\id 2PE - Maale Project
\ide UTF-8
\h ጴፂሮሴ ኪኢቶ'' 2
\toc3 2ጴፂ.
\toc2 ጴፂሮሴ ኪኢቶ'' 2
\toc1 ፆኦሲ ማዾ''ም ዳኪንቴ ጴፂሮሴኮ ላምዓሳ ኪኢቶ''
\mt ፆኦሲ ማዾ''ም ዳኪንቴ ጴፂሮሴኮ ላምዓሳ ኪኢቶ''
\imt ዓይፆ ካሮ''
\ip ፆኦሲ ማዾ''ም ዳኪንቴ፥ ጴፂሮሴኮ ሓና'' ላምዓሳ ኪኢታ'' ፃኣፒንቴሢ፥ ዱማ ዱማ ቤዞይዳ ሚናኣ ዎዶ''ና ዓኣ ዬሱሴ ጉሙርቂ ጎናሲ ዔኬዞንሢምኬ። ኪኢቴሎኮ ዼኤፖ ማሊፃ ሉኡዙሞና ዔርዛያ ማዔዞንሢኮ ዔርዚፆ ዛሎ''ና ሙኬ ፑርቶ ማዾ'' ማኪ ዒፃያኬ። ዬያ ሜታሢኮ ዼኤሻ ማዓንዳኔ ጌይንቲ ማሊንታሢ' ዬሱሴ ፔ ዓኣፖና ዛጌዞንሢና ዒ ዔርዛ ዎዶ''ና ፔ ዋዮና ዋይዜ ዓሳ ዔርዜ ባኮይዳፓ ፆኦሲና ጎዳ ዬሱስ ኪሪስቶሴና ዛሎ'' ኮይሳ ዔራቶ ዴንቂሢኬ። ሓኖ' ኪኢቶ'' ፃኣፔ ዓሢ ባሼ ዔርዛኒ ማሌሢ፦ «ኪሪስቶሴ ላሚ ሙኩዋሴ» ጋዓ ሉኡዙሞ ሃይሶ ዛሎ''ኬ፤ ዬያ ዛሎ'' ዒ ኬኤዛዖ ኪሪስቶሴ ማዒ ሙኪፆ ኔጋሢ፡ ዓሲ ቢያ ጎሜይዳፓ ማዓንዳጉዲ ፆኦሲ ኮዓሢሮ፤ ሓሣ ዓይጎ ዓሲያ ባይቃንዳጉዲ ዒ ኮውዋኣሢሮኬ ጋዓኔ።
\iot ማፃኣፔላ ዱማ ዱማ ዓርቄ ባኮ
\io ዓይፆ ካሮ'' 1፥1-2
\io ዬሱሴ ጉሙርቃ ዓሳ ናንጋንዳ ጎይሢ 1፥3-21
\io ሉኡዙሞና ዔርዛ ዓሶ ዛሎ'' 2፥1-22
\io ኪሪስቶሴኮ ማዒ ሙኪፆ ዛሎ'' 3፥1-18
\c 1
\p
\v 1 ዬሱስ ኪሪስቶሴም ማዻያ ማዔሢና ዒዛ ማዾ''ም ዳኪንቴ ሲሞኦኔ ጌይንታ ጴፂሮሴይዳፓ፦
\p ኑ ፆኦዛሢና ኑኡኮ ዼኤሻሢ ዬሱስ ኪሪስቶሴፓ ጴዻ ፂሉ''ሞ ዛሎ''ና ኑ ዴንቄ ጉሙርቂፆጉዴያ ማዔ ቦንቺንቴ ጉሙርቂፆ ዴንቄዞንሢም፤
\p
\v 2 ፆኦሲ፤ ሃሣ ኑ ጎዳሢ ዔሪሢና ሃሣ ዒዛይዳፓ ማዔ ፆኦሲኮ ኮሹሞ ዒንጊፆና ኮሹሞና ዒንሢም ዺቦንጎ።
\s ፆኦሲኮ ዔኤሊ''ፆና ዶኦሪፆና
\p
\v 3 ፔ ቦንቾና ሃሣ ፔ ኮሹሞና ኑና ዔኤሌ''ሢ፥ ዒዛ ኑ ዔሬሢሮ ናንጊንታ ጎኔ ዓያና ዓሲ ማዒሢንታም ኮይሳ ባኮ ቢያ ፔኤኮ ፆኦሱሞ ዎልቆና ኑም ዒንጌኔ። 
\v 4 ዬንሢ ኑም ዒንጊንቴ ባኮንሢ ዛሎ''ና ሳዖይዳ ዓኣ ፑርቶ ሱኡኮይዳፓ ዔቄያና ማሊፆ ላቢ''ሳ ባኮይዳፓ ዒንሢ ቶሊ''፥ ፆኦሲ ናንጋ ጎይፆጉዲ ዒንሢያ ናንጋያ ማዓንዳጉዲ ቦንቺንቴያና ሃሣ ሚርጌና ዼኤፒ ማዔ ሃጊ ማዓንዳ ዎዞ'' ኑም ዒዚ ዒንጌኔ። 
\v 5 ዬያ ዛሎ''ሮ ጌዒጋፓ ሃይፓ ሊካ ፓይዲንታ ባካ ዒንሢም ቃሲ''ንታንዳጉዲ ኮዑዋቴ፤ ፆኦሲ ጉሙርቂሢዳ ኮሹሞ፥ ኮሹሞይዳ ዔራቶ፥ 
\v 6 ዔራቶይዳ ፔና ቆሊሢ፥ ፔና ቆሊሢዳ ጊቢ'' ዳንዳዒሢ፥ ጊቢ'' ዳንዳዒሢዳ ዓያናና ዓኣ ዓሲ ማዒሢ፥ 
\v 7 ዓያናና ዓኣ ዓሲ ማዒሢዳ ዎሊም ዓዳ'' ጌርሲና ጌሮናጉዲ ማሊሢ፥ ጌርሲና ጌሮናጉዲ ዎሊም ማሊሢዳ ናሹሞ ቃሱዋቴ። 
\v 8 ዬንሢ ባኮንሢ ዒንሢዳ ሚርጌና ዓኣቶ ኑ ጎዳሢ ዬሱስ ኪሪስቶሴ ዒንሢ ዔሬ ዔራታ'' ፓሣ ባኣዚ'' ባኣያና ዓኣፒ ዓኣፑዋያ ዒንሢ ማሃዓኬ። 
\v 9 ዬንሢ ባኮንሢባኣ ዓሲ ጋዓንቴ ሃኬ ዓኣ ባኮ ዛጋኒ ዳንዳዑዋያ ዓኣፒ ባይቄ ዓሲኬ፤ ሃያኮ ቤርታ ዺቦ'' ጎሞይዳፓ ማኣሪንቲ ጌኤሽኬሢያ ዒ ዋሌኔ።
\p
\v 10 ዬያሮ ታ ዒሾንሦ! ታ ሚሾንሦ! ዒንሢኮ ዔኤሊ''ንቲፆና ዶኦሪንቲፆ ዔራኒ ሚርጌና ዶዱዋቴ፤ ያዺ ዒንሢ ማዔቶ ፔቴ''ታዖ ዻቢንታዓኬ። 
\v 11 ዬያይዲፆና ኑና ዻቂሻ፥ ጎዳ ዬሱስ ኪሪስቶሴኮ ናንጊና ናንጋያ ማዔ ካኣቱሞይዳ ጌላኒ ጉቤ ቢታንቶ ዒንሢም ዒንጊንታንዳኔ።
\p
\v 12 ዎዚ ሃንሢ ባኮንሢ ዒንሢ ዔራያና ዓርቄ ጎኑሞና ዶዲ ናንጋያ ማዔቶዋ ዬያቶ ዒንሢም ኬኤዚ ጶቂሥሢ ታ ዋላ''ዓኬ። 
\v 13 ታኣኒ ሼምፖና ዓኣዖ ዒንሢ ቢያ ኬሊ'' ጴቻንዳያ ታና ኮይሳኔ ጌዒ ታ ማላኔ። 
\v 14 ኑ ጎዳሢ ዬሱስ ኪሪስቶሴ ታኣም ዻዌ ጎይፆና ሓኖ' ዓጮ''ይዳፓ ዑኬና ሃይቂ ታ ዱማዻንዳሢ ታ ዔራኔ። 
\v 15 ሃሢ ታ ዒንሢም ዶዲሺ ኬኤዛሢ ሃይቂ ታ ዒንሢዳፓ ዱማዼሢኮ ጊንፃፓ ማዔቴያ ዬንሢ ባኮንሢ ዋሉ''ዋዖ ቢያ ኬሊ'' ዒንሢ ጶቂሣንዳጉዲኬ።
\s ኪሪስቶሴኮ ቦንቾ ዓኣፒና ዴንቄ ማርኮንሢ
\p
\v 16 ኑ ጎዳ ዬሱስ ኪሪስቶሴኮ ዎልቆና ዒዛኮ ሙኪፆ ዛሎ'' ኑ ዒንሢም ኬኤዛ ዎዶ''ና ኑ ኑ ቶኦኪና ዒዛኮ ዒጊቻ ቦንቾ ዓኣፒና ዛጊ ማዓንዳኣፓዓቴም ዓሲ ዔራቶና ኬኤዚንቴ ሓይሴ ዓርቂቱዋሴ። 
\v 17 «ታና ዎዛሳ፥ ታኣኒ ናሽካ ናዓሢ ታኣኮ ሃያኬ» ጋዓ ዑኡዛ ዼኤፖ ቦንቾይዳፓ ዒዛም ሙኬ ዎዶ''ና ፆኦሲ ዓዳሢዳፓ ዒዚ ጋላታና ቦንቾና ዔኬኔ። 
\v 18 ዒዛና ዎላ'' ጌኤዦ ዹኮ''ይዳ ኑ ዓኣዖ ዬኖ ጫሪንጫፓ ሙኬ ዑኡዞ ኑ ኑ ቶኦኪና ዋይዜኔ። \x - \xo 1፥18 \xo*\xt ማቲ. 17፥1-5፤ ማር. 9፥2-7፤ ሉቃ. 9፥28-35።\xt*\x*
\p
\v 19 ዬኖ ሃሣ ሚርጌና ጎናሳ ፆኦሲ ማሊፆ ኬኤዛ ዓሶኮ ቃኣላ'' ኑ ኮራ ዓኣኔ፤ ዬኖ ቃኣሎ''፦ ሳዓ ካሪ ካሪፆ ዦኦጋሢያ ዒንሢኮ ዒና'' ፖዓንዳኣና ዹሚዳ ፖዓ ፖዒጉዲ ሂርጊ ዒንሢ ዓርቂ ካፔቶ ቃራኬ። 
\v 20 ቢያ ባኣዚ''ኮ ቤርታ ዒንሢ ጶቂሢ ዔራኒ ኮይሳ ባኣዚ'' ጌኤዦ ማፃኣፖይዳ ዓኣ ፆኦሲ ማሊፆ ዓይጎ ማዔቶዋ ፔቴ'' ዓሲታዖ ፔ ማሊሢና ቡላ''ኒ ዳንዳዑዋያ ማዔሢኬ። 
\v 21 ዓይጎሮ ጌዔቶ ጌኤዦ ማፃኣፖይዳ ዓኣ ፆኦሲ ማሊፃ ቢያ ፔቴ''ታዖ ዓሲ ማሊሢና ኬኤዚንቴያቱዋሴ፤ ጋዓንቴ ዓያና ጌኤሺ ዓሶም ኬኤዜም ዓሳ ፆኦሲዳፓ ዔኪ ኬኤዜያኬ።
\c 2
\s ሉኡዙሞና ዔርዛ ዓሶ
\p
\v 1 ቤርታኣ ዎዶ''ና ዴሮ'' ባኣኮ''ይዳ ሉኡዙሞና ፆኦሲ ማሊሢ ኬኤዛኔ ጋዓ ዓሲ ዓኣሢጉዲ ዒንሢ ባኣኮ''ይዳኣ ሃሢ ሉኡዙሞ ባኮ ዔርዛ ዓሲ ጴዻንዳኔ፤ ዔያታ ባይሲንታ ባንሢ ዔኪ ዓኣዻ ሉኡዙሞ ባኣዚ'' ዔራቶ ዴሜና ዔኪ ጌልዛንዳኔ። ዬያይዲፆና ዔያቶ ሻንቂ ጌኤሼ ጎዳሢታዖ ዔያታ ዔሩዋሴ ጌዔም ባይሲንታ ዑኬና ዔያቶ ሄላ''ንዳኔ፤ 
\v 2 ዬያ ዛሎ''ና ሚርጌ ዓሳ ዔያቶኮ ቦርሲሳ ማዾ'' ማዻንዳኔ፤ ዔያቶኮ ዬያ ማዾ''ይዳፓ ዔቄያና ጎኑሞ ጎይፃ ጫሽኪንታንዳኔ። 
\v 3 ዬያታ ሉኡዙሞና ዔርዛ ዓሳ ሚኢሼ ዛጊ ጎጋይቂሢዳፓ ዔቄያና ፔኤኮ ኬሴ'' ሃይሴ ኬኤዚ ኬኤዚ ዎልቆ ዒንሢሲ ጌሺ ሙዓንዳኔ። ዖዶሲ ዎዴኮ ቤርታፓ ዓርቂ ፑርታ ዎጌ ዔያቶም ጊኢጊንቲ ዓኣኔ፤ ባይሲንታ ሃሣ ዔያቶ ጴጪ ካፒ ዓኣኔ።
\p
\v 4 ፆኦሲ ጎሜ ማዼ ኪኢታንቾታዖ ዼኤፖ ዹሞይዳ ካኒ ቢራታና ቱኪ'' ዎጎ ኬሎ'' ካፓንዳጉዲ ኬኤሬያፓዓቴም ዔያቶም ሚጪንቲባኣሴ። 
\v 5 ዬያጉዲ ፆኦሲ ሃያኮ ቤርታ ጎሞ ዓሳ ናንጋ ዓጮ''ይዳ ባይሲንቶ ዋኣፆ ዔኪ ሙካዖ ጌኤሹሞ ዛሎ'' ኬኤዛ ኖሄ ላንካይ ዓሲና ዎላ'' ዓይሴያፓዓቴም ቤርታዻ ዓጮ''ም ዒዚ ሚጪንቲባኣሴ። \x - \xo 2፥5 \xo*\xt ማዢ. ማፃ 6፥1—7፥24።\xt*\x* 
\v 6 ሃሣ ጊንሣ ጎሜ ማዻ ዓሲም ቢያ ዎጊንቲሢኮ ኮኦኪንሢ ማዓንዳጉዲ ሶዶኦሜና ጋሞኦራና ካታማ'' ዲቢንሢ ማዓንዳያ ሄላ''ንዳኣና ታሚና ሚቺንቲ ባይቃንዳጉዲ ዎጌኔ። \x - \xo 2፥6 \xo*\xt ማዢ. ማፃ 19፥24።\xt*\x* 
\v 7 ዓይሢንቲፆ ዒፃ ዓሶኮ ቦርሲሳ ማዾ'' ዛጊ ዒኖና ማሊ ማሊ ሜታዺ ናንጋ ጌኤዣሢ፥ ሎኦፄ ጋዓንቴ ዒዚ ዓይሴኔ። \x - \xo 2፥7 \xo*\xt ማዢ. ማፃ 19፥1-16።\xt*\x* 
\v 8 ዓይጎሮ ጌዔቶ ዬይ ጌኤዦ ዓሢ ዔያቶ ባኣካ'' ናንጋኣና ቢያ ኬሊ'' ዒ ዛጋ ባኮና ዋይዛ ፑርቶ ማዾ'' ዛሎ''ና ጌኤሺ ማዔ ሼምፓሢ ዒዛኮ ሜታዼኔ። 
\v 9 ዓካሪ ዬይ ቢያ ያዺ ማዔቶ ፆኦሲ ጎኑሞና ካኣሽኪ ናንጋ ዓሶ ዻቢሳ ባኣዚ''ዳፓ ዓይሲ፤ ሃሣ ጎሞ ዓሶ ሜታሲ ዎጎ ኬሎ'' ሄላ''ንዳኣና ጌሢ ዎይቲ ካፓንዳቴያ ፆኦሲ ዔራኔ። 
\v 10 ባሼ ዬኖ ዒኢሳያ ማዔ ዓሶ ማሊፆ ሱኡኮ ኩንሣዞንሢና ፆኦሲኮ ዔራቶ ቦሃዞንሢና ዎጌም ዒዚ ካፒ ጌሤኔ።
\p ዬያታ ሉኡዙሞ ባኮ ዔርዛ ዓሳ ጫርቃያና ዖቶርቃያና ማዔሢሮ፥ ጫሪንጫ ዎልቄና ዓኣ ማዢንቶ ጫሽካኣና ዔያታ ዒጊጩዋሴ። 
\v 11 ፆኦሲኮ ኪኢታንቻ ዔያቶይዳፓ ዎልቄና ቢታንቶና ባሻያ ማዔቶዋ ጎዳ ቤርቶይዳ ጫሪንጫ ቢታንታ ዓኣዞንሢ ጫሽኩዋሴ። 
\v 12 ዬያታ ሉኡዙሞ ባኮ ዔርዛ ዓሳ ጋዓንቴ ፔኤሮ ማሊ ዒና ዔኪ ዔሩዋ ጫሺ ጫሽካኔ፤ ዔያታ ፒሮና ዓርቂንቲ ባይቃኒ ሾይንቴያ፥ ሃሣ ፔ ሼና'' ዓይሣ ጎይፆ ኩንሣያ ዒናባኣ ካዮ ቦዖጉዴያኬ፤ ዬያሮ ዔያታ ካዮ ቦዓ ባይቃሢጉዲ ባይቃንዳኔ። 
\v 13 ዔያቶኮ ፑርቱሞ ዛሎ''ም ዒንጎ ዎጎ ዔያታ ዔካንዳኔ፤ ዔያቶኮ ዎዛ'' ቢያ ኬሊ'' ዓሲ ማሊሢም ኮይሳ ባኮ ኩንሥሢኬ፤ ጌሻያ ማዔ ዓሲም ኮይሳ ባኮና ቢያ ኬሊ'' ዎዛዻያታዖ ዒንሢ ናሹሞና ሙዓ ሙዖ ቤዞ ዓኣዺፆና ዒንሢ ቦርሲሳያኬ። 
\v 14 ጎሜ ማዺሢዳፓ ጊንሢም ጎውዋያና ማቾ ሃሣ ዓኒ ማዒባኣ ዓሲና ላሂሢ ሌሊ ዛጋ ዓኣፒ ዔያቶኮ ዓኣኔ፤ ዶዲ ዔቂባኣ ዓሶዋ ዔያታ ዻቢሻኔ፤ ሃሣ ሚኢሼ ዛጊ ጎጋይቂሢ ዔራ ዒኔ ዔያቶኮ ዓኣኔ፤ ዬያሮ ዔያታ ጋዳንቂንቴ ዓሲኬ። 
\v 15 ዔያታ ፒዜ ማዔ ጎይፆ ሃሺ'' ፑርቶ ማዾ''ሮ ዒዛም ዒንጎ ቦንቾ ማዔ ሚኢሾ ናሽኬ፥ ቢዖሬ ናኣዚ''፥ ባኣላኣሜ ጎይፆማ ዓኣዺ ዻቢንታኔ። 
\v 16 ፆኦሲ ማሊፆ ኬኤዛ ባኣላኣሜ ጋዓንቴ ዒዚ ማዼ ጎሞ ዛሎ'' ቆዲ''ንቴኔ፤ ሃሣ ጌስቲ ዔሩዋ ሃሬስኬና ዓሲ ዑኡሲና ዒዛም ኬኤዚ ዒዛኮ ዣኣሹሞ ማዾ'' ላኣጌኔ። \x - \xo 2፥16 \xo*\xt ፓይ. ማፃ 22፥4-35።\xt*\x*
\p
\v 17 ያኣታ ዓሳ ዓልቃያታዖ ሚጬ ዎርዚጉዴያኬ፤ ሃሣ ዢባሬ ሂዒ ዔኪ ዓኣዻ ሻኣሬጉዴያኬ፤ ዬያሮ ዔያቶ ሻኔ ዹሚ ካፒ ዓኣኔ። 
\v 18 ዓይጎሮ ጌዔቶ ዣኣሊ ናንጋ ዓሶ ባኣካ''ፓ ኬስኪ ሙኬዖ ናንጊባኣ ዓሶም ጉሪ ማዔ ዼኤፒ ሃይሴ ኬኤዚ ኬኤዚ ማቾ ሃሣ ዓኒ ማዒባኣ ዓሲና ላሂ ዓሲ ማሊሢ ሱኡኬ ኩንሦ ጎይሢና ዔያቶ ጌሻኔ። 
\v 19 ጊንሣ፦ «ጎሜ ዓይላ''ቶይዳፓ ዒንሢ ኬስካንዳኔ» ጌዒ ጌዒ ዓሶም ሃጊ ማዓንዳ ዎዛ ዒንጋኔ። ዔያታ ጋዓንቴ ፔ ቶኦኪና ጎሜኮ ዓይሌ''ኬ። ዓይጎሮ ጌዔቶ ዓሲ ባሺንታዖ ባሼሢም ዓይሌ'' ማዒ ቆሊንታኔ። 
\v 20 ኑ ጎዳሢ፥ ኑና ዻቂሼ ዬሱስ ኪሪስቶሴ ዔሪ ሳዖይዳ ዒኢሳ ባኮይዳፓ ቶላ''ዖ ጊንሣ ዬኖ ዒኢሳ ባኮና ዓርቂንቲ ዔያታ ባሺንቴቴ ቤርታኣስካፓ ዑሣ ጊንፃኣሲ ዔያቶም ባሼ ፑርታንዳኔ፤ 
\v 21 ዓይጎሮ ጌዔቶ ጌኤዦ ጎይፆ ዔሪ ዔያቶም ዒንጊንቴ ዱማዼ ዓይሢፆ ሃሺ'' ጊንሢም ማዓስካፓ ቤርታ ዔያታ ጌኤዦ ጎይፆ ዔሩዋዖ ዓቴቶ ቃራታዖኬ። 
\v 22 «ካኒ ጮኦሽኬ ጮኦዦ ጊንሣ ሙዓኔ» ዬያጉዲ ሃሣ «ጉዱንሢ ዑፆ ማስቴስካፓ ጊንሣ ዾቃሌይዳ ኮላዻኔ» ጌይንቲ ኬኤዚንቴ ኮኦኪንሣ ዔያቶይዳ ጎኔ ማዒ ኩሜኔ። \x - \xo 2፥22 \xo*\xt ኮኦኪ. 26፥11።\xt*\x*
\c 3
\s ጎዳ ዬሱሴኮ ላሚ ሙኪፆ ዛሎ''
\p
\v 1 ታ ዒሾንሦ! ታ ሚሾንሦ! ሃይ ታ ዒንሢም ፃኣፓ ላምዓሲ ኪኢታኬ፤ ላምዖ ኪኢቶ'' ታ ዒንሢም ፃኣፔሢ ሃንሢ ባኮንሢ ዒንሢ ጶቂሳንዳጉዲና ፒዜ ማሊሢ ዓኣያ ማዓንዳጉዲ ዒንሢ ጴቻኒ ጌዒኬ። 
\v 2 ሃያኮ ቤርታ ፆኦሲ ማሊፆ ኬኤዛ ጌኤዦ ዓሳ ኬኤዜ ቃኣሎ''፤ ዬያጉዲ ዳኪንቴ ዓሶ ዛሎ''ና ዒንሢ ዴንቄ ኑ ጎዳሢ፥ ሃሣ ኑና ዻቂሼሢኮ ዓይሢፆዋ ዒንሢ ጶቂሣንዳጉዲ ታ ኮዓኔ። 
\v 3 ሃሣ ቢያ ባኣዚ''ኮ ቤርታ ዬያ ባኮ ጶቂሱዋቴ፤ ዬይ ዓይጎዳይ ጌዔቶ ጋፒንፆ ኬሎ''ና ቦሃ ዓሲና ፔኤኮ ፑርቶ ሱኡኮ ሌሊ ኩንሣ ጌሻ ዓሲ ሙካንዳኔ፤ \x - \xo 3፥3 \xo*\xt ዪሁ. 18።\xt*\x* 
\v 4 ዔያታ ሙካዖ፦ « ‹ጎዳ ዬሱሴ ሙካንዳኔ› ጌይንታ ዎዛ'' ዒንጊንቲባኣዓዳ? ሂዳዖ ሃሢ ዎካ ዓኣይ? ኑኡኮ ቤርታ ዓዶንሢ ሃይቄስካፓ ዓርቃዖ ቢያ ባካ ማዢንቶኮ ዓይፆይዳፓ ሃኖ'' ሄላ''ንዳኣና ዓኣማ ጉዴያኬ» ጋዓንዳኔ። 
\v 5 ዬያታ ዓሳ ሚርጌ ዎዴኮ ቤርታ ሳዖንታ ጫሪንጮንታ ፆኦሲ ቃኣሎ''ና ማዢንቴሢ ሳዚ «ኑ ዔሩዋሴ» ጋዓንዳኔ፤ ሳዓ ማዢንቴሢ ዋኣሢ ባኣካፓ፤ ሃሣ ዋኣሢና ማዢንቴሢ «ዔሩዋሴ» ጋዓንዳኔ። \x - \xo 3፥5 \xo*\xt ማዢ. ማፃ 1፥6-9።\xt*\x* 
\v 6 ቤርታዻ ሳዓ ዬያይዲፆና ዋኣሢና ዔኤዺንቲ ባይቄኔ። \x - \xo 3፥6 \xo*\xt ማዢ. ማፃ 7፥11።\xt*\x* 
\v 7 ሃሢ ዓኣ ጫሪንጮንታ ሳዖንታ ዓይሢንቶ ዒፃ ዓሳኣ ባይቃንዳ ጋፒንፆ ዎጎ ኬሎ'' ሄላ''ንዳኣና ዬያ ፆኦሲ ዎልቆና ታሚም ካፒንቲ ዓኣኔ።
\p
\v 8 ዒጊኖንሢዮቴ! ዒንሢ ጋዓንቴ ጎዳሢ ኮራ ፔቴ'' ኬሊ'' ሺያ ሌዔ፥ ሺያ ሌዔ ፔቴ'' ኬሊ''ጉዴያ ማዔሢ ዬማ ፔቴ'' ባኣዚ'' ዋሊ''ፖቴ። \x - \xo 3፥8 \xo*\xt ዓይኑ. 90፥4።\xt*\x* 
\v 9 ፔቴ'' ፔቴ'' ዓሶም ናጋያ ማላሢጉዲ ጎዳ ዬሱሴ ዒዚ ኬኤዜ ሃጊ ማዓንዳ ዎዞ'' ቃኣሎ'' ኩንሣኒ ናጊንዱዋሴ፤ ጋዓንቴ ዓሲ ቢያ ጎሜፓ ማዓንዳጉዲና ሃሣ ፔቴ''ታዖ ዓሲ ባይቁዋጉዲ ዒንሢ ዛሎ''ሮ ጌዒ ዒዚ ጊቢ'' ካፓኔ።
\p
\v 10 ጎዳሢኮ ኬላ'' ጋዓንቴ ዉሲጉዲ ዔሩዋንቴ ሙካንዳኔ፤ ዬኖ ኬሎ''ና ጫሪንጫ ዼኤፒ ዑኡሲና ዓኣዻንዳኔ፤ ጫሪንጮ ማዢንታኣ ቢያ ታሚና ሚቺንቲ ባይቃንዳኔ፤ ሳዖና ሳዖይዳ ዓኣ ባካ ቢያ ሚቺንታንዳኔ፤ \x - \xo 3፥10 \xo*\xt ማቲ. 24፥43፤ ሉቃ. 12፥39፤ 1ቴስ. 5፥2፤ ዮሓ. ፆፔዻ 16፥15።\xt*\x* 
\v 11 ዓካሪ ቢያ ባኣዚ'' ዬያይዲ ባይቃያ ማዔቴ ሂዳዖ ጌኤሹሞና ሃሣ ዓያናና ዓኣ ዓሲ ማዒ ናንጊሢ ዎይቲ ዒንሢም ኮይሱዋዖ ዓታንዳይ? 
\v 12 ዬያሮ ፆኦሲኮ ኬላ'' ሙካንዳሢ ጶቂሢ ካፓያና ዒዚ ዑኬ ሙካንዳሢ ዔሪ ማዻያ ማዑዋቴ፤ ዬኖ ኬሎ''ና ጫሪንጫ ታሚና ሚቺንቲ ባይቃንዳኔ፤ ጫሪንጫ ዓኣ ማዢንታ ታሞኮ ዖይዻፓ ዔቄያና ዓልቃንዳኔ፤ 
\v 13 ጋዓንቴ ፂሉ''ሞኮ ማኣሪ ማዔ ዓኮ ጫሪንጮና ዓኮ ሳዖና ዒዚ ኬኤዜ ሃጊ ማዓንዳ ዎዞ'' ቃኣሎ'' ጎይፆ ኑ ካፓኔ። \x - \xo 3፥13 \xo*\xt ዒሲ. 65፥17፤ 66፥22፤ ዮሓ. ፆፔዻ 21፥1።\xt*\x*
\p
\v 14 ዬያሮ ዒጊኖንሢዮቴ! ዬይ ቢያ ማዓንዳ ኬሎ'' ካፒሢዳ ዒንሢ ዓኣቶ ቦርሲሳ ባኣዚ'' ባኣያ ሃሣ ዒንሢ ቦሂሳ ባኣዚ'' ባኣያ ማዒ ዒንሢ ዓኣንቴ ጎዳ ዒንሢ ኮሺና ሙኪ ዴንቃንዳጉዲ ዶዲ ማዹዋቴ፤ 
\v 15 ኑ ጎዳሢ ጊቢ'' ዴዔሢ ዒንሢ ዻቃንዳጉዲ ጌይ ማዔሢ ዋሊ''ፖቴ፤ ናሽኪንታ ኑ ዒሻሢ ጳውሎሴያ ፔኤም ዒንጊንቴ ዔራቶ ጎይፆና ዒንሢም ፃኣፔሢ ዬያኬ። 
\v 16 ዒዚ ዬኖ ዛሎ'' ፔ ኪኢቶ''ይዳ ቢያ ሃማ ጎይፆ ፃኣፔኔ፤ ዒዛኮ ኪኢቶ''ይዳ ፔቴ'' ፔቴ'' ዔራኒ ሜታሳ ባኣዚ'' ዓኣኔ። ዔራቶ ፓጬ ዓሶና ሴካ ሃንጋ ጌዒ ሺራ ዓሳ ጌኤዦ ማፃኣፖ ማሊፆ ዎቢሳሢጉዲ ዬንሢ ባኮዋ ዎቢሳንዳኔ፤ ያዒ ዔያታ ማዺፆና ባይቃንዳኔ፤
\p
\v 17 ዒንሢ ጋዓንቴ ዒጊኖንሢዮቴ! ዬያ ቤርታዺ ዔሬሢሮ ዓይሢንቶ ዒፃ ዓሶ ማሊፆይዳ ጌሊ ዒንሢ ዶዲ ዔቄ ቤዛፓ ሎኦሙዋጉዲ ኮሺ'' ዔሩዋቴ፤ 
\v 18 ቢያፓ ባሼ ኑ ጎዳሢና ኑና ዻቂሻ ዬሱስ ኪሪስቶሴኮ ኮሹሞና ዒንጊንታ ዒንጊፆና ጊንሣ ዒዛ ዔሪሢና ዲጩዋቴ፤ ዒዛም ሃሢያ ሃጊያ ናንጊና ቦንቾ ማዖንጎ! ዓኣሜን።