\id ZEC - MAALE Full Bible
\ide UTF-8
\h ዛካሪያሴ ማፃኣፖ
\toc1 ፆኦሲ ማሊፆ ኬኤዛ ዛካሪያሴ ማፃኣፖ
\toc3 ዛካ.
\toc2 ዛካሪያሴ ማፃኣፖ
\mt1 ዛካሪያሴ
\imt ዓይፆ ካሮ
\ip ፆኦሲ ማሊፆ ኬኤዛ ዛካሪያሴ ማፃኣፓ ላምዖ ቤሲ ፓቂንታ ማሊሢ ዓኣያኬ፤
\ip ፔታሳዛ ዓይሢ 1—8 ሄላንዳኣና ዓኣ ማሊፆኬ፤ ዬና ኪሪስቶሴ ሾይንታንዳሢኮ ቤርታ ዶንጎ ፄኤታና ላማታሚ ሌዔፓ ዴንዲ ዶንጎ ፄኤታና ታጶ ሳሊ ሌዔ ማዓ ጋሮይዳ ዱማ ዱማ ዎዴና ፆኦሲ ማሊፆ ኬኤዛ ዛካሪያሴ ኬኤዜ ባኣዚ ዓርቄያኬ፤ ዬያታ ፆኦሲ ማሊሢ ማዔም ኬኤዚንቴ ቃኣላ ፆኦሲ ፔጋሲ ዻዌ ጎይሢና ኬኤዚንቴያ ማዓዛ፥ ዬይ ኬኤዚንቴ ባካ ዬሩሳላሜኮ ጊንሣ ላሚ ዓካዺፆ፥ ጌኤዦ ማኣሮኮ ጊንሣ ማዢንቲፆ፥ ፆኦሲ ዴሮኮ ጎማፓ ጌኤሽኪፆንታ ሃጊ ሙካንዳ ሜሲሄ ዎዶ ዛሎዋ ኬኤዛያኬ።
\ip ላምዓሳዖ ዓይሢ 9—14 ሄላንዳኣና ዓኣ ቤዞይዳ ኬኤዚንቴ ባካ ዻካ ናጌዖ ኬኤዚንቴ ፆኦሲ ማሊሢ ዓርቄያኬ፤ ዬያታ ፆኦሲ ማሊሢ ማዒ ኬኤዚንቴ ቃኣላ ኬኤዛሢ ሃጊ ሙካንዳ ሜሲሄ ዛሎንታ ጋፒንፆና ዎጊንታንዳ ዎጎ ዛሎንታኬ።
\iot ማፃኣፔላ ዱማ ዱማ ዓርቄ ባኮ
\io1 ሜታ ዓኣያ ማዒፃ ላቲ ኬኤዚንቴሢና ሃጊ ሴካ ዎዛ ዓኣያ ማዒፆ (1፡1—8፡23)
\io1 ዒስራዔኤሌኮ ዓሺኖ ማዔ ዓጮይዳ ዎጊንታንዳ ዎጌ (9፡1-8)
\io1 ሃጊ ሴካ ዓኣ ዖርጎቹሞንታ ዎዛንታ ዛላ (9፡9—14፡21)
\c 1
\s1 ናንጊና ናንጋ ጎዳ ፔ ዴራ ዒዛ ባንሢ ማዓንዳጉዲ ዔኤሌሢ
\p
\v 1 ዳኣሪዮሴ ፓሪሴይዳ ካኣታዼንቴ ላምዓሳ ሌዖኮ ሳላሳ ዓጊኖና ዒዶኮ ናኣዚ፥ ባራኪዮ ናዖ ማዔ፥ ፆኦሲ ማሊፆ ኬኤዛ፥ ዛካሪያሴም ናንጊና ናንጋ ጎዳ ኬኤዜ ቃኣላ ያዺኬ፤ \x - \xo 1፡1 \xo*\xt ዒዝ. 4፡24—5፡1፤ 6፡14።\xt*\x* 
\v 2 ዛካሪያሴ ዴሮም ሂዚ ጌይ ኬኤዛንዳጉዲ ቢያ ባኮ ዎይሣ ጎዳ ማዔ ፆኦዛሢ ዓይሤኔ፦ «ታኣኒ፥ ናንጊና ናንጋ ጎዳ ዒንሢኮ ቤርታኣ ዓዶንሢ ዑፃ ሚርጌና ዻጋዼኔ፤ 
\v 3 ሃሢ ጋዓንቴ ታኣኒ ዒንሢም ሂዚ ጋዓኔ፦ ‹ታ ባንሢ ማዑዋቴ፤› ታኣኒያ ዒንሢ ባንሢ ማዓንዳኔ።
\p
\v 4 «ዒንሢኮ ቤርታኣ ዓዶንሢጉዲ ማዒፖቴ፤ ዔያቶም ሚና ታ ማሊፆ ኬኤዛ ዓሳ፦ ‹ዒንሢ ሃንታ ዎቦ ጎይፆና ፑርቶ ማዾናፓ ማዑዋቴ› ጌይ ላቲ ኬኤዚናኣኮኬ፤ ዒንሢኮ ቤርታኣ ዓዶንሢ ጋዓንቴ ዬያ ዋይዚባኣሴ፤ ታኣኮ ዓይሢፆዋ ካፒ ማዺ ኩንሢባኣሴ። 
\v 5 ሃሢ ዬያታ ዒንሢኮ ቤርታኣ ዓዶንሢ ዎካ ዓኣይ? ታ ማሊፆ ኬኤዛ ዓሶ ማዔቴያ ናንጊና ናንጋያዳ? 
\v 6 ጋዓንቴ ታ ዓይሎ ማዔ፥ ታ ማሊፆ ኬኤዛ ዓሶ ዛሎና ዒንሢኮ ቤርታኣ ዓዶንሢም ታ ዒንጌ ዎጎንታ ዓይሢፆንታ ካፖ ዒፂፆና ዔያቶ ሜታ ሄሊባይ? ዬያሮ ዔያታ ፔ ዻቢንቶ ዔሪ፦ ‹ቢያ ባኮ ዎይሣ ጎዳ ማዔ ፆኦዛሢ ማሌ ጎይፆጉዴያ ኑ ማዼ ማዾ ጎይፆና ኑ ሃንቴ ጎይፆናጉዴያ ኑጊዳ ዒዚ ዓጌ ሜታሢ ፒዜ ካራናኬ› ጌዔኔ።»
\s1 ፆኦሲ ማሊፆ ኬኤዛ ዛካሪያሴም ፔጋዺ ጴዼ ፓራሢ
\p
\v 7 ዳኣሪዮሴ ካኣታዼንቴ ላምዓሳ ሌዖና፥ ሼባፄ ጌይንታ ታጶ ፔታሳ ዓጊና ፄኤሬንቴ ላማታሚ ዖይዳሳ ኬሎና ዒዶ ናኣዚ ባራኪዮ ናይ ማዔ፥ ፆኦሲ ማሊፆ ኬኤዛ ዛካሪያሴም ናንጊና ናንጋ ጎዳ ሂዚ ጌይ ኬኤዜኔ። 
\v 8 ፆኦሲኮ ኪኢታንቻሢ ዞቄ ፓሮይዳ ዴይ ዓኣንቴ ታኣኒ ፔቴ ዋንቴና ዴንቄኔ። ዒዚ ዶኦጮይዳ ዓኣ ባርሴኔቴ ጌይንታ ሚፆ ባኣካ ዔቄኔ፤ ዒዛኮ ጊንፆይዳ ዞቄ፥ ዲንኪ ዞቄ፥ ሃሣ ጋላፒ ፓራ ዔቂ ዓኣኔ። \x - \xo 1፡8 \xo*\xt ዮሃ. ፆፔዻ 6፡2-8።\xt*\x* 
\v 9 ታኣኒ ዒማና፦ «ታ ጎዳሢዮ! ሃይ ፓራሢ ዓይጎ ማላቲ ዻዋያዳዖ?» ጌይ ፆኦሲ ኪኢታንቻሢ ኮይላ ዖኦጬኔ።
\p ዒዚ ማሃዖ፦ «ሃይ ፓራሢ ዓይጎ ማላታ ዻዋቴያ ታኣኒ ኔና ቤኤዛንዳኔ፤ 
\v 10 ዔያታ ሳዖ ሃንቲ ሙሪ ሙካንዳጉዲ ናንጊና ናንጋ ጎዳ ዳኬያኬ» ጌዔኔ። 
\v 11 ዔያታ ዒማና፦ «ሳዖ ኑ ቢያ ሃንቲ ሙሪ ዛጌኔ፤ ሳዓ ቢያ ሜታ ባኣያ ኮሺኬ» ጌይ ፆኦሲ ኪኢታንቻሢም ኬኤዜኔ።
\p
\v 12 ኪኢታንቻሢ፦ «ቢያ ባኮ ዎይሣ ጎዳሢዮ! ዬሩሳላሜንታ ዪሁዳ ካታሞ ቢያሢ ዑፆይዳ ኔ ዻጋዼንቴ ሃይሾ ላንካይታሚ ሌዔ ዓኣዼኔ፤ ኔኤኒ ዔያቶ ማኣሩዋኣሢ ዎማ ሄላንዳኣናዳዖ?» ጌይ ዖኦጬኔ።
\p
\v 13 ዬካፓ ናንጊና ናንጋ ጎዳ ታኣና ዎላ ጌስታ ኪኢታንቻሢም ኮሺ ዎዛሳ ዑኡሲና ዶዲሻ ጌኤሲያ ጌስቲ ማሄኔ። 
\v 14 ዬያሮ ኪኢታንቻሢ ታኣም ቢያ ባኮ ዎይሣ ጎዳ ማዔ ፆኦዛሢ ጋዓ ባኮ ሂዚ ጌይ ዼጊዲ ኬኤዜ ጌዔኔ፦ «ፂዮኔንታ ዬሩሳላሜንታ ታኣሮ ሌሊ ማዓንዳጉዲ ኮዓ ማሊሢና ዼኤፒ ናሹሞዋ ታኣኮ ዓኣኔ፤ 
\v 15 ኮሹሞ ዓኣያ ማዔም ሂርጋ ባኣያ ናንጋ ሜሌ ዴሮ ካኣቶ ዑፃ ሚርጌና ታኣኒ ዻጋዼኔ፤ ዓይጎሮ ጌዔቴ ታኣኒ ታ ዴሮይዳ ሜቶ ዓጊፆ ዻካሮ ሃሼ ዎዶና ዬያታ ካኣታ ታኣኮ ዴሮ ኮይሳሢፓ ዑሣ ፑርታ ጎይሢ ሜታሴኔ። 
\v 16 ዬያሮ ካታሜሎ፥ ዬሩሳላሜ ማኣራኒ ጊንሣ ታ ሺሪ ዒዞ ዛጋንዳኔ፤ ታኣኮ ጌኤዦ ማኣሮንታ ካታሜሎንታ ጊንሣ ዓካዺ ማዢንታንዳኔ።»
\p
\v 17 ፆኦሲ ኪኢታንቻሢ ጊንሣ ሃሣ፦ «ቢያ ባኮ ዎይሣ ጎዳ ካታማ ጊንሣ ዖርጎጫንዳጉዲ ማሃንዳሢ፥ ዬሩሳላሜ ካታሞዋ ሚናኣሲጉዲ ዒዚ ማኣዳንዳሢንታ ፔ ካታማ ማሂ ዒዚ ዶኦራንዳያ ማዔሢ ኬኤዜ» ጌዔኔ።
\s1 ፆኦሲ ማሊፆ ኬኤዛ ዛካሪያሴም ፔጋዺ ጴዼ ዖይዶ ጉራኒ
\p
\v 18 ሃሣ ፆኦሲ ታና ዖይዶ ጉራኒ ፔጋሲ ዻዌኔ፤ 
\v 19 ታኣና ዎላ ጌስታ ኪኢታንቻሢ ኮይላ ታኣኒ፦ «ሃንሢ ጉራኖንሢ ዓይጎ ማላታ ማዒ ዻዋቴያ ታኣም ኬኤዜ» ጌዔኔ።
\p ዒዚ፦ «ሃኣታ ጉራና ዪሁዳንታ ዒስራዔኤሌንታ ዬሩሳላሜንታ ዴሮ ዳውሲ ባይዜ ካኣቶኬ» ጌዔኔ።
\p
\v 20 ዬካፓ ናንጊና ናንጋ ጎዳ ሞቶሻ ኩጫ ዔኪ ዓኣ ዖይዶ ጊቶ ታና ዻዌኔ፤ 
\v 21 ታኣኒ ዒማና፦ «ሃንሢ ዓሳ ዓይጎ ማዻኒ ሙኬ ዓሲዳይ?» ጌይ ፆኦሲ ኪኢታንቻሢ ኮራ ዖኦጬኔ፤ ዒዚ ማሃዖ፦ «ዔያታ ሙኬሢ ዪሁዳ ሳዖ ጋፒሲ ባይዚ፥ ዴሮዋ ዳውሲ ፒፒንፂዴ ሜሌ ዴሮ ካኣቶኮ ካራ ባይዚ ዎዺ ኩርሳኒኬ» ጌዔኔ።
\c 2
\s1 ዛካሪያሴም ፆኦሲ ፔጋሲ ዻዌ ዋርቆ ዎዳሮ
\p
\v 1 ፔ ኩጫ ዋርቆ ዎዳራ ዔኪ ዓኣ ፔቴ ዓሲ ፆኦሲ ፔጋሲ ታና ዻዌኔ፤ 
\v 2 ታኣኒ፦ «ኔኤኒ ዎኒ ዴንዳይ?» ጌይ ዬያ ዓሢ ዖኦጬኔ፤ ዒዚ፦ «ዬሩሳላሜ ካታሞኮ ዖዶሱሞንታ ዳልጉሞንታ ዋኣዺታቴያ ታኣኒ ዋርቂ ዔራኒ ዴንዳኔ» ጌዔኔ።
\p
\v 3 ዬካፓ ታኣና ጌስታ ኪኢታንቻሢ ቤርቲም ሴካ ዴንዳንቴ ሜሌ ፆኦሲ ኪኢታንቾ ዒዛና ካኣማኒ ሙካያ ታ ዴንቄኔ። 
\v 4 ቤርታኣ ኪኢታንቻሢ ላምዓሲ ጴዼ ኪኢታንቻሢም፦ «ዋርቂ ዔሮ ዎዳሮ ዔኪ ዓኣ፥ ሃሴኬ ዼጌሢ ኮይላ ጳሽኪ ዴንዲ ‹ዬሩሳላሜይዳ ሚርጌ ዴሬንታ ቆልሞንታ ዓኣሢሮ ዼኤፒ ኬኤሌ ዲሢ ማዣኒ ሜቶኬ› ጌይ ኬኤዜ። 
\v 5 ናንጊና ናንጋ ጎዳ ፔኤሮ ካታሜሎኮ ዙሎይዳ ታሚ ዲሢ ማዒ ካፓንዳሢና ፔኤኮ ቦንቾናኣ ዒኢካ ፔጋዺ ናንጋንዳሢ ኬኤዜኔ» ጌዔኔ።
\s1 ሜሌ ዓጮ ዴንዲ ዓኣ ዓሳ ፔ ዓጮ ማዓንዳጉዲ ኬኤዚንቴሢ
\p
\v 6 ናንጊና ናንጋ ጎዳ፦ «ዓጮኮ ዖይዶ ዛሎ ቢያ ታ ዒንሢ ሃያኮ ቤርታ ዜርቂ ዳኬኔ፤ ሃሢ ጋዓንቴ ዓጮኮ ኬዶ ዛላፓ ዔቂ ቶላኒ ጳሽኩዋቴ። 
\v 7 ዒንሢ፥ ዳውሲንቲ ዴንዲ ባብሎኔይዳ ናንጋ ዓሳ ዬሩሳላሜ ማዒ ሙኩዋቴ» ጋዓኔ። 
\v 8 ዒንሢ ካኣማ ዓሲ ዒዛ ዓኣፖኮ ካርፆማ ሄላ ዓሲ ማዒ ዛጊንታንዳኔ። ዒዚ ታና ቦንቺሲ፥ ዒንሢ ቡሬ ዴሮዋ ማኪ ታ ጌስታንዳጉዲ ዳካኣና ታኣም ኬኤዜ ቃኣላ ያዺ ጋዓያኬ።
\p
\v 9 «ሃሢ ታኣኒ ታኣኮ ዎልቆ ዔያቶ ዻዋንዳኔ፤ ዔያታ ሃያኮ ቤርታ ዓይሌ ማሂ ሻንቂ ዔኪ ዎይሤ ዓሶ ኩጮ ጋሮ ዲዒንቲ ጌላንዳኔ፤ ዬካፓ ዒንሢያኣ ቢያ ባኮ ዎይሣ ጎዳ ታና ዳኬያ ማዔሢ ዔራንዳኔ።»
\p
\v 10 «ታኣኒ ሙኪ ዒንሢ ባኣካ ናንጋንዳሢሮ ዬሩሳላሜ ዴሬዮቴ! ታና ቦንቺ ዓይናዹዋቴ! ዎዛዺያ ዒላሹዋቴ!» ጋዓኔ ናንጊና ናንጋ ጎዳ።
\p
\v 11 ዬይ ያዺ ማዔ ዎዶና ሜሌ ዴሮፓ ሚርጌ ፃጲ ናንጊና ናንጋ ጎዳና ዎላ ማዒ ዒጊንታንዳኔ። ዒዚ ዔያቶ ባኣካ ናንጋንዳኔ፤ ታናኣ ዒንሢ ባንሢ ዳኬሢ ዒዛ ማዔሢ ዒንሢ ዔራንዳኔ። 
\v 12 ፆኦሲም ዱማዼ ሳዔሎይዳ ዓኣ፥ ዪሁዳ ፔ ዴኔ ማሂ ፆኦሲ ዔካንዳኔ፤ ዬሩሳላሜያ ጊንሣ ላሚ ፔኤሮ ማሂ ዒዚ ዶኦራንዳኔ።
\p
\v 13 ናንጊና ናንጋ ጎዳ ዒዛኮ ናንጎ፥ ጌኤዦ ማኣሮይዳፓ ሙካኒ ጊኢጊ ዔቄሢሮ ዓሲ ቢያ ዒዛ ቤርታ ዚቲ ጎዖንጎ።
\c 3
\s1 ቄኤሶ ሱኡጋሢ ዛሎ ፆኦሲ ዛካሪያሴም ፔጋሲ ዻዌ ባኮ
\p
\v 1 ዬካፓ ቄኤሶ ሱጋሢ፥ ዒያሱ ፆኦሲ ኪኢታንቻሢኮ ቤርታ ዔቂ ዓኣያ ናንጊና ናንጋ ጎዳ ታኣም ፔጋሲ ዻዌኔ፤ ዒማና ፃላሄ ዒያሱ ካሳሳኒ ዒዛኮ ሚዛቆ ዛላ ዔቂ ዓኣኔ። \x - \xo 3፡1 \xo*\xt ዒዝ. 5፡2፤ ዮሃ. ፆፔዻ 12፡10።\xt*\x* 
\v 2 ፆኦሲኮ ኪኢታንቻሢ ፃላሄ ኮይላ፦ «ሃይ ኔ ፃላሄ! ናንጊና ናንጋ ጎዳ ኔና ጎሮም! ዬሩሳላሜ ፔኤሮ ማሂ ዶኦሬ፥ ናንጊና ናንጋ ጎዳሢ ኔና ጎሮም! ሃይ ዓሢ ታሚ ጋውሌንቴ ባሺ ዓቲ ዓኣ ሚሢታሢ ኔ ዛጉዋይ» ጌዔኔ። \x - \xo 3፡2 \xo*\xt ዪሁ. 9።\xt*\x*
\p
\v 3 ዒያሱ ኪንቄ ዓፒላ ማኣዒ ፆኦሲ ኪኢታንቻሢ ቤርታ ዔቂ ዓኣኔ። 
\v 4 ፆኦሲኮ ኪኢታንቻሢ ዒዛም ዓይሢንቲ ማዻ ሃንጎ ኪኢታንቾ፦ «ዬያ ኪንቄ ማኣዓሢ ዒዛ ዑፃፓ ሺኢሹዋቴ!» ጌይ ዓይሤኔ፤ ዒማና ሃሣ ዒዚ ዒያሱ ባንሢ ሺራዖ፦ «ጎሞ ታ ኔኤኮ ኔጊዳፓ ሺኢሼኔ፤ ቃራ ኮሺ ማኣዖ ታ ኔና ማይሳንዳኔ» ጌዔኔ።
\p
\v 5 ዛካሪያሴ ዒማና፦ «ቶኦካኣ ዒዛኮ ጌኤሺ ዓፒላ ማሩዋቴራ» ጌዔኔ፤ ዔያታኣ ዓይሢንቴ ጎይፆማ ማዼኔ፤ ዒያሱ ዒማካ ዔቂ ዓኣ ጎይሣ ዓኣንቴ ፆኦሲኮ ኪኢታንቻ ዓኪ ማኣዖ ዒዛ ማይሴኔ።
\p
\v 6 ዒማና ፆኦሲ ኪኢታንቻሢ ዒያሱም፦ 
\v 7 «ቢያ ባኮ ዎይሣ ጎዳሢ ሂዚ ጋዓኔ፤ ኔ ሃንታ ሃንቲፃ ታ ጋዓ ጎይፆጉዲ ማዔቴ፥ ታ ኔና ዓይሤ ባኮ ቢያ ኔ ማዺ ኩንሤቴ፥ ታኣኮ ጌኤዦ ማኣሮ ኔ ቢታንቶና ኔ ዎይሣንዳጉዲ፤ ታኣኮ ዴራ ቡካ ጶኦኮይዳኣ ዼኤፑሞ ቢታንቶ ታ ኔኤም ዒንጋንዳኔ፤ ሃይካ ሃሢ ዔቂ ዓኣ ፆኦሲ ኪኢታንቾና ዎላ ኔ ማዻያ ታ ኔና ማሃንዳኔ። 
\v 8 ቄኤሶ ሱኡጋሦ፥ ዒያሱ! ዋይዜ፤ ዒንሢያኣ ዒዛና ዎላ ቄኤሴ ማዒ ማዻያ፥ ጊንሣ ሃሣ ሃጊ ሴካ ማዓንዳ ባኮኮ ማላታ ማዒ ዓኣ ዓሳ ሃያ ታ ጋዓሢ ዋይዙዋቴ፤ ‹ሚሢ ካኣፒ› ጌይንታ ታ ዓይላሢ ሃጊ ታኣኒ ዳካንዳኔ። \x - \xo 3፡8 \xo*\xt ዔር. 23፡5፤ 33፡15፤ ዛካ. 6፡12።\xt*\x* 
\v 9 ሃኣዛጉዋቴ፥ ታኣኒ ላንካይ ዓኣፒ ዓኣ ፔቴ ሹቺ ዒያሱ ቤርታ ጌሣንዳኔ፤ ዬይ ዎዚ ጌይሢታቴያ ዒኢካ ታኣኒ ቆኦቂ ፃኣፓንዳኔ፤ ሃኖ ዓጮኮ ጎሞ ፔቴ ኬሊና ታኣኒ ሺኢሺ፥ ጌኤሻንዳኔ። 
\v 10 ዬኖ ኬሎና ዒንሢ ፔቴ ፔቴሢ ዎይኖና ቤሌሶ ሚፆና ዴማ ዴዒ ዒንሢኮ ዓሺኖ ዔኤሊ ሙይ ዑሽኪ ዑሽኪ ዎዛዻንዳኔ።» ጋዓኔ ቢያ ባኮ ዎይሣ ጎዳሢ። \x - \xo 3፡10 \xo*\xt ሚኪ. 4፡4።\xt*\x*
\c 4
\s1 ፆኦሲ ዛካሪያሴም ፖዒ ጌሦ ሻርና ፔጋሲ ዻዌሢ
\p
\v 1 ታኣና ዎላ ጌስታ ፆኦሲ ኪኢታንቻሢ ላሚ ጊንሣ ሙኪ ጊንዓፓ ጴቾሢጉዲ ታና ጴቼኔ፤ 
\v 2 ዒዚ ዒማና፦ «ሃይ ኔኤም ጴዻ ባካ ዓይጌንዴዳይ?» ጌይ ታና ዖኦጬኔ።
\p ታኣኒ ዒዛም ማሃዖ፦ «ላንካይ ፖዒ ጊዳ ፖዓያ ፔቴ ዎርቄ ሻርና ታ ዴንቃኔ፤ ዑፆይዳ ጊንሣ ዛይቴ ዖቲ ጌሢንቲ ዓኣኔ፤ ላንካዎ ፖዖ ፖዓ ባኮንሢኮ ቢዖና ሻላ ዳኪንታንዳ ፂኢና ዓኣኔ። 
\v 3 ዬኖ ሻርኔሎኮ ኮይላ ላምዖ ዛይቴ ሪሚቲ ሚሢ ዖቴሎኮ ሻውሎና ሚዛቆናይዳ ጴዻኔ» ጌዔኔ። \x - \xo 4፡3 \xo*\xt ዮሃ. ፆፔዻ 11፡4።\xt*\x* 
\v 4 ታኣኒያ ታኣና ዎላ ጌስታ ፆኦሲ ኪኢታንቻሢ ኮይላ፦ «ታ ጎዳ! ሃይ ባካ ዓይጎኮ ኮኦኪንሢ ማዒ ዻዋ ባኣዚዳዖ?» ጌይ ዖኦጬኔ።
\p
\v 5 ዒዚ፦ «ሃይ ባካ ዓይጎታቴያ ኔኤኒ ዔሩዋዓዳ?» ጌዔኔ። ታኣኒ፦ «ዔይዔ፥ ታ ጎዳሢዮ! ታ ዔሩዋሴ» ጌዔኔ። 
\v 6 ዜሬባቡሌም ታኣኒ ኬኤዛንዳጉዲ ፆኦሲ ኪኢታንቻሢ ታኣም ኬኤዜ፥ ቢያ ባኮ ዎይሣ ጎዳሢኮ ቃኣላ ሂዚ ጋዓያኬ፦ «ኔኤኒ ባሻንዳሢ ታ ዓያኖናኬ፤ ዎልቄና ሃሣ ዶዱምናቱዋሴ። \x - \xo 4፡6 \xo*\xt ዒዝ. 5፡2።\xt*\x* 
\v 7 ኔ ቤርቶይዳ ዹካ ማዒ ዔቂ ዓኣ ዹቃሢ ቢያ ሺኢካንዳኔ፤ ጌኤዦ ማኣሮ ጊንሣ ኔኤኒ ማዣንዳኔ፤ ማኣሮ ሹጮና ኔኤኒ ማዣዖ ጋፒንፃ ኔኤኒ ጌሣ ሹጮ ጌሣኣና ዴራ፦ ‹ናይዮቴ፥ ሃይ ዎዚ ሚዛጳዖ! ፆኦሲ ሃያ ዓንጂንቴያ ማሆንጎ!› ጌይ ጌይ ዎዛዺ ዒላታንዳኔ።»
\p
\v 8 ጊንሣ ሃሣ ናንጊና ናንጋ ጎዳ ታኣም ሂዚ ጌዔኔ፦ 
\v 9 «ዜሬባቡሌ ናኣታ ሃያ ጌኤዦ ማኣሮ ማዢፆሮ ቤርታሳ ሹጮ ጌሢ ዓርቄኔ፤ ዔያታ ፔ ኩቻ ማዺ ኩኩርሳንዳኔ፤ ያዺ ማዓ ዎዶና ቢያ ባኮ ዎይሣ ጎዳሢ ታና ዒንሢ ባንሢ ዳኬያ ማዒፆ ዒንሢ ዔራንዳኔ። 
\v 10 ማኣሮኮ ፒዙሞ ሚፂ ዛጎ ዓንጎ ዜሬባቡሌ ኩጫ ዛጋዖ ዻካ ባኣዚ ማዺንቴ ኬሎ ቦሂ ቶኦቼ ዓሢ ዎዛዻንዳኔ፤ ሃንሢ ላንካዎ ፖዖንሢ ናንጊና ናንጋ ጎዳሢኮ ዓኣፖኬ፤ ዬይ ዓኣፓ ዓጮ ቢያ ማዔ ካራና ዛጋያኬ።» \x - \xo 4፡10 \xo*\xt ዮሃ. ፆፔዻ 5፡6።\xt*\x*
\p
\v 11 ታኣኒ ዒማና ጊንሣ፦ «ሃንሢ ፖዖ ጌሦ ሻርኖኮ ሻውሎና ሚዛቆናይዳ ዓኣ ዛይቶ ሪሚቶ ሚፆንሢ ዓይጎ ኮኦኪንሢ ዻዋያዳዖ? \x - \xo 4፡11 \xo*\xt ዮሃ. ፆፔዻ 11፡4።\xt*\x* 
\v 12 ሪሚቶ ዛይታ ሾኦታ ላምዖ ዎርቆ ፂኢኖንሢኮ ኮይላ ዓኣ ላምዖ ሪሚቶ ካኣፖንሢሾ፥ ዓይጎ ኮኦኪንሢ ዻዋያዳዖ?» ጌይ ፆኦሲ ኪኢታንቻሢ ዖኦጬኔ።
\p
\v 13 ዒዚ፦ «ሃይ ባካ ዓይጎታቴያ ኔኤኒ ዔሩዋዓዳ?» ጌዔኔ፤ ታኣኒ፦ «ታ ጎዳሢዮ! ታ ዔሩዋኣዋይ» ጌዔኔ።
\p
\v 14 ዒዚ ታኣም፦ «ሃኣታ ላምዓሢ ካኣቱሞም ፆኦሲ ዔያቶ ዶኦሜያ፥ ሳዖ ቢያይዳ ናንጊና ናንጋ ጎዳ ማዒ ዓኣሢም ዓይሢንቲ ማዻ ዓሲኬ» ጌዔኔ።
\c 5
\s1 ዛካሪያሴም ፆኦሲ ፔጋሲ ዻዌ ማሪንቴ ቢራኖ ማፃኣፖ
\p
\v 1 ላሚ ታ ሃሣ ዛጋንቴ ፔቴ ማሪንቴ ማፃኣፔ ዢባሬይዳ ዓኣዻያ ታኣኒ ዴንቄኔ፤ 
\v 2 ፆኦሲ ኪኢታንቻሢ ታ ኮይላ፦ «ኔኤም ዓይጌ ጴዻይ?» ጌይ ዖኦጬኔ፤ ታኣኒ ዒዛም፦ «ዖዶሱማ ላማታሚ ዋዻ፥ ዳልጉማ ታጶ ዋዻ ማዔ ፔቴ ማሪንቴ ቢራና ማፃኣፔ ዢባሬይዳ ዓኣዻያ ታኣም ጴዻኔ» ጌዔኔ።
\p
\v 3 ዒዚ ዒማና ታኣም፦ «ዬኖ ማሪንቴ ማፃኣፔሎይዳ ሳዖ ቢያ ሄላንዳ ጋዳማ ፃኣፒንቲ ዓኣኔ፤ ዬኖ ማሪንቴ ማፃኣፔሎኮ ፔቴ ዛሎይዳ፦ ‹ዉሲ ቢያ ዓጪፓ ባይቃንዳኔ› ጋዓያኬ፥ ባጎ ዛሎይዳ ሃሣ፦ ‹ሉኡቂ ጫኣቁሞ ጫኣቃ ዓሲ ቢያ ባይቃንዳኔ› ጋዓኔ። 
\v 4 ቢያ ባኮ ዎይሣ ጎዳ፦ ‹ሃያ ጋዳሞ ታኣኒ ዳካንዳኔ፤ ዬይ ጋዳማ ፔቴ ፔቴ ዉዞንታ ሉኡዙሞና ጫኣቃ ዓሶንታ ማኣሪ ጌላንዳኔ፤ ዬይ ዒኢካ ጌሊ ዴዒ ዔያቶኮ ማኣሮ ሙይ ሻሂ ባይዛንዳኔ› ጋዓኔ» ጌይ ኬኤዜኔ።
\s1 ፆኦሲ ዛካሪያሴም ኮታ ጋርካ ዓኣ ላኣሊ ፔጋሲ ዻዌያ
\p
\v 5 ፆኦሲ ኪኢታንቻሢ ላሚ ታ ኮይላ ሙኪ፦ «ዓካሪ፥ ሙካንዳ ባካ ዓይጎታቴያ ኮሺ ዛጌ!» ጌዔኔ።
\p
\v 6 ታኣኒ፦ «ሃይ ዓይጎ ባኣዚዳይ?» ጌዔኔ። ዒዚ፦ «ሳዖ ቢያይዳ ማዺንታ ጎሞ ኮኦኪንሢ ዻዋ ኮታኬ» ጌዔኔ።
\p
\v 7 ኮቴሎኮ ካሮ ጉኡፓ ዒርሳሴ ጌይንታ ዓንጎና ኮሾናያኬ፤ ታ ዛጋ ጎይሣ ዓኣንቴ ዬይ ካራ ቡሊንቴኔ፤ ዬኖ ኮቴሎ ጋራ ፔቴ ላኣሊስኬና ዴይ ዓኣኔ።
\p
\v 8 ፆኦሲ ኪኢታንቻሢ፦ «ሃና ላኣሌላ ዒኢቴ ማዾኮ ኮኦኪንሢ ማዓያኬ» ጋዓዖ፥ ሊካ ዺምዒ ኮቶ ጋሮ ዒዞ ጌልዜኔ፤ ዬካፓ ጊንሣ ካሮ ዒዞ ዑፃ ዎዼኔ። 
\v 9 ሌካ ዼግ ጌይ ታ ዛጋንቴ ላምዖ ላኣሊ ዢባሬይዳ ባራኒ ታ ባንሢ ሙካያ ታ ዴንቄኔ፤ ዔያቶኮ ጋኣዛ ኮኦኬ ጋኣሲጉዲ ዶዲኬ። ዔያታ ዬኖ ኮቴሎ ሳዓፓ ዔኪ ሌካ ጫሪንጮ ባራኒ ዴንዴኔ።
\p
\v 10 ታኣኒ ዒማና ታኣና ጌስታ ፆኦሲ ኪኢታንቻሢ ኮይላ፦ «ዔያታ ኮቶ ዎኒ ዔኪ ዴንዳዖ?» ጌይ ዖኦጬኔ።
\p
\v 11 ዒዚ፦ «ሴናዖሬ ዔኪ ዴንዳኔ፤ ዔያታ ዒኢካ ማኣሪ ማዢ፥ ማኣራ ማዢንቲ ጋፔስካፓ ኮቴሎ ዒኢካ ጌሣንዳኔ» ጌይ ታኣም ኬኤዜኔ።
\c 6
\s1 ፆኦሲ ዛካሪያሴም ፔጋሲ ዻዌ ዖይዶ ሳርጌላ ዖይታ
\p
\v 1 ሜሌ ሃሣ ዖይዶ ሳርጌላ ዖይታ ላምዖ ሞኦና ዓንጊ ዹካ ባኣካፓ ኬስካያ ታና ፆኦሲ ፔጋሲ ዻዌኔ። 
\v 2 ቤርታሳ ሳርጌሎ ዖይቴሎ ጎቻሢ ዞቄ ፓሮ ማዓዛ፥ ላምዓሳዞ ካርሢ ፓራ ጎቻኔ፤ \x - \xo 6፡2 \xo*\xt ዮሃ. ፆፔዻ 6፡4-5።\xt*\x* 
\v 3 ሃይሣሳዞ ጎቻሢ ቦኦሬ ፓሮኬ፤ ዖይዳሳዞ ዖዳላ ፓራ ጎቻኔ፤ ቢያ ፓራሢ ዎልቄና ዓኣያ ዶዲኬ። \x - \xo 6፡3 \xo*\xt ዮሃ. ፆፔዻ 6፡2።\xt*\x* 
\v 4 ታኣኒ ዒማና ታኣና ዎላ ጌስታ ፆኦሲ ኪኢታንቻሢ ኮይላ፦ «ታ ጎዳ! ሃይ ሳርጌሎ ዖይታ ዓይጎ ኮኦኪንሢ ዻዋያዳዖ?» ጌይ ዖኦጬኔ።
\p
\v 5 ዒዚ ታኣም፦ «ሃኣታ ዖይዶ ዢባሮኬ፤ ሳዖ ቢያኮ ናንጊና ናንጋ ጎዳሢ ቤርታ ዔቂ ዓይሢንቲ ማዻ ማዾፓ ሃሢ ዔያታ ሃጊ ኬስኮ ኬስካኔ» ጌዔኔ። \x - \xo 6፡5 \xo*\xt ዮሃ. ፆፔዻ 7፡1።\xt*\x*
\p
\v 6 ካርፆ ፓራሢ ጎቻ ሳርጌሎ ዖይታ ዓጮኮ ኬዴኖ ባንሢ፥ ቦኦሬ ፓራሢ ጎቻ ሳርጌሎ ዖይታ ዓባ ጌላ ባንሢ፥ ዖዳሎ ፓራሢ ጎቻ ሳርጌሎ ዖይታ ዾኦሎ ዛሎ ዓጮ ባንሢ ዴንዳኔ። 
\v 7 ዎልቆና ዓኣ ዬይ ፓራሢ ኬስኪ ዴንዳኣና ሳዖ ሙሪ ዛጎሮ ኮሺ ሩኡራኔ፤ ፆኦሲ ኪኢታንቻሢ ዔያቶ፦ «ዴንዱዋቴ፤ ሳዖ ሙሪ ዛጉዋቴ!» ጌይ ዓይሤኔ፤ ዬያሮ ዔያታ ዴንዲ ሳዖ ሙሪ ዛጌኔ። 
\v 8 ዬካፓ ፆኦሲ ኪኢታንቻሢ፦ «ዓጮኮ ኬዶ ዛሎ ዴንዴ ፓራሢ ናንጊና ናንጋ ጎዳሢኮ ዻጎ ሺሚሼኔ» ጌይ ታኣም ዒላቲ ኬኤዜኔ።
\s1 ዒያሱ ቶኦካ ዓጊንቴ ቦንቾ ባኮ
\p
\v 9 ናንጊና ናንጋ ጎዳ ታኣም ሂዚ ጌዔኔ፦ 
\v 10 «ሄልዳዬ፥ ፆቢያንታ ዪዳዒያ ጌይንታ ሜሌ ዓጫፓ ዳውሲንቲ ሙኬ ዓሳ ዒንጌ ቢሮ ዓንጎንታ ዎርቆንታ ዔኪ ሃሢ ኔጉዋዖ ሶፖኒያሴ ናኣዚ ዒዮሲያሴ ማኣሪ ዴንዴ፤ ዬይ ዓሳ ቢያ ባብሎኔ ዲዒንቲ ዔውቴዖ ማዔ ዓሶኬ፤ 
\v 11 ዔያታ ዒንጌ ቢሮ ዓንጎና ዎርቆናፓ ዔኪ ካኣቶ ቶኦካ ዓጎ ቦንቾ ባኮ ጉኡሪ ማሂ ኮሺጋፓ ፔቴማ ቄኤሶ ሱኡጋሢ፥ ዒዮሴዴቄ ናኣዚ ዒያሱ ቶኦካ ዓጌ። 
\v 12 ቢያ ባኮ ዎይሣ ጎዳሢ ሂዚ ጋዓኔ ጌይ ዒዛም ኬኤዜ፦ ‹ካኣፓ ዓኣ ቤዛ ዓኣዖ ጋምፒንቲ ዴንዳንዳሢሮ ሚሢ ካኣፒ ጌይ ሱንፆ ጌሦና ዓሢ ሃያኬ። ዓኣ ቤዛ ዓኣዖ ባቃሊ ዒ ዼኤፓንዳኔ፤ ፆኦሲኮ ጌኤዦ ማኣሮ ጊንሣ ዒ ማዣንዳኔ፤ \x - \xo 6፡12 \xo*\xt ዔር. 23፡5፤ 33፡15፤ ዛካ. 3፡8።\xt*\x* 
\v 13 ጌኤዦ ማኣሮኮ ሱኡጌ ማዒ ዎይሣንዳሢ ዒዛኬ፤ ካኣቱሞ ቦንቾ ዔኪ ካኣቶ ዖይታ ዴዒ ዎይሣንዳኔ፤ ቄኤሴ ማዒያ ማዻይ ዓኣኔ፤ ላምዓሢ ዎላ ዔኤዒ ኮሹሞና ናንጋንዳኔ።› 
\v 14 ካኣቶ ቶኦካ ዓጎ ቦንቾ ባኮኮ ዓቴዞንሢ ጌኤዦ ማኣሮይዳ ሄሌሜ ጌይንታ ሄልዳዬ፥ ፆቢያ፥ ዪዳዒያንታ ሶፖኒያሴ ናኣዚ ሄኔ ጌይንታ ዒዮሲያሴንታኮ ቦንቾ ጶቂሣያ ማዒ ዒኢካ ጌሢንታንዳኔ።»
\p
\v 15 ዬኖ ዎዶና ሃኬ ዓጮይዳ ናንጋ ዓሳ ናንጊና ናንጋ ጎዳኮ ጌኤዦ ማኣሮ ዓካሲ ማዦዋኣና ማኣዳኒ ሙካንዳኔ። ዬይ ጌኤዦ ማኣራ ዓካዺ ማዢንታዛ ቢያ ባኮ ዎይሣ ጎዳሢ ታና ዒንሢ ኮይላ ዳኬሢ ዒንሢ ዔራንዳኔ። ዬይ ቢያ ያዺ ማዒ ኩማንዳሢ ናንጊና ናንጋ ጎዳ ማዔ ዒንሢኮ ፆኦዛሢም ዒንሢ ጉቤ ዒናፓ ዓይሢንታያ ማዔቶኬ።
\c 7
\s1 ፒዜ ማዒባኣ ጎይሢና ሙኡዚ ሃሺ ሺኢጲፆ ፆኦሲ ኮዑዋያ ማዒፆ
\p
\v 1 ዳኣሪዮሴ ፓርሴ ዓጮይዳ ካኣታዼንቴ ዖይዳሳ ሌዖና ኪስሌዎ ጌይንታ ታዞጳሳ ዓጊና ፄኤሬንቴ ዖይዳሳ ኬሎና ናንጊና ናንጋ ጎዳ ዛካሪያሴም ሂዚ ጌይ ኬኤዜኔ፦ 
\v 2 ቤኤቴኤሌይዳ ናንጋ ዓሳ ሳርዔፄሬንታ ሬጌሜሌኬንታ ዔያቶና ዎላ ዓኣ ዓሶዋ ናንጊና ናንጋ ጎዳኮ ጌኤዦ ማኣሪ ዳኬኔ፤ ዬይ ዓሳ ዳኪንቴሢ ናንጊና ናንጋ ጎዳ ዓንጆ ሎፓ ኬይሳንዳጉዲ ሺኢቆም፤ ጊንሣ ሃሣ፥ 
\v 3 ቢያ ባኮ ዎይሣ ጎዳኮ ጌኤዦ ማኣሮይዳ ዓኣ ቄኤሶና ፆኦሲ ማሊፆ ኬኤዛ ዓሶ፦ «ሃይማ ሄላንዳኣና ሚርጌ ሌዔ ኑ ማዺ ናንጌ ጎይፆ ዶንጋሳ ዶንጋሳ ዓጊኖና ሙኡዚ ሃሺ ሺኢጲሢና ጌኤዦ ማኣሮኮ ሻሂንቲፆሮ ሲዬ ኑ ዓርቆም?» ጌይ ዖኦጫንዳጉዲኬ።
\p
\v 4 ዬካፓ ናንጊና ናንጋ ጎዳ ታኣም ሂዚ ጋዓ ቃኣላ ኬኤዜኔ፤ 
\v 5 ሃኖ ዓጮይዳ ናንጋ ዴሮ ቢያሢና ቄኤሶናም ሂዚ ጌዔ፦ «ሃያኮ ቤርታ ላንካይታሚ ሌዔ ቢያ ዶንጋሳ ዓጊኖና ላንካሳ ዓጊኖናይዳ ሙዖ ዒንሢ ሃሼሢንታ ሲዬ ሲዪፆንታ ታና ቦንቻኒዳ? 
\v 6 ዒንሢ ሙዖ ሙዋ ዎዶና፥ ሃሣ ዑዦ ዑሽካ ዎዶና ዒንሢ ሙይ ዑሽኬሢ ዒንሢ ቶኦኮምቱዋዓዳ?»
\p
\v 7 ዬሩሳላሜ ዓጫ ዖርጎጪ፥ ጊንሣ ሃሣ ዴሬያ ዺቢ ኩሜ ዎዶና፤ ዬያጉዲ ካታሞኮ ኮይሎይዳ ዓኣ ጉርዶይዳ ሌሊቱዋንቴ ዓጮኮ ዾኦሎ ዛሎና ዓባ ጌላ ባንፆናይዳ ዓኣ ጌሜሮ ዴማ ሚርጌ ዴሬ ናንጋ ዎዶና ናንጊና ናንጋ ጎዳ ፔ ማሊፆ ኬኤዛ ዓሶ ዛሎና ኬኤዜ ቃኣላ ዒማ ሃይማኬ።
\s1 ዋይዚ ዒፂፃ ዲዒንቲ ሜሌ ዓጪ ዓኣዺፆኮ ካራ ማዔሢ
\p
\v 8 ናንጊና ናንጋ ጎዳ ዛካሪያሴም ሂዚ ጌይ ኬኤዜኔ፦ 
\v 9 «ታኣኒ፥ ቢያ ባኮ ዎይሣ ጎዳሢ ታ ዴሮም ዓይሤ ዓይሢፃ ያዺኬ፤ ‹ፒዜ ዎጌ ዎጉዋቴ፤ ዎሊም ሴካና ሃንጋና ዓቶም ጌይሢና ሚጪንቲሢና ናንጉዋቴ፤ 
\v 10 ዒንሢ ባኣካ ናንጋ ዜኤሮ ዒንዶንሢ፥ ዜኤሮ ናኣቶ፥ ሜሌ ዓጪፓ ሙኪ ናንጋ ዓሶንታ ሜታዼ ዓሶንታ ሄርቂ ካራ ባይዚፖቴ፤ ፔቴይ ባጋሢም ጌኔ ማዾ ማዻኒ ማሊፖቴ።›
\p
\v 11 «ዔያታ ጋዓንቴ ዋይዞ ዒፂ ሴካ ሺሬኔ፤ ዋይዛዓ ጌይ ፔኤኮ ዋዮዋ ዓርቄኔ። 
\v 12 ዒኖ ፔኤኮ ዔያታ ሹቺጉዲ ዶዲሼኔ፤ ሃያኮ ቤርታ ታ ማሊፆ ኬኤዛ ዓሶ ዛሎና ታኣኒ፥ ቢያ ባኮ ዎይሣ ጎዳ ታ ዓያኖና ኬኤዜ ዎጎ ቢያ ዋይዙዋያ ዔያታ ማዔኔ፤ ዬያሮ ታኣኒ፥ ቢያ ባኮ ዎይሣ ጎዳሢ ዔያቶይዳ ሚርጌና ዻጋዼኔ። 
\v 13 ታኣኒ ኬኤዛዛ ዔያታ፦ ‹ኑ ዋይዛዓ› ጌዔሢሮ፥ ታኣኒያ ዔያታ ታና ሺኢቃኣና ዔያቶም ዋይዛዓኬ ጋዓኔ ቢያ ባኮ ዎይሣ ጎዳሢ። 
\v 14 ዓልጎ ዢባሬጉዲ ፒፂ ታኣኒ ዔያቶ ዔኪ ዔያታ ዔሩዋ፥ ፃንጎ ማዔ ዓጪዳ ዔያቶ ናንጊሼኔ፤ ሃና ኮዦ ሳዔላ ዒማና ዓይጎ ዓሲያ ናንጉዋያ ጉሪ ሳዓ ማዒ ዓቴኔ፤ ዬና ሚዛጶ ሳዔላኣ ጉሪ ዔዌ ቤሲ ማዒ ዓቴኔ።»
\c 8
\s1 ናንጊና ናንጋ ጎዳ ዬሩሳላሜ ጊንሣ ዓንጃኒ ጫኣቄ ጫኣቁሞ
\p
\v 1 ቢያ ባኮ ዎይሣ ጎዳሢ ታኣም ሂዚ ጌዒ ኬኤዜኔ፦ 
\v 2 «ዒኢካ ናንጋ ዴሮ ዒናፓ ታኣኒ ናሽካሢሮ ዬሩሳላሜ ታኣኒ ማኣዳኒ ኮዓኔ፤ ዒዞኮ ሞርኮ ዑፃ ዻጋና ታ ዔቃንዳጉዲ ማሄሢ ታኣኮ ዬያ፥ ዒዛ ታኣሮ ሌሊ ማዓንዳጉዲ ኮዒ ዒናፓ ናሽካ ታ ዒኖ ናሹሞኬ። 
\v 3 ታኣኒ ዒኢካ ናንጋንዳጉዲ ታኣም ዱማዼ፥ ታ ካታሞ፥ ዬሩሳላሜ ባንሢ ታኣኒ ጊንሣ ማዓንዳኔ፤ ጉሙርቂንታ ካታማ ማዒ ዒዛ ዔርታንዳኔ፤ ታኣኒ፥ ቢያ ባኮ ዎይሣ ጎዳሢ ናንጋ ዹካ፥ ፆኦሲም ዱማዼ ዹካ ጌይ ሱንሢ ጌታንዳኔ፤ 
\v 4 ዒኢካ ናንጋ ዓሳ ሚርጌ ሌዔ ናንጋያ ማዓንዳሢሮ ጋርቺ ባሺንቴ ዓሳ ኮኦሎና ሃንቲ ሃንቲ ዬሩሳላሜይዳ ዓሳ ቡካ ቤዛ ሙኪ ዴዓንዳኔ፤ 
\v 5 ካታሞኮ ሳዞይዳ ዓኣ ዳልጎ ዳልጎ ጎይፃ ቢያ ዓማሊ ዓማላ ዓቲንቄና ዉዱሮና ኩሚ ዓኣያ ጊንሣ ማዓንዳኔ።
\p
\v 6 «ዬይ ያዺ ማዓ ዎዶና ዴሮፓ ፒኢጫዺ ዓቲ ዓኣ ዓሶም ዬይ ዳንዳዒንቱዋ ባኣዚ ማሊ ጴዼቴያ ታኣም ዳንዳዒንቱዋያ ማዒ ዴኤፃ ባኣዚ ዓኣኖ? 
\v 7 ታኣኒ ታኣኮ ዳውሲንቲ ዴንዲ ዓጮኮ ዓባ ኬስካ ባንፆና ጌላ ባንፆናይዳ ናንጋ ዴሮ ማኣዲ ዓውሳንዳኔ፤ 
\v 8 ጊንሣ ታ ዔያቶ ማሂ ዔኪ ሙኪ ዬሩሳላሜይዳ ናንጊሻንዳኔ፤ ዔያታ ታ ዴሬ ማዓንዳኔ፤ ታኣኒያ ጎኑሞና ፂሉሞና ዒኢካ ዔኪ ሙኪ ዔያቶኮ ፆኦሲ ማዓንዳኔ።
\p
\v 9 «ቢያ ባኮ ዎይሣ ጎዳሢኮ ጌኤዦ ማኣሮ ጊንሣ ማዣኒ ዓይፆ ሹጫ ዾቂንቴያና ዒኢካ ዓኣ ታ ማሊፆ ኬኤዛ ዓሳ ዒንሢም ኬኤዜ ባኮ ዋይዜ ዓሳ፥ ዒንሢ ዶዱዋቴ ዒጊጪፖቴ! 
\v 10 ዬያኮ ቤርታ ዓሲ ማዺ ላቤሢኮ ጪጎ ባኣዚንታ ቆልማ ማኣዳ ማኣዲፆኮዋ ቆልሞ ዓዶንሢም ዒንጎ ባኣዚ ባኣያኬ፤ ዓሲ ቢያ ፔ ዓሺኖ ዒፂ ሞርኬ ማዓንዳጉዲ ታኣኒ ማሄሢሮ ዓይጎ ዓሲያ ማዖም ኮሺና ኬስኪ ጌሉዋሴ። 
\v 11 ሃሢ ጋዓንቴ ዬያ ዴሮፓ ፒኢጫዺ ዓቴ ዓሶ ዑፃ ቤርታ ታኣኒ ማዼ ጎይፆ ማዻዓኬ። 
\v 12 ሃኣኮ ዔያታ ፔኤኮ ኮሺና ዜርቂ፥ ዬይ ካፃዛ ዔኪ ኮና ዋሃንዳኔ፤ ዎይናኣ ዔያቶኮ ቃራ ዓኣፒ ዓኣፓንዳኔ፤ ሳዖ ሚሻ ዒርዚያ ዋርቃንዳሢሮ ሳዓ ሚርጌ ሃኣኮ ካፂሳንዳኔ፤ ዬያ ፒኢጫዺ ዓቴ ዴሮም ዬያ ዓንጆ ቢያ ታኣኒ ዒንጋንዳኔ። 
\v 13 ሜሌ ዴራ ጋዳንቂንቴ ዓሲ ማሂ ዛጋ፥ ዪሁዳንታ ዒስራዔኤሌ ዴሬዮቴ! ታኣኒ ዒንሢ ማኣዲ ዓውሳንዳኔ፤ ሜሌ ዓሶም ዓንጆኮ ካራ ዒንሢ ማዓንዳኔ፤ ዬያሮ ዒጊጪፖቴ! ዶዱዋቴ።»
\p
\v 14 «ዬያ ጌዔሢ ታና ቢያ ባኮ ዎይሣ ጎዳኬ፤ ዒንሢኮ ቤርታኣ ዓዶንሢ ታና ዻጋሴያና ቲኢሩዋኣዖ ሜቶ ታ ዔያቶይዳ ዓጋኒ ማሊ ቱኬኔ። 
\v 15 ዬሩሳላሜና ዪሁዳ ዴሮናም ኮሺ ባኣዚ ማዻኒ ማሊ ቱኪ ታ ዔቄሢሮ ዶዱዋቴ፥ ዒጊጪፖቴ። 
\v 16 ዒንሢ ማዻኒ ኮይሳ ባካ ዓይጎዳይ ጌዔቴ፦ ሴካና ሃንጋና ዎላ ጎኔ ባኣዚ ጌስቱዋቴ፤ ዒንሢ ዎጎ ዎጋ ቤዞይዳ ኮሹሞ ዓኣያ ማዓንዳጉዲ ፒዜ ዎጌ ዎጉዋቴ። \x - \xo 8፡16 \xo*\xt ዔፕ. 4፡25።\xt*\x* 
\v 17 ፔቴይ ባጋሢም ጌኔ ማዾ ማዻኒ ፑርታ ማሊሢ ማሎፓ፤ ሉኡዙሞ ጫኣቁሞ ጫኣቂፖቴ፤ ታኣኒ ዬያጉዴ ባኮ ቢያ ዒዒፃኔ» ጋዓኔ፥ ናንጊና ናንጋ ጎዳሢ።
\p
\v 18 ቢያ ባኮ ዎይሣ ጎዳሢ ታኣም ሂዚ ጌዔኔ፦ 
\v 19 «ዖይዳሳ ዓጊኖና፥ ዶንጋሶና፥ ላንካሶንታ ታጳሳ ዓጊኖንታይዳ ዒንሢ ካፒ ካፒ ሙዖ ሃሻ ኬላ ቢያ ዪሁዳ ዴሮም ኮሺ፤ ሃሣ ዎዛ ቦንቾ ኬሊ ማዓንዳኔ። ዒንሢ ጋዓንቴ ጎኔ ባኣዚና ኮሹሞና ኮዑዋቴ።»
\p
\v 20 ቢያ ባኮ ዎይሣ ጎዳሢ ሂዚ ጋዓኔ፦ «ሜሌ ዴሮንታ ሚርጌ ዺቦ ካታሞይዳ ናንጋ ዴራ ዬሩሳላሜ ባንሢ ዋኣሢጉዲ ጎዓንዳ ዎዴ ዬዓንዳኔ። 
\v 21 ፔቴ ካታማይዳ ናንጋ ዓሳ ሜሌ ካታሞይዳ ናንጋ ዓሶ ኮይላ ዴንዲ፦ ‹ሃኒ ዬውዋቴ! ቢያ ባኮ ዎይሣ ጎዳሢ ኮሺ ባኣዚ ኑም ማዻንዳጉዲ ኑ ዒዛ ሺኢቆም፤ ኑኡኒያ ሃሢ ዒኢካ ዓኣዺፆይዳኬ!› ጋዓንዳኔ። 
\v 22 ዬያይዲ ቢያ ባኮ ዎይሣ ጎዳሢም ዚጋኒና ዒዛፓ ዓንጆዋ ዔካኒ ሺኢጲሢሮ ሚርጌ ዓሲንታ ዎልቄና ዓኣ ዺቢ ዴሬያ ዬሩሳላሜ ሙካንዳኔ። 
\v 23 ዬንሢ ኬሎንሢዳ ሜሌ ዓጪ ዓሲ ታጶ ፔቴ ዓይሁዴ ዓሲኮ ማኣዓሢ ጎቺ ዓርቂ፦ ‹ፆኦሲ ዒንሢና ዎላታሢ ኑኡኒ ዋይዜሢሮ ሃዳራ ዒንሢና ኑ ዴንዶም› ጋዓንዳኔ።»
\c 9
\s1 ዒስራዔኤሌኮ ዓሺኖ ማዔ ሞርኮይዳ ፆኦሲ ዓጋኒ ጊኢጌ ሜቶ
\p
\v 1 ናንጊና ናንጋ ጎዳ ሃድራኬ ዓጮና ዴማስቆ ካታሞናይዳ ሜቶ ዓጋንዳኔ፤ ዒስራዔኤሌ ፃጶ ሌሊቱዋንቴ ሶኦሪያኮ ዼኤፖ ካታማኣ ናንጊና ናንጋ ጎዳም ማዓንዳኔ። \x - \xo 9፡1 \xo*\xt ዒሲ. 17፡1-3፤ ዔር. 49፡23-27፤ ዓሞ. 1፡3-5።\xt*\x* 
\v 2 ዬይ ሜታ ሃድራኬ ዓጮ ኮይላ ዓኣ ሃማቴና ሚርጌ ዔራቶ ዓኣ ፂሮሴና ሲዶና ካታሞይዳ ኬዳንዳኔ። 
\v 3 ፂሮሴ ፔና ካፓኒ፥ ዴይ ካፖ ዼጌ ቤሲ ዋርዲያ ማሂ ኮሼኔ፤ ሚርጉማ ዓጪጉዴ ሹቺ ቢራንታ ዎርቄንታኣ ቡኩሴኔ። 
\v 4 ጋዓንቴ ዒዛ ዬያ ቡኩሴ ባኮ ናንጊና ናንጋ ጎዳ ዒዞፓ ዔካንዳኔ፤ ባዞይዳ ዓኣ ዒዞኮ ዎልቆ ማዔ ባኮ ዒኢካ ዱኡኪ ዒ ባይዛንዳኔ፤ ካታሜላ ታሚና ሚቺንቲ ዲቢንሢ ማዓንዳኔ። \x - \xo 9፡4 \xo*\xt ዒሲ. 23፡1-18፤ ሂዚ. 26፡1—28፡26፤ ዒዩ. 3፡4-8፤ ዓሞ. 1፡9-10፤ ማቲ. 11፡21-22፤ ሉቃ. 10፡13-14።\xt*\x*
\p
\v 5 ዓስቄሎና ካታማ ዬያ ዛጋዖ ዲቃቲ ዒጊጫንዳኔ፤ ጋኣዛ ካታማኣ ዬያ ዛጋዖ ዎኦቶንዶ ካራ ባይዛንዳኔ፤ ዔቆሮኔያ ዬያጉዲ ሃጋኣ ዎዛ ባኣያ ማዓንዳኔ፤ ጋኣዛ ካታማኣ ካኣቲ ባኣያ ማዓንዳኔ፤ ዓስቄሎና ካታማ ዓሲ ናንጉዋ ጉሪ ቤሲ ማዒ ዓታንዳኔ። \x - \xo 9፡5 \xo*\xt ዒሲ. 14፡29-31፤ ዔር. 47፡1-7፤ ሂዚ. 25፡15-17፤ ዒዩ. 3፡4-8፤ ዓሞ. 1፡6-8፤ ሶፖ. 2፡4-7።\xt*\x* 
\v 6 ዔሽዶዴይዳ ሲኢሪንቴ ዴሬ ናንጋንዳኔ፤ ናንጊና ናንጋ ጎዳ ሂዚ ጋዓኔ፦ «ሃኣቶ፥ ዖቶርቃ ፒሊስፄኤሜ ዓሶ ታኣኒ ዻውሲሳንዳኔ፤ 
\v 7 ሱጉሢ ጊዳ ዓኣ ዓኣዔ ዓሽኮ፥ ጊንሣ ሃሣ ዳምቦ ጎይፆና ሙይንቱዋጉዲ ላኣጊንቴ ሙዖ ዔያቶ ዻንጋፓ ታኣኒ ኬሲሳንዳኔ፤ ዔያቶፓ ፒኢጫዺ ዓቴ ዓሳ ታ ዓሶና ዎላ ሲኢሪንቲ ዪሁዳ ፃጶይዳ ፔቴ ቶኦኪ ማዓንዳኔ፤ ዔቅሮኔ ዴራ ዓዳ ዒያቡሳ ዓሶጉዲ ዴሮና ዎላ ሲኢሪንታንዳኔ። 
\v 8 ዬካፓ ታ ዓጮኮ ዓጮ ታኣኒ ዋርዲ ዔቂ ካፓንዳኔ፤ ዓጮ ዎልቄና ጌሊ ዓርቃ ዎልቆ ዓሳ ዒኢና ዴንዱዋጉዲ ታኣኒ ላኣጋንዳኔ። ታኣኮ ዴራ ዎማዺ ዋኣዬቴያ ታኣኒ ዛጌሢሮ ሃይካፓ ሴካ ዎልቆና ሄርቂ ዎይሣ ዓሳ ዔያቶ ዎልቄና ጌሊ ዓርቃዓኬ።»
\s1 ሃጊ ሙካኒ ዓኣ ፂዮኔ ካኣታሢ
\q
\v 9 ፂዮኔ፥ ዎዛዼ!
\q2 ዬሩሳላሜ፥ ዎዛና ዒሊሼ!
\q ሃይሾ፥ ኔኤኮ ካኣቲ ኮሹሞና ሼሌዔ ማዒ
\q2 ሃሬሎ ዑፃ፥ ጌይፃ ሃሮ ናዖ ዑፃ ዴይ
\q2 ዎልቄና ባሻያ ማዒ ኔ ባንሢ ሙካኔ። \x - \xo 9፡9 \xo*\xt ማቲ. 21፡5፤ ዮሃ. 12፡15።\xt*\x*
\q
\v 10 ናንጊና ናንጋ ጎዳ ሂዚ ጋዓኔ፦
\q2 «ታኣኒ ሳርጌሎ ዖይቶ ዒስራዔኤሌፓ
\q2 ዖሎ ፓራሢያ ዬሩሳላሜፓ ዔኪ ሺኢሻንዳኔ፤
\q2 ዖሎ ዖላ ሂኢዦዋ ታኣኒ ሜንሣንዳኔ፤
\q2 ኔኤኮ ካኣቲ ሜሌ ዴሮ ባኣካ ዴይ
\q2 ኮሹሞ ሳዖይዳ ዔኪ ዬዓንዳኔ፤
\q2 ዒ ዎይሣ ዓጮኮ ዛጳ ባዛፓ ዴንዲ ሜሌ ባዞ ሄላንዳኣና
\q2 ዔፕራፂሴ ዎራፓ ዓርቃዖ ዴንዲ
\q2 ዓጮኮ ጋፒንፆ ሄላያ ማዓንዳኔ።» \x - \xo 9፡10 \xo*\xt ዓይኑ. 72፡8።\xt*\x*
\s1 ናንጊና ናንጋ ጎዳኮ ዴራ ዲዒንቲ ዴንዴ ዓጫፓ ማዓንዳሢ
\q
\v 11 «ዒንጎ ባኣዚ ማዒ ዒንጊንቴ ሱጉሢና ታ ኔኤም ጫኣቄሢሮ
\q2 ዋኣፃባኣ ጉሮ ዔታ ኔኤኮ ቱኡቲ ዓኣ ዓሶ ታኣኒ ኬሳንዳኔ። \x - \xo 9፡11 \xo*\xt ኬሲ. ማፃ 24፡8።\xt*\x*
\q
\v 12 ዒንሢ፥ ሃጋኣ ዎዛ ዴንቄ፥ ቱኡዞ ዓሳ!
\q2 ታኣኒ ቤርታ ዒንሢኮ ዓኣሢፓ ጳንጬ ማሂ ሃኖ ዒንሢም ዒንጋንዳሢሮ
\q2 ዒኢካ ዴዒ ካታሞ ዒንሢኮ ካፖ ዼጌ ቤዞ ባንሢ ማዑዋቴ።
\q
\v 13 ዪሁዳ ታኣኒ ሂኢሺ ጎይሢ
\q2 ዒስራዔኤሌ ጊንሣ ሃሣ ዓኣዛ ማሂ ዔያቶና ዖላንዳኔ፤
\q ጊሪኬ ዓጮ ዓቲንቆ ዖላኒ
\q2 ፂዮኔፓ ዓቲንቆ ናኣቶ ጬንቻ ዓራፖ ማሂ ታኣኒ ዳካንዳኔ።»
\b
\q
\v 14 ናንጊና ናንጋ ጎዳ ዴሮ ዑፃ ማዒ ፔጋዺ ጴዻንዳኔ፤
\q2 ዒዛኮ ዓኣዛ ዜኤሊንሢጉዲ ፖዒ ዴንዳያ ማዓንዳኔ፤
\q ናንጊና ናንጋ ጎዳ ማዔ ፆኦዛሢ ዛዬ ዋርቃንዳኔ፤
\q2 ዓጮኮ ዾኦሎ ዛላፓ ቱሮ ሙካ ዓልጎ ዢባሬጉዲ ዢባርሺ ዴንዳንዳኔ።
\q
\v 15 ቢያ ባኮ ዎይሣ ጎዳሢ ፔ ዴሮ ዛሎ ዖልታንዳኔ፤
\q2 ዒዛኮ ዴራ ፔ ሞርኮ ዎዺ ባይዛንዳኔ፤
\q2 ሞርኮኮ ዎሮ ሹዎ ቶኪና ሄርቃንዳኔ፤
\q2 ዔያታ ዖሎይዳ ማሢንቴ ዓሲ ጎይሢ ሜርታንዳኔ፤
\q2 ዔያቶ ሞርኮኮ ሱጉፃ ፆኦሲም ዒንጋኒ ሳኣኔይዳ ኩንሢ ዔኪ ዬይ
\q2 ዒንጎ ባኮ ዒንጎ ቤዞይዳ ዋሂንታ ሱጉሢጉዲ ሾኦታንዳኔ።
\b
\q
\v 16 ዬና ኬላ ሄላኣና ቆልሞ ሄንቃሢ ቆልሞ ፔኤኮ ሙዓ ቦዖይዳፓ ዓውሳሢጉዲ
\q2 ናንጊና ናንጋ ጎዳ ማዔ ዔያቶኮ ፆኦዛሢ ፔ ዴሮ ዓውሳንዳኔ።
\q2 ቦንቾሮ ቶኦካ ዓጎ ባኮይዳ ጳርቂ ኮሾና ዓንጋ ፖዓሢጉዲ
\q2 ዔያታ ፔኤኮ ናንጊና ናንጋ ጎዳሢኮ ዓጮይዳ ፖዓያ ማዓንዳኔ።
\q
\v 17 ዓጬሎኮ ኮሹሞና ሚዛጱሞና ዎዚ ሄርሺሳያ ማዓንዳይ!
\q2 ዒኢካ ዓኣያ ማዓንዳ ሃኣኮንታ ዎይኖ ዑዦንታ
\q2 ዓቲንቆንታ ዉዱሮ ዼጌሢንታኮ ዑፆ ሚዛጲሳያ ማዓንዳኔ።
\c 10
\s1 ናንጊና ናንጋ ጎዳ ዴሮ ዓውሳኒ ማሌ ማሊፆ
\p
\v 1 ናንጊና ናንጋ ጎዳ ዒንሢም ሃቻቡሮ ዒርዚ ዋርቂሳንዳጉዲ ዒዛ ሺኢቁዋቴ፤ ዒርዚና ዓኣ ሻኣሬ ዳካሢ ናንጊና ናንጋ ጎዳኬ፤ ዒርዚንታ ዱማ ዱማ ባቃላ ባኮዋ ባቃልሳሢ ዒንጋሢ ዒዛኬ። 
\v 2 ሜሌ ፆኦዛ ፓሡዋ ባኣዚ ኬኤዛኔ፤ ዦዋኣ ሉኡዙሞ ባኣዚ ዴንቄኔ ጌይ ኬኤዛኔ፤ ማቂሢ ዓውቲያ ዓውታዼኔ ጌይ ጌስታኔ፤ ዔያታ ዓሶኮ ዒኖ ዶዲሻሢያ ጉሪ ማዔ ባኣዚናኬ፤ ዬያሮ ዴራ ሄንቃ ዓሲባኣ ማራይጉዲ ዣኣሊ ካራ ባይዜኔ።
\p
\v 3 ናንጊና ናንጋ ጎዳ ሂዚ ጋዓኔ፦ «ታኣኮ ዼኤፖ ዻጋ ታ ዴሮ ሄንቃ ሱኡጎ ታሚጉዲ ሙዓንዳኔ፤ ታኣኒ፥ ቢያ ባኮ ዎይሣ ጎዳሢ ታ ቆልሞ ማዔ ዪሁዳ ዴሮ ዓውሳኒ ኮዓሢሮ ዔያቶኮ ሱኡጎይዳ ሜቶ ታኣኒ ዓጋንዳኔ፤ ዪሁዳ ዴሮ ዖሊ ባሼ ዶዲ ፓሮ ታኣኮ ታ ማሃንዳኔ። 
\v 4 ዪሁዳ ዴሮ ባኣካፓ ሹዎና ማዦ ማኣራ ዎላ ካኣማ ካራ ጌሦ ሹጮጉዴ፥ ዓፒሎና ማዦ ማኣሮ ዾቆ ዓንጎጉዴ፥ ዖልዚ ዖሎ ሂኢሺጉዴ ሱኡጌንታ ዖሎ ዓሶ ዓይሣ ቢቲያ ኬስካንዳኔ። 
\v 5 ዪሁዳ ዴራ ፔኤኮ ሞርኮ ጎይሢ ዾቃሌጉዲ ሄርቂ ዳኣፃ፥ ዶዲ ዖልዚ ዓሲ ማዓንዳኔ፤ ናንጊና ናንጋ ጎዳኣ ዔያቶና ዎላታሢሮ ዔያታ ዶዲ ዖሊ፥ ፓራሢና ዖልታ ዎልቆና ዓኣ ዓሶ ባሻንዳኔ።»
\b
\q
\v 6 «ታኣኒ ዪሁዳ ዴሮ ዖልዚ ዖላ ዶዲ ዓሲ ማሃንዳኔ፤
\q2 ዮሴፔ ማኣሮዋ ታኣኒ ዓውሳንዳኔ፤
\q ታኣኒ ዔያቶ ሚጪንቲ ቲኢራንዳሢሮ ቢያሢ ፔ ዓጮ ዓጮ ታ ማሃንዳኔ፤
\q2 ሃያኮ ቤርታ ፔቴታዖ ታ ዔያቶ ኬኤሪ ቤቂባኣያ ዔያታ ማዓንዳኔ፤
\q ታኣኒ ናንጊና ናንጋ ጎዳ ዔያቶኮ ፆኦሲ ማዔሢሮ
\q2 ሺኢጲፆ ታ ዔያቶኮ ዋይዛንዳኔ።
\q
\v 7 ዔፕሬኤሜ ዴራ ዖልዚ ዖላ ዶዲ ዓሲ ማዓንዳኔ፤
\q2 ዎይኔ ዑሺ ዑሽኬ ዓሲጉዲያኣ ዔያታ ዎዛዻያ ማዓንዳኔ፤
\q2 ዔያቶኮ ናኣታኣ ዬያ ባሺፆ ጶቂሢ ጶቂሢ ዎዛዻንዳኔ፤
\q2 ናንጊና ናንጋ ጎዳሢ ማዼ ባኮሮዋ ዔያታ ዎዛዻንዳኔ።»
\b
\q
\v 8 «ታ ዴሮ ታኣኒ ታ ባንሢ ዉቲ ዔኤሊ
\q2 ፔቴይዳ ቡኩሳንዳኔ፥ ታ ዔያቶ ዓውሳንዳኔ፤
\q2 ሃያኮ ቤርታ ዔያታ ዓኣ ጎይፆ ፓይዶ ታ ዔያቶኮ ሚርጊሻንዳኔ።
\q
\v 9 ሜሌ ዴሮ ባኣካ ታኣኒ ዔያቶ ዜርቄያ ማዔቴያ
\q2 ዔያታ ናንጋ ሃኬ ዓጮይዳ ዓኣዖ ታና ጶቂሣንዳኔ፤
\q2 ዔያቶንታ ዔያቶኮ ናኣቶንታ ሼምፔና ዓኣያ ማዒ ፔ ዓጮ ማዓንዳኔ።
\q
\v 10 ጊብፄ ዓጫፓ ታ ዔያቶ ማሂ ዔኪ ዬዓንዳኔ፤
\q2 ዓሶኦሬፓኣ ዔኪ ዬይ ታ ዔያቶ ቡኩሳንዳኔ፤
\q2 ሳዓ ኩሜም ቤሲ ዔያቶኮ ባይቃንዳሢሮ
\q2 ጌሌዓዴንታ ሊባኖኦሴ ዓጮንታይዳኣ ታ ዔያቶ ዴይሣንዳኔ።
\q
\v 11 ዼኤፖ ሜቶ ባዞ ባኣኪና ዔያታ ዴንዳኣና
\q2 ታኣኒ፥ ናንጊና ናንጋ ጎዳ ዒኢካ ዔቃ ባዞ ጉዳሢ ጎሪ ዚቲዳንዳኔ፤
\q2 ዔታዼ ቁልቦይዳ ዴዒ ዓኣ ዓባዬ ዎሮ ዋኣፃኣ ሚጫንዳኔ፤
\q ዖቶሬላ ዓሶኦሬ ዻውሲንታንዳኔ፤
\q2 ጊብፄያ ካኣታቲ ዎይሣ ዎይሢፃፓ ኬዳንዳኔ።
\q
\v 12 ታኣኒ፥ ናንጊና ናንጋ ዔያቶኮ ጎዳሢ ዔያቶ ዶዲሻንዳኔ፤
\q2 ታ ሱንፆና ዔያታ ዖቶርቃንዳኔ።»
\q ዬያ ጌዔሢ ታና፥ ናንጊና ናንጋ ጎዳኬ።
\c 11
\s1 ዒስራዔኤሌ ዓሶኮ ሞርካ ሜቶይዳ ኬዴሢ
\q
\v 1 ሊባኖኦሴ!
\q2 ኔኤኮ ዴኤሎ ዚቢቆ ሚፆ ታሚ ሙዓንዳጉዲ
\q2 ካሮ ቡሊ ሃሼ!
\q
\v 2 ሊባኖኦሴይዳ ዓኣ ሚፃ ዶዔሢሮ ዒንሢ ዚቢቆ ሚፃ፦
\q2 «ኑና ዎኦ!» ጌይ ቃዩዋቴ፤
\q2 ዒጊቻያ ማዔ ዼኤፖ ሚፃ ቢያ ባይቄኔ፤
\q ዲም ጌዔ ዴኤሎ ካያ ቲቂንቲ ጋፔሢሮ ዒንሢ ባኣሳኔ ሻኣቢዮቴ፦
\q2 «ኑና ዎኦ!» ጌይ ጌይ ዒንሢና ቃዩዋቴ።
\q
\v 3 ቆልሞ ሄንቃ ዓሶኮ ቆልሞ ሄንቆ ኮዦ ቤዛ ዱጊንቲ ባይቄሢሮ
\q2 «ኑና ዎኦ!» ጌይ ጌይ ቃያያ ዋይዚንቴኔ፤
\q2 ዮርዳኖሴ ዎሮ ዓጫ ዓኣ
\q2 ዔያቶኮ ናንጊ ቤሲ ማዔ ዴኤላ ጲሺንቲ ኩዴሢሮ
\q2 ዞባ ዖዪ ጉዻያ ዋይዚንቴኔ።
\s1 ቆልሞ ሄንቃ ላምዖ ዓሲ
\p
\v 4 ናንጊና ናንጋ ጎዳ ማዔ ታ ፆኦዛሢ ታኣም ሂዚ ጌዔኔ፦ «ሹኪንታኒ ጊኢጊንቴ ማራቶ ሄንቃኒ ኬሴ። 
\v 5 ዬያቶ ማራቶ ሻንቄ ዓሳ ሹካንዳኔ፥ ጋዓንቴ ዬያ ሹኬ ዓሶ ሜታ ሄላዓኬ፤ ዔያቶ ሻንቼ ዓሳኣ ‹ናንጊና ናንጋ ጎዳሢ ጋላቲንቶም! ኑ ዖርጎጬኔ› ጋዓንዳኔ፤ ሄንቃ ዓሳኣ ዔያቶ ሚጪንታዓኬ።»
\p
\v 6 ናንጊና ናንጋ ጎዳሢ ሂዚ ጋዓኔ፦ «ታኣኒያ ሃካፓ ሴካ ሳዖይዳ ናንጋ ዓይጎ ዓሲማኣ ማዖም ሚጪንታዓኬ፤ ታኣኒ ታ ቶኦኪና ፔቴ ፔቴ ዓሶ ፔ ዓሺናሢም፥ ሃሣ ካኣቲ ማዒ ዎይሣሢ ኩጫ ዓኣሢ ዒንጋንዳኔ፤ ዬያታ ዓሺኖንታ ካኣቶንታ ዬያ ሳዖ ባይዛንዳኔ፤ ታኣኒ ዬያቶ ኩጫፓ ዬኖ ዓሶ ዓውሳዓኬ።»
\p
\v 7 ዬያሮ ሹካኒ ዱማሶና ማራቶ፤ ባሼ ካራ ባይዚ ሜታሶና ቆልሞ ታኣኒ ሄንቃያ ማዓኔ። ዒማና ታኣኒ ላምዖ ኮኦሎ ዔኪ፥ ፔቴ ኮኦላሢ ሱንፆ «ዎዛሴ» ጌይ ጌሢ፥ ባጋሢ ሱንፆ «ፔቱሞ» ጌዔኔ። 
\v 8 ፔቴ ዓጊኒ ጋርካ ዬያቶ ማራቶ ሄንቃ ሃይሦ ዓሶ ታኣኒ ዳውሲ ዳኬኔ፤ ዒማና ማራታ ታና ዒፄኔ፥ ታኣኒያ ዔያቶ ሼናዼኔ። 
\v 9 ዬካፓ ታኣኒ ቆልሞም ሂዚ ጌዔኔ፦ «ሃይካፓ ሴካ ታኣኒ ዒንሢ ሄንቃዓኬ፤ ሃይቃሢ ሃይቆንጎ፤ ባይቃሢያ ባባይቆንጎ፤ ዓቲ ዓኣ ቆልማ ዎሊ ጋኣሺ ሙይ ባይቆንጎ፤» 
\v 10 ሄሊሳዖ «ዎዛሴ» ጌይ ታኣኒ ሱንፆ ጌሤ፥ ኮኦላሢ ታኣኒ ዔኪ ሜንሤኔ፤ ዬያ ታኣኒ ማዼሢ ናንጊና ናንጋ ጎዳና ዎላ ታ ጫኣቄ ጫኣቁማ ሃሺንቴያ ማዔሢ ዔርዛኒኬ። 
\v 11 ዬያ ጎይፆና ፆኦሲ ጫኣቄ ጫኣቁማ ዒማ ኬላ ሃሺንቴኔ፤ ዬያ ታኣኒ ማዻኣና ዔቂ ዛጋ ማራቶ ኮርማ ዓሳ ናንጊና ናንጋ ጎዳ ቃኣሎ ዬያይዲ ኬኤዜሢ ዔሬኔ። 
\v 12 ታኣኒ ዒማና፦ «ዒንሢ ናሽኬቴ ታኣም ኮይሳ ሚኢሾ ዒንጉዋቴ፤ ዒፄቴ ሃሹዋቴ» ጌዔኔ፤ ዔያታ ታኣኒ ማዼሢ ዛሎ ሃይሢታሚ ሹቺ ቢራ ታኣም ጪጌኔ። \x - \xo 11፡12 \xo*\xt ማቲ. 26፡15።\xt*\x*
\p
\v 13 ናንጊና ናንጋ ጎዳሢ ታኣም፦ «ጌኤዦ ማኣሮይዳ ሚኢሾ ጌሦ ሳኣፂና ዓጌ» ጌዔኔ። ዬያሮ ታኣኒ «ማዺንቴ ማዾ ዛሎኮ ጊዳ ሚኢሼኬ» ጌይ ታኣም ዔያታ ዒንጌ ሃይሢታሞ ሹዎ ቢሮ ዔኪ ማንዚኮ ዖቶ ጋራ ዓጌኔ። \x - \xo 11፡13 \xo*\xt ማቲ. 27፡9-10።\xt*\x* 
\v 14 ዬካፓ ሃሣ «ፔቱሞ» ጌይ ታኣኒ ሱንፆ ጌሤ፥ ላምዓሳ ኮኦላሢ ሜንሤኔ፤ ዬያ ታኣኒ ማዼሢ ዪሁዳና ዒስራዔኤሌና ባኣካፓ ዎሊኮ ጌርሲንሢ ማዒ ናንጎ ናንጋ ባይቄሢ ዔርዛኒኬ።
\p
\v 15 ዬያ ታኣኒ ማዼስካፓ ናንጊና ናንጋ ጎዳ ታኣም ሂዚ ጌዔኔ፦ «ሃሣ ጊንሣ ማኣዳ ባኣዚባኣ ቆልሞ ሄንቃ ዓሲ ማዻ ጎይሢ ማዼ፤ 
\v 16 ሳዔሎይዳ ናንጋ ታኣኮ ቆልሞ ሄንቃንዳ ሄንቃ ዓሲ ታኣኒ ዶኦራንዳኔ፤ ጋዓንቴ ዬይ ዓሢ ዬያይዶ ሃሺ ባይቄ ቆሎ ዛሎ ሜታዺ ማሉዋያ፥ ዣኣሌ ቆልሞ ኮዑዋያ፥ ሜቄ ቆልሞዋ ኮኦሉዋያ፥ ዋሊ ዓኣ ቆልሞም ዖሃ ዓጉዋያ ማዓንዳኔ፤ ዒዚ ዬያይዶ ሃሻዖ ቃራዺ ዲጬዞንሢ ሹኪ ሹኪ ሙዓንዳኔ፤ ሹቁሎዋ ዓይሱዋዖ ዒ ቆፂ ሙዓንዳኔ። 
\v 17 ቆልሞም ሚጪንቶ ዒፄ፥ ዬያጉዴ ፓሡዋያ ማዔ ሄንቃ ዓሣሢም ባዴዔ! ዒዛኮ ቃሶንታ ሚዛቆ ዓኣፖንታ ጬንቻ ዓራፖና ጫቶም፤ ቃሳ ዒዛኮ ጋፒንሢ ሜሊ ዞሌያ ማዖም፤ ሚዛቆ ዓኣፓ ዒዛኮ ጋፒ ባይቆም።»
\c 12
\s1 ዬሩሳላሜኮ ሞርካ ዖሎና ኩዳንዳያ ማዒፃ ኬኤዚንቴሢ
\p
\v 1 ጫሪንጮ ዼጊዲ ዳሬሢ፥ ሳዖ ቦኦኮልቂ ማዤሢ፥ ዓሲማኣ ሼምፖ ዑኡሲ ዒንጌ ናንጊና ናንጋ ጎዳሢ ሂዚ ጋዓኔ፦ 
\v 2 «ዬሩሳላሜ ታኣኒ ዒዞኮ ኮይላ ዓኣ ሜሌ ዴራ ዒዞፓ ዑሽኪ ማሢንታ ዑሺ ዓንጊ ማሃንዳኔ፤ ዬሩሳላሜ ዖላ ዓሳ ሙኪ ማንጋኣና ዪሁዳኣ ማንጊንታንዳኔ። 
\v 3 ዬኖ ኬሎና ዬሩሳላሜ ታኣኒ ዴሮ ቢያሢም ዓጊፁዋ ዼኤፒ ላሌ ማሃንዳኔ፤ ዒዞ ቡጊ ሺኢሻኒ ኮዓይ ቢያ ፔኤሮ ማኣሳናንዳኔ፤ ዓጮ ቢያይዳ ዓኣ ዴራ ጉቤ ዒዞ ዖላኒ ሙካንዳኔ፤ 
\v 4 ዒማና ታኣኒ ፓራሢ ቢያ ዲቃሣንዳኔ፥ ፓራሢ ቶጊ ዖላ ዓሶዋ ታኣኒ ዣኣሻንዳኔ፤ ፓራሢኮ ታኣኒ ዓኣፖ ባይዛንዳኔ፤ ጋዓንቴ ዪሁዳ ዴሮ ታኣኒ ታ ዓኣፖና ዛጊ ዛጊ ካፓንዳኔ። 
\v 5 ዬያሮ ዪሁዳ ዓጮ ሱኡጋ ፔ ዒኖና፦ ‹ቢያ ባኮ ዎይሣ ጎዳ ዔያቶኮ ፆኦዛሢ ማዔሢሮ ዬሩሳላሜይዳ ናንጋ ዒዛ ዴራ ዒዛና ዎልቄ ዴንቃኔ› ጋዓንዳኔ።
\p
\v 6 «ዬኖ ዓቦ ታኣኒ ዪሁዳ ዴሮ ሱኡጎ ናኣቦይዳ ዳኪ ዔኤሦ ሃንፂሌ፥ ጮኦሪ ጌሦና ናኣራኮ ባኣኪዳ ዓይሢንቴ ኩሻ ማሃንዳኔ፤ ዬያሮ ዔያታ ዔያቶኮ ኮይላ ዓኣ ሜሌ ዴሮ ሙዒ ባይዛንዳኔ፤ ዬሩሳላሜ ዴራ ጋዓንቴ ፔቴታዖ ዔኤቢ ዔያቶ ቆኦዹዋንቴ ካታሞይዳ ኮሺ ዴዓንዳኔ።
\p
\v 7 «ታኣኒ፥ ናንጊና ናንጋ ጎዳሢ ቤርታሳዖ ዪሁዳ ዴራ ሞርኮ ባሻንዳጉዲ ማሃንዳኔ፤ ታኣኒ ዬያ ማዻንዳሢ ዳውቴ ናኣቶ ቦንቾንታ ዬሩሳላሜይዳ ናንጋ ዴሮኮ ቦንቻ ሃንጎ ዪሁዳ ፃጶይዳፓ ባሼ ማዒ ዼግ ዼጊ ጎውዋጉዲኬ። 
\v 8 ዬኖ ዎዶና ታኣኒ፥ ናንጊና ናንጋ ጎዳሢ ዬሩሳላሜይዳ ናንጋ ዓሶም ጊቲማ ማዓንዳኔ፤ ዔያቶ ባኣካ ላቤያኬ ጌይንቴሢታዖ ዳውቴጉዲ ዶዲ ማዓንዳኔ፤ ዳውቴ ናኣታ ታና፥ ናንጊና ናንጋ ጎዳሢጉዲ፤ ጊንሣ ሃሣ ፆኦሲ ኪኢታንቻሢጉዲ ሶሮፒ ማዒ ዴሮ ዔኪ ዓኣዻንዳኔ። 
\v 9 ታኣኒ ዒማና ዬሩሳላሜይዳ ሞርኬ ማዒ ዔቃ ዴሮ ካኣቶ ቢያ ዖላኒ ጊኢጊንቲ ኬስካንዳኔ።
\p
\v 10 «ዬኖ ዎዶና ታኣኒ ዳውቴ ዜርፆንታ ዬሩሳላሜይዳ ናንጋ ዓሶንታም ሚጪንታ ዓያናና ሺኢጲሢ ዓያና ሚርጊሺ ዒንጋንዳኔ፤ ዬያ ታኣኒ ማዻንዳሢ ሜቴ ናይ፥ ሃሣ ጊንሣ ቶይዲ ናይ ሃይቃዛ ዒናፓ ዬኤኮ ጎይሢ ዔያታ ጫርጌሢ ሚጪንቲ ዬኤካንዳጉዲኬ። \x - \xo 12፡10 \xo*\xt ዮሃ. 19፡37፤ ዮሃ. ፆፔዻ 1፡7።\xt*\x* 
\v 11 ዒማና ዬሩሳላሜይዳ ዬኤኪንታንዳ ዬኤፓ ሜጊዶ ቦኦሎይዳ ሃዳዲሪሞኔ ዬኤኮና ጎይፆጉዲ ማዓንዳኔ። 
\v 12 ዬኖ ሳዔሎይዳ ፔቴ ፔቴ ቶኦካ ፔ ማኣሮ ዓሶማ ዓሶማ ዬኤካንዳኔ፤ ዓቲንቃ ዒማና ዔያቶኮ ላኣላፓ ዱማዺ ዴይ ዬኤካንዳኔ፤ ያዺዲ ዬኤካንዳ ማኣራ፦ ዳውቴ ማኣሮ፥ ናኣታኣኔ ማኣሮ፥ 
\v 13 ሌዊ ማኣሮንታ ሺምዒ ማኣሮንታ ፔ ቶኦኮና ቶኦኮና ፓቂንቲ ዬኤካንዳኔ፤ 
\v 14 ዬያጉዲ ሃንጎ ዓቴ ማኣሮ ዓሳኣ ፓቂንቲ ፓቂንቲ ዬኤካንዳኔ፤ ላኣላ ዔያቶኮ ዱማዺ ዴዒ ዖዪ ዬኤካንዳኔ።» \x - \xo 12፡14 \xo*\xt ማቲ. 24፡30፤ ዮሃ. ፆፔዻ 1፡17።\xt*\x*
\c 13
\p
\v 1 ቢያ ባኮ ዎይሣ ጎዳሢ ሂዚ ጋዓኔ፦ «ዬኖ ዎዶና ዳውቴ ናኣቶንታ ዬሩሳላሜይዳ ናንጋዞንሢንታም ጎማፓ ዔያቶ ጌኤሻንዳ ዓልቃ ዋኣሢ ዑርታንዳኔ። 
\v 2 ዓሳ ካኣሽካ ሜሌ ፆኦዞ ሳዖይዳፓ ዒማና ታኣኒ ባይዛንዳኔ፤ ላሚ ዔያቶ ጶቂሣንዳ ዓሲያኣ ባኣሴ፤ ሜሌ ፆኦዞ ማሊፆ ኬኤዛ ዓሶንታ ፑርቶ ዓያኖንታ ታኣኒ ባይዛንዳኔ። 
\v 3 ዓይጎ ዓሲያኣ ማዖም ታኣኒ ፆኦሲ ማሊሢ ኬኤዛያኬ ጌይ ዔቄቴ፥ ዬያ ዓሢ ሾዔ ዓዶንታ ዒንዶንታ ‹ናንጊና ናንጋ ጎዳ ሱንፆና ሉኡዚ ባኣዚ ኔ ኬኤዜሢሮ ኔኤም ሃይቢ ኮይሳኔ› ጋዓንዳኔ፤ ዒዚ ፆኦሲ ማሊፆ ኬኤዛኔ ጋዓኣና ሾዔ ዓሳ ዒዛ ጫርጊ ዎዻንዳኔ። 
\v 4 ዬኖ ዎዶና ዓይጎ ዓሲያኣ ማዖም ታኣኒ ፆኦሲ ማሊሢ ኬኤዛኔ ጋዓ ዓሲ ቢያ ዒዛም ፔጋዺ ጴዻ ባኮ ዴንቃዖ ቦርሲንታንዳኔ፤ ዓሶ ጌሻኒ ፆኦሲ ማሊፆ ኬኤዛ ዓሳ ማኣዓ፥ ጋፓኖ ማኣዓሢ ማይንቲ ኬስኪ ዒ ጴዻዓኬ። 
\v 5 ዒዚ ዒማና፦ ‹ታኣኒ ጎሺ ጎሽካ ዓሲኬ፥ ፆኦሲ ማሊሢ ኬኤዛያቱዋሴ፤ ታኣኮ ዼጋቶ ዎዳፓ ዓርቃዖ ታኣኒ ጎሺ ጎሽኪ ናንጋ ዓሲኬ› ጋዓንዳኔ። 
\v 6 ፔቴ ዓሲ፦ ‹ሃይ ኔኤኮ ዑፆይዳ ዓኣ ኪፃ ዓይጌ ኪፃሴ ኪሢዳዖ?› ጌይ ዖኦጬቴ፥ ዒዚ፦ ‹ታ ዒጊኒስኬያ ማኣራ ታ ማዻዖ ኪፃዼ ኪሢኬ› ጌይ ማሃንዳኔ።»
\s1 ፆኦሲኮ ቆልሞ ሄንቃሢ
\p
\v 7 ቢያ ባኮ ዎይሣ ጎዳሢ ሂዚ ጋዓኔ፦ «ታኣኮ ጬንቾ ዓፓራሢዮ! ታና ማኣዲ ታ ቆልሞ ሄንቃ ዓሢ ዑፃ ፑርቱሞና ዔቄ! ማራታ ዣኣሊ ዴንዲ ባይቃንዳጉዲ ሄንቃሢ ጫርጊ ዎዼ! ታኣኒያ ዻኮ ዻኮ ቆልሞ ዎዺ ኩርሳንዳኔ። \x - \xo 13፡7 \xo*\xt ማቲ. 26፡31፤ ማር. 14፡27።\xt*\x* 
\v 8 ዓጮይዳ ዓኣ ዴሮኮ ሃይሦፓ ላምዖ ማዓ ዛላ ጉቤ ሃይቂ ኩዳንዳኔ፤ ያዺ ማዔቴያ ሃይሦፓ ፔቴ ዛላ ማዓይ ሃይቁዋዖ ዓታንዳኔ። 
\v 9 ዬያቶ ታኣኒ ዓንጊ ታሚዳ ዓጊ ሼኤሺ ኬሶሢጉዲ ታሚዳ ታ ዔያቶ ጌልዚ ዛጋንዳኔ፤ ዎርቄያ ጎኔ ዎርቄ ማዒፃ ዛጊንታሢጉዲ ጎኑሞ ታ ዔያቶኮ ዛጋንዳኔ፤ ዬካፓ ዔያታ ታና ሺኢቃንዳኔ፤ ታኣኒያ ዔያታ ሺኢቃ ባኮ ዔያቶም ዋይዛንዳኔ። ታኣኒ ዔያቶ፦ ‹ታ ዴሬዮ› ጋዓንዳኔ፤ ዔያታኣ ታና፦ ‹ናንጊና ናንጋ ጎዳ ማዔ ኑ ፆኦዛሢዮ› ጋዓንዳኔ።»
\c 14
\s1 ዬሩሳላሜና ሜሌ ዓጮ ካኣቶና ዛላ
\p
\v 1 ናንጊና ናንጋ ጎዳሢ ዎጎ ዎጋ ኬላ ሄሌኔ፤ ዒማና ዒንሢ ዛጋ ጎይሣ ዓኣንቴ ዒንሢፓ ቡሪ ዔኬ ዓሳ ዔኬ ባኮ ዎሊም ጊሽታንዳኔ። 
\v 2 ዬሩሳላሜ ዖላንዳጉዲ ናንጊና ናንጋ ጎዳ ሜሌ ዴሮ ዔኤሊ ዔኪ ዬዓንዳኔ፤ ካታሜሎ ዔያታ ዓርቃንዳኔ፤ ኬኤፆዋ ቡራንዳኔ፤ ዒኢካ ዓኣ ላኣሎዋ ዎልቄና ዓርቃንዳኔ፤ ዴሮፓ ሄካሢ ዲዒንቲ ዔውታንዳኔ፤ ዓቴ ዓሳ ጋዓንቴ ካታማፓ ሜሌ ቤሲ ዴንዳዓኬ። 
\v 3 ዬካፓ ናንጊና ናንጋ ጎዳ ሃያኮ ቤርታ ዖላ ጎይፆ ዬያቶ ሜሌ ዴሮ ዖላኒ ኬስካንዳኔ። 
\v 4 ዬኖ ዓቦ ናንጊና ናንጋ ጎዳሢ ዬሩሳላሜኮ ዓባ ኬስካ ባንፃ ዓኣ ሪሚቶ ዹካ ኬስኪ ዔቃንዳኔ፤ ዒማና ዬይ ሪሚቶ ዹካ ዓባ ኬስካ ባንፃፓ ዴንዲ ዓባ ጌላ ባንፆ ሄላንዳኣና ዳልጊ ዶኦቺ ማዒ ላምዖ ፓቂንታንዳኔ፤ ዬያሮ ዬያ ዹኮኮ ሄካሢ ኬዶ ዛሎ ባንሢ፥ ዛላ ዾኦሎ ዛሎ ባንሢ ዶጫንዳኔ። 
\v 5 ዹኮ ዬያይዲ ላምዖ ፓቂ፥ ዴንዲ ዓፃሌ ሄሌ፥ ዬያ ዶኦጮና ፑኒ ቶሊ ዒንሢ ዴንዳንዳኔ፤ ዪሁዳ ካኣቲ ዖኦዚያ ዎዶይዳ ሳዓ ዓጊፄያና ዒንሢኮ ቤርታኣ ዓዶንሢ ፑኒ ዴንዴ ጎይፆ ዒንሢ ፑኒ ዴንዳንዳኔ፤ ናንጊና ናንጋ ጎዳ ማዔ ታ ፆኦዛሢ ጌኤዦ ዓሶ ፔኤና ዎላ ዔኪ ዬዓንዳኔ።
\p
\v 6 ዬኖ ኬሎ ሳዖ ሻኣሬ ዓርቄጉዲ ፖዓ ጌኤሽኪ ፖዓዓኬ። 
\v 7 ዬና ኬላ ፖዒያ ፖዒ፥ ዹሚያ ዹሚ ጋዓ ባኣዚ ባኣያ ፔቴ ዱማ ኬሊ ማዓንዳኔ፤ ዬና ኬላ ናንጊና ናንጋ ጎዳ ዔሬ ኬሊ ማዓንዳኔ፤ ዹማዛኣ ፖፖዓ ኬሊ ማዓንዳኔ።
\p
\v 8 ዬኖ ዓቦ ዬሩሳላሜፓ ጌኤሺ ዋኣሢ ዓልቃንዳኔ፤ ዬያ ዋኣፆኮ ዛላ ዓባ ኬስካ ባንፃ ዓኣ ዼኤፖ ባዞይዳ፥ ዛላ ጊንሣ ዓባ ጌላ ባንፃ ዓኣ ሜድቴራኒያ ባዞይዳ ዓኣዺ ጌላንዳኔ፤ ዖጎፆናኣ ማዖም ባርጎና ቢያ ዎዴ ዬይ ዎራ ጎዔ ጎይሣ ዴዓንዳኔ። \x - \xo 14፡8 \xo*\xt ሂዚ. 47፡1፤ ዮሃ. 7፡38፤ ዮሃ. ፆፔዻ 22፡1።\xt*\x* 
\v 9 ዬኖ ዎዶና ናንጊና ናንጋ ጎዳ ቢያ ዓጮይዳ ካኣታዻንዳኔ፤ ዓሲ ቢያ ዒዚ ሌሊ ፆኦሲ ማዔሢ ጉሙርቂ ዔካንዳኔ፤ ዒዛ ሱንፆዋ ሌሊ ዔኤሊ ካኣሽካንዳኔ።
\p
\v 10 ዓጮኮ ኬዶ ዛላ ዓኣ ጌባዔይዳፓ ዓርቃዖ ዴንዲ ዬሩሳላሜኮ ዾኦሎ ዛሎና ጌይ ዴንዲ ሪሞኦኔ ሄላንዳኣና ዓኣ ዓጫ ቢያ ቦኦሊ ማዓንዳኔ፤ ዬሩሳላሜ ኮይሎይዳ ዓኣ ዓጮፓ ዑሣ ሌካ ዼግ ጋዓንዳኔ፤ ካታሜላ ቢኢኒያሜ ካራፓ ዴንዲ ቤርታኣ ካሮ ዛሎይዳ ዓኣ ላምዖ ዲፃ ዎላ ካኣማ ካሮ፤ ዬያጉዲ ሃናኒዔኤሌ ኬኤሎ ዲፃፓ ዴንዲ ካኣቱሞ ማኣሮኮ ዎይኖ ዑዦ ጩኡጶ ቤዞ ሄላንዳኣና ዼግ ዼጊ ጌይ ዶዲ ዴዓንዳኔ። 
\v 11 ዬሩሳላሜ ዓሲ ናንጋ ቤሲ ማዓንዳኔ፤ ሃይካፓ ሴካ ዒዞይዳ ባይሲንታ ኬዳዓኬ፤ ዒኢካ ናንጋ ዴራኣ ሂርጋ ባኣያ ሃውሺ ናንጋንዳኔ። \x - \xo 14፡11 \xo*\xt ዮሃ. ፆፔዻ 22፡3።\xt*\x*
\p
\v 12 ዬሩሳላሜ ዖላኒ ዔቃ ዴሮይዳ ናንጊና ናንጋ ጎዳ ዎዺ ኩኩርሳ ዶርዖ ዓጋንዳኔ፤ ሼምፔና ዔያታ ዓኣንቴ ዑፃ ዓኣ ዓሽካ ዔያቶኮ ሙርዓንዳኔ፤ ዓኣፓ ዔያቶኮ ዴዒ ዓኣ ዔቶይዳ ዒኢካ ዎዓንዳኔ፤ ዒንዲርዛኣ ዻንጎ ጋራ ዓኣዖ ሙርዓንዳኔ።
\p
\v 13 ዬኖ ዎዶና ናንጊና ናንጋ ጎዳ ካራ ባይዛ ሜቶና ዒጊቹሞና ዓሶይዳ ዳካንዳሢሮ ፔቴይ ባጋሢዳ ሞርኬ ማዒ ዔቂ ዎሊ ዎዻንዳኔ። 
\v 14 ዪሁዳ ዴራ ዬሩሳላሜ ዓውሳኒ ዖላንዳኔ፤ ኮይሎይዳ ዓኣ ሜሌ ካኣቶኮዋ ቆሎ ቢያ ዲዒ ዔካንዳኔ፤ ዔያታ ዲዒ ዔካ ባኮይዳ ዎርቄ፥ ቢራንታ ማኣዖኮዋ ዱማ ዱማ ቶኦኪ ዺቢ ዓኣያ ማዓንዳኔ።
\p
\v 15 ዬያጉዴ ዎዺ ኩርሳ ዶርዓ ሞርኮ ጉርዶይዳ ዓኣ ዱማ ዱማ ቆልሞ፥ ፓራሢ፥ ባቁሎ፥ ጋኣላሢንታ ሃሮንታ ቢያ ኬዲ ዎዻንዳኔ።
\p
\v 16 ዬሩሳላሜ ዖሌ ካኣቶፓ ባይቁዋዖ ቶሊ ዓቴ ካኣታ ዉልሾ ዴማ ዴዒ ቦንቾ ቦንቾ ቦንቻኒና ቢያ ባኮ ዎይሣ ጎዳሢ ዚጊ ካኣሽካኒ ሌዓ ሌዓ ዬሩሳላሜ ሙካንዳኔ። \x - \xo 14፡16 \xo*\xt ሌዊ. ዓኬ 23፡39-43።\xt*\x* 
\v 17 ካኣታሢ፥ ቢያ ባኮ ዎይሣ ጎዳሢ ዚጊ ካኣሽካኒ ዬሩሳላሜ ሙኩዋ ዴሬ ዓኣቶ ዔያቶኮ ሳዖይዳ ዒርዚ ዋርቂንዱዋሴ። 
\v 18 ጊብፄ ዓጮ ዓሳ ዬያ ቦንቾ ቦንቻኒ ዬሩሳላሜ ሙኪ፥ ናንጊና ናንጋ ጎዳ ቤርቶ ሺኢካኒ ኮይባኣቶ «ዬሩሳላሜ ኑኡኒ ዴንዲ፥ ዉልሾ ዴማ ዴይ ቦንቾ ቦንቾ ቦንቻዓ» ጋዓ ካኣቶይዳ ኬዴ ዎዺ ኩርሳ ዶርዓሢ ዔያቶይዳኣ ኬዳንዳኔ። 
\v 19 ጊብፄ ዓጮ ዓሶ ማዔቴያ ሜሌ ካኣታ «ዉልሾ ዴማ ዴይ ቦንቾ ቦንቾ ኑ ቦንቻዓ» ጌኤቴ ዔያቶይዳ ሙካንዳ ሜታ ዬያኬ።
\p
\v 20 ዬኖ ዓቦ ፓራሢኮ ሉኡሎ ኬኤፆይዳ ቱኪንታ ሉኡሎይዳ ቢያ «ናንጊና ናንጋ ጎዳሢም ዱማዼያ» ጋዓ ፃኣፒንቴ ባኣዚ ኮሺንታዳኔ፤ ጌኤዦ ማኣሮይዳ ዓሽኮ ካሦ ዖታ ፆኦሲም ዒንጎ ባኮ ዒንጎ ቤዞይዳ ዓኣ ዓንጎ ሳኣኖጉዲ ናንጊና ናንጋ ጎዳም ዱማዼያ ማዓንዳኔ። 
\v 21 ዬሩሳላሜና ዪሁዳ ዓጮናይዳ ዓኣ ዓሽኮ ካሦ ዖታ ቢያ፥ ቢያ ባኮ ዎይሣ ጎዳሢም ዱማዼያ ማዓንዳኔ፤ ፆኦሲም ዒንጎ ባኮ ዔኪ ሺኢሻ ዓሳ ቢያ ዬያ ዖቶ ዔኪ ዔኪ ዓሽኮ ካሣንዳኔ፤ ዬይ ያዺ ማዓኣና ቢያ ባኮ ዎይሣ ጎዳሢኮ ጌኤዦ ማኣሮይዳ ካኣናኔ ዓሲ\f + \fr 14፡21 \fr*\fq ካኣናኔ ዓሲ፦ \fq*\ft ጋዓዞ ፔቴ ፔቴ ማፃኣፓ ኮርሞ ኮርማ ዓሲ ጋዓኔ።\ft*\f* ባኣያ ማዓንዳኔ።