\id 2TH - Makua Bible Version
\ide UTF-8
\h 2 Attu o Uthesalonike
\toc1 Iwarakha yo nayelhi i Napaolo wa attu o Uthesalonike
\toc2 2 Attu o Uthesalonike
\toc3 2 Uthes
\mt2 Iwarakha yo nayelhi i Napaolo wa
\mt1 Attu o Uthesalonike
\imt Malhove o uholhelha
\ip Iwarakha yo nayelhi i Napaolo wa attu o Uthesalonike yaalhepiye ni akarumiya Napaolo (nlhako wo 1:1). Anolhepa iwarakha ilha wo makhuvi baada yo iwarakha yo upachera, iyaakha yo 51 baada yo uyaria wa Kuristo. Napaolo yaalhempe iwarakha yo nayelhi wa nlhoko wa attu anrumelhenlhe Kuristo o Uthesalonike, bado anari Ukorintho. Nlhoko waachokhonlhe aya mu nkwaha aya wo nayelhi wo uhimiacha Malhove Orera (Mitk nlhako wo 17:1-10). Nhina ikitabu yo Mitheko cha akarumiya ihohimiya wiira nlhoko uyo wo uthakania akina Ayahudi ni akina Ayunani enchi.
\ip Nlhoko wa attu anrumelhenlhe Kuristo wo Uthesalonike, waakurumichiye uvarechesha mwaha wo mahuku o umalhelha ilhapo ni uwa wo nayelhi wa Kuristo ukhalhawaya Napaolo aholhepa malhove menchi nhina iwarakha chaya pilhi wa attu o Uthesalonike chiyo. Kharibu nusu yo iwarakha yo nayelhi wa attu o Uthesalonike, inohimiacha mwaha unaacha nihuku no umalhelha ilhapo. Tho, Napaolo anowaamuka attu ahiye ureshi, kila ntu avareke ntheko awe mwanene wiira apatte yolhia awe (nlhako wo 3:6-10).
\iot Chiri nhina
\io Napaolo anochokholha iwarakha wo wiihimiacha anene ni ashikhunanaya (nlhako wo 1:1-2).
\io Anonshukhuru Nlhuku wo nlhatu wo nlhoko wa attu anrumelhenlhe Kuristo o Uthesalonike ni waalhapelhelha (nlhako wo 1:3-12).
\io Nlhako wo 2, Napaolo anohimiacha mwaha wo mahuku o umalhelha ilhapo. Tho, anohimiacha mwaha wo attu ahiye ureshi, avareke mitheko (nlhako wo 3:1-15).
\io Napaolo anomalhiha wo urweeha isalamu tho wa attu anrumelhenlhe Kuristo (nlhako wo 3:16-18).
\c 1
\p
\v 1 Mii Paolo vamoka ni Nasila ni Natimotheo, ninoolhepa iwarakha wa nlhoko wa attu anrumelhenlhe Kuristo o Uthesalonike arii attu a Nlhuku Athumwanihu ni a Athithi Yesu Kuristo.
\p
\v 2 Ninoulhapelhelhani nnema ni mpuha ukhuma wa Nlhuku Athumwanihu ni Athithi Yesu Kuristo.
\s Uhukumulhiya wa attu ikatema yo uwa wa Yesu
\p
\v 3 Ashilhoko ihu, ninonshukuru Nlhuku ikatema chonkhaye wo nlhatu winyu. Iri yo ulhoka hii wiira chiicho ukhalhawaya nrima inyu unoothepa ukhomaalha chinene ni uttunana winyu unowunchereria chinene. 
\v 4 Ata hii vano ninowiititihacha mmilhokoni mwa attu a Nlhuku anrumelhenlhe Kuristo wo nlhatu winyu mwaatti, chinothepa inyu urumelhelha ni uvilhelha uhuva ni uttwaruwa wonkhaye unopatta inyu.
\p
\v 5 Chechiyo chonkhaye chiyo phi nohimiechesha wiira uhukumulha wa Nlhuku uri we ikekhiaye ni wiira mmiholho mwaya nnoowa mwaaphwanelhiya ukelha mu Imwene aya unohuvelha inyu. 
\v 6 Nlhuku rii e ikekhiaye, noowa aatwarusha attu anoutwarushani mwaatti, 
\v 7 ni uvahani nipesha no wiittuwa mwaatti nnohuvihiya va. Ni hii ninoopangelhiya chiicho, Athithi Yesu vanohalha aya uwa ukhuma wiirimu vamoka ni minepa aya o wiirimu o machiri. 
\v 8 Vanowa aya anoowa waahukumulha ni nlhimi no mooro attu onkhaye anonkhota Nlhuku ni attu ahinrumelhelha Malhove Orera a Athithi Yesu. 
\v 9 Ulhakalhihiya waya unowa ukhalha wo mahuku o uhimalha, atiyelhelhiyaka wohoona Athithi wiitho ni uhoona nthimicho waya mulhupalhe. 
\v 10 Vanowa aya upochera nthimicho ukhuma wa attu aya ni nthimicho ukhuma wa attu anrumelhelha onkhaye, ni inyu chiicho nnowa ukhalha amoka aya, ukhalhawaya nhorumelhelha uhimiechesha wihu.
\p
\v 11 Paahi etu ikatema chonkhaye ninoulhapelhelhani Nlhuku owooriheni uphwanelhiya ukhalha makhalhelho mwiihaniye inyu. Ninonlhapelha Nlhuku wo ikuru awe, atimirihe nnikwa inyu wo upanga chittu choombone ni umalhiha ntheko inyu wo upisha nrima. 
\v 12 Ninolhapelha wiira nchina na Athithi Yesu nithimichiye munlhokoni mwinyu ni inyu mpochere nthimicho ukhuma uwannyaya, wo nnema wa Nlhuku ni wa Athithi Yesu Kuristo.
\c 2
\s O uwonya mulhupalhe ulhe
\p
\v 1 Paahi vano ashilhoko ihu ulha phi mwaha unaacha uwa wa Athithi Yesu Kuristo irii uthukumaanihiya wihu vamoka. Mwaatti ninoushontelhelhani chinene, 
\v 2 wiira nhikelhiye nipampa chitemachitema mena nkamwaahiya nrima inyu, mena nhithuthushiye wo nnepa, mena wo nlhove, mena wo iwarakha inaanyiheriya ukhalha yawihu, thoko valhe nihuku ni Athithi nihaaya. 
\v 3 Ntu riyoothe huuthepiacheni ittu iriyoothe, ukhalhawaya nenno nihuku nno khaninowa mpaka uweeke Uhiiwananiya wulhupalhe wo unvinga Nlhuku ni O uhilhoka ulhe oonie kaye, nohalha umalhelha wo utanganyiya lhakalhaka. 
\v 4 Yoyo noowa aavinga kila ittu attu anaalhakelha aya ni wiihana milhuku ama anothimicha aya. Noowa wiichiinulha mwanene vachulhu kila ittu ata noowa aakelha ni ukhalha wi Inupa ya Nlhuku ni wiichihana Nlhuku.
\p
\v 5 Chani khannoopuwelha wiira kahouhimeriani mwaatti yayo malhove onkhaye ayo vaari aka ni inyu? 
\v 6 Nansho nhochuwelha ittu inonchiichiha vano iyo. Ikatema yaayakaru, yoyo ntu o uwonya uyo noowa oonia. 
\v 7 Ukhalhawaya machiri evinthe o yoyo O uhilhoka uyo ari munthekoni. Nansho khanoonia mpaka nonchiichiha uyo vanohalha awe uthamihiya. 
\v 8 Vavawo Yoyo o uwonya uyo phi nohalha awe upatakulhiya. Nansho Athithi Yesu vanowa aya, anowa aamwiiva wo Iphumu yo iyano aya ni umwiiva ni nchakarimia no uwa waya. 
\v 9 Yoyo O uwonya uyo noowa aawa ni machiri a Nakare ni upanga cho ushangiha ni ithikineha cho woothacha cho kila iphiro, 
\v 10 ni waathepiacha wo iphiro chinchi ampotera ayo, wo nlhatu wo ukhota urumelhelha ni uhittuna ikeekhene wiira oopolhiye akhalhe o ulhoka. 
\v 11 Nlhuku heesha yayo wuuthi machiri o muupoterani, arumelhelhe wiira athepiachiye. 
\v 12 Paahi attu onkhaye ahinorumelhelha ikeekhene, attapelhelhaka mwaha wo chittu cho unanara, anoowa yaahukumulhiya.
\s Nhothanlhiya wiira mwoopolhiye
\p
\v 13 Nansho vano hii ninshukuruku Nlhuku ikatema chonkhaye wo nlhatu winyu ashilhoko ihu nnottuniya ni Athithi. Ukhalhawaya toka varachi Nlhuku ahothanlhani wiira mwoopolhiye nkhalhe atakatifu wo machiri o Iphumu awe ni wo upishera nrima ikeekhene. 
\v 14 Nlhuku howiihanani mwaattiva wo Malhove Orera nihimianche ihu uwaninyu wiira mpatte vakittu munthimichoni mwa Athithi Yesu Kuristo. 
\v 15 Paahi etu, ashilhoko ihu mweemelheke rata, nhitikhinyiye, nvarechesheke meettuchiho mwiittuchihiye inyu ikhalhe wo malhove ama wo iwarakha chihu.
\p
\v 16 Ninowaalhapelha Athithi Yesu Kuristo anene ni Nlhuku Athumwanihu anittunne ni wo nnema waya ahonivaha mpuha wo mahuku o uhimalha ni nikhulhuvelho no ikeekhene, 
\v 17 ohelhekeni nrima ni ulhipihani ikatema chonkhaye wo machiri o upanga mitheko ni wulhumacha chittu choombone.
\c 3
\s Nnilhapelhelheke wa Nlhuku
\p
\v 1 Ashilhoko ihu, vanomalhiha ihu, nnilhapelhelheke, wiira nttenga wa Athithi uthepeke uwanelha chitema ni uthimichiya thoko chiri aya uwaninyu. 
\v 2 Tho munlhapelheke Nlhuku wiira anoopolhe mwa attu o uhilhoka apotenre, ukhalhawaya kahii attu onkhaye anorumelhelha ulha nttenga ulha.
\p
\v 3 Nansho Athithi arii o ukhulhuvelhiya. anoulhipihani ni uwiinkelhani nhivariye ni O uhilhoka ulhe. 
\v 4 Ni hii ninaakhulhuvelha Athithi wo nlhatu winyu mwaatti, nichuwelhaka chiicho wiira, nnoothepa upanga ittu ilhenhe ihu ilhe.
\p
\v 5 Athithi aholhelheke mirima chinyu uuchuwelhani uttuna wa Nlhuku ni nrima wo uvilhelha ninovahiya ihu ni Kuristo.
\s Malhehero o uvara ntheko
\p
\v 6 Ashilhoko ihu, ninoulheherani wo nchina ni Athithi Yesu Kuristo wiira mwaashembeke ashilhoko inyu onkhaye o uhuva ni ahinotwara malhehero nilhehenre ihu. 
\v 7 Inyu mwaatti mwaashinene nhochuwelha rata iphiro inothananiya inyu unittwariha chipangilhe ihu. Ukhalhawaya vaari ihu uwaninyu, khanaakhanlhe wo ureshi, 
\v 8 mena khanaalhilhie ittu ya ntu riyoothe wo uhinlhiva. Nansho, uthana ni uhiyu nihuvaka nahovara ntheko wo uhoochaa wiira nihinrie nsigo ntu riyoothe. 
\v 9 Naapannge chiicho kuhii wiira khaniphwanelhiye uvahiya chittu ni inyu mwaatti, nansho naathanana uwiittuchihani wiira nnittwarihe. 
\v 10 Ukhalhawaya ata vaari ihu uwaninyu naari nilheheraka wiira, “Ntu riyoothe hinottuna uvara ntheko hilhie.”
\p
\v 11 Nineera chiicho ukhalhawaya niheewa wiira munlhokoni mwinyu ahaawo areeshi ahinottuna uvara ntheko uriyoothe, nansho athemwaka uhimiacha chittu cha attu akina. 
\v 12 Paahi etu wo nchina ni Athithi Yesu Kuristo ninowaalhehera ni uwaamuka yayo attu ayo wiira eetimarikheke, avareke ntheko ni upatta ittu yo waalhamiha.
\p
\v 13 Ni inyu mwaatti chiicho, ashilhoko ihu, nhoochee upanga moombone. 
\v 14 Ni vavawo yakhalhaka wowo haawo ntu hinorumelhelha nlhove no ilha iwarakha ilha, munhimiacheke vaattuni yoyo ntu uyo, mena nhivaraanane, olhiye muru. 
\v 15 Nansho nhimwaalhakelhe thoko mmalhaponi nansho mmwaamukeke mmwoonaka ukhalha nlhoko inyu.
\s Malhove o umalhihera
\p
\v 16 Nlhuku mwanene nowiiha mpuha, ovaherekeni mpuha ikatema chonkhaye wo kila iphiro. Athithi akhalhe ni inyu mwaatti onkhaye.
\p
\v 17 Mii Paolo, kinouvahani isalamu chinolhepa aka wo moono aka kimwanene. Nenno phi nthonyero kinolhepa aka kila iwarakha. Chiichammo phi neera aka wo ulhepa.
\p
\v 18 Nnema wa Athithi Yesu Kuristo ukhalhe vamoka ni inyu mwaatti onkhaye.