\id PHP - Melo New Testament Latin
\ide UTF-8
\h Filphisoosa
\toc1 Phawuloosa Filphisoosa Asayis Xaafeez Kiita
\toc2 Filphisoosa
\toc3 Filp.
\mt1 Phawuloosa Filphisoosa Asayis Xaafeez Kiita
\imt Gelo
\ip Phawuloosa Filphisoosa asayis xaafeez kiitay xaafintteezay, Oroome biitta Maqadoona awurajja, Filphisoosa biitta yez woosa keethayisii. Ye woosa keethay Phawuloosa Awuroppa biitta tiinatii esseez woosa keethato. Yha kiitay xaafintteezay, Phawuloosa achch keetha yez wode hara woosa keeth ooso oothiz ammaniza asay eza ixxeez wodennee Filphisoosa woosa keetha dendeez worddo timirtte baggar e wozinay gaame azzaneez wode. Zin, Phawuloosa Yesuus Kiristtoosa miinthii ammaniza gishos yha kiitayid qoncce benttizay, ufayssinnee folo ammanintto. Filphisoosa yez gaame asay Oroomepp di7inttii ye7eez asita. Unttii Oroome biittas miccinttizannee lo7ithii naagiza. Unttapp pettay pettay ammano gishos fa biitta asayir bayi7intteeza. Ye bayi7ithay unttal afa metonnee manqqotithi ke7eeza (Haw. O. 16:20-21).
\ip Phawuloosa yha kiita tiin xaafoday garkk udeezay e meto wode eza maaddodayis Filphisoosa ammaniza asay maade ezis dakeez gisho unttan galatodayisi. Ezal afannee unttal afa duma duma meto helleezbaz maaqqikokka unttii miinggoday garkkennee kunthi ammano ammaninttii yezoday garkk yha dengeez ogayir unttan minthathiza. Utirannee gayiro ashshii, Yesuus Kiristtoosa ashikketithar unttii kumod garkk miinthii unttan akaakisiza. Yesuus Kiristtoosar wolla dengeez de7ay Xooss aadho keehatithapp pultteezannee ammanor unttii ekkeezaypp attin Ayihuditay woga polor benttekkazana unttan akaakisiza. Yesuus Kiristtoosar wolla yez ubbayis Xoossay ingiza saronnee ufayssi unttis xaafiza.
\ip Yha kiitay erinttizay ufayssi, ammanintto, pettetithinnee ammanor miinggii yezod yessi qonccisii beeziza. Yeyil afa gujjii, Phawuloosa Filphisoosa woosa keethayis qadhdhiza gita qadha beeziza.
\iot Filphisoosa kiitay aykkeez qofita
\io1 Gelo \ior 1:1-11 \ior*
\io1 Phawuloosa yezeez yessa \ior 1:12-26 \ior*
\io1 Kiristtaane yessay aaziso \ior 1:27—2:18 \ior*
\io1 Ximaatoosasisnnee Ephphaafiraditusas yez qofa \ior 2:19-30 \ior*
\io1 Morkkitayppennee iititaypp naagintto \ior 3:1—4:9 \ior*
\io1 Phawuloosannee Filphisoosa ammaniza asayis shiisheez galatannee zore \ior 4:10-20 \ior*
\io1 Sarothinnee anjjo \ior 4:21-23 \ior*
\ie
\c 1
\p
\v 1 Kiristtoos Yesuusas maaqqeez, Filphisoosa katama yez woosa keethi cimitayssi daaqonitayisinnee yesuus Kiristtoosar yez geeshshitayis ubbayis Yesuus Kiristtoosa aylle maaqqeez, Phawuloosappennee Ximaatoosapp kiitintteez kiita.\x - \xo 1:1 \xo*\xt Haw. O. 16:12\xt*\x*
\p
\v 2 Nu Ada nu Xoossayppennee Goda Yesuus Kiristtoosapp aadho keehetithinnee sarotithi yinttis maaqqo.
\s1 Phawuloosa galatannee woosa
\p
\v 3 Taanii yinttan qoppiza wode ubbayid, ta Xoossa galatiza. 
\v 4 Taanii yi ubbayis Xoossa woossittar ufayssar woossiza. 
\v 5 Yi binipp yhayino hellodayis, Wonggile markkattitar taar wolla maaqqii, tana maaddeez gisho ta Xoossa galatiza. 
\v 6 Yinttar lo77o ooso aykkeez Xoossay, Yesuus Kiristtoosa maaqqiz gallasay hellodayis, polodana ta lo7ith eriza.
\p
\v 7 Taanii achcha gelodaypp tiinannee yhatti achcha yezinkka Wonggile naagorannee Wonggile miinthii aythar Xoossay taasi inggeez aadho keehetitha yinttikka taar shagintteeza. Yi ubba wode ta wozina gancce yeza. Taanii yinttis ubba wodekka lo77o qoppiza. 
\v 8 Ta yinttan ubbita Yesuus Kiristtoosa siiqayir ab garkk laamotizakko Xoossay taas markka.
\p
\v 9 Yi siiqqay tuma eretitharannee akaakar gujjii gujjii diccod garkk ta Xoossa woossiza. 
\v 10 Yeykka yi lo77o baz shaakkii erii Kiristtoosa maaqqii ye7odar geeshshitannee borinttoozita maaqqaday garkke. 
\v 11 Yi yessay Yesuus Kiristtoosa baggar benttiz xillotith aafer kumii Xoossis bonchchonnee galata ki7izita maaqqada.
\s1 Phawuloosa accinttithay Wonggilay dalggod garkk maaddeeza
\p
\v 12 Ta ishuntho, tana helleez bazay Wonggile dalggod garkk tuma maaddeezana yi eroday garkk koyiza. 
\v 13 Taanii Kiristtoosas oothiz gisho accintteezana, kaat kara naagizitaynnee yhankkitay ubbitay eriza.\x - \xo 1:13 \xo*\xt Haw. O. 28:30\xt*\x* 
\v 14 Ta achchay baggar nu ishitaypp gaamitay Godayil lo7ithii ammanintteeza. Yey gisho, Xooss qaala yashsha bayth tiinaasaypp aathii miinggii odod garkk u minotith denggeeza.
\p
\v 15 Maaqqozin, pettay pettay qinaaterannee palamar Kiristtoosa baz odiza, Zin yhankkitay luule wozinapp odiza. 
\v 16 Luule wozinapp odizitay, Xoossay taas Wonggile naago ooso inggeezana eriza gisho siiqor odiza. 
\v 17 Zin yeyititay kiristtoosa bagga wobbithi sabakkizitay ta achchayil afa hara meto ko7odayisi fana dosii Kiristtoosa baz odizapp attin tuma wozinapp odooya.
\p
\v 18 Ye ubbayid tana ufayssiza. Tuma wozinar maaqqin woy worddo wozinar maaqqin ye ubbayir Kiristtoosa sabbakinttizay yey tana ufayssiza. Ma tiinaskka tana ufayssizabazay, 
\v 19 taanii yi woosarannee Yesuus Kiristtoosa Ayyana maader achchapp kezodana ta eriza gishos tana ufayssiza. 
\v 20 Ta gita amotitharannee ufayisar ta ooso ubbayira ta yeellatamana naagiza. Zin ubba wode oothizay garkk, yhattekka taanii path yezin woy yhayqqin yashittekkazar ta kunthi asetithayid Kiristtoosa bonchchinttoda gi minotithar odiza. 
\v 21 Taas de7o guussay Kiristtoosa aaddas yesse; ma ta yhayqqikokka taas usa lo77o. 
\v 22 Zin ta path yeziko aafer benttiz ooso oothoda. Yeya maaqqikokka path yezayppennee yhayiqopp aaya doorodazako taas erinttooya. 
\v 23 Taanii yha nam7itaypp aaya doorodazako tana wayitheeza. Yha yessaypp shaakinttii Kiristtoosar wolla yezodayis ta amottiza; Kiristtoosar wolla yezizay usa lo77o. 
\v 24 Hara baggar taanii yi gishos path yezizay yinttis usa lo77o.
\p
\v 25 Taanii, yi ammanor diccod garkkennee ufayttod garkk yinttar pathi yeziza. Yeya taanii lo7ithii eriza 
\v 26 Yey gishos, taanii yinttiko maaqqii ye7odar ta baggar Kiristtoosa Yesuusar yez yi yessayid yi ceeqinttay gaanggoda.
\p
\v 27 Ubbapp aathii, yi Kiristtoosa Wonggilayis beeziza yess yezoytta. Ta yi yinttan bi7in be7aam ixxin yi pettii qofar miinggii eqqii, hara asay Wonggila ammanod garkk pettii wozina maaqqii pettipp wolla buutitizana ta si7oda. 
\v 28 Yi morkkitayis yashittippate. Yey yi minotithay unttikka yinttar eqinttizabaz maaqqiko yinttis atotithis unttis dhabos Xoossapp maaqqeez malla garkke. 
\v 29 Kiristtoosas oothiz anjay yinttis inggintteezay, yi eza ammanod garkk aadda baazin yi e gisho meto ekkod garkke. 
\v 30 Yey gisho, yi ta waaya tiina be7eeza; yhattekka ta metotizana yi si7iza. Yinttikka ta metay garkk mettinttiza\x - \xo 1:30 \xo*\xt Haw. O. 16:19-40\xt*\x*.
\c 2
\s1 Tuma ashikketith
\p
\v 1 Kiristtoosar yinttis minotithii yeziko; ma e siiqayirakka yi minthathintteezbaz maaqqiko, Geeshsha Ayyanar yinttis pettetithi yeziko; yi wolis keehikonnee qadhinttiko. 
\v 2 Yikkee, yi pettii qofar, siiqor, pettii wozinarannee ayyanar petto maaqqii tana folo ufayssoytta. 
\v 3 Yinttan dosor woy ceeqinttar pettibazikka oothippate. Zin yi pettay pettaypp ta aadhiza yeegii qoppekkazar yinttan ziqqi udoytta. 
\v 4 Yi pettay pettay, hara as maaddiza baz koyoyttapp attin yinttan maaddiza baz aadda koyppate.
\p
\v 5 Kiristtoos Yesuusar yez qofay yinttar yezodayis beeziza.
\q1
\v 6 Ezis ubba wode Xoossatith hanotithii yeza.
\q2 Maaqqopp attin, eza Xoossar petto udiz Xoossatith hanota,
\q2 wolqqar ekkodayis koyekkaya.
\q1
\v 7 Maaqqozin, E faass yeza bonchcha ubba ashshii,
\q2 ayllegarkk maaqqii as aazii bentteeza;
\q2 asgarkk yelintteeza.
\q1
\v 8 E fana laafitheeza;
\q2 yhayqqod gatho,
\q2 hara attozin mazqqalel afa
\q2 yhayqqod hellodayis kiitintteeza.
\q1
\v 9 Yey gisho, Xoossay eza aathii dhoqqi dhoqqi udeeza;
\q2 ma sunth ubbapekka aadhiz dhoqqe sunthi inggeeza.
\q1
\v 10 Salonnee sa7all,
\q2 sa7app oommor yez ubbitay,
\q2 Yesuusa sunthay bonchchayis bunqqitoda.\x - \xo 2:10-11 \xo*\xt Isa. 45:23\xt*\x*
\q1
\v 11 As ubbay fa iranthayir,
\q2 Yesuus Kiristtoosa Goda yeegii markkattii,
\q2 Xooss Adayis bonchcho inggeeza.
\s1 Yha alamayis poo7o maaqqith
\p
\v 12 Ta ishuntho, taanii yinttar yeza wode ubbayid yi kiitintteezay garkk, yhatti taanii yi lanqqaypp haakikokka, tiinaasaypp aathii, kiitinttodayis beeziza. Xoossayis yashsharannee kukkurssar yi atotitha beeziza ooso oothoytta. 
\v 13 Xoossay, yi hanod garkk E koyiz baz yi koyoday garkkennee oothoday garkk ubba wode yi gancce oothiza.
\p
\v 14 Aba ooso oothittarakka zigirekkazarannee palamekkazar oothoytta. 
\v 15 Zhucannee nagara oothiz as gancce borinttoozita, borsso baazitannee Geeshsh Xoossa na7ita maaqqoytta. Yi u gancce salo xoolintto garkk poo7oda.\x - \xo 2:15 \xo*\xt Nam7i. 32:5\xt*\x* 
\v 16 Yeykka hanizay de7o inggiz qaala miinth aykkithara. Ye wode ta daaburssay ta oosay cere attekka gishos Kiristtoosa yi7iza gallas ta yinttal ceeqinttoda.
\p
\v 17 Hano zin yi Xoossis ammanor inggiz yarshshayilannee oosayil afa taakka gujinttii yarishinttizako tana ufayssiza. Yinttikka taar ufayttoda. 
\v 18 Yey garkk yinttikka ufayttii tanakka yinttar ufayssodayis beeziza.
\s1 Ximaatoosarannee Ephphaafiraditusa
\p
\v 19 Taanii yi yess bagga si7ii ufayttodayis Ximaatoosa yinttiko ellisii dakkoday Goda Yesuusa shene maaqqodana ta ammaniza. 
\v 20 Yinttis wozinapp qoppiz egarkke as hara oonkka taas baaya. 
\v 21 Yhankkitay fana adiza baz kozhizapp attin Yesuus Kiristtoosa koyiz baz oothooya. 
\v 22 E taara wolla maaqqii na7a fa ades oothizay garkk Wonggile ooso ootheezannee ammaninttiza as maaqqeezana yi eriza. 
\v 23 Yey gisho, tabazii ab hanodazako bi7ii ellisii eza yinttiko dakkoda gi ta qoppiza. 
\v 24 Taanii, ta ubbas ukker yinttiko yhammadana Godayil ammaninttiza.
\p
\v 25 Ubbarakka, taanii, ta isha Ephafiroditusa, taar wolla ta bagga maaqqii ootheezana, wotaaddare maaqqizannee, tana maaddodayis yi azazeezana, yinttiko kiittodayis qoppeeza. 
\v 26 E yinttan ubbita be7adayis iita laamotiza. Ma E harggintteezana yi si7eez gishos fa wozinar loyithii un77intteeza. 
\v 27 E tuma hargginttii yhayqqii wurii atteeza. Zin Xoossay ezis qadhintteeza. E aaddas baazin azanay azzanol afa guzhinttaam garkk, taaskka qadhintteeza.
\p
\v 28 Yikkee, yi eza mahii bi7ii ufayttod garkk taaskka ta wozina xuussay irxxod garkk taanii eza ellisii yinttiko dakkodayis amottiza. 
\v 29 Goda ammaniza asgarkk eza kunthi ufayssar mokkoytta. Ma e garkk as ubbitakka bonchchoytta. 
\v 30 Yi ta lanqqe maaqqii oothodayis danda7oowa maadee maaddii Kiristtoosa oosay gishos fa shemppos miccinttakkazar yhayqqii wurii atteeza.
\c 3
\s1 Tuma xillotith
\p
\v 1 Yikkepp gede, ta ishuntho, yi Godayil ufayttoytta. Taanii tiin xaafeezana mahii xaafoday tana azalissooya, Zin yinttan buutapp naagodayis danda7iza.
\p
\v 2 Iita baz oothiz kanitayppennee dookalinttodayis koshshiza giz iita asitaypp naaginttoytta. 
\v 3 Nuunii Xoossa Geeshsha Ayyanar goynniz gishonnee nu yessayir Kiristtoos Yesuusal ceeqinttiza gishos tuma dookalintto dookalintteezita. Nuunii afar asho gallal afa oosinttizbazar ceeqinttooya.
\p
\v 4 Ta ashor ceeqinttodayis koshshiko ta gaamebazar ceeqinttodayis danda7iza. Aba askka ashor ceeqinttizabaz paas yeza gi qopiko, taanii ezapp aadho ubbapp aathii ceeqinttizabaz yeza. 
\v 5 Taanii yelintteez hospuntha qammar dookalintteeza. Taanii yelinttor tilla Isreele; taanii Biinama kochchii; taanii walaka baa Ibiraawe asii. Ayihude higge naagor maaqqiko taanii Ferisaawe.\x - \xo 3:5 \xo*\xt Haw. O. 23:6; 26:5; Oro. 11:1\xt*\x* 
\v 6 Ayihude ammano higges qinaater maaqqiko taanii woosa keeth bayi7izaya. Pettii asii higge naagii xillizabaz maaqqiko, taal boro benttekkaya.\x - \xo 3:6 \xo*\xt Haw. O. 8:3; 22:4; 26:9-11\xt*\x*
\p
\v 7 Zin tiin tana maaddiza gi qoppeezbaz ubba, Kiristtoosa gishos gi maaddoowa baz udii taybeeza. 
\v 8 Yey aadda baazin taanii ta Goda Kiristtoos Yesuusa erizay hara baz ubbapp lo7ithii aadhiz gishos ye ubba wodhe baabaz garkk tayibeeza. Taanii E gishos ubba baz qohintteeza. Kiristtoosa denggodayis ubba baz alla wodhdheez buure garkk taybeeza. Taanii Yesuusar petto maaqqeeza. 
\v 9 Taanii higges naagii denggiz ta xillotitha ashshii Kiristtoosa ammanin benttiz xillotithay, Xooss lanqqepp yi7iz xillotithay yhatt taasi yeza. 
\v 10 Taanii Kiristtoosannee e denddo wolqqa erodayis koyiza. Taanii e meta ezar shaakinttodayisinnee e yhayiqayir eza aazodayis amottiza. 
\v 11 Ubbarakka, yhayiqopp dendii medhinas de7or yezodana ufayss gaddeeza.
\s1 Folo hellodayis laaso
\p
\v 12 Taanii yhatti gaxa helleeza woy taar bala baaya gooya. Zin Kiristtoos Yesuusa tana aykkeez gishos taanii ta tiina yez woyita aykkodayis woxxizannee butinttiza. 
\v 13 Ta ishuntho, taanii yeya heleeza gi qoppooya, zin taanii pettibaz udoda. Taapp guyer yezana dogittar tiina yezana aykkodayis zaaturiza. 
\v 14 Yey gishos, taanii folo hellodayis laasiza. Xoossay Kiristtoos Yesuusa baggar salo xeegii immadi woyitay salo de7o. Yin izo ekkodayis daaburiza.
\p
\v 15 Yikkee, nuunii Ayyanar minggeez ubbay yeya qoppodayis beeziza. Yinttapp baggitayis dummatiza qofa yezako, yeyakka Xoossay yinttis milxi udii beessada. 
\v 16 Maaqqikokka, nuunii yhanno hellodayis Xoossis beeziza yessayir, ane tiina wolla yhammada.
\p
\v 17 Ta ishuntho, tana aazoytta; yey garkkekka, nu aazisa kaalliza asita akaakii bo7oytta.\x - \xo 3:17 \xo*\xt 1 Qor. 4:16; 11:1\xt*\x* 
\v 18 Taanii yhaypp tiina mahii mahii odeeza, zin yhattekka mahii aafuthar odiza. Fa yessar Kiristtoosa mazqalayis fana morkkita maheez gaame asay yeza. 
\v 19 U wurssithay dhabo; u ulay unttis Xoosse. Yeellathiza bazi unttis bonchcho; ma u yha sa7abaz aadda qoppiza. 
\v 20 Nu gaday salo yeza. Salopp ye7od dhale Goda Yesuus Kiristtoosa nu laamothar naagiza. 
\v 21 Kiristtoosa ubba baz fa wolqqaypp oommo udodayis danda7iza fa wolqqayir kawuzheez nu asha laammii fa bonchcho asho udoda.
\c 4
\s1 Wurissithi zore
\p
\v 1 Ta ishuntho, ta qadhdhizuntho, ta laamotizuntho, ta ufayssitayinnee ta ooso akililuntho yikkee Godayil miinggii eqqoytta.
\p
\v 2 Ewoodaranne Sinxiika, yi nam7itay, pettii qofar Goday baggar wolis mishita maaqqii yezod garkk taanii yinttan zoriza. 
\v 3 Taar oothiz ammanthizayyo, neenii yha maachchita maaddod garkk ta nena woossiza. Yha maachchitay taar, Qeleminxoosara u sunthay Xooss de7o maxaafay gancce xaafintteez hara asayir wolla Wonggile ubba aqo helthodayis daabureeza.
\p
\v 4 Ubba wode Godayir ufayttoytta. Taanii yeya gujjikka odiza; ufayttoytta.
\p
\v 5 As ubbitay yi haayotitha ero; Goday ukker ye7oda. 
\v 6 Xoossa yi woossittar ubba wode eza galatittar, yinttan koshshiza baz ubbayis woossoyttapp attin ababaziskka hirigipatte. 
\v 7 As eretithi ubbaypp aadhiz Xooss sarotithay, yi wozinannee yi qofa Goda Yesuus Kiristtoosa baggar naagoda.
\p
\v 8 Wurssithal, ta ishuntho, yi kahayira lo77o baznnee galatisizabaz qoppoytta. Tuma maaqqizbaz ubba, bonchchobaz ubba, qoho maaqqoowa baz ubba, geesh baz ubba, siiqo baz ubbannee ufayssiza abaz ubba qoppoytta. 
\v 9 Yinttii taapp tamaareez baz, ekkeezbaz, si7eezbaznnee be7eez baz ubba oothoytta. Sarotith inggiz Xoossay yinttar wolla maaqqada.
\s1 Phawuloosa paas inggintteez imotayis galatiza
\p
\v 10 Gaame wodepp guye, yi tabaz mahii qoppith aykkeez gishos taanii Godayil lo7ithii ufayttiza. Yeya guussay, taas qoppodayis yinttis hanaam ixxeezaypp attin taas qopooya guuss baaya. 
\v 11 Taanii yeya gizay meteez gishos gooya; taasi yeza bazi gidod guussa ta tamaareeza. 
\v 12 Taanii metinttii yeziza yessa eriza; demokka dhabokka eriza. Aba maaqqin ma aba wodekka taanii mishshis nayes, pacceskka kunthisikka yez xuura ta tamaareeza. 
\v 13 Wolqqa inggiz Kiristtoosar ubba baz ta oothodayis danda7iza.
\p
\v 14 Maaqqikokka, yi ta meto taar shaakintteezayid lo77o ootheeza. 
\v 15 Filphisoosa asayyo, Wonggile tiina ododayis taanii Maqadoonapp keziz wode imor maaqqin ekorakka yi woosa keethapp attin hara oonkka tana maaddekkaza yi eriza.\x - \xo 4:15-16 \xo*\xt 2 Qor. 11:9\xt*\x* 
\v 16 Teselonqqe ta yeza wodekka yi tana maaqqii maaqqii maaddeeza.\x - \xo 4:16 \xo*\xt Haw. O. 17:1\xt*\x* 
\v 17 Taanii, yinttapp yi imo ekkodayis koyii baazin imopp yi7iz anjjo yi ekkoday garkke.
\p
\v 18 Taanii, yi inggeez ubbabazitannee gidii fucizabaz ekkeeza. Yi dakkeez ubbita Ephafiraditusapp ekkeeza; koshshiza baz ubbay taasi yeza. Yi taasi dakkeez imay Xoossis tonkki giz sawo, E qadhdhiza, E ufayttiza yarshsho garkkee.\x - \xo 4:18 \xo*\xt Kes. 29:18\xt*\x* 
\v 19 Ta Xoossay fa bonchcho duretithay garkk, Yesuus Kiristtoosa baggar yinttis koshshiza baz ubba immada. 
\v 20 Nu Adayisinnee nu Xoossayis medhinapp medhina hellodayis bonchcho maaqqo. Amin7e.
\s1 Wurssithii saroth
\p
\v 21 Kiristtoos Yesuusa baggar Xooss ammanizita ubbita saro goytta. Taar yez ishitay yinttan saro giza. 
\v 22 Xooss ammaneez asay ubbay, ubbapp aathii Kaati Qeesare keetha yezttay yinttan saro giza.
\p
\v 23 Goda Yesuus Kiristtoosa aadho keehatithay yinttar maaqqo.