\id TIT - Melpa NT [med] -Papua New Guinea 1995 (DBL 2014) 
\h Taitas 
\toc2 Taitas 
\toc1 Taitas 
\toc3 Tai 
\mt1 TAITAS  
\imt1 KUIMP TEPA IK KɄⱠ  
\is2 Ya Buk Ei Nga Puⱡ Ei:  
\ip Pol ndi, Taitas mon ropa ngumba kʉn, Got nga ropa tenda ila Krit nu muⱡ kuimp wamp mbʉ, tʉpa kun mundpa, ronduⱡ mundangga nimba mon ei ropa ngurum.  
\is2 Ya Buk Ei, Nam Ndi Rurum:  
\ip Ya buk kʉⱡ, Pol ndi, mon rurum.  
\is2 Mon Ropa Nam Ngurum:  
\ip Pol ndi, mon ei ropa, Grik kona ila wu Taitas ei ngurum.  
\is2 Ui Nant Ila Rurum:  
\ip Pol ndi, mon ei, kang manga ila pepa, ekit omba kʉn, Masaroniya kona ila moⱡpa, ei Kraist metʉng ei kʉn, mbuldung orunga pana 63-65(AD) ila kʉⱡ rurum.  
\is2 Ik Ronduⱡ: Taitas 1:5  
\ip Na ndi, nim Krit kona ila mondʉp kelip ur ei, nambuⱡ emel, kongun mat kun pi nʉpʉrʉm mbʉ, tʉkʉn kun mundkʉn itʉn nʉmp it. Wote, kona peng elpa elpa tetʉm mbila, atinga manga rʉp wu mat na ndi, unt nim man ngur ni mel iti.  
\is1 IK PENG KɄⱠ  
\iot Rump  
\io1 1:1-1:4 - Pol ndi, Taitas mon ropa ngurum  
\io1 1:5-1:16 - Taitas, Krit kona ila kongun itim  
\io1 2:1-2:15 - Man ik ronduⱡ  
\io1 3:1-3:11 - Uⱡ kai mbila ronduⱡ mondpʉn muⱡʉmʉn  
\io1 3:12-3:15 - Nimba pora ndurum ik mat  
\c 1  
\s1 Pol Ndi, Taitas Mon Ropa Ngurum  
\p
\v 1-2 Na Pol, Got nga kongun kindmant endʉp, wote Jisas Kraist nga nombuⱡa rung wu mor ei ndi, mon ei rop ngunt. Got ndi, na mbi ropa tʉpa mundrum ei, Got elim nga mbi ropa titim wamp mbʉ nga mondpa pili orunga, etʉp ronduⱡ mundʉp, elim nga uⱡ kun kupa mbʉ kandʉk tʉk, Got nga wamp mel muⱡing ei nga, na ndi, tʉp ora nduimp. Got wu ik kol rui narʉrʉm ei ndi, unt muⱡ mʉi raⱡ, iti nʉtʉtʉm ei kʉn, uⱡ nga kunt nga kont mul uⱡ ei, tʉn nguimp nimba mi titim.  
\v 3 Uⱡ kʉⱡ, elim nga ui kai kʉmp ropa itim ila, akup elim nga rʉnang ik kai ila tʉpa mot ndonʉm. Uⱡ ei na ndi, kapⱡa itimp ei nga pilpa mbi ndupa, na neimp nilinga nʉnt ei, Got tʉn nga Etpa Ti Wu ei, elim ndi, ni nilinga, nʉmp ekit ndunt.   
\p
\v 4 Mon ei, Taitas kʉn rop ngunt, nim na kʉn mondpa pili orunga, numan tenda purum ei nga, nim na nga kang kupa ei. Got Wuta kʉn, Jisas Kraist tʉn nga Etpa Ti Wu ei ndi, nim moⱡpa kundi uⱡ mbʉ kʉn, wamp poⱡ ti uⱡ mbʉ ngangga!   
\s1 Taitas, Krit Kona Ila Kongun Itim  
\p
\v 5 Na ndi, nim Krit kona ila mondʉp kelip ur ei nambuⱡ emel, kongun mat kun pi nʉpʉrʉm mbʉ, tʉkʉn kun mundkʉn itʉn nʉmp it. Wote, kona peng elpa elpa tetʉm mbila, atinga manga rʉp wu mat na ndi, unt nim man ngur ni mel iti.  
\v 6 Rʉp wu ei, wamp nga mong waⱡ ila uⱡ ⱡawa mat iti natʉpa, amp tenda tʉpa, wote elim nga kangambuⱡa mbʉ, mondpa pili kangambuⱡa mbʉ molk, ik tʉk roi nduk, uⱡ kit mbʉ iti natʉk, kangambuⱡa kai mat muⱡeing.  
\v 7 Got nga kongun rʉp etmba wu ti, wamp nga mong waⱡ ila, uⱡ ⱡawa mat iti natʉpa. Wote wu ei, popʉⱡ tʉkrʉpa mundi namʉndpa, nu ronduⱡ mat ou ndupa nomba, numan mbo pili napilpa iti nʉtangga! Wote kng mel mbʉ nga kum pendpa iti nʉtangga.  
\v 8 Rʉp wu kandʉk ting ei, wu ti wamp ki ngumba, uⱡ kai mbʉ etpa, numan ingk pilpa, elim ndi, elim rʉp etpa, nombuⱡa kun tem ila andpa, wamp nga mong waⱡ ila uⱡ kun kai mbʉ itangga!  
\v 9 Rʉp wu ei, elim Rʉnang Ik Kai ei, ronduⱡ mundpa ambuⱡpa, ik puⱡ pem mbila kun nimba itangga. I em uⱡ ei ndi, wamp mat ik kupa mbʉ nga puⱡ petʉm mbʉ, mbo rundangina, pilik tʉk pep rok, wote en enim nga uⱡ ⱡawa eng mbʉ, pilik mbi nduk wak reing.   
\p
\v 10 Ik nʉnt ei, nambuⱡ emel, ik Got nga ik tʉk roi nduk, roldʉnga nʉk, ik kol rok etmin wamp ei nga puⱡi mormin. Wamp mbʉ ndi, wamp mat ik kil rok nguk tʉk tiki pondurmʉn. Ei, Jura wamp, kʉng kupti wamp rʉⱡaip kʉⱡ ndi, puⱡ pendʉk etmin.  
\v 11 Ik i etʉk nitmin mbʉ, mon nʉi! Nambuⱡ emel, wamp mbʉ, enim nga numan orunga ku moni ting ei nga mendpʉⱡ pilik, wamp ik mbo rondurmin orunga omba kun pi napʉⱡnga, wamp mbo tenda rʉⱡaip ei nga, wamp puⱡi enimp kurmin.  
\v 12 Unt Krit mʉi puⱡ wu mendpʉⱡ ti, ik pai nui wu ei ndi, ik ti nitim ei ndi, nimba mel, “Krit wamp mbʉ, ik kol nga puⱡ wamp mbʉ, kng owa rakra mbʉ mel kapⱡa, kongun iti natʉk, rʉng wal nok, wei mormin wamp mbʉ,” nitim.  
\v 13-14 Ik i etpa nitim ik kʉⱡ, omba kupa enim. Uⱡ puⱡ ila nga wamp mbʉ ronduⱡ mundkʉn ik mbo rundana, wamp mbʉ nga mondpa pili orunga omba kun mba kai itangga. Wote, Jura wamp nga uⱡ unt nga pep rormin mbʉ kʉn, wamp nga mi ik mim etʉk, ik kupa tʉk pei mundʉk etmin uⱡ mbʉ, wak ruing ni!  
\v 15 Ei nga, wamp namin mat, numan orunga eng norum mbʉ ndi, mel mbʉ pora kai mint nʉk pʉtmʉn. Wote, wamp namin mat, numan orunga kit moⱡnga, mundʉk pili napʉtmʉn mbʉ ndi, mel mbʉ pora, eng nui nandʉrʉm nʉk pʉtmʉn. Nambuⱡ emel, en enim nga numan orunga kʉn pi nʉpʉtʉm.  
\v 16 Wamp mbʉ ndi, Got pʉtmʉn ning ei, wote enim nga ik nʉk, nombuⱡa andʉk rʉng nok etmin uⱡ mbʉ ndi, ora ndupa, mon nimba petʉm. Wamp mbʉ, numan ngui ngʉngi. Wamp mbʉ, ik tʉk roi nduk molk, uⱡ mat mura mondʉk iting mel, kapⱡa mon.   
\c 2  
\s1 Man Ik Ronduⱡ  
\p
\v 1 Wote, nim ndi molkʉn kʉn, wamp mbʉ ik ronduⱡ mat, tʉn ndi, mbo rundʉrmʉn nimbʉ nga puⱡ petʉm mbila, kun mbo rundi.  
\v 2 Wu mam ronduⱡ na mbʉ kundkʉn, nu nok kekilip rui narʉk, enim nga numan orunga rʉp mint etʉk, numan tenda ei piyangga. Wote, i etʉk molk kʉn, en enim nga mondpa pili orunga, wamp numan ngui uⱡ ei kʉn, wote enim nga mbun kandʉk tinmʉn uⱡ mbila, ronduⱡ mundʉk muⱡing uⱡ ei, kun mba piyangga!  
\v 3-5 Ei mel ku, amp wenda ronduⱡ na mbʉ kundkʉn, amp ingk kun kai mbʉ muⱡeing ni, nu nok kekilip rui narʉk, wote wamp ti nga ik mbuldung orunga nindi uⱡ ei nga iti natʉk, uⱡ kai mbʉ nga mint pep rok iteing ni. I eng uⱡ ei ndi, amp wendʉp mbʉ, mbo rundangina, en enim nga wamʉl na, kangambuⱡa na mbʉ, numan ngʉk, numan tenda pilik, kun kai molk, wote mang kona kongun mbʉ nga mura muⱡangga, wamʉl nga mana orunga mint molk, ik teng nduk iteing. I etʉk tangina kʉn, wamp tenda na ti ndi, Got nga rʉnang ik ei nʉk, kit mundi nʉmʉndeing.   
\p
\v 6 Uⱡ ei mel ku, kang wu mbʉ, en enim nga numan orunga rʉp etʉk, muⱡeing nʉkʉn man ngui!  
\v 7 Nim ninim uⱡ mbila pora, mura mondkʉn, ninim wamp mbʉ, ik mbo rondrʉn ei mel, pep rokʉn etkʉn kuimp tiyana! Wote, wamp mbʉ ndi, nim nga in uⱡ mbʉ kandʉk pep reing. Ik kupa ei, ronduⱡ mundkʉn, mbo endʉnt nʉkʉn iti!  
\v 8 Ik mong ronduⱡ mbʉ, ekit tʉkʉn nana kʉn, ik mbuldung orunga nʉndʉtmʉn wamp mbʉ, nʉkʉn pipil kundana, wote tʉn nʉk kit mundi nʉmʉndeing.   
\p
\v 9-10 Wote, kongun kindmant wu mbʉ kundkʉn, en enim nga wu nuim mbʉ nga ik teng nduk, uⱡ namba uⱡ eng mbʉ etʉk, wu nuim mbʉ nga numan orunga etʉk, wang nduk, ik pundma rui narʉk, kindʉp nui nandʉk, kongun kindmant wu mbʉ, en enim ora nduk, en enim molk kai mondʉk, numan tenda pendʉk muⱡeing. Wote, i eng uⱡ ei ndi, Got ei, tʉn nga Etpa Ti Wu ei nga ik mbo rondrum kʉⱡ, omba muⱡ piyangga.  
\v 11 Got elim nga wamp poⱡ tʉpa, wote etpa rukʉr tʉtʉm uⱡ ei, unt wamp mbʉ kʉn etpa mot ndurum.  
\v 12 Tʉn pʉtmʉn ni, wamp poⱡ titim uⱡ ei ndi, tʉn ora ndupa, Got tʉpa mbuⱡ ngui uⱡ kit mbʉ kʉn, wote mʉi kona ila uⱡ mbʉ, ou ndupʉn pep rop enmin ei uⱡ mbʉ, akup ui monmʉn ila wak ropʉn, numan kai mbʉ yant tʉpʉn, numan orunga ronduⱡ mundpʉn, Got nga nombuⱡa kun tetʉm ila pʉmʉn.  
\v 13 I etʉp moⱡpʉn kʉn, Got nga memp pinditim Ui ei, nokundpʉn muⱡʉmin. Wote ei kʉn, tʉn nga Nuim Got, wote wamp Etpa Ti Wu Kraist Jisas rʉpndi rʉⱡang eng nui pol ila moⱡpa, wangga mon mba ei, wote ui tila mot nimba.  
\v 14 Elim ndi, elim wak ropa, tʉn uⱡ kit mbila etpa tʉpa, wote wamp eng nui kʉⱡ mundrum. Ei nga, tʉn akup wamp elim nga mendpʉⱡ kʉⱡ moⱡpʉn kʉn, uⱡ kai mbʉ itmin ei nga, numan pendʉp muⱡʉmin.  
\v 15 Rʉk rʉk ya ik mong kʉⱡ nʉkʉn, wamp mbʉ etʉk ronduⱡ mundkʉn, mbo rondkʉn, man ngokʉn iti! Wote, nim kang wu kokila ti nʉk, nim tʉk mana ndui nʉndeing, mon!   
\c 3  
\s1 Uⱡ Kai Mbila Ronduⱡ Mondpʉn Muⱡʉmʉn  
\p
\v 1 Nim ndi wamp mbʉ, aldpa man ngukʉn, en enim nga gapman ei kʉn, gapman nga wu nuim mbʉ nga ronduⱡ ila, mana orunga molk, ik teng nduk, uⱡ kai mbʉ iting ei nga, rʉk rʉk tʉk kun etʉk muⱡeing ni!  
\v 2 Moⱡpa kundi uⱡ kai mbʉ etʉk, rʉk rʉk wamp mbʉ kʉn min mondʉk, wamp ti ndi ti, nʉk kit mundi uⱡ ei nga ti, iti nʉteing mon ni!  
\v 3 Tʉn pʉtmʉn ni, unt tʉn nga numan orunga kʉn, pi napʉpʉn ik tʉp roi ndupʉn, meka ropʉn, ⱡawa minal itmin. Mʉi kona ila mel mbʉ nga kindmant endʉtmin ei ndi, tʉn tʉpa kan ngurum. Wamp ti kʉn, pilpa kit pili uⱡ na, kandpa kum pindi uⱡ mbʉ nga minal itmin. Wamp mat ndi, tʉn numan ngui nganggʉrmʉn. Wote tʉn ndi, wamp mbʉ numan ngui nganggʉrmʉn ku.   
\p
\v 4-5 Wote, Got tʉn nga Etpa Ti Wu ei nga, wamp numan ngui uⱡ ei kʉn, wamp tʉpa rʉpʉndi uⱡ ei kʉn, omba pena ila pitim. Uⱡ ei ndi, tʉn etpa titim. Tʉn etpa titim uⱡ ei, tʉn nga uⱡ kai etmin mbʉ ndi mon! Wote, Got elim nga wamp kont kurum uⱡ ei ndi, tʉn etpa titim. Ei kʉn, tʉn nu titmin ei kʉn, Muⱡnga Wingti ei ndi, tʉn kont nga melinga, wamp kont kat murmʉn.  
\v 6 Tʉn nga Etpa Ti Wu Jisas Kraist ndi, kongun itim uⱡ ila, Got ndi, tʉn Muⱡnga Wingti ei, pilpa kelpa oi ndupa ngurum.  
\v 7 Uⱡ ei ndi, elim nga wamp poⱡ ti uⱡ ila, tʉn etpa tilinga, Got nga kuimp keta ila tʉn kun purmin. Wote, i etpʉn moⱡpʉn mbun, uⱡ nga kʉnt nga kont mba mul uⱡ ei, timin pilpʉn nokundpʉn mormʉn.  
\v 8 Ik kupa ei, nʉmp ngont. Wote nim ndi, wamp mbʉ kʉn, ronduⱡ mundkʉn nana, wote Got kʉn mondʉk piling wamp mbʉ, en enim ronduⱡ mundʉk, uⱡ kai mbʉ etʉk muⱡing. Ya nʉnt ik mbʉ, wamp mbʉ pora molk, kai munding.  
\v 9 Wote, wamp mat ik nʉmʉ nʉk, anda kouwʉmʉn kalk tʉtʉng mbʉ nga ik nʉk, mi ik na mbʉ nga ik palk etmin wamp mbʉ kʉn ok, tʉk muⱡʉi! Nambuⱡ emel, ik mbʉ, ik kai mat mon.  
\v 10 Wamp ti ndi, atinga rormʉn ik ei, pep rui narʉpa, elim nga ik ei pep reing nimba em wamp ei, kuimp tekʉn man ngana pilpa, ti natʉm ndam, aldpa man ngui! Wote ei kʉn, ik ei kum ti natʉm ndam, wamp ei tʉkʉn mbuⱡ ngui!  
\v 11 Nim pilik morʉn, wamp ti, nombuⱡa kun ei, wak ropa, elim nga uⱡ kit etʉm ei ndi, elim etpa kit mondrum.   
\s1 Nimba Pora Ndurum Ik Mat  
\p
\v 12 Wote na ndi, wu Artemas kep, wu Tikikus kep, tʉp nim kʉn mundunt ei kʉn, nim okʉn, ya Nikopolis kona ila ui! Nambuⱡ emel, ⱡapta mana orum ui ei kʉn, na kona ila omp muⱡimp.  
\v 13 Gapman nga mi ik pili wu Seinas kʉn, Apolus raⱡ, nombuⱡa pinggil ila, mek pinggil mel mbʉ, nim ndi, tʉkʉn kun indana mekʉⱡ pinggil.  
\v 14 Tʉn nga wamp mbʉ, kongun kai mbʉ, ronduⱡ mundʉk etʉk, wote wamp mat pilik rundʉng mbʉ, tʉk rapʉndʉk iteing. Enimp mondʉk wei monmʉn uⱡ ei mon. Moⱡpa kundi uⱡ kai mbʉ iteing.   
\p
\v 15 Na kʉn rup rop mormin wamp mbʉ ndi, nim kʉn rawe etʉk mundʉnmʉn. Tʉn nga rawe ik kai mbʉ nʉkʉn, tʉn nga mondpa pili wamp mat, tʉn numan ngormʉn mbʉ kʉn nʉkʉn ngui! Got nga wamp poⱡ ti uⱡ ei, enim kʉn pora piyangga!