\id GAL - Maale Project
\ide UTF-8
\h ጋላቲያ ዓሶም
\toc3 ጋላ.
\toc2 ጋላቲያ ዓሶም
\toc1 ፆኦሲ ማዾ''ም ዳኪንቴ ጳውሎሴ ጋላቲያ ዓሶም ዳኬ ኪኢቶ''
\mt ፆኦሲ ማዾ''ም ዳኪንቴ ጳውሎሴ ጋላቲያ ዓሶም ዳኬ ኪኢቶ''
\imt ዓይፆ ካሮ''
\ip ዬሱሴኮ ዻቂሻያ ማዒፆ ኬኤዛ ኮዦ ሓይሶ ቃኣላ'' ቢያ ቤዞይዳ ኬኤዚንቲ ኬኤዚንቲ ሓሣ ዓይሁዴ ማዒባኣ ዓሳኣ ዬያ ሃይሶ ጉሙርቂ ዔኬ ዎዶ''ና «ኪሪስቶሴ ጉሙርቃ ዓሲ ማዓኒ ሙሴ ዔርዜ ዎጎ ኩንሣኒ ኮይሳሞ ኮይሱዋይ?» ጋዓ ዖኦጪሢ ዔቄኔ። ዒማ''ና ጳውሎሴ፦ «ኪሪስቶሴ ጉሙርቃ ዓሲ ማዓኒ ሙሴ ዔርዜ ዎጎ ኩንሣኒ ኮይሱዋሴ፤ ባሼ ኪሪስቶሴ ዛሎ''ና ዓኪ ናንጊ ዴንቃኒ ቤርታዺ ኮይሳ ባኮማ ዒዛ ጉሙርቂሢኬ፤ ሓሣ ዓሲ ፆኦሲ ቤርቲዳ ፂላ''ኒ ዳንዳዓሢ ጉሙርቂሢና ሌሊኬ» ጌዒ ጌዒ ዔርዚሢ ዓርቄኔ፤ ጋዓንቴ ዻኮ'' ዒሲያ ጌይንታ ዓጮ''፥ ሮሜ ካኣቲ ዎይሣ ጋላቲያይዳ ዓኣ ሺኢጲፆ ማኣሮ ዓሶ ባኣካ''፦ «ዓሲ ፆኦሲ ቤርቲዳ ፂላ''ኒ ዬሱሴ ጉሙርቂሢ ሌሊ ማዒባኣንቴ ሙሴ ዔርዜ ዎጎዋ ኩንሣኒ ኮይሳኔ» ጌይሢና ጳውሎሴኮ ጌኤዞ ማኪ ዒፃ ዓሲ ዓኣኔ።
\ip ጳውሎሴ ሓያ ኪኢቶ'' ጋላቲያ ዓሶም ፃኣፔሢ፦ ዬያ ሉኡዙሞ ዔርዚፆና ዣኣሌ ዓሶ ፒዜ ጉሙርቂሢዳ ጌልዛኒ ሃሣ ኪሪስቶሴ ጉሙርቂ ናንጎንዶ ጎይፆዋ ዔርዛኒኬ፤ ቤርታሲ ጳውሎሴ ዬሱስ ኪሪስቶሴ ማዾ''ም ዳኪንቴያ ማዔሢ ፔና ፔጋሲ ዔርዚሢና ዓርቃኔ፤ ዬያ ማዾ''ም ዒዛ ዳኬሢ ዓሲቱዋንቴ ፆኦሲ ማዔሢ፤ ሃሣ ዒዛኮ ዳኪንቲፃ ዓይሁዴ ማዒባኣ ዓሶም ማዔሢ ፓይዲ ፓይዲ ኬኤዛኔ፤ ዬካፓ ዓሲ ፂላ''ኒ ዳንዳዓሢ' ኪሪስቶሴ ጉሙርቂሢና ሌሊ ማዔሢያ ኬኤዛኔ፤ ሃሣ ሃኖ' ኪኢቶ''ኮ ጋፒንፆ ዓይፆንሢዳ ኪሪስቶሴ ጉሙርቃ ዓሲ ናንጋ ፒዜ ናንጊ ዬሱሴ ጉሙርቂፆና ጴዻ ናሹሞፓ ሙካሢ ዔርዛኔ።
\iot ማፃኣፔላ ዱማ ዱማ ዓርቄ ባኮ
\io ዓይፆ ካሮ'' 1፥1-10
\io ጳውሎሴ ፆኦሲ ማዾ''ም ዳኪንቴያ ማዔሢ ዔርዛ ቢታንቶ 1፥11—2፥21
\io ፆኦሲኮ ኮሹሞ ዛሎ'' ኬኤዛ ኮዦ ሃይሶ 3፥1—4፥31
\io ዬሱሴ ጉሙርቃ ዓሶኮ ጎሜ ዓይላቶፓ ኬስኪፆና ዔያታ ናንጋንዳ ጎይፆ 5፥1—6፥10
\io ጋፒንሢ ሓይሴ 6፥11-18
\c 1
\p
\v 1 ዓሲ ማሊሢና ዓሲ ዳኬያቱዋንቴ ዬሱስ ኪሪስቶሴ ዛሎ''ና ሃሣ ዒዛ ሓይባ''ፓ ዔቂሴ፥ ፆኦሲ፥ ዓዳሢ ዛሎ''ና ዒዛም ማዻኒ ዳኪንቴያ ማዔ፥ ዶኦሪንቴ ጳውሎሴይዳፓ፤ 
\v 2 ሓሣ ዒዛና ዎላ'' ዓኣ ዒሾንሢዳፓ ቢያ ጋላቲያይዳ ዓኣ ሺኢጲፆ ማኣሮ ዓሶም ዳኪንቴ ኪኢታ፦
\p
\v 3 ኑ ዓዳሢ፥ ፆኦዛሢዳፓ፤ ሓሣ ኑ ጎዳሢ ዬሱስ ኪሪስቶሴይዳፓ ማዔ ሚጪንቲፆና ኮሹሞና ዒንሢም ማዖንጎ።
\p
\v 4 ሓያ ዓጮ'' ፑርቱሞይዳፓ ኑና ዻቂሻኒ ኑኡኮ ዓዳሢ ማዔ፥ ፆኦዛሢ ማሊሢና ኪሪስቶሴ ኑ ጎሞሮ ጌዒ ፔና ዓኣሢ ዒንጌኔ። 
\v 5 ዬያሮ ፆኦሲም ናንጊና ቦንቾ ማዖንጎ፤ ዓኣሜን።
\s ኪሪስቶሴ ዛሎ'' ኮዦ ሓይሳ ፔቴ'' ሌሊ ማዒፆ
\p
\v 6 ኪሪስቶሴኮ ኮሹሞ ዒንጊፆና ዒንሢ ዔኤሌ'' ጎዳይዳፓ ሓያይዲ ሩኡሪና ዒንሢኮ ዱማዺፆና ሜሌ'' ኮዦ ሓይሶ ባንሢ ዓኣዺፃ ታኣም ዔርቲባኣያኬ። 
\v 7 ሓያ ታ ጋዓሢ ዒንሢ ዻቢሳ ዓሶና ኪሪስቶሴኮ ኮዦ ሓይሶ ዎቢሳኒ ኮዓ ፔቴ'' ፔቴ'' ዓሳ ዓኣሢሮ ማዓንዳኣፓዓቴም ኮዦ ሓይሳ ጋዓንቴ ፔቴ'' ሌሊኬ። 
\v 8 ዬይ ያዺ ማዔቴያ ኑኡና ጫሪንጮ ፆኦሲ ኪኢታንቻሢና ዒንሢም ኬኤዜ ኮዦ ሓይሶይዳፓ ዱማዼ ኮሺ ሓይሴ ዒንሢም ኬኤዜያ ማዔቴ ዬይ ጋዳንቂንቴያ ማዖም። 
\v 9 ሓያኮ ቤርታ ታ ዒንሢም ጌዔሢጉዲ ሃሣ ታ ዒንሢም ጋዓኔ፦ ዒንሢ ዋይዚ ዔኬሢዳፓ ዱማ ሜሌ'' ኮሺ ሓይሴ ዖኦኒያ ዒንሢም ኬኤዜቴ ዬይ ጋዳንቂንቴያ ማዖም።
\p
\v 10 ዓካሪ ሃሢ ታኣኒ ኮዓሢ ዓሲ ታና ሄርሻንዳጉዲሞ ፆኦሲ ሄርሻንዳጉዲዳይ? ሃሣ ዓሲ ታ ዎዛሳኒ ኮዓያ ዒንሢም ማላ? ዓሲ ታ ዎዛሳኒ ኮዓያ ማዔቴ ኪሪስቶሴም ታ ማዻያ ማዓዓታንቴኬ።
\s ጳውሎሴኮ ፆኦሲ ማዾ''ም ዔኤሊ''ንቲፆ
\p
\v 11 ታ ዒሾንሦ! ታ ሚሾንሦ! ታ ዒንሢም ኬኤዜ ኮዦ ሓይሳ ዓሲ ኬሴ'' ማሊሢዳፓ ማዒባኣሢ ታ ዒንሢም ዔርዛኔ፤ 
\v 12 ዎይቲ ጌዔቴ ታኣም ዬያ ዬሱስ ኪሪስቶሴ ፔጋሲ ዻዌኔ፤ ዓይጎ ዓሲዳፓኣ ታ ዔኪባኣሴ፤ ሃሣ ዖኦኒያ ታና ዔርዚባኣሴ።
\p
\v 13 ሚና ቤርታ ዓይሁዶ ካኣዦና ዎማይዲ ታ ናንጌቴያ፥ ፆኦሲ ጉሙርቃ ሺኢጲፆ ማኣሮ ዓሶዋ ሚጪንቱዋዖ ዎማይዲ ታ ዳውሴቴያ፥ ዔያቶ ባይዛኒያ ታ ዎማዒ ማሌቴያ ዒንሢ ዋይዜኔ። \x - \xo 1፥13 \xo*\xt ዳኪ. ማዾ'' 8፥3፤ 22፥4-5፤ 26፥9-11።\xt*\x* 
\v 14 ዓይሁዶ ዓሶ ካኣዦ ዎጎ ካፒ ታ ናንጋኣና ዓኣ ታ ዒጊኖ፥ ዓይሁዶ ዓሶይዳፓ ቢያ ታ ባሼኬ፤ ዓዶንሢ ካኣዦ ዎጎይዳፓ ሜሌ'' ታ ሃሣ ኮዑዋያኬ። \x - \xo 1፥14 \xo*\xt ዳኪ. ማዾ'' 22፥3።\xt*\x*
\p
\v 15 ጋዓንቴ ታ ሾይንታንዳሢኮ ቤርታ ፆኦሲ ታና ዶኦሪ ፔኤኮ ኮሹሞና ታ ዒዛም ማዻንዳጉዲ ዔኤሌ''ኔ። 
\v 16 ዓይሁዴ ማዒባኣ ዓሶም ኮዦ ሃይሶ ታ ኬኤዛንዳጉዲ ፆኦሲ ፔ ናዓሢ ታኣም ፔጋሲ ዻዋኒ ማሌ ዎዶ''ና ዓይጎ ዓሲናኣ ታ ዞርቲባኣሴ፤ \x - \xo 1፥16 \xo*\xt ዳኪ. ማዾ'' 9፥3-6፤ 22፥6-10፤ 26፥13-18።\xt*\x* 
\v 17 ሓሣ ታኣኮ ቤርታ ፆኦሲ ማዾ''ም ዳኪንቴዞንሢና ካኣማኒ ዬሩሳላሜ ዒማ''ና ታ ዴንዲባኣሴ፤ ጋዓንቴ ቤርታዺ ታኣኒ ዓሬቤ ዓጪ ዓኣዼኔ፤ ዬካፓ ታ ጊንሣ ዴማስቆ ማዒ ሙኬኔ።
\p
\v 18 ሓይሦ ሌዔኮ ጊንፃፓ ጴፂሮሴና ካኣሚ ጌስታኒ ዬሩሳላሜ ታ ዴንዲ፥ ዒኢካ ዒዛና ዎላ'' ታጶ ዶንጎ ኬሊ'' ታ ዴዔኔ። \x - \xo 1፥18 \xo*\xt ዳኪ. ማዾ'' 9፥26-30።\xt*\x* 
\v 19 ጋዓንቴ ጎዳኮ ጌርሲ፥ ያይቆኦቤይዳፓ ዓታዛ ፆኦሲ ማዾ''ም ዳኪንቴዞንሢዳፓ ዖናኣ ታ ዴንቂባኣሴ።
\p
\v 20 ሓይ ታ ዒንሢም ፃኣፓሢ ሉኡዚቱዋኣሢ ፆኦሲ ቤርታ ታ ዒንሢም ዔርዛኔ።
\p
\v 21 ዬካፓ ሶኦሪያና ኪልቂያ ጋዓ ዓጪ ታ ዴንዴኔ። 
\v 22 ዬማና ዪሁዳ ዓጮ''ይዳ ዓኣ፥ ኪሪስቶሴ ጉሙርቃ ሺኢጲፆ ማኣሮ ዓሳ ታና ዛጊ ቤቂባኣሴ። 
\v 23 ዔያታ ዋይዜሢ፦ «ዬይ ሚና ኑና ዒፂ ዳውሳ ዓሢ' ዬኖ ዒ ባይዛንዳኔ ጌዒ ኮዓ ካኣዤሎ ዛሎ'' ሃሢ ኬኤዛኔ» ጋዓ ሓይሴ ሌሊኬ። 
\v 24 ታ ዛሎ''ሮዋ ፆኦሲ ዔያታ ጋላቴኔ።
\c 2
\s ጳውሎሴ ሃንጎ ፆኦሲ ማዾ''ም ዳኪንቴዞንሢና ዔርቴሢ
\p
\v 1 ታጶ ዖይዶ ሌዔኮ ጊንፃፓ ባርናባሴና ዎላ'' ዬሩሳላሜ ታ ዓኣዻዖ ቲቶ ታኣና ዎላ'' ዔኪ ዓኣዼኔ። \x - \xo 2፥1 \xo*\xt ዳኪ. ማዾ'' 11፥30፤ 15፥2።\xt*\x* 
\v 2 ታ ዒኢካ ዴንዴሢ' ፆኦሲ ታኣም ፔጋሲ ዻዌ ጎይፆናኬ። ዬያኮ ቤርታ ታ ማዼ ባኮንታ ሃሢ ታ ማዻሢ ጉሪ ዓቱዋጉዲ ጌይሢና ዓይሁዴ ማዒባኣ ዓሶም ታ ኬኤዛ ኮዦ ሓይሶ ዔያቶኮ ዼኤፖ ዼኤፖ ሱኡጎ ዱማሲ ታ ኬኤዜኔ። 
\v 3 ታኣና ዎላ'' ዓኣ ቲቶ ዎዚ ዒ ጊሪኬ ዓሲ ማዔቴያ ዓቲንቶ ቤርቶ ዒ ቲቂንታንዳጉዲ ዎልቄና ዓይሢንቲባኣሴ። 
\v 4 ጋዓንቴ ኑኡኮ ባኣኮ'' ዔርቱዋዖ ዓኣሺንቲ ጌሌ ፔቴ'' ፔቴ'' ሉኡቃ ዒሾንሢ ዒዚ ዓቲንቶ ቤርቶ ቲቂንታንዳጉዲ ኮዔኔ፤ ዬንሢ ዓሳ ኑ ባኣኮ'' ዔርቱዋዖ ጌሌሢ ዬሱስ ኪሪስቶሴና ኑኡኮ ጎማፓ ጌኤሽኪፆ ሙሪ ዛጋኒና ኑና ዓይሌ'' ማሃኒ ማሊኬ። 
\v 5 ኑኡኒ ጋዓንቴ ኮዦ ሓይሶኮ ጎኑማ ዒንሢና ዶዲ ናንጋንዳጉዲ ጌይሢና ዻካ'' ዎዴታዖ ዔያቶ ማሊፆም ባሺንቲባኣሴ።
\p
\v 6 ዬንሢ ዓሶ ዔኪ ዓኣዻያ ማላዞንሢ ዛሎ'' ጋዓንቴ ፆኦሲ ዓሲኮ ዓኣፒ ካራ ዛጊ ዓሲ ዱማሱዋኣሢሮ ዔያቶኮ ዼኤፑማ ታኣም ዔኤቢቱዋሴ፤ ዬንሢ ዓሶ ዔኪ ዓኣዻኔ ጌይንታዞንሢዳፓ ታኣኒ ኬኤዛ ኮዦ ሓይሶ ቃኣሎ''ይዳ ታና ማኣዳ''፥ ዓይጎዋ ዓኪ ባኣዚ'' ታ ዴንቂባኣሴ። \x - \xo 2፥6 \xo*\xt ላሚ. ዎማ 10፥17።\xt*\x* 
\v 7 ጋዓንቴ ፆኦሲ ጴፂሮሴ ዓይሁዶ ዓሶም ኮዦ ሓይሶ ኬኤዛንዳያ ማሄሢ፤ ታናኣ ኮዦ ሓይሶ ቃኣሎ'' ዓይሁዴ ማዒባኣ ዓሶም ኬኤዛንዳጉዲ ማሄሢ ዔያታ ዔሬኔ፤ 
\v 8 ዬያሮ ጴፂሮሴ ዓይሁዴ ዓሶም ፆኦሲ ማዾ''ም ዳኪንቴያ ማዒ ማዻንዳጉዲ ማሄ ፆኦዛሢ ታናኣ ዓይሁዴ ማዒባኣ ዓሶም ዳኪንቲ ማዻያ ማሄኔ። 
\v 9 ዓሶ ዔኪ ዓኣዻያ ማላ፥ ያይቆኦቤና ጴፂሮሴና ዮሓኒሴና ፆኦሲ ታኣም ሃያ ዱማ ማዾ'' ዒንጌሢ ዔራዖ ታኣና ባርናባሴና ዎላ'' ዔያታ ፔቴ'' ማዒፆ ዔርዛ ማላታ ማዓ ሚዛቆ ኩጮና ኑ ዎሊ ዓርቄኔ፤ ዬካፓ ኑኡኒ ዓይሁዴ ማዒባኣ ዓሶ ባንሢ ዓኣዼም፤ ዔያታ ዓይሁዴ ዓሶ ባንሢ ዓኣዻኒ ኑ ዎላ'' ጫኣቄኔ። 
\v 10 ዬይ ያዺ ማዔቴያ ዔያቶኮ ባኣካ'' ዓኣ ማንቆ ዓሶ ኑኡኒ ማኣዳ''ንዳጉዲ ዔያታ ኑና ሺኢቄኔ፤ ታኣኒያ ዬያ ማዻኒ ሚርጌ ማላያኬ።
\s ጳውሎሴኮ ዓንፆኪያይዳ ጴፂሮሴ ጎሪ''ፆ
\p
\v 11 ጴፂሮሴ ዓንፆኪያ ሙካዛ ፔጌና ዒ ዻቤሢሮ ፔጋ'' ታ ዒዛ ጎሬኔ፤ 
\v 12 ያይቆኦቤ ዳኬ፥ ፔቴ'' ፔቴ'' ዓሳ ዓንፆኪያ ሙካንዳሢኮ ቤርታ ዓይሁዴ ማዒባኣ ዓሶና ዎላ'' ዒ ሙዓኔ፤ ዔያታ ሙኬሢኮ ጊንፃ ጋዓንቴ «ዓይሁዴ ዓሲቱዋዖ ኪሪስቶሴ ጉሙርቄ ዓሳ ዓቲንቶ ቤርቶ ቲቂንታንዳያ ኮይሳኔ» ጋዓ ዓይሁዶ ዓሶ ዒጊጪሢና ሎኦሺ፥ ዓይሁዴ ማዒባኣ ዓሶይዳፓ ዱማዼኔ። 
\v 13 ሃንጎዋታ ዓይሁዶታዖ ኪሪስቶሴ ጉሙርቃ ዓሳ ጴፂሮሴ ማዼሢጉዲ ማዻዛ ባርናባሴያ ዔያቶ ጎይፆ ማዺሢዳ ጌሌኔ። 
\v 14 ዔያቶኮ ማዻ'' ኮዦ ሓይሶ ጎኑሞ ጎይፆጉዲ ፒዜቱዋኣሢ ታ ዛጋዖ ጴፂሮሴ ኮይላ''፦ «ኔኤኒ ዓይሁዴ ዓሲታዖ ዓይሁዶ ዓሶ ካኣዦ ዎጎናቱዋንቴ ዓይሁዴ ማዒባኣ ዓሶ ካኣዦ ዎጎ ጎይፆ ኔ ናንጋያኬ። ሂዳዖ ዓይሁዴ ማዒባኣ ዓሳ ዓይሁዶ ካኣዦ ዎጎ ጎይፆ ናንጋንዳጉዲ ዓይጎሮ ኔ ዔያቶ ዎልቃዺ ዓይሣይ?» ጌይ ቢያሢ ቤርታ ታ ዒዛ ጎሬኔ።
\s ዓይሁዴታቴያ ቱዋቴያ ዓሲ ጉሙርቂሢና ሌሊ ዻቃያ ማዒፆ
\p
\v 15 ጎኔኬ፥ ኑኡኮ ዜርፃ ዓይሁዴኬ፤ ጎሞ ዓሶ፥ ዓይሁዴ ማዒባኣ ዓሶጉዲቱዋሴ። 
\v 16 ጋዓንቴ ዓሲ' ፆኦሲ ቤርታ ፂላ''ሢ ዬሱስ ኪሪስቶሴ ጉሙርቂሢና ማዓንዳፓዓቴም ሙሴ ዔርዜ ዎጎ ኩንሥሢናቱዋኣሢ ኑ ዔራኔ፤ ኑኡኒያ ዎጎ ኩንሥሢናቱዋንቴ ኪሪስቶሴ ጉሙርቂሢና ፆኦሲ ቤርታ ፂላ''ኒ ዬሱስ ኪሪስቶሴ ኑ ጉሙርቄኔ፤ ዓይጎሮ ጌዔቴ ዓይጎ ዓሲያ ሙሴ ዔርዜ ዎጎ ኩንሥሢና ፂሉ''ዋሴ። \x - \xo 2፥16 \xo*\xt ዓይኑ. 143፥2፤ ሮሜ 3፥20።\xt*\x* 
\v 17 ኪሪስቶሴና ኑኡኮ ዎላ'' ዓኣ ፔቱሞና ፆኦሲ ቤርታ ኑ ፂላ''ኒ ኮዓዖ ኑኡኒ ኑ ቶኦኪና ጎሜ ዓሲ ማዒ ጴዼያታቶ ጎሜይዳ ኑና ዔኪ ጌልዛሢ ኪሪስቶሴኬ ጌይሢዳ? ፔቴ''ታዖ ያዺቱዋሴ! 
\v 18 ጋዓንቴ ታኣኒ ሻሄ ካኣዦ ዎጎ ማሂ ጊንሣ ማዻሢ ታና ማዔቴ ታኣኒ ታ ቶኦኪና ዎጌ ሻሃያ ማዔሢ ዔርዛኔ ጌይሢኬ። 
\v 19 ታኣኒ ፆኦሲም ናንጋንዳኔ ጌይ ዎጎ ዛሎ''ና ሃይቢና ዱማዺሢጉዲ ዎጌይዳፓ ታ ዱማዼኔ። 
\v 20 ታኣኒ ኪሪስቶሴና ዎላ'' ሱፂንቴያጉዲ ማዒ ፓይዲንቴሢሮ ሃካፓ ሴካ ኪሪስቶሴ ታ ጊዳ'' ናንጋንዳፓዓቴም ታ ታኣሮ ናንጋያቱዋሴ፤ ሃሢያ ታኣኒ ዓሲ ማዒ ናንጋ ናንጋ፥ ታና ናሽኬሢና ታ ጋይቴ ፔና ዓኣሢ ዒንጌ፥ ፆኦዛሢ ናዓሢ ጉሙርቂፆና ጴዼ ናንጎናኬ። 
\v 21 ፆኦሲኮ ኮሹሞ ዒንጊፆ ታኣኒ ሼሌዒሲ ዛጉዋሴ፤ ዓሲ' ፆኦሲ ቤርታ ፂላ''ሢ ሙሴ ዔርዜ ዎጎ ኩንሥሢናታቴ ኪሪስቶሴ ሓይቄሢ ጉሪኬ ጌይሢኬ።
\c 3
\s ኪሪስቶሴ ጉሙርቂሢና ዎጎና ዛላ
\p
\v 1 ዒንሢ ሓይ፥ ማሊ ጶቂሡዋ ጋላቲያ ዓጮ'' ዓሳ! ዖ ጌሺ ዒኖ ዒንሢኮ ባይዜይ? ኪሪስቶሴኮ ፑርቶ ዓሶ ሱፆ ሚፆይዳ ሱፂንቲ ሃይቂፆ ዛሎ'' ዒንሢ ዛዛጋጉዲ ፔጋሲ ታ ዒንሢም ኬኤዜኔ። 
\v 2 ታኣኒ ሃሢ ዒንሢዳፓ ፔቴ'' ዔራኒ ኮዓ ባኣዚ'' ዓኣኔ፤ ዒንሢ ዓያኖ ጌኤዦ ዔኬሢ ሙሴ ዎጎ ኩንሥሢናሞ ኮዦ ሓይሶ ቃኣሎ'' ዋይዚ ጉሙርቂፆናዳይ? 
\v 3 ዒንሢ ዓይፆ ፆኦሲ ዓያናና ዓርቃዖ ዓሲ ዎልቄና ኩንሣኒ ኮዓኔ፤ ሓይሾ ዒንሢ ሃኣዺ ዔኤያኬ! 
\v 4 ኮዦ ሓይሶ ዛሎ''ና ዒንሢ ዔኬ ሜታሢ ቢያ ጉሪ ማዒ ዓቴ''ኔ ጌይሢዳ? ዬይ ጉሪ ዓቲባኣሴ! 
\v 5 ፆኦሲ ፔኤኮ ዓያኖ ዒንሢም ዒንጋሢና ዒንሢ ኮራ ፔ ዎልቆና ማዺንታ ዓኮ ባኮ ማዻሢ ሙሴ ዎጎ ዒንሢ ኩንሣሢሮሞ ኮዦ ሓይሶ ቃኣሎ'' ዋይዚ ዒንሢ ጉሙርቃሢሮዳይ?
\p
\v 6 ሂንዳ ዓብራሃሜሲ ማሉዋቴ፦ «ዓብራሃሜ ፆኦሲ ጉሙርቄኔ፤ ፆኦሲያ ዒዛ ፔ ዓሲ ማሄኔ» ጌይንቲ ፃኣፒንቴኔ። \x - \xo 3፥6 \xo*\xt ማዢ. ማፃ 15፥6፤ ሮሜ 4፥3።\xt*\x* 
\v 7 ዓካሪ፤ ፆኦሲ ጉሙርቃዞንሢ ቢያ ዓብራሃሜ ናኣቶ'' ማዓሢ ዔሩዋቴ። \x - \xo 3፥7 \xo*\xt ሮሜ 4፥16።\xt*\x* 
\v 8 ፆኦሲ ዓይሁዴ ማዒባኣ ዓሶ ጉሙርቂሢ ዛላና ፂሊ''ሳንዳያ ማዔሢ ጌኤዦ ማፃኣፓ ቤርታዺ ዴንቂ፦ «ዴራ'' ቢያ ኔ ዛሎ''ና ዓንጂንታንዳኔ» ጌይሢና ቤርታ ዓብራሃሜም ኮዦ ሓይሶ ቃኣሎ'' ኬኤዜኔ። \x - \xo 3፥8 \xo*\xt ማዢ. ማፃ 12፥3።\xt*\x* 
\v 9 ዬያሮ ፆኦሲ ጉሙርቃዞንሢ ቢያ ፆኦሲ ጉሙርቄ፥ ዓብራሃሜጉዲ ዓንጂንቴያኬ።
\p
\v 10 «ዎጎ ኩንሢፆና ኑ ፂላ''ንዳኔ» ጋዓዞንሢ ቢያ ጋዳንቂንቴያኬ፤ ዓይጎሮ ጌዔቴ፦ «ሙሴ ዔርዜ ዎጎ ማፃኣፖይዳ ፃኣፒንቴ ዓይሢፆና ቢያ ዶዲ ናንጉዋያ ሃሣ ማዺ ኩንሡዋ ዓሲ ጋዳንቂንቴያኬ» ጌይንቲ ፃኣፒንቴሢሮኬ። \x - \xo 3፥10 \xo*\xt ላሚ. ዎማ 27፥26።\xt*\x* 
\v 11 «ፂሎ'' ዓሲ ጉሙርቂሢና ሼምፔና ናንጋኔ» ጌይንቲ ፃኣፒንቴሢሮ ዎጎ ኩንሥሢና ዓይጎ ዓሲያ ፆኦሲ ቤርቶይዳ ፂሉ''ዋኣሢ ዔርቴያኬ። \x - \xo 3፥11 \xo*\xt ዒምባ. 2፥4።\xt*\x* 
\v 12 ዎጌ ጉሙርቂሢና ዓርቂንቴ ባኣዚ''ቱዋሴ፤ ጋዓንቴ «ዓሲ ዎጌና ናንጋኒ ዳንዳዓሢ ዎጎ ዓይሢፆ ቢያ ኩንሤቶኬ» ጌይንቲ ፃኣፒንቴኔ። \x - \xo 3፥12 \xo*\xt ሌዊ. ዓኬ 18፥5።\xt*\x*
\p
\v 13 «ሚሢዳ ሱፂንቲ ሓይቃ ዓሲ ቢያ ጋዳንቂንቴያኬ» ጌይንቲ ፃኣፒንቴኔ፤ ኪሪስቶሴ ኑ ጋይቴ ጌይ ሱፂንቲፆና ጋዳንቂንቴያ ማዒ ዎጎ ጋዳሞይዳፓ ኑና ዻቂሼኔ። \x - \xo 3፥13 \xo*\xt ላሚ. ዎማ 21፥23።\xt*\x* 
\v 14 ዬይ ያዺ ማዔሢ' ፆኦሲ ዓብራሃሜም ዒንጌ ዓንጃ ዬሱስ ኪሪስቶሴ ዛሎ''ና ዓይሁዴ ማዒባኣ ዓሶ ሄላ''ንዳጉዲ፤ ሃሣ ፆኦሲ፦ «ታ ዒንሢም ዒንጋንዳኔ» ጌዔ ዓያኖ ጌኤዦዋ ጉሙርቂሢና ኑ ዔካንዳጉዲኬ።
\s ሙሴ ዎጎና ሃጊ ማዓንዳ ዎዞና
\p
\v 15 ታ ዒሾንሦ! ታ ሚሾንሦ! ዓሲም ዔርታ ማላታ ማዓንዳ ባኣዚ'' ታ ዒንሢም ኬኤዞም። ዓሲ ዎላ'' ጫኣቁሞ ጫኣቄስካፓ ዖኦኒያ ዬኖ ጫኣቁሞ ሃሻ''ኒና ጊዳ'' ቃሳኒያ ዳንዳዑዋሴ። 
\v 16 ፆኦሲ ዓብራሃሜና ዒዛኮ ዜርፆናም ሃጊ ማዓንዳ ዎዞ'' ቃኣሎ'' ዒንጌሢ ዬኖ ጎይፆኬ፤ ጌኤዦ ማፃኣፓ ሃጊ ማዓንዳ ዎዞ'' ቃኣላ'' ሚርጌ ዓሲም ማዓያ ማሂ፥ «ኔ ዜርፆም» ጎዑዋሴ፤ ጋዓንቴ ፔቴ'' ዓሲም ማዓያ ማሂ፥ «ኔ ዜርፃሢም» ጋዓኔ፤ ዬይያ «ኔ ዜርፃሢ» ጌይንቴሢ ኪሪስቶሴኬ። \x - \xo 3፥16 \xo*\xt ማዢ. ማፃ 12፥7።\xt*\x* 
\v 17 ዓካሪ፥ ታ ሂዚ ጋዓኔ፤ ዖይዶ ፄኤታና ሓይሢታሚ'' ሌዔኮ ጊንፃፓ ዒንጊንቴ ዎጋ'' ቤርታዺ ፆኦሲ' ዔሪ ዶዲሼ ጫኣቁሞ ዓይሲ፥ ዒንጊንቴ ዎዞ'' ቃኣሎ''ዋ ጉሪ ማሃኒ ዳንዳዑዋሴ። 
\v 18 ፆኦሲኮ ዒንጊፃ ዎጌ ዛላና ጴዻያታቴ፥ ፆኦሲ ዒንጌ ሃጊ ማዓንዳ ዎዞ'' ቃኣሎ''ና ማዒፃ ዓታንዳንቴኬ፤ ጋዓንቴ ፆኦሲ ዓብራሃሜም ዒንጌ ዒንጊፃ ሃጊ ማዓንዳ ዎዞ'' ቃኣሎ''ናኬ። \x - \xo 3፥18 \xo*\xt ሮሜ 4፥14።\xt*\x*
\p
\v 19 ሂዳዖ ዎጌ ዒንጊንቴሢ ዓይጌንዴሮዳይ? ዎጌ ጊዳ'' ቃሲ''ንቴሢ ዓብራሃሜም ሃጊ ማዓንዳ ዎዞ'' ቃኣሎ''ና ዒንጊንቴ ዜርፃሢ ሙካንዳያ ሄላ''ንዳኣና ፑርታ ማዾ ዓይጎ ማዔቴያ ዔርዛኒኬ፤ ዎጌ ሙኬሢ ፆኦሲና ዓሲና ባኣካ'' ማዔ፥ ዓሢም ፆኦሲ ኪኢታንቾ ዛሎ''ና ኬኤዚንቴምኬ። 
\v 20 ዬይ ያዺ ማዔቴያ ባኣካ'' ማዔ ዓሢ ፔቴ'' ዜርሢም ሌሊ ዔቃያቱዋሴ፤ ፆኦሲ ጋዓንቴ ፔቴ''ኬ።
\p
\v 21 ዓካሪ፤ ሙሴ ዎጋ'' ፆኦሲኮ ሃጊ ማዓንዳ ዎዞ'' ቃኣሎ''ና ዎላ'' ጊኢጉዋያዳ? ያዺቱዋሴ! ሼምፖ ዒንጋ ዎጌ ዒንጊንቴያ ማዔቴ ፂሉ''ሞ ዎጌም ዓይሢንቲሢና ጴዼያ ናንዳንቴኬ። 
\v 22 ጋዓንቴ ጌኤዦ ማፃኣፓ ዓጫ'' ጉቤ ጎሜና ቱኡቴያ ማዔኔ ጋዓኔ፤ ዬይያ፦ ዬሱስ ኪሪስቶሴ ጉሙርቂፆና ጴዻ ዎዞ'' ቃኣላ'' ጉሙርቃዞንሢም ዒንጊንታንዳጉዲኬ።
\p
\v 23 ዬይ ኪሪስቶሴ ጉሙርቂፃ ሙካንዳሢኮ ቤርታ ዎጎ ዛሎ''ና ኑ ቱኡሲ ዓሲ ማዒ ዬይ ፔጋዻንዳያ ሄላ''ንዳኣና ካራ ኑም ባይቄያ ማዔኔ። 
\v 24 ዬያሮ ጉሙርቂፆና ኑ ፂላ''ንዳጉዲ ኪሪስቶሴ ሙካንዳያ ሄላ''ንዳኣና ሙሴ ዎጋ'' ኑና ዔርዚ ዔርዚ ዲቻያ ማዔኔ። 
\v 25 ሓሢ ጋዓንቴ ኪሪስቶሴ ጉሙርቂሢ ሙኬሢሮ ዎጌ ኑና ዔርዚ ዔርዚ ዲቻያ ማዒፃ ዓቴ''ኔ።
\p
\v 26 ዬሱስ ኪሪስቶሴ ጉሙርቂፆና ዒንሢ ቢያሢ ፆኦሲ ናይኬ። 
\v 27 ኪሪስቶሴና ዎላ'' ፔቴ'' ማዓኒ ዋኣፆና ማስቴ ዓሳ ቢያ ኪሪስቶሴ ዒንሢ ማኣዔኔ። 
\v 28 ቢያሢ ዬሱስ ኪሪስቶሴ ዛሎ''ና ፔቴ'' ዒንሢ ማዔሢሮ ዓይሁዴና ዓይሁዴ ማዒባኣ ዓሲና፥ ማዻሢና ማዺሻሢና፥ ዓቲንቄና ላኣሊናኮ ባኣካ'' ዱሙሞ ባኣሴ። 
\v 29 ዓካሪ ዒንሢ ኪሪስቶሴሮ ማዔቶ ዓብራሃሜ ዜርፆኬ፤ ዒንጊንቴ ዎዞ'' ቃኣሎ'' ጎይፆና ዒዛና ዎላ'' ዒንሢ ፆኦሲ ዒንጋ ባኮ ዔካንዳዞንሢኬ። \x - \xo 3፥29 \xo*\xt ሮሜ 4፥13።\xt*\x*
\c 4
\p
\v 1 ሃሣ ታ ሂዚ ጋዓኔ፦ ዓዶ ዻካላኒ ቶይዶ ናዖ ማዔሢ ናይ ዓኣዖ ዎዚ ዒ ዓዶ ቆሎ''ኮ ቢያ ቢቲ ማዔቴያ ማኣራ ዓኣ ካራሞይዳፓ ዒ ዱማቱዋሴ። 
\v 2 ጋዓንቴ ዓዴ ዒዛም ጌዔ ዎዶ'' ሄላ''ንዳኣና ዒዛ ዔርዚ ዔርዚ ዲቻ ዓሶ ዴማ'' ዒ ማዓኔ።
\p
\v 3 ዬያጉዲ ኑኡኒ ፆኦሲ ዓያኖ ባኮ ዛሎ''ና ናይ ዓኣ ዎዶ''ና ሓያ ዓጮ'' ካኣዦ ዎጎም ዓይሌ ማዒ ኑ ዎርቃያኬ። 
\v 4 ጋዓንቴ ፆኦሲ ጌዔ ዎዳ'' ሄላ''ዛ ዓሲዳፓ ሾይንቴያ፤ ሓሣ ዎጎም ዓይሢንታያ ማዔ ፔኤኮ ናዓሢ ዒዚ ኑም ዳኬኔ፤ 
\v 5 ዬያ ዒ ማዼሢ ዎጎም ዓይሢንታያ ማዔዞንሢ ዻቂሻኒና ኑናኣ ዒዛኮ ኮሹሞና ፔ ናይ ማሃኒኬ። \x - \xo 4፥5 \xo*\xt ሮሜ 8፥15-17።\xt*\x* 
\v 6 ፆኦሲ ናይ ኑ ማዔሢሮ፦ «ታ ዓዴ» ጌይ ዒዛ ዔኤላ''፥ ፔኤኮ ናዓሢ ዓያኖ ኑም ዒ ዳኬኔ። 
\v 7 ዬያሮ ሃይፓ ሴካ ፆኦሲኮ ኔ ናይ ማዓንዳፓዓቴም ዓይሌ''ቱዋሴ፤ ፆኦሲኮ ኔ ናይ ማዔያታቴ ፆኦሲ ፔ ናኣቶ''ም ጊኢጊሼ ባኮ ቢያ ኔኤም ዒንጋንዳኔ።
\s ጳውሎሴ ጋላቲያ ዓሶም ማሌ ማሊፆ
\p
\v 8 ሓያኮ ቤርታ ፆኦሲ ዒንሢ ዔሪባኣሢሮ ካኣሽኮንዶ ባኣዚ'' ማዒባኣ ባኮም ዓይሌ'' ማዒ ዒንሢ ናንጌኔ። 
\v 9 ሃሢ ጋዓንቴ ዒንሢ ፆኦሲ ዔሬኔ፤ ላሚ ታ ኬኤዛኒ ኮዔቴ ፆኦሲያ ዒንሢ ዔሬኔ። ሂዳዖ ጊንሣ ዬያ ፓሡዋያና ላቤ''ያ ማዔ፥ ዓጮ'' ካኣዦ ዎጎ ባንሢ ዎዲ'' ዒንሢ ማዔይ? ሃሣ ዎዲ'' ዒንሢ ላሚ ዔያቶኮ ዓይሌ'' ማዓኒ ኮዔይ? 
\v 10 ዱማ ዱማ ኬሎ''፥ ዓጊኖ፥ ዎዶ''ንታ ሌዖንታ ዒንሢ ቦንቻኔ። 
\v 11 ዬያሮ ታ ዒንሢ ማኣዳ''ኒ ላቢ''ንቲ ማዼ ማዻ'' ጉሪ ማዓንዳሲንታኔ ጌይ ታ ሂርጋኔ።
\p
\v 12 ታ ዒሾንሦ! ታ ሚሾንሦ! ታ ዒንሢጉዲ ማዔሢሮ ዒንሢያ ታጉዲ ማዑዋቴ ጌይ ታ ሺኢቃኔ፤ ዒንሢ ታኣም ዓይጎዋ ፑርቲሲባኣሴ። 
\v 13 ቤርቲ ቤርታ ኮዦ ሓይሶ ታ ዒንሢም ኬኤዛኒ ዳንዳዔሢ ታኣኮ ሃርጎ ዛሎ''ና ማዔሢ ዒንሢ ዔራኔ። 
\v 14 ዎዚ ዒንሢም ታኣኮ ሃርጋ ሜቶ ማዔያታቴያ ዒንሢ ታና ቦሂባኣሴ፤ ሃሣ ሻኣኪንቲባኣሴ። ጋዓንቴ ፆኦሲኮ ኪኢታንቻጉዲ ዬያፓ ዑሣ ኪሪስቶሴ ቦንቺ ዔካያጉዲ ታና ዒንሢ ቦንቺ ዔኬኔ። 
\v 15 ሓሢ ሃያኮ ቤርታ ዒንሢ ታ ዛሎ''ና ዎዛዻ ዎዛ'' ቢያ ዎዎይቴይ? ዬኖና ዒንሢም ዳንዳዒንታቴ ዒንሢኮ ዓኣፖታዖ ታኣም ዒንጋንዳጉዲታሢ ታ ታ ቶኦኪና ዬያኮ ማርካኬ። 
\v 16 ሂዳዖ ሃሢ ጎኑሞ ታ ዒንሢም ኬኤዜሢሮ ዒንሢኮ ሞርኬ ታ ማዒያ?
\p
\v 17 ሓንጎ ዓሳ ዒንሢ ዛሎ'' ማሊ ሜታዻንዳያ ናንዳኔ፤ ማዔቴያ ዬያ ዔያታ ማዻሢ ኮሹሞምቱዋሴ፤ ዔያቶኮ ማሊፃ፦ ዒንሢ ኑ ጊዳ''ፓ ዱማዻንዳጉዲና ዔያቶም ዒንሢ ባሼ ማላንዳጉዲኬ። 
\v 18 ኮሹሞ ባኣዚ''ምታቴ ዶዲ ማሊፃ ኮሺኬ፤ ጋዓንቴ ዬይ ዒንሢኮ ታኣኒ ዒንሢና ናንጋ ዎዶ''ና ሌሊ ማዖፓ። 
\v 19 ታ ናይዮቴ! ኪሪስቶሴ ዒንሢዳ ፔጋዺ ጴዻንዳያ ሄላ''ንዳኣና ጊንሣ ዒንሢ ዛሎ'' ማሊፆና ሾይቺ ቆፂ''ሢ ሜታሳሢጉዲ ሜቶይዳ ታ ዓኣኔ። 
\v 20 ዱማ ማዔ ጎይሢና ዒንሢም ኬኤዛኒ ሃሢ ታ ዒንሢ ኮራታቴ ዓይጎ! ጋዓንቴ ዓይጎ ታ ማዻንዳቴያ ዔርቶ ዒፂ ባሼሢሮ ታ ሜታዻኔ።
\s ዓጋሮና ሳኣራናኮ ኮኦኪንሦ ማዒፆ
\p
\v 21 ዒንሢ ሙሴ ዔርዜ ዎጎም ዓይሢንቲ ናንጋኒ ኮዓ ዓሳ፥ ሂንዳ ታኣም ኬኤዙዋቴ፤ ዎጋ'' ዎዚ ጋዓቴያ ዒንሢ ዋይዙዋዓዳ? 
\v 22 ዎጎ ማፃኣፖይዳ፦ «ዓብራሃሜኮ ላምዖ ናይ ዓኣኔ፤ ፔቴ''ሢ ዒዛኮ ዓይሌ''ላ ሾዔያ ማዓዛ፥ ባጋሢ ሾይንቴሢ ማኣሮ ዒንዶይዳፓኬ» ጌይንቲ ፃኣፒንቴኔ። \x - \xo 4፥22 \xo*\xt ማዢ. ማፃ 16፥15፤ 21፥2።\xt*\x* 
\v 23 ዓይሌ''ሎይዳፓ ሾይንቴሢ ዓሲ ማሊሢና ማዓዛ ማኣሮ ዒንዶ ናዓሢ ሾይንቴሢ ጋዓንቴ ፆኦሲ ዒንጌ ዎዞ'' ቃኣሎ'' ጎይፆናኬ።
\p
\v 24 ዬንሢ ላምዖ ላኣሎንሢ ፆኦሲ ጫኣቄ ላምዖ ጫኣቁሞኮ ኮኦኪንሢ ማዓኔ። ፔቴ''ዛ፥ ሲና ዹኮ''ና ኮኦኪንሢንታዛ ዓጋኣሮኬ፤ ዒዛ ናኣቶ'' ሾዓሢ ዓይሉሞምኬ። 
\v 25 ዓጋኣራ ዓሬቦ'' ዓጮ''ይዳ ዓኣ፥ ሲና ዹኮ'' ማላታኬ፤ ዬያሮ ሃሢ ዓኣ ዬሩሳላሜ ማላኔ፤ ዒዛ ፔኤኮ ናኣቶ''ና ዎላ'' ዓይሉሞይዳ ዓኣያኬ። 
\v 26 ሎ ጫሪንጫፓ ማዔ፥ ዬሩሳላሜ ጋዓንቴ ዓይሌ''ቱዋሴ፤ ዒዛ ኑኡኮ ዒንዴሎኬ። 
\v 27 ዓይጎሮ ጌዔቶ፦
\q «ኔኤኒ ናይ ሾውዋ ዞኦኬሌ ዎዛዼ!
\q2 ኔኤኒ ሾዓኒ ባኒ ዔሩዋዜሌ ዒላሼ!
\q ዓኒ ዓኣ ላኣሌሎይዳፓ ባሼ
\q2 ዓኒ ሃሼ'' ላኣሌሎኮ ሚርጌ ናይ ዓኣያ ማዓንዳኔ»
\m ጌይንቲ ፃኣፒንቴኔ። \x - \xo 4፥27 \xo*\xt ዒሲ. 54፥1።\xt*\x*
\p
\v 28 ታ ዒሾንሦ! ታ ሚሾንሦ! ዒንሢያ ዪሳኣቄጉዲ ዒንጊንቴ ዎዞ'' ቃኣሎ'' ናኣቶ''ኬ። 
\v 29 ጋዓንቴ ዬኖ ዎዶ''ና ዓሲ ማሊሢና ሾይንቴሢ ዓያኖ ማሊፆና ሾይንቴሢ ዒፂ ዳውሴሢጉዲ ሓኖ''ዋ ዬያጉዲኬ። \x - \xo 4፥29 \xo*\xt ማዢ. ማፃ 21፥9።\xt*\x* 
\v 30 ጋዓንቴ ጌኤዦ ማፃኣፓ ዬያ ዛሎ'' ዎዚ ጋዓይ? ማፃኣፓ፦ «ዓይሌ''ሎ ናዓሢ ማኣሮ ዒንዳ ሾዔ ናዓሢና ዎላ'' ዓዶ ባኮ ዻካሊንዱዋኣሢሮ ዓይሌ''ሎ ናዓሢና ዎላ'' ኬሲ'' ዳኬ» ጋዓኔ። \x - \xo 4፥30 \xo*\xt ማዢ. ማፃ 21፥10።\xt*\x* 
\v 31 ዬያሮ ታ ዒሾንሦ! ታ ሚሾንሦ! ኑኡኒ ማኣሮ ዒንዶ ናኣቶ''ኬ፤ ዓይሌ''ሎ ናኣቶ''ቱዋሴ።
\c 5
\p
\v 1 ዓይሉሞፓ ኑ ኬስኪ፥ ሜታ ባኣያ ናንጋንዳጉዲ ኪሪስቶሴ ኑና ሙሴ ዔርዜ ዎጎ ዓይሉሞፓ ኬሴ''ኔ። ዬያሮ ዶዲ ዔቁዋቴ፤ ላሚ ዬያ ዓይሉሞይዳ ጌሊፖቴ።
\s ኪሪስቶሴና ጴዻ ዎጌ ዓይሉሞፓ ኬስኪሢ
\p
\v 2 ሓሢ ታኣኒ፥ ጳውሎሴ ዒንሢም ሂዚ ጋዓኔ፦ «ዓቲንቴ ቤርቲ ቲቂንታንዳያ ኑና ኮይሳኔ» ጌዒ ዒንሢ ዓቲንቶ ቤርቶ ቲቂንቴቴ ኪሪስቶሴ ዒንሢ ማኣዱዋያ ማዓንዳኔ፤ 
\v 3 «ዓቲንቴ ቤርቲ ቲቂሢ ታኣም ኮይሳኔ» ጌይ ቲቂንታይ ቢያ «ሙሴ ዔርዜ ዎጎ ቢያ ካፒ ኩንሣንዳያ ኮይሳኔ» ጌይ ላሚ ታ ላቲ'' ኬኤዛኣኬ። 
\v 4 ዒንሢ ዎጎ ካፒ ፂላ''ኒ ኮዓዞንሢ ቢያ ኪሪስቶሴይዳፓ ዱማዺ፥ ፆኦሲኮ ኮሹሞ ዒንጊፆ ዻቂንታፓኣ ዒንሢ ሃኬኔ። 
\v 5 ኑኡኒ ጋዓንቴ ፂሉ''ሞ ዴንቃኒ ዎዛ ጌሣሢ ፆኦሲ ዓያኖ ዛሎ''ና ጉሙርቂሢናኬ። 
\v 6 ዓይጎሮ ጌዔቴ ኑና ማኣዳ''ንዳሢ ኑኡኒ ዬሱስ ኪሪስቶሴና ዎላ'' ፔቴ'' ማዔም ናሹሞ ዛላና ማዾይዳ ፔኤቃ ጉሙርቂሢ ማዓንዳኣፓዓቴም ዓቲንቴ ቤርቲ ቲቂንቴቴያ ሓሼ''ቴያ ኑና ማኣዳ''ዓኬ።
\p
\v 7 ሓይማ ሄላ''ንዳኣና ዒንሢ ቃራታዖ ሃሢ ዒንሢ ጎኑሞም ዓይሢንቱዋጉዲ ዖ ላኣጌይ? 
\v 8 ዬያጉዴ ጌሺፃ ዒንሢ ኮራ ሙኬሢ ዒንሢ ዔኤሌ''፥ ፆኦዛሢዳፓቱዋሴ። 
\v 9 ዬይያ፦ «ዻካ'' ሙኑቃ ፃኣዛ ሙኑቆ ቢያ ካፂሳኔ» ጌይንቴሢጉዲኬ። \x - \xo 5፥9 \xo*\xt 1ቆሮ. 5፥6።\xt*\x* 
\v 10 ፔቴ''ታዖ ሜሌ'' ፑርታ ማሊሢ ዒንሢኮ ባኣሢ ታኣኒ ጎዳና ማዒ ጉሙርቃኔ። ጋዓንቴ ዒንሢ ዻቢሻኒ ማላይ ዓኣቶ ዬይ ዓሢ ዒዛም ኮይሳ ሜቶ'' ዔካንዳኔ።
\p
\v 11 ታ ዒሾንሦ! ታ ሚሾንሦ! ታኣኒ ሃኖ'' ሄላ''ንዳኣና ኬኤዛሢ፦ «ዻቂንታሮ ዓቲንቴ ቤርቲ ቲቂንቲሢ ኮይሳኔ» ጌይ ጌይታቶ ሃሢ ሄላ''ንዳኣና ዓይጎሮ ዒፂንቲ ታ ዳኪንታይ? ያዺ ማዔያታቴ ታ ኬኤዛ፥ ኪሪስቶሴ ሓይባ'' ዹቆ ዓሶም ማዒንዱዋያታንቴኬ። 
\v 12 ዓካሪ ዬንሢ፥ ዒንሢ ዻቢሻኒ ኮዓ ዓሶንሢ ዓቲንቶ ቤርቶ ቲቂፃ ዓታዛ ጉቤ ቲቄቶ ቃራኬ።
\p
\v 13 ታ ዒሾንሦ! ታ ሚሾንሦ! ዒንሢ ዎጌ ዓይላቶይዳፓ ኬስካንዳጉዲ ዔኤሊ''ንቴኔ፤ ጋዓንቴ ፔቴ''ሢ ባጋሢም ናሹሞና ዓይሢንቲ ማዻንዳኣፓዓቴም ዬይ ዒንሢኮ ዓይሉማፓ ኬስኪፃ ዒንሢ ሱኡኬ ኩንሥሢም ማዖፓ። 
\v 14 ዓይጎሮ ጌዔቴ፦ «ዓሲ ዓዳ'' ኔና ማሂ ናሽኬ» ጋዓዛ ሙሴ ዔርዜ ዎጎ ቢያ ዓርቂ ዓኣያኬ። \x - \xo 5፥14 \xo*\xt ሌዊ. ዓኬ 19፥18።\xt*\x* 
\v 15 ጋዓንቴ ዎሊ ዒንሢ ጌኤሲና ዻዓያና ሙዓያ ማዔቴ ዒንሢ ዎላ'' ባይቁዋጉዲ ዒንሢና ባዴዔ።
\s ዓሲ ማሊሢና ዓያና ማሊሢና
\p
\v 16 ዓካሪ ዓያናና ናንጉዋቴ፤ ዒንሢ ዬያይዴቴ ዒንሢ ማዻኒ ሱኡካዻ ባኮ ማዺንዱዋሴ ታ ጋዓኔ። 
\v 17 ዓይጎሮ ጌዔቴ ዒንሢ ማዻኒ ሱኡካዻ ማሊፃ ዓያና ማሊሢና ዎሊ ዒፃያኬ፤ ዓያናና ዒንሢ ማሊፆና ዎላ'' ካኣሙዋሴ፤ ዬያሮ ዒንሢ ማዻኒ ናሽካ ባኮ ማዻኒ ዒንሢ ዳንዳዑዋሴ። \x - \xo 5፥17 \xo*\xt ሮሜ 7፥15-23።\xt*\x* 
\v 18 ዓያና ዒንሢ ዔኪ ዓኣዻያ ማዔቴ ዎጌም ዒንሢ ዎርቃያ ማዒንዱዋሴ።
\p
\v 19 ዓሲ ማዻኒ ሱኡካዻ ማዾ ዔርቴያኬ፤ ዬያታ፦ ማቾ ሃሣ ዓኒ ማዒባኣያና ላሂሢ፥ ዒኢሳ ማዾ ማዺሢ፥ ማቾ ሃሣ ዓኒ ማዒባኣያና ላሃኒ ኮዒ ማሊሢ፥ 
\v 20 ሜሌ'' ካኣሺ ካኣሽኪሢ፥ ማርሻ ማርሺሢ፥ ዓሲ ዒፂሢ፥ ዑራ፥ ቂኢሩሞ፥ ዻጋ፥ ፔና ሌሊ ናሽኪሢ፥ ዱማዺሢ፥ ጌኔ ማዾሮ ዞርቲሢ፥ 
\v 21 ጌኔ ማዾ፥ ማሢንቲሢ፥ ኮይሱዋ ኮሢ ኮርጊሢና ዬያጉዴ ማዾኬ፤ ሓያኮ ቤርታ ታ ዒንሢም ላቴሢጉዲ ሓሣ ታ ዒንሢም ላቲ'' ኬኤዛኣኬ፤ ዬያጉዴ ማዾ'' ማዻዞንሢ ፆኦሲ ካኣቱሞይዳ ጌላዓኬ።
\p
\v 22 ዓያና ጌኤሺኮ ዓኣፒ ጋዓንቴ፦ ናሹሞ፥ ዎዛ፥ ኮሹሞ፥ ጊቢ'' ዳንዳዒሢ፥ ዓሲም ኮሽኪሢ፥ ጉሙርቂንቲሢ፥ 
\v 23 ሼሌዑሞ፥ ፔና ዔሪ ዎይሥሢኬ። ዬንሢጉዴ ባኮ ዒፃ ዎጌ ባኣሴ፤ 
\v 24 ዬሱስ ኪሪስቶሴሮ ማዔ ዓሳ ፔኤኮ ፑርቶ ማሊፆ ሱኡኮ ዬሱሴና ዎላ'' ፑርቲሴ ዓሶ ሱፆ ሚፆይዳ ሱፂ ዎዼኔ። 
\v 25 ዓያናና ኑ ናንጋያ ማዔቴ ዓያና ኑና ዻዋ ጎይፆ ኑ ሓንቶም። 
\v 26 ዎሊዳ ፑርቱሞና ኑ ዔቂ ዔቂ፥ ሓሣ ቂኢሪ ቂኢሪ ጉሪ ኑ ሄርሺንቲባኣያታቴ ቃራኬ።
\c 6
\s ዓሲ ቢያም ኮሺ ማዾ ማዺሢ
\p
\v 1 ታ ዒሾንሦ! ታ ሚሾንሦ! ዓሲ ዓይጎ ባኣዚ'' ዻቤቴያ ዒንሢ፥ ዓያናና ማዔ ዓሳ ዬያጉዴ ዓሶ ሼሌዑሞና ጊኢጊሹዋቴ፤ ጋዓንቴ ኔና ዬይ ዻቢሹዋጉዲ ኔና ዔሬ። 
\v 2 ዎሊ ሴካና ሃንጋና ማኣዲ'' ማኣዲ'' ፔቴ''ይ ባጋሢኮ ዴኤፆ ባሶ'' ባሶ''ንጎ፤ ዬያይዲ ኪሪስቶሴ ዓይሤ ዎጎ ዒንሢ ኩንሣያ ማዓንዳኔ።\f + \fr 6፥2\fr* \fk ዒንሢ ኩንሣያ ማዓንዳኔ፦\fk* ጋዓዞ ፔቴ'' ፔቴ'' ሚናኣ ማፃኣፓ «ኩንሡዋቴ» ጋዓኔ።\f* 
\v 3 ዖናታቴያ ሓንጎዋቶይዳፓ ዱማዻ ባኣዚ'' ባኣያታንቴ፦ «ታኣኒ ሓንጎ ዓሶፓ ባሼኬ» ጌይ ማላቶ ፔና ጌሻኔ። 
\v 4 ፔቴ'' ፔቴ'' ዓሳ ፔ ማዾ'' ዛጊ ዔሮንጎ፤ ዬካፓ ፔኤሲ'' ሓንጎዋቶሲና ዎላ'' ሄካሲፆ ሃሺ'' ፔ ማዾ''ና ሌሊ ሄርሺንታንዳ ባኣዚ'' ዴንቃንዳኔ። 
\v 5 ዓይጎሮ ጌዔቴ ፔቴ'' ፔቴ''ሢ ፔ ኬዶ'' ኬዳንዳያ ኮይሳሢሮኬ።
\p
\v 6 ፆኦሲ ቃኣሎ'' ዔሪፆይዳ ዓኣሢ ዔርዛሢና ዎላ'' ኮሺ ማዔ ባኮ ዞርቲ ዔካያ ማዖንጎ።
\p
\v 7 ዒንሢ ዒ'ንሢ ጌሺፖቴ፤ ፆኦሲ ዓማሊ''ንታያቱዋሴ። ዓሲ ፔ ማዾ''ማ ዔካኔ። 
\v 8 ፔ ሱኡኮ ማሊፆ ባኮ ማዻ ዓሲ ፔ ሱኡኮ ማሊፆይዳፓ ሓይቢ ዴንቃንዳኔ፤ ዓያና ዎዛሳኒ ማዻ ዓሢ ዓያናይዳፓ ናንጊና ናንጊ ዴንቃንዳኔ። 
\v 9 ኑ ማዾ'' ሃሺ''ባኣቶ ኮይሳ ዎዶ''ማና ኑ ማዼሢኮ ዓኣፖ ኑ ዔካንዳሢሮ ኮሺ ማዾ ማዺሢ ኑ ቤልፃዺባኣቴ ቃራኬ። 
\v 10 ኑ ማዻንዳ ዎዴ ዴንቄቴ ዓሲም ቢያ ሃሣ ባሼና ኪሪስቶሴ ጉሙርቃ ዓሶም ኮሺ ማዾ ኑ ማዾም።
\s ጋፒንሢ ዞሮና ሳራሥሢና
\p
\v 11 ሓያ ዎማይዲ ታ ኩቻ ዓንዲርሲ ታ ዒንሢም ፃኣፔቴ ሂንዳ ዛጉዋቴ፤ 
\v 12 ዒንሢ ዓቲንቶ ቤርቶ ቲቂንታንዳጉዲ ዎልቄና ዓይሣዞንሢ ዙልካ ጴዻ ባኣዚ''ና ሄርሺንታዞንሢኬ፤ ዬያ ዔያታ ማዻሢ' ኪሪስቶሴኮ ሓይቦ''ና ሜታሢ ዛሎ'' ኬኤዛያ ማዔቴ ዳውሲንታንዳሢሮኬ። 
\v 13 ዔያታ ዒንሢ ዓቲንቶ ቤርቶ ቲቂሾና ሄርሺንታኒ ማዓንዳኣፓዓቴም ዔያታ ቲቂንቴ ዓሳ ፔ ቶኦኪና ዎጋ'' ዓይሣ ጎይፆ ኩንሣያቱዋሴ። 
\v 14 ታኣኒ ዓጮ''ኮ ፑርቶ ማዻ''ፓ ዱማዺ፥ ዓጮ''ኮ ፑርቶ ማዻ'' ታጊዳፓ ዱማዺ ኪሪስቶሴና ዎላ'' ሓይቄ ሓይቦ''ይዳፓ ዓታዛ ሜሌ'' ታ ሄርሺንታ ባኣዚ'' ባኣሴ። 
\v 15 ዓቲንቴ ቤርቲ ቲቂንቴቴያ ሓሼ''ቴያ ማኣዳ'' ባኣዚ'' ባኣሴ፤ ማኣዳ''ሢ ዓኪ ማዢንቲ ማዒሢኬ። 
\v 16 ሓኖ' ዓይሢፆ ጎይፆ ዓኣዻ ፆኦሲ ዴሮ''ም ቢያ ኮሹሞና ማኣሪሢና ማዖንጎ።
\p
\v 17 ታኣኮ ዑፆይዳ ዓኣ ጳዺንቶ ዲኢዳ፡ ዬሱስ ኪሪስቶሴኮ ታ ዓይሌ'' ማዔሢ ዔርዛያታሢሮ ሓይፓ ሴካ ዖኦኒያ ታና ሜታሶፓ።
\p
\v 18 ታ ዒሾንሦ! ታ ሚሾንሦ! ኑ ጎዳሢ ዬሱስ ኪሪስቶሴኮ ኮሹሞ ዒንጊፃ ዒንሢ ዓያኖና ዎላ'' ማዖም፤ ዓኣሜን።