\id 2PE .01, 2 Peter 1, Motu, PNG, RTWP 3/93 
\h 2 PETRO 
\toc1 PETRO ENA REVAREVA  IHARUANA 
\toc2 2 PETRO 
\mt1 PETRO ENA REVAREVA  
\mt1 IHARUANA  
\c 1  
\p
\v 1 Lau, Simona Petro, Iesu Keriso isiaina ilao-henina bona ena aposetolo taugu, umui ai ida eda abidadama tamona iseda Dirava bona Hahemauri Tauna Iesu Keriso ena kara maoromaoro enai e miamu taumui na tore henimuimu:  
\v 2 harihari-bada bona maino emui ai bae bada, emui laloparara danu Dirava enai bona eda Lohiabada Iesu Keriso enai baine bada.   
\s1 Laumamui ihagoadadia  
\p
\v 3 Dirava ena siahu ese eda mauri bona ia ibadinana ḡaudia iboudiai vada e henida, hairaina bona ḡoeva-daena amo vada e boirida Tauna tame diba dainai.  
\v 4 Unu amo ena gwauhamata badadia bona hereadia vada e henida; unu gwauhamata ese tanobada ena heḡahusi bodagadia amo bae harohomui mauri, bena Dirava lalona korikorina bavabia.   
\p
\v 5 Badina bunai, ba goada balaheni. Emui kamonai enai, kara namo bavatoa kau; kara namo enai lalo-parara bavatoa kau;  
\v 6 lalo-parara enai haheauka bavaloa kau; haheauka enai boga-auka bavatoa kau; boga-auka enai Dirava ibadinana bavatoa kau;  
\v 7 Dirava ibadinana enai tadikakamui irua-henidia bavatoa kau; bona tadikakamui iura-henidia enai lalokau bavatoa kau.  
\v 8 Badina be bema ini ḡau lalomui ai bae mia bona bae bada, umui na lahedo taumui bona asi damumui taumui ai basiola, Lohiabada Iesu Keriso mai dibamui dainai.  
\v 9 A ini ḡau ai e dabumu tauna, ia na matakepulu tauna; matana e tunamu dainai e helalo boiomu ena kara dika gunadia vada e huri oho vaitani.  
\v 10 Taunabunai, varavaragu e, ba goada balaheni, e boirimui bona e abimui hidi vada ba hamomokania, badina be unu ba kara toma negana ai umui na basio keto.  
\v 11 Bona unu amo emui dala baine lailai ḡoevaḡoeva, eda Lohiabada bona eda Hahemauri Tauna Iesu Keriso ena mia-hanaihanai basileiana lalonai ba raka vareai.   
\s1 Ina revareva badina  
\p
\v 12 Badina bunai lau na tomamu ini hereva baina hamaorolaimui loulou. Ena be mai dibamui bona hereva momokani ai o gini tutuka-tutukamu,  
\v 13 to lau na tomamu, ina taruha doini na noho heniamu ai, baina haomui bona ini ḡau baina hahelalolaimui une.  
\v 14 Badina be lau dibagu egu taruha iraḡana negana vada eme kahira-kahira; iseda Lohiabada Iesu Keriso unu vada e hadibagu toma.  
\v 15 A baina goada toho, bena egu mase murinai ini ḡau ba helalolai une, nega iboudiai.   
\s1 Keriso hairaina na itaia  
\p
\v 16 Badina be eda Lohiabada Iesu Keriso ena siahu bona ena mai herevadia a hamaorolaimuiva negadia ai, ai na dia gori herevadia asia sivaraiva, a ia hairaina na matamai amo a itaia.  
\v 17 Badina be Tamada Dirava ena amo hemataurai bona hairai e abi negana ai, ere ta Diari-diari Herea-daena lalona amo e kamonai, eto, “Ina na Natugu, egu lalokau; lau ia na lalo namo heniamu”.  
\v 18 Ina ere ai ese a kamonai, ia ida ororo helaḡana ai a nohova negana ai.   
\s1 Peroveta herevadia na Dirava ena amo  
\p
\v 19 Unu amo peroveta herevadia vada e momokani vaitani, ai emai ai. Umui danu ba badinadia baine namo; idia na lamepa gabu diburana ai e diarimu na heto, ela bona daba baine rere, bona hisiu bada na lalomui ai baine dae.  
\v 20 A ina na ba diba guna: ta ese sibona ena lalo-hadai heḡereḡerena ai peroveta bukadia anidia basine gwaurai.  
\v 21 Badina be peroveta herevadia na taunimanima edia ura kava amo asie vara, a Lauma Helaḡa ese Dirava ena helaḡa taudia e haduadia heḡereḡerena e herevava.   
\c 2  
\s1 Hahediba koikoi taudia  
\p
\v 1 Peroveta taudia koikoidia na taunimanima bogaragidiai e nohova; bona umui bogaragimui ai danu hahediba koikoi taudia do bae gini tore. Idia na hahediba herevadia koikoidia bae hadibalai hehuni, bona Biagudia, e hoidia Tauna, bae ḡorea. Bae mase haraga, sibodia edia hahedika ai.  
\v 2 A hutuma ese edia dala dikadia ai bae ḡavadia; idia daidiai hereva momokani dalana na dikana bae gwauraia.  
\v 3 Edia mata-ḡaniḡani dainai, koikoi herevadia amo lalomui bae ani, ela bona bae abimui; a ihahemaorohenidia na se halahemu, bona ihamasedia na se mahutamu.   
\s1 Sisiba herevadia  
\p
\v 4 Dirava ese e kara havara anerudia na se bogadia hisi, a dibura masemase gabuna ai e tahodia dobi, unuseni ai e ḡuidia ela bona hahemaoro negana.  
\v 5 Bona bese gunana danu se bogaia hisi; Noa mo, kara maoromaoro iharorolaina tauna, mai bamona hahituosi ida, e hamauridia, a ia garina asie gariva taudia be utu-utu ese e habuadia.  
\v 6 Sodoma bona Gomora danu e habuadia tari, kahu ai e halaodia, gabeai ia garina basie gari taudia matadia ihakanidia;  
\v 7 a Lot mo, kara maoromaoro tauna, e hamauria. Una Lot be lalona e hesiku, kara dika taudia edia lebulebu karadia daidiai;  
\v 8 ia na kara maoromaoro tauna, a idia padadiai e nohova dinadia iboudiai edia kara havara e itava e kamonaiva dainai ia lalona e hisihisiva.  
\v 9 Benaini, Lohiabada ese ia ibadinana taudia hedibaḡani amo baine hamauridia diba, a kara dika taudia baine ḡuidia diba ela bona hahemaoro dinana.  
\v 10 Dika hereadia bini: tauanina ena ura bodagadia e ḡava taudia, bona gwau-maoro taudia e dadaraidia taudia. E hekokorokumu, sibodia edia ura e karamu, atai taudia i'ihiihiraidia asie garimu;  
\v 11 a aneru, ena be edia goada bona edia siahu na herea, to unu atai taudia asie habadelaidia Lohiabada vairanai.   
\p
\v 12 Ini na boroma na heheto, asi daradia; unu e vara toma, ma unu bae dika toma. Asi dibadia ḡaudia e ḡonaḡonalaimu; edia dika lalonai bae mase vaitani,  
\v 13 edia kara dika davadia do bae abi. Lebulebu karadia dina ai e moalelaimu; idia na toutou eiava bero na heto; umui ida o aniani heboumu negadia ai danu e aniani lalo-dikamu.  
\v 14 Matadia e bodagamu; kara dika ai asie hesikumu; lalo-manoka taudia e idoadiamu; mata-ḡaniḡani karadia ai vada e manada. Uru dikana!   
\p
\v 15 Idia na dala maoromaorona vada e rakatania, vada e raka kerere, Balaam, Beoro natuna, ena dala vada e rakalaia. Ia na kara dika davana iabina urana e urava tauna;  
\v 16 a ena kerere dainai e sisiba henia, doniki, hereva asi dibana ḡauna, ese taunimanima gadodia ai una peroveta tauna e hereva henia, ena kara kava e gwaua tubu.   
\p
\v 17 Idia na ranu guridia kororodia na heheto, eiava ḡahu lai ese e hodaia isi na heto; dibura masemase gabuna vada e seua, idia edia.  
\v 18 E hereva kavamu; e heaḡi kavamu; kara kerere-kerere taudia bogaragidia amo e roho maurimu taudia e idoadiamu tau-anina ena heḡahusi bona ena mata-dika amo.  
\v 19 Ura kwalimu bae henidia e tomamu, to idia sibodia na mase ena iḡui taudia; badina be darere tauna na kwalimu tauna ena hesiai ai bainela.   
\p
\v 20 Badina be eda Lohiabada bona eda Hahemauri Tauna Iesu Keriso dibadia murinai tanobada ena miro ḡaudia amo vada e roho mauri taudia na unu miro ḡaudia ese ma bae idoadia lou bona bae hadareredia, madi, edia dika gunana na maraḡi, edia dika gabena na baine bada.  
\v 21 Idia na dala maoromaorona basiema diba bema namo; a dibadia bena e henidia haheḡanina helaḡana amo e raka oho na dika.  
\v 22 Hereva heḡereḡerena na idia ediai vada eme momokani, eto, Sisia be ena mumuta e lou heniamu; bona boroma be bae huria to kopukopu ai baine hekui-hekui lou.   
\c 3  
\s1 Keriso do baine lou mai  
\p
\v 1 Egu lalokau taumui e, revareva iharuana binai na tore henimuimu. Ruaosi badidia be lalomui ihaodia, mai lalomui ḡoevaḡoevadia ida ba helalo une.  
\v 2 Peroveta taudia ese idau nega ai e gwauraiva herevadia, bona Lohiabada eda Hahemauri Tauna ena haheḡani, ena aposetolo ese vada e henimui ḡaudia, ba helalolai.  
\v 3 Ina na ba diba guna: nega dokona ai ḡonaḡona taudia baema, sibodia edia heḡahusi daladia ai bae raka,  
\v 4 baeto “Ena lou mai gwauhamatana na edeheto? Badina be tubuda tamada e mahutava negadia ema harihari, ḡau iboudiai vada eme hesiriu, tanobada e karaia negana heḡereḡerena”.  
\v 5 Unu e laloa tomamu badina be ina na vada e laloa boio: gunaguna guba e miava, bena Dirava ena hereva dainai tanobada na gadobada lalona amo e dae bona gadobada bogaraginai e miava.  
\v 6 A una tanobada na gadobada ese e habubunia, bena vada e ore.  
\v 7 A ina harihari e miamu gubana bona tanobadana na iena hereva ese e seudiamu, lahi ese baine ha-ore, hahemaoro bona Dirava asie badinaiamu taudia ihabuadia dinana ai.   
\p
\v 8 Egu lalokau taumui e, ina hereva tamona basio laloa boio, Lohiabada enai dina tamona na laḡani daha na heto, bona laḡani daha na dina tamona na heto.  
\v 9 Lohiabada na ena gwauhamata ihamomokanina ai se halahemu, haida e laloamu na heto; to, e haheauka henimuimu, badina be ia na se uramu ta baine mase; e uramu iboumui ai ba helalo kerehai.  
\v 10 A Lohiabada ena dina baine kau, henao tauna na heto; una dina ai guba baine puki mai rege-badana ida, ḡau iboudiai na siahu badana ese baine havevedia, tanobada danu, mai anina idoinai ida, lahi ese baine araia ore.   
\s1 Ba noho migomigo  
\p
\v 11 Benaini, ini ḡau iboudiai unu bema ore toma, umui ede boma kara toma? Emui kara iboudiai bema helaḡa; Dirava boma badinaia.  
\v 12 Dirava ena dina ena mai ba nari bona ba kahaia; una dina ai lahi ese guba baine araia ore, bona siahu-badana ese ḡau iboudiai baine havevedia.  
\v 13 Ita na guba matamatana bona tanobada matamatana, ena gwauhamata heḡereḡerena, ta narimu; kara maoromaoro taudia ese bae noholaia.   
\p
\v 14 Taunabunai, egu lalokau taumui e, ini ḡau o narimu dainai ba goada balaheni, hedaro-bouboumui ai baine davarimui, asi toutoumui bona asi kereremui ia vairanai.  
\v 15 Lohiabada ena haheauka ba haeroa, una na hahemauri ḡauna; varavara-dosida Paulo ese e henia aonegana amo e tore henimui heḡereḡerena.  
\v 16 Ena revareva iboudiai lalodiai ini ḡau na unu e torelai toma. E tore herevadia haida anidia idavaridia na auka, bena mala-lahui bona daradara tauna ese e hagagevamu, revareva helaḡadia haida e hagagevamu heḡereḡerena sibodia ihadikadia ḡaudia ai e halaomu.   
\p
\v 17 Egu lalokau taumui e, vada o diba guna, taunabunai nahuamui ba toho, kara havara taudia edia kerere ese baine hakaumui siri na garina, emui gini tutuka-tutuka amo ba keto na garina.  
\v 18 A eda Lohiabada bona eda Hahemauri Tauna Iesu Keriso ena harihari-bada bona ena lalo-diari ai ba tubu daga dae. Hairai na iena, harihari ela hanaihanai. Amen.