\id REV - Melpa NT [med] -Papua New Guinea 1995 (DBL 2014) 
\h Repeleisen 
\toc2 Repeleisen 
\toc1 Repeleisen 
\toc3 Rep 
\mt1 REPELEISEN  
\imt1 KUIMP TEPA IK KɄⱠ  
\is2 Ya Buk Ei Nga Puⱡ Ei:  
\ip Mon ei ropa, Kraist ei kupa tʉpa ora ndupa, mondpa pili wamp mbʉ kʉn, ronduⱡ ngumba, namba uⱡ mat akil tepa omba mbʉ nga, pai nomba kʉndrʉm.  
\is2 Ya Buk Ei, Nam Ndi Rurum:  
\ip Ya buk ei, nombuⱡa rung wu Jon ndi rurum  
\is2 Mon Ropa Nam Ngurum:  
\ip Mon ei ropa, Eisiya kona ila Got nga rapa tenda wamp 7 kʉⱡ nga mondpa pili wamp mbʉ kʉn ngurum.  
\is2 Ui Nant Ila Rurum:  
\ip Mon ei, pana 95 A.D. kʉn Jon ndi, Patmos mʉi ila moⱡpa rurum  
\is2 Ik Ronduⱡ: Repeleisen 1:3  
\ip Ei kʉn, pai nomba nitim ik mong kʉⱡ, kʉmp rom wamp ti ndi, numan kai pilangga! Wote ik kʉⱡ, kum tepa pilpa, pep rom wamp ei, numan kai pilangga! Ei nambuⱡ emel, uⱡ kʉⱡ ui nondpa tila, omba pemba.  
\is1 IK PENG KɄⱠ  
\iot Rump  
\io1 1. Kraist ndi, Jon uⱡ mo ropa mbʉ, tʉpa ora ndurum  
\io1 2. Episis kona peng ou ila, Got nga rapa tenda wamp kʉⱡ kʉn, mon ei, rokʉn ngui  
\io1 3. Sadis kona ila, Got nga rapa tenda wamp kʉⱡ kʉn, mon rokʉn ngui  
\io1 4. Wi muⱡ kona ila, Got nga mbi paka rorung  
\io1 5. Buk kat mʉkʉp rok pendʉtʉng kʉⱡ, Jon kʉndrʉm  
\io1 6. Sipsip waⱡ ei ndi, kan 7 kat buk ila petʉm kʉⱡ, koⱡmung itim  
\io1 7. Isrel wamp 144,000  
\io1 8. Sipsip waⱡ ei ndi, kan 7 ei, koⱡmung itim  
\io1 9. Anggelo 5 ei ndi, pikul ik ndurum  
\io1 10. Anggelo ti ndi, Jon ni, buk kat ngurum ila nurum  
\io1 11. Wu raⱡ ndi, ik nʉkʉⱡ, ekit ndʉrʉnggil  
\io1 12. Amp ei kʉn, wimbʉ mam ei kʉn  
\io1 13. Mel rakra raⱡ oⱡa orʉnggil  
\io1 14. Wamp 144,000 ndi, kinan kont kat nʉtʉng  
\io1 15. Anggelo 7 kat ndi, mbun kit 7 mat, ambulk morung  
\io1 16. Got nga popʉⱡ ming 7 kʉⱡ  
\io1 17. Bapilon kona ou ei, amp wapra mel  
\io1 18. Bapilon kona peng ou ni, kit murum  
\io1 19. Muⱡ kona ila, wamp mbʉ molk, Got nga mbi paka rondrʉng  
\io1 20. Seitan ni, kan manga pelinga, pana 1000 enim  
\io1 21. Muⱡ mʉi kont raⱡ  
\io1 22. Wamp kont mba mul nu ei  
\c 1  
\s1 Kraist Ndi, Jon Kʉn Uⱡ Mo Ropa Mbʉ, Tʉpa Ora Ndurum  
\p
\v 1 Ya buk kʉⱡ ila, Got ndi, uⱡ wote pemba mbʉ, Jisas Kraist kʉn tʉpa ora ndurum. Ei elim nga kongun wamp mbʉ, kondpa nangga, nimba itim. Wote Jisas ndi, elim nga anggelo ei, tʉpa munduⱡnga, omba uⱡ nondpa pemba mbʉ, kongun wu Jon kundpa nitim.  
\v 2 Wote, Jon ndi, uⱡ kandpa pitim mbʉ mel pora, mbi ropa mana ndurum. Wote ronduⱡ mundpa, nimba mel, Got nga ik ei kupa mint petʉm ei, Jisas Kraist ndi, etpa mot ndurum.  
\v 3 Ei kʉn, pai nomba nitim ik mong kʉⱡ, kʉmp rom wamp ti ndi, numan kai pilangga! Wote ik kʉⱡ, kum tepa pilpa pep rom wamp ei, numan kai pilangga! Ei nambuⱡ emel, uⱡ kʉⱡ ui nondpa tila, omba pemba.   
\s1 Jon Ndi, Got Nga Rapa Tenda Wamp 7 Kʉⱡ Kʉn, Rawe Ik Nimba Mundrum  
\p
\v 4-6 Na Jon ndi, enim Got nga rapa tenda wamp ei nga kona 7 wʉl Eisiya kona ou ila mormin kʉⱡ kʉn, rawe ik mbʉ nʉmp, mon rop ngunt. Got ei, unt murum, akup morum, wote yant omba ei kʉn, wote Muⱡnga 7 kat, elim nga rʉpʉndi pol ila mormin kʉⱡ nga, wamp poⱡ ti uⱡ wamp moⱡpa kundi uⱡ tetmin kʉⱡ, enim kʉn omba piyangga! Wote, Got kangʉm wu kumina, elim kuimp tepa, wamp kui kona ila ⱡoporpa kont murum, rʉk rʉk ik kupa nimba, wote mʉi kona nuim mumuk mbʉ nga rʉp wu moⱡpa etʉm wu Jisas Kraist nga wamp poⱡ ti uⱡ, moⱡpa kundi uⱡ tetʉm mbʉ, enim kʉn kan piyangga ku! Jisas Kraist ndi, tʉn numan ngumba, elim kaⱡpa mema oi ndurum ei ndi, tʉn uⱡ kit ila tinga ndupa titim. Wote, tʉn elim nga tʉpa mumuk rurum wamp kʉⱡ tʉpa, elim nga Tipam Got nga pris kʉⱡ moⱡpʉn, elim nga kongun wamp muⱡʉmin nimba itim. Uⱡ rʉpʉndi eng nui mbʉ kʉn, uⱡ ronduⱡ pi mbʉ pora, Nuim Jisas Kraist elim kʉn, uⱡ nga kʉnt nga pepa mint pangga! Ei kupa!  
\v 7 Wu ei, kopa pol ila onum ei, kanmin muna mon? Elim kupanda ei ndi, porung wamp mbʉ ndi kep, wamp elpa elpa mbʉ ndi pikʉ kʉning. Ya mʉi kona wamp mbʉ ndi pora, wu ei om kʉn, ka mam ti iting. Ei kapⱡa piyangga mint, ei kupa.  
\v 8 Ronduⱡ pi Wu Nuim Got unt murum, wote akup morum, wote omba wu ei ndi, nimba mel, “Kokila puⱡ mundi uⱡ mbʉ kep, wote etpa pora ndui uⱡ mbʉ kep, na mint mor,” nʉtʉm.   
\s1 Ⱡoporpa Omba Purum Wu Kraist Ni, Jon Kʉndrʉm  
\p
\v 9 Na Jon ei, enim nga ʉngʉn ei, wote Jisas pep ror uⱡ ei ndi, enim kʉn na kʉn, rʉmp nilinga mormin. Ei kʉn, elim nga tʉpa mumuk rorum wamp mbʉ kʉn, uⱡ mindil nui mbʉ, kapⱡa etpʉn ronduⱡ mbun tʉtmʉn. Na nu muⱡ kuimp mʉi Patmos ila mek puk mondrung. Ei nambuⱡ emel, na Got nga ik mong kʉⱡ para ndup nʉmp, wote Jisas nga ik kupa nitim kʉⱡ, nʉmp mot ndur ei nga, ya ila mor.  
\v 10-11 Na Nuim ei nga mbi paka rormin ui ei kʉn, na nga rukʉr orunga, Muⱡnga Wingti ei ndi omba, na tʉpa kanggʉⱡnga kʉn, na nga mbuldung orung pit ei, pikul ik nʉtʉm ni mel, wi mam ti urum ei ndi omba, nimba mel, “Uⱡ enim kan ei mel, buk ila rokʉn mana ndukʉn, Got nga rapa tenda wamp mormin kona 7 kʉⱡ ila ngukʉn mundi! Ei kona peng Episis, Smerna, Pergamam kʉn, Taiyataira, Sartis, Pilatelpiya kʉn Leyorasiya kʉn,” nitim.   
\p
\v 12-13 Ni kʉn, ik ninim wamp ei, kʉnimp nʉmp tʉp ropʉl rop kʉndʉr mel, gol lam eng nui 7 kʉⱡ, kiya nok molk pok etʉng. Ei nga, ruk ting ila wamp mel ti, anggilpa murum. Ni ndi, wal pʉki ruⱡ kat pʉkrʉm kʉⱡ mba mel, kʉmp puⱡ ila puⱡnga, pepil ombil ila kan ti rʉrʉm ei, gol ila mim etʉng ei nga, eng nurum.  
\v 14 Wote, elim nga peng ndi kʉⱡ, kona kopa kurmuⱡa etʉm ei mel itim. Wote, elim nga mong waⱡ raⱡ, ndip anmbil mel kiya nurum.  
\v 15 Wote, elim nga kʉmp raⱡ ain bras na, ndip ila kaⱡina, eng norum ni mel, eng nurum. Wote, elim nga ik ei, nu kuⱡʉp ropa tʉmʉm tʉpa petʉm ni mel itim.  
\v 16 Wu ni mipil 7 kat, elim nga ki mbo orunga ambuⱡpa, wote koiya ti mbuldung oldung raⱡ nengina, mul ti keta ila ekit urum. Elim nga kuimp keta ei, ant ropa rʉⱡang ronduⱡ purum ni mel purum.   
\p
\v 17-18 Elim ni kandʉp kʉn, anggilip mur ni, mboi nʉmp mana mbo wamp kuⱡi mel, wu ei nga kʉmp puⱡ ila koⱡʉp tit. Wote, elim nga ki mbo orunga ndi mana ndupa, na ambuⱡpa, nimba mel, “Mundmong iti nʉti! Puⱡ mundi uⱡ mbʉ kep, wote etpa pora ndui uⱡ mbʉ kep, na mint mor. Akup na rʉk rʉk kont mor. Na kur ni, wote akup kʉni, na rʉk rʉk kont muⱡimp ei nga mor. Wamp kormin uⱡ ei kʉn, wote wamp kui nga mormin kona ei nga ronduⱡ ei, nanim tep mor.   
\p
\v 19 Uⱡ ei nga, akup penim uⱡ mbʉ kep, wote pemba uⱡ mbʉ kʉn pora, nim kan ei mel, mon rokʉn mana ndui!  
\v 20 Na nga ki mbo ei ndi, mipil 7 ambʉⱡʉp mor kan kʉⱡ kʉn, wote gol ila mim etʉng lam 7 kiya nomba morum kʉⱡ nga puⱡ ei, ei mel. Mipil 7 ambʉⱡʉp mor kʉⱡ, Got nga manga rapa 7 kʉⱡ ila wamp mormin kʉⱡ nga anggelo kʉⱡ. Wote, gol ila mim etʉng lam 7 kiya mel,” nitim.   
\c 2  
\s1 Episis Kona Peng Ou Ila, Got Nga Rapa Tenda Wamp Kʉⱡ Kʉn, Mon Ei, Rokʉn Ngui  
\p
\v 1 Episis kona peng ou ila, Got nga rapa tenda wamp kʉⱡ nga anggelo ei kʉn, mon ei rokʉn ngui! Mipil 7 ki mbo orunga ambuⱡpa, wote gol lam 7 kiya nomba morum kʉⱡ nga ruk ting ila andpa morum wu ei ndi, ik ei mel nimba mundnʉm.  
\v 2 Nim nga kongun etʉn uⱡ mbʉ kep, wote kongun etkʉn mbun mbʉ orum ei kʉn, ndoimp rokʉn morʉn uⱡ ei, nanim pilip mor. Wote, uⱡ kit etmin wamp mbʉ kandkʉn, kui iti natkʉn, nombuⱡa rung wamp mul kʉmp ralk ik kep, nok andʉrmʉn mbʉ nga puⱡ ei, kombulkʉn kandrʉn uⱡ ei na pilip mor.  
\v 3 Na nga mbi ila mbun orum ei kʉn, ronduⱡ pukʉn, enimp kuⱡi nalkʉn, kongun etkʉn morʉn uⱡ ei, nanim kandʉp mor.   
\p
\v 4 Wote, uⱡ ti mint, na nim kʉn kant kapⱡa iti natʉnʉm ei, nim unt kokila ei kʉn, na numan ngurun uⱡ ni, akup wak ron.  
\v 5 Nim uⱡ kit mbila mana purum ei mel, tʉkʉn mendkʉn numan ropʉl rokʉn, kalkʉn, unt kuimp tekʉn itin, ni mel iti! Muna numan ropʉl rui nʉrʉn ndam, na ndi, nim nga lam morum ei omp timp.  
\v 6 Wote, uⱡ ti kapⱡa en ei, Nikolaus wamp kʉⱡ nga uⱡ etmin. Na numan ngui nganggʉr ei mel ku, nim i ku etʉn.   
\p
\v 7 Wote, wamp nam ti ndi, kum nombuⱡa tem ndam, Muⱡnga ei ndi, elim nga rapa tenda wamp kʉⱡ kundpa nʉnʉm ik ei pilangga! Wamp nam ti, el etpa int pendʉm wamp ei, Got nga pana ila, kont mba mul nde ei nga mong ei, kapⱡa tʉpa nangga nimp.   
\s1 Smerna Kona Ila, Got Nga Rapa Tenda Wamp Kʉⱡ Kʉn, Mon Ei Mel Rokʉn Ngui  
\p
\v 8 Wote, Smerna kona ila Got nga rapa tenda wamp kʉⱡ nga anggelo morum ei kʉn, mon ei mel, rokʉn ngui! Puⱡ mundi uⱡ mbʉ nga kep, wote etpa pora ndui uⱡ mbʉ nga kep morum. Wu ei, unt kurum, wote aldpa ⱡoporpa kont murum ei ndi, nombuⱡa rung ik ei mel nimba mundnʉm.  
\v 9 Nim mbun mindil mbʉ tʉkʉn, wote ya mʉi kona mel mbʉ nga kurpa norum uⱡ ei, na pilip mor. Wote, mul kona mel mbʉ nga nim nuim morʉn. Wamp mat, en enim Jura wamp mon mbʉ ndi, ik kep nok, Jura wamp mormun nʉk, nim kʉn ik kit mbʉ nʉtmin ei, na pilip mor. Wamp mbʉ, Seitan nga rʉⱡaip ila mormʉn.  
\v 10 Nim nondpa mbun kandʉk tin en ei nga, mundmong iti nʉti! Pin ei, kur kit Seitan ei ndi, nim oⱡa tʉpa kanʉmba pilpa, enim wamp mat ropa, kan manga ila mundangga, ila mbun mindil mbʉ, tʉk piyangina rumbʉⱡ 10 omba mba. Wote, ui ei kʉn, wamp kuⱡi uⱡ ei, nim kʉn om ndam, nim na kʉn mondʉk pʉtʉn uⱡ ei, wak rui nʉri! Nim ronduⱡ mundkʉn muⱡana, nim uⱡ nga kʉnt nga kont mul uⱡ kai ei, punt rop nguimp.   
\p
\v 11 Nim wamp nam ti ndi, kum nombuⱡa tem ndam, Muⱡnga ei ndi, elim nga rapa tenda wamp kʉⱡ kʉn ninim ik ei pilʉi! El etpa int pendʉm wamp ti, uⱡ nga kʉnt nga wamp kuⱡi uⱡ ei ndi, etpa kit mundi namʉndʉmba mon!   
\s1 Pergamum Kona Ila Got Nga Rapa Tenda Wamp Kʉⱡ Kʉn, Mon Ei Mel Rokʉn Ngui  
\p
\v 12 Wote, Pergamum kona ila, Got nga rapa tenda wamp kʉⱡ nga anggelo morum ei kʉn, mon ei mel rokʉn ngui! Wu ti koiya mbuldung oldung raⱡ nengina norum, tepa morum wu ei ndi, nombuⱡa rung ik kʉⱡ nimba mundnʉm.  
\v 13 Nim Seitan nga ronduⱡ ei nga rʉpʉndi pol ila morʉn ei, na pilip mor. Wote, Seitan morum kona ila, na nga mondpa pili wu Andipas rok kondrung. Ei kʉn, nim na kʉn mondkʉn pʉtʉn uⱡ ei, wak rui nʉrʉrʉn. Nim ndi, na nga mbi ei, ambulkʉn gi ndukʉn murʉn mint.   
\p
\v 14 Wote, nim kʉn uⱡ mat kant, kapⱡa iti natʉnʉm ei. Nim morʉn kona ei nga ruk ting ila, Beilam ni, wu ei nga ik mbo endʉtʉm mbʉ nga pep rormin wamp mat mormin. Unt Beilam ni, wu ei ndi, Isrel wamp mbʉ uⱡ kit ila mana peing nimba, Beilak mbo endpa, kur atinga rok rʉng ngurung mbʉ nok, wote wapra rok iteing nitim ei mel etʉng.  
\v 15 Ei mel ku, nim morʉn ruk ting ila, Nikolaus wamp rʉⱡaip mbʉ nga ik mbo endʉtmʉn mbʉ, ambulk gi ndurmin wamp mat mormin ku.  
\v 16 Akup nim numan ropʉl rui! Muna ei mel iti nʉtʉn ndam, na ndi, ui nondpa tila omp, na nga keta ila koiya ekit om ei ndi, wamp mbʉ kʉn el ruimp.   
\p
\v 17 Nim kum nombuⱡa tem ndam, Muⱡnga ei ndi, Got nga rapa tenda wamp kʉⱡ kundpa ninim ik ei pili! El etpa int pendʉm wamp ei kʉn, muⱡ ila rʉng, ‘mana,’ nʉtmʉn ei nga mat, mo ropa pinditim nimbʉ tʉp nguimp. Wote, ku kurmuⱡa ti, tʉp nguimp ku. Ku ila mbi kont ti, rok munding ei, wamp elpa ti ndi, pili napilmba. Ku ei tʉm wamp ei ndi, mendpʉⱡ pilmba.   
\s1 Taiyataira Kona Ila, Got Nga Rapa Tenda Wamp Kʉⱡ Kʉn, Ik Ei Mel Rokʉn Ngui  
\p
\v 18 Wote, Taiyataira kona ila Got nga rapa tenda wamp kʉⱡ nga anggelo morum ei kʉn, mon ei mel rokʉn ngui! Got nga Kangʉm, wu ei nga mong raⱡ ndip anmbil mel kapⱡa, wote kʉmp raⱡ ku bras mel, eng nomba tetʉm wu ei kʉn, nombuⱡa rung ik ei onum.  
\v 19 Nim nga kongun en uⱡ mbʉ, na pilip mor. Ei nim nga wamp numan ngui uⱡ ei kep, nim nga mondpa pili ei kʉn, wamp tʉpa rʉpʉndi uⱡ ei kʉn, mbun mbila ronduⱡ pukʉn morʉn uⱡ mbʉ kʉn, uⱡ mbʉ mel unt kel etkʉn itin ni, akup elina, mam enim ei, na pilip mor.   
\p
\v 20 Wote, uⱡ ti mint nim kʉn kant kapⱡa iti natʉnʉm. Ei amp Jesipel kandkʉn kui elina, nim kʉn morum. Amp ei ndi, elim pai nui amp ti nimba, na nga kongun kindmant wamp mbʉ tʉpa, tiki ponduⱡnga wapra rok, kor atinga rok rʉng ngormin mbʉ nʉi nimba, mbo endʉtʉm.  
\v 21 Amp ei, numan ropʉl rangga, nʉmp ui kanggʉp ambʉⱡʉp ngur. Ei wote, elim nga wapra rorum uⱡ mbila, numan ropʉl rui narʉrʉm.  
\v 22-23 Ei nga, amp ei tʉp ur pi kona ila pindamba, amp ei kʉn ok, wapra rormʉn wu mbʉ, amp ei nga mindil nom uⱡ mbʉ oⱡʉmp, tʉk mindil kit nuing. Ei kʉn, wu mbʉ amp ei kʉn, wapra rormin uⱡ mbʉ nga numan rop rui narʉng ndam, mindil kit nʉnt ei, akup ting. Ei kʉn, na ndi, en enim nga kangambuⱡa mbʉ rop kundamba kʉn, Got nga, rapa tenda wamp molk purmʉn mbʉ ndi, na ndi, wamp mbʉ nga numan rukʉr orunga petʉm uⱡ mbʉ pora kandʉp, pilip et wu ei, nʉk piling. Enim nga uⱡ etmin mbʉ mel, kandʉp punt rop elpa elpa nguimp.  
\v 24 Wote, enim Taiyataira kona ila wamp mat, uⱡ kit mbʉ nga mbo endʉtmʉn mbʉ, ambulk gi ndui nandʉrmʉn. Wote, enim wamp mat ndi, Seitan nga uⱡ mo ropa mat petʉm nʉtmin uⱡ mbʉ, pilik ti natʉk etmin. Wamp mbʉ kʉn, uⱡ mat etʉp mundmong mindil kundi nʉkʉndimp nʉnt.  
\v 25 Wote, enim nga mondpa pili uⱡ ei, ambulk gi nduk muⱡangina mba, na yant unt ui ei kʉn, kapⱡa itangga.   
\p
\v 26-27 Wamp nam ti, el etpa int pendpa, na nga kongun mbʉ ronduⱡ mundpa etpa muⱡangga, ui ei pora nim ndam, wamp ei, na nga Wuta ei ndi, na ronduⱡ ngurum ei ngamba kʉn, wamp rʉⱡaip elpa elpa mbʉ rup etmba. Wote, wamp ei ndi, tʉmbʉⱡ pʉiya ronduⱡ ti ambuⱡpa moⱡpa, wamp rʉⱡaip mbʉ rʉp etpa, tʉmbʉⱡ ei ndi rangga, mʉi ming na ni mel, gurʉk kel kel iting. Uⱡ ei, na nga Wuta kʉn ronduⱡ ei tit, ei mel ting.  
\v 28 Wote, kona rangʉmba etpa kʉn, mipil kiya norum ei, wamp ei nguimp.  
\v 29 Wamp nam ti, kum nombuⱡa tem ei ndi, Muⱡnga ei ndi, Got nga rapa tenda wamp kʉⱡ, kundpa ninim ik ei pilangga!   
\c 3  
\s1 Sartis Kona Ila, Got Nga Rapa Tenda Wamp Kʉⱡ Kʉn, Mon Rokʉn Ngui  
\p
\v 1 Wote, Sartis kona ila Got nga rapa tenda wamp kʉⱡ nga anggelo morum ei kʉn, mon ei mel rokʉn ngui! Got nga Muⱡnga 7 kʉⱡ kʉn, mipil 7 kʉⱡ kʉn, ambuⱡpa morum wu ei ndi, nombuⱡa rung ik ei mel, nimba mundnʉm. Nim kongun etʉn uⱡ mbʉ, nanim pilip mor ei, nim pilkʉn ninim kont mor ku nʉtʉn. Ei mon, nim wamp kui on ei morʉn.  
\v 2 Ei kʉn, nim rut nʉkʉn oⱡa muⱡi! Wote, nim nga uⱡ kai mbʉ koⱡmba enim ei, etkʉn ronduⱡ mundi! Ei nambuⱡ emel, na nga Got nga kuimp keta ila, nim nga etʉn uⱡ mbʉ, kun pi naprʉm.  
\v 3 Nim unt rʉnang ik mbo endʉtʉng pitin nimbʉ, tʉk mendkʉn molkʉn, ik ei pep rokʉn, uⱡ kit etʉn mbila, numan ropʉl rui! Nim rut nʉkʉn oⱡa muⱡi nʉmin ndam, na kʉndʉp wamp na ormʉn ni mel, ant mong nant kʉn uimp ei, tʉp tʉndʉp nim kʉn uimp.  
\v 4 Wote, int Sartis kona ila, wamp onunga kat tekʉn morʉn kʉⱡ ndi, en enim nga wal pʉki mbʉ, etʉk ⱡar mundi namʉndʉrmʉn. Wamp kʉⱡ wal pʉki kurʉmʉⱡa mbʉ pʉkangina, na kʉn rʉp rop mbin. Ei nambuⱡ emel, wamp kʉⱡ, na pʉt uⱡ mbʉ mel, etʉk mormin.  
\v 5 El etpa int pendʉm wamp ei, muⱡ mbal kurumuⱡa mbʉ pakʉndʉp, wote elim nga mbi ei, uⱡ nga kʉnt nga kont muⱡ buk ila morum ei, rop puⱡa rui nʉrimp. Wamp ei nga mbi ei, na nga Wuta mondʉp kʉn, elim nga anggelo mbʉ nga mormin, kuimp keta ila para ndup mbi timp.  
\v 6 Wamp nam ti, kum nombuⱡa tem ti ndi, Muⱡnga ei ndi, Got nga rapa tenda wamp mbʉ, kundpa ninim ik ei pilangga!   
\s1 Pilandelpiya Kona Ila, Got Nga Rapa Tenda Wamp Kʉⱡ Kʉn, Mon Ei Rokʉn Ngui  
\p
\v 7 Wote, Pilandelpiya kona ila Got nga rapa tenda wamp kʉⱡ nga anggelo morum ei kʉn, mon ei mel rokʉn ngui! Ya nombuⱡa rung ik mong kʉⱡ, wu wingti, wu kupa, wote Depit nga kumba ki tepa morum ei ndi, nimba mundnʉm. Wu ei ndi, kumba ki tʉpa tetʉm ei, wamp ti ndi, kapⱡa kumba rui narʉmba. Wote, wu ei ndi, kumba ropa gi ndurum ei kʉn, wamp ti ndi, kapⱡa kumba ti natʉmba.  
\v 8 Nim nga etʉn uⱡ mbʉ, na pilip mor. Wote, nim nga ronduⱡ ti, ou ndupa mon ei, na pʉnt ku. Wote, na nga ik mong kʉⱡ ambulkʉn gi ndukʉn, na nga mbi ei, tʉkʉn mbuⱡ ngui nganggʉrʉn ei, na pʉt. Ei nga, nim nga kuimp keta ila kumba tʉp tint ei, wamp ti ndi, kapⱡa kumba rui narʉmba mon!  
\v 9 Pʉnminan! Seitan nga wamp rʉⱡaip mormin mbʉ ndi, ik kol rok, en enim Jura wamp ku nʉk etmin wamp mbʉ, na ndi, etʉp elik rʉndamba. Nim nga kʉmp puⱡ ila ok, rumʉⱡi ping. I tamba pilik kʉn, na ndi, nim numan ngor uⱡ ei, pilik mbi nduing.  
\v 10 Ei kʉn, nim na nga nʉmp ngur ik nimbʉ, pilik tʉkʉn mbun orum ei kʉn, ronduⱡ pukʉn morʉn. Wote, ui tila muⱡ uⱡ mbila, wamp mbʉ nga oⱡa tʉpa kʉni uⱡ mat omba, enim ila nim etʉp peng kont timp.   
\p
\v 11 Na nondpa uimp ent! Nim nga mondpa pili tʉkʉn morʉn ei, ambulk gi ndukʉn muⱡi! I etkʉn mʉn ei kʉn, nim nga ronduⱡ pukʉn, kongun etkʉn mel kai ti, wote tin ei, wamp ti ndi, roldpa ti natʉmba mon!  
\v 12 El etpa int pendʉm ei kʉn, na ndi, wamp ei etʉp, na nga Got nga manga wingti ou ei nga paka rumʉnt mel mundamba omba, ekit pi napʉmba. Wote, wamp ei nga kʉng ila, na nga Got ei nga mbi ei, rop mundimp. Wote, na nga Got ei nga kona peng kont Jerusalem, wi muⱡ ila tepa mana omba, kona ei nga mbi kont ei kʉn kunda, wote wamp ei nga kʉng ila, na nga mbi kont mon rop mundimp.  
\v 13 Wamp nam ti, kum nombuⱡa tem wamp ti ndi, Muⱡnga ei ndi, Got nga rapa tenda wamp kʉⱡ, kundpa ninim ik ei pilangga!   
\s1 Leyoresiya Kona Ila, Got Nga Rapa Tenda Wamp Kʉⱡ Kʉn, Mon Ei, Rokʉn Ngui  
\p
\v 14 Wote, Leyoresiya kona ila wamp kʉⱡ nga anggelo morum ei kʉn, mon ei mel rokʉn ngui. ‘Ei kupa,’ nga Puⱡ Wu moⱡpa, rʉk rʉk uⱡ kupa mbʉ etpa, ik kupa mint nimba. Wote, Got nga itim mel mbʉ pora, rʉp etʉm wu ei ndi, nombuⱡa rung ik kʉⱡ nimba mundnʉm.  
\v 15 Nim nga etʉn uⱡ mbʉ, na pilip mor. Ei, nim pou ni nanʉn, wote nim muⱡ iti natʉn. Wote, na ndi pʉnt ei, nim pou nin ndam, pou mint ni, wote muⱡ itʉn ndam, muⱡ mint iti!  
\v 16 Wote, nim pou ni nanʉn, wote muⱡ iti natʉn kona ten pʉnt ei kʉn, nim kopop pupʉl rop mundʉp kilimp.  
\v 17 Ei nambuⱡ emel, nim ndi, nʉkʉn mel, na nanim kng orunga mel pelinga mor ku nʉkʉn, mel mbʉ nga, na kuri nakʉrʉr nʉtʉn. Ei wote, nim pek morʉn uⱡ ei, kit moⱡnga. Wamp mbʉ ndi, nim kandʉk kont kurmin. Ei, nim kurpa mendpʉⱡ morʉn, wote mong raⱡ kit morum ku. Wote wal pʉki na mel ti, mon nduⱡnga, gi gou andrʉn ei, ninim pilkʉn kun iti natkʉn nʉtʉn.  
\v 18 Ei kʉn, akup nim man ngump ik ei nʉnt. Nim na kʉn okʉn, gol ti, ndip ndi numba eng nom ei, rarʉp rokʉn tana, nim mel piyangga! Wote, mbuⱡ mbal kurumuⱡa kʉⱡ, na kʉn rarʉp rok tʉkʉn, nim gi gou andkʉn, pipil kun uⱡ ei, panda rokʉn kʉn, nim nga mong raⱡ piral nangga, kʉnin ei nga kopung ti, rarʉp rok tʉkʉn, kopung kʉndi!   
\p
\v 19 Nanim kandʉp numan ngor wamp ei, etʉp elik mondʉp tʉp kun mundʉp et. Ei kʉn, nim na kʉn etʉn uⱡ mbʉ nga, numan ou nduk ngukʉn, numan ei ropʉl rui!  
\v 20 Kum tek pilʉiya! Na manga keta puⱡ puⱡ ila moⱡʉp, kumba rop gep gep ndup mor. Ei nga, wamp ti ndi, na nga ik ei, pilpa mbi ndupa, kumba tʉm ndam, na wamp ei kʉn, rukʉr omp moⱡʉp, wamp ei kʉn rʉng nuimp, wote wamp ei, na kʉn moⱡpa, rʉng nomba.   
\p
\v 21 Na nanim el etʉp int pendʉp, na nga Wuta nga rʉpʉndi pol ila mor. Ei mel ku, el etpa int pendʉm wamp ti, na ndi, na nga rʉpʉndi pol ila muⱡi namba, kunda muⱡʉmbil.  
\v 22 Kum nombuⱡa tem wamp ti ndi, Muⱡnga ei ndi, Got nga rapa tenda ila wamp kʉⱡ, kundpa ninim ik ei pilangga!   
\c 4  
\s1 Wi Muⱡ Kona Ila Got Nga Mbi Paka Rorung  
\p
\v 1 Wote ni kʉn, na aldpa ur kump mel, etʉp kundrum mel wi muⱡ kona ila keta puⱡ puⱡ ti, wei titim. Wote kona ila, pikul ik ti, unt pit ni mel ti ndi omba, nimba mel, “Nim ya ila oⱡa wana, na ndi nim kʉn, uⱡ wote pemba mbʉ, nim tʉpa ora ndamba kʉnʉn,” nitim.  
\v 2 Ei kʉn, tʉngʉnda mint, Muⱡnga ei ndi, na kʉn omba, ronduⱡ mundpa moⱡnga, na kʉndʉr mel, wi muⱡ kona ila wu nuim mumuk mbʉ nga mormun rʉpʉndi pol kat titim. Pol ila, wamp ti murum.  
\v 3 Wote, wu nuim mumuk mbʉ nga rʉpʉndi pol ila murum wamp ni nga kuimp keta ei, ku kai Jaspa kʉn Karniliyan raⱡ, kiraipa muraipa etʉm ei mel itim. Wote, wu nuim mumuk ni nga rʉpʉndi pol ni kʉⱡ, kona kʉmp kʉpʉm poⱡpa, tʉpa pok etpa, ku kai Emeral mel mon mba pitim.  
\v 4 Wu nuim mumuk ni nga rʉpʉndi pol ni kʉⱡ, ruk ting ila telingina, rʉpʉndi pol 24 kat, tepa pok itim. Wote, rʉpʉndi pol ni kʉⱡ nga pol ila, rup wu 24 kat, mbuⱡ mbal kurumuⱡa mbʉ ralk, peng nimbila wu nuim mumuk mbʉ nga gol wʉnʉ nimbʉ nga mat mondʉk morung.  
\v 5 Wu nuim mumuk rʉpʉndi pol ruk ting ila telinga, kona kiraipa etpa ekit omba, wote muⱡ ik nilinga, wote guⱡ gaⱡa nimba itim. Wote, rʉpʉndi pol ei nga oldung orunga, ndip kiya 7 kat, kiya nomba pitim kʉⱡ, Got nga Muⱡnga 7 kʉⱡ morung.  
\v 6 Wote, rʉpʉndi pol oldung orunga ila ku, num kuta mam ni mel, kona ti titim. Mong kiraipa mel rʉⱡang mba titim. Wote, rʉpʉndi pol mbuldung orung kʉn, oldung orung kʉn, wote wʉng orung orung raⱡ ila, mel tʉmbʉkak rʉk rʉk kont mormun kat, mong waⱡ mbuldung orunga anggilpa, oldung orunga anggilpa, etʉm kat morung.  
\v 7 Mel kont morum kuimp tepa ei, kui Laiyon mel kapⱡa, wote mel ti kng kau pela mel kapⱡa, wote mel ti wamp mel kuimp keta anggʉtʉm. Wote, mel ti kʉi ndowa mel ei, mbur nimba etpa murum.  
\v 8 Mel tʉmbʉkak rʉk rʉk kont mormʉn kʉⱡ, pou 6 nimba elpa elpa ʉnggʉtʉm. Wote, mong minal rukʉr orunga ekit orunga mbʉ anggilpa pok elinga, rumbuldi rʉnggilmʉ raⱡ, muⱡ ti natʉk, kinan ei mel nʉtmʉn, “Ei Nuim Got Wu Ronduⱡ Wei! Wingti! Wingti! Wingti! Unt murʉn, akup morʉn, wote yant uin,” nʉtʉng.   
\p
\v 9-11 Mel tʉmbʉkak kat rʉk rʉk kont mormʉn ni kʉⱡ ndi, rʉpʉndi pol ila uⱡ nga kʉnt nga kont morum wamp ei nga, mbi ou tangga nʉk, kinan mbʉ nʉndʉk, mbi paka rondʉk, angge nʉk etʉng. Ni kʉn, rʉp wu 24 kat ndi, uⱡ nga kʉnt nga kont morum wamp mbʉ, to rʉpʉndi pol ila morum ni nga kuimp keta ila, rumʉⱡi pek mbi paka rondurmin. Wote, i etʉk mel, en enim nga gol wʉnʉ mbʉ, rʉpʉndi pol ei nga kuimp keta ila rok mundʉk nʉk mel, “Nim tʉn nga Nuim Got ye! Nim nga mbi paka rundamina, mbi ou tʉkʉn, wote muⱡ mʉi raⱡ nga ronduⱡ ei, tin ei nga kapⱡa etkʉn morʉn. Ei nambuⱡ emel, nim ndi, mel mbʉ pora mim itʉn. Wote ninim ndi, pʉtʉn ei mel, mana mel elpa elpa mbʉ, wengʉndkʉn mim etkʉn mundrʉn ei mel, kont puk mormin,” nʉtʉng.   
\c 5  
\s1 Buk Kat Mʉkʉp Rok Pendʉtʉng Kʉⱡ, Jon Kʉndrʉm  
\p
\v 1 Wote, rʉpʉndi pol ila morum wamp ei nga ki mbo orunga, buk kat mbuldung oldung orunga mondʉk mʉkʉp rok tetʉng ila kʉndʉr. Buk kʉⱡ kan 7 kat ndi, oi rok kʉn, kan rok gi nduk pendʉtʉng.  
\v 2 Wote, na kʉndʉr mel, anggelo ronduⱡ pi ti ndi, wi ronduⱡ ropa, nimba mel, “Wamp kai nam ti ndi kapⱡa, buk ei nga kan imp moⱡpa petʉm kʉⱡ, koⱡmung etpa mundpa pilinga, ndumba nda?” nitim.  
\v 3 Wote, muⱡ kona ila wamp ti kep, mʉi kona ila wamp ti kep, mʉi mana orunga wamp ti ndi kep, buk ei kapⱡa pilinga ndupa, rukʉr orunga mon morum kʉⱡ mel mon itim kanʉmba mbʉ ei, kumba tʉk rukʉr orunga kʉni nʉkʉning mon.  
\v 4 Ei kʉn, na ka ou ndupa it. Ei nambuⱡ emel, buk nʉnt kʉⱡ pilinga, nduk kʉning ei nga wamp ti, kapⱡa muⱡi nʉmbrʉm.  
\v 5 Wote, rʉp wu tenda ti ndi, na kundpa, nimba mel “Nim ka iti nʉti! Nim kan ei, Jura wamp rʉⱡaip ila nga kui Laiyon ti, anda kouwʉ Depit nga mema kʉngan ila oⱡa urum wamp ei ndi, el ropa int pinditim ei ndi kapⱡa, buk ei nga kan 7 kʉⱡ koⱡmung etpa pilinga, ndupa mundʉmba,” nitim   
\p
\v 6 Wote, na kʉndʉr mel, kng Sipsip Waⱡ ei, wamp rok kondurmin ni mel etpa, rʉpʉndi pol ruk ting ila, anggilpa murum. Wote, mel kont mul tʉmbʉkak kat ni kʉⱡ kʉn, rʉp wu nimbʉ kʉn kunda, tʉk pok etʉk morung. Sipsip ei nga kom 7 anggilpa, mong 7 anggilpa itim. Ei, Got nga muⱡnga 7 kʉⱡ, Got ndi, mʉi kona mul kʉmp mbila, elpa elpa tʉpa mundrum.  
\v 7 Ni kʉn, rʉpʉndi pol ila morum wamp ei nga ki mbo orunga, buk tetʉm ni kʉⱡ, Sipsip Waⱡ ei ndi mba titim.  
\v 8 Wote, buk kʉⱡ tʉpa ambuⱡnga kʉn, mel kont mul tʉmbʉkak kʉⱡ kʉn, rʉp wu 24 kʉⱡ kʉn kunda, Sipsip Waⱡ ei nga kʉmp puⱡ ila rumʉⱡi petʉng. Wamp nimbʉ ndi, kinan nʉk etmin, gita mbo elpa kat ti, ti nʉk ambulk, gol ming eng rui kat ambrung ni kʉⱡ, muⱡ kuip kuip ropa, mura ropa pitim. Uⱡ ei ndi, Got nga wamp mbʉ, atinga rormin ei nga ora ndupa itim.  
\v 9 Wu kʉⱡ ndi, kinan kont kat, Sipsip Waⱡ ei nga mbi paka rondʉk, nʉk mel, “Nim ndi kapⱡa, buk kʉⱡ nga kan 7 imp morum kʉⱡ, rokʉn koⱡmung itin. Ei nambuⱡ emel, nim rok kondʉk etʉng uⱡ ila, nim nga mema oi ndukʉn kʉn, mʉi kona mbila pora, wamp rʉⱡaip elpa elpa na, ik na, kʉng elpa elpa na mbʉ, rop rokʉn, rukʉr tʉkʉn Got ngurʉn.  
\v 10 Nim ndi, wamp mbʉ tʉkʉn, mumuk rokʉn, tʉn nga Got nga kongun kindmant indeing nʉkʉn etkʉn, pris monduⱡina kʉn, mʉi kona wamp mbʉ rʉp etmin,” nʉtʉng.   
\s1 Sipsip Waⱡ Ei Nga Mbi Paka Rondrʉng  
\p
\v 11 Wote, aldpa na kandʉp kʉn, kum tep pit mel, anggelo andret tausen miliyon minal minal mbʉ anggilik kʉn, rʉpʉndi pol kʉⱡ kʉn, mel kont mul tʉmbʉkak kʉⱡ kʉn, wote rʉp wu nimbʉ kunda, tʉk pok etʉk morung.  
\v 12 Ni kʉn, kinan oⱡa nduk, nʉk mel, “Sipsip waⱡ ei, unt rok kondrung uⱡ ei ndi, kapⱡa mbi ou tʉpa, mel kai mbʉ pora tʉpa, pilpa kungʉndi kai mbʉ, tʉpa ronduⱡ mam mbʉ tʉpa tangga kʉn, wamp mbʉ ndi, elim nga mbi ei paka rondʉk ambulk palk, angge nʉk iting,” nʉtʉng.  
\v 13 Na kum tep pit mel, Got nga mim itim mel mat, muⱡ ila tetʉm mel mat, mʉi ila tetʉm mel mat, mʉi mana orunga tepa mel mat, num kuta mbila tepa etʉm mel mbʉ ndi pora, kinan nʉk mel, “Rʉpʉndi pol ila morum wamp ei kʉn, Sipsip Waⱡ ei kʉn kunda, mbi ou ti uⱡ na, ambuⱡpa pʉl uⱡ na, angge ni uⱡ ronduⱡ na mbʉ pora, rʉk rʉk pepa mint pangga!” nʉtʉng.  
\v 14 Ni kʉn, mel tʉmbʉkak kont mul ni kʉⱡ ndi, punt rok nʉk mel, “Uⱡ ei kupa!” nʉtʉng. Wote, rʉp wu mbʉ ndi, rumʉⱡi pek mbi paka rondrʉng.   
\c 6  
\s1 Sipsip Waⱡ Ei Ndi, Kan 7 Kat Buk Ila Petʉm Kʉⱡ Koⱡmung Itim  
\p
\v 1 Wote na ndi, moⱡʉp kundʉr mel, Sisip Waⱡ ni ndi, buk ila kan 7 kat imp morum ni kʉⱡ nga kan kuimbal ni, koⱡmung itim. Ni kʉn, na kum tep pit ei, mel kont mul tʉmbʉkak ni kʉⱡ nga ti ndi, ik nilinga mel, num kan ei, kona guⱡ gaⱡa mel nimba, “Nim ui!” nitim.  
\v 2 Wote, aldpa na kʉndʉr mel, kng os kurumuⱡa tila, wamp ti mbuⱡ ila murum ei ndi, el ti ambuⱡpa murum. Wʉna ti, el etʉk int pendʉk mondʉrmin ei nga ngurung ei mondpa, el etpa int pendʉtʉm ei mel, el etʉp int pindimp nimba purum.   
\p
\v 3 Wote, Sipsip Waⱡ ei ndi, buk ila kan merʉng (2) ni, ropa koⱡmung elinga mel, mel kont mul 2 ni ndi, nimba mel, “Nim ui!” nitim.  
\v 4 Ni kʉn, kng os kunt ti, urum ila wamp ti, mbuⱡ ila murum ei, ronduⱡ ti nguⱡmina mepa urum. Ronduⱡ ei, mepa omba mʉi kona wamp mbʉ nga moⱡpa kundi uⱡ mbʉ, tʉpa mundangga kʉn, wamp mat ndi, wamp mat rok kondʉk iting. Kongun ei, wamp ei tangga nʉk, koiya rʉⱡ ti ngurung.   
\p
\v 5 Wote, kan 3 ei ndi, buk imp morum ni, Sipsip Waⱡ ei ndi, ropa koⱡmung elinga kʉn, mel kont mul 3 ei ndi, nimba mel, “Nim ui!” nitim. Ei kʉn, na ndi, kundʉr mel, kng os pombra ti urum. Kng ei nga mbuⱡ ila, wamp ti murum ei ndi, rʉng kuipa rormin mel kat, ambuⱡpa murum.  
\v 6 Na ndi, kum tep pit mel, mel tʉmbʉkak kont mul kʉⱡ mormin, ruk ting ila wamp ti ndi, ik ti ekit ndupa nimba mel, “Nim ndi pukʉn kʉn, wit ming kel tila, ku moni K20 nga kʉmp tʉkʉn, wote bali ming kel raldika kat kunda, kʉmp tʉkʉn iti! Wote nim ndi, olip na, wain na mbʉ etkʉn, kit mundi nʉmʉndi!” nitim.   
\p
\v 7 Wote, Sipsip Waⱡ ni ndi, kan 4 ti buk ei imp morum ni, ropa koⱡmung itim ila, mel kont mul 4 ni ndi, nimba mel, “Nim ui!” nitim.  
\v 8 Wote, aldpa na kundʉr mel, kng os kuⱡa ndi ti, ekit urum. Wamp ti, kng os mbuⱡ ila murum ei nga mbi ei, wamp kui nga uⱡ ei nʉtʉng. Wote, wamp kui nga kona wamp ei kʉn, nondpa pep ropa akil titim. Mel raⱡ nga, ronduⱡ tʉtʉnggil ei ndi, mʉi kona wamp rʉⱡaip tʉmbʉkak kʉmp tʉkʉⱡ mondkʉⱡ kʉn, wamp rʉⱡaip tenda ti, koiya na, kump kun na, kui peng elpa elpa mat kʉn, kng rakra na mbʉ, ronduⱡ nguⱡʉnggila kʉn, wamp minal rok kondrʉnggil.   
\p
\v 9 Wote, Sipsip Waⱡ ei ndi, kan 5 ti buk imp morum ei, ropa koⱡmung itim. Ei kʉn, na kundʉr ei, unt nga wamp korung nimbʉ nga min mbʉ, rat pol wingti mana orunga morung. Nambuⱡ emel, wamp mbʉ ndi, Got nga ik mong mbʉ, ronduⱡ mundʉk ambulk nilingina, el rui wamp mbʉ ndi, rok kondrung.  
\v 10 Wamp korung min mbʉ ndi, ronduⱡ ke nʉk mel, “Wu Nuim Mumuk Ronduⱡ Pi ei! Nim Wu Wingti! Nim Ik Kupa ei! Ui namba iti, tʉn nokundpʉn muⱡamina, nim ndi, mʉi kona wamp mbʉ, kʉmp tana kʉn, tʉn nga mema oi nitim uⱡ ei nga punt runding,” nʉtʉng.  
\v 11 Wote wamp nimbʉ, muⱡ kurmuⱡa ruⱡ mat, tenda tenda nʉk nguk, kundʉk nʉk mel, enim akup onunga kot muⱡ tʉk muⱡʉi! El puⱡa wamp mbʉ ndi, enim rok kondrung uⱡ ni mel etʉk, enim nga ʉngʉnʉl na, kongun tenda ila etmin wamp na mbʉ, rok kundangina kʉn, wote wamp mbʉ nga to ei mel kapⱡa itangga kʉn, Got ndi, enim nga mema oi nitim ei mel punt rondʉmba.   
\p
\v 12 Wote, Sipsip Waⱡ ei ndi, kan 6 ti ndi, buk ei, imp morum ni, ropa koⱡmung itim. Ni kʉn, na kʉndʉr mel, mʉi kona ila kilimbʉmp mam ti itim. Uⱡ ei elinga mel, kona ant ei muⱡ pombra ping nui mel kapⱡa elinga, kalimp ei mema mel kunt itim.  
\v 13 Ni kʉn, wi mul ila mipil mbʉ, nde pik mong rʉpa rui nʉri mat, kʉpkʉ ropa ndanda nimba, mana orum uⱡ ni mel elinga, mipil mbʉ, mʉi ila mana orung.  
\v 14 Wi muⱡ ei, kʉnʉng mat ti mʉkʉp rormin ni mel etpa mba pora ndurum. Komnga mong na, nu mul kuimp na mbʉ pora, mormin kona mbʉ, wak rok puk pora ndurʉng.   
\p
\v 15 Wote, mʉi kona mbila nga wu nuim mumuk na, wu nuim na, el wu nuim na, mel pi wu na, numan ronduⱡ pili wu na, wu nʉma na, kindmant kongun etmin wu na, wamp mbʉ pora, komnga mong mbila puk, mʉi mur manga na, ku manga na mbila mo rorung.  
\v 16 Wamp mbʉ ndi, wi rok, nʉk mel, “Komnga na, ku manga na mbʉ kundʉk, mana ok, tʉn panda rok, ʉk rangina kʉn, rʉpʉndi pol ila morum wamp ei nga mong raⱡ ndi, tʉn kʉni nʉkʉnangga! Wote Sipsip Waⱡ ei nga popʉⱡ ei ndi, tʉn pui nʉnangga!  
\v 17 Uⱡ ei nambuⱡ emel, wu raⱡ nga popʉⱡ ei, akup ui mam ila ekit onum. Ei nga, wamp nam ti ndi, wu raⱡ nga popʉⱡ ila, ronduⱡ mba anggilmba?” nʉtʉng.   
\c 7  
\s1 Isrel Wamp 144,000  
\p
\v 1 Uⱡ itim nimbʉ pora nilinga kʉn, wote na ndi, kundʉr mel, anggelo tʉmbʉkak kat ndi, ya mʉi kʉmp monmʉn ei nga mʉi punt tʉmbʉkak tetʉm ila, elpa elpa anggilik molk. Mʉi ei nga kona kʉpkʉ tʉmbʉkak kʉⱡ imp morum. Uⱡ etʉng ei ndi, mʉi na, num kuta na, nde mel mbʉ kʉpkʉ ropa kʉn, rowa ni nʉnangga nʉk etʉng.  
\v 2 Ni kʉn, na ndi, kundʉr mel, al ant oⱡa orum orunga anggelo ti urum ei ndi, Got kont morum ei nga tip timal ti, etpa mepa omba kʉn, anggelo tʉmbʉkak kat, Got ndi, ronduⱡ ngumba kʉn, num kuta na, mʉi na mbʉ etʉk, kit mundeing nitim kʉⱡ, ronduⱡ wi rurum.  
\v 3 Wote, anggelo ei ndi, nimba mel, “Enim ndi, tʉkrʉk num kuta na, mʉi na, nde na mel mbʉ, etʉk kit mundi nʉmʉndʉi! Unt Got nga kongun wamp mbʉ nga mʉi ombil ila, tʉn ndi, Got nga tip timal ei, mon ropʉn pora ndamina kʉn, wote enim ndi, mʉi kona mel mbʉ, etʉk kit mundeing,” nitim.  
\v 4 Wote, Got nga tip timal ei, wamp namba iti ndi, tʉtʉng uⱡ ei, na kundʉk nʉtʉng ila pit. Isrel wamp rʉⱡaip elpa elpa mormun ei nga wamp 144,000, Got nga tip timal ei tʉtʉng.   
\p
\v 5 Ei kʉn, Jura wamp rʉⱡaip ila 12,000 Got nga tip timal tilingina, Rupen nga rʉⱡaip ila 12,000 tilingina, Gat nga rʉⱡaip ila wamp 12,000 tʉtʉng.   
\p
\v 6 Wote, Asa nga rʉⱡaip ila wamp 12,000 Got nga tip timal ei tilingina, Naptali nga rʉⱡaip ila wamp 12,000 tilingina, Manasa nga rʉⱡaip ila wamp 12,000 tʉtʉng.   
\p
\v 7 Omba Simiyon nga rʉⱡaip ila wamp 12,000 tilingina, Lipai nga rʉⱡaip ila wamp 12,000 tilingina, Isikar nga rʉⱡaip ila wamp 12,000 tʉtʉng.   
\p
\v 8 Wote, Sepulun nga rʉⱡaip ila wamp 12,000 tilingina, Josep nga rʉⱡaip ila wamp 12,000 tilingina, Benjamin nga rʉⱡaip ila wamp 12,000 tʉtʉng. Wamp rʉⱡaip mbʉ pora, Got nga tip timal ei, tʉk pora ndurʉng.   
\s1 Wamp Rʉⱡaip Mam Ei Ndi, Got Kʉn Mbi Paka Rorung  
\p
\v 9 Wote na ndi, kundʉr mel, wamp rʉⱡaip mam ti, mʉk rok morung ei, wamp ti ndi, kʉmp ring mel kapⱡa mon. Wamp mormin mbʉ, rʉⱡaip na, mʉi kona na, kʉng na, ik na mbʉ elpa elpa mbʉ, Got nga rʉpʉndi pol ila kʉn, Sipsip Waⱡ raⱡ nga kuimp keta ila anggilik kʉn, muⱡ rʉⱡ kurʉmʉⱡa mat pakʉk, ki mbila yaⱡa ongum mat, ambulk morung.  
\v 10 Ni kʉn, ronduⱡ wi rok nʉk mel, “Tʉn nga Got rʉpʉndi pol ila moⱡnga kʉn, wamp etpa ti uⱡ ei, Sipsip Waⱡ ei kʉn, kandʉp tʉtmʉn,” nʉtʉng.  
\v 11 Wote, anggelo nimbʉ ndi pora, rʉpʉndi pol ila na, rʉp wu mbʉ na, mel kont mul tʉmbʉkak na mbʉ, morung kona ni anggilik paⱡa etʉk, tʉkrʉk ngurung. Wote, anggelo nimbʉ ndi, rʉpʉndi pol ila nondpa mura rok mondʉk, mʉi kandʉk, Got nga mbi paka rondrʉng.  
\v 12 Mbi paka rondʉk, nʉk mel, “Ei kupa! Tʉn nga Got ei kʉn minal ambuⱡpʉn paⱡpʉn, elim nga mbi ou ei nga nʉndpʉn itamin. Got ei, pilpa kungʉndi kai mbʉ nga pora puⱡi ei nga, tʉn ndi, Got kʉn angge nimbun, elim nga mbi paka rondpʉn itamin. Got ei, ama ronduⱡ purum ei ndi, uⱡ ronduⱡ mam mbʉ, elim kʉn mint rʉk rʉk tetʉm. Ei kupa mint!” nʉtʉng.  
\v 13 Wote, rʉp wu ti ndi, na waldpa, nimba mel, “Wamp mat, muⱡ kurʉmʉⱡa ruⱡ pakʉnmʉn mbʉ, naka wamp mbʉ nda, wote kona nant ila molk orung wamp mbʉ nda?” nitim.  
\v 14 Ni kʉn, na ndi, punt rop nʉmp mel, “Nim na nga rʉp wu ei! Nim ninim pʉtʉn ei ka!” nit. Wote, rʉp wu ni ndi, yant ndupa, nimba mel, “Wamp kan mbʉ, el rui wamp mbʉ nga ki mbila, mindil mbun mam mbʉ tʉk kʉn, Sipsip Waⱡ ei nga mema ei ndi, muⱡ mbʉ ⱡumʉiya roⱡnga, kurʉmʉⱡa itim.  
\v 15 Uⱡ i etʉng ei ndi, akup Got nga rʉpʉndi pol ei nga, kuimp keta ila anggilik kʉn, rumbuldi rʉnggilmʉ raⱡ, Got nga manga wingti ila molk, Got nga mbi paka ronduⱡmina kʉn, Got elim rʉpʉndi pol ila moⱡpa, wamp mbʉ rʉp etpa morum.  
\v 16 Got ndi, wamp mbʉ rʉp etʉm uⱡ ei ndi, wamp mbʉ kump kun kuⱡi nʉⱡing, nu waka ti mon, kona ant ronduⱡ nui nanʉmba, kʉng orunga mindil etpa, muⱡ etpa, iti natʉmba mon ku.  
\v 17 Uⱡ ei, nambuⱡ emel, Sipsip Waⱡ ei, rʉpʉndi pol ruk ting ila nga moⱡpa kʉn, wamp mbʉ rʉp etʉm. Wamp mbʉ, nu waka kuⱡʉng ei kʉn, Sipsip Waⱡ ei ndi, mepa pangga kʉn, wamp kont mul nu kut ila nu nuing. Got ndi, wamp nga ka net mana om mbʉ, kil ngundʉmba,” nitim.   
\c 8  
\s1 Sipsip Waⱡ Ei Ndi, Kan 7 Ei Koⱡmung Itim  
\p
\v 1 Wote, Sipsip Waⱡ ni ndi, kan 7 ti buk ei, imp moⱡpa pitim ni, koⱡmung elinga mel, muⱡ kona ni tiyu nimba telinga, ant mong tenda ei mel itim.   
\p
\v 2 Wote, na ndi kʉndʉr mel, anggelo 7 kat, Got nga kuimp keta ila anggilik mormin ni kʉⱡ, pikul 7 kat nguⱡungina tʉk ambrung.   
\p
\v 3 Ei kʉn, anggelo ti ndi omba, rat pol wingti ila nondpa anggilpa kʉn, ming gol ndip ikil mura rui ei, ambuⱡpa moⱡnga kʉn, ikil mel mura rui na mbʉ nga mat, puⱡi nguⱡina kʉn, Got nga wamp atinga rormʉn mbʉ kʉn, tʉpa rak ndupa, Got nga rat pol gol ila rʉpʉndi pol ei nga kuimbal tetʉm nila, angge nimba ngurum.  
\v 4 Ni kʉn, ndip ikil mura rui na, atinga na mbʉ ndi, anggelo nga ki raⱡ ndi, wak rok kʉn, Got nga kuimp keta ila oⱡa purum.  
\v 5 Wote, anggelo ei ndi, ndip ikil mura rui ming ei tʉpa kʉn, rat pol wingti ila ndip ei, tʉpa ming ila ruk ndupa kʉn, mʉi kona ila ropa, mana ndurʉng. Ni kʉn, kona guⱡ gaⱡa nimba, kump kiraipa elinga mel, kona kilimbʉmp itim.   
\s1 Anggelo Kat Ndi, Pikul Ik Ndurʉng  
\p
\v 6 Wote anggelo 7 kat ndi, pikul 7 kat ambulk mormin kʉⱡ, ik nduing pilik tʉk kun etʉng.  
\v 7 Ni kʉn, anggelo kuimbal ni ndi, elim nga pikul ni, ik nduⱡnga kʉn, kona kup mong ropa, ndip na, mema na mbʉ, rukʉrʉⱡa etʉk, mʉi kona ila mana orung. Mʉi kona na, nde na mel mbʉ, oi nduk raldika endʉk kʉn, mʉi oi ti kʉn, nde nga oi ti kʉn, ʉi ongum na mel mbʉ, ndip ndi nomba pora ndurum.   
\p
\v 8 Wote, anggelo 2 ni ndi, elim nga pikul ni, ik nduⱡnga kʉn mel ti, kʉndʉr ei, komnga mong mam ti, ndip norum ni mel itim. Wote mel ei, num kuta ila rok mana nduⱡmina kʉn, ʉldʉ ronggʉt mema rʉrʉm.  
\v 9 Num kuta ila nga oma na mel mormin mbʉ nga rʉⱡaip tenda ti, kolk pora ndurʉng. Ei kʉn, nu sip minal tetmʉn mbʉ nga, i ku etʉk, rʉⱡaip tenda ti etʉk kit mondrʉng.   
\p
\v 10 Wote, anggelo 3 ni ndi, elim nga pikul ei, ik nduⱡnga kʉn, muⱡ ila mipil ou ti, ndip anmbil mel kiya nomba, mana omba kʉn, mʉi ila nu mam mbʉ nga rʉⱡaip tenda tila mana orum. Wote nu pukpa ui mbʉ nga rʉⱡaip tenda tila i ku, etpa mana urum.  
\v 11 Mipil ni, mbi tek, Kombila iti ti, nʉtʉng. Nu nimbʉ nga rʉⱡaip tenda ti, mipil Kombila iti ei ndi ambuⱡnga, wamp puⱡi ndi, nu ei kolk norung ila kolk pora ndurʉng. Nambuⱡ emel, nu ei, kombila itim.   
\p
\v 12 Wote, anggelo 4 ni ndi, elim nga pikul ni, ik nduⱡnga kʉn, ant ei nga punt ronggʉt kʉn, kalimp ei nga punt ronggʉt kʉn, mipil na kʉⱡ nga punt ronggʉt kʉn, etʉk kit mondrʉng. Mel kʉⱡ nga ti, ti nʉk, rʉⱡang ngormʉn uⱡ ei nga, punt ronggʉt elpa elpa rumbʉⱡ murum. Ni kʉn, ant ei nga rʉⱡang ngorum uⱡ ei nga, punt ronggʉt rumbʉⱡ murum. Wote rumbuldi uⱡ ei, mel kit pitim.   
\p
\v 13 Wote na ndi, kʉndʉr mel, wi muⱡ ila kʉi ndowa ti, mbur nimba mba kʉn, ke ronduⱡ nimba mel, “Anggelo raldika mormin kʉⱡ ndi, pikul ik nduing enmin. Ei nga, mʉi kona wamp mbʉ kʉn, kont ama minal enim ei ka!” nitim.   
\c 9  
\s1 Anggelo 5 Ei Ndi, Pikul Ik Ndurum  
\p
\v 1 Wote na ndi, kundʉr mel, anggelo 5 ei ndi, elim nga pikul ei, ik nduⱡnga kʉn, muⱡ ila mipil ti, mʉi ila mana urum. Wote, mʉi ila kut mandpa tetʉm ei nga kumba ki ei, elim nguⱡmina, mepa urum.  
\v 2 Ni kʉn, mipil ni ndi, mʉi ila kut ni, kumba tilinga kʉn, ndip ikil mel mam mat, kut nila oⱡa omba kʉn, ant ei kʉn, kona kʉpkʉ raⱡ tʉpa rumbʉⱡ mundrum.  
\v 3 I elinga mel, ndip ikil oⱡa urum kona nila, uipʉ goimba ou mat, mʉi kona ila mana orung. Uipʉ goimba ou mbʉ, ronduⱡ ti ngurung ei, kimbuⱡa kelwa nga ronduⱡ ei mel kapⱡa.  
\v 4 Uipʉ goimba ou mbʉ, kundʉk nʉk mel, “Enim ndi, ui ongum na, nde na, wote mel mat, mʉi kona mbila oⱡa orum mbʉ, etʉk kit mundi nʉmʉndʉi, mon! Wamp mat, Got nga tip timal ei, mʉi ombʉl ila pi napʉm wamp mbʉ kandʉk kʉn, etʉk kit mundʉi!” nʉtʉng.  
\v 5 Wamp mbʉ, etʉk mindil nguk pangina, kalimp 5 omba pangga kʉn, wote wamp mbʉ, rok kundi nʉkʉndʉi! Ni kʉn, uipʉ goimba ou nimbʉ ndi, puk mʉi kona mbila andʉk wamp mbʉ, etʉk mindil kit mat nguing ei, kimbuⱡa kelwa ndi, wamp nomba mindil kundrum uⱡ ni mel etmba.  
\v 6 Ui ei kʉn, wamp mbʉ kuⱡing numan ei kandʉk, timin nʉk etʉk, wote kandʉk ti nʉtʉng. Ei kʉn, wamp kuⱡi uⱡ ei ndi, wamp mbʉ ropa kundi nʉkʉndʉmba.   
\p
\v 7 Na ndi, kʉndʉr mel, uipʉ goimba ou mbʉ, kng os na mat, el iting ping etmin uⱡ ni mel, tʉk kun etʉk morung. Peng mbila wʉnʉ gol mat mondrʉng. Wote, kuimp keta mbʉ, wamp nga kuimp keta ei mel titim.  
\v 8 Peng ndi mbʉ, amp nga peng ndi, ni mel ruⱡ mbʉ. Wote gu mbʉ, kui laiyon na gu ni mel ʉnggʉtʉm.  
\v 9 Pepil ombil mbila kapa mat, wal pʉki mel pakʉk, wote pou mbila, nung nung nitim uⱡ ei, kng os mat, el ila ping pilik, wil kar mel mat kundʉk mek puⱡina, kʉlkʉⱡ nʉtʉm uⱡ ni mel itim.  
\v 10 Uipʉ goimba ou nimbʉ nga ʉi mbʉ, kimbuⱡa kelwa ei, wamp nomba mindil kundrum. Ni mel kapⱡa ʉi ʉnggʉtʉm. Ʉi ila ronduⱡ ti, tʉk tek morung ei, wamp minal mindil ngangina, kalimp 5 omba mba ei nga ronduⱡ tʉtʉng.  
\v 11 Mel nimbʉ nga nuim mumuk ti murum. Nuim mumuk ei, mʉi ila kut ti mandpa tepa mba, pora ni nandʉtʉm ei nga anggelo ei. Ipru ik ila nga anggelo ei, mbi tek, Apandon, nʉtmʉn. Wote, Grik ik ila mbi tek, Apoliyon, nʉtmʉn. Ik ei nga puⱡ ei, wamp etpa kit mondrum anggelo ei.   
\p
\v 12 Mbun mindil mam kuimp tepa ni pora nim. Enim pilʉi! Wote, mbun mindil mam raⱡ omba uⱡ ei petʉm.   
\s1 Anggelo 6 Ei Ndi Pikul Ik Ndurum  
\p
\v 13-14 Wote, anggelo 6 ni ndi, elim nga pikul ni ik ndurum. Ni kʉn, Got nga kuimp keta ila, rat pol gol tetʉm nilinga, kom tʉmbʉkak kat anggʉtʉm ila, ik ti ekit oⱡnga na pit. Ik ni ndi, anggelo 6 ei, pikul ambuⱡpa murum ni, kundpa nimba mel, “Nim ndi, anggelo tʉmbʉkak kat, kan manga Nu Yupretis ila petmin kʉⱡ, tʉkʉn mundi!” nitim.  
\v 15 Ni kʉn, mba anggelo tʉmbʉkak ni kʉⱡ, tʉpa munduⱡnga kʉn ok, wamp mbʉ, kʉmp tʉk rʉⱡaip raldika endʉk kʉn, rʉⱡaip tenda ti, rok kondrung. Wote, anggelo nimbʉ ndi, tʉk kun etʉk, pora nduk molk kʉn, ant mong ei kʉn, kalimp ei kʉn, pana ei kʉn mint nokundʉk molk, wote kongun ei etʉng.  
\v 16 El wu mat, kng os mbuⱡ ila morung ei nga namba iti morung ei, na kundʉk nilingina pit. Ei, wu 200 miliyon minal morung.   
\p
\v 17 Na ur kump etʉp kundʉr mel, wu mat, kng os mbuⱡ morung nimbʉ, wal pʉki kapa kunt na, muk na, plawa kuk kʉng ti na mat tʉk pepil ila tʉk ni, nduk pendʉtʉng ei, ndip mel kapⱡa. Kng os peng mbʉ, kui laiyon nga peng ni mel kapⱡa. Ndip kou ikil kʉn, ku salpa na mbʉ, kng os keta min mbila, ndip nomba ekit omba, ndui nimba kona mbila elpa elpa purum.  
\v 18 I etʉk kʉn, wamp mbʉ kʉmp tʉk, rʉⱡaip raldika etʉk rok kʉn, wamp rʉⱡaip tenda ti mel, raldika kit kʉⱡ ndi, rok kondrung. Uⱡ ei, ndip kʉn, ikil kʉn, ku salpa na mbʉ, kng os keta min ila ekit urum.  
\v 19 Ni kʉn, kng os nimbʉ nga ronduⱡ pitim ei, keta ila pepa ʉi ila pepa itim. Wote, kng os ʉi mbʉ, wimbʉ na ni mel, peng anggilpa itim ei ndi, wamp mbʉ, etʉk kit mondrung.  
\v 20 Wamp mat, kont morung nimbʉ, numan ropʉl rui narʉk, wamp nga ki ila ambulk, mim etʉng mel mbʉ, ambulk gi nduk morung. Wote wamp mbʉ, kur kit mbi paka rondʉk, ku gol na, silpa na, bras na, ku na, nde na mbʉ, mim etʉng mel mbʉ, mbi paka rondrʉng. Mel mbʉ ik pili napilik, ik ni nandʉk, nombuⱡa ʉndi nandʉk etmin mel mbʉ nga mint, pilik morung.  
\v 21 Wamp mbʉ ndi, wamp mat rok kondʉk mbʉ, kupna ambulk, wapra rok wamp mat nga mel mbʉ, kʉndʉp nok etʉng. Wamp nimbʉ, numan ropʉl rui narʉk kʉn, uⱡ kit mbʉ, tʉk mbuⱡ nguk iti natʉtʉng.   
\c 10  
\s1 Anggelo Ti Ndi, Jon Ni, Buk Kat Ngurum Ila Nurum  
\p
\v 1 Ui ni pora nilinga kʉn, na moⱡʉp kundʉr mel, anggelo ronduⱡ ti, muⱡ kona ei wak ropa mana urum. Elim nga kʉng ei, kona kopa ndi, kum roⱡnga kʉn, peng ila kona kʉmp kʉpʉm ndi, mʉkʉp ropa pelinga kʉn, kʉmp keta ei, kona ant na ni mel rʉⱡang puⱡnga, kump raⱡ ndip anmbil mel noⱡnga urum.  
\v 2 Elim nga ki ila buk kel kat ambuⱡpa, mepa urum kʉⱡ, kumba tʉpa titim. Wote, elim nga kʉmp mbo orunga, num kuta ila kambilpa, kʉmp rar orunga, mʉi ila kʉmbʉtʉm.  
\v 3 Wote, kui laiyon na, ke nʉtʉm uⱡ ni mel, etpa ronduⱡ wi rurum. Ni kʉn, kopa 7 kat ndi, guⱡa gaⱡa nʉk ik nʉk, yant ndurʉng.  
\v 4 Kopa 7 kʉⱡ ik nʉk pora nduⱡmina, mon rimp pilip it. Ei kʉn, muⱡ ila wamp nga ik ti ndi, nimba mel, “Kopa 7 kʉⱡ nga guⱡ gaⱡa nʉk ik ninmin kʉⱡ pilkʉn, gi ndukʉn molkʉn kʉn, mon rokʉn, mana ndui nʉndi!” nitim.   
\p
\v 5-6 Unt anggelo ti, num kuta kʉn, mʉi raⱡ ila nga kʉmp kambilpa murum ni nga ki mbo orunga muⱡ ila oⱡa ndupa kʉn, ik kupa mendpʉⱡ ti, Got rʉk rʉk kont morum ei nga mbi ila nitim. Got ei ndi, mʉi ei, mim etpa kʉn, mʉi ila tetʉm mel mbʉ pora itim. Muⱡ ei etpa kʉn, muⱡ ila tetʉm mel mbʉ pora itim. Num kuta etpa kʉn, num ila tetʉm mel mbʉ pora itim. Anggelo ei ndi, nimba mel, “Ui mbʉ pora nimba enim ila, Got ndi, nukundi nakʉndʉmba mon!  
\v 7 Wote, anggelo 7 ei pikul ik ndum ei kʉn, Got nga ik nimba etmba pilpa itim uⱡ mo ropa tetʉm mbʉ, unt elim nga painui kongun wu mbʉ ndi, nʉtʉng ei mel etpa pora ndumba,” nitim.   
\p
\v 8 Unt muⱡ ila nga wamp ti nga ik nitim pit uⱡ ei mel, aldpa na kundpa, nimba mel, “Nim pukʉn anggelo ti, num kuta kʉn mʉi raⱡ nga kʉmp kambilpa morum ei nga ki ila buk kat kumba tʉpa tetʉm kʉⱡ ti,” nitim.   
\p
\v 9 Wote na ndi, mbo anggelo ni kundʉp, nʉmp mel, “Nim nga buk kʉⱡ na, ngui nilmba na kundpa, nim ndi, buk kʉⱡ tʉkʉn nana kʉn, oⱡ ila nga rukʉr orunga kombila etpa kʉn, wote nim nga keta min ila pilma kopung mel, tʉngʉn etmba,” nit.  
\v 10 Nimba pora nduⱡnga kʉn, wote na ndi, buk kel ni kʉⱡ tʉp nʉr. Noⱡmba keta min ila, pilma kopung mel, tʉngʉn elinga kʉn, wote nomp pora nduⱡmba, oⱡ rukʉr orunga, kombila itim.  
\v 11 Wote, aldpa na kundʉk, nʉk mel, “Nim ndi, ik pai nokʉn uⱡ, wote pemba mbʉ mel, mʉi kona mbila wamp na, wu nuim mumuk na, wamp ik elpa elpa nʉk etmin mbʉ, kundkʉn ni!” nʉtʉng.   
\c 11  
\s1 Wu Raⱡ Ndi, Ik Nʉkʉⱡ Ekit Ndʉrʉnggil  
\p
\v 1 Wote, tʉmbʉⱡ ambulk mek andurmin ni mel ti, na nguk kʉn, nʉk mel, “Nim ndi, oⱡa anggilkʉn andkʉn, Got nga manga wingti ei kʉn, rat pol na mbʉ to rokʉn iti! Wote wamp mat, Got nga mbi paka rondunmʉn mbʉ, namba iti mbʉ kʉmp rokʉn iti!  
\v 2 Wote nim ndi, rat pol wingti ekit orunga tetʉm kona ei, to rui nʉri! Nambuⱡ emel, wamp rʉⱡaip elpa mbʉ nga tʉpa ngurum kona ei tetʉm. Wamp mbʉ ndi, Got nga kona peng wingti ei, kʉmp kambilik mint pangina mba, kalimp 42 omba mba.  
\v 3 Na nga nombuⱡa rʉng wu raⱡ tʉp mundamba kʉn, muⱡ ping ralkʉⱡ pukʉⱡ wamp mbʉ kʉn, Got nga ik mbo endkʉⱡ panggila, rumbʉⱡ 1,260 omba mba,” nʉtʉng.  
\v 4 Muⱡ mʉi raⱡ nga Got nga kuimp keta ila, nde olip raⱡ kʉn, wote lam raⱡ mormbil ei, elim nga nombuⱡa rʉng wu raⱡ nga to ropʉⱡ mormbil.  
\v 5 Wamp mat ndi, wu raⱡ uⱡ mat ndi, etpʉn kit mundmin nʉk eng ndam, wu raⱡ nga keta min ila, ndip ti ekit omba kʉn, wamp mbʉ nomba kondʉmba. Wote, wamp nam ti ndi, wu raⱡ nga ti ruimin nʉk eng ndam, i etʉk ku kuⱡing.  
\v 6 Wu raⱡ nga ronduⱡ tekʉⱡ moⱡʉnggil ei ndi, muⱡ ei imp muⱡanggila kʉn, kona ndamʉng rui nʉrangga kʉn, andkʉⱡ Got nga ik mong mbʉ ninggil. Wu raⱡ nga ronduⱡ ei ndi ku, nu mbʉ tanggila, mema raⱡpa tangga kʉn, wote mʉi kona mbila pora, mel tetʉm mbʉ kit muⱡangga, ni kʉⱡ uⱡ mat itinggil. Wu raⱡ ndi, uⱡ mbʉ pilinggil ei mel, kapⱡa itinggil mint.   
\p
\v 7 Ei kʉn, wu raⱡ ndi, Got nga ik mong mbʉ, nʉkʉⱡ pora ndanggila kʉn, wote mel rakra ti, mʉi ila kut mana petʉm ei ndi, oⱡa omba, wu raⱡ kʉn, el romba. Wote, mel rakra ei ndi, wu raⱡ ropa mana ndupa, ropa kondʉmba.  
\v 8 Wu raⱡ nga on raⱡ, kona peng ou ei nga nombuⱡa mam ila tiyangga kʉn, tʉn ndi, ik ek ropʉn, kona peng ou ei kundpʉn, Sorom kʉn, Isip mʉi kʉmp raⱡ nimin. Unt kona peng tenda ila ku, wu raⱡ nga Nuim ni, unt nde peta ila nil rok, rok kondrung.  
\v 9 Ei kʉn, mʉi kona mbila wamp rʉⱡaip elpa elpa na, kʉng elpa elpa ti na, ik elpa elpa nʉk etmin na mbʉ ndi, wu raⱡ nga on ei kandʉk pangina, rumbʉⱡ raldika etpa, wote rumbʉⱡ ti nga ruk ting ila pora nimba. Wote, tʉk on iteing nʉk kandʉk, kont iti nʉtʉn.  
\v 10 Mʉi kona wamp mbʉ ndi, wu raⱡ korʉnggil uⱡ ei kandʉk kʉn, numan kai pilik, ʉp nok ambulk palk, en enim nga wamp mbo mbʉ kʉn, mel mat gem nguk int yant etʉng, nambuⱡ emel, painui wu raⱡ ndi, mʉi kona wamp mbʉ kʉn, uⱡ kit mbʉ etʉnggil ei nga iting.   
\p
\v 11 Wote, rumbʉⱡ raldika omba puⱡnga, wote rumbʉⱡ ti nga mba rʉk ting ila pora nilinga kʉn, Got nga muⱡnga ei, pop ropa, wu raⱡ kʉn ruk nduⱡnga, wu raⱡ rʉt ni kʉⱡ, kont morunggil. Ei kʉn, wamp mbʉ ndi, wu raⱡ nga itim uⱡ ei, kandʉk mundmong etʉng.  
\v 12 Ni kʉn, wu raⱡ mok pʉtʉnggil mel, wi muⱡ kopa ila wamp nga keta min ila, ronduⱡ wi ropa, nimba mel, “Enmbil ya ila oⱡa wʉl!” nitim. Ei kʉn, wu raⱡ, kopa pol ila, oⱡa pukʉⱡ wi muⱡ ila puⱡʉnggila mel, el rui wamp nimba ndi, wu raⱡ kandʉk morung.   
\p
\v 13 Ui ni kʉn, kona kilimbʉmp mam ti elinga, kona peng ou ei nga punt ronggʉt etpa, kit monduⱡnga kʉn, wamp 7,000 kolk pora ndurʉng. Wamp mat kont morung mbʉ, mundmong minal etʉk, muⱡ ila Got nga mbi ou ei, tʉk ou nduk, paka rondrʉng.  
\v 14 Enim pilʉi! Mbun mindil 2 ni, pora ninim. Wote, ui onunga kot ila mbun mindil 3 ei nondpa, ekit omba.   
\s1 Anggelo 7 Ni, Pikul Ik Ndunʉm.  
\p
\v 15 Wote, anggelo 7 ni nga pikul ni, ik nduⱡnga mel, wi muⱡ ila wamp nga keta ila ik mat ndi, ronduⱡ wi rok, nʉk mel, “Akup mʉi kona ila nga wamp rʉp iti uⱡ ei nga ronduⱡ ei, tʉn nga Oⱡa Nuim ei kʉn, elim nga Kraist raⱡ kʉn tetʉm. Wote, elim uⱡ nga kʉnt nga rʉp etpa moⱡmba,” nʉtʉng.  
\v 16 Ni kʉn, Got nga kuimp keta ila rʉp wu 24 kat, en enim nga rʉpʉndi pol ila mormin nimbʉ ndi, Got nga kuimp keta ila mura rok mondʉk, Got nga mbi paka rondrʉng.  
\v 17 Wu nimbʉ ndi, nʉk mel, “Nim Nuim Got Ronduⱡ Purum ei, nim unt murʉn, akup morʉn. Nim nga ronduⱡ mam ei, tʉkʉn pora ndukʉn kʉn, nim Nuim Mumuk molkʉn, wamp mbʉ pora puⱡ mondkʉn rʉp en. Uⱡ ei nga, tʉn ndi, nim kʉn angge ninmʉn.  
\v 18 Uⱡ ila nga, wamp rʉⱡaip elpa mbʉ, popʉⱡ mondrung. Ei nambuⱡ emel, wamp mbʉ nga popʉⱡ ei, omba ui ei akup. Ui ei, wamp kui mbʉ kʉmp tin. Nim nga ik painui kongun wamp na, wamp mat nim nga mundmong endʉk, mana orunga molk kongun etʉng na, mʉi kona wamp nuim na, wamp kurpa na mbʉ mel kai mat, punt rokʉn nguin, ui ei akup. Wamp mat ndi, mʉi kona ila nga mel tetʉm mbʉ, etʉk kit mondrung ei nga wamp mbʉ, etʉk kit munding ui ei akup,” nʉtʉng.   
\p
\v 19 Wote, rʉp wu nimbʉ, ik nʉk pora nduⱡmina kʉn, anggelo mbʉ ndi, Got nga muⱡ ila manga wingti ei, kumba tilingina kʉn, nimba mʉi rui ket kʉⱡ, pena ila ekit omba telinga kʉndʉr. Ni kʉn, kona kump kiraipa etpa, guⱡ gaⱡa nimba, mʉi ei kilimbʉmp etpa, kona ndamʉng tʉma ropa, kona kup mong mam mbʉ mana urum.   
\c 12  
\s1 Amp Ei Kʉn, Wimbʉ Mam Ei Kʉn  
\p
\v 1 Wote, uⱡ min ngʉn pi ti, muⱡ ila ekit urum ei, amp ti murum ei, elim nga muⱡ rurum kʉⱡ, kona ant ei mel kapⱡa, rʉⱡang purum. Wote, elim nga kʉmp puⱡ mana orunga, kona kalimp ei pitim. Wote, elim nga peng ila mipil 12 kat, wu nuim mbʉ nga wʉnʉ mondurmʉn ei nga ti mundrum.  
\v 2 Amp ni, kangambuⱡa mundrum ei nga kangambuⱡa memba ui ei nondpa urum ila, mindil nomba ronduⱡ ke nitim.  
\v 3 Wote, uⱡ min ngʉn pi ti ku, muⱡ ila ekit urum ei, wimbʉ mam kunt ti, peng 7 anggilpa, kom 10 anggilpa etʉm ei, ekit urum. Ni kʉn, peng 7 ni kʉⱡ ila, wu nuim mumuk mbʉ nga wʉnʉ mondurmʉn nimbʉ nga mondrung.  
\v 4 Ni kʉn, wimbʉ ʉi ni ndi, muⱡ ila mipil minal petmin nimbʉ nga rʉⱡaip ti ropa tʉpa, mʉi kona ila mana ndurum. Ni kʉn, wimbʉ ni ndi, amp ei kangambuⱡa miyangga nuimp nimba, nokundpa murum.  
\v 5 Wote, amp ni ndi, kang ti mitim. Kang ei, ronduⱡ minal tepa moⱡpa, wamp rʉⱡaip minal rʉp etpa nokundʉmba. Wote, amp ni ndi, kang ni melinga kʉn, tʉkrʉk ruk ok, kang ni tʉk mek, Got kʉn elim nga rʉpʉndi poⱡ ila, mek oⱡa purung.  
\v 6 Wote amp ni, nung nimba mba, kona kui waka tila purum ei, Got ndi, amp ei nga tʉpa kun endpa, tinditim kona ila purum. Kona ila amp ei, rʉp itangina, rumbʉⱡ 1260 omba mba.   
\p
\v 7 Ni kʉn, muⱡ kona ila el mam ti etʉng. Anggelo Maikel kʉn, elim nga anggelo mbʉ, tʉpa tepa wimbʉ ei kʉn, el roⱡnga, wimbʉ kunt ei ndi, elim nga anggelo mbʉ, tʉpa tepa Maikel nga anggelo mbʉ kʉn el rurum.  
\v 8 Ni wote, wimbʉ ei nga anggelo mbʉ, el iting ei nga ronduⱡ ti mon. Uⱡ ei nga, muⱡ kona ila muⱡing mel, kapⱡa iti nʉtʉtʉm.  
\v 9 Got nga anggelo mbʉ ndi, wimbʉ mam ei, rok tʉk ekit ndurʉng. Wimbʉ mam ei, unt kor nga murum ei, mbi tek, Seitan nʉtʉng ei ndi, mʉi kona ila wamp mbʉ, ik kol nga puⱡ ropa ngumba itim ila, elim nga anggelo mbʉ kʉn kunda, rok tʉk mʉi kona ila mana ndurʉng.   
\p
\v 10 Wote, na pit mel, wi muⱡ ila wamp nga ik ti ndi, wi ronduⱡ ropa, nimba mel, “Akup tʉn nga Got nga wamp etpa ti uⱡ ei onum! Akup Got elim nga wamp tʉpa mumuk rui uⱡ ei nga ronduⱡ ei, pena ila ekit onum. Akup elim nga Kraist nga ronduⱡ ei, ekit onum. Uⱡ ei, nambuⱡ emel, wamp ti, tʉn nga wamp ʉngʉnʉl mbʉ, rumbuldi rʉnggilmʉ raⱡ, Got nga kuimp keta ila, ik ndo ngumba etʉm wu ni, akup anggelo mbʉ ndi, rok tʉk mana ndurʉng.  
\v 11 Tʉn nga wamp angmʉn mbʉ, Sipsip Waⱡ ei nga mema ila ronduⱡ tʉk kʉn, elim nga ik kupa ei, wamp mat kundʉk nʉk etʉng uⱡ ei ndi, el rui wamp ei, rok mana ndurʉng. Wamp angmʉn mbʉ ndi, en enim rok kunding uⱡ ei, kapⱡa mint nʉk pʉtʉng.  
\v 12 Nim muⱡ kona ei kʉn, muⱡ ila mormin wamp mbʉ pora, numan kai pilik muⱡʉi! Wote, nim mʉi kona ei kʉn, num kuta raⱡ kit pilkʉⱡ ka etkʉⱡ muⱡʉl! Nambuⱡ emel, mbun mindil mam mat, enmbil kʉn onum. Seitan ni, popʉⱡ mam mat mepa kur mana urum. Ei nambuⱡ emel, elim ui onunga kot ila, mana omba moⱡmba uⱡ ei nga pilpa urum,” nitim.   
\p
\v 13 Wimbʉ ei, elim tʉk mʉi kona ila mana ndurʉng uⱡ ei pilpa kʉn, amp i kang mitim ni, pep ropa tʉkrʉpa purum.  
\v 14 Wote amp ni, kʉi ndowa mam ti nga pou raⱡ ngorung. Ei nambuⱡ emel, amp ei ndi, kʉi pou raⱡ ropa mondpa mbur nimba mba, kona kui waka ila muⱡangga, kona ila amp ei, rʉp itangina, wimbʉ ei kʉn, ruⱡ etpa nʉk kʉn etʉng, rumbʉⱡ 1260 omba mba.  
\v 15 Wote, wimbʉ ni nga keta nombuⱡa ila nu mam ti, mik ropa tʉpa, ekit ndurum ila nu ei ndi, amp ei, tangga nimba pilpa itim.  
\v 16 Wimbʉ ei ndi, nu ni mik ropa munduⱡnga kʉn, wote mʉi ei ndi, amp ni, tʉpa rapundpa, nu mam ni keta anga ropa, nomba kitim.  
\v 17 Ni kʉn, wimbʉ kunt ei ndi, amp ei kʉn, popʉⱡ kuⱡpa kʉn, amp ei nga wamp pundun mbʉ kʉn, el ruimp nimba purum. Wamp pundʉn mbʉ, Got nga, mi ik mbʉ pora, pep rok, Jisas nga ik kupa ei nʉndʉk, rʉk rʉk pep rok etmin.  
\v 18 Wote, wimbʉ mam kunt ni, num kuta ʉldʉ ila anggilpa murum.   
\c 13  
\s1 Mel Rakra Raⱡ Oⱡa Orʉnggil.  
\p
\v 1 Wote, na kundʉr ei, mel rakra ti, num kuta ila oⱡa urum. Mel ei nga peng 7 anggilpa, kom 10 ʉnggʉtʉm. Kom 10 kʉⱡ ila nga, wu nuim mumuk mbʉ nga wʉnʉ mondurmin nimba nga murum. Wote, peng 7 ni kʉⱡ ila, mbi mat murum mbʉ ndi, Got nga nimba kit mundrum.  
\v 2 Mel rakra na kundʉr ei, kui lepat mel itim. Kʉmp mbʉ, kng ber mel elinga, keta ei kui laiyon mel itim. Wimbʉ ni nga ronduⱡ ei, mel rakra ni ngumba, elim nga rʉpʉndi pol ei kʉn, wote wamp rʉp iti ronduⱡ mam ei ngurum ku.  
\v 3 Mel rakra ni nga peng tenda ti, rorung kona ei ur titim. Ei kʉn, mel rakra ni nga kona orʉⱡa ei, mʉi kona wamp mbʉ pora kandʉk, min ngʉn mundʉk, pep rok akil tetʉng.  
\v 4 Wamp mbʉ ndi pora, wimbʉ ei nga mbi paka rondrʉng. Ei nambuⱡ emel, wimbʉ mam ni nga ronduⱡ ei, mel rakra ei ngurum. Wote, mel rakra ni nga kunda, mbi paka rondʉk nʉk mel, “Wamp nam ti, mel rakra ei mel, kapⱡa murum? Wamp nam ti, mel rakra ei kʉn, el romba?” nʉtʉng.   
\p
\v 5 Ni kʉn, mel rakra ei, ik kit nimba, elim nga ronduⱡ ei, tepa kongun itangga, kalimp 42 omba pangga nimba, Got ndi, kandpa kui itim.  
\v 6 Mel rakra ei ndi, keta anga ropa, Got kʉn, Got nga mbi kʉn, elim nga kona morum ei kʉn, wote wamp muⱡ kona mormin mbʉ kʉn pora, ik kit nimba ngurum.  
\v 7 Got ndi kandpa, wak rangga kʉn, elim nga wamp mbʉ kʉn el ropa, wamp mbʉ ropa mana ndumba. Ronduⱡ ti tʉpa kʉn, mʉi kona mbila wamp rʉⱡaip na, kʉng elpa elpa kulk ik nʉk etmin wamp mbʉ nga pora, nuim mumuk moⱡʉp rʉp itimp nimba itim.  
\v 8 Mʉi kona wamp mbʉ ndi pora, mel rakra ei nga mbi paka runding. Wote, wamp mat ndi, mbi paka rundi nʉnding. Ei nambuⱡ emel, muⱡ mʉi raⱡ mim iti nʉti kʉn, wamp mbʉ nga mbi ei, Sipsip Waⱡ unt rok kondrung ei nga kont mba mul, buk ila mbi morum.  
\v 9 Ei nga, wamp nam ti, kum nombuⱡa tem ndam, ik ei pilik kai itʉi!  
\v 10 Wamp nam ti, kan manga ila mbi nimba pilim ndam, kan manga ila pangga! Wamp nam ti, kur koiya ila kuⱡimp nimba pilim ndam, kuⱡangga ku. Uⱡ mbʉ enim, Got nga wamp rʉⱡaip mbʉ kʉn, om ndam, enim nga mondpa pili uⱡ ei, ambulk gi nduk muⱡʉi!   
\p
\v 11 Wote, na ndi kundʉr ei, mel rakra ti mʉi ila oⱡa urum. Wote, mel ei nga kom raⱡ, kng sipsip waⱡ ei nga gu ni mel, raⱡ ʉnggʉtʉm. Wote, ik nʉtʉm uⱡ ei, wimbʉ kunt nga ik ni mel nitim.  
\v 12 Mel rakra akil tepa ni ndi, mel rakra kuimp tepa ni nga ronduⱡ ei, tʉpa kuimp keta ila kongun ronduⱡ mundpa itim. Mʉi kona mbila wamp mbʉ kʉn, kongun ronduⱡ mundpa elinga, mel rakra kuimp tepa ni nga unt kʉng iti itim kona ni, ur kurum ni nga mbi paka rondrʉng.  
\v 13 Mel rakra akil tepa ni ndi, uⱡ rʉpʉndi elpa elpa mam mat itim. Uⱡ rʉpʉndi ti itim ei, wamp morung kuimp keta mbila nga, muⱡ ila ndip mat, etpa mʉi kona ila mana elinga kandurmʉn.  
\v 14 Got ndi, mel rakra ei kandpa, wak roⱡnga kʉn, mel rakra kuimp tepa ei nga kuimp keta ila nga uⱡ rʉpndi elpa elpa mbʉ itim. Uⱡ ei ndi, mʉi kona mbila wamp mbʉ kʉn, ik kol ropa, nimba mel, “Mel rakra kuimbal ei, unt koiya ndi, rok kondrung. Wote, akup kont morum ei nga to tʉndʉk mel ti, mim etʉk mondʉk tʉk ou nduk mbi paka rundʉi!” nitim.  
\v 15 Got ndi, mel rakra akil tepa ni, kandpa wak roⱡnga kʉn, mel ti mim etʉk mondrʉng ni, muⱡnga kont ei, pop ropa ruk nduⱡnga kʉn, nde mel mim etʉk ni, ik nitim. Wamp mat ndi, mel mim etʉng ei nga, mbi paka rundi nandʉng wamp mbʉ, ropa kondʉmba.  
\v 16 Mel rakra akil tepa ni ndi, ik ti nilinga kʉn, tip timal ti, wamp mbʉ nga pora, ki mbo orunga na, mʉi ombil na mbila pendʉtʉng. Uⱡ etʉng ei, wamp ou na, kel na, mbi mul wamp na, wamp kurpa na, kng mel pi wamp na, kindmant kongun wamp na, wote nuwa murmin wamp mbʉ kʉn, pora etʉng.  
\v 17 Ei nga, wamp nam ti, mel rakra ei nga tip timal ei, elim nga mbi ei, kuimp keta ila muⱡi nambʉⱡʉm ndam, wamp ei ndi, wamp mbʉ nga mel mbʉ, rarʉp ropa ti nʉtangga kʉn, wote wamp mbʉ ndi, wamp ei nga mel mbʉ, rarʉp rok ti nʉting ku.   
\p
\v 18 Tʉn wamp mbʉ ndi, uⱡ ei pilpʉn, kai etamʉn! Wamp nam ti nga pilpa kungʉndi ei ndi, mel rakra ei nga mon mbʉ, kʉmp rok kai etʉk pilʉi! Nambuⱡ emel, mon ei, wamp ti nga mbi tetmin. Wu ti nga mbi ei, 666 nitmin.   
\c 14  
\s1 Wamp 144,000 Ndi, Kinan Kont Kat Nʉtʉng  
\p
\v 1 Wote na ndi, kundʉr mel, Sipsip Waⱡ ei, komnga Saiyon ila anggilinga kʉn, wamp 144,000 kunda rʉp rok anggʉtʉng. Sipsip Waⱡ ei nga mbi ei kʉn, Tipam nga mbi ei kʉn kunda, wamp mbʉ nga mʉi ombʉl ila, mon rok mondrung.  
\v 2 Wote, na kum tep pit ei, wi muⱡ ila ik ti pit ei, gita rok nʉtmin ni mel, ik nilingina, nu kuⱡʉp ropa, kona guⱡ gaⱡa nimba etʉm ni mel elinga pit.  
\v 3 Wamp 144,000 mbʉ ndi, rʉpʉndi pol nila, tʉmbʉkak mel kont mul na, rʉp wu na mbʉ nga kuimp keta ila molk, kinan kont kat nʉtʉng. Got ndi, wamp 144,000 rukʉr titim mbʉ mint kinan kʉⱡ, pilik mbi nduk nʉtʉng. Wamp wei nʉwʉ mat ndi, kinan kʉⱡ, pilik ni nandʉtʉng mon!  
\v 4 Wu mbʉ ndi, amp mbʉ kʉn, rʉp rok pek iti natʉtmin, mon! Wu eng nui mbʉ molk kʉn, Sipsip Waⱡ ei, purum kona mbila wu mbʉ, akil tek pep rok purmin mint. Mʉi kona mbila wamp mbʉ nga wu mbʉ mendpʉⱡ, Got ndi, etpa rukʉr titim. Mel mat, Got kʉn angge nʉk ngormʉn ni mel wu mbʉ, i etʉk angge nʉk, Sipsip Waⱡ ei kʉn, Got kʉn ngorung.  
\v 5 Wamp mbʉ nga keta ila ik kol ti, ekit ui nawʉrʉm. Wote, uⱡ ⱡawa ti kandʉk, ti natʉtmʉn mon ku.   
\s1 Anggelo Raldika Kat Rʉnang Ik Nʉtʉng  
\p
\v 6 Wote, na kʉndʉr mel, anggelo ti, mbur nimba muⱡ ila purum ei ndi, Rʉnang Ik Kai rʉk rʉk kont tetʉm kʉⱡ, mepa mba, mʉi kona mbila pora, ik elpa elpa ni wamp na, wamp rʉⱡaip elpa elpa na, kʉng elpa elpa ti wamp na, mʉi kump elpa elpa mbila, nimba ngumba pilpa purum.  
\v 7 Anggelo ei ndi, wi ronduⱡ ropa, nimba mel, “Got nga wamp mbʉ pora, kʉmp tʉmba ui ei, nondpa enim. Enim wamp mbʉ ndi, Got nga mundmong endʉk, mbi paka rondʉk indʉi! Got nga ronduⱡ ei, muⱡ mʉi raⱡ na, num kuta na, nu na mel mbʉ pora, mim itim,” nitim.   
\p
\v 8 Anggelo akil tepa ni ndi, anggelo kuimbal ni, pep ropa omba, nimba mel, “Kona peng ou Bapilon ni, kit moⱡpa pora ndunʉm, ei ka! Kona peng ou Bapilon ei ndi elinga kʉn, wamp mbʉ ndi, wapra puⱡ pendʉk ronmin. Uⱡ ei, nu wain ronduⱡ mel ti, wamp mbʉ nguⱡnga, nok kekilip rok etmin,” nitim.   
\p
\v 9-10 Wote, anggelo 3 ni ndi, anggelo kuimp tetʉnggil ni raⱡ, pep ropa omba, ronduⱡ ik nimba mel, “Wamp nam ti ndi, mel rakra ei nga to tʉndʉk, mim etʉng mel ei, mbi paka rondpa, wote tip timal ei, ki ila kep, mʉi ombil ila kep, pem ndam, wamp ei, nu wain ei nomba. Nu wain ronduⱡ ei, Got elim nga popʉⱡ ei, ming ila oi ndupa mondpa ngumba. Ei kʉn, uⱡ kit mbʉ nga punt ropa ngangga nomba. Wote wamp ei, ku salpa nomba, kondpa pem ila anggelo wingti mbʉ nga kep, Sipsip Waⱡ ei nga mong waⱡ ila kep, mindil minal nomba.  
\v 11 Ndip ila wamp mindil nok muⱡangina kʉn, ndip ikil ei, rʉk rʉk oⱡa mba mint moⱡmba. Wamp mbʉ, mel rakra ei kʉn, wote mel nga to tʉndʉk mim etʉng mel ei nga mbi paka rondʉk, mel ei nga mbi ila, tip timal tʉk etʉng wamp mbʉ, rumbuldi rʉnggilmʉ raⱡ, mindil nok mint muⱡing,” nitim.  
\v 12 Ei kʉn, akup wamp mat, Got nga mi ik kʉⱡ pep rok, Kraist kʉn rʉk rʉk mondʉk pilik etmin wamp kʉⱡ, ronduⱡ mondʉk muⱡʉi!   
\p
\v 13 Na kum tep pit mel, wi muⱡ ila wamp nga keta ila, nimba mel, “Nim ndi, ik kʉⱡ mon rui! Akup kep, wote kep, wamp mat Nuim ei nga kongun endʉk molk, koⱡung mbʉ, ambulk palk muⱡing,” nitim. Muⱡnga Wingti ei ndi, i ku ninim, “Wamp mat kont molk kʉn, mbun koma rorung mbʉ, muⱡ tʉk ambulk palk muⱡing. Nambuⱡ emel, wamp mbʉ nga uⱡ kai mat etmin mbʉ kunda, mek ping,” nitim.   
\s1 Mʉi Kona Rʉng Ting Ui Ei Nondpa Enim.  
\p
\v 14 Wote, na kʉndʉr mel, kupa kurʉmʉⱡa ila wamp mel ti murum. Wamp ei, wʉna gol ti peng ila mondpa, kur koiya nengina mul ti, ki ila ambuⱡpa murum.  
\v 15 Wote anggelo ti, Got nga manga wingti ila moⱡpa, pena omba ronduⱡ mundpa, ka wi ropa etpa nimba, wamp ti, kopa ila murum ni kundpa, nimba mel, “Pana kona mbila rʉng mbʉ, rupa ropa pora ndum, nim nga kur koiya ei ndi, rʉng mbʉ koⱡmung iti, akup rʉng ting ui ei ka!” nitim.  
\v 16 Wote, kopa ila murum wamp ni ndi, kur koiya ni, ambuⱡpa mepa mʉi ila mana omba, pana kona nimbila, rʉng rupa rurum nimbʉ, koⱡmung itim.   
\p
\v 17 Wote, anggelo ti ku, Got nga manga wingti ila moⱡpa, pena omba kʉn, elim nga kur koiya nengina mul ti, ku ambuⱡpa, mepa oⱡnga kʉndʉr.  
\v 18 Wote, anggelo ti ku, Got nga rat pol wingti ei, wak ropa pena urum. Ei nga, ronduⱡ ei ndi, ndip ei rʉp etʉm. Anggelo ei ndi, kur koiya nengina mul ti ambuⱡpa, wi ronduⱡ ropa, nimba mel, “Pana kona mbila, nde wain mong mbʉ poⱡ ropa petʉm. Nim nga kur koiya nengina mul ei ndi, koⱡmung etkʉn mʉk rui!” nitim.  
\v 19 Wote, anggelo ni nga kur koiya nengina mul ti, ʉmbrʉm ni mepa, pana kona nila mana omba, nde wain mong nimbʉ, koⱡmung etpa tʉpa mʉk rurum. Ropa mondpa, wote tʉpa ku ming mam ti wain mong mbʉ, kambilik nim nim ndurmin nila, rʉk rʉk itim. Kona ei, Got nga popʉⱡ kurum kona ei mel.  
\v 20 Kona peng ei nga, ekit orunga ku ming mam ni telinga, wain mong nimbʉ, kambilik nim nim nduⱡmina mel, mema mbʉ tilk nimba, ekit purum kona ei, 200 kilomita ei mel ruⱡ puⱡnga moⱡpa, oⱡa urum to ei, kng os mʉi ila oⱡa anggilinga omba, keta min ila oi tʉtʉm ei mel, kapⱡa itim.   
\c 15  
\s1 Anggelo 7 Kat Ndi, Mbun Kit 7 Mat Ambulk Morung.  
\p
\v 1 Wote, na kʉndʉr mel, wi muⱡ ila uⱡ min ngʉn pi mam ti, ekit oⱡnga, na kandʉp rut nit. Ni kʉn, anggelo 7 kat ndi, wamp etʉk kit munding ei nga mbun, 7 kit kat ambulk morung. Mbun kit kʉⱡ, Got nga popʉⱡ kʉⱡ, ambulk morung. Got nga popʉⱡ 7 kʉⱡ, pora nim kʉn, wote uⱡ ti iti natʉmba.  
\v 2 Wote na ndi, kundʉr mel, num kuta mam ei mel ti, kiraipa kʉn, ndip kʉn tʉk rakʉndʉk mim etʉng. Wamp mat, el etʉk kai mondʉk, mel rakra ei nga mim etʉng. Ei nga, mbi ila tip timal mat etʉng. Wamp mbʉ, num kuta kiraipa mel, ei nga ʉldʉ ila anggilik morung. Got ndi, wamp mbʉ, gita mat ngurum mbʉ, ambulk morung.  
\v 3 Got nga kongun wu Moses kʉn, Sipsip Waⱡ raⱡ nga kinan mat rom rondʉk, nʉk mel, “Nim Nuim Got Ronduⱡ Purum Wu ei ka! Nim nga kongun etʉn mbʉ pora, mam itim ila tʉn kandpʉn rʉt nʉtmʉn ei ka! Nim ndi, wamp mbʉ nga pora Wu Nuim Mumuk ei molkʉn, nim nga uⱡ etʉn mbʉ pora, kun mba kupa mint etʉn.  
\v 4 Wu Nuim ye! Nim Wu Wingti tenda ei mint morʉn. Wamp nam ti ndi, nim nga mundmong indi nandʉpa, mbi paka rundi nandʉmba? Ei mon! Wamp mbʉ pora, nim nga mbi paka ronding. Uⱡ ei, nambuⱡ emel, nim nga uⱡ kun kai mbʉ, pena ila ekit omba pora ndurum,” nʉtʉng.   
\p
\v 5 Wote, ui ei kʉn, na moⱡʉp kundʉr mel, muⱡ ila Got nga manga wingti ou ei, kumba tilinga, Got elim manga wingti ila murum.  
\v 6 Anggelo 7 kat ndi, wamp etʉk kit munding, mbun kit 7 kat ambulk mek, muⱡ mbal eng nui rʉⱡang pi, kai mat ralk, kan gol mat pepil ombil mbila, kan rok pendʉk, Got nga manga wingti wak rok pena orung.  
\v 7 Wote, mel tʉmbʉkak kat kont mormin ni kʉⱡ nga ti ndi, ming gol 7 kʉⱡ tʉpa kʉn, anggelo 7 kʉⱡ ngurum. Ming 7 kʉⱡ ila, Got rʉk rʉk kont morum ei nga popʉⱡ mbʉ, peka ropa murum.  
\v 8 Got nga ronduⱡ mbʉ kʉn, rʉⱡang eng nui mbʉ kʉn, tetʉm ila ndip ikil mel, Got nga manga wingti ila peka ropa murum. Ei nga, wamp ti ndi kapⱡa, Got nga manga wingti ila mukʉr pi napʉmba mon! Anggelo 7 kʉⱡ nga mbun kit kat, mek orung ni kʉⱡ, kongun etʉk pora ndangina kʉn, wote wamp mbʉ, kapⱡa mukʉr ping.   
\c 16  
\s1 Got Nga Popʉⱡ Ming 7 Kʉⱡ  
\p
\v 1 Wote, na kum tep pit mel, Got nga manga wingti ila wamp ti ndi, wi ronduⱡ ropa, anggelo 7 kʉⱡ kundpa, nimba mel, “Got nga popʉⱡ ming 7 kʉⱡ, mek puk nʉi kona mbila, oi nduk mana ndʉi!” nitim.   
\p
\v 2 Wote, anggelo kuimbal ni ndi, elim nga ming ni, mʉi kona ila oi ndurum. Ni kʉn, wamp mat, mel rakra ei nga to tʉndʉk mim etʉng, mel ei mbi paka rondʉk, wote mel rakra ei nga tip timal ei, kʉng ila tʉtʉng wamp mbʉ nga kʉng mbila, iti mam mindil nui mat itim.   
\p
\v 3 Wote, anggelo ti ndi, elim nga ming ni, num kuta ila oi nduⱡnga kʉn, num kuta ni, wamp kui nga mema roⱡnga mel, num kuta ila oma na, mel kont murmin nimbʉ, kolk pora ndurʉng.   
\p
\v 4 Wote, anggelo 3 ni ndi, elim nga ming ni, nu mam na, nu pit na mbila, oi nduⱡnga mel nu mbʉ pora, mema rʉrʉm.  
\v 5 Na pit ei, nu mbʉ rup etʉm anggelo ei ndi, nimba mel, “Got nim unt murʉn, akup morʉn ku, nim Wu Wingti ei molkʉn, mint purʉn ei ndi, wamp mbʉ pora, kʉmp tin uⱡ ei, kun mint mba tetʉm.  
\v 6 Wamp mbʉ ndi, Got nim nga painui wu na, wamp wingti na mbʉ rok kondʉk, mema oi ndurʉng. Ei nga, nim ndi, wamp kit mbʉ, wamp mema kulk ngana, nuing uⱡ ei, uⱡ kit etʉng mbʉ mel, punt rokʉn ngun!” nitim.   
\p
\v 7 Wote, na pit mel, rat pol wingti ila ik ti, nimba mel, “Nuim Got Ronduⱡ Purum ei ndi, wamp mbʉ kʉmp tin uⱡ ei, kupa kun mint itin!” nitim.   
\p
\v 8 Wote, anggelo 4 ni ndi, elim nga ming ni, kona ant ila oi nduⱡnga kʉn, ant ndip mel ei ndi, wamp nomba kondʉmba.  
\v 9 Ant ei, nomba ronduⱡ minal puⱡnga, wamp mbʉ nurum ila, Got kʉn numan ropʉl rok, mbi ou ngʉng uⱡ ei kelik, aldpa uⱡ mbun kit mba nga ronduⱡ ei, Got kʉn tepa onum nʉk, Got kʉn ik mura etʉng.   
\p
\v 10 Wote, anggelo 5 ni ndi, elim nga ming ni, mel rakra ni nga rʉpʉndi pol ila oi ndurum. Ni kʉn, mel rakra ei nga morum kona ni, rumbʉⱡ roⱡnga kʉn, wamp mindil mam mat nok, gu mbʉ konggilik puk rorung.  
\v 11 Wamp mbʉ ndi, en enim nga kʉng iti etpa, mindil nok etʉng mbʉ nga, wote Got ik mura kit ngurung. Wote, en enim nga uⱡ kit etʉng mbʉ nga numan ropʉl rok, wak rui narʉrʉng.   
\p
\v 12 Wote, anggelo 6 ni ndi, elim nga ming ni, nu Yupretis mam ila, oi nduⱡnga mel, nu mam ni, kumbʉⱡpa kʉr nitim. Uⱡ ei ndi, wu nuim mumuk al ant oⱡa, ui unt nga molk, uing mbʉ nga nombuⱡa mam rundrum.  
\v 13 Wote, na moⱡʉp, kundʉr mel, muⱡnga kit raldika kat, rok mel ralk kʉn, wimbʉ mam na, mel rakra na, ik kol ropa painui wu mbʉ nga keta ila, ekit urum.  
\v 14 Muⱡnga kit mbʉ ndi, uⱡ rʉpʉndi elpa elpa mat etʉk kʉn, puk mʉi kona mbila, wu nuim mumuk mbʉ kʉn, kunt kan elingina kʉn, wu nuim mbʉ ndi, Got Ronduⱡ Purum ei nga ui mam ila, el iteing nimba, tʉpa mʉk rorung.   
\p
\v 15 “Enim pilʉi! Na kindʉp wamp mel uimp. Wamp nam ti, ur pi napʉpa, elim nga rʉl mel mbʉ, tʉpa kun etpa raⱡpa moⱡum wamp mbʉ, ambulk palk muⱡing. Wamp nam ti, mel mbʉ ruⱡi naⱡʉpa wei gi go wamp moⱡung ila undi nandʉmba!” nitim.   
\p
\v 16 Wote, muⱡnga kit mbʉ ndi, wu nuim mumuk mbʉ, kunt kan etʉk mek ok, Ipru ik ila kona ti mbi tek, Amaketon, nʉtmin kona ila, tʉk mou rorung.   
\p
\v 17 Wote, anggelo 7 ni ndi, elim nga ming ni, kona kʉpkʉ nila, oi nduⱡnga mel, Got nga manga wingti ila mukʉr wamp ti ndi, ronduⱡ wi ropa, nimba mel, “Got nga popʉⱡ ei kʉn, mbun kit mbʉ kʉn pora ninim,” nitim.  
\v 18 Ni kʉn, kona nimbʉ, kʉmp kiraipa minal elinga, kona kʉmp muⱡ ropa, muⱡ gaⱡa nimba kilimbʉmp mam ti itim. Etʉm uⱡ ei, Got ndi, unt muⱡ mʉi raⱡ iti nʉti kʉn, kilimbʉmp iti nʉtʉtʉm mel itim.  
\v 19 Wote, kona peng ou ni, oi ndupa raldika inditim. I elingina, mʉi kona mbila, kona peng tetʉm mbʉ pora, ropa kit mundrum. Ni kʉn, Got ndi, kona peng ou Bapilon ni, pilpa moⱡpa, elim popʉⱡ mam ti mundrum, wain ming ni oi ndurum. Uⱡ ei, Got elim nga popʉⱡ mam ila itim.  
\v 20 Ei kʉn, nu muⱡ kuimp titim mbʉ pora, wei ai itim. Wote, komnga mong titim mbʉ pora, i ku itim.  
\v 21 Wote kona kup mong mam ndo ni mat, 45 kilo mel, wi muⱡ ila mana omba kʉn, wamp mbʉ ropa kit mundrum. Nambuⱡ emel, Got ndi, uⱡ itim ei nga wamp mbʉ ndi, Got kʉn ik mura kit mat tetʉng.   
\c 17  
\s1 Bapilon Kona Ou Ei, Amp Wapra Mel  
\p
\v 1 Wote, anggelo 7 kʉⱡ nga ming 7 ambulk mormin kʉⱡ nga ti ndi omba, na kundpa, nimba mel, “Nim ya ila ui! Amp wapra mbi purum ni, nu mam mbila nga oⱡa orunga ila morum ei, kit moⱡmba enim uⱡ ei, nim tʉp ora ndamp ui!  
\v 2 Mʉi kona mbila, wu nuim mumuk na, wamp mbʉ ndi pora, amp wapra ei kʉn, wapra rok etmin. Uⱡ ei ndi, wamp mbʉ ropa wʉlʉ munduⱡnga nu wain na mat nok, numan mbo pili napilik andurmin, ei mel etmin,” nitim.   
\p
\v 3 Wote, Muⱡnga Wingti ei ndi, na etpa ronduⱡ mundpa kʉn, mepa mba kona kui waka tila purum. Kona ila na mbo kʉndʉr mel, amp ti, mel rakra kunt ti nga murum. Mel rakra kunt ei nga kʉng mbila, mbi elpa elpa mat morum mbʉ ndi, Got kʉn nimba kit mondpa murum. Mel rakra kunt ei nga peng 7 anggilpa, kom 10 ʉnggʉtʉm.  
\v 4 Amp wapra ni, muⱡ kunt ti kʉn, muⱡ kung ti kʉn, paⱡpa gol ndi, mim etʉng mel mat kʉn, tʉtpal ronduⱡ mat kʉn, ku eng nui mat kʉn, paⱡpa murum. Gol ming ti, ki orunga ambuⱡpa morum ila, Got nga kuimp keta ila, uⱡ kit gar mul etmin mbʉ kʉn, amp ei kʉn wapra rok, uⱡ kit etmin mbʉ kʉn, ming ila peka ropa morum.  
\v 5 Amp wapra ni nga mʉi ombil ila, mon rok mondʉk kʉn, ik ek rok, nʉk mel, “Wapra rui uⱡ mbʉ nga, Bapilon Kona Ou ei, kona mam ei tetʉm,” nʉtʉng.   
\s1 Kona Peng Ou Bapilon Ei Wapra Mʉi Kona  
\p
\v 6 Wote, na kʉndʉr mel, amp ei ndi, Got nga wamp mbʉ kʉn, wote Jisas kʉn rʉk rʉk mondʉk pilik etmin wamp mbʉ, ropa kundrum. Amp ei ndi, wamp mbʉ nga mema mbʉ, kuⱡpa noⱡnga kʉn, amp ei wʉlʉ purum. Uⱡ ei, na kandʉp kʉn, rut nʉmp, numan ou ndup pit.   
\p
\v 7 Wote, anggelo ei ndi, na kundpa nimba mel, “Nambuⱡ emel, nim numan ou ndukʉn pilkʉn morʉn? Mel rakra ei nga peng 7 anggilpa, kom 10 anggilpa etʉm ei ndi, amp wapra ei mepa purum. Uⱡ ei nga puⱡ ei, mo ropa tetʉm ei, na ndi, nim kundʉp namp.  
\v 8 Nim ndi, mel rakra unt kont moⱡnga, kundrʉn ni, akup muⱡi nambʉⱡʉmba. Wote, mʉi ila kut kepa mba, pora ni nandʉtʉm kut ila, oⱡa omba kʉn, wote kit moⱡmba ei nga mba enim. Got ndi, unt muⱡ mʉi raⱡ iti nʉti kʉn, mʉi kona wamp mbʉ nga mbi mat, Got nga Buk Wingti ila ropa mundi nʉmʉndrʉm. Wamp mbʉ ndi, mel rakra ei kandʉk, min ngʉn munding. Ei nambuⱡ emel, mel rakra ei, unt murum, akup muⱡi nambrʉm, wote aldpa oⱡa wangga kʉning.   
\p
\v 9 “Wamp nam ti ndi, pilpa kungʉndi kai pem ei ndi, uⱡ puⱡ mbʉ, pilpa mbi ndumba. Mel rakra ei nga, peng 7 kʉⱡ mel to rondpa kʉn, komnga 7 kʉⱡ. Amp wapra ei, komnga mong 7 kʉⱡ ila, oⱡa morum ei, wu nuim mumuk 7 kʉⱡ mormin.  
\v 10 Wu nuim mumuk 5 kʉⱡ korung. Tenda ti akup morum. Wu ti, nuim mumuk muⱡi nʉmbʉⱡi kokila, wote oⱡa omba nuim mumuk onunga koⱡ moⱡpa kʉn, wote pora nimba.  
\v 11 Mel rakra ti unt murum, wote akup muⱡi nambʉrʉm. Unt wu nuim mumuk 7 kʉⱡ nga 8 ei, el elim wote kit moⱡmba, ei nga mba.   
\p
\v 12 “Nim ndi, kom 10 kat kʉndrʉn ni kʉⱡ, to rondpa kʉn, wu nuim mumuk 10 kʉⱡ, wamp rʉp iti uⱡ ei nga, oⱡa ui nawʉrʉng. Wote wu kʉⱡ, mel rakra ei nga ronduⱡ mbʉ tʉkʉn, ant mong tenda ila mint, mel rakra ei kʉn kunda, nuim mumuk muⱡing. Wote muⱡi nʉmbʉⱡing, mon!  
\v 13 Wu nuim mumuk 10 kʉⱡ, numan tenda mint pilik, en enim mbi ou tʉk, wamp rʉp iti uⱡ ei nga ronduⱡ ei, mel rakra ei nguing.  
\v 14 Wu mbʉ kʉn, mel rakra ei kʉn kunda molk, Kng Sipsip Waⱡ ei kʉn el iting. Wote, Sipsip Waⱡ ei ndi, wu mbʉ kʉn, mel rakra ei kʉn, ropa mana ndumba. Wu Nuim Mumuk mbʉ nga wu nuim mumuk oⱡa orung ei, Nuim mbʉ nga pora nuim oⱡa orung ei. Wamp mat elim ndi, kʉmp ropa, wi ropa rukʉr tilinga, elim nga ik ei, rʉk rʉk pep rok iting mbʉ, Sipsip Waⱡ ei kʉn kunda molk, mel rakra ei kʉn el iting,” nitim.  
\v 15 Wote, anggelo ei ndi, na kundpa, nimba mel, “Nim kan uⱡ ei, amp wapra ti, nu mam ila oⱡa morum. Uⱡ ei ndi, to ropa, wamp mʉi kʉmp elpa elpa, wamp kʉng elpa elpa ti mat kʉn, ik elpa elpa ni mbʉ nga minal morung.  
\v 16 Wote, mel rakra kom 10 mul kat kʉndrʉn kʉⱡ, amp wapra ei kʉn, el puⱡa wamp mormin. Amp wapra ei, rok kit mondʉk, wal pʉki na mel mbʉ, tʉk mundʉk kelik, kʉng mint mbʉ tʉk nok, ombil mbʉ ndip kalk iting.  
\v 17 Got elim nga numan mbo ei, wu nuim mumuk 10 kʉⱡ nga pilpa kungʉndi ila nguⱡnga kʉn, Got ndi, pitim uⱡ ei mel iting. Ei kʉn, wu nuim mumuk 10 kʉⱡ, numan tenda pangga kʉn, en enim nga wamp rʉp it. Uⱡ ei nga ronduⱡ ei, mel rakra ei ngangina, tepa muⱡangga mba, Got nga ik nitim mbʉ omba kupa etmba.  
\v 18 Nim ndi, amp wapra kʉndrʉn ei, to ropa kʉn, mʉi kona ila kona peng ou ti, wu nuim mumuk mormin mbʉ nokundrum uⱡ ei mel,” nitim.   
\c 18  
\s1 Bapilon Kona Peng Ou Ni Kit Murum.  
\p
\v 1 Wote, ui ei kʉn, na kandʉr mel, anggelo ti, muⱡ kona wak ropa, mʉi kona ila mana urum. Anggelo ei nga ronduⱡ mam ti mepa, elim nga kʉng ila rʉⱡang puⱡnga kʉn, mʉi kona ila rʉⱡang mam ti ngurum.  
\v 2 Wote, anggelo ni ndi, ronduⱡ ke nimba wi ropa nimba mel, “Kona peng ou Bapilon ni kit moⱡpa, uⱡ mbuⱡ nimba mana purum. Kona ni, muⱡnga kit mbʉ kʉn, uⱡ ⱡar mul kit mbʉ kʉn, kui kit elpa elpa mbʉ kʉn, kona ou ila peka rok muⱡing.  
\v 3 Uⱡ ei, nambuⱡ emel, wamp mbʉ ndi pora, kona peng ei, wapra amp mel randʉk, nu wain ronduⱡ mat nok, wote mʉi kona wu nuim mumuk mbʉ ndi, kona peng ei wapra amp mel randʉk. Kongun etʉk, ku moni puⱡi ambulk etmin uⱡ ei ndi, uⱡ kit mbʉ nga pipil kuⱡi nalk etmin,” nitim.   
\p
\v 4 Wote, na pit mel, wi muⱡ ila ik ti ku ndi wi ropa, nimba mel, “Enim na nga wamp mbʉ ye! Kona peng ou ei, wak rok kelik, ok ekit pʉi! Enim wamp mbʉ kona peng ei kʉn, rʉp rok molk, uⱡ kit mbʉ iting uⱡ ei mon!  
\v 5 Kona peng ou ei nga uⱡ kit mbʉ moⱡpa, oⱡa omba wi muⱡ kona punum. Kona peng ou ei nga uⱡ kit mbʉ, Got ndi, pilpa uⱡ mat etmba enim.   
\p
\v 6 Amp wapra ei enim kʉn, uⱡ kit etʉm ei mel mendpʉⱡ, elim kʉn punt rok ngui! Amp ei, elim kʉn, punt rok ngʉk kʉn, mbuⱡ ila raⱡ etʉk pendʉk ngʉi!! Amp ei, elim nga nu ming ila, enim ndi, punt rok, nu ronduⱡ pi, enim ngurum ei mel ngok, wote mbuⱡ ila nu ei, etʉk ronduⱡ minal endʉk raⱡ indʉi!   
\p
\v 7 Amp wapra ei mel minal tepa, elim nga kʉng orunga mepa oⱡa mba, ambuⱡpa paⱡpa murum. Elim nga uⱡ kit etʉm ila, enim ndi, punt rok mindil mat minal ngangina kʉn, ka rom ropa itangga. Amp wapra ei ndi, nimba mel, ‘Na amp nuim mumuk ei, wamp nuim mbʉ nga nde pol ila mor. Na amp wiya ti mon! Mbun mindil mbʉ, na kʉn ui nawʉrʉm ama mon!’ nitim.  
\v 8 Uⱡ ei nga, uⱡ kit elpa elpa mat, rumbʉⱡ tenda ila elim kʉn omba. Kui puⱡi omba, kona kump kun puⱡi tepa tangga kʉn, wamp puⱡi ka etʉk mindil nuing. Kona peng ou Bapilon ei, ndip ndi nomba pora ndumba. Ei nambuⱡ emel, Nuim Got ronduⱡ minal pi ei ndi, kona peng ou Bapilon ei, kit muⱡangga nitim ei mel etmba,” nitim.   
\p
\v 9 Mʉi kona ila wu nuim mumuk mbʉ ndi, amp wapra ei kʉn, wapra rok uⱡ kit minal etʉng mbʉ ndi, kona peng ou ei, ndip nomba ikil oⱡa wangga kandʉk kʉn, ka rom rok muⱡing.  
\v 10 Ei kʉn, kona peng ou ei, mindil tʉm uⱡ mbʉ, wu nuim mumuk mbʉ ndi kandʉk, ruⱡ etʉk molk, nʉk mel, “Nim Bapilon kona peng mam peng ronduⱡ ni, ant tenda ila uⱡ kit mbʉ nga, nim etʉn ei nga, ndip nonum ei, ka nʉk kont kuⱡing,” nʉtʉng.   
\p
\v 11 Mʉi kona mbila wu mel pi mbʉ ndi, kona peng ou ei, ndip nom uⱡ ei kandʉk, mbun tʉk ka iting. Ei nambuⱡ emel, en enim nga mel tetmʉn mbʉ, rarʉp rok ting wamp ti mon!  
\v 12-13 Rʉng rarʉp ruing ninmʉn mbʉ, ku gol na, silpa na, ku eng nui kai na, tʉtpal ronduⱡ na, muⱡ mbal kurʉmʉⱡa eng nui kai na, muⱡ mbal kunt elpa elpa mbʉ kʉn, nde ronduⱡ mura rui mat kʉn, kng elepant gu mbila, mim etmin mel mbʉ kʉn, nde mat ku moni ou ndupa purum mbʉ kʉn, bras na, ain na, ku mon rui mbʉ kʉn, mel mat kunda ku, nde kʉng mura rui na, kupna na, paura mura kai rui na, kopung mura rui ronduⱡ kai na, kopung na, wain na, plawa na, wit na, kng kau na, sipsip na, kng os na, wil kar na, kongun kindmant wamp na, kont mormin wamp mbʉ pora, rarʉp rok ting kona ti mon!   
\p
\v 14 Wote, wu mel pi mbʉ ndi, nʉk mel, “Nim nga numan ei ndi, mel mat timp nʉtʉn mbʉ, mba wei ai enim. Nim nga mel eng nui kai ku moni ou ndupa mba etʉm mel mbʉ, ndip nomba pora ndumba, wote kandkʉn ti nʉtʉn,” nʉtʉng.  
\v 15 Bapilon kona peng ila wu mel pi mbʉ ndi, kongun etʉk, ku moni ou nduk tʉk etmin mbʉ ndi, kona peng ei, ndip nangga kandʉk, mundmong etʉk kʉn, ruⱡ etʉk molk mbun mindil mbʉ, tʉk ka etʉk kont kulk muⱡing.  
\v 16 Wamp mbʉ ndi, nʉk mel, “Bapilon kona peng ei kandʉk, kont enim ei, ka nʉk muⱡing. Unt kona peng ei, wal pʉki kurʉmʉⱡa eng nui kai na, muⱡ mbal kunt elpa elpa mat kʉn, gol na, ku ronduⱡ mat kʉn, tʉtpal na mel ronduⱡ mat ndi, kona peng ei ou ndupa titim. Akup ndip nonum uⱡ ei nga kont enim.  
\v 17 Bapilon kona peng ei, ant mong tenda ila mint, ku moni na mel ronduⱡ mbʉ pora, ndip nurum,” nitim. Nu sip nga ambuⱡpa tʉpa kun etʉm rʉp wu na, sip ila wu mat puk kona peng mat ila andʉk etmin na, sip ila kongun tʉk rapʉndʉk etmin wu na, num kuta ila andʉk ku titmin wu mbʉ pora, Bapilon kona peng ila ruⱡ etʉk, kandʉk muⱡing.  
\v 18 Wote, wamp mbʉ ndi, ndip nomba ikil oⱡa oⱡnga kandʉk, nʉk mel, “Bapilon kona peng mam ni, ndip nomba pora ndunʉm ei ka! Wote, kona peng nam ti, Bapilon kona peng ei mel temba nda?” nʉtʉng.  
\v 19 Wote, wamp nimbʉ ndi, ui pakʉk kont kulk, ka etʉk, nʉk mel, “Bapilon kona peng ei nga kont mam ti, enim nʉk morung. Wu mel pi mbʉ ndi, num kuta ila nu sip mek andʉk, ku moni puⱡi kona peng ila tʉk etmin wu mbʉ ndi, en enim kont enim nʉk morung. Ant mong tenda ila Bapilon kona peng ei, ndip nomba pora ndurum.  
\v 20 Wote, enim Got nga muⱡ kona wamp na, painui wamp na, nombuⱡa rung wamp na mbʉ, akup Bapilon kona peng ei, uⱡ enim ei nga ambulk palk muⱡʉi! Nambuⱡ emel, Got ndi, kona peng ei nga uⱡ kit mat, enim kʉn itim mbʉ, kʉmp tʉpa punt ronum,” nʉtʉng.   
\p
\v 21 Ni kʉn, ik ni nimba pora nduⱡnga kʉn, wote anggelo ronduⱡ ti ndi, ku mam wit kʉiya rok tʉmin ni mel ti tʉpa, num kuta ila ropa mana ndupa, nimba mel, “Ku mam ei, rop mana mundunt uⱡ ei mel etʉk, Bapilon kona peng ronduⱡ rok mundangina, mba nu ila mana pangga kʉn, wote wamp mbʉ ndi, kʉni nʉkʉning.  
\v 22 Uⱡ ei nga, Bapilon kona peng ila ruk, gita na, pikul na, kowa pela ming ik ni na, kinan kai mat nʉk etmin mbʉ, kapⱡa pi nʉpiling. Wamp mat kongun iting mbʉ nga man ik tʉk pora nduk etʉng wamp mbʉ kʉn, ku mam wit kʉiya rok etmin mel mbʉ, Bapilon kona peng ila ruk tepa, ik nimba iti natʉmba mon!  
\v 23 Wote, lam kiya nomba rʉⱡang mba etʉm ei pora nitim. Wote, wu amp tʉk amp wu nguk iting ik nʉk etmin mbʉ, kona peng ila rukrʉng pi nʉpiling. Unt wu mel pi mbʉ ndi, wu nuim mel molk, kona peng ila wamp nga kuimp keta ila etʉng. Wote nim ndi, ik kol rokʉn wamp mbʉ kʉn, uⱡ kit mat itʉn ku.  
\v 24 Mʉi kona mbila el puⱡa wamp mbʉ ndi, wamp mat pora rok kondrung. Uⱡ mbʉ nga puⱡ ei, Bapilon kona peng ila mint pitim. Bapilon kona peng ou ni pora nilinga, wote painui wu na, Got nga wamp mbʉ nga mema oi ndurum,” nitim.   
\c 19  
\s1 Muⱡ Kona Ila, Wamp Mbʉ Molk, Got Nga Mbi Paka Rondrʉng  
\p
\v 1 Wote, ui ei kʉn, na kum tep pit mel, wi muⱡ ila wamp puⱡi molk, wi ronduⱡ rok, nʉk mel, “Tʉn ndi, Got nga mbi paka rundamʉn! Wamp Etpa Ti Uⱡ, uⱡ rʉpʉndi mbʉ nga puⱡ wu, wote uⱡ ronduⱡ pi mbʉ pora, tʉn nga Got ei kʉn puⱡ petʉm.  
\v 2 Got ndi, ik kupa ei kʉn, nombuⱡa mam kun ila wamp kʉmp tʉtʉm. Amp wapra mbi purum ei ndi, mʉi kona wamp mbʉ pora, etpa kit mondrum. Uⱡ ila, Got ndi, amp ei, ropa ndip kʉrʉm. Amp wapra ei ndi, Got nga kongun wamp mbʉ, ropa kundrum uⱡ ⱡawa ila, Got ndi, punt ropa pora ndurum.” nʉtʉng.  
\v 3 Ni kʉn, aldpa wi muⱡ ila wamp nimbʉ ndi wi rok, nʉk mel, “Tʉn Got nga mbi paka rundamʉn! Kona peng ou ndip nonum ei nga ikil enim ei, rʉk rʉk oⱡa mint pangga!” nʉtʉng.   
\p
\v 4 Wote, rʉp wu 24 ni kʉⱡ kʉn, mel tʉmbʉkak kat, kont mormin ni kʉⱡ kʉn kunda, Got nga rʉpʉndi pol ila morum ei nga kuimp keta ila rumʉⱡi pek, mbi paka rondʉk, nʉk mel, “Tʉn Got nga mbi paka rundamʉn! Ei kupa,” nʉtʉng.   
\p
\v 5 Wote, Got nga rʉpʉndi pol ila nga wamp ti ndi, wi ropa, nimba mel, “Enim Got nga kongun wamp mbʉ, Got kʉn mundmong itʉi! Enim wamp kurpa na, nuim na mbʉ pora, tʉn nga Got nga mbi paka rundʉi!” nitim.   
\s1 Sipsip Waⱡ Ei Amp Tʉmba Elinga, Rʉng Mam Mat Oⱡa Urum  
\p
\v 6 Na kum tep pit mel, wamp puⱡi mʉk rok molk, ik nʉtmʉn uⱡ ei mel nʉnmʉn. Nu ndi ropa, ik nʉtʉm uⱡ ei mel nitim. Kona muⱡ gaⱡa nimba enim. Uⱡ mbʉ etpa nʉk mel, “Tʉn Got nga mbi paka rundamʉn kʉn, Nuim tʉn nga Got Ronduⱡ Purum ei, akup Nuim Mumuk muⱡangga!  
\v 7 Tʉn akup ambuⱡpa paⱡpʉn numan kai pilpʉn, Got elim nga mbi paka rondpʉn i tʉmin. Ni kʉn, Sipsip Waⱡ ei nga amp tʉmba ui ei, nondpa oⱡnga kʉn, amp tʉmba ei nga, tʉpa kun etpa morum.  
\v 8 Got ndi, amp ei, wal pʉki kurmʉⱡa eng nui kai kat, amp ei pʉkangga nimba ngurum. Wal pʉki kʉⱡ, eng nomba rʉⱡang mba etʉm kʉⱡ. Wal pʉki kurmʉⱡa eng nui kai kʉⱡ to tʉndpa mel, Got nga uⱡ kun kai mbʉ, pep rok etmin wamp kʉⱡ,” nʉtʉng.   
\p
\v 9 Wote, anggelo ti ndi, na kundpa nimba mel, “Nim ndi, ik nʉnt ei mel, mon rui! ‘Sipsip Waⱡ ei nga amp tʉmba kona ila rʉng nuing wamp mbʉ Got ndi, wi rangga uing wamp mbʉ, numan kai pilik muⱡing,’” nitim. Wote, na kundpa nimba mel, “Ik ei, Got nga ik kupa mendpʉⱡ ei!” nitim.   
\p
\v 10 Wote na ndi, anggelo ei nga kʉmp puⱡ ila mura rop mondʉp, mbi paka rundimp nʉmp elimba mel, wote anggelo ei ndi, na kundpa, nimba mel, “Nim ndi, uⱡ ei mel iti nʉti mon! Na nim nga kongun wu ei, wote nim nga ʉngʉnʉl mbʉ nga kunda kongun endʉt. Enim ndi, Jisas nga mbi paka rondʉk mondʉk pilik itʉi! Tʉn ndi, Got tenda ei nga mint, elim nga mbi paka rundmʉn. Tʉn pʉtmʉn uⱡ ei, Muⱡnga Wingti ei ndi, wamp mat muⱡnga nguⱡnga kʉn, pai nok wamp ik mbo endʉtmin,” nitim.   
\s1 Wu Ti Kng Os Kurʉmʉⱡa Mbuⱡ Ila Murum  
\p
\v 11 Wi muⱡ ei, kumba tilinga, kng os kurmʉⱡa ti kʉndʉr. Wu ti, kng os mbuⱡ ming ila morum ei nga mbi tek, ei mel nitmin. Wu ei ndi, kongun mbʉ rʉp Etpa Kai Mondpa, Uⱡ Kupa mbʉ mint etpa. Wote wamp mbʉ, kʉmp tʉtʉm uⱡ ei, rʉk rʉk uⱡ kun kai mbila mint pilpa el rorum.  
\v 12 Wu ei nga mong raⱡ, ndip mel nomba rʉⱡang purum ila, wu nuim mumuk mbʉ nga wʉna mondurmin ei nga puⱡi, elim nga peng ila mundrum. Wu ei nga kʉng ila mbi ti rok mondrung ei, elim mint pʉtʉm. Wamp elpa mbʉ ndi, mbi ei pili napʉtmin mon!  
\v 13 Elim nga wal pʉki roⱡ pʉkrʉm kʉⱡ mema ndi, ⱡumʉi rurum kʉⱡ mbi tek, Got Nga Ik, ei nʉtmin.  
\v 14 Muⱡ kona ila el wu mbʉ, kng os kurʉmʉⱡa mbuⱡ ila molk, wu ei, pep rok akil tek purung. Wu mbʉ nga kʉng mbila, wal pʉki kurmʉⱡa eng nui kai mat, pakʉk purung.  
\v 15 Wote, koiya rukʉm mul ti, wu kuimbal purum ei nga keta ila ekit omba kʉn, mʉi kona wamp mbʉ pora, koiya ruⱡ ei ndi, ropa int pendʉmba. Got nga ronduⱡ ei, tʉmbʉⱡ mel ambuⱡpa moⱡpa, wamp mbʉ rʉp etmba. Wote, wain mong mbʉ, kambilik nim nim nduⱡmina, wain nu ei, tʉk nimba ekit orung ni mel, Got Ronduⱡ Purum ei nga popʉⱡ ei, i ku etmba.  
\v 16 Wu ei nga wal pʉki roⱡ na, kʉmp mbʉⱡaimp na mbila, elim nga mbi ei, mon rok mondrung ei ndi, nimba mel, “Wu nuim mumuk mbʉ nga Wu Nuim Mumuk ei, wote wu nuim mbʉ nga Wu Nuim ei morum!” nitim.   
\p
\v 17 Wote, na moⱡʉp kʉndʉr mel, anggelo ti, kona ant ila oⱡa morum ei ndi, wi ronduⱡ ropa, nimba mel, “Oⱡa waka ila kʉi mbʉr nʉk andʉrmʉn mbʉ kundpa, Got nga rʉng mam ila ning wʉi!  
\v 18 Wu nuim mumuk mbʉ nga kʉng na, el wu nuim na, el wu na, kng os na, kng os mbuⱡ ila mormin wu na, kindmant kongun wu na, wote wu mat roldʉnga mormin wu na, wu kurpa na, wote wu nuim na mbʉ nga pora, kʉng mint mbʉ ok, ning wʉi!” nitim.   
\p
\v 19 Wote, na kʉndʉr ei, mel rakra ni kʉn, mʉi kona wu nuim mumuk mbʉ kʉn, en enim nga el wu na mbʉ kunda ok, mʉk rok pora ndurʉng. Wu mbʉ ndi, kng os ila murum wu ei kʉn, elim nga el wu mbʉ kʉn, el iting pilik ok morung.  
\v 20 Wote, wu ei ndi, ik kol painui wu ni kʉn, mel rakra ni kʉn kunda, tʉpa kan ngurum. Ik kol painui wu ni ndi, mel rakra nga kuimp keta ila itim. Uⱡ rʉpndi mat kol ropa wamp mat, mel rakra ei nga tip timal tʉtʉng mbʉ kʉn, wote mel rakra ei nga to tʉndʉk mim etʉng mel ei nga, mbi paka rondʉk etʉng wamp mbʉ, uⱡ rʉpndi kol mbʉ ndi, tʉpa tiki pundrum. Wote, mel rakra ni kʉn, ik kol painui wu ni kʉn, kont mondʉk tʉk, ku salpa ila nip mam ti, nomba kondpa guk nimba murum ila, tʉk mana ndurʉng mbʉ kʉn, kng owa rakra na, mel raⱡ akup kont morum mbila mint. Mel raⱡ rok tʉk, ndip mam ti nomba, ku salpa kʉn kondpa petʉm kut ila mana ndurʉng.  
\v 21 Wu ti, kng os ila oⱡa murum wu ni nga koiya rukʉm mul ti, keta ila ekit orum ni ndi, mel rakra ei nga wamp mbʉ, ropa konduⱡnga kʉn, kʉi mbʉ ndi ruk ok, wamp mbʉ nga kʉng mint mbʉ, nok pilʉng kondrung.   
\c 20  
\s1 Seitan Ni, Kan Manga Pelinga Pana 1,000 Enim  
\p
\v 1 Wote, na kʉndʉr mel, anggelo ti, muⱡ kona wak ropa mana urum ei ndi, mʉi ila kut tepa mint purum ei nga ki ei kʉn, kan sen mam kat kʉn, ambuⱡpa mepa urum.  
\v 2 Anggelo ei ndi, wimbʉ mam ti tʉpa, imp moⱡpa, tepa morum ei, unt kor nga murum ei, wimbʉ ei nga mbi ei, Seitan. Ni kʉn, anggelo ei ndi, wimbʉ ni, pana 1,000 kan manga ila piyangga nimba, tʉpa kan ngurum.  
\v 3 Wote, anggelo ni ndi, Seitan ropa tʉpa, kut mam ila mana ndupa pendpa, kumba ropa gi ndurum. Ei nambuⱡ emel, Seitan ndi, aldpa wamp mbʉ kʉn andpa, ik kol rui narʉpa, kan manga ila piyangga, pana 1,000 omba pangga nimba itim. Wote, pana kʉⱡ omba pangga kʉn, kan tinga nduk mundangina kʉn, ui onunga kot ila ekit omba, wamp mbʉ kʉn, kona mbila andʉmba.  
\v 4 Wote, na kʉndʉr mel, wu nuim mbʉ nga rʉpʉndi pol mat tetʉm ila, wu mat morung. Got ndi, wu kʉⱡ wamp kʉmp ti, uⱡ ei nga ronduⱡ ngurum. Wote, na kʉndʉr mel, wamp minal Jisas mondʉk pilik, mbi paka rondʉk, Got nga ik ei, ronduⱡ ambʉⱡʉngina, el rui wamp mbʉ ndi rok, nuim kan puⱡa rorung mbʉ nga min mbʉ kʉndʉr. Wamp mbʉ ndi, mel rakra ei kep, mel rakra ei nga to tʉndʉk mim etʉng mel ei, mbi paka rundi nandrʉng. Wote, mel rakra ei nga tip timal ei, en enim nga mʉi ombʉl na, ki na mbila kep, ti natʉtʉng ku. Wamp mbʉ, ⱡoprʉk kont molk, Kraist kʉn rʉp rok, pana 1000 wu nuim mumuk ralk morum.  
\v 5 Wamp ⱡoprʉk kont mul uⱡ ei, wamp kʉⱡ ndi, kuimp tek etʉng. (Wote, wamp wei mat unt korung nimbʉ, pana 1000 omba puⱡnga kʉn, ⱡoprʉk kont morung.)  
\v 6 Wamp namin kat kuimp tek ⱡoprʉk kont morung wamp kʉⱡ memp kai mbʉ tʉk, wingti ralk muⱡeing. Wote wamp ndip kona ila puk kormʉn ei nga ronduⱡ ei ndi, wamp rʉⱡaip kʉⱡ ʉmbʉⱡi nambuⱡmba mon! Wamp kʉⱡ Got kʉn Kraist raⱡ nga pris rʉⱡaip kʉⱡ molk, Kraist elim kʉn wamp rʉp itangina, pana 1000 omba mba.   
\s1 Seitan Ni, Ndip Kona Ila Mindil Nonum  
\p
\v 7 Wote, pana 1,000 ei omba pangga kʉn, kut kumba ei, tʉk mundangina, Seitan ni, kan manga wak ropa omba mba.  
\v 8 Seitan ndi, andpa mʉi kona mbila wamp mbʉ kʉn, ik kol ropa kongun etmba uⱡ ei, Gok kʉn, Meikok kona raⱡ nga wamp rʉⱡaip mbʉ kʉn etmba. Nu ʉldʉ ila ku ok minal tetʉm ni mel, wamp rʉⱡaip minal ei, i iteing nimba Seitan ndi, tʉpa tenda etmba.  
\v 9 Ei kʉn, wamp rʉⱡaip minal mbʉ ndi, Got nga kona peng numan ngurum ei kʉn, elim nga wamp mbʉ kunda, tʉk pok etʉk muⱡʉngina, wi muⱡ ila ndip ti mana omba kʉn, wamp mbʉ nomba pora ndurum.  
\v 10 Ni kʉn, wamp mbʉ, ik kol ropa ngurum Seitan ei, Got ndi, ropa tʉpa, ndip kut mam ku salpa nomba, kondpa morum ila mana ndurum. Kona ila, mel rakra ni kʉn, ik kol painui wu ei kʉn kunda, ndip ila unt ropa mundrum. Wote, mel raldika kʉⱡ, rumbuldi rʉnggilmʉ raⱡ, rʉk rʉk mindil nok mint muⱡing.   
\s1 Wamp Kʉmp Tʉmba Ui Ei Ekit Omba  
\p
\v 11 Wote, na kʉndʉr mel, rʉpʉndi pol kurʉmʉⱡa mam ti titim ila wamp ti murum. Ni kʉn, wu ei nga kuimp keta ila muⱡ mʉi raⱡ wei ai etʉnggil muⱡʉnggil kona ti, ti nʉtʉtʉm.  
\v 12 Ni kʉn, na kʉndʉr mel, wamp nuim na, kurpa na, korung nimbʉ pora, rʉpʉndi pol titim ei nga, kuimp keta ila anggʉtʉng. Ei kʉn, buk titim nimbʉ, kumba tʉtʉng. Wote buk ti, wamp kont mul buk ni kumba tʉtʉng. Ni kʉn, wamp korung nimbʉ, en enim nga uⱡ etʉng mbʉ mel, buk ila mbi rok mana ndurʉng ei mel, kʉmp titim.  
\v 13 Ni kʉn, num kuta ei ndi, wamp kuⱡi mormin mbʉ pora, yant ndupa ngurum. Wote wamp kʉmp titim wu ei ndi, wamp mbʉ nga pora, uⱡ etʉng mbʉ mel, pilpa kʉmp titim.  
\v 14 Ei kʉn, wamp kuⱡi uⱡ ei ndi, wamp tepa morum mbʉ mepa omba ngurum. Wote wamp kuⱡi mbʉ mormin kona ei ndi, i ku etpa, elim nga tepa morum wamp mbʉ mepa omba ngurum.  
\v 15 Ni kʉn, rʉk rʉk kont mba mul buk ila mbi muⱡi nʉmbrʉm wamp ei, ndip mam ei nga kut ila, tʉpa mana ndurum.   
\c 21  
\s1 Muⱡ Mʉi Kont Raⱡ  
\p
\v 1 Wote, na kundʉr ei, muⱡ kona kont ei kʉn, mʉi kont ei kʉn, ekit orʉnggil. Ni kʉn, mul kona unt nga ei kʉn mʉi kona unt nga ei kʉn, wei ai etʉnggil. Wote num kuta ei muⱡi nʉmbrʉm.  
\v 2 Ni kʉn, Got nga Kona Peng Wingti Jerusalem kont ei, na kʉndʉr. Kona peng Jerusalem ei, Got kʉn tepa, wote muⱡ kona wak ropa mana urum. Kona peng ou ei, amp wendʉp na ti, wu manga mba pilpa kʉn, kʉng orunga moke etʉm uⱡ ei mel itim.  
\v 3 Wote, na kum tep pit mel, Got nga rʉpʉndi pol ila, wi ti, ronduⱡ urum ei ndi, nimba mel, “Enim akup pilʉi! Got nga moⱡmba kona ei, akup wamp mbʉ nga ruk ting ila tetʉm. Got elim wamp mbʉ kʉn, pepa muⱡangga kʉn, wote wamp mbʉ, elim nga wamp muⱡing. Got elim wamp mbʉ kʉn muⱡangga, wote elim, wamp mbʉ nga Got ei moⱡmba.  
\v 4 Wamp mbʉ nga mong mbila, ka nu mana mbʉ, Got ndi, kil ngumba. Ei kʉn, wamp kuⱡi uⱡ ei kʉn, mbun mindil orum tʉk, ka iti uⱡ mbʉ pora nimba. Uⱡ unt nga mbʉ, pora nimba, wote ti natʉmba,” nitim.   
\p
\v 5 Wamp ti, rʉpʉndi pol ila murum ni ndi, nimba mel, “Nim pili! Na ndi, mel mbʉ pora, kont nga mim ent. Nim ndi, na nga ik nʉnt ei, mon rokʉn pindi! Nambuⱡ emel, ik ei ama kupa mint! Ik ei, wamp mbʉ ndi pora, mondʉk piling!” nitim.   
\p
\v 6 Wote, wu ni ndi, na kundpa, nimba mel, “Mel mbʉ pora, etʉp pora ndʉnt. Mel mbʉ nga pora, na kuimbal, wote omba, akil tep mor ku. Uⱡ mbʉ pora, na ndi, puⱡ mondʉp etʉp, wote etʉp pora ndur. Wamp nam ti, nu waka kuⱡʉm ndam, na ndi, wamp kont mba mul nu pukpa omba, mint mul ei, wei kuⱡʉp nguimp.  
\v 7 Wamp nam ti, el etpa int pendʉm ei ndi, na nga nguimp nit mel mbʉ tʉmba. Wote wamp ei, na nga kangambuⱡa ei muⱡangga, na elim nga Got ei muⱡimp.  
\v 8 Wote, wamp mat na kʉn mundmong etʉk, mondʉk pili napilik, uⱡ kit elpa elpa mbʉ, puⱡ pendʉk etʉk, wamp mat rok kondʉk, wapra rok, kupna ambulk, kur kit mbi paka rondʉk, ik kol rok eng wamp mbʉ nga puk muⱡing kona ei, kut mam tila ku salpa ndip ti, nomba kondpa morum kona ila muⱡing. Kona ei wamp kolk pora nduing kona ei, kona ila wamp mbʉ, uⱡ nga kunt nga mindil tʉk mint ping,” nitim.   
\s1 Jerusalem Kona Peng Kont Ei  
\p
\v 9 Wote, anggelo 7 kat Got nga popʉⱡ kit ming 7 kat, ambulk mormin kʉⱡ nga tenda ti ndi omba, na kundpa, “Nim akup na kʉn wana! Sipsip Waⱡ ei nga amp tʉmba enim uⱡ ei, nim tʉp ora ndamp!” nitim.  
\v 10 Wote, Muⱡnga Wingti ei ndi, na etpa ronduⱡ munduⱡnga kʉn, anggelo ni ndi, na mepa wi komnga mong mam nila, oⱡa mba kʉn, Jerusalem Kona Peng Wingti ni, Got kʉn muⱡ ila tepa mana urum kona peng ni, na tʉpa ora ndurum.  
\v 11 Got nga rʉⱡang mam ei ndi, kona peng ei, rʉⱡang minal ngurum uⱡ ei ti, elpa mel. Ku jaspa ei, ku moni ou nduk ndi, rarʉp rok, tʉk etmin ku ei, kiraipa muraipa etʉm uⱡ ni mel, kona peng ei, i itim.  
\v 12 Kona peng ei nga ku paⱡa mam mat, wi oⱡa kila petʉm ila, keta puⱡ puⱡ 12 tetʉm. Wote, anggelo 12 kat keta puⱡ puⱡ mbila tenda tenda nʉk rʉp etʉng. Isrel wamp rʉⱡaip 12 kʉⱡ nga mbi mbʉ, keta puⱡ puⱡ 12 kʉⱡ ila murum ku.  
\v 13 Kona peng ei nga, al ant oⱡa orum kona, orunga keta puⱡ puⱡ raldika tetʉm. Wil ont mana purum kona orunga keta puⱡ puⱡ raldika ku tetʉm. Wote, met orunga keta puⱡ puⱡ raldika ku tetʉm. Wote, wi orunga keta puⱡ puⱡ raldika ku tetʉm.  
\v 14 Kona peng ei nga ku paⱡa mbʉ, ambuⱡpa ronduⱡ mundʉmba uⱡ ei, ku 12 kat ndi ambrʉm. Sipsip Waⱡ ei nga nombuⱡa rung wu 12 kʉⱡ nga mbi mbʉ, ku kʉⱡ ila murum.   
\p
\v 15 Wote anggelo, na kʉn ik nitim ei ndi, gol tʉmbʉⱡ ei, ambuⱡpa morum ei ndi, kona peng ei kʉn, paⱡa keta puⱡ puⱡ na mbʉ, to romba ei nga tepa murum.  
\v 16 Kona peng ei nga punt, tʉmbʉkak kʉⱡ ruⱡ purum na, oⱡa mana na mbʉ to tenda mint pitim. Anggelo ei nga tʉmbʉⱡ ei ndi, tʉpa kona peng ei, to rurum ei nga to ei, 15,000 kilomita mel ruⱡ purum.  
\v 17 Anggelo ei ndi, kona peng ei nga rukʉr orunga to rurum ei, 72 mita mel, ruⱡ purum. To rurum tʉmbʉⱡ ei, wamp ndi, kona peng to rormin uⱡ ei mel, anggelo ei ndi, to rurum.  
\v 18 Kona peng ei paⱡa itim uⱡ ei, Got ndi, ku jaspa mbila paⱡa etpa, gol mbʉ ndi, kona peng ei mim elinga, rʉⱡang mba kiraipa muraipa itim.  
\v 19 Kona peng ei, Got ndi, paⱡa itim puⱡ ei, ku elpa elpa mat ku moni ou nduk, rarʉp rok tʉk etmin mbʉ nga. Ku eng nui kai kuimbal ei nga mbi, jaspa nitim. Merʉng orunga ku muk ei nga mbi, sapaiya. Ku 3 ei nga mbi ei, aket, wote ku 4 ei nga mbi, emeral.  
\v 20 Ku kunt pendpa, kurʉmʉⱡa pendpa iti 5 ei nga mbi ei, saroniks. Ku kunt 6 ei nga mbi ei, kaniliyan. Ku plawa kuk 7 ei nga mbi, krisolait. Ku 8 ei, nde ongum wening mbo tinga ei mbi ei, beril. Ku 9 ei plawa kuk kʉng tʉtʉm mbo ti nga mbi ei, topas. Ku 10 ei nga mbi ei, krisopres. Ku 11 ei nga mbi ei, aiyasint. Ku kunt 12 mbo ti nga mbi ei, ametis, nitim.  
\v 21 Kona peng ei nga paⱡa keta puⱡ puⱡ kumba 12 kʉⱡ, tʉtpal kurmʉⱡa ronduⱡ 12 kat ndi, mim etʉk, rukʉr nombuⱡa mam mbʉ, ku gol eng nui mbʉ ndi, mim etʉk tetʉng ei kʉn, kiraipa muraipa etpa titim.   
\p
\v 22 Manga wingti ei ruk, kona peng ila ti nʉtʉtʉm, mon. Nambuⱡ emel, Nuim Got Ronduⱡ Purum ei kʉn, Sipsip Waⱡ ei kʉn kunda, manga wingti mel mormbil.  
\v 23 Kona peng ei, ant, kalimp na ti ndi, rʉⱡang ngui nganggʉrʉm, mon. Nambuⱡ emel, Got elim nga rʉⱡang ei ndi, kona peng ei, rʉⱡang nguⱡnga kʉn, Sipsip Waⱡ ei ndi, kona peng ila kiya nomba morum.  
\v 24 Ei kʉn, wamp rʉⱡaip mat pora, ruk kona peng ei nga rʉⱡang ila nombuⱡa ʉnding. Mʉi kona wu nuim mumuk mbʉ ndi, en enim nga mel kai mbʉ mek ok, kona peng ila uing.  
\v 25 Ui mbila rʉk rʉk kona peng ei nga keta puⱡ puⱡ kumba ei, ʉngʉndi nʉngʉnding. Keta puⱡ puⱡ kumba ei, rʉk rʉk wei tepa mint mba. Ei nambuⱡ emel, kona peng ila rumbʉⱡ ti rui narʉmba, mon!  
\v 26 Wamp mbʉ nga kʉng ou ndurmʉn mel na, wamp nga mbi ou ti, ku moni na mel mbʉ pora, mek kona peng ila mukʉr ping.  
\v 27 Wote, mel ⱡar muⱡ na, wamp mat uⱡ kit mbʉ etʉk, ik kol rok etmin mbʉ pora, kona peng ila rukʉr pi nʉping, mon! Sipsip Waⱡ ei nga wamp kont mba mul buk ila mbi ropa, mana ndupa mundrum wamp mbʉ mint, kona peng ila mukʉr ping.   
\c 22  
\s1 Wamp Kont Mba Mul Nu Ei  
\p
\v 1-2 Wote, anggelo ni ndi, wamp kont mba mul nu mam ti, na tʉpa ora ndurum. Nu mam eng nui ti, kiraipa muraipa etpa, Got kʉn Sipsip Waⱡ raⱡ nga rʉpʉndi pol ila wi ment omba, mba kona peng ei nga ruk ting ila omba purum. Nu mam ei kona peng ei nga ʉldʉ orunga omba mba, ʉldʉ orunga purum ruk ila, wamp kont mul nde mam kat murum. Pana tenda ei nga kalimp 12 kʉⱡ ila, mong ropa 12 endʉtʉm. Nde ongum mbʉ ndi, wamp rʉⱡaip mbʉ etpa kai mundrum.  
\v 3 Got ndi, mel mat numan ngui nganggʉrʉm mbʉ, kona peng ila ti natʉmba. Got ndi, tʉpa ekit ndumba. Kona peng ila ruk, Got kʉn Sipsip Waⱡ ei kʉn, mint muⱡanggila kʉn, kongun wamp mbʉ ndi, mbi paka rondʉk iting.  
\v 4 Wote, wamp mbʉ ndi, Got nga kuimp keta ei kʉnangina kʉn, Got ndi, elim nga mbi ei, wamp mbʉ nga mʉi ombʉl mbila, mon ropa mondʉmba.  
\v 5 Kona peng ila rumbʉⱡ ti muⱡi nambuⱡmba, ant nga rʉⱡang ti mon, ndip kiya nga rʉⱡang ti ama mon ku! Nambuⱡ emel, Nuim Got ei, en enim nga rʉⱡang ei muⱡangga kʉn, wamp mbʉ uⱡ nga kʉnt nga nuim mumuk ralk molk mint ping.   
\s1 Jisas Yant Omba  
\p
\v 6 Wote, anggelo ei ndi, na kundpa, nimba mel, “Ik ei ama kupa mint! Ik ei, wamp pilik kʉn, mondʉk piling. Nuim Got ei ndi, painui wamp mbʉ nga muⱡnga orunga, ropa rut nduⱡnga kʉn, Got nga ik mbʉ nʉndʉtmin. Wote Got ndi, anggelo ti, tʉpa munduⱡnga kʉn, omba kongun wamp mbʉ, uⱡ wote orunga tʉkrʉpa omba mbʉ mel, tʉk ora ndupa etʉm,” nitim.   
\p
\v 7 Jisas ndi, nimba mel, “Enim pilʉi! Na enim kʉn tʉkrʉp uimp ent. Wamp nam ti ndi, Got nga Buk Wingti ila painui ik mbʉ pilpa, pep ropa em wamp ei, numan kai pilpa muⱡangga!” nitim.   
\p
\v 8 Anggelo ei ndi, na Jon uⱡ kʉⱡ tʉpa ora nduⱡnga, kandʉp pilip pora ndup kʉn, na ndi, anggelo ei nga kʉmp puⱡ ila mura rop mondʉp, mbi paka rundimp pilip it.  
\v 9 Wote, anggelo ni ndi, na kundpa, nimba mel, “Nim uⱡ ei, iti nʉti mon! Na mor ei nim kʉn, nim nga ʉngʉnʉl na, painui wamp na, wote wamp mat, Got nga buk ila ik mbʉ, pep rok etmin mbʉ mel ku, na mor. Nim ndi, Got tenda ei nga mint, mbi paka rundi!” nitim.   
\p
\v 10 Anggelo ni ndi, na kundpa, nimba mel, “Got nga buk ila painui ik morum mbʉ, nim ndi, imp molkʉn, gi ndui nʉndi, mon! Nambuⱡ emel, Got nga uⱡ etmba nitim ui ei, nondpa pora nimba enim.  
\v 11 Ei nga, wamp nam ti uⱡ kit em ndam, pilpa kelpa etpa mint pangga! Wote, wamp nam ti, uⱡ kit minʉpi mat em ndam, pilpa kelpa etpa mint pangga! Wote wamp nam ti, uⱡ kun kai mat em ndam, pilpa kelpa etpa mint pangga! Wote wamp nam ti, wamp wingti raⱡpa moⱡum ndam, pilpa kelpa wamp wingti mint raⱡpa muⱡangga!” nitim.  
\v 12 Jisas ndi, nimba mel, “Enim pilʉi! Na enim kʉn nondpa uimp! Enim wamp mbʉ nga uⱡ etmin mbʉ, mel elpa elpa punt rop, mel mat nguimp.  
\v 13 Na mel mbʉ nga pora, Kuimbal, moⱡʉp, wote, Akil Tep, moⱡʉp et. Uⱡ mbʉ nga pora na kuimbal mbo, wote akil tep omp et ku. Na mel mbʉ nga pora, puⱡ wu ei, kongun mbʉ nga, na pilip mbi ndup, etʉp pora ndur,” nitim.   
\p
\v 14 Wamp mat, en enim nga wal pʉki mbʉ ⱡumʉi rok, eng nondʉk moⱡung mbʉ, kapⱡa ambulk palk, wamp kont mul ndi, mong mbʉ kapⱡa tʉk nok, kona peng ei nga keta puⱡ puⱡ ila, kapⱡa rukʉr ping.  
\v 15 Wote, wamp uⱡ kurpa minʉpi mat etʉk, kupna ambulk, wapra rok, wamp rok kondʉk, kur kit mbʉ nga mbi paka rondʉk, ik kol mbʉ pilik pep rok, uⱡ mbʉ pora eng wamp mbʉ, Got nga kona peng ei nga paⱡa, ekit orunga muⱡing.   
\p
\v 16 Na Jisas ndi, na nga anggelo ei tʉp, enim kʉn mundunt ei ndi, enim Got nga manga wingti mbila wamp mbʉ kʉn, Got nga ik mong mbʉ kundpa, nimba mel, “Na ndi, Depit nga Pundʉn ei. Kona rangʉmba kʉn, Mʉkʉlmʉ Mipil ti, kiya norum ni mel, na mor,” nitim.   
\p
\v 17 Muⱡnga Wingti kʉn, Sipsip Waⱡ ei nga ambʉm raⱡ ndi Jisas kundkʉⱡ, nʉkʉⱡ mel, “Ui!” ninimbil. Wamp mat ik mong ei pilʉng ndam, “Uing ku!” ning. Wamp mat, nu waka kulk, eng mbʉ ok, wamp kont mul nu wei gem ngurum ei, Got ndi, nuwa kuⱡung wamp mbʉ ngangga, nuing.   
\p
\v 18 Na ndi, ik mong ronduⱡ kat, Got nga Buk Wingti ila petʉm ei mel, enim wamp mbʉ pora, kundʉp nʉnt. Wote, wamp nam ti ndi, ik mong elpa kat, ya Got nga Buk Wingti ila pendpa nim wamp ei, Got ndi, wamp ei, ik nʉm mbʉ mel punt ropa mindil ngumba.  
\v 19 Wote, wamp nam ti ndi, ya Got nga Buk Wingti ila petʉm painui ik mong tenda ti, tʉpa ekit ndum ndam, wamp ei Got ndi, tʉpa ekit ndangga kʉn, elim nga to ila, wamp kont mul nde mong mbʉ, nui nandpa. Wote, Got nga kona peng wingti ila, ruk muⱡi nambʉⱡʉmba ku. Uⱡ ei, Got nga Buk Wingti ei ndi, ya nʉnʉm ei mel pemba.   
\p
\v 20 Uⱡ etmba mbʉ mel nimba, ekit ndunʉm wu ei ndi, akup nimba mel, “Kupa mint, na tʉkrʉp uimp mint!” ninim. Ei kupa! Nuim Jisas, nim ui!   
\p
\v 21 Jisas Kraist nga wamp pol ti uⱡ ei, enim kʉn kan piyangga! Ei Kupa.