\id 1JN - Maale Project
\ide UTF-8
\h ዮሓኒሴ ኪኢቶ'' 1
\toc3 1ዮሓ.
\toc2 ዮሓኒሴ ኪኢቶ'' 1
\toc1 ፆኦሲ ማዾ''ም ዳኪንቴ ዮሓኒሴኮ ቤርታሳ ኪኢቶ''
\mt ፆኦሲ ማዾ''ም ዳኪንቴ ዮሓኒሴኮ ቤርታሳ ኪኢቶ''
\imt ዓይፆ ካሮ''
\ip ፆኦሲ ማዾ''ም ዳኪንቴ ዮሓኒሴኮ ቤርታሳ ኪኢታ'' ላምዖ ዼኤፒ ዼኤፒ ማሊሢ ዓርቄያኬ፤ ዬያታኣ፦
\ip ኪኢቶ'' ናባባ ዓሶኮ ፆኦሲና ዒዛኮ ናዓሢ፥ ዬሱስ ኪሪስቶሴና ዎላ'' ፔቱሞ ዓኣያ ማዓንዳጉዲ ዶዲሻኒና ዬያ ፔቱሞ ባይዛኒ ዳንዳዓ ሉኡዙሞ ዔርዚፆ ዔሪ ካፒንታንዳጉዲ ላቲ'' ኬኤዛያኬ። ዬኖ ዎዶ''ና ኬስኬ ሉኡዙሞ ዔርዚፃ፦ «ፑርቱሞ ሙካሢ ሃያ ጴዻ ዓጮ''ና ካኣሚሢዳፓ ማዔሢሮ ፆኦሲኮ ናዓሢ፥ ዬሱሴ ፔቴ''ታዖ ዓሲ ማዓኒና ሃሣ ዓሲ ማሊሢ ዓኣያ ማዓኒ ዳንዳዑዋሴ» ጋዓያኬ። ዬያታ ሉኡዙሞ ዔርዛ ዓሳ፦ «ዻቂንታ ጌይሢ ናንጊና ናንጊ ዴንቃኒ ጌዒ ማሊ ሜታዺሢ ሃሺ''ኬ» ጋዓኔ፤ ሃሣ ዔያታ፦ «ዓሲ ‹ኮሺኬ፥ ፑርታኬ› ጌዒ ማላ ባኮንታ ሜሌ'' ዓሲ ናሽኪሢንታ ዻቂንታና ፔቴ''ታዖ ዎላ'' ካኣሙዋሴ» ጋዓኔ።
\ip ሓኖ' ኪኢቶ'' ፃኣፔ ዓሢ ጋዓንቴ ዬያ ማሊፆ ዒፂ ማኪሢና፦ «ዬሱስ ኪሪስቶሴ ፓጫ ባኣዚ'' ባኣያ ኩሙሢ ዓሲኬ፤ ዬሱሴ ጉሙርቃዞንሢና ፆኦሲ ናሽካዞንሢ ቢያ ዎሊ ናሽካንዳያ ኮይሳኔ» ጌዒ ዓሶም ፔጋሲ ኬኤዜኔ።
\iot ማፃኣፔላ ዱማ ዱማ ዓርቄ ባኮ
\io ዓይፆ ካሮ'' 1፥1-4
\io ፖዒና ዹሚና ኮኦኪንሢ ማሂ ኬኤዚንቴ ባኮ 1፥5—2፥29
\io ፆኦሲ ናይና ፃላሄ ናይና ዛላ 3፥1-24
\io ጎኔና ሉኡዙሞና ዛላ 4፥1-6
\io ናሹሞ ዛላ 4፥7-21
\io ቢያ ባኣዚ'' ባሻ ጉሙርቂሢ ዛላ 5፥1-21
\c 1
\s ናንጊ ቃኣላ
\p
\v 1 ቤርታፓ ዓርቃዖ ዓኣ ናንጎ ቃኣሎ'' ዛሎ'' ኑ ዒንሢም ፃኣፔኔ፤ ዬይ ናንጎ ቃኣላ'' ኑኡኒ ዋይዜሢ፥ ኑ ዓኣፖና ኑ ዛጌሢና ኑ ዴንቄሢ ሃሣ ኑ ኩጮናኣ ኑ ዓርቄሢ ዛሎ''ኬ። \x - \xo 1፥1 \xo*\xt ዮሓ. 1፥1።\xt*\x* 
\v 2 ዬይ ናንጎ ማዔሢ ፔጋዺ ጴዼኔ፤ ኑኡኒያ ዬያ ዛጌኔ፤ ዬያ ዛሎ''ዋ ኑ ማርካዻኔ። ዓዳሢ ኮራ ዓኣ፥ ኑኡማኣ ፔጋዺ ጴዼ፥ ናንጊና ናንጎ ኑ ዒንሢም ኬኤዛኔ። \x - \xo 1፥2 \xo*\xt ዮሓ. 1፥14።\xt*\x* 
\v 3 ዒንሢኮ ኑኡና ዎላ'' ፔቱሞ ዓኣያ ማዓንዳጉዲ ኑ ዛጌሢና ዋይዜሢና ዒንሢም ኬኤዛኔ፤ ኑኡኮ ፔቱማ ዓዳሢና ናዓሢ፥ ዬሱስ ኪሪስቶሴና ዎላ''ኬ። 
\v 4 ኑኡኮ ዎዛ'' ኩሙሢ ማዓንዳጉዲ ሃያ ኑ ዒንሢም ፃኣፔኔ።
\s ፆኦሲኮ ፖዒ ማዒፆ
\p
\v 5 ዒዛይዳፓ ኑ ዋይዚ ዒንሢም ኬኤዛ ኪኢታ''፦ «ፆኦሲ ፖዒኬ፤ ዹሚ ዒዛ ኮራ ፔቴ''ታዖ ባኣሴ» ጋዓያኬ። 
\v 6 ዬያሮ፦ «ፆኦሲና ዎላ'' ኑኡኮ ፔቱሞ ዓኣኔ» ጌዒ ጌዒ ዹሞይዳ ኑ ናንጋያ ማዔቴ ኑ ሉኡቃኔ፤ ኑ ኬኤዛ ባኮና ማዻ ባኮናኮ ጎኑሞ ባኣሴ ጌይሢኬ። 
\v 7 ጋዓንቴ ዒዚ ፖዖይዳ ዓኣሢጉዲ ኑኡኒ ፖዖይዳ ናንጋቶ ኑኡኮ ዎሊና ፔቱሞ ዓኣያ ማዓንዳኔ፤ ሃሣ ዒዛኮ ናዓሢ፥ ዬሱስ ኪሪስቶሴኮ ሱጉፃ ጎሜ ቢያይዳፓ ኑና ጌኤሻ''ኔ።
\p
\v 8 «ጎሜ ኑኡኮ ባኣሴ» ኑ ጌዔቴ ኑና ኑ ጌሻኔ፤ ጎኑሞዋ ኑ ጊዳ'' ባኣሴ። 
\v 9 ኑኡኮ ጎሞ ፆኦሲም ኑ ቡኡፄቴ ዒዚ ጉሙርቂንታያ፥ ሃሣ ጌኤሺ ማዔሢሮ ጎሞ ኑኡኮ ቢያ ዓቶም ጋዓንዳኔ፤ ኑ ዻቢንቶይዳፓኣ ቢያ ኑና ዒ ጌኤሻ''ንዳኔ። 
\v 10 «ጎሜ ኑ ማዺባኣሴ» ጌዔቴ ፆኦሲ ሉኡዚ ኑ ማሃኔ፤ ዒዛኮ ቃኣላ''ኣ ኑ ጊዳ'' ባኣሴ።
\c 2
\s ኪሪስቶሴ ኑና ማኣዳ''ያ ማዒፆ
\p
\v 1 ታ ናይዮቴ! ሃያ ታ ዒንሢም ፃኣፓሢ ጎሜ ዒንሢ ማዹዋጉዲ ጌይኬ፤ ጋዓንቴ ዓይጎ ዓሲያ ማዖም ጎሜ ማዼያ ማዔቴ ኑ ዓዳሢ ኮይላ'' ማዒ ኑ ዛሎ'' ጌስታይ ዓኣኔ፤ ዒዚያ ፂሎ'' ማዔ ዬሱስ ኪሪስቶሴኬ። 
\v 2 ኑኡኮ ጎማ ዓቶም ጌይንታሢ ዒዛናኬ፤ ያዺ ማዓሢ ኑ ጎሞ ሌሊቱዋንቴ ዓጮ'' ዓሶ ቢያሢሲኬ።
\p
\v 3 ፆኦሲኮ ዓይሢፆ ኑ ኩንሣያ ማዔቴ ኑ ዒዛ ዔራያ ማዒፆ ዬያና ኑ ጎናሲ ዔራንዳኔ። 
\v 4 «ፆኦሲ ታ ዔራኔ» ጌይ ጌይ ዒዛኮ ዓይሢፆ ኩንሡዋይ ዓኣቶ ዬይ ሉኡዚ ዓሲኬ፤ ጎኑሞዋ ዒዛይዳ ባኣያኬ። 
\v 5 ጋዓንቴ ፆኦሲ ቃኣሎ''ም ዓይሢንታሢ ቢያ ፆኦሲ ጉቤ ዒናፓ ናሽካኔ፤ ጎኔና ኑኡኮ ፆኦሲ ዓሲ ማዒፃ ዔርታሢ ዬያናኬ። 
\v 6 «ፆኦሲና ታ ናንጋኔ» ጋዓ ዓሲ ኪሪስቶሴ ናንጌ ጎይፆ ናንጋንዳያ ኮይሳኔ።
\s ዓኮ ዓይሢፆ
\p
\v 7 ታ ዒጊኖንሢዮቴ! ሃይ ታ ዒንሢም ፃኣፓ ኪኢታ'' ቤርታፓ ዓርቃዖ ዒንሢ ዔራያ ሓሣ ናንጌያ ማዓንዳኣፓዓቴም ዓኪቱዋሴ፤ ሃይ ናንጌ ዓይሢፃ ቤርታ ዒንሢ ዋይዜ ቃኣሎ''ኬ። \x - \xo 2፥7 \xo*\xt ዮሓ. 13፥34።\xt*\x* 
\v 8 ማዔቴያ ኪሪስቶሴ ናንጎና ዒንሢ ናንጎናይዳ ጎኔ ማዒ ጴዼ፥ ዓኪ ኪኢታ ታ ዒንሢም ፃኣፓኔ፤ ዓይጎሮ ጌዔቴ ዹማ ባይቂ ጎኑሞ ፖዒ' ፖዒ ፖዒ ዓኣሢሮኬ።
\p
\v 9 «ፖዒዳ ታ ናንጋኔ» ጌዒ ጌዒ ፔ ዒሻሢና ፔ ሚሼሎና ዒፃሢ ሃጊ ዹማ ዓኣኔ። 
\v 10 ፔ ዒሻሢና ፔ ሚሼሎና ናሽካሢ ቢያ ፖዒዳ ናንጋያኬ፤ ዒዛ ዛሎ''ና ዓሲ ዻቢንቲ ጎሜይዳ ጌላዓኬ። 
\v 11 ፔ ዒሻሢና ፔ ሚሾና ዒፃሢ ጋዓንቴ ዹሚዳ ናንጋኔ፤ ሃሣ ዹሞይዳኣ ሃንታኔ ዹማ ዓኣፖ ዒዛኮ ባይዜሢሮ ዒ ዓኣዻ ቤዞዋ ዔሩዋያኬ።
\p
\v 12 ታ ናይዮቴ! ጎማ ዒንሢኮ ኪሪስቶሴ ሱ'ንፆና ዓቶም ጌይንቴሢሮ ታ ዒንሢም ፃኣፓኔ። 
\v 13 ዓዶንሢዮቴ! ቤርታፓ ዓኣሢ፥ ዒዛ ዒንሢ ዔሬሢሮ ታ ዒንሢም ፃኣፓኔ። ዼጌዞቴ! ፑርታሢ፡ ዒንሢ ባሼሢሮ ታ ዒንሢም ፃኣፓኔ።
\p
\v 14 ናይዮቴ! ፆኦሲ፥ ዓዳሢ ዒንሢ ዔሬሢሮ ታ ዒንሢም ፃኣፓኔ። ዓዶንሢዮቴ! ቤርታኣፓ ዓኣሢ፥ ዒዛ ዒንሢ ዔሬሢሮ ታ ዒንሢም ፃኣፓኔ። ዼጌዞቴ! ዶዲ ዒንሢ ማዔሢሮ፥ ፆኦሲ ቃኣሎ''ናኣ ዒንሢ ዶዲ ዓኣሢሮ ሃሣ ፑርታሢያ ዒንሢ ባሼሢሮ ታ ዒንሢም ፃኣፓኔ።
\p
\v 15 ሓያ ዓጮ''ንታ ሓያ ዓጮ''ይዳ ዓኣ ዓይጎ ባኣዚ''ያ ናሽኪፖቴ፤ ዓጮ'' ናሽካ ዓሲ ፆኦሲ፥ ዓዳሢ ናሽኩዋያኬ። 
\v 16 ዓይጎሮ ጌዔቴ ዓሲኮ ፑርታ ሱኡኬ፥ ዓኣፒም ኮሽካ ባኣዚ''ና ዓሲ ሄርሺንቲሳ ባኣዚ'' ሃያ ዓጫ''ፓ ማዓንዳኣፓዓቴም ፆኦሲ፥ ዓዳሢዳፓቱዋሴ። 
\v 17 ሓያ ዓጮ''ና ሃካ ዓኣ ፑርቶ ሱኡካ ባይቃንዳኔ፤ ፆኦሲ ማሊፆ ኩንሢ ናንጋሢ ጋዓንቴ ናንጊና ናንጋንዳኔ።
\s ኪሪስቶሴ ዒፂ ማካ ዓሶ ዔሪ ካፒንቲሢ ዛላ
\p
\v 18 ታ ናይዮቴ! ሃይ ጋፒንሢ ዎዴኬ፤ «ኪሪስቶሴ ዒፂ ማካይ ሙካንዳኔ» ጌይንቴሢ ዒንሢ ዋይዜኔ፤ ሃሢያ ሃይሾ ኪሪስቶሴ ዒፂ ማካይ ሚርጌ ኬስኬኔ። ያዺ ማዒፆና ሃይ ጋፒንፆ ዎዶ'' ማዔሢ ኑ ዔራኔ። 
\v 19 ዔያታ ኬስኬሢ ኑ ባኣካ''ፓኬ፤ ማዔቴያ ቤርታ ዔያታ ጎኔ ኑኡና ዎላ'' ዓኣያቱዋሴ፤ ዎንዴ ዔያታ ጎኔ ኑኡና ዎላ'' ዓኣያ ማዒ ዓኣቴ ኑኡና ዎላ'' ዶዲ ናንጌያ ናንዳንቴኬ፤ ቢያሢ ጎኔ ኑኡና ዎላ'' ማዒባኣያ ማዔሢ ዔያቶኮ ዔርታንዳጉዲ ኑ ባኣካ''ፓ ዔያታ ዱማዺ ኬስኬኔ።
\p
\v 20 ዒንሢዳ ጋዓንቴ ኪሪስቶሴ' ዓያኖ ጌኤዦ ኬይሴሢሮ ዒንሢ ቢያሢ ጎኔ ባኮ ዔራኔ። 
\v 21 ታኣኒ ዒንሢም ፃኣፓሢ ጎኔ ባኮ ዒንሢ ዔሩዋኣሢሮቱዋሴ፤ ዒንሢ ጎኔ ባኮ ዔዔራኔ፤ ጎኔይዳ ሉኡዙሞ ባኣዚ'' ባኣሢያ ዒንሢ ዔራኔ።
\p
\v 22 ዓካሪ ዬሱሴ፦ «ሜሲሔ» ማዔሢ «ታ ዔሩዋሴ» ጋዓሢዳፓ ዓታዛ ሉኡዚ ጎዖሢ ዖናዳይ? ፆኦሲ ዓዳሢና ናዓሢና «ታ ዔሩዋሴ» ጋዓሢ ቢያ ኪሪስቶሴ ዒፂ ማካሢኬ። 
\v 23 ናዓሢ «ታ ዔሩዋሴ» ጋዓሢ ዓዳሢያ ዔሩዋያኬ፤ ናዓሢ ጉሙርቃሢ ዓዶዋ ጉሙርቃኔ።
\p
\v 24 ዒንሢኮ ጋዓንቴ ቤርታ ዒንሢ ዋይዜ ቃኣላ'' ዒና'' ዓኣያ ማዖንጎ፤ ያዺ ማዔቴ ዒንሢኮ ናዓሢና ዓዶና ዎላ'' ፔቱሞ ዓኣያ ማዓንዳኔ። 
\v 25 ዬይ፤ ኪሪስቶሴ ኑም ዒንጌ ሃጊ ማዓንዳ ዎዛ'' ናንጊና ናንጎኬ።
\p
\v 26 ዒንሢ ጌሺ ዻቢሳ ዓሶ ዛሎ''ና ሓያ ታ ዒንሢም ፃኣፔኔ፤ 
\v 27 ጋዓንቴ ኪሪስቶሴይዳፓ ዒንሢ ዔኬ ዓያና'' ዒንሢዳ ናንጋሢሮ ሜሌ'' ዖኦኒያ ዒንሢ ዔርዛንዳያ ኮይሱዋሴ፤ ዒዚ ቢያ ባኣዚ'' ዒንሢ ዔርዛንዳኔ፤ ዒዚ ዒንሢ ዔርዛንዳሢ ጎኔ ባኣዚ'' ማዓንዳኣፓዓቴም ሉኡዙሞቱዋኣሢሮ ዒዚ ዒንሢ ዔርዛ ጎይፆማ ኪሪስቶሴና ናንጉዋቴ።
\s ፆኦሲ ናይ
\p
\v 28 ዓካሪ ታ ናይዮቴ! ዒዚ ሙኪ ጴዻ ዎዶ''ና ኑኡኒ ዒጊጩዋዖ ጫርቂ ዒዛ ኑ ዛጋንዳጉዲና ዒ ሙካኣና ኑ ቦርሲንቱዋጉዲ ዒዛና ናንጉዋቴ፤ 
\v 29 ዒዚ ፂሎ'' ማዔሢ ዒንሢ ዔሬቴ ፂሎ'' ማዻሢ ቢያ ፆኦሲ ናይ ማዓሢ ዔሩዋቴ።
\c 3
\p
\v 1 «ፆኦሲ ናይ» ኑ ጌይንታንዳጉዲ ዓዳሢ ዎዚጉዴ ናሹሞና ኑና ናሽኬቴ ሂንዳ ዛጉዋቴ! ጎኔ ኑ ፆኦሲ ናኣቶ''ኬ። ዓጫ'' ዒዛ ዔሪባኣሢሮ ኑናኣ ዔሩዋሴ። \x - \xo 3፥1 \xo*\xt ዮሓ. 1፥12።\xt*\x* 
\v 2 ታ ዒጊኖንሢዮቴ! ሃሢ ኑኡኒ ፆኦሲ ናይኬ፤ ሃጊ ኑ ዎይታንዳቴያ ዔርቲባኣሴ። ጋዓንቴ ኪሪስቶሴ ሙኪ ጴዻ ዎዶ''ና ጎኔና ኑ ዒዛ ዛጋንዳሢሮ ዒዛ ኑ ማላንዳሢ ኑ ዔራኔ። 
\v 3 ዬይ ያዺ ማዓንዳያታሢ፡ ኪሪስቶሴ ዛሎ''ና ሃጊ ማዓንዳ ዎዛ ጌሣሢ ቢያ ኪሪስቶሴ ጌኤሺ ማዔሢጉዲ ፔና ጌኤሻ''ኔ።
\p
\v 4 ጎሜ ማዻሢ ቢያ ፆኦሲኮ ዎጎ ዑሣ ዓኣዻኔ፤ ዎይቲ ጌዔቴ ጎሜ ጌይሢ ፆኦሲ ዎጎኮ ዑሣ ዓኣዺሢታሢሮኬ። 
\v 5 ኪሪስቶሴ ዓሲኮ ጎሞ ጌኤሻ''ኒ ሙኪ ጴዼሢና ዒዛኮ ጎሜ ባኣያታሢ ዒንሢ ዔራኔ። \x - \xo 3፥5 \xo*\xt ዮሓ. 1፥29።\xt*\x* 
\v 6 ዬያሮ ኪሪስቶሴና ናንጋ ዓሲ ቢያ ጎሜ ማዺ ማዺ ናንጉዋሴ፤ ጎሜ ማዺ ማዺ ናንጋ ዓሲ ጋዓንቴ ኪሪስቶሴ ዛጊባኣያኬ፤ ሃሣ ዔሪባኣያኬ።
\p
\v 7 ታ ናይዮቴ! ዖኦኒያ ዒንሢ ጌሺ ዻቢሱዋጉዲ፤ ኪሪስቶሴ ፂሎ'' ማዔሢጉዲ ፂሎ'' ማዾ ማዻሢ ቢያ ፂሎ''ኬ። 
\v 8 ፃላሄ ቤርታኣፓ ዓርቃዖ ጎሜ ማዻያታሢሮ ጎሜ ማዻሢ ቢያ ፃላሄ ናይኬ። ፆኦሲ ናዓሢ ሙኪ ጴዼሢ ፃላሄኮ ማዾ'' ባይዛኒኬ።
\p
\v 9 ፆኦሲ ናይ ማዔያ ጎሜ ማዺ ማዺ ናንጉዋሴ፤ ሃሣ ማዺ ማዺ ናንጋኒያ ዳንዳዑዋሴ። ዎይቲ ጌዔቴ ፆኦሲ ማሊፃ ዒዛይዳ ናንጋሢሮና ፆኦሲ ናይ ዒ ማዔሢሮኬ። 
\v 10 ፆኦሲ ናኣቶ''ና ፃላሄ ናኣቶ''ና ዱማዺ ዔርታሢ ዬያናኬ፤ ፂሎ'' ማዾ ማዹዋያ፥ ሃሣ ፔኤኮ ዒሻሢንታ ሚሾንታ ናሽኩዋኣሢ ቢያ ፆኦሲ ናይቱዋሴ።
\s ዎሊ ናሽኪሢ ዛላ
\p
\v 11 ቤርታኣፓ ዒንሢ ዋይዜ ኪኢታ''፦ «ዎሊ ኑ ናሽኮም» ጋዓያኬ። \x - \xo 3፥11 \xo*\xt ዮሓ. 13፥34።\xt*\x* 
\v 12 ፃላሄ ዓሲ ማዒ ፔ ጌርሲ ዎዼ፥ ቃኣዔኤሌጉዲ ማዓንዳያ ኑም ኮይሱዋሴ፤ ዒዚ ፔኤኮ ጌርሲ ዓይጎሮ ዎዼይ ጌዔቴ ዒዛኮ ማዻ'' ፑርታ ማዔሢሮና ጌርሲ ማዻ'' ፒዜ ማዔሢሮኬ። \x - \xo 3፥12 \xo*\xt ማዢ. ማፃ 4፥8።\xt*\x*
\p
\v 13 ታ ዒሾንሦ! ታ ሚሾንሦ! ዓጫ'' ዒንሢ ዒፄቶ ዲቃቲ ሄርሺፖቴ። 
\v 14 ኑኡኒ ኑ ዒሾንሢና ኑ ሚሾንሢና ናሽካሢሮ ሃይቢፓ ናንጊ ባንሢ ኑ ፒንቄሢ ኑ ዔራኔ፤ ናሹሞባኣ ዓሲ ሓይቄያ ማዒ ናንጋኔ። \x - \xo 3፥14 \xo*\xt ዮሓ. 5፥24።\xt*\x* 
\v 15 ፔ ዒሻሢና ፔ ሚሾና ዒፃሢ ቢያ ዓሲ ሼምፖ ዎዻያኬ፤ ዓሲ ሼምፖ ዎዻ ዓሲኮ ናንጊና ናንጊ ባኣሢ ዒንሢ ዔራኔ። 
\v 16 ናሹሞ ዓይጎ ማዔቴያ ኑ ዔራሢ ዬሱስ ኪሪስቶሴ ፔ ሼምፓሢ ኑም ዓኣሢ ዒንጌሢሮኬ፤ ኑኡኒ ሃሣ ኑ ሼምፓሢ ኑ ዒሾንሢንታ ሚሾንሢንታ ዛሎ'' ዓኣሢ ዒንጋንዳያ ኮይሳኔ። 
\v 17 ዓሲ ሃያ ዓጮ''ይዳ ፔኤኮ ቆሎ ዓኣንቴ ሜታዼ ዓሲ ዛጋዖ ሚጪንቲባኣቴ «ፆኦሲ ናሽካኔ» ዎይቲ ጋዓኒ ዳንዳዓይ? 
\v 18 ታ ናይዮቴ! ኑኡኮ ናሹማ ጎኔ፥ ሃሣ ማዾና ጴዻያ ማዖንጎ፤ ዻንጋና ኬኤዚሢና ሌሊ ማዖፓ። 
\v 19 ዬያና ኑ ጎኑሞ ዓሲ ማዒፆንታ ፆኦሲ ቤርቶ ዓልቱዋዖ ጉሙርቂ ኑ ሺኢካኒ ዳንዳዓሢ ኑ ዔራኔ። 
\v 20 ኑኡኮ ዒና'' ፑርቶ ማዾ'' ኑ ማዻሢ፦ «ዻባኔ» ጌዔቴያ ፆኦሲ ኑኡኮ ዒና''ፓ ዑፃ ማዔሢ፤ ሃሣ ቢያ ባኣዚ'' ዔራያ ማዔሢ ኑ ዔራኔ። 
\v 21 ታ ዒጊኖንሢዮቴ! ዒና'' ኑኡኮ ዻቢንቶ ኑም ኬኤዙዋያ ማዔቴ ፆኦሲ ቤርቶይዳ ዓልቱዋያ ኑ ማዓንዳኔ። 
\v 22 ፆኦሲኮ ዓይሢፆ ኑ ኩንሣያና ዒዛ ዎዛሳ ባኣዚ'' ኑ ማዻያ ማዔሢሮ ኑ ዒዛ ሺኢቃ ባኮ ቢያ ዒዛይዳፓ ኑ ዔካንዳኔ። 
\v 23 ዒዛኮ ዓይሢፃ ዒዛኮ ናዓሢ፥ ዬሱስ ኪሪስቶሴ ኑ ጉሙርቃንዳጉዲና ሃሣ ኪሪስቶሴያ ኑና ዓይሤ ጎይፆ ዎሊ ኑ ናሽካንዳጉዲኬ። \x - \xo 3፥23 \xo*\xt ዮሓ. 13፥34፤ 15፥12፤ 17።\xt*\x* 
\v 24 ፆኦሲ ዓይሢፆ ኩንሣሢ ቢያ ፆኦሲና ናንጋኔ፤ ፆኦሲያ ዒዛይዳ ናንጋኔ። ፆኦሲ ኑጊዳ ናንጋሢ ኑ ዔራሢ' ዒዚ ኑም ዒንጌ ዓያኖናኬ።
\c 4
\s ዓያና ዱማሲ ዔሪሢ ዛላ
\p
\v 1 ዒጊኖንሢዮቴ! ዓጮ''ይዳ ሚርጌ፥ ሉኡዙሞና ፆኦሲ ማሊሢ ኬኤዛያ ማላ ዓሲ ኬስኬሢሮ ዓያኖ ቢያ ጎኔ ዓያናኬ ጌይፖቴ፤ ዬያይዳፓ ዺቦ'' ዓያና'' ፆኦሲፓታቴያ ቱዋቴያ ዱማሲ ዔራኒ ዛጉዋቴ። 
\v 2 ፆኦሲ ዓያኖ ዱማሲ ዒንሢ ዔራኒ ዳንዳዓሢ ያዺኬ፤ ዬይያ፦ ዬሱስ ኪሪስቶሴ ዓሲ ማዒ ጴዼሢ ማርካዻ ዓያና ፆኦሲ ዓያናኬ፤ 
\v 3 ዬሱስ ኪሪስቶሴ ዓሲ ማዒ ጴዼሢ ማርካዹዋ ዓያና ፆኦሲ ዓያናቱዋሴ፤ ዬይ ዓያና'' «ሙካንዳኔ» ጌይንቴም ዒንሢ ዋይዜ፥ ኪሪስቶሴ ዒፃሢ ዓያኖኬ፤ ዬይ ሃሢያ ዓጮ''ይዳ ዓኣኔ።
\p
\v 4 ታ ናይዮቴ! ዒንሢ ፆኦሲሮኬ፤ ዒንሢዳ ዓኣ ዓያና'' ዓጮ''ይዳ ዓኣ ዓያኖይዳፓ ባሼኬ፤ ዬያሮ ሉኡቂ ፆኦሲ ማሊፆ ኬኤዛያ ማላ ዓሶ ዒንሢ ባሼኔ። 
\v 5 ዔያታ ሃያ ዓጮ''ሮ ማዔሢሮ ዔያታ ኬኤዛሢ ሃያ ዓጮ'' ባኣዚ''ኬ፤ ሃይ ዓጫ''ኣ ዔያቶሲ ዋዋይዛኔ። 
\v 6 ኑኡኒ ጋዓንቴ ፆኦሲሮኬ፤ ፆኦሲ ዔራሢ ቢያ ኑኡሲ'' ዋይዛንዳኔ፤ ፆኦሲሮ ማዒባኣሢ ኑ ጋዓሢ ዋይዛዓኬ። ጎኑሞ ዓያኖና ሉኡዙሞ ዓያኖና ዱማሲ ኑ ዔራንዳሢ ዬያናኬ።
\s ፆኦሲ ዓሲ ናሽካያ ማዔሢ
\p
\v 7 ታ ዒጊኖንሢዮቴ! ናሹሞ ፆኦሲዳፓ ማዔሢሮ ዎሊ ኑ ናሽኮም፤ ዬያይዴቴ ኑ ፆኦሲ ናይኬ፤ ፆኦሲያ ኑ ዔራኔ። 
\v 8 ፆኦሲ፡ ዓሲ ናሽካያታሢሮ ናሹሞ ባኣሢ ፆኦሲ ዔሩዋያኬ። 
\v 9 ፔኤኮ ናዓሢ ዛሎ''ና ናንጊ ኑ ዴንቃንዳጉዲ ፆኦሲ ፔቴ'' ናዖ ዓጮ'' ዳኬኔ፤ ዬያና ፆኦሲኮ ናሹማ ዎዚጉዴያታቴያ ኑም ፔጋዺ ዔርቴኔ። 
\v 10 ኑኡኒ ፆኦሲ ናሽኬሢሮቱዋንቴ ዒዚ ኑና ናሽኪ፥ ጎማ ኑኡኮ ዓቶም ጌይንታንዳጉዲ ፔኤኮ ናዖ ዳኬኔ፤ ናሹሞ ጌይፃ ያዺኬ።
\p
\v 11 ታ ዒጊኖንሢዮቴ! ፆኦሲ ኑና ዬያይዲ ናሽኬያ ማዔቴ ኑ ዎሊ ናሽካንዳያ ኮይሳኔ። 
\v 12 ፆኦሲ ዛጌ ዓሲ ፔቴ''ታዖ ባኣሴ። ኑኡኒ ዎሊ ናሽኬቴ ፆኦሲ ኑኡና ዎላ'' ናንጋንዳኔ፤ ዒዛ ናሹማኣ ጎኔና ኑ ዒና'' ዓኣያ ማዓንዳኔ። \x - \xo 4፥12 \xo*\xt ዮሓ. 1፥18።\xt*\x*
\p
\v 13 ፆኦሲ ፔኤኮ ዓያኖ ኑማኣ ዒንጌሢሮ ኑኡኒ ዒዛና ናንጋሢንታ ዒዚያ ኑኡና ናንጋሢ ኑ ዔራኔ። 
\v 14 ፆኦሲ፥ ዓዳሢ ዓጮ'' ዻቂሻሢ ማሂ ፔ ናዓሢ ዳኬሢ ኑ ዛጌኔ፤ ሃሣ ኑ ማርካዻኔ። 
\v 15 ዬሱሴ ፆኦሲ ናይ ማዔሢ፡ ማርካዻ ዓሲዳ ቢያ ፆኦሲ ናንጋኔ፤ ዒዚያ ፆኦሲና ናንጋኔ። 
\v 16 ዬያሮ ፆኦሲ ኑና ናሽካ ናሹሞ ኑ ዔራኔ፤ ሃሣ ኑ ጉሙርቃኔ። ፆኦሲ ዓሲ ናሽካያኬ፤ ናሹሞ ዓኣ ዓሲ ፆኦሲና ናንጋኔ፤ ፆኦሲያ ዒዛና ናንጋኔ። 
\v 17 ኑኡኒ ጎኔና ዎሊ ናሽኬቴ፥ ሃሣ ኪሪስቶሴ ናንጌ ጎይፆ ሃያ ዓጮ''ይዳ ኑ ናንጌቴ ጋፒንፆ ዎጎ ኬሎ''ና ኑ ሂርጉዋዖ ዒዛ ቤርቶ ሺኢካንዳኔ። 
\v 18 ናሹሞ ዓኣያታቴ ሂርጋ ባኣሴ፤ ጎኔ ናሹሞ ዒዞ ኬሎ''ና ሂርጎ ባይዛንዳኔ፤ ሂርጋ «ፑርታና ዎጊሳንዳኔ» ጌይ ማሊሢዳፓ ሙካሢሮ ሂርጋ ዓሶኮ ናሹማ ኩሙሢ ናሹሞቱዋሴ።
\p
\v 19 ፆኦሲ ቤርታዺ ኑና ናሽኬሢሮ ኑ ዒዛ ናሽካኔ። 
\v 20 «ፆኦሲ ታ ናሽካኔ» ጌይ ጌይ ፔ ዒሻሢና ፔ ሚሼሎና ዒፃሢ ሉኡዚ ዓሲኬ፤ ዒ ዴንቃ ፔ ዒሻሢና ፔ ሚሼሎና ናሽኪባኣያ ማዔቴ ዒ ዴንቁዋ ፆኦዛሢ ናሽካኒ ዳንዳዑዋሴ። 
\v 21 ዬያሮ ኪሪስቶሴ ኑም ዓይሤ ዓይሢፃ፦ «ፆኦሲ ናሽካሢ ፔ ዒሻሢንታ ፔ ሚሼሎንታ ናሽኮንጎ» ጋዓያኬ።
\c 5
\s ዓጮ'' ባሺሢ ዛላ
\p
\v 1 ዬሱሴ ሜሲሔ ማዔሢ ጉሙርቃሢ ቢያ ፆኦሲ ናይኬ፤ ዓዳሢ ናሽካሢ ቢያ ናዓሢያ ናሽካኔ። 
\v 2 ፆኦሲ ናኣቶ'' ኑ ናሽካያ ማዔሢ ኑ ዔራንዳሢ ፆኦሲ ናሽኪ፥ ዒዛኮ ዓይሢፆዋ ኑ ኩንሤ ዎዶ''ናኬ። 
\v 3 ፆኦሲ ናሽኪሢ ጌይሢ ዒዛኮ ዓይሢፆ ኩንሥሢኬ፤ ዒዛኮ ዓይሢፃ ሜታሳያቱዋሴ። \x - \xo 5፥3 \xo*\xt ዮሓ. 14፥15።\xt*\x* 
\v 4 ዎይቲ ጌዔቴ ፆኦሲ ናይ ማዔሢ ቢያ ዓጮ'' ባሻያታሢሮኬ፤ ዓጮ'' ኑ ባሻንዳሢያ ፆኦሲ ጉሙርቂፆናኬ። 
\v 5 ዓጮ'' ባሻንዳሢ' ዬሱሴ ፆኦሲ ናይ ማዔሢ ጉሙርቃሢ ሌሊኬ።
\s ኪሪስቶሴ ዛሎ'' ማርካዺንቴ ማርካቶ
\p
\v 6 ዒዛኮ ማስቲፆ ዔርዛ ዋኣፆንታ ሃይቦ ዔርዛ ሱጉፆንታ ኬስኬሢ ዬሱስ ኪሪስቶሴይዳፓኬ፤ ዒዛኮ ኬስኬሢ ዋኣሢ ሌሊቱዋንቴ ዋኣሢና ሱጉሢናኬ፤ ዬይ ጎኔ ማዔሢ፡ ዓያኖ ጌኤዣ ማርካዻኔ፤ ዎይቲ ጌዔቴ ዓያኖ ጌኤዣ ጎኔ ኬኤዛያታሢሮኬ። 
\v 7 ዬያሮ ዒዛኮ ሃይሦ ማርካ ዓኣኔ፤ 
\v 8 ዬያታ፡ ዓያና ጌኤሺንታ ዋኣሢንታ ሱጉሢንታኬ፤ ዬንሢ ሃይሦንሢ ማርካዻ ማርካታ ፔቴ'' ማዓያኬ። 
\v 9 ዓሲ ማርካዻ ማርካቶ ኑ ዔካኔ፤ ጋዓንቴ ፆኦሲ ማርካታ ቢያይዳፓ ባሼኬ። ፆኦሲ ፔኤኮ ናዓሢ ዛሎ'' ማርካዼ ማርካታ'' ያዺኬ። 
\v 10 ፆኦሲ ናዓሢ ጉሙርቃሢኮ ዬይ ማርካታ'' ዒና'' ዓኣኔ። ፆኦሲ ጉሙርቁዋኣሢ ጋዓንቴ ፆኦሲ ፔኤኮ ናዖ ዛሎ'' ማርካዼ ማርካቶ ጉሙርቂባኣሢሮ ፆኦሲ ሉኡቄያ ማሃኔ። 
\v 11 ዬይ ማርካታ'' ፆኦሲ ናንጊና ናንጊ ኑም ዒንጌሢና ዬያ ናንጎ ዒዛኮ ናዓሢ ዒንጋያታሢ ማርካዻያኬ። \x - \xo 5፥11 \xo*\xt ዮሓ. 3፥36።\xt*\x* 
\v 12 ፆኦሲ ናዓሢ ዓኣሢኮ ናንጊ ዓኣኔ፤ ፆኦሲ ናዓሢ ባኣሢኮ ጋዓንቴ ናንጊ ባኣሴ።
\s ናንጊና ናንጊ
\p
\v 13 ዒንሢ፥ ፆኦዛሢ ናዓሢ ሱ'ንፆና ጉሙርቃዞንሢኮ ቢያ ናንጊና ናንጊ ዓኣያ ማዔሢ ዒንሢ ዔራንዳጉዲ ሃያ ቢያ ታ ዒንሢም ፃኣፓኔ። 
\v 14 ዓይጎ ባኣዚ''ያ ማዖም ዒዛ ማሊፆጉዲ ኑ ሺኢቄቴ ኑም ዒ ዋይዛንዳሢ ኑ ጉሙርቃኔ፤ ፆኦሲ ቤርታ ኑኡኮ ዓኣ ጫርሹማ ዬያኬ። 
\v 15 ኑ ሺኢቃ ባኮ ቢያ ዒ ዋይዛሢ ኑ ዔሬቴ ዒዛይዳፓ ኑ ሺኢቃ ባኮ ቢያ ዔኬሢ ኑ ዔራኔ።
\p
\v 16 ዖኦኒያ፡ ፔኤኮ ዒሻሢያ ማዖም ሚሼሎ ዎዹዋ ጎሜ ማዻንቴ ዴንቄቴ ዒዛም ሺኢቆንጎ፤ ዬያ ዓሢና ዓሴሎና ጎማ ዎዹዋያ ማዔቴ ፆኦሲ ዒዛም ናንጊ ዒንጋንዳኔ። ጋዓንቴ ዎዻ ጎሜ ዓኣኔ፤ ዬያጉዴ ጎሞም ሺኢቆንጎ ታ ጎዑዋሴ። 
\v 17 ፑርታ ማዾ ቢያ ጎሜኬ፤ ማዔቴያ ዎዹዋ ጎሜ ዓኣኔ።
\p
\v 18 ፆኦሲ ናይ ማዔሢ ቢያ ጎሜ ማዺ ማዺ ናንጉዋኣሢ ኑ ዔራኔ፤ ዎይቲ ጌዔቴ ፆኦሲኮ ናዓሢ፥ ዬሱስ ኪሪስቶሴ ዒዛ ካፓሢሮኬ፤ ፃላሄያ ዒዛ ካኣሙዋሴ።
\p
\v 19 ኑኡኒ ፆኦሲ ዓሲ ማዔሢ፤ ሃሣ ዓጫ'' ጉቤ ፃላሄ ዓሲ ማዔሢ ኑ ዔራኔ።
\p
\v 20 ፆኦሲ ናዓሢ ሙኬሢና ጎኔ ማዔሢ፥ ዒዛ ኑ ዔራንዳጉዲ ማሊ ጶቂሣ ዒና ኑም ዒንጌሢያ ኑ ዔራኔ፤ ኑኡኒ ዬያ ጎኔ ማዔ፥ ዬሱስ ኪሪስቶሴና ናንጋኔ፤ ዒዚ ጎኔ ፆኦሲ ሃሣ ናንጊና ናንጊ ዒንጋያኬ።
\p
\v 21 ታ ናይዮቴ! ሜሌ'' ፆኦዞ ካኣሽኪሢዳፓ ዒንሢና ካፑዋቴ።