\id 2TI - Melpa NT [med] -Papua New Guinea 1995 (DBL 2014) 
\h 2 Timoti 
\toc2 2 Timoti 
\toc1 2 Timoti 
\toc3 2 Tim 
\mt1 2 TIMOTI  
\imt1 KUIMP TEPA IK KɄⱠ  
\is2 Ya Buk Ei Nga Puⱡ Ei:  
\ip Pol ndi, Timoti ik man ngumba nimba ronduⱡ mundrum.  
\is2 Ya Buk Ei, Nam Ndi Rurum:  
\ip Ya buk ei, Pol ndi, mon rurum  
\is2 Mon Ropa Nam Ngurum:  
\ip Pol ndi mon ei ropa, Timoti ngurum.  
\is2 Ui Nant Ila Rurum:  
\ip Pol, Rom kona ila kan manga ila pepa, mon kʉⱡ rurum. Ei, Kraist metʉng ei nga mbuldung orunga pana 66 mba 67 ila mon kʉⱡ rurum. Ei kʉn, Pol kan manga ila wak roⱡnga, pana ti moⱡnga, wote aldpa, wu nuim mumuk Niro murum ui ila, Pol aldpa imp molk, wote rok kondrung.  
\is2 Ik Ronduⱡ: 2 Timoti 2:15  
\ip Nim kongun ei teng ndukʉn itana, Got ndi, kʉnangga kapⱡa itangga. Pipil kuⱡi nalkʉn, Got nga ik kupa ei, petʉm mel, kun mbo indi!  
\is1 IK PENG KɄⱠ  
\iot Rump  
\io1 1:1-2 - Pol ndi, Timoti mon akil tepa ropa ngurum ei  
\io1 1:3-18 - Timoti nga mondpa pili orunga nimba ronduⱡ mundrum  
\io1 2:1-13 - Jisas nga el wu kupa  
\io1 2:14-26 - Got nga kongun wu ei, Got ndi, kapⱡa nilinga morum  
\io1 3:1-9 - Uⱡ kit mbʉ, ui pora nim ei kʉn, ekit omba  
\io1 3:10-17 - Man ik ronduⱡ kʉⱡ  
\io1 4:1-5 - Got nga ik ei, ronduⱡ mundkʉn nindi  
\io1 4:6-8 - Na nga kongun ei, akup pora nimba enim  
\io1 4:9-18 - Man ik koⱡmung mat  
\io1 4:19-22 - Rawe ik kai mbʉ  
\c 1  
\s1 Pol Ndi, Timoti Mon Akil Tepa Ropa Ngurum Ei  
\p
\v 1-2 Ya mon kʉⱡ, na Pol Got ndi, pilinga mor ei. Kraist Jisas nga kitip kʉni wu ndi, ya Kraist Jisas kʉn rʉp ropʉn moⱡpʉn, uⱡ nga kʉnt nga kont mul uⱡ ei, wote Got kʉn timin ei nga, ik nangga nʉk, tʉk mundrʉng wu ei ndi, mon ei rop, Timoti na nga kangʉm kang tenda ei kʉn ngont. Got Tipam kʉn, wote tʉn nga Nuim Kraist Jisas raⱡ nga wamp poⱡ ti uⱡ ei kʉn, kont kuⱡi uⱡ ei kʉn, wote moⱡpa kundi uⱡ kʉⱡ, nim kʉn kan piyangga!   
\s1 Timoti Nga Mondpa Pili Orunga Nimba Ronduⱡ Mundrum  
\p
\v 3 Na nga anda kouwʉmʉn kʉⱡ, Got pep rorung ei mel ku, na pep ront. Na Got kʉn rumbuldi rʉnggilmʉ raⱡ, angge nimp atinga rop, nim pilip ku et.  
\v 4 Na nim nga ka mong ni kʉⱡ, tʉpa pinditim ei kʉn, na nim omp kandʉp kʉn ambʉⱡʉp paⱡʉp moⱡamp ka ei nʉmp pʉt.  
\v 5 Nim nga mondpa pili kun kai ei, na pilip mint mor. Mondpa pili ei, unt nim nga manʉm nga manʉm amp Lowis kʉn, wote nim nga manʉm amp Yunis kʉn, mondʉk pʉtʉnggil ni mel ku, akup na pʉnt ei, nim kʉn tetʉm ku.  
\v 6 Uⱡ puⱡ ei nga, na nim kʉn ronduⱡ mundʉp nʉnt. Na ndi, nim ki oⱡa ndupa memp pendpa atinga roⱡʉmba, Got nga ronduⱡ ti tʉtʉn ni, akup ronduⱡ mundkʉn ʉmbʉⱡi!  
\v 7 Got ndi, tʉl Muⱡnga Wingti ngurum ni, tʉl mel ti nga mundmong itimbil nimba ngui ngʉnggʉrʉm. Ei mon! Muⱡnga Wingti ei ndi, tʉl ronduⱡ ngumba, wamp numan ngui uⱡ ei ngumba, wote numan kai ei ngumba etʉm.   
\p
\v 8 Nim Got nga Rʉnang Ik Kai nin ei nga, pipil kuⱡi nʉⱡi! Wote na ya, Got nga kongun ila nʉmp kan manga pit ei nga, pipil kuⱡi nʉⱡi mon ku. Ei mon! Nim Got ndi, ronduⱡ ngurum ni, tekʉn molkʉn, Got nga Rʉnang Ik Kai kʉⱡ nga, na mbun koma ronduⱡ mundʉp, koma ront. Ei mel, nim i ku etkʉn koma rui!  
\v 9 Got ndi, tʉn etpa, peng kont tʉpa omba, tʉn elim nga wamp mbʉ nʉtʉm ei, tʉn nga uⱡ kai etmin nimbila mon. Got ndi, uⱡ etʉm ei, elim nga numan ila, wote elim nga wamp poⱡ ti uⱡ ila mint etʉm. Muⱡ mʉi raⱡ iti nʉti kʉn, Got nga wamp poⱡ ti uⱡ ei, Jisas Kraist kʉn to ropa, tʉn wamp mbʉ ngurum.  
\v 10 Wote, akup tʉn nga Etpa Ti Wu Kraist Jisas ei ndi, uⱡ mbʉ etpa tʉpa, pena ila pinditim kʉndʉrmʉn. Wamp kuⱡi peng ei nga ronduⱡ ei, ropa mana ndupa, wote Rʉnang Ik Kont mba mul uⱡ ei tʉpa, pena ila pendʉtʉm.   
\p
\v 11 Got ndi, elim nga Rʉnang Ik Kai ei, na ik mbo wu moⱡʉp, wote elim nga nombuⱡa rung wu muⱡeimp nimba na kandpa titim.  
\v 12 Uⱡ puⱡ ila mint, na mindil ou ndupa nont. Wote, ei nga nʉmp, na wak rui nʉrimp. Ei nambuⱡ emel, na Got mondʉp pilip, tʉp ou ndup et wu ei ndi, Nuim yant omba Ui Ou ila, na etpa peng kont tʉmba.  
\v 13 Na ik kupa mat, nim mbo indʉt nimbʉ, ambulkʉn gi ndukʉn, pep rokʉn, mondpa pili uⱡ ei kʉn, wote wamp numan ngui uⱡ raⱡ, Kraist Jisas kʉn tekʉn muⱡi!  
\v 14 Uⱡ kai mat, Muⱡnga Wingti nga ronduⱡ ei ndi, tʉn ngurum ei, akup nim kʉn tetʉm nimbʉ, ambulkʉn gi ndui!   
\p
\v 15 Nim pilik morʉn ei, ya Eisiya kona ila wamp nimbʉ, na wak rok porung. Wote, wu Pigelas kʉn Ermoginis raⱡ kunda, na wak rok purʉnggil.  
\v 16 Wu Nuim ei ndi, wu Onisiporas kʉn, elim nga wamp mbo tenda kʉⱡ, etpa numan wang ndangga. Ei nambuⱡ emel, na kan manga pit ei nga, pipil kuⱡi naⱡʉpa, na nga numan orunga etpa, ndoimp rundrum.  
\v 17 Wote, Rom kona ila urum ei kʉn, na andpa kurpa, wote kandpa titim.  
\v 18 Wu Nuim ei ndi, Nuim yant omba Ui Ou ila, wu Onisiporas kandpa kont kuⱡangga! Nim pilik morʉn ei, Episis kona ila, na wu ei ndi, minal tʉpa rapʉndrʉm.   
\c 2  
\s1 Jisas Nga El Wu Kupa  
\p
\v 1 Ei kʉn, na nga kang ei, nim Kraist Jisas nga wamp poⱡ ti uⱡ kai mbʉ, ronduⱡ mundkʉn ʉmbʉⱡi!  
\v 2 Ik ei mek pukʉn, wamp minal morung ila, nim man ngur ik nimbʉ, mek pukʉn wu kun kai, na nga ik ninding wu mat kundʉk nana! Wu mbʉ ndi, int puk, wamp mat mbo indeing.   
\p
\v 3 Nim Kraist Jisas nga, el wu kupa muⱡin ei nga, mindil ou nduk nuin ei, na mindil tit ei mel tin.  
\v 4 El wu ti, elim nga wu ou ei, numan kai pilangga nimba, wamp roldʉnga mbʉ kʉn, mba kup iti natʉtʉm.  
\v 5 Ei mel ku, nombuⱡa mam tʉkʉrʉrʉm wu ei ndi, nombuⱡa tʉkʉrʉrmʉn uⱡ mbʉ nga, pep ropa etʉm ndam, mba mel kai mbʉ tʉtʉm.  
\v 6 Ei kongun ronduⱡ mundpa etʉm wu ni, rʉng ou ndupa etpa mondpa, elim kʉmp tepa norum.  
\v 7-8 Na ik nint kʉⱡ tʉkʉn mindi! Nuim ei ndi, nim tʉpa rʉpʉndangga, ya uⱡ mbʉ pilkʉn, tʉn nim Depit nga anda kouwʉ wu Jisas Kraist koⱡpa, tikil rurum wu ei nga Rʉnang Ik Kai nʉndʉt, wu ei nga tʉkʉn mindi!  
\v 9 Ei nga, na rʉnang ik kai nʉt ei nga, na mindil ou ndup nont. Wote mat kʉn, kindʉp wamp na ni mel, na nga kʉmp ki raⱡ kan ngormʉn. Ei wote, Got nga ik ei, kan nguk pindi napʉndʉtmʉn.  
\v 10 Na mindil nont ei, Got nga wi ropa titim wamp kʉⱡ, Kraist Jisas nga etpa ti uⱡ ei, tʉk uⱡ nga kʉnt nga molk mint ping ei nga nʉmp, na mindil ou ndup nont.  
\v 11 Ya ik ei kupa, tʉn wu ei kʉn, kuⱡmʉn ndam, wote wu ei kʉn ku, kont mbun muⱡmin.  
\v 12 Wote, tʉn wu ei kʉn, ronduⱡ mundpʉn muⱡmʉn ndam, tʉn wu ei kʉn ku, kona mbʉ nukundmin. Tʉn wu ei, pili napʉtmin nimin ndam, wote wu ei ndi, tʉn pili napʉt ku nimba.  
\v 13 Wote, tʉn enimp mondurmʉn ndam, Got elim enimp mundi namʉndrʉm. Ei nambuⱡ emel, elim ndi, el elim ik kol ropa, ngui nganggʉrʉm!   
\s1 Got Nga Kongun Wu Ei, Got Ndi, Kapⱡa Nilinga Morum  
\p
\v 14 Nim nga wamp mbʉ, ya ik kʉⱡ kundkʉn ni, wote Got nga kuimp keta ila ya ik roldʉnga mbʉ, ni nʉning mon ni! Ik mbʉ, ik kai mat mon, omba ik mbʉ ndi, wamp ik pʉlʉng mbʉ etpa kit mondʉmba.  
\v 15 Nim kongun ei teng ndukʉn itana, Got ndi, kʉnangga kapⱡa itangga! Pipil kuⱡi nalkʉn, Got nga ik kupa ei petʉm mel, kun mbo indi!  
\v 16 Ik roldʉnga mbʉ, ok tʉkʉn muⱡi! Ik mbʉ ndi, wamp mbʉ nga numan orunga mepa, Got kʉn nondpa pi napʉrʉm.  
\v 17-18 Ik i etpa mbʉ ndi, wamp kʉng ila pipi norum ei mel kapⱡa. Wu Imineyas kʉn, Pilitas raⱡ, ik i etpa mbʉ nga mbo endʉtʉmbil. Wu raⱡ ndi, ik kupa ei, tʉk mbuⱡ ngokʉⱡ, wamp ⱡoporpa oⱡa mul uⱡ ei, kor ekit urum ninimbil. Ik i etʉk ninimbil ei ndi, wamp mat nga mondpa pili orunga, rok mbuⱡ mbaⱡ enmbil.  
\v 19 Wote, Got nga ik kupa ei, manga runga ku na ni mel, ronduⱡ mba petʉm. Mel ti ndi, roka ndumba mel kapⱡa mon. Manga runga ku ila, mbi i etpa kat morum.  
\q1 “Wu Nuim ei ndi, elim nga wamp mbʉ, pilpa morum.” Wote, “Wamp nam ti, elim wu Nuim ei nga wamp num ndam, wamp ei uⱡ kit mbʉ wak rangga!” nʉtʉm.   
\p
\v 20 Manga mam tila ming mat, gol kʉn, silpa kʉn mbʉ ndi, etmin mbʉ tetʉm. Wote ming mat, nde kʉn, ui kʉn mbʉ ndi, etmin mbʉ tetʉm. Mel mbʉ nga mat kongun ronduⱡ mel mat iting ei nga tetʉm. Wote, mel mat kongun wei wei mat iting mbʉ nga tetʉm.  
\v 21 Wamp ti, elim uⱡ kit mbʉ pendpa kelpa, uⱡ kai mbʉ mint em ndam, wamp ei, nu ming na ti, kongun ronduⱡ mbila kongun etmin ei mel kapⱡa. Etpa kai etpa eng nomba tiyangga kʉn, manga Puⱡ Wu ei ndi, tʉpa kongun kai mbila mundangga etmba.   
\p
\v 22 Kang wamp mbʉ nga numan meka rui mbila, ok tʉkʉn molkʉn, omba uⱡ kun kai mbʉ kʉn, mondpa pili uⱡ ei kʉn, wamp numan ngui uⱡ ei kʉn, wote moⱡpa kundi uⱡ ei kʉn, uⱡ kit iti natʉk, Nuim ei nga tʉpa rʉpʉndangga nʉk, wi rok etmin wamp mbʉ kʉn, rʉp rokʉn pep rui.  
\v 23 Ik kit mat nʉk, ik palk nʉtmin uⱡ mbʉ, wak rui! Ik i iti mbila, ik mura mel etʉk etmin.  
\v 24-26 Nuim ei nga kongun wu ei, ik mura iti natʉpa, wamp mbʉ kʉn uⱡ kai mbʉ etpa, numan kai pilpa, popʉⱡ mundi namʉndpa, ik mbo wu kai ti muⱡangga! Wamp mat, elim nga ik tʉk roi ndurmin mbʉ, numan wang ndupa, tʉpa kun tangga kʉn, Got ndi, wamp mbʉ etpa, numan ropʉl rundangga, ik kupa ei, pilik mbi nduing. I etʉk kʉn, en enim nga numan mbo ingk ei pilik, wu kit ei nga kan ei, rok puⱡa rok, omba wu kit ei nga kindmant indi uⱡ ei, wak rok, Got elim kʉn rukʉr uing.   
\c 3  
\s1 Uⱡ Kit Mbʉ Ui Pora Nim Ei Kʉn Ekit Omba  
\p
\v 1-2 Nim pilkʉn muⱡi! Ui pora nimba ei kʉn, uⱡ mindil nui mat ou ndupa omba. Wamp mbʉ, en enim ou nduk numan ngok, mel mbʉ mok rui narʉk, en enim nga kʉng orunga mel mbʉ nga ou nduk pilik, ku moni minal numan ngok, en enim nga kaip nʉndʉk iting. Kara pok, Got tʉk ik kuldʉk, tipam mamʉl nga ik tʉk roi nduk, Got kʉn angge nandʉk, uⱡ wingti mbʉ, tʉk mbʉⱡ nguing.  
\v 3 Wamp mbʉ, uⱡ kai mbʉ iti natʉk, wote wamp mat kont kuⱡi nalk, wamp ik mbuldung nʉndʉk, en enim nga mul orunga rʉp iti natʉk, wote uⱡ kai mbʉ, numan ngui nganggʉk iting.  
\v 4 Wamp mat, rok kunding mbʉ nga ruk molk, omba numan ingk mat pili napilik, wote numan meka rui ei ndi, wamp mbʉ kʉn peka romba. Kʉng orunga iting uⱡ mbʉ, numan minal ngok, Got numan ngui ngʉnging.  
\v 5 Got nga uⱡ mbʉ, kʉng orunga mint ambulk molk, Got nga uⱡ ronduⱡ kupa mbʉ wak rok, tʉk mbuⱡ ngok, wu i etpa mbʉ kandkʉn, ok tʉkʉn muⱡi!  
\v 6 Wu mbʉ nga mat, wamp mat nga manga mbila puk, amp numan kun etpa pi napʉtʉm mbʉ kandʉk, ik kol rok ngurmin. Amp mbʉ, en enim nga unt uⱡ kit na, wote numan kit na mbʉ ndi, en enim nga numan orunga peka roⱡnga, uⱡ kit mbʉ numan ila peka rorum.  
\v 7 Amp mbʉ, ik pili nʉpiling, wote ik kupa ei, pilik mbi ndui nʉnding.  
\v 8 Ei wote, wu Janis kʉn Jambres raⱡ, ik kupa ei, tʉk mbuⱡ ngokʉⱡ, Moses kʉn kapⱡa mendkʉⱡ el rorʉnggil. Ei mel ku, wu elpa mbʉ nga numan kai mat mon. Omba wote, nondpa pili kupa mat, tek muⱡi nambʉrmʉn.  
\v 9 Wamp kit i etpa mbʉ nga kongun eng uⱡ mbʉ, mba ruⱡ pi napʉmba. Wu Janis kʉn Jambres raⱡ kʉn pitim ni mel, wamp kit mbʉ nga uⱡ wʉlʉ eng mbʉ, kandʉk poⱡ nduing.   
\s1 Man Ik Ronduⱡ Kʉⱡ  
\p
\v 10-11 Wote, nim na nga man ik ei kʉn, ik nʉmp, nombuⱡa andʉp, numan pilip et uⱡ mbʉ, nim pep ron. Wote, na nga mondpa pili uⱡ, pilpa ment ndui uⱡ, wamp numan ngui uⱡ, wote wamp ndi, na mbun nguⱡungina, mbun tʉp ronduⱡ mbo mor uⱡ mbʉ kʉn, wote kʉng orunga mindil ngormʉn uⱡ mbʉ, nim pilkʉn poⱡ ndukʉn morʉn. Nim pilik morʉn ei, na wil Andiyok kʉn Aikoniyum, wote Listra kona kʉⱡ ila, na rok kunding pilik etʉng ni, Nuim ei ndi, na tʉpa rʉpʉndrʉm.  
\v 12 Wamp nam ti, Kraist Jisas kʉn rʉmp ndupa moⱡpa, wote Got kʉn mint muⱡimp nimba pʉtʉm wamp ei, mbun mindil kit mbʉ ting.  
\v 13 Wu kit mbʉ kʉn, ik mbo wu kol na mbʉ, en enim ik kol rok rukʉr titmin ei mel, wamp puⱡi ik kol rok nguⱡina, wote en enim kʉn wamp mbʉ kʉn pora, uⱡ kit ila mana purmin.  
\v 14-15 Wote, nim ik ei pilkʉn morun. Nim unt kang kel murʉn ei kʉn, Buk Wingti ik kʉⱡ pilkʉn morʉn. Ya buk ila nga, nim pilpa kungundi kai mat ngorum. Ei nga, nim Kraist Jisas mondkʉn pilkʉn muⱡana, Got ndi, nim etpa tʉmba.  
\v 16 Buk Wingti ila petʉm ik mbʉ, Got ndi, nimba nguⱡnga, mon rorung. Ik ronduⱡ kʉⱡ, tʉn numan kai mbo rondpa, uⱡ ⱡawa etmin mbʉ, etpa mot ndupa, wote tʉpa kun mundpa, moⱡpa kundi orunga muⱡmin ei mel, man ngorum.  
\v 17 I etʉm uⱡ ei ndi, Got nga kongun wamp ei, kongun kai elpa elpa mbila, etpa mura mondrum.   
\c 4  
\s1 Got Nga Ik Ei Ronduⱡ Mundkʉn Nindi  
\p
\v 1-2 Got kʉn, Kraist Jisas raⱡ nga kuimp keta ila, na nim kʉn ronduⱡ mundʉp nʉnt. Ei nambuⱡ emel, Kraist Jisas ndi omba, wamp kui kont mbʉ pora, kʉmp tʉmba. Ei kʉn, Jisas elim kʉn, elim nga tʉpa mumuk rui uⱡ ei nondpa omba, mot nimba enim. Ei nga, nim kʉn ronduⱡ mundʉp nʉnt. Rʉnang Ik Kai ei, wamp piling moⱡung mbila kep, wei kep, ronduⱡ mundkʉn nʉkʉn mint muⱡi! Koma pou raⱡ tekʉn man ngukʉn, uⱡ ⱡawa eng mbila, ik mura iti natkʉn, raka raka nʉkʉn, tʉkʉn kun mundi!  
\v 3 Ui ti ekit omba ila, wamp ou ndupa ik kupa ei, tʉk roi nduk, en enim nga kʉng orunga minal pilik, ik mbo wu ou ndupa kandʉk tangina, wu mbʉ ndi, wamp mbʉ ik elpa mat mbo ndangina, ik mbʉ kum tek piling.  
\v 4 Wamp mbʉ ndi, ik kupa ei wak rok, mbo ik nʉmʉ mbʉ nga ou ndupa piling  
\v 5 Wote, nim uⱡ mbʉ nga tʉk mendkʉn molkʉn, mbun om uⱡ mbʉ koma rokʉn, Rʉnang Ik Kai ei, nin ei nga ronduⱡ mundkʉn ni! Namba kongun mat in mbila, Got nga kongun kindmant wamp mel ralkʉn muⱡi!   
\s1 Na Nga Kongun Ei, Akup Pora Nimba Enim  
\p
\v 6 Na nʉkʉn pin ndam, na nga moⱡʉp mbi ui mbʉ, omba nondpa enim, kʉng orunga kont mul uⱡ ei, mbun mindil ngangina, mʉi kona wak ruimp ui ei, nondpa enim.  
\v 7 Na nombuⱡa pʉn ni uⱡ ila, omp kai mundʉr. Pʉn nʉtmin to ila, omp pit ka ndup mor. Ei na nga mondpa pili uⱡ ei, ambʉⱡʉp gi ndur.  
\v 8 Ei nga, na mel kai ti timp ei, nok ndupa tetʉm ei, uⱡ kun kai mbʉ nga peng wʉna mundimp ei. Uⱡ mbʉ nga tepa kʉmp tʉtʉm, Wu Nuim ei, yant om ui ou ila, na ngumba. Wote, na mendpʉⱡ mon, wamp mat, Nuim ei omba kʉnmin nʉk, numan kai pendʉk nokundʉk mormin mbʉ, kunda ngumba.   
\s1 Man Ik Koⱡmung Mat  
\p
\v 9 Nim tʉkʉrkʉn na okʉn na kʉni!  
\v 10 Dimas ni, mʉi kona uⱡ mbʉ numan mondpa, na wak ropa, Tesalonaika kona ila mba, wote Kresens mba, wote Galeisiya kona purum. Wote Taitas, Delmeisiya kona ila purum ku.  
\v 11 Luk mendpʉⱡ na kʉn morum. Nim wu Mak tʉk mekʉn ui! Nambuⱡ emel, wu ei ndi, na nga kongun et ila tʉpa rapʉndʉmba.  
\v 12 Na ndi, Tikikus, Episis kona ila tʉp mundʉr.  
\v 13 Nim uin etkʉn, na nga wal pʉki ruⱡ kʉⱡ, Trowas kona wu Karpas nga manga ila tep kelip ur kʉⱡ mendkʉn ui! Buk tetʉm mbʉ kunda, wote kʉn kʉng ila buk mel tetʉm mbʉ kunda ku.  
\v 14 Ain kongun etʉm wu Aleksanda ndi, na minal etpa kit mondum mbʉ nga, na ik ti, ni nʉnimp. Nuim ei ndi, em uⱡ mbʉ mel elim ndi, punt ropa ngangga.  
\v 15 Nim wu ei nga tʉk mendkʉn muⱡi! Nambuⱡ emel, wu ei ndi, tʉn nga ik nʉtmʉn mbʉ, tʉpa roi ndupa ropa akpa etʉm.   
\p
\v 16 Na ik ei nga nʉmp kun itimp nʉmp, wamp nga kuimp keta ila kot it ei kʉn, wamp ti ndi, na tʉpa rʉpʉndi nʉpʉndrʉm mon! Na mel wei mel wak rorung. Got kʉn atinga rop nʉnt ei, wamp kʉⱡ uⱡ etʉng ei nga pili nʉpʉlangga nʉnt!  
\v 17 Wote Nuim ei, na kʉn omba moⱡpa, ronduⱡ ngurum uⱡ ei ndi, na etpa elim nga nombuⱡa rung ik ei neimp nilinga, ronduⱡ mundʉp nilimba, wamp rʉⱡaip elpa mbʉ pora, ik ei pilik tʉtʉng, kui laiyon nga keta min ila, na ekit titim.  
\v 18 Wote Nuim ei ndi, na uⱡ kit mbila ok, poⱡpa oⱡa tʉpa mepa, muⱡ kona tʉpa mumuk rui kona ila tʉpa mondʉmba. Mbi ou oⱡa orunga ei, elim kʉn uⱡ nga kʉnt nga pepa mint pangga! Ei kupa.   
\s1 Rawe Ik Kai Mbʉ  
\p
\v 19 Na nga rawe ik kai mbʉ nʉmp Prisila, Akuila kʉn, wote Onisiporas kʉn, elim nga manga tenda wamp kʉⱡ kʉn nʉmp mundunt.  
\v 20 Erastas Korin kona ila moⱡnga, na ndi, Tropimas, Miletus kona ila mondʉp kelip ur. Ei nambuⱡ emel, wu ei, kui kandpa titim.  
\v 21 Kona kʉpkʉ, ui kit orum ui ei, akil tiyangga, nim kuimp tekʉn ui! Yubilus, Purens, Linus kʉn Klautiya kʉⱡ, ya molk, nim kʉn rawe ik kai mbʉ nʉk mundunmʉn, wote ʉngʉnʉl kat kunda ku nʉnmin.  
\v 22 Nuim ei omba, nim nga muⱡnga orunga poⱡpa kan tangga! Got nga wamp poⱡ ti uⱡ ei, enim kʉn kan piyangga!