\id NEH - MAALE Full Bible
\ide UTF-8
\h ኔሄሚያ ማፃኣፖ
\toc1 ኔሄሚያ ማፃኣፖ
\toc3 ኔሄ.
\toc2 ኔሄሚያ ማፃኣፖ
\mt1 ኔሄሚያ ማፃኣፖ
\imt ዓይፆ ካሮ
\ip ኔሄሚያ ማፃኣፓ ሃይሦ ቤሲ ፓቂንታኒ ዳንዳዓኔ፦
\ili 1. ዪሁዳ ዓጮ ዎይሣንዳጉዲ ፓርሴ ካኣቲ ዳኬ፥ ኔሄሚያ ሱኡጋቶና ዬሩሳላሜ ካታሞኮ ዲራ ዓካሲ ኮሺንቴ ሃይሴ ኬኤዛያኬ፤ ዬያ ሌሊቱዋንቴ ኔሄሚያ ዓሶኮ ዎላ ናንጎ ናንጎና ካኣዦና ጊንሣ ዓካሴሢ
\ili 2. ፆኦሲኮ ዎጎ ማፃኣፖ ዒዝራ ናባቤሢና ዴራ ፔኤኮ ጎሞ ቡኡፄሢ
\ili 3. ኔሄሚያ ዪሁዳ ዓጮ ዎይሣያ ማዒ ማዼ ሜሌ ማዾዋ ኬኤዛኔ።
\ip ማፃኣፔሎይዳ ዼኤፒ ማዒ ጴዻ ባካ ኔሄሚያ ፆኦሲ ዶዲ ጉሙርቄ ጉሙርቂሢንታ ዒዚ ሺኢቄ ሺኢጲሢንታ ሃይሴኬ።
\iot ማፃኣፔላ ዱማ ዱማ ዓርቄ ባኮ
\io1 ኔሄሚያኮ ዬሩሳላሜ ማዒፆ (1፡1—2፡20)
\io1 ዬሩሳላሜ ካታሞ ዲሮ ዓካሶናሢ (3፡1—7፡73)
\io1 ዒዝራ ፆኦሲኮ ዎጎ ናባቤሢና ዴራ ዎጎም ዓይሢንታኒ ጊንሣ ጫኣቄሢ (8፡1—10፡39)
\io1 ኔሄሚያ ማዼ ሜሌ ባኮ (11፡1—13፡31)
\c 1
\s1 ኔሄሚያ ዬሩሳላሜ ዛሎ ዖዪ ማሌ ማሊፆ
\p
\v 1 ሃካሊያ ናኣዚ፥ ኔሄሚያ ኬኤዜ ባካ ያዺኬ፦
\p ዓርፄክሲሴ ፓሪሴይዳ ካኣታዼንቴ ላማታማሳ ሌዖኮ ኪስሌዎ ጌይንታ ዓጊኖና ታኣኒ፥ ኔሄሚያ ዼኤፖ ካታሞ ሱኡሳይዳ ዓኣኔ። 
\v 2 ዒማና ታ ጌርሲንሢዳፓ ፔቴ ሃናኒ ጎዖሢ ሜሌ ዓሲና ዎላ ዪሁዳ ዓጫፓ ታ ኮራ ሙኬኔ፤ ዬሩሳላሜንታ ዲዒንቲ ባብሎኔ ዔውቱዋዖ ዓቲ ዓኣ ዓይሁዶ ዓሶንታ ዎዚ ዓኣቴ ታኣኒ ዔያቶ ዖኦጬኔ። 
\v 3 ዬያሮ ዔያታ፦ «ዲዒንቲ ባብሎኔ ዔውቱዋዖ ዓቲ ዓኣ ዓይሁዶ ዓሳ ዼኤፒ ሜቶና ዻውሲንቲናይዳ ዓኣኔ፤ ሃሣ ዬሩሳላሜኮዋ ዲራ ሻሂንቲ ዶዒ፥ ማርሾ ካራኣ ታሚና ሚቺንቴኔ» ጌይ ታኣም ኬኤዜኔ። 
\v 4 ታኣኒ ዬያ ቢያ ዋይዛዖ ዴዒ ዬኤኬኔ።
\p ሚርጌ ኬሊያኣ ሙኡዚ ሃሺ ዖዪ ታ ዴዔኔ፤ ዬካፓ ፆኦሲ ታ ሂዚ ጌይ ሺኢቄኔ፦ 
\v 5 «ናንጊና ናንጋ ጎዳ ማዔ ጫሪንጮ ፆኦዛሢዮ! ኔኤኒ ዼኤፒኬ፤ ኑኡኒ ዒጊቹሞና ኔ ቤርታ ዔቃንዳኔ፤ ኔኤኒ ኔና ናሽካዞንሢንታ ኔኤኮ ዓይሢፆ ካፓዞንሢንታ ዎላ ቢያ ጫኣቃ ጫኣቁሞ ኔ ካፓኔ። 
\v 6 ፆኦሲዮ! ኔኤኮ ዓይሎ፥ ዒስራዔኤሌ ዴሮኮ ዻቂንቶሮ ሮኦሮና ዋንቶና ታ ሺኢቃ ሺኢጲፆ ዋይዜ፤ ታኣም ማሌ፤ ኑኡኒ፥ ዒስራዔኤሌ ዴራ ማዼ ጎሞ ታኣኒ ቡኡፃኔ፤ ጎኔና ታናንታ ታኣኮ ቤርታኣ ዓዶንሢንታ ኑ ዻቤኔ። 
\v 7 ኔኤም ዋይዞ ዒፂ ኔኤኮ ዓይሢፆዋ ቢያ ኑ ሄርቄኔ፤ ኔኤኮ ዓይላሢ፥ ሙሴ ዛሎና ኔ ኑም ዒንጌ ዎጎና ዳምቦና ኑ ካፒባኣሴ። 
\v 8-9 ‹ዒንሢ ዒስራዔኤሌ ዴራ፥ ታ ጊንፆ ጉሙርቂሢና ዒንሢ ሃንቲባኣቴ ሜሌ ዴሮ ባኣካ ታ ዒንሢ ዜርቃንዳኔ፤ ጋዓንቴ ዒንሢ ሃንጋ ታ ባንሢ ማዒ፥ ታ ዒንሢ ዓይሤ ባኮ ማዺ ዒንሢ ኩንሤቶ ዴንዲ ዓጮኮ ጋፖ ሄላንዳኣና ዎዚ ዒንሢ ዜርቂንቴያ ማዔቴያ ታኣኒ ካኣሽኪንታኒ ዶኦሬ ቤዞ ላሚ ታ ዒንሢ ቡኩሲ ዔኪ ሙካንዳኔ› ጌይ ኔኤኒ ሙሴም ኬኤዜ ቃኣሎ ኔኤሲ ማሌ። \x - \xo 1፡8-9 \xo*\xt ሌዊ. ዓኬ 26፡33፤ ላሚ. ዎማ 30፡1-5።\xt*\x*
\p
\v 10 «ናንጊና ናንጋ ጎዳሢዮ! ሃኣታ ኔኤኮ ዓይሎኬ፥ ኔ ዴሮኬ፤ ሃያኮ ቤርታ ኔኤኮ ዼኤፖ ዎልቆና ዶዶ ኩጮና ዓውሲ ኔ ዔያቶ ዻቂሼኔ። 
\v 11 ሃሢያ ኔ ታ ሺኢጲፆ ዋይዜ፤ ሃሣ ኔና ቦንቻኒ ናሽካ ሜሌ ኔ ዓይሎኮዋ ሺኢጲፆዋ ዋይዜ፤ ሃኖ ታኣኒ ማዻኒ ማሌ ማሊፃ ጊኢጋንዳጉዲ፥ ሃሣ ካኣቲኮዋ ዒና ሚጪንታንዳጉዲ ማሂ ታና ማኣዴ።»
\p ታኣኒ ዒማና ካኣቲም ዎይኖ ዑዦ ሺኢሺ ዒንጋሢኬ።
\c 2
\s1 ኔሄሚያ ዬሩሳላሜ ዓኣዼሢ
\p
\v 1 ዓርፄክሲሴ ካኣታዼንቴ ላማታማሳ ሌዖና ኒሳኣኔ ጌይንታ ዓጊኖኮ ፔቴ ዓቢና ታኣኒ ካኣቲም ዎይኖ ዑዦ ዒንጋኔ፤ ዬኖ ዓባፓ ዓታዛ ቤርታ ታኣኒ ዖዬም ካኣቲ ታና ዴንቂ ቤቂባኣሴ። 
\v 2 ዬያሮ ካኣቲ፦ «ፔቴ ሜታ ኔና ሄሌም ማዓንዳኣፓዓቴም ኔ ሃርጊባኣንቴ ዎዲ ዓኣፖ ካራ ኔኤኮ ዖዪሢና ሃያይዲ ቱኡቴይ?» ጌይ ታና ዖኦጬኔ።
\p ታኣኒ ዒማና ሚርጌና ዒጊጫዖ፥ 
\v 3 «ካኣቲዮ፥ ናኣናና ካኣታዼ ጎይሣ ናንጌ! ታኣኮ ቤርታኣ ዓዶንሢ ዱኡቴ ካታማ ዶዒ ሻሂንቲ ዓቴም፥ ሃሣ ዲሮ ካራኣ ታሚና ሚቺንቲ ባይቄም ዎይቲ ታ ዖዩዋዖ ዓታንዳይ?» ጌዔኔ። \x - \xo 2፡3 \xo*\xt 2ካኣቶ. ማ 25፡8-10፤ 2ፆኦሲ. ዓሃኬ 36፡19፤ ዔር. 52፡12-14።\xt*\x*
\p
\v 4 ዬካፓ ካኣቲ፦ «ያዺ ማዔቴ ሃሢ ታኣኒ ኔኤም ዓይጎ ዎዶንዶይ?» ጌይ ታና ዖኦጫዛ፥ ታኣኒያ ጫሪንጮ ፆኦዛሢ ሺኢቄስካፓ፦ 
\v 5 ካኣቲ ኮይላ «ካኣቲዮ! ኔ ታና ቦንቻያ ማዔቴ፤ ሃሣ ታ ዖኦጪፆዋ ኔ ዋይዛቶ ታኣኮ ቤርታኣ ዓዶንሢ ዱኡኪንቴ፥ ዪሁዳይዳ ዓኣ ዬሩሳላሜ ካታሞ ታኣኒ ዴንዲ ካታሜሎ ጊንሣ ማዣንዳጉዲ ታና ዳኬቴራ» ጌዔኔ።
\p
\v 6 ዒማና ጌኤሻ ካኣቲኮ ኮይላ ዴዒ ዓኣኔ፤ ካኣቲያ ዬያ ታኣኮ ዖኦጪፆ ዋይዛዖ፦ «ዓኣፒኒ ኬሊዳ ኔ ዴንዲ ሄላንዳይ? ዓይዲ ኔ ማዓንዳይ?» ጌይ ታና ዖኦጬኔ፤ ታኣኒያ ዴንዲ ሄላንዳ ዎዶና ሃሣ ዓይዲ ማዓንዳቴያ ኬኤዜኔ።
\p
\v 7 ሄሊሳዖ ሃሣ ዒኢና ጌዒ ታኣኒ ዪሁዳ ዓጮ ዓኣዻንዳጉዲ ዔፕራፂሴ ዎሮኮ ዓባ ጌላ ባንፆና ዓኣ ዓጮ ዎይሣዞንሢም ካኣቲ ዓኣዾም ጌዔያ ማዒፆ ዔርዛ ዋርቃታ ዒንጋንዳጉዲ ካኣቲ ታኣኒ ሺኢቄኔ፤ 
\v 8 ዬያጉዲ ሃሣ ጌኤዦ ማኣሮ ዲሮ ካሮንታ ካታሞ ጌሎ ካሮንታ፤ ሃሣ ታኣኒ ሃውሻንዳ ማኣሮ ካፖ ቤዞዋ ማዦም ማዓንዳያ ሚሢ ቆፂሳንዳጉዲ ጋዓ ዋርቃታ ዓሳኣፔ ጎዖ፥ ካኣቲኮ ዴኤሎ ካዮ ካፓሢም ዒንጎንዶያ ታኣኒ ዖኦጬኔ፤ ዬያ ፆኦሲ ፔ ሚጪንቶና ታና ማኣዴሢሮ ካኣቲ፥ ታኣኒ ዖኦጬ ባኮ ቢያ ታኣም ዒንጌኔ።
\p
\v 9 ዖሎ ዓሶ ዓይሣ ዓሲና ፓራሢና ዖላ ዓሲ ታኣና ዎላ ዓኣዻንዳጉዲ ዒማና ካኣቲ ዳኬኔ፤ ዬካፓ ታኣኒ ዔፕራፂሴ ዎሮኮ ዓባ ኬስካ ባንፃ ዓኣ ዓጮ ዓኣዻኒ ኬስኬኔ፤ ዒኢካ ታ ሄሄላዖ ፃኣፒሲ ዔኬ ዋርቃቶ ዓጮ ዎይሣዞንሢም ዒንጌኔ፤ 
\v 10 ጋዓንቴ ዒስራዔኤሌ ዴሮ ዓውሳኒ ኮሺ ባኣዚ ማዻ ዓሲ ሙኬሢ ቤትሆሮኔ ካታማ ናንጋ ሴንባላፄና ዓሞኦኔ ዓጮኮ ቢቲ ማዒ ዎይሣ ፆቢያና ዋይዛዖ ሚርጌና ዻጋዼኔ።
\p
\v 11 ያዺ ማዔቴያ ታኣኒ ዬሩሳላሜ ዓኣዺ ዒኢካ ሃይሦ ኬሊ ፔኤቄኔ፤ 
\v 12 ዒማና ታኣኒ ዬሩሳላሜም ማዻንዳ ማዾ ቢያ ፆኦሲ ታኣም ፔጋሲ ዻዌ ዓኣሺንቴ ባኮ ዖኦማኣ ኬኤዙዋዖ ታ ዴዔኔ፤ ዬካፓ ዻካ ታ ላጌና ዎላ ሳዓ ዓሚ ጊዲሚሺ ማዓዛ ዔቂ ፔቴ ቤሲ ታ ዴንዴኔ፤ ኑ ኮይላ ዓኣ ጫኣና ጫኣኖ ቆልሞማ ታኣኒ ቶጌ ሃሮማ ሌሊኬ፤ 
\v 13 ዶኦጮ ዲሮ ካሮና ታኣኒ ኬስኪ ቃራሢ ዋኣፆ ካሮ ጌይንታ ቤዞይዴና ጌዒ ዾኦሎ ዛሎይዳ ዓኣ ቡኡሮ ላኣሎ ቤዞ ጌይንታዞ ታ ዴንዴኔ፤ ዒማና ሳዓ ሃጊ ዹሚኬ፤ ታ ዒኢና ዓኣዻኣና ካታሞኮ ሻሂንቴ ዲሮ ካሮንታ ታማ ሚቺ ኩርሴ ጌሎ ካሮዋ ታ ዛጌኔ። 
\v 14 ሄሊሳዖ ካታሞኮ ዓባ ኬስካ ባንፆና ጌይ ኬዶ ዛሎና ዓኣ «ዓልቃ ዋኣፆ ካሮ» ጌይንታ ቤዞና ጌይ ካኣቲ ቦቆሎ ባንሢ ታ ዴንዴኔ፤ ጋዓንቴ ታኣኒ ቶጌ ሃራ ዶዔ ባኮኮ ኩሎ ጊዴና ዓኣዾንዶ ጎይሢ ዴንቃኒ ዳንዳዒባኣሴ። 
\v 15 ዬያሮ ዬኖ ዋንቴሎ ቄድሮኦኔ ዎሮ ታኣኒ ኬዲ፥ ዲሮ ዛጊ ዛጊ ዒኢና ዓኣዼኔ፤ ጋፒንፆይዳ ጊንሣ ታ ሙኬ ጎይፆማና ማዒ ዶኦጮ ዲሮ ካሮ ዛሎና ካታሞ ታኣኒ ጌሌኔ።
\p
\v 16 ዒማና ዓጮይዳ ቢታንታ ዓኣ ዓሶይዳፓ ታ ዎካ ዓኣቴያ፥ ሃሣ ታ ዓይጎ ማዼቴያ ዔሬይ ዖኦኒያ ባኣሴ፤ ዬያ ሌሊቱዋንቴ ታኣኮ ላጎ ማዔ ዓይሁዶ ዓሶም ጌይፃ፦ ቄኤሶንታ ሱኡጎንታ ቢታንታ ዓኣ ዓሶንታ፤ ሃሣ ማዾ ማዻ ሃንጎ ዓሶፓ ፔቴ ዓሲምታዎ ዓይጎዋ ታ ኬኤዚባኣሴ። 
\v 17 ዬካፓ ጋዓንቴ ታኣኒ ዔያቶም፦ «ሂንዳ ዓካሪ ዓኣ ሜታሢ ቢያ ዛጉዋቴ! ዬሩሳላሜ ካታማ ሻሂንቴም ዶዔ ባካ ኩሊንቴኔ፤ ዒዞኮ ጌሎ ካራኣ ታሚና ሚቺንቲ ባይቄኔ፤ ዬያሮ ሃሢ ኑ ዔቂጋፓ ካታሜሎኮ ዲሮ ኮሾም፤ ኑና ሄሌ ዻውሲንቶዋ ኑ ባይዞም» ጌዔኔ። 
\v 18 ሃሣ ሄሊሳዖ ፆኦሲ ታኣና ዎላታሢንታ ዎማይዲ ዒ ታና ማኣዴቴያ፥ ዬያጉዲ ካኣቲ ታኣም ኬኤዜ ባኮዋ ቢያ ታ ዔያቶም ፔጋሲ ኬኤዜኔ።
\p ዬካፓ ዔያታ፦ «ጊንሣ ማዦ ኑ ዓርቃንዳኔ!» ጌዒ፥ ዬያ ኮዦ ማዾ ማዻኒ ጊኢጌኔ።
\p
\v 19 ጋዓንቴ ቤትሆሮኔ ዓሢ ሴንባላፄንታ ዓሞኦኔ ዓሢ ፆቢያንታ፤ ዬያጉዲ ሃሣ ጌሼሜ ጌይንታ ፔቴ ዓሬቤ ዓሲስኬይ ዬያ ኑ ማዻኒ ዓርቄ ማሊፆ ዋይዛዖ ቦሂ ሚኢጪ ሚኢጪ፦ «ሃይ ዒንሢ ማዻ ባካ ዓይጎ ባኣዚዳይ? ዒንሢ ካኣቲም ዋይዚ ዒፃኒ ኮዓሞ?» ጌይ ኑና ዖኦጬኔ።
\p
\v 20 ታኣኒ ዒማና፦ «ጫሪንጮ ፆኦዛሢ ማዾ ኑኡኮ ጊኢጊሻኒ ዒ ኑና ማኣዳንዳኔ፤ ኑ ዒዛኮ ዓይሎኬ፤ ዬያሮ ማዾ ኑ ዓርቃንዳኔ፤ ዒንሢ ጋዓንቴ ዬሩሳላሜፓ ዓይጎ ባኣዚ ዔካኒያ ማዖም ሃይሴ ዒንሢ ዛላ ኬኤዚንታንዳይ ባኣያ ማዓንዳኔ» ጌይ ዔያቶም ማሄኔ።
\c 3
\s1 ዬሩሳላሜ ካታሞኮ ዲራ ጊንሣ ኮሺንቴሢ
\p
\v 1 ካታሞኮ ዲራ ጊንሣ ኮሺንቴሢ ዬያይዲኬ፦ ቄኤሶ ቢያኮ ዑፃሢ፥ ዔሊያሺቤና ዒዛና ዎላ ማዻ ላጎ ማዔ ቄኤሳ «ማራቶ ካሮ» ጌይንታ ዲሮ ካሮ ጊንሣ ኮሺ ፆኦሲም ዱማዼያ ማሄኔ፤ ካሮዋ ኮሼኔ፥ ዲሮዋ «ፄኤታ» ጌይንታ ሹጮ ሴኤሎና «ሃናኒዔኤሌ» ጌይንታ ሹጮ ሴኤሎ ሄላንዳኣና ፆኦሲም ዱማዼያ ዔያታ ማሄኔ።
\p
\v 2 ዒያርኮ ዓሳ ዬኖ ቤዞ ሄሊሲ ዓኣ ቤዞ ኮሻዛ፥ ዜኩሬ ጌይንታሢ ዒምሪ ናኣዚ ዒዞይዳፓ ሄሌ ቤዞ ኮሼኔ።
\p
\v 3 ሃስናዓ ቶኦኮ ማዔ ዓሳ ሞላሢ ዲሮ ካሮ ጌይንታ ቤዞ ኮሼኔ፤ ዔያታ ቱርቱሮዋ ኮሼኔ፥ ካራኣ ኮሼኔ፤ ዬያ ካሮ ዎዾንዶ ጋጋርሲና ዎዾንዶ ቁልፔያ ጊኢጊሼኔ።
\p
\v 4 ዬካፓ ሄሊሳ ቤዞ ሃቆፄኮ ናኣዚ ናዖ፥ ዑሪያ ናኣዚ ሜሬሞቴ ኮሼኔ።
\p ሃሣ ሄሊሲ ዓኣ ቤዞ ሜሼዛቤሌኮ ናኣዚ ናዖ፥ ቤራኪያ ናኣዚ ሜሹላሜ ኮሼኔ፤ ዒዞይዳፓ ሄሊ ዓኣ ቤዞ ቤዓና ናኣዚ ሳዶቄ ኮሼኔ።
\p
\v 5 ሃሣ ሄሊ ዓኣ ቤዞ ቴቆዓ ካታሞ ዓሳ ኮሼኔ፤ ጋዓንቴ ዒማና ካታሞኮ ሱኡጋ ዔያቶ ዓይሢ ማዺሻ ዓሳ ዓይሣ ባኮ ማዺፆ ዒፄኔ።
\p
\v 6 ፓሳሄ ናኣዚ ዮዳሄና ቤሶዲያ ናኣዚ ሜሹላሜና ዪሻናኔ ዲሮ ካሮ ኮሼኔ፤ ዬካፓ ዔያታ ቱርቱሮ ዾቄኔ፥ ካሮዋ ኮሼኔ፤ ዬያ ካሮ ዎዾንዶ ቁልፔንታ ጋጋርሲያ ጊኢጊሼኔ።
\p
\v 7 ዬካፓ ሄሊሲ ዓኣ ቤዞ ጌባዖኦኔይዳ ሾይንቴ ዓሢ ሜላፂያ፥ ሜሮኖቴይዳ ሾይንቴ ያዶኔ፥ ጌባዖኦኔንታ ሚፂጳንታ ዓጮ ዓሳ ዔፕራፂሴኮ ዓባ ጌላ ባንፆ ዓጮ ዎይሣ ዓሢ ናንጋ ማኣሮ ሄላንዳኣና ዓኣ ቤዞ ኮሼኔ።
\p
\v 8 ሃሣ ሄሊ ዓኣ ቤዞ ዎርቆ ሼኤሺ ኮሻ፥ ሃርሃያ ናኣዚ ዑዚዔኤሌ ኮሼኔ።
\p ዬኖ ቤዞ ሄሊ ዓኣ ቤዞ ሳውቃ ቲዦ ኮሻ፥ ሃናኒያ ኮሼኔ፤ ዬና ዓሳ ዬሩሳላሜኮ «ዳልጎ ዲሮ» ጌይንታ ቤዞ ሄላንዳኣና ዓኣ ቤዞ ቢያ ጊኢጊሼኔ።
\p
\v 9 ዬካፓ ሄሊ ዓኣ ቤዞ ዬሩሳላሜኮ ዛሎ ዓጮ ዎይሣ፥ ሁሬ ናኣዚ ሬፓያ ኮሼኔ።
\p
\v 10 ሃሣ ሄሊ ዓኣ ቤዞ ሃሩማፔ ናኣዚ ዬዳያ ፔ ማኣሮኮ ሆታ ዓኣ ቤዞ ኮሼኔ።
\p ዬኖ ሄሊ ዓኣ ቤዞ ሃሻቤኒያ ናኣዚ ሃቱሼ ኮሼኔ።
\p
\v 11 ዬካፓ ሄሊ ዓኣ ቤዞ ሃሪሜ ናኣዚ ማልኪያና ፓሃትሞዓኣቤ ናኣዚ ሃሹቤና «ታሞ ፂኢሎ ኬኤሎ» ጌይንታ ዼጌ ቤዞ ኮሼኔ።
\p
\v 12 ዬኖይዳፓ ሄሊ ዓኣ ቤዞ ዬሩሳላሜ ካታሞኮ ዛሎ ዓጮ ዎይሣ፥ ሃሎሄሼ ናኣዚ ሻሉሜ ኮሼኔ፤ ዒማና ዒዛኮ ዉዱሮ ናኣታኣ ዒዛ ማዾና ማኣዳኔ።
\p
\v 13 ሄሊሳዖ ሃኑኔና ዛኖሃናይዳ ናንጋ ዓሳ ዎሊ ዑፃ ዶኦጮ ዲሮ ካሮ ዓካሲ ኮሼኔ፤ ዬያ ዲሮ ካሮ ኮሺ፥ ዬያ ዎዾንዶ ቁልፔና ጋጋርዞዋ ጊኢጊሼኔ፤ ዴንዲ ቡኡሮ ላኣሎ ቤዞ ሄላንዳኣና ዖዶሱማ ፔቴ ሺያ ዋዻ ማዓንዳ ኬኤሎ ዲፆ ጊንሣ ዔያታ ኮሼኔ።
\p
\v 14 ዬካፓ ዬያ ቡኡሮ ላኣሎ ቤዞ ጌሎ ዲሮ ካሮ ቤትሃካሬሜ ዓጮ ዎይሣ፥ ሬካቤ ናኣዚ ማልኪያ ጊንሣ ኮሼኔ፤ ካሮኮ ቁልፖንታ ጋጋርዞዋ ጊኢጊሼኔ።
\p
\v 15 ዬኖይዳፓ ሄሊ ዓኣ ቤዞ ሚፂጳ ዓጮ ዎይሣ፥ ኮልሆዜ ናኣዚ ሻሉሜ ዋኣፃ ዓልቃ ዲሮ ካሮ ጊንሣ ኮሼኔ፤ ዬያ ካሮኮዋ ካራ ኮሺ ዎዾንዶ ቁልፖንታ ጋጋርዞንታ ጊኢጊሼኔ፤ ዒማና ሼላሄኮ ቦቆሎ ዲፆ ባንፆና ካኣቱሞ ማኣሮኮ ሚፆ ቱኮ ቤዛፓ ዓርቂ ዳውቴ ካታሞፓ ሊካ ኬዶ ሳኖጉዴ ቤዞ ሄላንዳኣና ዓኣ ቤዞዋ ኮሼኔ።
\p
\v 16 ሄሊሳዖ ሃሣ ቤትፁሬ ዓጮኮ ዛሎ ዎይሣ፥ ዓዝቡቄ ናኣዚ ኔሄሚያ ዴንዲ ዳውቴ ዱኡፖ ሄላንዳኣና፥ ቦቆሎ ካሮ ሄላንዳኣና፤ ጊንሣ ሃሣ ዖሎና ዔርቴ ጎኦቦ ዓሳ ዱንኪ ዴዓ ቤዞ ሄላንዳኣና ዓኣ ቤዞ ኮሼኔ።
\s1 ዲሮ ማዾ ማዼ ሌዊ ዓሶ
\p
\v 17 ዲሮ ማዾ ማዼ ሌዊ ዓሶኮ ሱንፃ ሃካፓ ዴማ ዓኣ ጎይፆኬ፦
\p ባኒ ናኣዚ ሬሁሜ ዒዞይዳፓ ሄሌ ቤዞ ኮሼኔ።
\p ቄዒላ ዓጮኮ ዛሎ ዓጮ ዎይሣ ሃሻቢያ ፔ ዓጫ ማዼያ ማሂ ሄሊ ዓኣ ቤዞ ኮሼኔ።
\p
\v 18 ዬካፓ ሄሊ ዓኣ ቤዞ ሃሣ ቄዒላ ዓጮኮ ባጎ ዛሎ ዎይሣ፥ ሄናዳዴ ናኣዚ ባዋዬ ኮሼኔ።
\p
\v 19 ሄሊ ዓኣ ቤዞ ጊንሣ ሚፂጳ ዓጮ ዎይሣ፥ ዒያሱ ናኣዚ ዔዜሬ ዖሎ ዓንጋሞ ጌሦ ማኣሮኮ ሆታ ዓኣ ቤዞ ዴንዲ ዲራ ቃሳዺ ማዓ ካሮ ሄላንዳኣና ኮሼኔ።
\p
\v 20 ዬኖይዳፓ ሄሊ ዓኣ ቤዞ ዛባዬ ናኣዚ ባሩኪሜ ዴንዲ ቄኤሶ ቢያሢኮ ዑፃሢ፥ ዔሊያሺቤ ማኣሮ ጌሎ ካሮ ሄላንዳኣና ኮሼኔ።
\p
\v 21 ጊንሣ ሃሣ ሃቆፄ ናኣዚ ናዖ፥ ዑሪያ ናኣዚ ሜሬሞቴ ዴንዲ ዔሊያሺቤ ማኣሮ ጋፖ ሄላንዳኣና ዓኣ ቤዞ ኮሼኔ።
\s1 ዲሮ ማዾ ማዼ ቄኤሶ
\p
\v 22 ዬኖይዳፓ ሄሊ ዓኣ ዲሮ ኮሼ ቄኤሶኮ ሱንፃ ሃካፓ ዴማ ዓኣ ጎይፆኬ፦
\p ዬሩሳላሜ ካታሞ ኮይሎይዳ ዓኣ ቄኤሳ ዬካፓ ሄሊ ዓኣ ቤዞ ኮሼኔ።
\p
\v 23 ሃሣ ዔያቶ ሄሊሳዖ ቢኢኒያሜና ሃሹቤና ዔያቶኮ ናንጎ ማኣሮኮ ሆታ ዓኣ ቤዞ ኮሼኔ።
\p ዬኖ ሄሊሳዖ ዓናኒያ ናኣዚ ናዖ፥ ሜዕሴያ ናኣዚ ዓዛሪያ ፔ ማኣሮ ኮይላ ዓኣ ቤዞ ኮሼኔ።
\p
\v 24 ሄሊሳዖ ሄናዳዴ ናኣዚ ቤኑዬ ዓዛሪያሴ ማኣራፓ ዓርቃዖ ዴንዲ ዲሮኮ ካኣሞ ካሮ ሄላንዳኣና ዓኣ ቤዞ ኮሼኔ።
\p
\v 25-26 ዬካፓ ዑዛዬ ናኣዚ ፓላሌ ዲራ ካኣማ ካሮና ካኣቱሞ ማኣሮ ካፖ ቤዞ ኮይላ ዓኣ ኬዴና ዴዒ ካኣቱሞ ማኣሮ ካፖ ዼጌ ኬኤሎ ዲፃፓ ዓርቃዖ ዓኣ ቤዞ ቢያ ኮሼኔ።
\p ሄሊሳዖ ፓርዖሼ ናኣዚ ፔዳያ ዋኣፆ ዲሮ ካሮ ኮይላ ዓባ ኬስካ ባንፆ ባንሢ ዴንዳ ቤዞንታ ጌኤዦ ማኣሮ ካፖ ዼጌ ኬኤሎ ጌይፃ፦ ጌኤዦ ማኣሮ ማዾ ማዻ ዓሳ ናንጋ ካታሜሎኮ ፔቴዞ ማዔ «ዖፔሌ» ጌይንታ ቤዞ ኮይላ ዓኣ ቤዞዋ ኮሼኔ።
\s1 ዬያ ማዾ ማዼ ሜሌ ዓሶ
\p
\v 27 ጊንሣ ሃሣ ቴቆዓ ዓጮ ዓሳ ዒዞ ሄሊ ዓኣ ጌኤዦ ማኣሮ ካፖም ላሚ ማዢንቴ ዼጌ ኬኤሎ ቤዞኮ ሆታፓ ዓርቃዖ ዴንዲ ዖፔሌኮ ኮይላ ዓኣ ኬኤሎ ዲፆ ሄላንዳኣና ዓኣ ቤዞ ኮሼኔ።
\p
\v 28 ሃንጎ ዓቴ ቄኤሳ ፔኤኮ ናንጎ ማኣሮ ማኣሮኮ ሆታ ዓኣ ቤዞፓ ዓርቃዖ ፓራሢ ዲሮ ካሮኮ ኬዶ ዛሊና ዓኣ ቤዞ ሄላንዳኣና ኮሼኔ።
\p
\v 29 ዒሜሬ ናኣዚ ሳዶቄ ዒዚ ናንጋ ማኣሮኮ ሆታ ዓኣ ቤዞ ኮሻኣና ዓባ ኬስካ ባንፆ ዲሮ ካሮ ካፓሢ፥ ሼካኒያ ናኣዚ ሼማዒያ ዒዞፓ ሄሊ ዓኣ ቤዞ ኮሼኔ።
\p
\v 30 ሄሊሳዖ ሼሌሚያ ናኣዚ ሃናኒያና ፃላፔ ጎዖሢኮ ላሃሳ ናይ ሃኑኔ ጎዖስኬይ ላሚ ሃሣ ዔያቶ ሄላ ጊንፆ ኮሼኔ።
\p ሃሣ ቤራኪያ ናኣዚ፥ ሜሹላሜያኣ ፔ ማኣሮኮ ሆታ ዓኣ ቤዞ ኮሼኔ።
\p
\v 31 ሄሌ ቤዞ ሃሣ ዎርቆ ሼኤሺ ኮሻ፥ ማልኪያ ዲሮ ካራ ዎላ ካኣማ ካሮኮ ኬዶ ዛሊና ዓባ ኬስካ ባንፆኮ ጋፓፓ ዴንዲ ቢያ ባኮ ዴዒ ዛጎ ዼጌ ኬኤሎ ዲፆ ዛሊና ጌኤዦ ማኣሮኮ ማዾ ማዻ ዓሶና ኮርሞ ኮርማ ዓሶም ማዓ ቤዞ ሄላንዳኣና ዓኣ ቤዞ ኮሼኔ።
\p
\v 32 ዬካፓ ዎርቆ ሼኤሺ ኮሻ ዓሶንታ ኮርሞ ኮርማ ዓሳኣ ዲራ ካኣማ ካራፓ ዓርቃዖ ዴንዲ ማራቶ ዲሮ ካሮ ሄላንዳኣና ዓኣ ጋፒንፆ ቤዞ ሄላንዳኣና ዓኣሢ ኮሼኔ።
\c 4
\s1 ኔሄሚያ ማዾ ማዹዋጉዲ ማኮናሢ ቢያ ባሼሢ
\p
\v 1 ኬኤሎ ዲሮ ኑ ማዢፆ ዓርቄሢ ዋይዛዖ ሴንባላፄ ሚርጌና ዻጋዺ፥ ጎሪንቲ ኑና ቦሂ ጌስቲሢ ዓርቄኔ። 
\v 2 ዒማና ዒዛኮ ላጎና ሳማሪያ ፖኦሊሶና ቤርታ፦ «ሃንሢ ላቤ ዓይሁዶ ዓሶንሢ ዓይጎ ማዻኒ ማሌይ? ካታሜሎ ጊንሣ ላሚ ማዣኒ ዔያታ ማሌሞ? ፆኦሲም ዒንጎ ባኮ ዔያታ ሃሢ ዒንጋንዳ? ማዾዋ ዔያታ ፔቴ ኬሊዳ ማዺ ጋፒሳኒ ዳንዳዓያ ዔያቶም ማላ? ኬኤሎ ዲርቆንዶ ሹጮ ሚቺ ዶይሲ ኩሎና ቡኡሮ ባኣካፓ ኬሲ ዔያታ ዔካኒ ዳንዳዓንዳኖ?» ጌይ ቦሂ ጌስቴኔ።
\p
\v 3 ሃሣ ዒዛ ኮይላ ዔቂ ዓኣ ፆቢያ ፔ ዛሎና፦ «ዔያታ ዎዚጉዴ ኬኤሌ ዲርሲ ኮሻኒ ዳንዳዓይ? ዔያቶኮ ኬኤሎ ዲፆ ዑፆ ዉኡካ ኬስኬቴ ዶዓኒ ዳንዳዓኔ!» ጌይ ቶኦቺ ጌስቴኔ።
\p
\v 4 ዬያሮ ታኣኒ፦ «ኑ ፆኦሲዮ! ዔያታ ኑና ዎዚ ቶኦቻቴያ ሂንዳ ዛጌ፤ ሃይ ጫዣ ዔያቶ ቶኦካ ማዖም፤ ዔያቶኮ ዓኣ ቆላ ቢያ ቡሪንቴም ሜሌ ዓጪዳ ዔያታ ዳኪንቴ ዓሲ ማዖም፤ 
\v 5 ዔያታ ማዼ ፑርቶ ማዾ ዔያቶም ዓቶንጎ ጌይፖ፤ ኑኡኒ ሻሂንቴሢ ኮሼሢሮ ጫሺና ዔያታ ኑና ቦርሲሴኔ፥ ዻቢንቶ ዔያቶኮ ዋሊፖ» ጌይ ሺኢቄኔ።
\p
\v 6 ኑኡኒ ዒማና ኬኤሎ ዲሮ ጊንሣ ኮሺፆ ማዾ ሃሺባኣሴ፤ ዴራ ማዾ ዶዲ ማዼሢሮ ማዻ ሩኡሪና ዲሮኮ ሄካሢዳ ሄሌኔ።
\p
\v 7 ሴንባላፄ፥ ፆቢያ፥ ዓሬቦ ዓሳ፥ ዓሞኦኔ ዓሳ፥ ዓሽዶዴ ዴራኣ ዓቱዋዖ ዬሩሳላሜ ካታሞኮ ኬኤሎ ዲሮ ላሚ ጊንሣ ኑ ማዢፆና ኮሺ ማዾ ኑ ማዼሢሮ ሃሣ ኬኤሎ ዲሮ ባኣካ ዎላ ካኣሚባኣ ቤዛ ዲርቂንቴሢ ዋይዛዖ ኮሺ ዻጋዼኔ፤ 
\v 8 ዬያሮ ዔያታ ዎላ ፔቴ ማዒ ዬሩሳላሜ ሙካኒና ማንጊ ዖሊ ኑጊዳ ሜቶ ማዣኒ ዎላ ጌኔ ጌኤሲ ጌስቴኔ፤ 
\v 9 ኑኡኒ ጋዓንቴ ኑ ፆኦዛሢ ሺኢቄኔ፤ ዔያቶዋ ቃዛኒ ዋንቶና ሮኦሮና ቢያ ካፓ ዓሲያ ኑኡኒ ኬሴኔ።
\p
\v 10 ዒማና ዪሁዳ ዴራ፦
\q «ኬዳ ኑና ላቢሲ ላቢሲኬ፤
\q2 ሃጊ ዔቂሳኒ ኮይሳ ዶዔ ባኮ ኩላ ሚርጌኬ፤
\q2 ኑኡኒ ኬኤሎ ዲሮ ኮሻኒ ዳንዳዑዋሴ» ጌዔኔ።
\p
\v 11 ኑ ሞርካ፦ «ኑኡኒ ዔያቶ ባኣኮ ጌሊ ዔያቶ ዎዻንዳኣና ሃሣ ማዾዋ ኑ ዔያቶኮ ዔቂሳንዳኣና ዔያታ ኑና ዔሪንዱዋሴ፥ ዴንቂንዱዋሴ» ጌዔኔ። 
\v 12 ጋዓንቴ ኑ ሞርኮ ባኣካ ናንጋ ዓይሁዶ ዓሳ ታጶ ማይንቲ ሙኪ ሙኪ ኑ ሞርካ ዎማይዲ ኑና ማንጋኒ ዎላ ጫኣቄቴያ ፔጋሲ፥ ላቲሢና ኑም ኬኤዜኔ። 
\v 13 ዬያሮ ኑኡኮ ዴሮ ባኣካፓ ጬንቻ ዓፓሮንታ ዎርሢንታ ሂኢሺንታ ዓርቄ ዓሲ ዓሶኮ ቶኦካፓ ቶኦካፓ ኑኡኒ ጊኢጊሺ ማዻ ጋፒባኣ ቤዞ ቢያይዳ ኬኤሎ ዲሮኮ ዙሎ ዛሊና ዋርዲ ዋርዲ ዴዓንዳጉዲ ታ ማሄኔ።
\p
\v 14 ዒማና ዴራ ካራ ባይዜሢ ታ ዛጌሢሮ ዔያቶንታ ዔያቶኮ ሱኡጎንታ ሜሌ ቢታንታ ዓኣ ዓሶ ኮይላ ቢያ፦ «ኑ ሞርኮሮ ዒጊጪፖቴ፤ ዎዚጉዴ ዼኤፒ፥ ሃሣ ዼኤፑሞ ቦንቻ ዒጊቻ ፆኦሲ ኑኡኮ ዓኣሢ፤ ጊንሣ ሃሣ ዒዚ ዒንሢኮ ዒጊኖሮ፥ ዒንሢኮ ናኣቶንታ ላኣሎንታሮ፥ ዒንሢኮ ማኣራ ዓኣ ባኮ ዛሎሮዋ ዖልታንዳሢ ዔሩዋቴ» ታኣኒ ጌዔኔ። 
\v 15 ኑኡኮ ሞርካ ዔያታ ኑና ማንጊ ዖላኒ ጫኣቄ ጫኣቂፆ ኑ ዔሬሢ ዋይዜኔ፤ ፆኦሲ ዔያቶኮ ማሊፆ ጉሪ ማሄሢያ ዔያታ ዔሬኔ፤ ዬካፓ ኑኡኒ ቢያሢ ኬኤሎ ዲሮ ጊንሣ ኮሺፆ ዓርቄኔ።
\p
\v 16 ዬማ ኬላፓ ዓርቃዖ ታኣኒ ጊኢጊሼ ዓሳ ዛላ ማዾ ማዻኣና ዛላ ዖሎ ማኣዓሢ ማይንቲ፥ ዎርሢንታ ጊቲማንታ ዓርቂ፥ ሃሣ ሂኢዦዋ ዓኣሢ ዋርዲዮ ካፓንዳጉዲ ታኣኒ ማሄኔ፤ ኑኡኮ ሱኡጋኣ ዒማና ዴሮ ጉቤ ዒናፓ ማኣዳኔ፤ 
\v 17 ኬኤሎ ዲፆ ኮሻ ዓሶ ቢያ ዔያታ ዶዲሻኔ፤ ሜሌ ዓታዛ ኬዶ ኬዳ ዓሳኣ ዓቱዋዖ ፔቴ ኩጮና ማዾ ማዻዖ፥ ባጎ ኩጮና ዖሎ ዓንጋሞ ዓርቂ ዖላኒ ጊኢጊንታኔ። 
\v 18 ሹጮና ማኣሮ ማዣ ፔቴ ፔቴ ዓሳ ጬንቾ ዓፓሮ ኬርና ቱኡቲ ማዻኔ፤ ዛያሢ ዋርቃሢያ ታ ኮይላፓ ሺኢኩዋሴ። 
\v 19 ዴሮና ዔያቶኮ ሱኡጎና ቢታንታ ዓኣ ዓሶናም ታኣኒ፦ «ኬኤሎ ዲሮ ማዻ ዼኤፒ፥ ሃሣ ኮሺ ዳልጊ ማዔም ኑ ዎሊዳፓ ሃኬሢሮ ፔቴይ ባጋሢና ካኣማኒ ዳንዳዑዋሴ። 
\v 20 ዒንሢ ዛያ ዋርቂንታሢ ዋይዜ ዎዶና ሃንጋ ታ ባንሢ ሙኪ ቡኪንቱዋቴ፤ ኑ ፆኦዛሢ ኑ ዛሎ ዖልታንዳኔ» ጌዔኔ፤ 
\v 21 ዬያሮ ቢያ ኬላ ጉቴ ዓማፓ ዴንዲ ሳዓ ሃባርቲ ዉጫሢ ኬስካንዳያ ሄላንዳኣና ዛላ ማዾ ማዻኣና ዛላ ዖሎ ዓንጋሞ ዓርቂ ዔቂ ካፖ ካፓኔ።
\p
\v 22 ዒማና ታኣኒ ማዾ ማዺሻ ሱኡጎም፦ «ዋንቶ ዋንቶ ካታሞ ካፓኒ፥ ሮኦሮ ጊንሣ ኑኡኮ ማዾ ሂርጋባኣያ ማዻኒ ዳንዳዓንዳጉዲ ዒንሢታቴያ ዒንሢ ማኣዳ ዓሳ ዋንቶ ዋንቶ ዬሩሳላሜይዳ ዴዑዋቴ» ጌዔኔ። 
\v 23 ታና ማዔቴያ ታኣና ማዻ ታ ላጋ፥ ታኣም ማዻዞንሢንታ ታና ካፓዞንሢንታ ኑኡኒ ቢያሢ ዋንቶታቴያ ማይንታ ማኣዓሢ ኑ ኬሱዋሴ፤ ዬያጉዲ ኑኡኒ ዋኣፆ ዱዓኣናታዖ ዓንጋሞ ኑ ኩጫፓ ኑኡኒ ዱማሲ ጌሡዋሴ።
\c 5
\s1 ማንቆ ዓሶ ሄሌ ሜታሢ
\p
\v 1 ናንጊቤቃ ዴሮፓ ሚርጌሢ ዓቲንቆንታ ላኣሎንታ ዔያቶኮ ዒጊኖ ማዔ ዓይሁዶ ዓሶ ዒፂሢና ዒላቴኔ። 
\v 2 ዔያቶፓ ፔቴ ፔቴዞንሢ፦ «ሚርጌ ናይ ኑኡኮ ዓኣሢሮ ኑኡኮ ሼምፓሢ ዓይሳኒ ዳንዳዓ ሃኣኮ ኑ ኮዓኔ» ጌዔኔ።
\p
\v 3 ዛላ ሃሣ፦ «ሚርጌና ኑ ናይዼሢሮ ናያፓ ኑ ሼምፓሢ ዓይሳኒ ጌዒ ኑኡኮ ጎዦንታ፥ ኑ ቱኬ ዎይኖንታ ኑኡኮ ማኣሮዋ ቢያ ኑ ዓይሢሳንዳያ ሄላንዳኣና ኑና ማሄኔ» ጌዔኔ።
\p
\v 4 ሃንጎ ዛሎ ዓሳ ሃሣ፦ «ኑኡኮ ጎዦና ዎይኖ ዛሎናሮ ካኣቲ ጊኢሮ ኑና ዖኦጫሢሮ ኑ ጪጋንዳ ቢራ ኑ ታልዔኔ፤ 
\v 5 ኑኡኮ ዜርፃ ዔያቶና ፔቴኬ፤ ኑ ናኣታ ዔያቶ ናኣቶይዳፓ ዱማዻ ባኣዚ ባኣሴ፤ ያዺ ማዔቴያ ኑኡኮ ናኣቶ ዓይሌ ማሂ ዔያቶም ዒንጋኒ ዓቱዋ ባኣዚ ማዔኔ፤ ዬያ ሌሊቱዋንቴ ኑኡኮ ዉዱሮ ናኣቶይዳፓ ፔቴ ፔቴዞንሢ ዓይሌ ማዒ ሻንቺንቴኔ፤ ሃሣ ጎዦና ዎይኖ ቱኮ ቤዞና ኑኡኮ ዔውቴሢሮ ኑና ዛጋ ዓሲ ባኣያ፥ ካራ ባይቄ ዓሲ ኑ ማዔኔ» ጌይ ዒላቴኔ።
\p
\v 6 ታኣኒ ዒማና ዬያ ጌኤዞ ዋይዛዖ ዻጋዼኔ፤ 
\v 7 ታኣኒ ማዻኒ ኮይሳ ባኮ ታ ዒኖና ማላዖ ዴሮኮ ሱኡጎ ማዔ ቢታንታ ዓኣ ዓሶ፦ «ዒንሢ ዒንሢኮ ዒጊኖ ሜታሲ፥ ሚኢሼያ ሾይቺና ጪጊሻ!» ጌይ ጎሬኔ። \x - \xo 5፡7 \xo*\xt ኬሲ. ማፃ 22፡25፤ ሌዊ. ዓኬ 25፡35-37፤ ላሚ. ዎማ 23፡19-20።\xt*\x*
\p ዬያ ዔያቶኮ ሜቶ ሼሌዒሶንዶ ጎይሢ ዴንቃኒ ዴሮ ፔቴይዳ ታኣኒ ቡኩሲ፦ 
\v 8 «ሜሌ ዴሮም ሻንቺንቴ ዓይሁዶ ማዔ ኑ ዒጊኖ ዛሎ ዬያ ዔያታ ሻንቺንቴ ቤዛፓ ዔያቶ ኬሳኒ ማሊሢና ኑም ዳንዳዒንታ ባኣዚ ቢያ ኑ ማዼኔ፤ ዒንሢ ሃሢ ሃይሾ ዒንሢኮ ዒጊኖ ማዔ ዓይሁዶ ዓሶ ዔያቶኮ ዜርፆ ማዔ፥ ዒንሢም ዔያታ ፔና ዓይሌ ማሂ ሻንቻንዳጉዲ ማሂ ማሂ ዒንሢ ዓኣኔ!» ጌይ ታ ዔያቶ ጎሬም ዬይ ሱኡጋ ጎዖንዶ ጎይሢ ባይዚ ዚቲ ጌዔኔ።
\p
\v 9 ታኣኒ ሃሣ ኬኤዛዖ፦ «ዒንሢ ማዼ ባካ ፒዜቱዋሴ! ፆኦሲ ዒጊጪሢና ፒዜ ማዔ ባኣዚ ማዻኒ ዒንሢ ኮይሳኔ፤ ዎንዴ ዒንሢ ሂዴያታቴ ሜሌ ዓሶ ማዔ ኑኡኮ ሞርካ ኑና ቦሂ ጌስታንዳ ባኣዚ ባኣያናንዳንቴኬ። 
\v 10 ዴራ ታጊዳፓ ሚኢሼ ማዔቴያ ሃኣኮ ታልዓንዳጉዲ ታ ዓይሤኔ፤ ታኣና ዎላ ማዻ ታ ላጎና ታኣም ማዻ ዓሳኣ ዬኖ ጎይፆ ማዻንዳጉዲ ታ ዓይሤኔ፤ ዓካሪ፦ ‹ዒንሢ ታልዔ ጋሎ ኑም ጪጉዋቴ› ጌይ ዔያቶ ዖኦጪፃ ዓቶንጎ፤ 
\v 11 ሚኢሼታቶዋ ሃኣኮ፤ ሃሣ ዎይኖና ሪሚቶ ዛይቶ ማዔቶዋ ዒንሢ ዔያቶም ታልዔሢኮ ቢያ ሾይፆ ሃሹዋቴ፤ ዔያቶኮ ጎዦንታ ዎይኖ ሚፆንታ ጊንሣ ዔያቶኮ ሪሚቶ ዛይቶንታ ማኣሮንታ ቢያ ሃሢ ቤዛ ዔያቶም ማሁዋቴ» ጌዔኔ።
\p
\v 12 ዒማና ሱኡጋ ማሃዖ፦ «ኔ ኑና ዓይሤ ጎይፆ ኑ ማዻንዳኔ፤ ዔያቶኮ ዔኪንቴ ቆሎና ዔቦ ቢያ ኑ ዔያቶም ማሃንዳኔ፤ ዔያታ ታልዔ ጋሎዋ ኑኡኮ ‹ጪጉዋቴ› ጌይ ኑ ዔያቶ ዖኦጫዓኬ» ጌዔኔ።
\p ዬያሮ ታኣኒ ቄኤሶ ጋሮ ባንሢ ዔኤላዖ ሱኡጋ ጫኣቄ ጫኣቁሞ ማዺ ኩንሣንዳጉዲ ጫኣቂሲሴኔ። 
\v 13 ዒማና ታኣኒ ማኣዒ ዓኣ ማኣዓሢ ኬሲ ሃርፓዖ፦ «ዒንሢዳፓ ዓይጎ ዓሲያኣ ጫኣቄ ጫኣቁሞ ሃሼቶ ፆኦሲ ዒዛ ሃይማይዶንጎ፤ ዒዛኮ ማኣሮንታ ዓኣ ባኮንታ ቢያ ዔኪ ኩቺ ጉሪ ዓይሶንጎ» ጌዔኔ።
\p ዒማና ዬኖ ቤዞይዳ ዓኣ ዓሳ ቢያ ፔቴ ዑኡሲና «ዓኣሜን!» ጌዒ ናንጊና ናንጋ ጎዳ ጋላቴኔ፤ ሱኡጋኣ ዔያታ ጫኣቄ ጫኣቁሞ ማዺ ኩንሤኔ።
\s1 ኔሄሚያ «ታ ዻቆ» ጌይባኣያ ማዔሢ
\p
\v 14 ዓርፄክሲሴ ካኣታዼንቴ ላማታማሳ ሌዓፓ ዓርቃዖ ሃይሢታሚ ላምዖ ሌዔ ሄላንዳኣና ታኣኒ ዪሁዳ ዓጮ ዎይሣሢ ማዔንቴ ታጶ ላምዖ ሌዖይዳ ታኣኮ ዒጊኖ ማዔቴያ ሃሣ ታኣኒ ታ ቶኦኪና ፔቴ ዓጪ ዎይሣ ዓሲም ኮይሳ ሙኡዚ ኑ ሙይባኣሴ። 
\v 15 ታኣኮ ቤርታ ዓሶ ዎይሣያ ማዒ ዶኦሪንቴ ዓሳ ቢያ ዴሮም ዴኤሢ ኬዲ ማዒ ኬላ ኬላ ሙኡዚና ዑሺናም ዛላ ኪሎ ማዓንዳ ሹቺ ቢራ ዓሶ ጪጊሻኔ፤ ሃሣ ዬያ ዎይሣ ዓሶኮ ማዻ ዓሳታዖ ዴሮ ዑፆይዳ ቢቲ ማዒ ዓሶኮ ካራ ባይዛኔ፤ ታኣኒ ጋዓንቴ ፆኦሲ ዒጊጫያታሢሮ ዬያጉዴ ባኣዚ ማዺባኣሴ። 
\v 16 ታኣኮ ዓኣ ቆሎ ቢያ ዬሩሳላሜኮ ኬኤሎ ዲሮ ጊንሣ ኮሺፆ ማዾይዳ ታ ፔኤሼያፓዓቴም ታ ታኣኮ ዓይጎ ቆሎዋ ቡኩሲባኣሴ፤ ታ ዓይላኣ ቢያ ታኣና ዎላ ማዻያ ማዔኔ፤ 
\v 17 ዓሺኖ ዓጫፓ ታ ኮይላ ሙካ ሜሌ ዴራ ዓታዛ፥ ቢያ ኬሊ ታኣና ዎላ ሙዓ ዓይሁዶና ዔያቶኮ ሱኡጎናኮ ፓይዳ ፄኤታና ዶንጊታሚናኬ። 
\v 18 ቢያ ኬሊ ፔቴ ጌማይ፥ ላሆ ቃራ ቃራ ማራይና ሚርጌ ኮይዳኣ ሹኪ ሙዓ ታኣም ጊኢጊንታኔ፤ ሃሣ ጊንሣ ታጶ ኬሊዳ ፔቴና ዎይኔ ዑሺ ታ ዔያቶም ጊኢጊሻኔ፤ ጋዓንቴ ዴሮይዳ ዓጊንቴ ዴኤፆ ኬዶ ታ ዔራሢሮ ዓጪ ዎይሣ ዓሲም ኮይሳ ፔኤሺም ጪጎ ባኮ ታ ዖኦጪባኣሴ።
\p
\v 19 ታ ፆኦዛሢዮ፥ ሃያ ዴሮም ታ ማዼ ፒዙሞ ማዾ ቢያ ማሊጋፓ ኮሺ ባኣዚ ታኣም ማዼ።
\c 6
\s1 ኔሄሜይዳ ማዺንቴ ሜሌ ጌኔ ማዾ
\p
\v 1 ሴንባላፄ፥ ፆቢያ፥ ዓሬቦ ዓጮ ዓሢ ጌሼሜንታ ሜሌ ኑኡኮ ሞርኮንታ ኬኤሎ ዲሮ ታኣኒ ኮሺ ጋፒሴሢና ኮሺንቱዋ ዓቴ ቤሲ ባኣሢያ ዋይዜኔ፤ ያዺ ማዔቴያ ኬኤሎ ዲሮኮ ጌሎ ካሮ ዎዾንዶሢ ታኣኒ ዓኣሢባኣሴ። 
\v 2 ዬያፓ ዔቄያና ሴንባላፄና ጌሼሜና ዖኦኖ ጌይንታ ቦኦላ ዓኣ ጉርዶፓ ፔቴዞይዳ ኑ ካኣማንዳጉዲ ኪኢታ ታኣም ዳኬኔ፤ ዬያ ዔያታ ማዼሢ ታጊዳ ፑርታ ማዻኒ ጌኔ ማሊሢናኬ። 
\v 3 ታኣኒ ማሃዖ፦ «ታና ዑካሳ ማዾ ዓኣሢሮ ማዾ ሃሺ ዒንሢ ዓኣ ቤዞ ዎታኒ ታኣኒ ዳንዳዑዋሴ፤ ዒንሢ ኮራ ታ ሙካኒ ጌዒ ዓይጎሮ ማዾ ታ ዔቂሳንዳይ?» ጌዔኔ።
\p
\v 4 ዒማጉዴ ኪኢታ ዎሊ ጊንፆ ዖይዲ ማይንቲ ዔያታ ታኣም ዳካዛ፥ ታኣኒያ ዓዳ ቤርታ ታ ኬኤዜ ጎይፆማ ዔያቶም ማሄኔ።
\p
\v 5 ዬካፓ ዶንጋሶ ሴንባላፄ ፔኤኮ ማዾ ዓሶይዳፓ ፔቴሢ ኪኢቶና ታኣም ዳኬኔ፤ ዒዚ ጊዳ ፔ ማላቶ ዓይሢባኣዖ፥ ዖሺያ ዖሺባኣዖ ዳኬ ኪኢታ ሂዚ ጋዓያኬ፦
\p
\v 6 «ኔናንታ ኔኤኮ ዒጊኖ ማዔ ዓይሁዶ ዓሶንታ ፑርቱሞና ዋይዚ ዒፃኒ ማሊሢና ኬኤሎ ዲሮ ዒንሢ ኮሻሢ ዬያሮታሢ ኑኡኮ ዓሺኖ ማዔ ዴራ ዾንኪ ጌስታኔ፤ ዬይ ጎኔ ማዔሢ ጌሼሜያ ዔሬኔ፤ ዬያ ሌሊቱዋንቴ ኔኤኒ ኔኤሮ ካኣታዻኒ ማሌሢና፥ 
\v 7 ዪሁዳ ዓጮ ካኣቲ ኔ ማዔሢ ዬሩላሜይዳ ኬኤዚንታንዳጉዲ ፆኦሲ ማሊፆ ኬኤዛ ዓሶ ኔ ዶኦሬሢ ቃሲ ጌሼሜ ታኣም ኬኤዜኔ፤ ዬያ ሃይሶ ካኣቲ ዋይዛንዳሢያ ዔርቴያኬ፤ ዬያሮ ኔኤና ታኣና ኑ ዎላ ካኣሚ ዬያ ባኮ ዛሎ ጌስቴቴ ኮሺኬ» ጋዓያኬ። 
\v 8 ታኣኒ ዒማና ማሃዖ፦ «ዬይ ኔ ጋዓ ባካ ቢያ ፔቴታዖ ጎኔቱዋያ፥ ሃሣ ኔኤኒ ኔኤሮ ኬሴ ሃይሴኬ» ጌዔኔ።
\p
\v 9 ዬያይዲ ማዾ ኑ ዔቂሳንዳጉዲ ማሃኒ ኑና ዔያታ ዒጊቻኒ ማሌኔ፤ ዬያሮ ታኣኒ፦ «ፆኦዛሢዮ! ሃዳራ ታና ዶዲሼ!» ጌይ ሺኢቄኔ።
\p
\v 10 ዒማና ፔ ማኣራፓ ኬስኩዋጉዲ ካራ ዑፃ ዎዺንቲ ዓኣ ሜሄፃቤሎኮ ናኣዚ ናዖ፥ ዴላያ ናኣዚ ሼማዒያ ኮይላ ታ ዓኣዼኔ፤ ዒዚ ታኣም፦ «ዔያታ ኔና ዎዻኒ ዹሚና ሙካንዳሢሮ ኑ ዎላ ፆኦሲኮ ጌኤዦ ማኣሪ ጌሊ፥ ካሮ ዎዺ፥ ዓኣሺንታንዳኔ» ጌዔኔ።
\p
\v 11 ታኣኒ ጋዓንቴ፦ «ታጉዴ ዓሲ ፑኒ ዓኣሺንቱዋሴ፤ ታኣኒ ጌኤዦ ማኣሪ ጌሊ ዓኣሺንቲ ታ ሼምፓሢ ዓይሳኒ ኮይሳኔ ጌይ ኔ ማላ? ፔቴታዖ ዬያ ታ ማዻዓኬ» ጌዔኔ።
\p
\v 12 ዬካፓ ዬያ ባኮ ታ ማላንቴ ዒዚ ዬያጉዴ ሉኡዙሞና ታኣም ላቲ ኬኤዛንዳጉዲ ፆቢያና ሴንባላፄና ሚኢሼና ዒዛ ጌሼያ ማዓንዳፓዓቴም ሼማዒያ ፆኦሲፓ ዳኪንቴያ፥ ፆኦሲ ማሊሢ ኬኤዛያቱዋኣሢ ታ ዔሬኔ። 
\v 13 ጎኔና ዒ ዬያ ባኮ ማዺፆና ታና ዻቢሺ፥ ታ ዑፃ ፑርታ ሃይሴ ጌስቲሢና ዒጊቺ ዒጊቺ ሱንፆ ታኣኮ ፑርቲሲ ታና ቦርሲሳኒ ዴሚና ሚኢሼ ዔኬኔ።
\p
\v 14 ዬያሮ ታኣኒያ፦ «ፆኦሲዮ! ፆቢያና ሴንባላፄና ማዼ ባኮ ቢያ ኔ ዛጌ፤ ዔያቶይዳ ዎጌ፤ ኖዓዲያ ጌይንታ ፆኦሲ ማሊፆ ኬኤዛ ላኣሌሎንታ ሜሌ ፆኦሲ ማሊፆ ኬኤዛ ዓሳ ታና ዒጊቻኒ ማዼ ባኮ ቢያ ማሌ» ጌይ ሺኢቄኔ።
\s1 ኬኤሎ ዲሮ ኮሺፆኮ ጋፖ
\p
\v 15 ማዻ ዓርቂንቴሢዳፓ ዶንጊታሚ ላምዓሳ ኬሊኮ ጊንፃፓኬ፤ ዔሉሌ ጌይንታ ዓጊና ፄኤሬንቴ ላማታሚ ዶንጋሳ ኬሎና ዲሮ ማዻ ጉቤ ማዺንቲ ጋፔኔ፤ 
\v 16 ኑኡኮ ዓሺኖይዳ ናንጋ ሜሌ ዴሮ ማዔ ኑ ሞርካ ዬያ ዋይዛዖ ማዻ ኮሺ ዲቃሢ ሄርሺሳ ማዾ ማዔሢ ዔሬኔ፤ ሃሣ ዬይ ማዻ ፆኦሲ ማኣዴም ማዺንቴያ ማዔሢያ ዔሬሢሮ ሚርጌና ዒጊጬኔ፤ ማይ ሄርሺንታኒ ዔያታ ዳንዳዒባኣሴ።
\p
\v 17 ዒማና ዓይሁዶ ዓሶኮ ሱኡጋ ፆቢያም ሚርጌ ኪኢታ ፃኣፒ ፃኣፒ ዳካኔ፥ ዒዚያ ዔያቶም ማሂ ፃኣፓኔ። 
\v 18 ዒራሄ ናኣዚ ሼካኒያ ፆቢያኮ ባይሲታሢሮ ዓይሁዶ ዴሮኮ ሚርጌሢ ዒዛና ዎላ ሳሌ ሳላዼያ ዓኣኔ፤ ጊንሣ ሃሣ ሆናኔ ጌይንታ ዒዛኮ ዓቲንቆ ናዓሢ ቤሬኪያኮ ናኣዚ ሜሹላሜኮ ዉዱሮ ናይ ዔኬኔ። 
\v 19 ሃሣ ዴራ ዒማና ፆቢያ ማዼ ኮዦ ባኮ ሄርሺ ዼጊዲ ታ ቤርታ ማዔቴያ ኬኬኤዛኔ፤ ታ ጋዓ ባኮዋ ቢያ ዒዛም ዔያታ ኬኤዛኔ፤ ዬያሮ ዒዚ ታና ዒጊቻኒ ኪኢቶ ፃኣፒ ዳኪፃፓ ጊንሢም ጌይባኣሴ።
\c 7
\p
\v 1 ዬያይዲ ኬኤሎ ዲራ ኮሺንቲ ጋፔኔ፤ ዬያ ዲሮኮ ካራ ቢያ ቤዛ ቤዛ ጊኢጌኔ፤ ዬካፓ ጌኤዦ ማኣሮ ካፓ ዓሳ፥ ዓይኑሞ ዓይናዻ ዓሶንታ ሜሌ ሌዊ ዓሶንታም ማዾ ማዾ ቤዛ ዒንጊንቴኔ። 
\v 2 ታኣኒ ዬሩሳላሜ ካታሞ ዎይሣንዳጉዲ ላምዖ ዓሲ ዶኦሬኔ፤ ዬንሢያ፦ ታ ጌርሲ፥ ሃናኒና ዋርዲዮ ቤዞኮ ሱኡጋሢ ሃናኒያናኬ፤ ሃናኒያ ፆኦሲ ዒጊቹሞና ፒዙሞናኮ ዒዛና ቤቃ ዓሲ ባኣያኬ። 
\v 3 ዒማና ታ ዔያቶ ዓይሤሢ ዬሩሳላሜ ካታሞኮ ዲሮ ካሮ ጉቴ ዓባ ፆርቂ፥ ዋልዒ ሚቹዋንቴ ቡሉዋጉዲ ጌይኬ፤ ሃሣ ዒባኖ ዓባ ጌሌስካፓ ካሮ ካፓ ዓሳ ፔ ማኣሪ ዓኣዻንዳሢኮ ቤርታ ዲሮ ካሮ ጋጋርቂ፥ ሃሣ ቁልፒ ዎዻንዳጉዲ ታ ዓይሤኔ። ዬያጉዲ ሃሣ ዔያታ ፔኤሮ ዬሩሳላሜይዳ ናንጋ ዴሮ ባኣካፓ ካፓ ዓሲ ዶኦሪ፤ ሃሣ ዬያቶይዳፓ ፔቴ ፔቴ ዓሶ ዛላ ቤሲኮ ሱኡጌ ማሂ ጌሣንዳጉዲ፥ ዓቴ ዓሶ ሃሣ ፔኤኮ ማኣሮ ካራ ካራ ዔቂ ካፓንዳጉዲ ላቲ ታ ዔያቶም ኬኤዜኔ።
\s1 ዲዒንታፓ ማዔ ዓሶኮ ሱንፆ
\p
\v 4 ዬሩሳላሜ ዼኤፒና ዳልጊ ካታማ ማዔኔ፤ ጋዓንቴ ዒዞይዳ ናንጋ ዴሮኮ ፓይዳ ዻካኬ፥ ሃጊ ሚርጌ ማኣሪ ማዢንቲባኣሴ፤ 
\v 5 ፆኦሲ ዴሮና ዔያቶኮ ሱኡጎ ማዔ ቢታንታ ዓኣ ዓሶ ታ ቡኩሳንዳጉዲና ዔያቶ ማኣሮ ዓሶኮ ሾይንቶ ዜርፆ ፃኣፖና ጎይፆ ታ ዛጋንዳጉዲ ታና ማሊሴኔ፤ ዒማና ቤርታዺ ዲዒንታፓ ማዔ ዓሶኮ ዜርፆ ዎሊ ሄሊሲ ፃኣፖናያ ታ ዴንቄኔ፤ ዬይ ታ ዴንቄሢ ሃካፓ ዴማ ዓኣ ጎይፆኬ፦
\p
\v 6 ዲዒንቶይዳፓ ሚርጌ ዓሲ ባብሎኔ ዓጫፓ ዔቂ፥ ዬሩሳላሜና ዪሁዳ ዓጮና ባንሢ ማዒ ማዒ ፔቴ ፔቴሢ ፔኤኮ ካታሞ ካታሞ ጌሌኔ፤ ዬኖ ዎዶና ናብካዳናፆኦሬ ዲዒ ዔኪ ዓኣዼስካፓ ዓርቃዖ ዬኖ ዓሶኮ ማኣሮ ዓሳ ባብሎኔ ዓጮይዳ ናንጋኔ። 
\v 7 ዲዒንታፓ ዔያታ ማዔ ዎዶና ዔያቶኮ ሱኡጎ ማዔ ዓሳ፦ ዜሬባቡሌ፥ ዒያሱ፥ ኔሄሚያ፥ ዓዛሪያ፥ ሬዓሚያ፥ ናሃማኒ፥ ሜርዴኪዮሴ፥ ቤልሻኔ፥ ሚስፔሬቴ፥ ቢግዋዬ፥ ኔሁሜንታ ቤዓናንታኬ።
\p
\v 8-25 ዲዒንታፓ ማዔ ዓሶኮ ፔቴ ፔቴ ቶኦካፓ ኬስኪ ኬስኪ ፃኣፒንቴ ዒስራዔኤሌ ዓሶ ቶኦኮና ሾይንቶ ዜርፆ ሚርጉሞ ፓይዳ ሃካፓ ዴማ ዓኣ ጎይፆኬ፦
\m ፓርዖሼ ቶኦካፓ ፃኣፒንቴ ዓሳ ላምዖ ሺያና ፄኤታና ላንካይታሚ ላምዖ ዓሲ
\m ሼፓፂያ ቶኦካፓ ሃይሦ ፄኤታና ላንካይታሚ ላምዖ ዓሲ
\m ዓራሄ ቶኦካፓ ላሆ ፄኤታና ዶንጊታሚ ላምዖ ዓሲ
\m ዒያሱና ዒዮዓቤና ቶኦካፓ ማዔ ፓሃትሞዓኣቤ ቶኦካፓ ላምዖ ሺያና ሳሊ ፄኤታና ታጶ ሳሊ ዓሲ
\m ዔላኣሜ ቶኦካፓ ፔቴ ሺያና ላምዖ ፄኤታና ዶንጊታሚ ዖይዶ ዓሲ
\m ዛቱ ቶኦካፓ ሳሊ ፄኤታና ዖይዲታሚ ዶንጎ ዓሲ
\m ዛካዬ ቶኦካፓ ላንካይ ፄኤታና ላሂታሚ ዓሲ
\m ቢኑዬ ቶኦካፓ ላሆ ፄኤታና ዖይዲታሚ ሳሊ ዓሲ
\m ቤባዬ ቶኦካፓ ላሆ ፄኤታና ላማታሚ ሳሊ ዓሲ
\m ዓዝጋኣዴ ቶኦካፓ ላምዖ ሺያና ሃይሦ ፄኤታና ላማታሚ ላምዖ ዓሲ
\m ዓዶኒቃሜ ቶኦካፓ ላሆ ፄኤታና ላሂታሚ ላንካይ ዓሲ
\m ቢግዋዬ ቶኦካፓ ላምዖ ሺያና ላሂታሚ ላንካይ ዓሲ
\m ዓዲኔ ቶኦካፓ ላሆ ፄኤታና ዶጊንታሚ ዶንጎ ዓሲ
\m ሂዚቂያሴ ጌይንታ ዓፄሬ ቶኦካፓ ታዞጲታሚ ሳሊ ዓሲ
\m ሃሹሜ ቶኦካፓ ሃይሦ ፄኤታና ላማታሚ ሳሊ ዓሲ
\m ቤፃዬ ቶኦካፓ ሃይሦ ፄኤታና ላማታሚ ዖይዶ ዓሲ
\m ሃሪፔ ቶኦካፓ ፄኤታና ታጶ ላምዖ ዓሲ
\m ጌባዖኦኔ ቶኦካፓ ታዞጲታሚ ዶንጎ ዓሲ ፃኣፒንቴኔ።
\p
\v 26-38 ሃካፓ ዴማ ዓኣ ካታሞንሢዳ ናንጋ ቤርታኣ ዓዶንሢ ዲዒንታፓ ማዔዞንሢኬ፦
\m ቤቴልሄሜና ኔፆፓናይዳ ፄኤታና ሳሊታሚ ሳሊ ዓሲ ናንጌኔ
\m ዓናቶቴይዳ ፄኤታና ላማታሚ ሳሊ ዓሲ
\m ቤትዓዝማዌቴይዳ ዖይዲታሚ ላምዖ ዓሲ
\m ቂርያትይዓሪሜይዳ፥ ኬፒራና ቤዔሮቴናይዳ ላንካይ ፄኤታና ዖይዲታሚ ሃይሦ ዓሲ
\m ራማና ጌባዔናይዳ ላሆ ፄኤታና ላማታሚ ፔቴ ዓሲ
\m ሚክማሴይዳ ፄኤታና ላማታሚ ላምዖ ዓሲ
\m ቤትዔሌና ዓይናይዳ ፄኤታና ላማታሚ ሃይሦ ዓሲ
\m ላምዓሳ ኔቦይዳ ዶንጊታሚ ላምዖ ዓሲ
\m ላምዓሳ ዔላኣሜይዳ ፔቴ ሺያና ላምዖ ፄኤታና ዶንጊታሚ ዖይዶ ዓሲ
\m ሃሪሜይዳ ሃይሦ ፄኤታና ላማታሚ ዓሲ
\m ዒያርኮይዳ ሃይሦ ፄኤታና ዖይዲታሚ ዶንጎ ዓሲ
\m ሎዴ፥ ሃዲዴና ዖኖናይዳ ላንካይ ፄኤታና ላማታሚ ፔቴ ዓሲ
\m ሴናዓይዳ ሃይሦ ሺያና ታዞጳ ፄኤታና ሃይሢታሚ ዓሲ ናንጌኔ።
\p
\v 39-42 ዲዒንቶይዳፓ ማዔ ቄኤሶ ቶኦካ ሃይፓ ዴማ ፓይዲንታ ጎይፆኬ፦
\m ዒያሱ ቶኦኮ ማዔ ዪዳዒያ ቶኦካፓ ታዞጳ ፄኤታና ላንካይታሚ ሃይሦ ዓሲ
\m ዒሜሬ ቶኦካፓ ፔቴ ሺያና ዶንጊታሚ ላምዖ ዓሲ
\m ፓሽሁሬ ቶኦካፓ ፔቴ ሺያና ላምዖ ፄኤታና ዖይዲታሚ ላንካይ ዓሲ
\m ሃሪሜ ቶኦካፓ ፔቴ ሺያና ታጶ ላንካይ ዓሲ ማዔኔ። 
\v 43-45 ዲዒንታፓ ማዔ ሌዊ ዓሶ ቶኦካ፦
\m ሆዳውያ ቶኦኮ ማዔ ዒያሱና ቃድሚዔሌና ቶኦካፓ ላንካይታሚ ዖይዶ ዓሲ
\m ዓሳኣፔ ቶኦኮ ማዒ ጌኤዦ ማኣሮይዳ ዓይኑሞ ዓይናዻ ዓሶ ቶኦካፓ ፄኤታና ዖይዲታሚ ሳሊ ዓሲ
\m ሻሉሜ፥ ዓፄሬ፥ ፃልሞኔ፥ ዓቁቤ፥ ሃፂፃና ሾባዬና ቶኦኮ ማዒ ጌኤዦ ማኣሮ ካፓ ዓሶ ቶኦካፓ ፄኤታና ሃይሢታሚ ሳሊ ዓሲ ማዔኔ።
\p
\v 46-56 ዲዒንታፓ ማዔ ጌኤዦ ማኣሮይዳ ማዻ ዓሶ ቶኦካ፦
\q ፂሃ፥ ሃሱፓ፥ ፃባዖቴ፥
\q ቄሮሴ፥ ሲዓ፥ ፓዶኔ፥
\q ሌባና፥ ሃጋባ፥ ሻልማዬ፥
\q ሃናኔ፥ ጊዴሌ፥ ጋሃሬ፥
\q ሬዓያ፥ ሬፂኔ፥ ኔቆዳ፥
\q ጋዛሜ፥ ዑዛ፥ ፓሴሃ፥
\q ቤሳዬ፥ ሜዑኒሜ፥ ኔፓሼሲሜ፥
\q ባቅቡቄ፥ ሃቁፓ፥ ሃርሁሬ፥
\q ባፅሊቴ፥ ሜሂዳ፥ ሃርሻ፥
\q ባርቆሴ፥ ሲሴራ፥ ቴማሄ፥
\q ኔፅሃና ሃፂፓናኬ።
\p
\v 57-59 ዲዒንቶይዳፓ ማዔ ሴሎሞኔም ማዻ ዓሶኮ ቶኦካ፦
\q ሶፃዬ፥ ሶፔሬቴ፥ ፔሪዳ፥
\q ያዕላ፥ ዳርቆኔ፥ ጊዴሌ፥
\q ሼፓፂያ፥ ሃፂሌ፥ ፖኬሬቴ፥
\q ሃፄባይሜና ዓሞኦኔናኬ።
\p
\v 60 ዲዒንቶይዳፓ ማዔ ጌኤዦ ማኣሮይዳ ማዻ ዓሶና ሴሎሞኔም ማዻ ዓሶ ዜርፆኮ ሚርጉማ ሃይሦ ፄኤታና ታዞጲታሚ ላምዖ ዓሲኬ።
\p
\v 61-62 ቴልሜላሄ፥ ቴልሃሪሻ፥ ኬሩቤ፥ ዓዶኔና ዒሜሬ ጌይንታ ካታሞ ዙሎ ጉርዳፓ ማዔዞንሢ፦ ዴላያ፥ ፆቢያና ኔቆዳ ቶኦኮኮ ሚርጉማ ላሆ ፄኤታና ዖይዲታሚ ላምዖኬ፤ ያዺ ማዔቴያ ዬንሢ ቢያ ዒስራዔኤሌ ዓሶ ዜርፆ ማዔሢ ዔርዛኒ ዳንዳዒሳ ባኣዚ ዔያቶኮ ባኣሴ።
\p
\v 63-64 ሃካፓ ሊካ ዴማ ዓኣ ቄኤሶ ቶኦካ ዔያቶኮ ቤርታኣ ዓዶንሢ ሾይንቶ ዜርፆ ጎናሲ ዔራኒ ዳንዳዒባኣሴ፤ ዬንሢያ፦ ሆባዬ፥ ሃቆፄና ባርዚላዬናኬ፤ ቄኤሶ ቶኦኮ ማዔ ባርዚላዬኮ ቤርታኣ ዓዳሢ ጌሌዓዴ ሾይንቲ ማዔ ባርዚላዬ ቶኦካፓ ፔቴ ላኣሊስኬኖ ዔኬኔ፤ ዬያይዳፓ ዔቄያና ባይሲ ቶኦኮ ዻካሊ ዒ ናንጌኔ፤ ዬይ ዓሳ ዔያቶኮ ቤርታኣ ዓዶንሢኮ ሾይንቶ ዜርፆ ጎናሲ ዔራኒ ዳንዳዒባኣሢሮ ቄኤሴ ማዒ ዔያታ ማዻንዳጉዲ ዓይሢንቲባኣሴ። 
\v 65 ዬያሮ ዪሁዳ ዓጮ ዎይሣሢ ፆኦሲ ማሊፆ ዱማሲ ዔርዛ ባኮና ማዻ ቄኤሴ ኬስካንዳያ ሄላንዳኣና ፆኦሲም ዒንጊሢ ማዒ ዒንጎ ባኮይዳፓ ዔያታ ሙዓኒ ዳንዳዑዋያ ማዔሢ ዔያቶም ኬኤዜኔ። \x - \xo 7፡65 \xo*\xt ኬሲ. ማፃ 28፡30፤ ላሚ. ዎማ 33፡8።\xt*\x*
\m
\v 66-69 ዲዒንቶይዳፓ ማዔ ዴሮኮ ሚርጉማ ዎሊ ዑፃ ዖይዲታሚ ላምዖ ሺያና ሃይሦ ፄኤታና ላሂታሚናኬ
\m ዓቲንቆና ላኣሎ ካራሞናኮ ፓይዳ ላንካይ ሺያና ሃይሦ ፄኤታና ሃይሢታሚ ላንካይኬ፤
\m ፆኦሲ ቦንቾም ዓይኑሞ ዓይናዻ ዓቲንቆና ላኣሎናኮ ፓይዳ ላምዖ ፄኤታና ዖይዲታሚ ዶንጎ
\m ዔያቶኮ ፓራሢ ሚርጉማ ላንካይ ፄኤታና ሃይሢታሚ ላሆ
\m ባቁሎ ሚርጉማ ላምዖ ፄኤታና ዖይዲታሚ ዶንጎ
\m ጋኣላሢ ሚርጉማ ዖይዶ ፄኤታና ሃይሢታሚ ዶንጎ
\m ሃሮ ሚርጉማ ላሆ ሺያና ላንካይ ፄኤታና ላማታሚናኬ።
\p
\v 70-72 ፔቴ ፔቴ ማኣሮ ዓሶኮ ሱኡጋ ጌኤዦ ማኣሮ ጊንሣ ማዣኒ ማኣዳያ ዱማ ዱማ ባኣዚ ማዼኔ፤ ዔያቶይዳፓ ፔቴ ፔቴዞንሢ፦
\q ዓጮ ዎይሣሢ ሳሊ ኪሎ ማዓ ዎርቄ፥ ዶንጊታሚ ዔቴ ሳኣኔ፥ ዶንጎ ፄኤታና ሃይሢታሚ ቄኤሳ ማኣዓ ማኣዖ ሜሆ ጌሦ ማኣራ ዒንጌኔ።
\q ዱማ ዱማ ቶኦኮ ሱኡጋ፦ ፄኤታና ላሂታሚ ሳሊ ኪሎ ማዓ ዎርቄ፥ ፔቴ ሺያና ላምዖ ፄኤታና ዶንጊታሚ ማዓ ሹቺ ቢራ ዒንጌኔ።
\q ሃንጎ ዓቴ ዴራ ፄኤታና ላሂታሚ ሳሊ ኪሎ ማዓ ዎርቄ፥ ፔቴ ሺያና ፔቴ ፄኤታና ኪሎ ማዓ ሹቺ ቢራና ላሂታሚ ላንካይ ቄኤሴ ማኣዖና ዒንጌኔ።
\p
\v 73 ዬያይዲ፦ ቄኤሳ፥ ሌዊ ዓሳ፥ ጌኤዦ ማኣሮ ካፓ ዓሳ፥ ዓይኑሞ ዓይናዻ ዓሳ፥ ጌኤዦ ማኣሮይዳ ማዾ ማዻ ዓሶንታ ጉቤ ዒስራዔኤሌ ዓሳ ፔ ካታማ ካታማ ዱንኪ ዴዔኔ። \x - \xo 7፡73 \xo*\xt 1ፆኦሲ. ዓሃኬ 9፡2፤ ኔሄ. 11፡3።\xt*\x*
\c 8
\s1 ዒዝራ ፆኦሲ ዎጎ ዴሮም ናባቤሢ
\p
\v 1 ዒስራዔኤሌ ዴራ ላንካሳ ዓጊኖና ፔኤኮ ካታማ ካታማ ጋፒ ዴዔኔ፤ ዬኖ ዓጊኖኮ ዓይፆ ዓቦና ዬሩሳላሜይዳ ዋኣፆ ካሮ ጌይንታ ዓሳ ቡካ ጶኦኮኮ ጋሮ ዛሎና ዴራ ቢያ ፔቴይዳ ቡኪንቴኔ፤ ፆኦሲ ሙሴ ዛሎና ዒስራዔኤሌ ዴሮም ዒንጌ ዎጎ ናባቢ ዔሬያ ማዔ፥ ቄኤሳሢ ዒዝራ ዎጎኮ ማፃኣፖ ዔያቶም ዔኪ ሙካንዳጉዲ ዔያታ ዖኦጬኔ። 
\v 2 ዬያሮ ቄኤሳሢ ዒዝራ ላንካሳ ዓጊና ፄኤሬ ቤርታሳ ኬሎና ማሊ ጶቂሢ ዒና ዔካኒ ዳንዳዓ ዴሮ ቢያ፥ ላኣሎንታ ዓቲንቆንታ ናኣቶንታ ጋርቻኣ ዓቱዋዖ ቡኪንቲ ዓኣ ቤዞ ዎጎ ማፃኣፖ ዔኪ ሙኬኔ፤ 
\v 3 ዬያ ዓሳ ቡካ ጶኦኮይዳ ዒዝራ ዲሮ ካሮ ኮይላ ዔቃዖ ጉቴ ዓሚፓ ዴንዲ ዓባ ሳዛ ሄላንዳኣና ዎጎ ማፃኣፖ ዼግ ጌዔ ዑኡሲና ዴሮም ናባቤኔ፤ ዴራ ቢያ ዒማና ዒናፓ ዋይዜኔ።
\p
\v 4 ዒዝራ ዬያ ባኮም ጊኢጋንዳጉዲ ሚሢና ኮሾና ዼጌ ቤሲዳ ዔቄኔ፤ ዒማና ዒዛኮ ሚዛቆ ዛላ ዔቄ ዓሳ፦ ማቲትያ፥ ሼማዔ፥ ዓያና፥ ዑሪያ፥ ሂልቂያና ሜዕሴና ማዓዛ ሻውሎ ዛላ ሃሣ፦ ፔዳያ፥ ሚሻዔኤሌ፥ ማልኪያ፥ ሃሹሜ፥ ሃሽባዳናሄ፥ ዛካሪያሴንታ ሜሹላሜንታኬ።
\p
\v 5 ዒዝራ ዴሮይዳፓ ዼጊዲ ኮሾና ቤዞይዳ ዔቃዛ ቢያሢ ዒዛ ጊዥ ጌይ ዛጌኔ፤ ዒዚ ዒማና ዎጎ ማፃኣፖ ቡላዛ፥ ዴራ ቢያ ዴዔ ቤዛፓ ዔቄኔ፤ 
\v 6 ናንጊና ናንጋ ጎዳ ማዔ ዼኤፖ ፆኦዛሢ ዒዝራ ጋላቴኔ፤ ዴራኣ ቢያ ዒማና ኩጮ ሌካ ጫሪንጮ ባንሢ ዔቂሳዖ፦ «ዓኣሜን! ዓኣሜን!» ጌዔኔ፥ ባሊቶና ሳዖ ሄሊሲያ ፆኦሲም ዚጌኔ።
\p
\v 7 ዬካፓ ዓሳ ቤርታ ዓኣ ቤዛ ዔቄኔ፤ ሄሊሳዖ ሃሣ ሃካፓ ሊካ ሱንፃ ፓይዲንታ ሌዊ ዓሳ ዎጎ ማፃኣፖኮ ቡሊፆ ዓሶም ቡሊ ቡሊ ኬኤዜኔ፤ ዬንሢያ፦ ዒያሱ፥ ባኒ፥ ሼሬቢያ፥ ያሚኔ፥ ዓቁቤ፥ ሻቤታዬ፥ ሆዲያ፥ ሜዕሴያ፥ ቄሊፃ፥ ዓዛሪያሴ፥ ዮዛባዴ፥ ሃናኒታ ፔላያንታኬ። 
\v 8 ዔያታ ዴሮም ፆኦሲኮ ዎጎ ማፃኣፖ ናባባዖ፥ ዬይ ናባቢንቴሢ ዴሮም ዔርታንዳጉዲ ቡሊ ቡሊ ኬኤዛኔ።
\p
\v 9 ዴራ ዬያ ዎጎ ቃኣሎ ዋይዜ ዎዶና ዒና ሜቂ ዬኤኬኔ፤ ዬያሮ ዓጮ ዎይሣ፥ ኔሄሚያንታ ዎጎ ኮሺ ዔራ ቄኤሳሢ ዒዝራንታ ዴሮ ዔርዛ ሌዊ ዓሶንታ፦ «ሃናኣ ኬላ ናንጊና ናንጋ ጎዳ ማዔ ዒንሢ ፆኦዛሢም ዱማዼ ኬሊታሢሮ ዖዪ ዒንሢ ዬኤካንዳያ ኮይሱዋሴ» ጌዔኔ። 
\v 10 ዒማና ኔሄሚያ፦ «ዓካሪ ሃሢ ዒንሢ ማኣሪ ማኣሪ ዓኣዺጋፓ ዒንሢኮ ዓኣ ኮዦ ሙዖ ሙይ ዑዦዋ ዑሽኩዋቴ፤ ፔቴታዖ ዔኤቢ ባኣዞንሢማኣ ፓቂ ዳኩዋቴ፤ ሃናኣ ኬላ ናንጊና ናንጋ ጎዳ ማዔ ኑ ፆኦዛሢም ዱማዼ ኬሊኬ፤ ዬያሮ ዖዪፖቴ፥ ፆኦሲኮ ዎዛ ዒንሢኮ ዎልቆኬ» ጌዔኔ።
\p
\v 11 ዬኖ ፆኦሲም ዱማዼ ኬሎና ዴራ ዖያንዳያ ኮይሱዋኣሢ ሌዊ ዓሳ ዴሮም ኬኤዚሢና ዴሮኮ ዒላቶ ዚቲዴኔ፤ 
\v 12 ዬያሮ ዴራ ቢያ ዔያቶም ናባቢንቴ ቃኣሎ ዒና ዔኬሢሮ ፔ ማኣሪ ማኣሪ ዴንዲ ሙይ ዑሽኪ ዑሽኪ ሚርጌና ዎዛዼኔ፤ ሃሣ ዔያቶኮ ዓኣ ሙዖዋ ባኣ ዓሶና ዎላ ጊሽቲ ጊሽቲ ሙዔኔ፤
\s1 ዉልሾ ዴማ ዴዒ ቦንቺንቴ ቦንቾ
\p
\v 13 ዬካፓ ዚሮ ጉቴሎ ቶኦኮ ቶኦኮኮ ሱኡጋ ቄኤሶና ሌዊ ዓሶና ዎላ ፔቴይዳ ዎጎ ማፃኣፓ ኬኤዜ ባኮ ዔራኒ ዒዝራ ኮይላ ዓኣዼኔ። 
\v 14 ዒስራዔኤሌ ዓሳ ዎጎ ናባባ ዎዶና ላንካሳ ዓጊኖይዳ ውልሾ ዴማ ዴዒ ቦንቾ ኬሊ ማዒ ቦንቺንታንዳጉዲ ዓይሢንቴያታሢ ፆኦሲ ሙሴ ዛሎና ዓይሤ ዎጎይዳ ፃኣፒንቲ ዓኣያታሢ ዴንቄኔ። 
\v 15 ዬያሮ ሃካፓ ዴማ ኬኤዚንታ ዳምቦ ጊኢጊሺ ዬሩሳላሜ ካታሞና ጉርዶ ቢያሢም ዳኬኔ፤ ዬይ ዳምባ፦ «ሌካ ጌሜሮ ኬስኪ ዛይቶ ሪሚቶኮ ዋርቄ ካኣፖንታ ባርሴኔቴ ጌይንታ ሚፆንታ ሜኤፄንታ ሃንጎ ሚፆኮዋ ዋርቄ ካኣፖ ቲቂ ዔኪ ዬዑዋቴ፤ ዎጎ ማፃኣፖይዳ ፃኣፒንቴ ዳምቦ ጎይፆ ዉልሻ ዉልሹዋቴ» ጋዓያኬ። \x - \xo 8፡15 \xo*\xt ሌዊ. ዓኬ 23፡33-36፤39-43፤ ላሚ. ዎማ 16፡13-15።\xt*\x*
\p
\v 16 ዬካፓ ዴራ ሚፆኮ ዋዾ ካኣፖ ቆፂ ቆፂ ዔኪ ሙኪ ፔኤኮ ናንጋ ጉቦ ጋራ፥ ማኣሮኮ ፆኦዚንፆይዳ፥ ጌኤዦ ማኣሮኮ ዓሳ ቡካ ጶኦኮና ዋኣፆ ካሮ ጌይንታ ጶኦኮናይዳ፤ ዬያጉዲ ሃሣ ዔፕሬኤሜ ጶኦኮይዳኣ ዉልሼኔ፤ 
\v 17 ዲዒንታፓ ማዒ ሙኬ ዓሳ ቢያ ዉልሾ ዉልሺ ዉልሺ ዴማ ዴዔኔ፤ ዬይ ኔዊ ናኣዚ ዒያሱ ዎዳፓ ሃንጋ ኮይሪ ማዺንቴያኬ፤ ዬይ ዬያቶ ፔቴ ፔቴሢ ኮሺ ዎዛሴኔ። 
\v 18 ቦንቾ ኬላ ቦንቺንቶ ዓርቄስካፓ ዴንዲ ጋፖ ኬሎ ሄላንዳኣና ዒዝራ ኬላ ኬላ ፆኦሲኮ ዎጎ ማፃኣፓፓ ፔቴ ፔቴ ቤሲ ናባባኔ፤ ዬያ ቦንቾ ኬሎ ላንካይ ኬሊ ጉቤ ዔያታ ቦንቼኔ፤ ዬካፓ ሳላሳ ኬሎና ዎጋ ዓይሣ ጎይፆ ቦንቾ ኬሎ ጋፖና ዱማዼ ቡኪንቲ ቡኪንቴኔ።
\c 9
\s1 ዒስራዔኤሌ ዴራ ጎሞ ቡኡፄሢ
\p
\v 1 ዬኖ ዓጊኖኮ ላማታሚ ዖይዳሳ ዓቦና ዒስራዔኤሌ ዴራ ፔቴይዳ ቡኪንቴኔ፤ ዔያታ ዒማና ፔኤኮ ጎሞ ዛሎ ዻቤያ ማዒፆ ዔርዛኒ ሲዬ ፓቲሌ ማይንቲ፥ ፔኤኮ ቶኦኮይዳ ዓጪ ዋሂ፥ ሙዖ ሃሾ ዳምቦዋ ኩንሤኔ፤ 
\v 2 ዔያታ ፔና ሜሌ ዴሮይዳፓ ዱማሴኔ፤ ዬያይዴስካፓ ቢያሢ ዴዔ ቤዛፓ ዔቃዖ ዔያቶና ዔያቶኮ ቤርታኣ ዓዶንሢና ማዼ ጎሞ ቢያ ቡኡፄኔ። 
\v 3 ዔያታ ዔቄ ቤዞማካ ዓኣንቴ ሃይሦ ሳኣቴ ጉቤ ናንጊና ናንጋ ጎዳ ማዔ ዔያቶ ፆኦዛሢኮ ዎጎ ማፃኣፓ ዔያቶም ናባቢንቴኔ፤ ጊንሣ ሃሣ ዒማ ዔያታ ኔጌማጉዴያ ኔጊ ፔኤኮ ጎሞ ቡኡፂ ቡኡፂ ናንጊና ናንጋ ጎዳ ማዔ ፔ ፆኦዛሢም ዚጌኔ።
\p
\v 4 ዒኢካ ሌዊ ዓሶም ዔቆንዶ ዼጌ ቤሲ ኮሾናያ ዓኣኔ፤ ዬኖ ቤዞይዳ፦ ዒያሱ፥ ባኒ፥ ቃድሚዔኤሌ፥ ሼባኒያ፥ ቡኒ፥ ሼሬቢያ፥ ባኒንታ ኬናኒንታ ዔቃዖ ናንጊና ናንጋ ጎዳ ማዔ ዔያቶኮ ፆኦዛሢ ዼግ ጌዔ ዑኡሲና ሺኢቄኔ።
\p
\v 5 ሃሣ ዒያሱ፥ ቃድሚዔኤሌ፥ ባኒ፥ ሃሻቤኒያ፥ ሼሬቢያ፥ ሆዲያ፥ ሼባኒያንታ ፔታህያ ጌይንታ ሌዊ ዓሶንሢ፦
\q «ዒንሢ ዔቂጋፓ ናንጊና ናንጋ ጎዳ
\q2 ዒንሢኮ ፆኦዛሢ ጋላቱዋቴ፤
\q ጋላታና ዓንጆናኮ ቢያ ዑሣ
\q ዒ ዼግ ዼጊ ጎዖንጎ! ጎውዋቴ» ጌዔኔ።
\s1 ቡኡፃ ሺኢጲሢ
\p
\v 6 ዬካፓ ዒስራዔኤሌ ዴራ ሂዚ ጌይ ሺኢቄኔ፦
\q «ናንጊና ናንጋ ጎዳሢዮ! ኔኤኒ ሌሊ ፆኦሲኬ፤
\q2 ጫሪንጮንታ
\q2 ጫሪንጮኮ ጫሪንጮ ዦኦጋሢንታ
\q2 ሳዖና ዒኢካ ዓኣ ባኮ ቢያ
\q2 ባዞንታ ዬያቶይዳ ዓኣ ባኮ ቢያ
\q2 ኔ ማዤኔ፤ ቢያሢም ሼምፔ ኔ ዒንጌኔ፤
\q2 ጫሪንጮ ማዢንታ ኔኤም ዚጋኔ።
\q
\v 7 ባብሎኔይዳ ዑሬ ጌይንታ ካታሜሎይዳፓ
\q2 ዓብራሜ ዶኦሪ ሃይካ ዔኪ ሙኬሢ
\q2 ሱንፆዋ ዒዛኮ ‹ዓብራሃሜ› ጌይ ጌሤሢ
\q2 ኔኤኒ ናንጊና ናንጋ ጎዳ ፆኦሲኬ። \x - \xo 9፡7 \xo*\xt ማዢ. ማፃ 11፡31—12፡1፤ 17፡5።\xt*\x*
\q
\v 8 ዒዚ ኔኤም ጉሙርቂንቴያ ማዔሢ ኔ ዛጊ
\q2 ዒዛና ዎላ ኔ ጫኣቄኔ፤
\q2 ካኣናኔ ዓሳ፥ ሂኢታ ዓሳ፥
\q2 ዓሞራ ዓሳ፥ ፔርዛ ዓሳ፥
\q2 ዒያቡሳ ዓሶንታ ጌርጌሳ ዓሶንታ
\q2 ናንጋ ካኣናኔ ዓጮ
\q2 ዒዛኮ ዜርፆም ናንጊ ዓጪ ማሂ
\q2 ዒንጋኒ ኔ ዒዛም ጫኣቄኔ፤
\q2 ኔኤኒ ጉሙርቂንታያታሢሮ
\q2 ኔ ጫኣቁሞ ኔኤኒ ዶዲ ካፔኔ።»\x - \xo 9፡8 \xo*\xt ማዢ. ማፃ 15፡18-21።\xt*\x*
\b
\q
\v 9 «ኔኤኒ ኑኡኮ ቤርታኣ ዓዶንሢ ጊብፄይዳ
\q2 ሄሌ ሜታሢ ዛጌኔ፤
\q2 ሃሣ ዞቄ ባዞ ኮይላ ዓኣዖ
\q2 ዔያቶ ኔ ማኣዶም ዔያታ ኔና ሺኢቄሢ ኔ ዋይዜኔ። \x - \xo 9፡9 \xo*\xt ኬሲ. ማፃ 3፡7፤ 14፡10-12።\xt*\x*
\q
\v 10 ጊብፄ ካኣቲዳ
\q2 ዒዛኮ ቢታንታ ዓኣ ዓሶና ዓጮናይዳ
\q2 ናንጋ ዴሮ ቢያይዳ
\q2 ዲቃሣያ ማዔ ኔ ዎልቆና ማዺንታ ባኮ ፔጋሲ ኔ ዻዌኔ።
\q2 ዬያ ኔ ማዼሢ ዔያታ ኑኡኮ ቤርታኣ ዓዶንሢ
\q2 ዎማይዲ ሄርቂ ዎይሤቴያ ኔ ዛጌሢሮኬ፤
\q2 ዬያ ኔ ማዺፆና ሃኖ ሄላንዳኣና
\q2 ዼኤፑማ ኔኤኮ ዔርቴያ ማዔኔ። \x - \xo 9፡10 \xo*\xt ኬሲ. ማፃ 7፡8—12፡32።\xt*\x*
\q
\v 11 ባዞ ዋኣፆ ኔ ዔያቶኮ ቤርታ ላምዖ ፓቄም
\q2 ዔያታ ፃኣዺ ሳዓና ፒንቄኔ፤
\q2 ሹቺ ባዞ ዋኣፆይዳ ኬኤሪንታሢጉዲ
\q2 ዔያቶ ዳውሳዞንሢ
\q2 ባዞ ዋኣፆ ዔቶይዳ ዔኪ ኔ ዓጌኔ። \x - \xo 9፡11 \xo*\xt ኬሲ. ማፃ 14፡21-29፤ 15፡4-5።\xt*\x*
\q
\v 12 ሮኦሮ ኔ ዔያቶ ፒዝ ጌይ ዔቄ ሻኣሬና ካኣሌሤኔ፤
\q2 ዋንቶ ጎይፆ ዔያቶኮ ኔ ፒዝ ጌዒ ዔቄ ታሚና ፖዔኔ፤ \x - \xo 9፡12 \xo*\xt ኬሲ. ማፃ 13፡21-22።\xt*\x*
\q
\v 13 ጫሪንጫፓ ሲና ዹኮይዳ ኔ ኬዲ
\q2 ዴሮና ኔኤኮ ኔ ጌስቴኔ፤
\q2 ፒዜ ማዔ ዎጎና ዳምቦና
\q2 ኮሺ ማዔ ዳምቦና ዓይሢፆና ኔ ዔያቶም ዒንጌኔ።
\q
\v 14 ኔኤኮ ዱማዼ ሃውሾ ኬሎ ዔያቶ ኔ ዔርዜኔ፤
\q2 ኔ ዓይላሢ ሙሴ ዛሎና
\q2 ኔ ዓይሢፆ፥ ኔ ዳምቦንታ ኔኤኮ ዎጎንታ ኔ ዔያቶም ዒንጌኔ።» \x - \xo 9፡14 \xo*\xt ኬሲ. ማፃ 19፡18—23፡33።\xt*\x*
\b
\q
\v 15 «ዔያታ ናይዻዛ ጫሪንጫፓ ሙኡዚ ኔ ዔያቶም ዒንጌኔ፤
\q2 ዔኤታ ዼኤቢንታዛ ላላፓ ዋኣሢ ኔ ዔያቶም ኬሴኔ፤
\q ኔ ዔያቶም ዒንጋኒ ጫኣቄ ዓጮ
\q2 ዔያታ ፔ ዴማ ማሃንዳጉዲ ኔ ዔያቶ ዓይሤኔ። \x - \xo 9፡15 \xo*\xt ኬሲ. ማፃ 16፡4-15፤ 17፡1-7፤ ላሚ. ዎማ 1፡21።\xt*\x*
\q
\v 16 ጋዓንቴ ኑኡኮ ቤርታኣ ዓዶንሢ ዖቶርቃያና ዋይዚ ዒፃ ዓሲ ማዔኔ፤
\q2 ኔ ዎጎና ናንጊፆዋ ዔያታ ዒፄኔ፤ \x - \xo 9፡16 \xo*\xt ፓይ. ማፃ 14፡1-4፤ ላሚ. ዎማ 1፡26-33።\xt*\x*
\q
\v 17 ዔያታ ዓይሢንታያ ማዒባኣሴ።
\q2 ኔ ዎልቆና ኔ ዔያቶ ባኣካ ማዼ ባኮ ቢያ ዔያታ ዋሌኔ፤
\q2 ዋይዞ ዒፂ ዶዳያ ማዒ
\q2 ጊብፄ ዓይሉሞ ባንሢ ዔያቶ ዔኪ ዓኣዻንዳ
\q2 ሱኡጌ ዔያታ ዶኦሬኔ።
\q2 ኔኤኒ ጋዓንቴ ናሹሞ ኩሜያ
\q2 ዻጋዻኒ ሩኡሩዋያ ዓቶም ጋዓያ
\q2 ኮሺ፥ ሃሣ ዓቶም ጋዓ ፆኦሲ ማዔሢሮ ዔያቶ ኔ ሃሺባኣሴ። \x - \xo 9፡17 \xo*\xt ኬሲ. ማፃ 34፡6፤ ፓይ. ማፃ 14፡18።\xt*\x*
\q
\v 18 ናኣሪ ማሊሲ ካኣሽኮ ባኣዚ ፔኤም ዔያታ ኮሺ
\q2 ‹ጊብፄ ዓጫፓ ዔኪ ኑና ኬሴ ጎዳ ሃያኬ› ጌዔኔ፤
\q2 ዬያ ሌሊቱዋንቴ ዴኤሢ ጫሺ ኔና ዔያታ ጫሽኬኔ፤ \x - \xo 9፡18 \xo*\xt ኬሲ. ማፃ 32፡1-4።\xt*\x*
\q
\v 19 ጋዓንቴ ማኣሪፃ ኔኤኮ ዼኤፒታሢሮ
\q2 ዬያ ዓሳ ናንጉዋ ዳውሎይዳ
\q ዔያታ ባይቃንዳጉዲ ኔ ዔያቶ ሃሺባኣሴ፤
\q2 ሮኦሮና ዋንቶና ዔያቶ ዔኪ ዓኣዻንዳ
\q2 ሻኣሮ ሃሣ ጊንሣ ታሞ ፖዖ ኔ ዔያቶፓ ሺኢሺባኣሴ።
\q
\v 20 ዔያቶ ዔርዛንዳ ኔኤኮ ሚጪንታ ዓያኖ ኔ ዔያቶም ዒንጌኔ፤
\q2 ዔያታ ሙዓንዳ ማና፥ ሃሣ ዔያታ ዑሽካንዳ ዋኣሢያ ኔ ዔያቶም ዒንጌኔ።
\q
\v 21 ዖይዲታሚ ሌዔ ጉቤ ዓሳ ናንጉዋ ዳውላ ዔያታ ሃንታኣና ኔ ዔያቶ ማኣዴኔ፤
\q2 ዔያቶም ኮይሳ ዓይጎ ባኣዚያ ቢያ ኔ ዔያቶ ላኣጊባኣሴ፤
\q2 ማኣዓሢ ዔያቶኮ ዳርዒ ጋፒባኣሴ፤
\q2 ቶካኣ ዔያቶኮ ኪፂባኣሴ።»
\b
\q
\v 22 «ዔያታ ሜሌ ዴሮ ዓጮንታ ካኣቶንታ ዖሊ ባሺ
\q2 ዔያቶ ሳዖኮ ዛጶ ማዓ ዓጮ ዓርቃንዳጉዲ ኔ ማሄኔ፤
\q ሃሴቦኦኔ ካኣቲ ሲሆኔ ዓጮ
\q2 ባኣሳኣኔ ካኣቲ ዓጌ ዓጮዋ ዖሊ ዔያታ ዓርቄኔ፤ \x - \xo 9፡22 \xo*\xt ፓይ. ማፃ 21፡21-35።\xt*\x*
\q
\v 23 ሚርጉማ ጫሪንጮ ዉጫሢጉዲ ማዔ ናይ ዔያቶም ኔ ዒንጌኔ፤
\q2 ዔያቶኮ ቤርታኣ ዓዶንሢም ዒንጋኒ ኔ ጫኣቄ ዓጮ
\q2 ዖሎና ዔያታ ባሺ ዓርቃንዳጉዲ ኔ ማሄኔ። \x - \xo 9፡23 \xo*\xt ማዢ. ማፃ 15፡5፤ 22፡17፤ ዒያ. 3፡14-17።\xt*\x*
\q
\v 24 ናኣታ ዔያቶኮ ዖሎና ባሺ ካኣናኔ ዓጮ ዓርቄኔ፤
\q2 ዔያቶኮ ቤርታ ማዒ ዒኢካ ናንጋ ዴሮ ዖሎና ኔ ባሼኔ፤
\q2 ካኣቶንታ ዬኖ ካኣናኔ ዓጮ ዴሮናይዳ
\q2 ዔያታ ኮዔ ባኣዚ ቢያ ማዻንዳጉዲ ዎልቄ ኔ ዔያቶም ዒንጌኔ። \x - \xo 9፡24 \xo*\xt ዒያ. 11፡23።\xt*\x*
\q
\v 25 ኬልቂ ዲርቆና ካታሞና
\q2 ዬኖ ማሎ ዓጬሎ
\q2 ኮሺ ባኣዚና ቢያ ኩሜ ማኣሮ
\q2 ቦኦኪንቴ ዋኣፆ ዔቶንታ ዎይኖ ቱኮ ቤዞንታ
\q2 ሪሚቶንታ ሜሌ ዓኣፖ ዓኣፓ ሚርጌ ሚፆዋ
\q2 ቢያ ዔያታ ዔኬኔ፤
\q2 ሙዒ ሚሽኪ ዑፆ ፔኤኮ ዔያታ ዲጪሴኔ፤
\q2 ኔ ኮሹሞና ኔ ዔያቶም ዒንጌ ባኮና ቢያ ዔያታ ዎዛዼኔ።» \x - \xo 9፡25 \xo*\xt ላሚ. ዎማ 6፡10-11።\xt*\x*
\b
\q
\v 26 «ጋዓንቴ ኔ ዴራ ኔኤም ዋይዞ ዒፂ
\q2 ኔ ቃኣሎም ዓይሢንቲፆዋ ዒፄኔ፤
\q2 ኔ ዎጎም ዔያታ ዋይዞ ዒፂ ዙሎ ፔኤኮ ሺርሼኔ፤
\q2 ኔ ባንሢ ዔያታ ማዓንዳጉዲ ላቲ
\q2 ዔያቶ ዔርዜ ኔ ማሊፆ ኬኤዛዞንሢ ዔያታ ዎዼኔ፤
\q2 ሃሣ ቢያ ዎዴ ኔና ዔያታ ፑርታ ጫሺ ጫሽኬኔ፤
\q
\v 27 ዬያሮ ሞርካ ዖሎና ዔያቶ ባሺ
\q2 ዔያቶ ዎይሣንዳጉዲ ዓኣሢ ኔ ዔያቶ ዒንጌኔ፤
\q2 ሞርካ ዔያቶ ሄርቂ ዎይሤኔ።
\q2 ዔያቶ ሜቴ ዎዶና ማኣዶ ዴንቃኒ
\q2 ኔ ባንሢ ዔያታ ዒላቴኔ፤
\q2 ኔኤኒያ ጫሪንጫ ዓኣዖ ዔያቶም ዋይዜኔ፤
\q2 ኔኤኮ ዼኤፖ ማኣሪፆይዳፓ ዔቄያና
\q ዔያቶ ሞርካፓ ዔያቶ ዓውሳንዳ ሱኡጌ ኔ ዔያቶም ዳኬኔ።
\q
\v 28 ጋዓንቴ ኮሺ ዔያቶም ማዔ ዎዶና
\q2 ጊንሣ ዔያታ ጎሜ ማዼኔ፤
\q2 ዬያሮ ዖሎና ዔያቶ ባሻንዳ ሞርኮም ኔ ዔያቶ ሃሼኔ፤
\q2 ሞርካኣ ዔያቶ ዎይሤኔ፤
\q2 ኔ ዔያቶ ማኣዳንዳጉዲ
\q2 ጊንሣ ኔና ዔያታ ዖኦጬ ዎዶና
\q2 ኔኤኒ ጫሪንጫ ዓኣዖ ዔያቶም ዋይዜኔ፤
\q2 ኔኤኮ ሚጪንቶ ዼኤፑማፓ ዔቄያና
\q2 ቢያ ዎዴ ኔ ዔያቶ ዓውሴኔ። \x - \xo 9፡28 \xo*\xt ሱኡጎ. ማፃ 2፡11-16።\xt*\x*
\q
\v 29 ዔያታ ኔ ዎጎ ባንሢ ማዓንዳጉዲ
\q2 ኔ ዔያቶም ላቴኔ፤
\q2 ጋዓንቴ ዔያታ ፔ ዖቶርሙሞና ዓይሢፆ ኔኤሲ ቦሄኔ፤
\q2 ማዺ ዔያታ ኩንሤቶ ሼምፔ ዔያቶም ዒንጋንዳ
\q2 ኔ ዎጎ ዻቢ ጎሜ ዔያታ ማዼኔ።
\q2 ዒኔ ባይቂሢና ዓኣፖ ካሮ ዔያታ ፔኤኮ ሺርሼኔ፤
\q2 ዋይዚ ዒፃያ ማዒ ዶዲፆና ዋይዙዋኣያ ማዔኔ። \x - \xo 9፡29 \xo*\xt ሌዊ. ዓኬ 18፡5።\xt*\x*
\q
\v 30 ሚርጌ ሌዔ ኔ ዔያቶ ጊቤኔ፤
\q2 ዔያቶ ዔርዛንዳጉዲ ኔ ማሊፆ ኬኤዛዞንሢ
\q2 ኔኤኮ ዓያኖና ኔ ዔያቶም ዔቂሴኔ፤
\q2 ጋዓንቴ ዔያታ ኔኤም ዋይዚባኣሴ፤
\q2 ዬያሮ ዔያቶኮ ዓሺኖ ማዔ ሜሌ ዴራ ዖሎና ዔያቶ ባሻንዳጉዲ
\q2 ዓኣሢ ኔ ዔያቶ ዒንጌኔ። \x - \xo 9፡30 \xo*\xt 2ካኣቶ. ማ 17፡13-18፤ 2ፆኦሲ. ዓሃኬ 36፡15-16።\xt*\x*
\q
\v 31 ጊንሣ ኔኤኮ ማኣሪፆ ዼኤፑማፓ ዔቄያና
\q2 ኔ ዔያቶ ሃሺባኣሴ፤
\q2 ኔኤኒ ኮሺ፥ ሃሣ ዓቶም ጋዓ ፆኦሲታሢሮ
\q2 ኔ ዔያቶ ባይዚባኣሴ።»
\q
\v 32 «ኔኤኮ ጫኣቁሞንታ ናንጊና ናንጋ ናሹሞ ካፓ
\q2 ዼኤፖ ዎልቆና ዒጊቻ ኑ ፆኦዛሢዮ!
\q2 ኑጊዳ፥ ኑ ካኣቶይዳ፥ ኑ ሱኡጎይዳ፥
\q2 ኑ ቄኤሶይዳ፥ ኔ ማሊፆ ኑም ኬኤዛዞንሢዳ፥
\q2 ኑኡኮ ቤርታኣ ማዖንሢንታ ዬያጉዲ ኔ ዴሮ ጉቤሢዳ
\q2 ዓሶኦሬ ካኣቶይዳፓ ዴንዲ ሃኖ ሄላንዳኣና
\q2 ኑና ሄሌ ሜታሢ ቢያ ማሌ። \x - \xo 9፡32 \xo*\xt 2ካኣቶ. ማ 15፡19፤29፤ 17፡3-6፤ ዒዝ. 4፡2፤ 10።\xt*\x*
\q
\v 33 ኔ ኑጊዳ ዎጋኒ ማሊ ማዼ ባካ ፒዜኬ፤
\q2 ኑኡኒ ዻቢንቲ ማዼያ ማዔቴያ ኔኤኒ ኔኤኮ ጉሙርቂንቲፆና ዶዴ ቤዛኬ።
\q
\v 34 ኑኡኮ ቤርታኣ ዓዶንሢንታ ካኣቶንታ
\q2 ኑኡኮ ሱኡጎንታ ቄኤሶንታ
\q2 ኔ ዎጎ ዔያታ ካፒባኣሴ፤
\q2 ኔ ዔያቶ ዓይሤ ዓይሢፆንታ ላቲፆዋ ዔያታ ዋይዚባኣሴ።
\q
\v 35 ዔያቶኮ ካኣቶና ኔ ዔያቶም ዒንጌ ዓንጆና
\q2 ኔ ዔያቶም ዒንጌ ዳልጎና ማሎ ዓጮናይዳ
\q2 ዔያታ ዎዛዺ ናንጋ ዎዶናታዖ
\q2 ኔና ዔያታ ካኣሽኪባኣሴ፤
\q2 ዔያቶኮ ጎማፓኣ ዔያታ ማዒባኣሴ።
\q
\v 36 ዬያሮ ኔኤኒ ኑ ዓዶንሢም ዓኣፖ ዔያታ ሙዓንዳጉዲና
\q2 ኮሺ ባኣዚና ዔያታ ዎዛዻንዳጉዲ
\q2 ኔ ዔያቶም ዒንጌ ሳዔሎይዳ
\q2 ሃይሾ፥ ኑ ሃኖ ካራሚ ማዔኔ።
\q
\v 37 ኑ ጎሜ ማዼሢሮ ኔ ዖዪ
\q2 ኑና ዎይሣንዳጉዲ ኔ ማሄ
\q2 ኔኤኒ ዔቂሴ ካኣቶም
\q2 ዓጬሎኮ ዓንጆ ዔያቶም ኑ ጊኢሪፆይዳኬ፤
\q2 ዔያታ ኑኡና ኑ ቆልሞናይዳ
\q2 ዔያቶም ኮሽኬ ባኣዚ ቢያ ማዺ ኩንሣኔ፤
\q2 ዬያይዳፓ ዔቄያና ኑ ዼኤፒ ሜቶይዳኬ።»
\s1 ዴራ ጊኢጊ ዎላ ቱኬ ባኮ
\p
\v 38 ማዺንቴ ባኮ ቢያ ኑኡኒ ዔኤዔያ ማዒፆ ፃኣፒ ጌሣኒ ኑ ጌስቴኔ፤ ዬኖ ኑኡኮ ፃኣፒ ጌሦናዞይዳ ኑኡኮ ሱኡጎንታ ሌዊ ዓሶንታ ቄኤሶንታ ፔኤኮ ዱማሲ ዔርዛ ማላቶ ዓይሤኔ።
\c 10
\p
\v 1 ዱማሲ ዔርዛ ባኮ ዓይሤ ዓሳ ሃካሊያ ናኣዚ ዓጮ ዎይሣሢ ኔሄሚያ፥ ሴዴቂያሴ፤
\b
\p
\v 2-8 ቄኤሶ ፃጳፓ፦
\q ሴራያ፥ ዓዛሪያ፥ ዔርሚያሴ፥
\q ፓሽሁሬ፥ ዓማሪያ፥ ማልኪያ፥
\q ሃፁሼ፥ ሼባኒያ፥ ማሉኬ፥
\q ሃሪሜ፥ ሜሬሞቴ፥ ዓብዲዩ፥
\q ዳኣኔኤሌ፥ ጊኔቶኔ፥ ባሩኬ፥
\q ሜሹላሜ፥ ዓቢያ፥ ሚያሚኔ፥
\q ሜዓዝያ፥ ቢልጋዬና ሼማዒያናኬ።
\p
\v 9-13 ሌዊ ዓሶ ፃጳፓ፦
\q ዓዛኒያ ናኣዚ ዒያሱ፥
\q ሄናዳዴ ናኣዚ ቶኦኮ ማዔሢ ቢኑዬ፥
\q ቃድሚዔኤሌ፥ ሼባኒያ፥ ሆዲያ፥
\q ቄሊፃ፥ ፔላያ፥ ሃናኒ፥
\q ሚካ፥ ሬሆቤ፥ ሃሻቢያ፥
\q ዛኩሬ፥ ሼሬቢያ፥ ሼባኒያ፥
\q ሆዲያ፥ ባኒንታ ቤኒኑንታኬ።
\p
\v 14-27 ዴሮኮ ሱኡጎ ፃጳፓ፦
\q ፓርዖሼ፥ ፓሃትሞዓኣቤ፥
\q ዔላኣሜ፥ ዛቱ፥ ባኒ፥
\q ቡኒ፥ ዓዝጋኣዴ፥ ቤባዬ፥
\q ዓዶኒያ፥ ቢግዋዬ፥ ዓዲኔ፥
\q ዓፄሬ፥ ሂዚቂያሴ፥ ዓዙሬ፥
\q ሆዲያ፥ ሃሹሜ፥ ቤፃዬ፥
\q ሃሪፔ፥ ዓናቶቴ፥ ኔባዬ፥
\q ማግፒዓሼ፥ ሜሹላሜ፥ ሄዚሬ፥
\q ሜሼዛቤሌ፥ ፃዶቄ፥ ያዱዓ፥
\q ፔላፂያ፥ ሃናኒ፥ ዓናያ፥
\q ሆሴዔ፥ ሃናኒያ፥ ሃሹቤ፥
\q ሃሎሄሼ፥ ፒሊሃ፥ ሾቤቄ፥
\q ሬሁሜ፥ ሃሻቢና፥ ማዕሴያ፥
\q ዓኪያ፥ ሃናኒ፥ ዓናኒ፥
\q ማሉኬ፥ ሃሪሜና ቤዓናኬ።
\s1 ጊኢጊ ዎላ ቱኮና ባኮ
\p
\v 28 ዓቴ ሃንጎ ዓሳ፥ ቄኤሳ፥ ሌዊ ዓሳ፥ ጌኤዦ ማኣሮ ካፓ ዓሳ፥ ጌኤዦ ማኣራ ፆኦሲ ቦንቾም ዓይኑሞ ዓይናዻ ዓሳ፥ ጌኤዦ ማኣሮይዳ ማዻ ዓሳ፥ ፆኦሲ ዎጎም ዓይሢንታያ ማዔ ኑ ዓሺኖይዳ ናንጋ ሜሌ ዓጮ ዴሮይዳፓ ፔና ዱማሴ ዓሳ ፔኤኮ ላኣሎንታ ዓቲንቆንታ ዉዱሮ ናኣቶንታ ዎላ፥ 
\v 29 ዬያታ ቢያ ፔኤኮ ጌርሲንሢ ማዔ ሱኡጎና ዎላ ፔቴ ማዒ ፆኦሲ ዓይላሢ ሙሴ ዛሎና ዒንጊንቴ ናንጊና ናንጋ ጎዳ ማዔ ኑ ፆኦዛሢኮ ዓይሢፆም፥ ዎጎና ዳምቦናም ቢያ ዓይሢንታያ ማዓኒ «ዓይሢንቲባኣቴ ኑና ባይዞም!» ጌይ ጫኣቄኔ።
\p
\v 30 ኑ ዓሺኖይዳ ዓኣ ሜሌ ዴሮም ኑኡኮ ዉዱሮ ናኣቶ ዔያቶኮ ዓቲንቆ ናኣቶም ኑ ዒንጋኑዋኣሢና ዔያቶኮ ዉዱሮ ናኣቶ ኑኡኮ ዓቲንቆ ናኣቶም ኑ ዔካኑዋኣሢያ ጫኣቃኔ። \x - \xo 10፡30 \xo*\xt ኬሲ. ማፃ 34፡16፤ ላሚ. ዎማ 7፡3።\xt*\x*
\p
\v 31 ሜሌ ዓጮ ዴራ ሃውሾ ኬሎና ማዔቴያ ሜሌ ቦንቾ ኬሎና ሃኣኮዋ ማዖም ሜሌ ኮርሞም ማዓ ባኣዚ ዔኪ ሙኬቴ ዔያቶይዳፓ ኑ ሻንቃዓ። \x - \xo 10፡31 \xo*\xt ኬሲ. ማፃ 23፡10-11፤ ሌዊ. ዓኬ 25፡1-7፤ ላሚ. ዎማ 15፡1-2።\xt*\x*
\p ሃሣ ላንካሳ ሌዖይዳ ሌዖይዳ ኑ ጎሽካ ሳዖ ጎሽኩዋዖ ሃሻንዳኔ፤ ኑ ዓሲም ታልዔ ጋሌ ዓኣቴያ ዒዞ ሌዖይዳ ኑ ሃሻንዳኔ።
\p
\v 32 ሌዓ ሌዓ ጌኤዦ ማኣሮ ማዾም ማዓንዳያ ኑኡኒ ፔቴ ፔቴሢ ኑኡኮ ዓኣ ቢራፓ ሃይሦ ኩቺፓ ፔቴማ ዔኪ ሙኪ ኑ ዒንጋንዳኔ። \x - \xo 10፡32 \xo*\xt ኬሲ. ማፃ 30፡11-16።\xt*\x*
\p
\v 33 ዬያጉዲ ሃሣ ጌኤዦ ማኣሮ ማዾም ሃካፓ ሊካ ዓኣ ባኮ ኑ ኩንሢ ሺኢሻንዳኔ፦ ዬይ ባካ ፆኦሲም ዱማዼ ካሦ፥ ቢያ ኬላ ኬላ ዒንጋኒ ኮይሳ ሃኣኮ ዒንጊፆ፥ ሚቺ ዒንጎ ዒንጊፆም ማዓ ቆልሞ፥ ሃውሾ ኬሎንታ ዓጊኖ ፄኤሮንታ ሜሌ ቦንቾ ኬሎም ሺኢሾ ባኮ፥ ፆኦሲም ዱማዼ ዒንጊፆ ሜሌሢ ቢያ፥ ዒስራዔኤሌ ዓሶኮ ጎሞ ጌኤሻኒ ዒንጊንታኒ ኮይሳሢና ጌኤዦ ማኣሮ ማዾም ኮይሳ ሜሌ ባኮ ቢያ ኑ ፓጪሳዓኬ።
\p
\v 34 ዎጎይዳ ሚቺ ዒንጎ ባኮ ዛሎኮ ፃኣፒንቴ ጎይፆና ናንጊና ናንጋ ጎዳ ማዔ ኑ ፆኦዛሢም ዒንጊንታ ባኮ ሚቾንዶ ሃንፂሎ ዎኖ ቶኦካ ዒንጋኒ ኮይሳቴያ ኑኡኒ፥ ዴራ፥ ቄኤሶንታ ሌዊ ዓሶንታ ሌዓ ሌዓ ዒፃ ዓጊሢና ኑ ዱማሳንዳኔ።
\p
\v 35 ማኣሎ ኑኡኮ ኑ ቡራኣና ዱማ ዱማ ሚፆኮ ዓኣፖ ኑ ማንፃ ዓጊኖና ቤርታ ካፄ ቲሻሢ ጌኤዦ ማኣሪ ዔኪ ሙኪ ሙኪ ኑ ዒንጋንዳኔ። \x - \xo 10፡35 \xo*\xt ኬሲ. ማፃ 23፡19፤ 34፡26፤ ላሚ. ዎማ 26፡2።\xt*\x*
\p
\v 36 ኑኡኒ ፔቴ ፔቴሢ ሾዓ ዓቲንቆ ናኣቶኮ ቶይዶ ዔኪ ጌኤዦ ማኣሮይዳ ማዻ ቄኤሳሢም ሺኢሺሢና ዎጋ ዓይሣ ጎይፆ ፆኦሲም ዱማዼያ ኑ ማሃንዳኔ፤ ሃሣ ኑኡኮ ባኣቶና ማራቶና ዋኣሮናይዳፓ ሾይንታ ናኣሮንታ ማራናኣቶንታ ዋናናኣቶንታኮ ቤርታሳዞንሢ ቢያ ፆኦሲም ኑ ዱማሳንዳኔ። \x - \xo 10፡36 \xo*\xt ኬሲ. ማፃ 13፡2።\xt*\x*
\p
\v 37 ኑኡኒ ቡኩሴ ሃኣኮኮ ቤርቶ ዺኢሎ ዔኪ ጌኤዦ ማኣራ ማዻ ቄኤሳሢም ኑ ዒንጋንዳኔ፤ ሜሌ ሃሣ ዎይኖ ዑዣ፥ ዛይቶ ሪሚቶንታ ዬያጉዴ ባኮ ዓኣፖኮ ቢያ ቤርቶ ፆኦሲም ዒንጋኒ ኑ ሺኢሻንዳኔ። \x - \xo 10፡37 \xo*\xt ፓይ. ማፃ 18፡21።\xt*\x*
\p ኑኡኮ ጎዦ ዛሎ ጊኢሮ ጊኢሪሻ ሌዊ ዓሶም ኑኡኮ ጎዣ ካፂሳ ሃኣኮይዳፓ ታጶኮ ፔቴ ኩቺ ኑ ዒንጋንዳኔ። 
\v 38 ታጳፓ ፔቴማ ዒንጊንታ ዎዶና ሾይንታ ዓኣሮኔ ፃጳፓ ማዔ ቄኤሳ ሌዊ ዓሶና ዎላኬ፤ ጌኤዦ ማኣሮ ማዾም ሌዊ ዓሳ ታጳፓ ፔቴማ ቡኩሲሳሢኮ ጊንሣ ታጳሢኮ ፔቴማ ኬሲ ኬሲ ጌኤዦ ማኣሮኮ ሜሆ ጌሦ ማኣሮ ጌልዛንዳኔ። \x - \xo 10፡38 \xo*\xt ፓይ. ማፃ 18፡26።\xt*\x* 
\v 39 ዒስራዔኤሌ ዴሮንታ ሌዊ ዓሶንታ ሃኣኮይዳፓ፥ ዎይኖ ዑዦና ሪሚቶ ዛይቶናይዳፓ ቡኩሶና ዒንጊፆ ጌኤዦ ማኣራ ማዾ ማዺንቶ ሜሃ ጌሢንታ ቤዞ፥ ዒኢካ ማዻ ቄኤሶንታ ካፓ ዓሶንታ ዓይኑሞ ዓይናዻ ዓሳኣ ዴይ ሃውሻ ቤዞ ማዔ ሜሆ ጌሦ ማኣሮ ዔኪ ዬዓንዳያ ኮይሳኔ።
\p ኑ ፆኦዛሢኮ ማኣሮ ፔቴታዖ ኑኡኒ ዋላዓኬ።
\c 11
\s1 ዬሩሳላሜይዳ ናንጋ ዴሮ
\p
\v 1 ሱኡጋ ፔኤኮ ናንጎ ቤዞ ዬሩሳላሜይዳ ማሄኔ፤ ሃንጎ ዓቴ ዴሮ ባኣካፓ ታጶ ማኣሪ ዓሲዳፓ ፔቴማ ፆኦሲም ዱማዼ ዬሩሳላሜ ካታሞይዳ ናንጋንዳጉዲ ዒፃ ዓጊሢና ዶኦሪንቴኔ፤ ሃንጎ ዓቴ ዴራ ጋዓንቴ ሜሌ ጉርዶና ካታሞናይዳ ቢያ ናንጎ ፔኤኮ ማሄኔ። 
\v 2 ዴራ ዒማና ዬሩሳላሜይዳ ፔ ማሊሢና ናሽኪ ናንጋኒ ማሊፃ ዓኣ ዓሶ ቢያ ጋላቴኔ። 
\v 3 ጊንሣ ሃሣ ሜሌ ጉርዶና ካታሞናይዳ ናንጋ ዒስራዔኤሌ ዴራ ቄኤሶንታ ሌዊ ዓሶንታ ጌኤዦ ማኣራ ማዻ ዓሶንታ ሴሎሞኔም ማዾ ማዻ ዓሶ ዜርፆንታ ፔኤኮ ጉርዳኣ ጉርዳ ዔያቶኮ ዓኣ ቤዛ ናንጌኔ። \x - \xo 11፡3 \xo*\xt ኔሄ. 7፡73።\xt*\x*
\p ዬሩሳላሜይዳ ናንጋ ዪሁዳ ዓጮ ሱኡጎኮ ሱንፃ ሃካፓ ዴማ ዓኣ ጎይፆኬ፤
\b
\m
\v 4 ዪሁዳ ዜርፆ ዓሳ፦
\p ዛካሪያሴ ናኣዚ ናዖ ማዔ፥ ዑዚያ ናኣዚ ዓታያ፤ ሜሌ ዒዛኮ ቤርታኣ ማዖንሢ ማዔ ዪሁዳ ናኣዚ ፓሬሴ ዜርፆ ማዔዞንሢ ዓማሪያ፥ ሼፓፂያንታ ሜሃላሊዔሌንታኬ። 
\v 5 ኮልሆዜኮ ናኣዚ ናዖ ባሩኬ ናኣዚ ማዒሴያ፤ ሜሌ ዒዛኮ ቤርታኣ ዓዶንሢ ማዔ ዪሁዳ ናኣዚ ሼኤላ ዜርፆንሢ ሃዛያ፥ ዓዳያ፥ ዮያሪቤንታ ዛካሪያሴንታኬ።
\p
\v 6 ፓርሴ ዜርፆ ባኣካፓ ዖልዚና ዔርቴያ ማዔ ዖይዶ ፄኤታና ላሂታሚ ሳሊ ዓሲ ዬሩሳላሜይዳ ናንጌኔ።
\b
\m
\v 7 ቢኢኒያሜ ዜርፆ ዓሳ፦
\p ዮዳሄኮ ናኣዚ ናዖ ሜሹላሜ ናኣዚ ሳሉ፤ ዒዛኮ ቤርታሳ ማዖንሢ፦ ፔዳያ፥ ቆላያ፥ ማዒሴያ፥ ዒቲዔኤሌንታ ሻዒያንታኬ። 
\v 8 ሳሉኮ ዑኬ ዒጊኖ ማዔ ዓሳ፦
\p ጋባዬና ሳላዬና፤ ዔያታ ዎሊ ዑፃ ታዞጳ ፄኤታና ላማታሚ ሳሊ ማዓ ቢኢኒያሜ ዓሲ ዬሩሳላሜይዳ ናንጋኔ። 
\v 9 ዚኪሪ ናኣዚ ዒዩዔኤሌ ዔያቶኮ ሱኡጋሢ ማዓዛ፥ ሃሴኑዓ ናኣዚ ዪሁዳ ዒዛኮ ዴማ ላምዓሳሢ ማዓ ቢታንቶ ዓኣያኬ።
\b
\m
\v 10 ቄኤሳ፦
\p ዮያሪቤ ናኣዚ፥ ያኪኔ ናኣዚ፥ ዪዳዒያ፤ 
\v 11 ሜሹላሜኮ ናኣዚ ናዖ ሂልቂያ ናኣዚ ሴራያ፤ ዒዛኮ ቤርታኣ ዓዶንሢ ፃዾቂኔ፥ ሜራዮቴንታ ቄኤሶ ቢያኮ ዑፃሢ ማዔ ዓሂፁቤንታኬ። 
\v 12 ዬኖ ቶኦኮይዳፓ ዎሊ ዑፃ ሳሊ ፄኤታና ላማታሚ ላምዖ ዓሲ ጌኤዦ ማኣሮይዳ ማዻኔ።
\p ፔላሊያኮ ናኣዚ ናዖ ዬሮሆሜ ናኣዚ ዓዳያ፤ ዒዛኮ ቤርታኣ ማዖንሢ ዓሞፂኔ፥ ዛካሪያሴ፥ ፓሽሁሬንታ ማልኪያንታኬ። 
\v 13 ዬኖ ቶኦኮይዳፓ ዎሊ ዑፃ ላምዖ ፄኤታና ዖይዲታሚ ላምዖ ዓሲ ዔያቶኮ ማኣሮ ዓሶ ሱኡጎኬ።
\p ዓህዛዬኮ ናኣዚ ናዖ ማዔ ዓዛርዔኤሌ ናኣዚ ዓማሽሳዬ፤ ዒዛኮ ቤርታኣ ማዖንሢ ሜሺሌሞቴና ዒሜሬናኬ። 
\v 14 ዒዛኮ ጌርሲንሢ ዶኦሪንታኣና ዔርቴ ፖኦሊሴ ማዔ ዓሶንሢኮ ሚርጉማ ፄኤታና ላማታሚ ሳሊኬ፤ ዔያቶኮ ሱኡጋሢ ሃጌዶሊሜ ናኣዚ ዛብዲዔኤሌኬ።
\b
\m
\v 15 ሌዊ ዓሳ፦
\p ዓዝሪቃሜኮ ናኣዚ ሃሹቤ ናዖ ሼማዒያ፤ ዒዛኮ ቤርታኣ ማዖንሢ ሃሻቢያንታ ቡኒንታኬ።
\p
\v 16 ሻቤታዬና ዮዛባዴ ጌይንታ ሌዊ ዓሶኮ ሱኡጋ ጌኤዦ ማኣራቱዋንቴ ዙላ ማዺንታ ባኮኮ ቢያ ሱኡጎንሢኬ።
\p
\v 17 ዓሳኣፔ ዜርፆ ዒጊናፓ ሾይንቴ ዛብዲኮ ናዖ ሚካ ናኣዚ ማታኒያ ጌኤዦ ማኣሮይዳ ጋላቶ ሺኢጲፆ ሺኢቂ ዓይኑሞ ዓይናዻ ዓሶኮ ሱኡጋሢኬ፤ ባቅቡቄ ጎዖሢ ማታኒያኮ ዴማ ማዒ ማዻያኬ፤
\p ሜሌሢ ሃሣ ዪዱቱኔ ዜርፃፓ ሾይንቴ ጋላሌኮ ናዖ ሻሙዓ ናኣዚ ዓብዳኬ፤
\p
\v 18 ሌዊ ዓሶ ዒጊናፓ ዎሊ ዑፃ ላምዖ ፄኤታና ሳሊታሚ ዖይዶ ዓሲ ፆኦሲም ዱማዼ ካታሜሎ ዬሩሳላሜይዳ ናንጋኔ።
\b
\m
\v 19 ጌኤዦ ማኣሮ ካፓ ዓሳ፦
\q ዓቁቤ፥ ፃልሞኔንታ ዔያቶኮ ዒጊና ዎሊ ዑፃ ፄኤታና ላንካይታሚ ላምዖኬ።
\p
\v 20 ዓቴ ዒስራዔኤሌ ዴሮንታ ቄኤሶንታ ሌዊ ዓሳኣ ዓቱዋዖ ዓኣ ዔያቶኮ ዓጮ ዓርቄ ጎይሣ ማዒ ሃንጎ ዪሁዳ ካታሞይዳ ናንጋኔ። 
\v 21 ጌኤዦ ማኣሮይዳ ማዻ ዓሳ ዬሩሳላሜ ካታሞኮ ፔቴ ዛላ ዖፔሌ ጌይንታ ጌሜራ ናንጋኔ፤ ፂሃና ጊሽፓ ጌይንታ ዓሳ ዔያቶ ዛጊ ማዾ ማዺሻኔ።
\p
\v 22 ዬሩሳላሜይዳ ናንጋ ሌዊ ዓሶ ሱኡጋሢ ሃሻቢያኮ ናኣዚ ባኒ ናዖ ዑዚኬ፤ ዒዛኮ ቤርታኣ ዓዶንሢ ማታኒያንታ ሚካንታኬ፤ ዒዚ ጌኤዦ ማኣሮይዳ ዓይኑሞ ዓይናዻ ዓሶ ሱኡጋሢ ዓሳኣፔ ዜርሢኬ። 
\v 23 ቢያ ኬላ ኬላ ዓይናዺንታ ዓይኑማ ዎሊ ሄሊ ሄሊ ማዓንዳጉዲ ካኣቲ ዓይሤ ዓይሥሢ ዓኣኔ።
\p
\v 24 ዪሁዳ ፃጳፓ ዛራሄ ቶኦኪ ማዔ ሜሼዛቤሌ ናኣዚ ፔታህያ ዒስራዔኤሌ ዴሮ ዛሎ ፓርሴ ካኣቲ ጌሤም ጌስታ ዓሲኬ።
\s1 ሃንጎ ጉርዶና ካታሞናይዳ ናንጋ ዴሮ
\p
\v 25 ዴሮይዳፓ ሚርጌሢ ናንጋሢ ጎዦኮ ዑኬ ዓኣ ጉርዶይዳኬ፤ ዬያሮ ዪሁዳ ዜርፆ ማዔዞንሢዳፓ ፔቴ ፔቴዞንሢ ዓርባዒ ካታሞና ኮይላ ዓኣ ጉርዶናይዳ፤ ጊቦኔና ዪቄብፂዔኤሌ ጌይንታ ካታሞንሢና ኮራ ዓኣ ጉርዶናይዳ ናንጋኔ፤ 
\v 26 ዬያጉዲ ሃሣ ዒያሱ፥ ሞላዳ፥ ቤትጳሌፄና 
\v 27 ሃፃርሹዓሌ ጌይንታ ካታሞንሢዳ ናንጋኔ፤ ዬያ ሌሊቱዋንቴ ቤርሳቤና ኮሮይዳ ዓኣ ጉርዳ ዔያቶኮ ናንጎ ቤዞኬ፤ 
\v 28 ፂቅላጌ ካታማ፥ ሜኮናና ኮሮይዳ ዓኣ ጉርዶ፥ 
\v 29 ዔንሪሞኔ፥ ፄሪዓ፥ ያርሙቴ፥ 
\v 30 ዛኖሃንታ ዓዱላሜንታ ጌይንታ ዬንሢ ካታሞንሢና ኮይላ ዓኣ ጉርዶናይዳ ናንጋኔ፤ ሃሣ ላኪሼና ኮይሎይዳ ዓኣ ጎዦ ቤዞ፥ ዓዜቃና ኮይሎይዳ ዓኣ ጉርዳ ቢያ ዔያቶኮ ናንጎ ቤዞኬ፤ ዬያይዲ ዪሁዳ ዴሮኮ ናንጎ ቤዛ ዾኦሎ ዛሎና ቤርሳቤፓ ኬዶ ዛሎና ሄኖሜ ዶኦጫ ማሃዛ ዓኣ ቤዞ ጋሮይዳኬ።
\p
\v 31 ቢኢኒያሜ ዴራ ናንጋ ቤዛ ሃሣ፦ ጌባዔ፥ ሚክማሴ፥ ዓዬ፥ ቤኤቴኤሌና ኮይሎይዳ ዓኣ ጉርዶይዳኬ፤ 
\v 32 ጊንሣ ሃሣ ዓናቶቴ፥ ኖቤ፥ ዓናኒያ፥ 
\v 33 ሃፆሬ፥ ራማ፥ ጊታይሜ፥ 
\v 34 ሃዲዴ፥ ፆቦዒሜ፥ ኔባላፄ፥ 
\v 35 ሎዴና፥ ዖኖ፤ ዬያጉዲ ሃሣ «ጊታሢ ዶኦጮ» ጌይንታ ቤዛ ቢያ ዔያቶኮ ናንጎ ቤዞኬ። 
\v 36 ዪሁዳ ዓጮይዳ ናንጋ ሌዊ ዓሶ ባኣካፓ ፔቴ ፔቴዞንሢ ቢኢኒያሜ ዴሮና ዎላ ናንጋንዳጉዲ ማሆናኔ።
\c 12
\s1 ቄኤሶና ሌዊ ዓሶናኮ ሱንፆ
\p
\v 1 ሳላቲያሌ ናኣዚ፥ ዜሬባቡሌና ቄኤሶ ቢያኮ ዑፃሢ ዒያሱና ዎላ ዲዒንታፓ ማዔ ቄኤሶና ሌዊ ዓሶናኮ ሱንፃ ሃካፓ ዴማ ዓኣ ጎይፆኬ፤
\p
\v 2-7 ቄኤሳ፦
\q ሴራያ፥ ዔርሚያሴ፥ ዒዝራ፥
\q ዓማሪያ፥ ማሉኬ፥ ሃፁሼ፥
\q ሼካኒያ፥ ሬሁሜ፥ ሜሬሞቴ፥
\q ዒዶ፥ ጊኔቶኔ፥ ዓቢያ፥
\q ሚያሚኔ፥ ሜዓዲያ፥ ቢልጋ፥
\q ሼማዒያ፥ ዮያሪቤ፥ ዪዳዒያ፥
\q ሳሉ፥ ዓሞኬ፥ ሂልቂያንታ ዪዳዒያንታኬ።
\p ዬንሢ ቄኤሶንሢ ቄኤሶ ቢያኮ ዑፃሢ፥ ዒያሱ ዎዶና ዔያቶኮ ዒጊኖ ቄኤሶኮ ሱኡጎ ማዔዞንሢኬ።
\p
\v 8 ሌዊ ዓሳ፤
\p ፆኦሲ ቦንቾም ጋላቶ ዓይኑሞ ዓይናዻ ዓሶኮ ሱኡጎ ማዔ ሌዊ ዓሳ፦ ዒያሱ፥ ቢኑዬ፥ ቃድሚዔኤሌ፥ ሼሬቢያ፥ ዪሁዳንታ ማታኒያንታኬ።
\p
\v 9 ባቅቡቂያ፥ ዑኖንታ ሃንጎ ዔያቶኮ ጌርሲንሢ ማዓ ሌዊ ዓሲንታ ዔያቶና ዎላ ዎሊ ዓኣሢ ዓኣሢ ዓይኑሞ ዓይናዻኔ።
\s1 ቄኤሶ ቢያኮ ዑፃሢ ዒያሱ ዜርፆ
\p
\v 10 ዒያሱ ዮያቂሜ ሾዓዛ ዮያቂሜ ዔሊያሺቤ፥ ዔሊያሺቤ ዮያዳዔ ሾዔኔ፤ 
\v 11 ዮያዳዔ ዮናታኣኔ ሾዔኔ፤ ዮናታኣኔ ያዱዓ ሾዔኔ።
\s1 ቄኤሶ ቶኦኮኮ ሱኡጎ
\p
\v 12-21 ዮያቂሜ ቄኤሶ ቢያኮ ዑፃሢ ማዒ ዓኣ ዎዶና ሃካፓ ዴማ ዓኣ ቄኤሳ ቄኤሶ ቶኦኮኮ ሱኡጎንሢኬ፦
\m ሴራያ ቶኦኮኮ ቄኤሳሢ ሜራያ
\m ዔርሚያሴ ቶኦኮኮ ቄኤሳሢ ሃናኒያ
\m ዒዝራ ቶኦኮኮ ቄኤሳሢ ሜሹላሜ
\m ዓማሪያ ቶኦኮኮ ቄኤሳሢ ዬሆሃናኔ
\m ሜሉኪ ቶኦኮኮ ቄኤሳሢ ዮናታኣኔ
\m ሼካኒያ ቶኦኮኮ ቄኤሳሢ ዮሴፔ
\m ሃሪሜ ቶኦኮኮ ቄኤሳሢ ዓዲና
\m ሜራዮቴ ቶኦኮኮ ቄኤሳሢ ሂልቃዬ
\m ዒዶ ቶኦኮኮ ቄኤሳሢ ዛካሪያሴ
\m ጊኔቶኔ ቶኦኮኮ ቄኤሳሢ ሜሹላሜ
\m ዓቢያ ቶኦኮኮ ቄኤሳሢ ዚኪሪ
\m ሚንያሚኔ\f + \fr 12፡12-21 \fr*\fq ዔብሬ ዓሶ ሙኡጮ ማፃኣፖይዳ ሃኖ ቤዛ ሱንሢ ዓሲኮ ባኣሴ።\fq*\f*
\m ሞዓዲያ ቶኦኮኮ ቄኤሳሢ ፒልፃዬ
\m ቢልጋ ቶኦኮኮ ቄኤሳሢ ሻሙዓ
\m ሼማዒያ ቶኦኮኮ ቄኤሳሢ ዮሆናታኣኔ
\m ዮያሪቤ ቶኦኮኮ ቄኤሳሢ ማትናዬ
\m ዪዳዒያ ቶኦኮኮ ቄኤሳሢ ዑዚ
\m ሳላዬ ቶኦኮኮ ቄኤሳሢ ቃላዬ
\m ዓሞቄ ቶኦኮኮ ቄኤሳሢ ዔቤሬ
\m ሂልቂያ ቶኦኮኮ ቄኤሳሢ ሃሻቢያ
\m ዪዳዒያ ቶኦኮኮ ቄኤሳሢ ናቲናዔኤሌኬ።
\s1 ቄኤሶና ሌዊ ማኣሮ ዓሶናኮ ሱንፃ ፃኣፒንቲ ዓኣ ማዝጋቦ
\p
\v 22 ዔሊያሺቤ፥ ዮያዳዔ፥ ዮናታኣኔና ያዱዓ ጌይንታ ቄኤሶ ቢያኮ ዑፆ ማዔዞንሢ ዓኣ ዎዶና ሌዊ ዓሶንታ ቄኤሶ ማኣሮ ዓሶንታኮ ሱኡጋ ዱማዺ ዔርታንዳ ፃኣፖና ባኣዚ ጊኢጊሺንቴኔ፤ ዬና ጊኢጊሺ ፃኣፖናዛ ዳኣሪዮሴ ፓርሴ ዓጮይዳ ካኣታዺ ዓኣ ዎዶናኬ።
\p
\v 23 ጋዓንቴ ሌዊ ማኣሮ ዓሶኮ ሱኡጋ ፔጌና ፃኣፒንቲ ዔርቴሢ ዔሊያሺቤኮ ናኣዚ ናዖ ማዔ ዮናታኣኔ ሼምፔና ዓኣ ዎዶማና ሌሊኬ።
\s1 ጌኤዦ ማኣሮ ማዾ ፓቂ ዒንጎና ጎይፆ
\p
\v 24 ሌዊ ዓሳ፦ ሃሻቢያ፥ ሼሬቢያ፥ ዒያሱ፥ ቢኑዬንታ ቃድሚዔኤሌንታ ሱኡጋቶና ላምዖ ቤሲ ፓቂንቴኔ። ዬንሢ ላምዖ ፓቂንቴዞንሢ ፆኦሲ ዓሢ ማዔ፥ ካኣቲ ዳውቴ ዓይሤ ዳምቦ ጎይፆና ዎሊም ዓኣሢ ዓኣሢ ፆኦሲ ቦንቾም ጋላቶ ዓይኑሞ ዓይናዺ ፆኦሲ ዔያታ ጋላታኔ።
\p
\v 25 ጌኤዦ ማኣሮኮ ኬኤሎ ዲፆ ካሮ ኮይላ ማዢንቴ ሜሆ ጌሦ ማኣሮ ካፓዞንሢ፦ ማታኒያ፥ ባቅቡቂያ፥ ዖባዲያ፥ ሜሹላሜ፥ ፃልሞኔና ዓቁቤ ጌይንታዞንሢኬ።
\p
\v 26 ዬንሢ ዒዮፄዴቄኮ ናኣዚ ናዖ ማዔ ዒያሱ ናኣዚ ዮያቂሜ፥ ዓጮ ዎይሣ ኔሄሚያንታ ዎጎ ዛሎ ኮሺ ዔራ ቄኤሳሢ ዒዝራ ዓኣ ዎዶና ማዾም ጌሦናዞንሢኬ።
\s1 ዬሩሳላሜ ካታሞኮ ኬኤሎ ዲፃ ኮሺንቴሢሮ ቦንቺንቴ ቦንቾ
\p
\v 27 ዬሩሳላሜ ካታሞኮ ዲፆ ኮሺ ጋፒሶናሢሮ ቦንቺንቴ ዓቦና ሌዊ ዓሳ ሂቾንታ ሚርጌ ሻዦ ዴንሢ ዋርቆ ጎኦሎና ፔቴ ሻዦ ዴንሢ ዋርቆ ጎኦሎና ዋርቂ ዋርቂ ቦንቻንዳጉዲ ዔያታ ናንጋ ቤዛፓ ኮይንቲ ሙኬኔ። 
\v 28 ዬኖ ቦንቾ ኬሎ ቦንቻኒ ሌዊ ማኣሮ ዓሶፓ ፆኦሲ ቦንቾም ዓይኑሞ ዓይናዻዞንሢ ቢያ ዱንኪ ዴዒ ዓኣ ቤዞ ዬሩሳላሜ ኮይሎና ኔፆፓ ጌይንታ ቤዞናኮ ዻኮ ዻኮ ካታማፓ፥ 
\v 29 ቢትጊልጋሌ፥ ጌባዔንታ ዓዝማዌቴንታፓ ቡኪንቲ ሙኬኔ፤ 
\v 30 ዒማና ቄኤሶና ሌዊ ዓሶና ፔ ዛሎንታ ዴሮ ዛሎንታ ካታሜሎኮ ጌሎ ካሮንታ ዲሮንታኮ ጌኤሺፆ ዳምቦ ማዺ ኩንሤኔ።
\p
\v 31 ታኣኒ፥ ኔሄሚያ ሹጮ ኬኤሎ ዲፆ ዑፆ ዪሁዳ ዓሶኮ ሱኡጎ ኬሴስካፓ ዓይናዻ ዓሶ ላምዖ ዼኤፒ ዼኤፒ ቤሲ ፓቂ ፆኦሲ ቦንቾም ጋላታ ዓይኑሞ ዓይናዻንዳጉዲ ማሄኔ፤
\p ቤርታሲ ታኣኒ ኬሴ ዓሳ ኬኤሎ ዲፆ ዑፆና ጌይ ሚዛቆ ዛላ ዓኣ ቡኡሮ ላኣሎ ቤዞ ባንፆና ዴንዴኔ፤ 
\v 32 ዬካፓ ሆሻዒያና ዓይሁዶ ዓሶኮ ሱኡጎና ዔያቶ ጊንፆ ዓኣዼኔ። 
\v 33-35 ሃሣ ዓዛሪያ፥ ዒዝራ፥ ሜሹላሜ፥ ዪሁዳ፥ ቢኢኒያሜ፥ ሼማዒያንታ ዔርሚያሴ ጌይንታ ቄኤሶንሢ ዎሊ ጊንፆ ዒኢና ዓኣዼኔ፤ ሄሊሳዖ ዲንኮ ዋርቃ ዻካ ቄኤሴንታ፤ ዬያጉዲ ሃሣ ዛካሪያሴ ጌይንታ ዮናታኣኔ ናኣዚ፥ ሼማዒያ ናኣዚ፥ ማታኒያ ናኣዚ፥ ሚኪያ ናኣዚ፥ ዛኩሬ ናኣዚ፥ ዓሳኣፔ ናኣዚ ዴንዴኔ። 
\v 36 ዒዛ ቶኦኮ ማዔ፦ ሼማዒያ፥ ዓዛርዔኤሌ፥ ሚሌላዬ፥ ጊሌላዬ፥ ማዓዬ፥ ናትናዔኤሌ፥ ዪሁዳንታ ሃናኒንታ ፆኦሲ ዓሢ ዳውቴ ፆኦሲ ቦንቾም ዓይናዻ ዓይኑሞ ዓንጋሞ ቢያ ኬዲ ዒዛ ጊንፆ ዓኣዼኔ፤ ዬኖ ዎሊ ጊንፆ ዓኣዻ ዓሶ ዔኪ ዓኣዻሢ ዎጎ ኮሺ ዔራ፥ ቄኤሳሢ፥ ዒዝራኬ። 
\v 37 ዬካፓ ዔያታ ዓልቃ ዋኣፃ ዓኣ ካሮ ሄላዖ ሊካ ዳውቴ ካታሞ ባንሢ ዓኣዺ፥ ኬኤሎ ዲፆ ዑፃ ዓኣ ሳኖጉዴ ቤዞና ኬስኪ፥ ዳውቴኮ ካኣቱሞ ማኣሮ ኮርሳ ጌይ ካታሜሎኮ ዓባ ኬስካ ባንፆይዳ ዓኣ ዋኣፆ ዲሮ ካሮ ዴንዴኔ።
\p
\v 38 ላምዓሲ ታኣኒ ኬሴ ፆኦሲ ቦንቾም ዓይናዻ ዓሳ ዎሊ ጊንፆ ሹጮና ኮሾና ዲፆኮ ቶኦኮማ ዓርቃዖ ሻውሎ ባንፆ ዓኣዼኔ፤ ታኣኒያ ዒማና ዴሮኮ ሄካሢና ዎላ ዬኖ ዓሶ ጊንፆ ዓኣዼኔ፤ ታሞ ፂኢሎ ኮጮ ጌይንታ ሹጮና ኮሾናሢ ኮይሊና ጌይ ዳልጎ ኬኤሎ ዲፆ ካሮ ኑ ሄሌኔ። 
\v 39 ዒኢና ጌይ ዔፕሬኤሜ ዲሮ ካሮ፥ ዪሻና ዲሮ ካሮ፤ ጊንሣ ሃሣ ሞላሢ ዲሮ ካሮ ጌይንታ ቤዞና ሃናኒዔኤሌ ኬኤሎ ዲሮ፥ ፄኤቶ ኬኤሎ ዲሮና ማራቶ ዲሮ ካሮ ጌይንታ ቤዞ ኑ ሙኬኔ፤ ዬና ኑ ዎሊ ዑፃ ዓኣዻ ዓሳ ሃንቲፆ ጋፒ ዔቄሢ ጌኤዦ ማኣሮኮ ዑኬ ዓኣ፥ «ካፓ ዓሶ ዲሮ ካሮ» ጌይንታ ቤዞ ሄላዖኬ።
\p
\v 40 ዬያይዲ ላምዖ ቤዞ ፓቂንቴ ዓሳ ዎሊ ጊንፆ ፆኦሲ ቦንቾም ማዓ ዓይኑሞና ጋላቲ ጋላቲ ጌኤዦ ማኣሮ ኮይሎ ሄሌኔ፤ ታኣና ዎላ ዓኣ ሱኡጎና ቃሲ ሃሣ፥ 
\v 41 ሃካፓ ዴማ ዲንካሢ ዋርቃ ቄኤሴያ ዓኣኔ፤ ዬንሢ ቄኤሶንሢ፦ ዔኤሊያቄሜ፥ ሜዕሴያ፥ ሚንያሚኔ፥ ማካያ፥ ዔልዮዔናዬ፥ ዛካሪያሴና ሃናኒያናኬ፤ 
\v 42 ዔያቶ ጊንፆ ሃሣ፦ ሜዕሴያ፥ ሼማዒያ፥ ዔልዓዛሬ፥ ዑዚ፥ ዬሆሃናኔ፥ ማልኪያ፥ ዔላኣሜንታ ዔዜሬንታ ዓኣዻኔ፤ ኑ ዔቂ ዓኣንቴ ዓይኑሞ ዓይናዻ ዓሳ ዪዝራህያ ጎዖሢ ዔያቶ ጌይሳዛ ዑኡዞ ፔኤኮ ዼጊዲ ፆኦሲ ቦንቾም ዔያታ ዓይናዼኔ።
\p
\v 43 ዬኖ ዓቦና ፆኦሲም ሚቺ ዒንጎ ባኣዚ ሚርጌ ዒንጊንቴኔ፤ ዴሮ ፆኦሲ ዎዛሴሢሮ ዼኤፒ ዎዛ ዴራ ዎዛዼኔ፤ ላኣሎንታ ዓቲንቆንታ ዎላ ዎዛዼኔ፤ ዔያታ ዒማና ዬሩሳላሜይዳ ዓኣዖ ዒላሼ ዒላሺፃ ሃኬ ዋይዚንቴኔ።
\s1 ጌኤዦ ማኣሮ ማዾም ዒንጊንቴ ባኮ
\p
\v 44 ዒማና ጌኤዦ ማኣሮ ማዾም ዒንጊንቴ ባኮ፤ ዬያጉዲ ታጳፓ ፔቴ ዒንጊንታ ዒንጊፆ፥ ሌዓ ሌዓ ካፃ ሃኣኮና ዓኣፒ ዓኣፓ ሚፆ ዓኣፖ ቡኩሲ ጌሦ ዱማ ዱማ ቆልዖ ካፓንዳ ሱኡጌ ዶኦሪንቴኔ፤ ዬንሢ ዓሳ ዱማ ዱማ ካታሞ ኮይላ ዓኣ ጎዦይዳፓ ዎጋ ዓይሣ ጎይፆና ቄኤሶንታ ሌዊ ዓሶንታም ዒንጊንታ ባኮ ቢያ ቡኩሳኒ ዔያቶ ኮይሳያኬ፤ ዪሁዳ ዴራ ጉቤ ቄኤሶንታ ሌዊ ዓሶንታ ማዻ ባኮና ኮሺ ዎዛዼኔ። 
\v 45 ዓይጎሮ ጌዔቴ ዔያታ ፆኦሲ ዓይሤ ጎይፆና ማዺንቲ ኩማኒ ኮይሳ ዳምቦንታ ጌኤሺፆ ዳምቦዋ ኩንሤሢሮኬ፤ ጌኤዦ ማኣሮይዳ ፆኦሲ ቦንቾም ዓይኑሞ ዓይናዻ ዓሶንታ ጌኤዦ ማኣሮ ካፓ ዓሳ ዳውቴና ናኣዚ ሴሎሞኔና ኬሴ ዳምቦ ጎይፆ ዔያቶ ኮይሳ ማዾ ማዺ ኩንሤኔ። \x - \xo 12፡45 \xo*\xt 1ፆኦሲ. ዓሃኬ 25፡1-8፤ 26፡12።\xt*\x* 
\v 46 ካኣቲ ዳውቴና ፆኦሲ ቦንቾም ዓይኑሞ ዓይናዻ ዓሶኮ ሱኡጋሢ ዓሳኣፔና ዎዳፓ ዓርቃዖ ፆኦሲ ሄርሺሢ ዓይኑሞ ዓይናዻ ዓሶና ጋላቶ ዓይኑሞ ዓይናዻ ዓሶናኮ ዓርና ማዔ ዓሲ ዓኣኔ። 
\v 47 ዜሬባቡሌና ኔሄሚያና ዎዶይዳ ዒስራዔኤሌ ዴራ ጉቤ ጌኤዦ ማኣሮይዳ ዓይኑሞ ዓይናዻ ዓሶንታ ጌኤዦ ማኣሮ ካፓ ዓሶንታም ኬላ ኬላ ዒንጎ ባኮ ዒንጋኔ፤ ሃሣ ሌዊ ዓሳኣ ዓኣሮኔ ሾይንቶ ማዔዞንሢም ዔያቶ ሄላ ዛሎ ዒንጋኔ።
\c 13
\s1 ዒስራዔኤሌ ዴራ ሜሌ ዴራፓ ዱማዼሢ
\p
\v 1 ሙሴ ማፃኣፓ ዼግ ጌዔ ዑኡሲና ዔያቶም ናባቢንታሢ ዴራ ዋይዛኣና፦ «ሞዓኣቤ ዓሶንታ ዓሞኦኔ ዓሶንታ ፆኦሲ ዴሮና ዎላ ናኣናና ሲኢሪንቶፓ» ጋዓ ቤሲ ሄሌኔ። 
\v 2 ዬይ ሂዚ ጌይ ዓይሢንቴሢ ዒስራዔኤሌ ዴራ ቤርታ ጊብፄፓ ኬስኬ ዎዶና ጎይፃ ዓኣንቴ ሞዓኣቤንታ ዓሞኦኔ ዓሶንታ ሙዖና ዋኣፆና ዔያቶ ላኣጌሢሮኬ፤ ዬያ ሌሊቱዋንቴ ዒስራዔኤሌ ዴሮ ዔያቶም ጋዳንቃንዳጉዲ ባኣላኣሜ ጎዖሢም ዔያታ ሚኢሼ ዒንጌኔ፤ ፆኦሲ ጋዓንቴ ጋዳሞ ዓንጆ ባንሢ ሺርሼኔ።\x - \xo 13፡2 \xo*\xt ላሚ. ዎማ 23፡3-5፤ ፓይ. ማፃ 22፡1-6።\xt*\x* 
\v 3 ዬያ ናባቢንቴሢ ዒስራዔኤሌ ዴራ ዒማና ዋይዛዖ ሜሌ ዴሮ ማዔ ዓሶ ዔያቶ ባኣካፓ ዱማሲ ኬሴኔ።
\s1 ኔሄሚያ ጊንሣ ዓካሲ ማዼ ባኮ
\p
\v 4 ጌኤዦ ማኣሮኮ ሜሆ ጌሦ ማኣሮ ሱኡጋሢ ማዔ፥ ቄኤሳሢ፥ ዔሊያሺቤ ዖዶሲ ዎዴ ፆቢያ ጎዖሢና ዎላ ፔቴ ማዒ ናንጌኔ፤ 
\v 5 ዬያሮ ፆኦሲም ዒንጎ ሃኣኮ ዒንጊፃ፥ ዑንጃ፥ ጌኤዦ ማኣሮም ዱማዼ ሜሃ፥ ሃኣካ፥ ዎይኖ ዑዣ፥ ሪሚቶ ዛይታፓኣ ዔኪ ዔኪ ሌዊ ዓሶም፤ ሃሣ ጌኤዦ ማኣሮይዳ ዓይኑሞ ዓይናዻ ዓሶንታ ካፖ ካፓ ዓሶንታም ዒንጊንታ ታጳሢፓ ፔቴ ዒንጊፆንታ ቄኤሶም ዒንጊንታ ዒንጊፆንታ ቢያ ጌሢንታንዳጉዲ ማሊንቲ ማዢንቴ ዼኤፖ ቆልዖ ፆቢያ ፔ ማኣሪ ማሂ ናንጋንዳጉዲ ዔሊያሺቤ ዓይሤኔ። 
\v 6 ዬይ ቢያ ማዺንቴ ዎዶና ታኣኒ ዬሩሳላሜይዳ ባኣሴ፤ ዓርፄክሲሴ ባብሎኔይዳ ካኣታዼንቴ ሃይሢታሚ ላምዓሳ ሌዖና ታኣኒ ባብሎኔ ማዒ ዓኣዼኔ፤ ዬካፓ ዻካ ዎዴም ካኣቲ ታኣኒ ዖኦጪ፥ 
\v 7 ጊንሣ ታ ዬሩሳላሜ ማዒ ሙኬኔ፤ ዒኢካ ታ ሄላዖ ዔሊያሺቤ ፆቢያም ጌኤዦ ማኣሮኮ ዲሮ ጋራ ፔቴ ናንጎ ቆልዓ ዒንጌያ ማዔሢ ዋይዜኔ፤ 
\v 8 ዬያሮ ዻጋና ታ ዔቂ ፆቢያኮ ዓኣ ባኮ ቢያ ቆልዖ ጋራፓ ኬሲ ኬሲ ዢቤኔ፤ 
\v 9 ቆልዖ ጋሮንሢ ዎጎ ጎይፆ ዳምቦና ጌኤሽካንዳጉዲ፤ ሃሣ ጌኤዦ ማኣሮኮ ዱማዼ ሜሆንታ ሃኣኮ ዒንጊፆንታ ዑንጆንታ ዒኢካ ማሂ ጌሢንታንዳጉዲ ታኣኒ ዓይሤኔ።
\p
\v 10 ዬያጉዲ ሃሣ ጌኤዦ ማኣሮይዳ ፆኦሲ ቦንቾም ዓይኑሞ ማዾ ማዻ ዓሶንታ ሃንጎ ሌዊ ዓሳ ዬሩሳላሜ ሃሺ ኬስኪ ፔኤኮ ፔኤኮ ጎዣ ጌሌሢ ታ ዔሬኔ፤ ዬይ ያዺ ማዔሢ ዴራ ፆኦሲም ዓይናዻ ዓሶና ሌዊ ዓሶናም ዔያቶ ዎይሣንዳ ጊዳ ባኣዚ ዒንጉዋኣሢሮኬ። 
\v 11 ጌኤዦ ማኣራ ዬያ ሄላንዳኣና ቄል ጌይ ዛጊንቴሢሮ ቢታንታ ዓኣ ዓሶ ታኣኒ ጎሬኔ፤ ሌዊ ዓሶንታ ፆኦሲ ቦንቾም ዓይኑሞ ዓይናዻ ዓሶዋ ጌኤዦ ማኣሪ ጊንሣ ማሂ ዔኪ ሙኪሢና ማዾ ጊንሣ ታ ዓይሤኔ፤ 
\v 12 ዬካፓ ዒስራዔኤሌ ዓሳ ቢያ ጊንሣ ሃኣኮንታ ዎይኖ ዑዦንታ ሪሚታፓ ኮሾ ዛይቶዋ ኮይሳሢጉዲ ታጳፓ ፔቴ ኬሲ ኬሲ ጌኤዦ ማኣሮኮ ሜሆ ጌሦ ማኣሪ ዔኪ ሙኪሢ ዓርቄኔ። 
\v 13 ሜሆ ጌሦ ማኣሮይዳ ቄኤሳሢ፥ ሼሌሚያንታ ዎጎ ኮሺ ዔራ ሳዶቄንታ ሌዊ ዓሢ ፔዳያንታ ታኣኒ ሱኡጌ ማሂ ዶኦሬኔ፤ ማታኒያኮ ናኣዚ ናዖ ማዔ ዛኩሬ ናኣዚ ሃናኔ ዔያቶ ማኣዲ ማዻሢኬ፤ ዬንሢ ዓሳ ዔያቶና ዎላ ማዾ ማዻ ላጎም ኮይሳ ባኮ ጊሽኪሢና ጉሙርቂንታያኬ።
\p
\v 14 ታ ፆኦዛሢዮ፥ ኔኤኮ ጌኤዦ ማኣሮና ዒኢካ ማዺንታ ባኮ ፒዚሳኒ ጌይ ዬንሢ ቢያ ጉሙርቂንታያ ማዒ ታ ማዼሢ ማሊጋፓ ኮሺ ባኣዚ ታኣም ማዼ።
\p
\v 15 ዬንሢ ኬላ ዪሁዳይዳ ናንጋ ዴራ ሃውሾ ኬሎና፦ ዎይኖ ዓኣፖ ጩኡጳያ፤ ሃኣኮ፥ ዎይኔ ዑሺ፥ ሶዮና ዎላ ዓኣ ዎይና፥ ቤሌሴ ዓኣፓ፤ ዬያጉዲ ሜሌ ባኣዚ ቢያ ፔኤኮ ሃሮና ጫኣናያ ታ ዴንቄኔ፤ ዬያ ባኮ ቢያ ሃውሾ ኬሎና ዬሩሳላሜ ዔኪ ሙኪ ሻንቹዋጉዲ ላቲ ታ ዔያቶም ኬኤዜኔ። 
\v 16 ዬያ ሌሊቱዋንቴ ዬሩሳላሜይዳ ናንጋ ፂሮሴ ዓሳ ሞሎንታ ሜሌ ዱማ ዱማ ኮርሞ ባኣዚ ሃውሾ ኬሎና ካታሜሎ ጌልዚ ጌልዚ ዪሁዳ ዴሮም ሻንቻኔ፤ 
\v 17 ታኣኒ ዒማና ዪሁዳኮ ሱኡጎ፦ «ዒንሢ ማዻ ፑርቶ ባኮ ቢያ ዛጉዋቴ! ዒንሢ ሃውሾ ኬሎ ዒኢሲ ዒኢሲኬ፤ 
\v 18 ኑ ፆኦዛሢ ኑኡና ካታሜሎናይዳ ሃያ ባይሲንቶ ዔኪ ሙኬሢ ዒንሢኮ ቤርታኣ ዓዶንሢ ዬያ ፑርቱሞ ማዼሢሮቱዋዓዳ? ሃሢያ ዒንሢ ሃውሾ ኬሎ ቦንቹዋኣሢሮ ፆኦሲኮ ዻጎ ዒንሢ ዒስራዔኤሌይዳ ዔቂሳንዳኔ» ጌይ ጎሬኔ።
\p
\v 19 ዬካፓ ሃውሾ ኬላ ቦንቺንቶ ዓርቃኒ ዑኪ ሳዓ ሃባርታዛ ካታሜሎ ጌሎ ዲሮ ካራ ዎዺንታንዳጉዲና ሃውሾ ኬላ ቦንቺንቲ ጋፑዋንቴ ካሮ ዔያታ ቡሉዋጉዲ ታ ዔያቶ ዓይሤኔ፤ ሃሣ ሃውሾ ኬሎና ሃንጋ ካታሜሎ ባንሢ ዓይጎ ባኣዚያ ኬዲንቲ ጌሉዋጉዲ ዛጎም ጌይ ታኣኮ ዓይሎፓ ፔቴ ፔቴዞንሢ ካታሞ ጌሎ ዲሮ ካራ ካራ ታ ዔቂሴኔ። 
\v 20 ዱማ ዱማ ኮርሞ ባኮ ሻንቻኒ ሺኢሻ ኮርሞ ኮርማ ዓሳ ፔቴ ኬሊና ላምዖ ኬሊናጉዴያ ሃውሾ ኬላ ዚሮኬ ጋዓዖ ዓርቦ ዒባኖ ካታሜሎ ጌሎ ዲሮ ዙላ ዎርቄኔ፤ 
\v 21 ዬያቶ ታኣኒ፦ «ሚኢሪ ጌላኒ ማሊ ዒንሢኮ ዬካ ዎርቂፃ ዒንሢ ማኣዳያቱዋሴ፤ ዬኖ ማዾ ዒንሢ ሃሹዋኣያ ማዔቴ ዒንሢዳ ዎልቄና ፔቴ ባኣዚ ታ ማዻንዳኔ» ጌይ ላቲ ኬኤዜኔ፤ ዬማፓ ዓርቃዖ ዔያታ ሃውሾ ኬሎና ሙኪፆ ሃሼኔ። 
\v 22 ሌዊ ዓሳ ዎጎ ጎይፆና ፔና ጌኤሺ ሃውሾ ኬላ ፆኦሲም ዱማዼያና ካፒንቴያ ማዔሢ ዔርዛኒ ኬኤሎ ዲሮ ካሮ ኮሺ ዛጋንዳጉዲ ታ ዔያቶ ዓይሤኔ።
\p ፆኦሲዮ! ሃያሮ ቢያ ኔ ታኣም ማላንዳጉዲና ኔኤኮ ዼኤፖ ናሹሞና ኔ ታና ዓውሳንዳጉዲ ታ ኔና ሺኢቃኔ።
\p
\v 23 ዬኖ ዎዶና ሃሣ ዓይሁዴ ዴሮይዳፓ ሚርጌሢ፦ ዓሽዶዴ፥ ዓሞኦኔንታ ሞዓኣቤ ዓጮ ዉዱሮ ናኣቶይዳፓ ዔኬሢ ዖኦጪ ታ ዔሬኔ፤ \x - \xo 13፡23 \xo*\xt ኬሲ. ማፃ 34፡11-16፤ ላሚ. ዎማ 7፡1-5። \xt*\x* 
\v 24 ዬያቶ ሄካሢኮ ናኣታ ዓሽዶዴ ሙኡቺና ሜሌ ፔቴ ፔቴ ሙኡቺያኣ ጌስታኔ፤ ፔኤኮ ዓይሁዶ ሙኡጮና ዔያታ ጌስታኒ ዳንዳዒባኣሴ። 
\v 25 ዬያ ዓሶ ታ ጎሬኔ፤ ጊንሣ ሃሣ ጋዳንቂ፥ ጳርቂያ ጳርቂ ቶኦኮ ጋፓኖዋ ታ ዔያቶኮ ቱጌኔ፤ ዬካፓ ዔያቶ ማዔቴያ ዔያቶኮ ናኣታ ሜሌ ዓሶና ዎሊ ዔኩዋጉዲ ፆኦሲ ሱንፆና ታ ዔያቶ ጫኣቂሴኔ። 
\v 26 ታ ዔያቶም ኬኤዛዖ፦ «ዒስራዔኤሌ ካኣቲ ሴሎሞኔታዖ ጎሜ ማዻንዳጉዲ ማሄዞንሢ ዬያጉዴ ሜሌ ዓጮ ዉዱሮ ናኣቶቱዋዓዳ? ካኣቲ ሴሎሞኔ ሜሌ ዓጮ ካኣታፓ ቢያ ባሼ ዓሲኬ። ፆኦሲ ዒዛ ናሽኪ ፔኤኮ ዴሮ ዒስራዔኤሌይዳ ካኣታሤኔ፤ ዒዚ ጋዓንቴ ሜሌ ዓጮ ላኣሎ ዛሎና ጎሜ ማዺ፥ ዬያጉዴ ጎሜይዳ ሎኦሜኔ። \x - \xo 13፡26 \xo*\xt 2ሳሙ. 12፡24-25፤ 1ካኣቶ. ማ 11፡1-8።\xt*\x* 
\v 27 ዓካሪ ኑኡኒያ ዒንሢ ማዼ ጎይፆ ሜሌ ዓጮ ዉዱሮ ናኣቶ ዔኪ ፆኦሲ ዓይሢፆኮ ዑሣ ዓኣዺ ዻቢንታኒ ኑም ኮይሳያዳ?» ጌዔኔ።
\p
\v 28 ቄኤሶ ቢያኮ ዑፃሢ፥ ዔሊያሺቤ ናኣቶፓ ፔቴሢ ዮያዳዔኬ፤ ጋዓንቴ ዒዛ ናኣቶይዳፓ ፔቴ ቤትሆሮኔ ካታማ ናንጋሢ ሴንባላፄኮ ዉዱሮ ናይ ዔኬኔ፤ ዬያሮ ዬሩሳላሜ ሃሺሲ ዮያዳዔ ታ ኬሲ ዳኬኔ። \x - \xo 13፡28 \xo*\xt ኔሄ. 4፡1።\xt*\x*
\p
\v 29 ታ ፆኦዛሢዮ! ሃይ ዴራ ቄኤሶንታ ቄኤሶ ዳምቦንታ ኔኤኒ ቄኤሶና ሌዊ ዓሶና ዎላ ጫኣቄ ጫኣቁሞ ዎማይዲ ዒኢሴቴያ ዛጌ!
\p
\v 30 ዬካፓ ዴራ ቢያ ሜሌ ዓጮ ዴሮኮ ዒኢቴ ማዻፓ ፔና ጌኤሻንዳጉዲ ታ ማሄኔ፤ ቄኤሶንታ ሌዊ ዓሶንታ ፔቴ ፔቴሢ ፔ ማዻ ማዾ ዔሪ ማዻንዳጉዲ ዳምቤ ቢያ ታ ጊኢጊሼኔ። 
\v 31 ሚቺ ዒንጎ ዒንጊፆ ሚቾንዶ ሃንፂሎ ጌይንቴ ዎዶና ቢያ ሺኢሾንዶ ጎይሢያ ታኣኒ ጊኢጊሼኔ፤ ጊንሣ ሃሣ ዴራ ቡኩሳ ሃኣኮይዳፓ ቢያ ሃኣኮፓኣ ማዖም ዓኣፒ ዓኣፓ ባኮይዳፓኣ ቤርታ ካፄሢ ዎማይዲ ዔያታ ዒንጋንዳቴያ ታ ጊኢጊሼኔ።
\p ታ ፆኦዛሢዮ! ዬያ ቢያ ማሌ፤ ኔ ሚጪንቲፆና ኮሺ ባኣዚያ ታኣም ማዼ።