\id 2PE  
\h 2 PEDRO 
\toc1 TUTÚ CÚÚ ÙÚ NÍ CADÚHA TÉ PÈLÚ 
\toc2 2 PEDRO 
\toc3 2 P. 
\mt1 TUTÚ CÚÚ ÙÚ NÍ CADÚHA TÉ PÈLÚ 
\c 1  
\s1 Té Pèlú cádǔha‑dé tutú quɨ́hɨ́ⁿ ndaha ñáyiu sàndáá iní tnúhu Yá Ndiǒxí 
\p  
\v 1 Yúhú té Xǐmú, àdi Pelú chi úú dɨ̀u‑í, xínú cuèchi núú Xǐtohó Jesucrìstú, chi mee‑gǎ ní tendaha ñàha‑gá xii‑í xícá cùu‑í càháⁿ‑í tnúhu‑gá. Te càdúha‑í tutú‑a sá cúú‑xí nchàa nchohó ñáyiu sàndáá iní ñáhá xìi‑gá dàtná sàndáá iní‑ndɨ́‑gá, te ducaⁿ chi Tǎtá‑ó Dǔtú Ndiǒxí ní dácàháⁿ‑gá iní‑ó nǐ sándáá iní‑ó‑gǎ, chi cùu‑gá Yaá ío váha quìde ndáá ndɨhɨ Xítohó Jesucrìstú Yaá dácǎcu nihnu ñaha xìi‑o núú ùhú núú ndàhú.  
\v 2 Te xìcáⁿ táhù‑í núú Yǎ Ndiǒxí sá ùuⁿ‑gá uuⁿ‑gá ná cuìta chindee chitúu ñaha‑gǎ xii‑ndo quɨ̌hɨ́ⁿ, te ducaⁿ ǐo váha cuu iní‑ndó cùndecu‑ndo, te ducaⁿ càda‑gá chi ta cùtnuní‑gá iní‑ndó nàcuáa ndùu cuendá‑gá, te ducaⁿ ta cùtnuní tucu iní‑ndó nchàa nacuáa ndùu cuendá Xítohó Jesucrìstú Yaá cúú Xǐtohó‑ó. 
\s1 Nàcuáa quìde ñáyiu ndècu ichi Xítohó Jesucrìstú 
\p  
\v 3 Te Yá Ndiǒxí ío càhnu cuu‑gá chi chìndee ñaha‑gá xii‑o quìde ndáá‑ó ndècu‑o datná cuìní méé‑gǎ, te ducaⁿ chi cùtnuní iní‑ó nàcuáa sàni iní Xítohó Jesucrìstú Yaá ní cáháⁿ ñáhá xìi‑o. Te òré ní cáháⁿ ñáhá‑gǎ xii‑o te ní cutnùní iní‑ó sǎ ǐo càhnu cuu‑gá te ío váha quìde‑gá.  
\v 4 Te ducaⁿ nǐ cutnùní tucu iní‑ó nàcuáa ní cáháⁿ‑gá cada ñaha‑gǎ xii‑o, te tnúhu ní cáháⁿ‑gá‑áⁿ ǐo càhnu cuu‑xi te ío váha, te nchoo nǐ sándáá iní‑ó tnǔhu‑áⁿ nǔu xíǎⁿ ñá túú‑gǎ ndécú‑ó ìchi cuehé ichi duha te ni ñà túú‑gǎ sání ìní‑ó càda‑o nándɨ sá cuèhé sá dúhá, te ní cuu vii ní cuu váha iní‑ó vìtna.  
\v 5 Te sá dúcáⁿ quìde‑gá te xíǎⁿ ío nducu ndèe‑ndo cada‑ndo nchaa nacuáa càháⁿ‑í‑a, te nchòhó sàndáá iní‑ndó‑gǎ dico ñá dɨ́ú mèe‑ni xíǎⁿ chi tnàhá xíní ñùhu‑xi cada ndáá‑ndó cùndecu‑ndo. Te núu quìde ndáá‑ndó ndècu‑ndo te xìni ñuhu‑xi tecú tnùní‑ndó tnǔhu‑gá.  
\v 6 Te núu tècú tnùní‑ndó te cùu‑ndo ñáyiu xìní cotnɨɨ mee‑xi, te núu cùu‑ndo ñáyiu sàcóo tnɨɨ mee‑xi te xìni ñuhu‑xi cunduu cahnu iní‑ndó cuěi nándɨ sá ná yǎha‑ndo cùndecu‑ndo, te núu càhnu iní‑ndó te xìni ñuhu‑xi cada ndáá‑ndó cùndecu‑ndo datná cuìní méé Yǎ Ndiǒxí cada‑ndo.  
\v 7 Te núu quìde ndáá‑ndó ndècu‑ndo, te xìni ñuhu‑xi ío cuu iní tnáhá ndɨ̀ mee‑ndo nacuáa ndècu‑ndo ichi‑gá, te núu cùu iní tnáhá ndɨ̀ mee‑ndo te xìni ñuhu‑xi cuu iní‑ndó nchàa dava‑gá tnàha ñáyiu‑ndo. 
\p  
\v 8 Te núu sa ducaⁿ quìde‑ndo ndecu‑ndo te uuⁿ‑gá cuita ducaⁿ càda‑ndo quɨ́hɨ́ⁿ núú cuàháⁿ núú věxi, te núu ducaⁿ quìde‑ndo te cùu‑ndo cue ñáyiu ñá túú dàna iní‑xi xǐndecu, te cuita cutnùní‑gá iní‑ndó nchàa nacuáa sàni iní Xítohó Jesucrìstú quɨ́hɨ́ⁿ.  
\v 9 Te nchaa ñáyiu ñá túú cuìní ducaⁿ càda cuú‑yu ñáyiu ñá túú tnàhí ndìxi túu iní‑xi sá Yǎ Ndiǒxí sa ní ndada ndoo ní ndada nine‑gá iní‑yu cuèndá nchaa sá cuèhé sá dúhá nǐ xóo cadá‑yu, te ñáyiu‑áⁿ cúǔ‑yu dàtná ɨɨⁿ ñáyiu cuàá àdi datná ɨɨⁿ ñáyiu ñá túú cùtnuní váha núú‑xi, te ducaⁿ sǎtnahá‑xi cùú‑yu cuèndá sá dúcáⁿ quìdé‑yu.  
\v 10 Te xíǎⁿ nǔu yúhú càháⁿ‑í dóho nchaa nchòhó ñáyiu ndècu ichi Xítohó Jesucrìstú, te ío nducu ndèe‑ndo cada váha‑ndo cùndecu‑ndo cuendá cutnùní ndáá iní‑ndó sǎ Yǎ Ndiǒxí ní cáháⁿ ñáhá‑gǎ xii‑ndo, te ducaⁿ nǐ quide‑gá chi ducaⁿ nǐ cachí‑gá cada‑gá. Te vá ɨ́ɨ́ⁿ ndùu cani iní‑ndó dàña‑ndo ichi‑gá, te núu vá dáñá ndèé‑ndó càda‑ndo nchaa nacuáa càháⁿ‑í‑a.  
\v 11 Te núu ducaⁿ na càda‑ndo cundecu‑ndo, te ío vii ío váha cada Yá Ndiǒxí queheⁿ cuèndá ñáhá‑gǎ xii‑ndo òré ná sàá‑ndó nǔú ndécú Xǐtohó Jesucrìstú táxí tnùní‑gá nchaa nduu nchaa quɨ́ú, te dɨu‑ni Yaá‑ǎⁿ cúú Xǐtohó‑ó te ní dácǎcu nihnu ñaha‑gǎ xii‑o nǔú ùhú núú ndàhú. 
\p  
\v 12 Te ducaⁿ‑ni quɨ̀hɨ‑í dandàcu iní ñáhà‑í xii‑ndo nchàa tnúhu càháⁿ‑í‑a cuěi sa xìní‑ndó tnǔhu‑áⁿ, te cuěi sàndáá váha iní‑ndó nchàa tnúhu ndáá dácuàha‑ndo.  
\v 13 Te yúhú quídé cuèndá‑í sá ǐo tàú‑xi cáháⁿ‑í dóho‑ndo nɨ̀ni ndecu‑í ñuyíú‑a cuèndá sá vǎ nácuànaa‑ndo nacuáa cada‑ndo cùndecu‑ndo.  
\v 14 Chi Xítohó Jesucrìstú ní cachí‑gá sá ñà túú‑gǎ vài nduu cundecu‑í ñuyíú‑a te cuú‑í.  
\v 15 Te ío nducu ndèe‑í nducu‑ǐ nàcuáa cada‑í cuèndá quendóo ndɨhɨ‑ndo nchàa tnúhu càháⁿ‑í‑a, te cuěi na yǎha cuú‑í dico vá nácuànaa‑ndo cada‑ndo nchaa nacuáa càháⁿ tnúhu sá dánèhé ñáhà‑í xii‑ndo vìtna. 
\s1 Cue tée ní xiní núú sǎ ǐo càhnu cuu Xítohó Jesucrìstú 
\p  
\v 16 Te sa ní dánèhé ñáhá‑ndɨ̌ xii‑ndo sǎ ǐo càhnu cuu Xítohó Jesucrìstú. Te ní cachí tnúhu tucu‑ndɨ́ nàcuáa cada‑gá òré quixi tucu‑gá, te tnúhu‑áⁿ cúú‑xí tnǔhu ndáá cuɨtɨ te ñá dɨ́ú tnǔhu sá nǐ sani iní cue ñáyiu ñuyíú‑a cùu‑xi, chi nchúhú ní xiní núú‑ndɨ̌ nàcuáa ní quide‑xi cútnàhá ní cutnùní iní‑ndɨ́ sá ǐo càhnu cuu Xítohó Jesucrìstú.  
\v 17 Chi dàvá‑áⁿ ǐo váha ní quide Tǎtá‑ó Dǔtú Ndiǒxí ní quide càhnu‑gá Xítohó Jesucrìstú, te dɨu‑ni dàvá‑áⁿ nǐ cáháⁿ Dútú Ndiǒxí ndéé andɨu nǐ xáhaⁿ‑gǎ xii Xítohó Jesucrìstú: “Yòhó cúú‑n Děhe‑í tée ío cùu iní‑í, te ío cùdɨ́ɨ́ ìní ñáhà‑í xii‑n”, duha ní xáhaⁿ Yǎ Ndiǒxí xii Xítohó Jesucrìstú.  
\v 18 Te nchúhú ní tecú dóho‑ndɨ́ ní cáháⁿ Yǎ Ndiǒxí ndéé andɨu cǔtnàhá ducaⁿ nǐ xáhaⁿ‑gǎ xii Xítohó Jesucrìstú, chi tnàhá‑ndɨ́ ndécú‑ndɨ̌ ndɨhɨ‑gá yucu núú dúcáⁿ nǐ quide càhnu ñaha Yá Ndiǒxí xii‑gá. 
\p  
\v 19 Te ndècu ndɨhɨ‑o nchaa tnúhu ní cáháⁿ cue tée ní xóo cáháⁿ tnúhu Yá Ndiǒxí ndéé sanaha te nchaa tnúhu‑áⁿ càháⁿ‑xi nchaa nàcuáa cada‑xi vitna, te cùtnuní iní‑ó sǎ tnǔhu ndáá cúú‑xí, te xìni ñuhu‑xi cada cuendá váha‑ndo nchàa nacuáa càháⁿ tnúhu‑áⁿ, chi tnúhu‑áⁿ cúú‑xí dàtná ɨɨⁿ ñuhú dáyèhé‑xi ndéé òré véxi túndaá quéné chòdíní cáhnú dàyehé‑dɨ. Te ducaⁿ sǎtnahá‑xi cùu tnúhu‑áⁿ chi quìde‑xi nacuáa cutnùní iní‑ó cuèndá Xítohó Jesucrìstú.  
\v 20 Te xìni ñuhu‑xi sá ǐo‑gá cada cuèndá‑ndó sǎ ñà túú ñǎyiu tecú tnùní ni ɨ̀ɨⁿ tnúhu sá nǐ chídó tnùní cue tée ní cáháⁿ tnúhu Yá Ndiǒxí ndéé sanaha, te núu Yá Ndiǒxí vá cádá‑gǎ nàcuáa cutnùní iní‑yu nàcuáa càháⁿ nchaa tnúhu‑áⁿ.  
\v 21 Te cue tée‑áⁿ ǐo ní xíndecu yɨñùhu‑güedé núú Yǎ Ndiǒxí, te nchaa tnúhu sá nǐ cáháⁿ‑güedé‑áⁿ ñà túú cùu‑xi tnúhu sá nǐ cahu iní méé‑güedě, chi Espíritú Yǎ Ndiǒxí ní dácáhú ìní ñáhá‑xí xìi‑güedé nàcuáa cunduu tnúhu cáháⁿ‑güedé. 
\c 2  
\s1 Cue tée càchí sá càháⁿ tnúhu Yá Ndiǒxí te ñá ndàá 
\p  
\v 1 Te ndéé sanduu chi ní xíndecu cue tée ní xóo dandàhú ñáhá xìi ñáyiu isràél càchí sá càháⁿ tnúhu Yá Ndiǒxí te ñá ndàá sá càháⁿ‑güedé tnúhu‑gá, te dɨu‑ni ducaⁿ tùcu cundecu cue tée dandàhú ñáhá xìi‑ndo vitna, chi cachí‑güedé sá càháⁿ‑güedé tnúhu Yá Ndiǒxí te ñá ndàá. Te cue tée‑áⁿ ǐo yɨ̀dáhu cáháⁿ‑güedé, te nchaa tnúhu cáháⁿ‑güedé‑áⁿ dacuǐta nihnu ñaha‑xi xìi‑ndo te núu na tèdóho‑ndo, chi cue tée‑áⁿ vǎ nǔnuu‑güedé sá Xǐtohó Jesucrìstú ní xíhí‑gá cuèndá‑güedé. Te sá dúcáⁿ càda‑güedé ío‑gá ndɨ̌hɨ dacuǐta nihnu‑güedé méé‑güedě.  
\v 2 Te vài ñáyiu xínu iní‑yu cadá‑yu nándɨ sá cuèhé sá dúhá cuèndá sá dúcáⁿ càda cue tée‑áⁿ, te cuèndá xíǎⁿ ngóo ñáyiu cáháⁿ úhú‑yu cuèndá ichi Yá Ndiǒxí.  
\v 3 Te mee‑ni tnǔhu sá nǐ cahu iní cue ñáyiu ñuyíú‑a danèhé ñáhá‑güedě xii‑ndo, te quesaha‑güedě sá cúú‑xí tnǔhu ndáá te ñá ndàá cuèndá‑ni sá cuǎñaha‑ndo dǐhúⁿ xii‑güedé, chi dɨu‑ni xíǎⁿ tnàhí cuhuⁿ iní‑güedé, dico Yá Ndiǒxí sa ní cunaha ndècu túha‑gá cuèndá cada ndáá‑gá cuéchi‑güedé, te na sàá nduu te cuíta nihnu duuⁿ‑güedé, chi Yá Ndiǒxí vá nácuànaa‑gá ɨɨⁿ sá nǐ cachí‑gá cada‑gá. 
\p  
\v 4 Te Yá Ndiǒxí ñá túú ní quìde cahnu iní‑gá sá nǐ quide cue espíritú ñá túú ní cuìní cada ndáá xínú cuèchi núú‑gǎ ní cùu, chi ní dáquɨ̀hɨ́ⁿ ñáhá‑gǎ xii‑xi ɨɨⁿ xichi núú ǐo ndòho‑xi ndecu‑xi, te xíáⁿ cundedɨ́ nihnu‑xi ndéé sáá nduu cuǐta nihnu duuⁿ‑ná‑xi.  
\v 5 Te Yá Ndiǒxí ñá túú ní quìde cahnu tucu iní‑gá nchaa sá nǐ quide ñáyiu ñuyíú dǐhna, chi dàvá‑áⁿ nǐ dándáá‑gǎ ndute ñuyíú nǐ cáhá nchaa ñáyiu ndècu ichi cuehé ichi duha te ɨɨⁿdìi‑ni té Nǒé ndɨhɨ úsá‑gá tucu cue ñáyiu cùu ndɨ mee‑dé ní dácǎcu nihnu‑gá. Te té Nǒé‑ǎⁿ cúú‑dě tée ní cáháⁿ dóho‑yu nàcuáa cada váha‑yu cundecú‑yu ni cùu te ñá túú ní cuìní‑yu.  
\v 6 Te Yá Ndiǒxí ní dángává‑gǎ ñuhú ní dánáá‑gǎ ñáyiu ñuú Sòdomá ndɨhɨ ñáyiu ñuú Gòmorrá te mee‑nǎ yáá nǐ nduu ñuú‑áⁿ. Te sá dúcáⁿ nǐ cuu xíǎⁿ cútnùní iní‑ó nàcuáa cada ñaha Yǎ Ndiǒxí xii nchaa ñáyiu ñá túú quìde váha.  
\v 7 Dico té Lǒt tée ní quide ndáá ní xíndecu ɨɨⁿ ñuú‑áⁿ dàvá‑áⁿ chi ní dácǎcu nihnu ñaha‑gǎ xii‑dé. Te nchaa ñáyiu ñuú núú nǐ xíndecu‑dé‑áⁿ ǐo ní xínduu cuihna ìní‑yu, te mee‑ni ìchi dɨ́ɨ́ ìní ní xíndecú‑yu, te sá dúcáⁿ nǐ xóo cadá‑yu xíǎⁿ ío ní ndɨ́hú iní té Lǒt.  
\v 8 Te ɨɨⁿ nduu ɨɨⁿ nduu ní xóo cada ndàhú‑xi iní té Lǒt‑áⁿ cuèndá nchaa tnúhu cuèhé tnúhu duha ní xóo cáháⁿ‑yu ní xóo cundedóho‑dé, ndɨhɨ cuèndá nchaa sá cuèhé sá dúhá nǐ xóo cadá‑yu ní xóo quiní‑dé, te mee‑dě ní cuu‑dé ɨɨⁿ tée ní xínduu vii ní xínduu váha iní‑xi núú Yǎ Ndiǒxí.  
\v 9 Te sá dúcáⁿ nǐ yáha té Nǒé ndɨhɨ té Lǒt, xíǎⁿ cútnùní iní‑ó sǎ Yǎ Ndiǒxí ío chìndee‑gá cue ñáyiu quìde ndáá ndécú ìchi‑gá cuèndá sá vǎ cádǎ‑yu nándɨ sá cuèhé sá dúhá cuěi nándɨ na ndòhó‑yu cundecú‑yu. Te Yá Ndiǒxí càchí‑gá sá ncháá ñǎyiu ndècu ichi cuehé ichi duha sa ndècu túha‑yu sá quɨ̀hɨ́ⁿ‑yu núú ùhú núú ndàhú nduu nà yáha cundáá cuéchi‑yu. 
\p  
\v 10 Te uuⁿ‑gá cada ñaha Yǎ Ndiǒxí xii nchaa cue tée ndècu ichi dɨ́ɨ́ ìní, te dàquee tɨ́hú‑güedě nchaa tnúhu sá sánú ìchi ñaha xii‑o nacuáa cada‑o cùndecu‑o, te cùu‑güedé cue tée ñɨɨ́ iní‑xi, te yɨɨ ìní‑güedé, te ñá túú yùhú‑güedé cáháⁿ úhú‑güedé cuèndá nchaa espíritú cúnùu.  
\v 11 Te cue espíritú xínú cuèchi núú Yǎ Ndiǒxí ío cùnuu‑xi dacúúxí cuè tée‑áⁿ, dico ñá túú cùyɨɨ‑xi cáháⁿ‑xi dàtná càháⁿ cue tée‑áⁿ òré ndàcáⁿ cuéchi‑xi núú Yǎ Ndiǒxí cuèndá nchaa sá quídé cuè espíritú cúndɨ̀hɨ yucu ñávǎha. 
\p  
\v 12 Te nchaa cue tée dandàhú ñáhá xìi‑ndo‑áⁿ cúú‑güedě dàtná cue quɨtɨ, chi cue quɨtɨ‑áⁿ ñǎ túú ndècu sá xìní tnùní‑güedɨ, chi cue quɨtɨ‑áⁿ nǐ cacu‑güedɨ sá tnɨ́ɨ́‑ó‑güèdɨ te cahni‑o‑güèdɨ. Te ducaⁿ sǎtnahá‑xi cùu nchaa cue tée‑áⁿ, chi càháⁿ cuèhé‑güedé cuèndá ndědani càa espíritú cuěi ñá túú xìní‑güedé ná espíritú cúú‑xí, te dɨu‑ni mee‑güedě dácuǐta nihnu‑güedé méé‑güedě sá dúcáⁿ quìde‑güedé,  
\v 13 te sáá nduu te nacháhu‑güedé nchaa sá quídé‑güedě‑áⁿ, te cuěi nduu cuěi niú cúdɨ̌ɨ́ ìní‑güedé quídé‑güedě nchaa núú sǎ cuèhé sá dúhá sàni iní‑güedé. Te òré nàtacá‑ndó càda‑ndo ɨɨⁿ vico chiñuhu‑ndo Yá Ndiǒxí te chitnahá ñáhá‑güedě xii‑ndo, te cada dusaⁿ‑güedě sá cúdɨ̌ɨ́ ìní‑güedé sá dándàhú ñáhá‑güedě xii‑ndo, te dìcó sácáⁿnǔú cuǎha ñaha‑güedě xii‑ndo dùcaⁿ na cada‑güedé. 
\p  
\v 14 Te nchaa cue tée‑áⁿ òré xìní‑güedé ɨɨⁿ ñáyiu dɨ̀hɨ́ te ndɨ̌hɨ‑ni sàni iní‑güedé cáháⁿ ndɨhɨ ñaha‑güedě xií‑yu, te ñá túú ndùu vétú iní‑güedé cuèndá nchaa sá cuèhé sá dúhá quìde‑güedé chi uuⁿ‑gá uuⁿ‑gá sání ìní‑güedé cada‑güedé. Te cuáháⁿ‑güedé dándàhú‑güedé nchaa ñáyiu ñá túú nìhí ndéé càda ndáá cuèndá canchicúⁿ nihnú‑yu nchaa tnúhu càháⁿ‑güedé. Te mee‑ni nchàa sá ndécú ndɨ̀hɨ tnaha ñáyiu‑güedé cúú ìní‑güedé, te cue tée‑áⁿ cúú‑güedě cue tée duuⁿ duuⁿ sa ní xíta nihnu núú Yǎ Ndiǒxí.  
\v 15 Chi cùu‑güedé cue tée vá cání‑gǎ iní‑xi cada ndáá, te nchìcúⁿ nihnu‑ná‑güedé quídé‑güedě nàcuáa ní xóo cada ndíi Bàlaám déhe ndíi Bèór, chi ndíi Bàlaám‑áⁿ nǐ xóo tnahá iní ndíi cada ndíi chìuⁿ cuehé nàcuáa ní xóo níhí ndǐi díhúⁿ.  
\v 16 Te Yá Ndiǒxí ní quide‑gá ní cáháⁿ bǔrru ndíi ní tenàá ñáhá‑dɨ́ xìi ndíi cuèndá sá vǎ cádá ndǐi ɨɨⁿ cuéchi sàni iní ndíi cada ndíi ni cùu. Te sá dúcáⁿ nǐ cuu xíǎⁿ ní nguɨ́tuu ndíi ñá túú ní quìde ndíi ɨɨⁿ sá ñà túú nàndɨ́hɨ sàni iní ndíi ni cùu. 
\p  
\v 17 Te nchaa cue tée ducaⁿ xǐquide cùu‑güedé dàtná ɨɨⁿ doco yìchí, te cùu tucu‑güedé dàtná ɨɨⁿ vícó sǎ xídó tǎchí te ñá túú dǎú nchídó‑xí, te sa ndècu túha ɨɨⁿ xichi núú ǐo nee quɨ́hɨ́ⁿ‑güedé cundecu‑güedé nɨ caa nɨ quɨ́hɨ́ⁿ.  
\v 18 Te cue tée‑áⁿ càháⁿ‑güedé dàtná càháⁿ ɨɨⁿ tée ío cùu cahnu dico ñá túú vědana nàndɨhɨ nchaa tnúhu càháⁿ‑güedé, te cue tée‑áⁿ dándàhú‑güedé nchaa ñáyiu íchí nǐ dáñá ìchi cuehé ichi duha, te xǎhaⁿ‑güedě xií‑yu sá cúú‑ní càdá‑yu nchaa sá cuèhé sá dúhá quìde nchaa ñáyiu ndècu ichi dɨ́ɨ́ ìní,  
\v 19 te xǎhaⁿ tùcu‑güedé sá cúú‑ní càdá‑yu náni véxi iní‑yu cuěi sá vǎha te cuěi sá cuèhé, dico mee‑güedě chi mee‑ni sǎ cuèhé sá dúhá cùnuu quide‑güedé. Te nchaa ñáyiu ñá ndácú dàña nándɨ sá cuèhé sá dúhá cùú‑yu dàtná ɨɨⁿ ñáyiu xìnu cuechi ñá túú tnàhí dàñá quee núú chíúⁿ pàtróóⁿ‑xi. Te ducaⁿ sǎtnahá‑xi cùú‑yu chi ñá ndácǔ‑yu dàñá‑yu nándɨ sá cuèhé sá dúhá quìdé‑yu.  
\v 20 Te núu ñáyiu sa ní dáñá nchàa ichi cuehé ichi duha cuèndá sá nǐ cutnùní iní‑yu nàcuáa ndùu tnúhu Xítohó Jesucrìstú, Yaá ní dácǎcu nihnu ñaha xìi‑o núú ùhú núú ndàhú ná nànchocáva iní‑yu cundecu tucú‑yu ichi cuèhé ichi duha, te mee‑nǎ sá cuèhé sá dúhá tàxi tnuní ñáhá‑xí xìí‑yu, te núu ducaⁿ te vàa‑gá tucu cadá‑yu dàcúúxí dàtná ní xóo cadá‑yu cútnàhá vátá cútnùní‑gá iní‑yu nàcuáa ndùu tnúhu‑gá.  
\v 21 Te váha‑gá sá vǎ ngǔnu ichí‑yu ichi ndáá ní cùu te ñá dɨ́ú sǎ sà ní ngúnu ichí‑yu te ní dáñǎ‑yu nchaa tnúhu‑gá sá sà ní níhǐ‑yu ndècu ndɨhɨ́‑yu sànu ichi ñaha‑xi nacuáa cundecú‑yu ni cùu.  
\v 22 Te ñáyiu ducaⁿ xǐquide quèe ndáá‑xi nàcuáa cuáháⁿ ɨɨⁿ cuèndú sá càchí‑xi: “Iná ní nacaxi‑dɨ sá nǐ ndusaⁿ‑dɨ, te cùchí quɨtɨ íchí nǐ xichi ndute càndoo cuáháⁿ‑ni tucu‑dɨ cuchi ñuhu‑dɨ núú ndèhyú”, duha cuáháⁿ cuèndú‑áⁿ. 
\c 3  
\s1 Xítohó Jesucrìstú quixi tucu‑gá 
\p  
\v 1 Te nchaa nchòhó ñáyiu ío cùu iní‑í cùtnuní iní‑í sá ǐo váha sàni iní‑ndó, te xéhé cúú‑xí tùtú cúú ùú cádǔha‑í sá cúú‑xí‑ndó, te ɨɨⁿ‑ni càháⁿ‑í dándàcu iní ñáhà‑í xii‑ndo nchàa tnúhu sá sà ní xíndedóho‑ndo.  
\v 2 Chi cuìní‑í sá vǎ nácuànaa‑ndo nchaa tnúhu ní cáháⁿ nchaa cue tée ní xóo cáháⁿ tnúhu Yá Ndiǒxí ndéé sanaha, te ni vǎ nácuànaa‑ndo nchaa tnúhu ní cáháⁿ cue tée ní cáháⁿ tnúhu Xítohó Jesucrìstú Yaá ní dácǎcu nihnu ñaha xìi‑o núú ùhú núú ndàhú, chi dɨu nchaa tnúhu‑áⁿ sánú ìchi ñaha‑xi xii‑o nacuáa cada‑o cùndecu‑o. 
\p  
\v 3 Te ío‑gá xíní ñùhu‑xi cutnuní iní‑ndó nàcuáa cada‑xi òré vátá sàá‑gá nduu quìxi tucu Xítohó Jesucrìstú ñuyíú‑a, te càchí tnúhu‑í xii‑ndo sǎ cúndècu ñáyiu cuhuⁿ iní mee‑ni nchàa sá cuèhé sá dúhá te mee‑ni xǐǎⁿ cadá‑yu, te cáháⁿ cuèhé cáháⁿ duhá‑yu cuèndá tnúhu Yá Ndiǒxí.  
\v 4 Te cachí‑yu: “Ñá ndàá sá quíxí Xǐtohó Jesucrìstú ñuyíú‑a, chi núu quixi‑gá te sá nděé ama‑gá sa ní quexìo‑gá ní cùu. Te dàtná‑ni quìde‑xi vitna dɨu‑ni duha ní quesaha‑xi quìde‑xi ndéé cútnàhá ní ngáva ñuyíú, te dɨu‑ni duha quìde‑xi ndéé cútnàhá ní xíndecu cue ñaní tnáhá‑ó nděé sanaha, te dɨu‑ni duha quìde‑xi ndéé ní sáá nduu ní xíhí‑güedé, te dɨu‑ni duha quìde‑xi ndéé vitna”, duha cáháⁿ‑yu.  
\v 5 Te ñucùuⁿ cadá‑yu vá cádá cuèndá‑yu sá Yǎ Ndiǒxí ní cáháⁿ‑gá te ní ngúndecu andɨu ndɨ̀hɨ ñuyíú‑a, te dɨu‑gá ní quide ní quene ñuhu yìchí xɨtɨ́ ndute ní ngúndecu‑xi ɨɨⁿ xio.  
\v 6 Te ɨɨⁿ xito ní dándáá Yǎ Ndiǒxí ndute ñuyíú‑a ní dánáá‑gǎ nchaa sá ìó.  
\v 7 Te Yá Ndiǒxí ní cachí‑gá sá cúndècu‑ni ñuyíú‑a ndɨhɨ andɨu nděé ná sàá nduu càda‑gá nchaa nàcuáa ní cáháⁿ‑gá sá cúú‑xí nchàa ñáyiu ndècu ichi cuehé ichi duha, te dàvá‑áⁿ danàa‑gá nchaa ñáyiu‑áⁿ chi cáyú andɨu ndɨhɨ ñuyíú‑a. 
\p  
\v 8 Te nchaa nchòhó ñáyiu ío cùu iní‑í, ío cuhuⁿ iní‑ndó tnǔhu na càháⁿ‑í‑a, chi Yá Ndiǒxí ñá túú sàni iní‑gá dàtná sání ìní méé‑ó, te ɨɨⁿ nduu cùu‑xi datná úxí cièndú cuíá, te úxí cièndú cuíá‑ǎⁿ cúú‑xí dàtná ɨɨⁿ nduu sá cúú‑xí‑gǎ.  
\v 9 Te Yá Ndiǒxí ñá túú dàna ndodo iní‑gá vá cádá‑gǎ ɨɨⁿ sá càháⁿ‑gá dàtná càchí cue ñáyiu sá dáná ndòdo iní‑gá cada‑gá ɨɨⁿ sá càháⁿ‑gá, chi ñucùuⁿ tnahí dàcaca‑gá nduu cuèndá sá ǐo cùndahú iní ñáhá‑gǎ xii‑o, te cuìní‑gá sá ncháá ñǎyiu ndixi túu iní‑yu sá ñà túú quìde váha‑yu ndècú‑yu te tuhá‑yu ichi‑gá, te ducaⁿ quìde‑gá chi cuìní‑gá sá vǎ cuǐta nihnu ni ɨ̀ɨ́ⁿ‑yu. 
\p  
\v 10 Te dàtná quídé cuè ñadúhú quɨ̌hu‑güedé ɨɨⁿ vehe dùhu‑güedé òré ñá túú yɨ̀hɨ iní xítohó vehe‑áⁿ, te ducaⁿ càda Xítohó Jesucrìstú chi nduu ñà túú yɨ̀hɨ iní ñáyiu ñuyíú‑a quixi tucu‑gá, te dàvá‑áⁿ cada‑xi andɨu dàtná quídé‑xí òré níhi vìhi caháⁿ ñúhu, te dɨu‑ni òré‑áⁿ ndoñuhu àndɨu, te cáyú nchaa chódíní, te cáyú tucu tnàhá ñuyíú‑a ndɨhɨ nchaa sá ìó. 
\p  
\v 11 Te vitna nchòhó sa xìní‑ndó sǎ náá ñùyíú‑a te xíǎⁿ ío xìni ñuhu‑xi cada váha‑ndo cùndecu‑ndo, te cada‑ndo nàcuáa cuìní méé Yǎ Ndiǒxí cunduu.  
\v 12 Te ío nducu ndèe‑ndo ducaⁿ cada‑ndo cuendá ducaⁿ ndɨ̌hɨ‑ni sáá nduu càda‑gá nchaa nàcuáa càháⁿ‑gá, te ducaⁿ nchòhó cundecu túha‑ndo sǎá nduu‑ǎⁿ. Te dɨu‑ni nduu‑ǎⁿ ndoñuhu àndɨu chi cáyú‑xi, te dɨu‑ni ducaⁿ ndòñuhu tucu nchaa chódíní chi ndɨhɨ‑dɨ cáyú.  
\v 13 Te nchoo ndètu‑o sáá nduu cùndecu‑o ɨɨⁿ ñuyíú sáá, te quiní‑ó ɨ̀ɨⁿ andɨu saa datná ní cachí Yǎ Ndiǒxí, te yàcáⁿ chi mee‑nǎ cue ñáyiu quìde váha cundecu. 
\p  
\v 14 Te nchòhó ñáyiu ío cùu iní‑í, nɨni ndètu‑ndo sáá nduu dùcaⁿ cada‑xi ío nducu ndèe‑ndo cada‑ndo mee‑ni sá vǎha cundecu‑ndo ìchi Yá Ndiǒxí, te cundecu nahi‑ndo, te cada‑ndo nchàa nacuáa vá cúndècu cuéchi‑ndo nǔú‑gǎ.  
\v 15 Te ío cada cuèndá‑ndó sǎ dàcaca‑gá nduu dùcaⁿ cada‑gá chi cuìní‑gá sá ncháá ñǎyiu naníhí tàhú‑yu. Te té Pǎblú tée ío cùu iní‑ó ndècu ndɨhɨ‑o ichi Xítohó Jesucrìstú dɨu‑ni nàcuáa càháⁿ‑í‑a dɨu‑ni ducaⁿ nǐ tee‑dé ɨɨⁿ núú tùtú ní dáquíxí‑dě ndaha‑ndo, te ní tee‑dé nàcuáa ní dácáhú ìní ñáhá Yǎ Ndiǒxí xii‑dé.  
\v 16 Te dɨu‑ni ducaⁿ càháⁿ‑dé nchaa dava‑gá núú tùtú cádǔha‑dé, te dava tnúhu càháⁿ‑dé ío úhú tecú tnùní‑ó, núu xíǎⁿ ñáyiu ñá túú cùtnuní váha iní‑xi, ñáyiu ío yáchí sàndáá iní‑xi ɨɨⁿ tnúhu, ñáyiu‑áⁿ tècú tnùní dátnǐ‑yu nchaa tnúhu ní chídó tnùní‑dé, ndɨhɨ nchaa dava‑gá tnúhu yòdo tnuní núú tùtú Yǎ Ndiǒxí, te sá dúcáⁿ quìdé‑yu te dacuǐta nihnú‑yu mèé‑yu. 
\p  
\v 17 Te nchòhó ñáyiu ío cùu iní‑í, sa cùtnuní iní‑ndó nàcuáa quìde dava ñáyiu, núu xíǎⁿ ío xìni ñuhu‑xi quɨhɨ iní‑ndó cùndecu‑ndo cuendá ducaⁿ cùndecu‑ni‑ndo ichi‑gá, te vá dáñá‑ndó mèe‑ndo dandahú ñáhá nchàa cue tée ndècu ichi cuehé ichi duha, chi cue tée‑áⁿ ñà túú sàni váha iní‑güedé cuèndá tnúhu Yá Ndiǒxí. Te núu na dàña‑ndo mee‑ndo dandahú ñáhá‑güedě xii‑ndo te vá cúndècu váha‑gá‑ndó ìchi‑gá dàtná ndécú‑ndó vìtna.  
\v 18 Te nchòhó uuⁿ‑gá uuⁿ‑gá cuita cutnùní‑gá iní‑ndó quɨ̌hɨ́ⁿ nchaa nàcuáa ta chìndee ñaha Xítohó Jesucrìstú xii‑ndo cuǎháⁿ. Te ducaⁿ ǐo‑gá cuita cutnùní iní‑ndó nchàa nacuáa sàni iní‑gá, te dɨu‑gá cúú‑gǎ Yaá ní dácǎcu nihnu ñaha xìi‑o núú ùhú núú ndàhú. Te chí ná càchí‑ó sǎ ǐo càhnu cuu‑gá cuěi vitna té cuěi ndéé núú cuàháⁿ núú věxi. Te ducaⁿ na cùnduu. Te ío chí cádá ndèe iní‑nǎ vitna.