\id 1TI - Mekeo NT [mek] -Papua New Guinea 1998 (web version -2013 bd) 
\h 1 Timoti 
\toc1 Paulo Malele Epapua Kakaua Timoti Eegai Eulaisa Auga 
\toc2 1 Timoti 
\toc3 1 Tim 
\mt1 1 Timoti  
\mt2 Paulo Malele Epapua Kakaua Timoti Eegai Eulaisa Auga  
\c 1  
\p
\v 1-2 Lau Paulo. Deo iꞌa kaniaꞌa eagamauga auga, ke Iesu Kristo ega mai pugu aꞌima auga fou kepaini kapulaniau Iesu Kristo ega apostolo kepamiaisau. Pau iꞌina malelega lapapua laulaisa Timoti oi eemu efai. Iifa faunina Iesu fouga maamuai laifania efua auga lopakoꞌania kainai, oi lau gau koꞌa ipaumamu koa iꞌopoga lomia. Lau alou koꞌagai ke guau fofougai oi faumuai iꞌa Amaꞌa Deo ke aꞌa Lopia Iesu Kristo fou lamegamega peniꞌi, ega koa guamu fekeania eꞌi gafegafe akaikiꞌa ke eꞌi gagao fou fekepenio foagu felo laoma.   
\s1 Pifoge Pamalelega Auꞌi Fopaini Kapulaniꞌi Fakepamalele  
\p
\v 3-4 Papiau isaꞌi lau oi maamuai Deo ega iifa lapamalele koa akepamalele kai, pamalele iꞌoinagai kepamalele auga fouga lalogo. Isa eꞌi pamaleleai aufa kina ufuꞌi apaꞌi eꞌi mauni ninina aeapakipo auga fouꞌi opoꞌi fofougai keopolaniꞌi keifaniꞌi, ke isonioni pifogeꞌi isafa keifaniꞌi aefuafua. Egaꞌina papiauꞌi ega koa kekapa puo, isa Deo kapaꞌina anina eani fekekapa eoma auga aloꞌi koꞌagai akekapa. Ke isa kapaꞌina kekapa auga kapa agaꞌo aepagama kai akekua aageꞌi mo kepaꞌuegeniꞌi. Ke eꞌi pamaleleai papiau Deo akepakoꞌania kai aloꞌi mo kepamaꞌo. Lau anina laani oi egaꞌina papiauꞌi eeꞌi folao fopaini kapulaniꞌi egaꞌina kapaꞌi fakepamaleleniꞌi pugu laoma. Ega puo Masedonia ago malao laoma alogai, oi lapaini kapulanio Efesus taoninai foagu egaꞌina papiauꞌi fokaisapuꞌi fakepamalele laoma.  
\v 5 Kai papiau aloꞌi koꞌagai Deo ega iifa fekepakoꞌania ke pifogeai fakekapa. Isa ifoꞌi fekepaꞌani peniꞌi, ke Deo maagai kapaꞌina apala auga fakekapa kai felo mo fekekapa. Iꞌina iifaꞌi Deo eifa kapulaniꞌi iꞌa Iesu apakoꞌania papiauꞌa kaiꞌiai fapakaiꞌi eoma. Ke aloꞌa koꞌagai papiau aniꞌi agaani aisama, egaꞌina kapaꞌi faagaꞌaisai akemia.  
\v 6 Kai papiau isaꞌi keꞌualai iꞌina iifaꞌi kaiꞌiai akekai, keaga iꞌoinagai kepea. Isa eꞌi pamaleleai kapa agaꞌo aegama kai keniniꞌani aage mo.   
\p
\v 7 Iꞌina papiauꞌi Moses ega iifa oko akelogo felo kai anina keani papiau kegapamaleleniꞌi keoma. Ke kapaꞌina isa keifania auga isafa akelogo felo kai, papiau maaꞌiai keifa faiꞌi aage mo.   
\s1 Kapa Puo Deo Ega Iifa Epeniiꞌa  
\p
\v 8 Iꞌa alogo felo, papiau kapa agaꞌo kegakapa keoma kai Moses ega iifa muninai akepea koa aisama, kapaꞌina felo ke apala auga akelogo ke felo mo akekapa.  
\v 9 Ke papiau Deo aina kainai akepea auꞌi kapaꞌina apalaꞌi kekapaꞌi auꞌi fekelogo eoma puo, ega iifa ekapaiꞌi Moses epeniia auga isafa alogo felo. Kai Moses ega iifa auga Deo maagai alo opai auꞌi apuꞌi aeoma kai, Deo kemunia ega iifa laagai keaopagai auꞌi apuꞌi eoma. Egaꞌina papiauꞌi auga, Deo keumakalaina kai ifoꞌi kapaꞌina anina keani auꞌi mo kekapaꞌi auꞌi. Deo akeau afagaina auꞌi. Aloꞌiai laomai apala epogu auꞌi. Deo ke papiau fou keifa apala peniꞌi auꞌi. Inaꞌi amaꞌi keaupuguꞌi auꞌi. Papiau keaupuguꞌi auꞌi:  
\v 10-11 Papiau agaꞌo fou akeamage kai fou kefeu aage mo auꞌi. Maguae maguae mo fou, ke papie papie mo fou amage koa laoga maina kekapa auꞌi. Papiau keafiꞌi keꞌafaꞌafalainiꞌi auꞌi. Pifoge auꞌi. Papiau maaꞌiai niniꞌani kapula kekapaisa kai muninai akepea auꞌi. Ke kaisau iifa faunina Iesu fouga lau lapamalele auga kepamafua auꞌi fauꞌiai, Deo ega iifa Moses epeniia kainai fekepea eoma. Deo papiau kapa feloꞌi epeniꞌi auga lau epakoꞌaniau kainai, iifa faunina Iesu fouga egaꞌina papiau maaꞌiai faifafoua auga pinaugaga epeniiau. Ke iifa faunina Iesu fouga egaꞌina alogai, Deo ega isapu ke ega kapula epakinaiꞌa.   
\s1 Paulo Iesu Ega Gafegafe Akaikiꞌa Epeniia Auga Fouga Eifania  
\p
\v 12 Lau iꞌa aꞌa Lopia Iesu Kristo tenkiu akaikiꞌa ipauma lapenia. Isa lau kapula epeniiau ke epakoꞌaniau ega pinauga alakapa agekaina eoma. Ega puo ekinaniau ega pinauga fakapa eoma.  
\v 13-14 Ufainagai lau Iesu eegai laifa apala, ke Iesu kepakoꞌania papiauꞌi laafi apalaniꞌi, ke lapalifu alogainiꞌi kai felo mo lapamia. Egaꞌina lakapaiꞌi mo ganinagai isa ega guani lau epakinaisau, gome egaꞌina alogai lau iifa faunina Iesu fouga alalogo ke Iesu Kristo alapakoꞌania.   
\p
\v 15-16 Laomai apalaꞌi kekapaꞌi papiauꞌi epoꞌiai lau auga apalau ipaumau. Kai Iesu Kristo guau eaniia eꞌu apala maꞌoai eafiapiꞌi mo kai, ega gafegafeai kaniau eagamauga. Ega puo Iesu Kristo laomai apalaꞌi kekapaꞌi auꞌi kaniaꞌi gaagamauga eoma kainai emai agofaꞌai auga iifaga koꞌa ipauma. Papiau maꞌoai iꞌina iifaga fekepakoꞌania auga ekainia. Iesu Kristo papiau muni isa akepakoꞌania aisama, Deo isa agu pagai maunina afuga agepeniꞌi auga elogo. Ega aisama papiau eꞌi laomai apalaꞌi ageafiapiꞌi mo, lau faagauai ekapaisa koa iꞌopoga isa isafa faagaꞌiai agekapa auga gapakinaꞌi eoma.  
\v 17 Deo Iesu eulaisa iina koa ekapaisa puo, iifa gome Isa Kin ipauma. Ke Isa mauni gome auga kainai afaemaemae. Isa papiau aumauni maaꞌaisai afalaisa kai Isa ifogamo Deo ipauma. Lau alou koꞌagai ke guau fofougai lamegamega ega koa iꞌa Deo akaikiꞌa fapamia ke faau afagaina faefuafua laoma. Amen.   
\s1 Paulo Timoti Kapaꞌina Fekapa Auga Epainimue Pugu  
\p
\v 18 Timoti gau koꞌa koa lapamiaiso aumu, lapaini kapulanio pugu. Papiau fouꞌi maamuai laifa kakaua auꞌi oi imamuai laogeukaꞌi. Egaꞌina papiauꞌi fopaini kapulaniꞌi pamalele pifogeꞌi fakepamalele pugu. Kai omaꞌe pagu papiau isaꞌi Deo ega Spirituai profeta koa oi foumu keifa kakaua keifa oi Deo ega pinauga alokapa afoloapakipo keoma. Pau egaꞌina iifaga lapaopolanio foloꞌagege. Ega koa oi pifoge pamaleleꞌi auꞌi fokaisapuꞌi fakepamalele pugu laoma.  
\v 19 Iꞌina alokapa aisama, Deo ega iifa alomu koꞌagai fopakoꞌania, ke Deo maagai kapaꞌina apala auga folokapa kai felo mo fokapa. Kai papiau isaꞌi Deo maagai kapaꞌina felo mo fekekapa auga keumakalaina, Deo akepakoꞌania kai pifoge pamaleleꞌi mo kepakoꞌaniꞌi. Ega koa kekapa puo, kapa agaꞌo eeꞌiai laaꞌi kai pifoge pamaleleꞌi mo eeꞌiai kekae. Egaꞌina auga aꞌuai lonti fopai eꞌanimuꞌa, amu maꞌoai kekogo afeꞌai kapa agaꞌo aeka koa iꞌopoga, isa eꞌi pakoꞌa auga ekani okaoka.  
\v 20 Ke papiau isaꞌi ke au aka Hemonius, ke agaꞌo aka Aleksanda auniꞌi fou keapafou ega koa kekapa, Deo keifa apala peni aagenia mo. Lau iꞌina auꞌi auniꞌi Satani imagai lapuaꞌafuniꞌi kapaꞌina akekapa koa fekekapa. Iina koa lakapaisa auga isa kapaꞌina kekapa auga, Deo maagai apala ipauma auga fekelogo, ke muni Deo fakeifa apala peni aagenia mo pugu laoma.   
\c 2  
\s1 Paulo Deo Ala Fekeau Afagai Oma Auga Fouga Epamalele  
\p
\v 1-2 Lau anina laani pakoꞌa papiauꞌa agofaꞌai aague alogai, maꞌoai aloꞌa koꞌagai Deo faau afagaina. Ke Deo ega iifa koꞌaꞌi mo kaiꞌiai fapea. Ega koa iꞌa aꞌa laomai felo mo agakapa, ke papiau iꞌa aꞌa laomai felo mo akeisa aisama, isa isafa eꞌi laomai felo agemia. Ke agofaꞌai aague alogai isafa gagaoai faagu. Ke Deo ega pinauga akapa alogai, kaisau kelele agekapa pinauga agepalifua auga anina falaani laoma. Ega puo iꞌa aꞌa pinauga akaikiꞌa ipauma auga, kin fauꞌiai ke ago agaꞌo agaꞌo papiauꞌi keꞌimaꞌi lopiaꞌi maꞌoai fauꞌiai famegamega. Ke papiau maꞌoai isafa fauꞌiai famegamega. Iꞌa aꞌa megamegai Deo fagoina feꞌimaiꞌa, ke famegamega kapula kapa maꞌoai aniꞌi aani auꞌi fepeniꞌa. Ke papiau agaꞌo agaꞌo isafa fauꞌiai Deo famegamega penia, eꞌi opopo akaikiꞌa emeau auga eegai fepalagainiꞌi fepaꞌilikaea. Ke Deo papiau fauꞌiai, kapa maꞌoai isafa ekapaiꞌi kainai tenkiu akaikiꞌa fapenia.  
\v 3 Papiau fauꞌiai iina agamegamega oma aisama, felo ipauma, ke Deo iꞌa kaniaꞌa eagamauga auga isafa alo agapagama.  
\v 4 Ke Isa anina eani papiau maꞌoai kaniaꞌi feisagamau eoma, ke iifa faunina Iesu fouga koꞌa auga fofougai fekelogo fekeaguaina eoma.  
\v 5 Gome kai agaꞌo laaꞌi Deo ifogamo iꞌa kaniaꞌa eagamauga. Deo agaꞌomo koa iꞌopoga au agaꞌomo Deo ke papiau aumauni fou epoꞌaisai gagao ekokoaina. Egaꞌina auga, papiau aumauni ipauma emia, aka Iesu Kristo.  
\v 6 Deo kina eifania auga ekainia aisama, Iesu eulaisa. Ke isa ifo imaauga, Deo epaꞌa penia kolotiai emae, iꞌa aꞌa laomai apalaꞌi afaꞌi eogeiꞌi. Ega kainai Iesu fauꞌaisai kolotiai emae auga afalapakoꞌania koa aisama, Deo iꞌa aꞌa laomai apala afa agepaꞌaniaina. Ke iꞌina iifaga agapakoꞌania koa aisama, Deo iꞌa aꞌa laomai apala ageꞌagegeaina. Ega puo Deo papiau kaniaꞌi eagamauga iifaga auga, papiau maaꞌiai koꞌa ipauma emia.  
\v 7 Ke Deo anina eani alogaina auga, iꞌina iifaga Iudea papiauꞌi laaꞌi auꞌi isafa aꞌo fekelogo eoma. Ega puo Isa lau ekinaniau apostolo, ke inogo au epamiaisau, ega koa iꞌina iifaga faifafoua eoma. Lau alapifoge, koꞌa ipauma mo laifania. Ke pau iꞌina iifaga egaꞌina papiauꞌi lapamaleleniꞌi, ega koa isa Deo fekepakoꞌania, ke iifa faunina Iesu fouga koꞌa auga fekelogo laoma.   
\p
\v 8 Kai pau lau pakoꞌa auꞌi eꞌi laomai ala fekekapa oma auga fouga alaifania. Pakoꞌa auꞌi kapai kapai kemegamega aisama, Deo maagai aloꞌi felo fekepamia keoma puo, imaꞌi keafiakae kemegamega. Kai lau anina laani alogaina auga, isa akemegamega koa kai, papiau eeꞌiai guaꞌi faekupu, ke kai agaꞌo eegai fakeakekua kai aloꞌi felogai Deo fekemegamega penia.   
\p
\v 9 Pakoꞌa auꞌi lapainiꞌi koa iꞌopoga, pakoꞌa papieꞌi isafa eꞌi laomai ala fekekapa oma auga fouga alaifania. Lau anina laani alogaina auga, pakoꞌa papieꞌi fakepaakai alogaina. Isa fufu ipaino iꞌoiꞌi iꞌoiꞌi fakekapaꞌi. Ke tepole kimageꞌi, ouꞌou kimageꞌi, ke kaikai afaꞌi akaikiꞌaꞌiai,\f + \fr 2:9 \ft Pilitani malagai ‘gold and pearls’\f* fakepaakai alogaina. Ke tiapu afaꞌi akaikiꞌaꞌiai isafa fakepaakai alogaina.  
\v 10 Kai papie laoga mainai koa fekepaakai. Ke kapaꞌina akekapa auga, papiau iꞌoiꞌi isa eeꞌiai ala akeopola oma auga fekelogo kai, Deo maagai felo mo fekekapa. Ke papiau isafa fekepalagainiꞌi laoma. Ega koa akekapa Deo akepakoꞌania, ke akeau afagaina aisama, pakoꞌa papieꞌi koꞌaꞌi ipaumaꞌi akemia.   
\p
\v 11-12 Lau pakoꞌa papiaumi epomiai, pakoꞌa papieꞌi aꞌoaꞌo maꞌo kekapa auga fouga lalogo. Ega puo lau papie ifo ega isapuai pakoꞌa auga feꞌima ke fepamalelenia auga lapamafua. Kai isa alo koꞌagai kaisau akaikiꞌa auga aina feafia. Pakoꞌa papieꞌi maꞌoai iina koa fekekapa, ega koa aꞌoaꞌo fakekapa kai fekemalele laoma.  
\v 13 Gome Deo Adamo epagama kakaua, kai Efa muniai epagama.  
\v 14 Ke Satani Efa efogeisa Deo maagai laomai apala ekapaisa. Ke Adamo auga muniai kai ekapaisa.  
\v 15 Efa laomai apala ekapaisa ganinagai, papie ega pinauga agaꞌo auga kaniaꞌa isagamauga auga fepamauga eoma.\f + \fr 2:15 \ft Grik malagai, ‘papie imoi agepamauga alogai, kania ageisagamau.’\f* Ega puo papie agofaꞌai keague alogai, Deo fekepakoꞌania faefuafua ke papiau aniꞌi fekeani alogaina, ke Deo maagai alo lolofa laoga maina fekekapa, ke kapaꞌina papie fekekapa eoma auga mo fekekapa. Ega akekapa oma koa aisama, Deo isa eꞌi laomai apala ageꞌagegeaina.   
\c 3  
\s1 Deo Ega Pinauga Kekapa Kaniagai Auꞌi  
\p
\v 1 Kaisau alo koꞌagai pakoꞌa papiauꞌi iꞌimaꞌi lopiaga\f + \fr 3:1 \ft Pilitani malagai ‘bishop’\f* gamia eoma aisama, egaꞌina pinauga felo puo, opogai laomai felo mo feopolaga fekapa. Iꞌina iifaga auga koꞌa ipauma.  
\v 2 Ega kainai iifi eꞌa eꞌima auga ega laomai fepafelo alogaina, ega koa papiau isa fakepakefe. Ke eamage koa aisama, akafa agaꞌomo femia. Isa alo ke opo fou fepaꞌopaina. Ke aufa kina kapaꞌina ekapa auga feisa, ke feopola felo kai fekapa ke papiau maaꞌiai au akaikiꞌa femia. Isa pinauga okogai fepapea. Ke papiau fegafeꞌi feifa kokoꞌi ke pamalele felogai fepamalele.  
\v 3 Ke isa inuinu auga faemia, papiau eeꞌiai faeakekua aage mo, ke moni anina faeani alogaina. Ke papiau faeau aageniꞌi mo, eeꞌiai gua faekupu kai gagafeꞌi mo feafia.  
\v 4-5 Kaisau ifo ega famili afaeꞌima felo aisama pakoꞌa papiauꞌi ageꞌimaꞌi agekaina ma? Laaꞌi ipauma! Ega puo isa ifo ega famili feꞌima felo kakaua. Ke kapaꞌina ageifania auga, gauga aloꞌi koꞌagai isa aina fekeafia ega iifa kainai fekepea ke fekekapa. Egae kai isa Deo ega pinauga agekapa, pakoꞌa papiauꞌi ageꞌimaꞌi agekaina.  
\v 6 Kai pau mo alo eponi auga Deo ega pinauga agekapa, ke pakoꞌa papiauꞌi ageꞌimaꞌi koa aisama, isa ifo afeau afagai alogaina. Ega koa agemia koa aisama, Deo, Satani ega ainaꞌau afa epeniia epapealaisa koa iꞌopoga, isa isafa afa ega agepeni oma. Ega puo pau mo alo eponi auga iꞌina pinauga faekapa.  
\v 7 Ke papiau isa ega laomai keisa auga felo mo fekeoma. Laaꞌi koa aisama, pakoꞌa laaꞌi auꞌi isa ninina akeꞌanina. Ke papiau egaꞌina akekapa aisama, ageapoke Deo ega pinauga agepuaꞌafuga, Satani muninai agepea.   
\s1 Iifi Eꞌagai Kepipalagai Auꞌi Fouꞌi  
\p
\v 8 Iifi eꞌa papiauꞌi eꞌimaꞌi lopiaga koa iꞌopoga, iifi eꞌagai epipalagai auga\f + \fr 3:8 \ft Pilitani malagai ‘deacon’\f* isafa, ega laomai fepafelo alogaina, ega koa papiau isa fakepakefe. Ke isa kapaꞌina ageifania auga papiau aina fekeafia, ke kainai fekepea, ke au akaikiꞌa fekepamia. Ke isa mala aniani auga faemia, ke inuinu isafa auga faemia. Ke isa moni faugai Deo ega pinauga faekapa.  
\v 9 Ke isa Deo maagai kapaꞌina apala auga faeopolaga kai, felo mo feopolaga. Ke isa iifa faunina Iesu fouga Deo epalogoniꞌa auga fepakoꞌania kainai fepea.  
\v 10 Ega puo pakoꞌa papiauꞌi au kegakinaga iifi eꞌagai pipalagai auga gamia akeoma koa aisama, egaꞌina auga ega laomai fekeisa felo kakaua. Pakoꞌa papiauꞌi isa egaꞌina pinauga agekapa agekaina, o afaekaina auga isafa fekeisa. Ke isa ega laomaisai papiau isa afakepakefe, afakeifa apala penia aisama, isa fekekinaga pinauga egaꞌina fekapa.   
\p
\v 11 Ega koa iꞌopoga, isa akafa isafa kapaꞌina ageifania auga, papiau isa aina fekeafia kainai fekepea. Isa papiau eeꞌiai faeifa apala ke alo, opo fou fepaꞌopaina. Ke kapaꞌina eifania auga kainai fepea.  
\v 12 Iifi eꞌagai epipalagai auga fouga alaifamue pugu. Isa akafa agaꞌomo femia, ke ifo ega famili feꞌima felo.  
\v 13 Gome isa ega pinauga agekapa felo aisama, papiau isa aina akeafia, au akaikiꞌa akepamia. Egaꞌina auga isa ifo eegai felo. Ke Iesu Kristo epakoꞌania ke ega pinauga ekapa auga, papiau maaꞌiai ageifa faiꞌi agepainiꞌi agekaina.   
\p
\v 14-15 Lau anina laani oi loagu afuga, Efesus taonina mafai mafiakoa laoma. Kai kapa agaꞌo afegama afepaapa kipoisau koa aisama, afalafai afalafiakoa. Egaꞌina kainai alou koꞌagai anina laani oi kapaꞌina fologo laoma auga alaifania. Eꞌa agaꞌo uuꞌu ke ipalao fou, eꞌa keafiapi kapulania. Deo kepakoꞌania ega famili ikupugai kekoko auꞌi isafa eꞌa agaꞌo koa iꞌopoga. Egaꞌina eꞌagai Deo agu pagai auga ega famili fou keague. Ke eꞌa agaꞌogai uuꞌu, ke ipalao fou eꞌa keafiapi kapulania koa iꞌopoga, pakoꞌa papiauꞌi isafa, uuꞌu ke ipalao koa fekemia Deo ega iifa fekeafiapi kapulania. Egaꞌina kainai pakoꞌa papiauꞌi, kapaꞌina fekekapa auga oi fologo felo laoma puo, iꞌina malelega lapapua eemu efai.  
\v 16 Ke iꞌina iifaga kapula ipauma:  
\li1 Deo papiau aumauni ipauma emia, aagoai eake papiau epoꞌiai elao emai,  
\li1 Isa Deo ipauma auga epakinaiꞌi.  
\li1 Egaꞌina auga Iesu Kristo.  
\li1 Isa isafa Deo Gauga auga agelo papiau epakinaꞌi.  
\li1 Isa Deo maagai alo opai auga, Deo ega Spiritu papiau epakinaꞌi.  
\li1 Pau Deo isa ufai eꞌagauaina, Deo ega isapu akaikiꞌa afugai ekoko, kaina kainai fou keague.  
\li1 Papiau iꞌina iifaga Iesu fouga keifafoua. Ke agofaꞌai papiau isa kepakoꞌania.  
\m Ufainagai iꞌina iifaga papiau akelogo felo kai, pau Deo papiau epakinaꞌi. Ke Deo maagai iꞌa ala faau afagai oma, ke ala faagu oma aꞌa laomai felo femia auga epakinaiꞌa. Papiau maꞌoai iꞌina iifaga kapula ipauma puo, aloꞌi koꞌagai fekepakoꞌania, ke kai agaꞌo agepuniai afaekaina.   
\c 4  
\s1 Pifoge Pamalelega Auꞌi Fouꞌi  
\p
\v 1-2 Iꞌina iifaga koꞌa ipauma. Ke Deo ega Spiritu kapaꞌina agemia auga maaꞌaisai iina eifa oma: Muni papiau isaꞌi Satani papagai keagu kepinauga auꞌi akemai. Isa Deo maagai felo o apala auga akelogo. Kai akemai aisama, papiau akefogeꞌi maaꞌiai kapaꞌina fekekapa auga akeifania kai isa ifoꞌi auga afakekapa. Ega mo ganinagai, papiau isaꞌi tiapolo pifogeꞌi papaꞌiai kepinauga auꞌi, tiapolo pifogeꞌi ainaꞌi akeafia, ke eꞌi pamalele kaiꞌiai akepea. Ega puo iꞌa Deo ega iifa koꞌa apakoꞌania auga akepuaꞌafuga.  
\v 3 Pifoge pamalelega auꞌi egaꞌina isaꞌi pau papiau kepainiꞌi fakeamage ke foꞌama isaꞌi fakeaniꞌi keoma. Kai Deo kapa maꞌoai epagamaꞌi auꞌi fauꞌiai iꞌa iꞌina iifaga koꞌa alogo ke apakoꞌania auꞌa, Isa famegamega penia ke tenkiu fapenia kai faaniꞌi eoma.  
\v 4 Gome Deo kapa maꞌoai epagamaꞌi auꞌi feloꞌi, ke Deo tenkiu apenia kai aaniꞌi koa aisama, kapa agaꞌo agaumakalaina apala agapamia afaekaina.  
\v 5 Gome egaꞌina foꞌamaga Deo ega iifai ke megamegai elolofa efua.   
\s1 Deo Ega Iifa Koꞌa Fopamalelenia Ke Ifomu Isafa Fomalele  
\p
\v 6 Deo ega iifa iꞌa apakoꞌania ke kainai apea auga, oi ifomu aloafiꞌinia koa aisama, egaꞌina iifaga agepakapulanio. Ega koa iꞌopoga, oi pakoꞌa papiauꞌi maaꞌiai egaꞌina iifaꞌi laifa kakauꞌi auꞌi fopamaleleniꞌi ke fopalogo feloꞌi. Ega aisama oi Iesu Kristo ega pinauga ikapa aumu felomu alomia.  
\v 7 Pinauga felo papiauga, pamalele pifogeꞌi feumakalainiꞌi. Ega koa iꞌopoga, oi papie apaoꞌi keniniꞌani aage mo, pifoge isonioniꞌi keifaniꞌi auꞌi foumakalainiꞌi. Ke oi imaaumu fekapula kapa lokapa aisama, imaaumu ekapula. Ega koa iꞌopoga, oi alomu fekapula kapa fokapa Deo foau afagaina, ke ega iifa kainai fopea, fomalele faefuafua.  
\v 8 Au agaꞌo ifo imaauga gapakapulania eoma puo kapa agaꞌo ekapa aisama, egaꞌina kapa isa imaauga mo epalagaina. Kai isa Deo ageau afagaina ke ega iifa kainai agepea koa aisama, Deo eifania epakoꞌania auga kainai agepalagai felo alogaina. Ke pau aagoai eague alogai agepalagaina ageagu felo. Ke muni agemae aisama, agu pagai maunina afugai afa felo agepenia.  
\v 9 Iꞌina iifaga koꞌa ipauma. Papiau maꞌoai iꞌina iifaga fekepakoꞌania auga ekainia.  
\v 10 Ke egaꞌina kainai iꞌa auniaimoimo apinauga aafipugu. Gome iꞌa aꞌa afiaꞌama Deo eague aoniamo auga eegai aoge. Isa auga papiau maꞌoai kaniaꞌi isagamauga auga, ke kaisau aloꞌi koꞌagai Isa kepakoꞌania auꞌi kaniaꞌi eagamauga paisa.   
\s1 Laomai Felo Pakoꞌa Papiauꞌi Fopakinaꞌi Ke Deo Ega Iifa Koꞌa Mo Fopamaleleniꞌi  
\p
\v 11 Lau kapaꞌina laifa kakaua auga, pakoꞌa papiauꞌi fopaini kapulaniꞌi fopamaleleniꞌi.  
\v 12 Ke oi aguꞌamu puo egaꞌina alokapa alogai, papiau eꞌelemu mo fakeoma fakepaakeiso. Kai oi niniꞌani faunina mo foifania. Laomai felo mo fokapa. Alomu koꞌagai papiau aniꞌi foani. Alomu koꞌagai Iesu fopakoꞌania. Ke alomu fefelo, laomai apalaꞌi foumakalainiꞌi. Ega koa fokapa, pakoꞌa papiauꞌi oi fou oague auꞌi laomai felo mo fopakinaꞌi.  
\v 13 Lau oi eemu alafai koa kai, pakoꞌa papiauꞌi maaꞌiai laꞌafouai Deo ega iifa puka fokuapina faefuafua. Ke Deo ega iifa kainai fekeagu auga magogoga kapula papiau fopeniꞌi ke fopamaleleniꞌi.  
\v 14 Oi Deo ega pinauga iꞌina mokapa alooma alogai, pakoꞌa papiauꞌi keꞌimaꞌi au akaikiꞌaꞌi auꞌi imaꞌi oi kaniamuai keogeaua, emu pinauga faugai kemegamega. Egaꞌina alogai papiau isaꞌi profeta koa iꞌopoꞌi kemia Deo ega Spirituai muni oi kapaꞌina alokapa auga keifania. Ega koa kekapaisa oi pinauga fokapa felo auga ipenina Deo epeniio. Oi egaꞌina ipenina Deo epeniio auga foloꞌagege fopapinauga faefuafua.   
\p
\v 15 Oi Deo ega pinauga lokapa felo puo, pinauga efelo elaoaina auga papiau fekeisa. Lau egaꞌina auga alou koꞌagai anina laani. Ega puo alomu opomu fofougai lau kapaꞌina laifania fokapa laoma auga fokapa faefuafua.  
\v 16 Ke oi emu laomai foꞌima felo, ke emu pamalele isafa foisa felo kai fopamalele. Oi ega alokapa oma aisama, afoloapoke afoloꞌualai. Ke Deo kaniamu eagamauga lopakoꞌania auga pakoꞌaga eemuai feka aoniamo. Ega koa oi kaniamu ageagamauga ke emu pamalele aꞌo kelogo papiauꞌi isafa kaniaꞌi ageagamauga.   
\c 5  
\s1 Pakoꞌa Papiauꞌi Magogo Kapula Fopeniꞌi  
\p
\v 1-2 Pakoꞌa papiauꞌi laomai apala kekapa. Ke oi isa eꞌi laomai apala mopaꞌopaina alooma aisama, folofinaꞌi ke folopaumaniꞌi. Kai magogoꞌi foau kapulania eꞌi laomai apala fekepaꞌopaina. Au apaoꞌi auꞌi, oi amamu eegai ala lokapa oma koa iꞌopoga mo, isa eeꞌiai ega fokapa oma. Ega koa iꞌopoga, papie apaoꞌi auꞌi oi inamu eegai ala lokapa oma koa iꞌopoga mo, isa isafa eeꞌiai ega fokapa oma. Au aguꞌaꞌi isafa, oi aamu akimu eeꞌiai ala lokapa oma koa iꞌopoga mo, isa eeꞌiai ega fokapa oma. Ke papie aguꞌaꞌi, ifiao fou isafa, oi afakuamu eeꞌiai ala lokapa oma koa iꞌopoga mo, isa eeꞌiai ega fokapa oma. Kai papie ifiao fou eeꞌiai alomu faemaꞌo, alomu felogai emu pinauga fokapa.   
\s1 Afuafu Isaꞌi Pipalagai Fekeafia  
\p
\v 3 Iifa gome afuafu kai agaꞌo aepalagainiꞌi auꞌi fopalagainiꞌi fopalopianiꞌi.  
\v 4 Kai afuafu kapa gauga o ufuga agaꞌo keague koa aisama, isa ifoꞌi eꞌi famili alogai afuafu fekepalagai kakaua. Isa iina koa fekekapa fekemalele, Deo keau afagaina, ke ega iifa kainai kepea auga afuafu faagagai fekekapa. Ke fekemalele isa inaꞌi amaꞌi ke ufuꞌi fou eꞌeleꞌiai keꞌimaiꞌi auga, afa fekeoge isa fekeꞌimaꞌi. Isa iina akekapa oma aisama, Deo maagai felo ke alo agegama. Ega puo isa ega koa fekekapa laoma.  
\v 5 Kai afuafu kapaꞌi gauꞌi o ufuꞌi agaꞌo laaꞌi afakepalagainiꞌi auꞌi, Deo isa agepalagainiꞌi auga fekepakoꞌania fekeꞌima. Ke aufa kina fekemegamega kapula fakeapakipo, ke Deo fekegoina kapa maꞌoai aniꞌi keani auꞌi fepeniꞌi.  
\v 6 Kai afuafu kapa elapau elao emai aage mo auga, imaauga eague kai lalauga auga emae efua koa iꞌopoga.  
\v 7-8 Kai pakoꞌa papiauꞌi epoꞌiai kaisau ifo aaga akina, ke ifo ega famili ipauma afaeꞌima feloꞌi koa aisama, pakoꞌa papiauꞌi kapaꞌina kepakoꞌania auga eumakalaina. Egaꞌina papiauga ega apala auga Iesu akepakoꞌania auꞌi eꞌi apala ekaꞌegaina. Lau alou koꞌagai anina laani afuafu gauꞌi ke ufuꞌi isa fekepalagainiꞌi laoma. Isa ega akekapa oma koa aisama, papiau isa afuafu keꞌimaꞌi pinauga kekapa kainai, puo afakepeniꞌi. Ega puo pakoꞌa papiauꞌi maaꞌiai foifa kapula afuafu fekepalagainiꞌi.   
\p
\v 9-10 Papie laomai felo mo kainai epea gauga eꞌima feloꞌi. Ke papiau isa ega eꞌa peagege kemai auꞌi eeꞌiai egafegafe, ke pakoꞌa papiauꞌi eeꞌiai ifo eꞌele epamia epipalagai. Isa papiau kina apala kekaifaina auꞌi egafegafe peniꞌi. Ke papie laoga maina kekapa koa iꞌopoga akafa eegai ekapa. Ke papiau maꞌoai isa papie felo ke laomai feloꞌi mo ekapaiꞌi auga keisa keifafoua. Iꞌina papiega akafa agemae kai afaeamage ageagu agelao inipoga ouꞌaga imagea agepagai koa aisama, pakoꞌa papiauꞌi egaꞌina afuafuga pipalagai keafia auꞌi epoꞌiai aka fekeoge fekeifafoua, ke fekepalagaina.   
\p
\v 11-12 Kai afuafu aguꞌaꞌi auꞌi pipalagai keafia auꞌi epoꞌiai akaꞌi fakeoge fakepalagainiꞌi. Gome pakoꞌa papiauꞌi afuafu aguꞌaꞌi pipalagai keafia auꞌi epoꞌiai akaꞌi akeoge aisama, isa afakeamage pugu kai Iesu Kristo ega pinauga mo aloꞌi koꞌagai akekapa auga akepakoꞌania akeifa kapulania. Kai isa anina akeani kegaamage pugu akeoma koa aisama, iifa kepakoꞌania keifa kakaua auga laagai akeaopagai akeamage akefiakoa. Iina koa akekapa aisama, papiau isa akepakefeꞌi. Ke Deo maagai isa ifoꞌi eꞌi laomai apala afa akeafia.  
\v 13 Kapa puo afuafu aguꞌaꞌi akaꞌi fakeoge laoma auga alaifania pugu. Pakoꞌa papiauꞌi isa akepalagainiꞌi aisama, afakepinauga puo akeꞌapolo eꞌa akepao apuꞌi. Egaꞌina mo laaꞌi kai, nini akeꞌanina, eꞌa agaꞌo niniꞌanina auga akelao, eꞌa agaꞌogai fakeifania koa kai akeifania.  
\v 14-15 Ke iifa agaꞌo auga, afuafu aguꞌaꞌi isaꞌi keꞌualai Deo ega iifa kaiꞌiai akekai, keaga iꞌoina keafiia Satani muninai kepea. Afuafu aguꞌaꞌi isaꞌi ega koa akekapa pugu koa aisama, Satani kina felo akepenia agefogeꞌi muninai akepea, ke papiau isa akeifa apala peniꞌi. Ega puo lau alou koꞌagai anina laani alogaina auga, afuafu aguꞌaꞌi auꞌi pipalagai keafia papiauꞌi epoꞌiai akaꞌi fakeoge laoma. Kai isa auga fekeamage, ifoꞌi gauꞌi fekepafaꞌaꞌi, ke ifoꞌi eꞌi eꞌa fekeꞌima felo laoma.   
\p
\v 16 Ke egae pakoꞌa papiauꞌi eeꞌiai afuafu agaꞌo keaguega koa aisama, isa afuafu egaꞌina fekeꞌima feloꞌi. Ke pakoꞌa papiauꞌi fofouga meau fakepeniꞌi. Isa ega koa akekapa aisama, pakoꞌa papiauꞌi auga afuafu kapaꞌi kai agaꞌo aepalagainiꞌi auꞌi mo akepalagainiꞌi.   
\s1 Au Akaikiꞌaꞌi Pakoꞌa Papiauꞌi Keꞌimaꞌi Auꞌi Foꞌimaꞌi  
\p
\v 17-18 Pakoꞌa papiauꞌi Deo ega pinauga auꞌi keopolaniꞌi aisama, Deo ega iifa iina eifa oma auga fekeopolaniꞌi: “Polomakau epinauga efua aisama, epinauga afa feafia eoma. Ega puo ifegai laiti ogogoga faaga egafa ikia alogai ake akegope.”\f + \fr 5:17-18 \ft Testamento ufaina alogai iꞌina iifaga aeka kai \xt Luka 10:7\ft  alogai iina koa iꞌopoga ekae.\f* Ke Deo ega iifa iina eifa oma pugu: “Pinauga auꞌi eꞌi pinauga afa fekeafia,”\f + \fr 5:17-18 \ft Iꞌina iifaga Deuteronomy 25:4 alogai ekae.\f* eoma. Deo ega iifa iina eifa oma koa iꞌopoga, au akaikiꞌaꞌi pakoꞌa papiauꞌi keꞌimaꞌi auꞌi kepinauga felo koa aisama, pakoꞌa papiauꞌi aloꞌi koꞌagai isa au akaikiꞌaꞌi fekepamiaꞌi. Ke pinauga auꞌi eꞌi moni akaikiꞌa keafia koa iꞌopoga, isa isafa afa ega koa fekeafia. Kai iifa gome au akaikiꞌaꞌi pakoꞌa papiauꞌi keꞌimaꞌi auꞌi kapaꞌi keinogo, ke kepamalele auꞌi auga au akaikiꞌaꞌi ipaumaꞌi fekepamiaꞌi.  
\v 19 Ke pakoꞌa papiauga agaꞌo afemai au akaikiꞌa pakoꞌa papiauꞌi eꞌimaꞌi auga agaꞌo Deo maagai laomai apala ekapaisa auga eisa oi maamuai ageifania aisama, oi isa ega iifa folopakoꞌa kakaua, ke au egaꞌina folopaagu fofou aagenia mo. Kai papiau gua oiso, o maꞌo akemai iꞌina iifaga maamuai akeifania koa aisama fopakoꞌania, ke foꞌopo fopaꞌopaina.  
\v 20 Ke papiau eꞌi iifa egaꞌina koꞌa koa aisama, lau anina laani isa ega laomai apala pakoꞌa papiauꞌi maꞌoai maaꞌiai laꞌafouai foifania. Ega koa isa ke pakoꞌa papiauꞌi isafa fekemaniꞌi, laomai apalaꞌi fakekapaꞌi pugu laoma. Ke Timoti, oi pakoꞌa papiauꞌi fofouga agoꞌiai laomai apala ekapa auga fopaini kapulania, ke magogoga foauga, ega koa ega laomai fepaꞌopaina.   
\p
\v 21 Lau Deo, Iesu Kristo ke Deo ega agelo ekinaniꞌi auꞌi agoꞌiai oi laifa kapula penio. Oi lau kapaꞌina maamuai laifa kakauꞌi auꞌi kaiꞌiai fopea. Ke kapa maꞌoai alokapaꞌi alogai, ifomu minomuai kapaꞌina emai auga mo folokapa. Kai aufalao agaꞌo kapaꞌina eifania auga, koꞌa o pifoge auga fologo felo kakaua kai kapaꞌina alokapa auga fokapa. Ke papiau agaꞌo lologonia mo looma afegai foloaulao.   
\p
\v 22 Ke kaisau Deo ega pinauga gakapa ageoma eemu agefai aisama, fiakoa mo imamu isa kania laagai folooge Deo ega pinauga ikapa auga folopamia. Kai isa ega laomai foisa felo kakaua kai, imamu kania laagai foogeaua Deo ega pinauga ikapa auga fopamia. Iina koa alokapa aisama, Deo maagai oi alo opai aumu alomia.   
\p
\v 23 Ke lau lalogo oi alomu feꞌopai mo felao looma puo, fei maini mo loinu. Ega kainai kina maꞌo oi gua kiekie isafaga loafia. Kai lau anina laani egaꞌina isafaga feapakipo laoma puo, fei maini mo foloinu. Kai fino afaꞌagamo mulamula koa fopamia fei fou foinu. Ega koa guamu felo mo agemia.   
\p
\v 24 Ke papiau isaꞌi laomai apalaꞌi laꞌafouai kekapaꞌi puo, papiau maꞌoai kelogo felo. Ega kainai papiau isa eꞌi laomai apala afa kepeniꞌi kefiakoa. Kai papiau isaꞌi auga ogefakeai laomai apala kekapa.  
\v 25 Ega koa iꞌopoga, papiau isaꞌi laꞌafouai pinauga felo kekapa puo, papiau maꞌoai kelogo felo. Kai papiau isaꞌi auga ogefakeai eꞌi pinauga kekapa. Ega puo kai agaꞌo aelogo muniai kai, isa eꞌi pinauga efoki efoufaꞌa.   
\c 6  
\s1 Kalaꞌafi Papiauꞌi Fekepinauga Felo  
\p
\v 1 Pakoꞌa papiauꞌi kapaꞌi kekalaꞌafi auꞌi, isa keꞌimaꞌi lopiaꞌi ainaꞌi afakeafia koa aisama, papiau isaꞌi akeopolaga Deo kepakoꞌania, iifa faunina Iesu fouga, lai apamalelenia auga muninai kepea auꞌi papiau apalaꞌi ipaumaꞌi akeoma. Iina koa akekapa aisama, papiau Deo aka ke iifa faunina Iesu fouga eegai akeifa apala. Lau egaꞌina auga anina alaani. Ega puo papiau kapaꞌi kalaꞌafi pinauga kekapa auꞌi, aloꞌi koꞌagai eꞌi lopia fauꞌiai fekepinauga felo ke au akaikiꞌaꞌi fekepamiaꞌi mo opolaga fekeafia.  
\v 2 Kai kalaꞌafi kapaꞌi eꞌi lopia pakoꞌa auga aisama, akeopolaga isa eꞌi lopia pakoꞌa auga puo, afakepinauga kapula auga kapa agaꞌo laaꞌi fakeoma. Isa ega koa fakekapa kai, kalaꞌafi koa pinaugagai mo fekepinauga. Gome isa eꞌi lopia faugai kepinauga felo auga, afa felo kai agaꞌo aage afaeafia kai isa eꞌi lopia ageafia. Egaꞌina mo laaꞌi kai, isa pakoꞌa papiauꞌi ke eꞌi lopia isafa pakoꞌa auga. Ke isa maꞌoai Kristiano auꞌi kainai, aaꞌi akiꞌi koa iꞌopoga. Ega kainai Deo isa maꞌoai aniꞌi eani alogaina auga fekelogo. Pakoꞌa papiauꞌi maaꞌiai iꞌina iifaꞌi fopamaleleniꞌi, ke magogoꞌi foau kapulania ega koa eꞌi pinauga fekekapa feloꞌi.   
\s1 Pifoge Pamalelega Auꞌi Fouꞌi  
\p
\v 3 Kaisau Deo ega iifa koꞌa ipauma, Iesu Kristo fouga kaiꞌiai aepea, ke iꞌa Deo ala aau afagai oma, ke ega iifa kainai apea, ke apamalele auga kaiꞌiai aepea kai epamalele auga pifoge pamalelegai epamalele.  
\v 4 Iꞌina auga kapa agaꞌo aelogo kai ifo eau afagaina elogo eoma. Isa ega paꞌani auga koꞌa laaꞌi kai, aufa kina mo epaꞌani aefuafua. Isa iifa koꞌa auga aelogo kai papiau epaakekua aageniꞌi mo. Ega kainai papiau isa aina kelogo aisama, ifoꞌi mo epoꞌiai kepikupa, ifoꞌi keifa apala peniꞌi, ke opola apalaꞌi keafiꞌi, ke kapa agaꞌo akepakoꞌania.  
\v 5 Ke aufa kina keakekua aage mo aefuafua. Pifoge pamalelega iꞌina auꞌi, agofaꞌai deo pifogeꞌi isa aloꞌi, ke opolaꞌi fofouga kepalifua, kepifoge Deo ega iifa koꞌaꞌi auꞌi kekaisapuꞌi. Ke isa eꞌi opola auga, Deo keau afagaina, ke ega iifa kainai kepea auga, moni ikapa pinauga agaꞌo kepamia.   
\p
\v 6 Kai pau aague alogai, iꞌa Deo aau afagaina auꞌa kapaꞌina eeꞌaisai kekae auꞌi aloꞌa agekaina auꞌa, muni afa felo mo Deo eegai agaafia.  
\v 7 Gome iꞌa agofaꞌai amauni aisama, imaꞌaamo amauni. Ke agamae aisama, imaꞌaamo agofaꞌa agapuaꞌafuga.  
\v 8 Ega puo iꞌa foꞌama ekae aania, ke tiapu kekae aiꞌiukaꞌi koa aisama, aloꞌa fegama ke falogo egaꞌina mo ekainia. Ke opola egaꞌina mo faafia Deo faau afagaina, ke ega iifa kainai fapea.  
\v 9-10 Kai agofaꞌai papiau isaꞌi moni maꞌo eeꞌiai feka auga anina keani alogaina. Egaꞌina papiauꞌi moni mo keguakaeaina aisama, tiapolo isa efogeꞌi laomai apalaꞌi kekapaꞌi kefiakoa. Ke isa kemogemoge alogaina kegapaꞌamuꞌamu keoma puo, papiau kepakafoꞌoniꞌi eꞌi agu kepalifua. Ke fuagai isa ifoꞌi isafa eꞌi agu agelifu, lalauꞌi aoniamo agemae ke afaemaunimue pugu. Ega koa iꞌopoga, moni maꞌo anina keani auꞌi eeꞌiai moni auga kapa apalaꞌi maꞌo gome auga emia. Iifa gome papiau isaꞌi moni maꞌo anina keani alogaina puo, Iesu kepakoꞌania kai keapakipo Deo kemunia. Ke kapa maꞌo apalaꞌi keafiꞌi aloꞌi ke opolaꞌi kepalifua ke alo kiekieai keagu.   
\s1 Paulo Niniꞌani Fua Timoti Epaini Kapulania Auga  
\p
\v 11 Papiau isaꞌi ega koa kekapa kai, Timoti, oi Deo ekinanio, ega pinauga auga lomia. Ega puo iꞌina kapaꞌi fomuniꞌi. Kai Deo maagai kapaꞌina opaina, ke felo auga mo fokapa, ke alomu koꞌagai Deo fopakoꞌania, foau afagaina, ke papiau maꞌoai aniꞌi foani alogaina. Ke kina apalaꞌi ageafio aisama, alomuai mo fepiau, gamuga mo foopo ke guamu faekupu.  
\v 12 Deo oi ekinanio ke Iesu lopakoꞌania kinagai, agu pagai maunina afuga epeniio. Ega kainai oi iifa faunina Iesu fouga lopakoꞌania auga papiau maaꞌiai loifafoua. Oi Deo agu pagai maunina afuga epeniio kainai foloꞌagege, ke founiaimoimo ega pinauga fokapa faefuafua.  
\v 13-14 Deo amu maꞌoai epagamaꞌi maaꞌi mauniꞌi fekemia eoma. Ke Iesu Kristo Pontio Pilato agogai eapa iifa epakaisa aisama, kapaꞌina epakoꞌania auga eifa ofakae felo alogaina. Pau lau Deo ke Iesu Kristo egaꞌina auniꞌi agoꞌiai lapaini kapulanio, kapaꞌina maamuai laifa kakauꞌi auꞌi minomuai fekeka ke kaiꞌiai fopea. Ke egaꞌina alokapa alogai kai agaꞌo faepakefeiso. Ke alopinauga aisama, fopinauga mo felao iꞌa aꞌa Lopia Iesu Kristo ega mai pugu kinagai.  
\v 15 Deo ega logoai kina epaapa kinagai, Iesu Kristo iꞌa ageapakina peniꞌa. Deo ifogamo kapa feloꞌi ipeniꞌi gome auga. Isa ifogamo isapu akaikiꞌa ipauma auga. Iifa gome isa ifogamo Kin ke Lopia akaikiꞌa ipauma, aagoa ke ufa fou ega isapuai eꞌimaꞌi auga.  
\v 16 Deo ifogamo mauni gome auga puo afaemaemae. Ke eaea gome auga puo, eaea akaikiꞌa ipauma alogai eague. Ke iꞌa papiau aumauni auꞌa umina auꞌa puo, kai agaꞌo Isa eega agalao afaekaina. Ke kai agaꞌo maagai Deo aeisa ke pau isafa iꞌa Isa agaisa afaekaina. Iifa gome lau alou koꞌagai lamegamega ega koa papiau Isa Lopia Akaikiꞌa fekepamia, ke ega isapu akaikiꞌa agofaꞌai feka aoniamo laoma. E, iꞌina iifaga koꞌa ipauma!   
\s1 Paꞌamuꞌamu Auꞌi Fouꞌi  
\p
\v 17 Deo amu maꞌoai inagome auga anina eani iꞌa aloꞌa fegama eoma puo, amu maꞌo mo epeniꞌa. Ega kainai paꞌamuꞌamu auꞌi ifoꞌi fakeau afagainiꞌi ke fakeainaꞌau alogaina. Ke isa amu egaꞌina gaika akefua auga akelogo puo, fakegua kaeainiꞌi kai Deo mo fekegua kaeaina.  
\v 18-19 Ke agu pagai maunina afuga aoniamo ekaega auga fekelogo. Paꞌamuꞌamu auꞌi egaꞌina afugai kegakoko keoma koa aisama, isa papiau fekepalagainiꞌi ke laomai feloꞌi maꞌo mo fekekapaꞌi. Iina akekapa oma koa aisama, isa muni ufai akepaꞌamuꞌamu, ke ifoꞌi eꞌi laomai felo afa akeafia. Ke iifa gome isa muni agu pagai maunina afugai akekoko isafa auga fekepakinaiꞌa. Oi pau paꞌamuꞌamu auꞌi keague auꞌi fopaini kapulaniꞌi ega koa fekekapa.   
\p
\v 20-21 Papiau isaꞌi keifa isa kapa maꞌoai kelogo afeꞌai keoma. Kai eꞌi niniꞌani auga kapa agaꞌo aepagama kai, pifoge mo kepaalogaina, keniniꞌani ke keakekua aage mo. Ke papiau isaꞌi isa eꞌi pamalele aꞌo kelogo auꞌi, iifa faunina Iesu fouga keumakalaina keꞌualai keaga iꞌoinagai kepea. Timoti, oi egaꞌina pamaleleꞌi fomuniꞌi aniꞌi foloani. Kai iifa faunina Iesu fouga mo kainai fopea. Ke Deo ega pinauga lapainio fokapa laoma auga, foloꞌagege alomu koꞌagai fokapa felo. Lau alou koꞌagai ke guau fofougai oi ke pakoꞌa papiauꞌi fou faumiai lamegamega, ega koa Deo ega gafegafe akaikiꞌa fepenimi laoma.