\id 1PE - Mekeo NT [mek] -Papua New Guinea 1998 (web version -2013 bd) 
\h 1 Peto 
\toc1 Peto Malele Epapua Kakaua Auga 
\toc2 1 Peto 
\toc3 1 Pet 
\mt1 1 Peto  
\mt2 Peto Malele Epapua Kakaua Auga  
\c 1  
\p
\v 1 Lau Peto, Iesu Kristo ega apostolo au agaꞌo. Lau malele iꞌina lapapua oi Deo ekinanimi papiaumi, agofaꞌai ago aꞌina aumi koa iꞌopomi, okani okaoka, olao Pontus, Kalatia, Kapadosia, Asia, ke Bitinia agoꞌiai oague aumi eemiai laulaisa.  
\v 2 Ke oi aumi Deo Ama muni kapaꞌina agemia elogo auga ega logoai, ke Deo ega Spiritu papiau aloꞌi epalolofania auga ega pinaugai oi ekinanimi. Ega koa oi Iesu Kristo aina foafia, ke Iesu Kristo ifagai oi emi apala feikulaiꞌi eoma.  
\p Lau lamegamega ega koa Deo ega gafegafe akaikiꞌa, ke gagao fou alomi fepapogua, fepafakaua laoma.   
\s1 Afiaꞌama Ageka Aoniamo Auga  
\p
\v 3 Deo, iꞌa aꞌa Lopia Iesu Kristo Ama auga, tenkiu akaikiꞌa amapenia, ke amaau afagaina! Isa ega guani akaikiꞌa ipaumagai iꞌa mauni mamaga epeniiꞌa. Ega koa iꞌa Iesu Kristo maeai emaunimue auga faagagai, afiaꞌama ageka aoniamo auga faafia eoma.  
\v 4 Ke ega koa Deo oi kapaꞌina foafia eoma ufai eoge eka auga foafia eoma. Ke egaꞌina kapa auga, afaelifu, afaeofu, ke laaꞌi afaemia.  
\v 5 Oi emi pakoꞌa faagagai Deo ega isapuai oi ageꞌimaimi mo agelao, Isa papiau maꞌoai kaniaꞌi ageagamauga auga kinagai kai. Ke Isa papiau maꞌoai kaniaꞌi feagamauga auga epafua ekae, kina fuagai kai agepafokia.  
\v 6 Egaꞌina kainai pau oi kina oisomo mo alogai iꞌopo iꞌoiꞌi iꞌoiꞌiai alomi fekiekie mo ganinagai, oi alomi egama alogaina.  
\v 7 Ke oi emi pakoꞌa auga gold afa ekaꞌegaina. Papiau gold fekapula keoma puo, loai iuma emia mo ganinagai, afaeka aoniamo laaꞌi agemia. Kai iꞌopo iꞌoiꞌi iꞌoiꞌi oi eemi kefai ega koa oi emi pakoꞌa kapula ipauma femia. Ke Iesu Kristo ageapafoki pugu aisama, oi emi pakoꞌai feau afagainimi, au akaikiꞌami fepamiaimi, ke isapu eaea akaikiꞌa fepenimi laoma.  
\v 8 Ke oi Iesu Kristo aloisa mo ganinagai, oi alomi koꞌagai isa anina oani. Ke pau isafa isa aloisa mo ganinagai, oi isa opakoꞌania, ke emi alogama epagai alogaina, agaifaꞌopo afaekaina.  
\v 9 Gome oi emi pakoꞌa fuagai kapaꞌina foafia auga, oi lalaumi feisagamau auga pau oafiia.   
\p
\v 10 Ufainagai profeta papiau kaniaꞌi isagamauga egaꞌina auga fouga aloꞌi koꞌagai oko kekapunia, ke oko kegalogo felo keoma. Ke isa Deo ega gafegafe akaikiꞌa egaꞌina oi eemi agemai auga fouga keifafoua.  
\v 11 Ke isa Iesu Kristo kina kapagai agekiekie, ke ala agekiekie oma, ke agekiekie afegai Deo ala ageoma isa au akaikiꞌa agepamia auga keꞌopoisa kegakapulaisa keoma. Egaꞌina auga, egaꞌina kapaꞌi maꞌoai akemia koa kai, Iesu Kristo ega Spiritu isa aloꞌiai eagu auga kapa maꞌoai isa maaꞌiai epafokia efua.  
\v 12 Kai profeta egaꞌina kapaꞌi keifafouꞌi auga, isa ifoꞌi fauꞌiai akeifafouꞌi kai, oi faumiai keifafouꞌi auga Deo epalogoniꞌi. Ke egaꞌina kapaꞌi ufainagai profeta keifafouꞌi auga, pau oi maamiai keifafouꞌi. Egaꞌina auga Deo ega Spiritu ufai eulaisa emai auga ega isapuai papiau pau oi maamiai iifa faunina Iesu fouga keinogonia. Agelo isafa alafai kegaoma egaꞌina kapaꞌi kegaisaꞌi, okoꞌi kegalogo keoma.   
\s1 Deo Eifaniꞌi Aloꞌi Felolofa Eoma  
\p
\v 13 Ega puo oi ifomi fopafuaimi foagu, laomai feloꞌi fokapaꞌi. Ke ifomi foꞌima feloimi. Ke Iesu Kristo ageapafoki pugu aisama, gafegafe akaikiꞌa oi agoafia auga eegai emi afiaꞌama fofouga fooge.  
\v 14 Ke imoi inaꞌi amaꞌi ainaꞌi keafia koa iꞌopoga, Deo aina foafia, ke Iesu Kristo alologonia alogai, alomiai laomai apalaꞌi mo omaaniꞌi auꞌi laoꞌi maiꞌi kaiꞌiai folopea.  
\v 15 Kai oi eifanimi auga alo elolofa koa iꞌopoga, kapa maꞌoai agokapaꞌi alogai, alomi lolofagai fokapaꞌi.  
\v 16 Gome Deo ega iifa pukagai iina eifa oma: “Oi alomi felolofa, gome lau alou elolofa,”\x + \xo 1:16 \xt Lefitikus 11:44-45; 19:2; 20:7\x* eoma.   
\p
\v 17 Ke oi Deo kai agaꞌo afegai aeaulao kai, papiau agaꞌo agaꞌo kapaꞌina kekapa auga kainai mo afa epeniꞌi auga oifaga Amami ooma. Ega kainai oi inae agofaꞌai au aꞌimi koa iꞌopomi omia oague alogai, Deo fomaniꞌiaina.  
\v 18 Gome kapa agaꞌo afakepagama auga aguga, oi ufumi apami eeꞌiai oafiia oagu. Oi egaꞌina agugai oaguega kai, Deo oi afami eogeisa egaꞌina agugai epapealaimi auga ologo. Kai Isa oi kapa laaꞌi akemia auꞌi kapaꞌiai, silifai, o goldai afami aeogeisa.  
\v 19 Kai Iesu Kristo, sipi gauga faagagai isafa, ke kua afuga agaꞌo laaꞌi auga ifa kapa akaikiꞌa ipauma auga faagagai eꞌafaimi auga ologo felo.  
\v 20 Deo agofaꞌa aepagama koa kai isa ekinaga. Kai Deo ifo ega logoai oi faumiai iꞌina kina fuaꞌi alogai isa epaapa fokia.  
\v 21 Oi isa faagagai Deo opakoꞌania. Deo auga isa maeai epamaunimue, ke au akaikiꞌa epamia. Ega puo oi emi pakoꞌa ke emi afiaꞌama Deo eegai ooge.   
\p
\v 22 Ke oi pau Deo ega iifa muninai opea kainai, oi alomi elolofa. Ega koa oi alomi koꞌagai aami akimi Kristiano papiauꞌi aniꞌi oani. Ega koa iꞌopoga mo, foisa felo oi agaꞌo agaꞌo alomi koꞌa ipaumagai ke alomi fofougai animi foani.  
\v 23 Gome oi mauni mamaga oafiia auga, au oga emae auga faagagai aloafia. Kai Deo ega iifa, au oga maaga mauni ekae afaemaemae, ageka aoniamo auga faagagai mauni mamaga oafiia.  
\v 24 Gome Deo ega iifa pukagai iina eifa oma:  
\q1 “Papiau aumauni imaauꞌi auga mukimuki koa iꞌopoga,  
\q2 ke papiau aumauni iisaꞌi feloꞌi maꞌoai auga ago alo kaikaiꞌi koa iꞌopoꞌi.  
\q1 Mukimuki eogogo, ke kaikai keꞌualai.   
\q1
\v 25 Kai Lopia ega iifa auga ekae aoniamo.” \rq Aisaea 40:6-8\rq*   
\c 2  
\p Ke Deo ega iifa egaꞌina auga fouga oi maamiai keinogonia. 
\v 1 Ega puo kapa maꞌoai apalaꞌi ipaumaꞌi auꞌi, pifoge maꞌoai, ke pifogeai papiau felomi koa okagakaga auga laoga maina, ke pikupa, ke pikafa iꞌoiꞌi iꞌoiꞌi maꞌoai fooge meꞌeꞌi.  
\v 2 Kai imoi mamaꞌi kemauni auꞌi uꞌu anina keani alogaina koa iꞌopoꞌi fomia, Deo ega iifa uꞌu koꞌa ipauma auga koa iꞌopoga alomi koꞌagai anina foani. Ega koa uꞌu egaꞌina faagagai fouki felao Deo kaniami ageagamauga kinagai kai.  
\v 3 Ke oi Lopia Iesu Kristo ega felo gamuga ooponia koa aisama, oi egaꞌina fokapa.   
\s1 Kepo Ekae Aoniamo Auga Ke Deo Ekinaniꞌi Papiauꞌi  
\p
\v 4 Ke oi Lopia egaꞌina kepo ekae aoniamo, papiau keumakalaina kai Deo ekinaga maagai kapa akaikiꞌa ipauma auga eega fomai.  
\v 5 Ke oi isafa kepo egaꞌina ekae aoniamo koa iꞌopoga fomia, Deo oi fepapinauganimi, Isa ega eꞌa fepaapa. Egae oi Deo ega sakedote auꞌi koa fomia, Iesu Kristo faagagai Deo pipeni anina eani koa iꞌopomi fomia, ifomi imaaumi Deo fopalao penia.  
\v 6 Gome Deo ega iifa pukagai iina eifa oma:  
\q1 “Amoisa, Lau kepo agaꞌo lakinaga, ke uuꞌu kapula ipauma kiugai eapa, kapa akaikiꞌa auga  
\q2 Sion ikugai laogeisa.  
\q1 Ke kaisau isa epakoꞌania auga, afakepapameagaina,”  
\p eoma. \rq Aisaea 28:16\rq*   
\p
\v 7-8 Ega puo oi kepo egaꞌina opakoꞌania aumi, kepo egaꞌina oi eemiai auga kapa akaikiꞌa. Egaꞌina auga Deo ega iifa pukagai iina eifa oma koa iꞌopoga mo emia:  
\q1 “Eꞌa ipaapa auꞌi kepo keumakalaina auga,  
\q2 kepo egaꞌina pau eꞌa egaꞌinagai kiuga uuꞌuga kapula ipauma emia,”  
\p eoma. \rq Sam 118:22\rq*  
\m Kai kaisau kepo egaꞌina akepakoꞌania auꞌi fouꞌi Deo ega iifa pukagai iina eifa oma. Egaꞌina kepo auga:  
\q1 “Kepo agaꞌo papiau eꞌi keaga ekaisapua ifeꞌi keꞌanina auga,  
\q2 ke fopa agaꞌo papiau epaꞌualaiꞌi auga,”  
\p eoma. \rq Aisaea 8:14\rq*  
\m Deo ega iifa pukagai eifania koa iꞌopoga, isa egaꞌina kepogai ifeꞌi keꞌanina, gome isa Deo ega iifa muninai akepea. Egaꞌina auga Deo isa fauꞌiai kapaꞌina ekapaisa ekae auga, isa faagaꞌiai emia.   
\p
\v 9 Kai oi auga, Deo ekinanimi papiaumi. Ke oi sakedote, Deo, Kin ega pinauga okapa aumi. Ke oi Deo ega ago papiaumi, ke Deo apuga omia. Ega koa Deo oi uminagai eifalaimi elaoainimi Isa ega eaea felo ipaumagai epakokoimi auga isau afagaina foifafoua eoma.  
\v 10 Ufainagai oi auga Deo ega papiau alomia. Kai pau auga oi Deo ega papiau omia. Ufainagai oi Deo ega guani aloafia. Kai pau auga oi Isa ega guani oafiia efua.   
\p
\v 11 Ekefaꞌauagai, lau oi iꞌina agofaꞌagai, ago iꞌoina aumi, ke au aꞌimi koa iꞌopomi oague aumi magogo kapula lapenimi. Ega koa papiau aumauni imaauga kapaꞌina apala emaaga, oi lalaumi fou kepipaini auga fomunia.  
\v 12 Oi Deo akepakoꞌania papiauꞌi epoꞌiai oague alogai, agu felogai foagu. Ega koa isa oi laomai apala okapa keoma keifa apala penimi mo ganinagai, isa oi felo okapa auga fekeisa, ke Iesu Kristo agemai iꞌa ageisaꞌa kinagai aisama, isa Deo au akaikiꞌa fekepamia laoma.   
\s1 Isapu Keafia Auꞌi Ainaꞌi Foafia  
\p
\v 13 Papiau epoꞌiai isapu keafia papiau keꞌimaꞌi auꞌi agaꞌo agaꞌo auga Lopia faugai oi ifomi egaꞌina auꞌi ainaꞌi foafia. Egaꞌina auꞌi auga, kin au akaikiꞌaꞌi maꞌoai kaniaꞌiai auga.  
\v 14 Ke kin kafana eulaisa papiau laomai apalaꞌi kekapaꞌi auꞌi afa apala kepeniꞌi, ke papiau laomai feloꞌi kekapaꞌi auꞌi afa felo kepeniꞌi auꞌi.  
\v 15 Gome Deo ega logo auga, oi laomai felo fokapa, ega koa kafoꞌo papiauꞌi oi akelogonimi kai keifa apala peni aagenimi mo auꞌi akeꞌi foafuga eoma.  
\v 16 Deo agogai auga oi kapa maꞌoai agokapaꞌi agekaina. Kai oi Deo agogai kapa maꞌoai agokapaꞌi agekaina auga laoga maina folopapinaugania, laomai apalaꞌi folomokaꞌi. Kai oi Deo ega pinauga aumi koa foagu.  
\v 17 Ke papiau maꞌoai au akaikiꞌaꞌi fopamiaꞌi. Ke alomi koꞌagai aami akimi pakoꞌa auꞌi aniꞌi foani. Deo fomaniꞌiaina, ke kin auga au akaikiꞌa fopamia.   
\p
\v 18 Ke oi kalaꞌafi aumi, oi kapa maꞌoai agokapaꞌi alogai, keꞌimaimi auꞌi fomaniꞌiainiꞌi ke ainaꞌi foafia. Ke egaꞌina agokapa alogai, keopolanimi ke keꞌima feloimi auꞌi mo faagaꞌiai egaꞌina folokapa. Kai eemiai kefaꞌiꞌi akekapa feloimi auꞌi isafa faagaꞌiai ega koa fokapa.  
\v 19 Gome au agaꞌo Deo eopolaga kainai, aufalao agaꞌo isa eegai laomai felo aekapa puogai ekiekie mo ganinagai, gamuga mo ageopo ageafiapia mo auga, Deo isa felo ikapa auga ageoma.  
\v 20 Kai oi laomai apala lokapaisa kainai, keaunio kai oi kiekie egaꞌina gamuga mo loopo loafiapia mo koa aisama, kapa agaꞌo felo oi faagamuai afaemia. Kai oi laomai felo lokapa kainai faagamu kepakiekie, ke oi egaꞌina kiekie gamuga mo aloopo aloafiapia mo koa aisama, Deo maagai egaꞌina auga felo ageoma.  
\v 21 Egaꞌina puogai Deo eifanimi, gome Iesu Kristo oi faumiai ekiekie. Ke isa ega koa ekapaisa, oi isa iisa mo foꞌopo auga keagaga epakinaimi. Ega koa oi isa ife afugai mo fopea eoma.  
\v 22 Isa laomai apala agaꞌo aekapaisa. Ke isa akegai pifoge agaꞌo akekapulaisa.  
\v 23 Ke papiau isa eegai keifa apala aisama, isa eꞌi iifa afa aeogeisa aeifa apala peniꞌi. Ke papiau isa faaga kepakiekie aisama, isa iifa agaꞌo aeifania aepamaniꞌiniꞌi. Kai isa ifo elogoaina, Deo afa felogai epipeni auga eega elao.  
\v 24 Isa ifo imaaugai kolotiai iꞌa aꞌa laomai apalaꞌi epuaiꞌi. Ega koa iꞌa laomai apalaꞌi eeꞌiai famae kai, alo opai agugai faagu eoma. Ke isa faaga keau kaniniꞌi auga kainai oi Deo maagai felomi omia.  
\v 25 Gome ufainagai oi auga sipi keaga iꞌoina keafia auꞌi koa omia. Kai pau auga omue omai Deo Sipi Iꞌima auga, ke lalaumi eꞌima auga eegai.   
\c 3  
\s1 Au Papie Fou  
\p
\v 1-2 Ke kalaꞌafi isa keꞌimaꞌi auꞌi ainaꞌi keafia koa iꞌopoga, oi papie aumi, akafami ainaꞌi foafia. Ega koa oi papie kapami akafami Deo ega iifa akepakoꞌania auꞌi isafa oi emi laomaisai iifa agaꞌo aloifania komo mo ooma, ke oi Deo omaniꞌiaina, ke alomi elolofa auga fekeisa. Ke oi emi laomaisai isa folaꞌa pagainiꞌi laoma.  
\v 3 Ke oi iisami felo amopamia agooma koa aisama, oi faagami afe folopakaikaisa. Egaꞌina auga oi fufumi opakaikaisa kapaꞌi ke tepole, o ouꞌou goldai kekapaꞌi auꞌi, ke afemi tiapuꞌi feloꞌi ipaumagai folokaikai.  
\v 4 Kai oi alomi fopakaikaisa. Ke oi alomi iisa felo egaꞌina auga, Deo maagai papiau gagafeꞌi mo eafia, ke komo mo eoma auga, ke alomi kaikaina egaꞌina auga laaꞌi afaemiamia. Ke egaꞌina auga Deo maagai kapa akaikiꞌa ipauma.  
\v 5 Gome ufainagai keagu papieꞌi aloꞌi elolofa auꞌi, ke Deo eegai eꞌi afiaꞌama keoge auꞌi auga, ega koa kekapaisa aloꞌi kepakaikaisa. Ke isa ifoꞌi akafaꞌi ainaꞌi keafiia.  
\v 6 Ke ega koa kekapaisa auga, Sara akafa Abraham aina eafiia, ke eifaga ega lopia eoma auga koa iꞌopoga mo kekapaisa. Oi kapaꞌina felo auga mo agokapa, ke kapaꞌina mo fekemia mo ganinagai, afolomaniꞌi akafami ainaꞌi agoafia paisa koa aisama, oi Sara gauga papiemi, Deo gauga ipaumami.   
\p
\v 7 Ke oi au aumi, papie oi eemiai kekapa koa iꞌopoga, oi akafami fou oague alogai, oi isafa kapaꞌina isa eeꞌiai okapa auga foopola felo kai fokapa. Ke oi isa fopalopianiꞌi. Ke egaꞌina okapa alogai, oi akafami keapoke akekapula auꞌi koa eeꞌiai fokapa, ke Deo ega gafegafeai agu pagai maunina pipenina epipeni auga, isa oi fou kaimialao agoafia auga koa iꞌopoga laoga maina eeꞌiai fokapa. Ega koa kapa agaꞌo oi emi megamega keagaga faekaisapua.   
\s1 Laomai Felo Okapa Kainai Okiekie Auga Fouga  
\p
\v 8 Ke niniꞌani egaꞌina laifaniꞌi fuagai auga, oi maꞌoai agaꞌo agaꞌo alomi agaꞌomo femia. Ke agaꞌo agaꞌo emi kiekie fopuaꞌi. Ke aami akimi koa alomi koꞌagai agaꞌo agaꞌo animi foani. Ke agaꞌo agaꞌo guami foania, ke ifomi eꞌelemi fopamiaimi.  
\v 9 Ke aufalao agaꞌo oi eemiai apala ekapaisa koa aisama, oi isa afa folopenimue eegai apala folokapa. Ke aufalao agaꞌo oi eifa apala penimi koa aisama, oi isa ega iifa afa folopamue, foloifa apala penia. Kai Deo kapa feloꞌi isa agepenia auga maagai foifania, foifa felo penia. Gome oi ologo Deo oi eifanimi auga iꞌina puogai eifanimi, ega koa Deo kapa feloꞌi oi fepenimi eoma auga foafiꞌi eoma.  
\v 10 Gome,  
\q1 “Kaisau alo koꞌagai ifo ega agu maunina anina eani auga,  
\q2 ke anina eani kina feloꞌi feisaꞌi eoma auga,  
\q2 mala feꞌima malagai iifa apalaꞌi agaꞌo faepealai.  
\q1 Ke fifina isafa feꞌima, fifinagai pifoge iifaꞌi agaꞌo fakepealai.   
\q1
\v 11 Isa laomai apala femunia ke laomai felo fekapa.  
\q2 Ke isa gagao fekapuga muninai fepiau.   
\q1
\v 12 Gome Lopia maaga auga,  
\q2 papiau Isa maagai aloꞌi opaina auꞌi eeꞌiai ekae.  
\q2 Ke Isa aina auga, isa eꞌi megamega eegai ekae.  
\q1 Kai Lopia kaisau laomai apalaꞌi kekapaꞌi auꞌi emuniꞌi.” \rq Sam 34:12-16\rq*   
\p
\v 13 Ke oi alomi koꞌagai laomai felo muninai amopea ooma koa aisama, kai agaꞌo oi afaepalifuimi.  
\v 14 Kai oi felo okapa auga puogai papiau oi fekepakiekieimi mo ganinagai, Deo oi kapa feloꞌi epeniimi efua. Ke oi isa eꞌi pamaniꞌi folomaniꞌiaina ke foloopopo isafa.  
\v 15 Kai alomiai Iesu Kristo auga Lopia alo elolofa auga fopamia. Ke aufa kina fofua foagu, papiau agaꞌo agaꞌo oi emi afiaꞌama oafiia auga gome afekepaꞌaniaina koa aisama, eꞌi paꞌani afa fopenimueꞌi.  
\v 16 Kai egaꞌina agokapa alogai, Deo maagai kapaꞌina felo auga mo foopolaga fokapa, papiau gagafeꞌi mo foafia, ke au akaikiꞌai fopamiaꞌi. Ega koa papiau kapaꞌi oi Iesu Kristo faugai laomai feloꞌi okapaꞌi auꞌi eeꞌiai keifa apala, ke kepaagu fofou aagenimi mo auꞌi, egaꞌina meagaina fekepaꞌaua laoma.  
\v 17 Gome oi felo okapa kainai Deo ega logoai okiekie koa aisama, egaꞌina auga Deo agogai felo ipauma. Kai oi apala okapa kainai Deo ega logoai okiekie koa aisama, egaꞌina auga Deo agogai apala ipauma.  
\v 18 Gome Iesu Kristo alo opaina auga, oi alomi opaina laaꞌi aumi emi laomai apalaꞌi fauꞌiai emae agaꞌonia mo, ega koa isa oi Deo eega felaoainimi eoma. Isa imaauga auga keaupugua kai, Deo ega Spiritu ega isapuai isa emaunimue pugu.  
\v 19 Ke Spiritu egaꞌina ega isapuai isa elao papiau eꞌi spiritu ketipula auꞌi maaꞌiai einogo.  
\v 20 Egaꞌina auꞌi auga ufainagai Noa eagu kinaꞌiai sikuna ekapaisa alogai, papiau Deo aina akeafia auꞌi. Kai Deo alo isa eeꞌiai eafiapia mo. Ke Deo sikuna egaꞌinagai papiau oisomo mo, auꞌi imagea gua mo fei eegai kaniaꞌi eagamauga.  
\v 21 Ke fei egaꞌina auga, pau oi feisai baptismo oafia, ke Deo oi isafa kaniami eagamauga auga feina gouga. Ke egaꞌina auga, fei egaꞌina oi emi laomai apalaꞌi, ofu koa iꞌopoꞌi faagamiai kekae auꞌi aeikulaiꞌi. Kai oi pakoꞌa iifaga koa okapa, alomi felogai Deo eega olao. Ke baptismo egaꞌina auga, Iesu Kristo ega maunimueai, Deo oi kaniami eagamauga auga gouga.  
\v 22 Ke Iesu Kristo auga, eꞌagaukae elao ufai Deo kaina kainai eaguega. Ke agelo ke ufai isapu keafia auꞌi, ke ufai isapu maꞌoai fou isa papagai kemia.   
\c 4  
\s1 Deo Faugai Foagu  
\p
\v 1 Ega puo Iesu Kristo imaaugai ekiekie kainai, oi isafa isa ekapaisa koa iꞌopoga mo opolaga foafia fofua foagu. Gome aufalao agaꞌo imaaugai ekiekie aisama, laomai apala ikapa eapakipo.  
\v 2 Egaꞌina afegai isa eagu alogai, papiau aumauni kapaꞌina apalaꞌi emaaniꞌi auꞌi fauꞌiai afaeagu. Kai Deo ega logoai kapaꞌina anina eani auga faugai ageagu.  
\v 3 Gome oi ufainagai Deo akelogonia auꞌi kapaꞌina anina keani auꞌi mo kapaꞌi okapaiꞌi emai pau emi kina ekainia. Egaꞌina auga oi amage koa laoꞌi maiꞌi apalaꞌi ipaumaꞌi auꞌi, ke kapa apalaꞌi omaaniꞌi, ke oinuinu alogaina, ke omiamia oinuinu, ke ogefa aꞌoaꞌo akaikiꞌa ipauma okapaisa, ke pifoge deoꞌi oau afagainiꞌi, Deo alo koꞌagai anina aeani auꞌi laoꞌi maiꞌi okapaiꞌi.  
\v 4 Ke pau laomai apalaꞌi egaꞌina kekapaꞌi auꞌi auga, oi fiakoa mo isa fou alomia, ega koa kapaꞌi apalaꞌi ipaumaꞌi maꞌo alokapaꞌi auga eegai kekauai alogaina. Ke isa oi keifa apala peni alogainimi.  
\v 5 Kai egaꞌina papiauꞌi auga, Deo efua eague papiau keague auꞌi ke mae auꞌi fou eꞌi laomai apala afa agepeniꞌi auga maagai isa kapaꞌina kekapa auga akeifafoua.  
\v 6 Gome egaꞌina kainai papiau isaꞌi kemae efua auꞌi isafa maaꞌiai Iifa Faunina Iesu fouga keinogonia. Ega koa Deo papiau aumauni imaauꞌiai kapaꞌina kekapaisa auga iꞌopoga mo afa fepeniꞌi kai lalauꞌi auga, Deo maagai Deo ega aguai fekeagu eoma.   
\p
\v 7 Kai pau kapa maꞌoai fekefua laaꞌi fekemia auga kina emai kainagai. Ega puo oi alomi foꞌima felo, ke opolami felogai foagu. Ega koa oi fomegamega fekaina.  
\v 8 Ke egaꞌina laagai auga, oi alomi koꞌagai agaꞌo agaꞌo animi foani alogaina. Gome oi alomi koꞌagai animi agoani koa aisama, egaꞌina laoga mainai papiau oi eemiai laomai apalaꞌi maꞌo kekapaꞌi auꞌi agemokaꞌi agoꞌagegeainiꞌi.  
\v 9 Ke agaꞌo agaꞌo foifa kokoimi kai egaꞌina agokapa alogai foloifa mugumugu.  
\v 10 Ke agaꞌo agaꞌo Deo eegai pipeni iꞌoiꞌi iꞌoiꞌi oafiiꞌi auꞌi pinauga felo auga koa iꞌopomi fomia, Deo ega gafegafe akaikiꞌa pipeniꞌi egaꞌina fopapinauganiꞌi agaꞌo agaꞌo fopalagainimi.  
\v 11 Ke aufalao agaꞌo eniniꞌani koa aisama, isa Deo ega iifa eifafoua auga koa iꞌopoga feniniꞌani. Ke aufalao agaꞌo papiau epalagainiꞌi koa aisama, isa Deo kapula epipeni auga kapulagai papiau fepalagainiꞌi. Ega koa kapa maꞌoai agekapaꞌi alogai, Iesu Kristo faagagai papiau maꞌoai Deo mo fekeau afagaina. Ke papiau Deo egaꞌina auga au akaikiꞌa fekepamia ke isapu gome auga fekepamia aoniamo. Amen.   
\s1 Kristiano Papiaumi Omia Kainai Okiekie  
\p
\v 12 Ekefaꞌauagai, oi iꞌopo kiekieꞌi akaikiꞌaꞌi oafiꞌi aisama, egaꞌina auga kapa mamaꞌi koa iꞌopoꞌi folopamiaꞌi folokauai alogaina.  
\v 13 Kai Iesu Kristo ekiekie auga kiekiegai oi isafa okiekie auga alogama fopaꞌaua. Ega koa isa ega isapu ke eaea akaikiꞌa agepafokia aisama, oi alomi alogama fepogu laoma.  
\v 14 Ke Iesu Kristo aka puogai papiau oi akeifa apala penimi koa aisama, oi auga Deo eegai kapa feloꞌi oafiꞌi aumi. Gome Deo ega Spiritu, isapu ke eaea akaikiꞌa gome auga oi alomiai eague.  
\v 15 Kai oi okiekie koa aisama, oi auau aumi, o painao aumi, o kelele akaikiꞌaꞌi iꞌoiꞌi iꞌoiꞌi maꞌoai, o aufalao agaꞌo ago okaina puogai folokiekie.  
\v 16 Kai oi Kristiano omia kainai okiekie koa aisama folomeagai. Kai oi Iesu Kristo aka oafiia kainai, Deo foau afagaina.  
\v 17 Gome Deo papiau eꞌi laomai felo, o apala afa agepeniꞌi auga, kina eꞌina efua. Ke egaꞌina auga Deo ega papiau auꞌi faagaꞌiai ageꞌina. Ke Deo iꞌa faagaꞌaisai ageꞌina aꞌa laomai felo, o apala afa agepeniꞌa koa aisama, papiau Deo ega Iifa Faunina kainai akepea auꞌi auga faagaꞌiai kapaꞌina agemia?  
\v 18 Egaꞌina auga Deo ega iifa pukagai eifania koa iꞌopoga:  
\q1 “Deo papiau aloꞌi opaina auꞌi kaniaꞌi feagamauga auga eꞌinoka koa aisama,  
\q2 papiau Deo maagai aloꞌi opaina laaꞌi auꞌi,  
\q2 ke laomai apalaꞌi kekapaꞌi auꞌi auga faagaꞌiai kapaꞌina agemia?” \rq Proverbs 11:31\rq*   
\p
\v 19 Ega puo kai mo Deo ega logoai kekiekie auꞌi auga laomai felo mo fekekapa faefuafua. Ke egaꞌina akekapa alogai, isa eꞌi agu maunina isa Epagamaꞌi Auga, ke eꞌi pakoꞌa eegai akeoge agekaina auga imagai fekeogeaua.   
\c 5  
\s1 Iifi Eꞌa Auꞌi Akaikiꞌaꞌi Ke Au Aguꞌaꞌi Fou Fouꞌi  
\p
\v 1 Ke lau oi epomiai iifi eꞌa au akaikiꞌaꞌi auꞌi koa iꞌopoꞌi iifi eꞌa au akaikiꞌau agaꞌo, ke Iesu Kristo iꞌa fauꞌaisai ekiekie auga fouga koꞌa mo laifafoua au. Ke lau isafa isa agemai ega isapu, ke eaea akaikiꞌa fou agepafokia aisama, lau isa fou kaiꞌalao egaꞌina isapuga agaafia. Lau oi iifi eꞌa au akaikiꞌami aumi lagoinimi:  
\v 2 Oi sipi iꞌima auꞌi koa fomia, Deo ega papiau sipi koa iꞌopoꞌi fou oague auꞌi foꞌima feloꞌi. Kai egaꞌina agokapa alogai, oi fokapa puogai folokapa kai, Deo anina eani oi alomiai anina oani puogai fokapa eoma koa iꞌopoga mo fokapa. Ke egaꞌina alogai moni folomogemoge laina kai, alomi koꞌagai papiau fopalagainiꞌi.  
\v 3 Ke Deo oi papiau kapaꞌi epeniimi foꞌimaꞌi eoma auga pinaugaga fokapa felo kai, oi ifomi mo emi isapuai egaꞌina papiauꞌi fololopialainiꞌi. Ke oi isa kapaꞌina fekekapa auga fopakinaꞌi fekekapa.  
\v 4 Ke Sipi Iꞌimaꞌi Lopiaga auga ageapafoki aisama, isa oi kin kaniaꞌiai kraon keoge auga koa iꞌopoga iisa felo ipauma, isapuga ke eaea akaikiꞌa laaꞌi afaemia auga agepenimi.   
\p
\v 5 Ke oi au aguꞌami aumi isafa, oi iifi eꞌa au akaikiꞌaꞌi auꞌi ainaꞌi foafia. Ke oi maꞌoai auga ifomi eꞌelemi fopamiaimi laoga maina auga foafi inokania, papiau agaꞌo agaꞌo eeꞌiai fokapa. Gome  
\q1 “Deo kaisau ifoꞌi au akaikiꞌaꞌi kepamiaꞌi auꞌi eeꞌiai eapa emuni.  
\q2 Kai kaisau ifoꞌi eꞌeleꞌi kepamiaꞌi auꞌi ega gafegafe akaikiꞌa epeniꞌi.” \rq Proverbs 3:34\rq*   
\p
\v 6 Ega puo Deo ima isapuga akaikiꞌa papagai auga oi ifomi eꞌelemi amopamiaimi. Ega koa kina agekaina aisama, Isa oi ageafiakaemi au akaikiꞌami agepamiaimi.  
\v 7 Ke Deo oi eopopolainimi puo, oi emi opopo maꞌoai amopiuniꞌi Isa eega kegalao.   
\p
\v 8 Ke oi ifomi foꞌima feloimi, ke maami fekiakae foagu. Gome oi emi ou auga tiapolo laion koa eagaga epea aisoge papiau agaꞌo ekapuga gakogopa eoma.  
\v 9 Kai oi emi pakoꞌai foapa kapula kai isa foumakalaina. Gome agofaꞌai oi aami akimi Kristiano auꞌi oi kiekie aloꞌiai okoko auꞌi iꞌopoꞌi mo isa aloꞌiai kekoko auga ologo.   
\p
\v 10 Ke Deo gafegafe maꞌoai inagome auga, Iesu Kristo faagagai oi eifanimi, Isa ega isapu, ke eaea akaikiꞌa fou akeka aoniamo auga foafia eoma. Ke oi kina pika koa mo agokiekie afegai, Isa ifo oi emi kiekie eegai agepapealaimi. Ke Isa oi emi pakoꞌai agepakapulanimi afololao afolomai, ke emi pakoꞌa agoafiapia.  
\v 11 Deo egaꞌina auga, isapu akaikiꞌa inagome auga fopamia aoniamo. Amen.   
\s1 Pamego Fua  
\p
\v 12 Ke malele iꞌina ofolaꞌoga mo auga, Silas lau lapakoꞌania ke akiu koa lapamia auga epalagainiau lapapua eemi efai. Ega koa lau oi magogo kapula fapenimi, ke iꞌina iifaga auga Deo ega gafegafe akaikiꞌa koꞌa ipauma auga faifafoua laoma. Deo ega gafegafe egaꞌina alogai foapa inoka.   
\p
\v 13 Ke Babilon agogai iifi eꞌa agaꞌo, Deo oi fou kaimialao ekinanimi auga ega pamego iifaꞌi oi eemiai eulaisa. Ke Mako lau gau koa iꞌopoga lapamia auga isafa ega pamego iifaꞌi oi eemiai eulaisa.  
\v 14 Ke alomi koꞌagai agaꞌo agaꞌo animi oani auga laoga mainai, agaꞌo agaꞌo fopamegonimi.  
\p Lau lamegamega ega koa Deo ega gagao, oi Iesu Kristo fou omia aumi maꞌoai fepenimi laoma.