\id 2TI - Matés NT -Peru 2008 (DBL -2013) 
\h Timoteyon Iste 2 
\toc1 Timoteyon Iste 2 
\toc2 Timoteyon Iste 2 
\toc3 2Tim 
\mt1 TIMOTEYON ISTE 2 
\c 1  
\s1 Tauamboen Timoteyo chiaid 
\p  
\v 1 Pabado nebi. Nuquin Papan tantiacpadomboen Esuquidistun: —Ëbi chuibeneta —caidquio nebi. —Ambi chiampicpadomboen aton Mado Esuquidistu tantiaquid unësacsho Nuquin Papan abëdi tabadmendac —quequin Esus chuibenequidquio nebi.  
\v 2 Con mado icbobimboecquid mibi neque. Mibi chuiquin nëid dada uanu, Timoteyo. —Nuquin Papan aton Mado Nuquin Icbo Esuquidistubëdtan bëdamboen isquin bëdambo icmepashun —quequin mibi tantiembi. 
\s1 Chieshtoenquio icquin Esus chuiban, quiaid 
\p  
\v 3 Con tsusedpabon nacpadomboen Nuquin Papauidi tantiaquin ambi chiacpadomboen natiadquio iquebi. Adquid icquin Nuquin Papa mibi chianembi. —Mibi tantiaquid Timoteyo bëdambo iquec, Papa. Adquio icmec mibi bëdamboshë iquec. Adquiouidi icmeta, Papa —quequin Nuquin Papa chianembi.  
\v 4 —Ëbi nidnu —quesho tantiash mibi shubiondaid tantiec mibi iste bunquiebi, mado. Ambo nidash mibi isec cuishonquetsiabi.  
\v 5 Naden mibi tantiembi. —Aton chichi Doida caidën ani Eunisebëdtan aid daëdshumba Esus tantiabenquiacpadomboen Timoteyontsen nëbi Esus tantiaquiec —quequin mibi tantiembi.  
\v 6 Adquid icsho mimbi tantiondaid padpiden mibi chuinu. —Min Mayan nëidbëd tabadmequin cuesambo icmequin Esus chuibame, Papa —quequin mibi mamishquin Nuquin Papa chiondambi. Adoac aton Mayan mibëd tabadmiac. Adoaid icquin dacuëdenquio icquin Esus chuibanta, mado.  
\v 7 ¿Nuquin Papan aton Mayan nuquibëd icmiacta nuqui natia dacuëdpe? Padenquio. Comapenen tantiaquid yec nuquibëd icquin nuqui cuesambo icmec. Adembidi Nuquin Papan Mayanën tantiamiac nuqui matses bëdamboen tantiec. Adembidi nuqui icsate bunaid namenquio icquin mëmunquidquio icnuc nuqui bëdambo icmec. 
\p  
\v 8 —Adoaid nebi —queshun dacuëdenquio icquin Nuquin Icbo Esus chuibanta. Adembidi dacuëdenquio icquin: —Pabado tantiaquiembi —cata. —Quënën nauedtsaid Pabado tantiatiapi —quenda. Utsibon cuestiadquio icquin chieshënaqui Nuquin Papan namiacpadec chieshtoenquio icquin Esus chuibanuna.  
\v 9 Nuquin Papan: —Bëdamboec tabadquid icmequin con Mado Esus tantiamembi —caido icquin adonona. ¿Nuqui bëdamboecuidi tabadshoda Nuquin Papan nuqui bëdamboen isbempondash? Padenquio. Ëndenquimboshë nidaidbëdta matses uabi Nuquin Papan: —Ëmbi chiaid niac-niaquec icsambo icboedëmbi con Mado Esus tantiasho cuidenquio iquendambi —quequin ambi chuipampicpadomboen nuqui Esus tantiamiac.  
\v 10 Aden ambi chuipampid tantiamiabi icshumbic nëbi Esuquidistu matsesmeshun matses tantiamiac. Adoac: —Abi tantiaquid unësacsho icsaido cuidacno nidmenquio icquin unëstiapimbo icquid icmequin Nuquin Papa yacno abëdi Esuquidistun tabadmendac —quequin nuqui tantiec.  
\v 11 Aden tantiaquin Esus chuibenequidquio nebi. —Ëbi chuibeneta —Esusën caondaid yec Nuquin Papabëdta Esus tantiamequidquio nebi.  
\v 12 Aden chuibeneshobini chieshënquin quënën nauedondash. Adoaqui chieshtotiapimbo icquin Esus tantiembi. —Ëmbi tantiaidquio comapenen tantiaquin nabanquidquio Esus nec. Adquid icquin: “Ëbi tantienquio yanushe,” queshun abi tantiamequin ëbi chieshtomenquio iquendac. Nidaidën choabi icquin Esusën ëbi chieshtoenquio icquid icmendac —quec dacuëdenquio iquebi.  
\v 13 Tantia, mado. Mibi chuinu. Ëmbi abimbo chiondaidquio chuiban: —Nuquin Papan chiaidquio nec —queshun. Esuquidistu tantiaquinc matses tantiaquinc caquin adenuidi chuibanta, mado.  
\v 14 Nuquin Papan Mayan nuquibëd iqueque. Aidën namiac ëmbi chiondacpadomboen Nuquin Papan chiaidquio chuiquin Esus chuibanta, mado. 
\s1 Onesipodo chiaid 
\p  
\v 15 Ëmbi: —Cho —cac choenquio icboed mimbi tantiac, mado. Nidaid utsi Asia caid yacnocquido dadpen adec choenquio iccosh. Edemoquenes caid choenquio iccosh. Adecbidi Piquedo caid chedo.  
\v 16 Onesipodo caidën nëbi bëdamboen isposhi. Ëbi quënën nauedacsho dacuëdenquio icquin isuan-isuanquin bëdambo icmioshi. Adsho isun: —Aton shubun icquidobëdta aid bëdamboen ista, Papa —quequin Nuquin Papa chianembi.  
\v 17 Aidëmbi nëmbo shubu dadpen icquid Doma caid yacno choboshon: —¿Mitsimbo Pabado icpec? —quequin yuen nibëmbenequin istuidpondashi.  
\v 18 Mimbi isnubi Epeso yacnoshon aidëmbidi baded-badedquien nashundeniondashi. Adsho tantiashun: —Nidaidën padpidec choshon Nuquin Icbon Onesipodo bëdamboen ispashun —caimbi. 
\c 2  
\s1 Chieshtoenquio icquin chuiban, quiaid 
\p  
\v 1 Chieshtoenquio icquin Esus chuibanta, mado. —Esuquidistun ëbi bëdamboen isec. Aidën bëdambo icmiac dayacquio icquin naimbi —queshun chieshtoenquio icquin Esus chuibanta.  
\v 2 Matses dadpenshun tantianuc ëmbi chuibansho mimbi tantiondac. Ëmbi aden chiondaid utsibotsen chuiban. Adshun mimbi chuiboedo abentse-abentsen chuita. —Nëidën chieshtoenquio icquin Esus chuibantsiash —queshun: —Mimbitsen chuiban —cata, mado.  
\v 3 Sondado bëdambo icquidën nacbimboen chieshtoenquio icquin bëdamboen nabanuna. Matsesën chieshënubi Esuquidistun chiacpadomboenuidi nanuna chieshtoenquio icquin.  
\v 4 Sondadon: —Mibi bëdambo iquec —camenuen aton chuiquid dapan chiacpadomboenuidi naquid. Ambi tantiaid nainquio icquinc utsibon chiacpadomboen nainquio icquinc caquin aton chuiquid dapan chiacpadomboenuidi naquidquio sondado nec. Adomboembidi Nuquin Icbon chiacpadomboenuidi nanuna, mado.  
\v 5 Ma nuquin matses titinquequidquio. ¿Mitsipadquio icpec? Aton uidën tanec aton matsesën chiaction abia titinquec chosho: —Bëdamboec titinquiosh —queshun mauete menequid. Ambi chiaction titinquiabi icsho mauete menenquio icquid. Adembidi: —Mimbi bëdamboen naoc —Nuquin Icbo camenuen ambi chiacpadomboen chieshtoenquio icquin nabanuna, mado.  
\v 6 Ma nuquin matses tied uaquidquio. ¿Mitsipadquio icpec? Chonoadquidënquio dayacquio icquin aton tied uashun ambi nitsinaid pequid. Adembidi Esus chuibanquid icquin dayacquio icquin Esus chuiban-chuibanuna ënenquio icquin. Adoac utsibon Esus tantiabentsiash.  
\v 7 Aden ëmbi chuiboed tantiata. Adsho Nuquin Icbon mibi bëdamboen tantiametsiash. 
\s1 Esuquidistu tantiata, quiaid 
\p  
\v 8 Utsibon chieshënubi Esus tantiata, mado. Aidi matsesash isadaidbo tsusedpa Dabidën tsyuecquid nepanëdash. Nuquin Papan uincuemenëdaidquio yec abi iquec. Aidquio tantiaquiota. Aid chuibenequidquio nebi.  
\v 9 Aden chuisho chieshënquin bedshun icsambo icquid uidën uacbimboen shocosh nacnenaidën mëtaniac mëyadebi. ¿Ëbi aden uidën uacbimboenda Nuquin Papan chiaid uidën uapadic? Padenquio. Ëmbi chuibenetiapimbo icnuc Nuquin Papan chiaid chuibanquido utsibon adembidi chuibenendac.  
\v 10 Adnubi: —Aden Nuquin Papan ambi tantiactedi Esuquidistu tantiamendac. Aid tantiaquido unësacsho cuidenquio icquin abëdi tabadmendac —quec chieshtoenquio iccobi quënën nauedondaid yequi.  
\v 11 Naden abimbo chiaidquio tantiash chieshtoenquio iccobi. 
\q1 —Abi bunaid ënshun Nuquin Icbon chiacpadomboen naquid chieshëmënquidën unës uacsho Nuquin Icbon abi yacno abëdi tabadmendac. 
\q1  
\v 12 Utsibon chieshënaqui chieshtoenquio icquin Esus tantiec unësash abi yacno nidendac. Nidacsho chuiquid icmiac utsibo namendac. 
\q1 “Esus tantiatiapimbo iquebi,” quequidobic: “Ëmbi tantiacmaido neque. Nëid nuquibëdi tabadmenquien ictiad, Papa,” quequin Esusën Nuquin Papa chiendac. 
\q1  
\v 13 Aden abi tantiesabon ambi chiaid niac-niacsho isun Nuquin Icbo Esusën ambi chiacpadomboen naquidquio icquin icsaido cuidendac. 
\q1 Adembidi ambi chiacpadomboen abi tantiaquido bëdambo icmendac 
\m —quequin chiaid tantiashun ambi chiacpadomboen naquin Esusën naid chuibanuna chieshtoenquio icquin. 
\s1 Nuquin Papan chiaid isbanta, quiaid 
\p  
\v 14 Ëmbi dada uaquin chuiboed mibëd icquido naden chuibanta, mado. —Nuquin Icbon nuqui isnubi Esusquio chienquio yec ambembi chiaid chiec mibi chushcananquieque. Adenda. Adec chushcanansho tantiash matses icsambo yaneque. Padi —cata, mado.  
\v 15 —Mibi bëdambo iquec —Nuquin Papa camenuen bëdamboen nata. —Dacuëdtiapimbo iquebique. Ëmbi naid ma Nuquin Papan isnu —queshun adota. Ambi chiaid bëdamboen isbanshun chieshtoenquio icquin Nuquin Papan chiaidquio chuibanta, mado.  
\v 16 Ambembi chiaid chuiquidobëd onquec tabadenda. Adec onquequido icsambo icboedi buëdanquiec Nuquin Papan chiaid niac-niaquec icsamboshë yaneque.  
\v 17 Tosho bedacbimboec adquidën chiaid tantiaquido dadpen yaneque. Adquidën chuisho tantienda. Aden chuiquid Imeneyo caid nec. Adquidbidi Pideto caid nec.  
\v 18 Aidon Nuquin Papan chiaidquio chienquio icquin muaquin chiec. —Esus tantiaquido unësabi icquido nëbimbobi uincuenacbimboec icpec. Unësacsho aton dada chuca uaquin uincuemenquio iquendac —quequin muaquin chuisho tantiashun utsibon Nuquin Icbon chiaid tantienquio yanac.  
\v 19 Aidon Esus tantiabien icchitash. Nuquin Papan Esus tantiamiac ënenquio icquin Esus tantiatsempanëdash. Padnuc Esus tantiaquidombo dadpen iquec. Adquido chuiquin ambi dada uamepampicpadomboen: “ ‘Ëbi tantiaquidombo nec,’ quequin Nuquin Icbon tantiec.” Adnuc Esus tantiaquidën: —Con Icbo Esus nec —queshun ambi icsamboen naid ënendac. 
\p  
\v 20 Esus tantiaquido nadquio iquec. Shubu dapan tsitsan tabëcaid tabadacbimboecquid nec. Tsitsan abentse-abentsec icsactsëcquio icnubi utsi-utsiec bëdambo iquec. Icsactsëcquidën icsa secanun sandoquid yendac. Bëdambo icquidën di nandoquid yendac. Adecbidi Nuquin Papan shubun tabadtequido iquec. Utsi-utsiec Nuquin Papan chiaid natiadquio yec Esus tantiaquidquio icnubi utsi-utsiec abi icsaid ënabi: —Esus tantianu —quetsëcquid iquec.  
\v 21 Esus tantiaquidquio ictiadquio yec: —Muaid chuisho tantiatiapimbo icquin nëbi Nuquin Icbon chiacpadomboen natiadquio iquebi —quiash Nuquin Icbon yuambo yantsiash. Adsho Nuquin Icbon bëdamboen nametsiash. 
\p  
\v 22 Caniabon mëmunenquio icquin abi bunacpadomboen naquid tanenda, mado. Adenquio yec bëdamboec tabadte bunquiota. Nuquin Papan chiaid niacte bunenquio yec: —Nuquin Icbo Esus nec —quequidobëdtan chieshtoenquio icquin Esus tantiata. Matsestsen tantiec bëdamboec isnanec bëdamboec tabadta.  
\v 23 Mibi yacnoshon ambembi chuiquidon: —Mimbi icsamboen tantiec —canuen: —¿Mitsipaden mimbi tantiape? —cac chienda. Adquidën chuisho tantiash matses chushcananondashe. Aidën chiac chienda.  
\v 24 Nuquin Papan chiaid chuibanquid chushcananenquio icquid nendac. Chieshëmënenquio icquin aton matses bëdamboen isquid nendac. Adembidi nëishënenquio icquin Nuquin Papan chiaid tantiamequid nendac. Utsibon chieshënaqui chieshënanenquio icquid nendac.  
\v 25 Esus tantiesabon: —Mimbi Nuquin Papan chiaid chuisho tantiatiapimbo iquebi —cac adembi nëishenquio icquin Nuquin Papan chiaidquio chuibanendac. —Nuquin Papan ambi chiaidquio tantiamiac: “Icsamboen naombi,” quequin ma Esus tantiesan tantiabenu —quequin aden chuibanendac.  
\v 26 —Aden Nuquin Papan ambi chiaidquio tantiamiac Esus tantienquio icboedëmbi Esus tantiabenshun abi yuaquidën Satanasën namiaid ënendac. Aden Nuquin Papan chiacpadomboen naindac —queshun chieshtoenquio icquin Nuquin Papan chiaidquio chuibanendac abi chuibanquidën. 
\c 3  
\s1 Icsambo icquido iquendac, quiaid 
\p  
\v 1 Tantia, mado. Mibi chuinu. Esus padpidec choabi icnuc matses dadpenquioshë icsamboshë iquendac.  
\v 2 Nadquido iquendac. Nëidic utsi tantiatiapimbo yec abiuidtsëqui datantiadquido. Nëidic piucquid bedte comapenec bunquidombo. Nëidic: —Is. Ëmbimbo naiduidi bëdambo iqueque —quequido. Nëidic utsibo chieshënec icsamboec onquequido. Nëidic amën chiaid niac-niacquido. Nëidic anin chiaid niac-niacquido. Nëidic aton na nashunaqui nashumënenquio icquido. Nëidic Nuquin Papan chiaid niac-niacquidombo.  
\v 3 Nëidic aton matses tantiesabo. Nëidic chiesh bëdanesabo. Nëidic muauanquido. Nëidic abi icsate bunaid ënenquio icquido. Nëidic cuesanquido. Nëidic bëdambo icquid chieshënquido.  
\v 4 Nëidic bëdambo icquid damianquiashic cuesunianquido. Nëidic bëdamboen tantienquio yec badedi icsa uanquido. Nëidic: —Ëbiuidtsëqui bëdambo iquec —quec abibi tantiadquido. Nëidic ambi naiduidi bunquin Nuquin Papa tantiesabo.  
\v 5 Nëidic: —Nuquin Papa tantiaquid nebi —quec muaquin aidën chiaid niac-niacquido. Adquidtedi icsambo icquido nec. —Adquidbëduidi onquec tabadenda —caimbi. 
\p  
\v 6 Adquidon mibi yacnoshon shubu utsin shubu utsinquien isben-isbenac caosh. Adash chidouidquio icnubi shubun puduedshun ambembi chiaid chuibanac caosh. Aden chuisho tantiashun: —Padi —catiadquidi chidon: —Mimbi chiaid tantianu —quequin badedquio tantiac caosh. Nuquin Papan chiaid niacash adecbidi icsate bunquiec tabadac caosh aid chidobo.  
\v 7 Aden icsambo icquidën ambembi chuidenesho tantianeshun Nuquin Papan chiaidquio tantiatiapimbo icpac caosh aid chidobo.  
\v 8-9 Aid chidobo chiec muaquido icsambo icpampidobimboec iquec. Icsambo icpampid abentsëc Canes cuëmëdnubi utsi Mambades cuëmëdpampic. Isadaidbo tsusedpa Moisesën Nuquin Papan chiaidquio chuisho tantiashun aidon: —Mue nec. Ëmbimbo comapenen tantiaquin ismenu —queboedombi bëdiactsëc tantiaquin nacnenuidpampic. Adsho isun: —Abimbo cainquio iccosh. Muachitosh —capampic matsesën. Adembidi chido chiec muaquidon icsate bunquin ambi chiaid chuitiapimbo icsho Nuquin Papan bëdamboen istiapimbo iquec. Adembidi aidon muaquin chuisho tantiashun matses dadpenshun: —Muequi nec —capendac. 
\s1 Nuquin Papan chiaid isbanec bëdamboec tabadte 
\p  
\v 10 Ëbien muaquidpenquio nec. Ëmbi naid ma mimbi tantieyoc. —Ma Esus tantianu —quequin Esusën naid chuibanec bëdamboec tabadondabi. Esus tantiaquidquio icquin matses tantiaquin Esusën naid chuibeniondambi. Chieshënaqui chieshtoenquio icquin adembi chuibeniondambi.  
\v 11 Ëmbi aden chuibansho isun chieshënondashi. Shubu dadpen icquid Antioquiya caid yacnoshon ëbi: —Cuesnu —casho Nuquin Icbon nac padenquio icpondash. Adshumbic shubu dadpen icquid utsi Iconio caid yacnoshontsen adembidi. Adshobini shubu dadpen icquid utsi Disteda caid yacnoshonquio bedshun cuënoten se-sequin unës uatsempondash. Adsho Nuquin Icbon nac unësenquio iccondabi.  
\v 12 Ëbipadquido Esus tantiaquidotedi bëdamboec tabadtiadquio icsho adembidi utsibon comapenen chieshënendac.  
\v 13 Padnuen chieshëmënquidobëd bëdambo icquid damianquiec muaquido bëdiactsëc icsambo icboedi muauananquiec buëdanquiec icsamboshë yanendac. 
\p  
\v 14 Mibi adquidpenquio nec, mado. —Ëmbi isondaidon bëdambo icquidon abimbo chuibanondashi —quec Nuquin Papan chiaid niaquenquio yec bëdamboec tabadta, mado.  
\v 15 Ënden bacuëmpi icquin Nuquin Papan chiaidquio min matsesën chuibansho mimbi tantianëdac. Adshun: —Aton Mado Esus tantiaquid unësacsho abëdi Nuquin Papan tabadmendac —quequin mimbi tantiabenëdac. Aden Nuquin Papan bëdamboen iste tantiametembo Nuquin Papan chiaid nendac.  
\v 16 Nuquin Papan chiaid aton Mayanën tantiamiac matsesën dada uapampic. Aidën chiaid abitedimbo bëdamboshë iquec. Aid isec onquequin: —Nuquin Papan chiacpadec bëdamboec tabadnuna. Esus tantiaquido yec icsainquien ictiad —quequin abi chuibanquidën chuibanec. Adembidi: —Esus tantiaquido adesa. Padi. Bëdamboembien natiad —quequin chuibanec.  
\v 17 Nuquin Papan: —Ëmbi chiaidquio tantiashun Esus tantiaquinc matses nashunquinc caic Esus tantiaquido ma bëdamboec tabadnu —quequin ambi chiaidquio dada uamepampic. 
\c 4  
\s1 Nuquin Papan chiaid chuisho tantienquio yaid 
\p  
\v 1 Nuquin Papabëdtan Esuquidistun mibi iseque. Bëdamboen nata. Esusën nidaidën padpidec choshon abitedishun Icbombo icquin unësaido uincuemiaido unësabi icquidobëdta chiendac. —Nëid ëbi tantiaquid ëbëdi tabadmembi. Nëid ëbi tantiesa cuidembi —quequin chiendac.  
\v 2 Aidën chiacpadomboen naquin Nuquin Papan chiaidquio chuibanta, mado. Matsesën tantiatiadquio icnuc adota. Tantiatiapimbo icnubi adembi chuibanta. Esus tantiaquido icsasho isun: —Esus tantiaquido adesambo neque. Bëdamboembien natiad —quequin nëishëmënenquio icquin chuita, mado. Utsibo bëdamboec tabadsho: —Mibi bëdamboec tabadoc. Aduidequi tabadta —quequin chieshtoenquio icquin chuita. Bëdiactsëc tantiatsëcquido: —Esus tantiaquidon nadoquid —quequin chuibanta, mado.  
\v 3 —Yuecshun Nuquin Papan chiaidquio matses dadpenshun tantiatiapimbo iquendac —queshun nata, mado. Aden tantiatiapimbo icquidën Nuquin Papan chiaidpenquio chuisho tantiash: —Mimbi ëbi bunaidquio chuisho tantianu. Ëbi chiec cho —quequin muaquid utsi-utsien abi yacno puduedmendac.  
\v 4 Pamumëdacbimboecquin Nuquin Papan chiaid tantienquio icquin tsusedpabon ambembi chiampiduidi tantiendac.  
\v 5 Aidën nacpadomboen nainda, mado. Nuquin Papan chiaidquio bëdamboen tantiaquid yec bëdamboec tabadta. Adsho utsibon chieshënaqui chieshtoenquio icquin Esusquio tantiata, mado. Adembidi Nuquin Papan bëdamboen iste Esus tantiesabo chuibanta. —Esus chuibanquidën nadoquid —caidtedi nabanta, mado. 
\p  
\v 6 —Ëbi unës uan ëmbi nacpadomboen: “Adota,” mibi caquid nibëdtsiash —queshun mibi aden chiec nebi. Nëbi Nuquin Papan tantiacpadën chieshëmënquidon ëbi unës uaic.  
\v 7 Utsibon chieshënubi ënenquio icquin Esusën naid chuibeniombi. —Ëbi bunaid bednu —quec comapenec titinquiacbimboen dayacquio icquin Nuquin Papan chiaidtedi naombi. Chieshtoenquio icquin Esus tantiaquidquio nebi. Adshobini nëbi unës uaic.  
\v 8 Unës uacshobini matsesën naid abitedimbo tantiaquidën Nuquin Icbon: —Ëbi tantiaquin ëmbi chiacpadomboenuidi naic mibi bëdambo iccoque. Nuquin Papa yacno ëbëdi tabadmequin mibi bëdamboshë icmendambi —caindac. Abi chote ushën choshon aden Nuquin Icbon ëbi chiendac. Adembidi abi chosho iste bunquidotedi abi tantiaquido Nuquin Icbon abëdi tabadmendac. 
\s1 Timoteyo: Cho, caid 
\p  
\v 9 Nëbimbobi ëbi isec cho, mado.  
\v 10 Utsibo nidanebon ëbentsëqui tsadebique. Demas caid aton na bedteuidi bunec ëbi nianec shubu dadpen icquid Tesadonica caid yacno nidosh. Quedesente caidic nidaid utsi Cadasia caid yacno nidosh. Titobic nidaid utsi Damasia caid yacno nidosh. Aidtedi nidanebon  
\v 11 Ducas abentsëqui ëbëd iquec. Madcos bedbëtsenec cho, mado. Ëbëdtan aidëmbi nëshunquio Esus chuibantsiashe.  
\v 12 Tiquico caid Epeso yacno mibi yacno nidmiombi.  
\v 13 Shubu dadpen icquid Todoas caid yacno Cadpo cuëmëdquidën shubun con na niamëdaccondashe. Con dashcute ëmbi dada uaidbëdta bedbëtsenec cho, mado. —Abitedi buantiapimbo iquebi —queshun nëish yua bitsi nacnenaid dada uaiduidtsëqui bëta. 
\p  
\v 14 Shocosh nacnenquidën Adecandedo caidën comapenen chieshënondashi. Aid Nuquin Papan cuidendac, mado.  
\v 15 Nuquin Papan chiaid ëmbi chuisho tantiatiapimbo icquin icsamboen chuishunondashibique. Choquin aid isenda: —Ëbitsen icsamboen chuishunushe —queshun.  
\v 16 Ënden tauamboen bedshun: —Quënën nauednu —cac cuidte chuiquid dapa ëmbentsëqui chuibampondambi. —¿Mitsipadosho isun ëbi bedo? Icsamboen nambo iccombi —capondambi. —Ëbëd icboedon dadpenshun: “Bëdambo icquid nec,” quequin ëmbi naid chuibanac ëbi quënën nauedquidon ëbi nidmetsiash —queshun ëbëd icboedo: —Chiec cho —caqui choenquio iccondash. Aden ëbi cacuidondaido tantiaquin: —Nuquin Papan aido cuidenquio icpashun —caimbi.  
\v 17 Nuquin Icbombini nianenquio iccondash. —Isadaidpembo matses utsibo ma ëmbi naid chuibenenu —quequin cuesambo icmepondashi. Adondaid icshobini chieshëmënquidon: —Cuesnu —cabededpondash. Nuquin Icbon nac aid matsesën unës uainquio icpondashi.  
\v 18 Padpiden chieshëmënquidon ëbi caic: —Ma mëyanac chieshtoshon Esus tantienquio yanu —casho Nuquin Icbon nac chieshtoenquio ictsiabi. —Nuquin Icbombidi abi yacno ambi matses dadpen namiacno abëdi ëbi tabadmendac —queshun: —“Nuquin Icbo bëdamboshë iquec,” canuna ënenquio icquin —caimbi. 
\p  
\v 19 Mibi yacnocquido: —Mibi caic: “Unësquio iquec,” quiosh Pabado —quequin chuiban, mado. Nëidic Aquida caid. Nëidic aton chido Pidisida caid. Nëidic Onesipodo caid chedo. Aidtedi aden chuiban.  
\v 20 Mimbi isondaid Edasto caid shubu dadpen icquid Codinto yacno tëshëdondash ëbi chonoc. Utsibic Tëdopimo caid aton dada icsabudacsho shubu dadpen icquid Mideto caid yacno nianondambi.  
\v 21 Ue tsasi iquenuanquid taënushe. Baded cho, mado. Doma yacnocquido nëmbo icquidon: —“Timoteyo unësquio iquec,” quequin dada ua —caposhi. Nëidic Eyobudo caid. Nëidic Pudente caid. Nëidic Dino caid. Nëidic Quëdaudia caid. Nëidic Esus tantiaquido nëmbo icquido utsibotedi. Aidtedi adosh.  
\v 22 —Nuquin Icbo Esusën abëd icquin con mado bëdamboen ispashun —quequin mibi tantiembi. Padi. Aidtedi chuiquin dada uaombi, mado.