\id JOL - MAALE Full Bible
\ide UTF-8
\h ዒዩዔኤሌ ማፃኣፖ
\toc1 ፆኦሲ ማሊፆ ኬኤዛ ዒዩዔኤሌ ማፃኣፖ
\toc3 ዒዩ.
\toc2 ዒዩዔኤሌ ማፃኣፖ
\mt1 ዒዩዔኤሌ
\imt ዓይፆ ካሮ
\ip ፆኦሲ ማሊፆ ኬኤዜ ዒዩዔኤሌ ዎማ ዎዶይዳ ናንጌቴያ፤ ሃሣ ዒዚ ናንጌ ጎይፆ ኬኤዛ ሃይሴ ሜርጌ ዔርታይ ባኣሴ፤ ያዺ ማዔቴያ ማፃኣፓ ፃኣፒንቲ ዓኣያ ማዒ ጴዼሢ ኪሪስቶሴ ሾይንታዳሢኮ ቤርታ ዶንጋሳ ፄኤቶ ሌዖኮ ሃንጎ ዖይዳሳ ፄኤቶ ሌዖኮ ጋራኣኬ ጌይንታኔ፤ ዬይ ዎዳ ፓሪሴ ካኣቲ ካኣታዺ ዎይሣ ዎዶናኬ። ዒዩዔኤሌ ዒስራዔኤሌ ዓጮ ዓቢሢ ሙካንዳሢና ኪሊንኮ ሉማ ኬስካንዳ ዎዶዋ ፔጋሲ ኬኤዜኔ፤ ናንጊና ናንጋ ጎዳ ኬላ ሙካኒ ዑኬያ ማዒፆ ዬይ ባካ ዔርዛያታሢ ዒዚ ኬኤዛኔ፤ ናንጊና ናንጋ ጎዳኮ ኬላ ሙካኣና ዒዛኮ ዱማዼ ማሊፆ ዒፂ ማካዞንሢዳ ቢያ ሜቶ ናንጊና ናንጋ ጎዳ ዓጋንዳሢ ቃሲ ዒ ኬኤዛኔ። ፆኦሲ ማሊፆ ኬኤዛሢ ዴራ ፔኤኮ ጎሞ ቡኡፃንዳጉዲ ፆኦሲ ዔኤላያ ማዒፆ ፔጋሲ ኬኤዚ፥ ዴራ ጎሞ ፔኤኮ ቡኡፄቴ ዔያታ ዎንዴ ናንጋ ጎይፆ ባንሢ ማሂ ዓንጃንዳሢ ዒዚ ዔያቶም ኬኤዛኔ። ዒዚ ኬኤዜ ፆኦሲ ማሊፆይዳ ባሼ ዓኣፒ ማዒ ጴዻ፥ ሃጊ ማዓንዳ ዎዞ ቃኣላ፦ ፆኦሲ ዓቲንቆንታ ላኣሎንታ ዼጌሢንታ ጋርቾዋ ዓይሱዋዖ ዴሮ ቢያ ዑፃ ፔኤኮ ዓያኖ ኬይሳንዳሢ ፔጋሲ ኬኤዛሢኬ።
\iot ማፃኣፔላ ዱማ ዱማ ዓርቄ ባኮ
\io1 ሳዖ ባይዛኒ ሙኬ ዓቢፆ (1፡1—2፡17)
\io1 ናንጊና ናንጋ ጎዳ ኬሎ (2፡18-32)
\io1 ናንጊና ናንጋ ጎዳ ሜሌ ዴሮይዳ ሜቶ ዓጋንዳሢ (3፡1-21)
\c 1
\s1 ዓቢፃ ዒስራዔኤሌ ዓጮ ሙይ ባይዜሢ
\p
\v 1 ባኣቱዔኤሌ ናኣዚ ዒዩዔኤሌም ናንጊና ናንጋ ጎዳፓ ዳኪንቴ ኪኢቶ ቃኣላ ያዺኬ፦
\q
\v 2 ዒንሢ ጋርቾ ዓሳ ዋይዙዋቴ!
\q2 ዪሁዳ ዓጫ ናንጋ ዓሳ ቢያ ዒናፓ ዋይዙዋቴ!
\q ዒንሢ ናንጌ ዎዶይዳ ሃያ ጉዴ ባኣዚ፤
\q2 ጊንሣ ሃሣ ዒንሢኮ ቤርታኣ ዓዶንሢ ዎዶናኣ ዓሲ ዛጊ ቤቂያ?
\q
\v 3 ዬያ ባኮ ዒንሢኮ ናኣቶም ኬኤዙዋቴ፤
\q2 ዒንሢኮ ናኣታ ጊንሣ ፔ ናኣቶም ኬኤዞንጎ፤
\q2 ዬያታኣ ዔያቶ ሄሊ ሙካ ሾይንቶም ኬኤዞንጎ።
\q
\v 4 ሜልካሢዳፓ ዓቴ ሃኣኮ ባቃሎ
\q2 ሻዻ ዓቢፃ ሙዔኔ፤
\q2 ዬካፓ ዓቴሢ ሃሣ ዢኢፓ ዒርዚጉዲ ዲኢና
\q2 ዓቢፃ ሙይ ባይዜኔ፤
\q2 ዓቴሢያኣ ማካሢ ሙዔኔ።
\q
\v 5 ሃይካፓ ሴካ ዒንሢ ሙርጎ ዎይኖ ዑዦ ዻንጋ ካንሢንዱዋኣሢሮ
\q2 ዒንሢ ማሢንታ ዓሳ ጊንዓስካፓ ጴጪ ዬኤኩዋቴ፤
\q2 ዒንሢ ቢያ ዎዴ ዎይኖ ዑዦ ዑሽካ ዓሳ!
\q2 ዒናፓ ቃዪ ዬኤኩዋቴ።
\q
\v 6 ዎልቄና ዓኣ ዑሣ ዓኣዼ ዺቤ ሜሌ ዴሬ
\q2 ታ ዓጮ ዖሊ ባይዛኒ ሙኬኔ፤
\q2 ዬያ ዖሎ ዓሶኮ ዓጫ ዞቢ ዓቺጉዲኬ፤
\q2 ባንጋላ ጊንሣ ሃሣ ዒንዴ ዞቢሮጉዲኬ። \x - \xo 1፡6 \xo*\xt ዮሃ. ፆፔዻ 9፡8።\xt*\x*
\q
\v 7 ታኣኮ ቱኮና ዎይኖ ቢያ ሙይ ባይዜኔ፤
\q2 ቤሌሴ ሚፆዋ ቆፂ ሙዔኔ፤
\q2 ዬያ ሚፆኮ ዛንዞዋ ቦኦሪሺ
\q2 ቁኡሮ ቢያ ፒኢቲ ሙዔኔ።
\q
\v 8 ዒዞ ጎቺ ዴዓያታዖ ሃይቄ ዼጌሮ
\q2 ሲዬ ፓቲሌ ማይንቲ ዬኤካ
\q2 ዉዱሮ ናይጉዲ ዒንሢያ ዬኤኩዋቴ።
\q
\v 9 ናንጊና ናንጋ ጎዳ ማኣሮይዳ ዒንጎ ባኣዚ ማሂ ሺኢሾ
\q2 ሃኣኮንታ ዎይኖ ዑዦንታ ባይቄሢሮ
\q2 ናንጊና ናንጋ ጎዳም ማዻያ ማዔ ቄኤሳ ዬኤካኔ።
\q
\v 10 ጎዣ ጎሽኪንቴ ጎይሣ ጉሪ ዓቴኔ፤
\q2 ሃኣኮ ዒኢካ ባኣያ ማዔኔ፤
\q2 ቱኮና ዎይናኣ ሃይቄኔ፤
\q2 ዛይታኣ ባይቄኔ፤
\q2 ዬያሮ ሳዓ ዬኤካኔ።
\q
\v 11 ዛርጋሢንታ ዔልዖንታ፤ ሜሌ ካፃ ሃኣካኣ ቢያ ባይቄሢሮ
\q2 ዒንሢ ጎዦ ጎሽካ ዓሳ ዖዩዋቴ፤
\q2 ዒንሢ ዎይኖ ቱካ ዓሳኣ ዬኤኩዋቴ።
\q
\v 12 ቱኮና ዎይኖንታ ቤሌሶ ሚፆንታ ሹሌኔ፤
\q2 ሮኦማኣኔ፥ ቴሚሬ ጌይንታ ሚፃ፥ ሙቃሎንታ ሜሌ ዓኣፖ ዓኣፓ ሚፃ ቢያ ሜሌኔ፤
\q2 ዬያሮ ጎኔና ዓሲ ዎዛዻ ዎዛ ባይቄኔ።
\q
\v 13 ዒንሢ ፆኦዛሢም ዒንሢ ዒንጋ ሃኣኮንታ ዎይኖ ዑዦ ዒንጊፆንታ ባኣሢሮ
\q2 ዒንሢ ታ ፆኦዛሢም ማዻ ቄኤሳ!
\q2 ሃኒ ዬዒ፥ ሲዬ ፓቲሌ ማይንቲ ዋንቶ ጉቤ ዬኤኩዋቴ፤
\q2 ዒንሢ ዒንጎ ባኮ ዒንጎ ቤዞይዳ ማዻ ዓሳ ቃዪ ዬኤኩዋቴ።
\q
\v 14 ሙኡዚ ሃሾ ዱማ ኬሊ ሜንሡዋቴ!
\q2 ፆኦሲም ዱማዼ ቡኪንቲ ዴሮ ቡኩሱዋቴ!
\q2 ጋርቾንታ ዓጮይዳ ናንጋ ዓሶዋ ቢያ
\q2 ናንጊና ናንጋ ጎዳ ማዔ ኑ ፆኦዛሢ ማኣሪ ቡኩሱዋቴ፤
\q2 ዒኢካ ፆኦሲ ዒንሢም ዋይዛንዳጉዲ ዬኤኩዋቴ።
\q
\v 15 ባዴዔ! ናንጊና ናንጋ ጎዳ ኬላ ዑኬኔ!
\q2 ቢያ ባኮ ዳንዳዓ ጎዳሢ ባይሲንታ ዔኬ ሙካ ኬላ ሄሌኔ። \x - \xo 1፡15 \xo*\xt ዒሲ. 13፡6።\xt*\x*
\b
\q
\v 16 ሃኣኮ ኑ ዓኣፓፓ
\q2 ዎዛና ዒላሺሢና ኑ ፆኦዛሢኮ ጌኤዦ ማኣራፓ
\q2 ጋፒ ባይቄኔ።
\q
\v 17 ዜርቂንቴ ዜርፃ ቢያ ሳዖይዳ ሙርዒ ዓቴኔ፤
\q2 ሃኣካ ባይቄሢሮ ሃኣኮ ናቶ ቤዛ ቢያ ጉሪ ማዔኔ፤
\q2 ኮናኣ ዶዔኔ።
\q
\v 18 ባኣታ ሄንቃንዳ ማኣቲ ባይቄሢሮ ዖኦላኔ፤
\q2 ማራታኣ ቢያ ናይዺንቲ ካራ ባይዚ ዓኣኔ።
\q
\v 19 ናንጊና ናንጋ ጎዳሢዮ! ቦኦሎይዳ ዓኣ ማኣቶ ቢያ ታሚ ሙዔሢሮ
\q2 ካዮ ሚፆዋ ታሚ ሚቼሢሮ
\q2 ታኣኒ ኔ ባንሢ ዒላታኔ።
\q
\v 20 ዎራ ሚጬሢሮ
\q2 ቦኦሎ ማኣታ ቢያ ሜሊ ባይቄሢሮ
\q2 ካዮ ቦዓታዖ ዓቱዋዖ ኔ ባንሢ ዒላታኔ።
\c 2
\s1 ናንጊና ናንጋ ጎዳ ኬሎ ሙኮ ዓቢፃ ዔርዛያ ማዒፆ
\q
\v 1 ፂዮኔይዳ ዛዬ ዋርቁዋቴ! ፆኦሲም ዱማዼ ዹኮይዳኣ
\q2 ኬስኪ ዒላቱዋቴ!
\q ናንጊና ናንጋ ጎዳ ኬላ ሙካኒ ዑኬሢሮ
\q2 ዓጬሎይዳ ናንጋ ዓሳ ቢያ ጎጋይቆንጎ።
\q
\v 2 ዬና ኬላ ዹማያና ቃኣያዻ ኬሊ፤
\q2 ሻኣራዻያና ሻኒ ዹማ ኬሊኬ፤
\q2 ዓባ ፆርቃኣና ፖዓ ዹኮ ዑፆይዳ ጴዻሢጉዲ
\q2 ዺቢ፤ ሃሣ ዎልቃዻ ሜሌ ዴሬ ቢያ ቤዞ ሙኪ ባይዛንዳኔ።
\q ዬያጉዴ ባኣዚ ሃያኮ ቤርታ ዛጊንቲ ቤቂባኣሴ፤
\q2 ሃካፓ ሴካ ዓይዲያ ጴዻዓኬ።
\b
\q
\v 3 ዔያቶኮ ቤርታ ጴዻ ዓኣዔ ባኮ ቢያ ታሚጉዲ ዔያታ ሙዓንዳኔ፤
\q2 ዔኤታ ታሚጉዲያኣ ሚቻንዳኔ።
\q2 ሃጊ ዔያታ ሄሊባኣ፥ ቤርታ ዓኣ ሳዓ
\q2 ዔዴኔ ጌይንታ ቤዞጉዴያ ዓኣዔ ባኣዚ ዋርቂ ዓኣያኬ፤
\q2 ዔያታ ሙይ ጊዴና ዓኣዻ ሳዓ ጋዓንቴ
\q2 ጋፒ ባይቄያ ዓሲ ናንጉዋ ዳውሌ ማዓኔ፤
\q2 ዔያቶይዳፓ ቶሊ ዓታንዳ ዓይጎ ባኣዚያ ባኣሴ።
\q
\v 4 ዔያቶኮ ማላሢ ፓሮ ማላኔ፤
\q2 ዔያታ ዖሎ ፓራሢጉዲያኣ ሳጋራኔ።
\q
\v 5 ዓዳ ሳርጌሎ ዖይቶጉዴ ዑኡሲ ዋይዚሲ ዋይዚሲ
\q2 ዹኮ ቶኦኮይዳ ኮኦማኔ፤
\q2 ሃኣኮኮ ዲኢሪ ሙዓ ታሚጉዲ
\q2 ቢያ ባኮ ዔያታ ሙዓኔ፤
\q2 ዖልዚም ጊኢጊንቴ ዺቢ ዖልዚ ዓሲጉዲ ቤሲ ቤሲ ዓርቂ ዴዔኔ። \x - \xo 2፡5 \xo*\xt ዮሃ. ፆፔዻ 9፡7-9።\xt*\x*
\q
\v 6 ዔያቶ ዴንቃ ዴራ ካራ ባይዚ ጎጋይቃኔ፤
\q2 ዓሶኮ ቢያ ዓኣፖ ካራ ዒጊቹሞና ቦኦራኔ።
\q
\v 7 ዔያታ ዖልዚ ዓሲጉዲ ዔርቲባኣንቴ ዖልዚ ቡላኔ፤
\q2 ዖላ ዓሶጉዲያኣ ኬኤሎ ዲሮ ዑፆ ጊዓንዳኔ፤
\q2 ቢያሢ ዔያታ ዓርቄ ጎይፆ ዻቡዋዖ
\q2 ዓኣዻ ካሮማና ጎዓንዳኔ።
\q
\v 8 ፔቴይ ባጋሢና ዎሊ ሂዑዋሴ፤
\q2 ፔቴ ፔቴሢ ፔ ጎይፆማ ዓኣዻኔ፤
\q2 ሞርኮኮ ዋርዲዮ ሻሂ ዓኣዻኔ፤
\q2 ዔያቶ ቃዛ ባኣዚ ባኣሴ።
\q
\v 9 ዔያታ ካታሞ ጌሊ ዓርቃኔ፤
\q2 ካታሞኮ ዙሎ ዲርቆና ኬኤሎ ዲፆ ዑፃ ጳሽካኔ፤
\q2 ጱሊ ጱሊ ማኣሮ ዑፆዋ ኬስካኔ፤
\q2 ዓዳ ዉሲጉዲ ማኣሮኮ ፑልቶ ካሮና ጋሮ ጌላኔ።
\b
\q
\v 10 ሳዖ ዔያታ ጎቃይሳኔ፤
\q2 ጫሪንጮዋ ዔያታ ዓጊሣኔ፤
\q ዓቦንታ ዓጊኖንታ ዹማኔ፤
\q2 ዦኦጋሢያ ፖዑዋያ ማዓኔ። \x - \xo 2፡10 \xo*\xt ዮሃ. ፆፔዻ 8፡12።\xt*\x*
\q
\v 11 ናንጊና ናንጋ ጎዳ ጉጉንሢጉዴ ዑኡዞ ዬያ ዖሎ ዓሶ ዋይዚሳኔ፤
\q2 ዬይ ዖሎ ዓሳ ዎዚ ሚርጋይ!
\q ዓይሢፆ ዒዛኮ ኩንሣ ዬይ ዖሎ ዓሳ ኮሺ ዺቢኬ፤
\q2 ዬይ ሚርጌ ዒጊቻያ ማዔሢሮ ዬያ ኬሎና ዖኦኒ ዳንዳዒ ዔቃንዳይ? \x - \xo 2፡11 \xo*\xt ዮሃ. ፆፔዻ 6፡17።\xt*\x*
\s1 ጎሜ ቡኡፆም ኬኤዚንቴ ኪኢታ
\q
\v 12 ናንጊና ናንጋ ጎዳ ሂዚ ጋዓኔ፦
\q2 «ሃሢ ሙኡዚ ሃሺሢና ዬኤፒና ዖዪሢና
\q2 ጉቤ ዒናፓ ታ ባንሢ ማዑዋቴ።
\q
\v 13 ዒንሢ ዖያያ ማዒፆ ዔርዛኒ ማኣዓሢ ዒንሢኮ ዳርዚፖቴ፤
\q2 ጋዓንቴ ዒኖ ዒንሢኮ ሺኢቺ፥ ጎሞ ቡኡፁዋቴ።»
\q2 ናንጊና ናንጋ ጎዳ ማዔ ዒንሢኮ ፆኦዛሢ ኮሺ፥ ማኣራያ፥ ሩኡሪና ዻጋዹዋያ
\q2 ናንጊና ናንጋ ናሹማ ዺቢ፤
\q2 ፑርታ ባኣዚ ዓጋኒ ሩኡሩዋያ ማዔሢሮ
\q2 ዒዛ ባንሢ ማዑዋቴ።
\q
\v 14 ጎዖንቴ ናንጊና ናንጋ ጎዳ ማዔ ዒንሢኮ ፆኦዛሢ ዻጎ ሃሺ
\q2 ዓንጆ ዒንሢም ዒንጋንዳያ ናንዳኔ፤
\q2 ዒንሢያ ዒማና ናንጊና ናንጋ ጎዳ ማዔ ዒንሢኮ ፆኦዛሢም
\q2 ሃኣኮንታ ዑዦ ዒንጊፆንታ ዔኪ ሺኢሻንዳኔ።
\b
\q
\v 15 ፂዮኔ ዹኮይዳ ዛያሢ ዋርቁዋቴ!
\q2 ዴሮ ፆኦሲም ዱማዼ ቡኪንቲሮ ዔኤሉዋቴ!
\q2 ሙኡዚ ሃሻንዳጉዲያኣ ዴሮም ኬኤዙዋቴ!
\q
\v 16 ዴሮ ቢያ ፔቴይዳ ቡኩሲ
\q2 ፆኦሲም ዱማዼ ቡኪንቲም ጊኢጊሹዋቴ፤
\q2 ጋርቾ ዓሶ ዔኤሉዋቴ፤
\q2 ዻኮ ናኣቶንታ ዻንፆ ዻንቃ ዓኣሎ ናኣቶዋ ዓይሱዋዖ ቡኩሱዋቴ፤
\q2 ዑኡታኣ ዓቱዋዖ ዑኡቱሞ ኬኤፃፓ ኬስኮንጎ።
\q
\v 17 ናንጊና ናንጋ ጎዳም ማዻ ቄኤሳ
\q2 ፆኦሲም ዒንጎ ባኮ ዒንጎ ቤዞና
\q2 ጌኤዦ ማኣሮይዳ ዓሳ ቡካ ጶኦኮናኮ ባኣካ ዔቂ ዬኤኮንጎ፤
\q ዔያታ፦ «ናንጊና ናንጋ ጎዳሢዮ! ኔኤኮ ዴሮ ሚጪንቴ፤
\q2 ሜሌ ዴራ ‹ዒንሢኮ ፆኦዛሢ ዎካ ዓኣይ?› ጌይ
\q2 ኑና ቶኦቻንዳጉዲና ሚኢጪ ዓማላንዳጉዲ ማሂፖ» ጎዖንጎ።
\s1 ናንጊና ናንጋ ጎዳ ፔ ዴሮ ጊንሣ ዶዲሺ ዔቂሳንዳሢ ኬኤዜሢ
\q
\v 18 ናንጊና ናንጋ ጎዳ ሳዔላ ዒዛሮ ሌሊ ማዓንዳጉዲ ኮዒ
\q2 ፔ ዴሮም ሚጪንቴኔ፤
\q
\v 19 ዬያሮ ዒዚ ሂዚ ጌዔኔ፦
\q2 «ሃኣኮንታ ዎይኖ ዑዦንታ ሪሚቶ ዛይቶንታ
\q2 ዒንሢ ሚሽካንዳያ ሄላንዳኣና ታ ዒንሢም ዒንጋንዳኔ፤
\q2 ሃካፓ ሴካ ሜሌ ዴራ
\q2 ሚኢጪ ዒንሢ ዓማላንዳጉዲ ታ ሃሻዓኬ።
\q
\v 20 ዓጮኮ ኬዶ ዛላፓ ሙካ ዺቦ ዓቢፆ
\q2 ታ ዒንሢ ኮይላፓ ሃኪሳንዳኔ፤
\q ዓሲ ናንጉዋ ዳውሎ ቦኦሎ ታኣኒ ዳውሲ ዳካንዳኔ፤
\q2 ዬያቶኮ ሶሮፖ ታኣኒ ሶኦጌ ባዚ፤
\q2 ጊንፃ ዓቴሢ ሃሣ ታኣኒ ሜዲቴራኒያ ባዞ ዳውሲ ጌልዛንዳኔ፤
\q2 ዒኢካ ዔያቶኮ ሌዛ ዛዓንዳኔ፤
\q ጎኔና ታኣኒ፥ ናንጊና ናንጋ ጎዳ ዼኤፒ ባኣዚ ዒንሢም ማዼኔ።»
\b
\q
\v 21 «ሳዔሌ ዒጊጪፖ፤
\q2 ናንጊና ናንጋ ጎዳ ኔኤም ዼኤፒ ባኣዚ ማዼሢሮ ዎዛዼ!
\q2 ሃሣ ዒላሼ።
\q
\v 22 ዒንሢ ካዮ ቦዓ ዒጊጪፖቴ፤
\q2 ዒንሢ ሄንቃ ቤዛ ዓኣ ማኣታ ዋርቄኔ፤
\q2 ሚፃኣ ዓኣፔኔ፤
\q2 ቤሌሶንታ ዎይኖ ዓኣፖንታ ኮሺ ሚርጌኔ።»
\b
\q
\v 23 «ዒንሢ ፂዮኔ ዴራ!
\q2 ናንጊና ናንጋ ጎዳ ማዔ ዒንሢኮ ፆኦዛሢ ዒንሢም ማዼ ባኮሮ
\q2 ዎዛዹዋቴ፥ ሃሣ ዒላሹዋቴ፤
\q2 ዒዚ ፒዜ ዎጌ ዎጊ
\q2 ዓዳ ቤርታኣ ጎይፆ ዖጎፆንታ ባርጎ ዓጊኖንታይዳ
\q2 ጊዳ ዒርዚ ዒንሢም ዋርቂሴኔ።
\q
\v 24 ዒንሢኮ ሃኣኮ ሺርኮ ቆይዶይዳ ሃኣኮ ኩማንዳኔ፤
\q2 ዎይኖ ዑዦንታ ሪሚቶ ዛይቶንታ
\q2 ዒንሢ ጩኡጳ ዔቶ ኩሚ ሾኦታንዳኔ።
\q
\v 25 ሚርጌ ዎዴ፦ ዺቢ ዖልዚ ዓሲጉዴያ ታ ዒንሢም ዳኬ፥ ዢኢፖ ዒሮጉዲ ዲኢና ዓቢፃ፥
\q2 ማካሢ፥ ሜልካሢንታ ሻዻ ዓቢፆንታ
\q2 ዒንሢኮ ሙይ ጋፒሴ ሃኣኮ ቤዛ ታ ዒንሢም ዒንጋንዳኔ።
\q
\v 26 ሚርጌ ሙይ ዒንሢ ሚሽካንዳኔ፤
\q2 ሚርጌ ዲቃሢ ሄርሺሳ ባኣዚ ዒንሢም ማዼ
\q2 ታና፥ ናንጊና ናንጋ ጎዳ ማዔ ዒንሢኮ ፆኦዛሢ ዒንሢ ጋላታንዳኔ፤
\q2 ዴራ ታኣኮ ሃካፓ ሴካ ቦርሲንታዓኬ።
\q
\v 27 ታ ዴሬዮቴ! ታኣኒ ዒንሢ ባኣካ ዓኣሢ፤
\q2 ዒንሢኮ ፆኦዛሢያ ታና ሌሊ ማዔሢ፤
\q2 ታ ጊዳፓ ዓታዛ ሜሌ ፆኦሲ ባኣሢያ ዒንሢ ዔራንዳኔ፤
\q2 ታኣኮ ዴራ ሃካፓ ሴካ ቦርሲንታዓኬ።»
\s1 ናንጊና ናንጋ ጎዳ ኬሎ
\q
\v 28 ናንጊና ናንጋ ጎዳ ሂዚ ጋዓኔ፦
\q2 «ዓካሪ ታኣኮ ዓያኖ ዓሲ ቢያ ዑስካ ታኣኒ ኬይሳንዳኔ፤
\q2 ዒንሢኮ ዓቲንቆንታ ዉዱሮ ናኣቶንታ ታ ማሊሢ ኬኤዛንዳኔ፤
\q2 ጋርቻ ዒንሢኮ ዓውቲ ዓውታዻንዳኔ፤
\q2 ዼጌሢያ ታኣኒ ፔጋሲ ዻዋ ባኣዚ ዛጋንዳኔ። \x - \xo 2፡28 \xo*\xt ዳኪ. ማዾ 2፡17-21።\xt*\x*
\q
\v 29 ዬያጉዲ ሃሣ ዬንሢ ኬሎይዳ
\q2 ታኣም ማዻ ዓቲንቆንታ ላኣሎንታይዳ
\q2 ታኣኮ ዓያኖ ታኣኒ ኬይሳንዳኔ።»
\b
\q
\v 30 «ጫሪንጮና ሳዖናይዳ ዲቃሢ ሄርሺሳ ባኣዚ ታኣኒ ዻዋንዳኔ፤
\q2 ሱጉሢንታ ታሚንታ ጩቢያ ሻኣሬጉዲ ላሂ ጴዻንዳኔ።
\q
\v 31 ዼኤፖ፥ ዒጊቻ፥ ጎዳ ኬላ ሙካንዳሢኮ ቤርታ
\q2 ዓባ ዹማንዳኔ፤ ዓጊናኣ ሱጉሢጉዲ ዞቃንዳኔ፤ \x - \xo 2፡31 \xo*\xt ማቲ. 24፡29፤ ማር. 13፡24-25፤ ሉቃ. 21፡25፤ ዮሃ. ፆፔዻ 6፡12-13።\xt*\x*
\q
\v 32 ናንጊና ናንጋ ጎዳ ማኣዳንዳጉዲ ዔኤላሢ ቢያ ዻቃንዳኔ፤
\q2 ናንጊና ናንጋ ጎዳ ኬኤዜ ጎይፆ ፂዮኔ ዹኮና
\q ዬሩሳላሜናይዳፓ ዼኤሻ ጴዻንዳኔ፤
\q2 ዻቃ ዓሶ ባኣኮይዳ ናንጊና ናንጋ ጎዳ ዶኦሬ ዓሳ ዓኣያ ማዓንዳኔ።» \x - \xo 2፡32 \xo*\xt ሮሜ 10፡13።\xt*\x*
\c 3
\s1 ናንጊና ናንጋ ጎዳ ሜሌ ዴሮይዳ ዎጋንዳያ ማዒፆ
\q
\v 1 ናንጊና ናንጋ ጎዳ ሂዚ ጋዓኔ፦
\q2 «ዬኖ ዎዶና ዬሩሳላሜና ዪሁዳናፓ ዲዒንቴ ባኮንታ ዓሶንታ ታኣኒ ጊንሣ ማሃንዳኔ፤
\q
\v 2 ዒማና ሜሌ ዴሮ ቢያ ታኣኒ ቡኩሲ
\q2 ዒዮሳፒፄ ዶኦጮ ኬይሳንዳኔ፤
\q2 ታኣሮ ማዔ ዒስራዔኤሌ ዴሮ
\q2 ዔያቶ ባኣካ ዔያታ ዜርቂ ሳዖዋ ጊሽቲ ዔኬሢሮ
\q2 ዒዮሳፒፄ ዶኦጮይዳ ፑርታ ዎጌ ዔያቶይዳ ዎጋኒ ዒኢካ ሺኢሻንዳኔ።
\q
\v 3 ዲዒ ዔኬ ታኣኮ ዴሮ ጊሽታኒ ዒፃ ዔያታ ዓጌኔ፤
\q2 ዔያታ ዞኦዛ ኮኦማ ላኣሎና ላሃኒ ዓቲንቆ ናኣቶ፤
\q2 ዎይኖ ዑዦ ዑሽካኒያ ዉዱሮ ናኣቶ ዓይሌ ማሂ ሻንቼኔ።»
\p
\v 4 «ዒንሢ ፂሮሴንታ ሲዶናንታ ፒሊስፄኤሜ ዓጮ ዴራ! ዒንሢ ማዻ ባካ ዓይጎዳይ? ታና ኮማኒ ዒንሢ ማላ? ያዺ ማዔቴ ዒንሢ ማዼ ማዾ ኔጉዋዖ ታኣኒ ዒንሢዳ ሺርሻንዳኔ። \x - \xo 3፡4 \xo*\xt ዒሲ. 14፡29-31፤ 23፡1-18፤ ዔር. 47፡1-7፤ ሂዚ. 25፡15—28፡26፤ ዓሞ. 1፡6-10፤ ሶፖ. 2፡4-7፤ ዛካ. 9፡1-7፤ ማቲ. 11፡21-22፤ ሉቃ. 10፡13-14።\xt*\x* 
\v 5 ታኣኮ ቢሮ ዓንጎንታ ዎርቆንታ፤ ዬያጉዲ ሃሣ ጴዹዋያ ማዔ፥ ታኣኮ ቆሎ ቢያ ዒንሢ ዔኪ ዒንሢኮ ካኣሽኮ ሜሌ ፆኦዞ ማኣሪ ጌልዜኔ። 
\v 6 ዪሁዳና ዬሩሳላሜናይዳ ሾይንቴ ዓሶ ዔያቶኮ ዓጫፓ ሃኪሲ ዔኪ ዴንዲ ጊሪኬ ዓሶም ዒንሢ ሻንቼኔ። 
\v 7 ሃሢ ዓካሪ ታኣኒ ዔያታ ሻንቺንቴ ቤዛፓ ዔያቶ ዔቂሲ፥ ዬኖ ዓጫፓ ዔያታ ኬስካንዳጉዲ ማሃንዳኔ፤ ዔያቶይዳ ዒንሢ ማዼ ፑርቶ ባኮ ቢያ ዒንሢዳ ታኣኒ ሺርሺ ዔኪ ዬዓንዳኔ። 
\v 8 ዒንሢኮ ዓቲንቆንታ ዉዱሮ ናኣቶንታ ዪሁዳ ዴሮም ሻንቺንታንዳኔ፤ ዬካፓ ዪሁዳ ዓጮ ዓሳ ሃኬይዳ ዓኣ ሳኣባ ዓሶም ዔያቶ ሻንቻንዳኔ፤ ዬያ ጌዔሢ ታና፥ ናንጊና ናንጋ ጎዳኬ።»
\b
\q
\v 9 «ዬያ ሜሌ ዴሮም ቢያ ዒላቲ ኬኤዙዋቴ፤
\q2 ዖልዚማኣ ጊኢጊንቱዋቴ!
\q2 ዖሎና ዔርቴ ዓሶዋ ዔኤሊ ኬሱዋቴ፤
\q2 ዖሎ ዖላ ዓሳ ቢያ ቡኪንቲ ዖሎሮ ኬስኮንጎ።
\q
\v 10 ማራሾ ዒንሢኮ ዹይ ጬንቻ ዓራፖ፥ ባኣጮዋ ዹይ ዎርሢ ማሁዋቴ፤
\q2 ዎልቄ ባኣሢታቴያ ‹ታኣኒ ዶዲኬ!› ፔና ጎዖንጎ፤ \x - \xo 3፡10 \xo*\xt ዒሲ. 2፡4፤ ሚኪ. 4፡3።\xt*\x*
\q
\v 11 ዒንሢ ቢያ ዛሎና ዓኣ ሜሌ ዴራ ቢያ፤
\q2 ዑካዺ ኬስኩዋቴ!
\q2 ዶኦጮይዳ ቡኪንቱዋቴ።»
\b
\q ናንጊና ናንጋ ጎዳሢዮ! ኔኤኮ ዖሎ ዓሶ ዳኬ።
\q
\v 12 «ሜሌ ዴራ ቢያ ዔቂ ዒዮሳፒፄ ዶኦጮ ዓኣዾንጎ፤
\q2 ታኣኒ፥ ናንጊና ናንጋ ጎዳ ቢያ ዛላ ዓኣ ሜሌ ዴሮይዳ
\q2 ፑርታ ዎጌ ዎጋኒ ዒኢካ ታኣኒ ዴዓንዳኔ።
\q
\v 13 ዔያቶኮ ፑርቱማ ዑሣ ዓኣዼ ዺቤኔ፤
\q2 ካፄ ሃኣኮ ባኣቺና ጮኦሪንታሢጉዲ ዔያቶ ጮኦሩዋቴ፤
\q2 ዎይና ሶዮና ዎላ ጩኡጶ ቤዞይዳ ኩሚ ሄርቂንታሢጉዲ ዔያቶ ሄርቁዋቴ።» \x - \xo 3፡13 \xo*\xt ዮሃ. ፆፔዻ 14፡14-16፤ 19፤ 20፤ 19፡15።\xt*\x*
\q
\v 14 ናንጊና ናንጋ ጎዳ ዎጎ ዎጎ ዶኦጮይዳ ዎጋ ኬላ ሄሌኔ፤
\q2 ዬያሮ ኮሺ ሚርጌ ዴሬ ዒኢካ ቡኪንቴኔ።
\q
\v 15 ዬኖ ኬሎና ዓቦንታ ዓጊኖንታ ዹማንዳኔ፤
\q2 ዦኦጋሢያ ፖዑዋያ ማዓንዳኔ።
\q
\v 16 ናንጊና ናንጋ ጎዳ ፂዮኔ ዹኮይዳ፤ ጊንሣ ሃሣ ዬሩሳላሜይዳ ዔቂ
\q2 ፔኤኮ ዒጊቻ ዑኡዞ ዋይዚሳንዳኔ፤
\q2 ጫሪንጮንታ ሳዖንታ ዓጊፃንዳኔ፤
\q2 ዒዚ ፔ ዴሮ ዒስራዔኤሌኮ
\q2 ካናዾ ዋርዲዮ ማዓንዳኔ። \x - \xo 3፡16 \xo*\xt ዓሞ. 1፡2።\xt*\x*
\s1 ፆኦሲ ፔ ዴሮ ዓንጄሢ
\q
\v 17 «ዒስራዔኤሌ ዓሲዮቴ! ዒማና ታኣኒ፥ ናንጊና ናንጋ ጎዳሢ
\q2 ዒንሢኮ ፆኦዛሢታሢ ዒንሢ ዔራንዳኔ፤
\q ታኣም ዱማዼ ፂዮኔ ዹኮይዳ ታኣኒ ናንጋንዳኔ፤
\q2 ዬሩሳላሜያ ታኣም ዱማዼ ካታማ ማዓንዳኔ፤
\q2 ሃካፓ ሴካ ሜሌ ዓጮ ፖኦሊሳ ዖሊ ዒዞ ዓርቃዓኬ።»
\b
\q
\v 18 «ዬኖ ዎዶና ዹኮይዳ ቢያ ዎይኔ ባቃሊ ኩማንዳኔ፤
\q2 ጌሜሮ ዑፆይዳኣ ሚርጌ ማኣፃ ባይ ሄንቃንዳኔ፤
\q ዪሁዳ ዓጮ ዎራ ቢያ ዋኣሢ ዓኣያ ማዓንዳኔ፤
\q2 ናንጊና ናንጋ ጎዳኮ ጌኤዦ ማኣሮይዳፓ ዋኣሢ ዓልቃንዳኔ፤
\q2 ሺፂሜ ዶኦጮዋ ዬይ ዋኣፃ ዑሻንዳኔ።»
\b
\q
\v 19 «ጊብፄና ዔዶኦሜ ዓጮ ዓሶና ዪሁዳ ዴሮ ዑፃ
\q2 ጌኔ ማዾ ማዼሢሮ፥ ፂሎ ዴሮዋ ዎዼሢሮ
\q2 ‹ጊብፄ ዓሲ ናንጉዋ ዓጪ ማዓንዳኔ፤
\q2 ዔዶኦሜያ ዓሲ ናንጉዋ ዳውሌ ማዓንዳኔ።›
\q
\v 20-21 ዬያሮ ሃይማ ሄላንዳኣና ኮሞ ኮፁዋዖ ታኣኒ ሃሼ
\q2 ጌኤዦ ዓሶ ሱጉፆ ዛሎ ኮሞ ታኣኒ ኮፃንዳኔ፤
\q ጋዓንቴ ዬሩሳላሜንታ ዪሁዳንታ ታኣኮ ዴራ ናኣናና ናንጋ ቤሲ ማዓንዳኔ፤
\q2 ታኣኒ፥ ናንጊና ናንጋ ጎዳሢ ፂዮኔ ዹኮይዳ ናንጋንዳኔ።»