\id MAL - MAALE Full Bible
\ide UTF-8
\h ሚልኪያሴ ማፃኣፖ
\toc1 ፆኦሲ ማሊፆ ኬኤዛ ሚልኪያሴ ማፃኣፖ
\toc3 ሚል.
\toc2 ሚልኪያሴ ማፃኣፖ
\mt1 ሚልኪያሴ ማፃኣፖ
\imt ዓይፆ ካሮ
\ip ፆኦሲ ማሊፆ ኬኤዜ ሚልኪያሴ ማፃኣፓ ፃኣፒንቴሢ ኪሪስቶሴ ሾይንታንዳሢኮ ቤርታ ዶንጋሳ ፄኤቶ ሌዖና ዬሩሳላሜይዳ ጌኤዦ ማኣራ ጊንሣ ማዢንቴሢኮ ጊንፃኣኬ። ፆኦሲ ማሊፆ ኬኤዛ ሚልኪያሴ ዶዲሺ ላታሢ ቄኤሶ ማዔያታቴያ ዴራ ፆኦሲና ዎላ ጫኣቄ ጫኣቁሞ ጊንሣ ዓካሳንዳያ ኮይሳሢኬ፤ ፆኦሲኮ ዴራ ናንጋ ናንጎና ማዔቴያ ካኣሽካ ካኣዦና ሼኔ ጌዔ ጎይሢ ናንጋያና ፑርቴያ ማዔሢ ዔርቴያኬ፤ ዬያ ሌሊቱዋንቴ ቄኤሶንታ ዴሮንታ ኮይሳያ ማዔ ፆኦሲም ዒንጎ ዒንጊፆዋ ሺኢሹዋዖ ሃሺ ዔያቶም ዒንጊንቴ ዳምቦ ጎይፆ ናንጎ ሃሺሢና ፆኦሲ ዔያታ ጌሻኒ ማሌኔ። ዬያሮ ፆኦሲ ጎይፆ ፔኤኮ ጊኢጊሻኒና ዔያቶና ዎላ ጫኣቄ ጫኣቁሞ ዒላቲ ኬኤዛኒ ፔኤኮ ኪኢቶ ዓሢ ቤርታሲ ዳኬስካፓ ዴሮ ዎጋኒና ጌኤሻኒ ሙካንዳኔ።
\iot ማፃኣፔላ ዱማ ዱማ ዓርቄ ባኮ
\io1 ናንጊና ናንጋ ጎዳ ዒስራዔኤሌ ዴሮ ናሽካ ናሹሞ (1፡1-5)
\io1 ፆኦሲ ቄኤሶ ዎጋንዳያ ማዒፆ (1፡6—2፡9)
\io1 ፆኦሲና ዎላ ጫኣቆና ጫኣቁማ ሃሺንቴሢ (2፡10-17)
\io1 ናንጊና ናንጋ ጎዳኮ ሙኮ (3፡1-5)
\io1 ፆኦሲ ጌሻኒ ኮይሱዋኣያ ማዒፆ (3፡6-15)
\io1 ጉሙርቂንታ ዓሶም ቦንቺ ዒንጎንዶ ባኮንታ ፑርቶ ዓሳኣ ዎጊንታንዳሢ ዛላ (3፡16—4፡6)
\c 1
\p
\v 1 ናንጊና ናንጋ ጎዳ ፔ ማሊፆ ኬኤዛ ሚልኪያሴ ዛሎና ዒስራዔኤሌ ዴሮም ኬኤዜ ዒዛ ማሊፆ ቃኣላ ያዺኬ።
\s1 ናንጊና ናንጋ ጎዳ ዒስራዔኤሌ ናሽካ ናሹሞ
\p
\v 2 ናንጊና ናንጋ ጎዳ ፔኤኮ ዴሮ «ታ ዒንሢ ናሽኬኔ» ጋዓኔ። ዒንሢ ጋዓንቴ «ዎያይዲ ኔ ኑና ናሽኬይ?» ጋዓኔ።
\p ናንጊና ናንጋ ጎዳ ማሃዖ፦ «ዔኤሳዎና ያይቆኦቤና ዎሊኮ ጌርሲንሢኬ፤ ታኣኒ ያይቆኦቤ ናሽኬኔ፤ 
\v 3 ዔኤሳዎ ጋዓንቴ ታኣኒ ዒፄኔ፤ ዔኤሳዎኮ ጌሜራዻ ዓጮ ዓሲ ናንጉዋ ዳውሌ ታኣኒ ማሄኔ፤ ሳዔሎዋ ዉኡካ ኮኦሚ ሺራ ቤሲ ታኣኒ ማሄኔ» ጌዔኔ። \x - \xo 1፡3 \xo*\xt ሮሜ 9፡13።\xt*\x*
\p
\v 4 ዔዶኦሜ ዓሶ ጌይንታ ዔኤሳዎ ዜርፃ፦ «ካታማ ኑኡኮ ሻሂንቴኔ፤ ጋዓንቴ ማሂ ኑኡኒ ማዣንዳኔ» ጌዔቴ ቢያ ባኮ ዎይሣ ጎዳ ሂዚ ጋዓኔ፦ «ዔያታ ማዣንዳኔ፤ ታኣኒ ጋዓንቴ ዬያ ሻሃንዳኔ፤ ዓሲ ቢያ ዬኖ ዓጬሎ ‹ፑርታ ሳዓ› ዒኢካ ናንጋ ዓሶዋ ‹ናንጊና ናንጋ ጎዳ ጫሽኬ ዴሬ› ጌይ ዔኤላንዳኔ።»
\p
\v 5 ዒንሢ ዬያ ቢያ ዒንሢ ዓኣፒና ዛጊ፦ «ናንጊና ናንጋ ጎዳ ዒስራዔኤሌ ዓጮይዳ ሌሊቱዋንቴ ሜሌ ዓጮይዳኣ ዼኤፒኬ!» ጋዓንዳኔ። \x - \xo 1፡5 \xo*\xt ዒሲ. 34፡5-17፤ 63፡1-6፤ ዔር. 49፡7-22፤ ሂዚ. 25፡12-14፤ 35፡1-15፤ ዓሞ. 1፡11-12፤ ዓብዲ. 1-14።\xt*\x*
\s1 ናንጊና ናንጋ ጎዳ ቄኤሶ ዞሪ ጎሬሢ
\p
\v 6 ቢያ ባኮ ዎይሣ ጎዳ ቄኤሶም ሂዚ ጋዓኔ፦ «ናይ ፔኤኮ ዓዶ፥ ዓይሌ ፔኤኮ ጎዳ ቦቦንቻኔ፤ ዓካሪ፥ ታኣኒ ዒንሢኮ ዓዶ ማዓያታቴ ዓይጎሮ ዒንሢ ታና ቦንቹዋይ? ታ ዒንሢኮ ጎዳ ማዔያታቴ ዓይጋ ዒንሢ ታና ዒጊጩዋይ? ዒንሢ ታኣኮ ሱንፆ ቶኦቼኔ፤ ጋዓንቴ ዒንሢ፦ ‹ሱንፆ ኔኤኮ ኑ ቶኦቼሢ ዎይቲዳይ?› ጌይ ዖኦጫኔ። 
\v 7 ዒኢቴ ሙኡዚ ታኣም ዒንጎ ባኮ ዒንጎ ቤዛ ሺኢሺ፦ ‹ኔኤም ዒንጎ ባኮ ዒንጎ ቤዞ ዎይቲ ኑ ዒኢሴይ?› ጌይ ዒንሢ ዖኦጫኔ፤ ዒንሢ ዬያ ዒኢሴሢ ታኣኮ ሙዖ ሙዎ ጋባዳ ቶኦቺንቴያኬ ጋዓሢሮኬ። 
\v 8 ዒንሢ ዓኣፒ ባይቄያ፥ ሃርጊንቴያና ዎቦ ማዔ ቆልሞ ታኣም ዒንጎ ዒንጊሢ ማሂ ሺኢሺፆና ዻቢንቲ ማዼያ ዒንሢም ማሉዋዓዳ? ዬያጉዴ ቆልሞ ዒንሢኮ ሱኡጋሢም ዒንጎ ባኣዚ ማሂ ዒንሢ ዒንጌቴ ዎዛና ዒንሢፓ ዔኪ፥ ዒዚ ዒንሢ ጋላታንዳያ ዒንሢም ማላ?» ጋዓኔ ቢያ ባኮ ዎይሣ ጎዳ። \x - \xo 1፡8 \xo*\xt ላሚ. ዎማ 15፡21።\xt*\x*
\p
\v 9 ዒንሢ ቄኤሳ! ዬያ ቢያ ማዺጋፓ ናንጊና ናንጋ ጎዳ ኮሺ ባኣዚ ዒንሢም ማዾም ሺኢቃዛ፥ ሺኢጲፆ ዒንሢኮ ዒዚ ዔካንዳያ ማላ? ዬያኮዋ ዻቢንታ ዒንሢዳኬ ጋዓኔ ቢያ ባኮ ዎይሣ ጎዳሢ። 
\v 10 ቢያ ባኮ ዎይሣ ጎዳ፦ «ታኣም ዒንጎ ባኮ ዒንጎ ቤዞይዳ ማዒባኣ ታሚ ዒንሢ ዔኤሢፆይዳፓ ጌኤዦ ማኣሮኮ ካሮ ዎዻ ዓሲ ዒንሢዳፓ ፔቴ ጴዼቴ ዓይጎ! ዒንሢና ታኣኒ ዎዛዹዋኣያ ማዔሢሮ ዒንሢ ታኣም ዒንጋ ዒንጊፆ ታኣኒ ዔካዓኬ፤ 
\v 11 ሃኣዛጉዋቴ፤ ዓጮ ዴራ ቢያ ካራፓ ካሮ ሄላንዳኣና ታና ቦንቻኔ፤ ዎኖ ቤዛ ማዓቴያ ታኣም ዑንጄ ጩቢሺ ጩቢሺ ዒንጎ ዒንጊሢ ጌኤሺ ዔያታ ታኣም ሺኢሻኔ፤ ዓሲ ቢያ ቦንቺያ ታና ቦንቻኔ። 
\v 12 ዒንሢ ጋዓንቴ፦ ‹ናንጊና ናንጋ ጎዳም ዒንጎ ባኮ ዒንጎ ቤዛ ዒኢቴያኬ› ‹ሙዓኣ ቶኦቺንቴያኬ› ጌይ ጌይ ዒንሢ ቦሃኔ። 
\v 13 ሃሣ ዒንሢ ዓማሊ ሚኢጪ ሚኢጪ ‹ሃይ ቢያ ዎዚ ዒሣ ባኣዚዳይ!› ጋዓኔ። ዉኡቂ ዔኮናያ፥ ዎቦ፤ ጊንሣ ሃሣ ሃርጊንቴ ቆልሞ ዒንጎ ዒንጊሢ ማሂ ዒንሢ ሺኢሻኔ፤ ታኣኒ ዬያ ዒንሢኮ ዔካያ ዒንሢም ማላ? 
\v 14 ታኣኒ ዼኤፒ ካኣቲኬ፤ ሱንፃ ታኣኮ ዴሮ ቤርታ ቦንቺንቴያ ማዔሢሮ ማራቶ ባኣኮይዳ ዓዴ ማራይ ዓኣንቴ ዒዚ ናኣቤ ናኣቦም ቦሂሳ ባኣዚ ዓኣ ማራይ ታኣም ዒንጎ ዒንጊሢ ማሂ ሺኢሻሢ ጋዳንቂንቴያ ማዖም!» ጋዓኔ፤ ቢያ ባኮ ዎይሣ ጎዳሢ።
\c 2
\p
\v 1 ቢያ ባኮ ዎይሣ ጎዳ ቄኤሶም ሂዚ ጋዓኔ፦ «ዒንሢ ሃይ ቄኤሳ! ሃይ ዓይሢፃ ዒንሢምኬ። 
\v 2 ዒንሢ ዋይዞ ዒፄቴ፥ ሱንፆዋ ታኣኮ ቦንቻኒ ታኣኮ ቃኣሎ ዒኖይዳ ዒንሢ ዓርቂባኣቴ ታ ዒንሢ ጋዳንቃንዳኔ፤ ዓንጆ ዒንሢሲ ጫሺ ማሂ ታኣኒ ሺርሻንዳኔ፤ ታና ቦንቻኒ ዒና ዒንሢኮ ኮዑዋያ ማዔሢሮ ጎኔና ዬያ ቢያ ታኣኒ ዒንሢዳ ማዻንዳኔ። 
\v 3 ዒንሢ ማዼ ባኮሮ ናኣቶይዳ ታ ዒንሢኮ ሜቶ ዓጋንዳኔ፤ ታኣም ዒንጎ ዒንጊፆ ማሂ ዔኪ ዒንሢ ሙካ ቆልሞኮ ሜኤዦ ታኣኒ ዒንሢኮ ቤርታ ላኣሊ ዒንሢ ታ ዻውሲሳንዳኔ፤ ታ ቤርታፓ ታ ዒንሢ ሺኢሻንዳኔ። 
\v 4 ሌዊና ዒዛኮ ዜርፆና ዎላ ታኣኒ ጫኣቄ ጫኣቁማ ዶዲ ናንጋንዳጉዲ ሃያ ዓይሢፆ ታ ዒንሢም ዳኬያ ማዔሢ ዒንሢ ዔራንዳኔ። \x - \xo 2፡4 \xo*\xt ፓይ. ማፃ 3፡11-13።\xt*\x*
\p
\v 5 «ታኣኒ ዔያቶም ጫኣቄ ጫኣቁማ ናንጊንታ ኮሹሞዋ ዒንጋ ጫኣቁሞኬ፤ ዬያጉዲ ታና ዒንሢ ቦንቻንዳያ ኮይሳኔ፤ ዔያታ ታና ዒጊጪ ሱንፆዋ ታኣኮ ቦንቺ ናንጌኔ። \x - \xo 2፡5 \xo*\xt ፓይ. ማፃ 25፡12።\xt*\x* 
\v 6 ዔያታ ዓሶ ጎኑሞ ዔርዜኔ፤ ዻንጎይዳፓ ዔያቶኮ ሉኡዙሞ ኬስኪባኣሴ፤ ታኣና ዎላ ኮሹሞና፥ ሃሣ ፒዙሞና ዔያታ ሃንቴኔ፤ ዔያታ ዔርዛ ዔርዚፆና ሚርጌሢ ዻቢንቲፓ ማሄኔ። 
\v 7 ቄኤሴ ቢያ ባኮ ዎይሣ ጎዳሢኮ ኪኢታ ዓሲ ማዔሢሮ፤ ዴራኣ ዒዛይዳፓ ዔራቶ ኮዓሢሮ ቄኤሴኮ ዻንጋ ዔራቶና ጌስታያ ማዓኒ ኮይሳኔ። 
\v 8 ዒንሢ ጋዓንቴ ጎይፃፓ ኬስኪ ዒንሢ ዔርዚፆና ሚርጌሢ ዹቂሴኔ፤ ሌዊና ዎላ ታኣኒ ጫኣቄ ጫኣቁሞዋ ዒንሢ ሻሄኔ። 
\v 9 ታኣኮ ዳምቦ ካፒ ማዾ ሃሺሢና ዎጌ ዛላይዳ ዓሲ ዱማሲ ዒንሢ ማዻሢሮ ታኣኒያ ዴሮ ቢያሢኮ ቤርቶይዳ ዒንሢ ቶኦቺንቲ ዻውሲንታንዳጉዲ ማሃንዳኔ።»
\s1 ዴራ ፆኦሲም ጉሙርቂንቱዋ ማዔሢ
\p
\v 10 ኑና ቢያሢኮ ፔቴ ዓዴ ዓኣያቱዋዓዳ? ኑና ማዤሢያ ፔቴ ፆኦሲቱዋዓዳ? ሂዳዖ ኑኡኮ ቤርታኣ ዓዶንሢ ጫኣቄ ጫኣቁሞ ኑኡኒ ሻሂ ዎሊም ጉሙርቂንቱዋያ ዎይቲ ማዓይ? 
\v 11 ዪሁዳ ዴራ ናንጊና ናንጋ ጎዳም ጉሙርቂንቱዋያ ማዔኔ፤ ዒስራዔኤሌና ዬሩሳላሜናይዳ ሻኣካያ ማዔ ቄፄ ባኣዚ ዔያታ ማዼኔ፤ ዬይ ያዺ ማዔሢ ሜሌ ፆኦዞ ካኣሽካያ ማዔ ፃንጎ ላኣሎ ዔኪፆና ናንጊና ናንጋ ጎዳ ናሽካ ጌኤዦ ማኣሮ ዪሁዳ ዒኢሴሢሮኬ። 
\v 12 ዬያ ማዻ ዓሢ ቢያ ባኮ ዎይሣ ጎዳም ዒንጎ ዒንጊሢ ሺኢሼያ ማዔያታቴያ ናንጊና ናንጋ ያይቆኦቤ ማኣሮ ባኣካፓ ዒዛ ባባይዞንጎ።
\p
\v 13 ሜሌ ዒንሢ ማዻ ባካ፦ ናንጊና ናንጋ ጎዳ ዒንሢ ዒንጋ ባኮ ዔኩዋኣሢሮ ናንጊና ናንጋ ጎዳም ዒንጎ ባኮ ዒንጎ ቤዞይዳ ዬኤኪ ዓቢሢና ዒንሢ ዬያ ቤዞ ማስካኔ። 
\v 14 «ዒዚ ዓይጎሮ ኑኡኒ ዒንጋ ዒንጊፆ ዔኩዋይ?» ጌይ ዒንሢ ዖኦጫኔ፤ ናንጊና ናንጋ ጎዳ ዒንሢ ዒንጋ ባኮ ዔኩዋኣሢ ዒንሢ ዎላ ጫኣቂ ዼጋቶና ዓኣዖ ዎሊ ዒንሢ ዔኬ ማቾንሢም ዒንሢ ጉሙርቂንቱዋያ ማዔሢሮኬ፤ ዬያኮ ዒንሢ ባኣካ ናንጊና ናንጋ ጎዳ ማርካኬ። 
\v 15 ፆኦሲ ዒንሢንታ ዒንሢኮ ማቾንሢንታ ፔቴ ዑሢና ፔቴ ዓያናና ዓኣያ ማዓንዳጉዲ ማሂባኣዓዳ? ዬይ ዒዛኮ ማሊፃ ዓይጌንዴዳይ? ዒዛኮ ዼኤፖ ማሊፃ ፆኦሲኮ ዴሬ ማዓ ናይ ዒንሢ ሾዓንዳጉዲ ኮይሢናኬ፤ ዬያሮ ዒንሢ ፔቴ ፔቴሢ ፔኤኮ ማቾንሢም ጫኣቄ ጫኣቁሞ ሻሁዋጉዲ። 
\v 16 «ታኣኒ ዓኒና ማቾናኮ ዓንጂንቶ ዒዒፃኔ፤ ዒንሢዳፓ ፔቴ ዓሲታዖ ዬያጉዴ ፑርታ ማዔ ዓንጂሢ ዓንጃንዳጉዲ ታኣኒ ኮዑዋሴ፤ ዬያሮ ዒንሢኮ ማቾንሢም ጉሙርቂንቱዋያ ማዒ ዒንሢ ጫኣቄ ጫኣቁሞ ሻሁዋጉዲ ዒንሢና ዔሩዋቴ።» ጋዓኔ፤ ዒስራዔኤሌ ፆኦሲ ማዔ ናንጊና ናንጋ ጎዳሢ።
\s1 ፆኦሲኮ ዎጎ ኬላ ዑኬያ ማዒፆ
\p
\v 17 ዒንሢ ጌስታ ጌኤዞና ቤዞ ቤዞ ጌስቲ ናንጊና ናንጋ ጎዳ ዒንሢ ሼናሴኔ፤ ዒንሢ ጋዓንቴ፦ «ዓይጎናንዳይ ኑ ዒዛ ሼናሲሴሢ?» ጋዓኔ፤ ዒንሢ ዒዛ ሼናሲሴሢ፦ «ፑርታ ማዻ ዓሲ ቢያ ናንጊና ናንጋ ጎዳ ቤርታ ኮሺ ማዒ ጴዻኔ፤ ናንጊና ናንጋ ጎዳ ዬይ ዎዎዛሳኔ» ጌይ ጌይ፥ ሃሣ ጊንሣ፦ «ፒዜ ዎጌ ዎጋ ፆኦሲ ዎካዳይ?» ጌይ ጌይ ዖኦጪፆናኬ።
\c 3
\p
\v 1 ቢያ ባኮ ዎይሣ ጎዳ ሂዚ ጋዓኔ፦ «ታኣኮ ጎይፆ ጊኢጊሻንዳጉዲ ታኣኮ ኪኢቶ ዓሢ ቤርታሲ ታኣኒ ዳካንዳኔ፤ ዬካፓ ዒንሢ ኮዓ ናንጊና ናንጋ ጎዳ ዔርቲባኣንቴ ጌኤዦ ማኣሪ ሙካንዳኔ፤ ዒንሢ ናሽካ ጫኣቁሞ ዛሎ ኬኤዛ ኪኢቶ ዓሢ ጎኔና ሙካንዳኔ።» \x - \xo 3፡1 \xo*\xt ማቲ. 11፡10፤ ማር. 1፡2፤ ሉቃ. 1፡76፤ 7፡27።\xt*\x*
\p
\v 2 ዒዚ ጋዓንቴ ዓንጊ ጊልፖ ታሚጉዲ፤ ጊንሣ ሃሣ ዓፒላ ማስኮ ሳኣሙናጉዲ ማዔሢሮ ዒዚ ሙካ ኬሎና ዶዲ ዔቃኒ ዳንዳዓያና ዒዚ ፔጋዺ ጴዻ ኬሎና ዒዛ ቤርታ ዔቃኒ ዳንዳዓይ ዖናዳይ? \x - \xo 3፡2 \xo*\xt ዒዩ. 2፡11፤ ዮሃ. ፆፔዻ 6፡17።\xt*\x* 
\v 3 ዒዚ ቢሮ ዓንጎ ሼኤሻሢና ጌኤሺ ኮሻ ዓሲጉዲ ዎጎ ፒዚሳኒ ዴዓንዳኔ፤ ሌዊ ዜርፃኣ ፂሉሞና ፆኦሲም ዒንጎ ዒንጊሢ ዒንጋያ ማዓኒ ዳንዳዓንዳያ ሄላንዳኣና ዎርቄና ቢራ ዓንጊናጉዲ ዔያቶ ዒ ጌኤሻንዳኔ።
\p
\v 4 ዪሁዳና ዬሩሳላሜና ዴራ ናንጊና ናንጋ ጎዳም ሺኢሻ ዒንጊፃ ሚናኣ ዎዶና ናንጊና ናንጋ ጎዳ ዎዛሳ ጎይፆጉዴያ ማዓንዳኔ። 
\v 5 ቢያ ባኮ ዎይሣ ጎዳ ሂዚ ጋዓኔ፦ «ታኣኒ ዎጌ ዎጋኒ ዒንሢ ባኣኮ ሙካንዳኔ፤ ዒማና ታኣኒ ማርሾ ማርሻ ዓሶ፥ ዞኦዛ ኮኦማ ዓሶ፥ ሉኡዙሞና ማርካዻ ዓሶ፥ ማዾ ማዻ ዓሶም ማዼሢ ዛሎ ዒንጎ ሚኢሾ ጌሺ ዓይሳ ማዺሻ ዓሶ፥ ዜኤሮ ዒንዶንሢንታ ዜኤሮ ናኣቶ ሄርቂ ዎይሣ ዓሶ፤ ጊንሣ ሃሣ ዒፂ ዳውሶና ዓሶም ፒዜ ዎጌ ዎጉዋ ዓሶና ታና ዒጊጩዋ ዓሶ ዑፃ ሩኡሪና ታኣኒ ዎጋንዳኔ።»
\s1 ታጶ ባኣዚፓ ፔቴማ ፆኦሲም ዒንጊሢ ዳምቤ
\p
\v 6 «ታኣኒ ናንጊና ናንጋ ጎዳ ላኣሚንቱዋያኬ፤ ዬያሮ ዒንሢ ያይቆኦቤ ዜርፃ! ሃጊ ዒንሢ ጋፒ ባይቂባኣሴ። 
\v 7 ሚና ዒንሢኮ ቤርታኣ ዓዶንሢ ዎዳፓ ዓርቃዖ ታኣኮ ዎጋፓ ዒንሢ ሃኬኔ፤ ካፒያኣ ካፒባኣሴ። ሃንጋ ታ ባንሢ ማዑዋቴ፤ ታኣኒያ ዒንሢ ባንሢ ማዓንዳኔ ጋዓኔ፤ ቢያ ባኮ ዎይሣ ጎዳሢ። ዒንሢ ጋዓንቴ፦ ‹ኑኡኒ ኔ ባንሢ ዎማይዲ ማዖንዶይ?› ጋዓኔ። 
\v 8 ዓሲ ናንጊና ናንጋ ጎዳኮ ባኮ ዉኡቃኒ ኮይሳያዳ? ጋዓንቴ ዒንሢ ታ ባኮ ዉኡቄኔ፤ ዒንሢ፦ ‹ኑኡኒ ዉኡቄሢ ዓይጎዳይ?› ጋዓኔ፤ ዒንሢ ታኣኮ ዉኡቄሢ ዒንሢኮ ዓኣ ባካፓ ታጶኮ ፔቴማ ዒንጋ ባኮንታ ሜሌ ዒንጎ ባኮዋ ዒንጎ ሃሺፆናኬ። 
\v 9 ዒንሢ፥ ዴራ ቢያሢ ታ ባኮ ዉኡቄሢሮ ዒንሢ ቢያሢ ጋዳንቂንቴያ ማዔኔ። 
\v 10 ታኣኮ ጌኤዦ ማኣሮይዳ ሙኡዚ ሚርጋንዳጉዲ ዒንሢኮ ዓኣ ባካፓ ታጶኮ ፔቴማ ዔኪ ዔኪ ኮናይዳ ዋሁዋቴ፤ ዬያ ዒንሢ ማዼያ ማዔቴ ታኣኒ ጫሪንጮኮ ፑልቶ ካሮ ቡሊ ኮሺ ማዔ ዓንጆ ቢያ ሚርጊሺ ታ ዒንሢም ዒንጊባኣቴ ዬያና ታና ዒንሢ ዛጊ ዔራኒ ዳንዳዓኔ። \x - \xo 3፡10 \xo*\xt ሌዊ. ዓኬ 27፡30፤ ፓይ. ማፃ 18፡21-24፤ ላሚ. ዎማ 12፡6፤ 14፡22-29፤ ኔሄ. 13፡12።\xt*\x* 
\v 11 ሃኣኮ ዒንሢኮ ኮሴ ፑርቲሱዋጉዲ ታኣኒ ቃዛንዳኔ፤ ዎይናኣ ዒንሢኮ ዓኣፑዋዖ ጉሪ ዓታዓኬ፤ 
\v 12 ሃካፓ ሴካ ሜሌ ዴራ ቢያ ዒንሢ፦ ‹ዔያታ ዓንጂንቴ ዓሲኬ› ጋዓንዳኔ።» ዬያ ጌዔሢ ታና ቢያ ባኮ ዎይሣ ጎዳሢኬ።
\s1 ዴሮ ፆኦሲ ማኣራንዳያ ማዒፆ ኬኤዜ ሃጊ ማዓ ዎዛ
\p
\v 13 ናንጊና ናንጋ ጎዳ ሂዚ ጋዓኔ፦ «ዒንሢ ታ ዑፃ ጫርቂ ጌስታኔ፤ ሃሣ ጊንሣ፦ ‹ኑኡኒ ኔ ዑፆይዳ ዓይጎ ፑርታ ባኣዚ ጌስቴይ?› ጌይ ዒንሢ ዖኦጫኔ፤ 
\v 14 ዒንሢ፦ ‹ናንጊና ናንጋ ጎዳም ማዺሢ ጉሪኬ፤ ዒዛኮ ዓይሢፆ ካፒሢንታ ዖያ ዓሲጉዲ ቢያ ባኮ ዎይሣ ጎዳሢ ቤርታ ሃንቲፃ ዓይጎ ኑና ማኣዳይ? 
\v 15 ሃሢ ኑ ዛጋ ጎይፆታቴ ሃይሾ ፑርቶ ማዻ ዓሳ ዎዛዺ ናንጋኔ፤ ጎኔና ዖርጎጪ ናንጋኔ፤ ናንጊና ናንጋ ጎዳ ዎይታቴያ ዛጋኒ ማዻ ዓሶ ዓይጎ ሜታኣ ሄሉዋሴ› ጌይ ጌይ ዒንሢ ጌስታኔ።»
\p
\v 16 ዬካፓ ናንጊና ናንጋ ጎዳ ቦንቻ ዓሳ ዎላ ጌስቴኔ፤ ዒዚያ ዔያቶ ጌኤዞ ዒናፓ ዋይዜኔ፤ ናንጊና ናንጋ ጎዳ ዒጊጫዞንሢና ሱንፆዋ ዒዛኮ ቦንቻዞንሢኮ ሱንፃ ዔያታ ማዼ ባኮ ጶቂሣያ ማዒ ናንጋንዳጉዲ ማፃኣፔይዳ ፃኣፒንቴኔ። 
\v 17 ቢያ ባኮ ዎይሣ ጎዳሢ፦ «ዔያታ ታኣሮ ማዓንዳኔ፤ ታኣኒ ማዻ ኬሎና ታ ሚኢሼ ዔያታ ማዓንዳኔ፤ ሾዔ ዓሳ ፔኤም ማዻ ዓቲንቆ ናዖ ሚጪንቲ ማኣዳሢጉዲ ታኣኒያ ዔያቶ ማኣዳንዳኔ። 
\v 18 ዬኖ ዎዶና ፂሎንታ ጎሞ ዓሶንታ ፆኦሲም ዓይሢንታ ዓሶንታ ዓይሢንቱዋ ዓሶንታ ባኣካ ዓኣ ዱሙሞ ዒንሢ ላሚ ዛጋንዳኔ።»
\c 4
\s1 ናንጊና ናንጋ ጎዳኮ ዎጎ ኬሎ
\p
\v 1 ቢያ ባኮ ዎይሣ ጎዳሢ ሂዚ ጋዓኔ፦ «ዖቶርቃ ዓሶንታ ፑርቶ ማዾ ማዻ ዓሶንታ ዲኢሪጉዲ ጌኤካ ታሚና ሙይንታንዳ ዎዴ ሙካኔ፤ ዬይ ሙካ ኬላ ዔያቶኮ ፃጶንታ ካኣፖዋ ዓይሱዋዖ ቢያ ሙዓንዳኔ። 
\v 2 ዒንሢ ታኣኮ ሱንፆ ቦንቻዞንሢም ጋዓንቴ ፂሎ ዓቢ ፆርቃንዳኔ፤ ዬይ ዻቂንታኣ ዒንሢም ዔኪ ዬዓንዳኔ። ጊርባይዳፓ ቶሊ ኬስኬ ላንጋ ናኣሪጉዲ ዒንሢ ፂካንዳኔ። 
\v 3 ታኣኒ ዬያ ማዻ ኬሎና ፑርቶ ዓሳ ዒንሢኮ ቶኮ ዴማ ዲቢንሢጉዲ ሄርቂንታንዳኔ።
\p
\v 4 «ዒስራዔኤሌ ዴራ ቢያ ዓይሢንቲ ናንጋንዳጉዲ ሲኢና ዹኮይዳ ታኣም ማዻሢ፥ ሙሴም ታኣኒ ዒንጌ ዎጎና ዓይሢፆና ማሊ ጶቂሡዋቴ።
\p
\v 5 «ዼኤፒ፤ ሃሣ ዒጊቻያ ማዔ ታና፥ ናንጊና ናንጋ ጎዳኮ ኬላ ሄላንዳሢኮ ቤርታ ታ ማሊፆ ኬኤዛ ዔኤሊያሴ ታኣኒ ዒንሢም ዳካንዳኔ። \x - \xo 4፡5 \xo*\xt ማቲ. 11፡14፤ 17፡10-13፤ ማር. 9፡11-13፤ ሉቃ. 1፡17፤ ዮሃ. 1፡21።\xt*\x* 
\v 6 ታኣኒ ሙኪ ሳዖ ዒንሢኮ ጋዳንቁዋጉዲ ዒዚ ዓዶንሢ ዒኖ ናኣቶ ባንሢ፤ ሃሣ ናኣቶ ዒኖዋ ዓዶንሢ ባንሢ ማሃንዳኔ።»