\id 2TH - Melpa NT [med] -Papua New Guinea 1995 (DBL 2014) 
\h 2 Tesalonaika 
\toc2 2 Tesalonaika 
\toc1 2 Tesalonaika 
\toc3 2 Tes 
\mt1 2 TESALONAIKA  
\imt1 KUIMP TEPA IK KɄⱠ  
\is2 Ya Buk Ei Nga Puⱡ Ei:  
\ip Pol ndi, mon ei ropa kʉn, mondpa pili wamp mat, mbun mindil tʉtʉng mbʉ, nimba ronduⱡ mondpa, wote enimp mundi namʉndʉk kongun iteing nimba, man ngurum. Nuim yant omba ei nga ik mat, ⱡawa purum mbʉ, nimba tʉpa kun mundrum.  
\is2 Ya Buk Ei, Nam Ndi Rurum:  
\ip Ya buk ei, Pol ndi, mon rurum.  
\is2 Mon Ropa Nam Ngurum:  
\ip Pol ndi, mon ei ropa, Got nga rapa tenda ila wamp met Tesalonaika kona ila aldpa ngurum.  
\is2 Ui Nant Ila Rurum:  
\ip Pol ndi, Korin kona ila moⱡpa, mon akil tepa ropa, Tesalonaika wamp ngurum. Ei Kraist metʉng ei kʉn, mbuldung orunga pana 51 mana 52 ila mon kʉⱡ rurum.  
\is2 Ik Ronduⱡ: 2 Tesalonaika 3:5  
\ip Nuim ei ndi, enim nga numan orunga, tʉpa kun mundangga, Got nga wamp kaimp kul uⱡ mbʉ kʉn, wote Jisas mbun titim mel ku, enim mbun tʉnmin ei pilik, mbi nduk kʉn, ronduⱡ mundʉk muⱡʉi!  
\is1 IK PENG KɄⱠ  
\iot Rump  
\io1 1:1-1:2 - Pol nga mon akil tepa ropa, Tesalonaika wamp kʉⱡ ngurum  
\io1 1:3-1:12 - Jisas yant omba wamp kʉmp tʉmba  
\io1 2:1-2:12 - Uⱡ kit etʉm wu  
\io1 2:13-2:17 - Enim ronduⱡ puk, Got kʉn muⱡʉi  
\io1 3:1-3:5 - Tʉn nga nʉk, Got kʉn atinga rundʉi  
\io1 3:6-3:15 - Wamp pora kongun itʉi  
\io1 3:16-3:18 - Na nga memp ik ei  
\c 1  
\s1 Pol Nga Mon Akil Tepa Ropa, Tesalonaika Wamp Kʉⱡ Ngurum  
\p
\v 1-2 Tʉn, Pol Sailas kʉn Timoti kunda moⱡpʉn, mon ropʉn, enim Got Tipam ei kʉn, Nuim Jisas Kraist raⱡ nga wamp met Tesalonaika Got nga rapa tenda ila mormin wamp mbʉ kʉn, mon rop ngunmʉn. Tʉn nga Tipam Got ei kʉn, Nuim Jisas Kraist raⱡ nga wamp poⱡ ti uⱡ na, moⱡpa kundi uⱡ kai mbʉ, enim kʉn piyangga!   
\s1 Jisas Yant Omba Wamp Kʉmp Tʉmba  
\p
\v 3 Angmʉn, ui mbila rʉk rʉk, enim nga nimbun Got kʉn angge nimin mint i itmin ei, tʉn kapⱡa itmin mint. Nambuⱡ emel, enim nga mondpa pili orunga kanmin ei, ronduⱡ puⱡnga, wote wamp numan ngui uⱡ ei, enim wamp tenda tenda nimba ei kʉn tepa oⱡa omba ou ndunʉm.  
\v 4 Ei nga nimbun, tʉn ndi, Got nga rapa tenda ila wamp mbila enim nga kaip nʉndʉtmin. Ei, enim akup ui mbila rʉk rʉk, uⱡ kit onum mbʉ, wangga nʉk pilik kelik, mindil tʉk mondpa pili uⱡ ei, ronduⱡ mundʉk amʉnmʉn. Ei nga, tʉn ndi, enim nga kaip nʉndʉnmʉn.   
\p
\v 5 Enim nga enmin uⱡ kʉⱡ, Got ndi, tʉn orunga mel ndupa, elim ndi, tʉn apʉrpa tʉpa, uⱡ kun mbila mint tʉpa mundrum. Enim mindil tʉk, wote Got nga mbi paka rondʉnmin uⱡ ei ndi, enim elim nga wamp tʉpa mumuk rui uⱡ mbʉ enim ngomba ei nga, enim etpa mura mondnʉm.  
\v 6-8 Got ndi, uⱡ kun kai ti etmba ei, enim mindil ngung wamp mbʉ, Got ndi, wamp mbʉ, punt ropa mindil ku ngumba. Wote, enim nga kep, tʉn nga kep, mbun tʉtmʉn uⱡ mbʉ tʉpa mundpa, numan kai mbʉ ngumba. I etmba uⱡ ei, tʉnggʉt Nuim Jisas, elim nga anggelo ronduⱡ pi mbʉ kʉn, muⱡ kona molk, ekit wangina, ndip anmbil mam ti ndi omba, Got mondʉk pili napʉtmʉn wamp mbʉ kʉn, omba Nuim Jisas nga Rʉnang Ik Kai ei, teng ndui nandʉrmin wamp mbʉ, ndip ndi nangga, mindil mint nok muⱡing.  
\v 9 Mindil ting ei, uⱡ nga kʉnt nga pepa mint mba. Nuim ei nga rʉngaⱡ ronduⱡ pi tem ila nondpa, muⱡi nʉmbʉⱡing.  
\v 10 Nuim Jisas yant omba, Got nga wamp mbʉ kʉn, mbi ou tʉmba om ei kʉn, elim nga mbi paka runding, mondpa pili wamp mbʉ, numan kai pilik ambulk palk muⱡing. Enim kunda ila muⱡing ku, nambuⱡ emel, tʉn ndi, Rʉnang Ik Kai nimbun ngurmʉn kʉⱡ, mondʉk pilik pep rorung ei nga.   
\p
\v 11 Ei nga, nimbun enim nga rʉk rʉk atinga mint rondʉrmin. Got ndi, enim wi ropa titim ei, elim ndi, enim pek molk, kai mundeing nimba pitim ei mel pek muⱡʉi! Elim nga ronduⱡ ila, enim uⱡ kai mbʉ, itmin nʉk pilik, numan ngurmin uⱡ mbʉ, elim ndi, etpa ronduⱡ mundangga. Wote, enim Nuim Jisas kʉn mondʉk pilik, uⱡ mat itmin nʉk pilʉng mbʉ, elim ndi, etpa kapⱡa indangga iteing.  
\v 12 I etʉk eng uⱡ ei ndi, enim Jisas nga mbi paka rundangina, wote elim ndi, enim i ku etmba. Tʉn nga Got kʉn Nuim Jisas Kraist raⱡ nga wamp poⱡ ti uⱡ mbʉ, enim kʉn kan piyangga!   
\c 2  
\s1 Uⱡ Kit Etʉm Wu  
\p
\v 1-2 Nuim Jisas Kraist yant wangga, tʉn mondʉp pili wamp mbʉ pora, elim kʉn mbun mou tenda ila muⱡmin uⱡ ei, angmʉn, na ndi, enim ronduⱡ mundʉp waldʉp nʉnt. Ei, enim wamp na ti ndi, ik pai nomba muna, wote tʉn ndi, ya mon rop ngurmʉn nimbila nga tila ik ti pepa mel, Jisas nga omba ui ni kor, ekit om nʉk pilik, enim nga numan orunga mepa ʉndi nʉndangga, mon!  
\v 3 Wamp ti, kandʉk kont tangina, enim tʉpa, tiki pindi nʉpʉndangga, mon! Jisas omba ant ei, unt ekit ui nʉwangga, wamp minal Got kʉn tʉk mbuⱡ ngangina, wote uⱡ kit mbʉ nga puⱡ wu, ndip kona tʉmba wu ei omba, ui ei kʉn, ku mot nimba.  
\v 4 Ei kʉn ku, wamp nga uⱡ kai mat etʉk, Got nga mbi paka rondʉk eng uⱡ mbʉ, mon nimba, kumba pendʉmba. Elim nga mbi paka ropa mepa oⱡa mba, wote Got nga manga wingti ou ila mukʉr mba, elim Got mor nimba ila moⱡmba ku.   
\p
\v 5 Enim pilik mbi ndonmin muna mon? Ya uⱡ mbʉ, na enim kʉn rʉp rop murmʉn ei kʉn, enim kundʉp nʉmp pora ndur.  
\v 6 Uⱡ kʉⱡ, akup ui ila ekit oⱡnga ei, wote mel ti ndi imp monum ei, enim pilik mormin. Wu kit ei, Got ndi, ui ngum tila mint mot nimba.  
\v 7-8 Uⱡ kit mo ropa tetʉm mbʉ, kongun elinga mel enim. Wote, nʉnt uⱡ mbʉ, unt ekit ui nawʉmba, imp monum wamp ei ndi, ambuⱡpa mint muⱡangga mba, wu kit ei, tʉnggʉt tʉk mundung ei kʉn, wu kit ei, kuimp tepa mot nangga kʉn, wote Nuim Jisas yant omba. Wu kit ei, Nuim Jisas elim nga keta muⱡnga ei ndi, ropa kondpa, wote elim nga uⱡ rʉⱡang pi mepa om ei ndi, wu kit ei, ama uⱡ nga kʉnt nga ropa etpa, kit mondʉmba.  
\v 9-10 Wu kit ei, Seitan nga ronduⱡ ei, tʉpa mepa omba, uⱡ rʉpndi elpa elpa mat etpa, wote wamp kit muⱡing mbʉ, uⱡ rʉpʉndi kol ropa mbʉ, ou ndupa ora ndumba, wamp kit muⱡing. Ei nambuⱡ emel, Got nga uⱡ kupa, en enim etpa tʉmba uⱡ kun mbʉ, numan nguk rukʉr ti natʉtʉng.  
\v 11 Uⱡ puⱡ ila nga, Got ndi, uⱡ kol mbila pep rormʉn wamp mbʉ, pilik kelik pep reing nimba, ronduⱡ ti, wak rondʉmba.  
\v 12 Itangga kʉn, punt ropa ngumba uⱡ ei, uⱡ kit mbʉ, numan nguk pilik kelik eng wamp mbʉ, kit muⱡing.   
\s1 Enim Ronduⱡ Puk Got Kʉn Muⱡʉi!  
\p
\v 13 Angmʉn, Nuim ei ndi, enim numan ngorum ei nga, tʉn Got kʉn rʉk rʉk angge nʉtmin. Ei nambuⱡ emel, Got ndi, etpa ti uⱡ ila, enim kuimp tepa rukʉr titim. Wote, enim nga mondpa pili orunga mek puk, uⱡ kupa mbila tetʉng ei, Muⱡnga Wingti nga ronduⱡ ila, enim etpa, Got nga wamp wingti kʉⱡ, mondʉmba pilpa itim.  
\v 14 Tʉn, Got nga Rʉnang Ik Kai ei, enim nimbun ngurmin nila, Got ndi, enim wi ropa titim. Wote, Nuim Jisas Kraist nga uⱡ eng nui kai tetʉm mbʉ, enim elpa elpa mok rok, tʉk ʉmbʉⱡeing nimba itim.  
\v 15 Ei kʉn, angmʉn! Ya tʉn mon rop ngunmʉn ila kep, wote unt ik mbo inditmin nimbila kep, en enim nga mondpa pili orunga, ronduⱡ puk molk, uⱡ kupa mbʉ, ambulk gi ndʉi!   
\p
\v 16-17 Tʉn nga Nuim Jisas Kraist elim kʉn, Wuta Got tʉn numan ngumba. Wote, elim nga wamp poⱡ ti uⱡ ila, tʉn uⱡ nga kʉnt nga kont mul uⱡ ei, tʉmin nimba ronduⱡ ngurum wu ei ndi tangga, enim keⱡ rundi rundi molk, enim nga numan orunga, etpa ronduⱡ mundangga, ik kai mbʉ nʉk, uⱡ kai mbʉ, etʉk mek pʉi!   
\c 3  
\s1 Tʉn Nga Nʉk Got Kʉn Atinga Rundʉi!  
\p
\v 1 Angmʉn, ya mon ei pora nimba ila, enim tʉn nga nʉk, Got kʉn atinga rangina, ya Wu Nuim ei nga ik mong kai kʉⱡ, enim kʉn tenim ei mel ku, kona wei mbila, kʉmp kʉm tepa ndaip nimba, kapⱡa etangga! Rʉnang Ik Kai kʉⱡ, mbi muⱡangga!  
\v 2 Wote, ti pundmong wamp moⱡung kona mbila, Got ndi, tʉn etpa tangga nʉk pendʉk, atinga rʉi! Enim pʉtmin ni, wamp puⱡi, Got nga Rʉnang Ik Kai kʉⱡ, mondʉk pili napʉtmin ni ka!   
\p
\v 3 Wote, Wu Nuim ei, uⱡ kupa mbʉ mint etʉm. Ei ndi, enim ronduⱡ ngumba rʉp itangga! Wote wu kit ei ndi, enim omba, ti nʉtangga!  
\v 4 Tʉn Nuim ei ndi, numan ronduⱡ nguⱡnga pʉnmin ei, enim iteing nitmin uⱡ nimbʉ etmin. Ni mel ku, akup itʉi nʉnmin uⱡ mbʉ, etʉk mint muⱡʉi!   
\p
\v 5 Nuim ei ndi, enim nga numan orunga tʉpa kun mundangga, Got nga wamp kaimp kul uⱡ mbʉ kʉn, wote Jisas mbun titim mel ku, enim mbun tʉnmin ei pilik, mbi nduk kʉn, ronduⱡ mundʉk muⱡʉi!   
\s1 Wamp Pora Kongun Itʉi!  
\p
\v 6 Angmʉn, Nuim Jisas Kraist nga mbi ila, enim kʉn ronduⱡ mundpʉn ik ti nʉnmin ei, angmʉn mat, tʉn ndi, molk kai mundeing nimbun ik man ngurmʉn mbʉ, pep rui narʉk, enimp mondʉk enmin wamp mbʉ kʉn, ruⱡ etʉk muⱡʉi!  
\v 7 Enim pilik pora nduk mormin ei, tʉn enim kʉn rʉp rop murmʉn ni kʉn, tʉn enimp mundi nʉmʉndʉrmin ni mel, enim uⱡ ei mel ku itʉi!  
\v 8 Enim rʉng na mat, tʉn ngorung ndam, wei ti nʉtʉtmʉn mon, mel ti ngumbun ku titmʉn. Tʉn rumbuldi, rʉnggilmʉ raⱡ, kongun nduip nduip ngumbun itmin ei, wamp ti etpʉn mbun ngui ngʉngmin pilpʉn itmin.  
\v 9 Tʉn enim nga rʉng na mbʉ, wei noⱡmina ei, wote iti nʉtʉtmʉn. Ei nambuⱡ emel, enim kongun etʉk, rʉng neing nimbun etpʉn ora ndurmʉn.  
\v 10 Unt, enim kʉn murmʉn ei kʉn, tʉn enim kundpʉn nimba mel, “Wamp nam ti, kongun iti natʉm ndam, rʉng nui nʉnangga, mon!” nʉtmʉn.   
\p
\v 11 Tʉn i nitmin ei nambuⱡ emel, enim mormʉn ruk ting ila, wamp mat kongun iti natʉk, enimp mondʉk wamp mat nga etmin uⱡ mbila, rok nde pendʉk andʉrmin ila kandʉp nʉtmʉn.  
\v 12 Nuim Jisas Kraist nga mbi ila, wamp kʉⱡ kʉn, ronduⱡ mundʉp nʉnmʉn ei, ropa nde ti wamp mbʉ, koⱡ etʉk molk, rʉng mbʉ, en enim kongun etʉk kandʉk tʉk neing.   
\p
\v 13 Wote angmʉn, enim uⱡ kai mbʉ iting ei nga, enimp mundi nʉmʉndʉi!  
\v 14 Enim int mormin ila wamp nam ti, ya mon ropʉn ngonmʉn ik ei, pep rui narʉm ndam, wamp ei kandʉk ok, tʉk muⱡangina, elim pipil kuⱡangga!  
\v 15 Wote, wamp ei tʉk, enim nga el rui wamp mel rundi nʉndʉi! Enim nga wamp ʉngʉn mel randʉk, man nguk itʉi!   
\s1 Na Nga Memp Ik Ei  
\p
\v 16 Moⱡpa kundi uⱡ mbʉ nga puⱡ petʉm Wu Nuim ei ndi, enim ui mbila rʉk rʉk namba uⱡ eng mbila, moⱡpa kundi numan ei ngangga! Wote Nuim ei, enim kʉn muⱡangga mint!   
\p
\v 17 Na nga ki ei ndi, mon ya ei ront! Na Pol ei ndi, enim kun rawe ent. Ei kʉn, na nanim mon ror mbila pora, tip timal mel etʉp, mbi ror ei mel ront.   
\p
\v 18 Nuim Jisas Kraist nga wamp poⱡ ti uⱡ mbʉ pora, enim kʉn kan piyangga!