\id COL - Ese (Managalasi) NT [mcq] -Papua New Guinea 1999 (web version -2014) 
\h Korasia 
\toc1 Korasia 
\toc2 Korasia 
\toc3 Kr 
\mt1 Korasia  
\c 1  
\s1 Vuꞌa Anejijihina  
\p
\v 1 Na Poru kaꞌene Jesu Keriso oni pwea Godoni ura ijino rejujara Timoti kaꞌene núni vweijiꞌi veju.  
\v 2 Godoni ehija akuaviꞌina ꞌee vwehu nuna kaꞌene Keriso oni vaji pauchaviꞌina kaꞌene Korasi hijujihi punaꞌe veju. ꞌEnakúne maiji vwihanie ꞌee vivinui matauma hijiꞌina kaꞌene Godi núni Omijihunaꞌi rena roajaho ja puꞌúmuna.   
\s1 Teimani ꞌWavuri Siporua  
\p
\v 3 Nú naꞌia mapokaꞌe siporua ꞌojujaho Godi Amo kaꞌene núni Natohwa Jesu Kerisoho jonijihunaꞌe teimani ꞌwavura.  
\v 4 Ijihuni maijaho Jesu Keriso oni vaji joni nimaaroa ꞌee jara Godoni ea kaꞌene akuaviꞌiniji oja mihuji henareꞌe avajura.  
\v 5 Ijihuni maijaho iraka kaꞌene ja nimaarojura kaꞌene akúpi ꞌahi navujiꞌina. ꞌEne nimarako ja vuꞌa nimaa kaꞌene vuꞌa maa maiuꞌina vajijino hejajina.  
\v 6 Ijí vuꞌa maiuꞌina kajara joni roajaꞌinaꞌe ꞌuꞌo ꞌeꞌune kwaa ararakino vaꞌe hine majaa ꞌina renu ꞌee rausahe emarenu. ꞌEne ni areri vea kaꞌene ja Godoni maiji vwihanie ijihuni nimaiji hene kavume renajaꞌinaꞌe renu.  
\v 7 ꞌEne ja Epaporasi naꞌi vuꞌa kajaho hene kavara. Hu nú puꞌúmo kaukara vejiꞌine ꞌee ea pina kaꞌene nú oja mahujina. Hu Keriso oni pwea pina kaꞌene núni ijihunaꞌe pauchaviꞌinijina.  
\v 8 ꞌEne jara Godoni ꞌAveni jihuni vaji ea oja mihujaho hura ꞌwarumana.  
\v 9 Ijihuni hahi nú ꞌuꞌo vea kaꞌene ijí hejaji rene ojuta pahweꞌi hine joni siporua ꞌona ꞌwaravakame joni henaka vaja areri rene ꞌee Huni ura ijaho hene ꞌee ꞌavena huni vwiha mahoꞌo hena kama parahuna.  
\v 10 ꞌEne ja ꞌunama mamaa kaꞌene Natohwiji ura renujaꞌinaꞌe one ꞌee Huni hura veꞌavara. ꞌEne kaukara mamaa kaꞌene ja vejujija ꞌina rukinaꞌe rene ꞌee Godoni henaka vajijino emareꞌavara.  
\v 11 ꞌEne ja Huni hanajiꞌina vajijino harura mahoꞌone ꞌee vivinui matauma hine ꞌee ata kairasahe hihunijaho ꞌekakame nihoꞌo temarijara joni vaji rarenaꞌe paraniꞌamana.  
\v 12 Nú Amo teimani ꞌwavujihuni maijaho Hu venume nú Godoni ea akuaviꞌina kaꞌene hanajiꞌini hijujihi puni aachijija ahuma ꞌekahuna.  
\v 13 Ijihuni maijaho Hu nú nututa huni ara kwaijino vahanume siriramúe ꞌekue Huni Hariha kaꞌene Hu oja mahujihuni ara kwai irechamúana.  
\v 14 ꞌEne Huni vaji nú kúꞌo ꞌimenue ꞌekuana ꞌee Huni vaji sisea vwihane arevume paꞌarenana.   
\s1 Keriso Oni Kara ꞌEe Huni Kaukara Icháꞌinijina  
\p
\v 15 ꞌEne Hu Godia kaꞌene nia pakaviꞌinijihu vareꞌine ꞌee maiꞌo uneunecha mahoꞌo reꞌavarono Hu amuraꞌe ijí hinajina.  
\v 16 Ijihuni maijaho uneunecha kivura ho pakivujaho mahoꞌo mweꞌa ꞌee akúpa ꞌahi navujaho Hura venana. ꞌEne Hura kiniepo ꞌajoahuri ara kwaa ꞌee ꞌajohaiꞌina ꞌee Huni harura hari hijujija irechamie ꞌee uneunecha mahoꞌo kija Hura venarena Hunaꞌe venana.  
\v 17 ꞌEne uneunecha kija mahoꞌo parejiꞌini Hu iji hinana. ꞌEne Hura uneunecha kija mahoꞌo ꞌuninamiuꞌe ahuma navu.  
\v 18 Hu ꞌuꞌo sosia ikehuni húmata ꞌee sosijaho Huni haha. Hu uneunecha mahoꞌo ikihi puni húmata. ꞌEne Hura amura kwama ꞌurinana.  
\v 19 Ijihuni maijihunaꞌe Omaha teamavume Huni kara ijaho mahoꞌo Keriso oni vaji namu.  
\v 20 ꞌEne na Huni vaji ꞌwaravu. Godiho uneunecha mahoꞌo kehi puꞌúmo ꞌunama vene kúꞌo napura venana. Huni ꞌaa kaꞌene korosia ꞌahi hirama arihajara uneunecha mahoꞌo kaꞌene mweꞌi navura ho akúpa ꞌahi navujija venaue matauvu.  
\v 21 ꞌEne ja nimarakuꞌijaho apiora ꞌee nakaꞌe rene vwiha sisea vwihane sisea vejiꞌi hijara.  
\v 22 ꞌEnakaivo Hura hahijiꞌi kwamana vajijino ja venaume ꞌunama Hu huꞌúmo napura vejara. ꞌEnarena aherume roe Godoni unaꞌi irechamiuꞌe ja iviꞌa akuaviꞌinaꞌe ꞌee panamahiꞌina ꞌee nihoꞌo sisea pina paꞌanaꞌe namiju.  
\v 23 ꞌEnakúne ike nimaaroakaho hena vene ꞌee ija kisi ꞌuname namiha. ꞌEne ja pakiꞌeje vuꞌa maiuꞌina kara iraka kaꞌene rehuna ꞌwaravume hejaji raname arema vaꞌava. Ijihuni maijaho ike vuꞌa mamaa maiuꞌinakaho kwaa ara mapoka kaꞌene ike akúpa hari navukipo heꞌavarono ꞌwaravara. ꞌEnajihunaꞌe na Poruho ijí veꞌurono iji pijihana.   
\s1 Porura Sosihuni Pwea Rene Kaukara Venajina  
\p
\v 24 Na teamanimu jihuni maijaho na jonijihunaꞌe haha hianimu. ꞌEne Kerisora Huni haha kaꞌene sosijihunaꞌe sisei hinajihuni pwina ijaho nara sisei hijuꞌe paꞌarenu.  
\v 25 ꞌEjume Godira kaukara kaꞌene sosiaꞌe ꞌajoahe ꞌee Godoni ira mahoꞌo niꞌajihe najaꞌurono iji pijihana.  
\v 26 ꞌEne nitama rene juara juara paꞌarene ꞌee ea tuama apene roajaho hema kaho pavejume samaahiramana kaivo iviamaa Huni ea akuaviꞌinijihi najahana.  
\v 27 Ijihuni maijaho Godoni ura ijaho uneunecha mamaa kaꞌene ike hema vaji navujija veje Jenitaru hena kahuna. Ijí hema kajaho Keriso kaꞌene joni vaji hinujina. ꞌEne nimaa rojiꞌinijija. Huni mamaijaho túnaꞌi ꞌekahuna.  
\v 28 ꞌEne nú ichihichano vaꞌujaho Keriso rone ea mapoka ꞌwaravu. Nú pu niꞌajihe ꞌwarame ꞌee vwiha mamaiji najahura. Ijihuni maijaho nú ea kwinu kwino Keriso oni vaji marana areri rena paraꞌeje vajahuna.  
\v 29 Na ꞌuꞌo ikehuni maijihunaꞌe kaukara nihoꞌo kisinaꞌe Huni harura natohwa kaꞌene nuni vaji namujara veniuꞌe veju.   
\c 2  
\p
\v 1 Jaa ꞌee ea kaꞌene Reatasia hijura ꞌee ea mahoꞌo kaꞌene nuni urania pakaviꞌini jihipuni jihunaꞌe oja niꞌimaꞌura hejuji na ura ja hehuna ura reniu.  
\v 2 ꞌEjakame puni ojijija niꞌajihuna. ꞌEje oja ꞌekaravuri vajijino ahuma parahuna. ꞌEjakame uneunecha kaꞌene mahoꞌo hena kavura ꞌee henaka kaꞌene nimaa Godoni hemiji hena kahuna. Ijaho Kerisona.  
\v 3 Huni vaji vwiha mavarasaꞌina arira ꞌee henaka mahoꞌo rinamiuꞌe navu.  
\v 4 Na ijaꞌinaꞌe ꞌwaravu jihuni maijaho ea ꞌahoꞌapo vuꞌa iraꞌatijino pisimisave ja nimaa vena veꞌavarono ꞌwaravu.  
\v 5 ꞌEne hahijaho na ijaho pahiju kaivo ꞌavena vajijaho na ja puꞌúmuna. Jara mamaaꞌe ojono ꞌajoꞌarame ꞌee Keriso nimaa rojuji kirasaha paraju jihunaꞌe teamanimu.   
\s1 Hia Kaꞌene Keriso Oni Vaji Marana Parahunijina  
\p
\v 6 ꞌEnakaivo ja Jesu Keriso kaꞌene Natohwiji apejarakúne Huni vaji ꞌurahoꞌavara.  
\v 7 ꞌEnakúne Huni vaji chinuma same emarena ajiꞌavara. ꞌEne ja najahe ꞌwaravume hejajaꞌinaꞌe joni nimaa roijaho veje kisinaꞌe rena paraꞌavara. ꞌEne temari ituꞌona paraniꞌeje oꞌavara.  
\v 8 ꞌEne paveje emaapuni vwiha ꞌee vuꞌa maa paꞌajipo pisimie ꞌee emaapuni tamana ꞌee mweꞌa kehuni ꞌunama ani aniꞌina najahe ꞌwaravujipo pisimie ani ruvaꞌava. Ijihuni maijaho ijí ꞌunama kajija Keriso oni ꞌunama pana.  
\v 9 Hura haha kaꞌene apenana vajijino Godoni kara ichaꞌinijaho mahoꞌo Huni vaji navu.  
\v 10 ꞌEne Huni vaji ja mahoꞌo ni areri renaana. ꞌEne Hu ea mahoꞌo ꞌajohaiꞌine ꞌee harura mapokijihi puni húmata.  
\v 11 ꞌEne Huni vaji ja ꞌuꞌo sisa ꞌuhuahara. Sisa kaꞌene emaapo iji ꞌuhuahujaꞌina pana kaivo sisa kaꞌene Kerisora ꞌuhuahajaho sisei jihuni kara ijí ꞌuhuana.  
\v 12 Hua mweꞌi vaji apúsavume ꞌurina jaꞌinaꞌe ja ꞌuꞌo pu puꞌúmo toi samaume ꞌurijara. ꞌEne Huaꞌe nimaa rojari vajijino Godira Huaꞌe kwamana kaꞌene vejume ꞌurina jaꞌinaꞌe ja ꞌuꞌo venaume ꞌurijara.  
\v 13 Vea kaꞌene ja joni sisea vajijino kwamasahe ꞌee sisa paꞌuhuari vajijaho Hura núni sisea mahoꞌo vwihanúe arevume paranana. ꞌEꞌikaivo venume ꞌurine pu puꞌúmo maiꞌo hiju.  
\v 14 ꞌEne núni chimua ꞌee varapijara núaꞌe ninamuꞌe ruruhajaho Hura ꞌeka ruvaꞌe korosi ꞌahi ꞌaniume parajara.  
\v 15 Hura ꞌajohaꞌina ꞌee harura mamaꞌina sisesa ijija Huni vaji korosia ꞌahi eriri samaumai túa vetie venaume harura paꞌarenaana.  
\v 16 Ijihuni hahi paveje ea pina joni ꞌirumijihuna ꞌee toijihuna ꞌee sora ijuri vea ꞌee masapa maiuꞌina huna ꞌee Sapatia huni vea panamahiꞌinaꞌe reꞌamana.  
\v 17 Ikija raka kaꞌene maiꞌo rohuni jihuni ꞌavena kaivo nimaijaho Keriso ona.  
\v 18 Ja pakiꞌeje ea ꞌahopo ja pisimisave joni haha ruarahe ꞌona ojiꞌina oja mihunaꞌe ꞌwarame visoni toi namujiꞌi ike veha ꞌiame ꞌejahie ꞌee puni vwiha ijí ani ani kehi kehi vejiꞌi ꞌwaravakame joni eha kaꞌene ꞌekahunijihi areꞌejakúne hena pavanamiꞌavara.  
\v 19 ꞌEnakaivo pu húmati rene ihena roe haha mahoꞌo kaho niꞌajahuna pana. ꞌEnavo nú Huni haha ꞌahi tanuka ꞌee chinumijipo roe ihenuara. ꞌEnajihunaꞌe harura kaꞌene Godoni rena roujara harura múhe niꞌajúhuꞌe emareju.   
\s1 Kwamasaharaꞌe Kerisoꞌi Puꞌúmo ꞌUrina Hijujina  
\p
\v 20 Ja Keriso oni vaji mweꞌa kehuni ꞌunama ani aniꞌina kaꞌene najahujija nikwamasahume paranana kaivo ja irakijihunaꞌe mweꞌa kehuni varapa hara kúꞌo hijo? Ijija ikehina.  
\v 21 Ikaho paꞌuniraꞌavara. Ikaho paina heꞌavara ꞌee ikaho pavwenaꞌavara. Ikaho paina heꞌavara ꞌee ikaho pavwenaꞌavara.  
\v 22 Ijaho emaapo ꞌwarume najuha jihunaꞌe nú ikehi ꞌeke veꞌavajaho paꞌarehuna.  
\v 23 Ike varapa ikija nimaa punaꞌi rehuna. Ijihuni maijaho puni oja vwiha ijija niijihi miha parane ꞌee haha puna ruarahe siseꞌi ꞌahiura. ꞌEnakaivo ijipo puni vwiha sisesa kaꞌene itunavujihi niꞌajihuna pana.   
\c 3  
\p
\v 1 ꞌEjume ja Keriso puꞌúmo ꞌurijaraꞌe reꞌavajaho uneunecha kaꞌene akúpi ꞌahi Hunijiru saraꞌavara. Ijihuni maijaho ijino Kerisoho Godoni ija manaꞌinijaꞌi asuma hinuna.  
\v 2 Joni vwiha ijaho uneunecha kaꞌene ichutohuneru vwihaꞌavara. ꞌEꞌikaꞌi mweꞌa kehuni uneunechijija pavwihaꞌavara.  
\v 3 Ijihuni maijaho vea kaꞌene ja kwamasahajino Godoni vaji joni hiijaho Kerisoi puꞌúmo apúrinanamiuꞌe namu.  
\v 4 Vea kaꞌene Keriso núni hiijara roe samaahiraꞌamajaho ja ꞌuꞌo pu puꞌúmo Huni mamaa ijihuni vaji samaahirahuna.   
\s1 Hia Tamana ꞌEe Hia Maiuꞌina  
\p
\v 5 Ijihunaꞌe joni haha pwinanaꞌa vaji ꞌuasa vehuni ꞌunama ꞌee huricharame ꞌee sisea vehuna ura renae ituname ꞌee jajaso uneunecha rukinaꞌe rehuna itunavura kaꞌene joni vaji navujija ꞌanie kwamasaꞌavara. Ijipuhipo joni godi iraꞌatijaho rejukúne ꞌania kwamasaha!  
\v 6 Ijihuni maijaho ike uneunecha ikipo reje Godoni sena rohuna.  
\v 7 ꞌEne kúꞌo ꞌunama ikija nimarako ja ijihuni vaji hine ꞌee ojara.  
\v 8 ꞌEnakúne ꞌunama ikija ꞌuꞌo areꞌavara. Ajira ꞌee sena ꞌee ea siseꞌi ꞌahiꞌi ura renaura ꞌee vuꞌa iraꞌatijino ea ꞌahopuni hia ruarahura ꞌee ira sisea kaꞌene joni ira vaji roe usevujija areme areꞌavara.  
\v 9 ꞌEne ja iraꞌata paapene pisivaraꞌavara. Ijihuni maijaho ja joni kara sahasijaho ni areme ꞌee ijihi vejiꞌi hijujija ni arevara.  
\v 10 ꞌEnakaivo ja iviamaa kara maiuꞌini savara. ꞌEnaꞌomo ike kara maiuꞌinakaho Venina kaꞌene ijí venajara Huaꞌina reꞌavarono majaa vejuꞌe maiuꞌina rejaraꞌomo roe mahoꞌo Huaꞌinaꞌe rehuna.  
\v 11 ꞌEne ike kara maiuꞌinakaho a ea irakijaho hu patahu. Areri Kurikia ho a Jua ho a sisa ꞌuhuaꞌina ho paꞌuhuaꞌina. ꞌEne a pahena pakaviꞌina ho Sitiani kaꞌene ea mají ꞌanikuviꞌina ho a pwea ho a pwea pana kaivo Kerisoho ea mahoꞌo ikihi puna. ꞌEnaꞌomo Hu ea mahoꞌo kehi puni vaji hinu.  
\v 12 ꞌEnajihunaꞌe ja ea kaꞌene Godira akuaviꞌina ꞌee oja mihe iji pijihakije oja kaꞌene ea ꞌahoꞌa kime temukame ꞌee epunaꞌi mamaaꞌe vene ꞌee epuni hari hijura ꞌee ea ajuarasahiꞌina rene masuani hijuri ojijino saha.  
\v 13 ꞌEne matausahe niꞌajarame ꞌee vwihana arekarame ꞌee ea ꞌahopo chicha vene sua heꞌavajaho areri Natohwijara ja vwihanie arema jaꞌinaꞌe vwihana areꞌavara.  
\v 14 ꞌEne oja ꞌekaravujara kara ikija asitahana. Ijihuni maijaho ijara venaue ea ahuma hami hijura.  
\v 15 ꞌEne veje Keriso oni matauviꞌinijara joni oja ꞌajohaꞌamana. ꞌEne ijihunaꞌe ja haha kwino rene matauma hiꞌavarono nimaa iji pijihanakúne teamanaꞌeje hiha!  
\v 16 ꞌEne veje Keriso oni irijara joni vajijaho mahoꞌo tinia apenama. ꞌEje ja ira kajara vwiha mamaa najahe ꞌee niꞌajaꞌaraviꞌi Samusi vaji javaa vene ꞌee Godi taꞌarohuni javaa vene ꞌee ꞌAvena huni javaa vene ꞌee joni oja vaja temari rarenaꞌeje Godoni javaa venaꞌavara!  
\v 17 ꞌEnajihunaꞌe ja uneunecha irakaꞌe ꞌwaꞌeja ho veꞌavajija mahoꞌo Natohwa Jesuni iha ꞌahi veha ꞌee Huni vaji Godi kaꞌene Amoho teimani ꞌwaꞌavara!   
\s1 Kachiꞌinapo Hia Maiuꞌina Vaji Icháꞌina Hihunijina  
\p
\v 18 ꞌEnakúne napahwahe paruhu jopuni hari hiha. Ijaꞌinaꞌe vejujara Natohwijaho teamamuna.  
\v 19 ꞌEne paruhwahe napahu jona oja miha ꞌee pasiseꞌi ꞌahie venae temukava.  
\v 20 ꞌEne sesamae uneunecha mahoꞌo ja vejujaho emahu jopuni ira hene veꞌavara. Ijihuni maijaho ijara Natohwijaho teamamuna.  
\v 21 Omahwahe ja pakiꞌeje veje sesahu jona ajiname oja vaja areri parenaꞌama.  
\v 22 ꞌEne pwee joni mamaꞌina kaꞌene iki mweꞌi hijujihi puni ira hene veꞌavara. Ja pakiꞌeje joni mamaꞌinapo kihuni jihunaꞌe puni nia aharu kaukara veꞌava kaivo joni ojijiꞌi Natohwiji juhaviꞌi veꞌavara.  
\v 23 ꞌEnajihunaꞌe ja uné rakaꞌe veꞌavajaho ojijiꞌi veha. Areri ja ojijiꞌi Natohwi jihunaꞌe venaꞌava jaꞌinaꞌe emaapunaꞌe venahu paroꞌavara.  
\v 24 ꞌEnajihunaꞌe ja nihena kavujaꞌinaꞌe Natohwi jihunaꞌi ja aachijija eha vene ꞌekahuna. Ijaho ja Natohwi jihunaꞌe venahe avaju.  
\v 25 Ea kaꞌene sisea venujaho hura sisea kaꞌene venujihuni eha ijaho apehuna. Ijihuni maijaho Godiho Hu ronu kwino parehuna.   
\c 4  
\p
\v 1 Pwea puni mamaꞌine pwehu jona arira ꞌee mamaa ꞌahiꞌavara. Ijihuni maijaho ja niheju. Ja ꞌuꞌo joni Niꞌina kahi akúpi ꞌahina.   
\s1 ꞌUnama Icháꞌina Siporua ꞌOhune ꞌEe Kara Icháꞌina Hihunijina  
\p
\v 2 ꞌEnakúne siporuaꞌe ꞌoja maha paranareje hami ꞌajoaraviꞌi teimani rojiꞌi ꞌoꞌavara.  
\v 3 ꞌEne núni siporua ꞌuꞌo ꞌonuꞌavara. ꞌEjakame Godira ira ikehuni vwicha núna jaraakame nú Keriso oni hemijaho areri ꞌwaraꞌavara. Na ꞌuꞌo ijihunaꞌe tipurai hiju.  
\v 4 ꞌEjakame na hemijaho veje samaaꞌe reꞌeje nara ꞌwarahuni jaꞌinaꞌe ꞌwarauta.  
\v 5 ꞌEne ea kaꞌene samai hiju jihipuna vwiha mamaiji vwihajiꞌi ja iraka kaꞌene veꞌavajija hami veꞌavara. ꞌEne vea mamaa apeꞌavajaho vea kajaho hami apeꞌavara.  
\v 6 ꞌEne veje joni vuꞌa iraka kaꞌene ꞌwaꞌavajija naꞌia mapoka maiji vwihaniuji misa punaꞌi save vwea reꞌeje ꞌwaravakame jara icháꞌinaꞌe pu eha vetihunijaho ja hena kaꞌavara.   
\s1 Túchamaa ꞌAjoramajina  
\p
\v 7 Tichikasi kaꞌene núni vwea nú oja mahiꞌina ꞌee uchaha paꞌana kaꞌene Natohwi jihuni pweijara nuni vuꞌa icháꞌinijija apena vuꞌe ꞌwarahuna.  
\v 8 Ijihuni hahi jihunaꞌe na hu ranavuꞌe vuꞌu. ꞌEjakame núra icháꞌina kaꞌene hijujaho ja hena kúme ꞌee hura vuꞌa niꞌajihe ꞌwarave joni oja sonahihuna.  
\v 9 Onesimasi kaꞌene núni vwea nú oja mahiꞌina kaꞌene uchaha paꞌajiꞌi huꞌúmo ranavuꞌe rou. Hu joni ea pinaꞌomo pura roe ꞌunama mahoꞌo kaꞌene ikino rejujija ꞌwarahuna.  
\v 10 ꞌEne Arisitakasiho na huꞌúmo tipurai hinunaꞌomo ijara ja ꞌajoramu ꞌee Panapasi oni vwina Maka kaꞌene ja hununaꞌi vuꞌa ꞌahoꞌa hejajara joni roa kaꞌavajaho ꞌajome ꞌaheꞌavara.  
\v 11 ꞌEne Jesu kaꞌene Jasitasina ꞌwavujaho ꞌee ea ikipo pupuso Godoni arijihuni kaukara vejiꞌina kaꞌene sisa ꞌuhuaꞌini jihipuni vajijaho rena roara. ꞌEne pu na areri niꞌajihume kivuta.  
\v 12 Ipaparasiho joni ea pina kaꞌene Jesu Keriso oni pwea pinijara ja ꞌajoramu. Hu naꞌia mapoka jonijihunaꞌe siporua nimaijino ꞌonuna. ꞌEjakame ja kirasahe Godoni ura ijija mahoꞌo hene kime areri renahuna.  
\v 13 Ijihuni maijaho na hu hena kavujaho hu joni oja niꞌimaꞌuraꞌe vwihaniuna. ꞌEne ea kaꞌene Reatisia hijura ꞌee Haiaraparisi hijujija ꞌuꞌo oja niꞌimaꞌuraꞌe vwihaniuna.  
\v 14 Ruku kaꞌene núni juketa nú oja mahiꞌinijara ꞌajoravuꞌe ꞌee Timasi ꞌuꞌo ꞌajoramu.  
\v 15 Vwehija kaꞌene Reatisia hijujija ꞌajorame ꞌee Nemipaho ꞌee sosia kaꞌene huni sei ahuvujija ꞌajoraꞌavara.  
\v 16 Vea kaꞌene asura ike joni vaji tahe paꞌareꞌamajaho Reatisia sosia vaja ꞌuꞌo taꞌavara. ꞌEne joni vea rejakaviꞌi nuni asura kaꞌene Reatisia rena rouji taꞌamana.  
\v 17 ꞌEne Achipasi ꞌwaraꞌavara kaukara kaꞌene hura Natohwi jihuni vaji apenajaho hami naꞌia mapoka veꞌamana ꞌwaꞌavara.  
\v 18 Na Porura nuni iji ike ꞌajoravujija veju. ꞌEnakúne na tipurai hijujaho vwihaniꞌavara. ꞌEne maiji vwihaniujaho ja puꞌúmuna.