\id 1TH .01, 1 Thessalonians 1, Motu, PNG, RTWP 3/93 
\h 1 TESALONIKA 
\toc1 PAULO ENA REVAREVA   GINI GUNANA  TESALONIKA TAUDIA EDIA 
\toc2 1 TESALONIKA 
\mt2 PAULO ENA REVAREVA  
\mt1 GINI GUNANA  
\mt2 TESALONIKA TAUDIA EDIA  
\c 1  
\p
\v 1 Ai taloiosi, Paulo bona Siluano bona Timoteo, ese Tamada Dirava bona Lohiabada Iesu Keriso edia ekalesia oreana Tesalonika ai a tore henimuimu: harihari-bada bona maimo bavabi.   
\s1 Emai moale na daimui ai  
\p
\v 2 Ai na nega iboudiai Dirava a hanamoamu umui daimui ai, bona emai ḡuriḡuri ai umui ladamui a hato louloumu.  
\v 3 Emui kamonai karadia, bona emui uraheni ḡaukaradia, bona emui helaro Lohiabada Iesu Keriso enai e aukamu, ini ḡau nega idoidiai Tamada Dirava vairanai, a lalo taomu.  
\v 4 Dibamai danu, varavaramai e, Dirava ese umui, ena lalokau taumui, vada e abimui hidi.  
\v 5 Badina be emai sivarai namo emui ai e kau, dia hereva ai mo, a siahu ai bona Lauma Helaḡa ai, bena emui ai e momokani vaitani; bona emai kara daimui ai vairamui ai e hedinarai be dibamui.  
\v 6 Bena ai o haḡoimai, Lohiabada danu o haḡoia, hereva o abia daeva mai hisihisimui ida, to mai moalemui ida danu, Lauma Helaḡa moalena.  
\v 7 Bena kamonai taudia iboudiai Makedonia ai bona Akaia ai edia ihaḡoina ḡauna ai ola.  
\v 8 Badina be umui emui amo Lohiabada ena hereva vada e piua rohoroho, Makedonia ai bona Akaia ai; bona dia una mo, a gabu iboudiai emui abidadama Dirava enai vada e diba. Taunabunai, ai baia hereva na asi badina.  
\v 9 Badina be idia sibodia harida e hapiuamu, ede o abimai dae toma, bona kaivakuku ede o rakatanidia toma, bona Dirava Mauri, Dirava Momokani, ede o haḡerea toma, isiaina ede o lao heni tomamu,  
\v 10 bona ia Natuna guba amo ede o naria tomamu: Iesu bunai, ia na mase amo e tore isi, bainema baduna amo e hamauridamu.   
\c 2  
\s1 Emai heigo-ita gunana  
\p
\v 1 Varavaramai e, dibamui a vasi negana ai na emai heigo-ita na mai anina.  
\v 2 Dibamui a hisihisi gunava, Filipi ai e daḡedaḡe henimaiva; a Dirava ladana ai a haheauka, daḡedaḡe bogaraginai Dirava ena sivarai namo a hadibalaimuiva, asia gariva.  
\v 3 Badina be emai hahealo herevadia na dia lalo-hadai kerere amo, dia lalo-hadai mirodia amo, dia koikoi amo, asie vara;  
\v 4 a Dirava ese vada e abimai hidi bona sivarai namo vada e henimai heḡereḡerena mo a gwauraiamu; dia taunimanima ihamoaledia, a laloda e dibamu Diravana ihamoalena.  
\v 5 Umui dibamui ai na nega ta asia gwaumui lalo-aniva; bona Dirava dibana ai na kohu asia ḡaima hehuniva.  
\v 6 Ena be ai na Keriso ena aposetolo dainai baiama hametaumui diba, to nega ta heimodai asia tahuava, umui emui ai eiava haida ediai.  
\v 7 Ai na bogaragimui ai a manauva, natuna e ubudia hahinena na heto.  
\v 8 Unu a ura henimui tomava dainai, lalomai e urava dia Dirava ena sivarai namo mo baiama henimui, a laumamai danu; badina be a lalokau henimuiva.   
\p
\v 9 Varavaramai e, emai hekwarahi bona emai hisihisi o lalo taomu ani? Dina hanuaboi a ḡaukarava, baia hahekwarahimui na garina; bena Dirava ena sivarai namo a harorolai henimuiva.  
\v 10 Umui dibamui, Dirava danu dibana, umui kamonai taumui bogaragimui ai a nohova mai helaḡamai bona mai maoromaoromai ida, asi bebeka-bebekamai.  
\v 11 Tama ese natuna e kara henidiamu heḡereḡerena, a hahealo henimuiva, taumui a halova, a haḡanimuiva,  
\v 12 Dirava ena ura heḡereḡerena ai ba raka helaoreana. Ia ese vada e boirimui, ena basileia bona hairaina baine henimui.   
\p
\v 13 Una dainai ai ese Dirava ihanamona asia hadokoamu, badina be emai ai o kamonai herevana na o abia dae, dia taunimanima mo emai hereva, a Dirava ena hereva. Una be momokani, bona una hereva be umui kamonai taumui lalomui ai e ḡaukaramu.  
\v 14 Varavaramai e, Dirava ena ekalesia oreadia Iudea ai ida vada o heḡereḡere, Keriso Iesu lalonai; badina be Iuda taudia ese idia e hahisidia heḡereḡerena umui emui bese taudia ese vada e hahisimui.  
\v 15 Idia ese Lohiabada Iesu e alaia, edia peroveta taudia danu e aladia, bona ai e lulumai. Idia ese Dirava e habaduamu, bona taunimanima e inai henidiamu;  
\v 16 ai danu e gwaumai taomu, idau bese taudia mauri herevadia basia harorolai henidia e tomamu. Edia kara dika e haḡuḡurumu; Dirava ena badu na latadiai vada e kau, baine habuadia tari.   
\s1 Lalomai e hekwarahimu daimui ai  
\p
\v 17 Varavaramai e, ina nega sisina ai vairamui asia itamu; tau-anida na mai padadia, to laumada na asi padadia; taunabunai ai na a ura lalo-dika vairamui baiama ita lou ato.  
\v 18 Bena baia vasi ato; momokani, lau Paulo dala na tahu loulouva baina vasi nato. To Satana ese e laomai ahu.  
\v 19 Badina be eda Lohiabada Iesu baine lou mai negana ai emai helaro, emai moale, emai heaḡi toana, ia vairanai be dahaka? Umui, ani!  
\v 20 Emai heaḡi bona emai moale badidia na umui.   
\c 3  
\p
\v 1 Emai haheauka e ore, bena ato ai raruosi mo Atena ai baia noho,  
\v 2 a tadimai Timoteo, Dirava ena hesiai tauna Keriso ena sivarai namo lalonai, a siaia vasi, emui abidadama ai lalomui baine hagoadadia bona taumui baine halodia totona,  
\v 3 ini hisihisi lalodiai ta basine marere-marere helaoreana. Badina be dibamui hisi-ani e ahulaida;  
\v 4 ta noho hebouva negana ai a hamaoromui heḡaeḡaeva hisi bae vara; benaini, vada e vara, ani!   
\p
\v 5 Badina binai, egu haheauka e ore negana ai na siaia vasi, emui abidadama sivaraina baina diba, hedibaḡani tauna ese bema dibaḡanimui bena emai hekwarahi anina bema boio na garina.  
\v 6 A harihari Timoteo na emui amo vada e lou mai, emui abidadama bona emui lalokau haridia vada e mailai; e tomu, umui ese nega idoinai o lalomaimu mai moalemui ida, bona o uramu ha itamai, ai a uramu baia itamui heḡereḡerena.  
\v 7 Varavaramai e, emui abidadama dainai taumai vada eme lo, emai hisihisi bona emai daradoko lalodiai.  
\v 8 Umui Lohiabada enai bo gini tutuka-tutukamu dainai ai baia maurimu.  
\v 9 Dirava ede baia hanamoa toma, emai Dirava vairanai umui a moalelaimuimu moalena idoinai dainai?  
\v 10 Dina bona hanuaboi a ḡuriḡuri goadagoadamu, vairamui do baia ita a tomu, bena abidadama ai o dabumu ḡaudia baia henimui ḡuḡuru.   
\p
\v 11 Benaini, Tamada Dirava bona eda Lohiabada Iesu ese do bae hakaumai vasi.  
\v 12 Lohiabada ese emui heura-heheni baine havaraia bona baine habadaia; bona baine durumui, taunimanima iboudiai ba lalokau henidia, ai ese umui a lalokau henimuimu heḡereḡerena;  
\v 13 bona lalomui baine hagoadadia, bena eda Lohiabada Iesu Keriso mai ena helaḡa taudia loḡora ida baema negana ai, Tamada Dirava vairanai ba helaḡa, asi bebeka-bebekamui.   
\c 4  
\s1 Hahealo herevadia  
\p
\v 1 Varavaramai e, orena binai: Lohiabada Iesu ladana ai a noimuimu, bona a haḡanimuimu, emui raka dalana bona Dirava ihamoalena dalana, emai ai o abia, ba goadalaia.  
\v 2 Badina be haheḡani, Lohiabada Iesu ena amo a abi a henimui, na dibamui.  
\v 3 Badina be Dirava ena ura binai: ba helaḡa, mata-bodaga kaladia basio kara;  
\v 4 bona iboumui ai ba diba, ta ta adavamui bavabidia mai helaḡamui bona mai hematauraimui ida,  
\v 5 dia mata-dika ena ura bodagadia daidiai basio abidia, Dirava asi dibadia besedia na heheto.  
\v 6 Bona ta ese varavarana basine koia bona basine hurea hanai; badina be ini kara iboudiai davadia ihenina tauna na Lohiabada, ai ese a hamaoromui gunava bona vada a gwauraia hedinaraiva heḡereḡerena.  
\v 7 Badina be Dirava ese vada e boirida, dia mata-dika enai, to helaḡa enai.  
\v 8 Taunabunai, e dadaraiamu tauna ese dia taunimanima se dadaraidiamu, a ena Lauma Helaḡa e henimuimu Diravana e dadaraiamu.   
\p
\v 9 Varavara iura-henidia herevadia na basina tore henimui, badina be Dirava ese vada e hadibamui umui ta ta ba heura heheni.  
\v 10 Momokani, umui ese varavara iboudiai Makedonia ai o lalokau henidiamu; to, varavaramai e, a noimuimu, una kara ba habadaia.  
\v 11 Mai manaumui ida ba noho, sibomui emui ḡaukara ba kara, imamui amo ba ḡaukara, a haḡanimuiva heḡereḡerena.  
\v 12 Unu amo murimuri taudia vairadiai ba raka bena idia ese bae matauraimui, bona ḡau ta ai basio dabu.   
\s1 Mase taudia  
\p
\v 13 Varavaramai e, a uramu umui na basio daradara mase taudia daidiai; bona daramui basie doko, asi edia helaro taudia na heheto.  
\v 14 Ta abia daemu herevana binai: Iesu e mase, ma e tore isi lou. Benaini, Iesu enai e masemu taudia na Dirava ese ia ida baine hakaudia vareai mauri ai.  
\v 15 Badina be Lohiabada ena hereva a henimuimu, a tomu, Lohiabada ena mai dinana ai tanobada ai ta nohomu tauda ese mase taudia basita laidia oho.  
\v 16 Badina be Lohiabada na guba amo mai lolona ida baine diho; bona aneru badana danu mai gadona ida bona mai kibi be Dirava ena. Bena Iesu enai e mase taudia na hae tore isi guna;  
\v 17 gabeamo, doini tanobada ai ta maurimmu tauda baine abida isi, ori latadiai Lohiabada ida baita hedavari, guba padanai. Bena Lohiabada ida baita noho hebou hanaihanai.  
\v 18 Benaini, ini hereva daidiai ba hahegoada heheni.   
\c 5  
\s1 Lohiabada ma bainema  
\p
\v 1 Varavaramai e, nega bona laḡani herevadia na basia torelai henimui;  
\v 2 badina be umui dibamui Lohiabada ena dina na bainema, henao tauna hanuaboi ai e maimu na heto.  
\v 3 Idia baeto “Maino” bona “Namo” negana ai, hebuatari ese baine lasidia tao, hekamonai ese rogorogo hahinena e lasia taomu na heto; bena basie roho mauri diba.   
\p
\v 4 To, varavaramai e, umui na dia dibura taumui; una dina ese basine lasimui tao, henao tauna na heto.  
\v 5 Umui iboumui ai diari memeromui, dina memeromui: ita na dia hanuaboi ena, dia dibura ena.  
\v 6 Benaini, basita mahuta, haida e mahutamu na heto; a matada baita hapapa nega iboudiai, baita haheauka.  
\v 7 Mahuta taudia be hanuaboi ai e mahutamu, bona kekero taudia be hanuaboi ai e kekeromu.  
\v 8 A ita, dina tauda, baita haheauka; kemeda ai kamonai bona lalokau baita hadabualai, bona hahemauri helarona na kwarada ḡauna ai baita halaoa.  
\v 9 Badina be Dirava ena ura ita edai na dia badu; ena ura be hahemauri baita abia, eda Lohiabada Iesu Keriso bagunai  
\v 10 Ia na ita daidai e mase, bena nogada ai eiava mahutada ai ia ida baita noho hebou.  
\v 11 Taunabunai, ba hahealo heheni, ba hahegoada heheni, ina harihari o karamu heḡereḡerena.   
\s1 Sisiba herevadia  
\p
\v 12 Varavaramai e, a noimuimu, bogaragimui ai e ḡaukaramu bona Lohiabada ladana ai e reḡumuimu bona e sisiba henimuimu taudia na ba hakala henidia.  
\v 13 Bona edia ḡaukara dainai emui lalokau ai bavabidia dae. Ba hedaro boubou.   
\p
\v 14 Varavaramai e, a haḡanimuimu: noho kava taudia ba sisiba henidia, lalo-hesiku taudia ba hagoadadia, manoka taudia ba imudadia, taunimanima iboudiai ba haheauka henidia.  
\v 15 Ta ese dika na dika basine davalaia. Namo ba gavaia, bamomui edia bona taunimanima iboudiai edia.  
\v 16 Nega idoinai ba moale.  
\v 17 Ḡuriguri basio hadokoa.  
\v 18 Ḡau iboudiai daidiai Dirava ba hanamoa; badina be una na Dirava ena ura emui, Keriso Iesu bagunai.  
\v 19 Lauma na basio habodoa.  
\v 20 Peroveta herevadia basio dadarai.  
\v 21 Ḡau iboudiai ba diba toho: ḡau namona ba kahua tarika-tarika;  
\v 22 ḡau dikana ena amo ba raka oho.   
\s1 Hahetoni herevadia  
\p
\v 23 Maino Diravilla ese idoimui ai baine hahelaḡamui ḡuḡuru. Lalomui bona laumamui bona taumui ia ese baine dogodia tao, asi bebeka-bebekamui ba noho, ela bona eda Lohiabada Iesu Keriso bainema  
\v 24 E boirimuimu Tauna na momokani; ia ese baine karaia.   
\p
\v 25 Varavaramai e, ai daimai ai ba ḡuriḡuri.  
\v 26 Varavara iboudiai na haherahu helaḡana amo ba hanamodia.  
\v 27 Lohiabada ladana ai na haḡanimuimu, ina revareva na varavara iboudiai vairadiai ba duahia.   
\p
\v 28 Eda Lohiabada Iesu Keriso ena harihari-bada na emui ai baine mia.