\id JAS - Ese (Managalasi) NT [mcq] -Papua New Guinea 1999 (web version -2014) 
\h Jemisi 
\toc1 Jemisi 
\toc2 Jemisi 
\toc3 Je 
\mt1 Jemisi  
\c 1  
\s1 Vuꞌa Anejijihina  
\p
\v 1 Na Jemisi kaꞌene Godiho ꞌee Natohwa Jesu Keriso oni pweijarana. Jua puni ituha iropu ropu noꞌo kaꞌene ranaꞌarame ani ani vaꞌajihi punaꞌe asura ikaho vene ꞌajoravu.   
\s1 Nimairoa ꞌEe Vwiha Mamaa Ijina  
\p
\v 2 ꞌEne vwehu nune hami vwihane nirisaꞌavara. Vea kaꞌene ja venakia ani aniꞌina piuniꞌavari vajijaho temarasaꞌavara.  
\v 3 ꞌEne ja nihejura. Joni nimairoiji vene kivujara rejuꞌe kisina rene hina vaꞌura.  
\v 4 ꞌEnakúne veje kirasahe vaꞌujaho roe emarene areri rene paraꞌamana. ꞌEjakame ja nihoꞌo emarene areri renae paranareje unenua ꞌahoꞌa papivuhuna.  
\v 5 ꞌEnakaivo ja ea irara vwiha mamaiji paꞌanaꞌe renaꞌamajaho makaꞌeje hu Godi kaꞌene iswasiniji jarivakame Hu teamaꞌeje maꞌamana.  
\v 6 ꞌEnakaivo veje hu jarima ꞌwaraꞌamajaho nimaa rojiꞌi jarime ꞌwaraꞌamana. Ijihuni maijaho ea irara panimaa ronujaho hu areri asiasiꞌi roe soha ninavuꞌe amenu jaꞌinaꞌe venuna.  
\v 7 Ea kaꞌene ijaꞌinijaho hu pakaꞌeje unenuꞌu pina Natohwi jihunaꞌi apeꞌena rojiꞌi hiꞌama.  
\v 8 Ijihuni maijaho ea kaꞌene vwiha noꞌu noꞌo vwihanujaho huni ꞌunamijija maiꞌo parira kwinu soname namuna.   
\s1 Kukua Paꞌamaijine ꞌEe Kukua Rukinijina  
\p
\v 9 ꞌEne vwea nuna kaꞌene pivujiꞌi hinujaho Godira hu aromahuni jihunaꞌe mariꞌuviꞌi hinama.  
\v 10 ꞌEnakaivo veje ea kaꞌene monia uneunecha rukimaꞌurijaho huni pinana veje masuani ajuaraꞌamana. Ijihuni maijaho areri sinarapo sonarene navuraꞌomo ꞌuhue paꞌareju jaꞌinaꞌe hu kwama vaꞌeje paꞌarehuna.  
\v 11 Ijihuni maijaho vea uhoijiꞌi ajimujara sinara ꞌaniuꞌe puni sona uasahe arihura. ꞌEne ijí sinara sona kajihuni niura mamaijaho vejuꞌe paꞌareju jaꞌinaꞌe ea kaꞌene nihoꞌo uneunecha rukinaꞌe reꞌi ꞌahaukame sarama vaꞌuna vajijino ꞌuꞌo paꞌarenuna.   
\s1 Nimairoa Huni Venaka ꞌEe Venakú Ijina  
\p
\v 12 Ea kaꞌene venakia hari majamano kirana vaꞌamajaho Godira merajahuna. Ijihunaꞌe hu nimaaꞌe kirane vaꞌanaꞌe reꞌamajaho hu majama hihuni iꞌesa kaꞌene natohwijara ea kaꞌene Hu oja mahuji nahama ꞌwaramajaho apehuna.  
\v 13 Ea pinaꞌe siseijara vena kaꞌamajaho hu pakaꞌeje ijá ꞌiama Na Godira vena kimana ꞌiama. Ijihuni maijaho Godiho areri sisea paꞌeke ea vena kimuna. ꞌEne Hu Huhusu sisea paꞌeke ea vena kimuna.  
\v 14 ꞌEnakaivo ea kwinu kwino vena kivujaho vea kaꞌene hura sisea iraka kaꞌene itumujara tairia vauꞌe sisea venuna.  
\v 15 ꞌEne vea kaꞌene itunavujara roe emarena paranujaho sisea nahenuna. ꞌEne vea kaꞌene siseijara roe anesinaꞌe rena paranujaho kwamasahuna renuna.  
\v 16 Vwehu núna kaꞌene na ja oja mihiꞌinakije paveje ea ja pisivisaꞌavara.  
\v 17 ꞌEne uneunecha mahoꞌo mamaa ꞌee swara arira mamaijija ichutoi hanajiꞌini jihipuni Omijihunaꞌi rene roura. Hu pataꞌarohe ani aniꞌina rene ꞌee Hu areri nihapo ikehikehi niha rena vaꞌa vaꞌujaꞌina pana.  
\v 18 Hu Huni ura ijino nú Huni vuꞌa nimaa vajijino nahenuana. ꞌEjakame nú areri Hura uneunecha kaꞌene vena jihipuni amurijihi reꞌavarono avanana.   
\s1 Hene ꞌEe Vehunijina  
\p
\v 19 ꞌEne vwehu nuna kaꞌene na oja mihiꞌinakije ja ikaho nihejiꞌina. Ja ea kwinu kwino mamako hami heꞌavara kaivo marako paꞌwarame ꞌee paꞌajinaviꞌinaꞌe reꞌavara.  
\v 20 Ijihunaꞌe emaa huni ajirijaho pavenauꞌe Godoni ꞌunama ariramaa ijaꞌina paroe rejura.  
\v 21 ꞌEnajihunaꞌe ꞌunama kaꞌene chiha rukinijija ꞌee sisea ꞌahoꞌa kaꞌene joni vaji navujija mahoꞌo irechaꞌi kaivo masuani ajuarasahe hiꞌavara.  
\v 22 ꞌEnakaivo ja ojono papisivaꞌarame vuꞌaru hejiꞌinaru pareꞌavara kaivo ira iraka kaꞌene ja hejajija hene vejiꞌinaꞌe reꞌavara.  
\v 23 ꞌEnajihunaꞌe ea irara Godoni iriji hejiꞌinaꞌe reꞌi kaivo pavejiꞌinaꞌe reꞌamajaho hu areri ei pini huni niura maneꞌa vaji kasaramu jaꞌinaꞌe venuna.  
\v 24 Ijihunaꞌe vea kaꞌene hu ori kasarama hiꞌejuꞌe hu ea icháꞌinijaho ruvuꞌe paꞌarenu jaꞌinaꞌe venuna.  
\v 25 ꞌEnakaivo ea irara varapa arimaa kaꞌene vejume hanasinaꞌe apejaji hami piuhahe ijihuni toi hijiꞌi paruviꞌinaꞌe ꞌee hene teamaꞌejuꞌe vejiꞌinaꞌe renujaho ea ijaho uneunecha kaꞌene hura veꞌamajaho nihoꞌo merajahuna.  
\v 26 ꞌEne ei pini vwihaje hu mamaa vejiꞌina roꞌikaꞌi huni mitara hami paꞌajohujaho hu ori pisivaramuna. ꞌEjuꞌe hura mamaa kaꞌene venujaho iraꞌataꞌe renuna.  
\v 27 ꞌEjume ꞌunama arira mamaa ꞌee sisea paꞌamaa kaꞌene nú vejukame nuni Godi Omijara ura renujaho ikehina. ꞌOja ꞌee amuna kaꞌene pivusahiꞌi hijujija ꞌajohae ꞌee mweꞌa kehuni siseijaho tatumihiꞌi vaꞌakame parenuhuna.   
\c 2  
\s1 Ronu Kwinu Parehuni Jujuvuꞌa  
\p
\v 1 Vwehu nuna ja pakiꞌeje núni Natohwa Jesu Keriso kaꞌene mavarasaꞌiniji nimaa rojiꞌina ꞌwaꞌikaꞌi ea kwinu kwino ura renaꞌinaꞌe reꞌava.  
\v 2 Ijaꞌini jihunaꞌe jara roe ahuvuri vajijino ei pini ija rinia kaꞌene korutia vejajaho ariname ateha maa same roe aruve ꞌee ea pivujiꞌina pina ꞌuꞌo ateha sisesai chiha rukini same roe aruhuna.  
\v 3 ꞌEe ea kaꞌene ateha mamaa same roaji kaviꞌi ijá ꞌwaꞌama A roe ike ruha mamaakino asuma hina. ꞌEꞌikaivo vu ea kaꞌene pivujiꞌinijaho ijá ꞌwaꞌama A karokaro vaꞌe namina ho roe nuni mumori namukino asuma hina ꞌwaꞌama.  
\v 4 ꞌÚ ja iviꞌa ojono iana vetiarame ꞌee vwiha sisea huni ꞌunamijino mina vetiaravume paranane?  
\v 5 Vwehu nuna kaꞌene na ja oja mihiꞌinakije heha! ꞌÚ Godiho ea kaꞌene mweꞌakino pivusahiꞌina kaꞌene Hu oja mahe ꞌee puni nimairoa marasaha parane ꞌee aachiꞌa kaꞌene Godoni ari vahunaka nahama ꞌwaramaji apehuna ija papijihana raka?  
\v 6 ꞌEnakaivo ja ea kaꞌene pivujiꞌini jihuni hura pavenahura. ꞌÚ ea kaꞌene uneunecha rukinijija pu ja paruarahe ꞌee pairisamie ꞌeke ꞌotua vaꞌahure?  
\v 7 ꞌEne Iha mamaa kaji ja ꞌumejajaho pu ira sisea ꞌwavura raka?  
\v 8 ꞌEnavo varapa mavarasaꞌina kaꞌene Godoni ira vaji namujaho ikaꞌina ꞌwarumana. Ja ea kaꞌene joni rori hijujija oja miꞌavara. Areri ja ojono joni haha oja mahujaꞌinaꞌe miꞌavara ꞌúmana. Ja ijaꞌinaꞌe veꞌavajaho mamaaꞌe vene avahuna.  
\v 9 ꞌEnakaivo ja hine ronukwino rejiꞌi hiꞌavajaho ja siseaꞌe vene avaju. ꞌEjuꞌe varapijara ꞌwaramujaho ja sisea vejiꞌina.  
\v 10 Ijihunaꞌe ea irara varapa ꞌahoꞌa ꞌajoꞌi kaivo kwinu enujaho hu varapa mahoꞌo ejume paranana.  
\v 11 Ijihuni maijaho Hu ikaꞌina ꞌwarumana. Ja ea ꞌahopuni napara paturaꞌavara ꞌee kúꞌo ikaꞌinaꞌe ꞌwarumana. Ja ea paꞌanae kwaꞌamana ꞌúmana. ꞌEnaꞌomo iviꞌa a ea ꞌahopuni napara paturamana kaivo a ea ꞌanaume kwamanaꞌe reꞌamajaho a varapa ꞌejiꞌinaꞌe renana.  
\v 12 ꞌEnakúne ja iraka kaꞌene ꞌwaravu jaꞌinaꞌe veꞌavara. Ijihuni maijaho hanasina apejuri varapijara ja piuhiha kihuna.  
\v 13 Ijihuni maijaho ea kaꞌene ea pihunaꞌa panumisaramujaho ꞌotuijaho nihoꞌo ea kajihunaꞌa panumisarahuna. ꞌEnajihunaꞌe numisara ijara ꞌotuijaho asimana.   
\s1 Nimai Rone ꞌEe Vejajina  
\p
\v 14 ꞌEnaꞌomo vwehu nune ei pini hu nimaa rojiꞌina ꞌiꞌikaꞌi hura one ꞌee venujara areri pareꞌamajaho ijaho icháꞌine? ꞌEne nimairoa ijaꞌinijaho hu areri niꞌajaꞌena raka?  
\v 15 Vwea núni pinina ho maꞌini pini ateha ꞌiruma paꞌareje mahiꞌeje  
\v 16 ja ei pini ika ꞌwahuna Mataume vaha ꞌee haha ohoa renaꞌeje hiha ꞌee túame areri renaꞌeje hiha ꞌiꞌi kaivo puni hahijihuni ura ijihi unenuꞌu ꞌahoꞌa paveꞌamajaho maa irakijihunaꞌe ꞌwaraꞌeja?  
\v 17 ꞌEnajihunaꞌe nimairoijara huhusu reꞌikaꞌi kara mamaa pavejiꞌinaꞌe reꞌamajaho kwamuna.  
\v 18 ꞌEnakaivo ei pini ikaꞌina ꞌwarahuna. A nimairoa rukina ꞌee na kara mamaaru vejiꞌina. ꞌEnaꞌomo a kara mamaa paꞌana reꞌamajaho icháꞌinaꞌe oni nimairoa najiꞌena? ꞌEje na nuni kara mamaa kaꞌene vejujihuni toi nuni nimairoa najahuna.  
\v 19 ꞌÚ a nimaa ronujaho Godiho nikwinune? ꞌEjume ijaho a mamaa venu. ꞌEnavo ꞌavena sisesa ꞌuꞌo ijaho nimaa rone nihoꞌo simamaruviꞌi hiju.  
\v 20 ꞌEne vwiha paꞌakera. ꞌÚ a ura na najaꞌurono avano? Oni kara maa paꞌana reꞌamajaho oni nimairoa maa paꞌana.  
\v 21 ꞌÚ Eparahami kaꞌene núni omijara kara kaꞌene vene huni hariha Aisikiho apene swasa vene ꞌaijua ꞌahi ranamajara rejume hu ariraꞌe renajaho nimaa pana raka?  
\v 22 A iviꞌa huni nimairoa ꞌee huni kara mamaijiꞌi ahume kaukara venajaho nikamo? Ijihunaꞌe huni kara mamaijara renajihunaꞌe huni nimairoa roe areri renana.  
\v 23 Ikaꞌinaꞌe ꞌwarumajara rejume Godoni irijaho roe nimaaꞌe renana. Eparahamira Godi nimaa ronajihunaꞌe Hu vejume ariraꞌe renana. ꞌEne hu Godoni napura ꞌwamana.  
\v 24 A iviꞌa nikamo? Ea huni kara mamaijara rejuꞌe ariramaa ꞌwavura. ꞌEnakaivo nimaaroaru pana.  
\v 25 ꞌEne Rehapi kaꞌene ꞌuasa vejiꞌinijara kara kaꞌene venarena ea kaꞌene júhi roajihi aherame ꞌeke ꞌunama ani irechamiume vaꞌajaho hu arira parenana raka?  
\v 26 Ijihunaꞌe haha kaꞌene ꞌavena paꞌajaho kwamujina. ꞌEnaꞌomo ꞌuꞌo areri nimairoa kaꞌene kara mamaa paꞌajaho kwaviꞌina.   
\c 3  
\s1 Mitarijina  
\p
\v 1 Vwehu nune veje ja ea mapoka najahiꞌina pareꞌavara. Ja nihena kavujaꞌinaꞌe nú ea kaꞌene ijaꞌinijija niꞌimaꞌuraꞌe eha sisea apehuna.  
\v 2 Ijihunaꞌe nú ea mahoꞌo ꞌunama ani aniꞌini tachinamie arihura. ꞌEnavo ea pina hura ira kaꞌene ꞌwaramujino paasusamujaho hu ea arira. ꞌEnaꞌomo hu huni haha oriꞌini ꞌajoarahuna arerina.  
\v 3 ꞌEnaꞌomo nú iviamaa hosia puni iri vaji ꞌauria irechamiakame vuꞌataa hejura reꞌavajaho nú puni hahiji ꞌuꞌo mahoꞌo ꞌeke ura arini irechamihuna.  
\v 4 Heha! Sisima ijija ꞌuꞌo mamaꞌina kaivo hwasisia mamaꞌinapo ꞌaniꞌejuꞌe vaꞌura. Ijaꞌinaꞌe sisima ꞌajohiꞌinijara unenu pina maꞌuꞌui vejuꞌe sisima icháꞌina hu ura renujaꞌinaꞌe vaꞌuna.  
\v 5 ꞌEne ꞌuꞌo mitarijaho haha pwinanaꞌa maꞌuꞌua kaivo uneunecha mamaꞌina kehi kehi ꞌwaramuna. Heha! Nechiꞌa niꞌimaꞌura kaivo vena maꞌuꞌui ꞌejanavuꞌe rena vaꞌuna.  
\v 6 ꞌEne mitariji ꞌuꞌo vene ꞌee sisea huni tinia. ꞌEne mitarijara haha pwinanaꞌa mahoꞌo ruarahuna. ꞌEne mitari jihuni harura sisea kajaho veni renuni kwaa ijino rena rouꞌe ꞌwaramuna.  
\v 7 Ijihunaꞌe hanuha ani aniꞌina uka tapara ꞌee uneunecha kaꞌene mweꞌi tiroha ojiꞌina sohanuha ijija emaapo ꞌuninamie ꞌajohaura.  
\v 8 ꞌEnakaivo ei pini huni mitara hami ꞌajohe sonama nahuna areri pana. Ijaho nihoꞌo sisea kaꞌene siheria paꞌana kaꞌene maka punaꞌi ꞌaninamiu jaꞌina ituꞌona namu.  
\v 9 Ijí mitara nikwisu kajino nú núni Natohwa ꞌee Oma taꞌarohura. ꞌEne ijí mitara nikwisu kajino nú ea kaꞌene Godi vareꞌinaꞌe venajija siripavura.  
\v 10 ꞌEne ira nikwisuꞌina kajino merajihujaho ꞌwarame ꞌee siripavujaho ꞌwaravura. Vwehu nune ike uneunechakija ꞌunama ijaꞌina paveꞌavara.  
\v 11 ꞌÚ toa úja mamaijaho toa siseijiꞌi ahume rouna raka?  
\v 12 Vwehu nune matakapo tavoꞌa rejura raka? ꞌEne aja ꞌahi mataka ꞌina irima navura raka? ꞌEne soha areri toa maa reꞌena raka?   
\s1 Vwiha Maa Ichutoi Rena Roujina  
\p
\v 13 ꞌÚ ea irara joni vajakaho vwiha hami vwihajiꞌine ꞌee hena kama parajiꞌine? Makaꞌeje hu huni kara mamaijino vene masuani vwiha mamaijino najahama.  
\v 14 ꞌEnakaivo ja nihoꞌo senama parane ꞌee joni ojijihuni ura ijiru vwihajiꞌinaꞌe reꞌavajaho pakehi kehi veꞌavara. Kehi kehi vejujaho sisea niꞌimaꞌura kaꞌene nimaijiꞌi ninakaraviꞌinijina.  
\v 15 Vwiha ijá kajaho ichutoi rena rohuna pana kaivo ijaho mweꞌa kehuna ꞌee haha huni ꞌunama ꞌee ꞌavena sisea punaꞌi rena roura.  
\v 16 Ijihunaꞌe ichihichakaro oja sisesa vwihane ꞌee ajiname ꞌee puni ura ijino pupusu vwihajujipo navujaho sisea ani aniꞌina kihune ꞌee uneunecha ura arini panahuna.  
\v 17 ꞌEnakaivo mamaa kaꞌene ichutoi rena roujija ikehina. Amurijaho ariramaaꞌe matauviꞌine masuani ajuaraviꞌine hami vwihajiꞌine numisarai rarena parajiꞌine kara mamaaꞌe ꞌee karokaha pavejiꞌina. ꞌEnakúne paꞌaroꞌaroti namine choichoi pamejiꞌinaꞌe reꞌavara.  
\v 18 ꞌEne matauma hihuna ꞌwaraviꞌinijipo matauma hihuna ꞌwaravuꞌe roe ariramaaꞌe rejura.   
\c 4  
\s1 Mweꞌakeꞌi Napura Vejujina  
\p
\v 1 Irakijara rejuꞌe ꞌuraꞌarame ꞌee joni vaja ꞌajikaravo? ꞌÚ ijaho iraka kaꞌene jara ura renaujipo joni haha pwina vajakaho ajira veju raka?  
\v 2 Ja unenuꞌu ꞌahoꞌa ituname ura renau kaivo ja paꞌeku jihunaꞌe ja ea ꞌaniuꞌe kwamasahu. ꞌEne ja ea ꞌahopuni kukua kime ꞌekahuna ura renau kaivo paꞌeku jihunaꞌe ja ꞌarahe ꞌee ꞌuraura. Ja paꞌeku jihuni maijaho ja pajarivu jihunaꞌe avajura.  
\v 3 Ja jarivu kaivo paꞌeku jihuni maijaho joni oja vwiha ani naꞌejuꞌe jarivu jihunaꞌe paꞌekura. Ja ꞌekareje joni ura ijiru veje paꞌarehuni jihunaꞌe paꞌekura.  
\v 4 Godoni hura pavenahiꞌinakije ꞌÚ ja mweꞌa ikeꞌi napura vejujara rejuꞌe Godoni naka rejujaho ja pahene pakavo? Ijihuni hahi ea irara mweꞌakeꞌi napura vehuna ura renujaho hu ori vejuꞌe hu Godoni naka renuna.  
\v 5 Ú ja vwihajujaho Godoni irijara ꞌwaramujaho maa paꞌa majikari ꞌwarumu raka? Hu ꞌAvena kaꞌene núni vaji Hura vejue hinujaho ura rena paranu. Ijihuni maijaho Huni hura vehuna ura renu.  
\v 6 ꞌEnakaivo Hura maiji vwihaniꞌinijaho niꞌimaꞌura vajúhuna. Ijihunaꞌe ijaꞌinaꞌe ꞌwarumana.  
\q1 Godiho kehi kehi vejiꞌinijija ura parenu kaivo masuani ajuarasahe hijujihija maiji vwihaniujaho vajihiꞌina ꞌúmana.   
\p
\v 7 Ijihunaꞌe Godoni hari hiha. ꞌEꞌikaivo ꞌavena siseijaho roturahe vaꞌama.  
\v 8 ꞌEne Godoni nini roa paraha! ꞌEjakame Hu joni nini roa paranama. Sisea vejiꞌinakije joni ija sisea sove paranama. ꞌEne vwiha noꞌo noꞌuꞌinikije joni oja veje ariramaa rejava.  
\v 9 ꞌEne temukama paraꞌeje nirame joni sisea ijihunaꞌe veha. ꞌEne veje jara ijasahujaho taꞌarohe temukaꞌe renama. ꞌEne temarijaho taꞌarohe temuka rena paranama.  
\v 10 ꞌEne Natohwi jihuni unaꞌi ajuarasahe roakame Hura ja taꞌarorahama.   
\s1 Namahujihuni Jujuvuꞌa  
\p
\v 11 Vwehu nune ira kisina ꞌwame ninakaraviꞌina pareha! Ea irara huni vwea ira kisi niname ꞌee namahujaho hu varapiji niname ꞌee namaha avanu. ꞌEnakaivo ja varapiji namaꞌavajaho ja varapa ꞌararihaiꞌina pana kaivo ijí namahiꞌina.  
\v 12 Ea kwinu Huhusu Varapa vajihiꞌina ꞌee ꞌotua hejiꞌina. ꞌEne Hura Huhusu areri niꞌajihuꞌe maranie ꞌee ruarahuꞌe paꞌarejura. ꞌEnakaivo ꞌú a ea iranaꞌomo ea kaꞌene oni rori hinujaho namaho?   
\s1 Taꞌarosaravujihuni Jujuvuꞌa  
\p
\v 13 Iviamai ja ea kaꞌene ika ꞌwavujija roha. Iviasina ho niari nú vaꞌe ara kajino juara kwino hine kaukara vene monia rukina reja ꞌwavura.  
\v 14 ꞌEnakaivo a oni hiijara niari roe icháꞌinaꞌe rehunijaho maiꞌo pahena pakamu. Ja niareri ꞌimitiepo ajime sama navuraꞌomo tasioma vaꞌujaꞌina.  
\v 15 ꞌEnajihunaꞌe ja ikaꞌinaꞌe ꞌwahune saꞌinaꞌe avajura. Natohwijara ura reꞌamajaho nú hine ikaho vene ꞌee karaho vehuna ꞌwahune saꞌina.  
\v 16 ꞌEnavo a oni vwiha ijaꞌinijiꞌi jarika renujaho jarika kajaho sisea.  
\v 17 Ijihuni hahi ea irara ꞌunama arira iraka kaꞌene vehunijaho nihene kaꞌi kaivo ijija pavenujaho hununaꞌijaho hu sisea venuna.   
\c 5  
\s1 Kukua Rukinijihuni Jujuvuꞌa  
\p
\v 1 ꞌEnakúne ja ea kaꞌene uneunecha rukimaꞌurakije sisea kaꞌene joni haha ꞌahi reꞌi venujihunaꞌe iviamaa roe niramarume ꞌee úchia eha.  
\v 2 Joni kukua uneunechijija sakarasa raname ꞌee joni ateha tiriapo uhusa ranavara.  
\v 3 Joni korutia ꞌee siriva tihejara. ꞌEne ijí tiheja kajipo ja rone ꞌwarahuna. ꞌEne ijipo veje ja areri veni renau jaꞌinaꞌe renahuna. Ike vea túchamaa ikino ja joni uneunecha hine tamua vejara.  
\v 4 Heha! Ea kaꞌene oni juara meja jihipuni eha kaꞌene a pavajiꞌi ꞌuninamie hinujihunaꞌe pu ninamaꞌe hine ꞌumeju. ꞌEne ea kaꞌene juara savajipo hine emavajujaho ajime Natohwa Sapaoti kaꞌene uneunecha mahoꞌo ꞌAjohiꞌini jihuni ataa vaji arumu.  
\v 5 ꞌEnakaivo ja ikino mweꞌi hijujaho uneunecha mamaa ꞌee mapoka ani renavumakame ijihuni toi hami hine ꞌee joni hiijaho joni hahijara ura renajaꞌinaꞌe vejiꞌi hijara. ꞌEne ijihuni vei reje ꞌanihuni jihunaꞌe joni oja siseiji piravume emarejara.  
\v 6 Ja ea arimaa kaꞌene ja patanuꞌurihujaho namahe ꞌee ꞌanaume kwamana.   
\s1 ꞌUnama Icháꞌina Masuani Hine ꞌEe Siporua ꞌOhunijina  
\p
\v 7 ꞌEnajihunaꞌe vwehu nune masuani ajuarasahe hina vaꞌeje Natohwijaho roꞌamana. Ea kaꞌene juara ꞌojiꞌinijara huni uja mavarasaꞌina kaꞌene mweꞌa vaji irechavuꞌe navujipo nehi pine sonaꞌeje marasaꞌavarono masuani ꞌajiha hinujaho kaha.  
\v 8 Ja ꞌuꞌo masuani ajuarasahe joni oja veje harura renaꞌamana. Ijihuni maijaho Natohwijara rohuna nituranu.  
\v 9 ꞌEnakúne vwehu nune pasuꞌarame ninakaraꞌavara. ꞌEjakame ja panamaꞌavara. Heha! ꞌOtua hejiꞌinijaho vwicha jiamai naminu.  
\v 10 Vwehu nune areri poropetiepo Natohwi jihuni iha toi vejajaꞌinaꞌe siseisei hiꞌavajaho masuani ajuarasahe pura vene najaha kajaꞌinaꞌe hiꞌavara.  
\v 11 Heha! Ea kaꞌene kirasahe vaꞌujija nú punijihunaꞌe teamanuhuna. Jopura kirane vaꞌajaho ja nihejura. ꞌEne túnaꞌi roe icháꞌina kaꞌene Natohwijara venajaho nikavara. Natohwijaho nihoꞌo temuki rarejiꞌine ꞌee numisarai rarejiꞌina.  
\v 12 ꞌEnavo vwehu nune niꞌimaꞌurijaho akúpa ꞌee mweꞌa ho unenuꞌu pina paꞌurahiꞌi ichutoa pikiꞌavara. ꞌEnakaivo iꞌa ꞌiꞌi veꞌavajaho iꞌa ꞌiame ꞌee pana ꞌiꞌi veꞌavajaho pana ꞌiꞌavara. ꞌEꞌirakúne ja ꞌotua vaja panamiꞌavara.  
\v 13 ꞌÚ ja ea pina joni vaja ahijijiꞌi vi hino? Hu makaꞌeje siporua ꞌoꞌamana. ꞌEne ea irara oja sonama paraꞌeje hiꞌamajaho makaꞌeje javaa kaꞌene Godi taꞌarohujaho vejiꞌi hinama.  
\v 14 ꞌÚ joni vaja vi ea pina atami ꞌunaꞌejuꞌe hino? Ijinakú makaꞌeje sosi huni erutaꞌe ꞌwarave roa ꞌee makiꞌeje pu huni siporua ꞌonaha ꞌee Natohwi jihuni iha toi ꞌwerua ꞌonaha.  
\v 15 ꞌEne siporua kaꞌene nimaa rojiꞌi ꞌojujara reje ea kaꞌene atami ꞌunamujaho marahuna. ꞌEne Natohwijara veje ꞌurihuna. ꞌEne hu sisea venanaꞌe reꞌamajaho huni sisea vwihane areve paꞌarehuna.  
\v 16 Ijihuni hahi joni sisea ꞌwame nahatiꞌaraꞌavara. ꞌEne niꞌajarame siporua ꞌojakame ja maraniꞌamana. Ea kaꞌene arimai jihuni siporuijaho harura rukimaꞌure ꞌee maaru rejiꞌina.  
\v 17 Iraijaho emaa ꞌee huni kara ijaho núnijaꞌina kaivo hu siporua nimaa nimaijino neha papiꞌamarono ꞌojume mweꞌa neha papiꞌeme juara noꞌopisune ꞌee masapa iropune kwinu paꞌarejara.  
\v 18 ꞌEjume hu kúꞌo siporua ꞌojume ichutoa neha roe pijume mweꞌa ꞌiruma marasahara.  
\v 19 ꞌEne vwehu nune ei pini joni vaja kajino ꞌunama nimaiji areꞌikaꞌi vaꞌamajaho ei pini vaꞌe ahema apene roꞌamana.  
\v 20 Makaꞌeje ea kajaho hena kaꞌamana. Ea irara ea kaꞌene sisea vejiꞌiniji ꞌwaravuꞌe huni ꞌunama sisei jihuniji aremujaho hu huni ꞌavena kaꞌene kwahuni ꞌunamiji vaꞌajaho niꞌajahana. ꞌEne huni sisea mapokijaho vahamana.