\id PHP - Melpa NT [med] -Papua New Guinea 1995 (DBL 2014) \h Pilipai \toc2 Pilipai \toc1 Pilipai \toc3 Pil \mt1 PILIPAI \imt1 KUIMP TEPA IK KɄⱠ \is2 Ya Buk Ei Nga Pʉⱡ Ei: \ip Pol ndi, mon ei ropa mondpa pili wamp mbʉ, mbun mindil om mbila, ronduⱡ puk muⱡeing ei mel nimba ronduⱡ mundrum. \is2 Ya Buk Ei, Nam Ndi Rurum: \ip Ya buk ei, Pol ndi, mon rurum. \is2 Mon Ropa Nam Ngurum: \ip Got nga Pilipai rapa tenda ila wamp ngurum. \is2 Ui Nant Ila Rurum: \ip Buk kʉⱡ Pol Rom kona ila kan manga pepa rurum. Ei, Kraist metʉng ei kʉn, mbuldung pana 61 ila mon kʉⱡ rurum. \is2 Ik Ronduⱡ: Pilipai 4:4 \ip Enim ndi, ui mbila rʉk rʉk Nuim ei kʉn, kai pilik muⱡʉi! Na aldpa nʉnt ku, enim ambulk palk muⱡʉi! \is1 IK PENG KɄⱠ \iot Rump \io1 1:3-1:7 - Pol Got kʉn angge nitim \io1 1:12-30 - Kont mul uⱡ ei Kraist \io1 2:1-2:4 - Tʉn mep mana mbun Kraist itim ei mel itʉmin \io1 2:5-2:18 - Kraist elim nga orunga mepa mana oⱡnga, Got ndi, elim nga orunga mepa oⱡa purum \io1 2:19-2:30 - Timoti kʉn Epaprondaitas raⱡ \io1 3:1-3:7 - Wamp ti, Kraist mondpa pilim ndam, wamp ei kun kai moⱡmba \io1 3:8-3:21 - Tʉkrʉp mbun mel muⱡ ei, ⱡar nʉmp tʉmin \io1 4:1-4:8 - Wamp mbʉ numan tenda pangga, numan kai pilik, pilpa kungʉndi kai mbʉ ting \io1 4:10-4:23 - Pol mel titim mbʉ nga angge nitim \c 1 \p \v 1 Pol kʉn Timoti raⱡ, tʉl Kraist Jisas nga kongun wu raⱡ ndi, mon ei ropʉⱡ, enim Got nga wamp Pilipai kona ila Kraist Jisas nga mondpa pili wamp kʉⱡ kʉn, rʉp wamp na, kongun wamp mbʉ pora rop ngunmbʉⱡ. \p \v 2 Tʉn nga, Wuta Got kʉn, Nuim Jisas Kraist raⱡ nga wamp poⱡ ti uⱡ ei kʉn, numan wang ndui uⱡ raⱡ, enim kʉn kan piyangga! \s1 Pol Got Kʉn Angge Nitim \p \v 3-6 Ui mbila rʉk na enim nga nimp pilip, na nga Got kʉn angge nimp, rʉk rʉk numan kai pilip, enim nga nimp atinga rop mint mor. Nambuⱡ emel, na Rʉnang Ik Kai ei nga, unt kongun puⱡ mondʉp it ei kʉn, omba akup ui ila, na tʉk rapʉndʉrmʉn. Na kupa punt ei, Got ndi, kongun kai ei, enim kʉn puⱡ mundrum ei, etpa mepa mba, Kraist Jisas nga ui ou ila, etpa pora ndumba. \p \v 7 Na nga numan ei, enim kʉn tetʉm ei nga, wote na enim nga nʉmp pilip mor. Enim kep, na kep, Got nga poⱡ ti uⱡ ei tʉtmʉn. Ei nga, na kan manga ila pep, wote Rʉnang Ik Kai ei nʉmp kep, enim tʉp, na nga numan ila ambʉⱡʉp gi ndup mor. \v 8 Na Got nga kuimp keta ila ik kupa ei nʉnt. Kraist Jisas nga kont kaimp kul uⱡ ei ndi, na nga numan orunga ropa rut nduⱡnga, wote na enim omp kʉnimp ei nga kundʉⱡnga mor. \v 9-10 Na enim nga atinga rondʉp kʉn, enim nga wamp numan ngui uⱡ ei, tepa mba ou ndangga kʉn, wote pilpa kungʉndi tʉk, numan ila kʉmp tʉk kandʉk, uⱡ kun kai mbʉ pilik mbi nduk, wote Kraist nga ui ei om ei kʉn, enim wamp kun kai mbʉ muⱡeing. \v 11 Enim nga numan ila, Jisas Kraist nga uⱡ kun kai mbʉ, tepa peka rangga. Uⱡ ei ndi, Got mbi ou tangga kʉn, wote tʉn ndi, Got nga mbi ei, paka rundʉmin. \s1 Kont Mul Uⱡ Ei Kraist \p \v 12 Wote angmʉn, enim pilʉi! Uⱡ na kʉn enim mbʉ ndi, Rʉnang Ik Kai ei, ropa mana ndui nandʉrʉm mon. Uⱡ ei ndi, Rʉnang Ik Kai ei, etpa mepa int int purum. \v 13 Ei kʉn, Rom gapman nga manga ila, el wu mbʉ pora, wote wu mat kunda, na Kraist nga mbi ila kan manga ila pet. Ei nambuⱡ emel, na Kraist nga kindmant wu ei nʉk pʉtmin. \v 14 Wamp ou nduk, Wu Nuim ei mondʉk pʉtʉng. Ei kʉn, na kan manga ila pit ui ei kʉn, wamp kʉⱡ nga mondpa pili orunga ronduⱡ tʉtʉng. Wote, mundmong etʉng uⱡ ei, wak rok, ronduⱡ mondʉk, Got nga Rʉnang Ik Kai ei nʉndʉtʉng. \p \v 15 Kupa, wamp mat ndi, Kraist nga Rʉnang Ik Kai ninmin ei nga pilik, kit pilik, wʉlʉk rok etmin. Wamp mat ndi, pilpa kungʉndi kai mbʉ, tʉk Kraist nga Rʉnang Ik Kai ei ninditmʉn. \v 16 Wu kʉⱡ pʉtmin ei, na wamp nga kuimp keta ila moⱡʉp, Got nga ik ei nʉmp ronduⱡ mundʉr ei nga, wamp mbʉ ndi, na numan nguk, Got nga ik ei nitmin. \v 17 Wote wu mat, en enim mbi ou ting pilik, Kraist nga ik ei nitmin. Wu mbʉ, numan kun mat kandʉk tʉk, ni nanʉnmʉn mon. Na kan manga ila pʉnt ei kʉn, na mbun ou ndupa nguing pilik ninmin. \v 18 Wote kep, nui uⱡ ei kep, kupa ni uⱡ mbʉ kep, uⱡ mbʉ pora, Kraist nga mbi paka rundʉnmʉn ei, na rʉk rʉk, numan mint etmba. \v 19 Wote, na pʉnt ei, enim na tʉk rapʉndʉk, atinga rormin ei ndi, Jisas Kraist nga Muⱡnga Wingti na ronduⱡ ngangga! Ya uⱡ pʉnmʉn mbʉ ndi, na tʉpa rʉpʉndangga moⱡʉp, kai mundimp. \v 20 Na numan mam ti enim uⱡ, wote orunga pemba mbʉ, nokundʉp mor. Na ronduⱡ mbo uⱡ etʉp mor ei mel itimp ku, pipil kuⱡi nʉⱡimp. Wote, na kunt ndam kep, kont munt ndam kep, na uⱡ int ei ndi, Kraist nga mbi paka rundimp. \v 21 Na pʉnt ei, na kont munt ndam, Kraist nga kongun ei, indimp muna kunt ndam, mel muⱡ ti timp. \v 22 Wote, na kont munt ndam, na kapⱡa wamp ou ndupa tʉp rʉpʉndimp. Uⱡ raⱡ nga na itimp ei, na pili napʉnt. \v 23 Na ila numan raⱡ etʉp pʉnt ei. Na Kraist kʉn mbo munt ndam, ei ama uⱡ kai mel ti pʉnt! \v 24 Ei ama uⱡ kai ti pʉnt. Wote na kont munt ndam, enim kapⱡa tʉp rʉpʉndimp. \v 25 Na numan ronduⱡ ti pʉnt ei, enim kʉn moⱡʉp mint mbo enim tʉp rʉpʉndamba kʉn, enim nga mondpa pili ronduⱡ pangga, ambulk palk muⱡeing. \v 26 Wote, na enim kʉn unt ei kʉn, enim na kʉn ambulk palk, Kraist Jisas nga mbi paka runding. \p \v 27 Namba uⱡ mat em ndam, Kraist nga Rʉnang Ik Kai ei, nʉtʉm ei mel pep rui! Na enim omp kʉnt ndam kep, wote enim mormun ei nga timan ik ei, pint ndam kep, na ti pʉnt ei, enim numan tenda pangga, numan tenda ei mint ambulk molk, Rʉnang Ik Kai ila mondpa pili uⱡ ei, etʉk ronduⱡ mundʉi. \v 28 Enim nga el rui wamp mbʉ nga mundmong iti nʉtʉi! Rʉk rʉk ronduⱡ mundʉk molk, wamp mbʉ uⱡ kupa mbʉ tʉk ora ndʉi. Wamp mbʉ nila muⱡing, wote enim muⱡ ping. Nambuⱡ emel, Got ndi, enim itʉi nʉtʉm uⱡ ei mel etʉm. \v 29 Got ei ndi, enim Kraist nga kongun indeing nimba uⱡ kai mbʉ ngurum. Enim Kraist kʉn mondpa pili uⱡ ila mint ngui ngʉnggʉrʉm mon. Wote, elim nga mbi ila molk, mbun koma ruing uⱡ ei kunda ngurum. \v 30 Unt enim na kandrʉng ni, na el rur. Akup ei kʉn, na el rop mint mor timan ik ei pʉnmin. Enim na kʉn rup rop moⱡpʉn el rʉmin. \c 2 \s1 Tʉn Mep Mana Mbun Kraist Itim Ei Mel Itʉmin \p \v 1-2 Enim nga, numan ila Kraist kʉn ronduⱡ tʉtmʉn muna? Wote, elim nga kaimp kul uⱡ ei ndi, enim nga numan orunga etpa wang ndurum muna? Muⱡnga Wingti nga mul uⱡ ila rukrʉng orunga mormin muna? Enim nga numan ei, wamp ʉngʉnʉl kʉⱡ nguk kaimp kurmin ei? I etʉk kʉn, na nga ambuⱡpa puⱡi uⱡ ei, etʉk ou indʉi! I etʉk numan tenda mundʉk, wote kaimp kul uⱡ tenda ambulk, numan tenda pangga muⱡʉi! \v 3 Enim nga numan orunga mint pilik, kara pi nʉpʉi mon! Wote, wamp mat tʉk ou nduk, enim mana orunga muⱡʉi! \v 4 Enim nga kʉng orunga mint pili nʉpʉlʉi mon! Wamp mat nga kunda pilʉi ku! \s1 Kraist Elim Nga Orunga Mepa Mana Oⱡnga, Got Ndi, Elim Orunga Mepa Oⱡa Purum \p \v 5-6 Enim Kraist Jisas nga numan pʉtʉm ei mel ku pilʉi! \p Elim ni Got ku, wote elim ni, Got Tipam murum ei mel muⱡimp nimba, pili nʉpʉtʉm, mon! \v 7-8 Elim nga numan ei wak ropa, kongun kindmant wamp mel raⱡpa moⱡpa, elim nga orunga mepa mana omba, Got nga ik ei pep ropa mba kurum. Nde peta ila ruing nimba pitim ndam kep, koⱡmba ei nga numan ngumba kurum. \v 9-11 Ei nga, Got ndi, Jisas oⱡa tʉpa, elim nga ki mbo orunga mundrum. Wote, mbi ti ngurum ei, mbi wei mbʉ mel mon, mbi ou ti ngurum. Mbi ei Jisas. Nambuⱡ emel, wi muⱡ kona kep, ya mʉi kona kep, mʉi min mana orunga kep, wamp mbʉ, Jisas nga mbi ei tek, mura rok mondʉk, wote wamp ik nuim kan elpa elpa mbʉ ndi, pora keta tenda puⱡnga, Jisas Kraist ei Nuim ei nangina, Got Tipam nga mbi ei mon pangga! Tʉn ndi, Got nga mbi ou ei paka rundʉmin. \s1 Tʉn rʉⱡang Ei Mel Muⱡʉmin \p \v 12 Ei kʉn, na nga wamp mʉn kʉⱡ, na unt enim kʉn, mur ei kʉn, na nga ik ei rʉk rʉk pep rorung, ei mel ku akup, na enim wak rur ei kʉn, ik ei pep ku rʉi! Enim kongun ronduⱡ mundʉk etʉk, Got ndi, tʉn rukʉr titim ei nga, mundmong etpʉn angge nimbun, Got nga mbi paka rundmin. \v 13 Nambuⱡ emel, Got ndi, enim nga numan orunga pilpa kongun etʉm. Uⱡ ei nga, elim ndi, enim nga numan ei, ropa rot nduⱡnga, enim ndi, elim nga kongun numan ngorum ei mel kun kulk etmin. \p \v 14-16 Uⱡ mbʉ kump kʉm enim iting etʉk kʉn, popʉⱡ mundi namʉndʉk, el rui narʉk eng ei kʉn, uⱡ ⱡawa mat pi nʉpangga! Wote, enim Got nga kangambuⱡa kun kai ralk muⱡing. Wote enim ndi, kont mba mul uⱡ ei, ambulk gi nduk, enim ya mana mʉi ila wamp rʉⱡaip uⱡ kit etmin mbʉ nga ruk ting ila ui muⱡ ila mipil mel, rʉlang pangga muⱡing. Enim ndi, wamp mat kʉn, Rʉnang Ik kont pi kʉⱡ nʉk ngung ndam, wote Kraist nga ui ou ila, na enim kʉn numan etmba. Ei nambuⱡ emel, na nga kongun enim kʉn, it uⱡ mbʉ wei ai iti natʉmba. \v 17 Ei nga, na nga kʉng kʉⱡ enim nga, mondpa pili ei nga, nʉndʉp uⱡ kunt ndam, na enim kʉn ambʉⱡʉp paⱡʉp muⱡimp. \v 18 Wote ei mel ku, enim ndi, i ku etʉk, na kʉn ambulk palk muⱡʉi! \s1 Timoti Kʉn Epaprondaitus Raⱡ \p \v 19 Wote, pilim ndam, ui nondpa ti kʉn, Timoti enim kʉn omba moⱡpa, enim nga enmin uⱡ mbʉ na kundpa nangga, numan kai pilip muⱡimp. \v 20 Wu tenda ei ndi, na nga numan pʉt ei mel pilpa, enim tʉp rʉpʉndimp ku nimba pʉtʉm. \v 21 Wote, wamp minal ndi, en enim nga kʉng orunga nga nʉk pilik, Kraist Jisas nga kongun mbʉ pili napʉtmʉn. \v 22 Wote, enim pilik mormun ei, Timoti na kʉn tipam kangʉm mel moⱡpʉⱡ, Rʉnang Ik Kai ei, nʉmp mep andrʉmbʉⱡ kangʉm ndi, tipam tʉpa rapʉndurʉm ei mel. \v 23 Wote, na nanim moⱡʉp pilamba uⱡ mbʉ, kapⱡa em ndam, Timoti enim kʉn ui nondpa tila tʉp mundimp. \v 24 Wote, na kupa pʉnt ei, Nuim ei ndi, nombuⱡa mam ti tʉpa kun tangga, na enim kʉn ui nondpa tila uimp. \p \v 25 Na pʉnt ei, na nga ʉngʉn Epaprondaitus, wote kongun rʉp wu, wote el nde wu, nombuⱡa rʉng wu Epaprondaitus ni, enim kʉn ngump int ndont. \v 26 Wu ei, enim kanʉmba ei nga numan elinga morum. Ei nambuⱡ emel, elim kui rurum ei nga enim numan ou nduk pilik mormun ei nga. \v 27 Ei kupa, unt elim kui rurum. Ei kʉn, koⱡpa pora nduⱡnga, ei wote, Got ndi, wu ei kont kurum. Wote, na kont kurum ku. Ei nambuⱡ emel, Got elim ndi, na mbun mam ti, koma rui nʉreimp nimba pitim. \v 28 Ei kʉn, na numan mam ti pʉnt ei, Epaprondaitus enim kʉn ngump int ndamba, enim kandʉk numan wang nduk kai pilangina, na numan ou ndup pili nʉpʉleimp. \v 29 Wote, wu ei om ei kʉn, Nuim ei nga mbi ila numan mam ti nguk, rawe etʉk tʉi! \v 30 Ei nambuⱡ emel, Kraist nga kongun indimp nimba etpa, elim koⱡmba itim. Elim koⱡmba ei, nga pili napilpa itim ei, enim ndi, iti natilingina mel itim. \c 3 \s1 Wamp Ti Kraist Mondpa Pilim Ndam, Wamp Ei Kun Kai Moⱡmba \p \v 1 Wamp angmʉn, na ik ei nʉmp pora nduimp etʉp, enim Nuim ei kʉn numan kai pilʉi! Enim mon rop ngur ik kʉⱡ, nga aldpa rop nguimp, ei nga mbun ti mon. Mon ei ndi, enim tʉpa rapʉndʉmba. \p \v 2 Wu kit mat ndi, owa rakra mel ok, tʉn kʉng kupti uⱡ ila nga, ronduⱡ mundʉk nʉk, enim kʉng kupti ei nga tʉk mendʉk muⱡʉi! \v 3 Tʉn kupti uⱡ ila, tʉn Got nga kangambuⱡa muⱡi namburmin mon. Tʉn Got nga Muⱡnga mondpʉn, Got nga mbi paka rondʉrmin uⱡ ei, kʉng kʉpti uⱡ kupa ei. Tʉn rapa tenda wamp mbʉ, Kraist Jisas kʉn kai pʉtmʉn. Ei nambuⱡ emel, tʉn tʉn etʉp peng kont ti natʉlmina uⱡ mbila, Kraist ndi, tʉn etpa titim ei nga. \v 4 Wote, kʉng orunga uⱡ mat etpʉn, tʉndʉn etʉp peng kont timʉn nilimina ndam, na kuimp tep elimba. Jura wamp uⱡ mbʉ nga nam pilpa pora ndurum. Nilingina ndam, na kapⱡa. \v 5 Ei nambuⱡ emel, na ndi, na melinga rumbʉⱡ 8 omba puⱡnga, na Jura wu mema ei nga, Jura wamp nga etmin ei mel, na nga kʉng kopʉtʉtʉng. Na Isrel wu, Benjamin nga rʉⱡaip ila, wote Ipru wamp kupa. Ei wote, na Perisi wu kupa, ei nambuⱡ emel, na Moses nga mi ik mbʉ ronduⱡ mundʉp pep ruimp nʉmp it. \v 6 Wote, na mi ik kʉⱡ pep rop, Got nga kongun ei ronduⱡ mundʉp itimp nʉmp, Got nga rapa tenda wamp mbʉ rop kundimp nʉmp it. Ei kʉn, Moses nga mi ik kʉⱡ ila wamp ti ndi, kandpa tepa nakʉn, nim ndam, na nga ⱡawa ti mon. \p \v 7 Wote, na akup Kraist kʉn moⱡʉp kʉn, uⱡ unt nga etʉp undʉr mbʉ, uⱡ roldʉnga mat nʉmp pʉnt. \v 8-9 Wote, uⱡ mbʉ mint mon! Wote na ndi, namba mel mbʉ pora, tʉp pei mundunt. Ei mel, ronduⱡ ingk it nga nʉmp ent. Ei kʉn, Kraist Jisas na nga Nuim, ei nga numan ei pilip timp. Uⱡ ei nga, nʉmp kʉn uⱡ wei mbʉ wak rop mundʉr. Na Kraist rukʉr timp ei nga, mondpa pili uⱡ ei, mel ronduⱡ ti nʉmp pʉnt. \v 10-11 Na uⱡ ti pilamp, ka nʉmp pʉnt ei, Kraist koⱡpa kont purum uⱡ ei nga ronduⱡ ei kʉn, wote mindil nurum ei mel nomp, kurum ei mel koⱡʉp, wote ⱡoporpa omba purum ei mel pamp, ka nʉmp punt. \s1 Tʉkrʉp Mbun Mel Muⱡ Ei Ⱡar Nʉmp Tʉmin \p \v 12 Na ndi nʉmp kʉn, na timp nʉt mel ei, tit ni nanʉnt mon. Wote, kun kai mor ni nanʉnt mon ku. Ei nga, na mel kai ti timp ei nga, kokila kongun ronduⱡ mundʉp etʉp mint mor. Ei kʉn, Kraist Jisas elim ndi, na teimp nitim mel kai ei timp. \v 13-14 Angmʉn, na kai muⱡ ei tit nʉmp pi napʉnt. Wote, mel tenda ti pʉnt ei, mel mbuldung orunga tetʉm mbʉ wak rop, mel kai ei ronduⱡ mundʉp timp ei nga pilip kʉn, tʉkrʉp mbo mel muⱡ ei, Got ndi, wi ropa nguⱡnga ila omp kʉn, mel ingk kai ei tit. Mel kai ei, Kraist Jisas tepa morum. Ei, uⱡ nga kʉnt nga kont mul uⱡ ei mbo timp. \p \v 15 Wote, tʉn uⱡ kun kai mbʉ, etʉp moⱡmina ndam, tʉn nga numan ei wamp kun kai mbʉ mel kapⱡa moⱡmina. Wote, enim numan elpa ti piling ndam, Got ndi, enim nga numan ei etpa mot ndumba. \v 16 Wote, tʉn uⱡ kun kai titmʉn mbʉ, ambuⱡpʉn gi ndʉmin. \p \v 17 Wamp angmʉn, enim ndi, na nga uⱡ ent mbʉ pep rʉi! Wote enim ndi, unt na uⱡ kun kai et mbʉ mel, pep rok etmin wamp mbʉ mel kandʉk itʉi! \v 18 Ui ou ndupa, enim kundʉp nit. Ei mel ku, wote akup enim kundʉp nilmba, na nga mong ila ka onum. Ei kʉn, wamp minal Kraist nga, nde peta ila el rui wamp mel mormin. \v 19 Wote, enim nga kʉng orunga numan pʉtmʉn ei, en enim nga got mel etʉm. Wote, wamp mbʉ ndi, en enim nga kʉng orunga ambulk parmin ei pipil kul uⱡ mbʉ, wote wamp mbʉ ndi, mʉi kona uⱡ mbʉ nga mint pʉtmin. Wamp mbʉ kit muⱡing. \v 20 Wote, tʉn mondpa pili wamp mbʉ, muⱡ kona ila wamp mendpʉⱡ kʉⱡ mormun. Tʉn wamp kʉⱡ ndi, Jisas Kraist ei muⱡ kona wak ropa mana omba, tʉn rukrʉng tʉmba ei nga nokundpʉn mormun. \v 21 Wote Kraist ndi, tʉn nga mbo kʉng kʉⱡ etpa, elim nga kʉng wingti kʉⱡ mel randpa, etpa mon mundʉmba. Ei mel etpa kʉn, wote uⱡ ronduⱡ em mbʉ ndi, mel tetʉm mbʉ kʉmp kʉm, elim nga mana orunga mint temba. \c 4 \s1 Wamp Mbʉ Numan Tenda Pangga, Numan Kai Pilik, Pilpa Kungʉndi Kai Mbʉ Ting \p \v 1 Wote, na nga angmʉn! Enim Nuim ei kʉn ronduⱡ mundʉk muⱡʉi! Wote na ndi, pilip nʉnt ei, na nga numan ei, enim ngump, na enim kʉn kont minal enim. Na enim kʉn numan etʉm ei kʉn, enim wamp kai wei kʉⱡ nʉpʉnt. \p \v 2 Amp Iyotiya kʉn Sintike raⱡ, enmbil pilʉl! Enmbil Nuim ei kʉn, numan tenda pangga, muⱡʉnggil! \v 3 Nim na kʉn, kongun tenda ila kupa etmbʉⱡ ei nga nim kundʉp nʉnt. Nim ndi, amp raⱡ tʉkʉn rʉpʉndi! Amp raⱡ ndi, na tʉk rapunduⱡʉnggila, Nuim ei nga Rʉnang Ik Kai ei nʉtmʉn. Wote Klement kʉn, kongun wu mat kʉn, kongun tenda ila etmʉn mbʉ, amp raⱡ kʉn kongun etmin. Enim nga mbi ei, kont mba mul Buk ila morum. \p \v 4 Enim ndi, ui mbila rʉk rʉk Nuim ei kʉn kai pilik muⱡʉi! Na aldpa nʉnt ku, enim ambulk palk muⱡʉi! \v 5 Enim ndi, wamp mbʉ kʉn pora, numan wang ndui uⱡ mbʉ etʉk muⱡʉi! Nuim ei nondpa onum. \v 6 Enim numan ou nduk pili nʉpilʉi mon! Wote, enim numan ngung mel mbʉ, Got kʉn rʉk rʉk numan mbo ila tek, elim kʉn kai pilik, atinga rok, angge nʉk etʉi! \v 7 Ei nga, moⱡpa kundi uⱡ ei, Got ndi, tʉn ngorum ei ndi, wamp mbʉ nga pilpa kungʉndi uⱡ mbʉ pora ropa mana ndurum. Wote, Jisas Kraist nga kongun etʉm ila moⱡpa kundi uⱡ ei, enim nga numan orunga kʉn, enim nga pilpa kungʉndi uⱡ orunga rʉp etpa kai etangga! \p \v 8 Nimp pora ndup nʉnt wamp angmʉn. Enim nga numan ila rop peka runding mel kʉⱡ, uⱡ wingti kai, ik kupa, mbi ou, uⱡ kun, mel wingti, uⱡ kai mon pi, wote kaip ninding uⱡ mat itʉi! \v 9 Uⱡ mbʉ kʉmp kʉm enim mbo rundʉr ui ei kʉn, enim tʉk pora ndurʉng uⱡ mbʉ, enim pilik, wote na kandrung ei, wote enim ndi, rʉk rʉk uⱡ mbʉ pora etʉi! Wote etangina kʉn, Got ndi, tʉn kʉn moⱡpa kundi uⱡ ei, enim kʉn moⱡmba. \s1 Pol Mel Titim Mbʉ Nga Angge Nitim \p \v 10 Akup enim nga numan ei ropa rot nduⱡnga, enim na nga nʉk pʉnmʉn. Wote ei nga, Nuim ei kʉn numan kai ti enim. Enim unt na nga nʉk pʉtʉng. Ei nga, wote na tʉk rʉpʉnding ei nga, nombuⱡa mam ti, ti natʉtʉm mon. \v 11 Na mel, ti nga mon mondunʉm ni nʉnʉnt mon. Na mel ou ndupa tep munt kep, orunga etʉp tep munt kep, na nga numan orunga kapⱡa elinga mor. \v 12 Na wamp kurpa mel moⱡʉp, wote mel minal kapⱡa ʉmbuⱡimp. Na rʉng ou ndupa nui uⱡ ei nga puⱡ ei pʉt. Wote, kump kun tetʉm ei nga puⱡ ei, pʉt ku. Wote, mel minal ʉmbil uⱡ ei nga, na pʉt ku, wote mel mon ndui ei nga, puⱡ ei pʉt ku. Wote ui mbila kep, kona mbila kep, kʉmp kʉm na ndi kapⱡa mint nʉt. \v 13 Kraist ndi, na ronduⱡ mundrum ei nga, elim nga ronduⱡ ila, na ndi kapⱡa uⱡ mbʉ itimp. \p \v 14 Wote enim ndi, uⱡ kai ti etʉng ei, enim ndi, na nga mbun ila, na tʉk rapʉndrʉng. \v 15 Enim Pilipai wamp kʉⱡ, pilik kun etʉk mormin. Na Masaroniya kona wak rur ui ei kʉn, na Rʉnang Ik Kai ei nʉmp ngur ei, enim Got nga rapa tenda ila wamp kʉⱡ ndi mendpʉⱡ, na tʉk rapʉndrʉng. Enim wamp kʉⱡ ndi, na kʉn molk, mel mat na ngok mint etʉng. Wote, mat yant nguk etʉng. \v 16 Na Tesalonaika kona ila moⱡmba. Enim ndi, na unt tʉk rapʉndʉk, wote tʉk rapʉndʉk etʉng. \v 17 Na ndi, enim nga mel ti timp ei nga ni nʉndʉt mon. Na ndi, enim nga uⱡ kai numan ngur mbʉ, etʉk kakina indʉi! \v 18 Na mel timp ei mel tʉp, wote ama mat pendʉk ngurung. Na nga gem ngurung mel Epaprondaitus mepa urum nimbʉ, na tilmba kakina murum. Koipa tindiⱡim mundi uⱡ ni mel, mel mura rui kai mat mek, na ngurung nimbʉ, Got ndi, pilpa kai pitim. \v 19 Na nga Got ei, mel kai mbʉ tepa morum ei ndi, Kraist Jisas nga nindpa, enim wamp nam ti mel mon ndum ei, etpa kapⱡa endʉmba. \p \v 20 Got tʉn nga, Tipam ei kʉn, ui mbila rʉk rʉk elim nga mbi ei, tʉn wamp mbʉ ndi, paka rundamin! Ei kupa. \p \v 21 Na ndi, Kraist Jisas nga mbi ila, enim Got nga wamp mbʉ kʉn, mʉkʉlmʉ kai, nʉnt. Wote, tʉn nga wamp ʉngʉnʉl na kʉn, kunda mormin mbʉ ndi, enim kʉn, mʉkʉlmʉ kai ku ninmʉn. \v 22 Wote, Got nga wamp ya wu nuim mumuk Sisa nga manga ila kongun etmin wamp mbʉ ndi, ama ronduⱡ mundʉk enim kʉn, ‘Mʉkʉlmʉ kai,’ nʉnmin. \p \v 23 Nuim Jisas Kraist nga wamp, mʉn kan mundi uⱡ ei, enim kʉn kan piyangga!