\id TIT  
\h Tito 
\toc1 Tito 
\toc2 Tito 
\toc3 Tit. 
\mt1 Tito 
\c 1  
\p  
\v 1 Pablohájpøch høøc̈h. Jaꞌa Dióshøch xmioonsähajp. Jaꞌa Jesucrístøch xquiuguex̱yhajp. Jadúhṉhøch tøø xwyiinguex̱y cooc̈hä jäyaꞌayä Diosmädiaꞌagy nyajwiinhixǿꞌøwät, pønjatiä Dios tøø wyiimbiy, ween hajxy jaduhṉ miäbøcy, weenä tøyhajt hajxy jaduhṉ miøødhaty, jaduhṉä Dios hajxy hoy wyiingudsähgǿꞌøwät.  
\v 2 Jéquiänä Dios hajxy xyajwiinwaaṉǿøyyäm coo hajxy xyagjugyhadáaṉäm cøjxtaꞌaxiøø neby jeꞌe jiugyhatiän. Cabä Dios mänaa yhøhṉdaꞌagy, jaduhṉä tøyhajt hajxy nmøødhájtäm coo hajxy jaduhṉ xyagjugyhadáaṉäm.  
\v 3 Coo yhabaaty, mänitä Dios hajxy jaduhṉ xyhawáaṉäm coo hajxy jaduhṉ xyagjugyhadáaṉäm. Tøøc̈hä Dios jaduhṉ xyhaneꞌemy cooc̈hä miädiaꞌagy jaduhṉ nyajwáꞌxät. Xtiehm̱ wyiinguéjxhøch jaduhṉ. Jaꞌa Dios hajxy xyajnähwaats xyajcuhwáatsäm.  
\v 4 Tito, míic̈hhøch hädaa nocy nyajnäjaayøøby. Tehm̱ tiøyhájthøch miic̈h njuøꞌøy nébiøch nhamdsoo huungän. Tuꞌcuhdujt højtsä Diosmädiaꞌagy nmäbǿjcäm. Jaꞌa Diosteedy møødä Wiindsǿṉ Jesucristo, ween miic̈hä mayhajt hajxy xtiuuṉä, ween miic̈hä hoyhajtä weenhajt hajxy xmioꞌoy. Jaꞌa Jesucristo hajxy xyajnähwaats xyajcuhwáatsäm. 
\p  
\v 5 Mänáajøch jim̱ nwiimbitiän Creta, páadyhøch miic̈h jim̱ nyajmähmøøyy coo mjaac yaghoyǿꞌøwät tijaty højts hänajty ngaꞌa yajpéjtäpnä. Jadúhṉhøch miic̈h nhaneꞌemy coo wiindsǿṉ mbädáꞌagät maa tsajtøjcän wiinduhm̱yhagajpt.  
\v 6 Jeꞌe mbädáꞌagäp pøṉ hoy jäyaꞌayhajp, pøṉ toꞌoxiøjc tuꞌug yaghijp, pøṉ yhuung mäbøjpä Diosmädiaꞌagy, pøṉ yhuung hoy wädijp, pøṉ yhuung mädiaꞌagymiäbøjp.  
\v 7 Jaꞌa jäyaꞌayhajxy jaduhṉ tunaam̱bä wiindsǿṉ, jaꞌa Dios hajxy moonsähadáaṉäp. Howyiinmahñdy hajxy yaghídäp. Cab hajxy jiootmøjhádät. Cab hajxy yhawaꞌandáꞌagät. Cab hajxy yhuꞌug cab hajxy jiǿøꞌxät. Cab hajxy chiptsógät. Cabä jäyaꞌaxiädøꞌøñ hajxy yhadsógät.  
\v 8 Yajtøjtägǿꞌøwäp hajxy pønjaty mejtsp maa tiøjc‑hajxiän; piuꞌumióꞌowäp quioñdymóꞌowäp hajxy jaduhṉ. Chógäp jaꞌa hoybä hajxy. Cab hajxy choj jootmáꞌadät. Hoy hajxy jiäyaꞌayhádät. Hoy jaꞌa Diosmädiaꞌagy hajxy quiudiúnät. Cabä haxøøgwiinmahñdy hajxy yajtúnät.  
\v 9 Cabä tømiädiaꞌagy hajxy ñajtshixǿꞌøwät, jaꞌa hajxy tøø yajnähixøꞌøyíijäbä, jaduhṉä mäbøjpädøjcä hoguiuhdujt hajxy yajwiingapxǿꞌøwät. Jaduhṉ hajxy yajcähxǿꞌøgät coo hänaꞌc‑hajxy yhøhṉdaꞌagy, jaꞌa wiingmädiaꞌagy hajxy yajnähixøøbiä. 
\p  
\v 10 Nämayyä høhṉdaacpähajxy wiädity. Cabä Diosmädiaꞌagy hajxy quiudiunaꞌañ. Näꞌä nägoodä hajxy jaduhṉ ñäꞌä capxy ñäꞌä mädiaꞌagy. Jaduhṉä hänaꞌc‑hajxy nämay jiatcøøbiä, jaꞌa hajxy jaduhṉ mänaam̱bä coo jaꞌa mäbøjpädøjc‑hajxy tsipcøxp yajcircuncidarhádät.  
\v 11 Tsipcøxp myaghamónät pønjaty jaduhṉ wiing yajnähixøøby. Cabä cuhdujt hajxy miøødä coo hajxy jaduhṉ wiing yajnähixǿꞌøwät. Yajmäjuyaam̱b hajxy, paady hajxy jaduhṉ wiing yajnähixøꞌøy. Hoc̈hähdiuuṉnä hajxy jaduhṉ jiatcøꞌøy. Haa jaꞌa mäbøjpädøjcä wiingmädiaꞌagy hajxy jaduhṉ yajnähixǿøyyäbä, nax̱y hajxy jaduhṉ yajtuꞌudägoyyii, jaꞌa hajxy tuꞌjøøn tuꞌtøjcpä. 
\p  
\v 12 Jaduhṉä Cretabäjäyaꞌay tuꞌug tøø yhuuc mänaam̱bä coogä miägunaax̱hajxy jiaanc̈h tehm̱ yhøhṉdaꞌagy, møød coog hajxy hanax̱iä quiahwiindøyyä, møød coog hajxy jiaanc̈h tehm̱ quiax̱ä, møød coog hajxy jiaanc̈h tehm̱ ñuuxhoꞌogy. Jaayaꞌay jaduhṉ tøø miänáꞌañäbä, profeta hijty tiuum̱by.  
\v 13 Tehm̱ tiøyhajt jaduhṉ coo jaꞌa Cretabä‑jäyaꞌayhajxy jaduhṉ haxøøg jiäyaꞌayhaty. Paady miic̈h møc‑haamby mhoj mmägápxät, weenä Diosmädiaꞌagy hajxy jaduhṉ hoy miäbøcy.  
\v 14 Cabä høhṉdaꞌagymiädiaꞌagy hajxy miøjpädáꞌagät, jaꞌa judíoshajxy nax̱y yajnähixøøbiä. Møød weenä mädiaꞌagy hajxy quiaꞌa cudiuṉ̃ nebiä hänaꞌc‑hajxy jia haneꞌemiän, jaꞌa tøyhajt hajxy caꞌa tsojpä. 
\p  
\v 15 Jaꞌa hänaꞌcä howyiinmahñdy hajxy møødpä, cumáayyäbä Dios hajxy jaduhṉ, hoy hajxy quiaꞌa ja cudiuṉ̃ nebiä hänaꞌc høhṉdaacpähajxy jia haneꞌemiän. Pero jaꞌa hänaꞌcä Diosmädiaꞌagy hajxy caꞌa mäbøjpä, caba Dios hajxy quiumayii jeꞌeguiøxpä coo haxøøgwiinmahñdy hajxy jiaanc̈h tehm̱ miøødä. Cab hajxy tii hoy ñänøm̱y.  
\v 16 Jaduhṉ hajxy jia mänaꞌañ cooc tyijy jaꞌa Dios hajxy yhix̱yhaty, pero coo hajxy haxøøgjaty wyiꞌi jiatcøꞌøy, jaduhṉ hajxy yajcähxøꞌøgy coo hajxy tøyhajt quiaꞌa hix̱iä. Cabä Diosmädiaꞌagy hajxy quiudiunaꞌañ. Cabä hodiuuṉg hajxy ñäꞌägädä jadaꞌañ. Paady hajxy xiøøghadyii jaꞌa Dios. 
\c 2  
\p  
\v 1 Pero miic̈h, jaꞌa hoguiuhdujt myajnähixǿꞌøwäp, jaduhṉä mäbøjpädøjcä Diosmädiaꞌagy hajxy hoy quiudiúnät.  
\v 2 Jaduhṉä majjäyaꞌadiøjc myajwiinxiic myajwiingapxǿꞌøwät coo hajxy quiaꞌa huꞌug quiaꞌa jǿøꞌxät. Cab hajxy näꞌä nägoodä ñäꞌä xiꞌig ñäꞌä hanähátät. Hoy hajxy jiäyaꞌayhádät. Hamuumduꞌjootä Diosmädiaꞌagy hajxy miäbǿgät. Hoy jaꞌa miäjøøn miädøjc hajxy choc piaꞌhäyówät. Mieeꞌxtúgäp hajxy coo hajxy hänajty chaac̈hpøcy.  
\v 3 Jaduhṉä tajhoctøjc myajwiinxiic myajwiingapxǿøbiät coo howyiinmahñdy hajxy miøødhádät, jaduhṉ hajxy hoy quiuhdujthádät. Cab hajxy pøṉ ñähøønǿꞌøwät. Cab hajxy yhuꞌug cab hajxy jiǿøꞌxät. Jaꞌa hoybä weenbä hajxy yajnähixǿꞌøwäp.  
\v 4 Jaduhṉä tajhoctøjcä miädsaan miädoꞌoxy muutspä hajxy yajwiinxiic yajwiingapxǿꞌøwät coo jaꞌa yhuung coo jaꞌa ñaꞌay hajxy chógät,  
\v 5 møød coo hajxy hoy jiäyaꞌayhádät. Jaꞌa howyiinmahñdy hajxy miøødhádäp. Hoy yajxoṉä jiøøn tiøjc hajxy cwieendähádät. Miøødhádäbä hojioot hajxy. Wyiingudsähgǿꞌøwäbä ñihyhap hajxy. Coo hajxy jaduhṉ hoy quiuhdujthádät, jaduhṉä cuꞌugä Diosmädiaꞌagy hajxy wyiingudsähgǿꞌøwät. 
\p  
\v 6 Jaanä jaduhṉduhm̱bä, jaduhṉä muutsc‑hänaꞌctøjc myajwiinxiic myajwiingapxǿꞌøwät coo howyiinmahñdy hajxy miøødhádät.  
\v 7 Jaanä jaduhṉ miic̈hpä, tehṉgajnä hoy mwädítät, weenä mäbøjpädøjc jaduhṉ xpiahix̱y. Howyiinmahñdymøød myajnähixǿꞌøwät. Caj näꞌä nägoodä mnäꞌä xiꞌig mnäꞌä hanähátät.  
\v 8 Jaꞌa hoguiapxy jaꞌa homiädiaꞌagy jaduhṉ myajnähixǿꞌøwäp, jaduhṉ pøṉ xquiaꞌa jøjcapxǿꞌøwät. Jaduhṉä nmädsiphájtämhajxy chähdiúnät, cab hajxy jaduhṉ hoy xñänǿøm̱ämät haxøøg. 
\p  
\v 9 Hoorä, jaꞌa hänaꞌc‑hajxy hijpä cudoogøꞌøyä, jaduhṉ myajwiinxiic myajwiingapxǿꞌøwät coo jaꞌa wyiindsøṉä miädiaꞌagy hajxy pedyii quiudiuuṉ quiuñájxät, hoy hajxy näꞌä waam̱baty yhaneꞌemyii. Cab hajxy yhadsoowiimbídät.  
\v 10 Cab hajxy miéedsät. Hamuumduꞌjootä wyiindsøṉä miädiaꞌagy hajxy yajtúuṉät, ween hajxy jaduhṉ quiumayii, wehṉdä wyiindsøṉä Dios miädiaꞌagy hajxy jaduhṉ xmiäbǿjcät. Jaꞌa Dios hajxy xyajnähwaats xyajcuhwáatsäm. 
\p  
\v 11 Hix̱, tøø jaꞌa Dios jaduhṉ yajcähxøꞌøgy coo jaꞌa mayhajt tøø tiuṉ̃, coo hajxy nägøx̱iä xyajnähwaats xyajcuhwáatsäm, mäduhṉ̃tiä hajxy yaa nhíjtäm hädaa yaabä naax̱wiin.  
\v 12 Jaduhṉä Dios hajxy xyhanéhm̱äm coo jaꞌa haxøøgwiinmahñdy hajxy nnajtshixǿøyyämät møødä hadsojtwiinmahñdy, møød coo jaꞌa howyiinmahñdy hajxy nyaghíjtämät møødä hoguiuhdujt, møød coo jaꞌa Dios hajxy hamuumduꞌjoot nwiingudsähgǿøyyämät, jaduhṉ hajxy hoy nwädíjtämät hädaa yaabä naax̱wiin,  
\v 13 jeꞌeguiøxp coo jaꞌa Jesucristo hajxy jaduhṉ njøbhíjxäm coo yaa quiädaactägatsaꞌañ neby hajxy tøø xyajwiinwaaṉǿøyyäm. Xiꞌig xoṉ hajxy jaduhṉ njøbhíjxäm. NDioshájtäm jaꞌa Jesucristo hajxy jaduhṉ. Møj jaanc̈h jeꞌe. Jeꞌe hajxy xyajnähwaats xyajcuhwáatsäm. Yajxóṉ jiaanc̈h tehm̱ quiädaꞌagaꞌañ.  
\v 14 Paady hajxy hoy xñähhoꞌtúutäm, jaduhṉä haxøøg caꞌa hoybä hajxy xquiøx̱y yajnähwaats xquiøx̱y yajcuhwáatsäm. Jaduhṉ hajxy xquiuꞌughájtäm, weenä hoybä weenbä hajxy jaduhṉ hamuumduꞌjoot ndúuṉäm. 
\p  
\v 15 Jaduhṉdsä mäbøjpädøjc myajwiinxiic myajwiingapxǿꞌøwät coo hajxy jaduhṉ miäbǿgät. Mmøød miic̈hä cuhdujt jaduhṉ coo mhoj coo mmägápxät pøṉ caꞌa mäbøgaam̱b, jaduhṉ mgaꞌa yajpéxät. 
\c 3  
\p  
\v 1 Jaduhṉä mäbøjpädøjc myagjahmiejtstáꞌagät coo jaꞌa gobiernähajxy wyiingudsähgøꞌøwǿøjät møødä cuduuṉghajxy, møød coo jaꞌa miädiaꞌagyhajxy quiudiúuṉäxät. Cabä mäbøjpädøjc‑hajxy ñuuxhóꞌogät. Tiúnäp jaꞌa cuꞌugtuuṉg hajxy.  
\v 2 Cab hajxy pøṉ ñähøønǿꞌøwät. Cab hajxy chiptsógät. Meeꞌxxieemy hajxy jiäyaꞌayhádät. Hoy piøṉä hajxy wyiingudsähgǿꞌøwät. 
\p  
\v 3 Hix̱, hijty, cabä Diosmädiaꞌagy hajxy hijty nwiinjuǿøyyäm. Cab hajxy hijty ngudiúuṉäm. Tuꞌudägóoyyäm hajxy hijty. Hanax̱iä haxøøg caꞌa hoybä hajxy hijty nhadsójcäm. Haxøøg hajxy hijty njäyaꞌayhájtäm. Hadsojtwiinmahñdy hajxy hijty nyaghíjtäm. Xxiøøghájtäm jaꞌa cuꞌug hajxy hijty. Hamiṉ̃ haxøpy hajxy hijty nnimiäháṉ nnimiägøꞌøwhájtäm.  
\v 4-5 Pero mänitä Dios yajwiingähxøꞌcy coo hajxy xñäxúuꞌtsäm, møød coo hojioot jiaanc̈h tehm̱ miøødä. Mänit hajxy xyajnähwaats xyajcuhwáatsäm coo hajxy jaduhṉ xñäxúuꞌtsäm, caꞌa jieꞌeguiøxpä cooc tyijy hajxy hoy tøø ngudiúuṉäm. Jaduhṉ hajxy xyajnähwaats xyajcuhwáatsäm coo hawiinjem̱yjioot coo hawiinjem̱ywyiinmahñdy hajxy xmióoyyäm, møød coo jaꞌa Dioshespíritu hajxy xyagjeem̱ xyajtägájtsäm.  
\v 6 Coo jaꞌa Jesucristo hajxy hoy xñähhoꞌtúutäm, jaduhṉä Dios jaꞌa yhEspíritu hajxy møj may xmióoyyäm.  
\v 7 Paadiä Dios jaꞌa yhEspíritu hajxy xmióoyyäm, jaduhṉ hajxy xpiädáacäm hawaꞌadstuum. Møjjä mayhajt hajxy jaduhṉ xtiúuṉäm. Møød jaduhṉ hajxy xyagjugyhadáaṉäm cøjxtaꞌaxiøø nebiä Dios jiugyhatiän. Jaduhṉ hajxy tøø xyajwiinwaaṉǿøyyäm. Paady hajxy jaduhṉ njøbhíjxäm. 
\p  
\v 8 Tehm̱ tiøyhajt jaduhṉ. Nax̱y miic̈hä mäbøjpädøjc jaduhṉ mdehm̱ miägapx mdehm̱ yhanéꞌemät coo hajxy hamuumduꞌjoot hoy quiuhdujthádät, jaꞌa Diosmädiaꞌagy hajxy tøø miäbǿquiäbä. Tehṉgajnä hoybä weenbä hajxy tiúnät. Tsoobaatp jaduhṉ. Jaduhṉ hajxy ñiyaghoyøꞌøwǿøjät.  
\v 9 Pero caj myajtägǿꞌøwät maa jaꞌa høhṉdaꞌagymiädiaꞌagy hajxy nax̱y yajcapxiøꞌøyän, maa jaꞌa jecyquiuhdujt hajxy nax̱y yajtsiptaꞌaguiän, maa jaꞌa jecyjiäyaꞌay xiøø hajxy nax̱y yajtøøw̱ yajtøøꞌxän. Cab jaduhm̱bä capxy mädiaꞌagy jaduhṉ ñäꞌägädä tuuṉgpaady. 
\p  
\v 10 Jii hänaꞌc‑hajxy näjeꞌe maa jaꞌa tsajtøjcän, wiingjaty hajxy yajnähixøꞌøy. Y coo jaꞌa mäbøjpädøjc‑hajxy jaduhṉ näjeꞌe miäbøcy, tuꞌudägooby hajxy jaduhṉ. Cabä jiamiøød hajxy hoy miøødhijnä tuꞌugmädiaꞌagy. Pønjaty jaduhṉ wiingjaty yajnähixøøby, mhójäp jaduhṉ tähooc metsc‑hooc, ween hajxy yhuuc hamoṉ̃. Y pø cab hajxy jaduhṉ yhamonaꞌañ, mänit mgaꞌa mämøjǿꞌøwät mgaꞌa mämayǿꞌøwät.  
\v 11 Pønjaty jaduhṉ jatcøøby, cabä howyiinmahñdy hajxy miøødä. Haxøøgä wyiinmahñdyhajxy jaduhṉ. Paady hajxy haxøøgtuum piädaꞌagaꞌañii. 
\p  
\v 12 Jím̱høc̈hä Artemas nguexaꞌañ maa miic̈hän. Coo jaꞌa Artemas jaduhṉ quiaꞌa yajnäbaadǿꞌøwät coo jim̱ ñǿcxät, mänítøc̈hä Tíquico mäbøcy jim̱ nguéxät. Coo jim̱ miédsät, mänítøch miic̈h jim̱ nøcxy xpiaady Nicópolis. Jím̱høch nhidaꞌañ høxtä coo tøøchpä ñáxät. Mhuuc hadǿꞌødsäp jaduhṉ.  
\v 13 Jim̱ä Apoloshajxiädaꞌa wiädity Creta møødä Zenas, jaꞌa cuhdujtyajnähixøøbiä. Coo hajxy hänajty tiuꞌubøgaꞌañ, mänit miic̈h cøx̱iä wiinä mmóꞌowät tijaty hajxy hänajty yajmaajiadaam̱by.  
\v 14 Jaduhṉä njamiøødhájtäm myajwiinxiic myajwiingapxǿꞌøwät coo jaꞌa hoyba weenba hajxy tehṉgajnä tiúnät, ween hajxy jaduhṉ piuhbety pøṉ hänajty yajmaajiajp. Cab hajxy ñäꞌä nuuxhóꞌogät. 
\p  
\v 15 Jaꞌa njamiǿødhøch hajxy yaa xmiøødhijpä, xyhaagä yajpooꞌxp miic̈h jaduhṉ. Huuc tuṉä mayhajt, huuc yajpooꞌx jaꞌa høøc̈hcøxpä pønjaty højts jim̱ xchojp xpiaꞌhäyoob jaꞌa Diosmädiaꞌagyquiøxpä. Ween mijtsä Dios jaꞌa hoyhajtä weenhajt xmioꞌoy nägøx̱iä. Amén.