\id EZR  
\h ESRA 
\toc1 ESRA 
\toc2 ESRA 
\mt1 ESRA  
\c 1  
\s1 Kurese ena Haheḡani  
\p
\v 1 Kurese, Parasa pavapavana, ena lohia laḡanina gini-gunana ai, Iehova ena hereva Ieremia uduna amo e gwauraia na anina baine vara totona Iehova ese Kurese, Parasa pavapavana, e rohea; bena ia ese haheḡani ta e gwauraia ena basileia idoinai laionai, bona e torea danu.   
\p
\v 2 Haheḡani na binai. Kurese, Parasa pavapavana, na ini e gwau tomamu: Iehova, guba Diravana, ese tanobada basileiadia iboudiai vada e henigu, bona vada e haḡanigu ena dubu auta baina haginia Ierusalem ai, Iuda tanona ai.  
\v 3 Daika daika umui bogaragimui ai na iena bese tauna, Iehova, ia ena Dirava, ese baine bamoa. Ia na Ierusalem, Iuda tanona ai, baine dae lao, Iehova, Israel Diravana, ena dubu baine haginia lou. Ia na Ierusalem ai e nohomu Diravana.  
\v 4 Bona edena gabu edena gabu ai doini e noho hedoamu taudia ta ta na unu e nohomu gabudia taudia ese bae durudia, \it silver\it* bona \it gold\it* bona kohu bona ubu-ubu ḡaudia bae henidia, bona lalo-namo herahiadia danu, Dirava ena dubu Ierusalem ai ena.   
\s1 Ierusalem ilou-henina  
\p
\v 5 Bena Iuda bona Beniamina iduhu kwaradia na e tore isi, bona hahelaḡa taudia bona Levi taudia danu, Dirava ese vada e rohedia taudia iboudiai, Iehova ena dubu Ierusalem ai bae haginia lou totona;  
\v 6 bona dekedia taudia iboudiai ese \it silver\it* ḡaudia bona \it gold\it* bona kohu bona ubu-ubu ḡaudia bona dava-bada ḡaudia na e henidia, mai edia lalo-namo herahiadia iboudiai ida.  
\v 7 Hanua pavapavana Kurese ese danu Iehova ena dubu kohudia, Nebukadnesara ese Ierusalem amo e laohai bona ena dirava edia dubu ai e ato ḡaudia, na e abidia lasi.  
\v 8 Kurese, Parasa pavapavana, ese e abidia lasi, moni inarina tauna Mitredata imana ai e atodia; bena una tau ese e hagaudia, Iuda lohiana Sesebasara e henia.  
\v 9 Ihagaudia bini: \it gold\it* naudia toi-ahui, \it silver\it* naudia daha-ta, kaia ruahui taurahani-ta,  
\v 10 \it gold\it* kibokibodia toi-ahui, \it silver\it* kibokibodia idaudia sinahu-hani gwauta, bona ma ḡau idau-idau daha-ta danu.  
\v 11 \it Gold\it* bona \it silver\it* ḡaudia iboudiai na daha-ima sinahu-hani. Ini iboudiai na Sesebasara ese e daelaidia, e laohaidia idau gabu ai e hanohodia taudia na Babulono amo Ierusalem e hakaudia dae lao negana ai.   
\c 2  
\s1 E lou taudia ladadia  
\p
\v 1 Iuda tanona taudia bini, Nebukadnesara, Babulono pavapavana, ese vada e abidia mauri, Babulono tanona vada e laohaidia, bena edia noho-hedoa amo ma e dae lao. Idia na Ierusalem bona Iuda e lou lao, ta ta ena hanua ena hanua ela.  
\v 2 Idia na Serubabele bona lesua bona Nehemia bona Seraia bona Reelaia bona Morodekai bona Bilsan bona Mispara bona Bigvai bona Rehumu bona Baanaha ida ela.  
\p Israel tataudia ihagaudia binai:  
\v 3 Paroso garana, daha-rua sinahu-ta hitu-ahui rua;  
\v 4 Sefatia garana, sinahu-toi hitu-ahui rua;  
\v 5 Ara garana, sinahu-hitu hitu-ahui ima;  
\v 6 Pahatamoab garana (unu na Iesua bona Ioab garadia), daha-rua sinahu-taurahani gwauta-rua;  
\v 7 Elam garana, daha-ta sinahu-rua imahui hani;  
\v 8 Satu garana, sinahu-taurahanita hari-ahui ima;  
\v 9 Sakai garana, sinahu-hitu tauratoi-ahui;  
\v 10 Bani garana, sinahu-tauratoi hari-ahui rua;  
\v 11 Bebai garana, sinahu-tauratoi ruahui toi;  
\v 12 Asgada garana, daha-ta sinahu-rua ruahui rua;  
\v 13 Adonikama garana, sinahu-tauratoi tauratoi-ahui tauratoi;  
\v 14 Bigvai garana, daha-rua imahui tauratoi;  
\v 15 Adini garana, sinahu-hani imahui hani;  
\v 16 Atere garana (unu na Hesekia garana), taurahanita-ahui taurahani;  
\v 17 Besai garana, sinahu-toi ruahui toi;  
\v 18 Iora garana, sinahu-ta gwauta-rua;  
\v 19 Hasumu garana, sinahu-rua ruahui toi;  
\v 20 Gibara garana, taurahanita-ahui ima;  
\v 21 Betelehem garana, sinahu-ta ruahui toi;  
\v 22 Netofa taudia, imahui tauratoi;  
\v 23 Anatoto taudia, sinahu-ta ruahui taurahani;  
\v 24 Asamavete taudia, hari-ahui rua;  
\v 25 Kiriat-arimi bona Kefira bona Beroto taudia, sinahu-hitu hari-ahui toi;  
\v 26 Rama bona Geba taudia, sinahu-tauratoi ruahui ta;  
\v 27 Mikma taudia, sinahu-ta ruahui rua;  
\v 28 Betele bona Ai taudia, sinahu-rua ruahui toi;  
\v 29 Nebo taudia, imahui rua;  
\v 30 Magabisi taudia, sinahu-ta imahui tauratoi;  
\v 31 Elam ma ta taudia, daha-ta sinahu-rua imahui hani;  
\v 32 Harimi taudia, sinahu-toi ruahui;  
\v 33 Lod bona Hadidi bona Ono taudia, sinahu-hitu ruahui ima;  
\v 34 Ieriko taudia, sinahu-toi hari-ahui ima;  
\v 35 Senaha taudia, daha-toi sinahu-tuaratoi toiahui.   
\p
\v 36 Hahelaḡa taudia: Iedaia (Iesua ena iduhu tauna) garana, sinahu-taurahanita hitu-ahui toi;  
\v 37 Imere garana, daha-ta imahui rua;  
\v 38 Pasahuru garana, daha-ta sinahu-rua hari-ahui hitu;  
\v 39 Harimi garana, daha-ta gwauta-hitu.   
\p
\v 40 Levi taudia: lesua bona Kadmiele garadia (idia na Hodavia garana), hituahui hani.   
\p
\v 41 Ane-abi taudia: Asaf garana, sinahu-ta ruahui taurahani.   
\p
\v 42 Ikoukou igimadia taudia garadia: Salumu garana, Atere garana, Talmon garana, Akubu garana, Hatita garana, Sobai garana. Iboudiai na sinahu-ta toi-ahui taurahani-ta.   
\p
\v 43 Dubu ena hesiai taudia: Siha garana, Hasufa garana, Tabaoto garana,  
\v 44 Kero garana, Siaha garana, Padono garana,  
\v 45 Lebana garana, Hagabaha garana, Akubu garana,  
\v 46 Hagaba garana, Samalai garana, Hanana garana,  
\v 47 Gidele garana, Gahara garana, Re-aia garana,  
\v 48 Resini garana, Nekoda garana, Gasama garana,  
\v 49 Usa garana, Pasea garana, Besai garana,  
\v 50 Asna garana, Meunimi garana, Nefisimi garana,  
\v 51 Bakabuku garana, Hakufa garana, Harahuru garana,  
\v 52 Basalutu garana, Mehida garana, Harasa garana,  
\v 53 Barako garana, Sisera garana, Tema garana,  
\v 54 Nesia garana bona Hatifa garana.   
\p
\v 55 Solomon ena hesiai taudia garadia: Sotai garana, Hasoferete garana, Peruda garana,  
\v 56 Iaala garana, Darakono garana, Gidele garana,  
\v 57 Sefatia garana, Hatili garana, Pokerete-hasabaimi garana bona Ami garana.   
\p
\v 58 Dubu ena hesiai taudia iboudiai bona Solomon ena hesiai taudia garadia na sinahu-toi taurahanita-ahui rua.   
\p
\v 59 Ini na Tele-mela bona Tele-harasa bona Kerubu bona Adana bona Imere amo ema taudia, a edia iduhu bona senedia ladadia ihamomokanidia asi dibadia, idia na Israel besena eiava lasi:  
\v 60 Delaia garana, Tobia garana bona Nekoda garana, sinahu-tauratoi imahui rua.  
\v 61 Hahelaga taudia garadia danu: Habaia garana, Hakoso garana, Barasilai garana (una tau ese Barasilai tau Gilead natuna hahinedia ta e adavaia, bena idia ladadia ta ai e henemai).  
\v 62 Unu na ladadia e tahu, uru ladadia bukadia ai, to asie davaridia; una dainai hahelaḡa dagina amo e atodia tabe, idia na dia ḡoḡoeva dainai.  
\v 63 Hanua lohiana ese e hamaorodia, idia na aniani helaḡa-hereana basie ania, ela bona hahelaḡa tauna ta ese Urim bona Tumim\f + \fr 2:63 \ft Urim bona Tumim. Esodo 28, s. 30 ba itaia.\f* ediai baine henanadai.   
\p
\v 64 Hegogo idoinai be taunimanima gerebu-hani daha-rua sinahu-toi tauratoi-ahui;\f + \fr 2:64 \ft Gerebu-hani daha-rua sinahu-toi tauratoi-ahui = 42,360.\f*  
\v 65 bona edia hesiai tataudia bona hahinedia danu daha-hitu sinahu-toi toi-ahui hitu; edia ane-abi tataudia bona hahinedia danu na sinahu-rua.  
\v 66 Edia hosi na sinahu-hitu toi-ahui tauratoi; edia doniki badadia na sinahu-rua hari-ahui ima;  
\v 67 edia kamelo na sinahu-hani toi-ahui ima; bona edia doniki maraḡidia na daha-tauratoi sinahu-hitu ruahui.   
\p
\v 68 Iehova ena dubu Ierusalem ai e kau negana ai, iduhu kwaradia haida ese lalo-namo herahiadia e heni, Dirava ena dubu ena, gabuna korikorina ai baine gini helaoreana.  
\v 69 Edia taḡa heḡereḡerena idia ese una ḡaukara idurulaina monina e heni, \it gold\it* darikidia gerebu-tauratoi daha-ta, bona \it silver\it* minadia\f + \fr 2:69 \ft “Dariki” bona “mina” na Parasa taudia edia moni ladadia. Ini \fk gold\ft bona \fk silver\ft monidia iboudiai na reana K200,000 sisivana.\f* daha-ima, bona hahelaḡa taudia edia hahedoki sinahu-ta.   
\p
\v 70 Hahelaḡa taudia bona Levi taudia bona taunimanima haida na Ierusalem ai bona hetabira tanodia ai e nohova; ane-abi taudia bona ikoukou igimadia taudia bona dubu ena hesiai taudia na edia hanua lalodiai e nohova. Israel taudia iboudiai danu edia hanua lalodiai e nohova.   
\c 3  
\s1 Ḡuriḡuri karadia e hagini lou  
\p
\v 1 Hua ihahituna e kau negana ai, Israel taudia na hanua lalodiai e nohova. Bena taunimanima na Ierusalem ela, e hegogo hebou, tau tamona na heto.  
\v 2 Bena Iesua Iosadak, mai bamona hahelaḡa taudia ida, bona Serubabele Sealtiele, mai varavarana ida, e tore isi, Israel Diravana ena ihaboulaina patana e larebaia, ḡole-oho boubou ḡaudia na ia latanai bae hahelaḡadia totona, Dirava ena tau Mose ena taravatu ai e torea heḡereḡerena.  
\v 3 Ihaboulaina patana na ena gabu ai e haginia, badina be gari ese e butudia tao, unu tano taudia daidiai; bena ḡole-oho boubou ḡaudia na ia latanai e hahelaḡadia Iehova ena, daba ai bona adorahi ai.  
\v 4 Bona kalaga ariana e karaia, e torea heḡereḡerena, bona dina ta ta amo ḡole-oho boubou ḡaudia hahidaosi e hahelaḡadia, taravatu ese dina ta ta ahudia e gwaurai heḡereḡerena.  
\v 5 Una murinai idia ese ḡole-oho boubou ḡaudia e hahelaḡadia loulouva, hua matamata bouboudia bona Iehova ena aria negadia korikoridia bouboudia, bona ta ta edia lalo-namo bouboudia, Iehova e heni ḡaudia, iboudiai danu.  
\v 6 Hua ihahituna dinana gini-gunana ai idia ese ḡole-oho boubou ḡaudia e hahelaḡadia matama, Iehova ena. A Iehova ena dubu badina na do asie hadaia.  
\v 7 Taunabunai, idia ese nadi iḡaukaralaidia taudia bona kamuta taudia na moni e henidia; bona aniani bona inuinu ḡaudia bona dehoro na Sidono bona Turo taudia e henidia, sida audia na Lebanon amo bae lasilaidia kone ai bona lopa ai bae atodia na davana, Kurese, Parasa pavapavana, ena gwau-maoro heḡereḡerena.   
\s1 Dubu ihagini-louna e matamaia  
\p
\v 8 Dirava ena dubu Ierusalem ai e lou henia laḡanina iharuana huana iharuana lalonai, Serubabele Sealtiele bona lesua losadak na e ḡaukara matama, tadikakadia oredia, hahelaḡa taudia bona Levi taudia, bona abi-mauri amo Ierusalem vada e lou henia taudia iboudiai ida. Idia ese laḡani ruahui vada e hanai taudia Levi oreana lalonai e duanaidia, idia ese Iehova ena dubu ḡaukarana bae itaia tao.  
\v 9 Bena Iesua, mai natuna bona varavarana ida, bona Kadmiele mai natuna, Iuda vevena taudia, ida, ese Dirava ena dubu ai e ḡaukarava taudia na e itadia tao hebou, Henadab natuna bona Levi taudia mai natudia bona varavaradia ida.   
\p
\v 10 Ruma-hagini taudia ese Iehova ena dubu badina e hadaia negana ai, hahelaḡa taudia ese edia dabua helaḡadia e hahedokilai, bena mai kibidia ida e raka kahira, bona Levi taudia, Asaf garana, mai edia botabota auridia ida, e raka ela, Iehova ihanamolaina totona, David, Israel pavapavana, ena haheḡani heḡereḡerena.  
\v 11 Bena ane e abi hadava-hadava, Iehova e imodaia bona e hahenamo henia, eto,  
\q1 Badina be ia na namo;  
\q1 Badina be ena hebogahisi e hesiriu hanaihanaimu, Israel enai.  
\m Bena Iehova e hanamoa negana ai, taunimanima iboudiai na e lolo mai gao badadia ida, Iehova ena dubu badina vada e hadaia dainai.  
\v 12 A hahelaḡa taudia bona Levi taudia bona iduhu kwaradia loḡora, tau burukadia, dubu gunana e itaia taudia na e tai lolololo, ina dubu badina e hadaia e itaia negana ai; a hutuma na moale dainai e lolo badabada.  
\v 13 Taunabunai, taunimanima asie diba maoro dahaka reḡe, moale eiava taunimanima edia taitai reḡedia; badina be taunimanima na e lolo badabada, bona reḡena na dauhai danu e kamonaiva.   
\c 4  
\s1 Iuda taudia inaidla ese ḡaukara e laoa ahu  
\p
\v 1 A Iuda bona Beniamina taudia inaidia na e kamonai hari noho-hedoa amo vada e lou mai taudia ese Iehova, Israel Diravana, ena dubu e haginiava;  
\v 2 bena idia ese Serubabele bona iduhu kwaradia dekedia ela, e hereva henidia, eto, Mani emui kara ai na umui ida dubu baita haginia hebou; badina be ai ese emui Dirava a toma henia dihomu, umui heḡereḡeremui, bona a bouamu danu, Esarahadon, Asuria pavapavana, ese e mailaimai bona ina gabu ai e hanohomai negana amo ema bona harihari.  
\v 3 A Serubabele bona lesua bona iduhu lohiadia oredia Israel ai ese e haere henidia, eto, Umui na asi emui ḡaukara ai emai ai, emai Dirava ena dubu ihaginina ai; a ai sibomai ese baia haginia, Iehova, Israel Diravana, ena, King Kurese, Parasa pavapavana, vada e haḡanimai heḡereḡerena.   
\p
\v 4 Bena tano taudia ese Iuda taudia lalodia e ani bona e hagaridia, una ḡaukara ai;  
\v 5 bona hahealo taudia haida davadia e kara, edia ura ḡaukarana bae laoa ahu, Kurese, Parasa pavapavana, ena dina iboudiai, ela bona Darauese, Parasa pavapavana, ena lohia negana.   
\p
\v 6 Bena Ahasuero e lohia matama negana ai, idia ese hahebade pepana e torea, Iuda bona Ierusalem inoholaidia taudia ihahebadelaidia.   
\p
\v 7 Aratasasta e lohiava negana ai, Bisilama bona Mitredata bona Tabele mai bamodia oredia ida ese Aratasasta, Parasa pavapavana, e tore henia. Edia revareva be Aram revarevadia bona gadona amo e torea.  
\v 8 Rehumu, tuari oreana biaguna, bona Simisai, itorena tauna, ese Ierusalem ihadikana revarevana ta na King Aratasasta e tore henia.  
\v 9 Rehumu, tuan oreana biaguna, bona Simisai, itorena tauna, mai bamodia oredia ida, hahemaoro taudia, lohia taudia, heitatao taudia, bona Parasa bona Ereke bona Babulono bona Susa taudia (unu na Elam taudia),  
\v 10 bona lohia badana bona herea-daena Osonopara ese e laohaidia Samaria hanuadia bona Sinavai Badana unukahana basileiana orena lalodiai e hanohodia besedia oredia, ese revareva e torea.  
\v 11 E siaia revarevana lalonai e tore herevadia bini:  
\p Revareva King Aratasasta ena: Emu hesiai taudia, Sinavai Badana inikahana basileiana ai e nohomu taumai, ese a hahenamo henimuimu.  
\v 12 Harihari oi, pavapava taumu, ba diba, hari Iuda taudia oiemu amo dekemai ema na Ierusalem vada ela. Idia ese una daḡedaḡe bona kara dika hanuana ma e haginia loumu; maḡu na be ha-oreamu, bona ruma badidia e banidia.  
\v 13 Oi pavapava taumu ba diba, ina hanua na bema haginia lou bona maguna bema ha-orea, bena idia ese heaiva eiava kohu davadia eiava \it tax\it* basie heni, bena oi pavapava taumu emu taḡa na baine maraḡi.  
\v 14 Ai ese pavapava ena ruma damenana a animu dainai, dia namo ai ese hanua pavapavana ihahemaraina baia itaia; taunabunai ina hereva a siaia vasimu, oi pavapava taumu ihadibamu,  
\v 15 bena senemu sisigadia bukana ai bae hetahu. Una sisiga bukana ai ba davaria bona ba diba, ina hanua na daḡedaḡe hanuana, pavapava bona basileia ihadikadia ḡauna. Nega gunadia amo taravatu idadaraina karadia vada e tubu ia lalonai; una dainai ina hanua na e habuaia tari.  
\v 16 Oi pavapava taumu a hadibamumu, ina hanua bema gini lou bona maḡuna bema ore negana ai, oi na asi emu ḡau ta, Sinavai Badana inikahana basileiana idoinai lalonai.   
\p
\v 17 Hanua pavapavana ese ena haere e siaia. Haere na binai:  
\p Revareva Rehumu, tuari oreana biaguna, bona Simisai, itorena tauna, mai bamodia oredia Samaria bona Sinavai Badana enekahana basileiana orena lalodiai e nohomu edia: Na hahenamo henimuimu.  
\v 18 Dekemai o siaia mai revarevana na vairagu ai vada e duahia hedinarai.  
\v 19 Bena na hahedua, bena vada e hetahu; vada e davaria una hanua ese nega gunadia amo hanua pavapavadia vada e tuari henidia, bona ia lalonai daḡedaḡe bona taravatu idadaraina karadia vada e kara.  
\v 20 Pavapava herea-daedia ese Ierusalem vada e lohiaia; Sinavai Badana enekahana basileiana idoinai ese heaiva bona kohu davadia bona \it tax\it* na idia e henidia.  
\v 21 Taunabunai ba hahedua, unu tatau ese edia ḡaukara bae hadokoa, bona hanua na basie haginia lou, ela bona lau ese hahedua herevana ta ma baina gwauraia.  
\v 22 Nahuamui ba toho, ina kara ai basio manoka. Anina be dahaka ina hekwakwanai ḡauna na baine tubu badabada, hanua pavapavana ihadikalaina.   
\p
\v 23 King Aratasasta ena revareva herevadia na Rehumu bona itorena tauna Simisai mai bamodia ida vairadiai e duahi hedinarai; bena idia na Iuda taudia Ierusalem ai dekedia ela haraḡa, bona mai goadadia bona mai siahudia ida edia ḡaukara ai e hadokodia.  
\v 24 Bena Dirava ena dubu Ierusalem ai iḡaukaralaina e doko vaitani, ela bona Darauese, Parasa pavapavana, ena lohia laḡanina iharuana.   
\c 5  
\s1 Dubu e haginia lou  
\p
\v 1 Peroveta taudia Hagai bona Sekaria Ido ese Iuda taudia, Iuda ai bona Ierusalem ai, e haroro henidia, Israel Diravana, idia e biagudia Diravana, ladana ai.  
\v 2 Bena Serubabele Sealtiele bona lesua losadak na e tore isi, Dirava ena dubu Ierusalem ai ihagini-louna e matamaia; Dirava ena peroveta taudia na idia ida, e durudiava.   
\p
\v 3 Una negana ai, Tatenai, Sinavai Badana unukahana basileiana lohiana, bona Setara-bosenai, mai bamodia ida, na idia dekediai e kau, e hereva henidia, eto, Daika ese hahedua e henimui, ina dubu ba haginia lou bona maḡuna ba ha-ahua?  
\v 4 Ma e nanadaidia, eto, Ina ruma e haginiamu taudia ladadia be daidia?  
\v 5 A Iuda tau-badadia na edia Dirava ese e raraidia tao, bena asie hadokodia, ela bona harina na Darauese enai baine kau, bena iena haere na revareva amo bae davaria.   
\p
\v 6 Tatenai, Sinavai Badana unukahana basileiana lohiana, bona Setara-bosenai mai bamona, lohia haida Sinavai Badana unukahana basileiana ai e nohova taudia, ida edia revareva, King Darauese enai e siaia ḡauna, herevadia bini.  
\v 7 Idia ese sivarai e torea, ia dekena e siaia, eto:  
\p Revareva King Darauese ena: maino idoinai avabia.  
\v 8 Pavapava taumu vada ba diba, ai na Iuda basileiana ala, Dirava badana ena dubu enai. Ia na nadi bada-hereadia amo e haginia bona au na haba ai heheato; ina ḡaukara na e goadalaiamu, bona idia imadia ai anina e varamu.  
\v 9 Bena ai ese unu tau-badadia na ini a nanadaidia toma, ato, Daika ese hahedua e henimui, ina dubu ba haginia bona maḡuna ba ha-ahua?  
\v 10 Bena ladadia a henanadailai, oi ihadibalaimu, idia ikwaradia taudia ladadia baia tore ato.  
\v 11 Bena idia ese e haere henimai, eto, Ai na guba bona tanobada Diravana ena hesiai taudia, bona laḡani momo vada e lao bubuni Israel pavapavana badana ta ese e haginia bona e ha-orea dubuna na ai ese ma a haginia loumu.  
\v 12 A senemai ese guba Diravana e habadua dainai, ia ese Nebukadnesara, Babulono pavapavana, tau Kaldea, imana ai e atodia; bena una tau ese ina dubu e ḡiḡia dobi, bona taunimanima na Babulono kahana e laohaidia.  
\v 13 Ḡau tamona, Kurese, Babulono pavapavana, ena lohia laḡanina ginigunana ai, hanua pavapavana ese hahedua herevana e gwauraia, ina Dirava ena dubu baia haginia lou eto.  
\v 14 Bona \it gold\it* bona \it silver\it* gaudia, una Dirava ena dubu kohudia, Nebukadnesara ese Ierusalem dubuna amo vada e abi lasi bona Babulono dubuna ai vada e vareailai ḡaudia, na King Kurese ese Babulono dubuna amo e abi lasi, tau ta ladana Sesebasara e henia. Ia ese una tau na lohia tauna ai e halaoa;  
\v 15 bona e hamaoroa, eto, Ini ḡau avabidia, baola, Ierusalem dubuna lalonai ma bavatodia; bona Dirava ena dubu na gabuna korikori ai ma bae haginia lou.  
\v 16 Bena hari Sesebasara na ema, bona Dirava ena dubu Ierusalem ai badina e hadai. Bena una negana ema bona hari, ihaginina vada a ḡaukaralaia, to do se ore.  
\v 17 Taunabunai, hanua pavapavana lalona bema heḡereḡere, pavapava edia pepa e haboumu rumadia Babulono ai lalodiai bae hetahu, bae diba, King Kurese ese hahedua pepana ta e karaia, ina Dirava ena dubu Ierusalem ai ihagini-louna e hahedualaia eiava lasi. Bena hanua pavapavana ese ena ura baine hadibalaimai ina kara ai.   
\c 6  
\p
\v 1 Bena King Darauese e hahedua; bena Babulono tanona ai e hetahu, basileia pepadia e habou rumadia lalodiai.  
\v 2 Bena Ekebatana, Media basileiana ena hanua badana, Ialonai pepa ta e davaria; una pepa ai e tore herevadia bini:  
\p Sivarai ta.  
\v 3 King Kurese ena lohia laḡanina gini-gunana lalonai, King Kurese ese hahedua herevana ta e gwauraia, eto, Dirava ena dubu Ierusalem ai herevana binai: dubu na bae haginia lou, boubou ḡaudia e hahelaḡadiamu bona ḡole-oho boubou gaudia e laohaidiamu gabuna; harana latana na kiubit tauratoi-ahui bona lababana danu kiubit tauratoi-ahui, unu bae haginia toma.  
\v 4 Nadi ere toi bona au ere ta bae kara. Davana na pavapava ena moni amo ba heni.  
\v 5 Ina danu, Dirava ena dubu ena \it gold\it* bona \it silver\it* ḡaudia Nebukadnesara ese Ierusalem dubuna lalona amo e abi bona Babulono e mailai ḡaudia, na bae heni lou, Ierusalem dubuna bae laohai, bena ta ta ena gabu ena gabu ai ma bae ato lou. Dirava ena dubu lalonai bavatodia.   
\p
\v 6 Taunabunai, Tatenai, Sinavai Badana enekahana basileiana lohiana, bona Setara-bosenai, mai bamomui Sinavai Badana enekahana ai e nohomu lohiadia ida, umui na dauhai a noho.  
\v 7 Hari Dirava ena dubu ḡaukarana aine hekara; Iuda lohiadia bona tau-badadia ese hari Dirava ena dubu na gabuna korikorina ai bae haginia.  
\v 8 Ina danu na haganimuimu, ene Iuda tau-badadia na ini ba durudia toma, hari Dirava ena dubu ihagini-louna ai: davana idoinai na ene tatau ba henidia ḡuḡuru haraḡa, pavapava ena moni, hari Sinavai Badana enekahana basileiana ena heaiva ḡauna, amo.  
\v 9 Bona dahaka ai e dabumu, boromakau natudia mamaruanedia eiava mamoe mamaruanedia eiava hahinedia, ḡole-oho boubou ḡaudia guba Diravana iboulaina; bona uit bona damena bona vine ranuna bona dehoro, hahelaḡa taudia Ierusalem ai edia dabu heḡereḡeredia, na dina ta ta amo ba henidia, basio reaia;  
\v 10 bena idia ese boubou ḡaudia namodia na bae hahelaḡadia guba Diravana ena, bona bae guriḡuri, hanua pavapavana mai natuna ida edia mauri daidiai.  
\v 11 Lau na haheduamu danu, tau ta ese ina haheḡani bema ha-idaua, bena au ta iena ruma amo bae raḡaia, bona una tau na una au ai bae gwadaia uru, bena ena ruma na boromakau taḡena ihabouna gabuna ai bae halaoa.  
\v 12 Ina hereva baine ha-idaua, eiava hari Dirava ena dubu Ierusalem ai baine ḡigia dobi, pavapavana eiava besena na una gabu ai ladana vada e hanohoa Diravana ese baine hadarerea. Lau Darauese na haheduamu; ba karaia balaheni.   
\p
\v 13 Bena King Darauese ese e siaia herevana heḡereḡerena, Tatenai, Sinavai Badana unukahana basileiana lohiana, bona Setara-bosenai, mai bamodia ida, ese King Darauese ena hahedua ḡaudia na e karadia balaheni.  
\v 14 Bena Iuda tau-badadia ese dubu e haginia, bona edia ḡaukara anina e tubu, peroveta tauna Hagai bona Sekaria Ido edia haroro herevadia daidiai. Dubu ihaginina e haḡugurua, Israel Diravana ena haheḡani bona Kurese bona Darauese bona Aratasasta, Parasa pavapavadia, edia hahedua daidiai.  
\v 15 King Darauese ena lohia laḡanina ihatauratoina ai, hua ladana Adara ena dina ihatoina ai, una dubu e haḡuḡurua.   
\p
\v 16 Bena Israel taudia, hahelaḡa taudia bona Levi taudia bona noho-hedoa amo vada e lou taudia oredia, ese hari Dirava ena dubu ihahelaḡana karadia e kara, mai moaledia ida.  
\v 17 Idia ese boromakau mamaruanedia sinahu-ta bona mamoe mamaruanedia sinahu-rua bona mamoe natudia sinahu-hani na boubou ḡaudia ai e halaodia, hari Dirava ena dubu ihahelagana totona; bona nani mamaruanedia gwauta-rua e hahelaḡadia Israel idoinai ena kara dika boubouna ḡaudia, Israel ena iduhu gwauta-ruaosi ihaheḡereḡeredia.  
\v 18 Bena hahelaḡa taudia e hididia, edia orea ta ta ai, bona Levi taudia danu unu e karadia toma, Ierusalem ai, Dirava isiaina ilaohenina totona, Mose ena buka ai e hetore heḡereḡerena.   
\p
\v 19 Hua gini-gunana dinana ihagwauta-hanina ai, hari noho-hedoa amo e lou taudia ese lagau-hanai ariana e karaia.  
\v 20 Badina be hahelaḡa taudia bona Levi taudia na sibodia vada e hahegoeva hebou; idia iboudiai na goḡoeva-ḡoḡoeva. Taunabunai idia ese lagau-hanai mamoedia e ala mase, noho-hedoa amo e lou taudia iboudiai edia, bona bamodia hahelaḡa taudia edia, bona idia sibodia edia.  
\v 21 Israel taudia noho-hedoa amo vada e lou ese e ani, bona idia ida e hebou bona una tano taudia edia kara mirodia vada e rakatani, Iehova, Israel Diravana, bae toma henia diho totona, taudia iboudiai danu.  
\v 22 Dina hitu lalodiai idia ese se hatubua flaoana ariana e karaia, mai moaledia ida, badina be Iehova ese vada e hamoaledia, bona Asuria pavapavana lalona vada e haloua idia ediai, taunabunai ia ese Dirava, Israel Diravana, ena dubu iḡaukaralaina ai e durudia.   
\c 7  
\s1 Esera mai ena orea ida Ierusalem ai e kau  
\p
\v 1 Una murinai, Aratasasta, Parasa pavapavana, e lohiava negana ai, Esera na e dae lao. Una Esera na Seraia natuna, Seraia na Asaria natuna, Asaria na Hilkia natuna,  
\v 2 Hilkia na Salumu natuna, Salumu na Sadok natuna, Sadok na Ahitubu natuna,  
\v 3 Ahitubu na Amaria natuna, Amaria na Asaria natuna, Asaria na Meraioto natuna,  
\v 4 Meraioto na Serahia natuna, Serahia na Usisi natuna, Usisi na Buki natuna,  
\v 5 Buki na Abisua natuna, Abisua na Fineha natuna, Fineha na Eleasara natuna, Eleasara na Aaron, hahelaḡa tauna badana, natuna.  
\v 6 Hari Esera na Babulono amo e dae lao. Ia be itorena tauna ta, Mose ena taravatu, Iehova, Israel Diravana, ese e heni ḡauna, dibana herea. Hanua pavapavana ese iena ura idoinai e henia, badina be Iehova, ena Dirava, imana na ia latanai.   
\p
\v 7 Bena King Aratasasta ena lohia laḡanina ihahituna ai, Israel taudia haida danu Ierusalem e dae lao, bona hahelaḡa taudia bona Levi taudia haida, bona ane-abi taudia bona ikoukou igimadia taudia, bona gabu helaḡana ena hesiai taudia.  
\v 8 Ia be hua iha-imana lalonai Ierusalem ai e kau, hanua pavapavana ena lohia laḡanina ihahituna ai.  
\v 9 Badina be hua gini-gunana dinana gini-gunana ai ia na Babulono tanona amo e dae lao matama, bona hua iha-imana dinana gini-gunana ai Ierusalem ai e kau, badina be ena Dirava imana namona na ia latanai.  
\v 10 Badina be Esera ese lalona vada e hadaia, ia ese Iehova ena taravatu baine haeroa bona karana baine karaia, bona ena taravatu bona ena hahedua herevadia na Israel ai baine hahedibalai.   
\p
\v 11 King Aratasasta ese revareva ta Esera, hahelaḡa tauna bona itorena tauna, Iehova ena haheḡani bona ena taravatu Israel latanai mai dibana tauna, e henia. E henia revarevana herevadia bini:   
\p
\v 12 Aratasasta, pavapava edia pavapava, vada e torea revarevana, hahelaḡa tauna Esera, guba Diravana ena taravatu itorena tauna, enai.  
\v 13 Lau vada na hahedua, Israel taudia eiava edia hahelaḡa taudia eiava Levi taudia egu basileia lalonai daika daika ena urakwalimu dainai Ierusalem lao e uramu na oi ida baola.  
\v 14 Badina be hanua pavapavana mai ena hahealo taudia hahituosi ese vada e siaimumu, Iuda bona Ierusalem henanadaidia ba kara, emu Dirava ena taravatu, oi imamu ai e miamu ḡauna heḡereḡerena;  
\v 15 bona hanua pavapavana mai ena hahealo taudia ida edia herahia ḡaudia, \it silver\it* bona \it gold\it*, idia ese Israel Diravana, Ierusalem ai e nohomu, vada e henia ḡaudia na oi ese ba laohai;  
\v 16 bona \it silver\it* bona \it gold\it* idoinai, Babulon tanona iboudiai ba davari gaudia, bona taunimanima bona hahelaḡa taudia edia herahia gaudia, mai lalo-namodia ida vada e gwaurai hamata edia Dirava, Ierusalem ai e nohomu Diravana, ena dubu ena.  
\v 17 Taunabunai, ina moni ba gaukaralaia balaheni, boromakau mamaruanedia bona mamoe mamaruanedia bona mamoe natudia, mai edia flaoa boubouna ḡaudia bona inuinu boubouna ḡaudia ida, na ba hoi, bena emui Dirava ena dubu ena ihaboulaina patana Ierusalem ai latanai ba hahelaḡadia.  
\v 18 Bena \it silver\it* bona \it gold\it* oredia na oi mai tadikakamu ida emui lalo-hadai bona emui Dirava ena ena ura heḡereḡeredia ai ba gaukaralai.  
\v 19 Hari emu Dirava ena dubu gaukaradia ikaralaidia ḡaudia vada a henimui na ba laohai, Ierusalem Diravana vairanai bavato.  
\v 20 Bona dahaka ḡau dahaka ḡau ai o dabumu, emu Dirava ena dubu ena, bavabi, bena hanua pavapavana ena moni amo davadia do ba kara.   
\p
\v 21 Ina danu, lau King Aratasasta ese moni inarina taudia iboudiai Sinavai Badana unukahana basileiana lalonai, na haḡanimuimu: dahaka dahaka hahelaḡa tauna Esera, guba Diravana ena taravatu itorena tauna, ese emui ai baine gwaurai, vada ba kara balaheni,  
\v 22 ela bona \it silver talent\it* sinahu-ta bona uit koro\f + \fr 7:22 \ft “Talent” bona “koro” bona “bata” na Heberu taudia edia hahetoho ḡaudia haida.\f* sinahu-ta bona vine ranuna bata sinahu-ta bona damena asi hahetohona.  
\v 23 Dahaka dahaka guba Diravana ese baine haganilai, vada ba kara ḡuguru, guba Diravana ena dubu ena, iena badu na hanua pavapavana mai natuna ida edia basileia latanai baine kau na garina.  
\v 24 Ai na a hadibamuimu danu, hahelaḡa taudia, eiava Levi taudia, eiava ane-abi taudia, eiava ikoukou igimadia taudia, eiava gabu helaḡana ena hesiai taudia, eiava hari Dirava ena dubu ena hesiai taudia haida, na ta ena amo heaiva monidia eiava kohu davadia eiava \it tax\it* monidia basio abi.   
\p
\v 25 Oi danu, Esera e, emu Dirava ena aonega, imamu ai e miamu ḡauna, heḡereḡerena ai, hahemaoro taudia maraḡidia bona badadia ba duanaidia; idia ese Sinavai Badana unukahana basileiana taudia. emu Dirava ena taravatu mai dibadia taudia, iboudiai na bae hahemaoro henidia. A asi dibadia taudia ba hadibadia.  
\v 26 Daika ese emu Dirava ena taravatu bona hanua pavapavana ena taravatu basine badinaia, hahemaoro aukana na ia latanai bae karaia, bena baine mase, eiava tano amo baine raka oho, eiava ena kohu bae heabi oho, eiava dibura rumana ai baine hekou ahu.   
\p
\v 27 Iehova, ita seneda edia Dirava, aita hanamoa, badina be ia ese kara unuhetomana na hanua pavapavana lalona ai e havaraia, Iehova ena dubu Ierusalem ai ihahairaina;  
\v 28 ia ese danu hanua pavapavana mai ena hahealo taudia vairadiai bona hanua pavapavana ena heitatao taudia mai siahudia vairadiai ena hebogahisi vada e henigu. Lau na boga auka, badina be Iehova, egu Dirava, imana na latagu ai; bena Israel tau-badadia na haboudia, lau ida baia dae lao totona.   
\c 8  
\p
\v 1 King Aratasasta ena lohia negana ai lau ida Babulono tanona amo a dae ala taudia edia iduhu kwaradia bona edia uru ladadia bini.  
\v 2 Fineha garana amo: Geresom. Itamara garana amo: Daniel. David garana amo: Hatusu;  
\v 3 ia be Sekania natuna ta. Paroso garana amo: Sekaria; ia ida tatau sinahu-ta imahui ladadia e hetore.  
\v 4 Pahata-moab garana amo: Eliehoenai Serahia, bona tatau sinahu-rua ia ida.  
\v 5 Satu garana amo: Sekania lahasiel, bona tatau sinahu-toi ia ida.  
\v 6 Adini garana amo: Ebed Ionatan, bona tatau imahui ia ida.  
\v 7 Elam garana amo: Iesaia Atalia, bona tatau hitu-ahui ia ida.  
\v 8 Sefatia garana amo: Sebadia Mikael, bona tatau taurahani-ahui ia ida.  
\v 9 Ioab garana amo: Obadia Iehiele, bona tatau sinahu-rua gwauta-taurahani ia ida.  
\v 10 Bani garana amo: Selomiti Iosifia, bona tatau sinahu-ta tauratoi-ahui ia ida.  
\v 11 Bebai garana amo: Sekaria Bebai, bona tatau ruahui-taurahani ia ida.  
\v 12 Asgada garana amo: Iohanan Hakatan, bona tatau sinahu-ta gwauta ia ida.  
\v 13 Adonikama garana amo haida na gabeai ema: Elifelete bona Ieuele bona Semaia, bona tatau tauratoi-ahui idia ida.  
\v 14 Bigvai garana amo: Utai bona Sakuru, bona tatau hitu-ahui idia ida.   
\p
\v 15 Ahava e aru laomu sinavaina badinai na haboudia, bona dina toi unuseni ai a taruha. Taunimanima bona hahelaḡa taudia na nenedia negana ai, asi tauna ta unuseni ai Levi garana amo.  
\v 16 Bena Eliesere, Ariele, Semaia, Elnatan, Iaribi, Elnatan, Natan, Sekaria bona Mesulama, orea igunalaina taudia, bona loiaribi bona Elnatan, lalo-parara taudia, na boiridia;  
\v 17 bena na siaidia lao, Ido, gabu ladana Kasifia ikwarana tauna dekenai, bona na hamaorodia, hari Ido bona tadikakana, dubu ena hesiai taudia, ede bae hereva henidia toma, gabu ladana Kasifia ai. Herevana binai: idia ese eda Dirava ena dubu ena hesiai taudia na dekemai ai bae siaidia mai. I  
\v 18 Bena eda Dirava imana namona na ai latamai ai dainai, idia ese lalo-maoro tauna ta, Mali, Levi Israel natuna, garana ta, e hakaua mai. Una tau ladana na Serebia; ia na natuna bona varavarana ida ema, tatau gwauta-taurahani.  
\v 19 Hasabia danu e hakaua mai, bona ia ida Merari garana tauna ta ladana lesaia, bona varavarana mai natudia ida, tatau ruahui.  
\v 20 Dubu ena hesiai taudia sinahu-rua ruahui danu e hakaudia mai; unu na David bona ena heitatao taudia ese e gwauraidia, Levi taudia isiaidia bae lao heni. Ini iboudiai na ladadia e hegwaurai.   
\p
\v 21 Bena anivaga ta na gwauraia, hari Ahava sinavaina badibadinai, eda Dirava vairanai baia hahemanau bona dala maoromaorona ta iena amo baia tahua, ai emai bona natumai edia bona emai ḡau iboudiai ediai.  
\v 22 Badina be hanua pavapavana inoina na hemarai, emai raka dalana ai tuari taudia bona hosi-gui taudia oreana ta ese inaimai edia amo baine gimamai: badina be ai ese hanua pavapavana vada a hamaoroa, ato “Emai Dirava imana na namo, ia e tahuamu taudia iboudiai latadiai, bona ena badu siahuna ese iena amo e raka ohomu taudia na e inai henidiamu”.  
\v 23 Taunabunai ai na a anivaga, bona eda Dirava unu a noia toma; bena ia ese emai noinoi e hakala henia.   
\p
\v 24 Bena hahelaḡa taudia badadia gwauta-rua na gwauraidia hidi: Serebia bona Hasabia, bona varavaradia gwauta idia ida.  
\v 25 Bena \it silver\it* bona \it gold\it* bona ḡau idau-idau, hanua pavapavana mai ena hahealo taudia bona ena lohia taudia ida, bona Israel taudia unuseni ai vada e hebou danu, edia herahia ḡaudia vada e heni eda Dirava ena dubu ḡaudia, na hahetoho, na henidia hagau-hagau.  
\v 26 Na hahetoho bona idia imadia ai na ato gaudia bini: \it silver talent\it* sinahu-tauratoi imahui, bona \it silver\it* ḡaudia \it talent\it* sinahu-ta davana; bona \it gold talent\it*\f + \fr 8:26 \ft Ini \fk gold\ft bona \fk silver\ft ḡaudia iboudiai davadia na readia K1,900,000 sisivana, ita eda moni ai.\f* sinahu-ta,  
\v 27 bona \it gold\it* kibokibodia, davadia na dariki daha-ta; bona auri labora-labora namo-hereana bona kimore-kimorena, davana na \it gold\it* davana ida heḡereḡere, ḡaudia rua.  
\v 28 Bena na hereva henidia, nato, Umui na hehelaḡa Iehova ena, bona ini ḡau danu hehelaḡa, bona hari \it silver\it* bona \it gold\it* na herahia ḡaudia, lalo-namo ai e heni, Iehova, senemui edia Dirava, ena.  
\v 29 Ba gimadia bona ba baladia heni, ela bona hahelaḡa taudia badadia bona Levi taudia bona Israel iduhu kwaradia vairadiai ba hahetohodia, Ierusalem ai, Iehova ena dubu daiutudia lalodiai.  
\v 30 Taunabunai hahelaḡa taudia bona Levi taudia ese \it silver\it* bona \it gold\it* bona ḡau idau-idau metaudia idoinai e abi, eda Dirava ena dubu Ierusalem ai bae laohai totona.   
\p
\v 31 Bena hua gini-gunana dinana ihagwauta-ruana ai, ai na Ahava sinavaina amo a raka oho, Ierusalem baiala totona. Eda Dirava imana na latamai ai, bena ia ese inai taudia imadia amo bona dala ai e bani henimai taudia edia amo e hamaurimai.  
\v 32 Ai na Ierusalem ai a kau, bena dina toi unuseni ai a noho.  
\v 33 Dina ihahanina ai, eda Dirava ena dubu lalonai, hari \it silver\it* bona \it gold\it* bona ḡau idau-idau na e hahetohodia, hahelaḡa tauna Meremoto Uria imana ai e atodia. Ia ida be Eleasara Fineha, bona Levi taudia Iosabad Iesua bona Noadia Binui.  
\v 34 Iboudiai na e hagaudia bona e hahetohodia, bona iboudiai metaudia e tore.   
\p
\v 35 Una negana ai, abi-mauri taudia, edia noho-hedoa amo vada e lou taudia, ese ḡole-oho boubou ḡaudia na e hahelaḡadia, Israel Diravana ena: boromakau mamaruanedia gwauta-rua Israel idoinai dainai, bona mamoe mamaruanedia taurahanita-ahui tauratoi bona mamoe natudia hitu-ahui hitu; bona nani mamaruanedia g vauta-rua danu, kara dika boubouna ḡaudia. Ina idoinai na ḡole-oho boubouna Iehova ena.  
\v 36 Idia ese hanua pavapavana ena hahedua pepadia na hanua pavapavana ena tuari biagudia bona Sinavai Badana inikahana basileiana lohiadia e henidia; bena idia ese taunimanima bona Dirava ena dubu e durudia.   
\c 9  
\s1 Esera ena ḡuriḡuri  
\p
\v 1 Unu ḡaukara muridiai, heitatao taudia na lau dekegu ema, eto, Israel taudia bona hahelaḡa taudia bona Levi taudia na ini tano taudia, kara dika-herea taudia, Kanaan bona Hiti bona Perisi bona Iebusu bona Amono bona Moab bona Aigupto bona Amoro taudia, edia amo do asie raka oho.  
\v 2 Badina be natudia hahinedia haida vada e abidia, idia adavadia bona natudia adavadia ai e halaodia; una kara amo bese helaḡana na ini tano taudia ida vada e hebulo; bona ina hebeatai karana ai heitatao taudia bona hanua tau-badadia vada e guna.   
\p
\v 3 Una hereva na kamonai negana ai, egu dabua bona egu hahedoki badana na dare, bona kwaragu bona aukigu huidia na rakasidia, bena na helai diho, daragu e doko.  
\v 4 Mai dara-dokogu ai na helaiva ai, noho-hedoa amo e lou taudia edia gwau hebeatai dainai Israel Diravana ena hereva bagudiai kudoudia e hetaha taudia na dekegu ai e hebou, ela bona adorahi boubouna negana.  
\v 5 Bena adorahi boubouna negana ai, lau na egu anivaga amo na tore isi, mai dabuagu bona hahedokigu hedaredia ida; bena tuigu na hadai, imagu na Iehova, egu Dirava, na toi roro henia,  
\v 6 nato:  
\p Egu Dirava e, na hemaraimu, vairagu danu e kakakakamu, egu Dirava e, vairagu iabi-isina emu ai na heto'o ahumu; badina be emai kara dika vada e dae kwaramai daediai, bona emai kerere vada e dae ela bona guba.  
\v 7 Senemai negana amo ema bona ina dina, ai na vada a kerere dikadika; bona emai kara dika daidiai ai bona emai pavapava bona emai hahelaḡa taudia na tano haida pavapavadia imadia ai vada e atomai, bona dare bona abi-mauri bona dadidadi bona hemarai bada-herea ediai vada o negemai, ina dina heḡereḡerena ai.  
\v 8 A harihari nega kwadogi ai Iehova, emai Dirava, ese vada e hanamomai, ai kwabukwabumai vada e hanohomai, bona emai hekamo-kau gabuna vada e henimai ena gabu helaḡana lalonai, emai Dirava ese matamai baine hadiaridia bona emai igui ai taina baine hagoadamai totona.  
\v 9 Badina be ai na iḡui taumai; ḡau tamona emai Dirava ese emai igui ai se rakatanimai, a vada e bogamai hisi Parasa pavapavadia vairadiai, emai goada taidia ma baine hamatamata, bena emai Dirava ena dubu baia haginia lou, bona ena dika gabudia baia banidia, bona imaḡu-ahumai ai bainela, Iudea ai bona Ierusalem ai.   
\p
\v 10 A harihari, emai Dirava e, ina murinai ai na ma dahaka baia gwaurai? Badina be emu haheḡani vada a dadaraidia.  
\v 11 Unu haheḡani na emu hesiai peroveta taudia edia amo o henimai, oto, O raka vareaimu bona bo ḡaunaiamu tanona na miro, tano taudia edia kara mirodia daidiai; edia kara dika-hereadia ese edia miro amo vada e hahonua, duduna ela bona duduna.  
\v 12 Taunabunai, natumui hahinedia na idia natudia mamaruanedia basio henidia, bona idia natudia hahinedia na basio abidia, natumui mamaruanedia edia, bona edia maino eiava noho-namo daladia na nega ta basio tahua; bena ba goada, tano anidia bavani, bona ba rakatani dihimui edia, ela bona hanaihanai.  
\v 13 Ina idoinai na ai latamai ai vada e kau, emai kara dikadia bona emai kerere bada-hereadia daidiai; a oi, emai Dirava, ese mata-hakani sisina mo vada o henimai, dia emai kara dika davadia korikori, bona ina kwabukwabumai o hanohomai;  
\v 14 mato, ai na emu haheḡani baia tata utu lou, bona hari kara dika-hereadia e karamu taudia ida ma baia headava hanai a? Basioma badu henimai ela bona boma habuamai tari, bena kwabukwabuna ta eiava roho-maurina ta basinema noho, a?  
\v 15 Iehova e, Israel Diravana, oi na maoromaoro, badina be ai na kwabukwabumai, a roho mauri taumai, ina dina ai. O itaiamu, ai na oi vairamu ai mai emai kerere; badina be asi tauna ta oi vairamu ai baine gini diba, ina kara dainai.   
\c 10  
\s1 Idau bese hahinedia e hadihodia  
\p
\v 1 Esera e ḡuriḡuriva bona dika e gvaurai hedinaraiva, e taitaiva bona Dirava ena dubu vairanai e goru dihova, Ialonai hegogo bada-hereana, tatau bona hahine, memero bona kekeni, israel idoinai amo na ia dekenai e hebou; badina be taunimanima na e tai dikadikava dainai.  
\v 2 Bena Sekania, Iehiele natuna, (ia na Elam natuna ta), ese Esera e hereva henia, eto, Eda g vauhamata eda Dirava enai vada ta hamakohia, idau hahinedia ina tano besedia amo vada ta adavadia; ḡau tamona, ena be unu vada ta kara toma to Israel na doini mai ena helaro.  
\v 3 Taunabunai, ita ese eda Dirava aita gwau henia hamata, ini hahine iboudiai mai natudia ida, baita hadihodia, egu lohia, bona eda Dirava ena haheḡani dainai kudoudia e hetahamu taudia, edia hahealo heḡereḡerena; bena karana baita karaia, taravatu heḡereḡerena.  
\v 4 A tore isi, badina be ina na oiemu ḡaukara, bona ai na oi ida; ba goada, ba karaia.  
\v 5 Bena Esera e tore isi, hahelaḡa taudia bona Levi taudia igunalaidia taudia, bona Israel idoinai, e haduadia, bae gwau hamata, e gwauraia heḡereḡerena ai bae kara. Taunabunai idia na e gwau hamata.   
\p
\v 6 Bena Esera na Dirava ena dubu vairana amo e raka oho, lehohanan Eliasibi ena daiutu ela, unuseni ai e noho rani; aniani se ani, ranu se inu; badina be noho-hedoa amo vada e lou taudia edia hebeatai e tailaia.  
\v 7 Bena hahedua na Iuda bona Ierusalem idoinai lalodiai e gwauraia hedinarai, noho-hedoa amo vada e lou taudia na Ierusalem ai bae hebou;  
\v 8 bona dina toi lalodiai tau ta basinema mai, bena heitatao taudia bona hanua tau-badadia na bae hahedua, ena kohu baine heabi oho, bona ia danu noho-hedoa amo vada e lou taudia edia hebou lalona amo bae gwaua tao.   
\p
\v 9 Bena Iuda bona Beniamina taudia iboudiai na Ierusalem ai e hebou, dina toi lalodiai; dina na hua ihataurahani-tana dinana iharuahuina. Bena taunimanima iboudiai na hanua ariarana ai e helai, Dirava ena dubu vairanai, e heude-heudeva, una kara dainai bona medu e diho badabadava dainai.  
\v 10 Bena hahelaḡa tauna Esera na e tore isi, e hereva henidia, eto, Umui na vada o kara kerere, idau hahinedia vada o adavadia, unu amo Israel ena kerere vada o habadaia.  
\v 11 Taunabunai, emui kerere na Iehova, senemui edia Dirava, vairanai ba gwaurai hedinarai, bona iena ura be karaia: ina tano taudia bona idau hahinedia edia amo ba raka oho.  
\v 12 Bena hebou taudia iboudiai e haere, e hereva badabada, eto, Momokani, emu hereva heḡereḡerena do baia karaia.  
\v 13 A taunimanima na hutuma, bona ina na medu momo negana; ai na murimuri ai basia gini diba. Bona ina na dia dina tamona eiava dina rua ḡaukarana; badina be ai na vada a kerere bada ina kara ai.  
\v 14 Emai heitatao taudia ese hebouna bae abia; emai hanua lalodiai idau hahinedia vada e adavadia taudia iboudiai na bae hegwaurai hidi negadia ai baema, bona hanua tau-badadia bona hahemaoro taudia danu idia ida, hanua iboudiai amo, ela bona eda Dirava ena badu ḡaraḡara ina kara dainai na ita eda amo baine heabi oho.  
\v 15 Ionatan Asahele bona lahaseia Tikva sibodia ese una hereva e utua, bona Mesulama bona Sabetai, Levi tauna, ese e durudia.   
\p
\v 16 Bena noho-hedoa amo e lou taudia na unu e kara toma. Hahelaḡa tauna Esera ese tatau haida e abidia hidi, iduhu kwaradia iduhu ta ta ai; bona ta ta ladadia e hato. Hua ihagwautana dinana gini-gunana ai e hebou matama, una kara bae tahua totona;  
\v 17 ela bona hua gini-gunana dinana gini-gunana ai idau hahinedia vada e adavadia taudia iboudiai e davaridia vaitani.   
\p
\v 18 Hahelaḡa taudia natudia bogaragidia amo e davaridia idau hahinedia vada e adavadia, taudia bini: Maaseia, Eliesere, laribi, Gedalia. Ini na Iesua Iosadak mai tadikakana ida natudia.  
\v 19 Idia na e gwau hamata, adavadia bae hadihodia; edia kara dika boubouna na mamoe maruanena ta edia seri amo, edia kara dika irohona.  
\v 20 Imere natuna bogaragidia amo: Hanani bona Sebadia.  
\v 21 Harimi natuna bogaragidia amo: Maaseia, Elia, Semaia, Iehiele, Usia.  
\v 22 Pasahuru natuna bogaragidia amo: Elioenai, Maaseia, Ismael, Netanele, Iosabad, Elasa.   
\p
\v 23 Levi oreana amo: Iosabad, Simei, Kelaia (ladana ta Kelita), Petahia, Iuda, Eliesere.  
\v 24 Ane-abi oreana amo: Eliasibi. Ikoukou igimadia oreana amo: Salumu, Telem, Uri.   
\p
\v 25 Israel besena amo: Paroso natuna bogaragidia amo: Ramia, Isia, Malkia, Miamini, Eleasara, Hasabia, Benaia.  
\v 26 Elam natuna bogaragidia amo: Matania, Sekaria, Iehiele, Abdi, Ieremoto, Elia.  
\v 27 Satu natuna bogaragidia amo: Elioenai, Eliasibi, Matania, Ieremoto, Sabada, Asisa.  
\v 28 Bebai natuna bogaragidia amo: Iehohanan, Hanania, Sabai, Atalai.  
\v 29 Bani natuna bogaragidia amo: Mesulama, Maluku, Adaia, lasub, Seala, Ieremoto.  
\v 30 Pahatamoab natuna bogaragidia amo: Adna, Kelala, Benaia, Maaseia, Matania, Besalele, Binui, Manase.  
\v 31 Harimi natuna bogaragidia amo: Eliesere, Isihia, Malkia, Semaia, Simeon,  
\v 32 Beniamina, Maluku, Semaria.  
\v 33 Hasumu natuna bogaragidia amo: Matenai, Matata, Sabada, Elifelete, Ieremai, Manase, Simei.  
\v 34 Bani natuna bogaragidia amo: Maadai, Amram, Uele,  
\v 35 Benaia, Bedeia, Keluhi,  
\v 36 Vania, Meremoto, Eliasibi,  
\v 37 Matania, Matenai, Iaasu.  
\v 38 Binui natuna bogaragidia amo: Simei,  
\v 39 Selemia, Natan, Adaia,  
\v 40 Maknadebai, Sasai, Sarai,  
\v 41 Asarele, Selemia, Semaria,  
\v 42 Salumu, Amaria, Iosef.  
\v 43 Nebo natuna bogaragidia amo: Ieiele, Matitia, Sabada, Sebina, Iadai, Ioel, Benaia.   
\p
\v 44 Ini iboudiai ese idau hahine e adavadia, bena mai natudia ida e hadihodia.