\id 1JN - Madak Bible [mmx] -Papua New Guinea 2011 (DBL 2015) 
\h 1 Jon 
\toc2 1 Jon 
\toc1 1 Jon 
\toc3 1 Jo 
\mt1 1 Jon  
\mt2 Lovoang Avot At Ne Jon  
\imt1 Levelinga Loklox Axasep  
\imt2 Levenmaares 90–95 A.D.  
\ip Jon neni lun pinivu at ne Iesu. I se neni gak sokso neni ga nemen to Epesas. Neni ga malagan i na lovoang tinedi limixin nunu diga nemen to Asia, mumu legepu vanga. Lara avot i lok keretna: neni ga malagan i na xusu ti lox asuvos luruturun mumu lorooro ruturun. Ni ga lok keretna, do “Ata ebalamu mila ne Moroa ni lavasuun at labalamu.” Lara mumu i lok keretna: lentaba luvuttadi babala diga vot la diga xarang taba limixin nunu mi levelinga xeretna, “Labantuxu atdik, neni lavanga ua i lok kapmek. Neni loxot tinotno at laxakapmek. Kuren la ne Iesu goxo vot mi labantuxu. Neni ga vot la neni ga milik ngan laradi ketla neni goxo ruuna labantuxu.”  
\ip Na levelinga limixin babala diga tong i la di goxopara limixin dina ruuna loklok nunuan la dina lox asuusu labalamu. La diga doma i do ne Iesu xopmen lamdak tuturun at ne Moroa. Kuren la ne Jon ga malagan i na lovoang kusu ti lok kepe i mo laxaxarang atdi.  
\iot Lengkot silok keneng at na lovoang  
\io1 \ior 1:1-4\ior* Lavasuun tinotno at na lovoang.  
\io1 \ior 1:5–2:17\ior* Langas at laxasep mi langas at lamain nedu xopmen duna epovo.  
\io1 \ior 2:18-29\ior* Jon ga vaase aronga nedi mumu limixin munepen.  
\io1 \ior 3:1–4:6\ior* Nege nedi limixin at ne Moroa la nege nedi limixin at ne Satan.  
\io1 \ior 4:7–5:5\ior* Ik mokso do limixin nunu dina ebalamu ela.  
\io1 \ior 5:6-21\ior* Lempapaase mumu lavantun lempanga i paase katling ne Iesu.  
\c 1  
\s1 Lavapaase Im Taba Lorooro  
\p
\v 1 \x * \xo 1:1 \xt Jo 1:1-2,4; 1 Jo 2:13-14\x*Nema lavaun pavang ma malagan li na levelinga mumu mo laradi ga rooro avot ti luruntudum li at na lavatbung menemen. Nema maga ronga levelinga ren la maga ven i mi levengkatli atnema. Maga reven kisip lugugu ren la maga long tu ren. Neni Lenavolo im taba lorooro la ma vavang min tinimi.  
\v 2 \x * \xo 1:2 \xt Jo 1:14\x*Mo laradi im taba lorooro ga vor asuvos, nema maga reven i la ma tong asu i rinimi. La ma vavang bok min tinimi, neni Luntoo Avolo, la neni gat kis esogo eburu mi ne Temen dik la melemu ga vor asuvos tinama.  
\v 3 Lempanga axap mo laradi ga lox i, maga ven pam i, la maga ronga vam levelinga ren. Ma vavang bok min tinemi, kusu nemi minat kis esogo eburu minema kerekngan nema mat kis esogo mi ne Temen dik la mi ne Nitna bok ne Iesu Karisito.  
\v 4 \x * \xo 1:4 \xt Jo 16:24\x*Nema ma malagan na levelinga nunuan tinimi kusu lomomo atdik naba umsu aleng.   
\s1 Lavatpas Atdik Keneng At Laxasep  
\p
\v 5 \x * \xo 1:5 \xt 1 Ti 6:16; Je 1:17\x*Na levelinga nema mara ronga vam i boro at ne Nitna la ma vavang min tinemi keretna, Moroa neni Laxasep la kopmen lamain nak lok teren.  
\v 6 \x * \xo 1:6 \xt 1 Jo 2:4\x*La mo do tara atdik na lok do it kis esogo mi ne Moroa, ketla lamain i umsu keneng at lorooro ren, neni laradi xaxarang la lorooro ren kopmen nak mokso la kopmen na sixit emu mi levelinga ruturun.  
\v 7 \x * \xo 1:7 \xt Jo 3:21; Ais 2:5; Ib 9:14; Li 1:5; 7:14\x*Ketla mo do nedik ta nemen at laxasep, kerekngan ne Moroa i nemen at laxasep, nedik atat kis esogo eburu. La lada at ne Iesu, nitna ne Moroa i lox adadat nedik basinge levengkakapmek axap.   
\p
\v 8 \x * \xo 1:8 \xt Sam 32:5; Ler 28:13\x*Dola tara na lok keretna, “Kopmen taxapmek tarak,” neni i xarang axa i, la levelinga ruturun kopmen nak lok teren.  
\v 9 Ketla mo do nedik ta soxomus asu laxakapmek atnedik ti ne Moroa, ni naba doxoma xepe i la ni naba lox adadat nedik basinge leveloklok kapmek axap atdik, mila neni Laradi Ruturun la Laradi Manmanton.  
\v 10 Dola tara na lok keretna, “Nenia a goxo lok taxapmek,” neni mo laradi i lox asuusu i do ne Moroa i ngan leeme xaxarang, mila ne Moroa ga tong i do limixin axap di lok laxakapmek. La do mo laradi i paase kerepmo, levelinga at ne Moroa kopmen na nemen keneng teren.   
\c 2  
\s1 Iesu Neni Laradi Loklox Arooro Atdik  
\p
\v 1 \x * \xo 2:1 \xt Ib 7:25; 9:24\x*Luvutnuruk orong. Nia a malagan na levelinga rinemi kusu mi noxo lok taxapmek. Ketla do tara na lok laxakapmek, ne Iesu Karisito neni Laradi Manmanton naba lok tooro i. Iesu naba sing saparap ne Moroa ne Temen dik, kusu ne Moroa naba doxoma xepe mo laxakapmek ap mo laradi.  
\v 2 \x * \xo 2:2 \xt Jo 1:29; 11:52; Kl 1:20; 1 Jo 4:10,14\x*Iesu neni laxaavuk tidik la ni ga lok langas kusu ne Moroa na doxoma xepe laxakapmek atdik. La ni noxo doxoma xepe laxakapmek atnedik kusuk mun. Ketla neni naba doxoma xepe bok laxakapmek at limixin axap at na lavatbung menemen.   
\p
\v 3 Dola nedik ta mu asu levelinga at ne Moroa, i ngan nedik taklen tinotno i do nedik limixin teren.  
\v 4 \x * \xo 2:4 \xt 1 Jo 1:6,8\x*Mo do tara na lok dola neni at ne Moroa, ketla neni kopmen na mu asu levelinga ren, neni laradi xaxarang, la levelinga ruturun at ne Moroa xopmen nak lok keneng at lorooro ren.  
\v 5 \x * \xo 2:5 \xt Jo 13:15; 14:21,23; 1 Jo 4:12,17; 5:3\x*Ketla mo do tara na mu asu levelinga at ne Moroa, i lox asuusu i do labalamu at ne Moroa ik lox ampana keneng at lorooro ren. Neni na langas nedik ataba ven asuusu ba i do nedik dit kis esogo mi ne Moroa.  
\v 6 Do taradi na doma i do lorooro ren ik lok keneng at ne Moroa, loklok teren na lok ngan tinotno ne Iesu Karisito.   
\s1 Leretere Maxat  
\p
\v 7 \x * \xo 2:7 \xt 2 Jo 1:5-6; 1 Jo 2:24; 3:11\x*Larapen tangas orong tarak. Na levelinga a malagan li vam i, kopmen leretere maxat. Levelinga ganoxa min, la miga ruuna ka i at lurutu kaxat at lununu atnimi saparap ne Iesu Karisito, la mo levelinga migara ronga vam i ni levelinga me migomgo.  
\v 8 \x * \xo 2:8 \xt Jo 13:34; Ro 13:12; Jo 1:9\x*Ketla nia ana malagan li leretere maxat, ne Iesu ga lox asuusu i at lorooro ren la ik lok bok keneng at lorooro atnimi. Do tara na mu asu na levelinga, i lox asuusu i do lamain ira xap la laxasep i vubeles pam at lorooro ren.   
\p
\v 9 \x * \xo 2:9 \xt 1 Jo 3:10,15; 4:20\x*Do tara na tong i do neni i nemen at laxasep, ketla neni i belengatngas ti neton, ni move i nemen keneng at lamain.  
\v 10 \x * \xo 2:10 \xt Jo 11:9; Ro 14:13\x*Do tara na balamu neton, neni i nemen keneng at laxasep la kopmen taxapmek nabak lok teren kusu na lox asak kikixin i.  
\v 11 \x * \xo 2:11 \xt Jo 11:10; 12:35\x*Ketla do tara na belengatngas ti neton, neni i nemen keneng at lamain. La lavatpas teren at na lorooro xopok ik lok bok at lamain kerekngan laradi luxatli ren i main, la it pas tangtagap gamasa mila laxakapmek ik lok pe luxatli ren.   
\p
\v 12 \x * \xo 2:12 \xt 1 Ko 6:11\x*Nenia a malagan na lovoang tinemi luvutnuruk orong. Lavasuun teren keretna, Moroa ira doxoma xepe vam laxakapmek atnimi maxeneng at laasen at ne Iesu Karisito.  
\v 13 \x * \xo 2:13 \xt 1 Jo 1:1\x*Nenia a malagan na lovoang tinemi limixin mukun. Lavasuun teren keretna, nemi miklen ne Iesu Karisito mo gak lok ganoxa at lereot. Nenia a malagan na lovoang tinemi limixin maxat. Lavasuun teren keretna, nemi mira on basinge vam loklok kakapmek at ne Satan. Nia a malagan na lovoang tinemi luvutnuruk orong. Lavasuun teren keretna, miklen ne Moroa, ne Temen dik.  
\v 14 Nia a malagan na lovoang tinemi limixin mukun. Lavasuun teren keretna, nemi miklen ne Iesu Karisito mo gak lok ganoxa at lereot. Nia a malagan na lovoang tinemi limixin maxat. Lavasuun teren keretna, nemi mi tu tuxuruxun at lununu atnimi la levelinga at ne Moroa i lox asuusu lempanga nunuan at lorooro atnemi. La mira on basinge vam loklok kakapmek at ne Satan.   
\s1 Nemen Mita Mumu Asu Loklok At Na Lavatkangka  
\p
\v 15 \x * \xo 2:15 \xt Ro 8:7\x*Nemen mita ngaongao mu loklok at na lavatkangka eburu mi lapnovos teren. Mo do tara na ngaongao mu i, naba lox asuusu i do labalamu at ne Moroa, ne Temen dik kopmen nak lok keneng teren.  
\v 16 \x * \xo 2:16 \xt Ro 13:14; Je 4:16; 1 Pi 2:11\x*Leveloklox axap at na lavatkangka ngan levempavara kapmek at labantuxu, levereven peves, la loklox asilok, nedi na leveloklok kopmen na laa boro at ne Temen dik. Mo leveloklok i suusu at loklok at lavatkangka.  
\v 17 \x * \xo 2:17 \xt Mt 7:21; 1 Ko 7:31\x*La na lavatkangka eburu mi leveloklok kakapmek teren, naba xap. Ketla laradi do i mumu asu lavavara at ne Moroa, neni naba rooro avolo.   
\s1 Lavapaase Aronga Mumu Nedi Di Munepen Mi Ne Iesu  
\p
\v 18 \x * \xo 2:18 \xt 1 Pi 4:7; Mt 24:5,24; 2 Jo 1:7\x*Luvutnuruk orong. Levenaleng kavaxap at na lavatbung menemen ira rupot pam. Gano nemi miga ronga levelinga do laradi munepen naba rupot, la buaang limixin munepen dira rupot pam. Kuren la nedik diraklen i do levenaleng kavaxap i rupot pam.  
\v 19 \x * \xo 2:19 \xt Gu 20:30; 1 Ko 11:19\x*Gano diga nemen eburu minedik ngan limixin at ne Iesu Karisito. Ketla nedi goxopmen limixin teren, kuren la diga on basinge dik. Nedi do gita nunu at ne Iesu Karisito, nedi gitoxo on basinge dik. Ketla diga on basinge vam dik, kuren la dik ta xasep do nedi xopmen at ne Iesu Karisito.   
\p
\v 20 \x * \xo 2:20 \xt 1 Ko 2:15; 1 Jo 2:27\x*Ketla ne Iesu Karisito, Laradi Melemelengan, ga raba vam nimi mi Loroonan Kaala at ne Moroa. Kuren la nemi axap miga ruuna ka vam levelinga ruturun teren.  
\v 21 Nia a malagan na lovoang tinimi kopmen do mixoklen levelinga ruturun teren. Ketla a malagan i na mila mikleklen levelinga ruturun la kopmen taxaxarang i nemen atnedi di ruuna levelinga ruturun at ne Moroa.  
\v 22 \x * \xo 2:22 \xt 1 Jo 4:3; 2 Jo 1:7\x*Nege neni laradi vapaase xaxarang? Ni laradi i paase keretna, “Iesu neni kopmen Lanarong at ne Moroa.” Ni na laradi ik sok tixirixes kepe ne Temen dik eburu mi ne Nitna, kuren la neni laradi munepen mi ne Moroa.  
\v 23 \x * \xo 2:23 \xt Jo 5:23; 15:23; 1 Jo 4:15; 5:1; 2 Jo 1:9\x*Do taradi i sok tixirixes kepe ne Nitna ne Moroa, i ngan do neni i sok tixirixes kepe bok ne Temen. Do taradi i nunu at ne Nitna ne Moroa, neni i nunu bok at ne Moroa, ne Temen nedik.   
\p
\v 24 Minam tebeng lolos amisik mo levelinga miga ronga i, ap mo levenaleng miga ruuna ka lununu maxat. Do kuren, minabat kis esogo amisik mi ne Nitna, la ne Temen.  
\v 25 \x * \xo 2:25 \xt Jo 3:15; 6:40\x*La neni naba lox epovo lavapaase ali ren, no ni ga xaape min tinedik keretna, neni naba raba nedik mi lorooro avolo.   
\p
\v 26 Nia a malagan na levelinga rinemi ri lox axasep nimi mi loklok at limixin di lok tong i xusu dina sar asoogong nimi.  
\v 27 \x * \xo 2:27 \xt Jo 16:13\x*Ketla nemi miga ruuna ka vam Loroonan Kaala, ne Iesu Karisito ga raba nimi min, la mo Loroonan Kaala ik lok keneng atnemi. La ixo epovo do tara na anasa nimi, ketla Loroonan Kaala i lox axasep nimi mi lempanga axap. La mo Loroonan Kaala xopmen laxaxarang mun, ketla ni i ruturun. La nemi minat kis esogo mi ne Iesu kerekngan Loroonan Kaala ira lox ase vam nemi min.   
\p
\v 28 \x * \xo 2:28 \xt 1 Jo 3:2; 4:17\x*Luvutnuruk orong. Minat kis esogo amisik mi ne Iesu kusu at lovotpot teren mi noxo marat la mi noxo mangan.   
\p
\v 29 \x * \xo 2:29 \xt 1 Jo 3:7,10\x*Nemi mi xasep do ne Iesu neni Laradi Manmanton, la kerepmo nemi mi xasep bok do laradi ik lok leveloklok nunuan, i lox asuusu i do neni i ruuna ka vam livipisik amaxat.   
\c 3  
\s1 Monga Dik Gi Nemen Ngan Luvutnitna Ne Moroa  
\p
\v 1 \x * \xo 3:1 \xt Jo 1:12-13; 16:3\x*Labalamu at ne Temen dik i silok aleng, ni gara lox asuusu vam i ridik keretna. Neni ga soxot nedik do luvutnitna ne Moroa. La i ruturun tinotno, nedik luvutnitna ne Moroa. Limixin at na lavatkangka dixokleklen ne Moroa, kuren la nedi xopmen dinaklen bok dik.  
\v 2 \x * \xo 3:2 \xt 2 Ko 3:18; Pl 3:21\x*Larapen tangas orong tarak. Monga nedik luvutnitna ne Moroa, ketla kovisi bok ata xasep do nedik taba unus tinotno xereva. Ketla nedik takleklen i do at laaleng ne Iesu na ru asuvos, nedik tanaba lok ngan i mila tana epen etang tinotno ba min.  
\v 3 Nedi axap di ngangais mi lomomo ti mo laaleng, amisik di lok kepe laxakapmek at lorooro atdi kusu dina dadat basinge laxakapmek la lorooro atnedi naba dadat axap kerekngan ne Iesu.   
\p
\v 4 Do tara na lok laxakapmek, i los polo levelinga at ne Moroa, mila laxakapmek ni loklok ti los polo levelinga at ne Moroa.  
\v 5 \x * \xo 3:5 \xt 2 Ko 5:21; 1 Pi 2:22-24; 1 Jo 2:2\x*La nemi mikleklen i do ne Iesu ga rupot kusu ti lox asepmus limixin basinge laxakapmek atdi. La kopmen taxapmek nak lok at ne Iesu.  
\v 6 \x * \xo 3:6 \xt Ro 6:1-2,14; 1 Jo 3:9\x*La nedi dit kis esogo mi ne Iesu, di noxo lox amisik laxakapmek. Ketla do tara i lox amisik laxakapmek, i lox asuusu i do neni xovisi na ven kibis ne Iesu la kopmen naklen i.   
\p
\v 7 \x * \xo 3:7 \xt 1 Jo 2:29\x*Luvutnuruk orong. Mina lok tatao avukat nemi kusu tara noxo sar asoogong nimi. Do tara ik lox amisik lempanga in manton, neni laradi manmanton, kerekngan ne Karisito in manton tino.  
\v 8 \x * \xo 3:8 \xt Jo 8:44\x*Do tara ik lox amisik laxakapmek, neni at ne Satan, mila ne Satan ga lok laxakapmek, ga ruka i ganoxa at lereot. Lavasuun at lovotpot at ne Nitna ne Moroa do neni na sele utut kepe lugugu at ne Satan.   
\p
\v 9 \x * \xo 3:9 \xt 1 Jo 5:18\x*Do tara i ruuna livipisik amaxat at lorooro ren keneng at ne Moroa, ni noxok lox amisik laxakapmek, atla lorooro maxat at ne Moroa i nemen keneng teren. Do tara i ruuna ka vam livipisik amaxat at ne Moroa, neni ixo epovo ri lox amisik laxakapmek.  
\v 10 Anai i lox axasep dik do nege di luvutnitna ne Moroa, la nege bok di luvutnitna ne Satan. Lara do i lok tavanga kopmen nak mokso, kopla kopmen na balamu neton, neni xopmen ne nitna ne Moroa, ketla neni ne nitna ne Satan.   
\s1 Mina Balamu Ela Nimi Ngan Limixin At Ne Moroa  
\p
\v 11 \x * \xo 3:11 \xt Jo 13:34\x*Mo levelinga miga ronga i, ga ruka i at lurutu kaxat at lununu maxat atnimi saparap ne Iesu Karisito, la mo levelinga i lok keretna. Nedik ata ebalamu ela.  
\v 12 \x * \xo 3:12 \xt Lur 4:8\x*Nemen dik ta lok ka loklok at ne Kaen. Neni laradi at ne Satan la neni ga sev amet neton, laasen teren ne Abel. Tila ba ne Kaen ga sev amet ne Abel? Lavasuun teren do ne Kaen ga ven kibis i do luruptuvuk teren ga lok kapmek la luruptuvuk at ne Abel ga lox avukat.   
\p
\v 13 \x * \xo 3:13 \xt Mt 5:11-12; Jo 5:18-19\x*Luvutnetak mi luvurinuk. Nemen mita sangu dola limixin at na lavatkangka dina belengatngas tinemi.  
\v 14 \x * \xo 3:14 \xt Jo 5:24; 1 Jo 2:11; Mt 5:21-22\x*Nedik ataklen i do nedik gara on basinge vam lolos at lanmet, la nedik dira beles pam ti lorooro. Nedik takleklen i na mila nedik ta ebalamu ela. Do tara kopmen tabalamu ren, neni move i nemen maxopok at lolos at lanmet.  
\v 15 \x * \xo 3:15 \xt Li 21:8\x*Do tara i belengatngas ti neton, neni i lok ngan laradi sepsev amet tadi, la atakleklen i do laradi sepsev amet tadi kopmen torooro avolo rin.   
\p
\v 16 \x * \xo 3:16 \xt Jo 13:1; Ga 1:4; 1 Ts 2:8\x*At na loklok at ne Iesu Karisito nedik ta xasep at lavasuun at labalamu. I lok keretna, Iesu Karisito ga met nop loklok atdik. Kuren la nedik bok ata raba lorooro atnedik ti lok tooro limixin at ne Moroa.  
\v 17 \x * \xo 3:17 \xt Lal 15:7\x*La kerepmo, do taradi apnovos i ven ti neton ik pakes aleng, ketla kopmen na raba i mi tempanga, kereva, i vara ne Moroa? Kopmen tinotno.  
\v 18 \x * \xo 3:18 \xt Je 2:15-16\x*Luvutnuruk orong. Labalamu atnedik kopmen noxo lok ngan levelinga la lempapaase gamasa mene nga. Ketla ata ruuna ka labalamu ruturun, kusu leveloklok atdik naba lox asuusu i do labalamu ruturun mo ik lok keneng atdik.   
\p
\v 19 Do nedik ta ruuna labalamu xerepmo, i lox asuusu i do nedik luvuttadi at ne Moroa, mo i ruturun. La kerepmo nedik ta noxo suma lanmarat ap mo laaleng dik taba ru ro melamgo at ne Moroa.  
\v 20 Do nedik ata suma xapmek ap mo laaleng mumu laxakapmek nedik ga lok pam i gano, ata xasep do nedik limixin at ne Moroa, la neni noxo lok li lumumuat atdik, mila ne Moroa noxo doma solo mo lusumsuma atdik la ikleklen lempanga axap la naba doxoma xepe laxakapmek atdik.   
\p
\v 21 \x * \xo 3:21 \xt Ib 4:16\x*Larapen tangas orong tarak. Nedik ta noxo ruuna ka lumumuat mumu lusumsuma atdik, kuren la nedik ta noxo suma lanmarat to melamgo at ne Moroa,  
\v 22 \x * \xo 3:22 \xt Mt 21:22\x*la i epovo do ata sue ne Moroa ri lempanga ta vara rin. La neni naba raba dik min mila nedik ta mumu asu levelinga ren la tak lok lempanga ik lox amomo i.  
\v 23 \x * \xo 3:23 \xt Jo 6:29; 13:34\x*La levelinga ren tidik i lok keretna, nedik tana nunu at laasen at ne Nitna, neni ne Iesu Karisito la atana ebalamu ela kerekngan ne Iesu ga tong i ridik.  
\v 24 \x * \xo 3:24 \xt Ro 8:9; 1 Jo 4:13\x*Do tara i mumu asu levelinga at ne Moroa, neni it kis esogo mi ne Moroa la ne Moroa it kis esogo min. La nedik takleklen i do ne Moroa it kis esogo midik mila neni ga raba dik mi Loroonan Kaala ren.   
\c 4  
\s1 Mina Ila Mumu Avot Be Levenanasa Vetpes  
\p
\v 1 \x * \xo 4:1 \xt Mt 7:15; 1 Jo 2:18; 2 Jo 1:7; 1 Ts 5:21\x*Larapen tangas orong tarak. Nemen gat mita rebeng alis soso levenanasa atnedi di tong i do di ruuna Loroonan Kaala. Ketla mina viila mumu avot be levenanasa atdi do i sixit epovo mi levenanasa at ne Moroa. Mina lox i xuren atla buaang lavaeme vapaase xaxarang dit pas tangtagap at lengkot axap.  
\v 2 \x * \xo 4:2 \xt 1 Ko 12:3\x*I epovo do mina ven kibis mo laradi i ruuna levenanasa at Loroonan Kaala at ne Moroa. Do neni i tong asu i do ne Iesu, neni Lanarong at ne Moroa la ga vee radi ngan nedik, la neni i ruuna Loroonan Kaala at ne Moroa.  
\v 3 \x * \xo 4:3 \xt 1 Jo 2:18; 2 Jo 1:7\x*Ketla do tara kopmen na tong i do ne Iesu ga rupot boro at ne Moroa, neni kopmen at ne Moroa. Limixin kerepmo nedi luvuttadi munepen mi ne Iesu. Nemi miga ronga i do dinaba rupot la monga dira nemen pam at na lavatbung menemen.   
\p
\v 4 \x * \xo 4:4 \xt Mt 12:29; 1 Jo 5:4-5\x*Luvutnuruk orong. Nemi limixin at ne Moroa. Mira ke xepe vam lavaeme vapaase xaxarang atla ne Moroa i nemen keneng atnemi la lolos teren i volo lolos at ne Satan, neni lamgomgo at limixin at na lavatbung menemen.  
\v 5 \x * \xo 4:5 \xt Jo 15:19\x*Nedi mede at na lavatbung menemen mun, kuren la di anasa mi levempanga at na lavatbung menemen, la limixin at na lavatbung menemen ding tonga res atdi.  
\v 6 \x * \xo 4:6 \xt Jo 8:47\x*Ketla nedik limixin at ne Moroa, la mo do laradi ikleklen ne Moroa, neni nabang tonga res atdik. La mo laradi do kopmen neni at ne Moroa, neni noxong tonga res atdik. La kerepmo i epovo ta ven kibis i do nege i ruuna Loroonan Tuturun, la nege i ruuna loroonan kaxarang.   
\s1 Moroa Ni Laradi Balamu  
\p
\v 7 \x * \xo 4:7 \xt 1 Jo 2:29\x*Larapen tangas orong tarak. Ata ebalamu ela mila ne Moroa ni lavasuun at labalamu. Mo lara do i umsu mi labalamu, ni ne nitna ne Moroa la ikleklen ne Moroa.  
\v 8 \x * \xo 4:8 \xt 1 Jo 4:16\x*Mo lara do kopmen tabalamu ren, neni kopmen naklen ne Moroa atla ne Moroa neni Laradi Balamu.  
\v 9 \x * \xo 4:9 \xt Jo 3:16\x*La ne Moroa ga lox asuusu labalamu ren tinedik keretna, neni ga riki legesamdak teren ude at na lavatbung menemen, kusu nedik taba ruuna ka lorooro avolo ma xeneng at lugugu ren.  
\v 10 \x * \xo 4:10 \xt Ro 5:8-10; 1 Jo 2:2\x*Labalamu i lok keretna. Kopmen dola nedik diga vavara solo ne Moroa, ketla neni ga balamu dik la ga riki ne Nitna ngan laxaavuk ti ru korop ti laxakapmek atnedik.  
\v 11 \x * \xo 4:11 \xt Mt 18:33\x*Larapen tangas orong tarak. Do ne Moroa i balamu nedik kerepmo, nedik bok ata ebalamu ela.  
\v 12 \x * \xo 4:12 \xt Jo 1:18; 1 Jo 2:5-6\x*Kopmen tara goxo ven tu at ne Moroa. Ketla do nedik ta ebalamu ela, i lox asuusu i do ne Moroa i nemen keneng atdik, la labalamu ren i lox ampana keneng at lorooro atdik.   
\p
\v 13 \x * \xo 4:13 \xt 2 Ko 1:22; 1 Jo 3:24\x*Nedik di xasep dola nedik di rooro at ne Moroa la ne Moroa i rooro atdik, atla ni ga raba vam dik mi Loroonan Kaala ren.  
\v 14 \x * \xo 4:14 \xt Jo 3:17\x*La nema magara ven pam ne Nitna la ma tong asu i dola ne Temen dik ga riki ne Nitna ngan Laradi Loklox Arooro ri limixin at na lavatbung menemen.  
\v 15 \x * \xo 4:15 \xt 1 Jo 5:5\x*Do tara i tong asu i do ne Iesu Nitna ne Moroa, ne Moroa i nemen keneng teren la neni i nemen keneng at ne Moroa.  
\v 16 \x * \xo 4:16 \xt 1 Jo 4:8\x*La nedik axa takleklen i do ne Moroa i balamu dik la kerepmo ta xasep do ik lok tatao dik.  
\p Moroa neni Laradi Balamu la do tara i rooro keneng at labalamu, ni i nemen keneng at ne Moroa la ne Moroa i nemen keneng teren.  
\v 17 \x * \xo 4:17 \xt 1 Jo 2:28\x*At na mun langas labalamu at ne Moroa ik lox ampana keneng at lorooro atdik kusu at laaleng ete ata noxo ruuna lanmarat, mila lorooro atnedik at na lavatbung menemen i lok ngan mun lorooro at ne Iesu.  
\v 18 Do tara i ruuna labalamu, ixo epovo do lanmarat na nemen keneng at lorooro ren. La mo labalamu ruturun teren naba lok kepe mo lanmarat i nemen at lorooro ren. Lanmarat ik lok at laradi i lok laxakapmek la naba xip lumumuat. Do tara i ruuna lanmarat, kovisi labalamu na epampana at lorooro ren.   
\p
\v 19 Nedik ta umsu mi labalamu atla ne Moroa ga balamu avot dik.  
\v 20 Do tara i lok dola i vavara ne Moroa ketla i belengatngas ti neton, ni laradi xaxarang. Atla neni ixo epovo xusu ni na vavara ne Moroa no neni goxovisi na ven tu ren do neni noxo balamu avot be neton ua neni ira ven tu vam teren.  
\v 21 \x * \xo 4:21 \xt Mt 5:44-45; Mk 12:29-31\x*Mo lavapaase ne Karisito gara raba vam dik min i lok keretna. Do tara i vavara aleng ne Moroa, neni na balamu bok neton.   
\c 5  
\s1 Limixin At Ne Moroa  //  Di Los Kimit Laxakapmek  
\p
\v 1 \x * \xo 5:1 \xt 1 Jo 4:15\x*Do tara i nunu do ne Iesu neni Lanarong at ne Moroa, i lox asuusu i do i ruuna ka vam livipisik amaxat at lorooro ren keneng at ne Moroa. La do tara i balamu ne temen, i balamu bok laxamdak mi laxaalik teren.  
\v 2 Do tara i vavara aleng ne Moroa la i ronga res at levelinga ren, i lox asuusu i do neni i balamu limixin at ne Moroa.  
\v 3 \x * \xo 5:3 \xt Jo 14:15,23-24; 2 Jo 1:6; Mt 11:30\x*Do nedik ta ronga res at levelinga ren, i lox asuusu i do dik ta vavara aleng ne Moroa. La noxo lolos tinedik kusu tana mumu asu levelinga ren.  
\v 4 \x * \xo 5:4 \xt Jo 16:33\x*Do tara i ruuna ka vam livipisik amaxat at lorooro ren keneng at ne Moroa, i lox asuusu i do neni ira on basinge vam leveloklok at na lavatbung menemen. Do tara i nunu at ne Iesu, na i lox asuusu i do neni ira on basinge vam loklok at na lavatbung menemen.  
\v 5 \x * \xo 5:5 \xt Ro 8:37; 1 Jo 4:4\x*Nege i epovo kusu na los kimit loklok at na lavatbung menemen? Neni xusuk mun laradi i nunu dola ne Iesu neni Nitna ne Moroa.   
\s1 Levelinga Loklok Katling Mumu ne Iesu  
\p
\v 6 \x * \xo 5:6 \xt Jo 1:29-34\x*Iesu Karisito ga si boro vana at laxalibet la lempanga loklok katling ga rupot ti lox asuusu i do neni ne Nitna ne Moroa. Ladan ga ru katling lesep susu at ne Iesu la lada ga ru katling lanmet teren. Ni goxo lok ka mun lesep susu, ketla neni ga met bok. La Loroonan Kaala i tong asu i do ne Iesu neni ne Nitna ne Moroa la i epovo do ata siam ka levelinga ren atla levelinga ren i ruturun.   
\p
\v 7 Kerepmo na lavantun lempanga i lox asuusu i.  
\v 8 \x * \xo 5:8 \xt Jo 15:26\x*Ni Loroonan Kaala, ladan, la lada. La na lavantun axap di lox asuusu legesa vanga mun.  
\v 9 \x * \xo 5:9 \xt Jo 5:32-37; 8:18\x*I epovo dik ta nunu at levelinga at taradi, ketla levelinga at ne Moroa i mumuat aleng ti mo levelinga, mila neni levelinga mumu ne Nitna.  
\v 10 \x * \xo 5:10 \xt Ga 4:6\x*Do tara i nunu at ne Nitna ne Moroa, neni i ruuna ka vam mo levelinga keneng at lorooro ren. Do tara kopmen na nunu at ne Moroa, i lok ne Moroa ngan laradi xaxarang, atla ni kopmen na nunu ap mo levelinga ne Moroa ga vaase i mumu ne Nitna.  
\v 11 Mo levelinga i lok keretna, Moroa ga raba vam dik mi lorooro avolo, la ne Nitna, ni Luntoo Avolo.  
\v 12 \x * \xo 5:12 \xt Jo 3:36\x*Dola tara i nunu at ne Iesu, i ruuna ka vam nom lorooro. Do tara kopmen na nunu at ne Iesu, ne Nitna ne Moroa, neni noxo ruuna ka nom lorooro.   
\s1 Lorooro Avolo  
\p
\v 13 \x * \xo 5:13 \xt Jo 20:31\x*Nia a malagan na lempanga rinemi mi nunu at laasen at ne Nitna ne Moroa kusu mina xasep do mira ruuna ka vam lorooro avolo.  
\v 14 \x * \xo 5:14 \xt Jo 14:13; 16:23; 1 Jo 3:21-22\x*Nedik taklen tuturun i do dik ta epovo na vot pasa ne Moroa, neni i ronga dik mo do dik ta sing ti lempanga i epovo at lavavara ren.  
\v 15 Nedik ta xasep pam do ne Moroa ing tonga levesingising atdik, kuren la nedik ta xasep bok do neni im taba dik mi mo lempanga ta ngising tin.   
\p
\v 16 \x * \xo 5:16 \xt Mt 12:31\x*Do tara na ven neton na lok laxapmek, la mo laxapmek kopmen na lolos kusu tara naba seeve ren, neni na sing ti ne Moroa, la ne Moroa naba raba i mi lorooro avolo. Nia a paase mumu nom limixin di lok laxakapmek la di noxo seeve ren. Ketla lara laxakapmek mo, do limixin dina lox i, dinaba seeve mu i.\f * \fr 5:16 \ft Tinedi di vas gasinge ne Moroa la di sok tixirixes kepe rinotno i.\f* Nia xopmen na paase mi nom.  
\v 17 Do tara na lok lempanga kopmen na mokso, ni i lok laxakapmek. La leveloklok kakapmek mo, do tara na lox i, neni noxo seeve ren.   
\p
\v 18 \x * \xo 5:18 \xt 1 Jo 3:9; Jo 17:5\x*Nedik takleklen i do tara i ruuna ka vam livipisik amaxat at lorooro ren keneng at ne Moroa, neni noxo nemen at laxakapmek. La ne Nitna ne Moroa i lok tatao i xusu laradi kapmek ne Satan noxo lok kapmex i.  
\v 19 \x * \xo 5:19 \xt 1 Jo 4:6\x*Nedik takleklen i do nedik limixin at ne Moroa, la limixin at na lavatbung menemen kopmen dina nunu at ne Iesu Karisito, di nemen maxopok at lolos at laradi xapmek, ne Satan.  
\v 20 \x * \xo 5:20 \xt Jo 17:3\x*Nedik ta xasep bok pam keretna, ne Nitna ne Moroa ga rupot la ga raba vam dik mi laxasep, kusu nedik tabakleklen ne Moroa, neni Laradi Ruturun. Nedik dik lok at ne Moroa i ruturun la at ne Nitna, Iesu Karisito. La ne Moroa neni Luntoo Avolo.   
\p
\v 21 \x * \xo 5:21 \xt 1 Ko 10:14\x*Luvutnuruk orong, mina lok tatao nimi basinge lempoovo moroa.