\id 1JN  
\h I San Juan 
\toc1 Carta Tsa Jihna Ñi Tsa Tyaa̱ Ra Juan 
\toc2 I San Juan 
\toc3 1 Jn. 
\mt1 Carta Tsa Jihna Ñi Tsa Tyaa̱ Ra Juan 
\c 1  
\s1 Cua coo yo ñayɨvɨ nyito 
\p  
\v 1 Ihya tyaá ndi tuhun ra tsa iyó nda ndi cumañi coo tandɨhɨ tsa iyó. Tsiñi̱ ndi tsa caha̱n ra quɨvɨ tsica̱ ndi tsihin ra. Nyehe̱ ndi tsi ra tsihin tinuu ndi tan cutuñi̱ iñi ndi yóo ra cuví ra. Tan tɨɨ̱n ndi tsi ra tsihin ndaha ndi. Maa ra cuví Tuhun Caahán Nyoo tsihin yo. Tan tsaha̱ ra ñayɨvɨ nyito iyó yo.  
\v 2 Tan quɨvɨ tsaa̱ ra nyehe̱ ndi ñayɨvɨ nyito can tan cuví ndi tsandaa tsa cuenda can. Tan jacotó ndi tsi ndo náa cuví ñayɨvɨ tsa ña cua naa tyin iyó tsi tsihin Jutu yo Nyoo, tan tsaa̱ tsi nu iyó yo.  
\v 3 Nacatyí tuhun ndi tsihin ndo tsa nyehe̱ ndi tan tsa tsiñi̱ ndi. Tyin tacan tan cuvi ndu iin ndo tsihin ndi, tumaa tsa iin ñi cuví maa ndi tsihin Jutu yo Nyoo tan tsihin ra Jesucristo, Sehe ra. Tan nditsa tsa iin ñi cuví ndi tsihin ra.  
\v 4 Tan tyaá ndi tuhun ihya tsa cuenda ndo tyin tacan tan coto ndo tandɨhɨ tsa tsahá Nyoo tsi ndo tan sɨɨ xaan cua cuvi tsi ndo. 
\s1 Nyoo, ñuhu̱ cuví ra 
\p  
\v 5 Vityin nacatyí tuhun ndi tsihin ndo tsa caha̱n ra Cristo tsihin ndi. Catyi̱ ra tsihin ndi tyin Nyoo ñuhu̱ cuví ra. Tan nduve tsa naa tsi ra, [nduve tsa ña vaha tsicá iñi ra cuví can].  
\v 6 Tun catyí yo tyin iin ñi cuví yo tsihin ra, tan ndi iyó ca maa yo nu naa, jandaví ñaha yo tan ña javahá yo tsa nditsa.  
\v 7 Maa tyin tatun iyó yo nu nditsin, tumaa tsa iyó maa Nyoo nu nditsin, tacan tan iin ñi cuví yo tsihin nyɨvɨ yɨhɨ́ tuhun Nyoo tsihin yo, tan nacatyá ra Jesucristo Sehe Nyoo tandɨhɨ cuatyi yo tsihin nɨñɨ ra. 
\p  
\v 8 Tatun catyí yo tyin nduve cuatyi yo, juvin ñi maa yo jandaví ñaha yo, tan nduve tsa nditsa iyó añima yo.  
\v 9 Maa tyin tatun naahmá yo cuatyi yo nuu Nyoo, cuví cuita iñi yo tsi ra tyin cua jaha ra tucahnu iñi tsi yo tsa cuenda cuatyi yo tan cua nacatya ra tandɨhɨ cuatyi yo tyin maa ra vaha ra tan javahá ra cuhva catyí ra tyin ña vatya ra.  
\v 10 [Nyoo catyí ra tyin iyó cuatyi yo], tan tatun catyí yo tyin nduve cuatyi yo iyó, jahá yo tyin vatya Nyoo. Tan nduve tuhun caahán ra, iyó añima yo. 
\c 2  
\s1 Ra Cristo cuví ra caahán ndaahvi tsaha yo 
\p  
\v 1 Sehe nyihi yu, caahán yu tandɨhɨ tuhun ihya tsihin ndo, tyin tacan tan ña javahá ca ndo tsa ña vaha. Maa tyin tatun iin ndo tan javaha ndo tsa ña vaha, ña nayuhvi ndo tsa ña cuvi ca nduvaha ndo nuu Nyoo, tyin iyó iin ra caahán ndaahvi tsaha yo nuu Nyoo. Tan ra ican cuví ra Jesucristo, ra cuɨtɨ iyó.  
\v 2 Juvin ra jahá tucahnu iñi tsi yo tyin tsihi̱ ra nu cruu tsa cuenda cuatyi yo. Tan ñavin tsa cuenda maa ñi maa yo tsihi̱ ra, tyin tsihi̱ ra tsa cuenda tandɨhɨ cuii nyɨvɨ iyó nu ñuhu ñayɨvɨ. 
\p  
\v 3 Tatun tyaá yahvi yo tsa caahán Nyoo, nacotó yo tsi ra.  
\v 4 Maa tyin tatun iin ra tsa catyí tyehen: “Yuhu tsitó yu tsi Nyoo”, tan ña tyaá yahvi ra tsa caahán Nyoo, cuví ra iin ra vatya. Tan nduve tsa nditsa iyó añima ra.  
\v 5 Nyɨvɨ javahá tsa caahán Nyoo, ñi ican cuví ñi cuñí tsi ra tsihin tsa nɨɨ iñi añima ñi. Tan tsihin yacan tsitó yo tyin iin ñi cuví ñi tsihin ra.  
\v 6 Nyɨvɨ catyí tyin iin caa ñi iyó ñi tsihin Nyoo, taahán tsi coo ñi tumaa tsicoo̱ maa ra Jesucristo quɨvɨ quitsi̱ ra nu ñuhu ñayɨvɨ ihya. 
\s1 Taahán tsi tsa cuñí tahan yo tsi yo 
\p  
\v 7 Yañi, ñavin tuhun tsaa jacotó yu tsi ndo, tyin cuví tsi tuhun tsahnu tsa tsa tsitó maa ndo nda quitsi̱ ca tsi. Tan juvin tsi cuví tsa tsa yaha̱ tsiñi̱ ndo.  
\v 8 Maa tyin ña tsindɨhɨ́ tsa tsaa tsi tyin tyaá yahvi yo itsi tan tsa tyaá yahvi yo itsi, cuñí tahan yo tsi yo tumaa javahá maa ra Cristo. Tan tsihin yacan cuahán nduluhlu tsa naa tan nduñihi ca jandunditsín ñuhu̱ tsa nditsa. 
\p  
\v 9 Nyooho tsa catyí tyin iyó ndo nu nditsin, tan ndasɨ cuñí ndo nyehe ndo tsi nyɨvɨ yɨhɨ́ tuhun Nyoo tsihin ndo, ndi iyó ndo nu naa.  
\v 10 Maa tyin nyɨvɨ tsa cuñí tsi nyɨvɨ yɨhɨ́ tuhun Nyoo tsihin ñi, iyó ñi nu nditsin. Tan nduve maa cuatyi cuvi janduva tsi ñi.  
\v 11 Maa tyin nyɨvɨ ndasɨ cuñí nyehe tsi nyɨvɨ yɨhɨ́ tuhun Nyoo tsihin ñi, iyó ñi nu naa. Tan ña tsitó ñi numaa cuahán ñi tyin ña nditsin nyehé ñi tyin tumaa tsa cuaa̱ ñi jaha̱ tsa naa can. 
\p  
\v 12 Jaquitsí yu tandɨhɨ tuhun ihya tsi nyooho tsa ndi nacuhva̱ cuenda tsi ndo tsi Nyoo. Tyin tsa yaha̱ jaha̱ Nyoo tucahnu iñi cuatyi ndo tsa cuenda tsa tsihi̱ ra Jesucristo cuenda yo.  
\v 13 Nyooho tsa tsa tsahnu̱ tsihin tuhun Nyoo, tyaá yu carta ihya tsa cuenda ndo, tyin nacotó ndo tsi ra iyó nda ndi cumañi ca tsinu ñuhu ñayɨvɨ. Tan tyaá tucu yu itsi tsa cuenda nyooho ra tsa ndi cuahan cutuñí vaha iñi tuhun ra Cristo tyin jaha̱ canaa ndo tan ndi jahá canaa ca ndo tsi nu ña vaha. 
\p Tan tyaá tucu yu itsi tsa cuenda nyooho, tsa ndi nacuhva̱ cuenda tsi ndo tsi Nyoo, tyin nacotó ndo tsi Nyoo Jutu yo.  
\v 14 Jaquitsí yu carta ihya tsi nyooho tsa tsa tsahnu̱ tsihin tuhun Nyoo, tyin nacotó ndo tsi ra tsa iyó maa tan tsinu̱ ñuhu ñayɨvɨ. Tan jaquitsí yu carta ihya tsi nyooho tsa ndi cuahan cutuñi vaha iñi tuhun ra Cristo, tyin iyó xaan tunyee iñi tsi ndo jahá tuhun Nyoo tsa iyó añima ndo. Tan jaha̱ canaa ndo tsi nu ña vaha. 
\p  
\v 15 Ña cuñi ndo tsa caquiñi tsa iyó nu ñuhu ñayɨvɨ ihya. Tyin nyɨvɨ cuñí tandɨhɨ yacan, ña cuñí ñi tsi Nyoo Jutu yo.  
\v 16 Tyin tandɨhɨ tsa ña vaha tsa iyó nu ñuhu ñayɨvɨ ihya, tsa cuñí cuñu ñuhu yo, tsa nyehé yo tan cuñi yo coo tsi yo, tan tsa cuñi yo nduyaa yo tsihin tsa iyó tsi yo, tandɨhɨ yacan tsahá ñuhu ñayɨvɨ ihya tsi yo, tan ñavin Nyoo Jutu yo tsahá can.  
\v 17 Ñuhu ñayɨvɨ ihya cua cundɨhɨ can, tan cua cundɨhɨ ndɨhɨ tucu tandɨhɨ tsa caquiñi tsa cuñí nyɨvɨ javaha ñi. Maa tyin nyɨvɨ tsa javahá cuhva cuñí Nyoo, cua coo cuii ñi tsihin ra. 
\s1 Nu tsa ndasɨ cuñi nyehe tsi ra Cristo 
\p  
\v 18 Nyooho, tsa cuví ndo tumaa sehe yu, co̱to ndo tyin tsa cua ndɨhɨ quɨvɨ. Tan nyooho tsiñi̱ ndo tyin vatsí nyɨvɨ tsa ña cuñí nyehe tsi ra Cristo, tan vityin tsa nducuahá xaan ñi. Tan tsa tacan tsa iyó cuaha ñi. Tsihin yacan nacotó yo tyin tsa taha̱n tsi cundɨhɨ quɨvɨ.  
\v 19 Nyɨvɨ can ña yɨhɨ́ ca ñi tuhun Nyoo tsihin yo, tyin ñavin cuenda yo cuví ñi. Tyin tun nditsa ñi tyin cuenda yo cuví ñi, ña cua quita ñi tuhun Nyoo. Maa tyin tacan cuvi̱ tyin tacan tan coto yo tyin ñavin nyɨvɨ yɨhɨ́ tuhun Nyoo tsihin yo cuví ñi. 
\p  
\v 20 Maa tyin nyooho tsa tsitó ndo tsa caahán Nyoo tyin tsaha̱ ra Cristo Tatyi Ii Nyoo iyó añima ndo tan jacotó tsi tandɨhɨ tsi ndo.  
\v 21 Jaquitsí yu carta ihya tsi ndo tsa cuenda tsa tsitó ndo tsa nditsa tan ñavin tsa cuenda tsa ña tsitó ndo. Tan tsitó ndo tyin ña cuvi quita tuhun vatya tsihin tuhun nditsa. 
\p  
\v 22 ¿Yóo cuví nyɨvɨ vatya? Nyɨvɨ vatya cuví ñi catyí tyin ra Jesús ñavin ra Cristo cuví ra. Tan juvin ñi ican cuví ñi ndasɨ cuñi nyehé tsi ra Cristo. Tyin ña tsinú iñi ñi tsi Jutu yo Nyoo, tan tsi ra Jesucristo Sehe ra.  
\v 23 Tan tandɨhɨ nyɨvɨ tsa ña tsinú iñi tsi Sehe Nyoo, nduve Nyoo Jutu yo iyó tsihin ñi. Maa tyin nyɨvɨ tsa caahán tsihin tsa nɨɨ iñi añima ñi tsihin nyɨvɨ tyin ra Jesucristo cuví Sehe Nyoo, iyó Nyoo Jutu yo tsihin ñi. 
\p  
\v 24 Yacan cuenda na̱quihin vaha ndo tsitsi añima ndo tandɨhɨ tsa tsiñi̱ ndo nda quɨvɨ jihna ñi. Tyin tun naquihin vaha ndo itsi tsitsi añima ndo, cua coo ndo iin caa ñi tsihin Nyoo Jutu yo tan tsihin Sehe ra.  
\v 25 Tan ñayɨvɨ nyito can cuví tsa catyí ra Jesucristo tyin cuhva ra tsi yo. 
\p  
\v 26 Tyaá yu tuhun ihya tyin cahvi ndo itsi tsa cuenda tyin tsa iyó cuaha nyɨvɨ cuñi jandaví ñaha tsi ndo.  
\v 27 Maa tyin ra Jesucristo tsaha̱ ra Tatyi Ii Nyoo iyó añima ndo, yacan cuenda ña tsiñí ñuhu ca tsa jacuaha nyɨvɨ tsi ndo. Tyin juvin ñi maa Tatyi Ii Nyoo jacuahá tandɨhɨ maa tyiñu tsi ndo. Tan tsa nditsa cuví tsi, ñavin cuendu cuví tsi. Yacan cuenda ja̱ñihi ndo cunyanaa vaha ndo tsi ra Cristo tumaa janahá maa Tatyi Ii Nyoo tsi ndo. 
\p  
\v 28 Tan vityin nyooho, tsa cuví tumaa sehe yu, cu̱nyanaa vaha ca ndo tsi ra Cristo tyin tacan tan quɨvɨ quitsi ra, iin cuñi yo tsihin ra. Tan iin cuñi tucu maa ra tsihin yo. Tan inga tucu tuhun ña cua tahan yo ticanuu nuu ra quɨvɨ tsaa ra.  
\v 29 Vityin tsa tsa tsitó ndo tyin vaha ra Cristo, cuñí tsi coto ndɨhɨ ndo tyin tandɨhɨ nyɨvɨ javahá tsa vaha, sehe Nyoo tsi ñi. 
\c 3  
\s1 Nyɨvɨ cuví sehe Nyoo 
\p  
\v 1 Nye̱he ndo, Nyoo Jutu yo cuñí xaan ra tsi yo, tyin jacunañí ra sehe Nyoo tsi yo. Tan cuví yo sehe ra. Tan tsa cuenda yacan, nyɨvɨ taahán iñi tsa iyó nu ñuhu ñayɨvɨ ihya ña cutuñi iñi ñi cuhva tsicá iñi yo tyin ña nacoto ñi tsi maa ra.  
\v 2 Nyooho yañi, tsa cuví yo sehe ra vityin, maa tyin ñaha ca coto yo náa cua cuvi yo. Maa tyin tsitó yo tyin quɨvɨ quitsi ra Jesucristo, cua cuvi yo tumaa cuví maa ra, tyin cua nyehe vaha yo tsi ra tan cua nyehe tucu yo nácaa caá ra.  
\v 3 Tandɨhɨ yoo tsa ndatú tsa cua cuvi tacan, nducú yo cuhva janduvaha yo tsi yo, tan cuvi yo tumaa maa Jutu Mañi yo Jesucristo, tyin maa ra cuɨtɨ iyó ra. 
\p  
\v 4 Tandɨhɨ nyɨvɨ tsa tsicoó cuatyi, ñi ican cuví ñi tsa ña tyaá yahvi ley Nyoo. Tyin tun javahá yo tsa ña vaha, cuñí tsi catyi tyin ña tyaá yahvi yo ley Nyoo.  
\v 5 Nyooho tsa tsitó tyin ra Cristo quitsi̱ ra nu ñuhu ñayɨvɨ ihya tyin quinyaa̱ ra cuatyi yo, tan tsitó tucu ndo tyin maa ra nduve cuatyi ra.  
\v 6 Tandɨhɨ yoo tsa iyó iin caa ñi tsihin ra, ña jañihí ca yo javahá ca yo tsa ña vaha. Maa tyin nyɨvɨ javahá tsa ña vaha, ñaha ca nyehe ñi tsi ra, tan ñaha ca coto ñi tsi ra.  
\v 7 Nyooho, tsa cuví tumaa sehe yu, coto jandavi ñaha nyɨvɨ tsi ndo. Tyin nyɨvɨ javahá tsa vaha, cuví ñi nyɨvɨ vaha, tumaa vaha maa ra Cristo.  
\v 8 Tyin nyɨvɨ javahá tsa ña vaha, cuenda nu ña vaha cuví ñi. Tyin nu ña vaha javahá nu tsa ña vaha nda quɨvɨ jihna ñi. Yacan cuenda quitsi̱ ra Jesucristo, Sehe Nyoo, tyin janaa ra tandɨhɨ tsa javahá nu. 
\p  
\v 9 Tandɨhɨ yoo tsa tsa yaha̱ nacacu̱ tsaa jaha̱ Nyoo, ña taahán ca iñi yo javahá yo tsa ña vaha, tyin iyó yo ñayɨvɨ tsaha̱ Nyoo tsi yo. Yacan cuenda ña javahá ca yo tsa ña vaha, tyin tsa yaha̱ nacacu̱ tsaa yo tan vityin cuví yo sehe Nyoo.  
\v 10 Cuví nacotó yo ndáa nyɨvɨ cuví sehe Nyoo, tan ndáa nyɨvɨ cuví sehe nu ña vaha, tyin tandɨhɨ nyɨvɨ tsa ña javahá tsa vaha tan ña cuñí tsi nyɨvɨ yɨhɨ́ cuenda Nyoo, ñavin sehe Nyoo tsi ñi. 
\s1 Na cu̱ñi tahan yo tsi yo 
\p  
\v 11 Tyin tsa tsiñi̱ ndo nda quɨvɨ jihna ñi cuví: Tsa cu̱ñi tahan yo tsi yo.  
\v 12 Ña taahán tsi javaha yo tumaa javaha̱ ra Caín, tyin ra Caín cuvi̱ ra iin ra cuenda nu ña vaha. Tan tsahñi̱ ra tsi yañi ra. ¿Náa cuenda tsahñi̱ ra tsi yañi ra? Tsa cuenda tyin ra yañi ra javaha̱ ra tsa vaha, tan maa ra javaha̱ ra tsa ña vaha. 
\p  
\v 13 Nyooho yañi, ña iyo cuñi ndo tun ndasɨ cuñí nyɨvɨ ña yɨhɨ́ tuhun Nyoo nyehé ñi tsi ndo.  
\v 14 Yoo tsa cuñí tsi nyɨvɨ yɨhɨ́ tuhun Nyoo tsitó yo tyin iyó yo ñayɨvɨ nyito, tyin juvin tsi janahá tsi yo tyin ña cuví ca yo nyɨvɨ tsihi̱. Maa tyin nyɨvɨ ña cuñí tsi nyɨvɨ yɨhɨ́ tuhun Nyoo, cuví ñi tumaa nyɨvɨ tsihi̱.  
\v 15 Nyɨvɨ ndasɨ cuñí nyehé tsi nyɨvɨ, cuví ñi tumaa nyɨvɨ tsahñí nyɨvɨ. Tan tsitó ndo tyin ndi intuhun ñi tsahñí nyɨvɨ, tan ña cua cuhva Nyoo ñayɨvɨ nyito coo ñi.  
\v 16 Tsitó yo náa cuví tsa cuñí tahan yo tsi yo tyin tsa yaha̱ janaha̱ ra Jesucristo tsi yo nácaa taahán tsi cuñi tahan yo tsi yo. Tyin maa ra nda cuanda tsaha̱ ra ñayɨvɨ ra tsa cuenda yo tsa catyi tsa cuñí ra tsi yo. Tacan taahán tsi javaha tucu maa yo. Cuñí tsi cuhva yo nda cuanda ñayɨvɨ iyó yo tsa cuenda nyɨvɨ yɨhɨ́ tuhun Nyoo.  
\v 17 Tatun yɨhɨ́ yo tan iyó luxu tsa iyó tsi yo, tan nyehé yo tyin cumañí tsa cumañí tsi inga nyɨvɨ, tan jahá yo tumaa tsa ña nyehé ñi yo, ¿a cuñí yo tsi Nyoo tsa tacan javahá yo? Ña cuñí yo tsi ra.  
\v 18 Nyooho tsa cuví ndo tumaa sehe yu, na ña cuñi yo tsi nyɨvɨ tsihin tuhun caahán ñi yo, na cuñi tahan yo tsi yo tsihin tsa quitá tsitsi añima yo tan javahá yo tumañi iñi tsihin tsa nɨɨ iñi yo. 
\s1 Nacaa javaha yo tan coo vaha yo tsihin Nyoo 
\p  
\v 19 Tatun javahá yo tacan, tsitó yo tyin iyó vaha yo tsihin tsa nditsa. Tan vaha iyó yo tsihin Nyoo.  
\v 20 Tatun tuví iñi tsitsi añima yo tyin iyó cuatyi yo, na ña cuita iñi yo yacan. Na cuita iñi yo tsi Nyoo tyin juvin ra tsitó tandɨhɨ tsa iyó añima yo tan cahnu ca cuví ra tan ñavin ca añima yo.  
\v 21 Yañi, tatun tuví iñi yo tyin nduve cuatyi yo, na ña nayuhvi yo nyehe yo tsi Nyoo.  
\v 22 Tan tandɨhɨ tsa cua ndacan yo tsi ra, cua cuhva ra can tsi yo, tyin tyaá yahvi yo tsa caahán ra, tan javahá yo cuhva taahán iñi ra.  
\v 23 Tyin tyiñu tsa tsaha̱ ra tsi yo yacan cuví tsa tsi̱nu iñi yo tyin ra Jesucristo cuví Sehe ra, tan tsa cu̱ñi tahan yo tsi yo, tumaa tava̱ tyiñu ra tsi yo.  
\v 24 Nyɨvɨ tyaá yahvi tyiñu tsaha̱ ra tsi ñi, iyó ñi tsihin ra, tan iyó tucu maa ra tsitsi añima ñi. Tan tsitó yo tyin iyó ra tsihin yo tsa cuenda Tatyi Ii ra tsa tsaha̱ ra tsi yo. 
\c 4  
\s1 Tatyi Ii Nyoo tan tatyi nu ña vaha 
\p  
\v 1 Nyooho yañi tsa cuñí xaan yu, ña tsi̱nu iñi ndo tsa caahán nyɨvɨ catyí tyin tuhun Nyoo caahán ñi. Nye̱he jihna ndo tatun nacatsí tahan tsa caahán ñi tsihin tuhun Nyoo. Tyin vityin cuaha xaan nyɨvɨ jandaví ñaha iyó. Catyí ñi tyin Nyoo caahán tsa caahán ñi tan ña nditsa ñi.  
\v 2 Cuví nacoto ndo tsi nyɨvɨ tun juvin Tatyi Ii Nyoo jacahán tsi ñi o ñavin. Ñi tsa iyó Tatyi Ii Nyoo tsihin, catyí ñi tyin quee̱ ra Jesucristo nda gloria tan quitsi̱ ra nu ñuhu ñayɨvɨ ihya, tan cuvi̱ ra iin rayɨɨ tumaa maa yo.  
\v 3 Maa tyin tandɨhɨ nyɨvɨ tsa catyí tyin ñavin tacan cuvi̱, ñavin Nyoo jacahán tsi ñi. Tatyi ña vaha, tsa ndasɨ cuñi nyehé tsi ra Cristo, jacahán tsi ñi. Tsa tsitó ndo tyin nyaá tsa cua quitsi nu jandaví ñaha can. Tan vityin tsa iyó nu nu ñuhu ñayɨvɨ ihya tan jandaví ñaha nu tsi nyɨvɨ. 
\p  
\v 4 Nyooho tsa cuví ndo tumaa sehe yu, nyɨvɨ cuenda Nyoo cuví ndo. Tan tsa yaha̱ jaha̱ canaa ndo tsi nu caahán tsa ña nditsa. Tyin Nyoo iyó ra añima ndo tan cahnu ca cuví ra tan ñavin ca nu ña vaha, tsa iyó añima nyɨvɨ tsa taahán iñi tsa iyó nu ñuhu ñayɨvɨ ihya.  
\v 5 Ñi ican, cuenda nu ñuhu ñayɨvɨ ihya cuví ñi. Yacan cuenda caahán ñi cuenda tsa iyó nu ñuhu ñayɨvɨ ihya. Tan inga nyɨvɨ cuenda nu ñuhu ñayɨvɨ ihya tyaá soho ñi tsa caahán ñi ican.  
\v 6 Maa tyin yoo cuví yo nyɨvɨ cuenda Nyoo. Tan nyɨvɨ nacotó tsi Nyoo tyaá soho ñi tsa caahán yo. Tan nyɨvɨ tsa ña tsitó tsi Nyoo, ña cuñí ñi tyaa soho ñi tsa caahán yo. Tsihin yacan cuví nacoto yo ndáa nyɨvɨ iyó Tatyi Ii Nyoo tsihin, tan caahán ñi tsa nditsa tan ndáa nyɨvɨ yɨhɨ́ tatyi ña vaha tan jandaví ñaha ñi. 
\s1 Nyoo cuñí xaan ra tsi tandɨhɨ nyɨvɨ 
\p  
\v 7 Nyooho yañi, na cuñi tahan yo tsi yo, tyin Nyoo janahá ra tsi yo nácaa taahán tsi cuñi tahan yo tsi yo. Tyin tandɨhɨ yoo tsa cuñí tsi nyɨvɨ, sehe Nyoo cuví tsi yo, tan nacotó yo tsi Nyoo.  
\v 8 Nyɨvɨ ña cuñí tsi inga nyɨvɨ, ña nacotó ñi tsi Nyoo, tyin Nyoo cuñí xaan ra tsi yo tan tsi tandɨhɨ nyɨvɨ.  
\v 9 Nyoo janaha̱ ra tsi yo tsa cuñí ra tsi yo tsihin tsa tsaha̱ ra Sehe mañi ra quitsi̱ nu ñuhu ñayɨvɨ ihya, tyin cuhva ra ñayɨvɨ nyito coo yo.  
\v 10 Nye̱he ndo, nácaa tsa cuñí Nyoo tsi yo. Ñavin jihna ca maa yo cuñi̱ tsi ra, tyin jihna ca maa ra cuñi̱ tsi yo. Tan jaquitsi̱ ra Sehe ra tyin tacan tan cúu ra tsa cuenda yo tan quinyaa ra cuatyi yo. 
\p  
\v 11 Nyooho yañi, tatun tacan cuñí Nyoo tsi yo, juvin ñi tacan taahán tsi tsa cuñí tucu maa yo tsi nyɨvɨ tumaa tsa cuñí maa Nyoo tsi yo.  
\v 12 Ndi intuhun maa nyɨvɨ, tan ñaha ca maa nyehe ñi tsi Nyoo, maa tyin tatun cuñí tahan yo tsi yo, iyó Nyoo añima yo. Tan nɨɨ vaha iñi yo cuñí yo tsi ra tan tsi nyɨvɨ.  
\v 13 Tan tsitó yo tyin iyó vaha yo tsihin ra tan maa ra iyó ra añima yo, tyin tsaha̱ ra Tatyi Ii ra iyó añima yo.  
\v 14 Nyuhu nyehe̱ vaha ndi tan cuví ndi tsandaa tyin jaquitsi̱ Nyoo Jutu yo tsi Sehe ra tyin jacacu ra tsi yo tsa cuví yo nyɨvɨ iyó nu ñuhu ñayɨvɨ ihya.  
\v 15 Tandɨhɨ nyɨvɨ tsa tsinú iñi tan caahán tyin ra Jesús cuví Sehe Nyoo, iyó Nyoo añima ñi. Tan iyó ñi iin caa ñi tsihin ra. 
\p  
\v 16 Yoo tsitó yo tan tsinú iñi yo tyin Nyoo cuñí ra tsi yo, tan cuñí ra tsi tandɨhɨ nyɨvɨ. Tan tandɨhɨ yoo tsa cuñí tahan yo tsi yo, iyó yo iin caa ñi tsihin Nyoo; tan Nyoo iyó ra tsitsi añima yo.  
\v 17 Tyin tatun cuñí yo tsi Nyoo tsihin tsa nɨɨ iñi añima yo, ña cua nayuhvi yo nyehe yo tsi ra na tahan tsi quɨvɨ cutuñi tandɨhɨ nyɨvɨ nuu ra. Tyin tumaa iyó ra Jesucristo, tacan iyó yo nu ñuhu ñayɨvɨ ihya.  
\v 18 Nyoo cuñí ra tsi yo, tan tatun cuñí yo tsi ra, nduve tsa nayuhvi yo. Tatun nɨɨ iñi yo cuñí yo tsi Nyoo ña nuña ca nu quɨhvɨ tuhun yuuhví can añima yo, tyin Nyoo jatsiyo̱ ra tandɨhɨ maa yacan. Tyin tatun yuuhví yo, yɨhɨ́ can tyin tuví iñi yo tyin iyó cuatyi yo. Tan yuuhví yo tsa cua tatsi tuñi Nyoo tsi yo. Tyin tatun yuuhví cuñí yo, yuuhví yo tyin ñaha ca cuñi yo tsi Nyoo tumaa taahán maa tsi cuñi yo tsi ra. 
\p  
\v 19 Yoo cuñí yo tsi Nyoo tyin jihna ca maa ra cuñi̱ tsi yo.  
\v 20 Tatun iin nyɨvɨ tan catyí ñi: “Yuhu cuñí yu tsi Nyoo”, tan ndasɨ cuñí ñi nyehé ñi tsi nyɨvɨ tahan ñi, nyɨvɨ vatya cuví ñi. Tyin tatun ndasɨ cuñí yo nyehé yo tsi nyɨvɨ tahan yo tsa tuhvá yo nyehé, ¿nácaa cua cuñi yo tsi Nyoo tsa ña cuví nyehe yo? Ña cua cuvi.  
\v 21 Tava̱ tyiñu Nyoo tsi yo tyin tun cuñí yo tsi ra, tacan cuñí tsi tsa cuñí tahan yo tsi yo. 
\c 5  
\s1 Tatun nɨɨ iñi yo tsinú iñi yo tsi Nyoo cuví jaha canaa yo tsi tsa ña vaha 
\p  
\v 1 Tandɨhɨ nyɨvɨ tsa tsinú iñi tyin ra Jesús cuví ra Cristo ra quee̱ nda gloria jaha̱ Nyoo, juvin ñi cuví sehe Nyoo. Tyin tatun cuñí yo tsi iin ra iyó sehe, cuñí ndɨhɨ yo tsi sehe ra.  
\v 2 Tatun cuñí yo tsi Nyoo tan javahá yo tsa caahán ra, cua cuñi ndɨhɨ yo tsi nyɨvɨ cuví sehe ra.  
\v 3 Tyin tsa cuñí yo tsi Nyoo yacan cuví tsa tyaá yahvi yo tsa tsaha̱ cuenda ra tsi yo. Tan tandɨhɨ tsa tsaha̱ cuenda ra tsi yo, ña yɨɨ javaha yo can.  
\v 4 Tyin tandɨhɨ yoo tsa cuví sehe Nyoo, jahá canaa yo tsi tsa ña vaha tsa iyó nu ñuhu ñayɨvɨ ñayɨvɨ ihya. Cuví jaha canaa yo can tyin tsinú iñi yo tsi Nyoo.  
\v 5 Maa ñi maa nyɨvɨ tsa tsinú iñi tyin ra Jesús cuví Sehe Nyoo, ñi ican cuví ñi cuví jahá canaa tsa ña vaha tsa iyó nu ñuhu ñayɨvɨ ihya. 
\s1 Tatyi Ii Nyoo cuví tsandaa cuenda ra Jesús Sehe Nyoo 
\p  
\v 6 Ra Jesucristo quitsi̱ ra nu ñuhu ñayɨvɨ ihya. Tan tsa tsicoondutya̱ ra tsihin ndutya tan tsa tsatɨ̱ nɨñɨ ra janahá tyin Sehe Nyoo cuví tsi ra. Ñavin tsa tsicoondutya̱ ñi ra. tyin nda cuanda tsa tsatɨ̱ nɨñɨ ra. Tan juvin ñi maa Tatyi Ii Nyoo cuví tsandaa tyin tacan cuvi̱. Tan Tatyi Ii Nyoo ña jandaví ñaha tsi.  
\v 7 Nda andɨvɨ iyó uñi taahan tsa cuví tsandaa: maa Nyoo Jutu yo tan ra Cristo ra cuví Tuhun tsa Caahán Nyoo, tan Tatyi Ii Nyoo. Tsa nduñi taahan ra naha, iin ñi cuví ra naha.  
\v 8 Tan nu ñuhu ñayɨvɨ ihya iyó tucu uñi tsandaa: Tatyi Ii Nyoo tsa iyó añima yo caahán tyin ra Jesús cuví Sehe Nyoo. Tsa tsinu uvi cuví nu tsicoondutya̱ ra Jesús, nu catyi̱ Nyoo tyin juvin ra Jesús cuví Sehe ra. Tan tsa tsinu uñi cuví nu tsatɨ̱ nɨñɨ ra Jesús. Tan tsa nduñi taahan yacan nacatsí tahan caahán can.  
\v 9 Yoo naquihín yo tsa caahán ra cuví tsandaa nu ñuhu ñayɨvɨ ihya. Tan Nyoo cahnu ca cuví ra tan ñavin ca ra ñuu ñayɨvɨ ihya. Yacan cuenda taahán tsi naquihin yo tsa caahán ra, tan juvin ñi maa ra catyi̱ tyin Sehe ra cuví tsi ra Jesús.  
\v 10 Nyɨvɨ tsa tsinú iñi tyin Sehe Nyoo cuví tsi ra Jesús, tsitó ñi tsitsi añima ñi tyin nditsa. Nyɨvɨ tsa ña tsinú iñi tsi ra, jahá ñi tyin vatya Nyoo, tyin ña cuñí ñi tsinu iñi ñi tsa caahán Nyoo tsandaa cuenda Sehe ra.  
\v 11 Tan tyehen caahán Nyoo tsihin yo: Catyí ra tyin tsaha̱ ra ñayɨvɨ nyito coo yo tan ñihi yo itsi tatun tsinú iñi yo tyin ra Jesucristo cuví Sehe ra.  
\v 12 Nyɨvɨ iyó Sehe Nyoo añima, iyó ñi ñayɨvɨ nyito. Tan nyɨvɨ nduve Sehe Nyoo iyó añima, ña iyó ñi ñayɨvɨ nyito. 
\s1 Nu ndɨhɨ̱ caha̱n ra Juan tan nu tsahá ra tyiñu tsi nyɨvɨ 
\p  
\v 13 Tyaá yu tuhun ihya tsa cuenda nyooho tsa tsinú iñi tsi ra Jesús Sehe Nyoo, tyin tacan tan coto ndo tyin tsa iyó ndo ñayɨvɨ nyito tsa ña cua naa maa. 
\p  
\v 14 Ndita iñi yo tsi Nyoo tyin tatun tsicán yo tsa tsicán yo tsi ra tan cuhva cuñí maa ra tsicán yo, tsitó yo tyin maa ra tsiñí ra tsa caahán yo.  
\v 15 Tan tsa tsitó yo tyin tsiñí ra tsa tsicán yo, tsitó tucu yo tyin tsa ñihi̱ yo tsa tsica̱n yo tsi ra. 
\p  
\v 16 Tatun iin nyɨvɨ tan nyehe yo tyin javahá ñi cuatyi tsa ña taahán tsi cúu ñi, taahán tsi cahan ndaahvi yo tsihin Nyoo tsa cuenda ñi na jaha ra tucahnu iñi tsi ñi tsa cuenda cuatyi can. Maa tyin tatun javahá ñi cuatyi tsa taahán tsi cúu ñi, ña ndacan tahvi yo tsa cuenda ñi.  
\v 17 Tandɨhɨ tsa caquiñi tsa javahá nyɨvɨ, cuatyi cuví can. Tan iyó tucu cuatyi tsa ña jaha Nyoo tucahnu iñi. 
\p  
\v 18 Tsitó yo tyin nyɨvɨ tsa nacacu̱ tsaa jaha̱ Nyoo, ña jañihí ca ñi javaha ñi cuatyi. Tyin jahá cuenda Sehe Nyoo tsi ñi tan ña tsahá ra tsa tɨɨn nu ña vaha tsi ñi. 
\p  
\v 19 Yoo tsa tsitó yo tyin cuenda Nyoo yɨhɨ́ yo. Tan tandɨhɨ nyɨvɨ tsa taahán iñi tsa iyó nu ñuhu ñayɨvɨ ihya, nu ña vaha ndacá ñaha tsi ñi. 
\p  
\v 20 Tan tsitó tucu yo tyin quitsi̱ Sehe Nyoo, tan tsaha̱ ra tsa cutuñi iñi yo tsa caahán ra tyin tacan tan nacoto yo tsi Nyoo, ra cuví tsa nditsa. Tan ra cuví tsa nditsa can, cuví ra Jesucristo Sehe Nyoo. Tan iyó yo iin caa ñi tsihin ra. Tan juvin maa ra cuví Nyoo tsa nditsa. Tan iyó ra ñayɨvɨ nyito tsa ña cua naa maa.  
\v 21 Nyooho tsa cuví tumaa sehe yu, ja̱ha cuenda ndo tsi ndo tsihin tsitoho tsa jacahnú nyɨvɨ, tyin ñavin Nyoo cuví can. 
\p Tan na cuvi tsi tacan ñi.