\id EPH - Melo New Testament Latin
\ide UTF-8
\h Efisoon
\toc1 Phawuloosa Efisoone Asayis xaafeez Kiitaa
\toc2 Efisoon
\toc3 Efi.
\mt1 Phawuloosa Efisoone Asayis Xaafeez Kiita
\imt Gelo
\ip Phawuloosa Efisoone yez asayis xaafeez kiitay ubbaypp aathii be7eezay, «Wode heliko Xoossii polodayis qoppeez qofay, salonnee sa7a yez medhetith ubbay Kiristtoosapp oommo maaqqoday garkkesii» yeegiz qofa (1:10). Yeyil afa gujjii Yesuus Kiristtoosar yez pettipettithayid, as zereth ubbay petto maaqqoday garkk yha gita qofa oosol peeshshoday garkk Xooss woyita qoppisiza.
\ip Efisoone kiitay tiina kifilayid xaafeez kaara qofa maaqqeez pettipettith bagga xaafodayis aykkeezana dalggisii, Xoossay Aday fa asa wayizii dooreezako, unttikka E na7a, Yesuus Kiristtoosar fa nagarapp maarotith denggeeza wayizii wallo kezeezakonnee, Xoossa gita ufayss qaalay Geeshsha Ayyana baggar tuma maaqqeezay wayizii erintteezako odiza. Nam7intho kifilayid ma xaafeezay yha kiita nabbabiza asay fa pettipettith yessayid Kiristtoosar unttis yez pettipettithay tuma maaqqoday garkk u wayizii yezodayis beezizako qofisiza.
\ip Asay Kiristtoosar yez pettipetteth wayizii yezodayis beezizako duma duma aazisor qoncceeza. Woosa keetha asetithis aaziso maaqqin Kiristtoosa ye asetithayis kustte. Woosa keethi gimbbe keethar aazisinttin Kiristtoosa ye keetha muumer tookkii aykkiz kirkiro garkk maaqqiz waanna shuchch. Woosa keetha machchir aazisinttiza wode Kiristtoosa azinar aazisintteeza. Xaafay Kiristtoosa baggar qoncceez Xoossa aadho kehetithapp gaame soobii odittar, ganccay ciimmottiza nashsha nashshiza. E ubba baz, Kiristtoosa siiqo, e yarshshintto, E inggeez nagara atotitha, E aadho keehetithinnee e geeshshitith baggar benttiza.
\iot Efisoone kiitay aykkeez qofita
\io1 Sarotho \ior 1:1-2 \ior*
\io1 Kiristtoosannee woosa keeth \ior 1:3—3:21 \ior*
\io1 Kiristtoosar yez oroth de7o \ior 4:1—6:20 \ior*
\io1 Kustte qofa \ior 6:21-24 \ior*
\ie
\c 1
\s1 Sarotho
\p
\v 1 Xooss shener Kiristtoosa Yesuusa hawaare maaqqeez Phawuloosapp, Efisoone yez geeshshitayisinnee Kiristtoosa Yesuusa ammanizitayis xaafintteez kiita.\x - \xo 1:1 \xo*\xt Haw. O. 18:19-21; 19:1\xt*\x*
\p
\v 2 Xooss nu Adayppennee Goda Yesuus Kiristtoosapp aadho keehatithinnee sarotithii yinttis maaqqo.
\s1 Ayyana anjjo
\p
\v 3 Salo yez ayyana anjjo ubbayir Kiristtoosa baggar nuna anjjeez, nu Goda Yesuus Kiristtoosa Aday, Xoossay galatintto. 
\v 4 Nuunii e tiina geshetithar boro baazita maaqqoday garkk Xoossii alame medhinttodaypp tiina Kiristtoosa baggar fa siiqor nuna dooreeza. 
\v 5 Xoossii fa shenayid fa doseezay garkk Yesuus Kiristtoosa baggar nuna fa na7ita udodayis tiinatii qoppii gaddeeza. 
\v 6 Xoossii fa siiqiza Na7ay baggar nuus cere inggeez bonchchintteez aadho keehatithay galatinttoday garkk yeya udeeza.
\p
\v 7 Xoossa aadho keehatith duretithay garkk Kiristtoosa suuthar wozinttii nagaras atotith nu denggeeza. 
\v 8 Fa aadho keehatitha ecetitharannee eratithar gaanthii nuus inggeeza.\x - \xo 1:8\xo*\xt Qol. 1:14\xt*\x* 
\v 9 Xoossay fa qoppii gaddeezay garkk Kiristtoosa baggar e shene xuura nu eroday garkk ootheeza. 
\v 10 Wode hellodar Xoossii polodayis qoppeez qofay, salonnee sa7a yez medhetith ubba Kiristtoosapp oommo udodayisii.
\p
\v 11 Ubba baz fa shene garkk oothiza Xoossay, tiinatii fa qoppii gaddeezay garkk Kiristtoosa baggar nuunii E irisitta laattoday garkk nuna dooreeza. 
\v 12 Yeyi haneezay, Kiristtoosal ufayss gaddii naagor tiina maaqqeez nuunii Xooss boncha galatar qonccisoday garkkesii. 
\v 13 Yinttikka yi atotith Wonggile, yeykka tuma qaala si7eez wode Kiristtoosana ammaneeza. Xoossay yinttis inggod geez Geeshsha Ayyana maatame yinttal gaddeeza. 
\v 14 Yeykka Xooss bonchchay galatinttoday garkk Xoossay fa asa wozod gatho Geeshsha Ayyana nu laattod gadayis nuus saath udii inggeeza.
\s1 Phawuloosa woosa
\p
\v 15 Yeyi gishos, Goda Yesuusall yinttis yez ammanannee geeshshitayis yez yi siiqa ta si7ii 
\v 16 ta woosayir yinttan qoppittar yi gishos Xoossa galatizana ashshekkaya. 
\v 17 Nu Goda Yesuus Kiristtoosa Xoossa, boncho Ada yi aathii eroday garkk ecetithinnee qonccith ayyana yinttis immaday garkk ta woosiza. 
\v 18 Xoossay yinttan xeegeez ufayssaynnee geeshshitay laattiza bonchcho laatay ab garkk gaameezako yi erodayiss Xoossay yi wozina aafa dooyod garkk taanii Xoossa woosiza.
\p
\v 19 Ma eza ammaniza nuur oothiza e wolqqay ab garkk aadho dammazako yi eroday garkk ta woosiza. 
\v 20 Kiristtoosana yhayiqopp denthii, salo fa ushachch baggar bettitheez kiristtoosar ootheez gita wolqqa. 
\v 21 E sunthay, aqisizitayppenne mawuter yezitaypp, mooddizitayppennee goditaypp, aath maaqqii yha alamayil aadda baazin tiinapp ye7od alamayidakka hara sunth ubbitaypp aadho boncho sunth inggeeza.\x - \xo 1:21 \xo*\xt Maz. 110:1\xt*\x* 
\v 22 Xoossay ubba baz Kiristtoosa toke oommo haariseeza; ma woosa keethis ubba bazar kustte maaqqod garkk eza shuumeeza. 
\v 23 Woosa keethay Kiristtoosas asetithii. Izakka Kiristtoosa ubbabazar kunthiz Ees iza E kunthato.\x - \xo 1:23 \xo*\xt Maz. 8:6; Qol. 1:22-23; 1:18\xt*\x*
\c 2
\s1 Kiristtoosar yhayiqopp de7oko piinggith
\p
\v 1 Yhaypp tiina yi, yi nagarayirannee yi qohayir yhayqqeezita.\x - \xo 2:1-5 \xo*\xt Qol. 2:13\xt*\x* 
\v 2 Ye wode yi yha alamay iita oga kaalleeza. Carkkol afa yez wolqqitay halaqaysinnee yhattekka Xoossayis azazinttowa na7itayir oothiz ayyaanas yi azazintteeza. 
\v 3 Nu ubbaykka tiina ye asitay gancce nu asho amonnee nu wozina shene kaallii yezeeza. Nuunikka yhankkitay garkk nu medhetithar pirdda ekkodayis yezeezita.
\p
\v 4 Zin Xooss gita maarotithayppennee nuus yez E gita siiqaypp denddeezayid, 
\v 5 Hara attozin nuunii nu qohopp dendeezayid yhayqqii yezin Kiristtoosa baggar nuus de7o inggeeza. Xooss aadho keehatithayir yinttikka atteeza. 
\v 6 Xoossii nuna Kiristtoos yesuusar pettipp yhayiqopp denthii salo ezar wolla gaddeeza. 
\v 7 E yeya ootheezay, Kiristtoosa Yesuusa baggar nuus qoncciseez fa keehetithinnee zawa baa fa aadho keehetith duretitha ye7od laythitayid nuna beessadayis yeya ootheeza. 
\v 8 Yi paxeezay ammano baggar E aadho keehatithayira. Yeykka, Xooss imotapp attin yi oosor benttekkaya. 
\v 9 Oonkka ceeqinttaamay garkk paxotith aadho keehatithay bentteezay as oosor baaya. 
\v 10 Xoossii nuus tiinatii giigisii gaddeez lo77o oosita oothoday garkkennee ezayir yessadayis Kiristtoos Yesuusa baggar maaqqii medhintteez Xooss medhetithita;
\s1 Kiristtoosar yez pettipettith
\p
\v 11 Yeyi gishos, yinttano sisa yi yelintto Ayihude baazitayyo, Ayihuditay fana as kusher dookalintteezita gi gayirttar, yinttan ma dookalinttekazita gi borizana akaakoytta. 
\v 12 Ye wode yi Kiristtoosapp shaakinttii yezeezana, Isreele asayis allaga maaqqii yezeezana, Xooss qaala caaqayis haakkii yezeezannee yha alamel ufayssinnee Xooss bayth yezeezana akaakoytta. 
\v 13 Zini yi tiina haakkii yezeezitay, yhatt Kiristtoosa Yesuusar yezi E suuthay baggar Xoossiko uukkeeza.
\p
\v 14 Nam77ii shaakkii gaddeez morkketith gabbara fa ashayir laalii Ayihudenne Ayihude baa asa timii petto udeezay Kiristtoosa sarotitha. 
\v 15 E paar yha nam77ii zaritaypp pettii oroth as medhdhodayis, higge azazannee wogita pettipp fa ashayir dhabisii sarotithi inggeeza.\x - \xo 2:15 \xo*\xt Qol. 2:14\xt*\x* 
\v 16 Kiristtoosa mazqalel afa yhayqqii morkkintto dhabiseeza; ma nam77ii kochita pettii asho udii Xoossar igintheeza.\x - \xo 2:16 \xo*\xt Qol. 1:20\xt*\x* 
\v 17 Kiristtoosa yi7ii, Xoossapp haakkii yez yinttis, ma ukkii yez unttis sarotith Wonggile odeeza.\x - \xo 2:17 \xo*\xt Isa. 57:19\xt*\x* 
\v 18 Nu ubbay e baggar pettii Ayyanar Aday tiina shiiqodayiss danda7eeza.
\p
\v 19 Yhaypp yi allaga woy imathita baaya, zin yi yhatti geeshshitayir gade asinnee Xoossis kara asita. 
\v 20 Yinttii hawaaritayinnee nabitay baaseez baasayil afa keexxintteeza. Keetha muumer tookkii aykkeez kirkiro garkk shuchchay Kiristtoosa Yesuusa. 
\v 21 Ezal keeth ubbay pettipp aykkinttii Godayil geeshsha Xooss kara maaqqodayis dicciza. 
\v 22 Yi ma Xoossii fa Ayyanar yeziza keeth maaqqodayis Kiristtoosar pettipp keexxinttiza.
\c 3
\s1 Ayihude baa asayis hawaare maaqqeez Phawuloosa
\p
\v 1 Yeyi gishos, taanii, Phawuloosa, Ayihude baa maaqqeez yi gishos Kiristtoosa Yesuusar achch as maaqqeeza. 
\v 2 Ta yinttan maaddoday garkk Xoossii fa aadho keehatithayir taas inggeez yha oosay bagga yi lo7ithii si7eeza. 
\v 3 Ta yinttis tiina haatar xaafeezay garkk Xoossii fa xuura qonccithar taas beezeeza. 
\v 4 Ta xaafeezana yi nabbabiza wode Kiristtoosa xuura ta ab garkk ereezako yi akaakodayis danda7iza.\x - \xo 3:4-6 \xo*\xt Qol. 1:26-27\xt*\x* 
\v 5 Yha xuuray geeshsha hawaaritayisinnee nabitayis yhatti Ayyana baggar qoncciseezay garkk binii wode asayis yhay garkk qonccisekkaya. 
\v 6 Yha Xuuray beezizay: Ayihude maaqqekka asay Wonggile baggar Isra7eelitayira pettipp Xooss iristte laattiza. Isra7eeltayir pettii asetith maaqqiza; Kiristtoosa Yesuusa baggar Xooss ufayss qaala ekkiza.
\p
\v 7 Xoossii fa oothiza wolqqay baggar taas inggeez aadho keehetithayid ta yha Wonggilayis oososanchcho maaqqeeza. 
\v 8 Taanii geeshshitay ubbaypp laafa maaqqikokka Ayihude maaqqekka asayis zawa baa Kiristtoosa duretith Wonggile ododay garkk yha aadho keehatithay taas inggitteeza. 
\v 9 Ma binii wode ubba medhdheez Xoossar qosinttii yez xuurayis, Xooss qofay abizako ubbayis qonccisodayis aadho keehatithay taas inggintteeza. 
\v 10 Xoossii yeya ootheezay yhatte wode woosa keethay baggar salo yez halaqitayisinnee mawuter yezitayis fa duma duma ecetitha erisodayisii. 
\v 11 Xoossii fa medhina qofa nu Goda Kiristtoosa Yesuusa baggar polodayis yeya udeeza. 
\v 12 Nu ammanor yashsha bayith Xoossiko shiiqoday garkk Kiristtoosa nuus minotethinnee mawute inggeeza.
\p
\v 13 Taanii yi bagga ekkiza mettay yinttis bonchcho. Yey gishos yi taan metinttizana bi7ii ufayis gachchaamay garkk yinttan woosiza.
\s1 Efesoona asayis woosintteez woosa
\p
\v 14 Taanii Xooss Aday tiina bunqqinttii woossizay yey gishos. 
\v 15 Salonnee sa7a yez medhetith ubbayis sunthii Xoossapp ingginttiza. 
\v 16 Xoossii fa bonchcho duretithaypp yi gancce asetitha minithiza wolqqa fa Ayyana baggar inggod garkk yinttis woosiza. 
\v 17 Maakka ammanor Kiristtoosa yi wozinayid yessaday garkkennee yi siiqor xapho dakkii miinggii yezoday garkk ta woosiza. 
\v 18 Yey garkkekka, Kiristtoosa siiqqay waafa garkk dalggeezako, adussizako, dhoqqazakonnee ciimmozako geeshshitay ubbayira eriza wolqqa yi akaakoday garkk ta woosiza. 
\v 19 Eratetithapp aadhiz Kiristtoosa siiqo yi eroday garkk inggiza Xoossapp maaqqeez kunthatiyir yi kumod garkk ta woosiza.
\p
\v 20 Yikkee, nu gancce oothiza fa wolqqay baggar nuunii woossizaypp woy qoppizaypp aathii oothodayis danda7iza Xoossayis, 
\v 21 woosa keethannee Kiristtoosa Yesuusa baggar Xoossis medhetith ubbaypp wode ubbayid medhinapp medhina hellodayis bonchcho maaqqo. Amin77ee.
\c 4
\s1 Kiristtoosar yez pettipetteth
\p
\v 1 Yikkee, Goday gishos accintteez taanii, yi xeegintteez xeeginttithayid beeziza yess yezoday garkk yinttan woosiza. 
\v 2 Yi ubba wode aadannee haayo maaqqoytta; pettay petta danda7oyttannee siiqor yezoytta.\x - \xo 4:2 \xo*\xt Qol. 3:12-13\xt*\x* 
\v 3 Sarotithar acinttii Ayyana pettipettetha naagodayis miinggoytta. 
\v 4 Xoossii yinttan xeegeez wode pettii ufayssas xeegeezay garkk pettii asetithinnee pettii Ayyana yeza. 
\v 5 Pettii Goda, pettii ammanonnee pettii xinqqate yeza. 
\v 6 Ubbapp aathay, ubbayir oothizannee ubbay gancce yez pettii Xooss, ubbayis Ade yeza.
\p
\v 7 Zini Kiristtoosa inggodayis koyeez imotay garkk nuus pettayis pettayis aadho keehatithii inggintteeza. 
\v 8 Yeyi gishos, Xooss qaalay,
\q1 «E udee kezeez wode
\q2 di77ii gaamita paar ekkii qiteeza;
\q2 asayiskka imotita inggeeza»
\m yeegiza.\x - \xo 4:8 \xo*\xt Maz. 68:18\xt*\x* 
\v 9 Yeezin, «Udee kezeeza» guussay E tiina sulle, sa7a ziqqa aqo wodhdheeza guuss maaqqaam ixxiko ab guuso? 
\v 10 Yha sulle wodhdheezay, ubba kunthodayis ubbapp dhoqqa salo kezeezay eza.
\p
\v 11 E pettita pettita hawaare, pettita pettita nabe, pettita pettita Wonggile sabaakita, pettita pettita woosa kara aqisizitannee asitamaarita maaqqaday garkk imota inggeeza. 
\v 12 E yeya udeezay Kiristtoosas asetith maaqqeez woosa keetha dichchodayisinnee ammaniza asa Xooss oosos giigisodayisii. 
\v 13 Yey garkkekka, nu ubbay Xooss Na7a erii ammanor benttiz pettipettethikko hellii, Kiristtoosa ayyana de7o kunthetithyiko hellii folo as maaqqii diccoday garkkesii.
\p
\v 14 Yikkepp guye, asay doosha gener maaqqeez balithiza worddo timirtte carkkorannee abba gotera gedennee yhana kulo kaa7iza duuditay garkk maaqqodayis beezooya. 
\v 15 Zini nuunii tumana siiqor odittar ubba bazar asetithis kustte maaqqeez Kiristtoosako dichchoda. 
\v 16 Kunth asetithay Kiristtoosar aykkinttiza ma duma duma asetith billititay pettay pettayir aykkinttii betteeza. Pettii pettii asetith kifilay fa ooso oothodar kunth asetithay siiqor miinggoday garkk asetitha diccoda.\x - \xo 4:16 \xo*\xt Qol. 2:19\xt*\x*
\s1 Kiristtoosar oroth yess
\p
\v 17 Yhaypp gede kaha dhabin cere qofar ammanoowa as garkk yezipatte, taanii yhaya yinttis Goday sunthayir odizannee markkattiza. 
\v 18 U qofay dhumeeza; u fa wozina muumiseeza. Unttii eretith dhaborannee ixxora Xoossii inggiza de7aypp haakkeeza. 
\v 19 Unttii yeella gizibaz eroowa; unttii tuna ooso ubba polodayis zhimbarosinnee asho amos fana aathii inggeeza.
\p
\v 20 Zini yi Kiristtoosa bagga tamaareezay yey garkk oger baaya. 
\v 21 E baz tuma si7eeza. Ma Yesuusar yez tuma yi eepp tamaareeza. 
\v 22 Yi tiina yezeez oga ashshoytta. Ma dooshshii amor dhabisiza yi cima atha qaarii oloytta.\x - \xo 4:22 \xo*\xt Qol. 3:9\xt*\x* 
\v 23 Yi wozina qofayir ooroxoytta. 
\v 24 Tuma xillotitharannee geeshshetithar Xooss aazisor medhintteez oroth asetitha ma77oytta.\x - \xo 4:24 \xo*\xt Medhe. 1:26; Qol. 3:10\xt*\x*
\p
\v 25 Yikk, worddo odinttipate. Nuunii ubbay Kiristtoosa asetith billitita maaqqeez gishos as ubbayira turo odinttoda.\x - \xo 4:25 \xo*\xt Zak. 8:16\xt*\x* 
\v 26 Gayilinttoytta zin yi gayilayir nagara oothipate. Yi gayilinttii yezin awa yinttal gelippe.\x - \xo 4:26 \xo*\xt Maz. 4:4\xt*\x* 
\v 27 Dabulosas oge doyipatte. 
\v 28 Kasitiza athay yikkepp guye kasttippe. Zini manqqita maaddiza baz ees yezoday garkk fa kusher lo77o baz ootho.
\p
\v 29 Yi doonaypp iita qaala kezippe. Zini si7izitayis maaddoday garkkennee yhankkita minthathos koshshiza lo77o qaala yi doonaypp kezo. 
\v 30 Xoossii yinttan wozeezana erisodayis ye gallasis yinttal attaamii gaddeez Xoossa Ayyana azzanthipate. 
\v 31 Canggintto, yilo, kachchii, uufo, cashshennee iitatithii ubba yinttipp hakithoytta. 
\v 32 Aathii wolis keehannee qadhinttizita maaqqoytta. Xooss Kiristtoosa baggar yinttis atto geezay garkk yinttikka wolis atto goytta.\x - \xo 4:32 \xo*\xt Qol. 3:13\xt*\x*
\c 5
\p
\v 1 Yikkee, Xoossii dosiza na7itay garkk eza aazoytta. 
\v 2 Kiristtoosa nuna dosii fana nu gishos Xoossis tonkki gi sawuza imonnee yarshsho udii inggeezay garkk yinttikka siiqor yezoytta.\x - \xo 5:2 \xo*\xt Kes. 29:18; Maz. 40:6\xt*\x*
\p
\v 3 Zini laammo, tunatithinnee uuzetithii ammaniza asayis beezoowa gishos yi gancce ubbarakka si7inttippe. 
\v 4 Xooss galatoyttappe attin yeellathiza bazi boozotith nahshsa woy ari7ee yinttis beezowazay gishos yi gancce ubbarakka yezippe. 
\v 5 Yhaya eroytta; oonkka laame woy tuna baz ootho woy uuzatto Eeqas goynnos tenttetto Kiristtoosa kaatetithinnee Xooss kaatetitha laattodayis danda7ooya.
\p
\v 6 Yhayititaypp denddeezayid Xooss kachchii azazinttowa asayil afa ye7od gishos oonkka yinttan pathoowa odar dooshshippe. 
\v 7 Yey garkk asayir pettipettithii oothipate. 
\v 8 Binii yi dhuma, zin yhatti Goday baggayir poo7o. Yikkee, poo7o as garkk poo7or yedhdhoytta. 
\v 9 Poo7o lo77otith, xillotithinnee tumatith aafiza.
\p
\v 10 Goda ufayssiza abaz oothodayis koyoytta. 
\v 11 Aafe baa dhuma ooso qonccisoyttapp attin ezar maqinttipate. 
\v 12 Unttii geema oothiza oosay hara attozin ododayisikka yeellathiza. 
\v 13 Zini ubba baz poo7ol kezeez wode qonccer benttiza. 
\v 14 Poo7o ubba baz qonccer beeziza. Yeyi gishos,
\q1 «Naati genttizayo barkkoba;
\q2 yhayiqopp denddoba;
\q1 Kiristtoosa nees poo7iza» yeegintteeza.
\p
\v 15 Yikkee, yi wayizii yezizako akaakii bo7oytta. Eccita maaqqoyttapp attin boozita maaqqipatte. 
\v 16 Gallasitay iita maaqqeez gishos layitha wozoytta.\x - \xo 5:16 \xo*\xt Qol. 4:5\xt*\x* 
\v 17 Yeyi gishos, Goday shenay abizako akaakoyttapp attin boozipatte.
\p
\v 18 Geeshsha Ayyanar kumoyttapp attin dhaboko yinttan kaalithiz woyne ushshar mathipate. 
\v 19 Mazmuurer, sabarannee ayyana yethar, pettay pettayir odinttoytta. Ma yi wozinayir mazimuurttaranne sabbittar Goda galatooytta.\x - \xo 5:19-20 \xo*\xt Qol. 3:16-17\xt*\x* 
\v 20 Nu Goda Yesuus Kiristtoosa sunthayir ubba wode Xooss Ada ubbabazis galatooytta.
\p
\v 21 Kiristtoosa bonchchos gi pettay pettayis haarinttoytta.
\s1 Azin baggannee machchii bagga
\p
\v 22 Machchitayyo, Godayis haarinttizay garkk yi azinitayiskka haarinttoytta.\x - \xo 5:22 \xo*\xt Qol. 3:18; 1 Phix. 3:1\xt*\x* 
\v 23 Kiristtoosa woosa keethis kustte maaqqeezay garkk azinayikka fa machchis kustte. Ma Kiristtoosa fa asetithi maaqqeez woosa keethi ashshizaya. 
\v 24 Zini woosa keethay Kiristtoosas haarinttizay garkk machchitay fa azinitayis ubba bazar haarinttodayis beeziza.
\p
\v 25 Azinitayyo, Kiristtoosa woosa keeth dosii I gishos fana inggeezay garkk yinttikka yi machchita dosoytta.\x - \xo 5:25 \xo*\xt Qol. 3:19; 1 Phix. 3:7\xt*\x* 
\v 26 E yeya ootheezay woosa keeth geeshshodayis koyii udeeza, geeshsheezaykka fa qaalay baggar haathar meeccii. 
\v 27 Kiristtoosa woosa keeth qita woy sino tukith woy yey garkkez baz bayth E kunth bonchchor geeshshinnee borinttoozanno udii faako shiishodayis koyii yeya udeeza. 
\v 28 Yey garkkekka, azinttay fana dosizay garkk fa machchita dosodayis beeziza. Fa machchat dosizay fana dosiza. 
\v 29 Fana ixxiza as oonkka baaya, zin Kiristtoosa woosa keethis oothizay garkk fa asetitha muzizannee naagiza. 
\v 30 Nuunii Kiristtoosa asetith billitita.
\p
\v 31 Xooss qaalay, «Yeyi gishos, asii fa adannee fa indato ashshii, fa machchatir wola yessada; unttii nam7itaykka pettii asho maaqqiza» yeegeeza.\x - \xo 5:31 \xo*\xt Medhe. 2:24\xt*\x* 
\v 32 Yhay gita xuura, zin taanii yeya Kiristtoosa baggannee woosa keethi bagga aaziso udii odiza. 
\v 33 Yey garkkekka, yi pettay pettay fa machchato, fana dosizay garkk doso. Machchakka fa azina bonchchodayis beeziza.
\c 6
\s1 Na7itay baggannee yeleezitay bagga
\p
\v 1 Na7itayyo, Goday gisho gi yinttan yeleezitayis azazinttoytta. Yeyi yinttis beeziza bazii.\x - \xo 6:1 \xo*\xt Qol. 3:20\xt*\x* 
\v 2 «Ne adannee ne indato bonchchoba.» Yeyi ufayssa qaala yez tiina azazo.\x - \xo 6:2-3 \xo*\xt Kes. 20:12; Nam7i. 5:16\xt*\x* 
\v 3 «Ne yeya polizabaz maaqqiko ubbay nees hanoda; ne laythaykka sa7all afa aduqqoda.»
\p
\v 4 Yeleezitayo, yi na7ita Goday qaalar tamaarssorannee unttan kaalithor dichchoyttapp attin unttan yilothipatte.\x - \xo 6:4 \xo*\xt Qol. 3:21\xt*\x*
\s1 Goditay baggannee ayllitay bagga
\p
\v 5 Ayllitayyo, Kiristtoosas azazinttizay garkk asho goditayis yashshara, bonchchorannee luule wozinar azazinttoytta.\x - \xo 6:5-8 \xo*\xt Qol. 3:22-25\xt*\x* 
\v 6 Kiristtoosa aylle garkk Xooss shene wozinapp poloyttapp attin galata denggodayis u tiina aadda oothipatte. 
\v 7 Asis baazin Godayis oothizay garkk yi kunth wozinaypp oothoytta. 
\v 8 Aylle maaqqin god maaqqin pettay pettay fa oothiz lo77o oothayis Godaypp woyito ekkodana eriza.
\p
\v 9 Goditayyo, as aafe zoqo bi7ii pirddoowa yinttisinnee unttis Goday, salo yezana yi eriza. Yeyi gishos, yi ayllita maniddiza ashshii unttii yinttis kiitinttizaygarkk yi unttis lo77o baz oothoytta.\x - \xo 6:9 \xo*\xt Qol. 4:1; Nam7i. 10:17; Qol. 3:25\xt*\x*
\s1 Xooss ola massara
\p
\v 10 Yikk yhayppe, Godayranne E damma wolqqayir miinggoytta. 
\v 11 Daabuloosa doosha gamodayis danda7od garkk Xoossii yinttis inggeez ola miishe ubba danccoytta. 
\v 12 Nu olay asar baazin salo yez tuna ayyanitayir olizitayira, mawute aditayir, haarizitayrannee yha dhuma alame wolqqitayra.
\p
\v 13 Yeyi gishos, iita gallasa morkke teqqodayisnnee ubba polii, miinggii eqqinttodayis yi danda7oday garkk Xooss ola miishita ubba danccoytta. 
\v 14 Tuma, xeessal zinnare garkk danccii, xillotith xurure garkk tiral gaddii, 
\v 15 sarotith Wonggile yi toke caamma garkk aathii miinggii eqqoytta.\x - \xo 6:15 \xo*\xt Isa. 11:5; Isa. 59:17; 52:7\xt*\x* 
\v 16 Ye ubbaypp aathii, Xalahe dakkiz laxiz tama dongge ubba to7isodayis danda7iza ammano ubba wode gonddalle garkk aykkoytta. 
\v 17 Xooss atotithana biraata barnneexa garkk yi ommayil gaddoytta; ma Geeshsha Ayyana mashsha, yeykka Xooss qaala aykkoytta.\x - \xo 6:17 \xo*\xt Isa. 59:17\xt*\x* 
\v 18 Woosa ashshipate; yhankkitayiskka guuroytta; ubba wode Ayyanar woossoytta. Ezayid, geeshshitayis azalekkazar miinggii ubba wode woossoytta. \fig Orome wotadaray kunth ola miishe ma77eezaya|alt="Roman soldier in armor" src="LB00196B.tif" size="span" ref="6:18"\fig*
\p
\v 19 Taanii Wonggile xuura yashsha bayith qonccisii ododay garkk Xoossii taas qaala inggod garkk woossoytta. 
\v 20 Taanii yeya oothodayis kiitizayinnee yhattekka achcha yezay ye Wonggilay gishos. Yeyi gishos, taanii yashsha bayth beezizay garkk ododay garkk taas woossoytta.
\s1 Wurssith sarotho
\p
\v 21 Taanii wayizii yezakkonnee ab oothizako yi erod garkk nu siiqo ishay, Goday oosor ammanintteez oosanchchay, Tikiqoosa, ta baz ubba yinttis ododa.\x - \xo 6:21 \xo*\xt Haw. O. 20:4; 2 Xim. 4:12; Qol. 4:7-8\xt*\x* 
\v 22 Nuunii ubbay wayizii yezako yinttis ododay garkkennee yi wozina minthathod garkk taanii eza yinttiko kiiteeza.\x - \xo 6:22 \xo*\xt Medhe. 21:10\xt*\x*
\p
\v 23 Xooss Adaypp, Goda Yesuus Kiristtoosapp sarotithinnee siiqo ammanor wola nu ishitay ubbitayis maaqqo. 
\v 24 Irxxoowa siiqor nu Goda Yesuus Kiristtoosa dosiza ubbayira Xooss aadho keehatithay maaqqo.