\id 1TI - Melpa NT [med] -Papua New Guinea 1995 (DBL 2014) 
\h 1 Timoti 
\toc2 1 Timoti 
\toc1 1 Timoti 
\toc3 1 Tim 
\mt1 1 TIMOTI  
\imt1 KUIMP TEPA IK KɄⱠ  
\is2 Ya Buk Ei Nga Puⱡ Ei:  
\ip Ya Buk ei, Pol ndi, Timoti mon ropa ngumba, ambuⱡpa pʉl uⱡ mbʉ nga mbo rundrʉm.  
\is2 Ya Buk Ei, Nam Ndi Rurum:  
\ip Pol ndi, kuimp tepa Timoti mon ropa ngurum.  
\is2 Mon Ropa Nam Ngurum:  
\ip Listra wu Timoti titim.  
\is2 Ui Nant Ila Rurum:  
\ip Pana ei, Kraist metʉng ei kʉn mbuldung orunga pana 64 (AD.) Pol ndi, mon ropa, Rom Masaroniya kuimp tepa kan manga Rom ila pitim.  
\is2 Ik Ronduⱡ: 1 Timoti 4:12  
\ip Wote, wamp mbʉ ndi, nim kandʉk kʉn, kang wu kokila ti nʉk pilik, pei mundi nʉmʉndeing. Ei mon! Nim ndi, wamp mbʉ, nombuⱡa kun ʉndi uⱡ, omba ik kun ni uⱡ, wamp numan ngui uⱡ, mondpa pili uⱡ na, uⱡ eng nui na mbʉ nga nim ndi, etkʉn ora ndupʉn mbo rundi.  
\is1 IK PENG KɄⱠ  
\iot Rump  
\io1 1:1-1:2 - Pol ndi, Timoti mon kuimp tepa ropa ngurum ei  
\io1 1:3-1:11 - Ik mbo wu kol mbʉ nga tʉk mendʉk muⱡi  
\io1 1:12-1:20 - Got ndi, Pol kaimp kurum  
\io1 2:1-2:15 - Got nga mbi paka ruing ei mel  
\io1 3:1-3:7 - Manga Wingti rʉp wu mbʉ nga man ik  
\io1 3:8-3:13 - Manga Wingti tʉpa rʉpʉndi wu  
\io1 3:14-3:16 - Uⱡ mam ti mo ropa titim  
\io1 4:1-4:5 - Ik kol nga ik mbo wu  
\io1 4:6-4:16 - Jisas nga kongun wu kai  
\io1 5:1-5:25 - Mondpa Pili wamp tʉkʉn rʉpʉndʉn ei mel  
\io1 6:1-6:2 - Kindmant wamp mbʉ nga ik  
\io1 6:3-6:10 - Kandpa kum pindi uⱡ  
\io1 6:11-6:21 - Pol ndi, Timoti man ngurum  
\c 1  
\s1 Pol Ndi, Timoti Mon Kuimp Tepa Ropa Ngurum Ei  
\p
\v 1 Na Pol, Kraist Jisas nga nombuⱡa rung wu ei, Got tʉn nga Etpa Ti Wu ei kʉn, wote Kraist Jisas tʉn ndi, nokundpʉn pilpʉn mormun ei kʉn, kunda nilinggila, mon ei ront.   
\p
\v 2 Kang wu Timoti, na nga mondʉp pili uⱡ ila, koip purum ei kʉn, mon rop mundʉp nʉmp mel, Got Tipam ei kʉn, wote tʉn nga Wu Nuim Kraist Jisas nga wamp poⱡ ti uⱡ ei kʉn, wamp kaimp kul uⱡ ei kʉn, wote numan wang ni uⱡ mbʉ pora, nim kʉn kan piyangga!   
\s1 Ik Mbo Wu Kol Mbʉ Nga Tʉk Mendʉk Muⱡi  
\p
\v 3-4 Na wʉl Masaroniya kona ou ila, mbi omp, nim kʉn ronduⱡ mundʉp, ya Episis kona peng ou ila, mul nit ni mel ku, akup nim kona ila ku mul nʉnt. Ik mbo wu mat, ik kol rormin mbʉ, man ngukʉn muⱡi! Wamp mbʉ, kang timan ronmin mbʉ kʉn omba, en enim nga anda kouwʉmʉn mbʉ nga mbi ruⱡ mat, mon rok tek mormin mbʉ, wak reing ni! Ik mbʉ ndi, wamp mbʉ nga numan ila roⱡnga, ik palk etmin. Got nga numan pʉtʉm uⱡ ei, mondpa pili uⱡ ila mint pʉtmin.   
\p
\v 5 Ik ti ya ronduⱡ mundʉp nʉnt ei, wamp numan ngui uⱡ ei. Uⱡ ei, wamp nga mundmong ila eng nomba, numan ei piral nimba, mondpa pili ronduⱡ purum. Ei kʉn, wamp numan ngui uⱡ ei, kupa etʉm.  
\v 6 Wamp mat ndi, uⱡ kai mbʉ wak rok, en enim nga ik roldʉnga mbʉ, nʉk andurmin.  
\v 7 Wamp kʉⱡ, en enim Got nga mi ik mbo wu muⱡmin nʉk pilik, ik ronduⱡ mundʉk nʉtmin. Ei wote, en enim nga ik na, uⱡ na mat ou nduk etmin mbʉ, tʉk mindi namʉndʉtmʉn.   
\p
\v 8 Tʉn pʉtmʉn, mi ik kʉⱡ, elim petʉm ei mel pep rumʉn ndam, kai etmba.  
\v 9-11 Ik ei, kupa mint tʉk mundʉiya! Got nga mi ik petʉm ei, ya wamp kai mbʉ nga mon. Mi ik ei ya, ik tʉpa roi ndui wamp, kʉndʉp nui wamp omba, Got mondpa pili nʉpili wamp, uⱡ kit etmin wamp mbʉ kʉn, wamp mbi paka rui narʉk, Got nga uⱡ kai mbʉ, tʉk mindi namʉndʉk etmin mbʉ kʉn, wamp nam ti, elim nga mam tipam raⱡ kep, wote wamp elpa mat rok kondʉk etmin mbʉ kʉn, wote wu ndi, wu kʉn wapra rui uⱡ, amp ndi, amp kʉn wapra rui uⱡ, wamp kindʉp nui uⱡ, ik kupa ei, wak rok, ik kol rok etmin wamp mbʉ nga petʉm. Wote, mi ik kupa ei, Got wu eng nui ei nga Rʉnang Ik Kai ei, na neimp nilinga mbem ik ei, nʉmp mor.   
\s1 Got Ndi, Pol Kaimp Kurum  
\p
\v 12 Na ndi, tʉn nga Nuim Kraist Jisas kʉn angge nʉnt. Ei nambuⱡ emel, na wu kai ti nimba pilpa, na ronduⱡ ngumba, na elim nga rʉnang ik kai ei, neimp nimba kandpa titim.  
\v 13 Unt na ndi, elim ik kit nʉmp ngump, elim nga wamp mbʉ rop kondʉp, wote ik mura ngump it mbʉ, Got ndi, na kaimp kurum. Ei nambuⱡ emel, na Got mondʉp pili napilip, wote uⱡ mbʉ tʉp mindi namʉndʉp it.  
\v 14 Nuim Got ndi, elim nga wamp pol ti uⱡ ei na minal ngumba, wote mondpa pili uⱡ ei kʉn, wamp numan ngui uⱡ raⱡ pendpa ngurum. Ei mel elinga, tʉl akup Kraist Jisas kʉn rʉp rop morumbʉⱡ.  
\v 15 Ya ik kʉⱡ, ama kupa mint, pilik kai itʉi! Kraist Jisas ya mʉi kona urum ei, wamp kit mbʉ, etpa tʉmba pilpa urum. Wamp kit mbʉ nga, na ama uⱡ kit minal it wu ei.  
\v 16 Wote, uⱡ puⱡ ya ila mint, Got ndi, na kont kurum. Uⱡ ei, Nuim Jisas ndi, na etʉp timp nimba nokundrum uⱡ ei, na kʉn etpa mot ndurum. Uⱡ ei, wamp akil teng mbʉ ndi kandʉk, Got mondʉk pilik, wote uⱡ nga kʉnt nga kont mul uⱡ ei ting.  
\v 17 Wu Nuim Mumuk ei, uⱡ nga kʉnt nga Nuim ei morum. Got ei, rak rʉk kont morum, elim kʉni nakʉndʉrmʉn, wote elim nga mbi ou ei kʉn, uⱡ mon pi mbʉ elim kʉn, uⱡ nga kunt nga pemba ei nga piyangga! Ei kupa.   
\p
\v 18 Kang wu Timoti nim kopʉt man ngump namp, pai nok nʉtʉng ik ni kʉⱡ, nim nʉmp ngur ik ni kʉⱡ, pilkʉn tʉkʉn, el ronduⱡ mundkʉn iti!  
\v 19 El ila mondpa pili uⱡ ei kʉn, numan kun pindi uⱡ raⱡ, akilma iti! Wamp mat ndi, numan kun pindi uⱡ ei, tʉk pei mundʉk elingina, en enim nga mondpa pili orunga, etpa kit morum.  
\v 20 Wamp kʉⱡ kʉn, ya wu Imeneyas kʉn, Aleksanda raⱡ, Got kʉn ik kit nʉtʉnggil ni, Seitan kʉn ngump rukʉr ndur ei, wu raⱡ ropa elik rundangga nʉmp it.   
\c 2  
\s1 Got Nga Mbi Paka Ruing Ei Mel  
\p
\v 1-2 Kuimp tep na ik ti ronduⱡ mondʉp, kundʉp nimp ent ei, nim ndi, wamp mbʉ nga pora, atinga rondkʉn omba, Got ndi, wamp mbʉ kaimp kuⱡangga ni, wu nuim na, wu ou mbʉ pora, wote tʉn moⱡpʉn kai mondmin uⱡ kun kai mbʉ itʉmʉn, nʉkʉn atinga rundi!  
\v 3-4 Uⱡ ei, Got tʉn nga Etpa Ti Wu ei ndi, kandpa kai pʉtʉm. Got elim kʉn rukʉr puk, ik kupa ei pilik, mbi ndeing nimba pʉtʉm.  
\v 5-6 Ei kʉn, Got tenda ei morum. Wote Got kʉn, wamp mbʉ nga ruk ting ila morum wu ei, Kraist Jisas, wamp mbʉ pora, etʉp timp nimba kurum ei ndi, tʉn rop ropa tilinga, akup tʉn elim nga wamp mendpʉⱡ kʉⱡ mormin. Uⱡ ei ndi, ora ndupa, Got ndi, tʉn wamp mbʉ pora, rukʉr timp nimba itim uⱡ ei, elim to ropa pinditim ui ila kʉn Jisas kurum.  
\v 7 Uⱡ puⱡ ila, na Got nga ik kupa ei kʉn, mondpa pili uⱡ ei kʉn, ik puⱡ nʉmp ngump, wote nombuⱡa rung wu ei, muⱡeimp nimba, God ndi, na kandpa titim. Na kupa nʉnt, ik kol rui narʉnt. Na ik mbo wu ei ndi, nʉnt ik ei, enim wamp rʉⱡaip elpa mbʉ ndi, ik kupa ei mondʉk pilʉi!  
\v 8 Muⱡ kump mbila pora, wu mbʉ popʉⱡ kandʉk ti natʉk, wingti ralk molk, ki ru rok atinga reing nʉmp nʉnt.  
\v 9 Wote, uⱡ ti pʉnt ei, amp mbʉ pora numan mbo pilik, en enim nga rarmin mel mbʉ ralk tʉtʉpal na, ki rung na, ku moni ou ndupa purum mel mbʉ kʉn, kʉng nin kʉni uⱡ etmin mbʉ pora, wak rʉi!  
\v 10 I etʉk, kʉng moke iti mel, Got nga kongun kai mbʉ etʉk elim nga mbi paka rʉi!  
\v 11-12 Amp mbʉ raka nʉk molk, rʉk rʉk ik teng mint ndeing. Amp ndi, wu ik mbo endʉk, wote wu ei nga ronduⱡ ei, tʉpa mana ndupa, iti nʉtangga mon nʉnt. Amp ei, elim raka nimba muⱡangga.  
\v 13-14 Ei nambuⱡ emel, Andam kuimp tepa mim itim. Wote, Seitan ei ndi, Andam kuimp tepa oⱡa tʉpa kʉni nʉkʉndrʉm, mon! Amp ei, kuimp tepa ⱡawa itim.  
\v 15 Ei kʉn, amp mbʉ ndi, kangambuⱡa mindil nok mek, wote uⱡ kun kai mbʉ etʉk, Got mondʉk pilik numan ngok, wingti ralk molk, pilpa kungʉndi kai ei tʉng ndam, Got ndi, en enim rukʉr tʉmba.   
\c 3  
\s1 Atinga Manga Wingti Rʉp Wu Mbʉ Nga Man Ik  
\p
\v 1 Ik kupa ei, petʉm mel nʉnt, wu ti, elim Got nga rapa tenda ila wamp mbʉ nga rʉp wu ti, muⱡimp nimba pilim ndam, kongun kai ei etmba.  
\v 2-3 Got nga rapa tenda wamp mbʉ, rʉp itimp nimba pilim ndam, wamp nga kuimp keta ila, elim wu kai, ⱡawa ti mon, amp tenda ti tangga, popʉⱡ mundi namʉndpa, elim nga orunga rʉp etpa kai mondpa omba, kona elpa wamp mbʉ, elim nga manga ila rawe etpa tʉpa, ik mbo endpa, nu ronduⱡ mbʉ nui nandʉpa, koma pou raⱡ tepa, kara pi napʉpa, ku moni numan ou ndupa, ngui ngʉngangga mon!  
\v 4 Wu ei, elim nga mang kona amp kangambuⱡa wamp mbʉ, rʉp etpa kai mondpa, wote elim nga kangambuⱡa mbʉ man ngangga, elim tʉk ou nduk ik kum teing.  
\v 5 Wu ti, elim nga amp kangambuⱡa wamp mbʉ, rʉp etpa kai mundi namʉndʉm ndam, wote, Got nga rapa tenda ila wamp mbʉ, etpa rʉp etmba mel nant?  
\v 6 Wu ei, kokila, numan ropʉl rom ti mon. Nambuⱡ emel, Seitan ei, itim ei mel, elim nga kʉng orunga mepa oⱡa pum ndam, mba uⱡ kit ila mana mba.  
\v 7 Wu ei, mbo wamp ekit orunga mbʉ ndi, tʉk ou nduk etmin wu ti. Ei nambuⱡ emel, elim wamp mbʉ nga pipil kuⱡi naⱡʉmba, wote elim, Seitan nga mil ila rui narʉmba.   
\s1 Atinga Manga Tʉpa Rʉpʉndi Wu  
\p
\v 8-9 Got nga rapa tenda tʉpa rʉpʉndi wu kʉⱡ molk, uⱡ kun kai mbʉ etʉk, ik kun mbʉ nʉk, nu nok, kupʉr rui narʉk, omba wamp ti nga kng mel mbʉ kandʉk, kum pindi napʉndʉk, wu kʉⱡ kapⱡa, Got kʉn mondpa pili uⱡ kupa ei, ambuⱡ gi nduk, numan orunga eng nangga muⱡeing.  
\v 10 Kuimp tek wu kʉⱡ, kongun ila tʉk mondʉk kʉnangina, kongun etʉk kun mundung ndam, wote wak rangina, kongun iteing.  
\v 11 Wu kʉⱡ nga ambʉmʉl kʉⱡ, uⱡ ei mel ku etʉk molk, kai mondʉk, ik mbuldung orunga ni nandʉk, uⱡ kai mbʉ etʉk, wote ik kupa mbʉ nʉk iteing.  
\v 12 Got nga rapa tenda ila tʉpa rʉpʉndi wu ei, amp tenda ti tʉpa, wote elim nga mang kona amp kangambuⱡa mbʉ, rʉp etpa kai mondpa itangga.  
\v 13 Kongun etʉk kai mondurmʉn wu mbʉ, wamp ndi, tʉk ou ndangina, wote Jisas Kraist nga Rʉnang Ik Kai ei, en enim mondʉk pʉtmʉn ei, ronduⱡ mundʉk ning.   
\s1 Uⱡ Mam Ti, Mo Ropa Titim  
\p
\v 14 Na mon ei, rop ngunt ei kʉn, nim nondpa omp kʉnimp ei nga, wote ya ik kʉⱡ, unt man ngamp.  
\v 15 Wote, na nondpa ui nʉwʉnt ndam, ya mon ei ndi, tʉn Got kʉn ronduⱡ mundpʉn muⱡmin ei mel, tʉpa ora ndumba. Got rʉk rʉk kont morum ei nga rapa tenda ila mormin wamp mbʉ, manga paka rumʉnt na ei mel, ik kupa ei koma rok mormin.  
\v 16 Wamp ti ndi, tʉn Got kʉn mbi paka ronmʉn uⱡ ei, oⱡa oⱡa tetʉm ni nanʉmba. Ik mo ropa pinditim, akup pʉnmʉn ei, ik mam ti. Wu ei, wamp kʉng tʉpa, Muⱡnga Wingti ei ndi, elim nga puⱡ ei, tʉpa mot ndurum. Ei kupa, wote anggelo mbʉ ndi kandrung. Wu ei nga ik puⱡ mbʉ, ya mʉi kona ila nʉk ngurmʉn. Mʉi kona wamp mbʉ ndi, ik ei mondʉk pʉtʉng. Wote wu ei, muⱡ kona ila oⱡa titim.   
\c 4  
\s1 Ik Kol Nga Ik Mbo Wu  
\p
\v 1 Muⱡnga Wingti ei ndi, nʉtʉm pʉtmʉn ni, wote ui mbila, wu mat en enim nga mondpa pili uⱡ ei, wak rok kʉn, ik kol muⱡnga mbʉ nga, man ik kep, nui mbʉ pep ruing.  
\v 2 Man ik mbʉ, ik kol rormin wu mbʉ kʉn, tepa orum, omba, wu mbʉ nga numan ila uⱡ kit mbʉ mint petʉm. Ei nga, uⱡ etmin mbʉ nga pipil kuⱡi nakʉrmin.  
\v 3 Wu mbʉ ndi, nʉk mel, amp tʉk, wote amp wu puk etmin uⱡ ei, ⱡawa etmin ning. Wote rʉng mat, mi rok nui nʉni ning. Ei wote, Got nga, elim nga ik kupa mondʉk pʉtmin wamp mbʉ, elim kʉn angge nʉk, rʉng mbʉ tʉk, neing nimba itim.  
\v 4-5 Got ndi, itim mel mbʉ pora, kai mint mel tenda na ti, kit ni nʉnmin. Mel mbʉ tin etkʉn, Got kʉn angge ni! Ei nambuⱡ emel, atinga ei kʉn, Got nga ik ei kʉn, Got nga kuimp keta ila etpa eng nondrʉm.   
\s1 Jisas Nga Kongun Wu Kai  
\p
\v 6 Nim ya ik mbo indʉt nʉkʉⱡ mek pukʉn, nim nga wamp kʉⱡ nʉkʉn ngun ndam, nim Kraist Jisas nga kongun wu kai. Nim Got mondʉk pilkʉn, wote uⱡ kupa etʉn ni ndi, nim ronduⱡ ngurum.  
\v 7 Wamp nga kang timan nʉwʉ mat rormin uⱡ mbʉ, nim ndi, tʉkʉn mbuⱡ ngokʉn, Got nga uⱡ kun kai mbʉ iti!  
\v 8 Nim pʉtʉn ni, nim nga kʉng orunga uⱡ mat etʉn ni ndi, nim orunga kot tʉpa rapʉndʉmba. Wote nim ndi, Got nga uⱡ mbʉ nga mat ou ndukʉn in ndam, akup nga ui ila kep, wote ui ila kep, nim minal tʉpa rapʉndʉmba.  
\v 9-10 Ya ik kupa kʉⱡ, wamp pora pilik tʉk, wote mondʉk pileing. Got wamp Rukʉr Tʉtʉm Nuim ei, tʉn kupa mondpʉn pitmin wamp mbʉ, rukʉr titim. Tʉn ya mondpʉn pʉnmʉn ei, Got kont morum, wote tʉn etpa tʉmba. Ei nga, tʉn ya kongun ronduⱡ mundpʉn enmin.  
\v 11 Ik mbʉ, wamp mbʉ nʉkʉn ngukʉn, wote pep reing nʉkʉn mbo indi!  
\v 12 Wote, wamp mbʉ ndi, nim kandʉk kʉn, kang wu kokila ti, nʉk pilik pei mundi nʉmʉndeing. Ei mon! Nim ndi, wamp mbʉ, nombuⱡa kun ʉndi uⱡ, omba ik kun ni uⱡ, wamp numan ngui uⱡ, mondpa pili uⱡ na, uⱡ eng nui na mbʉ nga, nim ndi, etkʉn ora ndupʉn, mbo rundi.  
\v 13 Akup ui ila, na nokundkʉn molkʉn mel, wamp mbʉ, Got nga Rʉnang Ik Kai mbʉ nʉkʉn ngukʉn, mbo endkʉn mint muⱡi!  
\v 14 Nim unt ik pai nok nʉk etʉng, wote atinga manga kongun wu mbʉ ndi, nim ambulk memp pendʉk, atinga rondʉk etʉng ronduⱡ ni, wak rui nʉri!  
\v 15 Wote nim ndi, uⱡ mbʉ pilkʉn molkʉn rʉk rʉk rʉⱡaip rokʉn, kongun itana, oⱡ omba kai itangga, wamp mbʉ ndi, kandʉk kai piling.  
\v 16 Nim nga nombuⱡa mam andkʉn, wote ik nʉkʉn in ei, tʉk mendkʉn ʉndʉn ndam, nim nga kongun in ei ndi, nim etpa tʉmba. Wote, nim nga ik nʉtʉn ei, pʉtʉng wamp mbʉ, etpa tʉmba ku.   
\c 5  
\s1 Mondpa Pili Wamp Tʉkʉn Rupʉndʉn Ei Mel  
\p
\v 1-2 Wu ronduⱡ mbʉ, ik mura ngui ngʉngi, wote wu mbʉ tʉkʉn, nim nga tipanʉm mel rundi. Kang wu mbʉ tʉkʉn, nim nga ʉngʉnʉl mel randkʉn. Wote, amp manʉmʉl tʉkʉn, nim nga manʉmʉl mel rundi. Amp wendʉp kʉⱡ, numan kun kai ila, nim nga amp kimʉnʉl mel rundi.  
\v 3 Amp wiya mendpʉⱡ kʉⱡ, kandkʉn tʉkʉn ou ndui.  
\v 4 Amp wiya ti, elim nga kangambuⱡa na mat kep, wote elim nga kangambuⱡa apʉmʉl na mat, tepa moⱡum ndam, kangambuⱡa kʉⱡ ou etʉk, wote elim nokundʉk kai iteing, wote punt mat morum nda ngok. Uⱡ i etmin ni, wu Got kandpa kai pʉtʉm.  
\v 5 Amp wiya munduⱡina ti, elim mendpʉⱡ morum ei, elim nga numan ei, Got kʉn tepa omba, rumbuldi rʉnggilmʉ raⱡ rʉk rʉk, Got kʉn atinga ropa, elim tʉpa rʉpʉndangga nʉtʉm.  
\v 6 Wote, amp wiya ti, elim mʉi kona uⱡ mbʉ nga ambuⱡpa paⱡpa andrʉm ni, min orunga korum.  
\v 7 Amp kʉⱡ, ya man ik kʉⱡ nʉk ngana, wote wamp mbʉ ndi kandʉk, ⱡawa mundi nʉmʉndeing.  
\v 8 Wamp ti, elim nga wamp mema kan ti, rʉp etpa kai iti natʉm ndam, wamp ei nga mondpa pili ti mon. Ei wamp ekit orunga iti natʉtmʉn ei mel etʉm.  
\v 9-10 Amp wiya nga mbi rok, mana nduin rʉⱡaip ila, amp ya i etpa, mat nga mint rok mana ndui. Amp ei, pana 60 ndi oⱡa ndupa, wu tenda ti mint purum. Uⱡ kai mat mint etpa, elim nga kangambuⱡa mbʉ, rʉp etpa kai mondrum. Omba wamp tʉma ong mbʉ, rawe etpa tʉpa, kongun etpa wamp mbʉ, tʉpa rapundupa, Got nga kongun wu mbʉ, kʉmp ⱡumʉi rondpa, wote wamp mong tʉk mormin mbʉ, tʉpa rapundpa etʉm amp ei nga mbi rui!   
\p
\v 11-12 Wote, kang amp ti, wiya moⱡum ndam, mbi rok mana ndui nʉndi! Amp ei, elim wu kont nga puⱡmba nimba pilim ei ndi, Kraist tʉpa mbuⱡ ngumba, Nuim pep ruimp nimba, nimba mʉi rormʉn ik ni, wak romba uⱡ ei ndi, ⱡawa mba.  
\v 13 Uⱡ ti, wamp kʉⱡ enimp mondʉk, wote wamp manga mbila ʉlinga rok, enimp mendpʉⱡ mondʉk, uⱡ ti, ik kunt rok, ik na mat nandilina mbʉ, nʉk etmin.  
\v 14 Wote, ei nga na pʉnt ei, kang amp wiya kʉⱡ wu puk, kangambuⱡa mek, wote enim nga mang kona kongun mbʉ etʉk, i eng uⱡ ei ndi, wu kit ei ndi, ropa mana ti natʉmba.  
\v 15 Kang amp wiya mat, Jisas wak rok, Seitan pep rormin.  
\v 16 Na ndi, enim kundʉp namp, mondpa pili amp ti nga rʉⱡaip ila, amp wiya mat moⱡʉng ndam, mondpa pili amp ei ndi, rʉp etangga. Got nga rapa tenda ila wamp kʉⱡ ndi, iteing nimba, wak rui nʉrangga! Wote, Got nga rapa tenda ila wamp mbʉ ndi, i ku etʉk, ku moni wak rok, amp wiya mat, en enim kou moⱡʉng mbʉ tʉk rʉpʉndeing.   
\p
\v 17 Rup wu kʉⱡ kandʉk, tʉk ou nduk, rʉp minal iting ei, wu kat ronduⱡ mundʉk, Got nga rʉnang ik nʉk nguk, wote wamp ik mbo endʉk etmin wu kʉⱡ ngʉi!  
\v 18 Wote, Got nga Buk Wingti ei ndi, nimba mel,  
\q1 “Nim ndi, kng kau ti, wit mong kambilpa nim nim ndum ei kʉn, keta komnga ngui ngʉngi!”  
\p Wote ei nga,  
\q1 “Rup wu ei, elim nga kongun etʉm uⱡ ila, mel kai mat tʉmba mint.” nʉtʉm.   
\p
\v 19 Wamp nam ti ndi, rup wu ei, uⱡ ⱡawa ti, em nʉm ndam, kum ti nʉti mon! Wamp raⱡ kep, raldika kep, nʉng ndam, mint kum ti!  
\v 20 Uⱡ ⱡawa em rʉp wamp ei, wamp moⱡʉng kona mbila ik mura ngana, wamp mbʉ ndi kandʉk, mundmong iteing.   
\p
\v 21 Got kʉn, Kraist Jisas kʉn, wote anggelo eng nui kʉⱡ nga kuimp ila moⱡʉp nim kʉn kun kondʉp nʉnt, ya ik kʉⱡ, kum tekʉn pep rui! Wote, nim nga uⱡ en mbila, wamp ti numan ngukʉn, wamp ti numan ngui nganggʉkʉn uⱡ ti, iti nʉti!   
\p
\v 22 Got nga kongun ila wamp ti, tʉkʉrkʉn mbi rokʉn, tʉkʉn mundi nʉmʉndi! Wamp ti nga ⱡawa em ei, nim kʉn kunda, mbi kit moⱡmba ei mon! Nim nga orunga eng nomba, kai itangga muⱡi!   
\p
\v 23 Mbo nu mendpʉⱡ nui nʉni! Nu wain kot pendkʉn nana, nim nga oⱡ ila kui petʉm mbʉ pora nangga!  
\v 24-25 Wamp mat nga uⱡ kit etmin mbʉ, wei wei etʉk kandurmin! Wote, wamp mat nga uⱡ kit etmin mbʉ, kʉni nakʉndʉrmʉn mbʉ, Got nga wamp kʉmp tʉmba uⱡ ila, unt kuimp tepa purum. Wote, wamp mat nga uⱡ kit etmin mbʉ, akil tepʉn kandurmʉn. Ni mel ku, uⱡ kai mbʉ, wei wei etʉp kandurmʉn. Wote uⱡ kai mat mo ropa petʉm mbʉ, wei wei etʉp, kʉni nakʉndʉrmʉn. Uⱡ kai mbʉ, mo rui narʉmba.   
\c 6  
\s1 Kindmant Wamp Mbʉ Nga Ik  
\p
\v 1 Kindmant wamp mbʉ ndi pora, en enim nga wu ou mbʉ, tʉk ou nduk, wu kai nangina, wote wamp ekit orunga mbʉ ndi, Got kʉn kep, wote tʉn nga ik mbo endʉtmʉn ik nimbʉ, nʉk kit mundi nʉmʉndeing.  
\v 2 Mondpa pili wu ou ti nga, kongun kindmant wu mbʉ, en enim nga wu ou mbʉ, minal tʉk ou ndʉi! Wu ʉngʉn ti nʉk, ik tʉk roi ndui nʉndʉi! Nambuⱡ emel, kongun endʉtmin mondpa pili wamp kʉⱡ, en enim ndi, numan nguk kongun ronduⱡ mundʉk endʉtmin. Uⱡ etmin ei ndi, mondpa pili wamp ou kʉⱡ, minal tʉk rapʉndʉrmʉn. Timoti nim ndi, ik kupa mbʉ mbo endkʉn, wamp mbʉ pep ring nʉkʉn, ndoimp rundi!   
\s1 Kandpa Kum Pindi Uⱡ  
\p
\v 3-4 Wamp nam ti, Got nga ik puⱡ elpa mat mbo endpa, tʉn nga Nuim Jisas Kraist nga ik kupa ei kʉn, tʉn Got kʉn mbi paka rormʉn uⱡ kʉⱡ wak ropa, ik elpa mat mbo endʉm ndam, wamp ni nga rukʉr orunga mondpa pili ila mel ti, ti natʉtʉm. Wote ik puⱡ ti kep, pili napʉtʉm ku. Wamp ei, numan kit pendpa, ik puⱡ mbʉ nga ropa akpa nimba etʉm. I etʉm uⱡ ei ndi, wʉlʉk rui uⱡ, ik kit ni uⱡ, ik mbuldung orunga nindi uⱡ ik ropa mondpa ni uⱡ mbʉ nga puⱡ pendpa, numan ila pʉtʉm.  
\v 5-6 Wote, wu mat numan kit morum mbʉ ndi, ik kupa ei wak rormʉn. Wamp i etpa mbʉ ndi pilik kʉn, Got kʉn atinga rui uⱡ ei, kng mel mbʉ ting, nombuⱡa mam ti nʉk pʉtmʉn. Mondpa pili wamp ti, elim tep mor mel mbʉ, manda nimba pʉtʉm ni, Got nga uⱡ kai mbʉ, wamp ei kʉn tepa kapⱡa endʉtʉm.  
\v 7 Tʉn ya mʉi kona ila uimin etpʉn mel ti, mepʉn ui nʉwʉrmʉn. Ni mel ku, wote tʉn ya mʉi kona wak ropʉn mbin etpʉn, mel ti mepʉn pi nʉpʉmʉn.  
\v 8 Wote, nim rʉng na, wal pʉki na mat tekʉn mun ndam, ei nim nga to ila manda.  
\v 9 Wamp ti mel ou ndupa, timp nimba pilpa etʉm wamp ni, Seitan nga oⱡa tʉpa kʉni uⱡ mbila, mana mba, kandpa kum pendpa anduⱡnga, elim nga moⱡpa kundi orunga, kit moⱡnga wamp ei, elim kit morum.  
\v 10 Ku moni kandpa kum pindi uⱡ ei, uⱡ kit mbʉ nga puⱡ pilkan ei. Wamp mat, ku moni nga kum pendʉk, en enim nga mondpa pili uⱡ ei, wak rok, kitim mindil tʉk, tiki polk andurmin.   
\s1 Pol Ndi, Timoti Man Ngurum  
\p
\v 11 Nim Got nga kindmant wu ei kandkʉn, uⱡ mbʉ kildi kulkʉn. Wote, uⱡ kun kai, uⱡ eng nui na, mondpa pili na, wamp numan ngui uⱡ na, numan ronduⱡ pili uⱡ na omba, wote numan wang ndui uⱡ kʉⱡ, ronduⱡ mundkʉn iti!  
\v 12 Nim nga mondpa pili el ruin ei, ronduⱡ mondkʉn el rui, wote uⱡ nga kʉnt nga kont mul uⱡ ei, timp nʉkʉn pilkʉn el rui! Got ndi, nim kont mul uⱡ ei, ngumba pilpa kʉn, nim wi ropa tilinga, wamp nga mou ila, nim nga uⱡ kit mbʉ nʉkʉn ekit ndurun.  
\v 13-14 Got mel mbʉ pora, etpa peng kont tʉtʉm Puⱡ Wu ei kʉn, wote Kraist Jisas elim nga mondpa pili ei, wu Pontas Pailot ei nimba ngurum. Ei mel, wu raⱡ nga kuimp keta ila, na nim kʉn man ngump nʉnt ei, ‘Nim ndi, Got nga mi ik kʉⱡ wamp mbʉ ndi, nʉk kit munding ei nga, tʉk mendkʉn pep rokʉn moⱡana, Nuim Jisas Kraist yant omba ui ei, kandkʉn tʉn.’  
\v 15-16 Jisas omba ui ei, Got elim to ropa pendpa morum. Wu Got ei, wamp ambʉⱡpa puⱡ uⱡ mbʉ nga Puⱡ Wu. Nuim mumuk mormun mbʉ nga Nuim Mumuk Oⱡa orunga ei, omba wu nuim mbʉ nga Nuim ei. Mel mbʉ nga pora Rʉp Wu ei, ronduⱡ elim kont moⱡpa mint purum. Ei nga, tʉn akup kont mormun ui ila wamp ti, rʉⱡang ila morum kona ila, kapⱡa rukʉr pi napʉmba. Wamp ti ndi, elim kʉni nʉkʉndrʉm. Wote, akil tep, kʉni nʉkʉning ku. Nuim Got ei mint, mbi ou tangga, uⱡ nga kʉnt nga ronduⱡ tepa mint pangga! Ei kupa!  
\v 17 Mel ou nduk tek mormin wamp mbʉ kundkʉn, enim nga kʉng orunga, mek oⱡa pi napʉk, en enim nga mondpa pili uⱡ ei, mel pora nimba mbʉ kʉn ti natʉk, Got kʉn mendpʉⱡ pilik nokundʉk muⱡeing ni! Got wu mel pi ei ndi, numan kai pendpa, tʉn mel minal nguⱡnga, tepʉn moⱡpʉn, ambuⱡpʉn paⱡpʉn muⱡeimin nimba etʉm.  
\v 18 Wamp mbʉ kundkʉn, uⱡ kai mbʉ iteing ni! Uⱡ kai mbʉ nga mel piyangga nʉkʉn, molk kai mondʉk, en enim nga mel tetmin mbʉ, numan kai pendʉk, mok rok iteing ni!  
\v 19 Uⱡ ei mel eng ndam, mel kai mat, wote ui tila tʉpa rapʉndʉmba ei nga, tʉk mou rok muⱡing. Ei, uⱡ nga kʉnt nga rʉk rʉk kont mul uⱡ kupa ei ting.  
\v 20 Timoti, Got ndi, nim kongun ngurum ei, ronduⱡ mundkʉn rʉp iti! Ik kit na, wote ik mat, ik kol rok, “ik pilpa kungʉndi kai” nʉk enmin mbʉ, tʉkʉn mbuⱡ ngukʉn iti! Ik mbʉ, Got nga el rui ik mbʉ.   
\p
\v 21 Wamp mat, ya ik pilpa kungʉndi kai ei, tep mor nʉk pilik, en enim nga mondpa pili ei, wak rormin. Got nga wamp poⱡ ti uⱡ ei, nim kʉn kan piyangga!