\id 2CO - Maale Project
\ide UTF-8
\h ቆሮንቶሴ ዓሶም 2
\toc3 2ቆሮ.
\toc2 ቆሮንቶሴ ዓሶም 2
\toc1 ፆኦሲ ማዾም ዳኪንቴ ጳውሎሴ ቆሮንቶሴ ዓሶም ዳኬ ላምዓሳ ኪኢቶ''
\mt ፆኦሲ ማዾም ዳኪንቴ ጳውሎሴ ቆሮንቶሴ ዓሶም ዳኬ ላምዓሳ ኪኢቶ''
\imt ዓይፆ ካሮ''
\ip ጳውሎሴ ቆሮንቶሴ ዓሶም ፃኣፔ ላምዓሳ ኪኢታ'' ፃኣፒንቴሢ' ጳውሎሴና ቆሮንቶሴይዳ ዓኣ፥ ኪሪስቶሴ ጉሙርቃ ዓሶና ባኣካ'' ሜታ ማዢንቲ ዓኣንቴኬ። ፔቴ'' ፔቴ'' ኪሪስቶሴ ጉሙርቃ ዓሳ ዒማ''ና ዒዛ ፑርቲሲ ዾንካያ ማዔቴያ ጳውሎሴ ዔያቶና ዎላ'' ጊኢጋኒ ኮዓያ ማዒፆ ሃሣ ጊኢጌያ ማዔቴ ሚርጌና ዒዛ ዎዛሳኒ ዳንዳዓሢ ሃና ኪኢታ ኬኤዛኔ።
\ip ኪኢቶ''ኮ ዓይፆይዳ፡ ጳውሎሴ ቆሮንቶሴይዳ ዓኣ፥ ኪሪስቶሴ ጉሙርቃ ዓሶና ዎላ'' ዓኣ ዒዛኮ ፔቱሞና ኪሪስቶሴ ጉሙርቃ ዓሶ ባኣካ'' ዒዛ ዾንካ ዓሶና ዒዛ ዒፂ ማካ ዓሶም ዓይጋ ዒ ዴኤፃ ዑኡሲና ማሂ ኬኤዜቴያ ዔርዛኔ። ሃሣ ዬይ ዒዛኮ ጎሪ''ፃ ዔያታ ዻቢንቲፓ ማዓንዳጉዲና ዒዛና ቡካንዳጉዲ ማሄሢሮ ዒዛ ዎዛሴ፥ ዎዞ'' ዔያቶም ኬኤዛኔ። ዬካፓ ዪሁዳ ዓጮ''ይዳ ዓኣ፥ ኪሪስቶሴ ጉሙርቃ ዓሶ ማኣዳ''ኒ ኮሹሞና ዔያታ ዒንጎ ባኣዚ'' ዒንጋንዳጉዲ ዔያቶም ኬኤዛኔ። ሓኖ' ኪኢቶ''ኮ ጋፒንፆ ዓይፆንሢዳ ዓሳ ዒዛ ዒፂ ጋዓ ጌኤዞኮ ማሂፆ ጳውሎሴ ኬኤዛኔ፤ ዓይጎሮ ጌዔቴ ቆሮንቶሴይዳ ዓኣ፥ ኪሪስቶሴ ጉሙርቃ ፔቴ'' ፔቴ'' ዓሳ ፔና ጎኔ ፆኦሲ ማዾም ዳኪንቴያ ማሂ፦ «ጳውሎሴ ፆኦሲ ማዾ''ም ጎኔ ዳኪንቴያቱዋሴ» ጌዒ ዒዛ ፑርቲሲ ኬኤዛሢሮኬ።
\iot ማፃኣፔላ ዱማ ዱማ ዓርቄ ባኮ
\io ዓይፆ ካሮ'' 1፥1-11
\io ጳውሎሴና ቆሮንቶሴይዳ ዓኣ ሺኢጲፆ ማኣሮ ዓሶና ዛላ 1፥12—7፥16
\io ዪሁዳይዳ ዓኣ፥ ኪሪስቶሴ ጉሙርቃ ዓሶም ዳኪንቴ ማኣዶ 8፥1—9፥15
\io ጳውሎሴ ፆኦሲ ማዾ''ም ዳኪንቴያ ማዔሢ ኬኤዜሢ 10፥1—13፥10
\io ጋፒንሢ ሓይሴ 13፥11-13
\c 1
\p
\v 1 ፆኦሲ ማሊሢ ማዔም ዬሱስ ኪሪስቶሴኮ ዳኪንቲ ማዻያ ማዔ፥ ጳውሎሴና ኑ ዒሻሢ ፂሞቴዎሴናይዳፓ፦ \x - \xo 1፥1 \xo*\xt ዳኪ. ማዾ'' 18፥1።\xt*\x*
\p ቆሮንቶሴይዳ ዓኣ ሺኢጲፆ ማኣሮ ዓሶና፤ ዬያጉዲ ዓካይያይዳ ዓኣ፥ ኪሪስቶሴ ጉሙርቃ ዴሮ''ም ቢያ።
\p
\v 2 ኑ ዓዳሢ፥ ፆኦዛሢና ኑ ጎዳሢ ዬሱስ ኪሪስቶሴናኮ ሚጪንቲፆና ኮሹሞና ዒንሢም ማዖንጎ።
\s ጳውሎሴ ፆኦሲ ጋላቴ ጋላቶ''
\p
\v 3 ሚጪንታ ዓዶ ማዔያ፤ ሃሣ ቢያ ባኣዚ''ና ዶዲሻያ ማዔ ፆኦዛሢ፥ ኑ ጎዳሢ ዬሱስ ኪሪስቶሴኮ ዓዶ፥ ፆኦዛሢም ጋላታ ሄሎ''ንጎ። 
\v 4 ኑኡኒ ፆኦሲዳፓ ዴንቃ ዶዱሞና ሜታሢዳ ዓኣ ዓሶ ቢያ ዶዲሻኒ ዳንዳዓንዳጉዲ፥ ፆኦሲ' ኑ ሜታዻ ዎዶ''ና ቢያ ኑና ዶዲሻኔ። 
\v 5 ኪሪስቶሴ ሜታዼ ሜቶ'' ኑዋ ሚርጌና ሜታዼሢጉዲ ኪሪስቶሴ ዛሎ''ና ዶዱሞ ሚርጌና ኑ ዴንቃንዳኔ። 
\v 6 ኑኡኒ ሜታዻ ዎዶ''ና ዒንሢ ዶዱሞና ዻቂንታና ዴንቃኔ። ኑኡኒ ዶዱሞ ዴንቃ ዎዶ''ና ሃሣ ዒንሢያ ኑኡኒ ሜታዼ ሜቶ''ጉዴ ሜቶ ጊቢ'' ዳንዳዒ ዶዱሞ ዴንቃኔ፤ 
\v 7 ኑኡና ዎላ'' ዒንሢ ሜታዻሢጉዲ፥ ኑ ዶዱሞዋ ዒንሢ ዴንቃያ ማዔሢ ኑ ዔራሢሮ ዒንሢዳ ኑ ጌሣ፥ ሃጊ ማዓንዳ ዎዛ'' ዶዲኬ።
\p
\v 8 ታ ዒሾንሦ! ታ ሚሾንሦ! ዒሲያይዳ ኑ ዓኣንቴ ኑና ሄሌ'' ሜታሢ ዒንሢ ዔራንዳጉዲ ኑ ኮዓኔ፤ ዬይ ኑና ሄሌ'' ሜታሢ ሚርጌና ኑም ዴኤፄያ ማዔሢሮ ኑ ሼምፔና ዓታንዳኔ ጌዒ ማሊባኣሴ። \x - \xo 1፥8 \xo*\xt 1ቆሮ. 15፥3።\xt*\x* 
\v 9 ፔቶ ኑ ሓይቃንዳጉዲ ኑ ዑፃ ዎጊንቴያ ኑም ማሊ ጴዼኔ፤ ዬይ ቢያ ኑና ሄሌ''ሢ ሃይቄ ዓሶ ዔቂሳ፥ ፆኦሲ ኑ ጉሙርቃንዳጉዲ ማሃንዳፓዓቴም ኑና ኑ ጉሙርቁዋጉዲኬ። 
\v 10 ዬያሮ ዒዚ ኑና ዬያ ሓይቦ''ይዳፓ ዻቂሼኔ፤ ሓጊያ ኑና ዻቂሻንዳኔ፤ ኑና ዻቂሻንዳኔ ጌዒ ሃጊ ማዓንዳ ዎዞ ኑ ጌሤሢ ዒዛይዳኬ፤ 
\v 11 ዬይ፡ ዒንሢ ኑና ሺኢጲፆና ማኣዳ''ሢሮ፥ ሚርጌ ዓሶ ሺኢጲፆና ኑኡኒ ፆኦሲ ማኣዶ ዴንቄም ሚርጌሢ ፆኦሲ ጋላታንዳኔ።
\s ጳውሎሴኮ ማሌ ማሊፆ ሺርሺፆ
\p
\v 12 ሓያ ዓጮ''ይዳ ባሼ ዒንሢና ዎላ'' ኑ ፔቱሞና ሃሣ ፆኦሲዳፓ ማዔ፥ ፂሉ''ሞና ፒዙሞና ኑ ናንጌሢ ኑ ዒና'' ማርካዻኔ፤ ዬይ ዓሲ ዔራቶናቱዋንቴ ፆኦሲ ፔ ኮሹሞና ዒንጋ ዒንጊፆ ዎልቆናኬ፤ ዬያሮ ሄርሺንታ ኑኡኮ ዬያናኬ። 
\v 13 ናባቢ ዒንሢ ዔራኒ ዳንዳዑዋ ባኣዚ'' ኑ ዒንሢም ፃኣፓዓኬ፤ ቢያ ባኮ ዒንሢ ዔራንዳሢያ ታ ጉሙርቃኔ፤ 
\v 14 ሓሢ ዒንሢ ኑ ዛሎ'' ጋፒሲ ዔሩዋ ባኮ ጊንፃፓ ጋፒሲ ዒንሢ ዔራንዳሢ ታ ጉሙርቃኔ፤ ጎዳ ዬሱሴ ኬሎ''ና ኑ ዒንሢና ዖቶርቃንዳሢጉዲ ዒንሢያ ኑኡና ዖቶርቃንዳኔ።
\p
\v 15 ዬይ ባካ ጎኔ ማዔሢ ታ ዔራሢሮ ላሚ ዒንሢም ማዓ ባኣዚ'' ዒንሢ ዴንቃዳጉዲ ቤርታዺ ዒንሢ ታ ዛጋኒ ማሌንቴኬ። 
\v 16 ዬያ ታ ዛጋኒ ማሌሢ' ሜቄዶኒያ ባንሢ ዓኣዻኣና ሃሣ ዒኢካፓ ማዒ ሙካኣናኣ ቢያኬ፤ ዬካፓ ዪሁዳ ታ ዓኣዻኣና ዒንሢ ታና ማኣዳ''ንዳኔ ጌዒ ታ ማሌኔ። \x - \xo 1፥16 \xo*\xt ዳኪ. ማዾ'' 19፥21።\xt*\x* 
\v 17 ጋዓንቴ ዬያ ታ ማላኣና ታኣኒ ማዻ ባኮ ዔሩዋዖ፥ ማሊፆና ሴካ ሃንጋ ጌዒ ሺራ ዓሲ ማላ? ሃሣ ዬያ ማሊፆና ፔቴ''ና «ሂዮዋ፥ ዔይዔያ» ጌዒ ጌዒ ዓሲ ማሊሢና ታ ማዻያ ማላ? 
\v 18 ፆኦሲ ሉኡቁዋ ፆኦሲ ማዔሢሮ ኑኡኒያ ዒንሢም ኬኤዛሢ «ሂዮዋ፥ ዔይዔያ» ጌዒ ሴካ ሃንጋ ጌይሲ ሺርሻ ባኣዚ''ቱዋሴ። 
\v 19 ዓይጎሮ ጌዔቴ ታናንታ ሲላሴንታ ፂሞቴዎሴንታ ፆኦሲኮ ናዓሢ፥ ዬሱስ ኪሪስቶሴ ዛሎ'' ኑ ዒንሢም ኬኤዛሢ «ሂዮ» ጋዓያና ሌሊ ማዓንዳኣፓዓቴም «ሂዮዋ፥ ዔይዔያ» ጋዓያናቱዋሴ። \x - \xo 1፥19 \xo*\xt ዳኪ. ማዾ'' 18፥5።\xt*\x* 
\v 20 ፆኦሲ ኑም ዒንጌ ሃጊ ማዓንዳ ዎዛ'' ቢያ «ሂዮ» ማዒ ኩማንዳሢ ዬሱስ ኪሪስቶሴናኬ። ዬያሮኬ ፆኦሲ ቦንቾም ኪሪስቶሴና «ዓኣሜን» ኑ ጋዓሢ። 
\v 21 ኑና ማዔቴያ ዒንሢ ኪሪስቶሴና ኑ ዶዳንዳጉዲ ማሄሢ ፆኦሲኬ፤ ዒዛም ኑና ዱማሴሢያ ዒዛኬ። 
\v 22 ዒዛም ኑ ማዔሢ ዔርዛ ማላታ ኑጊዳ ጌሤሢና ሃጊ ኑም ዒንጊንታንዳ ባኮኮ ዓያኖ ጌኤዦ ዓይሢ ባኣዚ'' ማሂ ኑም ዒንጌሢ ዒዛኬ።
\p
\v 23 ታኣኒ ቆሮንቶሴ ማዒ ሙኪባኣሢ ዒንሢ ዖዪሳዓ ጌዒ፥ ሚጪንቲሢናኬ፤ ዬያኮ ፆኦሲ ታኣኮ ማርካኬ። 
\v 24 ዒንሢ ጉሙርቂሢና ዶዴያ ማዔሢሮ ዒንሢ ዎዛሳኒ ዒንሢና ዎላ'' ኑ ማዓንዳኣፓዓቴም ዒንሢ ጉሙርቃንዳ ባኮ ኑ ዒንሢም ኬኤዚ ዓይሣያቱዋሴ።
\c 2
\p
\v 1 ዓካሪ ታ ዒንሢ ዖዪሳኒ ኮይባኣሢሮ ላሚ ታ ዒንሢ ኮይላ'' ሙካዓ ጌዒ ማሌኔ። 
\v 2 ታ ዒንሢ ዖዪሴያ ማዔቴያ ታ ዖዪሴ፥ ዒንሢዳፓ ዓታዛ ሜሌ'' ታና ዎዛሳንዳይ ዖናዳይ? 
\v 3 ሓያኮ ቤርታ ታ ዒንሢም ፃኣፔሢ ዒንሢ ኮይላ'' ታ ሙካኣና ታና ዎዛሳኒ ኮይሳ ዓሳ ታና ዖዪሱዋጉዲ ጌዒኬ፤ ዓይጎሮ ጌዔቴ ታ ዎዛዼኔ ጌይፃ ዒንሢ ቢያሢ ዎዛዼኔ ጌይሢ ማዔሢ ታ ጉሙርቃኔ። 
\v 4 ሚርጌ ዖዪ፥ ሜታዺ ማሊሢና ሃሣ ሚርጌና ዬኤኪ ዬኤኪ ታ ዒንሢም ፃኣፔሢ ሚርጌ ታ ዒንሢ ናሽካያ ማዔሢ ዒንሢ ዔራንዳጉዲ ጌይ ማዓንዳኣፓዓቴም ዒንሢ ዖዪሳኒ ጌይቱዋሴ።
\s ዻቤ ዓሲም ዓቶም ጌይሢ ዛላ
\p
\v 5 ዓይጎ ዓሲያ ማዖም ዓሲ ዖዪሴይ ዓኣቶ ዒዛኮ ዻቢንቶ ፑኡፒሲ ኬኤዚሢቱዋንቴ ዒ ዖዪሴሢ ታናቱዋንቴ ዒንሢዳፓ ሚርጌሢ ዒ ዖዪሴኔ ጌይሢኬ። 
\v 6 ዬያጉዴ ዓሢም ዒንሢዳፓ ሚርጌሢ ጌስቲ ዓጌ ባካ ዒዛም ጊዳንዳኔ። 
\v 7 ዬያሮ ዬይ ዓሢ ሚርጌ ዖዪሢና ዎዛ ባይዙዋጉዲ፥ ዒዛም ዒንሢ ዓቶም ጋዓንዳያና ዶዲሻንዳያ ኮይሳኔ። 
\v 8 ሃሣ ዒንሢ ዒዛ ናሽካያ ማዒፆ ጊንሣ ጎናሲ ዔርዛንዳጉዲ ታ ዒንሢ ሺኢቃኔ። 
\v 9 ዬያ ኪኢቶ'' ታ ዒንሢም ፃኣፔሢ ዒንሢ ዛጋኒ ዒንጎ ሜታሢ ዎዲ'' ዒንሢ ዶዲ ዓኣሣቴያ ሃሣ ቢያ ዎዴ ታኣኒ ዓይሣ ባኮ ዒንሢ ኩንሣያ ማዔቴያ ዔራኒ ጌይኬ። 
\v 10 ዒንሢ ዻቢንቶ ዓቶም ጋዓ ዓሢም ታኣኒያ ዓቶም ጋዓንዳኔ፤ ታ ዒዛም ዓቶም ጋዓንዳ ዔርቴ ዻቢንቲ ዓኣቶ ታኣኒ ኪሪስቶሴ ቤርታ ዒዛም ዓቶም ጌዔሢ ዒንሢ ጋቴ ጌይኬ። 
\v 11 ዬያ ኑ ማዻሢ ፃላሄኮ ጌኖ ማሊፆ ኑ ዔራሢሮ ካራ ዒ ዴንቂ ጌሉዋጉዲ ጌይኬ።
\s ኪሪስቶሴና ጴዻ ባሺሢ
\p
\v 12 ዬካፓ ኪሪስቶሴኮ ኮዦ ሃይሶ ኬኤዛኒ ፂሮዓዳ ታ ዓኣዼ ዎዶ''ና ጎዳ ዳልጊ ማዾኮ ካራ ታኣም ቡሌ''ንቴ፥ 
\v 13 ዒኢካ ታኣኒ ታ ዒሻሢ፥ ቲቶ ዴንቂባኣሢሮ ዒና'' ታኣኮ ሃውሺባኣሴ። ዬያሮ ዒኢካ ዓኣ ኪሪስቶሴ ጉሙርቃ ዓሶ ሳራሢ ሜቄዶኒያ ታ ዓኣዼኔ። \x - \xo 2፥13 \xo*\xt ዳኪ. ማዾ'' 20፥1።\xt*\x*
\p
\v 14 ጋዓንቴ ቢያ ዎዴ ኪሪስቶሴ ባሻ ባሺፆና ዔኪ ኑና ሃንታሢንታ ኪሪስቶሴኮ ዓኣ ዔራቶ ቢያ ቤዞ ሳውቃ ቲሺጉዲ ኑ ሄሊ''ሳንዳጉዲ ኑና ማሃ ፆኦዛሢም ጋላታ ሄሎ''ም። 
\v 15 ኑኡኒ ዻቃ ዓሶም ማዔቴያ ባይቃ ዓሶም ኮሺ ሳውሞ ዓኣ ዑንጄጉዲ ኪሪስቶሴ ዛሎ''ና ፆኦሲም ዒንጊንቴያኬ። 
\v 16 ባይቃ ዓሶም ዎዻያ፥ ሃይቢ ሃይቢ ጌይ ሳውቃያ፤ ዻቃዞንሢም ጋዓንቴ ኑኡኒ ናንጊ ዒንጋያ ሼምፖ ሳዊኬ፤ ዓካሪ ዬያ ማዾ'' ማዻኒ ዳንዳዓሢ ዖናዳይ? 
\v 17 ኑኡኒ፡ ፆኦሲ ቃኣሎ'' ኮርሞ ባኣዚ''ሮ ዔኪ ሃንታ ሚርጌ ዓሶጉዲቱዋሴ፤ ጋዓንቴ ኑኡኒ ፆኦሲፓ ዳኪንቴ ዓሶጉዲ ኪሪስቶሴና ማዒ ፆኦሲ ቤርታ ፒዙሞና ኬኤዛኔ።
\c 3
\s ዓኮ ጫኣቁሞ ዎዶ''ና ማዻ ዓሶ
\p
\v 1 ኑ ኑና ጊንሣ ሄሄርሻኔ ጌይሢዳ? ሃሣ ፔቴ'' ፔቴ'' ዓሳ ማዻሢጉዲ ዒንሢምታቴያ ዒንሢዳፓ ፒዜ ማዻያ ማዒፆ ዔርዛ ዋርቃታ ኑም ኮይሳኔ ጌይሢዳ? 
\v 2 ዓሲ ቢያ ዒንሢ ዛጋያና ናባባያ፥ ኑ ፒዜ ማዻያ ማዒፆ ዔርዛ፥ ኑ ዒና'' ፃኣፒንቲ ዓኣሢ ዒንሢኬ። 
\v 3 ዒንሢ፡ ኑ ማዼ ማዻ''ፓ ጴዼያ፥ ኪሪስቶሴኮ ፃኣፒንቴ ኪኢታ ማዔሢ ዔርቴያኬ፤ ዬይ ኪኢታ'' ፃኣፒንቴሢ ናንጊና ናንጋ ፆኦሲ ዓያኖና ማዓንዳኣፓዓቴም ዓሲ ፃኣፓ ባኣዚ''ናቱዋሴ፤ ሃሣ ዬይ ዓሲ ዒናይዳ ፃኣፒንቴያኬ፤ ዓርሲንቴ ሹቺዳ ፃኣፖናያቱዋሴ። \x - \xo 3፥3 \xo*\xt ኬሲ. ማፃ 24፥12፤ ዔር. 31፥33፤ ሂዚ. 11፥19፤ 36፥26።\xt*\x*
\p
\v 4 ዬያ ኑ ጋዓሢ ኪሪስቶሴ ዛሎ''ና ፆኦሲ ጉሙርቂኬ። 
\v 5 ኑ ማዻ ማዾ'' ማዻንዳጉዲ ዎልቄ ኑም ዒንጋሢ ፆኦሲ ማዓንዳኣፓዓቴም ኑኡኒ ኑ ቶኦኪና ዓይጎዋ ማዻኒ ዎልቄ ኑኡኮ ባኣሴ። 
\v 6 ዓኮ ጫኣቁሞ ዎዶ'' ማዾ'' ኑ ማዻንዳጉዲ ማሄሢ ፆኦሲኬ፤ ዬይ ፃኣፒንቴ ዎጎናቱዋንቴ ዓያኖ ጌኤዦ ዛሎ''ና ማዔያኬ፤ ፃኣፒንቴ ዎጋ'' ዎዎዻኔ፤ ዓያኖ ጌኤዣ ጋዓንቴ ሼምፖ ዒንጋኔ። \x - \xo 3፥6 \xo*\xt ዔር. 31፥31።\xt*\x*
\p
\v 7 ፃኣፒንቴ ዎጎ ቆኦቂ ኮሾ''ናሢ ዓርሲንቴ ሹጮይዳኬ፤ ዎጋ ዒንጊንቴ ዎዶ''ና ፆኦሲ ቦንቻ ፔጋዺ ጴዼኔ፤ ሙሴኮ ዓኣፖ ካሮ''ይዳ ፖዔ ፖዓ ባይቂ ባይቂ ዓኣዻያ ማዔቴያ ዒስራዔኤሌ ዓሳ ሙሴኮ ዓኣፖ ካሮ'' ኮሺ'' ዛጋኒ ዳንዳዒባኣሴ፤ ዓካሪ ዎዻ ዎጋ'' ዬያጉዴ ቦንቾና ጴዼያ ማዔቴ፥ \x - \xo 3፥7 \xo*\xt ኬሲ. ማፃ 34፥29።\xt*\x* 
\v 8 ዓያኖ ጌኤዦ ዛሎ''ና ማዺንታ ማዻ'' ዎዚ ባሼ ቦንቾ ዓኣያ ማዓንዳይ! 
\v 9 ዓሶ «ዻቤኔ» ጌዒ ዎጋ ማዻ'' ዬያይዲ ቦንቺንታያ ማዔቴ ዓሶ ዻቂሻ ማዻ'' ዎዚ ባሼ ቦንቾ ዓኣያ ማዓንዳይ! 
\v 10 ቤርታ ቦንቺንቴያ ማዔ ማዻ'' ሃሢ ባሼ ቦንቺንቴ ማዾ''ና ዎላ'' ቤኤዚ ዛጎዛ ቦንቾ ባኣ ባኣዚ'' ማዒ ጴዻኔ። 
\v 11 ዬይ ባይቃያ ማዔ ባካ ዬያጉዴ ቦንቾና ዓኣያ ማዔቴ ናንጊና ባይቁዋዖ ናንጋ ባኮኮ ባሼ ቦንቾ ዓኣኔ ጌይሢኬ።
\p
\v 12 ዬያጉዴ ሃጊ ማዓንዳ ዎዛ ኑኡኮ ዓኣሢሮ ዑሣ ዓኣዼ ጫርቂ ኑ ኬኤዛኔ። 
\v 13 ሙሴኮ ዓኣፖ ካራ'' ፖዓሢ ሓሻኣና ዒስራዔኤሌ ዓሳ ዒዛኮ ዓኣፖ ካሮ'' ዴንቁዋጉዲ ዓኣፖ ካሮ'' ዒ ካንቃኔ፤ ኑኡኒ ጋዓንቴ ዒዛ ጉዲቱዋሴ። \x - \xo 3፥13 \xo*\xt ኬሲ. ማፃ 34፥33።\xt*\x* 
\v 14 ዒስራዔኤሌ ዓሶኮ ዒና'' ዔኩዋያ ማዒ ጎኔና ዶጪ ዓኣኔ፤ ሃኖ'' ሄላ''ንዳኣና ሚናኣ ጫኣቃሢ ማፃኣፖ ዔያታ ናባባኣና ዒና'' ዔያቶኮ ዬኖ ካንቆ ዓፒሌሎና ካንቂንታያኬ፤ ጋዓንቴ ዬና'' ካንቃ ባኬላ ባይቃንዳሢ ኪሪስቶሴ ዛሎ''ና ሌሊኬ። 
\v 15 ሃኖ'' ሄላ''ንዳኣና ሙሴ ዔርዜ ዎጎ ማፃኣፖ ዔያታ ናባባኣና ዒና'' ዔያቶኮ ዬኖ ባኬሎና ካንቂንታኔ። 
\v 16 ጋዓንቴ ዬና ባኬላ ሺኢካኒ ዳንዳዓኔ፤ ጌኤዦ ማፃኣፖይዳ፦ «ሙሴ ጎዳ ባንሢ ማዓዛ ካንቃ ባኬላ ሺኢኬኔ» ጋዓኔ። \x - \xo 3፥16 \xo*\xt ኬሲ. ማፃ 34፥34።\xt*\x* 
\v 17 ዬያሮ ጎዳ ጌይንቴሢ ዓያኖኬ፤ ጎዳኮ ዓያና'' ዓኣ ቤስካ ዓይሉሞ ባኣሴ። 
\v 18 ዬያሮ ኑ ቢያሢ ጎዳኮ ቦንቾ ካንቂንቲባኣ ዓኣፒ ካራና ፖዒ፥ ፔጋሲ ዻዋኔ፤ ዓያና ማዔ ጎዳይዳፓ ጴዻ ሃይ ቦንቻ ቦንቾይዳ ቦንቾ ኑም ቃሲ'' ቃሲ'' ዓዳ'' ጎዳ ኑ ማላንዳጉዲ ማሃኔ።
\c 4
\s ፆኦሲ ማዾ''ም ዳኪንቴዞንሢኮ ጉሙርቂንቲ ማዾ''
\p
\v 1 ፆኦሲ ፔ ኮሹሞና ሃያ ማዾ'' ኑም ዒንጌሢሮ ሓጋኣ ዎዛባኣ ዓሲ ኑ ማዓዓኬ። 
\v 2 ዔርቲባኣ ባኮና ቦርሳያ ማዔ ባኮ ኑ ሃሼ''ኔ፤ ጌሺሢ ማዾዋ ኑ ማዹዋሴ፤ ፆኦሲኮ ቃኣሎ'' ሉኡዙሞ ባኣዚ''ና ዎላ'' ኑ ሲኢሩዋሴ፤ ጋዓንቴ ጎኑሞ ፔጋሲ፥ ፔጋ ኬኤዛኔ፤ ማሊፆ ኑኡሲያ ዓሲም ቢያ ፔጋሲ ፔጋሲ ፆኦሲ ቤርታ ኑ ናንጋኔ። 
\v 3 ኑ ኬኤዛ ኮዦ ሃይሳ ዔርቱዋያ ማዔቴያ ዔርቱዋያ ማዓሢ ባይቃ ዓሶምኬ። 
\v 4 ዔያታ ኑ ኬኤዛ ባኮ ጉሙርቁዋኣሢ ሃያ ዓጮ''ኮ ፆኦሲ ማዔ፥ ፃላሄ ዒኖ'' ዔያቶኮ ባይዜሢሮኬ፤ ፆኦሲ ማሎና ጴዼ፥ ኪሪስቶሴ ቦንቾ ዛሎ'' ኬኤዚንቴ ኮዦ ሃይሶይዳፓ ጴዻ ፖዖ ዴንቁዋጉዲ ዔያቶ ማሄሢ ዒዛኬ። 
\v 5 ኑኡኒ ኬኤዛሢ' ዬሱስ ኪሪስቶሴ ጎዳ ማዔሢና ኑኡኒያ ኑ ቶኦኪና ዬሱሴ ዛሎ''ና ዒንሢም ማዻያ ማዒፆ ማዓንዳኣፓዓቴም ኑ ዛላ ኑ ኬኤዙዋሴ። 
\v 6 ዓይጎሮ ጌዔቴ፦ «ፖዓ ዹሞይዳ ፖዖንጎ» ጌዔ ፆኦዛሢ ኪሪስቶሴ ማሎና ፖዓ፥ ፆኦሲ ቦንቾ ዔርዛ ፖዒ ኑም ዒንጊንታዳጉዲ ፖዖ ኑኡኮ ዒኖይዳ ፖዒሤኔ። \x - \xo 4፥6 \xo*\xt ማዢ. ማፃ 1፥3።\xt*\x*
\s ዖቲ ጋርካ ጌሢንቴ ኮይዚንታ ሜሄ
\p
\v 7 ጋዓንቴ ሃይ ዼኤፖ ዎልቃ ፆኦሲዳፓ ማዓንዳኣፓዓቴም ኑኡሮ ማዒባኣሢ ዔርታንዳጉዲ ሃያ ቦንቾ ባኮ ዖቲ ማዒ ኑ ዓርቂ ዓኣኔ። 
\v 8 ቢያ ዛሎ''ና ሜታ ኑና ሄላ''ኔ፤ ጋዓንቴ ኑ ባሺንቱዋሴ፤ ሚርጌና ዔርቲ ዒፃ ባኣዚ'' ኑ ጊዳ'' ሙካኔ፤ ማዔቴያ ኑ ሃጊ ማዓንዳ ዎዛ ባይዙዋሴ፤ 
\v 9 ኑና ዒፃ ዓሳ ዳውሳኔ፤ ጋዓንቴ ላጌ ኑ ባይዚ ቤቂባኣሴ፤ ጳዺንቲ ኑ ሎኦማኔ፤ ጋዓንቴ ኑ ባይቁዋሴ፤ 
\v 10 ዬሱሴኮ ሃይቦ'' ባሼ ሼምፓሢ ኑ ዑፃ ፔጋዺ ዔርታንዳጉዲ ቢያ ዎዴ ዬሱሴኮ ሃይቦ'' ኑ ዑፃ ኑ ኬዲ ሃንታኔ። 
\v 11 ዒዛኮ ሃይቦ'' ባሼ፥ ሼምፓሢ ኑኡኮ ሃይቃ ዑፆይዳ ፔጋዺ ዔርታንዳጉዲ ጌዒ ኑኡኒ ሃሢ ሼምፖና ዓኣ ዓሳ ቢያ ኬሊ'' ዬሱሴ ዛሎ''ሮ ሃይቄዖ ዓቲ ዓቲ ዓኣኔ። 
\v 12 ዓካሪ ኑኡኒ ሓይቄዖ ዓቲ ዓቲ ናንጋኔ፤ ዒንሢ ጋዓንቴ ሼምፖና ናንጋኔ።
\p
\v 13 ጌኤዦ ማፃኣፖይዳ፦ «ታ ጉሙርቃሢሮ ኬኤዜኔ» ጌይንቲ ፃኣፒንቴሢጉዲ፥ ኑኡኒያ ዬኖ ዓያኖና ጉሙርቃኔ፤ ዬያሮ ኑ ኬኤዛኔ። \x - \xo 4፥13 \xo*\xt ዓይኑ. 116፥10።\xt*\x* 
\v 14 ጎዳ ዬሱሴ ሃይባ''ፓ ዔቂሴ ፆኦዛሢ ኑናኣ ዬሱሴና ዎላ'' ዔቂሲ፥ ዒንሢና ዎላ'' ፔ ቤርቶ ሺኢሻንዳሢ ኑ ዔራኔ። 
\v 15 ዬይ ቢያ ዒንሢ ማኣዳ''ንዳጉዲ ማዔኔ፤ ፆኦሲኮ ኮሹሞ ዒንጊፃ ሚርጌ ዓሶም ዒንጊንቲ ዒንጊንቲ ዓኣሢ ዬይ ዓሳ ፆኦሲ ሚርጌና ጋላታንዳጉዲና ቦንቻንዳጉዲኬ።
\s ጎዳ ጉሙርቂ ናንጊሢ
\p
\v 16 ዬያሮ ኑ ሃጋኣ ዎዛባኣ ዓሲ ማዓዓኬ፤ ዎዚ ኑኡኮ ዙላ'' ጴዻ፥ ዑፃ ባይቃያ ማዔቴያ ጋሮ ዑፃ ኑኡኮ ቢያ ኬሊ'' ዓካዻኔ። 
\v 17 ዎይቲ ጌዔቴ ሃይ ሼሌዔ፤ ሃሣ ዻካ'' ዎዴሮ ማዔ ሜታሢ ቤቃያባኣ፥ ናንጊና ናንጋ ቦንቾ ኑም ጴዺሻንዳኔ። 
\v 18 ኑኡኒ ዛጊ ዓኣሢ፦ ጴዻ ባኮቱዋንቴ ጴዹዋ ባኮኬ፤ ዓይጎሮ ጌዔቴ ጴዻ ባካ ሃሣኣ ባኣዚ'' ሌሊኬ፤ ጴዹዋ ባካ ጋዓንቴ ናንጊና ባይቁዋ ባኣዚ'' ማዔሢሮኬ።
\c 5
\p
\v 1 ሓይ ዉልሻ ማላ፥ ዻካ'' ዎዴሮ ማዔ ዑፃ ኑኡኮ ባይቄቴያ ዓሲ ማዢባኣያ፥ ፆኦሲ ማዤ ናንጊና ናንጎ ማኣሪ ኑኡኮ ጫሪንጮይዳ ዓኣሢ ኑ ዔራኔ። 
\v 2 ሃይካ ሳዖይዳ ኑ ዓኣዖ ጫሪንጮይዳ ዓኣ ማኣሮ ኑኡኮ ጌላኒ ኮዒ ሚርጌና ማሊ ኑ ሜታዻኔ። 
\v 3 ዬያ ማኣሮይዳ ኑ ጌሌ ዎዶ''ና ማኣሪባኣያ ካሎ'' ኑ ማዓዓኬ። 
\v 4 ሓያ ዉልሾጉዴ ማኣሮይዳ ኑ ናንጋ ናንጋ ዴኤፄም፥ ኑ ሚርጌና ማሊ ሜታዻኔ፤ ኑ ዬያይዲ ማሊ ሜታዻሢያ ኑኡኮ ሃይቃ ዑፃ ናንጎና ዔኤዺንቶም ጊዳ'' ቃቃሳኒ ማዓንዳፓዓቴም ኑፓ ሺኢሻኒቱዋሴ። 
\v 5 ያዺ ማዓንዳጉዲ ኑና ጊኢጊሼሢ ፆኦሲኬ፤ ኑም ሃጊ ማዓንዳ ባኮኮ ቢያ ዓይሢ ባኣዚ'' ማዓንዳጉዲ ፔኤኮ ዓያኖዋ ኑም ዒንጌሢ ዒዛኬ። \x - \xo 5፥5 \xo*\xt ሮሜ 14፥10።\xt*\x*
\p
\v 6 ኑኡኮ ሳዖይዳ ናንጎ ማኣሮ ማዔ ዑፆና ኑ ዓኣ ዎዶ''ማና ጎዳይዳፓ ኑ ሃኪ ናንጋሢ ዔራያ ማዔቴያ ቢያ ዎዴ ዒጊጩዋዖ ጎዳ ጉሙርቂ ኑ ናንጋኔ። 
\v 7 ኑኡኒ ናንጋሢ ጎዳ ጉሙርቂሢና ማዓንዳኣፓዓቴም ዛጊሢናቱዋሴ። 
\v 8 ሓያ ኑኡኮ ማኣሮ ማዔ ዑፆይዳፓ ዱማዺ ጎዳና ናንጋኒ ኑኡኒ ኮዓኔ፤ ጫርቂኬ ኑ ጌስታሢ። 
\v 9 ዬያሮ ሓያ ኑኡኮ ዑፆና ኑ ዓኣቴያ ዱማዺ ኑ ናንጌቴያ ኑኡኮ ማሊፃ ጎዳ ዎዛሲሢኬ። 
\v 10 ፔቴ'' ፔቴ''ሢ ፔ ናንጌ ዎዶ''ና ማዼማ ጉዴያ፥ ኮሺ ማዔቴያ ፑርታ ማዼ ማዾ'' ዛሎ'' ዒንጊንታ ባኮ ዔካኒ ኪሪስቶሴኮ ዎጎ ዎጎ ቤዞ ሺኢኪ ዔካንዳኔ።
\s ኪሪስቶሴ ዛሎ''ና ጊኢጊሺሢ ማዾ
\p
\v 11 ፆኦሲ ዒጊጪሢ ዎዚ ጌይሢታቴያ ኑ ዔራሢሮ ዓሳ ኑ ጋዓ ባኮ ጎኔኬ ጌይ ዔካንዳጉዲ ኑ ማዻኔ፤ ኑኡኒ ዖናንሢታቴያ ፆኦሲ ኑና ዔራኔ፤ ዒንሢያ ሃሣ ዒንሢ ዒኖና ኑኡኒ ዖናንሢታቴያ ዔራኔ ጌይ ታ ማላኔ። 
\v 12 ጋርሲ ዒናይዳ ዓኣ ባኣዚ''ቱዋንቴ፥ ዙላ'' ዓሲም ጴዻ ባኣዚ''ና ሄርሺንታ ዓሶም ዒንሢ ማሂ ኬኤዛኒ ኑኡና ዒንሢ ሄርሺንታንዳጉዲ ማዓንዳኣፓዓቴም ላሚ ጊንሣ ኑኡኮ ዖኑሞ ዒንሢም ኑ ኬኤዛኒቱዋሴ። 
\v 13 ኑ ዣኣሽካ ዓሲ ማዔቴያ ፆኦሲሮ ጌይኬ፤ ሃሣ ዒናና ዓኣ ዓሲ ኑ ማዔቴ ዒንሢሮ ጌይኬ። 
\v 14 ኪሪስቶሴኮ ናሹማ ኑና ዬያ ማዺሻኔ፤ ፔቴ''ሢ ቢያሢ ዛሎ'' ሃይቄሢሮ ቢያሢ ዒዛና ዎላ'' ሃይቄያ ማዔሢ ኑ ዔራኔ። 
\v 15 ሼምፔና ዓኣዞንሢ ቢያ ዔያቶ ጋይቴ ሓይቂ ሓይባ''ፓ ዔቄሢም ናንጋንዳኣፓዓቴም ሃይካፓ ሴካ ፔኤም ጌዒ ናንጉዋጉዲ ኪሪስቶሴ ቢያሢም ሓይቄኔ።
\p
\v 16 ዬያሮ ሃይፓ ሴካ ዖናኣ ኑ ዓሲ ዛጋ ዓኣፒና ዛጋዓኬ፤ ሃያኮ ቤርታ ኪሪስቶሴ ኑ ዛጌሢ ዓሲ ዛጋ ዓኣፒና ማዔቴያ ሃካፓ ሴካ ጋዓንቴ ኑ ዛጋንዳሢ ዬያ ጎይፆቱዋሴ። 
\v 17 ዬያሮ ዖኦኒያ ኪሪስቶሴና ዎላ'' ፔቴ'' ማዔቴ ዓኪ ማዢንቲኬ፤ ቤርታኣ ባካ ዓኣዼኔ፤ ዬያ ቤዞ ዓኪ ባኣዚ'' ዓርቄኔ ጌይሢኬ። 
\v 18 ዬይ ቢያ ያዺ ማዔሢ ኑና ፔኤና ዎላ'' ኪሪስቶሴ ዛሎ''ና ጊኢጊሼሢና፥ ጊኢጊሺፆ ማዾ''ዋ ኑም ዒንጌ ፆኦዛሢ ዛሎ''ናኬ። 
\v 19 ዬይያ ፆኦሲ' ኪሪስቶሴ ዛሎ''ና ዓሶ ቢያ ፔኤና ዎላ'' ጊኢጊሼኔ ጌይሢኬ፤ ሃሣ ዻቢንቶዋ ዔያቶኮ ዓርቂባኣሴ፤ ኑኡማኣ ዬያ ዓሶ ጊኢጊሻ ቃኣሎ'' ዒንጌኔ።
\p
\v 20 ፆኦሲ' ዓሶ ፔ ባንሢ ኑ ዛሎ''ና ዔኤላ''ሢሮ ኑኡኒ ኪሪስቶሴ ዛሎ'' ማዒ ጌስታያኬ፤ ዬያሮ፦ «ፆኦሲና ዎላ'' ጊኢጉዋቴ» ጌዒ ኪሪስቶሴ ሱ'ንፆና ኑ ዒንሢ ሺኢቃኔ። 
\v 21 ኑኡኒ ኪሪስቶሴና ዎላ'' ፔቴ'' ማዒ ፆኦሲ ፂሉ''ሞ ዴንቃንዳጉዲ ጎሜባኣ ኪሪስቶሴ ኑኡኮ ጎሞ ኬዳንዳጉዲ ፆኦሲ ማሄኔ።
\c 6
\p
\v 1 ፆኦሲና ዎላ'' ኑኡኒ ማዻያ ማዔያታሢሮ፦ «ዒንሢ ፆኦሲዳፓ ዔኬ፥ ዒ ፔ ኮሹሞና ዒንጌ ዒንጊፆ ጉሪ ማሂፖቴ» ጌይ ኑ ዒንሢ ሺኢቃኔ። 
\v 2 ፆኦሲ ኬኤዛዖ፦
\q «ታ ኔኤም ኮሺ ባኣዚ'' ማዻንዳኔ ጌዔ ኬላ''
\q ሄሌ'' ዎዶ''ማና ታ ኔኤም ዋይዜኔ፤
\q2 ታ ኔና ዻቂሻንዳኔ ጌዔ ኬላ''
\q2 ሄሌ'' ዎዶ''ማና ታ ኔና ማኣዴ''ኔ» ጋዓሢሮ
\m «ሓይሾ ዓካሪ ጌይንቴ ዎዳ'' ሃያኬ፤
\q2 ዻቂንቶ ኬላ''ኣ ሃኖ''ኬ።» \x - \xo 6፥2 \xo*\xt ዒሲ. 49፥8።\xt*\x*
\p
\v 3 ኑ ማዻ ማዻ'' ቦሂንቱዋጉዲ ዓይጎ ባኣዚ''ና ማዔቴያ ዖኦማኣ ዹቆ ኑ ማዓዓኬ። 
\v 4 ጋዓንቴ ኑና ሄላ'' ሜቶና ሄላ'' ባኮ ቢያ፤ ሃሣ ዋኣዪሳ ሜቶ ቢያ ጊቢ'' ዳንዳዒሢና ፆኦሲም ማዻ ዓሲ ማዒፆ ቢያ ዛሎ''ና ኑ ፔጋሲ ዔርዛኔ። 
\v 5 ፆኦሲም ማዻ ዓሲ ማዒፆ ኑ ዔርዜሢ፦ ዢራፓና ጳዺንቲ፥ ቱኡቲ፥ ዓሲና ዣሊ፥ ሚርጌ ማዺ ላቢ''ንቲ፥ ጊንዖ ዓቲሢና ናይዺንቲሢናኬ። \x - \xo 6፥5 \xo*\xt ዳኪ. ማዾ'' 16፥23።\xt*\x* 
\v 6 ዬያጉዲ ሃሣ ጌኤሹሞና፥ ዔራቶና፥ ጊቢ'' ዳንዳዒሢና፥ ኮሹሞና፥ ዓያና ጌኤሺ ዻዋ ጎይፆ ሃንቲሢና፥ ጎኔ ናሹሞና፥ 
\v 7 ጎኔ ባኮ ኬኤዚሢና ፆኦሲ ዎልቄና ማዺፆናኬ፤ ዔኤቢ ባሻኒ ማዔቴያ ኑ ጊዳ'' ሙካ ባኮ ላኣጋኒ ዳንዳዒሳ ዓንጋሞ ኑኡኮ ማዓሢ ፂሉ''ሞኬ። 
\v 8 ቦንቺንቲሢና ዻውሲንቲሢና ጋላቲንቲሢና ጫሽኪንቲሢና ኑ ናንጌኔ፤ ሃሣ ኑ ጎኔ ኬኤዛ ዓሲታዖ ሉኡዚ ዓሲ ጌይንቴኔ፤ 
\v 9 ኑ ዔርቴ ዓሲታዖ ዔርቲባኣ ዓሲ ማዔኔ፤ ሃይቄኔ ኑ ጌይንቴያታዖ ሃሢ ሼምፔና ኑ ዓኣኔ፤ ኑኡኒ ጳርቂንቴቴያ ኑና ዎዺቦኦሴ፤ 
\v 10 ኑና ዖዪሶናያ ማዔቴያ ቢያ ዎዴ ኑ ዎዎዛዻያኬ፤ ኑ ማንቆ ዓሲታዖ ሚርጌሢ ኑ ዖርጎቻኔ፤ ዓይጎ ባኣዚ''ያ ባኣ ዓሲታዖ ቢያ ባካ ኑኡሮ ማዔያኬ።
\p
\v 11 ዒንሢ ቆሮንቶሴይዳ ናንጋ ዓሳ! ታ ዒንሢም ፔጌና ኬኤዜኔ፤ ዒኖ'' ኑኡኮ ኑ ዒንሢም ዻዊ ሃሼ''ኔ። 
\v 12 ዒንሢ ዒንሢኮ ዒኖ'' ኑም ዻዊ ሃሺ''ባኣፓዓቴም ኑ ዒኖ'' ዒንሢም ዻዊ ኑ ሃሼ''ኔ። 
\v 13 ታኣኮ ዒንሢ ናኣቶ'' ማዔሢሮ ታ ዒንሢም ኬኤዛሢ፦ «ዒንሢያ ዒማይዲ፥ ሚርጌና ዒኖ'' ዒንሢኮ ኑም ዻዊ ሃሻ''ንዳጉዲ» ጌይኬ።
\s ኪሪስቶሴ ጉሙርቁዋ ዓሶና ዎላ'' ፔቱሞ ላኣጊንቲፆ
\p
\v 14 ኪሪስቶሴ ጉሙርቁዋ ዓሶና ዎላ'' ኮይሱዋ ጎይሢና ፔቴ'' ማዒፖቴ፤ ፂሉ''ሞና ጎሜና ፔቴ'' ማዓኒ ዳንዳዓ? ፖዒና ዹሚና ዎላ'' ዎዲ'' ናንጋኒ ዳንዳዓይ? 
\v 15 ኪሪስቶሴና ዲያብሎሴና ዎይቲ ዎላ'' ጊኢጋኒ ዳንዳዓይ? ኪሪስቶሴ ጉሙርቃ ዓሲና ጉሙርቁዋ ዓሲና ዎይቲ ፔቴ'' ማዓኒ ዳንዳዓይ? 
\v 16 ፆኦሲኮ ጌኤዦ ማኣሮና ሜሌ'' ፆኦዞናኮ ዓይጎ ፔቱሞ ዓኣይ? ፆኦሲ፦
\q «ታ ናንጋ ማኣሮ፥ ታ ዴሮ'' ባኣካ'' ታ ማሃንዳኔ፤
\q2 ዔያቶና ዎላ'' ታ ናንጋንዳኔ፤
\q ታ ዔያቶኮ ፆኦዛሢ ማዓንዳኔ፤
\q2 ዔያታኣ ታ ዴሬ ማዓንዳኔ» \x - \xo 6፥16 \xo*\xt ሌዊ. ዓኬ 26፥12፤ ሂዚ. 37፥27፤ 1ቆሮ. 3፥16፤ 6፥19።\xt*\x*
\m ጌዔሢጉዲ ኑኡኒ ባይቁዋ ፆኦዛሢም ዱማዼ ማኣሪኬ። 
\v 17 ሓሣ ፆኦሲ ኬኤዛዖ፦
\q «ዔያቶ ባኣካ''ፓ ዱማዺ ኬስኩዋቴ፥
\q2 ዒኢቴ ባኮ ካኣሚፖቴ፤
\q2 ታኣኒያ ዒንሢ ታ ዓሲ ማሃንዳኔ፤ \x - \xo 6፥17 \xo*\xt ዒሲ. 52፥11።\xt*\x*
\q
\v 18 ታ ዒንሢኮ ዓዶ ማዓንዳኔ፤
\q2 ዒንሢ ታኣኮ ዓቲንቆና ዉዱሮ ናኣቶ''ና ማዓንዳኔ፤
\q2 ጋዓኔ፤ ቢያ ባኣዚ'' ዳንዳዓ ጎዳሢ።» \x - \xo 6፥18 \xo*\xt 2ሳሙ. 7፥14፤ 1ፆኦሲ. ዓሃኬ 17፥13፤ ዒሲ. 43፥6፤ ዔር. 31፥9።\xt*\x*
\c 7
\p
\v 1 ዓካሪ ታ ዒጊኖንሢዮቴ! ሓይ ቢያ ሃጊ ማዓንዳ ዎዛ'' ዒንጊንቴሢ፡ ኑም ማዔሢሮ ዓሲኮ ዑሢና ዓሲኮ ጋሮ ዓያኖና ዒኢሳ፥ ዓይጎ ባኣዚ''ዳፓኣ ኑ ቶኦኮ'' ኑ ጌኤሾም፤ ፆኦሲ ዒጊጪሢና ዒዛም ኑኡኮ ዱማዺፆ ዔርቴያ ኑ ማሆም።
\s ጳውሎሴ ዎዛዼ ዎዛ
\p
\v 2 ዒኖ'' ዒንሢኮ ኑም ዻዊ ሃሹ''ዋቴ፤ ዖኦማኣ ኑ ፑርታ ማዺባኣሴ፥ ዖናኣ ኑ ዻቢሲባኣሴ፤ ሃሣ ዖናኣ ኑ ጌሺ ዎልቆ ሙይባኣሴ። 
\v 3 ዬያ ታ ጋዓሢ፦ «ዒንሢ ዻቤኔ» ጋዓኒ ጌይቱዋሴ፤ ዓይጎሮ ጌዔቴ ሃያኮ ቤርታ ኑ ዒንሢም ጌዔሢጉዲ ዒንሢ ኑ ዒና''ፓ ባይቂባኣሴ፤ ዬያሮ ኑ ናንጌቴያ ሓይቄቴያ ቢያ ዎዴ ዒንሢና ዎላ''ኬ። 
\v 4 ዒንሢ ታ ኮሺ'' ጉሙርቃኔ፤ ሃሣ ዒንሢና ታ ኮሺ'' ሄርሺንታኔ፤ ኑ ሜታዻኣና ቢያ ዼኤፒ ዶዱሞ ታ ዴንቃኔ፤ ታ ዎዛዻ ዎዞኮዋ ጋፒንሢ ባኣያኬ።
\p
\v 5 ሜቄዶኒያ ኑ ሄሌ''ያናታዖ ሚርጌ ዛላና ሜታ ኑና ሄሌ''ያፓዓቴም ሃውሺሢ ኑኡኮ ባኣያ ማዔኔ፤ ዙላ''፥ ሜሌ'' ዓሳፓ ሙካ ባኮና ሃሣ ኑ ዒና'' ኑና ዒጊቻ ባኮና ኑ ሚርጌ ሜታዼኔ። \x - \xo 7፥5 \xo*\xt 2ቆሮ. 2፥13።\xt*\x* 
\v 6 ጋዓንቴ ዖያ ዓሶ ዶዲሻ፥ ፆኦዛሢ ቲቶ ኑ ኮራ ዳኪፆና ኑና ዶዲሼኔ። 
\v 7 ኑ ዶዴሢ' ዒዛኮ ኑ ኮራ ሙኪፆና ሌሊ ማዒባኣንቴ ዒንሢ ዒዛ ዶዲሼያ ማዔሢያ ኑ ዋይዜሢሮኬ። ሃሣ ዒንሢ ታና ጶቂሣሢያ፥ ታ ዛሎ''ሮ ዒንሢ ዖያያ፤ ጊንሣ ሃሣ ታና ሚጪንቲ ዒንሢ ማላ ማሊፆ ኑም ዒ ኬኤዛዛ ሚርጌና ታ ዎዛዼኔ።
\p
\v 8 ሃያኮ ቤርታ ታ ዒንሢም ፃኣፔ ኪኢታ'' ዒንሢ ዖይሴያ ማዔቴያ ዬያ ፃኣፒፆና «ዻቤኔ» ታና ታ ጎዑዋሴ፤ ታ ታና «ዻቤኔ» ጌዔቴያ ዬይ ታ ፃኣፔ ኪኢታ'' ዻካ'' ዎዴሮ ሌሊ ዒንሢ ዖዪሴሢ ታ ዔሬኔ። 
\v 9 ሃሢ ታ ሚርጌና ዎዛዻኔ፤ ታ ዎዛዻሢያ ዒንሢ ዖዪሴሢሮቱዋንቴ ዒንሢኮ ዖዪፃ ዒንሢኮ ዻቢንቶ ዒንሢም ዔርዜም፥ ዒንሢ ዬያፓ ማዔያታሢሮኬ፤ ዓካሪ ዒንሢኮ ዖዪፃ ፆኦሲ ማሊሢጉዲ ማዔሢሮ ዓይጎዋ ኑ ዒንሢም ፑርቲሲባኣሴ ጌይሢኬ። 
\v 10 ፆኦሲ ማሊሢጉዴያ ማዔ ዖዪሢ፦ ዻቂንታ ባንሢ ዔኪ ሙካ፥ ጎሜ ቡኡፂም ጊኢጊሻሢሮ «ዓይጋ ዬይ ማዔይ» ጌይሳያቱዋሴ። ሃያ ዓጮ'' ዛሎ''ና ሙካ ዖዪሢ ጋዓንቴ ሓይቢ ዔኪ ሙካኔ። 
\v 11 ዬይ ፆኦሲ ማሊፆ ጉዴያ ማዔ ዖዪፃ፡ ዶዲ ዒንሢ ማላንዳጉዲና ዻቢንቲባኣያ፥ ጌኤሺ ዒንሢ ማዔሢ ዔርዛንዳጉዲ ዒንሢ ማሄኔ፤ ዬያጉዲ ሃሣ ጎሜ ማዔ ባኣዚ'' ዒንሢ ዒፃያ ማዓንዳጉዲ፥ ታ ዞሮ'' ዒንሢ ዒጊጪ ዔካንዳጉዲ፥ ታና ዒንሢ ጶቂሣንዳጉዲ፥ ዓያና ዓኣ ማሊሢና ፒዜ ዒንሢ ዎጋንዳጉዲና ዻቢንቴሢያ ዒንሢ ጎራ''ንዳጉዲ ዒንሢ ማሄኔ። ዬያ ባኮ ቢያና ዒንሢ ጌኤሺ ማዔሢ ዒንሢ ዔርዜኔ።
\p
\v 12 ዓካሪ ታ ዒንሢም ፃኣፔሢ፦ ኑ ዛሎ'' ዒንሢ ማላ ማሊፃ ፆኦሲ ቤርቶይዳ ጌኤሺ ማዒ ዒንሢም ጴዻንዳጉዲ ማዓንዳኣፓዓቴም ዻቢንቴ ዓሲና ፑርታ ባኣዚ'' ማዺንቴ ዓሲና ዛላቱዋሴ። 
\v 13 ኑ ዶዴሢያ ዬያ ዛሎ''ናኬ።
\p ሃሣ ኑኡኮ ዶዱማፓ ባሼ ቲቶ ዎዛዼሢሮ ሚርጌና ኑዋ ዎዛዼኔ፤ ዓይጎሮ ጌዔቴ ዒንሢ ቢያሢ ቲቶ ዶዲሺፆና ዒዛኮ ዒኖ'' ሃውሺሴሢሮኬ። 
\v 14 ዒንሢና ታ ሄርሺንታ ሄርሺንቶ ቲቶም ታ ኬኤዜኔ፤ ዒንሢ ታና ዬያና ቦርሲሲባኣሴ። ቢያ ዎዴ ኑ ዒንሢም ኬኤዛ ባካ ጎኔ ባኣዚ'' ማዔሢጉዲ፥ ዒንሢ ዛሎ'' ሄርሺንቲ ቲቶም ኑ ኬኤዜ ባካ ጎኔ ማዔሢ ዔርቴኔ። 
\v 15 ቢያሢ ዒንሢ ዓይሢንታያታሢና ዒጊቹሞና ጎጋይቂ ዒንሢ ዒዛ ሾኦቺንሢ ዔኬሢ ዒዚ ጶቂሣኣና ዒንሢ ዒ ዑሣ ዓኣዼ ናሽካንዳጉዲ ማሄኔ። 
\v 16 ታኣኒያ ጉቤ ባኣዚ''ና ዒንሢ ጉሙርቃኒ ዳንዳዒፆና ሚርጌ ዎዛዼኔ።
\c 8
\s ኪሪስቶሴ ጉሙርቃ ዓሶኮ ማኣዳሢ ዒንጊፆ
\p
\v 1 ታ ዒሾንሦ! ታ ሚሾንሦ! ፆኦሲ ሜቄዶኒያይዳ ዓኣ፥ ኪሪስቶሴ ጉሙርቃ ሺኢጲፆ ማኣሮ ዓሶም ዒንጌ ኮሹሞ ዒንጊፆ ዒንሢ ዔራንዳጉዲ ኑ ኮዓኔ። 
\v 2 ዶዲ ሜታ ዔያቶ ሄሌ''ያ ማዔቴያ ዔያታ ሚርጌና ዎዛዻያኬ፤ ሃሣ ኮሺ'' ዔያታ ማንቆ ማዔቴያ ኮሹሞና ዔያታ ዒንጌ ዒንጊፃ ሚርጌኬ። 
\v 3 ዔያቶም ዳንዳዒንታሢጉዲቱዋንቴ ዑሣ ዓኣሢ ፔ ናሹሞና ዔያታ ዒንጌሢ ታ ዔያቶ ዛሎ'' ማርካዻኔ። 
\v 4 ዪሁዳይዳ ዓኣ፥ ኪሪስቶሴ ጉሙርቃ ዓሶ ዔያታ ማኣዳ''ኒ ኮዒ ሚርጌና ኑና ሺኢቄኔ፤ \x - \xo 8፥4 \xo*\xt ሮሜ 15፥26።\xt*\x* 
\v 5 ዔያታ ማዼ ባኮ ኑ «ዔያታ ማዻንዳያ ናንዳኔ» ጌዒ ማሌስካፓ ዑሣኬ፤ ዔያታ ቤርታሲ ፔና ጎዳሢም ዒንጌኔ፤ ዬካፓ ጊንሣ ፆኦሲ ማሊፆጉዴያ ፔ ቶኦኮ'' ኑም ዒንጌኔ። 
\v 6 ዬያ ማዾ'' ቤርታ ማዺሾ ዓርቄሢ ቲቶ ማዔሢሮ ሃሢ ዬይ ዒንሢ ኮሹሞና ዒንጋ ዒንጊፆ ጋፒንሢ ሄሊ''ሲ ዒ ማዺሻንዳጉዲ ኑ ዒዛ ሺኢቄኔ። 
\v 7 ዒንሢ ኪሪስቶሴ ጉሙርቂፆና ማዖም ጌስቶ ጌኤሲና፥ ዔራቶና፥ ዓሲ ማኣዳ''ኒ ዒንሢኮ ዓኣ ዶዶ ማሊፆና፤ ሃሣ ኑና ዒንሢ ናሽካ ናሹሞና ማዔቴያ ዼኤፒ ማዾ ዒንሢ ማዼሢጉዴያ ዬያ ኮሹሞና ዒንሢ ዒንጊ ማዻ ማዾ''ናኣ ዒንሢ ዶዳንዳጉዲ ኑ ኮዓኔ።
\p
\v 8 ዓካሪ ዬያ ታ ጋዓሢ ዓይሥሢ ኪኢታ ማሂቱዋሴ፤ ጋዓንቴ ሜሌ'' ዓሳ ዶዲ ዒንጋ ዒንጊፆና ዒንሢና ዎላ'' ቤኤዚ ዛጊ ዒንሢኮ ጎኔ ናሹሞ ዔራኒ ታ ኮዓሢሮ ጋዓኔ። 
\v 9 ዒንሢ ኑ ጎዳሢ፥ ዬሱስ ኪሪስቶሴ ኮሹሞና ዒንጌ ዼኤፖ ዒንጊፆ ዔራኔ፤ ዒዚ ሚርጌ ዖርጎቺታዖ ዒንሢ ዖርጎቻኒ ዒንሢ ዛሎ''ሮ ጌዒ ማንቆ ማዔኔ።
\p
\v 10 ዬኖ ዛሎ''ና ዒንሢም «ኮሺ ማዓንዳኔ» ጌዒ ታ ማላ ዞሮ ዒንሢ ታ ዞራኔ፤ ሂናኣቤሬ ዒንጊፆና ሌሊቱዋንቴ ዒንጋኒ ማሊፆናኣ ቤርቲ ማዔ ዓሳ ዒንሢኬ። 
\v 11 ዬያሮ ዒንሢ፡ ዒንጋኒ ናሹሞና ዔቄ ማሊፃ ማዺንቴያ ማዒ ጋፒንሢ ሄላ''ንዳጉዲ ዒንሢኮ ዓኣ ጎይፆ ዬያ ዒንሢ ማሌ ማዾ'' ሃሢ ማዹዋቴ። 
\v 12 ናሹሞና ዒንጋኒ ማሊሢ ዓኣቴ ዓሲኮ ዒንጊሢ ፆኦሲ ቤርታ ዔውቴያ ማዓሢ ዓሢ ፔኤኮ ዓኣ ጎይፆ ዒንጋዛ ማዓንዳኣፓዓቴም ባኣ ባኣዚ'' ዒንጋንዳኔ ጌይፆናቱዋሴ።
\p
\v 13 ዬያ ታ ጋዓሢ' ቢያሢ ዒንሢ ሄኮ ማዓንዳጉዲ ማዓንዳኣፓዓቴም ዒንሢ ዒንጊፆና ሜቶይዳ ጌሌም ማኣዲ''ንታ ዓሳ ሜታባኣያ ዴዓንዳጉዲ ጌይቱዋሴ። 
\v 14 ሃሢ ዒንሢኮ ዓኣ ባካ ዔያቶ ሜታሢ ማኣዳ''ያ ማዖንጎ፤ ሃሣ ዒንሢ ሜታዼ ዎዶ''ና ዔያቶኮ ዓኣ ባካ ዒንሢ ሜታሢ ማኣዳ''ያ ማዖንጎ፤ ዬያይዲፆና ዒንሢኮ ባኣካ'' ሄኩሞ ዓኣያ ማዓንዳኔ። 
\v 15 ዬይያ፦
\q «ሚርጌ ቡኩሲ ዔኬሢም
\q2 ዑሣ ዓኣዼ፥ ዺቢባኣሴ፤
\q ዻካ'' ቡኩሲ ዔኬሢማኣ
\q2 ፓጪ፥ ዻኪ''ባኣሴ» ጌይንቲ ፃኣፒንቴሢጉዲኬ። \x - \xo 8፥15 \xo*\xt ኬሲ. ማፃ 16፥18።\xt*\x*
\s ቲቶኮ ቆሮንቶሴ ዳኪንቲፆ
\p
\v 16 ታ ዒንሢም ማላሢጉዲ ቲቶዋ ዒንሢም ማላንዳጉዲ ማሄ ፆኦዛሢ ጋላቲንቶጎ። 
\v 17 ሓሢ ቲቶ ዒንሢ ኮራ ዴንዳሢ ፔኤሮ ናሽኪኬ፤ ኑ ዒዛ ዴንዶም ሺኢቃሢሮ ሌሊቱዋሴ። 
\v 18 ኮዦ ሃይሶ ኬኤዚፆና ኪሪስቶሴ ጉሙርቃ ዓሶ ሺኢጲፆ ማኣሮይዳ ቢያ ዔርቴ፥ ዒሻሢ ዒዛና ዎላ'' ኑ ዳካንዳኔ። 
\v 19 ዒዚ ዬይ፥ ዒሻሢ ኑኡኒ ዬያ ኮዦ ማዾ'' ጎዳ ቦንቾም ማዻኣና፤ ሃሣ ኑ ማዻኒ ናሹሞና ዔቃኣና ኑኡና ዎላ'' ዒ ዓኣዺ ማዻንዳጉዲ ሺኢጲፆ ማኣሮ ዓሳ ዒዛ ዶኦሬያኬ። 
\v 20 ዬያ ዒንጎና ሚኢሾ ዓርቂ ማዾይዳ ኑ ፔኤሻ ዎዶ''ና ኑ ዾንኪንቱዋጉዲ ኮሺ'' ኑ ሂርጊ ካፓኔ። 
\v 21 ዓይጎሮ ጌዔቴ ማሊፃ ኑኡኮ ጎዳ ቤርታ ሌሊቱዋንቴ ዓሲ ቤርቲዳኣ ኮሺ ማዔ ባኣዚ'' ማዻኒታሢሮኬ። \x - \xo 8፥21 \xo*\xt ኮኦኪ. 3፥4።\xt*\x*
\p
\v 22 ሚርጌ ዎዴ ሚርጌ ባኣዚ''ና ጉሙርቂንታያ ማዒፃ ዛጊንቴም ዶዲ ማዒ ጴዼ፥ ዒሻሢያ ቲቶንሢና ዎላ'' ኑ ዳኬሢ ዬያሮኬ፤ ዒዚ ዒንሢ ሚርጌና ጉሙርቃሢሮ ሃሢ ዒንሢ ዒ ማኣዳ''ኒ ዶዲ ማላ ማሊፃ ኮሺ'' ዼኤፒኬ። 
\v 23 ቲቶ ዛሎ'' ዔራኒ ዖኦጫ ዓሲ ዓኣቴ ዒዚ ዒንሢ ማኣዳ''ኒ ታኣና ዎላ'' ማዻ ታኣኮ ላጌኬ፤ ዒዛና ዎላ'' ዒንሢ ኮይላ'' ሙካንዳ ዒሾንሢ ዛሎ'' ማዔቴ ዔያታ ኪሪስቶሴ ጉሙርቃ ዓሶ ሺኢጲፆ ማኣሮይዳፓ ዳኪንቴያ፥ ኪሪስቶሴ ቦንቺሳያኬ። 
\v 24 ዬያሮ ዒንሢ ዔያቶ ናሽካያ ማዒፆ ፔጋሲ ዔርዙዋቴ፤ ሃንጎ፥ ኪሪስቶሴ ጉሙርቃ ሺኢጲፆ ማኣሮ ዓሳ ዬያ ዔሮንጎ፤ ኑኡኒያ ዒንሢና ሄርሺንታኔ።
\c 9
\s ኪሪስቶሴ ጉሙርቃ ዓሶ ማኣዳ''ኒ ኬሶ''ና ሚኢሼ
\p
\v 1 ዪሁዳ ዓጮ''ይዳ ዓኣ፥ ኪሪስቶሴ ጉሙርቃ ዓሶ ማኣዳ''ኒ ዒንሢ ኬሴ'' ሚኢሾ ዛሎ'' ታ ዒንሢም ፃኣፓንዳያ ኮይሱዋሴ፤ 
\v 2 ዒንሢ ዓካይያይዳ ዓኣ ዓሳ ሜሌ'' ዓሲ ማኣዳ''ኒ ዒንሢኮ ኮሺ ማሊሢ ዓኣሢ ታ ዔራሢሮ «ዓካይያይዳ ዓኣ ዓሳ ሂናኣ ቤራፓ ዓርቃዖ ሜሌ'' ዓሲ ማኣዳ''ኒ ጊኢጊንቲ ዓኣያኬ» ጌዒ ታ ሜቄዶኒያ ዓሶም ጫርቂ ኬኤዜኔ፤ ዒንሢኮ ኮሺ ማሊሢና ዔቂ ማዺፃ ሜሌ'' ዓሶ ኮሺ ማዻንዳጉዲ ጴቼኔ። 
\v 3 ዓካሪ ኑ ዒንሢና ሄርሺንቲ ጌዔ ጌኤዛ ጉሪ ማዑዋጉዲ ሃንሢ ዒሾንሢ ታ ዒንሢ ኮይላ'' ዳኬኔ፤ ዒንሢያ ታ ዒንሢም ቤርታ ኬኤዜሢጉዲ ጊኢጊንቲ ካፑዋቴ። 
\v 4 ሜቄዶኒያ ዓሳ ታኣና ዎላ'' ዒንሢ ኮይላ'' ሙካ ዎዶ''ና ዒንሢ ጊኢጊንቲባኣያ ማዒ ዓኣንቴ ዴንቄቴ ኑ ዒንሢና ሄርሺንቲ ኬኤዜ ባኮና ኑናንታ ዒንሢንታ ዎላ'' ቦርሲንታንዳኔ። 
\v 5 ዬያሮ ዒንሢ ዒንጋንዳኔ ጌዒ ናኣቤ ባኮ ቤርታዺ ዒንሢ ጊኢጊሻንዳጉዲ ዒንሢም ጶቂሢ ኬኤዞም ጌዒ ሃንሢ ዒሾንሢ ቤርታሲ ዒንሢ ኮይላ'' ዔያቶ ሺኢቂ ዳካኒ ኮይሳያታሢ ታ ዔሬኔ፤ ዬያይዴም ታኣኒ ሙካ ዎዶ''ና ዒንሢ ዒንጋኒ ጌዔ ባካ ዒንጊንቲ ጊኢጌያ ማዓንዳኔ፤ ዒንሢ ዒንጋሢያ ዓሲ ዎልቃዼምቱዋንቴ ናሹሞና ዒንጋያ ማዒፃኣ ዔርታንዳኔ።
\p
\v 6 «ዻካ'' ዜርሢ ዜርቄሢ ዻካ'' ሃኣኮ ዔካንዳኔ፤ ሚርጌ ዜርሢ ዜርቄሢ ሚርጌ ሃኣኮ ቡኩሲ ዔካንዳኔ» ጌይንቴሢ ጶቂሡዋቴ። 
\v 7 ፆኦሲ' ናሽካሢ ዎዛና ዒንጋ ዓሲ ማዔሢሮ ፔቴ'' ፔቴ''ሢ ዒንጋኣና ፔ ዒና'' ናሽኬሢጉዲ ማዓንዳኣፓዓቴም «ዓይጎሮ ታ ዒንጋይ?» ጌዒ ጌዒ ዓሲ ዒንጎም ጌዒ ዎልቃዼም ዒንጎፓ። 
\v 8 ዒንሢ ቢያ ዎዴ ኮይሳ ባኣዚ'' ቢያ ዴንቂ፥ ኮሺ ማዾ ቢያ ማዻንዳጉዲ ዓንጆ ዒንሢም ፆኦሲ ዒንጋኒ ዳንዳዓኔ፤ 
\v 9 ዬይያ፦
\q «ማንቆ ዓሶም ኮሹሞና ዒዚ ዒንጌኔ፤
\q2 ዒዛኮ ኮሹማ ናንጊና ናንጋኔ»
\m ጌይንቲ ፃኣፒንቴሢጉዲኬ። \x - \xo 9፥9 \xo*\xt ዓይኑ. 112፥9።\xt*\x*
\p
\v 10 ዜርሢ ዜርቃሢም ዜርሢ፤ ሃሣ ዓሲ ሙዓንዳጉዲ ሙኡዚ'' ዒንጋ ፆኦዛሢ' ዒንሢ ዜርቃንዳ ዜርፆ ሚርጌ ዒንሢም ዒንጋንዳኔ፤ ዒንሢ ዒንጋሢኮዋ ዓኣፖ ዒ ሚርጊሻዳንዳኔ። \x - \xo 9፥10 \xo*\xt ዒሲ. 55፥10።\xt*\x* 
\v 11 ዒንሢ ኮሹሞና ዒንጋ ባካ ኑ ዛሎ''ና ዔያቶም ሄላ'' ዓሳ ቢያ ፆኦሲ ጋላታንዳጉዲ ሃሣ ቢያ ዎዴ ኮሹሞና ዒንሢ ዒንጋንዳጉዲ ፆኦሲ ቢያ ባኣዚ''ና ዒንሢ ዖርጎቻንዳኔ። 
\v 12 ዬይ ዒንሢ ዒንጊፆና ማዻ ማዻ'' ኪሪስቶሴ ጉሙርቃ ዓሶኮ ሜታሢ ሼሌዒሳያ ሌሊቱዋንቴ ፆኦሲ ሚርጌና ዔያታ ጋላታንዳጉዲ ማሃኔ። 
\v 13 ዬይ ማዻ'' ዒንሢኮ ዒ'ንሢ ኪሪስቶሴኮ ኮዦ ሃይሶ ዋይዚ ዔኪ ዓይሢንቴሢሮና ዔያቶና ሜሌ''ዞንሢናም ዒንሢኮ ዒንጊፃ ዔርቴያ ማዔሢሮ ቢያሢ ፆኦሲ ጋላታንዳኔ። 
\v 14 ዔያታ ፆኦሲ ዒንሢም ዒንጌ፥ ዑሣ ዓኣዼ ዼኤፒ ማዔ ኮሹሞ ዒንጊፆ ዛሎ''ና ዒንሢ ጶቂሣሢሮ ዒንሢም ዔያታ ሺኢቃንዳኔ። 
\v 15 ዓሲ «ሃማኬ» ጌይ ኬኤዛኒ ዳንዳዑዋ ፆኦሲኮ ዒንጊፆሮ ዒዚ ጋላቲንቴያ ማዖንጎ።
\c 10
\s ጳውሎሴ ዒዛ ዾንካ ዓሶም ማሂ ኬኤዜ ባኮ
\p
\v 1 ዒንሢ ኮይላ'' ዓኣዖ «ሴልቃያ»፤ ዒንሢ ኮይላ''ፓ ሃኪ ዴንዳዖ ጋዓንቴ «ጫርቃያ» ጌይንቴሢ፥ ታኣኒ ጳውሎሴ ኪሪስቶሴኮ ኮሹሞና ሼሌዑሞና ማዒ ታ ዒንሢ ሺኢቃኔ፤ 
\v 2 ታ ዒንሢ ሺኢቃሢ' ዒንሢ ኮራ ታ ሙኬ ዎዶ''ና ዬያይዲ ጫርቂ ጌስታንዳጉዲ ታና ማሂፖቴ ጌይኬ፤ ዓሲ ማሊሢና ኑ ሃንታያ ማሂ ኑና ፓይዳ፥ ፔቴ'' ፔቴ'' ዓሶ ቤርታ ጋዓንቴ ጫርቂ ጌስታኒ ታ ማላኔ። 
\v 3 ዎዚ ኑ ሃያ ዓጫ'' ናንጋያ ማዔቴያ ኑ ዖልታሢ ሃያ ዓጮ'' ዓሳ ዖልታ ጎይፆቱዋሴ። 
\v 4 ኑኡኮ ዖሎ ዓንጋማ፡ ዖሎሮ ኬልቂ ዴዖና ኬኤሎ'' ዶይሳኒ ዳንዳዓ፥ ፆኦሲ ዎልቄ ዓኣ፥ ዓንጋሞ ማዓንዳኣፓዓቴም ሃያ ዓጮ'' ዖሎ ዓንጋሞጉዲቱዋሴ። 
\v 5 ዓሲ ፆኦሲ ዔሩዋጉዲ ሉኡዙሞና ማርሞ ማርማሢንታ ዖቶርሞ ማሊፆዋ ጉቤ ኑ ባይዛንዳኔ፤ ዓሲኮ ማሊፆ ጉቤ ኑ ዲዒ ዲዒ ኪሪስቶሴም ዓይሢንታንዳጉዲ ማሃኔ። 
\v 6 ዒንሢኮ ዓይሢንቲፃ ጎኔ ማዔሢ ኑ ዔሬሢኮ ጊንፃ ዓይሢንቲ ዒፃ ባኣዚ'' ዓይጎዋ ጉቤ ኑ ፑርታና ዎጋኒ ጊኢጌኔ።
\p
\v 7 ዒንሢ ዛጋሢ ፔጌና ጴዻ ባኣዚ'' ሌሊኬ፤ ዓይጎ ዓሲያ ታኣኒ ሌሊ ኪሪስቶሴሮኬ ጌዒ ጉሙርቃቶ ፔና ጊንሣ ሺርሺ ዛጎንጎ፤ ኑኡኒያ ዒዛጉዲ ኪሪስቶሴሮ ማዔሢ ዔሮንጎ። 
\v 8 ጎዳ ኑም ዒንጌ ቢታንቶና ሚርጌና ታ ሄርሺንቴቴያ ታና ቦርሱዋሴ፤ ዎይቲ ጌዔቴ ዬይ ቢታንታ ኑም ዒንጊንቴሢ ዒንሢኮ ጉሙርቂፆ ዶዲሻኒ ማዓንዳኣፓዓቴም ባይዛኒቱዋኣሢሮኬ። 
\v 9 ታኣኮ ኪኢታ'' ታ ዒንሢ ዒዒጊቻኒ ኬኤዛያ ማሎፓ። 
\v 10 ፔቴ'' ፔቴ'' ዓሳ «ጳውሎሴኮ ኪኢታ'' ዴኤፃያ ሃሣ ዶዲኬ፤ ጋዓንቴ ዒዛ ኑ ዛጋኣና ዑፃ ላኣፓ፥ ጌኤዛኣ ዒዛኮ ፓሡዋያኬ» ጋዓያ ናንዳኔ። 
\v 11 ዬኖ ጋዓ ዓሳ ዒንሢዳፓ ሃኬ ዓኣዖ ኑ ፃኣፓ ኪኢቶ''ና ዒንሢ ኮይላ'' ዓኣዖ ኑ ማዻ ማዾ''ናኮ ባኣካ'' ዱሙሞ ባኣያታሢ ዔሮንጎ።
\p
\v 12 ኑኡኒ ጋዓንቴ ፔ ቶኦኮ'' ጋላታ ዓሶና ኑና ዎላ'' ፔቴ'' ማሃኒ፥ ሃሣ ጊንሣ ቤኤዚ ዛጋኒ ፔቴ''ታዖ ኑ ማሊሢዳ ባኣሴ፤ ዔያታ ፔና ፔኤና ቤኤዚ ዛጋሢሮ ዔያቶኮ ዒና ባኣያኬ። 
\v 13 ኑኡኒ ጋዓንቴ ፔቶ'' ዑሣ ዓኣዼ ሄርሺንቱዋሴ፤ ኑኡኒ ሄርሺንታሢ' ፆኦሲ ኑና ማዾንጎ ጌዔማ ጎይፆ ዴንዲ ዒንሢ ሄላ''ንዳኣና ማዼ ማዾ''ናኬ። 
\v 14 ዒንሢ ሃሢ ዓኣሢ ኑ ማዻንዳጉዲ ጌይንቴ ቤዞይዳ ማዔሢሮ ኪሪስቶሴኮ ኮዦ ሃይሶ ኬኤዛኒ ኑ ዔኪ ዒንሢ ኮይላ'' ሙኬ ዎዶ''ና ያፓ ኑ ዑሣ ዓኣዺባኣሴ። 
\v 15 ዬያሮ ፆኦሲ ኑም ጌዔ ቤዛፓ ኑ ዓኣዺ ሜሌ'' ዓሲ ማዼ ማዾና ኮይሱዋ ጎይሢ ዑሣ ዓኣዼ ኑ ሄርሺንታዓ፤ ጋዓንቴ ዒንሢኮ ጉሙርቂፃ ዶዳንዳጉዲና ኑኡኮዋ ማዻ'' ፆኦሲ ኑም ዒንጌ ቤዞ፥ ዒንሢ ባኣካ'' ባሼና ዳልጋንዳኔ ጌዒ ሃጊ ማዓንዳ ዎዛ ኑ ጌሣኔ። 
\v 16 ዓካሪ ሜሌ'' ዓሳ ማዼ ቤዞይዳ ጌሊ፥ ቤርታ ማዺንቴ ማዾ''ና ሄርሺንቱዋዖ ዒንሢኮ ዙላ'' ዓኣ ዓጮ''ም ኮዦ ሃይሶ ኑ ኬኤዛኒ ዳንዳዓኔ።
\p
\v 17 ጋዓንቴ «ሄርሺንታሢ ጎዳና ሄርሺንቶንጎ።» \x - \xo 10፥17 \xo*\xt ዔር. 9፥24።\xt*\x* 
\v 18 ዓይጎሮ ጌዔቴ ዓሲ ጋላቲንቴያ ማዓኒ ዳንዳዓሢ ፆኦሲ ዒዛ ጋላቴቴ ማዓንዳኣፓዓቴም ፔና ፔኤሮ ዒ ጋላቴቴቱዋኣሢሮኬ።
\c 11
\s ጳውሎሴና ፆኦሲ ማዾ''ም ዳኪንቴኔ ጌይ ሉኡቃዞንሢና
\p
\v 1 ዻካ'' ዔኤያቶና ታ ጌስታ ባኮ ዒንሢ ጊቢ'' ዳንዳዓንዳጉዲ ታ ኮዓኔ፤ ጎኔኬ፥ ዒንሢ ዳንዳዒ ዳንዳዒኬ። 
\v 2 ፆኦሲ ዒንሢ ናሽኪ፥ ዒዛም ሌሊ ዒንሢ ማዓንዳጉዲ ኮዓሢጉዲ ታኣኒያ ዒማዺ ማላኔ፤ ታ ያዺዲ ማላሢ' ፔቴ'' ኩሙሢ ዉዱሮ ናይጉዲ ፔቴ'' ዓቲንቄም ታ ዒንሢ ዖኦጬሢሮኬ፤ ዬይ ዓሢያ ኪሪስቶሴኬ። 
\v 3 ሾኦሺ ሂዋኣኖ ጪንጩሞና ጌሺ ዻቢሴሢጉዲ ጎዖንቴ ዒንሢኮዋ ማሊፃ ፑርቴም ኪሪስቶሴም ዒንሢኮ ዓኣ ፒዙሞና ጌኤሹሞና ዒንሢ ሃሻ''ንዳያናንዳኔ ጌይ ታ ሂርጋኔ። \x - \xo 11፥3 \xo*\xt ማዢ. ማፃ 3፥1-5፤ 13።\xt*\x* 
\v 4 ዓይጎሮ ጌዔቴ ፔቴ'' ዓሲ ዒንሢ ኮይላ'' ሙኪ ኑኡኒ ዒንሢም ኬኤዜ ዬሱሴቱዋንቴ ሜሌ'' ዬሱሴ ዒንሢም ኬኤዜቴ ሃሣ ዒንሢ ቤርታ ዔኬ ዓያኖይዳፓ ሜሌ'' ዓያና ዒንሢ ዔኬቴ ጊንሣ ሃሣ ቤርታ ዒንሢ ዋይዚ ዔኬ ኮዦ ሃይሶይዳፓ ሜሌ'' ዋይዚ ዒንሢ ዔኬቴያ ዬያ ዒንሢ ዚቲዮ ጌይ ዛዛጋኔ። 
\v 5 ጋዓንቴ ታኣኒ ዬንሢ «ፆኦሲ ማዾ''ም ዳኪንቴ ዼኤፖ ዓሶ» ጌይንታ ዓሶይዳፓ ዓይጎናኣ ሃታያ ታኣም ማሉዋሴ። 
\v 6 ዬና ዓሳ ጌኤታ''ሢጉዲ ሃይሴ ማዢ ታ ጌስቲባኣቴያ ዔራቶ ታኣኮ ናንጊኬ፤ ዬያ ሚርጌ ዎዴ፥ ሚርጌ ባኣዚ''ና ፔጋሲ ኑ ዒንሢም ዻዌኔ።
\p
\v 7 ታኣኒ ፆኦሲኮ ኮዦ ሃይሶ ሚኢሼ ዔኩዋኣዖ ዒንሢም ኬኤዚፆና፥ ሃሣ ዒንሢ ዼ'ጊዳኒ ታ ቶኦኮ'' ሂርኪሲፃ ታኣኮ ጎሜ ማዔኔ ጌይሢዳ? 
\v 8 ዒንሢም ማዻኒ ኪሪስቶሴ ጉሙርቃ ሃንጎ ሺኢጲፆ ማኣሮ ዓሶይዳፓ ማኣዳሢ ታ ዔኪፆና ታ ዔያቶ ቡሬኔ። 
\v 9 ዒንሢና ዎላ'' ታ ዓኣንቴ ሜታሢ ታና ሄሌ'' ዎዶ''ና ሜቄዶኒያፓ ሙኬ ዒሾንሢ ታኣም ኮይሳ ባኮ ዒንጊ ማኣዳ''ያ ማዔሢሮ ዖናኣ ታ ሜታሲባኣሴ፤ ሃኖ'' ሄላ''ንዳኣና ዓይጎ ባኣዚ''ናኣ ታ ዒንሢ ሜታሲባኣሴ፤ ሴካ ሃጋ ቤርታኣ ታ ዒንሢ ሜታሲንዱዋሴ። \x - \xo 11፥9 \xo*\xt ፒልጲ. 4፥15-18።\xt*\x* 
\v 10 ኪሪስቶሴኮ ጎኑማ ታጊዳ ዓኣሢሮ ታ ጫርቂ ጌስቱዋጉዲ ዓካይያ ዓጮ''ይዳ ታና ላኣጋኒ ዳንዳዓይ ዖኦኒያ ባኣሴ። 
\v 11 ዬያ ታ ጋዓሢ ዓይጎሮዳይ? ታ ዒንሢ ናሽኩዋኣሢሮዳ? ፆኦሲ ዔራሢጉዲ ታ ዒንሢ ናሽካኔ።
\p
\v 12 ዬያታ ሓንጎ ፆኦሲ ማዾ''ም ዳኪንቴ ዓሳ፦ «ኑኡኒያ ጳውሎሴንሢጉዲ ማዻኔ» ጌይ ጌይ ሄርሺንታ ባኮ ዔያቶ ሃሺ''ሳኒ ሃሢ ታ ማዻ ጎይፆ ሃጊ ሴካኣ ማዻንዳኔ። 
\v 13 ዬኖጉዴ ዓሳ ኪሪስቶሴ ማዾ''ም ዳኪንቴያ ፔና ማሊሻኒ ኮዓያ፥ ሉኡዙሞና ፆኦሲ ማዾ''ም ዳኪንቴያ ማላ ጌሺ ማዻ ዓሲኬ። 
\v 14 ዬይ ዲቃሢ ሄርሺሳ ባኣዚ''ቱዋሴ፤ ዎይቲ ጌዔቴ ፃላሄታዖ ፔና ፖዖ ኪኢታንቾ ማሃኒ ዱማ ዱማ ጎይሢና ፔና ላኣማኔ። 
\v 15 ዬያሮ ፃላሄም ማዻ ዓሳ ፂሉ''ሞና ማዻያ ማሊሲ ፔና ዱማ ዱማ ጎይሢና ላኣሜቴያ ዲቃሢ ሄርሺሳያቱዋሴ፤ ጋፒንፃ ዔያታ ማዼ ማዾ'' ዛሎ'' ፔኤኮ ዴንቃንዳኔ።
\s ጳውሎሴ ፔና ሄሌ'' ሜታሢ ጫርቂ ኬኤዜሢ
\p
\v 16 «ዓይጎ ዓሲያ ታና ዔኤያኬ ጎዖፓ» ጌይ ላሚ ታ ኬኤዛኔ። ታ ዒንሢም ዔኤያ ማሊ ጴዼቴያ ዻካ'' ታ ጫርቂ ጌስታንዳጉዲ ዔኤያ ማሂ ታና ፓይዱዋቴ። 
\v 17 ሓያይዲ ታ ጫርቂ ጌስታሢ ጎዳ ማሊፆጉዲቱዋንቴ ዔኤያ ማዒኬ። 
\v 18 ሚርጌሢ' ሃያ ሳዖ ባኣዚ''ና ሄርሺንታሢሮ ታኣኒያ ሄርሺንታንዳኔ። 
\v 19 ዒንሢ ጪንጫ ማዔሢሮ ዔኤዮ ዓሶ ባኮ ዛጌዖ ጊባ''ኔ። 
\v 20 ዬያጉዲ ዖኦኒያ ዒንሢ ዓይሌ'' ማሄቶ፥ ቡሪ ዒንሢ ባኮ ዔኬቴ፥ ዒንሢ ጌሼቴ፥ ዒንሢዳ ዖቶርቂ ጌስቴቴ፥ ዖኦኒያ ዒንሢ ባዔቴ ዚቲ ጌዒ ጊቢ'' ዒንሢ ዳንዳዓንዳኔ። 
\v 21 ዎዚ ታና ቦርሳያ ማዔቴያ ዒንሢጉዲ ጊቢ'' ዳንዳዒፆና ኑ ዶዲ ማዒባኣሢ ታ ዒንሢም ኬኤዛኔ።
\p ጋዓንቴ ዖኦኒያ ሄርሺንታኒ ጫርቃቶ ታኣኒያ ዒዛጉዲ ጫርቂ ሄርሺንታንዳኔ፤ [ዬያ ታ ጋዓሢ ሃሢ ዔኤያጉዲ ማዒኬ።] 
\v 22 ዔያታ፥ ዬና ዓሳ፡ ዔብሬ ዓሲዳ? ታኣኒያ ዔያቶጉዲኬ፤ ዔያታ ዒስራዔኤሌ ዓሲዳ? ታኣኒያ ዔያቶጉዲኬ፤ ዔያታ ዓብራሃሜ ዜርሢዳ? ታኣኒያ ዔያቶጉዲኬ። 
\v 23 ዔያታ ኪሪስቶሴም ማዻ ዓሶዳ? ታኣኒ ዔያቶይዳፓ ባሼ ኪሪስቶሴም ማዻያኬ፤ [ዬያ ታ ጋዓሢ ዣኣሹሞጉዲኬ።] ታኣኒ ሚርጌ ዎዴ ማዾና ላቤ''ኔ፥ ሚርጌ ዎዴ ታ ቱኡቴኔ፥ ሚርጌ ዎዴ ዢራፓናኣ ታ ጳርቂንቴኔ፥ ሚርጌ ዎዴ ሃሣ ታ ሃይቄዖ ዓቲ'' ዓቲ'' ዓኣሤኔ። \x - \xo 11፥23 \xo*\xt ዳኪ. ማዾ'' 16፥23።\xt*\x* 
\v 24 ዓይሁዶ ዓሳ ዢራፓና ሃይሢታሚ'' ታዞጳ ጳዺ ዶንጎ ማይንቲ ታና ጳርቄኔ፤ \x - \xo 11፥24 \xo*\xt ላሚ. ዎማ 25፥3።\xt*\x* 
\v 25 ሓይሢ ማይንቲ ኮኦሎ''ና ታ ጳዺንቴኔ፥ ፔቴ''ና ሹቻ ታ ዹይንቴኔ፥ ሃይሢ ማይንቲ ዋኣሢ ካኣሚሌይዳ ሜታ ታና ሄሌ''ኔ፥ ፔቴ'' ኬሊ'' ዹሚና ሮኦሪና ቢያ ዋኣሢዳ ታ ዎርቂ ፔኤቄኔ፤ \x - \xo 11፥25 \xo*\xt ዳኪ. ማዾ'' 16፥22፤ 14፥19።\xt*\x* 
\v 26 ሚርጌ ዎዴ ታ ጎይሢ ሃንቲሢና ሜታዼኔ፤ ዬያይዳ ዎርዚ ኩሚ ታና ሙዔዖ ዓቴ''ኔ፥ ሱላንታ ታ ዒጊኖ ዓይሁዶ ዓሶንታ ዓይሁዶ ማዒባኣ ዓሳኣ ታና ዎዼዖ ዓቴ''ኔ፥ ካታሞና ካዮና ዼኤፖ ባዞ''ናይዳ ታ ሃይቄዖ ዓቴ''ኔ፤ ሃሣ ሉኡዙሞና ኪሪስቶሴ ጉሙርቃኔ ጋዓ ዓሳ ታና ዎዼዖ ዓቴ''ኔ። \x - \xo 11፥26 \xo*\xt ዳኪ. ማዾ'' 9፥23፤ 14፥15።\xt*\x* 
\v 27 ሚርጌ ታ ላቢ'' ማዺ ሜቶ ዛጌኔ፥ ሚርጌ ዎዴ ጊንዖ ታ ዓቴ''ኔ፥ ናይዚና ዋኣሢ ዼኤቢ''ና ታና ሜታሴኔ፥ ሚርጌ ዎዴ ሙኡዚ'' ባይቄም ታ ሜታዼኔ፥ ሚርጌ ዎዴ ጪኢሺና ካሉ''ሞና ታና ሜታሴኔ። 
\v 28 ጋዓንቴ ሜሌ'' ዓቴ'' ባኮይዳፓ ባሼ ቢያ ኬሊ'' ታና ሜታሴሢ ኪሪስቶሴ ጉሙርቃ ሺኢጲፆ ማኣሮ ዓሶ ዛሎ''ኬ። 
\v 29 ፔቴ'' ዓሲ ላባ''ኣና ታ ዒዛና ዎላ'' ላባ''ኔ፤ ሃሣ ፔቴ'' ዓሲ ባጋሢ ዻቢሲ ጎሜይዳ ጌልዜቴ ሚርጌና ታ ዻጋዻኔ።
\p
\v 30 ሄርሺንቲ ጌስቲሢ ኮይሳያ ማዔቴ ታኣኒ ሄርሺንታሢ ታ ላቤ''ያ ማዒፆ ዻዋ ባኮንሢናኬ። 
\v 31 ኑ ጎዳሢ፥ ዬሱስ ኪሪስቶሴኮ ዓዶ ማዔ ፆኦዛሢ ናንጊና ጋላቲንቴያ ማዖም፤ ታ ሉኡቂ ኬኤዙዋኣሢ ዒ ዔራኔ። 
\v 32 ዴማስቆ ካታሞይዳ ታ ዓኣ ዎዶ''ና ካኣቲ ዓሬታሴኮ ዴማ'' ማዒ ዴሮ'' ዎይሣሢ ታና ዓርቃኒ ኮዒ ካታሞ ጌላ ካሮ'' ካሮ'' ካፓ ዓሶና ካፒሳኔ። 
\v 33 ጋዓንቴ ሹጮና ኬልቂ ኮሾ''ና ዲሮኮ ፑልታና ዓሳ ታና ሮኦጬና ኬይሴም ታ ዒዛይዳፓ ቶሊ'' ዓቴ''ኔ። \x - \xo 11፥33 \xo*\xt ዳኪ. ማዾ'' 9፥23-25።\xt*\x*
\c 12
\s ጳውሎሴም ፆኦሲ ፔጋሲ ዻዌ ባኮ
\p
\v 1 ታኣኒ ሄርሺንቲ ጌስታንዳኔ፤ ጋዓንቴ ዬይ ፓሣ ባኣዚ''ቱዋሴ፤ ሃሢ ታኣኒ ጎዳ ታና ፔጋሲ ዻዌ ባኮና፤ ሃሣ ታኣኒ ዛጌ ባኮዋ ኬኤዛንዳኔ። 
\v 2 ፔቴ'' ኪሪስቶሴ ጉሙርቃ ዓሲስኬያ ታ ዔራኔ፤ ዬይ ዓሢ ታጶ ዖይዶ ሌዔኮ ቤርታ ጫሪንጮኮ ዑፃ ዓኣ ጫሪንጮ ዔውቲ ዓኣዼኔ፤ [ዬይ ዓሢ ዔውቴሢ' ዑፃ ዒዛኮ ዬማዺ ዓኣንቴሞ ባኣንቴሞ? ታ ዔሩዋሴ፤ ፆኦሲ ዔራኔ።] 
\v 3 ጎኔ ዬይ ዓሢ፥ ዑፃ ዒዛኮ ዬማዺ ዓኣንቴሞ ባኣንቴሞ? ታ ዔሩዋሴ፥ ፆኦሲ ዔራኔ፤ 
\v 4 ጋዓንቴ ዬይ ዓሢ ጌኔቴ ጌይንታ ቤዞ ዔውቴሢ ታ ዔራኔ፤ ዒኢካ ዒዚ ዓሲ' ፔጋሲ ኬኤዛኒና ጌስታኒ ዳንዳዑዋ ባኣዚ'' ዋይዜኔ። 
\v 5 ዬያጉዴ ዓሢ ዛሎ''ና ታ ሄርሺንታኔ፤ ታ ታ ዛሎ'' ጋዓንቴ ታኣኮ ላቤ''ያ ማዒፆና ሄርሺንታኔ፤ ሜሌ'' ሄርሺንታ ባኣዚ'' ባኣሴ። 
\v 6 ታ ሄርሺንቲ ጌስታኒ ኮዔቴታዖ ዖኦኒያ ታና ዔኤያኬ ጎዖፓ፤ ዓይጎሮ ጌዔቴ ታ ኬኤዛሢ ጎኔ ባኣዚ''ኬ። ጋዓንቴ ዓይጎ ዓሲያ ታ ዛሎ'' ዛጋ ባኮና ዋይዛ ባኮናይዳፓ ዑሣ ዼኤፒሲ ኬኤዙዋጉዲ፥ ሄርሺንቲፆ ታ ሃሻ''ኔ።
\p
\v 7 ዬንሢ ታኣም ጴዼ፥ ዼኤፖ ባኮንሢ ዛሎ''ና ታ ዖቶርቁዋጉዲ ታኣኮ ዓሽኮ ዓንጊሢጉዲ ጫርጋ ባኣዚ'' ታኣም ዒንጊንቴኔ፤ ዬይ ፃላሄኮ ኪኢታንቻ ማዒ ታና ሜታሴም ታ ዖቶርቁዋጉዲ ታኣም ዒንጎናያኬ። 
\v 8 ዬይ ታና ሜታሳ ባካ ታጊዳፓ ባይቃንዳጉዲ ጎዳ ሃይሢ ማይንቲ ታ ሺኢቄኔ፤ 
\v 9 ጋዓንቴ ዒዚ፦ «ታኣኮ ዎልቃ ጴዻሢ ኔኤኒ ላቢንቴ ዎዶ''ና ማዔሢሮ ታ ዒንጌ ኮዦ ዒንጊፃ ኔኤም ጊዳንዳኔ» ታኣም ጌዔኔ፤ ዬያሮ ኪሪስቶሴኮ ዎልቃ ታጊዳ ማዓንዳጉዲ ዑሣ ዓኣዼ ታ ዎዛዺ ዎዛዺ ታ ላቢ''ፆና ታ ሄርሺንታኒ ኮዓኔ። 
\v 10 ዎልቄ ታኣኒ ዴንቃሢ ታኣኒ ላቤ'' ዎዶ''ና ማዔሢሮ ኪሪስቶሴ ዛሎ'' ታ ላቢ''ንታኣና፥ ጫሽኪንታኣና፥ ሜታዻኣና፥ ዒፂንቲ ዳውሲንታኣና፥ ካራ ባይዚ ታ ሃንታኣና ቢያ ታና ዎዎዛሳኔ።
\s ጳውሎሴ ቆሮንቶሴ ዓሶ ዛሎ'' ሜታዺ ማሌ ማሊፆ
\p
\v 11 ታኣኒ ዬያ ጌስቲፆና ዔኤያ ማዔኔ፤ ያዺ ታ ጌስታንዳጉዲ ማሄሢ ዒንሢኬ፤ ታና ጋላታንዳዖ ዓቴ''ሢያ ዒንሢኬ፤ ዓይጎሮ ጌዔቴ ታኣኒ ዓሲ ጌይንቱዋ ዓሲ ማዔቴያ፦ «ፆኦሲ ማዾ''ም ዳኪንቴ፥ ዼኤፖ ዓሶ» ጌይንታ ዓሶይዳፓ ታ ሃታያቱዋሴ። 
\v 12 ታኣኒ ዒንሢ ባኣካ'' ዓኣ ዎዶ''ና ፆኦሲ ማዾ''ም ጎኔ ዳኪንቴ ዓሲ ማዒፆ ዔርዛ ባኣዚ'' ጊቢ'' ዳንዳዒሢና ማዼ ባካ ዱማ ዱማ ማላታ፥ ዲቃሣ ባኣዚ''ንታ ፆኦሲ ዎልቄና ማዺንታ ዓኮ ባኮንታኬ። 
\v 13 ዒንሢ ታ ሜታሱዋዖ ሃሼ''ማፓ ዓታዛ ሃንጎ ኪሪስቶሴ ጉሙርቃ ሺኢጲፆ ማኣሮ ዓሶይዳፓ ዓይጎና ታ ዒንሢ ዻኪ''ሴይ? ዬይ ታኣኮ ዻቢንቲ ማዔቴ ታኣም ዓቶም ጎዑዋቴ።
\p
\v 14 ዒንሢ ኮይላ'' ታ ሙካንዳኔ ጌይ፥ ጊኢጊንቲ ጊኢጊንቲ ዓታንቴ ሃኖ' ሃይሣሲኬ፤ ታቴያ ታ ዒንሢ ሜታሳኒ ኮዑዋሴ፤ ዓይጎሮ ጌዔቴ ታ ኮዓሢ ዒንሢ ማዓንዳኣፓዓቴም ዒንሢኮ ሚኢሾቱዋኣሢሮኬ። ናይም ሚኢሼ ቡኩሳሢ ሾዔ ዓሶ ማዓንዳኣፓዓቴም ናኣታ'' ሾዔ ዓሶም ሚኢሼ ቡኩሱዋሴ። 
\v 15 ታኣኒ ጋዓንቴ ዒንሢ ዛሎ''ሮ ታኣኮ ዓኣ ባኮ ቢያ፥ ሃሣ ጊንሣ ታና ዓኣሢ ታ ዒንጌቴ ታኣም ቃራኬ፤ ዓካሪ ታ ዒንሢ ዬያይዲ ሚርጌና ናሽካዛ ዒንሢ ታና ዬማይዲ ዻካ''ና ናሽካኔ ጌይሢዳ?
\p
\v 16 ዬይ ያዺ ማዔቴያ ታ ዒንሢ ሜታሳዓኬ፤ ጋዓንቴ ፔቴ'' ፔቴ'' ዓሳ ጋዓሢጉዲ ፑርታ ማሊሢና ጌሺ ታ ዒንሢ ዓርቄያ ማሉዋዖ ዓታዓ! 
\v 17 ታ ዒንሢ ኮይላ'' ዳኬ ዓሶይዳፓ ፔቴ''ሢ ዛሎ''ናታዖ ታ ዒንሢ ቡሪያ? 
\v 18 ቲቶ ዒንሢ ኮይላ'' ዓኣዻንዳጉዲ ታ ሺኢቄኔ፤ ፔቴ'' ኑ ዒሻሢያ ዒንሢ ኮይላ'' ዒዛና ዎላ'' ታ ዳኬኔ፤ ሂዳዖ ቲቶ ዒንሢ ዒማና ቡሪያ? ታኣና ዒዛና ዒንሢም ማዼሢ ፔቴ'' ማሊሢናቱዋዓዳ? ኑኡኮ ማዻ''ኣ ፔቴ''ቱዋዓዳ?
\p
\v 19 ሃኖ'' ሄላ''ንዳኣና ኑ ዬያይዲ ጌስታሢ «ኑ ዻቤዖ ዻቢባኣሴ» ጌይ ጌስታያ ዒንሢም ማላ? ኑኡኒ ኪሪስቶሴና ማዒ ኬኤዛሢ ፆኦሲ ቤርታኬ፤ ኑ ዒጊኖንሢዮቴ! ኑኡኒ ሃያ ዒንሢም ኬኤዛሢ ዒንሢ ዶዲሺ ማዣኒኬ። 
\v 20 ታኣኒ ዒንሢ ኮይላ'' ሙካ ዎዶ''ና ታ ማላ ጎይፆ ዒንሢ ማዒባኣያ፥ ሃሣ ታኣኒያ ዒንሢ ማላ ጎይፆ ማዒባኣዖ ኑ ዎላ'' ካኣማንዳኣ ናንዳኔ ጌዒ ታ ዒጊጫኔ፤ ጎዖንቴ ዒንሢ ባኣካ'' ዑራ፥ ቂኢሩሞ፥ ጎሪ''ንቲ፥ ፑርታ ማዻኒ ዞርቲሢ፥ ዓሲ ፑርቲሲ ጌስቲሢ፥ ዾንኮ፥ ዖቶርሙሞንታ ዣሎንታ ዓኣ ናንዳኔ ጌዒ ታ ዒጊጫኔ። 
\v 21 ዬኖ ታ ዒንሢ ኮይላ'' ላሚፆ ሙካዞና ታ ፆኦዛሢ ጎዖንቴ ዒንሢ ቤርታ ታና ቦርሲሳንዳያ ናንዳኔ ጌዒ ታ ዒጊጫኔ፤ ሃሣ ሚርጌ ዓሳ ሓያኮ ቤርታ ዔያታ ማዼ ጎሞንታ ዒኢቴ ማዾ''ንታ ዓኒ ሃሣ ማቾ ማዒባኣያና ላሄሢንታ ዓኒ ሃሣ ማቾ ማዒባኣያና ላሃኒ ኮዒ ዓማሊ''ፆ ጎሞንታ ዔያታ ቡኡፂባኣያ ማዔም ታና ሚርጌ ዖዪሳንዳያ ናንዳኔ ጌዒ ታ ሚርጌ ዒጊጫኔ።
\c 13
\s ጳውሎሴኮ ጋፒንፆ ዞሮ''ና ሳራሢፆ
\p
\v 1 ዓካሪ ሃና ታኣኮ ዒንሢ ኮይላ'' ሃይሣሶ ሙኮ ማዓንዳኔ፤ ቢያ ባኣዚ''ኮ ጎኑማ ዔርታሢ ላምዖ ሃንጎ ሃይሦ ማርካናኬ። \x - \xo 13፥1 \xo*\xt ላሚ. ዎማ 17፥6፤ 19፥15።\xt*\x* 
\v 2 ላሚፆ ታ ዒንሢ ዛጋኒ ዒንሢ ኮይላ'' ሙኬ ዎዶ''ና ላቲ'' ታ ዒንሢም ኬኤዜ ባኣዚ'' ዓኣኔ፤ ሃሢያ ታ ሃኬ ዓኣዖ ቤርታ ጎሞ ማዼዞንሢንታ ሃንጎዋቶንታም ላቲ'' ታ ኬኤዛኔ፤ ዓካሪ ታ ዒንሢ ኮራ ማዒ ሙካኣና ዖናኣ ታ ሚጪንቲ ጌስታዓኬ፤ 
\v 3 ዬያይዲ ታኣና ማዒ ኬኤዛሢ ኪሪስቶሴታሢ ዒንሢ ዔራንዳኔ፤ ዒንሢ ባኣካ'' ዒ ማዻንዳሢ ዎልቄናኬ፤ ላቢ''ሢናቱዋሴ። 
\v 4 ዒዚ ፑርቶ ዓሶ ሱፆ ሚፆይዳ ሱፂንቲ ሓይቄሢ ላቢ''ሢና ማዔያታቴያ፥ ሃሢ ዒዚ ፆኦሲ ዎልቄና ሼምፖና ናንጋኔ፤ ኑኡኒያ ዒዛና ዎላ'' ማዒፆና ላቤ''ያ ማዔቴያ ዒንሢም ማዻኒ ፆኦሲ ዎልቄና ዒዛና ዎላ'' ሼምፔና ዓኣያ ማዒ ኑ ናንጋኔ።
\p
\v 5 ዒንሢ ፆኦሲ ጎኔ ጉሙርቃያ ማዒፆ ዔራኒ ዒንሢ ማሂ ዛጉዋቴ፤ ሃሣ ዒንሢ ጊንሣ ሺሪ ዖኦጩዋቴ፤ ዒንሢ ዣኣሌቴ ሌሊ ማዓንዳኣፓዓቴም ሃንጎ ዬሱስ ኪሪስቶሴ ዒንሢዳ ዓኣሢ ዒንሢ ዔሩዋዓዳ? 
\v 6 ኑኡኒ ጋዓንቴ ዬያና ዻቢንቲ ዣኣሊባኣያ ማዔሢ ዒንሢ ዔራኔ ጌይ ኑ ጉሙርቃኔ። 
\v 7 ዒንሢ ፔቴ''ታዖ ፑርታ ባኣዚ'' ማዹዋጉዲ ፆኦሲ ኑ ሺኢቃኔ፤ ኑኡኒ ሺኢቃሢ ዎዚ ዓሲም ኑ ኮሺ ዓሲ ማዒ ጴዺባኣቴያ ዒንሢ ቢያ ዎዴ ፒዜ ማዔ ባኣዚ'' ማዻንዳጉዲ ማዓንዳኣፓዓቴም ኑ ኮሹሞ ዻዋኒቱዋሴ። 
\v 8 ዓይጎሮ ጌዔቴ ኑ ጎኑሞም ማዻኣፓዓቴም ጎኑሞና ዎላ'' ዓኣዹዋ ባኣዚ'' ዓይጎዋ ኑ ማዻኒ ዳንዳዑዋሴ። 
\v 9 ኑኡኒ ላቤ''ያ ማዔም ዒንሢ ዶዲ ማዔቴ ኑም ቃራኬ፤ ኑኡኮ ሺኢጲፃ ዒንሢ ፓጬ ባኣዚ''ባኣ ዓሲ ማዓንዳጉዲኬ። 
\v 10 ሓያ ኪኢቶ'' ዒንሢፓ ሃኬ ዓኣዖ ታ ፃኣፔሢ ዬያሮኬ፤ ዬያይዲፆና ታ ዒንሢ ኮይላ'' ሙኬ ዎዶ''ና ጎዳ ታኣም ዒንጌ ቢታንቶና ታ ዒንሢ ሜታሳዓኬ፤ ዓይጎሮ ጌዔቴ ጎዳ ዬያ ቢታንቶ ታኣም ዒንጌሢ ዒንሢ ታ ዶዲሺ ማዣንዳጉዲኬ፥ ሻሂ ባባይዛንዳጉዲቱዋሴ።
\p
\v 11 ዓካሪ ታ ዒሾንሦ! ሚሾንሦ! ኮሺ ናንጉዋቴ፥ ፓጬ ባኣዚ''ባኣ ዓሲ ማዓኒ ዶዱዋቴ፥ ታ ዞሮ'' ዋይዙዋቴ፥ ዎላ'' ሃሣ ጊኢጊ ናንጉዋቴ፥ ሴካና ሃንጋና ኮሹሞና ናንጉዋቴ። ናሹሞና ኮሹሞናኮ ፆኦዛሢ ዒንሢና ዎላ'' ማዓንዳኔ።
\p
\v 12 ዎሊኮ ጌርሲንሢጉዲ ማዒ ዎሊ ሄርቂ ሄርቂ ዎሊ ዔኤሉ''ዋቴ።
\p
\v 13 ፆኦሲም ዱማዼ ዓሳ ቢያ ዒንሢ «ኮሺዳ?» ጋዓኔ።
\p
\v 14 ጎዳ ዬሱስ ኪሪስቶሴኮ ኮሹማ፥ ፆኦሲኮ ናሹማ፥ ዓያኖ ጌኤዦኮ ፔቱማ ዒንሢ ቢያሢና ዎላ'' ማዖንጎ።