\id HAB - MAALE Full Bible
\ide UTF-8
\h ዒምባቆሜ ማፃኣፖ
\toc1 ፆኦሲ ማሊፆ ኬኤዛ ዒምባቆሜ ማፃኣፖ
\toc3 ዒምባ.
\toc2 ዒምባቆሜ ማፃኣፖ
\mt1 ዒምባቆሜ
\imt ዓይፆ ካሮ
\ip ፆኦሲ ማሊፆ ኬኤዛ ዒምባቆሜ ፆኦሲ ኪኢቶ ኬኤዜሢ ባብሎኔ ካኣታ ዎልቄና ዓኣያ ማዒ ዓጮ ዎይሣ ዎዶና፥ ኪሪስቶሴ ሾይንታንዳሢኮ ቤርታ ፄኤቶ ፄኤቶ ሌዖ ፓቂፆኮ ላንካሳ ፄኤቶ ሌዖኮ ጋፒንፃኬ፤ ሃኖ ማፃኣፔሎኮ ዓኣ ላምዖ ዓይፆንሢ ዒምባቆሜና ናንጊና ናንጋ ጎዳና ጌስቴ ጌኤሲኬ፤ ዒምባቆሜ ዪሁዳይዳ ፒዜ ዎጌ ዎጊሢ ፓጬሢሮና ፑርታ ማዾ ማዺንታያሮ ማኪ ጌስቴኔ፤ ናንጊና ናንጋ ጎዳ «ባብሎኔ ዓሳ ዪሁዳ ዴሮ ሜታሳንዳኔ» ጌይ ዒዛም ኬኤዜኔ፤ ዬካፓ ዒምባቆሜ «ባብሎኔ ዓሳ ዪሁዳ ዓሶፓ ባሼ ጎሜና ማዔያታንቴ ዪሁዳ ዴሮ ዎይቲ ዔያታ ሜታሳኒ ዳንዳዓይ?» ጌይ ናንጊና ናንጋ ጎዳ ዖኦጬኔ፤ ናንጊና ናንጋ ጎዳ ዒምባቆሜም፥ «ባብሎኔ ዓሳ ሃጊ ፔ ዎዶና ሜቶ ዔካንዳኔ» ጌይ ማሂ ኬኤዜኔ።
\ip ማፃኣፔሎኮ ጋፒንፆ ዓይፆይዳ ዒምባቆሜ ናንጊና ናንጋ ጎዳኮ ቦንቾና ቢታንቶና ዛሎ ጋላታ ሺኢሼ ሺኢጲሢ ዛላ ኬኤዛያኬ።
\iot ማፃኣፔላ ዱማ ዱማ ዓርቄ ባኮ
\io1 ዒምባቆሜ ፑርቴ ባኮ ዛሎ ፆኦሲ ዖኦጬሢና ፆኦሲ ማሄ ማሂፆ (1፡1—2፡4)
\io1 ጎሞ ዓሶይዳ ዎጊንቴ ዎጊፆ (2፡5-20)
\io1 ዒምባቆሜኮ ሺኢጲፆ (3፡1-19)
\c 1
\p
\v 1 ናንጊና ናንጋ ጎዳ ፔ ማሊፆ ኬኤዛ፥ ዒምባቆሜም ፔጋሲ ዻዌ ቃኣላ ሃካፓ ዴማ ዓኣሢኬ፦
\s1 ፒዜ ዎጌ ባይቄሢሮ ዒምባቆሜ ዖዬሢ
\p
\v 2 ናንጊና ናንጋ ጎዳሢዮ! ኔ ማኣዳንዳጉዲ ኑ ዒላታዛ ኔኤኒ ዋይዙዋኣሢ ዓይዲ ሄላንዳኣናዳይ? «ጌኔ ማዾ ኑ ዑፃ ሚርጌኔ» ጌይ ኑ ዒላታዛ ኔ ኑና ዓውሱዋኣሢ ዓይዲ ሄላንዳኣናዳይ? 
\v 3 ሃያ ቢያ ፑርቶ ባኮ ዓይጋ ኔ ታና ዛጊሳይ? ሃሣ ሃይ ሄርቂንቲ ዎይፃ ኑና ሄላኣና ኔ ዚቲ ጌይ ዛዛጋ? ሃኣዛጌ ዺቢ ባይሲንታንታ ሄርቂንቲ ዎርቂሢንታ ኑና ማንጌኔ፤ ዣሎና ማርሞና ዔቂባኣ ቤሲ ባኣሴ። 
\v 4 ዎጌ ሼሌዔኔ፤ ፒዜ ዎጌ ዎጊሢያ ዎቤኔ፤ ዬይ ዎጋ ዎቤሢሮ ጎሞ ዓሳ ኮዦ ዓሶ ማንጊ ዋኣዪሳኔ።
\s1 ናንጊና ናንጋ ጎዳ ማሂ ኬኤዜሢ
\p
\v 5 ዬካፓ ናንጊና ናንጋ ጎዳ ዴሮም ሂዚ ጌዔኔ፦ «ሂንዳ ዒንሢኮ ኮሮይዳ ዓኣ ሜሌ ዴሮ ዛጉዋቴ፤ ዒንሢም ጴዻ ባኮ ቢያ ዲቃቲ ሄርሹዋቴ፤ ዖኦኒ ኬኤዜቴያ ጉሙርቃኒ ዒንሢ ዳንዳዑዋ፥ ዲቃሢ ሄርሺሳ ባኣዚ ዒንሢ ዎዶና ታ ማዻንዳኔ። \x - \xo 1፡5 \xo*\xt ዳኪ. ማዾ 13፡41።\xt*\x* 
\v 6 ዓካሪ፥ ዬያቶ ዓሲም ሚጪንቱዋያና ሩኡራያ ማዔ ባብሎኔ ዓሶ ታኣኒ ዒንሢዳ ዔቂሳንዳኔ፤ ዔያታ ዔያቶ ዓጪ ማዒባኣ ዓጮ ቢያ ዖሊ ዎልቄና ዓርቃኒ ዱማ ዱማ ዓጮ ሃንታኔ። 
\v 7 ዔያታ ዒጊቺ ዲቃሣያኬ፤ ጊንሣ ሃሣ ዔያታ ፔ ቦንቾ ሌሊ ካፒሳንዳ ዎጌ ኬሳኔ።
\p
\v 8 «ፓራሢ ዔያቶኮ ማኣኪዳፓ ባሼ ሩኡራያኬ፤ ዹሚና ሃንታ ያኣዮይዳፓ ባሼ ዒጊቻያኬ፤ ዔያቶኮ ፓራሢና ዖላ ዓሳ ሃኬይዳፓ ሳጋሪ ሙካኔ፤ ዓርቂ ዔኪ ሙዓኒ ዓዳ ኮኦኬጉዲ ባራናኔ።
\p
\v 9 «ዔያቶኮ ዖሎ ዖላ ዓሳ ቢያ ጌኔ ማዾ ማዻኒ ቤርቲም ጎዓኔ፤ ዔያቶኮ ዓኣፖ ካራ ዓባ ኬስካ ዛላፓ ዢባርሻ ዢባሮጉዲ ሚቻኔ፤ ዔያታ ዲዒ ዔካ ዓሶዋ ማኣሻላጉዲ ቡኩሳኔ። 
\v 10 ካኣቶ ዔያታ ቶኦቻኔ፤ ሜሌ ዓጮ ሱኡጎዋ ዔያታ ሚሚኢጫኔ፤ ዋርዲዮ ቤዞ ቢያ ዛጊ ቦሂሢና ሚኢጫኔ፥ ዬያ ዋርዲዮ ቤዞኮ ዑኪሢ ዓጪ ኩሊ ዓሶ ዔያታ ዓርቃኔ። 
\v 11 ዬካፓ ቢያ ባኮ ዓልጎ ዢባሬጉዲ ዔያታ ፒፂ ዔኪ ዴንዳኔ፤ ዬያታ ዎልቆ ፔኤሲ ፆኦሲ ማሂ ዛጋ ዓሳ ዻቢንቴ ዓሲኬ።»
\s1 ፒዜ ዎጋ ዎቤሢሮ ዒምባቆሜ ላሚ ዖዬ ዖዪፆ
\p
\v 12 ናንጊና ናንጋ ጎዳ ማዔ ታ ፆኦዛሢዮ! ኔኤኒ ሚናኣፓ ዓርቃዖ ዓኣያ፥ ዱማዼያኬ፤ ኔኤኒ ኑና ካፓሢሮ ኑኡኒ ሃይቃዓኬ፥ ኑና ዓኣቻ ካያሢዮ! ኑ ጎሞሮ ዔያታ ኑና ሜታሳንዳጉዲ ባብሎኔ ዓሶ ኑ ዑፃ ዔቂሲ፥ ቢታንቶዋ ዔያቶም ዒንጌሢ ኔናኬ። 
\v 13 ዓኣፓ ኔኤኮ ኮሺ ጌኤሺ ማዔሢሮ ፑርታ ባኣዚ ዛጋኒ ኔ ዓኣፖም ኮሽኩዋሴ፤ ኔኤኒያ ፑርታ ባኣዚ ማዺንታኣና ዛጋኒ ኔኤም ጊኢጉዋያኬ፤ ሂዳዖ፥ ሃንሢ ዋይዞ ዒፃ ፑርቶንሢ ዎዲ ኔኤኒ ዚቲ ጌይ ዛጋይ? ፑርቶ ዓሳ ዔያቶይዳፓ ባሼ ኮሺ ማዔ ዓሶ ባይዛኒ ዔቃኣና ዛጊ ኔኤኒ ዚቲ ጋጋዓ?
\p
\v 14 ዓሶ ኔኤኒ ባዞ ሞላሢንታ ሱኡጌባኣ፥ ዳዶና ጎቺንቲ ሃንታ ማዢንቶንታጉዲ ማሄሢ ዓይጎሮዳይ? 
\v 15 ባብሎኔ ዓሳ ዴሮ ዓንጊ ኪሬና ሞላሢ ጎይፆ ዓርቃኔ፤ ሮኦጮ ማላ ፒራሢ ሱዞና ጎቺ ዔኪ፥ ቡኩሶ ቤዛ ቡኩሳኔ፤ ዬያ ማዺፆና ዔያታ ዎዛዺ ዒላሻኔ። 
\v 16 ዖቶርቂ ዔያታ ናንጋንዳጉዲ ማሃያና ሙዎ ባኣዚ ቢያ ዔያቶም ዴንቂሳሢሮ ሮኦጮ ማላ ፒራሢ ሱዞም ዒንጎ ባኣዚ ሺኢሻኔ፥ ዑንጄያ ዔያታ ጩቢሻኔ። \x - \xo 1፡16 \xo*\xt 2ካኣቶ. ማ 24፡2።\xt*\x*
\p
\v 17 ዓካሪ ዬይ ዓሳ ሮኦጮ ማላ ፒራሢ ሱዞ ሃርፒ ሃርፒ፥ ሚጪንቲባኣያ ኑኡኮ ዴሮ ዔያታ ዎዺ ጋፒሲ ጋፒሲ ናንጋንዳያ ኮይሳ?
\c 2
\s1 ናንጊና ናንጋ ጎዳ ማሂ ኬኤዜ ባኮ
\p
\v 1 ታኣኒ ዴይ ካፖ ካፓ ቤዛ፥ ኬኤሎ ዲፆ ዑፃ ዓኣ ቤዛ ኬስኪ ዔቃንዳኔ፤ ዒኢካ ናንጊና ናንጋ ጎዳ ታኣም ዎዚ ጌይ ኬኤዛቴያ፥ ታ ዖኦጪፆኮዋ ዎዚ ጌይ ማሃቴ ዋይዛኒ ካፓንዳኔ። \fig ካታሞ ካፖ ዼጌ ቤዞ |alt="watchtower" src="LB00104B.TIF" size="col" ref="2፡1"\fig*
\p
\v 2 ናንጊና ናንጋ ጎዳ ታኣም፦ «ታ ኔኤም ፔጋሲ ዻዋ ባኮ ፃኣፔ፤ ሜታሱዋዖ ናባቢንታንዳጉዲ ሳሌዳይዳ ፃኣፔ፤ 
\v 3 ዓይጎሮ ጌዔቴ ሃይ ታኣኒ ፔጋሲ ዻዋ ባካ ዻካ ዎዴ ኔጋንዳኔ፤ ዬይ ኬኤዛሢ ማዺንቲ ኩማንዳ ኬሎኬ፤ ሉኡቁዋያኬ፤ ኔጌያ ማዔታቴያ ካፔ፤ ጎኔና ሙካንዳኔ፥ ኔጋዓኬ። \x - \xo 2፡3 \xo*\xt ዔብ. 10፡37።\xt*\x* 
\v 4 ዖቶርቃ ዓሶ ዛጌ፤ ማሊፃ ዔያቶሲ ፒዜቱዋሴ፤ ፂሎ ዓሳ ጋዓንቴ ጉሙርቂሢና ናንጋንዳኔ» ጌዔኔ። \x - \xo 2፡4 \xo*\xt ሮሜ 1፡17፤ ጋላ. 3፡11፤ ዔብ. 10፡38።\xt*\x*
\s1 ፑርቶ ዓሳ ሎኦማንዳሢ
\p
\v 5 ጎኔና ቆሎ ሚርጊሢ ዓሲ ጌጌሻኔ፤ ቆሎም ጎጋይቃ ዓሲ ዖቶሮኬ፥ ፔቴ ቤስካ ሃውሺ ዴዑዋሴ፤ ሃይቢና ዱኡፒና «ታኣም ጊዴኔ» ጌይሢ ዔሩዋኣሢጉዲ ዬይ ዓሳ «ኑኡም ጊዴኔ» ጌይሢ ዔሩዋኣሴ፤ ዬያሮኬ ዔያታ ካኣቶ ዖሊ ዓርቃሢና ዴሮዋ ዲዒ ዔካሢ። 
\v 6 ዓሲ ቢያ ዬያጉዴ ዓሶይዳ ቄኤዼና ዓኣቺሢ ዓኣቻዖ፦ «ኔኤሮቱዋ ባኮ ቡኩሳሢዮ ኔና ባዴዔ! ዓይሢ ማሂ ዔኪንቴ ባኣዚና ኔኤኒ ኔና ዖርጎቻሢ ዓይዲ ሄላንዳኣናዳይ?» ጋዓንዳኔ።
\p
\v 7 ዒንሢ ዒንሢኮ ጋሌ ዓሲ ማሂ ሜታሳ ዓሳ፥ ዔርቲባኣንቴ ዔቂ ዒንሢ ጋሌ ዓሲ ማሂ ጎቃይሳንዳኔ፤ ዬያ ሌሊቱዋንቴ ቆሎዋ ዒንሢኮ ዔያታ ቡራንዳኔ። 
\v 8 ዒንሢ ሚርጌ ዓሶኮ ቆሎ ቡሬሢሮ ዔያቶይዳፓ ዓቴ ዓሳ ዒንሢኮ ቆሎ ቡራንዳኔ፤ ዬይ ያዺ ማዺንታንዳሢ ዒንሢ ዓሶ ዎዼሢሮ፥ ዓጮንታ ካታሞንታ ዒኢካ ናንጋ ዓሶ ጋፒሲ ዒንሢ ባይዜሢሮኬ። 
\v 9 ሜታ ሄሉዋጉዲ ፔኤኮ ናንጎ ቤዞ ዼጌ ዹኮ ቶኦካ ማዣሢና ዎጌባኣ ካራና ዔኤቢ ዔኪ ፔኤኮ ማኣሮ ማዣሢም ባዴዔ! 
\v 10 ጌኔ ማሊሢ ማሊ ቱኪ ሚርጌ ዓሲ ዎዺሢና ቦርሲንቲ ኔ ማኣሪ ኔኤኒ ዔኪ ሙኬኔ፤ ናንጎዋ ኔኤኮ ኔኤኒ ሜቶም ኬሲ ጌሣኔ። 
\v 11 ሹጮና ማዦ ማኣሮኮ ኮጫ ዓኣ ሹጮንታ ሚፆና ኮሺንቴ ቱርቱሮንታ ዒንሢ ማኪ ጌስታንዳኔ። 
\v 12 ዓሲ ዎዺ ካታሞ ማዣ፥ ዻቢንቲናኣ ዼኤፒ ካታማ ማዣ ዓሶ ዒንሢም ባዴዔ! 
\v 13 ዓሳ ማዻ ባካ ታሚና ሚጫንዳጉዲ፥ ካኣታ ላቢንታ ባኮዋ ዔኤቢ ፓሡዋያ ማዓንዳጉዲ ማዻሢ ቢያ ባኮ ዎይሣ ጎዳቱዋዓዳ? 
\v 14 ባዚ ዋኣሢና ኩሜያ ማዔ ጎይፆ ዓጫ ቢያ ናንጊና ናንጋ ጎዳኮ ቦንቾ ዔሪሢና ኩሜያ ማዓንዳኔ። \x - \xo 2፡14 \xo*\xt ዒሲ. 11፡9።\xt*\x* 
\v 15 ዑሢ ካላዼም ዛጋኒ ኔ ላጋሢም ካፄ ዑሺ ዒንጋሢና ዒዚ ማሢንታንዳያ ሄላንዳኣና ዒዛ ዑሻሢዮ ኔና ባዴዔ! 
\v 16 ኔኤኒ ኔ ቶኦኪና ዑሽኪ ማሢንቲ ቴንጊንቃንዳኔ፤ ኔኤያ ቦንቺንቶንዶ ቤዞ ዻውሲንታንዳኔ፤ ናንጊና ናንጋ ጎዳ ዼኤፒ ዻጋ ዑሺ ኔና ዑሻንዳኔ፤ ቦንቺንቶ ኔኤኮ ዻውሲንቲ ባንሢ ሺርሻንዳኔ። 
\v 17 ሊባኖኦሴ ዹኮይዳ ኔ ማዼ ጌኖ ማዻ ኔና ባይዛንዳኔ፤ ዒኢካ ናንጋ ቦዖ ኔ ዎዺ ባይዜሢ ኔና ዲቃሣንዳኔ፤ ዬይ ያዺ ማዓንዳሢ ዓሲ ኔ ዎዼሢሮ፥ ዓጮንታ ካታሞንታ ዒኢካ ናንጋ ባኮዋ ቢያ ኔ ባይዜሢሮኬ። 
\v 18 ዓካሪ፥ ሜሌ ፆኦዛ ዓይጎ ማኣዳይ? ዬይ ዓሲ ፔ ኩቻ ቃርፂ ኮሼ ባኣዚኬ፤ ሉኡዙሞይዳፓ ዓታዛ ዔያቶይዳፓ ዓይጌያ ጴዹዋሴ፤ ሂዳዖ ዬያ ቃርፂ ኮሼ ዓሢ ዔኤቢ ጋዓኒ ዳንዳዑዋ ዬያ ሜሌ ፆኦዞ ጉሙርቃሢ ዒዛ ዓይጎ ማኣዶምዛይ? 
\v 19 ሚፆይዳፓ ዓርሲንቲ ኮሺንቴ ባኮ፦ «ጴጬ!»፥ ሹጮ ቆኦቂ ኮሾናሢያ፦ «ዔቄ!» ጋዓሢዮ ኔና ባዴዔ! ሜሌ ፆኦዛ ዓኣሺንቴ ባኣዚ ፔጋሲ ኔኤም ዔርዛኒ ዳንዳዓ? ሜሌ ፆኦዛ ቢራ ዓንጊና ዎርቄና ጳርቂ ኮሾናያኬ፤ ዑኡሲ ዔካ ሼምፔ ጋዓንቴ ዔቶኮ ባይያ ባኣሴ።
\p
\v 20 ናንጊና ናንጋ ጎዳ ፔኤኮ ዱማዼ ጌኤዦ ማኣራ ዓኣኔ፤ ዬያሮ ዓጮ ዴራ ቢያ ዒዛ ቤርታ ዚቲዮ ጎዖም።
\c 3
\s1 ዒምባቆሜኮ ሺኢጲፆ
\p
\v 1 ዒምባቆሜ ዓይኑሞና ፆኦሲ ሺኢቄ ሺኢጲፃ ያዺ ጋዓያኬ፦
\b
\q
\v 2 ናንጊና ናንጋ ጎዳሢዮ! ኔኤኒ ማዼ ዲቃሢ ሄርሺሳ ባኮ ቢያ ታኣኒ ዋይዚ ሚርጌና ዒጊጬኔ፤
\q ሃሢ ኑ ዎዶና ሚናኣ ማዾ ኔኤኮ ላሚ ማዼ፤
\q2 ቢያ ዎዴና ዔርቲ ናንጋንዳጉዲ ማሄ፤
\q2 ኔኤኒ ዻጋዻ ዎዶናታዖ ሚጪንቲፆ ኔኤኮ ኑጊዳፓ ሃኪሲፖ።
\b
\q
\v 3 ፆኦሲ ፔኤኮ ዱማዺፆና ቴማኔ ዓጮና
\q2 ፓኣራኔ ዹኮናፓ ላሚ ሙካንዳኔ፤
\q ዼኤፖ ቦንቻ ዒዛኮ ጫሪንጮ ዓኣቼኔ፤
\q2 ጋላታኣ ዒዛሲ ሳዖ ኩሜኔ።
\q
\v 4 ፖዓ ዒዛሲ ዓቢጉዴያኬ፤
\q2 ዎልቆ ዒዛኮ ካንቂ ዓኣ ኩጫፓ
\q2 ሼኤራ ፖዒ ፖዓኔ።
\q
\v 5 ዎዻ ዶርዓሢ ዒዛኮ ቤርታ ቤርታ ዒ ዳካኔ፤
\q2 ሃይቢያ ዒዛም ዓይሢንቲ ዒዛ ጊንፆ ሙካኔ።
\q
\v 6 ዒዚ ዔቃዛ ሳዓ ዓጊፃኔ፤
\q2 ዒዚ ዛጋዛ ሜሌ ዴራ ጎጋይቃኔ፤
\q2 ሚናኣፓ ዓኣ ዹካ ዲኢማዺ ዶዓኔ፤
\q ሚናንካፓ ዓርቃዖ ዒዚ ሃንታ ጌሜራ
\q2 ሊካ ዓርዲ ባይቃኔ።
\b
\q
\v 7 ዒቶጲያ ዴራ ሜታዻንቴ
\q2 ሚዲያሜ ዓሳ ጎጋይቃንቴ ታ ዛጌኔ።
\q
\v 8 ናንጊና ናንጋ ጎዳሢዮ! ኔኤኮ ፓራሢንታ ሳርጌሎ ዖይቶንታ ባሻንዳጉዲ ኔ ማዼ ዎዶና
\q2 ኔኤኮ ዼኤፖ ዻጋ ዎሮይዳዳ?
\q2 ጊንሣ ሃሣ ባዞይዳ ኔኤኒ ዻጋዺያ?
\q
\v 9 ሂኢዦ ኔኤኮ ኔኤኒ ካቲላፓ ኬሴኔ፤
\q2 ዱካኒያ ኔኤኒ ዓኣሤኔ፤
\q2 ሳዖ ኔኤኒ ዳርዚ ዎርዚ ማዤኔ።
\q
\v 10 ዹካ ኔና ዛጋዖ ዒጊቹሞና ጎጋይቄኔ፤
\q2 ዒሮ ዲጳኣ ሳዖ ፒፂ ዓኣዼኔ፤
\q ዼኤፖ ባዛ ጉኡሚ ዋይዚንቴኔ፤
\q2 ባዞ ጉዳሢያ ሌካ ዼግ ዼግ ጌዔኔ።
\q
\v 11 ኔኤኮ ዱኪንታ ሂኢዦንታ
\q2 ዜኤሊንሢጉዲ ፖዓ ዎርፆ ፖዒፃፓ ዔቄያና
\q2 ዓቦንታ ዓጊኖንታ ዓኣ ቤዛ ዔቄኔ።
\q
\v 12 ሳዖይዳ ኔኤኒ ባይዛ ባኮና ዔቄኔ፤
\q2 ኔኤኮ ዻጎና ሜሌ ዴሮ ኔኤኒ ሄርቄኔ።
\q
\v 13 ዴሮ ኔኤኮ ዓውሳኒ፥ ኔኤኒ ዶኦሚ ካኣታሤ ካኣቲ ዓውሳኒ ኔኤኒ ኬስኬኔ፤
\q2 ጎሞ ዓሶኮ ሱኡጋሢ ኔኤኒ ሄርቄኔ፤
\q2 ዒዛና ዎላ ዓኣ ዓሶ ኔኤኒ ባይዚ ካሎ ኔ ዓይሴኔ።
\q2 ቶካፓ ቶኦኮ ሄላንዳኣና ዒዛ ኔኤኒ ካላሴኔ።
\q
\v 14 ዓልጎ ዢባሬጉዲ ኑና ላኣላኒ ሙኬ
\q2 ዖሎ ዓሶኮ ሱኡጋሢ ዒዛ ሂኢዦና ኔኤኒ ዱኬኔ።
\q2 ላቤ ቆልሞ ጫሃኒ ዓፃዻ ቦዖጉዲ
\q2 ዒዚ ዓኣሺንቲ ዓኣ ማንቆንሢ ባይዛኒ ጊኢጌኔ።
\q
\v 15 ኔኤኒ ኔ ፓራሢና ባዞ ሄርቃኣና
\q2 ዬይ ዼኤፖ ባዛ ዓዓጊፃኔ።
\q
\v 16 ዬያ ቢያ ታ ዋይዛኣና ዒና ታኣኮ ዲቃቴኔ፤
\q2 ሙሱራ ታኣኮ ዒዛ ዑኡዞ ዋይዛዖ ጎጋይቃኔ፤
\q2 ዒጊቹማ ዴንዲ ታኣኮ ሜጌፆ ጋሮ ጌሌኔ፤
\b
\q ቶካኣ ታኣኮ ጎጋይቄኔ፤
\q2 ኑና ሜታሳ ዴሮ ዑፃ ሜታ ሙካንዳያ ሄላንዳኣና
\q2 ዬኖ ኬሎ ጊቢ ዳንዳዒሢና ታኣኒ ካፓንዳኔ።
\b
\q
\v 17 ቤሌሶ ሚፃ ዎዚ ቡኒባኣያታቴያ
\q2 ዎይኖ ዑፆይዳ ዓኣፒ ባኣያ ማዔቴያ
\q ሃሣ ሪሚቶ ሚፃኣ ዓኣፒ ባኣታቴያ
\q2 ጎዦ ጋራ ካፄ ሃኣኮ ባይቄያታቴያ
\q ማራታ ቢያ ሃይቂ ጋፔታቴያ
\q2 ባርቶ ጋራ ባይ ባኣያታቴያ፤
\q
\v 18 ዬይ ቢያ ማዔቴያ ታኣኮ ናንጊና ናንጋ ጎዳ ዓኣሢሮ ታ ዎዛዻንዳኔ፤
\q2 ታ ፆኦዛሢ፥ ታኣኮ ዼኤሻሢ ዓኣሢሮ ታ ዒላሻንዳኔ።
\q
\v 19 ናንጊና ናንጋ ጎዳ ማዔ ፆኦዛሢ ታኣኮ ዎልቃሢኬ፤
\q2 ዒዚ ቶኮ ታኣኮ ዎሾ ሹቁሊጉዲ ዶዲሻኔ፤
\q2 ዒዚ ታና ዹኮ ዑፆይዳ ሃንታንዳጉዲ ማኣዳኔ። \x - \xo 3፡19 \xo*\xt 2ሳሙ. 22፡34፤ ዓይኑ. 18፡33።\xt*\x*