\id HOS - MAALE Full Bible
\ide UTF-8
\h ሆሴዔ ማፃኣፖ
\toc1 ፆኦሲ ማሊፆ ኬኤዛ ሆሴዔ ማፃኣፖ
\toc3 ሆሴ.
\toc2 ሆሴዔ ማፃኣፖ
\mt1 ሆሴዔ
\imt ዓይፆ ካሮ
\ip ፆኦሲ ማሊፆ ኬኤዜ ሆሴዔ ኪሪስቶሴ ሾይንታንዳሢኮ ቤርታ ሳማሪያ ካታማ ላንካይ ፄኤታና ላማታሚ ፔቴ ሌዔይዳ ሻሂንታንዳሢኮ ቤርታ ፆኦሲ ማሊፆ ኬኤዚ ማዼ ዓሲኬ። ዬኖ ዎዶና ኮሺ ሜቶ ዎዴታንቴ ፆኦሲ ማሊፆ ኬኤዜ ዓሞፄፓ ሄሊሳዖ ዒስራዔኤሌኮ ኬዴኖ ካኣቶ ዓጮይዳ ፆኦሲ ማሊሢ ዒዚ ኬኤዜኔ። ሆሴዔ ዒማና ዴራ ሜሌ ፆኦዞ ካኣሽኪ ፆኦሲም ጉሙርቂንቲባኣያ ማዒፆ ዛሎ ኮሺ ዶዲሺ ኬኤዜኔ፤ ዒዚ ዴሮኮ ዬያ ጉሙርቂንቲፆ ባይሱሞ ፔጋሲ ዔርዛኒ ጉሙርቂንቱዋያ ማዔ ጎሜሮ ጎዖ ላኣሊስኬኖ ዒዛኮ ኮኦኪንሢ ማሂ ጌስቴኔ፤ ዬና ላኣሌላ ዒዛም ጉሙርቂንቲባኣያ ማዔሢጉዲ ናንጊና ናንጋ ጎዳኮ ዴራ ፆኦሲም ጉሙርቂንቲ ናንጊፆ ሃሼኔ፤ ዬያ ዛሎና ሜታ ዒስራዔኤሌ ዓሶይዳ ሙካንዳሢ ዒዚ ኬኤዛኔ፤ ዬይ ያዺ ማዔቴያ ፆኦሲ ፔኤኮ ዴሮ ናሽካ፥ ጋፑዋ ናሹማ ኮሺ ዶዲ ማዔሢሮ ዴሮ ዒዚ ፔ ባንሢ ማሂ፥ ዒዛና ዒዛኮ ዴሮና ባኣካ ዓኣ ፔቱሞ ጊንሣ ዓካሳንዳሢ ሆሴዔ ኬኤዜኔ፤ ዬይ ፆኦሲኮ ዼኤፖ ናሹማ ዓይ. 11፡8ይዳ «ዒስራዔኤሌ! ታኣኒ ኔና ዎይቲ ኬኤራንዳይ? ዎይቲ ታ ኔና ሜሌም ዓኣሢ ዒንጋንዳይ?… ታ ኔና ናሽካ ናሹማ ኮሺ ዶዲታሢሮ ዬያ ቢያ ታኣኒ ማዹዋጉዲ ታ ዒና ታና ባሼኔ!» ጌይንቲፆና ፔጋዺ ዔርቴኔ።
\iot ማፃኣፔላ ዱማ ዱማ ዓርቄ ባኮ
\io1 ሆሴዔ ዔኬ ላኣሌሎና ናኣቶና ጉሙርቂንቱዋያ ማዔ ፆኦሲ ዴሮኮ ኮኦኪንሢ ማዒፆ (1፡1—3፡5)
\io1 ፆኦሲ ዒስራዔኤሌንታ ዪሁዳንታ ዔያቶኮ ሱኡጎዋ ዞሪ ጎሬያ ማዒፆ (4፡1—5፡15)
\io1 ዴራ ፆኦሲ ባንሢ ማዔያ ማሊሲ ጌሼ ጌሺፆ (6፡1—7፡12)
\io1 ዒስራዔኤሌ ዴራ ፆኦሲ ጉሙርቂፆ ሃሼሢ (7፡13—8፡14)
\io1 ዒስራዔኤሌ ዴራ ኮይሳያ ማዔ ሜቶ ዔካንዳያ ማዒፆ (9፡1-17)
\io1 ዒስራዔኤሌ ዴራ ዔራንዳጉዲ ላቲ ኬኤዚንቴ ባኮ (10፡1-15)
\io1 ፆኦሲ ፔኤኮ ዴሮ ናሽካ ናሹሞ (11፡1-11)
\io1 ፆኦሲ ፔ ዴሮ ዑፃ ዎጌ ዎጎ (11፡12—13፡16)
\io1 ጎማ ዓቶም ጌይንታንዳሢና ዓንጆዋ ሙካንዳያ ማዒፆ (14፡1-9)
\c 1
\s1 ሆሴዔኮ ማቾንታ ናኣቶንታ ኮኦኪንሢ ማዒ ኬኤዚንቴሢ
\p
\v 1 ዪሁዳ ዓጮይዳ ዖኦዚያ፥ ዒዮዓታሜ፥ ዓካኣዜንታ ሂዚቂያሴንታ ዎሊ ሄሊሲ ካኣታዼ ዎዶና ቢያ፤ ዬያጉዲ ሃሣ ዮዓሴ ናኣዚ፥ ዒዮርቢዓሜ ዒስራዔኤሌ ዓጫ ካኣታዼ ዎዶና ናንጊና ናንጋ ጎዳ ቢዔሬ ናኣዚ ሆሴዔም ፔጋሲ ኬኤዜ ቃኣላ ሂዚ ጋዓያኬ። \x - \xo 1፡1 \xo*\xt 2ካኣቶ. ማ 14፡23—15፡7፤ 15፡32—16፡20፤ 18፡1—20፡21፤ 2ፆኦሲ. ዓሃኬ 26፡1—27፡8፤ 28፡1—32፡33።\xt*\x*
\p
\v 2 ናንጊና ናንጋ ጎዳ ሆሴዔ ዛሎና ዒስራዔኤሌ ዴሮም ፔኤኮ ቃኣሎ ኬኤዚፆ ዓርቃዖ ሆሴዔም፦ «ታኣኮ ዴራ ታና ሃሺ፥ ሻኣካያ ማዔ ዞኦስካ ኮኦሞ ኮኦሚሢ ዓርቄኔ፤ ሃሢ ኔኤኒ ዴንዲጋፓ ዞኦስካ ኮኦማ ላኣሊ ዔኬ፤ ዬያይዲ ዞኦዜ ናይ ሾዔ» ጌዔኔ።
\p
\v 3 ዬያሮ ሆሴዔ ዴንዲ ዲቢላዬ ናዎ፥ ጎሜሮ ጎዖዞ ዔኬኔ፤ ዒዛ ጎጳዺ ዓቲንቄ ናይ ሾዔኔ። 
\v 4 ዬካፓ ናንጊና ናንጋ ጎዳ ሆሴዔም፦ «ዒዩ ዒይዚራዔኤሌ ዶኦጮይዳ ዎዼ ዓሶኮ ሱጉፆ ማሃኒ ዒዛ ማኣሮ ዓሶይዳ ሜቶ ታኣኒ ዓጋንዳ ዎዳ ሃኬ ማዓዓኬ፤ ዒስራዔኤሌ ፔ ካኣቲ ዓጪ ማዒ ናንጋ ናንጎዋ ታኣኒ ባይዛንዳኔ፤ ዬያሮ ዬያ ናማኮ ሱንፆ ዒይዚራዔኤሌ\f + \fr 1፡4 \fr*\fq ዒይዚራዔኤሌ፦ \fq*\ft ጌይፃ «ፆኦሲ ዜርቂ ባባይዛያኬ» ጌይሢኬ።\ft*\f* ጌይ ጌሤ» ጌዔኔ። \x - \xo 1፡4 \xo*\xt 2ካኣቶ. ማ 10፡11።\xt*\x* 
\v 5 ዬማና ዒይዚራዔኤሌ ዶኦጮይዳ ዒስራዔኤሌኮ ዖሎ ዓሶ ዎዺ ታኣኒ ኩርሳንዳኔ።
\p
\v 6 ጎሜራ ሃሣ ጎጲ ዔኪ ዉዱሮ ናይ ሾዔኔ፤ ናንጊና ናንጋ ጎዳ ሆሴዔም፦ «ሃይካፓ ሴካ ዒስራዔኤሌ ዴሮ ሚጪንቲ ታኣኒ ቲኢራዓኬ፤ ዻቢንቶዋ ታ ዔያቶም ዓቶንጎ ጋዓዓኬ፤ ዬያሮ ኔኤኮ ናዖ ሱንፆ ‹ሎሩሃማ›\f + \fr 1፡6 \fr*\fq ሎሩሃማ፦ \fq*\ft ጌይፃ «ጎሜ ዓቶም ጌይ ቲኢሪሢ ኮይሱዋ ዴሬ» ጌይሢኬ።\ft*\f* ጌይ ጌሤ ጌዔኔ። 
\v 7 ዪሁዳ ዴሮ ጋዓንቴ ሚጪንቲ ታኣኒ ቲኢራንዳኔ፤ ታኣኒ፥ ናንጊና ናንጋ ጎዳ ማዔ ዔያቶኮ ፆኦዛሢ ዔያቶ ዓውሳንዳኔ፤ ታኣኒ ዔያቶ ዓውሳንዳሢ ዖልዚናቱዋሴ፤ ጬንቻ ዓራፖ፥ ሂኢሺ፥ ዬያጉዲ ፓሮንታ ፓሮና ዖላ ዓሲናኣ ዖሊቱዋሴ» ጌዔኔ።
\p
\v 8 ጎሜራ ሎሩሃማ ጉኡጲሼስካፓ ጊንሣ ጎጲ ዔኪ ዓቲንቄ ናይ ሾዔኔ። 
\v 9 ናንጊና ናንጋ ጎዳ ሃሣ ሆሴዔም፦ «ሃይካፓ ሴካ ዒስራዔኤሌ ዴራ ታኣኮ ዒጊኒቱዋሴ፤ ታኣኒያ ዔያቶኮ ፆኦሲቱዋሴ፤ ዬያሮ ኔኤኮ ናኣዚ ሱንፆ ‹ሎዓሚ›\f + \fr 1፡9 \fr*\fq ሎዓሚ፦ \fq*\ft ጌይፃ «ታ ዴሬ ማዒባኣያ» ጌይሢኬ።\ft*\f* ጌይ ጌሤ» ጌዔኔ።
\s1 ዒስራዔኤሌ ዴሮም ሃጋኣ ዎዛ ማሂ ኬኤዚንቴ ባኣዚ
\p
\v 10 ያዺ ማዔቴያ ዒስራዔኤሌ ዴራ ፓይዲንታኒና ማኪ ዔርታኒ ዳንዳዑዋ ባዚ ማኣሻላጉዲ ሚርጋንዳኔ፤ ሃሢ ፆኦሲ ዔያቶ፦ «ዒንሢ ታ ዴሬቱዋሴ» ጌዔቴያ ዒማ ቤዛ ጊንሣ «ናንጊና ባይቁዋዖ ናንጋ፥ ፆኦሲ ናኣቶ» ዔያታ ጌይንታንዳ ዎዴ ዬዓንዳኔ። \x - \xo 1፡10 \xo*\xt ሮሜ 9፡26።\xt*\x* 
\v 11 ዬኖ ዎዶና ዪሁዳ ዴሮንታ ዒስራዔኤሌ ዴሮንታ ዎላ ፔቴ ማዓንዳኔ፤ ዔያቶ ላምዓሢ ዎይሣንዳ ፔቴ ሱኡጌ ዔያታ ዶኦራንዳኔ፤ ጊንሣ ዔያታ ፔ ዓጮይዳ ዔርቴያ ማዒ ዳልጊ ዖርጎጪ ናንጋንዳኔ፤ ዬና ኬሌላኣ ዒይዚራዔኤሌም ዼኤፒ ኬሊ ማዓንዳኔ።
\c 2
\p
\v 1 ዬያሮ ዒስራዔኤሌ ዓሶ ማዔ ዒንሢኮ ጌርሲንሢኮ ሱንፆ «ዓሚ»\f + \fr 2፡1 \fr*\fq ዓሚ፦ \fq*\ft ጌይፃ «ታ ዴሬ» ጌይሢኬ።\ft*\f* ጌሮንሢ ሱንፆ «ሩሃማ»\f + \fr 2፡1 \fr*\fq ሩሃማ፦ \fq*\ft ጌይፃ «ጎማ ዓቶም ጌይ ቲኢሪ ሃሺንታ ዴሬ» ጌይሢኬ።\ft*\f* ጌይ ጌሡዋቴ።
\s1 ዒስራዔኤሌ ዴራ ጉሙርቂንቲባኣሢሮ ዔያቶይዳ ዓጎና ሜቶ
\p
\v 2 ታ ናይዮቴ! ሃይካፓ ሴካ ዒንሢኮ ዒንዳ ታኣኮ ማቾቱዋኣሢሮ፤ ጊንሣ ሃሣ ታኣኒያ ዒዞኮ ዓኒቱዋኣሢሮ ዞኦዛ ኮኦማኒ ዒዛ ማላ ማሊፆንታ ሜሌ ዓኒና ዒዛ ላሃ ላሂፆ ሃሻንዳጉዲ ዞሪ ዒዞ ጎሩዋቴ። 
\v 3 ዒዛ ዬያ ሃሺ ማዒባኣቴ ዒዛ ሾይንቴ ኬሎ ዓኣማ ጎይፆ ካሎ ታ ዒዞ ዓይሳንዳኔ፤ ዒርዚ ዋርቁዋ ሳዓ፥ ጉሪ ጉሪ ዳውሌ ታ ዒዞ ማሃንዳኔ፤ ዋኣሢ ዼኤቢና ታ ዒዞ ዎዺሻንዳኔ። 
\v 4 ዞኦዜ ላኣሊፓ ናኣታ ዒዞኮ ሾይንቴሢሮ ናኣቶም ታኣኒ ሚጪንታዓኬ። 
\v 5 ዔያቶኮ ዒንዴላ ዞኦስካ ኮኦማያ ማዔሢሮ ዔያቶ ዒዛ ሻኣካ ጎይሢና ጎጳዼያኬ፤ ዒዛ ዬያ ማዼሢ «ታኣኒ ሙዓንዳ ሙዖንታ ዋኣፆንታ፥ ሱኡፖና ታልቦ ጎሎና ኮሾና ማኣዓሢንታ፥ ዛይቶንታ ታኣኒ ዑሽካንዳ ዑዦዋ ታኣም ዔያታ ዒንጋያታሢሮ ታ ላጎ ጊንፆ ታኣኒ ዴንዳንዳኔ» ጌይኬ።
\p
\v 6 ዬያሮ ታኣኒ ጎይፆ ዒዞኮ ዓንጊሢና ዲርቃንዳኔ፤ ካራ ዴንቂ ዒዛ ኬስኩዋጉዲ ካታሞኮ ዙሎ ታኣኒ ሹቺና ኬልቂ ዲርቃንዳኔ። 
\v 7 ዒዛ ፔ ላጎ ጊንፆ ዓኣዻኒ ዳንዳዓኔ፥ ጋዓንቴ ዒዛ ዴንዲ ዔያቶ ሄላዓኬ፤ ዔያቶ ዒዛ ኮዓንዳኔ፥ ጋዓንቴ ዒዛ ዴንቃዓኬ፤ ዬካፓ ዒዛ፦ «ሃያፓ ታኣኮ ቤርታኣ ናንጎማ ኮሺኬ፤ ዬያሮ ታኣኮ ቤርታኣ ዓኒ ኮይላ ታ ዴንዳንዳኔ» ጋዓንዳኔ።
\p
\v 8 ታኣኒ ዒዞም ሃኣኮንታ ዎይኖ ዑዦንታ ሪሚቶ ዛይቶንታ ዒንጌያታሢ ጋፒ ዒዛ ዋሌኔ፤ ታኣኒ ዒዞም ዬያ ሚርጊሺ ዒንጌ ቢሮንታ ዎርቆንታ «ባዓኣሌ» ጌይንታ ሜሌ ፆኦዞም ዒንጎ ባኣዚ ማሂ ዒዛ ሺኢሼኔ። 
\v 9 ማኣላ ቡሪንታ ዎዶና ሃኣኮ፥ ዎይና ካፃ ዎዶና ዎይኖ ታ ዒዞይዳፓ ዔካንዳኔ፤ ካሉሞ ዒዛ ፔኤኮ ዓኣቻ ሱኡፓሢና ታልቦ ጎሎና ኮሾና ማኣዓሢ ታ ዒዞኮ ጉሲ ዔካንዳኔ። 
\v 10 ዒዞኮ ዞኦዛ ዎላ ኮኦሞ ላጎ ቤርታ ታ ዒዞ ካሎ ዓይሳንዳኔ፤ ታ ኩጫፓ ዒዞ ቶሊሲ ዓውሳንዳይ ባኣሴ። 
\v 11 ዒዛ ቦንቺ ቦንቺ ዎዛዻ ቦንቾ ኬሎ ቢያ፤ ጌይፃ፦ ሃውሾ ኬሎንታ ሌዓ ሌዓ ቦንቾሢንታ ዓጊኖ ፄኤሮ ቦንቾሢንታ ታኣኒ ዓይሳንዳኔ፤ ዬያጉዲ ዱማ ዱማ ዒዛ ቦንቻ ቦንቾ ቢያ ቦንቹዋጉዲ ታኣኒ ዒዞ ላኣጋንዳኔ። 
\v 12 ዒዛ ፔኤኮ ዎላ ዞኦዛ ኮኦማ ላጎፓ ዔኬኔ ጋዓ ዎይኖንታ ቤሌሶ ሚፆንታ ታኣኒ ዒዞኮ ቱጋንዳኔ፤ ዎይኖንታ ዱማ ዱማ ሚፆ ዓኣፖ ዒዛ ቱካ ጎዦ ታኣኒ ካይዚ ማሃንዳኔ፤ ዬያ ሚፆ ዓኣፖ ካዮ ቦዓ ሙዓንዳኔ። 
\v 13 «ባዓኣሌ» ጌይንታ ሜሌ ፆኦዞም ዑንጆ ዒዛ ጩቢሼሢሮና ዒዞና ዎላ ዞኦዛ ኮኦማ ላጎ ጊንፆ ዒዛ ፓልሚንቲ ዴንዲ ታና ሃሼሢሮ ሜቶ ታ ዒዞይዳ ዓጋንዳኔ፤ ጋዓኔ፥ ናንጊና ናንጋ ጎዳሢ።
\s1 ፆኦሲ ፔ ዴሮ ናሽካ ናሹሞ
\p
\v 14 ዬያሮ ጊንሣ ታ ዒዞ ዓሲ ናንጉዋ ዳውሎ ዔኪ ዴንዳንዳኔ፤ ዒኢካ ታ ዒዞ ናሹሞ ዑኡሲና ጌሺ ታ ባንሢ ማሃንዳኔ። 
\v 15 ቤርታ ዒዞፓ ዔኬ ዎይኖ ጊንሣ ታ ዒዞም ማሃንዳኔ፤ ሜቶ ዶኦቺ ማዔ ቤዞ ሃጊ ኮሺ ባኣዚ ጴዻንዳ ካራ ታ ዒዞም ማሂ ኮሻንዳኔ፤ ዓካሪ ዒዛ ዒኢካ ሚና ጊብፄ ዓጫፓ ኬስካኣና ዼጋቶ ዎዶና ዓኣ ጎይፆ ማዒ ዎዛና ዓይኑሞ ዓይናዻንዳኔ። \x - \xo 2፡15 \xo*\xt ዒያ. 7፡24-26።\xt*\x* 
\v 16 ዬኖ ኬሎና ዒዛ «ዓኒዮ!» ጌይ ታና ዔኤላንዳኔ፤ ባዓኣሌ ጌይንታ ሜሌ ፆኦዞ ዒዛ ዔኤላ ጎይፆ «ታ ጎዳ!» ጌይ ዒዛ ታና ዔኤላዓኬ። 
\v 17 ዒዞኮ ዻንጋፓ ባዓኣሌ ጌይንታ ሜሌ ፆኦዞኮ ሱንፆ ታኣኒ ባይዛንዳሢሮ ዔያቶኮ ሱንፆ ጶቂሢ ዒዛ ዔኤላዓኬ።
\p
\v 18 ዒንሢ ኮሺ ናንጊ ናንጋንዳጉዲ ካዮ ቦዖንታ ጫሪንጫ ባራና ካፖንታ ካዮ ቦዖ ዻኮንታ ዼኤፖንታ ዎላ ታኣኒ ሳሌ ሳላዻንዳኔ፤ ዒንሢ ናንጋ ሳዖይዳፓ ዖልዚ ዓንጋሞና ዖልቶ ዖልዚያኣ ታኣኒ ባይዛንዳኔ።
\q
\v 19 ዒስራዔኤሌ! ናንጊና ታ ማቾ ማሂ ታ ኔና ናንጊሻንዳኔ፤
\q2 ፂሎ ማዾ ማዺሢና ፒዜ ዎጌ ዎጊሢና
\q2 ናንጊና ናንጋ ናሹሞና ናሽኪ ሚጪንቲ
\q2 ዓዳ ታ ማቾ ማሂ ታ ኔና ዛጋንዳኔ።
\q
\v 20 ታ ማቾ ማሂ ታኣኒ ኔኤና ዎላ ሳላዼ ሳሎ ካፓንዳኔ፤
\q2 ታኣኒ፥ ናንጊና ናንጋ ጎዳ ማዔሢ ኔኤኒያ ዔራንዳኔ።
\q
\v 21 ናንጊና ናንጋ ጎዳ ሂዚ ጋዓንዳኔ፦
\q2 «ዬኖ ኬሎና ታኣኒ ማሂ ኬኤዛ ባኮ ኬኤዛንዳኔ፤
\q2 ታኣኒ ጫሪንጮም ማሂ ኬኤዛንዳኔ፤
\q2 ጫሪንጫኣ ሳዖም ማሂ ኬኤዛንዳ ባኣዚ ዓኣኔ።
\q
\v 22 ሳዓ ሃኣኮንታ ዎይኔንታ ሪሚቲ ዛይቴንታ ጴዺሳያ ማዒ
\q2 ዒይዚራዔኤሌም ማሂ ኬኤዛንዳኔ።
\q
\v 23 ታኣኮ ዴሮ ታኣኒ ሳዔሎይዳ ማዢ ዶዲሺ ዔቂሳንዳኔ፤
\q2 ዔያታ ዖርጎጪ ናንጋንዳጉዲያኣ ታኣኒ ማሃንዳኔ፤
\q ‹ጎማ ዓቶም ጌይ ቲኢሪንታዓኬ› ጌይንቴ ዴሮ ሚጪንቲ ታኣኒ ቲኢራንዳኔ፤
\q2 ‹ዒንሢ ታ ዴሬቱዋሴ› ጌይንቴ ዴሮ ‹ታ ዴሬኬ› ታኣኒ ጋዓንዳኔ፤
\q2 ዔያታ ዒማና ‹ኔኤኒ ኑኡኮ ፆኦዛሢኬ› ጋዓንዳኔ።» \x - \xo 2፡23 \xo*\xt ሮሜ 9፡25፤ 1ጴፂ. 2፡10።\xt*\x*
\c 3
\s1 ሆሴዔና ዒዛኮ ዞኦዛ ኮኦማ ላኣሌሎና
\p
\v 1 ናንጊና ናንጋ ጎዳ ታኣም፦ «ዒስራዔኤሌ ዓሳ ሜሌ ፆኦዞ ባንሢ ሺሪ ዬያቶ ፆኦዞም ዱማሲ ዒንጎ ዎይኖ ዓኣፖ ሜሌሢ ናሽካያ ማዔቴያ ናንጊና ናንጋ ጎዳ ዔያቶ ናሽኬሢጉዲ ኔኤኒያ ኔኤኮ ዞኦዛ ኮኦማ ላኣሌሎ ናሽኪ ዒዞና ዎላ ናንጌ» ጌዔኔ።
\p
\v 2 ዬያሮ ታኣኒ ዒዞ ታጶ ዶንጎ ሹቺ ቢራና ፄኤታና ዶንጊታሚ ኪሎ ማዓ ዔልዓና ጊንሣ ሻንቂ ዔኬኔ፤ 
\v 3 ታኣኒ ዒዞም፦ «ሜሌ ዓሲና ዞኦስካ ኮኦሚ፥ ሜሌ ዓሲያኣ ናሽኩዋዖ ታኣና ዎላ ሚርጌ ዎዴ ናንጌ፤ ታኣኒያ ኔኤና ዎላ ናንጋንዳኔ» ጌዔኔ። 
\v 4 ዬያ ጎይፆ ዒስራዔኤሌ ዴራ ካኣቲያ ሱኡጌያ ባኣያ፥ ፆኦሲም ዒንጎ ባኣዚያ ባኣያ ዻኣቦዋ ዻኣቡዋዖ፥ ዔፑዴያ ባኣያ፤ ጊንሣ ሃሣ ካኣሽኮ ፆኦዛ ባኣያ ማዒ ሚርጌ ዎዴ ናንጋንዳኔ፤ 
\v 5 ዬካፓ ዒስራዔኤሌ ዓሳ ናንጊና ናንጋ ጎዳ ማዔ ዔያቶኮ ፆኦዛሢና ዔያቶኮ ካኣቲ ዳውቴና ባንሢ ሺራንዳኔ፤ ጋፒንፆ ዎዶይዳ ዒጊጪ ጎጋይቂሢና ናንጊና ናንጋ ጎዳ ባንሢ ዔያታ ዬዓንዳኔ፤ ዓንጂንታ ዓንጆዋ ዔያታ ዔካንዳኔ።
\c 4
\s1 ፆኦሲ ዒስራዔኤሌ ዓሶ ማኪ ጌስቴ ጌኤዞ
\p
\v 1 ሃኖ ሳዔሎይዳ ናንጋ ዓሶ ቢያ ናንጊና ናንጋ ጎዳ ማኪ ጌስታ ጌኤሲ ዓኣኔ፤ ዬያሮ ዒስራዔኤሌ ዴሬዮቴ! ዒዚ ዒንሢም ጋዓ ባኮ ዋይዙዋቴ፦ «ሃኖ ሳዖይዳፓ ጉሙርቂንቲሢንታ ናሹሞንታ ፆኦሲ ዔሪሢያ ጋፒ ባይቄኔ። 
\v 2 ዔያታ ዎሊም ሉሉኡቃኔ፥ ጋጋዳንቃኔ፥ ዓሲ ዎዎዻኔ፥ ዉዉኡቃኔ፥ ማቾ ሃሣ ዓኒ ማዒባኣያና ላሃኔ፥ ዎሊ ዎዺሢያ ሚርጊ ሚርጊ ዴንዴኔ። 
\v 3 ዬያ ዛሎና ሳዓ ዓቢ ማዔም ዔኤቢያ ሜሊ ጋፓኔ፤ ሳዔሎይዳ ናንጋ ባካኣ ቢያ ዎልቄ ባይቂ ላባኔ፤ ቆልማ፥ ካዮ ቦዓ፥ ካፖንታ ባዞይዳ ናንጋ ሞላሢንታ ቢያ ሃይቂ ጋፓኔ።»
\s1 ፆኦሲ ቄኤሶ ማኪ ጌስቴ ጌኤሲ
\p
\v 4 ናንጊና ናንጋ ጎዳ ሂዚ ጋዓኔ፦ «ታኣኒ ማኪ ጌስታሢ ዒንሢ፥ ቄኤሶም ማዔሢሮ ዴራ ዔኤቢ ዻቤኔ ጌይ ጌስታ ዓሲንታ ዴሮ ማኪ ጌስታ ዓሲ ባኣያ ማዖም። 
\v 5 ዒንሢ፥ ቄኤሳ! ሮኦሮ ፖዖይዳ ሃንታዖ ዹቂንታኔ፤ ታ ማሊፆ ኬኤዛ ዓሳኣ ዒንሢና ዎላ ዹሞይዳ ሃንታኔ ጌይ ዹቂንታኔ፤ ዬያሮ ታኣኒ ዒንሢኮ ዒንዶ ማዔ ዓጬሎ ባይዛንዳኔ። 
\v 6 ታኣኮ ዴራ ታና ኮይሳ ጎይፆጉዴያ ዔሪባኣሢሮ ባይቄኔ፤ ዒንሢያ ታና ዔራኒ ኮይባኣሢሮ ዒንሢ ቄኤሴ ማዒ ታኣም ማዻንዳጉዲ ታ ኮዑዋሴ፤ ታና፥ ዒንሢኮ ፆኦዛሢ ዎጎ ዒንሢ ቶኦቼሢሮና ዋሊ ዒንሢ ሃሼሢሮ ናኣቶ ታ ዒንሢኮ ያዺ ዋሊ ሃሻንዳኔ።
\p
\v 7 «ዒንሢ፥ ቄኤሳ! ፓይዳ ዒንሢኮ ዺቢ ዴንዴ ጎይፆጉዴያ ታኣም ዒንሢ ዓይሢንቶ ዒፂ ዻቤ ዻቢንታኣ ዒንሢኮ ያዺ ሚርጊ ዴንዴኔ፤ ታኣኒያ ዒንሢኮ ቦንቾ ባይዚ ዒንሢ ዻውሲሳንዳኔ። 
\v 8 ታ ዴሮኮ ጎማ ዒንሢም ዖርጎጪሢኮ ካራ ማዔሢሮ ዴራ ዺቢ ጎሜ ማማዻንዳጉዲ ዒንሢ ኮዓኔ። 
\v 9 ዒንሢ፥ ቄኤሳኣ ዴሮጉዲ ማዔኔ፤ ዬያሮ ዴሮይዳ ታኣኒ ዓጋንዳ ፑርቶ ባካ ዒንሢ ቄኤሶዋ ሄላንዳኔ፤ ፔቴ ፔቴ ዓሳ ሃንቴ ጎይፆጉዴያ ኮሞ ታኣኒ ኮፃንዳኔ፥ ማዼ ማዾማ ጉዴያ ሃሣ ማሂ ታኣኒ ዒንጋንዳኔ። 
\v 10 ዔያታ ታና ሃሼሢሮ ሙዓኔ፥ ጋዓንቴ ሚሽኩዋሴ፤ ሜሌ ፆኦዞም ዚጎ ቤዞይዳ ዞኦዛ ኮኦማኔ፥ ጋዓንቴ ናይ ዔያታ ሾዑዋሴ።»
\s1 ሜሌ ፆኦዞ ካኣሽኪሢ ዛላ ፆኦሲ ጌስቴ ጌኤሲ
\p
\v 11 ናንጊና ናንጋ ጎዳ ሂዚ ጋዓኔ፦ «ዞኦስካ ኮኦሚሢንታ ካፄ ዎይኖ ዑዦንታ ሙርጎንታ ታ ዴሮኮ ዒኖ ባይዜኔ። 
\v 12 ዬያሮ ሚሢና ኮሺንቴ ሜሌ ፆኦዞ ኮይላ ዞሮ ዔያታ ዖኦጫኔ፤ ዬይ ሚፃ ዔያቶም ማሂ ዔኤቢ ኬኤዛንዳያ ማላኔ፤ ዞኦስካ ኮኦማንዳጉዲ ማሃ ዓያና ዔኪ ታና ዔያቶኮ ፆኦዛሢፓ ሃኪ ዔያታ ዴንዴኔ። 
\v 13 ዹኮና ጌሜሮናይዳ ቢያ ሜሌ ፆኦዞም ዒንጎ ባኣዚያ ዒንጊ፥ ዑንጄያ ዔያታ ጩቢሻኔ፤ ዬያ ዔያታ ማዻሢ ዼኤፖ ሚፆ፥ ካኣፓ ጋምፒንቲ ዴንዳ፥ ሺባኣ ኮሺ ጊኢጋያ ማዔ ሻኣቦንታ ዱማ ዱማ ሚፆ ዴማኬ፤ ዬያ ዒንሢ ማዻሢሮ ዒንሢኮ ዉዱሮ ናኣቶንታ ናኣዚንሢ ላኣሎንታ ናይ ሾዓኒ ዞኦስካ ኮኦማያ ማዓንዳኔ። 
\v 14 ዒንሢኮ ዉዱሮ ናኣቶንታ ናኣዚንሢ ላኣሎንታ ናይ ሾዓኒ ኮይፆና ዞኦስካ ኮኦማ ዎዶና ታኣኒ ሜቶና ጎሪ ዔያቶ ማሃዓኬ፤ ዓይጎሮ ጌዔቴ ዒንሢ፥ ዓቲንቃ ጌኤዦ ማኣሮይዳ ዓኒንሢ ማዒባኣ ዓሶና ላሃ ላኣሎ ጊንፆ ሃንቲ ሃንቲ ሜሌ ፆኦዞ ዒንሢ ካኣሽካኔ፤ ዬያሮ ማሊ ጶቂሡዋ ዴሬ ባይሲንታይዳ ኬዳንዳኔ።
\p
\v 15 «ዒስራዔኤሌ ዴሬዮቴ! ዒንሢ ዞኦስካ ኮኦማ ዓሲ ማዔቴያ ዪሁዳ ዴሮ ዻቢንቲዳ ጌልዚፖቴ፤ ጌልጌላኣ ማዖም ቤትዓዌ\f + \fr 4፡15 \fr*\fq ቤትዓዌ፦ \fq*\ft ጌይፃ «ፑርቱሞኮ ማኣሪ» ጌይሢኬ፤ ዬና ቤኤቴሌሜም ጌሢንቴ ጫቺ ሱንሢኬ።\ft*\f* ዴንዲፖቴ፤ ‹ናንጊና ባይቁዋዖ ናንጋ ፆኦሲ ሃይቆ!› ጌይ ጫኣቂፖቴ። 
\v 16 ዒስራዔኤሌ ዴራ ዔኤቢ ዓቴኔ ጎዑዋ ማሮጉዲ ዋይዚ ዒፄኔ፤ ሂዳዖ ናንጊና ናንጋ ጎዳ ዔያቶ ማራናይጉዲ ዎይቲ ኮሺ ቤስካ ሄንቃኒ ዳንዳዓይ? 
\v 17 ዔፕሬኤሜ ዴራ ሜሌ ካኣሺ ካኣሽኪሢና ሜሌ ፆኦዞና ዎላ ቱኡቴያ ማዔሢሮ ሼኔ ጌዔ ባኣዚ ማዾንጎ ዔያቶ ሃሹዋቴ። 
\v 18 ዎይኖ ዑዦ ሚርጊሺ ዔያታ ዑሽካዖ ዞኦዛ ኮኦሚፆ ማዾ ዓርቃኔ፤ ዔያቶኮ ሱኡጋ ቦርሲሳ ማዾ ማዺሢ ዒናፓ ናሽካኔ። 
\v 19 ዔያታ ዓልጎ ዢባሬና ፒፂንቴ ዴንዳ ባኣዚጉዲ ዔውቲ ዴንዲ ባይቃንዳኔ፤ ሜሌ ፆኦዞም ዒንጎ ባኮ ዒንጊፆናኣ ዔያታ ዻውሲንታንዳኔ።»
\c 5
\s1 ዒስራዔኤሌይዳ ዓጊንታኒ ጊኢጌ ሜቶ
\q
\v 1 «ዒንሢ ቄኤሳ! ዋይዙዋቴ!
\q2 ዒንሢ ዒስራዔኤሌ ዓሳ ኮሺ ዒና ዔኪ ማሉዋቴ!
\q2 ዒንሢ ካኣቶ ማኣሮ ዓሳ ሃያ ኮሺ ዋይዙዋቴ!
\q ዒንሢዳ ሜታ ዓጊንታኒ ጊኢጌኔ፤
\q2 ሚፂጳይዳ ዓሶኮ ዒንሢ ሆሌ ፒሮ
\q2 ታኣቦኦሬይዳ ቶኪ ፒሮ ማዔኔ።
\q
\v 2 ዋይዞ ዒፃ ፑርቶ ዓሳ ዓሲ ዎዺሢሮ ኬስኬ ዓሲ ማዔኔ፤
\q2 ዬያሮ ቢያሢዳ ታኣኒ ሜቶ ዓጋንዳኔ።»
\q
\v 3 «ዔፕሬኤሜ ዛሎ ቢያ ጋፒ ታኣኒ ዔራኔ፤
\q2 ዒስራዔኤሌ ባካኣ ታ ቤርታ ዓኣሺንቴያቱዋሴ።
\q2 ዔፕሬኤሜ፥ ኔኤኒ ዞኦስካ ኮኦማያ ማዔኔ፤
\q2 ዒስራዔኤሌያ ዒኢቴኔ።»
\p
\v 4 ዞኦስካ ኮኦማንዳጉዲ ማሃ ዓያና ዒስራዔኤሌ ዴሮ ዒኖይዳ ዓኣሢሮ፥ ናንጊና ናንጋ ጎዳኣ ዔያታ ዔሩዋኣሢሮ ፆኦሲ ባንሢ ዔያታ ማዑዋጉዲ ዔያታ ማዻ ማዻ ዔያቶ ላኣጌኔ። 
\v 5 ዒስራዔኤሌ ዴሮኮ ዖቶርማ ዔያቶም ፔኤሮ ማርካዻኔ፤ ጎማ ዔያቶኮ ፒሮ ማዒ ዔያቶ ቡኡዲ ሎንሣኔ፤ ዪሁዳ ዴራኣ ዔያቶና ዎላ ዹቂንቲ ሎኦማኔ። 
\v 6 ዒንጎ ባኣዚ ማሂ ፆኦሲም ሺኢሻኒ ማራቶንታ ባኣቶንታ ዒሺ ዔኪ ዒዛ ኮይፆ ዔያታ ዴንዳኔ፤ ጋዓንቴ ዒዚ ዔያቶ ቤርታፓ ዱማዺ ዶጪ ዔቄሢሮ ዔያታ ዒዛ ዴንቂንዱዋሴ። 
\v 7 ዔያታ ሜሌ ፆኦዞ ካኣሽካያ ማዔሢሮ ናንጊና ናንጋ ጎዳም ጉሙርቂንታያ ማዒ ጴዺባኣሴ። ናኣታ ዔያቶኮ ሜሌ ፆኦዞሮ ማዔኔ፤ ዬያሮ ሃኖ ዓጊኖ ፄኤሮና ዔያቶንታ ዔያቶኮ ሳዖንታ ቢያ ባይቃንዳኔ።
\s1 ዪሁዳና ዒስራዔኤሌና ባኣካ ኬስካንዳ ዖልዚ
\p
\v 8 ዖልዚም ኬስካንዳጉዲ ጌባዖኦኔይዳ ዛዬ፥ ራኣማይዳ ፖሮዚ ዋርቁዋቴ! ቤትዓዌኔይዳ ዔቂጋፓ፦ «ቢኢኒያሜ ፃጲዮ! ኑኡኒ ኔኤና ዎላኬ» ጌይ ጌይ ዒላቱዋቴ። 
\v 9 ታኣኒ ሜቶ ዓጋ ኬሎና ዔፕሬኤሜ ሻሂንቲ ዶዔ ካታማ ማዓንዳኔ፤ ዬይ ጎኔና ዒስራዔኤሌ ፃጶ ሄላንዳጉዲ ታኣኒ ዓጌ ባይሲንታኬ።
\p
\v 10 ናንጊና ናንጋ ጎዳ ሂዚ ጋዓኔ፦ «ዪሁዳ ዓጮ ሱኡጋ ጌዲ ዎዺ ጎሽካ ዓሲጉዲ ማዔሢሮ ታኣኮ ዻጎ ዲጲጉዲ ዔያቶ ዑፃ ማሂ ታኣኒ ዳካንዳኔ። 
\v 11 ዔፕሬኤሜ ሜሌ ፆኦዞ ካኣሽኪሢ ናሽኬሢሮ ሄርቂ ዎይሥሢና ፒዜ ዎጌ ባይቂሢና ዔያቶ ሄሌኔ። 
\v 12 ዬያሮ ታኣኒ ዔፕሬኤሜም ቢሎ፥ ዪሁዳ ዴሮም ሃሣ ኮሴ ማዔኔ።
\p
\v 13 «ዔፕሬኤሜ ሃርጊንቲፆ፥ ዪሁዳኣ ሜቂ ኪፃዼ ኪፆ ዴንቄኔ፤ ዬካፓ ዔፕሬኤሜ ዓሶኦሬ ዓጮ ዴንዴኔ፤ ማኣዶ ዖኦጫኒያ ዼኤፖ ካኣታሢ ኮይላ ኪኢታ ዓሲ ዳኬኔ፤ ጋዓንቴ ዬይ ዔያቶ ዓውሳኒንታ ኪፆዋ ዔያቶኮ ፓሣኒ ዳንዳዒባኣሴ። 
\v 14 ዬያሮ ታኣኒ ዞቢጉዲ ዔፕሬኤሜ፥ ጊንሣ ሃሣ ሃጊ ዔቃ ዞቢጉዲ ዪሁዳ ሜንሢ ጋኣጪ ዴንዳንዳኔ፤ ዓርቂ ዔኪያኣ ታኣኒ ዴንዳንዳኔ፤ ዔያቶ ዓይጌያ ዬያይዳፓ ዓውሳዓኬ።
\p
\v 15 «ሜታ ዔያቶ ሄላዛ ታና ዔያታ ኮዓንዳኔ፤ ዬያሮ ዔያታ ዻቤ ዻቢንቶ ዔሪ ታ ባንሢ ማዓንዳያ ሄላንዳኣና ዔያቶፓ ታኣኒ ሃኪ ዶጪ ዔቃንዳኔ።»
\c 6
\s1 ዒስራዔኤሌ ዴሮኮ ጎሞ ቡኡፄያ ማሊ ጌሺፆ
\p
\v 1 ዴራ ሂዚ ጋዓኔ፦ «ሃኒ ዬውዋቴ! ናንጊና ናንጋ ጎዳ ባንሢ ኑ ማዖም! ዒዚ ኑና ሜንሤኔ፥ ዒ ኑና ኮኦሊ ዓውሳንዳኔ፤ ዒዚ ኑና ኪፃሴኔ፥ ዒ ፔኤሮ ፓፂሳንዳኔ። 
\v 2 ዒዛ ቤርታ ሼምፔና ኑ ናንጋንዳጉዲ ላምዖ ኬሊኮ ጊንፃ ዒ ኑና ዓካሳንዳኔ፥ ሃይሣሳ ኬሎና ሃሣ ዒዚ ኑና ሼምፔና ዓኣያ ማሂ ዔቂሳንዳኔ። 
\v 3 ሃኒ ዬውዋቴ፥ ናንጊና ናንጋ ጎዳሢ ኑኡኒ ዔሮም፤ ሴካ ሃንጋ ጎዑዋዖ ዒዛ ጊንፆ ኑ ሃንቶም፤ ዒዚ ፆፆርቃ ዓቢጉዲ፥ ሃሣ ጊንሣ ሳዖ ዑሺ ሚሻ ባርጊ ዒርዚጉዲ ኑ ባንሢ ዬዓኔ።»
\p
\v 4 ናንጊና ናንጋ ጎዳ ሂዚ ጋዓኔ፦ «ዔፕሬኤሜና ዪሁዳና ዴሬዮቴ! ታ ዒንሢ ዎዎዳንዳይ? ዒንሢ ታና ናሽካ ናሹማ ጉቴና ጴዻ ሊኢሎና ዖልኬናጉዲ ኔጉዋዖ ባባይቃያኬ። 
\v 5 ዬያሮ ታ ማሊፆ ኬኤዛ ዓሶና ታኣኒ ዒንሢ ቲቄኔ፤ ታ ዻንጋፓ ኬስካ ቃኣሎና ታ ዒንሢ ዎዼኔ፤ ታኣኒ ዒንሢዳ ዓጌ ፑርቶ ባካ ዜኤሊንሢጉዲ ዒንሢዳ ፖዔኔ። 
\v 6 ታኣኒ ታኣም ዒንጎ ባኣዚፓ ባሼ ዱማ ዱማ ካራና ላኣሚንቱዋ ናሹሞ ኮዓኔ፤ ሚቺ ዒንጎ ባኮይዳፓኣ ባሼ ታና፥ ናንጊና ናንጋ ጎዳ ዒንሢ ዔራንዳጉዲ ታኣኒ ኮዓኔ።»\x - \xo 6፡6 \xo*\xt ማቲ. 9፡13፤ 12፡7።\xt*\x*
\p
\v 7 «ዓሲ ታኣና ዎላ ጫኣቄ ጫኣቁሞ ሃሼሢጉዲ ዔያታ ታኣኒ ዔያቶም ዒንጌ ዓጬሎ ጌላዖ ጫኣቄ ጫኣቁሞ ኬኤሪ ሃሼኔ፤ ታኣም ጉሙርቂንቱዋያ ማዒፆዋ ፔጋሲ ዔያታ ዻዌኔ። 
\v 8 ጌሌዓዴ ካታማ ፑርታ ዓሲና ዓሲ ዎዼ ዓሲያኣ ኩሜ ካታማ ማዔኔ። 
\v 9 ሱላ ዓሲ ዎዻኒ ካታያጉዲ ቄኤሳ ዎላ ማርቲ ዒማይዳያ ማዔኔ፤ ሴኬኤሜ ዔኪ ዴንዳ ጎይፆይዳታዖ ካቲ ካቲ ዓሲ ዔያታ ዎዻኔ፥ ቦርሲሳያ ማዔ ጌኔ ማዾዋ ማዻኔ። 
\v 10 ዑስካ ጌላ ባኣዚ ዒስራዔኤሌ ዴራ ማዻያ ታኣኒ ዴንቄኔ፤ ዔፕሬኤሜ ዞኦስካ ኮኦማያ ማዔኔ፤ ዒስራዔኤሌያ ዒኢቴኔ።»
\b
\q
\v 11 «ዒንሢ፥ ዪሁዳ ዴሬዮቴ!
\q2 ታኣኒ ዒንሢዳ ዎጌ ዎጎንዶ ኬሊ ሜንሤኔ።»
\c 7
\p
\v 1 «ታ ዴሮ ዒስራዔኤሌ ታኣኒ ፓሣኒ ኮዓዛ ዔፕሬኤሜኮ ጎማ፥ ሳማሪያኮ ፑርቱማ ፔጋዺ ታኣም ጴዼኔ፤ ዔያታ ዎሊም ሉሉኡቃኔ፥ ማኣሪ ሜንሢ ጌሊ ዉዉኡቃኔ፥ ዎላ ማርቲ ፔቱሞና ጉርዶ ዴንዲ ዴንዲ ዓሶ ቡራኔ። 
\v 2 ጋዓንቴ ታኣኒ ዬያ ቢያ ፑርቱሞ ዔያቶኮ ዔሬያታሢ ዔያታ ጶቂሡዋሴ፤ ዬያፓ ዔቄያና ዔያቶኮ ጎማ ዔያቶ ዱኡኬኔ፤ ዔያታ ማዻ ፑርቶ ማዻ ቢያ ታ ዓኣፓፓ ዓኣሺንቴያቱዋሴ።»
\s1 ካኣቱሞ ማኣሮይዳ ማዺንቴ ጌኔ ማዾ
\p
\v 3 ናንጊና ናንጋ ጎዳ ሂዚ ጋዓኔ፦ «ዔያታ ዔያቶኮ ፑርቱሞና ካኣቲ ዎዛሲ፥ ሱኡጎ ማዒ ዎይሣ ዓሶዋ ፔ ሉኡዙሞና ዎዛሳኔ። 
\v 4 ዔያታ ቢያሢ ዞኦስካ ኮኦማያኬ፤ ካፃንዳጉዲ ዺንቂ ሃሾና ዺኢላ ካፂ ጋኣባንዳያ ሄላንዳኣና ላኣዶ ላኣዳ ዓሴላ ታሞ ዴማ ዳካኒ ኮይሱዋ ቦኦቆጉዲ ዔያታ ዖይዺ ቴኤሊ ዓኣያኬ። 
\v 5 ካኣቲኮ ቦንቾ ኬሎና ሱኡጋ ዎይኖ ዑዦ ሚርጊሺ ዑሽኪ ማሢንቲ ሃርጌኔ፤ ዒዚያ ዬያ ፓሡዋ ዓሶና ዎላ ፔቴ ማዔኔ። 
\v 6 ጌኔ ማዾ ማዾንዶ ካራ ማዣኒ ዒና ዔያቶኮ ናኣቦ ታሚጉዲ ዖይዻያኬ፤ ጌኖ ማዻ ዔያቶኮ ዒባኖ ቢያ ጩቤ ጎይሣ ዎርቃኔ፤ ሳዓ ካራዛ ጋዓንቴ ታሚጉዲ ዔዔኤታኔ።
\p
\v 7 «ዔያታ ቢያሢ ፔ ጌኖ ማዾና ናኣቦ ታሚጉዲ ዖይዺ ፔኤኮ ሱኡጎ ሙዔኔ፤ ዔያቶኮ ካኣቶዋ ፔ ዎዶና ዎዶና ዎዺ ዔያታ ባይዜኔ፤ ዬይ ቢያ ያዺ ማዓኣና ዬያቶ ካኣቶ ባኣካፓ ፔቴታዖ ታኣኒ ማኣዳንዳጉዲ ታና ዖኦጬይ ባኣሴ።»
\s1 ዒስራዔኤሌ ዴራ ሜሌ ዴሮና ዎላ ሲኢሪንቴሢ
\p
\v 8 ናንጊና ናንጋ ጎዳ ሂዚ ጋዓኔ፦ «ዔፕሬኤሜ ሜሌ ዴሮና ዎላ ሲኢሪንቴኔ፤ ዬያሮ ዔያታ ዛኣሩዋዖ ቦኦቆይዳ ሃሾና ላኣዳጉዲ ፑርቲ ጉሪ ዓቴኔ፤ 
\v 9 ፃንጎ ማዔ ዴራ ዎልቆ ዔያቶኮ ጉሪ ሙዔኔ፤ ዔያታ ጋዓንቴ ዬያ ማሊ ዒና ዔኪባኣሴ፤ ሜሌ ዓሳ ዔያቶ ዎይሣንቴና ቶኦካ ዔያቶኮ ቡኡቄኔ፤ ጋዓንቴ ዬያኣ ዔያታ ዒና ዔኪባኣሴ። 
\v 10 ዒስራዔኤሌ ዴራ ዖቶርቄ ዖቶርማ ሺሪ ዔያቶ ዑፃ ማርካዼኔ፤ ዬይ ቢያ ያዺ ማዔቴያ ታና፥ ናንጊና ናንጋ ጎዳ ማዔ ዔያቶኮ ፆኦዛሢ ባንሢ ዔያታ ማዒባኣሴ፤ ማዓኒያ ፔቴታዖ ዔያታ ኮይባኣሴ። 
\v 11 ዔፕሬኤሜ ዶኦሌጉዲ ጉሪ ሼሌዔ፥ ጊንሣ ሃሣ ዒኔያኣ ባኣያ ማዔኔ፤ ዬያሮ ፔና ማኣዳንዳሲኑዋይ ጌይ ፔቴና ጊብፄ ባንሢ ዒላታኔ፥ ባጌያና ጊንሣ ዓሶኦሬ ባንሢ ጳሽካኔ። 
\v 12 ዬያ ዔያታ ሃንቲ ሺራ ቤዞ ቢያይዳ ታኣኮ ፒራሢ ፒሪ ካፒጉዲ ታኣኒ ዔያቶ ዓርቃንዳኔ፤ ዔያታ ማዻ ፑርቶ ማዾ ዛሎ ታ ዔያቶይዳ ሜቶ ዓጋንዳኔ።
\p
\v 13 «ታና ሃሺ ሃኪ ዔያታ ዴንዴሢሮ ዔያቶ ባዴዔ! ታኣም ዔያታ ዋይዞ ዒፄሢሮ ባይሲንታ ዔያቶይዳ ሙኮም፤ ታኣኒ ዔያቶ ዓውሳኒ ኮዔያታንቴ ዔያታ ታኣም ሉኡቃያ ማዔኔ። 
\v 14 ዔያታ ፔኤኮ ዓርሶይዳ ላሂ ዒላታኣፓዓቴም ዒናፓ ታና ሺኢቁዋሴ፤ ሃኣኮንታ ዎይኖ ዑዦንታ ዴንቃኒ ፔኤኮ ዑፆ ዔያታ ቲቂ ኪፃሳኔ፤ ታኣም ዔያታ ዋይዚያ ዋይዙዋሴ። 
\v 15 ዔያቶ ዔርዜሢንታ ዎልቆዋ ዔያቶኮ ዶዲሼሢ ታናኬ፤ ዔያታ ጋዓንቴ ታኣም ጌኔ ማዾ ማዻኒ ዎላ ቡኪ ዔቃኔ፤ 
\v 16 ታና ሃሺ ሜሌ ፓሡዋ ካኣሺዳ ዔያታ ጌሌኔ፤ ዱኮና ቤዞ ሃሺ፥ ሼኤሊ ዴንዴ ዓኣዛ ዔያታ ማዔኔ፤ ዔያቶኮ ሱኡጋ ፑርታ ባኣዚ ጌስቴሢሮ ዖልዚዳ ሃይቃንዳኔ፤ ጊብፄ ዓሶኮ ሚኢቺ ዔያታ ማዓንዳኔ።»
\c 8
\s1 ዒስራዔኤሌ ዴሮኮ ሜሌ ፆኦዞ ካሽኪፃ ዻቢንቲ ማዒፆ
\p
\v 1 ናንጊና ናንጋ ጎዳ ሂዚ ጋዓኔ፦ «ታኣና ዎላ ጫኣቄ ጫኣቁሞ ታ ዴራ ሃሼሢሮና ታኣኮ ዎጎዋ ካፖ ዒፄሢሮ ሞርኬ ታ ማኣሮይዳ ሃምፑሮጉዲ ሺራያታሢሮ ዖልዚሮ ጊኢጉዋቴ ጋዓ ዛዮ ዋርቁዋቴ!» 
\v 2 ዒስራዔኤሌ፦ «ፆኦሲዮ! ኑኡኒ፥ ኔኤኮ ዴራ ኔና ዔራኔ» ጌይ ጌይ ታ ባንሢ ዒላታኔ፤ 
\v 3 ጋዓንቴ ዒስራዔኤሌ ዴራ ኮሺ ባኣዚ ዒፄሢሮ ሞርካ ዔያቶ ዳውሳንዳኔ።
\p
\v 4 «ታኣኒ ዔሪባኣንቴ ካኣቶ ዔያታ ካኣታሤኔ፤ ታና ዖኦጪባኣዖ ሱኡጎ ዔያታ ዶኦሬኔ፤ ዔያታ ፔኤኮ ቢሮና ዎርቆ ዓንጎና ሜሌ ፆኦሲ ኮሺ ፔኤም ዔቴ ቦኦኬኔ። 
\v 5 ሳማሪያ ዴሬዮቴ! ናኣሮ ማሊሲ ማዦና ሜሌ ፆኦዞ ታ ዒንሢኮ ሻኣኪንቴኔ፤ ታኣኮ ዻጋ ዒንሢዳ ታሚጉዲ ዔኤታንዳኔ፤ ዒንሢ ዻቢንቲፓ ሃኪ ፂሎ ማዑዋኣሢ ዓይዲ ሄላንዳኣናዳይ? 
\v 6 ሃይ፥ ናኣሪ ማሊሲ ኮሾና ሜሌ ፆኦዛ ዓሲ ፔ ኩቺና ማዤ ባኣዚታሢሮ ፆኦሲ ማዓኒ ዳንዳዑዋሴ፤ ዬያሮ ናኣሪ ማሊሲ ኮሾና ሳማሪያ ፆኦዛ ሜቂ ሁርዳንዳኔ። 
\v 7 ዔያታ ዢባሬ ዜርቂ ዓልጎ ጮኦራ ዓሲ ማዓንዳኔ፤ ሃውላ ጉሪ ዔቄያኬ፥ ዓኣፔ ባኣዚ ጊዳ ባኣያኬ፤ ዓኣፔ ባኣዚ ዓኣያ ማዔቴያ ሜሌ ፃንጎ ዓሲ ሙኪ ሙዓንዳኔ። 
\v 8 ዒስራዔኤሌ ዴራ ሜሌ ዴሮ ባኣካ ዔኤዺንቲ ባይቄኔ፤ ፓሣ ባኣዚ ባኣ ሜሄ ማዒ ጉሪ ዓቴኔ። 
\v 9 ፔኤሮ ዣኣሊ ሃንታ ኪርሞሌጉዲ ዓሶኦሬ ባንሢ ዔያታ ዴንዴኔ፤ ዔያቶ ዓውሳንዳጉዲ ዔኤቢ ጪጊ ሜሌ ካኣቶ ዔያታ ሺኢቄኔ፤ 
\v 10 ሜሌ ካኣቶ ሺኢጲፆ ዔያታ ዔኤቢ ጪጌያ ማዔቴያ ታኣኒ ዔያቶ ፔቴይዳ ቡኩሳንዳኔ፤ ካኣቶንታ ሱኡጎንታ ሄርቂ ዔያቶ ዎይሣ ዎይሢፆና ዎልቄ ባይቂ ዻኪ ዻኪ ዔያታ ዴንዳንዳኔ።
\p
\v 11 «ዔፕሬኤሜ ፔኤኮ ጎሞ ጌኤሻኒ ታኣም ዒንጎ ባኣዚ ዒንጎንዶ ቤሲ ሚርጌ ኮሼኔ፤ ጋዓንቴ ዬያታ ዒንጎ ባኮ ዒንጎ ቤዛ ጎሜ ማዾ ቤሲ ማዔኔ። 
\v 12 ታኣኒ ዔያቶም ታ ዎጎይዳፓ ሚርጌ ዳምቤ ፃኣፒ ዒንጌኔ፤ ዔያታ ጋዓንቴ ዓኪ ቢሪ ባኣዚ ማሂ ዛጌኔ። 
\v 13 ታኣም ዔያታ ዒንጋኒ ቃራ ቃራ ባኣዚ ዔኪ ሺኢሼቴያ፥ ዬያ ዒንጊንቴ ባኮኮ ዓሽኮ ዔያታ ሙዔቴያ ታኣኒ፥ ናንጊና ናንጋ ጎዳ ዬያ ዔያቶኮ ዔካያቱዋሴ። ታኣኒ ዔያቶኮ ዻቢንቶ ዛጊ ዔያታ ማዻ ጎሞሮ ሜቶ ታ ዔያቶይዳ ዓጋንዳኔ፤ ጊብፄ ዓጮይዳ ዔያታ ዓይሌ ማዒ ናንጌ ጎይፆ ማዓንዳኔ።
\p
\v 14 «ዒስራዔኤሌ ዴራ ፔኤም ዼኤፒ ዼኤፒ ካኣቱሞ ማኣሪ ማዤኔ፤ ታና ማዤ ፆኦዛሢ ጋዓንቴ ዔያታ ዋሌኔ፤ ዪሁዳ ዴራኣ ሚርጌ ዙሎ ኬልቂ ኮሾና ካታማ ማዤኔ፤ ዬያሮ ዬያ ዔያቶኮ ካታሞንታ ካታሞኮ ዙላ ዓኣ ኬኤሎ ዲፆንታ ሙዓንዳ ታሚ ታኣኒ ዒኢካ ኬይሳንዳኔ።»
\c 9
\s1 ዒስራዔኤሌ ዓሶይዳ ሜታ ዬዓንዳሢ ሆሴዔ ኬኤዜሢ
\p
\v 1 ዒስራዔኤሌ ዴሬዮቴ! ሃኣኮ ሺርኮ ቆይዶይዳ ቆይዶይዳ ዓኒንሢ ማዒባኣ ዓሶና ዒንሢ ኮኦሜሢ ዛሎ ዒንሢም ዒንጊንታ ባካ ባዓኣሌ ጌይንታ ፆኦዛሢ ዒንሢም ዒንጋያ ማሌም ዒንሢ ዎዛዻኔ፤ ዬያ ማዺፆና ዒንሢ ፆኦዛሢም ዒንሢ ጉሙርቂንታያ ማዒባኣሴ፤ ዬያሮ ሜሌ ዴሮጉዲ ዎዛዺ፥ ሃሣ ኮኦሚ ሺሪፆ ሃሹዋቴ! 
\v 2 ሃይካፓ ሴካ ዒንሢ ሃኣኮ ሺርኮ ቆይዶይዳ ዒንሢም ጊዳንዳ ሃኣኮ፥ ዎይኖ ጩኡጶ ቤዞይዳኣ ጊዳንዳ ዎይኔ ዑሺ ዴንቃዓኬ፤ ካፂባኣ ሙርጎ ዎይኖ ዑዣኣ ዒንሢም ፓጫንዳኔ። 
\v 3 ናንጊና ናንጋ ጎዳ ዔያቶም ዒንጌ ሳዖይዳ ዔፕሬኤሜ ናንጊንዱዋሴ፤ ጋዓንቴ ናሽኪባኣዖ ጊብፄ ዓጮ ዔያታ ማዒ ዴንዳንዳኔ፤ ዓሶኦሬ ዓጮዋ ዔያታ ዴንዲ ዳምቦ ጎይፆና ጌኤሺ ማዒባኣ ካሦ ሙዓንዳኔ። 
\v 4 ዒኢካ ዔያታ ናንጊና ናንጋ ጎዳም ዎይኖ ዑዦ ዒንጎ ባኣዚ ማሂ ዒንጋኒ ዳንዳዑዋሴ፤ ዔያታ ዒንጋ ባካኣ ናንጊና ናንጋ ጎዳ ዎዛሳያ ማዒንዱዋሴ፤ ዔያቶኮ ካሣ ዔያታ ፔና ናይዼም ሙሙዓያ ማዓንዳኔ፥ ፆኦሲ ማኣሪም ዒንጎ ባኣዚ ማዒ ሺኢሺንታያ ማዒንዱዋሴ፤ ዬያሮ ዔያቶኮ ዬይ ካሣ ሌሲ ጋርካ ዓኣንቴ ሙዎ ካሣ ማዓንዳኔ፤ ዬያ ሙዔ ዓሲ ቢያ ዒኢታንዳኔ። 
\v 5 ዓካሪ ዒንሢ ናንጊና ናንጋ ጎዳ ቦንቻኒ ጌሢንቴ ሌዖና ቦንቾ ኬሎናይዳ ዎዎይታንዳይ? 
\v 6 ዔያታ ቶሎሮ ጳሽኬቴያ ጊብፄ ዓሳ ካይሌ ቡኡራጉዲ ዔያቶ ቡኩሳንዳኔ፤ ሜምፖኦሴያ ዔያቶ ዱኡካንዳኔ፤ ዔያታ ቡኩሴ ቆሎ ሆዼ ሙዔም ጉሪ ዓታንዳኔ፤ ዔያታ ናንጋ ኬኤፆይዳኣ ዓንጊሢና ዓኣ ቡኡሪንዶ ካይዚ ባቃላንዳኔ።
\p
\v 7 ሜታሢ ዓጎ ኬላ ሄሌኔ፤ ዒስራዔኤሌ ዓሶ ኮሜ ኮፆ ኬላ ዑኬሢ ዔያታ ዔሮንጎ፤ ዒንሢኮ ዻቢንቶና ፑርቱሞናፓ ዔቄያና ፆኦሲ ማሊፆ ኬኤዛሢ ዔኤያ ዓሲ፥ ፆኦሲኮ ዓያና ዎላ ዓኣ ዓሢ ዣኣዦ ዓሲ ማሂ ዒንሢ ዛጋኔ። \x - \xo 9፡7 \xo*\xt ሉቃ. 21፡22።\xt*\x* 
\v 8 ፆኦሲ ማሊፆ ኬኤዛሢ ዔፕሬኤሜ ካፓንዳጉዲ ፆኦሲ ዶኦሪ ጌሤኔ፤ ጋዓንቴ ጎይፆይዳ ቢያ ፒራ ዒዛም ፒሪንቴኔ፤ ፆኦሲኮ ጌኤዦ ማኣሮይዳኣ ዒፂንቲሢ ዒዛ ካፔኔ። 
\v 9 ዔያታ ጌባዖኦኔ ዎዶና ዓኣ ዴሮጉዲ ጋፒ ዒኢቴኔ፤ ፆኦሲ ዔያቶኮ ጎሞ ዛጊ ዴንቂ ዔያቶይዳ ሜቶ ዓጋንዳኔ። \x - \xo 9፡9 \xo*\xt ሱኡጎ. ማፃ 19፡1-30።\xt*\x*
\s1 ዒስራዔኤሌ ዴሮኮ ጎሞና ጎማ ዔኪ ሙኬ ባይሲንቶ
\p
\v 10 ናንጊና ናንጋ ጎዳ ሂዚ ጋዓኔ፦ «ዒስራዔኤሌ ዴሮ ታኣኒ ዴንቄያና ካፄ ዎይኔ ሶዬና ዓኣያ ዓሲ ናንጉዋ ዳውሌይዳ ዴንቄያጉዲኬ፤ ዒንሢኮ ቤርታሳ ዓዶንሢ ታኣኒ ዴንቄያና ቤርቲ ቤርታ ካፄ ቤሌሴ ዓኣፒ ዴንቄያጉዲ ታኣም ማዔኔ፤ ዔያታ ባዓልፔዖሬ ጌይንታ ቤዞ ሙካዖ ዬያ ሻኣካያ ማዔ ፔዖሬ ፆኦዛሢም ፔና ዱማሲ ዓኣሢ ዒንጊ፥ ዬያ ዔያታ ናሽካ ፆኦዛሢጉዲ ፔኤሮዋ ዒኢቴያ ማዔኔ። \x - \xo 9፡10 \xo*\xt ፓይ. ማፃ 25፡1-5።\xt*\x* 
\v 11 ዔፕሬኤሜኮ ቦንቻ ካፒጉዲ ባራኒ ዴንዲ ባይቃንዳኔ፤ ሃይካፓ ሴካ ሾይሢሮ ላሂሢንታ ጎጳዺሢንታ ሾይቺያኣ ባኣያ ማዓንዳኔ። 
\v 12 ዔያታ ናይ ሾዒ ዲቼቴያ ናኣቶይዳ ፑርታ ዶርዖ ታኣኒ ዓጊ ዎዺ ኩርሳንዳሢሮ ናይ ባኣያ ዔያታ ዓታንዳኔ፤ ታ ዔያቶፓ ሃኪ ሺኢኪ ዔቄቶ ዔያቶ ባዴዔ!»
\p
\v 13 ዔፕሬኤሜ ኮሺ ሳዓይዳ ዱኡቂንቴ ሜኤፄ ዓኣፒ ማዒ ታኣም ጴዼኔ፤ ጋዓንቴ ሃሢ ዔያታ ፔኤኮ ናኣቶ ሃይቢም ዓኣሢ ዒንጌኔ። 
\v 14 ናንጊና ናንጋ ታ ጎዳሢዮ! ሃያ ዴሮም ዓይጎ ዒንጌ ታ ኔና ጎዖንዶይ? ዑስካፓ ኩርሳ ጎጲና ዲኢቂ ሶርቁዋ ዻንሢና ዔያቶም ዒንጌ!
\s1 ፆኦሲ ዒስራዔኤሌ ዓሶይዳ ዎጌ ዎጎ
\p
\v 15 ናንጊና ናንጋ ጎዳ ሂዚ ጋዓኔ፦ «ዔያቶኮ ፑርቱማ ጌልጌላይዳ ፔጋዼሢሮ ዒኢካ ታ ዔያቶ ዒፄኔ፤ ዔያታ ማዼ ፑርቶ ማዾሮ ታ ማኣራፓ ታ ዔያቶ ዳውሳንዳኔ፤ ሃይካፓ ሴካ ታ ዔያቶ ናሽኪንዱዋሴ፤ ዔያቶኮ ሱኡጋኣ ቢያ ዋይዙዋያ ማዔኔ። 
\v 16 ዔፕሬኤሜ ፑርታ ዢባሬና ካኣሚ ፃጳ ሜሌም፥ ዓኣፒ ዓኣፓኒ ዳንዳዑዋ ሚሢ ማዒ ዓታንዳኔ፤ ዔያታ ናይ ሾዔቴያ ዒናፓ ዔያታ ናሽካ ናኣቶ ታኣኒ ዔያቶኮ ዎዻንዳኔ።»
\s1 ፆኦሲ ማሊፆ ኬኤዛሢ ዒስራዔኤሌ ዓሶ ዛላ ጌዔ ባኣዚ
\p
\v 17 ዔያታ ዓይሢንቲባኣሢሮ ታ ፆኦዛሢ ዔያቶ ኬኤራንዳኔ፤ ዔያታ ሜሌ ዴሮ ባኣካ ቤሲ ባይዚ ሴካ ሃንጋ ሃንታንዳኔ።
\c 10
\p
\v 1 ዒስራዔኤሌ ዴራ ሚርጌ ዓሜ ዎይኔ ማዔኔ፤ ዓኣፓ ዔያቶኮ ዺቤሢ ጎይፆ ሜሌ ፆኦዞም ዒንጎ ባኣዚ ዒንጊ ካኣሽኮ ሚርጌ ቤሲ ዔያታ ኮሼኔ፤ ሳዓ ዔያቶኮ ኮሽኪ ዖርጎቺ ሳዓ ማዔሢ ጎይፆ ሜሌ ፆኦዞም ዚጎ ዻኣቦ ሚዛጲሲ ዔያታ ማዤኔ። 
\v 2 ዒና ዔያቶኮ ላምዖ ጎይካ ዓኣያኬ፤ ዔያታ ፔ ዻቢንቶኮ ዒንጊንታ ባኮ ዔካንዳኔ፤ ዬያ ሜሌ ፆኦዞም ዔያታ ዒንጎ ባኮ ሺኢሻ ቤዞ ፆኦሲ ሜንሢ ሻሃንዳኔ፤ ሜሌ ፆኦዞም ዚጎ ዻኣቦዋ ዔያቶኮ ዒዚ ዶይሳንዳኔ።
\p
\v 3 ዴራ፦ «ኑኡኒ ናንጊና ናንጋ ጎዳ ዒጊጪ ቦንቺባኣሢሮ ካኣቲ ኑኡኮ ባኣያ ማዔኔ፤ ዒ ዎንዴ ካኣቲ ኑኡኮ ዓኣቴያ ዓይጎ ኑኡም ማዻንዳይ?» ጋዓኔ። 
\v 4 ሉኡዙሞ ጫኣቁሞ ጫኣቂ ጫኣቂ ጉሪ ባኣዚ ጌስቲ ሺራኔ፤ ዬያሮ ጎሺ ሳዛይዳ ሃኣኮ ዎዎዻ ፑርታ ሆኦሪ ባቃላሢጉዲ ዔያቶ ባኣኮይዳ ዣላ ዺባኔ።
\p
\v 5 ሳማሪያ ካታሞይዳ ናንጋ ዴራ ቤትዓዌኔይዳ\f + \fr 10፡5 \fr*\fq ቤትዓዌኔ፦ \fq*\ft ዬኖ ጌይፃ ዔብሬ ዓሶ ሙኡጮና «ፑርቱሞኮ ማኣሪ» ጌይሢኬ።\ft*\f* ናኣሪ ማሊሲ ማዦና ሜሌ ፆኦዞሮ ዒጊጪ ጎጋይቂ ሃይቃኔ፤ ዬያ ፆኦዞኮ ቦንቻ ባይቄሢሮ ዔያታ ዬኤካኔ፤ ዬያ ፆኦዞ ካኣሽኪ ዞኦስካ ኮኦማያ ማዔ ቄኤሳኣ ዒናፓ ዬኤኪ ዒላታኔ። 
\v 6 ዬይ ፆኦዛ ዓሶኦሬ ዓጮ ዔውቲ ዴንዲ ዼኤፖ ካኣታሢ ቤርቶ ሺኢኪሮ ዒንጎ ባኣዚ ማዒ ዒንጊንታንዳኔ፤ ዔፕሬኤሜ ቦርሲንታንዳኔ፥ ዒስራዔኤሌ ፔ ዋይዜ ዞሮና ዻውሲንታንዳኔ። 
\v 7 ሳማሪያ ካኣቲ ዋኣሢ ዑሢዳ ዴንዳ ዱባጉዲ ዓኣዺ ባይቃንዳኔ። 
\v 8 ዒስራዔኤሌ ዴራ ቤትዓዌኔ ጌይንታ ካታሞይዳ ሜሌ ፆኦዞ ካኣሽኪ ጎሞ ማዻ ዼጌ ዼጌ ቤዛ ሻሂንታንዳኔ፤ ዔያታ ፔ ፆኦዞም ዒንጎ ባኮ ዒንጋ ቤዞይዳ ዓንጊሢንታ ጋውዲንታ ባቃላንዳኔ፤ ዬኖ ዎዶና ዴራ ዹኮ ኮይላ፦ «ኑና ዓኣቹዋቴ!»፥ ጌሜሮ ኮይላኣ፦ «ኑና ካንቁዋቴ!» ጋዓንዳኔ። \x - \xo 10፡8 \xo*\xt ሉቃ. 23፡30፤ ዮሃ. ፆፔዻ 6፡16።\xt*\x*
\s1 ፆኦሲ ዒስራዔኤሌይዳ ሜቶ ዓጋንዳያ ማዒፆ
\p
\v 9 ናንጊና ናንጋ ጎዳ ሂዚ ጋዓኔ፦ «ዒስራዔኤሌ ዴራ ጊቢዓይዳ ጎሞ ማዼማፓ ዓርቃዖ ሃኖ ሄላንዳኣና ታና ዖዪሲሢፓ ጊንሢም ጌይባኣሴ፤ ጌባዖኦኔይዳ ፑርቶ ማዼ ዓሶ ዖልዚና ታኣኒ ኩርሲሲባኣዓዳ? \x - \xo 10፡9 \xo*\xt ሱኡጎ. ማፃ 19፡1-30።\xt*\x* 
\v 10 ታኣኒ ኮዔ ዎዴና ዔያቶ ፁንቃንዳኔ፤ ሜሌ ዴራ ቢያ ቡኪ ዔያቶ ባይዛኒ ዔቃንዳኔ፤ ጳንጬ ማሂ ዔያታ ማዼ ጎሞ ዛሎ ሜታ ዔያቶይዳ ኬዳንዳኔ።
\p
\v 11 «ዔፕሬኤሜ ሃያኮ ቤርታ ሃኣኮ ሺርኪ ዔሬ ማሮኬ፤ ጋዓንቴ ታኣኒ ዔያቶኮ ሚዛጶ ባቃኖይዳ ቃምባራ ጌሣንዳኔ፤ ያዺ ማዔም ዪሁዳ ጎሽካንዳኔ፤ ያይቆኦቤ ናኣታ ቢያ ዋኣፂንቲጋፓ ሳዖ ጎሽኪ ሺኢቻንዳኔ፤ 
\v 12 ታኣኒ፦ ‹ዓካሪ፥ ሻፖ ጳሉዋቴ፤ ፂሉሞ ዒኢካ ዒንሢም ዜርቁዋቴ፤ ዱማ ዱማ ካራና ላኣሚንቱዋ ናሹሞ ዓኣፒ ዒኢፓ ጮኦሩዋቴ፤ ታና፥ ዒንሢኮ ፆኦዛሢ ባንሢ ዒንሢ ማዓንዳ ዎዳ ሃይሾ ሃሢኬ! ታኣኒ ሙኪ ፒዜ ዎጌ ዒንሢ ባኣካ ዎጊንታንዳጉዲ ማሃንዳኔ› ጌዔኔ። \x - \xo 10፡12 \xo*\xt ዔር. 4፡3።\xt*\x*
\p
\v 13 «ዒንሢ ጋዓንቴ ዒንሢ ዎልቆና ዒንሢኮ ዔርቴ ዖሎ ዓሶ ሚርጉሞና ጉሙርቄሢሮ ፑርቱሞ ዜርቂ ጌኔ ማዾ ጮኦሪ ዒንሢ ዔኬኔ፤ ዒንሢኮ ሉኡዙሞ ዓኣፖ ዒንሢ ዴንቂ ዔኪ ሙዔኔ። 
\v 14 ዒንሢኮ ዴሮይዳ ዼኤፒ ዖልዚ ማዢንታንዳኔ፤ ዒንሢኮ ዋርዲዮ ማሂ ኬልቂ ኮሾና ዲፃ ቢያ ሻሂንታንዳኔ፤ ካኣቲ ሼልማኣኔ ቤትዓርቤኤሌ ካታሞ ዖሊ ሻሂ፥ ዒንዶንሢ ናኣቶና ዎላ ሳዓ ጳዺሲ ዳኣፂ ኩርሴሢጉዴ ባኣዚ ዒንሢዳኣ ማዺንታንዳኔ። 
\v 15 ቤኤቴኤሌ ካታሞይዳ ናንጋ ዴሬዮቴ! ዒንሢ ማዼ ዼኤፖ ጎሞ ዛሎና ዒንሢዳ ዬያጉዴ ባይሲንታ ሙካንዳኔ፤ ዖላ ዓዓርቃኣና፥ ሃጊ ሳዖኮ ዲጊጫ ዞቃኣና ዒስራዔኤሌ ካኣቲ ኔጉዋዖ ሞርኮ ኩጫ ሃይቃንዳኔ።»
\c 11
\s1 ፆኦሲ ዒዛኮ ዴራ ዋይዞ ዒፄቴያ ናሽኬ ናሹሞ
\q
\v 1 ናንጊና ናንጋ ጎዳ ሂዚ ጋዓኔ፦
\q2 «ዒስራዔኤሌ ሃጊ ናይ ዓኣንቴ ታኣኒ ናሽኬኔ፤
\q2 ታ ናኣዚ ጊብፄፓ ታኣኒ ዔኤሌኔ። \x - \xo 11፡1 \xo*\xt ኬሲ. ማፃ 4፡22፤ ማቲ. 2፡15።\xt*\x*
\q
\v 2 ጋዓንቴ ታ ዴራ፥ ዒስራዔኤሌ
\q2 ባሼ ታ ባንሢ ዑካንዳጉዲ ታኣኒ ዔያቶ ዔኤላዛ
\q2 ሃቺም ታ ጊዳፓ ሃኪ ሃኪ ዔያታ ዴንዴኔ።
\q ባዓኣሌ ጌይንታ ሜሌ ፆኦዞም ዒንጎ ባኮ ዒንጊፆንታ
\q2 ዬያ ፆኦዞ ማሊሲ ኮሾና ባኮም ዑንጆ ጩቢሺፆ ዔያታ ሃሺባኣሴ።
\q
\v 3 ዔፕሬኤሜኮ ኩጮ ዓርቂ ታኣታሲ
\q2 ሃንቲሢ ዔርዜሢ ታናኬ፤
\q2 ዔያታ ጋዓንቴ ታኣኒ ዔያቶ ፓሤሢ ዔሪባኣሴ።
\q
\v 4 ዓሲ ዓሲ ሚጪንታ ሚጪንቲሢና
\q2 ናሹሞ ካኒ ቢራታና
\q2 ታኣኒ ዔያቶ ጎቺ ዓርቄኔ፤
\q2 ዔያቶኮ ባቃና ዓኣ ቃንባሮ ዔኪ ሺኢሺ
\q2 ታኣኒ ታኣሮ ሂርኪ ጌይ ዔያቶ ሙኡዜኔ።»
\b
\p
\v 5 «ዔያታ ጋዓንቴ ታ ባንሢ ማዖ ዒፄሢሮ ጊብፄ ዓጮ ማዒ ዴንዳኔ፤ ዓሶኦሬ ካኣቲያ ዔያቶ ዎይሣያ ማዓንዳኔ። 
\v 6 ሞርኮኮ ዖሎ ዓሳ ካታሞ ዔያቶኮ ዖላንዳኔ፤ ካታሞ ጌሎ ካሮዋ ሜንሣንዳኔ፤ ዔያቶኮ ፑርቶ ዞርቲፃኣ ጉሪ ማዒ ዓታንዳኔ። 
\v 7 ታ ዴራ ታ ባንሢ ማዖ ባሺንቲ ላምዖ ጎይካ ዔቄኔ፤ ያዺ ማዔቴያ ዼኤፒ ማዔሢ ባንሢ ዔያታ ዒላታኔ፤ ጋዓንቴ ማሊፆ ፔቴይዳ ዔቂሴይ ዖኦኒያ ባኣሴ።»
\b
\q
\v 8 «ዔፕሬኤሜ! ታ ኔና ዎዲ ሃሻንዳይ?
\q2 ዎይቲ ታኣኒ ኔና ዓኣሢ ሜሌም ዒንጋንዳይ?
\q ዓዳኣማና ፄቦይሜ ካታሞናይዳ ታኣኒ ማዼ ጎይፆ
\q2 ዎይቲ ታኣኒ ኔጊዳ ማዾንዶይ?
\q2 ታኣኒ ኔና ናሽካ ናሹማ ኮሺ ዼኤፒታሢሮ
\q2 ዬያ ቢያ ታ ማዻኒ ዳንዳዑዋሴ። \x - \xo 11፡8 \xo*\xt ላሚ. ዎማ 29፡23።\xt*\x*
\q
\v 9 ታኣኒ ዒንሢ ባኣካ ዓኣ
\q2 ዱማዼ ፆኦሲ ማዓንዳኣፓዓቴም ዓሲቱዋሴ።
\q2 ዬያሮ ታኣኮ ባይዛ ዻጎ ታ ዒንሢዳ ኬይሳዓኬ፤
\q2 ላሚ ታኣኒ ዔፕሬኤሜ ባይዛዓኬ፤
\q2 ታ ዻጎና ታኣኒ ዒንሢ ባንሢ ዬዓዓኬ።
\b
\p
\v 10 «ታኣኒ፥ ናንጊና ናንጋ ጎዳ ዔያቶ ዓውሳኒ ጉዻ ዞቢጉዲ ጉዻዛ ዔያታ ታ ጊንፆ ዬዓንዳኔ፤ ታኣኮ ናኣታ ጎጋይቂ ጎጋይቂ ዓባ ጌላ ባንፃፓ ዬዓንዳኔ። 
\v 11 ካፒጉዲ ጊብፄፓ፥ ዶኦሌጉዲ ዓሶኦሬፓ ባራኒ ባራኒ ዔያታ ዬዓንዳኔ፤ ቤርታ ዔያታ ናንጋ ኬኤፆ ማሂ ታኣኒ ዔያቶ ጌልዛንዳኔ፤ ዬያ ጋዓሢ ታና፥ ናንጊና ናንጋ ጎዳኬ።»
\s1 ፆኦሲ ፔ ዴሮይዳ ዓጌ ሜቶ
\p
\v 12 ናንጊና ናንጋ ጎዳ ሂዚ ጋዓኔ፦ «ዔፕሬኤሜ ሉኡዙሞና፥ ዒስራዔኤሌያ ጌሺሢና ታ ኮይሎ ማንጊ ዔቄኔ፤ ዪሁዳኣ ፆኦሲም ዓይሢንቱዋያ ዒዚ ጉሙርቃ፥ ዱማዼሢያ ማኪ ዒፃያ ማዔኔ።»
\c 12
\p
\v 1 «ዔፕሬኤሜ ዢባሬ ዓርቃኒ ኮዒ ኬሎ ጉቤ ዓባ ኬስካ ዛሎ ዢባሮ ዳውሴ ጎይሣ ጉሪ ዓቴኔ፤ ሉኡዙሞና ጌኔ ማዾና ዔያታ ሚርጊሼኔ፤ ዬያ ሌሊቱዋንቴ ሪሚቶ ዛይቶ ጊብፄ ዓጮ ዔያታ ዳካኔ።»
\p
\v 2 ናንጊና ናንጋ ጎዳ ዪሁዳ ዴሮ ማኪ ጌስታ ጌኤሲ ዓኣኔ፤ ያይቆኦቤ ናኣቶም ዔያታ ማዼ ማዾ ጎይፆ ሜቶ ዓጋንዳኔ፤ ዔያታ ማዼ ፑርቶ ማዾጉዴያ ዔያቶም ዒዚ ማሂ ጪጋንዳኔ። 
\v 3 ያይቆኦቤ ሃጊ ዒንዶ ጎጳ ዓኣዖ ሜንቶ ባጎ ማዔ፥ ዒዛኮ ጌርሲ ቢሪ ኬዳኒ ዲንጊርዦ ዓርቄኔ፤ ዒዚ ዑጌስካፓ ሃሣ ፆኦሲና ማሹምቦ ዓርቃዖ «ታ ኔና ሃሻዓኬ» ጌዔኔ፤ \x - \xo 12፡3 \xo*\xt ማዢ. ማፃ 25፡26፤ ማዢ. ማፃ 32፡24-26።\xt*\x* 
\v 4 ፆኦሲኮ ኪኢታንቻሢና ማሹምቦ ዓርቂ ዒዚ ባሼኔ፤ ዒዚ ዒማና ዬኤኪ፥ ዬይ ኪኢታንቻሢ ዒዛ ማኣራንዳጉዲ ሺኢቄኔ፤ ሜሌ ኬሊና ሃሣ ፆኦሲ ዒዛ ቤኤቴሌይዳ ዴንቂ ዒዛና ጌስቴኔ። \x - \xo 12፡4 \xo*\xt ማዢ. ማፃ 28፡10-22።\xt*\x* 
\v 5 ቢያ ባኮ ዎይሣ ጎዳ ማዔ ፆኦዛሢኮ ዱማዺ ዔርቶ ሱንፃ ናንጊና ናንጋ ጎዳኬ። 
\v 6 ዬያሮ ዒንሢኮ ፆኦዛሢ ባንሢ ማዑዋቴ፤ ናሹሞንታ ፒዜ ዎጌ ዎጊሢንታ ኮሺ ዶዲሺ ዓርቁዋቴ፤ ዒንሢኮ ፆኦዛሢ ዒንሢ ማኣዳንዳያ ሄላንዳኣና ጊቢ ዶዲ ካፑዋቴ።
\p
\v 7 ናንጊና ናንጋ ጎዳ ሂዚ ጋዓኔ፦ «ዒስራዔኤሌ ዴራ ጌሺ ማኮ ባኣዚና ኮርማ ካኣናኔ ዓጮ ኮርሞ ዓሶጉዲ ማዔኔ፤ ዬያና ዔያታ ዓሶ ጌሺ ጌሺ ሺራኔ፤ 
\v 8 ዔፕሬኤሜ፦ ‹ታኣኒ ዖርጎጬኔ፥ ዉዱንቴኔ፤ ታኣኒ ላቢ ዴንቄ ሃያ ቆሎይዳ ቢያ ዻቢንቲ ማዒ ታና ጎማንዳ ባኣዚ ጴዺንዱዋሴ› ጌይ ጌይ ዖቶርቂ ጌስታኔ። 
\v 9 ጋዓንቴ ጊብፄ ዓጫፓ ዒንሢ ዔኪ ኬሴሢ ታና፥ ናንጊና ናንጋ ጎዳ ማዔ ፆኦዛሢኬ፤ ዉልሾ ዴማ ዴዒ ቦንቾ ቦንቾና ዓፒላና ማዦና ማኣሪዳ ዒንሢ ናንጌ ጎይፆ ጊንሣ ታ ዒንሢ ዒኢካ ናንጊሻንዳኔ። \x - \xo 12፡9 \xo*\xt ሌዊ. ዓኬ 23፡42-43።\xt*\x*
\p
\v 10 «ታ ማሊፆ ኬኤዛ ዓሳ ዔያቶም ኬኤዛንዳ ባኮ ታኣኒ ኬኤዜኔ፤ ሚርጌ ባኣዚ ፔጋሲ ታኣኒ ዻዌኔ፤ ዬያቶ ታ ማሊፆ ኬኤዛ ዓሶ ዻንጎና ኮኦኪንሢያኣ ታኣኒ ኬኤዜኔ፤ 
\v 11 ዬያ ታኣኒ ቢያ ማዼንቴ ጌሌዓዴይዳ ሜሌ ፆኦዞም ዔያታ ዚጋኔ፤ ዬያ ሜሌ ፆኦዞም ዚጋ ዓሳ ፓሡዋ ዓሲ ማዓኔ፤ ዎፓኖ ጌልጌላይዳ ዬያ ፆኦዞም ዒንጎ ባኣዚ ማሂ ዔያታ ሹካኔ፤ ጋዓንቴ ዔያቶኮ ዬይ ዒንጎ ባኮ ዒንጎ ቤዛ ዶዒ ቡርሺንቲ ጎሺ ሳዛይዳ ኩሊንቴ ሹቺ ማዒ ዓታንዳኔ።»
\p
\v 12 ኑኡኮ ዓዳሢ፥ ያይቆኦቤ ሜሶፖታሚያ ፑኒ ዴንዴኔ፤ ዒኢካ ላኣሊ ዔኪሮ ጌይ ማራይ ሄንቃ ካራሚ ማዔኔ። \x - \xo 12፡12 \xo*\xt ማዢ. ማፃ 29፡1-20።\xt*\x* 
\v 13 ናንጊና ናንጋ ጎዳ ዳኬ፥ ዒዛኮ ማሊፆ ኬኤዛሢ ዛሎና ዒስራዔኤሌ ዴሮ ጊብፄፓ ዔኪ ኬሴኔ፤ ዬያ ዒዛ ማሊፆ ኬኤዛሢ ዛሎና ዔያቶ ዒዚ ማኣዴኔ። \x - \xo 12፡13 \xo*\xt ኬሲ. ማፃ 12፡50-51።\xt*\x* 
\v 14 ያዺ ማዔቴያ ዔፕሬኤሜ ናንጊና ናንጋ ጎዳ ሚርጌና ዻጋሴኔ፤ ዔያታ ዻቤ ዻቢንቶ ዛሎ ዖኦጪንታንዳኔ፤ ዒዛኮ ሱንፆ ዔያታ ጫሽኬሢሮዋ ሜታ ዔያቶይዳ ዓጊንታንዳኔ።
\c 13
\s1 ዒስራዔኤሌይዳ ዎጊንቴ ጋፒንሢ ዎጌ
\p
\v 1 ዔፕሬኤሜ ጌስታኣና ዋይዛ ዓሲ ቢያ ዒጊጪ ጎጎጋይቃኔ፤ ሃሢ ጋዓንቴ ዒኢኒ ባዓኣሌ ጌይንታ ሜሌ ፆኦዞም ዚጊ ጎሜ ማዼሢሮ ሃይቄኔ። 
\v 2 ዬያ ሃሾ ዒፂ ጎሞ ማዺፆ ዔያታ ዺቢሼኔ፤ ዔያታ ፔኤኮ ቢሮ ዓንጎ ሼኤሺ ዔያቶም ፆኦሲ ማዓንዳያ ኮሼኔ፤ ዬይ ቢያ ዓሲ ፔ ኩቻ ማዤ ባኣዚኬ፤ ዬያ ዓሲ ኩቻ ማዢንቴ ባኮም ዓሳ ዒንጎ ባኣዚ ዒንጊ ሄርቂያ ሄርቂ፥ ዬያ ናኣሮ ማሊሲ ኮሾና ባኮም ዚጋንዳጉዲ ዔያታ ጋዓኔ። 
\v 3 ዬያሮ ዔያታ ጉቴና ጴዻ ሊኢሎና ዖልኬናጉዲ ጉሪ ባይቃንዳኔ፤ ሃኣኮ ሺርኮ ቆይዳይዳፓ ዢባሬና ፒፂንቲ ዴንዳ ዲልባጉዲ፥ ጊንሣ ሃሣ ፑልታ ካራና ኬስኪ ዴንዳ ጩቢጉዲ ዴንዲ ዔያታ ባይቃንዳኔ።
\p
\v 4 ናንጊና ናንጋ ጎዳ ሂዚ ጋዓኔ፦ «ጊብፄ ዓጫፓ ዒንሢ ዔኪ ኬሴሢ፥ ናንጊና ናንጋ ጎዳ ማዔሢ ታና ፆኦሲኬ፤ ታጊዳፓዓቴም ሜሌ ፆኦሲ ዒንሢኮ ባኣሴ፤ ዒንሢ ዓውሳሢያ ታና ሌሊኬ። 
\v 5 ዬያ ሜሎ ዳውሎ ዓጮይዳ ዒንሢኮ ቶኦኮ ዛጊ ማኣዴሢ ታናኬ። 
\v 6 ጋዓንቴ ኮዦ ዓጬሎ ሙኪ ዒንሢ ጌላዖ ሙይ ሚሽኪ ሚርጌና ዖቶርቄኔ፤ ታናኣ ዒንሢ ዋሌኔ። \x - \xo 13፡6 \xo*\xt ላሚ. ዎማ 8፡11-17።\xt*\x* 
\v 7 ዬያሮ ታኣኒ ዒንሢም ዞቢ፥ ጊንሣ ሃሣ ጎይሢዳ ካቲ ዴዔ ማኣኪ ማዓንዳኔ። 
\v 8 ናይ ዔውቴ ፑርታ ቦዖጉዲ ማዒ ታ ዒንሢ ማኣሳንሣንዳኔ፤ ሾኦሊ ሾኦሊ ታ ዒንሢ ላኣላንዳኔ፤ ሙሙዓ ዞቢ ታ ዒንሢ ኮይላ ማዓንዳኔ።
\p
\v 9 «ዒስራዔኤሌ ዴሬዮቴ! ታና፥ ዒንሢ ማኣዳሢ ዑፃ ፑርቱሞና ዒንሢ ዔቄሢሮ ታ ዒንሢ ባይዛንዳኔ፤ 
\v 10 ካኣቲንታ ሱኡጌንታ ዒንሢም ዒንጊንታንዳጉዲ ዒንሢ ዖኦጬኔ፤ ሃሢ ሂዳዖ ዒንሢ ዓውሳ ካኣቶንታ ማኣዳ ሱኡጎንታ ዎካዳዖ? \x - \xo 13፡10 \xo*\xt 1ሳሙ. 8፡5-6።\xt*\x* 
\v 11 ታኣኒ ዻጋዺ ካኣቶ ዒንሢም ዒንጌኔ፤ ጋዓንቴ ታኣኮ ዼኤፖ ዻጎና ጊንሣ ታ ዔያቶ ባይዜኔ። \x - \xo 13፡11 \xo*\xt 1ሳሙ. 10፡17-24፤ 15፡26።\xt*\x*
\p
\v 12 «ዔፕሬኤሜኮ ዻቢንታ ናካኣና ኩሊንቴኔ፤ ጎማኣ ዒዛኮ ፃኣፒንቲ ዓዺንቴኔ። 
\v 13 ሾይቺ ዓዺንቴ ላኣሊጉዲ ዒዚ ሜታዻንዳ ዎዴ ዬዓንዳኔ፤ ዒዚ ሾይንታ ዎዳ ሄላዛ ዒንዶ ጎጳፓ ኬዶ ዒፃ ናይጉዲ ዔኤያ ማዔኔ። 
\v 14 ሳዖ ዴሞ ዎልቃፓ ታ ዔያቶ ዓውሳንዳኖ? ሃይቢፓ ታ ዔያቶ ዻቂሻንዳኖ? ሃይቢዮ! ኔኤኮ ዎዺ ኩርሳ ባካ ዎካ ዓኣይ? ሳኣ ዴሚዮ! ኔኤኮ ባይዚፃ ዓንካዳይ? ታኣኒ ዔያቶም ሚጪንቲንዱዋኣዋይ፤ \x - \xo 13፡14 \xo*\xt 1ቆሮ. 15፡55።\xt*\x* 
\v 15 ዒዚ ፔኤኮ ጌርሲንሢ ባኣካ ዖርጎቺ ማዔቴያ ናንጊና ናንጋ ጎዳ ዳካ ፑርቶ ዢባራ፥ ዓባ ኬስካ ዛሎፓ ዔቃሢ ዒዛ ዓጮ ሙካንዳኔ፤ ዓልቃ ዋኣፃ ዓልቆ ዒፄም፥ ዎራ ዒዛኮ ሚጫንዳኔ፤ ዬይ ዢባራ ዒዛኮ ዓኣ ሚዛጶ ባኮ ቢያ ፒፂ ዔኪ ዴንዳንዳኔ። 
\v 16 ሳማሪያ ታኣም ዋይዞ ዒፂ፥ ማዼ ዻቢንቶ ዛሎ ዖኦጪንታያ ማዓንዳኔ፤ ዒዞኮ ዴራ ዖልዚና ኩዳንዳኔ፤ ዻኮ ናኣታ ሳዖይዳ ጳዺንቲ ዳኣፂንታንዳኔ፤ ጎጶይንዳሢኮዋ ጎጳ ዳርዚንታንዳኔ።»
\c 14
\s1 ዒስራዔኤሌ ዴራ ፆኦሲ ባንሢ ማዓንዳጉዲ ሆሴዔ ዖኦጬሢ
\p
\v 1 ዒስራዔኤሌ ዴሬዮቴ! ዒንሢኮ ጎማ ዒንሢ ዹቂ ዣኣሊሴያታሢሮ ናንጊና ናንጋ ጎዳ ማዔ ዒንሢኮ ፆኦዛሢ ባንሢ ማዑዋቴ። 
\v 2 ዒንሢ ቡኡፃንዳ ባኮ ዔሪ ናንጊና ናንጋ ጎዳ ባንሢ ማዑዋቴ፤ ሂዚ ጎዑዋቴ፦ «ኑኡኮ ጎሞ ቢያ ዓቶም ጌዔ፤ ኑና ማኣሪ ዔኬ፤ ኑኡኒያ ኑ ዻንጎና ኮሺ ዓኣፒ ማዔ ጋላታ ኔኤም ሺኢሻንዳኔ። 
\v 3 ዓሶኦሬ ኑና ዓውሳዓኬ፥ ዖሎ ፓራሢያ ኑኡኒ ጉሙርቁዋሴ፤ ሃይካፓ ሴካ ኑ ኩቻ ኑኡኒ ማዤ ባኮ ‹ፆኦሲ› ጌይ ኑ ዔኤላዓኬ፤ ናንጊና ናንጋ ጎዳሢዮ! ዜኤሮ ናኣቶ ኔኤኒ ሚጪንታያኬ።»
\s1 ፆኦሲ ጎሞ ዓቶም ጋዓንዳያ ማዒፆ ኬኤዜሢ
\p
\v 4 ናንጊና ናንጋ ጎዳ ሂዚ ጋዓኔ፦
\q «ታ ዴሮኮ ጉሙርቂንቱዋያ ማዒፆ ታኣኒ ጊኢጊሺ
\q2 ታ ባንሢ ዔኪ ማሃንዳኔ።
\q2 ዻጋ ታኣኮ ዔያቶ ባንፃፓ ማዔሢሮ
\q2 ታኣኒ ታ ሼኔና ጉሪ ዔያቶ ናሽካንዳኔ።
\q
\v 5 ዒስራዔኤሌ ዴሮም ታኣኒ ፆፆዻ ዖልኬ ማዓዛ
\q ዔያታ ቡኒጉዲ ቡናንዳኔ፤
\q2 ሊባኖኦሴ ሚፆጉዲ ፃጲ ዔያታ ዳካንዳኔ።
\q
\v 6 ዓንታ ዔያቶኮ ዋርቃንዳኔ፤
\q2 ዛይቶ ሪሚቶጉዲያኣ ዔያታ ሚዛጲ
\q ሃሣ ሊባኖኦሴ ዴኤሎጉዲ ኮሺ ሳውሞ ዓኣያ ማዓንዳኔ።
\q
\v 7 ጊንሣ ማዒ ታ ሺቦ ዴሞ ዔያታ ጌላንዳኔ፤
\q2 ሃጊ ባቃላ ሃኣኮጉዲ ዔያታ ዓኣዒ ሚዛጳንዳኔ፤
\q ዎይኔጉዲያኣ ዔያታ ቡናንዳኔ፤
\q2 ዔያቶኮ ሳውማ ሊባኖኦሴ ዎይኖ ዑዦሲጉዲ ዔርቴያ ማዓንዳኔ።
\q
\v 8 ዔፕሬኤሜ!
\q2 ሜሌ ፆኦዞና ዎላ ታኣኮ ዓይጎ ካኣሚ ዓኣይ?
\q2 ዒንሢኮ ሺኢጲፆ ዋይዛሢንታ ቶኦኮ ዒንሢኮ ዛጋሢ ታናኬ፤
\q2 ታኣኒ ቢያ ዎዴ ዋርቄ ጎይሣ ዴዓ ዚቢቂጉዲኬ፤
\q2 ዒንሢ ዓኣፒሳሢያኣ ታናኬ።»
\s1 ጋፒንሢ ሃይሴ
\p
\v 9 ዔራቶ ዓኣ ዓሲ ዬንሢ ባኮ ዒና ዔካንዳኔ፤ ማሊ ጶቂሣ ዓሲያኣ ዔራንዳኔ፤ ናንጊና ናንጋ ጎዳኮ ጎይፃ ፒዜኬ፤ ፂሎ ዓሳ ዒዞና ሃንታኔ፤ ጎሞ ዓሳ ጋዓንቴ ዹቂንቲ ዒኢካ ሎሎኦማኔ።