\id 2TH  
\h 2 Tesalonicenses 
\toc1 2 Tesalonicenses 
\toc2 2 Tesalonicenses 
\toc3 2 Ts. 
\mt1 2 Tesalonicenses 
\c 1  
\p  
\v 1 Chaa højts hädaa nocy nhädiuuṉmugaꞌañ, høøc̈h Pablo, møødä Silvano, møødä Timoteo. Mijts hädaa nyajnäjaayøøby, pønjaty jim̱ hamugøøby Dioswiingudsähgøøbiä Tesalónica. Jaꞌa Dios hajxy nDeedyhájtäm, møødä Jesucristo hajxy nWiindsøṉhájtäm.  
\v 2 Ween mijtsä Dios jaꞌa tsooctä mayhajt xtiuuṉä, ween mijtsä hoyhajtä weenhajt xmioꞌoy. 
\p  
\v 3 Mäguꞌughajpädøjc, jaꞌa mijtscøxpä højtsä Dios hoy miänaajä nnämaꞌay “Dioscujúꞌuyäp.” Hawiinmats jaduhṉ. Hix̱, tehṉgajnä Diosmädiaꞌagy hajxy mjaac mäbøcy, møød hajxy tehṉgajnä mjaac nic̈hogyii hamiṉ̃ haxøpy.  
\v 4 Hoy miajatiä højts nwädity maa jaꞌa Diostøjcän, jaduhṉ højts nmädiaꞌagy jaꞌa mijtscøxpä coo jaꞌa Diosmädiaꞌagy hajxy hoy mjaanc̈h tehm̱ miäbøcy, møød coo hajxy hoy mjaanc̈h tehm̱ mieeꞌxtucy, hoy hajxy hanax̱iä mja tsaac̈hpøcy jaꞌa Dioscøxpä.  
\v 5 Coo hajxy jaduhṉ mmeeꞌxtucy, paadiä Dios hajxy jim̱ xpiädaꞌagaꞌañ hawaꞌadstuum coo hänajty miähaneꞌemaꞌañ. Xyhijxpä Dios hajxy coo hajxy jeꞌe myajcudsaac̈hpøgøꞌøy. Hoy jaduhṉ coo hajxy jim̱ xpiädáꞌagät. 
\p  
\v 6 Pønjaty mijts jaduhṉ xchaac̈htiuum̱b, yaghawiimbidaam̱biä Dios jaduhṉ. Jaduhṉä Dios jioot chocy.  
\v 7 Coo jaꞌa Wiindsǿṉ Jesucristo yaa miänajtägatsaꞌañ hädaa yaabä naax̱wiin, jim̱ choonaꞌañ tsajpootyp. Jaꞌa mioonsä miøødmänacaam̱by, jaꞌa hajxy mäjaamøødpä. Hajájjäbä Jesucristo quiädaꞌagaꞌañ. Mänitä Dios hajxy nägøx̱iä xyajpooꞌxáaṉäm, møød højts møød mijts nägøx̱iä. Cab hajxy jaduhṉ xyajtsaac̈htiunáaṉänä.  
\v 8 Coo jaꞌa Jesucristo hänajty yaa tøø quiädaꞌagy, mänitä jäyaꞌayhajxy quiumädow̱aꞌañ pønjatiä Dios hänajty tøø quiaꞌa møjpädáꞌaguiäbä, pønjatiä miädiaꞌagy hänajty tøø quiaꞌa mäbǿjcäbä jaꞌa Wiindsǿṉ Jesucristocøxpä.  
\v 9 Cøjxtaꞌaxiøø hajxy jiiby chaac̈hpøgaꞌañ haxøøgtuum. Cab hajxy jim̱ mänaa yajtägøꞌøwaꞌañii Dioswiinduum, maa jaꞌa Dios møj jaanc̈h yhäñaꞌayän, maa møcmäjaa miøødän.  
\v 10 Coo jaꞌa Jesucristo hänajty yaa tøø quiädaꞌagy, mänitä jäyaꞌayhajxy jiaanc̈h tehm̱ yagjuøꞌøwaꞌañ, jaꞌa Diosmädiaꞌagy hajxy hänajty tøø miäbǿquiäbä, jaꞌa hajxy hänajty tøø ñähwaꞌac̈h tøø quiuhwáꞌac̈häbä. Mänitä Jesucristo hajxy wyiingudsähgøꞌøwaꞌañ. Jim̱ mijts hänajty mbahidaam̱bä jeꞌeguiøxp coo jaꞌa Diosmädiaꞌagy hajxy hänajty tøø mmäbøjpä neby højts mijts tøø nyajnähixøꞌøyän. 
\p  
\v 11 Jaꞌa mijtscøxpä højtsä Dios hoy miänaajä nbaꞌyaꞌaxy coo jaꞌa miädiaꞌagy hajxy hoy mgudiúuṉät, ween hajxy jaduhṉ xquiumay. Paady hajxy tøø xyajnähdijy coo hajxy mnähwaꞌads mguhwáꞌadsät. Ween hajxy xpiuhbety jaꞌa miäjaahaam coo jaꞌa miädiaꞌagy hajxy hoy mmäbǿjcät, jaduhṉä hojioot hajxy mmøødhádät.  
\v 12 Coo jaꞌa hoybä weenbä hajxy jaduhṉ mgudiúnät, jaduhṉä cuꞌugä Wiindsǿṉ Jesucristo hajxy wyiingudsähgǿꞌøwät, møød jaduhṉ mijtsä cuꞌug xwyiingudsähgǿøbiät. Jaꞌa nDioshájtäm møødä Wiindsǿṉ Jesucristo, jaayaꞌay mijtsä tsooctä mayhajt xtiúuṉäp. 
\c 2  
\p  
\v 1-2 Mäguꞌughajpädøjc, chám̱høch nmädiaꞌagaꞌañ coo jaꞌa Wiindsǿṉ Jesucristo yaa quiädaactägatsaꞌañ hädaa yaabä naax̱wiin, møød coo hajxy xmiøjyaꞌaxáaṉäm coo hajxy jim̱ nhamugǿøyyämät maa jeꞌejän. Hoorä, coo hajxy mmädoyhádät cooc tyijy tøø yhabaatnä coo jaꞌa Jesucristo quiädaactägatsaaṉnä, cab hajxy mdsoj mäbǿgät. Cab hajxy mjootmayhádät. Cab hajxy mdsähgǿꞌøwät. Hix̱, jaduhṉä hänaꞌc‑hajxy näjeꞌe tøø yhøhṉdaꞌagy cooc tyijy jaꞌa Dios jaduhṉ tøø miänaꞌañ, møød cooc tyijy højts jaduhṉ tøø nmänaꞌañ, capxyhaam, nocyhaam. Pero cab jaduhṉ ñäꞌä tøyyä. Paady højts mijts cham̱ nmänuuꞌxtaꞌagy  
\v 3 coo hajxy mgaꞌa yajwiinhǿønät ni weeṉ̃tiä. Hix̱, cab jaduhṉ choj habaadaꞌañ. Jayøjpä jayaꞌayä Diosmädiaꞌagy hajxy nämay ñajtshixøꞌøwaꞌañ. Mänitä haxøøgjäyaꞌay wyiingähxøꞌøgaꞌañ, jaꞌa hänajty jiiby caꞌawaam̱bä haxøøgtuum.  
\v 4 Mänitä haxøøgjäyaꞌayä Dios miädsibøꞌøwaꞌañ møødä jäyaꞌayhajxy yaa wyiingudsähgøøbiä cøx̱iä. Jaanc̈h tehm̱ yajcumayaam̱b hänajty jaduhṉ. Mänitä yhanehm̱daact jiiby piädaꞌagaꞌañ maa Diostøjcän. Jaduhṉ hänajty ñibiädaꞌagaꞌañii nebiä Diosän. Yajwiingudsähgøꞌøwaam̱b hänajty jaduhṉ nebiä Diosän. 
\p  
\v 5 Mänáajøch jim̱ nhitiän maa mijtsän, mänítøch jaduhṉ nhuuc hawáaṉäm coo jaduhṉ jiadaꞌañ. Mjahmiejchp hajxy jaduhṉ, túhm̱äts.  
\v 6 Cabä haxøøgjäyaꞌay jaduhṉ choj wiingähxøꞌøgaꞌañ jeꞌeguiøxp coo yhadugyii høxtä coonä Dios yaghabáadät coo jaduhṉ wyiingähxǿꞌøgät. Mnajuøøby hajxy jaduhṉ pøṉ mähadujp.  
\v 7 Tøø jaꞌa haxøøgwiinmahñdy tiägøøñä wädijpä. Hameeꞌch jaduhṉ wiädity. Jaanä jaduhṉ jeꞌe yhadújcäbä. Coo yhabáadät coo quiaꞌa hadújcänät, mänitä mähadujpä jiøwaꞌadsaꞌañ.  
\v 8 Mänitä haxøøgjäyaꞌay jaduhṉ jiaanc̈h wiingähxøꞌøgaꞌañ. Mänitnä Wiindsǿṉ Jesucristo yaa quiädaactägatsaꞌañ mäjaamøød. Mänitä Jesucristo jaꞌa haxøøgjäyaꞌay yajcuhdägoyyaꞌañ. Piäxujyhaam jaduhṉ yaghoꞌogaꞌañ.  
\v 9 Coo jaꞌa haxøøgjäyaꞌay jaduhṉ wyiingähxøꞌøgaꞌañ, jaꞌa møjcuꞌugong puhbedaam̱b. Møcmäjaa miøødhadaam̱by. Mänitä hijxtahṉd yajcähxøꞌøgaꞌañ hoy‑yagjuøøñä. Jaduhṉä cuꞌug hänajty wyiinhøønaꞌañ.  
\v 10 Haxøøgwiinmahñdyhaam hänajty miäwiinhøønaꞌañ. Jaꞌa jäyaꞌayhajxy hänajty tuꞌudägoyyaam̱bä, jeꞌedshajxy jaduhṉ yajwiinhøønaam̱b. Paady hajxy hänajty tiuꞌudägoyyaꞌañ coo jaꞌa tøyhajt hajxy hänajty tøø quiaꞌa tsocy. Paady hajxy hänajty quiaꞌa nähwaꞌads quiaꞌa cuhwaꞌadsaꞌañ.  
\v 11-12 Pønjatiä tøyhajt jaduhṉ caꞌa tsojp, jaꞌa haxøøgpä hajxy wyiinxooṉdaacypy. Jaduhṉä Dios miänaꞌañ coo hajxy ween yajwiinhøøñ, møød coo jaꞌa høhṉdaꞌagymiädiaꞌagy hajxy ween miäbøcy, jaduhṉ hajxy jiiby quiáꞌawät haxøøgtuum. 
\p  
\v 13 Mäguꞌughajpädøjc, xjiaanc̈h tehm̱ chojpy mijtsä Dios. Jaꞌa mijtscøxpä højtsä Dios hoy miänaajä nnämaꞌay “Dioscujúꞌuyäp.” Hawiinmats jaduhṉ. Paady højts jaduhṉ nnämaꞌay jeꞌeguiøxp coo jaꞌa Dios hajxy jecy xyajnähdijy coo hajxy mnähwaꞌads mguhwáꞌadsät. Cahnä hädaa yaabä naax̱wiin hänajty yhawijy tiøøꞌxtaꞌagy coo hajxy jaduhṉ xyajnähdijy. Coo jaꞌa tøyhajt hajxy tøø mmäbøcy, paadiä Dios hajxy xyajnähwaꞌac̈h xyajcuhwaꞌac̈h jaꞌa yhEspírituhaam.  
\v 14 Coo jaꞌa Dios hajxy jaduhṉ xyajnähdijy, paadiä tøyhajt hajxy tøø mmäbøcy mänaa højts mijts hoy nyajwiingapxøꞌøyän. Jaduhṉ hajxy tøø xyajnähdijpä coo jaꞌa Wiindsǿṉ Jesucristo hajxy xmiøødhídät cøjxtaꞌaxiøø. 
\p  
\v 15 Mäguꞌughajpädøjc, tøø højts mijtsä cuhdujt madiuꞌu nyajnähixøꞌøy capxyhaam møød nocyhaam. Hamuumduꞌjoot hajxy jaduhṉ mmäbǿgät tehṉgajnä. Cab hajxy nnajtshixǿꞌøwät.  
\v 16 Xjiaanc̈h tehm̱ chójcäm jaꞌa Wiindsǿṉ Jesucristo hajxy møødä Diosteedy. Tøø mayhajt hajxy xtiúuṉäm coo hajxy tøø xyajwiinwaaṉǿøyyäm cooc hajxy hoy miänaajä xmiøødhidáaṉäm.  
\v 17 Weenä Dios hajxy xpiuhbety coo hajxy hoy mgudiúnät, møød coo hajxy hoy mgápxät. 
\c 3  
\p  
\v 1 Hoorä, mäguꞌughajpädøjc, huuc paꞌyaꞌaxä Dios hajxy jaꞌa højtscøxpä, ween højtsä mädiaꞌagy jaꞌa Jesucristocøxpä paquiä nøcxy nyajwaꞌxy, weenä cuꞌughajxy miäbøcy nej mijts tøø mmäbøquiän,  
\v 2 møød ween højtsä Dios xñäwaꞌañ maa jaꞌa haxøøghänaꞌc‑hajxiän, maa jaꞌa cahwiindøyhänaꞌc‑hajxiän. Hix̱, cabä jäyaꞌayhajxy nägøx̱iä miäbøcy.  
\v 3 Pero tømiädiaacpä Dios. Xpiuhbedaam̱b hajxy jaduhṉ. Xñäwaꞌanaam̱b hajxy jaduhṉ maa jaꞌa haxøøgpän.  
\v 4 Jaanä jaduhṉduhm̱bä, nmäbǿjcäp højtsä Dios jaꞌa miädiaꞌagy jaꞌa mijtscøxpä. Nnajuøøby højts coo mijtsä cuhdujt mgudiunaꞌañ, jaꞌa højts mijts cham̱ nyajwiingapxøꞌøwaam̱biä.  
\v 5 Weenä Dios hajxy xjiaac yajwiinjuøꞌøy tiiguiøxpä hajxy jaduhṉ coo xchójcäm, møød tiiguiøxpä Jesucristo coo mieeꞌxtujcy mänaa yaa yhitiän hädaa yaabä naax̱wiin. 
\p  
\v 6 Mäguꞌughajpädøjc, tøø højts nmädoyhaty cooc mijts näjeꞌe mwiꞌi ñuuxhoꞌogy, møød cooc hajxy näjeꞌe mgaꞌa näꞌägädä tunaꞌañ. Hoorä, jaduhṉ højts mijts nmägapxy nhaneꞌemy jaꞌa Wiindsǿṉ Jesucristocøxpä coo hajxy mbuhwáꞌadsät pønjaty jaduhṉ wiꞌi ñuuxhoꞌp, jaꞌa cuhdujt hajxy caꞌa cudiunaam̱bä, jaꞌa højts mijts tøø nyajwiingapxǿꞌøyäbä.  
\v 7 Mnajuøøby hajxy coo højts hawiinmats xpiahíxät neby højts hoy nwäditiän. Hix̱, mänaa højts jim̱ nhitiän maa mijtsän, cab højts hänajty jim̱ nnuuxhoꞌogy.  
\v 8 Caj pues. Xøømdsuhm̱ højts hänajty nduṉ̃ nxajy. Paady højts hänajty jaduhṉ nguhdujthaty, cab højts hänajty ndsocy coo højts mijts cu xpiuhbejty. Ngujuuby højts hänajty tijaty højts hänajty ngaaby.  
\v 9 Paady højts hänajty jaduhṉ nguhdujthaty, jaduhṉ højts hänajty ndsocy coo højts mijts jaduhṉ xpiahíxät, hoy højtsä cuhdujt hänajty nja møødä coo højts mijts cu xpiuhbejty.  
\v 10 Mänaa højts jim̱ nhitiän maa mijtsän, jaduhṉ højts hänajty nmägapxy nhaneꞌemy coo hajxy nägøx̱iä mduṉ mxájät. Pøṉ jaduhṉ caꞌa tunaam̱b, cabä caayyøøc hajxy mmóꞌowät.  
\v 11 Coo højts jaduhṉ tøø nmädoyhaty cooc hajxy jaduhṉ näjeꞌe mwiꞌi ñuuxhoꞌogy, møød cooc hajxy näjeꞌe mgaꞌa näꞌägädä tunaꞌañ, møød cooc hajxy näjeꞌe mwiꞌi yajtägøꞌøy maa cueendä hajxy mgaꞌa møødän,  
\v 12 pønjaty jaduhṉ jatcøøby, jaduhṉ højts nmägapxy nhaneꞌemy jaꞌa Wiindsǿṉ Jesucristocøxpä coo hajxy jootcujc ween tiuṉ̃ xiajy, jaduhṉä quiaayyøøc hajxy ñiguiudúuṉäxät. 
\p  
\v 13 Mijts, mäguꞌughajpädøjc, cab hajxy mnänuuxǿꞌøwät coo jaꞌa hoybä weenbä hajxy mdúnät.  
\v 14 Pøṉ jaduhṉ caꞌa cudiunaam̱b neby højts cham̱ ngujaayän maa hädaa noquiän, myajcopcǿꞌøwäp hajxy jaduhṉ. Cab hajxy mmøødwädijmújnät. Ween jaduhṉ chähdiuṉ̃.  
\v 15 Pero cab hajxy mmädsiphádät. Jaduhṉ hajxy mhoj mmägápxät nebiä huch nebiä puhyaꞌayän. 
\p  
\v 16 Yejpiä Dios jaꞌa hoyhajtä weenhajt. Ween mijtsä hoyhajtä weenhajt møj may xmioꞌoy hoy miänaajä. Ween hajxy nägøx̱iä xmiøødhity. 
\p  
\v 17 Høøc̈h Pablo, hamdsoo cøꞌøháamhøch cham̱ njahmiayaꞌañ. Jadúhṉhøch nxøø ngujaay hoy ñäꞌä mädyii nocyjiootiä: Pablo.  
\v 18 Ween mijtsä Wiindsǿṉ Jesucristo jaꞌa tsooctä mayhajt xtiuuṉä nägøx̱iä. Amén.