\id TIT - Ese (Managalasi) NT [mcq] -Papua New Guinea 1999 (web version -2014) 
\h Taitasi 
\toc1 Taitasi 
\toc2 Taitasi 
\toc3 Ta 
\mt1 Taitasi  
\c 1  
\s1 Vuꞌa Anejijihina  
\p
\v 1 Na Poru Godoni pwea ꞌee Jesu Keriso oni apasorua. ꞌEne ea kaꞌene Godira iji pijiha jihipuni nimaaroa ꞌee nimaiji henakame ariramaa hihuna najahu.  
\v 2 Ijí majama hihuna apehuna kaꞌene Godi iraꞌata paꞌajara nitama nahama ꞌwarumaji ꞌajaha hiju.  
\v 3 Huni vea apejume ike Huni vuꞌakaho najahe ꞌwaravume samaa renana. Godi kaꞌene núni Niꞌajúhiꞌinijara nara veꞌurono ꞌwarimana.  
\v 4 Taitasi nuni hariha nimaa kaꞌene núni nimaaroa nikwinuꞌini jihunaꞌe veju. ꞌEne maiji vwihanúana ꞌee matauviꞌina kaꞌene Godi Amoho ꞌee Jesu Keriso kaꞌene núni Niꞌajúhiꞌinijaho a huꞌúmuna.   
\s1 Taitasi Kureti Kaukara Vejiꞌi Eruta Iji Pijihajina  
\p
\v 5 Nara a Kuriti ranamau jihuni maijaho kaukara pwinanaꞌa kaꞌene namuji veꞌamarono avajuta. ꞌEne arara kino nara ꞌwaravu jaꞌinaꞌe eruta iji pijiꞌamana.  
\v 6 A ea iji pijiꞌamajaho ea kaꞌene sisea vejiꞌinijija papijiꞌamana. ꞌEnakaivo ea kaꞌene napara kwinu kwino saviꞌinijino pijiꞌamana. ꞌEꞌirakúne puni harihija Natohwijaho nimaa rone sisea ani ani pavene ꞌee emahwapuni ira papataarorahuna.  
\v 7 Ea kaꞌene ꞌajohaꞌinijaho Godoni kaukara hami ꞌajohareꞌe nihoꞌo ariraꞌe ꞌuraha onuna. ꞌEne hu jarika parene ꞌee marakuꞌa paꞌajime ꞌee toa sisea huni harura hara pahine ꞌee ea majikari paꞌanie ꞌee monia ꞌunama sisei jihunijaho paꞌekahuna.  
\v 8 ꞌEnakaivo hu apiora oja mihe hami ꞌajoahuna. ꞌEne maijiru oja mihuna ꞌee hu hami vwihajiꞌi vehuna ꞌee hu ea mamaa ꞌee huni kaukara oja mihiꞌi venuna ꞌee hu oja pahiaviꞌina ꞌee paꞌurijiꞌina.  
\v 9 Pu vuꞌa kaꞌene arimaaka pu najahujaho ija kisi apene puni unaꞌi saname vejura. Ijá veꞌava jihunaꞌe vuꞌa kajara pu ea mapoka areri arira najahe ijara veje ea ꞌahoꞌa kaꞌene huaꞌe ninavujija niꞌajihe najahe pu nimaa rohuna.  
\v 10 Pu ea mapoka vuꞌa kajaho pahene veju kaivo pu ira karokaha ꞌwame iraꞌata kajino ea pisivisavura. ꞌEne ea kaꞌene sisa ꞌuhuiꞌinijipo ijaꞌina vejura.  
\v 11 ꞌEnaꞌomo ea ijaꞌina vejiꞌinijija veje areva. Ijihuni maijaho uneunecha kaꞌene panajahuna saꞌinijaho hine kachiꞌina mahoꞌo ruarahe najahu jihuni maijaho pu monia ꞌeki ꞌahiuꞌe ꞌunama sisea hine avaju.  
\v 12 Puni ea pina poropetiaꞌomo ijara ijaꞌinaꞌe ꞌwaramana. Ja Kuriti ora naꞌia mapoka iraꞌata apejura ꞌee hanuha sisesa ꞌee uchaha rukine ꞌiruma isaꞌora.  
\v 13 Ijí raka kaꞌene hura ꞌwarama kajaho nimaa ariramaa. ꞌEnakúne a nihoꞌo hami ira kisi najahakame puni nimaaroijaho ija kisi apene puni unaꞌi saname veꞌavara.  
\v 14 ꞌEꞌirakúne Jua puni mamiha ꞌee emaapuni tamana ani aniꞌinijija ataa paapúsaꞌavara. Ea kaꞌene nimaa nimaiji pataaroꞌikaꞌi ani vaꞌajihipuni vuꞌa ataa paapúsaꞌavara.  
\v 15 Ea mapoka puni oja vaja nihoꞌo maa navujaho pu maaru vwihajura kaivo ea kaꞌene puni oja vaja sisea name panimaa rojujaho sisearu vwihajura. Puni oja vaja nisakarasaha jihunaꞌe pura uneunecha kaꞌene kime vwihajujaho sisearuna.  
\v 16 Pu Godoni ea ꞌúvu kaivo raka kaꞌene pura vejuji nú kivujaho pu nimaa Godoni ea pana. Pu nihoꞌo sakarasahiꞌini jihunaꞌe Godoni ira pataarohura. Pura unenu pina mamaa areri vehuna pana.   
\c 2  
\s1 Emaina ꞌEe Ea Maiuꞌina Puni Vuꞌa Nimaa Nimaijina  
\p
\v 1 ꞌEnakaivo a vuꞌa nimaa ariramaa ijiru najaꞌamana.  
\v 2 ꞌEne emaa ꞌuꞌo ꞌwarave areme sonasahe hine hura vene vwiha hami vwihane ꞌee huni nimaaroa arira name ꞌee oja aririji mihe ꞌee masuani ajuarana hija.  
\v 3 ꞌEne paranaha ꞌuꞌo ꞌwaravakame pu ꞌunama maaru vene pu majikari ea panamahe toa sisea puni harura hara pahija kaivo pu uneunecha kaꞌene mai ijihunijiru najaꞌavara.  
\v 4 ꞌEne pu napara kaꞌene maiuꞌinijija najahe pu masuani mamaa hine paruhwaha oja mihe ꞌee kasihwaha oja miha.  
\v 5 ꞌEnareje pu puni vwiha hami ꞌajohe ꞌee nia pakairasahe ꞌee puni sea hami ꞌajohe ꞌee paruhwapuni ira hene veja. ꞌEjakame pu ea ꞌahoꞌa Godoni vuꞌa areri sisea paꞌwaꞌavara.  
\v 6 ꞌEne ꞌunama nikwinuꞌina kajino kivasa ꞌuꞌo ꞌwaravakame puni vwiha hami ꞌajoꞌavara.  
\v 7 A ꞌuꞌo uneunecha mapoka kaꞌene a veꞌamajaho unama mamaaru vejakame pu ꞌuꞌo mamaaru veꞌavara. A ea najaꞌamajaho ariraru najahe pu ara raka kaꞌene najahu jihuni hura veꞌavara.  
\v 8 A nihoꞌo vuꞌa maaru ea najaꞌamana. ꞌEjakame ea pina a sisea areri paꞌwaraꞌamana. ꞌEne ninakaraviꞌinijija junave nú ira sisea areri paꞌwaruꞌavara.  
\v 9 ꞌEne ꞌunama kajihuna kajino pwea ꞌuꞌo ꞌwaravaka puni mamaꞌini jihipuni iraru hena veja. ꞌEne najahakame uneunecha mapoka kaꞌene pu veꞌavajara puni mamaꞌina teamanahuna. ꞌEꞌirakúne pu ira puna patuꞌavara.  
\v 10 ꞌEnakaivo pu puni mamaꞌini jihipuni uneunecha maꞌuꞌumaa nesa paꞌekakame pu nimaa vetihuna. ꞌEjakame Godi kaꞌene núni Niꞌajúhiꞌini jihuni irijaho richama paraꞌamana.  
\v 11 Ijihuni maijaho Godira maiji vwihanúajara ea mahoꞌo maranihuna apena roana.  
\v 12 Ijí Godoni maiji vwihaniꞌinijara nú najuhe nú ꞌunama sisea arehuna. Mweꞌa kehuni ꞌunama paitunume ꞌee hami vwihajiꞌi hine ꞌee ariramaa hine ꞌee mweꞌi hina apena vaꞌukaho Godoni ꞌunama maijino vejiꞌi hiꞌavara.  
\v 13 ꞌEnaꞌomo nú vea kaꞌene Hura rohuni vea mamaa kaji ꞌajaha hine ꞌee núni Godia kaꞌene niꞌimaꞌurijaho ꞌee núni Niꞌajúhiꞌina Jesu Kerisora eajarame roa arihuniji ꞌajaha hiju.  
\v 14 Hu núnijihunaꞌe kwamana. Nú sisei vaji hiꞌeme nú Huni ea reꞌavarono ꞌeka ruvaꞌuana. Hu nú venume Huni ea arimaa rene ꞌee Huni ea kaꞌene Hu mamaa nimaijihi rene ꞌee nú mamaaru vehuna ura renau.  
\v 15 A unekakihi harurijiꞌi mahoꞌo niꞌajihe najahe ꞌwaraꞌamana. Veje ea ꞌahoꞌa a túa pavetaꞌavara.   
\c 3  
\s1 Godoni Eapo Kara Icháꞌina Vehunijina  
\p
\v 1 Kúꞌo huri ꞌwarave pu vwihaꞌavara. ꞌEne puni ꞌajohaꞌina ꞌee kamatia puni hari hine puni ira hene veꞌavara ꞌee mamaaru vehunaꞌe amairiaraviꞌi hiꞌavara.  
\v 2 Pu ea ꞌahoꞌa paronahe ꞌwarame ꞌee paꞌuraraꞌavara kaivo ea ꞌahopunaꞌi mamaa vene ꞌee ea ꞌahoꞌa oja vwihaniꞌavara.  
\v 3 Nú marakoꞌa hami pavwihane ꞌee vuataa pahene ꞌee pisimúuꞌe nú hahijihuni ura ani aniꞌina vene ꞌee hahijara teamahuni jihuni pwea rejara. ꞌEne sisea vaji hine ꞌee ea ꞌahopuni kukua kime itunume ꞌee senuma paranúe ꞌee ea ꞌahoꞌa puꞌúmo sena vejara.  
\v 4 ꞌEnakaivo Godi kaꞌene núni Niꞌajúhiꞌinijara Hu mamaa vene ꞌee ea oja ꞌekaujaho najuhana.  
\v 5 ꞌEnarena Hu nú niꞌajúha jihuni maijaho núra uneunecha mamaa ariraꞌe vejakame ijihunaꞌe niꞌajúhuna pana kaivo Huni numisaraa ꞌee Huni ꞌAvena vajijino kúꞌo nahenuꞌe somuhume nú ea maiuꞌina rejara.  
\v 6 Godira Huni ꞌAvena Jesu Keriso kaꞌene núni Niꞌajúhiꞌini jihuni vaji mahoꞌo samuhana.  
\v 7 Huni maiji vwihanúani vajijino Hu venume nú ariramaa rejajihunaꞌe nú nimaa rojujaho majama hihunijaho núni aachiaꞌe renana.  
\v 8 Ike vuꞌa kaꞌene nara ja ꞌwaravukija nimaa nimaaꞌomo na ura ja ꞌunama kajaho hina ꞌejahiꞌi ꞌwavakame Godoni eijija naꞌia mapoka mamaa kaji vehuniji hami hami ꞌajoꞌavara. ꞌEjakame ike ꞌunamakaho mamaakúne ijara ea niꞌajiꞌamana.  
\v 9 ꞌEne ja ira ani aniꞌina sisea karokaha aposaravura areme amuja nirisaravujaho areme tamana nakaravujija areꞌavara. Ijija nihoꞌo areri ea paniꞌajihunakúne areꞌavara. ꞌEne ijaꞌina ꞌunama maa pana.  
\v 10 Ei pini ja puꞌúmo ahuma hiꞌi kaivo hu veje ea ꞌahoꞌa ani ani vwihaja kaꞌavajaho ꞌaha noꞌo ruviꞌi kave paꞌareva kaꞌavajaho roturaꞌavara.  
\v 11 Ea ijaꞌina ꞌunama kaꞌene maijaho niaremana. Ijihunaꞌe hu sisea venu. Hu oriꞌini huni ahija vene avanuna.   
\s1 Túchamaa Icháꞌina Vehuniji Najahajina  
\p
\v 12 Nara Atemasiho Tichikasi araki ranave oni vuhuna. ꞌEnakúne hu vuꞌa kaꞌamajaho marako ꞌurine na Nikaporisi hijukúne roe na piuniꞌamana. Atuata veijaho na roe ijí hihuna.  
\v 13 Sinasina ꞌotua vejiꞌinijiꞌo Aporasiꞌo uneunecha kaꞌene ꞌeka vahunijaho niꞌajihakame papivusaꞌavara.  
\v 14 Ehu nuna najahakame kaukara mamaa vene ꞌee iviamaa huni temukaho ahija niꞌajihakame pu uneunecha puni iji vejiꞌinaꞌe reꞌavara.  
\v 15 Ea mahoꞌo iki na huꞌúmo hijujipo ꞌajoravu. ꞌEnakúne ea kaꞌene nimairoa vaji oja múhujija ꞌajoraꞌamana. ꞌEne maiji vwihaniiꞌinijara mahoꞌo ja puꞌúmuna.