\id 2TH  
\h 2 TESALONICENSES 
\toc1 CARTA UU JEE NI TEE APOSTOL SAN PABLO NUU ÑAYUU ÑUU TESALONICA 
\toc2 2 TESALONICENSES 
\toc3 2 Ts. 
\mt1 CARTA UU JEE NI TEE APOSTOL SAN PABLO NUU ÑAYUU ÑUU TESALONICA 
\c 1  
\p  
\v 1 Máá rí cúu Pablo jiín Silvano jiín Timoteo, te cátee ri carta yáha cuájeē nuū rohó ñáyuu cácandíje ñuu Tesalónica, jeē cáyɨhɨ ró ndaha Tátá yō Yaā Dios jiín Jítoho yō Jesucristo.  
\v 2 Te cáñuhun ni rī jeē Tatá yō Yaā Dios jiín Jítoho yō Jesucristo, na sáha ga yā jeē váha róhó, te sáha ya jeē coo ndeyɨ́ coo sɨɨ̄ ni rō jijnáhan ró. 
\s1 Jeē sándaā yā cuēchi quɨvɨ̄ ndíji Cristo 
\p  
\v 3 Cánuú jéē niní nacuatáhú rí nuū Yaā Dios jeē sɨquɨ́ rohó jíjnáhan ró hermano. Chi súcuan íyó váha, chi yōhyo vāha cuahije ró jíín jnúhun jeē cácandíje ró yá, te yōhyo cuanducuehē jeē cácundáhú ni rō tāca jnáhan ró.  
\v 4 Te jeē yúcuan cúu jeē cácusɨɨ̄ teyɨ́ ni rī cánacani ri jnūhun ró núū tāca grupo ñayuu cácandíje nuū Yaā Dios. Chi vāha cácandíje ró, te vāha cájendeyɨ́ ni rō jeē cájito xeēn ñayuu rohó jíín jéē cándoho ró táca gá jnūndóho.  
\v 5 Te jíín táca jéē yáha chíhi ya cuenta jeē cácuu ró ñáyuu váha jeē quɨ́vɨcoo ró ñuu nuū ndácu ya jniñu. Chi sɨquɨ̄ ñuu un cúu jeē cándoho ró. Te jeē súcuan chíhi ya cuenta sɨquɨ̄ rō, yāha stéén nuū yō jeē vāha Yaā cúu ya. 
\p  
\v 6 Te suni íyó váha jeē nastóho ya ñayuu castóho róhó.  
\v 7 Te quɨvɨ̄ ndíji Jitoho yō Jesús, quɨvɨ̄ un sáha Yaā Dios jeē ndétātu róhó jéē cándoho, te suni ruhū jijnáhan ri. Chi jíín yáñuhūn quiji Jesús ichi ándɨvɨ́ jíín táca ndajéhé yā jeē ndíso poder.  
\v 8 Te cuāha ya castigo nuū ñáyuu jeē tu ní cájēhe i jnūhun cuni i ndese Yaā cúu Yaā Dios, te tu ní cájetáhú i jnūhun máá Jítoho yō Jesucristo jeē jnáma ya i.  
\v 9 Te ñayuu ún chi ndoho i nɨ́ɨ́ cáni, chi cujiyo i nuū maá Jítoho yō, te ma cúu quɨ̄vɨcoo i nuū lúu ndasɨ́ cújéhnu ya jiín poder yā.  
\v 10 Súcuan sáha ya quɨvɨ̄ ndíji ya jeē lúu cujéhnu ya sáha ñayuu cácandíje jeē yɨ́hɨ ndaha ya. Te nahán naa ni i coto i nuū yā. Te suni súcuan róhó jíjnáhan ró, chi ni cacandíje ró jnúhun jeē ní canacani ri nuū rō. 
\p  
\v 11 Te jeē yúcuan cúu jeē niní cájicān tahú rī jehē rō, jeē na cúu ró ñáyuu vāha jeē ní cana ya rohó. Te jíín fuerza yā na sáha ya jiín ró jeē squícu ró táca jniñu váha jeē ní catee ni rō sáha ró sɨ́quɨ̄ jeē cácandíje ró.  
\v 12 Te súcuan te cujéhnu máá Jítoho yō Jesucristo sáha ró, te suni cujéhnu máá ró jijnáhan ró sáha ya. Chi Yaā Dios yō jiín Jítoho yō Jesucristo, súcuan cúu jeē sáha ya jeē váha yóhó. 
\s1 Jnūhun sɨquɨ̄ maá tée sáha xeēn cuēchi 
\c 2  
\p  
\v 1 Vijna te cahān rī sɨquɨ̄ jeē ndíji máá Jítoho yō Jesucristo jiín jéē ndutútú yó núū yā. Cácahān ndahú rí jiín ró jijnáhan ró hermano,  
\v 2 jeē ma cuáha ró jnúhun sacā nuu cani ni rō, ni ma cunéé ni rō núu cácahān ñayuu jeē jé ni quee quɨvɨ̄ ndíji máá Jítoho yō. Ma candíje cuɨtɨ rō vēsú núu cahān i jeē ni níhīn i ɨɨn jnūhun sɨquɨ̄ un núū Espíritu, chí ɨɨn jnūhun jeē ni cáhān ɨnga, chí núu cachi i jeē ruhú jijnáhan ri ni tají ɨɨn carta jeē cahán súcuan.  
\v 3 Ma cuáha cuɨtɨ rō jnūhun jeē stahú ni ɨɨn i róhó. Chi nde ná tu quiji quɨvɨ̄ ún te xīhna gā ndunīhni ni cuehē ñayuu nuū yā, te quenda ndijin máá tée sáha xeēn cuēchi, te tēe jnáhnū ndetū cúu máá tée ún.  
\v 4 Chi tēe jíto uhū Yaā Dios cúu de, te ndonda de contra sɨquɨ̄ tāca jéē casnání i yaā i jíín táca jeē cáchiñúhún i. Te xeēn gā sáha de, chi nde cucōo de ini templo Yaā Dios jeē iyó Jerusalén, te cahān de jeē maá de cúu Yaā Dios. 
\p  
\v 5 ¿A cánahán ró jnūhun yáha? Chi súcuan ni cahān rī jiín ró ná ni īyo ri jiín ró.  
\v 6 Te je cájini rō ndé vé cúu jeē jésɨ jeē ná tu quenda ndijin tēe ún, chi nde na quée quɨvɨ̄ maá de.  
\v 7 Chi je jícu sāhi táca cuéchi xeēn ini ñayɨ̄vɨ́, te vijna chi íyó jéē jésɨ nuū, návāha ma cáa ndasɨ́ gá cuēchi, chi nde na cújiyo máá jéē jésɨ nuū.  
\v 8 Te sáá te quenda ndijin maá tée xeēn ún. Te máá Jítoho yō Jesús cahni ya tēe un jíín táchī yuhu‑ni ya, te jíín jéē ndíndēe yá ndiji ya te snáhnú ndetū yā de.  
\v 9 Te jeē quíji tēe xeēn ún chi máá Satanás sáha. Te quiji de jíín cuéhē poder, te sáha de tācá jniñu jéhnu jeē stahú de, jeē nahán naa ni ñayuu coto i.  
\v 10 Te jíín táca jniñu néé te stáhú ndasɨ́ de ñayuu jeē jnahnú ndetū, chi tu ní cúní i cuatáhú i jnūhun ndaā jeē cácu i núú.  
\v 11 Te jeē yúcuan cuāha Yaā Dios jnūhun jeē cuatáhú i jnūhun jeē tú ndaā cuɨtɨ, te candíje i jnūhun stáhú un.  
\v 12 Te súcuan te jecondee cuēchi sɨquɨ̄ ndɨhɨ i jeē tu ní cácandíje i jnūhun ndaā, chi sa jniñu néé ni cacusɨɨ̄ ni i jíín. 
\s1 Ñayuu jeē ní nacāji ya jeē cācu i 
\p  
\v 13 Te cánuú jéē niní nacuatáhú rí jijnáhan ri nuū Yaā Dios jeē sɨquɨ́ rohó jéē cácuu ró hermano jeē maní Jítoho yō jiín. Chi nde ná ni jecōo ñayɨ̄vɨ́, te je ni nacāji Yaā Dios rohó jéē jnáma ya rohó. Chi sáha Espíritu yā jeē cáhīyo ndoo cáhīyo iī rō nuū yā te cácandíje ró jnúhun ndaā.  
\v 14 Chi jeē yúcuan ní cana ya rohó jíín jnúhun jeē jnáma ya yohó jeē ní canacani ri, návāha quɨ̄vɨcoo ró núū cujéhnu luu ró jíín máá Jítoho yō Jesucristo. 
\p  
\v 15 Núu súcuan te cuɨñɨ nīhin ró hermano, te conahán váha ró jnúhun jeē ní cacutūhva ró núū rī, núu jeē ní cacahān rī chí jéē ní tee ri nuū carta.  
\v 16 Máá Jítoho yō Jesucristo jiín Tátá yō Yaā Dios ni cundáhú ni yā yohó, te ni sáha ya jeē coo sɨɨ̄ ni yō nɨɨ́ cáni, jíín jéē ñúhun ni yō tāca jéē váha jeē coo sɨquɨ̄ jeē váha ni yā jiín yó.  
\v 17 Te na sáha ga yā jeē cóo ndeyɨ́ ni anuá rō jijnáhan ró, te na sáha ya jeē íje ró cáhān rō tāca jnúhun vāha ya, te sáha ró táca jniñu váha. 
\s1 Jeē na cácán tahú i jehē de 
\c 3  
\p  
\v 1 Te íyó ɨnga jnūhun cánuú, hermano. Na cácán tahú rō jehē rī jijnáhan ri, návāha yachī cuitē núu jnūhun máá Jítoho yō, te cuatáhú váha ñayuu, nájnūhun ni cajetáhú máá ró.  
\v 2 Te suni cacān tahú rō jeē na cácu ri nuū tāca tée cásáha néé jéē cátejnáhan jíín rí. Chi tú ndɨhɨ tēe cácandíje jnūhun ya.  
\v 3 Te máá Jítoho yō chi vāha squícu ya jeē ni jéjnūhun ya, te sáha ya jeē íje ni tāca ró jiín jnúhun ya, te coto ya rohó núū jeneé.  
\v 4 Te cácucáhnu ni rī sáha máá Jítoho yō, jeē cócuu ró jíín jniñu jeē ní candacu ri nuū rō, te suni cocuu ga rō jiín.  
\v 5 Te ñúhun ni rī jeē maá Jítoho yō steén gā yā ndese coo manī gā rō jiín Yaā Dios nde jiín ini jiín ánuá rō, jiín jéē cuándeyɨ́ ni rō nájnūhun ni sáha Cristo. 
\s1 Jeē cánuú sájniñu yó 
\p  
\v 6 Te cándacu ri jniñu nuū rō hermano, chi súcuan ni ndacu máá Jítoho yō Jesucristo, jeē na cújiyo ró núū tācá hermano cájica cúxí te tu cájica vāha de nájnūhun ni castéén rī nuū rō.  
\v 7 Chi je cájini rō ndese cánuú ndacu ró rúhū jijnáhan ri, chi tu ní cájica cúxí rí ná ni cahīyo ri jiín ró.  
\v 8 Ni tu ní cáyeji rī staā ni ɨɨn ró súcuan‑ni, chi ni cachunaa rī. Chi sa ni canducú ndéyɨ́ rí ni casájniñu téyɨ́ rí nduú ñuú, návāha ma stáhān rī ni ɨɨn ró.  
\v 9 Te vēsú íyó derecho rī jeē cacán rī nuū rō nuú, te tu ní cájicān rī, chi súcuan ni casáha ri návāha cuu ri ɨɨn ejemplo nuū rō ndese sáha ró jíjnáhan ró.  
\v 10 Chi ná ni coyūcu rí jiín ró, te ni candacu ri jniñu yáha nuū rō: Núu ndé ɨɨn ñayuu tu cúní i sájniñu i, te suni ma cáji i núu súcuan.  
\v 11 Chi ni canihīn rī jnūhun jeē cájica cúxí sava ró, te tu cásájniñu ró, chi yāha yúcuan‑ni sáha ró.  
\v 12 Te cándacu ri jniñu nuū rohó jéē casáha súcuan, te cástɨ́hvɨ́ ni rī rohó jeē na cóo nayúú ró te sájniñu ró, návāha nihīn rō jeē cáji rō sɨquɨ̄ jníñu sáha máá ró. Chi súcuan ndácu máá Jítoho yō Jesucristo jniñu. 
\p  
\v 13 Hermano, ma ndínuu ni rō jijnáhan ró sáha ró táca jniñu váha.  
\v 14 Te núu ndé ɨɨn i tu jétáhú i jnūhun jeē cahán rī nuū carta yáha, te condēhe váha ro ndé‑ni i cúu, te ma quijnáhan ga rō jiín i, návāha na cúcanu i te nacani ni i.  
\v 15 Te nasūu jéē cóto uhū rō i, chi sa cahān rō jiín i nájnūhun jíín ñani rō jeē na sájniñu vāha i. 
\s1 Bendición jeē sándɨ̄hɨ́ 
\p  
\v 16 Te ñúhun ni rī jeē maá Jítoho yō, Yaā jeē jéhe jnūhun ndeyɨ́ sɨ́ɨ̄ ni, níní na sáha ya jeē coo ndeyɨ́ coo sɨɨ̄ ni rō sɨquɨ̄ tācá‑ni, te coo ya jiín ró jijnáhan ró. 
\p  
\v 17 Ruhū Pablo, yāhá‑ni cúu jeē tée ri jiín ndaha máá rí jeē cahán rī jeē sándeyɨ́ ni rō jijnáhan ró. Te súcuan jéhe ri firma nuū tāca carta rī, návāha cuni rō jeē carta maá rí cúu. Súcuan cáa letra rī.  
\v 18 Te ñúhun ni rī jeē maá Jítoho yō Jesucristo, na sáha ga yā jeē váha ró jíjnáhan ró. Súcuan na cóo. Amén.