\id COL .01, Colossians 1, Motu, PNG, RTWP 3/93 
\h KOLOSE 
\toc1 PAULO ENA REVAREVA  KOLOSE  TAUDIA EDIA 
\toc2 KOLOSE 
\mt2 PAULO ENA REVAREVA  
\mt1 KOLOSE  
\mt2 TAUDIA EDIA  
\c 1  
\p
\v 1 Lau Paulo, Iesu Keriso ena aposetolo taugu, Dirava ena ura dainai, bona varavarada Timoteo,  
\v 2 ai raruosi ese umui helaḡa taumui Kolose ai, Keriso iabidadama-henina taumui, a tore henimuimu: harihari-bada bona maino Tamada Dirava ena amo bavabi.   
\s1 Hahenamo herevadia  
\p
\v 3 Dirava, iseda Lohiabada Iesu Keriso Tamana, a hanamoamu, umui daimui ai a noiamu negadia iboudiai;  
\v 4 badina be ai na vada a kamonai Keriso Iesu o abidadama heniamu, bona helaḡa taudia iboudiai o ura henidiamu.  
\v 5 Badina be emui helaro na guba ai, sivarai namo ena hereva momokani ai o kamonai guna helarona.  
\v 6 Ina na umui emui ai vada e kau, tanobada idoinai vada eha kau heḡereḡerena: bona tanobada idoinai huahuana e dobimu, umui bogaragimui ai e dobimu heḡereḡerena; dia ina harihari mo, to Dirava ena harihari-bada sivaraina o kamonai bona o diba momokani dinana amo.  
\v 7 Ai bamomai, emai lalokau Epafra, ese e hadibamui; ia na Keriso ena hesiai tauna korikori emui ai.  
\v 8 Ia ese danu emui uraheni, Lauma lalonai, vada e hamaorolaimai.   
\s1 Emai guriguri daimui ai  
\p
\v 9 Una dainai, ai a kamonai dinana amo ema bona harihari, ḡuriḡuri asia hadokoa umui daimui ai; a noinoimu, iena ura ba diba vaitani mai aonegamui idoinai, laumamui danu bae diari;  
\v 10 bena Lohiabada imatauraina ai ba raka, kara iboudiai ia ba hamoalea, kara namodia iboudiai anidia ba havara, bona emui diba Dirava enai baine tubu.  
\v 11 Ai a noinoimu danu, siahu idoinai ese baine hagoadamui, ia siahuna herea-daena heḡereḡerena; bena ba haheauka bona ba boga auka mai moalemui ida.  
\v 12 Ita Tamada baita imodaia. ia ese vada e haḡoevada, diari ai helaḡa taudia ida ahuda baita abia;  
\v 13 ia danu dibura siahuna amo vada e hamaurida, ia Natuna, ena lalokau, ena basileia lalonai vada e abida vareai;  
\v 14 ia lalonai ita na mai eda hahemauri bona mai eda dika igwau-taodia.   
\s1 Keriso ena ḡaukara  
\p
\v 15 Ia na asita itaiamu Diravana heida-idana, e vara ḡaudia iboudiai roboadia.  
\v 16 Badina be ḡau iboudiai guba ai bona tanobada ai ia ese e kara, ta itamu ḡaudia bona asita itamu ḡaudia, guba pavapavadia, lohia badadia, ḡaubada hereadia, siahu taudia: iboudiai ia ese e karadia, iena ḡau.  
\v 17 Ia e noho guna, a ḡau iboudiai be gabeamo, bona ḡau iboudiai ia lalonai e hekamo boumu.   
\p
\v 18 Ia na ekalesia kwarana; ekalesia na ia tau-anina. Ia na mase amo toreisi-lou roboana, taunabunai ḡau iboudiai lalodiai ia na herea.  
\v 19 Badina be Diravana ena ura dainai, ena honuhonu-dae na ienai e miava;  
\v 20 bona iena amo ḡau iboudiai, tanobada ḡaudia bona guba ḡaudia, ienai baine hadarodia dae, ia idia ida bae herohemaino, iena satauro rarana dainai.   
\p
\v 21 Umui danu, gunaguna ia bona umui na mai padamui; lalomui ai o inai heniava emui kara dika daidiai.  
\v 22 A harihari ia ese ienai vada eme hadaromui dae, ia tau-anina ena mase dainai; bena ia vairanai baine haginimui mai helaḡamui ida, asi bebeka-bebekamui, asi emui kara havara.  
\v 23 Ḡau tamona, kamonai ai ba noho, ba badinaia tarika-tarika, ba gini tutukatutuka; sivarai namo ena helaro amo basie daromui daudau. Sivarai namo bunai vada o kamonai; sivarai namo bunai taunimanima iboudiai guba henunai vada e harorolai henidia; sivarai namo bunai lau Paulo na hesiai tauna ai vada eme halaogu.   
\s1 Lauegu ḡaukara daimui ai  
\p
\v 24 Harihari egu hisihisi umui daimui ai na moalelaimu; bona Keriso ena hisihisi orena lau taugu ai na haḡuḡuruamu, ekalesia, ia tau-anina, dainai.  
\v 25 Ena hesiai taugu ai nala, bena Dirava ese dagi e henigu umui emui ai, Dirava ena hereva baina harorolaia ḡuḡuru helaoreana.  
\v 26 Ena hereva hehunina na sene eregunadia bona uru iboudiai edia amo e hunia, ema harihari; a harihari ena helaḡa taudia ediai vada e hahedinaraia,  
\v 27 bena idia ediai, Dirava ena ura dainai, ina hereva hehunina hairaina herea-daena na bese idau-idau taudia bogaragidiai baine hedinarai. Herevana binai: Keriso na umui lalomui ai, emui hairai helarona.  
\v 28 Ai ese ia a harorolaiamu; taunimanima iboudiai a sisiba henidiamu, launimanima iboudiai a hadibadiamu, aonega iboudiai lalodiai; taunimanima iboudiai danu baia haginidia, bae namo ḡuḡuru Keriso lalonai.  
\v 29 Una totona na hekwarahimu bona na goada tohomu; iena ḡaukara heḡereḡerena lau lalogu ai e ḡaukaramu, mai siahuna ida.   
\c 2  
\p
\v 1 Badina be na uramu ba diba, lau na hekwarahi hereamu umui daimui ai, bona Laodikea taudia daidiai, bona vairagu do asie itaia taudia iboudiai daidiai.  
\v 2 Na uramu lalodia bae hagoadadia, bona lalokau ai bae hedaro boubou; na uramu danu lalo-parara idoinai ese baine hataḡadia, ela bona Dirava ena hereva hehunina, Keriso bunai, bae diba.  
\v 3 Ia lalonai aonega bona lalo-parara kohudia iboudiai na vada e hehunimu.   
\s1 Sisiba herevadia  
\p
\v 4 Ini na gwau tomamu, tau ta ese lalo-ani herevadia baine koilaimui na garina.  
\v 5 Ena be tau-anigu na dia dekemui ai, to laumagu na dekemui ai; bena na moalemu, badina be emui hereḡu namona na itaiamu, bona Keriso o abidadama henia tarika-tarikamu danu na itaiamu.  
\v 6 Taunabunai, Keriso Iesu vada o abia lava dae heḡereḡerena, ienai ba raka.  
\v 7 Ia lalonai ba haheholo kau; ia latanai ba hahedai kau; ia iabiabiraina ai ba hahegoada, vada e hadibamui heḡereḡerena; ia ihanamona ai ba herea dae.   
\p
\v 8 Nahuamui ba toho, tau ta ese ena dadidadi damuna ai baine halaomui na garina, taunimanima edia aonega kavakavadia eiava edia lalo-hadai koikoidia eiava sene taudia edia toma-diho karadia ai baine koimui na garina; Keriso ena dala na dia unu-heto.  
\v 9 Badina be Dirava ena mauri ḡoeva-daena na Keriso tau-anina ai vada e noho.  
\v 10 Ia lalonai umui vada o namo ḡuḡuru. Ia na lohia hereadia bona siahu taudia iboudiai kwaradia.  
\v 11 Ia lalonai peritome vada o abia, dia taunimanima imadia amo, a tau dikana idokiohona ḡauna, Keriso ena amo.  
\v 12 Emui bapatiso ai ia ida e gurimui hebou bona ia ida o tore isi hebou, Dirava o abidadama heniamu, ia siahuna ese Keriso e hatorea isi lou, dainai.  
\v 13 Umui na asie peritomemui taumui, emui kara dika ai o maseva; to Dirava ese ia ida vada e hamaurimui, bona iseda kara dika iboudiai vada e gwau tao.  
\v 14 E laoda ahu herevadia taravatu ai e hetore na ia ese vada e roho, vada e abi oho, ena satauro ai vada e koko kau.  
\v 15 Lohia hereadia bona siahu taudia ia ese vada e haketodia, taunimanima vairadiai vada e hahemaraidia, ia murina amo vada e hakaudia.   
\p
\v 16 Taunabunai, tau ta ese basine hahemaoro henimui aniani dainai, eiava inuinu dainai, eiava aria daidiai, eiava hua matamatadia daidiai, eiava dina helaḡadia daidiai.  
\v 17 Unu na gabeai bae vara ḡaudia laulaudia mo, a anina korikori be Keriso ena.  
\v 18 Ena mata-hanai e heaḡilaiamu bona lalonai e hahemanau koikoimu bona aneru e toma henidia dihomu tauna ese basine hahemaoro henimui. Ia na tau-anina ena lalo-hadai kavakavadia e heagilaimu, a una na asi anina.  
\v 19 Ia danu Keriso, ia na Kwara, enai se kahua taomu. Keriso ena amo tau-anina idoinai ese goada e abiamu, bena garugaru bona varovaro ese e hatamonaiamu, bena e bada oho bada ohomu, Dirava ena heubu dainai.   
\p
\v 20 Benaini, Keriso ida tanobada laumadia edia lohia badadia edia amo vada o roho mauri, a dahaka dainai ene taravatu o badinamu, emui mauri na tanobada ai na heto, a?  
\v 21 O tomu “Basio dogoa tao” bona “Basio mamia toho” bona “Basio daua toho”;  
\v 22 a ene ḡau iboudiai na iabidia ai bae ore; idia na taunimanima edia hahedua bona edia hahediba herevadia mo.  
\v 23 Tomadiho momo ai, bona hahemanau ai, bona tau-ani ihadikadia ai, oromadia na aonega herevadia, to idia na asi anidia, badina be taunimanima ena ura dikadia asie hadareremu.   
\c 3  
\s1 Mauri matamatana Keriso lalonai  
\p
\v 1 Taunabunai, Keriso ida vada o tore isi dainai, atai ḡaudia ba haero; gabuna bunai Keriso na Dirava idibana kahana ai e helaimu.  
\v 2 Atai ḡaudia ba haero; tanobada ḡaudia basio haero.  
\v 3 Badina be vada o mase; emui mauri na Keriso ida Dirava lalonai vada e hehunimu.  
\v 4 Keriso, eda mauri badina, baine hedinarai negana ai, umui danu ia ida hairai ai ba hedinarai.   
\p
\v 5 Taunabunai, tau-animui edia ura dikadia ba hamase: heuda-hanai, kara dika, mata-dika, lalo-heḡani, mata-ḡaniḡani. Ena na kaivakuku itomadiho-henina na heto.  
\v 6 Ene ḡau daidiai Dirava ena badu e kaumu, gwau-edeede taudia latadiai.  
\v 7 Gunaguna umui danu ene dala ai o rakava, idia bogaragidiai o nohova negana ai.  
\v 8 A harihari ini ḡau iboudiai ba nege: badu, daḡedaḡe, lalo-dika, ere-dika, udumui herevadia dikadia.  
\v 9 Basio hekoi heheni. Badina be tau gunana mai ena dika vada o dokia oho,  
\v 10 tau matamatana vada o hahedokilaia; ia na aonega ai e hamatamataia, ikarana Diravana heida-idana.  
\v 11 Tau matamatana lalonai asi Helene tauna, asi Iuda tauna, e peritomea tauna na lasi, bona se peritomea tauna danu lasi, idau tauna ta lasi, asi Skute tauna, asi hesiai tauna, bona asi ura-kwalimu tauna, a Keriso mo sibona, taunimanima bona ḡau iboudiai lalodiai.   
\p
\v 12 Dirava ena abi-hidi taumui, ena helaḡa taumui, ena lalokau taumui e, ini na ba hahedokilai: hebogahisi, gado namo, manau, manada, haheauka.  
\v 13 Ba haheauka heheni. Ta ese bamona baine habadelaia negana ai, emui dika ba hegwau tao heheni; Lohiabada ese emui dika vada e gwau tao; umui danu unu ba kara toma.  
\v 14 A unu ḡau iboudiai latadiai, lalokau ba hahedokilaia; ia na ihatamonada ḡauna herea-daena.  
\v 15 Keriso ena maino danu lalomui baine biagudia; e boirimui, tau-anina tamona ai e haboumui, badina bunai. Dirava ba hanamoa.  
\v 16 Keriso ena hereva be lalomui ai bae mia, nega idoinai bae hataḡamui. Salamo ai, ane ai, lauma anedia ai, ba hahediba heheni bona ba hahealo heheni. Dirava ihanamolaina anedia bavabi mai lalomui ida.  
\v 17 Emui hereva ai bona emui ḡaukara ai, ḡau iboudiai Lohiabada Iesu ladana ai ba kara; bona Dirava ba hanamoa ia bagunai.   
\s1 Hahealo herevadia  
\p
\v 18 Hahine e, adavamui ba kamonai henidia; una na maoro, Lohiabada lalonai.   
\p
\v 19 Tatau e, adavamui ba lalokau henidia, basio lalo dika henidia.   
\p
\v 20 Memero kekeni e, ḡau iboudiai lalodiai tamamui sinamui eredia ba kamonai, bena Lohiabada ese baine lalo namo henimui.   
\p
\v 21 Tama e, natumui basio turia riki henidia, lalodia bae hesiku na garina.   
\p
\v 22 Hesiai memeromui e, ḡau iboudiai lalodiai biagumui ina tanobada ai ba kamonai henidia, dia vairadiai mo, taunimanima ihamoaledia karana, a mai lalomui idoidiai, Lohiabada imatauraina karana.  
\v 23 Emui kara iboudiai na ba kara balaheni, Lohiabada vairanai, dia taunimanima mo vairadiai;  
\v 24 ba diba, ahumui na Lohiabada ena amo bavabi, badina be umui na Lohiabada Keriso ena hesiai taumui.  
\v 25 A kara dika tauna ese ena kara dika davana do baine abia; eda Lohiabada na taunimanima toadia se lalomu.   
\c 4  
\p
\v 1 Biagu e, kara maoromaoro ai bona kara namo ai emui hesiai memerodia ba kara henidia; ba diba, umui danu mai Biagumui guba ai.   
\p
\v 2 Ba ḡuriḡuri goada, basio hadokoa; ba ḡuriḡuri dudukau, Dirava ba hanamoa.  
\v 3 Dirava ba noia emai ai, ia ese iduara ta baine kehoa emai, Keriso herevana hehunina baia harorolaia. Ina iḡui ai na nohomu badina bunai.  
\v 4 Taunabunai do baina gwauraia hedinarai; e henigu ḡaukarana binai.   
\p
\v 5 Murimuri taudia vairadiai ba raka mai aonegamui ida; nega emui ai mia na ba ḡaukaralaia namonamo.  
\v 6 Nega idoinai ba hereva mai gadonamomui ida; emui hereva na damena ai ba damenaia. Bena taunimanima ta ta ba haere henidia mai dibamui ida.   
\s1 Hahetoni herevadia  
\p
\v 7 Sivaraigu idoinai Tukiko ese baine hamaorolaimui. Ia na varavaragu, egu lalokau; ia danu hesiai tauna namona ta, ai raruosi ese Lohiabada isiaina a lao heni heboumu.  
\v 8 Na siaia vasimu badina binai: ai sivaraimai baine hamaorolaimui, bena lalomui baine hakeru.  
\v 9 Onesimo danu ia ida na siaidia vasimu; ia danu varavarada namona ta, ai emai lalokau bona umui bamomui. Idia ese iniseni ai e varamu karadia iboudiai bae hadibalaimui.   
\p
\v 10 Aristako, lau bamogu dibura rumana ai, bona Banaba tadina Mareko, raruosi ese e hahenamo henimuimu. Mareko dainai hahedua vada o abia: bema vasi, boma abia dae.  
\v 11 Iesu, ladana ta be Iusto, ese danu e hahenamo henimuimu. Peritome taudia na idia tatoiosi mo sibodia lau ida a ḡaukara heboumu, Dirava ena basileia iharorolaina ai; idia ese danu lalogu vada eme hakerua.   
\p
\v 12 Bamomui Epafra, Keriso Iesu ena hesiai tauna, ese e hahenamo henimuimu. Nega idoinai umui daimui ai e ḡuriḡurimu, e noinoimu, ba gini tutuka-tutuka, ba namo ḡuḡuru, bona Dirava ena ura ba diba ḡoeva.  
\v 13 Na hamaoromui momokanimu, ia na e hekwarahi bada, umui daimui ai, bona Laodikea taudia daidiai, bona Hieropoli taudia daidiai.   
\p
\v 14 Egu lalokau Luka, muramura tauna, bona Dema, raruosi ese e hahenamo henimuimu.   
\p
\v 15 Varavarada Laodikea ai ba hanamodia. Numufa, bona ekalesia oreana iena ruma ai e heboumu, danu ba hanamodia.  
\v 16 Ina revareva na bogaragimui ai ba duahia murinai Laodikea hebouna ai danu bae duahia. Bona Laodikea taudia edia revareva na umui danu ba duahia.  
\v 17 Akipo ba hamaoroa, ia ese hesiai ḡaukarana, Lohiabada enai e abia, na nahuana baine tohoa, karana baine karaia ḡuḡuru.   
\p
\v 18 Ina hahenamo na lau Paulo imagu amo na toreamu. Ba laloa tao, lau na iḡui ai na nohomu. Harihari-bada na dekemui ai baine mia.