\id 2TH .01, 2 Thessalonians 1, Motu, PNG, RTWP 3/93 
\h 2 TESALONIKA 
\toc1 PAULO ENA REVAREVA  IHARUANA TESALONIKA  TAUDIA EDIA 
\toc2 2 TESALONIKA 
\mt2 PAULO ENA REVAREVA  
\mt1 IHARUANA TESALONIKA  
\mt2 TAUDIA EDIA  
\c 1  
\p
\v 1 Ai tatoiosi, Paulo bona Siluano bona Timoteo, ese Tamada Dirava bona Lohiabada Iesu Keriso edia ekalesia oreana Tesalonika ai a tore henimuimu:  
\v 2 harihari-bada bona maino Tamada Dirava ena amo bona Lohiabada Iesu Keriso ena amo bavabi.   
\s1 Emai moale na daimui ai  
\p
\v 3 Varavaramai e, ai na nega idoidiai Dirava a hanamoamu umui daimui ai. Una na maoro, badina be emui abidadama e badamu, bona emui heura-heheni danu bada.  
\v 4 Taunabunai, ai ese Dirava ena ekalesia oreadia vairadiai a heaḡilaimuimu, badina be e butumui taomu daḡedaḡedia bona hisihisidia lalodiai emui haheauka bona emui abidadama o hahedinaraimu.  
\v 5 Ina na Dirava ena hanemaoro namona toana: ena basileia, bagunai o hisihisimu basileiana, lalonai do ba heḡereḡere.  
\v 6 Badina be Dirava ena kara maoromaoro binai, e hahisihisimui taudia davadia hisihisi baine henidia.  
\v 7 A umui ai ida hisi ta animu tauda laḡada baita ani, Lohiabada Iesu mai ena aneru siahudia ida guba amo baema negana ai, Iahi hururu-hururuna ai bainema.  
\v 8 Dirava asi dibadia taudia bona Lohiabada Iesu ena sivarai namo asie abia daemu taudia davadia do baine henidia.  
\v 9 Davadia binai: Lohiabada vairana amo bona ena siahu hairaina amo mase hanaihanai bae abia,  
\v 10 ena helaḡa taudia ida heimodai iabma bainema negana ai. Una dina ai abidadama taudia iboudiai bae hoa, badina be emai haroro o abia dae.   
\p
\v 11 Taunabunai, nega idoidiai a ḡuriḡurimu umui daimui ai, Dirava ese baine haeromui ena boiboi ikamonaina ba heḡereḡere, bona ena siahu amo emui ura namodia iboudiai bona emui kamonai karadia baine haḡuḡuru  
\v 12 Bena eda Lohiabada Iesu ladana bae imodaia umui daimui ai, bona umui bae imodaimui ia dainai, iseda Dirava bona Lohiabada Iesu Keriso edia harihari-bada heḡereḡerena.   
\c 2  
\s1 Lohiabada ma bainema  
\p
\v 1 Varavaramai e, ai a noimuimu, eda Lohiabada Iesu Keriso ma bainema bena ia ida baita hebou dainai  
\v 2 lalomui na basie haraḡa-haraḡa; bona, ena be lauma ta eiava hereva ta eiava revareva ta, ai emai na heto, baineto “Lohiabada ena dina vada be gini daemu”, to kudoumui na basie hetaha.  
\v 3 Ta ese ḡau ta ai basine koimui; badina be una dina na basine gini dae ela bona raka-muri baine vara, bona dika tauna, hahemase natuna, baine hedinarai guna.  
\v 4 Ia ese dirava ai e halaodiamu bona e toma heni dihomu ḡaudia iboudiai e inai henidiamu, bona e hereadiamu e tomu; Dirava ena helai gabuna helaḡana ai e helaimu, sibona Dirava ai e hahelaomu.   
\p
\v 5 Asio helalo unemu a, ta noho hebouva negadia ai ini ḡau na hamaorolaimuiva?  
\v 6 Harihari ia iruna tauna dibamui; baine rua ela bona ena nega korikori ai baine hedinarai.  
\v 7 Badina be dika na e ḡaukara hehunimu; basine hedinarai ela bona iruna tauna baine heabi oho.  
\v 8 Una negana ai hari dika tauna baine hedinarai; bena Lohiabada ese baine hahoho henia, baine alaia mase; ia maina diaridiarina ese baine ha-orea.  
\v 9 Hari dika tauna na Satana ena siahu ai bainema, mai siahu koikoidia, mai toa koikoidia mai hoa karadia koikoidia ida.  
\v 10 Bona ia ese ena kara gagevagagevadia amo mase dalana ai e rakamu taudia baine koidia; badina be hereva momokani iura-henina ese bema hamauridia, to asie ura henia.  
\v 11 Badina binai Dirava ese lalodia baine haduhu, hereva koikoi bae abia dae helaoreana.  
\v 12 Bena hereva momokani asie abia dae a kara dika e moalelai taudia na baine hahemaoro henidia.   
\s1 Ba gini tutuka-tutuka  
\p
\v 13 Varavaramai e, Lohiabada ena lalokau taumui e, ai ese nega idoidiai Dirava a hanamoamu umui daimui ai. Badina be Dirava ese matamana amo e abimui hidi, Lauma ena hahelaḡa bona hereva momokani iabi-daena daidiai mauri bavabia.  
\v 14 Una dainai emai sivarai namo amo e boirimui, iseda Lohiabada Iesu Keriso hairaina bavabia helaoreana.  
\v 15 Taunabunai, varavaramai e, ba gini tutuka-tutuka; udumai amo eiava emai revareva ai a hadibamui herevadia na ba kahu tao tarika-tarika.   
\p
\v 16 Eda Lohiabada Iesu Keriso bona Tamada Dirava, e lalokau henidamu bona ena harihari-bada ai mia-hanaihanai tauhalona bona helaro-namona vada e henida Diravana, ese  
\v 17 lalomui bae hakeru, bona kara namodia bona hereva namodia iboudiai lalodiai bae hagoadamui.   
\c 3  
\s1 Sisiba herevadia  
\p
\v 1 Varavaramai e, orena binai: ai daimai ai ba ḡuriḡuri, bena Lohiabada ena hereva na baine pere rohoroho, bena hutuma ese bae imodaia, umui ese o imodaiamu heḡereḡerena;  
\v 2 bona ura kerere bona ura dika taudia imadia amo baine hamaurimai. Badina be haida mo mai edia abidadama.  
\v 3 A Lohiabada na vada momokani; bena ia ese baine haginimui tutuka-tutuka, dika amo baine hamaurimui.  
\v 4 Ai ese Lohiabada lalonai a abidadama henimuimu, a halḡanimui karadia o karamu bona ba kara.  
\v 5 Lohiabada ese lalomui baine hakaudia, Dirava ena uraheni ai bona Keriso ena haheauka ai.   
\p
\v 6 Varavaramai e, Lohiabada Iesu Keriso ladana ai a haḡanimuimu, e raka havara-havaramu taudia bona emai hahediba herevadia asie badinamu taudia edia amo ba raka oho.  
\v 7 Umui dibamui ai ba haḡoimai hari namo; badina be ai na padamui ai asia kara havara-havarava,  
\v 8 bona tau ta ana aniani asia ani kavava; dina hanuaboi a ḡaukarava, a hekwarahiva, umui baia hametaumui na garina.  
\v 9 Unu a kara tomava, badina he dia asi emai siahudainai, a umui ese ba haḡoimai helaoreana.  
\v 10 Dekemui ai a nohova negana ai danu ina haheḡani a henimui, ato “Ta basine ḡaukara, ia na basine aniani”.   
\p
\v 11 Haida haridia ame kamonai, bogaragimui ai e raka havara-havaramu, asie ḡaukaramu; unu na gado-dae gado-dae taudia.  
\v 12 Unu e kara tomamu taudia na Lohiabada Iesu Keriso ladana ai a haḡanidiamu bona a sisiba henidiamu, bae ḡaukara manaumanau, sibodia adia malamala bae ani.   
\p
\v 13 Varavaramai e, kara namo ikarana ai basio hesiku.  
\v 14 Tau ta ese ina revareva ai a tore herevadia basine abi dae, ia toana ba itaia, bona bavatoa tabe, bena kopina baine hemarai.  
\v 15 To basio inai henia; ba sisiba henia, tadimui na heto.  
\v 16 Bena Maino Lohiana ese ena maino baine henimui, nega idoidiai bona gabu iboudiai. Lohiabada ese iboumui ai baine bamomui.   
\p
\v 17 Ina hahenamo herevana na lau, Paulo, sibogu imagu amo na toreamu. Egu revareva iboudiai toadia na ini na tore tomamu.   
\p
\v 18 Iseda Lohiabada Iesu Keriso ena harihari-bada na iboumui ai emui ai baine mia.