin naba rupe laxangkakapmek solo. \v 9 \x * \xo 4:9 \xt Ib 13:2\x*Mina lok maraose kaka leventaba vetpes uto xeneng at laraogu atnemi la nemen gat mita gagalinga. \v 10 \x * \xo 4:10 \xt Ro 12:6-8\x*Nemi getgesara mi ruuna lugugu at loklok tatao levenasen tamtaba at ne Moroa. Kuren la mina gugu avukat mi nom leventamtaba axap no ne Moroa ga raba nemi min, ti lok tooro leventaba vetpes. \v 11 \x * \xo 4:11 \xt 1 Ko 10:31\x*I ngan nege do neni laradi vavang, neni na vavang akmokso mi levelinga at ne Moroa. La do nege i gugu taba, neni na gugu taba mi lolos ne Moroa im taba i min, kusu keneng mun at na leventamtaba axap, leemi asu nabat pas ti ne Moroa mumu mun ne Iesu Karisito. Leemi asu la lolos tin amisik la kopmen taxavaxap teren. Tuturun. \s1 Losongsongot At Laradi I Mumu Ne Karisito \p \v 12 \x * \xo 4:12 \xt 1 Pi 1:6-7\x*Larapen tangas orong tarak. Nemen gat miguta sangu at leveloklox asongot lolos ik lok tong pen nemi, la na ngan ta lavanga maxat petpes i vot parap nemi. \v 13 \x * \xo 4:13 \xt Gu 5:41; Ro 8:17; 2 Ti 2:12; Je 1:2\x*Ketla mina sosoro atla nemi mi ru buru mi ne Karisito at losongsongot teren, kusu minaba umsu mi lomomo at laaleng lisisilok teren na ru asuvos. \p \v 14 \x * \xo 4:14 \xt Sam 89:50-51; 1 Pi 2:20\x*La do limixin di paase aksaksa rinimi mumu laasen at ne Karisito, luvukat nabat pas tinemi. Lavasuun at nai keretna, mo loroonan i lox asuusu lisisixam, ni Loroonan at ne Moroa la ik lok keneng atnemi. \v 15 La do teventaba atnemi na lok kaka loklox asongot, ixo lox avukat do dina lok ka i ngan luvuttadi sepsep tadi, kopla luvuttadi xipkip pilo xopla luvuttadi xapmek, kopla nemi mik lox angtang lorooro at leventaba vetpes. \v 16 \x * \xo 4:16 \xt Gu 11:26; Pl 1:20\x*Ketla do mina lok ka loklox asongot mumu mun i do nemi luvuttadi mumu asu at ne Karisito, nemen gat nemi guta mangan at loklok di lox i rinimi. Ketla mina tong avukat ti ne Moroa atla nemi mip kip laasen at ne Karisito. \v 17 \x * \xo 4:17 \xt Jer 25:29; 2 Ts 1:8\x*Laaleng ira auret pam ti laaleng ete na ru kaxat, la ne Moroa naba viila mumu avot be loklok at limixin tinotno ren. Do na ru kaxat avot minedik, naba lok kapmek tinotno rinedi, dixo ronga res at Lagale Lavavang at ne Moroa. \v 18 \x * \xo 4:18 \xt Lu 23:31\x*I ngan Lovoang Kaala i vaase i xeretna, \q1 “I lolos aleng do luvuttadi manmanton dina roo su, ketla naba lok ba xereva rinedi luvuttadi xopmen dinaklen ne Moroa la dik lok laxakapmek?” \rq Ler 11:31\rq* \p \v 19 \x * \xo 4:19 \xt Sam 31:5\x*Kuren la nedi dik lok kaka losongsongot mila dik lok mu asu lavavara at ne Moroa, dina tu atmatkun at leveloklok nunuan, la lununu atnedi na tu tuxuruxun at ne Moroa, Laradi Runtudum Li, la neni kopmen na domampe leveng kakaape ren. \c 5 \s1 Lubung Sipsip At Ne Moroa \p \v 1 \x * \xo 5:1 \xt Ro 8:17\x*Nenia lamgomgo at lotu ngan lubung amgomgo dik lok kantubu atnimi. Nenia aga ven levesongsongot ne Karisito gap kiv i, la nenia anaba ruuna ka lisisixam eburu minemi mo naba ru asuvos. La a sing nemi lubung amgomgo xeretna, \v 2 \x * \xo 5:2 \xt Jo 21:15-17; Gu 20:28; Pm 1:14; Ta 1:11\x*mina lok tatao avukat laxasipsip ne Moroa gara raba vam nemi min. La minak lok tatao nedi mi lavavara axap atnimi, ngan ne Moroa i vara i xuren. Nemen gat miguta lok lugugu atnemi mi lodoxoma rip kip unun teren, ketla mina lox i mi lodoxoma rinotno ri gugu. \p \v 3 \x * \xo 5:3 \xt 2 Ko 1:24; Pl 3:17; Ta 2:7\x*Nemen gat miguta ru polo nedi dik lok maxopok at loklok tatao atnemi, ketla minap tuvuk ase nedi. \v 4 \x * \xo 5:4 \xt Ib 13:20; 1 Ko 9:25\x*La do Lamgomgo Rinotno at Lubungsipsip na vot, minaba ruuna xaka luunun, ni lempatbungorong i ruuna lisisixam, la mo lisisixam teren noxo repes. \p \v 5 \x * \xo 5:5 \xt Ep 5:21; Je 4:6\x*La nemi bok luvuraau minang tonga ka levelinga at limixin mukun la mina mumu asu i. La nemi axap mina lok kaka langsangan loklok ngangao kusu na umsu kantubu atnemi. I ngan Lovoang Kaala i vaase xeretna, \q1 “Moroa naba vaase asi luvuttadi di simi aurut nedi, ketla i lox asu letaba nabalamu ren tinedi dik lox asi di.” \rq Ler 3:34\rq* \m \v 6 \x * \xo 5:6 \xt Mt 23:12; Je 4:10\x*Kuren la mina lox asi nimi maxopok at lukngen lolos at ne Moroa, kusu neni naba xip aurut nemi at laaleng ni ga lok katling i. \v 7 \x * \xo 5:7 \xt Sam 55:22; Mt 6:25-30\x*Mina ke raba i mi levenanbulu atnemi, atla neni im doma loxokok tinemi. \p \v 8 \x * \xo 5:8 \xt 1 Ts 5:6\x*Mina lok tatao avukat lavatpas atnimi la mina reven avukat, atla laradi munepen minemi neni ne Satan im booro saasaa ngan lavatlaion mukmusak, la i puse ri tuvuttadi xusu neni na lok kapmek di.\fig Satan i lok ngan lavatlaion.|alt="lion prowling" src="hk00046b.tif" size="col" loc="1Pe 5:8-9" copy="BFBS (Knowles)" ref="1 Pi 5:8" \fig* \v 9 \x * \xo 5:9 \xt Ep 6:11-13; Je 4:7\x*Ketla mina tu atmatkun at lununu atnemi la mina tu munepen min, atla mikleklen i do luvuttadi axap at na lavatbung menemen di nunu, dip kip na legesemet songsongot mun. \p \v 10 \x * \xo 5:10 \xt 1 Ts 2:12; 1 Pi 1:6\x*Noxo lox abao la levesongsongot atnimi naba xap, la ne Moroa i umsu mi letaba nabalamu la ni ga ro xaka nimi kusu mina ruuna ka lisisixam avolo ren keneng at ne Karisito. Neni naba lox axatu nimi, la neni naba lox alolos nimi la na lok li nemi ro at lixitkis avukat. \v 11 La ateren kusuk mun lolos amisik la kopmen taxavaxap teren. Tuturun. \s1 Levelinga Loklox Axap \p \v 12 Sailas ga lok tooro ia xusu ti malagan na lovoang mutmut tinemi, la neni netak at laasen at ne Karisito. A vara i xusu ana lox alolos nemi mi levelinga at na lovoang, anai neni letaba nabalamu rinotno at ne Moroa. Kuren la mina tu atmatkun keneng teren. \p \v 13 \x * \xo 5:13 \xt 2 Ti 4:11\x*Luvutneton nemi at lotu keneng at lemenemen Babilon, nedi limixin soksoxolik ka, di lox aonon lavapaase momo atnedi rinemi, la ne nuruk bok ne Mak i lox aonon lavapaase momo rinemi. \v 14 \x * \xo 5:14 \xt 1 Ko 16:20\x*Mina eseega rangarang nimi mi lenetnes ti lok katling lixitkis etangas atnimi. \p Lenmila nak lok eburu axap minemi limixin at ne Karisito. I ruturun.