\id 2TI - Bargam NT [mlp] -Papua New Guinea 2001 (web edition -2012 bd) 
\h 2 Timoti 
\toc1 Sansandek gigerta Pol in Timoti amen mar tonan lahta 
\toc2 2 Timoti 
\toc3 2Ti 
\mt1 2 Timoti  
\mt2 o  
\mt2 Sansandek gigerta Pol in Timoti amen mar tonan lahta  
\imt1 Gamuk ameb lehaqta  
\ip Pol ame gigerta uliq Rom-ub irquran osad in Timoti amen sansandek ka mar tonim eman leh ug. Kam nab Pol afaqan kabemmo soryaq. In aholyogniz asor God ago kabiy emnan haqad hulosim lehsa in amomo osyaq. Ossa mat amulik-mulikmo bo Pol ahol waqsa bunmo in Pol aholib hiqiy yaqay. Hiqiysa Pol ago hazizir amebta nab in amomo iyim tur. Teq in ago hazizir na le a hi dimniyan in anad tiqemyaq, Muran Rom mataw ka ya inol emid ya tumoqdaiq haqyaq. Nazaq iyan in Timoti bulonid agerab hidmo tuboldaq haqad in amen gamuk ka eman lah.  
\ip Timoti in Pol inaq kabiy agaribmo emsa Pol in Timoti loyinsa in ago amun diqta nog iyyaq. Nazaq iyan luweq in irquran osaqta na ago Timoti anad meqniy hasdaq haqad in gamuk awaz meqinta kazaq bulon, Timoti, ni ninad helmota na hi hulosad ni Yesus Krais ago wagam dimunta bilaqaqta na ni waz naqmo hiqiy ham. Ni God ago gamuk na bunmo muzin bugsa mataw afaqan nigad santitiy nigsa ni zaway diq iyeq God kabiy nigta na ni emmo em ham.  
\ip Pol anad emyaq, Ya moqid teq Timoti in yaqgo ban waqeq God ago kabiy ka em tuteq ad tilehdaq haqyaq. Haqad in Timoti bulonim bilam, Kabiy ka God-mo agota iyan in wamuzsa in a hikidik woqdaq ham. Sa mataw i gisan ka wol emid moqsa i giwitan le God inaq kuluwa-kuluwmo ginad dimniysa osamta ham. Nazaq iyan Timoti ham, ni ya isen muzinad helmo haqad nidan sosil hi iyan ham. Ad teq ni nigem kiskismo ussa ni mataw ginan ninad bilaqsa afaqan bunmo sor ham.  
\c 1  
\ms1 Timoti aholtuw bulad God ago kabibiy matmo diq iydaq  
\p
\v 1 Ari yaqmo Pol. God-mo anad bilaqan ya Krais Yesus ago Aposel iyta. Ya on mataw gibilensa in os dimunta God negnan hel diqmo bilamta na ago hurit kem daqay haqad God in kabiy na ya ibenab amta.   
\p
\v 2 Timoti, ni yaqgo amunmo diq nog iysa ya ni ninan inad bilaqaqta. Ya ninmen gamuk ka mar tonim eman leh nigaq.  
\p I Gimam God teq i gigo Iyahta Krais Yesus inaq in gigem dimunta nigad in ni ninan ginad meqniysa ni nigem midemeqmo usan.   
\s1 I Yesus awagamun dimunta ago gimebay hi woqan  
\p
\v 3 Ya isesan God abin wazinad ayon lotu em yaqayta nazaqmo ya emaiqmo. Emad ya igem loyinsa in God ameb dimun diqmo usaq. Timoti, taromab teq zeqab inaqmo ya God inaq gamuk emad ya ni ninadin emad God esey ugaiqta.  
\v 4 Ad ya nihulosim lehsa ni nimeqil womta na ya anadin emad ya a ta nibiynan inad diq bilaqaq, ya nibiyeq teq inad tidimniydaq haqad.  
\v 5 Teq ni nimileq a hi iyad Krais anan helmo diq haqaqta na ya anadin emaiq. Kwaziqmo ni nises Lowis teq ni ninen Yunis in helmo haqad osiyta. An ya inad emaiq in ginad nog ni ninad usaqmo haqaiq.  
\v 6 Nazaq iyan kwaziqmo ya iben niholib emim niwazsa ni God ago naw wamta na ni anadin emad akabiyan waz ta eraqsa in niholib ayahmo diq usan. Bilaqne faq miynan tonsa mat ulam haman amileq a ta eraqaqta nazaq nog.  
\v 7 Ni ninad em. God in ago Bugaw igan Bugaw na i giqemid i mataw girabungo a haiqta. Haiqgam. Bugaw na i giqemid i zaway diq iyeq osad i on mataw ginan ginad bilaqsa i gigo luw os anononmo wamuzam haqad in ago Bugaw na igta.   
\p
\v 8 Nazaq iyan ni i gigo Iyahta awagamun ulalab bilaqnan nimebay hi woqan. Ad ya Iyahta ago kabiy emsa mataw ya iwazim iqirquran ya kawa osaiqta na ago ni nimebay hi woqanmo. Haiqgam. God zaway nigsa ni ya inaq araqibmo Yesus awagamun dimunta akabiyan emad i araqibmo afaqan soruq.  
\v 9 I God ago on mataw tawonta iyeq osam haqad in i gililewunim aholyon giwamta. Teq i kabiy dimdimunta emsa in i gibiyad giwamta nazaq a haiq. In anadibmo agem dimunta samanmo igad in i gilumsihim giwamta. Kwaziqmo diq in og ka eman a hi gwahtiqsamo in anad tiqam, Ya on mataw iholyon giwaqdaiqta na inad negad ya Krais Yesus ago kabiy amalib tigilumsihdaiq ham.  
\v 10 Haqan muran mat i gilumsihim giwaqaqta amatin Krais Yesus-mo bo tugwahtiqim in God anad bilaqan usta na eman ulal tiqiy. In bolim moq ago zaway walemim teq in os dimunta kuluwa-kuluwmo osayta na ago dante eman saw anuwanib tugwahtim. An on mataw Yesus awagamun dimunta huritim anan helmo tihaqayta na in dante na ahol waq kemayta.   
\p
\v 11 Ya Yesus awagamun dimunta naqmo waqeq a le og saw haresmo bilaqdaiq haqad God ya itowun eman ya in ago Aposel iyta. Iyim ya in ago gamuk na asuleqin on mataw negad luwaiqta.  
\v 12 Daq alulin naqmo ago ya kawa santitiy waqad osaiqta. Teq ya imebay a hi woqaq. Na ezaqgo ya mat anan helmo haqaiqta na ago ya tuhurit has. In kabiy dimunta ya ibenab amta na inmo wamuz naqmo hiqiysa yaqgo kabiy na dimunmo ussa le Krais Yesus ta boldaqta na akaman tugwahtiqdaq.   
\p
\v 13 Ya suleq dimunta nibilenta na ni anadin emad tuteqmo ni suleq na adan emad os. Osad ni Krais Yesus asen muzad ni God anan helmo haqad teq ni on mataw ginan ninad bilaqan.  
\v 14 God ago Bugaw Dimunta i giduganib usaqta na in nilumsihsa ni God kabiy dimunta nibenab amta na anononmo wamuzsa in hi woqan.   
\p
\v 15 On mataw saw Esiya-ibta na bunmo gileh tiyagiy. Ad in gilikmanib mataw giger Figelus ayow Hermogenes inaq tiqihulosiymo. Na ago ni tuhuritta.   
\p
\v 16-17 Teq ya Onesiforus asenlulniz gimen Iyahta bulonaiqta, in mataw na ginan anad meqniydaq haqad. Na ezaqgo ya iqirquran kab ossa Onesiforus in ya iben am waziyta ka ago amebay a hi womta. Haiqgam. In uliq Rom-ub kab bolim in aholtuw bulad inagunad luwim le in bo ya tiqibiyta. In sirisirimo bo ya ibiysa ya igem hastitaysa zaway muturta waqyaiq.  
\v 18 Nazaq iyan ya inad awaz meqin amalib Iyahta kazaq bulonaiq, Iyahta haqaiq, kam abebtanta nab ni Onesiforus anan ninad meqniyan haqaiq. Teq mat na uliq Efesus-ib ame kabemmo ya ilumsihtamo. Na ago ni tuhurit kamta.   
\c 2  
\s1 Timoti in Krais Yesus ago bab mat dimunta iyeq osan  
\p
\v 1 Ari yaqgo amun Timoti, Krais Yesus agem dimunta nigad nilumsihaqta na ni anadin emad ni niwaz meqniyeq os.  
\v 2 Ad ningo walmataw gilikmanib ni mataw asor gituw inaqta ginagun. Ginagunad gibiyeq teq ni gamuk kwaziqmo ya mataw kabemmo gimeb nibilenan ni huritta na agamukan bunmo ni mataw na neg. Negid teq in gamuk na asuleqin tuteq in gigo walmataw gibileniymo.   
\p
\v 3 Teq ni Krais Yesus ago bab mat dimunta iyeq osad ni santitiy sor, i bunmo Yesus ago kabiy emad santitiy sorauqta nazaqmo.  
\v 4 Mat bab emaqta na in kabiy haresmo mataw uliqabta emayta nagan in a hi emaqta. Haiqgam. In ago ayahta anad muzinad in ago ayahta kabiy anan anad bilaqaqta naqmo amomo in emaqta.  
\v 5 Teq mat sibtitayim ameb le towub gwahtiqaqta na in anadibmo a hi sibaqta. Haiqgam. In daq na ago agununin muzinim sibaqta. Ari in gunun nagan itiyoneq in ago naw na a hi waqdaq.  
\v 6 Teq mat aholtuw bulim kabiyab didaq layta naqmo in kabiy ame waqim neqaqta. Mataw hares in didaq ameta na waqim a hi neqayta.  
\v 7 Gamuk naway na ni anadin emsa Iyahta teq ninad emid hastitaydaq. Hastitaysa ni gamuk ezeqman na alulin bunmo ninad tiqem hasdaq.   
\p
\v 8 Tuteqmo ni Yesus Krais anadin em. In Devit asenlulib gwahtiqim in moqim teq ta eramta. Ya Yesus awagamun dimunta nazaqmo bilaqaiqta.  
\v 9 Teq ya wagam dimunta na bilaqsa mataw ya inan mat meqin haqad in afaqan amo amo yagim le tiqiqirquriy. Bilaqne ya gavman gigo gunun itiyonim daq meqinta emta nazaq. Ta teq in God ago gamuk irqureq a hi wasih daqay.  
\v 10 Nazaq iyan ya on mataw God gilumim aholyon giwamta na ginadin emad ya ituw a hi hiqiysa afaqan ka bunmo soraiqta. Sorad ya inad emaiq, Ya God ago on mataw na gimen afaqan ka sorsa teq in le ban dimunta Krais Yesus in gimen wastitayan usaqta na waqeq in God inaq ginad dimniysa kuluwa-kuluwmo tuqos daqay haqaiq.  
\v 11 Teq gamuk araq ya nibilendaiqta ka in hel diqtaqmo.  
\li1 I Yesus Krais inaq moqeq teq i inaq kayeqmo tuqosam.   
\li1
\v 12 Ad i afaqan sorad gituw a hi hiqiysa teq i inaq araqibmo king iyeq tuqosam.  
\li1 Ari i gileh ugsa teq in i gileh tiqigdaqmo.   
\li1
\v 13 Teq i ginad buliyeq i gigo gamuk helta in bulonta na i a ta hi muzinsa in i gigo hib daq nazaq a hi emdaq.  
\li1 Inmo gamuk helta i gibilanta na tumuzin tutdaq.  
\li1 Na ezaqgo inmo ago gamuk in bilamta na in a hikidik hulosdaq.   
\s1 Timoti atuw bulad God ago kabibiy matmo diq iydaq  
\p
\v 14 Tuteqmo ni gamuk nawa ya teko nibilenta na ningo on mataw ginadib emsa in anadin emad osiy. Ad ni God ameb in gidek wazad gamuk atoranmo gibilensa in gamuk amikmikta aqanan hi mugiy. An mug nazaq na in mat araq a hikidik ulumsihaqta. Haiqgam. Mataw nazaq an mugsa mataw ta asor gamuk meqinta na huritad in ginad dimunta usaqta na timeqniyaqta.   
\p
\v 15 Ni niholtuw bulad God ago kabiy emsa in ni ninan anad dimniyan. Ad ni on mataw in ago gamuk helta asuleqin negad ni gamuk na alulin anonon ninad em hasadmo in gibilen. Ni nazaq God ago kabiy wastitayeqmo emad teq ni in ameb turad ningo kabiy anan nimebay a hi woqdaq.  
\v 16 Teq ni og ka ago gamuk samanta God abin wazan woqaqta na bunmo gileh ug. Mataw gamuk naqanta bilaqad oseq in God anad huloseq daq meqinta haresmo emsa le daq naqmo ayahmo diq in gilikmanib tuqusdaq.  
\v 17 Ussa in gigo gamuk meqinta na on mataw kabemmo giholib lehdaq, bilaqne mat aholib asulan meqinta gwahtiqim lilihim ban bunmo waqaqta nazaq nog. Mataw giger Himeneus ayow Filetus inaq in gamuk naqanta bilaqayta.  
\v 18 In giger gamuk helta ago dante tuhulosim in bilaqay, Mataw hodhodab eraq daqayta akaman na tekomo tugwahtim haqayta. Abeb mataw moqeq in a ta hi eraq daqay haqayta. Haqad in mataw asor ginad helta walebolsa in ginadnad tiqemayta.   
\p
\v 19 Teq God ago gamuk awaz meqniyim usad ahol a hi buliyaqta. In bilaqne tituq araq zawayta tileyan turaqta nazaq nog. Teq tituq na ahulib gamuk giger mar tonan usaqta na gigo araq in kazaq bilam,  
\li1 Iyahta in ago on matawta na gigo tuhurit ham.  
\m Teq ta araq na in bilam,  
\li1 On mataw Iyahta ahaqenib iyim abin wazinayta na bunmo in daq meqinta gileh ugiy ham.   
\p
\v 20 Ni ninad em. Bit araq ayahtab reb deg teq yuqsan amo amo giqusaqta. Nagah na asor gol teq silva amalib giqemiyta. Teq asor ayib sisoqiyta teq asor og soskaqib giqemiyta. Nagah na asor in kabiy dimdimunta emgo giqusaqta teq asor in kabiy meqmeqinta emgo giqusaqta.  
\v 21 Nazaq iyan on mataw in giholib daq meqinta ya ginan teko nawa tibilayta nagan suhol bugeq in bilaqne gog deg dimdimunta amalib kabiy dimunta emayta nazaq nog tiqiy daqay. Iyeq in bit anamren na amomo agota iysa in giwazsa in aben inaq diq tiqiy daqay. Sa bit anamren na in gimalib kabiy dimdimunta emgo haqad wastitayeqmo gigo banab giqemdaq.   
\p
\v 22 Nazaq iyan mataw minminta gigemab ginad meqinta gwahtiqaqta nagan ni gileh ugad tuk. Tukeq ni on mataw gigem anumlan haiqmo osad in Iyahta ahaqenib iyim anan biyayta naqmo nenaq luwad ne bunmo God-mo ago daq titnonta muzinad luwiy. Ad ni mataw dimunta na nenaq God anan helmo haqad ne an anan ginad bilaqsa zib alowabmo osiy.  
\v 23 Teq mataw nan agadanta bilaqsa in gilikmanib an mug alulin haiqta gwahtiqsa ni gamuk na asor hi bilaq. Mataw gamuk naqanta bilaqad in gigem meqniysa an haresmo wadayta. Na ago ni tuhuritta.  
\v 24 Iyahta ago kabibiy mat in mataw nenaq an a hi mugdaqta. Haiqgam. In mataw bunmo gilowan tondaqta. Teq in ago walmataw God ago suleq gibilen sireqsa mataw ta asor in gihar ugsa in mataw na gigo afaqan sorad a hi ginadaqta.  
\v 25-26 Haiqgam. Mataw na in ago gamuk othassa in kiskismo ginad wastitaydaqta. Mataw gamuk othasayta na in Satan ago dobub woqan Satan in giwazim giqeman in anad muzinad daq emayta. Teq Iyahta ago kabibiy mat na in mataw naqanta kiskismo giwastitaydaqta. Na ezaqgo luweq God in mataw na gilumsihid in ginad tubuliy daqay. Ginad buliyeq gigo daq meqinta gileh ugad teq in God ago gamuk anan ginad em has daqay. Ginad em haseq teq in Satan ago dob bayid woqsa asanib gwahtiqeq osad in ginad hastitaysa dimunmo tuqos daqay.   
\c 3  
\s1 Kam abebtanta na bo sinsin tiqiysa teq on mataw daq meqinta kabemmo em daqay  
\p
\v 1 Ari ni ninad em. Kam abebtanta na tubolsa afaqan meqmeqinta kabemmo kazaq tugwahtiqdaqta.  
\v 2 Mataw in gimo gihol anadin emad mani kabemmo waqgo ginad em daqayta. Teq in gihol abin iluwid eraqsa in igmo ag haqad nan meqinta haresmo bilaq daqayta. Teq in ginenmaman giqez othas daqayta. Teq on mataw in gimen daq dimunta emsa in ginad dimunta a hi neg daqayta. Teq in God gileh ugad daq anumlan inaqta naqmo emad os daqayta.  
\v 3 Teq in mataw amota meqin diq ossa gibiyad in ginan ginad a hikidik meqniydaqta. Teq in mataw ginan gigem meqniyad in ginad na a hikidik buliy daqayta. Teq in mataw gigilehunan bilaq daqayta. Teq in giholmo in ginad wamuzdaqta. Teq in gimot meqniysa in mataw haresmo gimeqin ton daqayta. Teq in God ago daq dimunta na bunmo geg ug daqayta.  
\v 4 Teq in giyogniz kat negeq giwaqeq bab gibenab giqem daqayta. Teq in ginad hi emta adan muzinad bilaq daqay, Igmo asittaqmo haq daqayta. Teq in ginad dimniysa osnan ginad bilaqsa in God anan ginad a hi bilaq daqayta.  
\v 5 Teq in mataw kat negad God ago daq akabiyakinmo em daqayta. Ta teq in God ago zaway anan helmo a hi haqad in asit diq a hi loyin daqayta. Nazaq iyan ni mataw naqanta girabunad pesanmo luw.   
\p
\v 6 Na ezaqgo mataw na gilikmanib asor in le on ginad haiqta na gigo bitab gwalim kat negad ginad wamuzayta. On naqanta gigo daq meqinta kabemmo giholib usad iyan in ginad soqotim usaqta. Sa in gihol gigem eraqsa in muzgomo iyayta.  
\v 7 On na tutimmo suleq dimunta huritayta teq gamuk dimunta na ginadib lehim in soqotim a hi usaqta. Nazaq iyan in gamuk helta na anan ginad a hi em hasayta.   
\p
\v 8 Mataw nawa daq meqmeqinta nazaq emayta na in gamuk helta bab ugayta, kwaziqmo Janes ayow Jambres inaq in Moses bab ugiyta nazaqmo. Mataw na ginad meqinta ayahmo ussa in katiyad God anan helmo haqayta.  
\v 9 Ta teq in gigo daq na ayahmo diq a hi gwahtiqdaq. Haiqgam. In gigo daq agadanta na gwahtiqsa mataw bunmo ahol tuwaq kem daqay. Kwaziqmo Janes ayow Jambres inaq daq agadanta emsa on mataw ahol waq kemiyta nazaqmo.   
\s1 Timoti in God ago gamuk waz naqmo hiqiydaq  
\p
\v 10 Ari ya ninaq luwad ya on mataw God ago suleq gibilensa ni tuhurit bugta. Ad ni yaqgo daq bunmo ahol waqad ya iholyon dan emim muzaiqta na ago ni tuhuritmo. Teq ya God anan helmo haqaiqta na teq ya ituw a hi hiqiysa kabiy emaiqta na teq ya mataw ginan inad diq bilaqsa ya afaqan sorad ihol a hi hureq hasaiqta na ni ahol tuwamtamo.  
\v 11 Teq ya God ago kabiy emsa mataw imeqin ton yaqayta na ago ni tuhurit. Antiyok-ib teq Aikoniyam-ub teq Listra-ib mataw santitiy meqin diq yagiyta na ago ni tuhurit bug. Uliq nab mataw imuzad imeqin tonsa ya afaqan ayahmo sorta. Teq Iyahta ilumsihsa afaqan nagan a hi inol am.  
\v 12 Helmo, on mataw Krais Yesus aholib soqoteq in God ago daq dimdimunta emad luwsa mataw tigimeqin ton daqay.  
\v 13 Sa mataw ginad meqinta usaqta na teq mataw katiyayta na in daq hihiq emad oseq in daq meqinta mebmebmo em yaqayta na uriyamad in ta daq meqin diqta tiqem daqay. In on mataw kat negad teq in gimo nan katiyta anan helmo tihaq daqaymo.   
\p
\v 14 Ari Timoti ninmo nazaq hi em. Haiqgam. On mataw gamuk helta asuleqin nibileniyta na gigo tur os ni anadin emad ni suleq in gigo hib huritim anan helmo hamta naqmo ni muzin tut.  
\v 15 Teq kwaziqmo ni amunib osad ni God ago mar tawonta na bunmo huritad osim bo muran kawa tiqiy. God ago gamuk naqmo in Krais Yesus anan helmo haqgo adan niqisihunaqta. Nazaq iyan ni gamuk na muzinsa teq God ni nilumsiheq tiniwaqdaq.  
\v 16 God ago marib gamuk usaqta na bunmo God ago Bugaw inmo eman gwahtimta. Nazaq iyan gamuk na ayahmo i gilumsihaqta. Gamuk nab i God ago suleq helta waqauqta. Teq gamuk na in on mataw ginad meqinta wazan woqaqta. Teq in mataw gigo luw os wastitayaqta. Teq gamuk na in God ago dante titnonta na ago i gibilen kemaqta.  
\v 17 Nazaq iyan God ago kabibiy on mataw bunmo in gamuk na wazad in God ago kabiy emgo anaghan araq ago siqim a hi iyayta. Haiqgam. In God ago kabiy dimdimunta bunmo tiqem bug daqayta.   
\c 4  
\s1 Timoti zaway diq iyeq God ago gamuk bilaqan  
\p
\v 1 Ari God teq Krais Yesus mat on mataw tumoqiyta teq a hi moqayta inaqmo giyon hazizir emdaqta amatin na inaq in ya ibiysa ya gamuk araq awaz meqinta tinignan. Ad Krais Yesus teq on mataw bunmo gimeb ulalabmo boleq ago maror og saw bunmo emid gwahtiqdaqta na ya anadin emad ya atoranmo kazaq tinibilenaiq.  
\v 2 Ni on mataw God ago gamuk gibilen. In gamuk na huritnan ginad bilaqsa o haiq in gituw hiqiysa ni na ago a hi bilaqad ni gibilenmo gibilen. Ad ni gamuk awaz meqintaqmo amalib gibilenad giqutil ulumsa in ginad buliyiy. Teq in daq meqinta emsa ni ginad. Ad in gidan sosil iysa ni zaway neg. Tuteqmo ni God ago suleq gibilenad ni in gigo afaqan bunmo sorad nituw hi hiqiyan.  
\v 3 Na ezaqgo kam araq meqinta nawa tubolaq. Kam na bo tugwahtiqid teq mataw in suleq dimunta huritnan ginad a hi bilaqdaq. In gamuk gidek siriraqta naqmo huritnan ginad bilaqsa in mataw ta asor gihureqid in bo suleq in ginad usaqta naqmo bilaqsa in tuhurit daqayta.  
\v 4 Ad in gamuk helta na huritnan gituw hiqiysa in gihol buliyeq dante haresmo muzad in wagam samanta alulin haiqta naqmo huritnan gidek tiqem daqay.  
\v 5 Ari ninmo teq worworeqmo osad mataw afaqan nigsa ni sorad nituw hi hiqiyan. Ad ni on mataw God ago gamuk dimunta gibilenad ni kabiy God nigta naqmo ni em bug.   
\s1 Pol moqdaqta akaman sinsin tiqiy  
\p
\v 6 Ari mataw ya inol em daqayta na sinsin tiqiy. Inol emid ya inedan bilaqne mataw wain ayun tamaz emim God anognib wazbalan woqaqta nazaq nog tiqiydaq.  
\v 7 Ya God ago bab nenaq an wolad ya wagay dimunta nab iwaz meqniyim titur. Ad God yaqmen tow amta nab ya sibim le tugwahtiy. Teq ya God ago suleq helta na waz naqmo hiqiyad ya in anad tumuzin bug.  
\v 8 Muran mat sibim le towub gwahtiqaqta na ago balaw dimunta gifaqinib emayta na in ya ibaq tunim usaq. Balaw na in kazaq. Iyahta teq ya inan mat titnonta haqid ya ibin nazaqmo iholib tuqus tutdaq. Iyahta daq titnontaqmo amalib on mataw gigo daq ulum kemaqta. Ad in hazizir ayahta emdaqta akaman nab teq in naw na tiyagdaq. Teq in ya imomo naw na a hi yagdaq. Haiqgam. On mataw ginad emay, Iyahta hidmo bolan haqad gihol husisiqsa osayta na bunmo inaqmo in God abenab naw dimunta na tuwaq daqaymo.   
\s1 Timoti in Pol ago hib hidmo bolan  
\p
\v 9 Timoti, ni agudan hi emad hid naqmo yaqgo hib bol.  
\v 10 Na ezaqgo Demas in og ka ago nagah anan moqad in ya ihulosim uliq Tesalonaika-ib tilah. Teq Kresens saw Galesiya-ib lehsa Taitus saw Dalmesiya-ib tilahmo.  
\v 11 Sa Luk amomo ya inaq kawa osauq. Nazaq iyan ni bolad teq ni Mak waqeq inaq bol. In mat dimunta iyim in ya kabiyab tiqilumsihdaqta.  
\v 12 Teq ya Tikikus eman Efesus-ib lahta.   
\p
\v 13 Ni bolnan teq uliq Trowas-ib ni le Karpus ago bitab yaqgo iholsihen sisaqta ya hulosan nawa usaqta na ni waqeq teq a bol. Ad ni yaqgo buk giwaqmo. Giwaqad buk karuw asanib giqemiyta na ni inaqmo giwaq ton. Buk naqmo ya ahol waqnan inad bilaqaqta.   
\p
\v 14 Aleksanda mat ain akabiyan emaqta na in ya imeqin diq tonta. Abeb teq Iyahta in ago daq na amenin tuqugdaq.  
\v 15 Ni mat na ago nihol waz. In God ago gamuk i bilaqauqta na ababunmo diq.   
\p
\v 16 Ya ime amebta hazizirib gamuk amenin emad tursa mat araq ya ibunib turad gamukib a hi ilumsih. Haiqgam. Mataw bunmo tiqihulos yagiy. Teq ya God bulonaiq, Mataw ya ihulosiyta na gigo daq meqinta na ni walemad anadin ta hi em haqaiq.  
\v 17 Ari ya hazizirib tursa Iyahtaqmo ibiy muzad zaway yagyaq, ya in ago gamuk dimunta bilaq sireqsa on mataw en ta asor Juda a haiqta na tuhurit daqay haqad. In nazaq ilumsihim in laiyon ateb iwaqan ya afaqan araq a hi way.  
\v 18 Ad nazaqmo muran teq abeb mat nog imeqin tonnan tonsa Iyahta ilumsihid ya dimunmo tuqosdaiq. Oseq yaqgo kam tugwahtiqid nab teq in ya iwaqeq iqad ago sawab lehid ya in ago maror aduganib dimunmo tuqosdaiq. Nazaq iyan i bunmo tuteqmo Iyahta amomo abin wazid eraqsa osuq! Hel diqtaqmo.   
\p
\v 19 Ari ni Prisila aduw Akwila inaq teq Onesiforus asenlulniz na bunmo yaqgo zeq dimun neg.  
\v 20 Ya Erastus uliq Korin-ib hulosan osaq. Ari Trofimus ago moq inaq iyan ya Miletus-ib hulosan towa osaq.  
\v 21 Ni agudan hi emad hidmo bol. Luweq ni tim meqinta amuditqanta na anobun qwaydaq.  
\p Yubulus teq Pudens teq Linus teq Klodiya teq ni nimaqbaban Krais aduganibta na bunmo in gigo zeq dimun ninmen eman nawa lah.   
\p
\v 22 Iyahta ni niwamuzad ninaq osan.  
\p Ari God agem dimunta ne bunmo negsa ne osiy. Nawaqmo.