\id GAL - Mekeo NT [mek] -Papua New Guinea 1998 (web version -2013 bd) 
\h Kalatia 
\toc1 Paulo Malele Epapua Kalatia Ago Kristiano Papiauꞌi Eeꞌiai Eulaisa Auga 
\toc2 Kalatia 
\toc3 Kal 
\mt1 Kalatia  
\mt2 Paulo Malele Epapua Kalatia Ago Kristiano Papiauꞌi Eeꞌiai Eulaisa Auga  
\c 1  
\p
\v 1 Lau apostolo Paulo. Lau auga papiau aumauni akeulaisau alamai, o kai agaꞌo aekinaniau aeulaisau alamai kai, Iesu Kristo ke Amaꞌa Deo Iesu maeai epamaunimue auga auniꞌi lau kekinaniau keulaisau lamai.  
\v 2 Lau iꞌina malelega lapapua, ke Kristiano papiauꞌi inae fou aagu auꞌi fou akamaisai laulaisa, oi Kalatia ago iifi eꞌa papiaumi eemi efai.   
\p
\v 3 Lau iꞌa Amaꞌa Deo ke aꞌa Lopia Iesu Kristo fou lamegamega peniꞌi, ega koa eꞌi gafegafe akaikiꞌa ke eꞌi gagao fou fekepenimi foagu felo laoma.  
\v 4 Ke iꞌa aꞌa Lopia Iesu Kristo papiau pau laomai apalaꞌi muniꞌiai kepea auꞌi laoꞌi maiꞌi eeꞌiai gapapealaiꞌa eoma puo, ifo imaauga elogoaina Deo epaꞌa penia iꞌa aꞌa laomai apalaꞌi fauꞌiai emae. Ke isa egaꞌina ekapaisa auga Amaꞌa Deo ega logoai anina eani auga kainai mo ekapaisa.  
\v 5 Deo ega koa ekapaisa auga, Au Akaikiꞌa fapamia faau afagaina faefuafua. Amen.   
\s1 Iifa Faunina Agaꞌomo Iꞌoina Agaꞌo Laaꞌi  
\p
\v 6 Iesu Kristo ega gafegafe kainai Deo oi eifanimi ega papiau omia kai, oi ofiaisakoa mo Deo eifanimi auga opuaꞌafuga iifa faunina iꞌoina agaꞌo muninai opea auga laisa lakauai alogaina.  
\v 7 Kai iifa gome auga, iifa faunina iꞌoina agaꞌo laaꞌi. Kai papiau isaꞌi oi alomi kepamaꞌo, ke isa iifa faunina Iesu Kristo fouga kegapaefo pagainia iꞌoina kegapamia keoma.  
\v 8 Kai lai o ufai agelo mo ganinagai, lai iifa faunina aifafou kakaua auga iꞌopoga mo afalainogonia koa aisama, lau Deo lagoi peni kapulania, ega koa lai o kaisau epifoge auga afa apala fepenia aoniamo laoma!  
\v 9 Ke maamiai aifa kakaua koa iꞌopoga, pau laifamue pugu. Aufalao agaꞌo lai iifa faunina Iesu fouga oi maamiai ainogonia, ke oi opakoꞌania auga iꞌopoga mo afaeinogonia koa aisama, lau Deo lagoi peni kapulania, ega koa isa afa apala fepenia aoniamo laoma!   
\p
\v 10 Ke pau papiau lau aniu kegaani laoma puo, egaꞌina lakapa, o Deo aniu gaani laoma puo egaꞌina lakapa ma? Ke lau papiau aloꞌi mapagama laoma puo, egaꞌina lakapa ma? Laaꞌi. Lau papiau mo aloꞌi mapagama paisa koa aisama, lau Iesu Kristo ega pinauga au falamia.   
\s1 Deo Paulo Eifaga Apostolo Emia Auga Fouga  
\p
\v 11 Aau akiu Kristiano papiaumi, lau iifa faunina Iesu fouga lainogonia auga papiau ifoꞌi opoꞌiai keopolaga kekapa auga laaꞌi. Egaꞌina auga oi amologo felo laoma.  
\v 12 Ke iifa faunina egaꞌina aufalao agaꞌo eegai alaafia, ke kai agaꞌo isafa egaꞌina iifaga aepamaleleniau kai, Iesu Kristo ifo egaꞌina iifaga epalogoniau.   
\p
\v 13 Gome lau Iudea papiauꞌi eꞌi kagakaga kainai lapea aisama, ala laoma auga aꞌo ologonia. Ke egaꞌina alogai, lau Deo ega iifi eꞌa papiauꞌi ala laafi apala omaꞌi, ke mapalifu afeꞌaina laoma auga fouga ologo.  
\v 14 Ke Iudea auꞌi aguꞌaꞌi lau fou inipomai agaꞌomo auꞌi epoꞌiai, lau auga isa maꞌoai lakaꞌegai afeꞌainiꞌi, ke alou imaau fofougai lai ufumai apamai eꞌi kagakaga maꞌoai mo kaiꞌiai lapea.  
\v 15 Kai lau alamauni koa kai, Deo ega gafegafe akaikiꞌa kainai ekinaniau ega iifa ipapea au famia eoma.  
\v 16 Ke Deo alo koꞌagai anina eani, Gauga lau epakinaisau, ega koa lau Iudea papiauꞌi laaꞌi auꞌi maaꞌiai iifa faunina Iesu fouga faifafoua eoma. Ega kainai lau kapaꞌina faifania auga fouga kai agaꞌo maauai aeifania alaifafoua.  
\v 17 Ke lau Ierusaleme taonina alalao, papiau lau agouai keufai apostolo kemia auꞌi isafa maaꞌiai lau kapaꞌina alaifafoua auga fouga alaifania. Kai lau fiakoa mo Arabia ago lalao, ke muniai kai lamue lamai Damaskus taoninai.   
\p
\v 18 Egae kai inipo oiso afegai, lau Peto maisa aunimai amaniniꞌani laoma puo, lalao Ierusaleme taonina, ke egae kina 15 fou aagu.  
\v 19 Ke egae laagu alogai, apostolo iꞌoiꞌi agaꞌo alaisaꞌi kai, Lopia akina James auga mo laisa.  
\v 20 Ke lau kapaꞌina lapapua eemi efai auga pifoge iifaga laaꞌi kai, Deo agogai iifa gome mo maamiai laifania.  
\v 21 Ke lau Ierusalemeai laagu afegai, lalao Siria ago, ke egaꞌina afegai lalao Silisia ago.  
\v 22 Ega kinagai Iudea agogai iifi eꞌa papiauꞌi Iesu Kristo kepakoꞌania auꞌi lau akelogoniau.  
\v 23 Kai isa lau fou papiau iina keifa oma auga mo kelogo: “Ufainagai au iꞌa eafi apalaniꞌa aꞌa pakoꞌa gapalifua eoma auga, pau eapae egaꞌina pakoꞌaga fouga einogonia,” keoma.  
\v 24 Ke Deo lau epaponiau auga fouga kelogo aisama, isa Deo keau afagaina.   
\c 2  
\s1 Apostolo Paulo Kelogoaina Isa Fou Kemia  
\p
\v 1 Egae kai inipo 14 elao afegai, laꞌagau Ierusaleme taonina lalao pugu kai, egaꞌina kinagai auga Banabas fou alao, ke Taitus isafa laafiia fou alao.  
\v 2 Ke lau ega lalao auga kai agaꞌo aepainiau malao aeoma kai, Deo ifo lau epalogoniau ega falao eoma puo lalao. Ke lalao egae alogai, papiau keopolaga iifi eꞌa au akaikiꞌaꞌi keoma auꞌi mo maaꞌiai lau Iudea papiauꞌi laaꞌi auꞌi maaꞌiai iifa faunina Iesu fouga lainogonia auga, ogefakeai isa mo maaꞌiai laifafoua. Gome aufalao agaꞌo iꞌina fouga afelogo aisama, eꞌu pinauga lakapa kakaua auga, ke pau lakapa auga fou aniꞌi afaeani puo afekaisapua, ke eꞌu pinauga egaꞌina auga kapa agaꞌo laaꞌi koa afemia auga maniꞌina lapaꞌaua. Ega kainai ega lakapa oma.  
\v 3 Kai Taitus lau fou Ierusaleme alao auga Grik auga. Ke isa maguaega faaga iifalaina aemia mo ganinagai, Ierusaleme iifi eꞌa au akaikiꞌaꞌi auꞌi isa akepaafia maguaega faaga iifalaina gamia akeoma.  
\v 4 Kai au isaꞌi lai keifa kapula penimai Taitus maguaega faaga iifalaina gamia keoma. Egaꞌina papiauꞌi auga pakoꞌa papiauꞌi koꞌaꞌi laaꞌi kai, kepifoge pakoꞌa papiauꞌi koa kekagakaga. Isa kemai auga lai Iudea papiauꞌi eꞌi kagakaga muninai apea ma auga kegaisa keoma. Ke kalaꞌafi auga ega au akaikiꞌa aina eafia koa iꞌopoga isa anina keani lai isa eꞌi kagakaga kainai amapea keoma. Ega puo isa ogefakeai kemai lai pakoꞌa papiaumai koꞌamai aumai emai laꞌafou alogai kekoko. Kai lai Iesu Kristo apakoꞌania kainai kagakaga egaꞌina kainai afalapea auga kapa agaꞌo laaꞌi.  
\v 5 Kai lai isa kapaꞌina keifania auga, kina maaga agaꞌomo mo ganinagai alapeniꞌi alaapakipo ainaꞌi alaafia, ega koa oi Iudea papiauꞌi eꞌi kagakaga ufaina egaꞌina muninai folopea kai, Iesu fouga koꞌa auga mo fopakoꞌania faefuafua aoma.   
\p
\v 6 Kai oi oopolaga au akaikiꞌaꞌi ooma auꞌi, lau kapaꞌina lainogonia auga laagai kapa agaꞌo akeogeaua fainogonia akeoma. Papiau keopolaga au agaꞌo au akaikiꞌa keoma auga, Deo isa ega keopola oma puo, isa au akaikiꞌa afaepamia. Gome Deo afeꞌa aeisa kai aloꞌa eisa. Ega kainai isa au akaikiꞌa, o au eꞌele ma ganinagai, lau eeuai auga isa iꞌoiꞌi agaꞌo laaꞌi.  
\v 7 Kai isa lau keisau auga, Peto iifa faunina Iesu fouga Iudea papiauꞌi maaꞌiai feifafoua pinauga Deo epeniia koa iꞌopoga, lau eꞌu pinauga auga iifa faunina Iesu fouga Iudea papiauꞌi laaꞌi auꞌi maaꞌiai faifafoua.  
\v 8 Gome Deo Peto eifaga apostolo emia, ega koa iifa faunina Iesu fouga Iudea papiauꞌi maaꞌiai eifafoua. Ega koa iꞌopoga mo Deo lau isafa eifaniau apostolo lamia, ega koa iifa faunina Iesu fouga Iudea papiauꞌi laaꞌi auꞌi maaꞌiai laifafoua.  
\v 9 Ke apostolo epoꞌiai James, Peto, Ioane auꞌi oiso, oi oopolaga iifi eꞌa ipalaoꞌi koa iꞌopoꞌi ooma auꞌi isafa, Deo ega gafegafe akaikiꞌa lau epeniiau auga keisa kelogo. Ega puo isa lau ke Banabas aunimai imamai keafiia. Ega koa kekapaisa auga isa Deo ega pinauga kekapa koa iꞌopoga, lai isafa isa koa iꞌopoꞌi Deo ega pinauga akapa auga gouga eemaisai kekapaisa. Egae kai maꞌoai apakoꞌania isa fekelao Iudea papiauꞌi maaꞌiai iifa faunina Iesu fouga fekeifafoua aoma, ke lai auga falao Iudea papiauꞌi laaꞌi auꞌi maaꞌiai iifa faunina Iesu fouga faifafoua aoma.  
\v 10 Kai isa kapa agaꞌomo kepainimai fakapa keoma auga, lai ulalu papiauꞌi faopolaniꞌi keoma. Kai lau egaꞌina kapa keifania auga, aufa kina alouai laopolaga makapa laoma.   
\s1 Paulo Peto Efinaisa  
\p
\v 11 Kai egaꞌina afegai, Peto emai Antiok taoninai aisama, maagai mo laifa lakaisapua, gome kapa agaꞌo ekapa lilifua laisa.  
\v 12 Au isaꞌi James eegai akemai koa kai, isa elao Iudea papiauꞌi laaꞌi auꞌi fou keaniani. Kai au egaꞌina James eegai kemai auꞌi kemai aisama, eapakipo Iudea papiauꞌi laaꞌi auꞌi eeꞌi aelao. Gome isa papiau isaꞌi maguaeꞌi faaga iifalaina iifaga muninai kepea auꞌi emaniꞌiainiꞌi.  
\v 13 Ke egaꞌina ekapaisa alogai, Iudea papiauꞌi isaꞌi isafa isa ega pifoge alogai keapauka, ke Banabas ganinagai kepagaga isa kekapa koa iꞌopoga ekapaisa.   
\p
\v 14 Kai lau isa ega kekapa oma laisaꞌi auga iifa faunina Iesu fouga koꞌa auga alogai kapaꞌina eifania auga akekapaisa laisa. Ega aisama lau isa maꞌoai agoꞌiai Peto lapainia lainaka, “Oi auga Iudea aumu. Ega mo ganinagai oi ifomu auga Iudea papiauꞌi eꞌi kagakaga maꞌoai mo kaiꞌiai alopea kai Iudea papiauꞌi laaꞌi auꞌi koa lokagakaga. Oi ega lokapa oma kai ala koa iꞌopoga Iudea papiauꞌi laaꞌi auꞌi opaafiꞌi, Iudea eꞌi kagakaga muniꞌiai kegapea ooma?   
\p
\v 15 “Iifa gome iꞌa auga Iudea guaꞌiai amauni kai, Iudea papiauꞌi laaꞌi laomai apalaꞌi kekapaꞌi auꞌi guaꞌiai alamauni.  
\v 16 Ke iꞌa Iudea papiauꞌa alogo iꞌa Moses ega iifa muninai apea kainai, Deo maagai alo opai auꞌa afalamia kai, Iesu Kristo agapakoꞌania aisama, alo opai auꞌa agamia. Ega puo iꞌa Iudea papiauꞌa isafa Iesu Kristo apakoꞌania, ega koa iꞌa Iesu Kristo apakoꞌania kainai alo opai auꞌa famia aoma. Kai Moses ega iifa kainai apea puogai alo opai auꞌa afalamia. Gome kai agaꞌo Moses ega iifa muninai epea mo kainai, alo opai auga afaemia.   
\p
\v 17 “Kai iꞌa Deo maagai alo opai auꞌa amamia aoma puo, Iesu Kristo apakoꞌania alogai, iꞌa Moses ega iifa muninai alapea. Ke iꞌa Moses ega iifa muninai alapea kainai, Iudea papiauꞌi keopolaga iꞌa auga Iudea papiauꞌi laaꞌi auꞌi, Moses ega iifa muninai akepea koa iꞌopoꞌi laomai apala ikapa auꞌa keoma. Ke isa akeifa Iesu iꞌa efogeiꞌa laomai apala ikapa auꞌa amia akeoma. Kai egaꞌina koꞌa ma? Laaꞌi, egaꞌina auga pifoge iifaga.  
\v 18 Kai lau Moses ega iifa kainai lapea alogai, kapa agaꞌo lakapulaisa auga, lau egaꞌina iifaꞌi maꞌoai muniꞌiai fapea auga aekainia, ega koa lau Deo maagai alo opai au famia auga isafa aekainia. Kai lau kapaꞌina laauoka auga, alapaapamue pugu aisama, lau Moses ega iifa alaaupea.  
\v 19 Gome lau Iesu lapakoꞌania aisama, Moses ega iifa kaiꞌiai pea laapakipo. Ega koa lakapaisa Moses ega iifa kainai alapea puo, Moses ega iifa eegai auga, lamae efua koa iꞌopoga. Ke pau Moses ega iifa kainai lamae, ega koa lau Deo faugai faagu laoma.  
\v 20 Kai lau Iesu Kristo kolotiai emae auga muninai lapea. Egaꞌina auga isa kolotiai emae koa iꞌopoga, lau isafa kolotiai lamae. Ke pau auga lau ifou kapaꞌina makapa laoma auga alakapa kai, Iesu Kristo alouai eague auga, lau kapaꞌina fakapa eoma auga mo lakapa. Isa lau aniu eani alogaina kainai aeumaka ifo imaauga Deo epaꞌa penia kolotiai emae, kaniau eagamauga. Ega puo pau agofaꞌai laague alogai, isa Deo Gauga lau epalagainiau auga alou koꞌagai lapakoꞌania.  
\v 21 Kai aufalao agaꞌo Moses ega iifa mo muninai gapea, ke Deo maagai alo opai auga gamia koa aisama, Iesu Kristo kolotiai emae auga kapa agaꞌo laaꞌi koa iꞌopoga femia. Kai Deo lau egafegafe peniau kainai Iesu lau fauai emae. Ega puo lau Deo ega gafegafe akaikiꞌa egaꞌina afalaumakalaina.   
\c 3  
\s1 Iesu Kristo Fopakoꞌania O Moses Ega Iifa Muninai Fopea  
\p
\v 1 Kristiano papiaumi Kalatia agogai oague aumi, oi kafoꞌo aumi! Lau oi lapamalelenimi aisama, Iesu Kristo kapa puo iꞌa maꞌoai fauꞌaisai kolotiai emae auga, maamiai laifa ofakae felo alogaina. Kai oi Iesu Kristo muninai fopea auga, kaisau opola apalaꞌiai alomi keaniia opomi kepamaꞌo, Iesu muninai pea oapakipo?  
\v 2 Lau anina laani kapa agaꞌomo oi eemiai malogo laoma. Oi Moses ega iifa muninai opea kainai, Deo ega Spiritu oafiia, o iifa faunina Iesu fouga aꞌo ologonia auga opakoꞌania kainai, Deo ega Spiritu oafiia?  
\v 3 Oi oꞌina mo aisama, Deo ega Spiritu epalagainimi Iesu opakoꞌania. Kai pau auga papiau aumauni ma kapulagai Deo maagai alo opai aumi omia ooma? Oi ega koa okapa, okafoꞌo alogaina!  
\v 4 Oi Iesu mo opakoꞌania puogai keafi apalanimi okiekie auga pau kapa agaꞌo laaꞌi ma amopamia ooma? Ke iifa gome oi okiekie aage mo ma?  
\v 5 Ke oi Moses ega iifa kainai opea puo, Deo ega Spiritu epeniimi, ke mirakulo epomiai ekapaiꞌi, o oi kapaꞌina aꞌo ologonia auga opakoꞌania puo Deo ega koa ekapaisa?   
\p
\v 6 Deo ega iifa pukagai Abraham fouga iina kepapua oma auga amoopolaga: “Abraham Deo epakoꞌania kainai, Deo isa epakoꞌania ega papiau epamia. Ke egaꞌina pakoꞌagai Abraham Deo maagai alo opai auga emia.”\x + \xo 3:6 \xt Genesis 15:6\x*  
\v 7 Ega kainai oi fologo kaisau Abraham koa iꞌopoga kemia Deo kepakoꞌania auꞌi, Abraham ufuga apa koꞌaꞌi kemia.  
\v 8 Gome ufainagai Deo ega iifa pukagai eifa kakaua koa iꞌopoga, muni Iudea papiauꞌi laaꞌi auꞌi isa akepakoꞌania aisama, Deo isa eꞌi pakoꞌa egaꞌina anina ageani. Ke egaꞌina pakoꞌagai Deo maagai isa alo opai auꞌi agepamiaꞌi eoma. Egae kai Deo iifa faunina egaꞌina Abraham maagai eifa kakaua einaka, “Agofaꞌa fofouga papiauꞌi oi munimuai akemai auꞌi oi faumuai kapa feloꞌi maꞌo akeafiꞌi,”\x + \xo 3:8 \xt Genesis 12:3; 18:18; 22:18\x* eoma.  
\v 9 Ke Deo ega eifa oma puo, Abraham Deo epakoꞌania aisama, kapa feloꞌi maꞌo Deo eegai eafiiꞌi. Ega koa iꞌopoga kaisau Deo kepakoꞌania auꞌi, Deo Abraham eegai ekapa koa iꞌopoga, isa isafa faagaꞌiai ega koa agekapa.   
\p
\v 10 Ke papiau maꞌoai Moses ega iifa muninai kepea auꞌi, egaꞌina iifaꞌi maꞌoai kaiꞌiai fekepea auga afaekaina puo, Deo isa afa apala agepeniꞌi aoniamo. Gome Deo ega iifa pukagai iina kepapua oma: “Kaisau Moses ega iifa maꞌoai mo muniꞌiai afaepea mo afaelao koa aisama, Deo isa afa apala agepenia aoniamo,”\x + \xo 3:10 \xt Deuteronomy 27:26\x* keoma.  
\v 11 Iifa gome kai agaꞌo Moses ega iifa kainai epea puo Deo maagai alo opai auga aemia, gome Deo ega iifa pukagai iina kepapua oma: “Papiau Deo kepakoꞌania auꞌi Deo maagai aloꞌi opaina agemia, ke agu pagai maunina akeafia.”\x + \xo 3:11 \xt Habakuk 2:4\x*  
\v 12 Deo ega iifa Moses epeniia, ke Moses iifa egaꞌina eafiia papiau epeniiꞌi alogai, epainiꞌi aufa kina mo egaꞌina iifaꞌi maꞌoai kaiꞌiai fekepea eoma. Kai egaꞌina iifaꞌi alogai aeifa isa Deo mo fekepakoꞌania aeoma. Kai Deo ega iifa pukagai iina kepapua oma ekae: “Kaisau Moses ega iifa maꞌoai kaiꞌiai agepea auga, Deo eegai agu pagai maunina ageafia,”\x + \xo 3:12 \xt Lefitikus 18:5\x* keoma.  
\v 13 Kai iꞌa Moses ega iifa maꞌoai kaiꞌiai agapea afaekaina, ke maꞌoai kaiꞌiai afalapea. Ega mo ganinagai Isa iꞌa aoniamo afa apala aepeniꞌa kai, aꞌa laomai apala afa Iesu epeniia, isa kolotiai emae afaꞌa eogeisa. Gome kolotiai kemae auꞌi fouꞌi Deo ega iifa pukagai iina kepapua oma: “Kaisau kolotiai emae auga, Deo isa ega laomai apala afa epenia aoniamo.”\x + \xo 3:13 \xt Deuteronomy 21:23\x*  
\v 14 Iesu iꞌa fauꞌaisai ega koa ekapaisa, ega koa Abraham maagai pakoꞌa iifaga ekapaisa eifa Deo ega gafegafe agepenia eoma auga, Iudea papiauꞌi laaꞌi auꞌi isafa Iesu akepakoꞌania aisama, gafegafe egaꞌina fekeafia eoma. Ke iꞌa isafa Iesu agapakoꞌania aisama, Deo pakoꞌa iifaga iꞌa eeꞌaisai ekapaisa eifa, ega Spiritu agepeniꞌa eoma auga agepeniꞌa.   
\s1 Deo Ega Pakoꞌa Iifaga Ke Moses Ega Iifa Fou Fouꞌi  
\p
\v 15 Aau akiu Kristiano papiaumi, pau kapa agaꞌo iꞌa aꞌa agu alogai emia auga alaafi opo fouga alaifania. Papiau auniꞌi pakoꞌa kapula niniꞌanina kekapaisa, ke auniꞌi kepakoꞌania pakoꞌa kapula niniꞌanina egaꞌina afakeaupea keoma. Ke isa auniꞌi papiau aumauni mo ganinagai, pakoꞌa kapula niniꞌanina egaꞌina kekapaisa auga, kai agaꞌo aage isa auniꞌi eꞌi pakoꞌa kapula niniꞌanina egaꞌina afaeaupea. Ke kai agaꞌo pakoꞌa kapula niniꞌanina egaꞌina laagai niniꞌani mamaga agaꞌo afakeogeaua.  
\v 16 Ega koa iꞌopoga Deo Abraham maagai pakoꞌa iifaga kapula ekapaisa, ke Abraham ufuga apa auga isafa maagai pakoꞌa iifaga kapula egaꞌina ekapaisa. Ke pakoꞌa iifaga egaꞌina auga, Deo ega iifa pukagai aeifa, Abraham oi ufumu apamu maꞌoai maaꞌiai pakoꞌa iifaga kapula lakapaisa aeoma kai, Deo Abraham epainia einaka, “Oi ufumu apamu eegai pakoꞌa iifaga lakapa,” eoma. Egaꞌina auga isa Abraham ufuga apa fofouga maaꞌiai pakoꞌa iifaga kapula aekapaisa kai, Abraham ufuga apa agaꞌomo mo maagai pakoꞌa iifaga kapula ekapaisa. Ke egaꞌina papiauga agaꞌomo auga, Iesu Kristo.  
\v 17 Lau kapaꞌina maifania laoma auga, Deo Abraham maagai pakoꞌa iifaga kapula ekapaisa, ke isa epakoꞌania pakoꞌa iifaga egaꞌina laaꞌi afaepamia eoma. Kai inipo 430 elao afegai, Deo ega iifa Moses epeniia Iudea papiauꞌi egaꞌina iifaga kainai fekepea eoma. Deo egaꞌina iifaga Iudea papiauꞌi epeniiꞌi mo ganinagai, pakoꞌa iifaga kapula ekapa kakaua auga aeaꞌinia iꞌoina aekapaisa.  
\v 18 Iꞌina iifaga koꞌa ipauma. Papiau Moses ega iifa kainai kepea puo, Deo epakoꞌania kapa feloꞌi agepeniꞌi eoma koa aisama, kapaꞌina isa epeniiꞌi apuꞌi emia auga, isa ega pakoꞌa iifaga ekapa auga eegai aemai. Gome Deo Abraham Moses ega iifa kainai epea puo kapa feloꞌi aepenia kai, Deo pakoꞌa iifaga kapula ekapaisa auga kainai, Abraham kapa feloꞌi epeniia.   
\p
\v 19 Ega koa aisama, kapa puo Deo ega iifa Moses epeniia, Iudea papiauꞌi fepeniꞌi kaiꞌiai fekepea eoma? Gome Deo anina eani papiau laomai apalaꞌi, ke feloꞌi Isa agogai kekapaꞌi auga fepakinaꞌi, ega koa Isa maagai laomai feloꞌi mo fekekapaꞌi eoma. Ke papiau Deo ega iifa egaꞌina kaiꞌiai fekepea mo felao, Deo Abraham maagai pakoꞌa iifaga ekapaisa eifa Iesu Kristo Abraham okogai agemai auga femai kai eoma. Kai Deo ega iifa Iudea papiauꞌi epeniiꞌi alogai, Isa ifo aemai aepipeni kai ega agelo eulaiꞌi kemai ega iifa Moses kepeniia. Egae kai Moses egaꞌina iifaga eafiia elao papiau epeniiꞌi. Moses ega koa ekapaisa auga isa Deo papiau fou epoꞌiai eapa apie apie eꞌi iifa ipapea auga emia.  
\v 20 Kai Deo Abraham maagai pakoꞌa iifaga kapula ekapaisa, ke eifa kapa feloꞌi Abraham agepenia eoma aisama, Isa ifo emai Abraham maagai eniniꞌani. Iifa gome kai agaꞌo Deo Abraham fou epoꞌiai feapa apie apie eꞌi iifa ipapea auga femia apuga laaꞌi. Kai aufalao agaꞌo ipuainagai eapa apie apie eꞌi iifa ipapea auga emia auga, apie apie elao kapaꞌina keifania auga kekapa ma auga eisa.   
\p
\v 21 Ega koa aisama Moses ega iifa auga Deo pakoꞌa iifaga kapula ekapaisa auga auniꞌi epoꞌiai kepipaini koa ma? Laaꞌi. Isa auniꞌi epoꞌiai ega aemia oma. Gome Deo ega iifa epipeni auga alogai gaifa papiau kegaagu aoniamo gaoma koa aisama, iifa gome kaisau iifa egaꞌina muninai kepea auꞌi Deo maagai alo opai auꞌi fekemia.  
\v 22 Kai Deo ega iifa puka alogai kepapua keifa agofaꞌa fofouga papiauꞌi laomai apalaꞌi mo keguakaeainiꞌi kaiꞌiai kepea. Ega puo kai agaꞌo Moses ega iifa muninai epea mo puogai Deo maagai alo opai auga agemia afaekaina. Kai ega pakoꞌa kapula Iesu Kristo mo eegai ageoge aisama, Iesu isa laomai apalaꞌi eegai agepapealaisa. Ke egaꞌina papiauga mo Deo Abraham, ke ufuga apa maaꞌiai pakoꞌa iifaga kapula ekapaisa eifa kapa feloꞌi agepeniꞌi eoma auga isa isafa ageafia.   
\p
\v 23 Iꞌa Iesu Kristo alapakoꞌania koa kai, Moses ega iifa iꞌa egopeiꞌa kaiꞌiai apea. Ega koa emia auga tipula eꞌa keꞌima auꞌi tipula papiauꞌi keꞌimaꞌi koa iꞌopoga, Moses ega iifa ega eꞌima omaiꞌa. Ega koa mo emia emai Deo iꞌa afa apala egaꞌina fepeniꞌa auga eegai ala fapealai oma auga keagaga epalogoniꞌa.  
\v 24 Ega puo Moses ega iifa auga pamalele auga koa emia epamaleleniꞌa kapaꞌina fakapa, ke kapaꞌina falakapa Deo maagai alo opai auꞌa famia auga keagagai epapeaiꞌa. Ega koa mo emia emai Iesu Kristo emai, iꞌa apakoꞌania kainai, Deo maagai kapaꞌina fakapa alo opai auꞌa famia auga keagaga epakinaiꞌa.  
\v 25 Ke pau iꞌa aꞌa pakoꞌa Iesu Kristo mo eegai faoge auga kina emai efua. Ke iꞌa Iesu Kristo apakoꞌania puo Moses ega iifa iꞌa fepainiꞌa kapaꞌina fakapa o falakapa, ega koa Deo maagai alo opai auꞌa famia auga kina pau efua.   
\s1 Iꞌa Iesu Apakoꞌania Puo Deo Gauga Amia  
\p
\v 26 Ke pau oi maꞌoai Iesu Kristo opakoꞌania kainai oi Deo gauga omia.  
\v 27 Gome oi maꞌoai Iesu akagai baptismo oafiia aisama, Iesu tiapu koa iꞌopoga oiꞌiuka. Ega koa emia oi Iesu fou agaꞌomo omia.  
\v 28 Ke oi Iesu fou agaꞌomo omia aisama, oi papiau kapami auga kapa agaꞌo laaꞌi. Oi Iudea aumi, o Iudea aumi laaꞌi ma, o oi papie o au ma, o oi kalaꞌafi o papiau aagemu ma ganinagai, oi maꞌoai Iesu apuga.  
\v 29 Ke oi Iesu Kristo opakoꞌania kainai, oi auga Abraham ufuga apa koꞌami. Ega puo Deo Abraham maagai pakoꞌa iifaga kapula ekapaisa alogai kapaꞌina agepenia eoma auga, oi isafa agoafiꞌi.   
\c 4  
\pc
\v 1 Lau kapaꞌina maifania laoma auga inaꞌina. Maami galao au agaꞌo gauga fou amoisaꞌi. Ama ageoge ega kapa maꞌoai gauga agepenia. Kai isa gauga aeapao aeminifaꞌa koa puo, ama ega kapa maꞌoai feafiꞌi auga afaekaina. Ke gauga kina agaꞌogai ageapao aisama, ama ega kapa maꞌoai ageafiꞌi apuga akemia mo ganinagai, pau auga isa apuga laaꞌi kai, isa kalaꞌafi koa iꞌopoga emia.  
\v 2 Ke isa aeminifaꞌa puo, papiau isa keꞌima auꞌi papaꞌiai emia, ke papiau isa ama ega amu maꞌoai keꞌimaꞌi auꞌi isafa papaꞌiai emia elao ama kina epaapa auga kina ekaina kai, isa ifo ega amu maꞌoai eꞌimaꞌi.  
\v 3 Ega koa iꞌopoga Iesu Kristo alapakoꞌania koa kai, iꞌa maꞌoai auga, kalaꞌafi koa iꞌopoꞌa amia, ifoꞌa aꞌa kagakaga ke logo ufaiꞌi fou papaꞌiai aagu kalaꞌafi koa iꞌina agofaꞌagai alao amai.  
\v 4 Kai Deo kina epaapa auga kina ekainia aisama, Gauga eulaisa emai iꞌina agofaꞌagai. Ke papiau maꞌoai inaꞌi guaꞌiai kemauni koa iꞌopoga, isa isafa ina guagai emauni. Ke isa Iudea papiauꞌi koa, Moses ega iifa papagai emauni.  
\v 5 Kai Deo isa eulaisa auga, Moses ega iifa kainai fepea puo aeulaisa aemai kai, papiau kapaꞌi Moses ega iifa papagai kalaꞌafi koa kemia auꞌi afaꞌi feoge fepapealaiꞌi eoma puo emai. Ega koa fekapa iꞌa isa gauga koꞌaꞌa famia kapaꞌina iꞌa apuꞌa eoma auga faafia eoma.  
\v 6 Ke oi Deo gauga kainai Deo ega Spiritu Iesu Kristo eegai eka auga, pau oi epeniimi alomiai ekae. Ke Deo ega Spiritu iꞌa Deo gauga auga epalogoniꞌa kainai, iꞌa alogamai Deo aifaga, “Abba, oi lai Amamai” aoma.  
\v 7 Ega puo oi maꞌoai Moses ega iifa papagai kalaꞌafi fomia kainai fopea auga kina efua. Oi auga Deo gauga. Ke oi maꞌoai Deo gauga kainai, Deo Gauga kapa maꞌoai agepenia aisama, oi isafa egaꞌina kapaꞌi agepenimi.   
\s1 Paulo Ega Opopo Akaikiꞌa Kalatia Papiauꞌi Eeꞌiai  
\p
\v 8 Kai ufainagai oi Iesu Kristo alopakoꞌania alogai Deo koꞌa auga alologonia. Egaꞌina kinagai oi kalaꞌafi koa omia papiau aumauni deo koꞌaꞌi laaꞌi auꞌi oau afagainiꞌi.  
\v 9 Kai pau auga oi Deo koꞌa auga ologonia efua, o Deo oi elogonimi efua maoma. Ke oi elogonimi efua koa aisama, kapa puo oi Deo koꞌa auga omunia kai, emi kagakaga ufaiꞌi afakepalagainimi kaniami afakeagamauga auꞌi kaiꞌiai opea pugu? Oi anina oani kagakaga egaꞌina papaꞌiai amoagu kalaꞌafi koa amomia pugu ma ooma?  
\v 10 Oi Deo maagai alo opai aumi amomia ooma puo, Iudea papiauꞌi eꞌi kagakaga oafiꞌi kaiꞌiai opea. Ke kagakaga egaꞌina kaiꞌiai opea alogai, Iudea papiauꞌi Deo keau afagaina kinagai mo Deo oau afagaina. Ke isa kekapa koa iꞌopoga okapa aufa gafai omiamia, ke eꞌi miamia kinaꞌi akaikiꞌaꞌi isafa kinaꞌiai omiamia, ke inipoai isafa omiamia.  
\v 11 Lau oi kapa maꞌoai maamiai laifa ofakae felo alogaina. Kai pau oi kapaꞌina okapa auga laisa lamaniꞌi, gome eꞌu pinauga egae lakapaisa auga lakapa aagenia mo koa laisa.   
\p
\v 12 Aau akiu Kristiano papiaumi, oi Iudea papiauꞌi eꞌi kagakaga ufaiꞌi auꞌi kaiꞌiai alopea koa iꞌopoga, lau isafa kagakaga ufaiꞌi egaꞌina kaiꞌiai alapea. Ega puo lagoi peni kapulanimi, lau oi koa iꞌopomi lamia kainai, oi isafa lau koa iꞌopou fomia, kagakaga egaꞌina kaiꞌiai folopea laoma. Ke lau oi eemi lafai kakaua aisama, oi lau aloumakalainiau, ke eeuai kapa apala agaꞌo alokapaisa.  
\v 13 Ke oi ologo lau eꞌu isafa kainai oi emi taoni lafai kaukau. Ke egaꞌina kinagai lau oi maamiai iifa faunina Iesu fouga laifafoua.  
\v 14 Ke egaꞌina kinagai lau laisafa kainai, oi lau aniu amoani auga afaꞌagamo eꞌinoka. Ke emia foumakalainiau koa iꞌopoga. Kai oi lau aloisa papaisau, ke aloumakalainiau isafa. Kai oi lau Deo ega agelo agaꞌo koa opamiaisau oifa kokoisau. Ke lau oifa koko felo alogainiau puo, ega koa okapaisa auga Iesu Kristo koa oifa koko.  
\v 15 Ke lau oi eemi lafai kaukau mo kinagai iifa faunina Iesu fouga laifafoua aisama, Deo ega gafegafe akaikiꞌa eemi efai auga alogama akaikiꞌa opaꞌaua. Ke alomi egama alogaina puo maami ganinagai foꞌiulaisa lau fopeniau fekaina. Iifa gome egaꞌina auga aufalao agaꞌo maagai faifania fekaina. Kai pau oi emi alogama lau eeuai auga ala elao?  
\v 16 Ke pau auga lau iifa faunina Iesu fouga koꞌa mo auga maamiai laifafoua puo, oi emi ou lamia ma? Laaꞌi, lau oi emi ou alamia.   
\p
\v 17 Kai oi fologo papiau egaꞌina oi maamiai iifa iꞌoina keifafoua auꞌi, oi kegalaꞌa pagainimi isa fou amomia keoma puo, egaꞌina kekapa. Ke isa kapa agaꞌomo anina keani auga, oi lau kapaꞌina lapamalelenimi auga kaiꞌiai folopea kai, alomi koꞌagai isa mo muniꞌiai amopea keoma.  
\v 18 Kai lau oi fou faagu, o fou falaagu mo ganinagai, aufa kina aufalao agaꞌo alo felogai gapalagainimi ageoma koa aisama, oi alomi koꞌagai isa muninai amopea ageoma auga felo.  
\v 19 Gauagai, lau oi laopolanimi aisama, papie agaꞌo mauniai ekiekie koa iꞌopoga kiekiemi ega lapaꞌau oma. Ke kiekiemi alapaꞌaua afaefua agelao, oi Iesu Kristo koa iꞌopoga agomia kai alaapakipo.  
\v 20 Kai pau auga lau ala mo maoma mafai oi fou amaagu, ega koa kapaꞌina epaopopoimi auga, niniꞌani felogai maamiai faifania laoma. Gome oi eemiai laopopo alogaina.   
\s1 Haga Ke Sara Auniꞌi Fouꞌi  
\p
\v 21 Amoifa! Oi kaisau mo anina oani Moses ega iifa papagai amoagu ooma aumi, Moses ega iifa kapaꞌina eifania auga alologo ma?  
\v 22 Gome Moses ega iifa Deo ega iifa puka alogai iina kepapua oma: Abraham gauga maguaeꞌi auniꞌi. Imoi agaꞌo auga Abraham akafa ega kalaꞌafi ifiaoga epamauga. Ke agaꞌo auga isa akafa ipauma kalaꞌafi laaꞌi auga epamauga.  
\v 23 Imoi egaꞌina auniꞌi kaiꞌialao Abraham gauga. Kai isa auniꞌi eꞌi mauni iꞌopoga mo laaꞌi. Kalaꞌafi ifiaoga gauga auga, pau papieꞌi imoi kepamauniꞌi koa epamauga kai, Abraham akafa imoi epamauga auga, Deo ega pakoꞌa iifaga kapula Abraham eegai ekapaisa auga kainai emauni.   
\p
\v 24 Imoi egaꞌina auniꞌi faagaꞌiai Deo pakoꞌa iifaꞌi kapulaꞌi auniꞌi papiau eeꞌiai ekapa auga kepakinaiꞌa. Gome papie auniꞌi auga, pakoꞌa iifaga kapulaꞌi auniꞌi Deo papiau eeꞌiai ekapa auga koa iꞌopoꞌi. Kalaꞌafi papiega auga aka Haga. Isa auga Deo Sinai ikugai pakoꞌa iifaga kapula Moses maagai ekapa auga koa iꞌopoga. Ke kalaꞌafi papieꞌi imoi kepamauniꞌi auꞌi kalaꞌafi kemia.  
\v 25 Ke Haga auga, Moses Deo auniꞌi epoꞌiai pakoꞌa iifaga Arabia agogai Sinai ikugai kekapa auga eifania. Ke papiau maꞌoai Ierusaleme taoninai keagu auꞌi, Haga kalaꞌafi papiega auga gauga koa iꞌopoꞌi keoma. Ke isa Moses ega iifa maꞌoai kaiꞌiai fekepea.  
\v 26 Kai Abraham akafa kalaꞌafi laaꞌi auga, Ierusaleme taonina ufai ekae auga koa iꞌopoga. Isa aka Sara. Isa auga iꞌa inaꞌa.  
\v 27 Gome egaꞌina fouga ufainagai profeta Aisaea Deo ega iifa pukagai iina epapua oma:  
\q1 “Oi papie kapamu loogeoge aumu alomu gagama!  
\q2 Oi alomu gamagai mo moagaga pea!  
\q1 Gome oi imoi alopapamauga, ke kiekie gamuga aloopopo mo ganinagai,  
\q2 oi gaumu akealogai papie eamage auga gauga alokaꞌegainiꞌi.” \rq Aisaea 54:1\rq*   
\p
\v 28 Ke aau akiu Kristiano papiaumi, Deo Abraham maagai pakoꞌa iifaga kapula ekapaisa Aisak emauni koa iꞌopoga, pau oi auga pakoꞌa kapula egaꞌina imoimi.  
\v 29 Kai ega kinagai papie imoi kepamauniꞌi koa mauninai emauni auga eoge, imoi Deo ega pakoꞌa iifagai Deo ega Spiritu isapugai emauni auga eafi apalania. Ke kapaꞌina ega kinagai egama auga, pau iꞌopoga mo egama. Papiau kapaꞌi Moses ega iifa muninai kepea auꞌi keoge, Iesu kepakoꞌania papiauꞌi keafi apalaniꞌi.  
\v 30 Kai Deo ega iifa puka alogai iꞌina kapaꞌi fouꞌi ala kepapua omaꞌi auga fologo. Deo ega iifa pukagai iina kepapua oma: “Kalaꞌafi papiega gauga fou mopapealaiꞌi. Gome kalaꞌafi papiega gauga auga, Abraham ega amu agaꞌo afaeafia mo laaꞌi. Kai Abraham akafa ipauma kalaꞌafi laaꞌi auga gauga ama Abraham ega amu maꞌoai ageafiꞌi,”\x + \xo 4:30 \xt Genesis 21:10\x* eoma.  
\v 31 Deo ega iifa pukagai ega eifa oma kainai, aau akiu Kristiano papiaumi, iꞌa auꞌa kalaꞌafi papiega gauga laaꞌi kai, kalaꞌafi papiega laaꞌi auga gauga.   
\c 5  
\s1 Iesu Opakoꞌania Aisama Oi Kalaꞌafi Laaꞌi  
\p
\v 1 Ke Iesu Kristo iꞌa Moses ega iifa kaiꞌiai fapea auga eegai epapealaiꞌa kainai, iꞌa kalaꞌafi koa Moses ega iifa papagai faagu alo opai auꞌa famia auga afaekaina. Ega puo oi ifomi alomi fopakapulania emi pakoꞌai foapa kapula, ega koa kai agaꞌo Moses ega iifai faegopeimi, ke kalaꞌafi koa kaiꞌiai fopea auga meauga faepenimi pugu.   
\p
\v 2 Lau kapaꞌina laifaniꞌi auꞌi foopolaniꞌi. Lau Paulo oi lapainimi. Oi Iudea papiauꞌi isaꞌi eꞌi kagakaga kainai kepea maguaeꞌi faaga iifalaina emia auꞌi koa agomia, maguaemi faaga iifalaina agemia koa aisama, Iesu Kristo oi faumiai kapaꞌina ekapaisa auga, oi eemiai egaꞌina ekapa aagenia mo koa iꞌopoga.  
\v 3 Kai kaisau maguaeꞌi faaga iifalaina emia efua auꞌi, lau isa lapaini kapulania Moses ega iifa maꞌoai kapaꞌina eifania fekekapa eoma auꞌi fekekapaꞌi.  
\v 4 Ke oi kaisau Moses ega iifa muninai opea kainai, Deo maagai alo opai aumi omia ooma aumi, oi ifomi Iesu Kristo omunia. Ke Deo ega gafegafeai oi alo opai aumi fomia auga oumakalaina.  
\v 5 Kai iꞌa auga alogo Deo iꞌa alo opai auꞌa agepamiaiꞌa auga fouga Deo ega Spiritu iꞌa epalogoniꞌa. Ega puo iꞌa aꞌa pakoꞌai, aloꞌa koꞌagai kina kapagai Deo iꞌa alo opai auꞌa agepamiaiꞌa auga, kina afiaꞌamaga aafiaꞌama.  
\v 6 Gome Iesu Kristo apakoꞌania aisama, au kapa maguaega faaga iifalaina emia, o aemia mo ganinagai, Deo maagai auga kapa agaꞌo laaꞌi. Kai kapa akaikiꞌa auga, oi emi pakoꞌa fofouga Iesu Kristo mo eegai fooge. Ke alomi koꞌagai papiau isafa aniꞌi foani.   
\p
\v 7 Mamagai mo aisama, oi iifa faunina Iesu fouga koꞌa auga alomi koꞌagai opakoꞌania. Ega koa okapaisa auga, oi pipalau felogai opiau koa iꞌopoga. Kai kaisau oi alomi eaniia iifa faunina Iesu fouga koꞌa auga eegai ekaisapuimi kainai alopea?  
\v 8 Oi fologo aloani ega koa iꞌopoga auga, Deo oi eifanimi apuga epamiaimi auga eegai aemai.  
\v 9 Gome papiau egaꞌina ega pamalele auga, palafa iuma mulamula afaꞌagamo palafai keoge ganinagai, palafa epaufua koa iꞌopoga, isa ega pamalele kapa eꞌele koa ganinagai, oi iifa faunina Iesu fouga opakoꞌania auga iifaga epaefo pagainia efiakoa.  
\v 10 Kai lau iꞌa aꞌa Lopia lapakoꞌania isa oi agepalagainimi pamalele iꞌoina agaꞌo afolopakoꞌania. Ke papiau kapa pamalele pifogegai oi alomi epamaꞌo auga, isa papiau kapa femia ma ganinagai, Deo isa afa apala agepenia.   
\p
\v 11 Aau akiu Kristiano papiaumi, papiau isaꞌi keifa lau papiau maꞌoai maguaeꞌi faaga iifalaina gouga pamalelega lapamalelenia keoma. Kai lau ega mapamalele oma koa aisama, kapa puo Iudea papiauꞌi lau fekeafi apalaniau? Kai lau lapamalele laifa, Iesu Kristo iꞌa fauꞌaisai kolotiai emae, ega koa Deo maagai alo opai auꞌa amia laoma puo, Iudea papiauꞌi guaꞌi lapakupua koa iꞌopoga, ke isa lau keafi apalaniau.  
\v 12 Ke papiau kapaꞌi eꞌi pamaleleai oi alomi kepamaꞌo auꞌi, lau anina laani isa ifoꞌi maguaeꞌi fofouga fekeafilaisa, ega koa isa Deo ega papiau fakemia laoma.   
\p
\v 13 Aau akiu Kristiano papiaumi, Deo eifalaimi Moses ega iifa papagai epapealaimi ega papiau epamiaimi. Kai oi alomiai foloopolaga papiau aumauni eꞌi laomai apala auga agokapa agekaina folooma. Kai pau auga oi alomi koꞌagai agaꞌo agaꞌo animi foani. Ke animi agoani alogai, alomi koꞌagai agaꞌo agaꞌo fopalagainimi.  
\v 14 Gome Deo ega iifa maꞌoai ekapaiꞌi alogai, iifa agaꞌomo laagai ega iifa maꞌoai ekapaiꞌi. Egaꞌina iifaga auga, “Oi alomi koꞌagai ifomi animi oani koa iꞌopoga, papiau maꞌoai isafa aniꞌi ega foani oma,” eoma.  
\v 15 Kai aꞌo aꞌiꞌi ifoꞌi mo kepiaga aisama, faagaꞌi kea kaniniꞌi, ke ifoꞌi keꞌiꞌiniꞌi koa iꞌopoga agokapa aisama, foisa felo, o laaꞌi koa aisama, ifomi mo agoauoka afeꞌainimi.   
\s1 Deo Ega Spiritu Aguga  
\p
\v 16 Pau lau oi lapaini kapulanimi. Oi Deo ega Spiritu kapaꞌina eifania fokapa eoma auga mo fokapa, ke agugai foagu. Ke ega agokapa oma koa aisama, papiau aumauni laoga maina apala oi afaefogeimi kapaꞌina anina eani auga afolokapa.  
\v 17 Gome kapaꞌina Deo ega Spiritu anina eani auga, papiau aumauni laoga maina apala anina aeani. Ke papiau aumauni laoga maina apala kapaꞌina anina eani auga, Deo ega Spiritu anina aeani. Ega koa kekapa auniꞌi epoꞌiai kepipaini. Ega puo Deo ega Spiritu oi agepapeaimi aisama, papiau aumauni laoga maina apala kapaꞌina eifania auga afolokapa. Ke papiau aumauni laoga maina apala oi agepapeaimi koa aisama, Deo ega Spiritu kapaꞌina eifania auga afolokapa.  
\v 18 Kai Deo ega Spiritu oi agepapeaimi koa aisama, oi Moses ega iifa papagai afoloagu.   
\p
\v 19 Ke papiau aumauni laoga maina apala kapaꞌina eifania kekapa auga agoisa ofakaenia mo agologo agofiakoa. Egaꞌina kapaꞌi auga: Amage papiauꞌi kai papiau iꞌoina agaꞌo fou akeamage auga fou kefeu aage mo auꞌi. Ifiao oꞌoae fou kefeu aage mo auꞌi. Ke papiau amage koa laoꞌi maiꞌi apalaꞌi ipaumaꞌi kekapaꞌi auꞌi.  
\v 20 Ke deo pifogeꞌi keau afagainiꞌi, ke ugauga kekapa auꞌi. Ke papiau maꞌo aniꞌi akeani, ke agaꞌo agaꞌo fou keakekua kepikupa auꞌi. Ke papiau isaꞌi eeꞌiai guaꞌi ekupu auꞌi. Ke kapa maꞌoai ifoꞌi mo fauꞌiai kekapa auꞌi. Ke ifoꞌi mo epoꞌiai keꞌeaꞌi papiau isaꞌi fou keakekua auꞌi. Ke papiau isaꞌi eꞌi laꞌafou alogai ifoꞌi mo kepapealaiꞌi auꞌi.  
\v 21 Ke papiau agaꞌo eegai kapa agaꞌo eka keisa aisama, kepikupa ke alafai kegaoma kegaafia keoma auꞌi. Ke keinuinu alogaina auꞌi. Ke kemiamia keinuinu, ke kegefa aꞌoaꞌo akaikiꞌaꞌi ipaumaꞌi kekapaꞌi auꞌi. Ke kapa isaꞌi isafa ega koaꞌi auꞌi mo kekapakapaꞌi auꞌi. Kai lau oi ainami lapalogo kakaua koa iꞌopoga, pau ainami lapalogo pugu. Papiau kapaꞌi inaꞌina laoꞌi maiꞌi kekapaꞌi auꞌi, Deo ega agofaꞌa afakeafia.   
\p
\v 22 Kai papiau Deo ega Spiritu aloꞌiai eagu auꞌi iina kekapa oma: Isa aloꞌi koꞌagai agaꞌo agaꞌo aniꞌi keani. Ke isa alogamai mo kelao kemai. Isa papiau fou gagaoai keagu. Ke papiau isa aloꞌi kepakiekie aisama, eꞌi alo kiekie keafiapia mo. Ke isa papiau kegafegafe peniꞌi. Ke isa papiau eeꞌiai laomai felo mo kekapa. Ke isa iifa koꞌa mo keifania, ega koa papiau isa kepakoꞌaniꞌi.  
\v 23 Ke isa papiau gagafeꞌi mo keafia. Ke isa ifoꞌi keisaꞌi, ke keꞌima feloꞌi. Papiau iꞌina laoꞌi maiꞌi fekekapaꞌi auga, agofaꞌa alogai kai agaꞌo aeifa apuꞌi.  
\v 24 Ke kaisau Iesu Kristo ega papiau kemia auꞌi, papiau aumauni laoga maina apala kapaꞌina eifania auga akekapa. Kai Iesu Kristo isa fauꞌiai kolotiai emae koa iꞌopoga, isa papiau aumauni laoga maina apala kapaꞌina anina eani, ke emaaniꞌi auꞌi maꞌoai Iesu Kristo fou kolotiai keauꞌuꞌuꞌi. Ega koa kekapa puo, isa kelogo papiau aumauni laoga maina apala egaꞌina auga emae efua, ke papiau aumauni laoga maina apala kapaꞌina eopolaga auga muninai akepea.  
\v 25 Ke iꞌa Deo ega Spiritu kapaꞌina eifania auga mo agugai aagu kainai, Deo ega Spiritu fou kaiꞌalao falao famai.  
\v 26 Ke ifoꞌa falaau afagainiꞌa, ke papiau isafa guaꞌi falapakupua. Ke papiau eeꞌiai falapikupa.   
\c 6  
\s1 Papiau Maꞌoai Eeꞌiai Felo Mo Fokapa  
\p
\v 1 Aau akiu Kristiano papiaumi, laomai apala oi epomiai aufalao agaꞌo afepaoa apala afekapa aisama, oi Deo ega Spiritu agugai oagu aumi, isa gagafe mo foafia, fopalagaina fopaapakipo laomai apala egaꞌina faekapa pugu. Kai femue femai laomai felo mo fekapa pugu. Kai egaꞌina agokapa alogai, oi ifomi isafa foisa feloimi, o laaꞌi koa aisama, oi ifomi isafa isa koa agomia laomai apala agokapa.  
\v 2 Ke epomiai aufalao agaꞌo meau agaꞌo ageafia koa aisama, fopalagaina. Ega koa fokapa agaꞌo agaꞌo fopalagainimi, ke egaꞌina agokapa aisama, Iesu Kristo kapaꞌina eifania fokapa eoma auga, maꞌoai agokapa afeꞌainiꞌi.  
\v 3 Gome aufalao agaꞌo au akaikiꞌa laaꞌi kai, ifo eopolaga isa au akaikiꞌa eoma koa aisama ifo efoge.  
\v 4 Aufalao agaꞌo kapa agaꞌo felo agekapa koa aisama, isa kapaꞌina ekapa auga aufalao agaꞌo kapa agaꞌo ekapa auga fou faeoge opoꞌi. Kai isa ifo kapaꞌina ekapa auga feisa. Egae kai isa ifo kapaꞌina felo ekapaisa auga ainaꞌauga fepaꞌaua.  
\v 5 Gome papiau ifo kapaꞌina gakapa eoma auga, ifo egaꞌina meauga fepua.   
\p
\v 6 Ke aufalao agaꞌo Deo ega iifa aꞌo elogonia aisama, ega amu feloꞌi maꞌoai, isa ega pamalele auga fou fekepapinauganiꞌi.   
\p
\v 7-8 Ke papiau aumauni laoga maina apala aufalao agaꞌo epaina kapaꞌina gakapa eoma auga mo ekapa koa aisama, Deo isa afa apala agepenia aoniamo, ke papiau Isa gauga kemia auꞌi eeꞌiai agepapealaisa. Kai kai mo Deo ega Spiritu kapaꞌina eifania auga akekapa aisama, Deo isa agu pagai maunina agepeniꞌi. Egaꞌina auga aufalao agaꞌo ega uma alogai au oga efauniꞌi koa iꞌopoga. Ke isa kapaꞌina oga efauga auga mo anina ageafia. Ega puo oi ifomi folofogeimi foloopolaga kapa feloꞌi okapaꞌi folooma. Gome kai agaꞌo Deo afaefoge.  
\v 9 Ke iꞌa laomai felo ikapa falaꞌapoloaina falaapakipo, gome Deo kina epaapa auga kina agemai aisama, au oga felo afaunia kainai, puaga isafa felo agaafia.  
\v 10 Ega puo iꞌa kina felo agaꞌo agaafia kapa agaꞌo agakapa aisama, Deo maagai kapa feloꞌi mo papiau maꞌoai eeꞌiai fakapa. Kai egaꞌina kapaꞌi agakapaꞌi aisama, pakoꞌa papiauꞌi iꞌa fou famili agaꞌomo amia auꞌi eeꞌiai, kapa feloꞌi fakapa kakaua.   
\s1 Niniꞌani Fua  
\p
\v 11 Iꞌina malelega alogai lau ifou imauai malele akaikiꞌaꞌiai kapaꞌina lapapuaꞌi auꞌi foisa felo alogainiꞌi.  
\v 12 Papiau isaꞌi Iesu kolotiai emae auga fouga akeinogonia aisama, Iudea papiauꞌi isa akeafi apalaniꞌi auga anina akeani. Ega puo isa kefaegai kepaafimi maguaemi faaga iifalaina gamia keoma. Ke isa egaꞌina kekapa auga, Iudea papiauꞌi aloꞌi kegapagama keoma puo kekapa.  
\v 13 Kai papiau egaꞌina maguaeꞌi faaga iifalaina emia ganinagai, Moses ega iifa maꞌoai kaiꞌiai akepea. Kai isa anina keani Iudea papiauꞌi agoꞌiai fekeainaꞌau fekeifa, oi isa eꞌi pamalele muninai opea maguaemi faaga iifalaina emia fekeoma keoma puo ega kekapa oma.  
\v 14 Kai lau auga kapa ega koa auga ainaꞌauga afalapaꞌaua! Kai lau Iesu Kristo lau eꞌu laomai apalaꞌi fauꞌiai kolotiai emae auga, ainaꞌauga alapaꞌaua afaefuafua. Gome Iesu kolotiai emae aisama, lau agofaꞌai kapaꞌina mo aniꞌi laani auꞌi isa fou kemae. Ega puo papiau inae agofaꞌai keopolaga kapaꞌina akaikiꞌaꞌi keoma auꞌi lau eeuai auga kapa eꞌeleꞌi.  
\v 15 Deo maagai auga au agaꞌo maguaega faaga iifalaina emia ma, aemia ma ganinagai kapa agaꞌo laaꞌi. Kai kapa akaikiꞌa auga aufalao agaꞌo Iesu Kristo epakoꞌania mauni mamaga eafia auga, Deo eegai kapa akaikiꞌa ipauma.  
\v 16 Ke papiau mauni mamaga egaꞌina keafia auꞌi fauꞌiai alou koꞌagai Deo lamegamega penia, ega koa Deo ega gagao fepeniꞌi, ke guaꞌi feania laoma. Ke lamegamega ega koa papiau maꞌoai Isa ega papiau kemia auꞌi isafa ega gagao fepeniꞌi, ke guaꞌi feania laoma.   
\p
\v 17 Ke eꞌu niniꞌani fuagai auga, kaisau lau keleleai opaapaukaisau aumi ainami lapalogo folokapa pugu laoma. Gome Iesu Kristo puogai Iudea papiauꞌi lau keafi apalaniau auga makaꞌi faagauai kekae. Ke maka egaꞌina lau faagauai kekae auga, lau Iesu Kristo ega kalaꞌafi auga fouga eifania.   
\p
\v 18 Aau akiu Kristiano papiaumi, lau alou koꞌagai lamegamega, ega koa iꞌa aꞌa Lopia Iesu Kristo ega gafegafe oi fepenimi, ke ega gafegafe egaꞌina oi alomiai feka fepinauga laoma. Amen.