\id ROM - Sharanahua NT [mcd] -Peru 2008 (DBL -2013) 
\h Romanos 
\toc1 Pablonun Roma Anoafo Cunu Fomani 
\toc2 Romanos 
\toc3 Rm 
\mt1 Pablonun Roma Anoafo Cunu Fomani 
\c 1  
\s1 Jesús icoinra huafo Roma anoafo Pablonun cunu fomani 
\p  
\v 1-3 Uhuun yoramishtichin, Roma anoafoan un mato cunu fomai man tapinon. Unquian Pablo unfin Jesucristo ahuun oinmatiquin. Ua catonni un afu rafumisi un inon. Upa Diosin ua nichini ahuun tsain shara Furunhuunoa un yoinon. Jesús David ahuun funa ini. Caiantaima Diospan tsain shara inonpacoai cuscan ahuunoa cunushonifo. 
\p  
\v 4 Ahuunoa cununi cuscan Diospan Yoshin Sharapan ahuun curushhuunshon nocon Ifo Jesucristo maiya anoa funimani. Funimashon noco tapimani nan Diospan Furun Shara nocon Ifoan ahuamamishti huatiro.  
\v 5 Non ahuara shara huahuunshocai Upa Diosin noco catonnima. Ahuun Furunhuunoashu nocohuun ramapaiquin noco catonni afu rafumisi inon. Noco nichini nocon caifomari non ahuun tsain yoinon ahuun Furun Cristo icoinra huanonfo.  
\v 6-7 Upa Diosin manifoti icoinra huamapai. Mato Roma anoafori noiquin mato catonni maton chaca man shatunon Furun Jesucristo ahuun yorafo man inon. Upa Diosin nocohuun ramapaiquin nocon ointi shinansharacoinon. Furun futan Apamain mato asca huashopainon. 
\s1 Pablon Roma ano oinmitsai capaini 
\p  
\v 8 Tau huaquin un mato yoisharapai. Man Jesucristo icoinra huacun manifotiton nicamisifo. Ascacun un mato shinanquin un Jesucristohuunshon —¡Aichoran! Upa Diosin, —ishon un yoimisi.  
\v 9-10 Upa Diosin ua yonomapaiyai cuscan un curushcain yonoshomisi ahuun tsain shara Furunhuunoa un ato yoinon. Upa Diosifin ua oinquin un mato shafatifi cufishofafainaiton. Nan un cufiain cuscamain Upa Diosin mato muran ua nichi huuati ishon un cufifafaini.  
\v 11-12 Un fasi mato oinpai mato Diosin tsain yoipaiquin. Ahuun Yoshin Sharahuunshon man icoinra huanon man yoinonansharanon Jesús tanasharashquin. Un icoinra huaino marifi man icoinra huainofin non unimanantanantiroquin. 
\p  
\v 13 Uhuun yoramishtichin tapicahuun. Uhuun caifomari un ato Jesushuunoa yoimisi tanasharanonfo. Nanscarifi un mato huamapai. Mun catacatamisi ifiacuanano ahuara futsa huai un camisima.  
\v 14 Jesús ua yonoa ahuunoa manifoti un yoinon. Ua yonoa cuscan ayamai un yoitima itiro. Ascan nantifi un yoipai. Uhuun caifomari yoifain nahuafori yoifain cunu tapiafori yoifain cunu tapiamafori un yoinon.  
\v 15 Ascashori un mato tsain shara Jesushuunoa Roma anoafo yoi capaimisi. 
\s1 Nan tsain shara Jesushuunshonfin ahuamamishti huatiroquin 
\p  
\v 16 Nan tsain shara Cristohuunoa Upa Diosin ahuun curushhuunshon icoinra huafoti ato numatiro afu nipanonfo. Uhuun caifo Israelifoan nicaquin tauhuanifo. Natiarifi mani futsafoan nicacani Upa Dios fu nipashcaquin. Ascacufin un ranotama manifoti ahuun tsain shara un ato yoicain.  
\v 17 Nan tsain sharafohuunoa Upa Diosin noco tapimana ahuuscashumain non isharatiroquin ahuun tsain tanasharashquin. Nan non Jesús Ifo huaquin tau huanitian non Upa ari caitianri nanscasi huaquin non icoinra huatiro isharacoinshquin. Diospan tsain cununi isca huaquin, —Nan Diosin aton chaca soashonafoanfin icoinra huamisifoquin, —ishon cununi. 
\s1 Upa Diosin icoinra huamafo ato onaintimashqui 
\p  
\v 18 Ascafiacai atirifo ascarafoma. Diosihuunoacai shinanpaicanima. Icoinra huapaicanima. Chacasi shinanmisifo. Chaca fustisi tanapaicaniquin. Diospan tsain iconcoin tapifiacashon nicacasmamisifo. Nantifi nanscarafosi Upa Diosin atoqui sinacoinquin. Nai muranshon ato onaintimaquin finacoinshquin.  
\v 19 Upa Diosin ahuu cuscaramainquin tapipaiquifin tapicuanafoquin. Upa Diosin ato shafacafi ismani.  
\v 20 Nantifi onihuaquin tau huanitian natianri ato shafacafi ismamisi. Mai yafi nai onihuani cuscan nantififain oinmisifo. Diosin ahuamamishti huatiro oinmisifo. Ascacun, —Uncai tapiama ahuu cuscaramain Diosiquin, —itirofoma. Nan tapiamafofin atohuun nuaquin. 
\p  
\v 21 Ahuunoa tapifiacashon yoicasmanifo. —Min nocon Diosin. Min fasi shara. Non mia noi. ¡Aicho! Min noco shara huafafainiran, —ishoncai yoinifoma. Ascacun ahuunoa amaquiri ipaitsi shinannifo. Aton nomuran afanan ahuunoa shafacafi shinantamarocon nisopan shinantiro cuscan shinannifo.  
\v 22 —Nonfin fasi tapisharaquin, —ifiacatan tatimashunifo. 
\p  
\v 23 Nocon Diosincai nanacama. Ifiacashocai isca huaquin yoinifoma, —Upa Diosin, tsoa futsacai mia cuscara shara imisima. Min ahuamamishti huatiro. Non mia noiran, —ifiacashon anori yoitama ahuara futsafo rami huanifo. Na nocofunufo naashu payocofiafo nan ointsa rami huafain puiyafo rami huafain yoinafo rami huafain rono cuscarafori rami huanifo. —Nanfo nocon Diosiran, —ishon yoipaonifo. 
\p  
\v 24 Ascacun Upa Diosin ato potaquin futsani aton nomuran chaca huapaiyai cuscan huanonfo. Afanancai ato numanima. Afi ranan chaca huaa tanannifo futsan namannoa ainfo fucashni huaifoan. Ainfofori ascarifiaifoanno.  
\v 25 Upa Diosin tsain icoinra huatama chani fusti catonnifo. Diosin nantifi onihuani. Nan Diosicai cufitama nan onihuafo cufinifo. Ascatama Diosin shararan ishon yoipacupainonfo. 
\p  
\v 26 Ascacufin aton nomuran chaca huapaiyaifoan tapishon Upa Diosin ato potani. Afanan ato numanima. Upa Diosin noco onihua cuscan nocofunufo ainfo ya icaino ainfofori nocofunufo ya inonfo. Ascatamarocon ainfofo afiranan fuchinanpaicani. Aforanansi iquinannifo. Chaca huatanannifo.  
\v 27 Nanscarifiai nocofunufo ainfo tanatama afi ranan iquinanpaicani. Ascashu chaca huantanancatan aton nomuran aton cayari omitsisca huapaonifo. 
\p  
\v 28 Ascatari Upa Dios onanpainifoma amaqui inifo. Ascacurifi arifi ato potani aton nomuran afiranan shinanpaiyaifo cuscan chaca huan tananonfo.  
\v 29 Chaca fustisi shinancani chaca huan tananonfo aton ahuinma ya icaifoanno ainfofori ato funumafo yari ipaonifo. Aton namari fipaifain. Fasi chacafo icain mafo noiriamisi icain futsafoqui shinanchacamisifo icain fashimitsamisifo icain rutumitsamisifo icain fochishmanantanancatan sinaisi fuyamisifo icain paramitsafoanfafainmisifo icain noimati huamitsamisifo icain yoiti huamitsamisifo icain  
\v 30 futsafo yoiti huafain Dios noicasmafain roanmitsamisifo icain cacapaimisifo icain aton nomuran chaca fustisi shinanmisifo icain aton apa yafi ahua nicacasmafain  
\v 31 ahuara shara shinanpaimisifoma icain tsoashtacai ato icoinra huatirofoma icain tsoanshtahuun noiyamacain chaca huapaimisifo icain rauhuaquin tapiamafo icain tsoanshtahuuncai ramapaimisifoma icain.  
\v 32 Upa Diosin ahuun tsain shara yoiquin isca huani, —Futsafoan ascaran chaca huaiton un ato namairan, —ishon. Yoini cuscan man tapifiacashon aton chaca shatupainifoma. Ascarifiatan futsafoanri nan acaifo cuscan huaifoan oincaquin, —¡Aichoran! Nanscarocon chaca huatanacahuun, —ato huanifo. 
\c 2  
\s1 Upa Diosin ato iconquin onaintimai 
\p  
\v 1 Ascano man shinanraca, —Nan cuscara yora fasi chacacoin. Upa Diosinmain ato onaintimapainonran, —ifiashon marifi man asca huamisiquin. Ascashu, mafiri man yoimui cuscaracoin. Matori onaintimatiro.  
\v 2 Nan non ahuara chaca huamisi cuscan nantifi Upa Diosin man tapicoian. Ascan man non tapian nan chaca huamisifo iconcoin ato onaintimai. 
\p  
\v 3 Mancai Diosin cuscarama. Marifi man nocofunufiashon man yoiquin isca huamisi, —Nan chaca huamisifomain Upa Diosin ato onaintimapainonran, —ifiaquin marifi man asca huamisi. ¿Ascacun man shinanmun Upa Diosin matori onaintimaimaquin?  
\v 4 Upa Diosin matohuun noiquicai mato funa ahuusca huarima. Man chaca huafiaiton mato shara huafafaini. Mato funa onaintimaima. ¿Man tapiamamun matohuun ramapaiquin maton chaca shatumapai man tanasharanon? ¿Nanfohuunoamun man shinanpaimacai? ¿Diosiqui man ointi mutoimun? 
\p  
\v 5 Upa Diosin mato shara huafiaintocai man shinan futsapaima maton chaca shatushquin. Diosiquiricai man shinanmisima. Man chaca huaa cuscan Upa Diosin ointiaquimaima. Ascan chaca huaquin man unuyamaiton Diosin sinaitian mato onaintimashqui.  
\v 6 Upa Diosin nan niyoshon amisifo cuscan atoti inanpacushquin.  
\v 7 Nan tsoaran Diosin ato imapaiyai cuscan amisiton futsafo shara huafafaini tsain shara Upa Diosin atohuunoa yoisharaiton nicapaicani. Isca huaquin, —¡Aicho! Un mia yonoa cuscan min amisi. Un miqui unimai. Min ufu ipasharatiroran, —ishon nicapaicani. Afu ipashquin. Nan cuscarafo Upa Diosin aya ato imapacunaca.  
\v 8 Ascafiata ratoranfoan afi apaiyai cuscan fusti shinainfoan aton nomuran fucash huamisifo icain Diospan tsain iconcoin tanatama ahuara chacafosi tanaifoan. Nan cuscarafoqui Upa Diosin ahuun nomuran sinacoinquin ato onaintimashqui.  
\v 9 Nan ratoran futsa Israelifo iyamarai mani futsafoan chaca huamisishaquin fasi aton nomuran omitsiscai finacoinshcani.  
\v 10 Ascacun ratoran futsa sharamisicun Diosin sharapan ato yoishquin, —Mian nicamisicun. Un miqui unimairan, —ishon ato yoishquin. Aton nomuran unimacaquin ahua fucash huanonfoma. Israelifo iyamarai mani futsafo isharaifoan Upa Diosin ato shara huaiquin.  
\v 11 Ascacun Diospan nantifi noco nanscarafosi oin. 
\p  
\v 12-15 Nantifiton chaca huamisicun ato onaintimashqui. Uhuun caifo Israelifoanma atirifiton Upa Diosin tsainquin cununifo cuscan oinyamafiamisishaquin ahuara shara aton nomuran tapiafo. Tapifiacashon shara huamisifoma. Chaca huafiacatan aton nomuran shinanquin isca huamisifo, —Un chaca huaran, —iyamarai, —Uncai chaca huamaran, —ishon shinancani. Ascacun chaca huaifoan ato onaintimashqui. Ascashu omitsiscapanacafo muran foshcani. Ascan uhuun caifo Israelifoan Upa Diosin yononi cuscan noco cunushoni cuscan non aya. Tsoan man tapifiashon chaca huaiton nan yononi cuscan huaquin ato onaintimaicain nan omitsiscapanacafo muran foshcani. Diosin tsain cununi cuscan nicafiashucai ascacoianfoma ato imasharanon. Ascano Diosin yononi cuscain ato yoishquin, —Min shararan, —ishon ato yoishquin.  
\v 16 Nantififain aton nomuran shinanmisifo cuscan Upa Diosin tapicoian. Nan shinanmisifo cuscan fomanfiainfoan nocon Ifoan nantifi ato puashoshquin. Upa Diosin ahuun Furun Jesucristohuunshon ato onaintimashqui. Nannori Diospan tsain sharahuunoa un mato yoi. 
\s1 Diosin yononi cuscan Moisés Israelifo tapimani 
\p  
\v 17 Uhuun yoramishtichin, Upa Diosin yononi cuscan noco cunushopaoni. Nan noco cunushonicun man shinanraca, —Upa Diosin non Israelifo noco fusti catonni futsafocai catonnima. Non fustifin ahuun yoraquin, —ishon man shinanmisiquin.  
\v 18 Mato amapaiyai cuscan man man tapia. Tapimamisifoan ahuun tsain mato tapimana. Ascan ahuara shara nicashon, —Iconran, —ishon man yoimisi. 
\p  
\v 19 Man yoiquiri isca huaquin, —Nocon caifoma fusho cuscarafo. Ahuuscashomain Diosin tsain tanasharatiroquin tapiafoma. Nonfin ato tapimatiroquin. Faquish muran ica shinantsa aafo. Nonfin chashamati cuscara ato chashashotiroquin Dioshuunoa tapinonfo.  
\v 20 Upa Diosin noco yononi cuscan iconcoin. Ahuun tsainhuunshon non tapicoian. Ascacun tsoa futsacai tapiataima aton chaca shatushcaquin non aton facufo ya tapimatiroran, —ishon man shinanmisi. 
\p  
\v 21 Man futsafo tapimamisi ¿Ahuuscain mafiri man tapimamuimanmun? Futsafo man yosimisi, —Ahua onuyamacahuun, —man huamisi. ¿Marifimun man onumisima?  
\v 22 —Maton ahuinma fu iyamacahuun. Maton funuma furi iyamacahuun, —man ato huamisi. ¿Ascafiashu marifi maton ahuinma fu man icamun? —Ascan Diosicoinma cufiyamacahuun. Dios fusti noicoincahuun, —man ato huamisi. ¿Manmun Upa Dios fusti tanacoincai?  
\v 23-24 —Upa Diosin noco yononi cuscan man non tapicoian, —nan cacapaimisi cuscara man tsainfafaini. Man futsafo yoifiatacai marifi Diosin yononi cuscan man aima. Ascan matohuunshon nocon caifomafoan yoiquin isca huamisifo, —Diosin ahuun yorafocai isharafoma. Ascan arificai sharamaran, —ishon yoimisifo. Ascan matohuunshon Dios chaca huafo. Nannorifi Diospan tsainquin cununi. 
\p  
\v 25 Upa Diosin noco yononi cuscan non aafin nan Israeli sharafo cuscara noco imatiroquin. Ascafia noco yononi cuscan ayamashu nan yora chaca cuscarafo non itiro.  
\v 26 Yora futsafo Diosin yononi cuscan amisicun Upa Diosin noco shara huashopaiyai cuscan atorifi shara huashotiro. Noco inanpaiyai cuscari atori inanshquin.  
\v 27 Nanfo Israelifomafiashon Diosin tsain nicasharacoincani. Manfin Israelifoquin. Diosin mato yononi cuscan tapicoinfiashu man yoitimamisi. Ascan nanfo isharafiainocai man isharamisima. 
\p  
\v 28 Diospan yoracoinin ahuun tsain tanasharatiro. Nanfofin Israelicoinfoquin. Futsafo Israelicoinfo cainfianishaquin Diosin yononi cuscacoin acanima. Afocai Diospan yoracoinfoma. Ascafiashucai Israelifocoinma. Nocon fuyamisi cuscara furonanfacu rama caian non foshqui rupa shatumisi. Ascan tapitirofo nanfo Israelicoin. Ascafia noco yononi cuscan non ato foshqui rupa shatufiacai ahuun tsain icoinra huafomacai Diospan yora itirofoma.  
\v 29 Diospan Yoshin Sharahuunoashu nocon nomuran fiananantiro non Diosiquiri shinansharanon. Ascashu Diospan yoracoin iishquin. Non ascaino yorafoan nocohuunoa yoisharayamafiaino Upa Diosin nocohuunoa yoisharashquin. 
\c 3  
\p  
\v 1 Ascan nonfin Israeliri cainniquin. Ascan non ahuaraya cuscacai futsafo ayama. ¿Non amisi cuscan nocon facufo non aton foshqui rupa shatuainomun shara itiro? Ainfain.  
\v 2 Uhuun yoramishtichin, shinancapon. Upa Diosin manifoti yoipaiyai cuscan nocon caifo yoiqui tau huani. Noco tapimani cuscari non mani futsafori tapimanon. 
\p  
\v 3 Icon, atirifi nocon caifocai Upa Diosin yononi cuscacoin acanima. ¿Icoinra huayamafiashon Upa Diosin noco yoini cuscamun noco ashoimacai?  
\v 4 Ma. Ascapacunacama. Nantifi yorafoan noco paratirofiancai Upa Diosin noco parapacunacama. Nanfin iconcoin fustiquin. David cunuquin isca huani, 
\q3 “Yorafoan Upa Diosin tsain icoinra huayamafiashon ahuun tsain cayacafi iconcoin manifoti ato tapimashcaniran,” 
\m ishon cununi. 
\p  
\v 5 Futsan shinanquiraca, —Upa Dios fustifin sharaquin. Noncai ascaranma. Ascan non chaca huaiton futsafoan noco oinquin Upa Dios noco cuscarama aafin sharacoinquin. Ascan tapitirofo Upa Dios mimacai sharacoincun. Nocon chacahuunshon futsan tapitiro Dios sharacoincun. Diosincai iconquin noco onaintimatiromaran, —ishon anori shinantirofoquin.  
\v 6 ¡Ohua! Fasi amaquiri shinancani. Upa Diosicai non chaca huaa cuscan ointiaquimatiroma. Non chaca huafiaiton Upa Diosin noco onaintimayamaitocai ahuuscashon non tapitiroma afanan asca huashquima. Diosin chacafo onaitimayamaino ahuuscashomain yorafoti yoitiroquin afu ipayamarain omitsiscapanacafo muran focanicai. 
\p  
\v 7 Ascan futsafoanraca shinancani, —Un chani yoimisicun futsafoan tapitirofo Upa Diosin iconcoin fusti yoimisi. “Upa Diosin sharacoinran,” ishon yoishcani. Ascan uhuun chanihuunshon futsafoan mima huaquin Dioshuunoa shinansharashcani ¿Ascan ahuuscain, “Min chaca huamisicun un mia onaintimairan,” ua Diosin huatiromun? —Nannori man shinanraca.  
\v 8 Nan cuscara yorafoan fasi amaquiri chaca shinanpaicani. Isca huaqui yoipai, —Non chaca huanoncahuun. Ascan Dioshuunoa shinansharatirofoquin, —ishon yoipaicani. —Pablonunri anori yoimisiran, —ishon yoicani. Chanimisifo. Uncai anori yoimisima. Upa Diosin iconquin na cuscarafo onaintimashqui. 
\s1 Tsoa futsacai non isharamisima 
\p  
\v 9 ¿Ascan yora futsafo chacafiaino noncai ato cuscaramamun? ¿Norus fustimun non shara? Ma. Anorima. Un mato tapima cuscan nantifi yorafocai nocon caifomafoan norifi non Israelifoanri man non chaca huamisi.  
\v 10 Nunorifi Diosin tsain cunuquin isca huaniquin, 
\q3 “Diosin noco yononi cuscacai tsoashta amisima.  
\v 11 Diosin noco yononi cuscan tsoancai tapicoinmisima. Mancai Upa Dios onanpaicoinma noco yononi cuscan tapishquin.  
\v 12 Manifoti anoafoan Upa Dios cachiquiri huaafo ato isharamapaiyai cuscan atamarocon chacacoin tapiafo. Tsoacai shara tapimisima. Tsoa fusticai isharamisima.  
\v 13 Yora naacun mai huashon non fupuaino pisin tohuutiro cuscan nanscarifiai aton ashfan muranshon tsain fasi chacacoin yoimisifo. Nan rono paupaton noco nasa non mutiro cuscan aton tsainmanri noco omitsiscamatiro.  
\v 14 Roanmitsamisifo icain tsain isininpaton yoimisifo.  
\v 15 Samamashta yora rututirofo.  
\v 16 Nan cahuancacainaitishon yora chaca huafoanfafainmisi ato omitsisca huafoanfafainmisi.  
\v 17 Diosin nocon ointi shinansharamapaiyai cuscacai afoan mumisima.  
\v 18 Dioshuunoa shinanmisifoma. ‘Aacai ahuamaran,’ ishon shinanmisifo. Aquicai ratucanima,” 
\m ishon Diosin tsain inonpacoai cuscan yoimisifoan cununi. 
\p  
\v 19 Man non tapia Upa Diosin yononi cuscan Moisés noco cunushoni. Noco yononi non chaca huanonma. Noco yononi cuscacai non amisima. Ascan tsoancai yoitiroma isca huaquin, —Diosin yononi cuscan un amisiran, —ishoncai yoitiroma. Iconquin nantifi noco onaintimatiro.  
\v 20 Ascacucai Upa Diosin tsohuunoa yoitiroma isca huaquin, —Un mato yononi cuscan man amisi. Man ahua chaca huamisimaran, —noco huatiroma. Diosin noco yononi cuscan man non tapicoinfiashon nanhuunshon non shinantiro, —¡Ohua! Upa Diosin yononi cuscacoincai un amisima. Urifi un chaca huamisiran, —ishon non shinantiro. 
\s1 Jesús icoinra huaashu non Dios fu ipatiro 
\p  
\v 21-22 Upa Diosin noco yononi cuscan Moisés noco cunushoni. Noco cunushoni cuscan non apaifiai non itiroma Diospan yora iishquin. Ascafia ahuuscashomain nocon chaca noco soashotiroquin a cuscara shara non inon Upa Diosin natian noco tapimana. Nannori Moisés yafi Diospan tsain yoimisi futsafoanri cununifo. Ratoranfo nocon caifo Israelifo iyamarai nocon caifoma non Jesucristo icoinra huacun nocon chaca noco soashotiro a cuscara noco imasharashquin.  
\v 23 Manifoti anoafoan nantififain man non chaca huamisi. Upa Diosin noco imapaiyai cuscacai tsoa acoinmisima. 
\p  
\v 24 Ascafiacun Jesucristo noco nashoni nocon chaca soashoshquin. Non icoinra huacun afanan chaca nocon ifo itama Jesucristo acoin nocon Ifo inon. Non ahuara shara huahuunshoncai noco numanima. Ahuun Furunhuunshon nocohuun noiquin noco numani. 
\p  
\v 25 Ahua chacacai Upa Dios fu itiroma. Ascan Furun nichini nococairocon onaintimatama Furun onaintimani nocohuunoashu nashon nocon chaca soashonon. Ascan ahuun imi foyanan noco nashoni non icoinra huaiton Upa Diosin noco onaintimaima. Ascan Furunmun noco nashoantaima iyopaonifoanri chaca huapaonifo cuscan. Tapiyonifo chipo Furun atohuunoashuri nashquiai. Ascano icoinra huafoan aton chaca iconquin Furunhuunshon soashotiro afori afu ipanonfo.  
\v 26 Natianri Diosin ato ismapai chaca huafiamisishaquin Jesús icoinra huacun ahuun yorafo ato imatiro. Man raca shinain, —¿Ahuuscain chaca huamisifo ato onaintimama Upa Dios fu ipatirofomun? —ishonraca shinancaniquin. Anorimafinquin. Furunmun ato nashoni aton chaca soashoshquin. Ascan nan icoinra huacatan Upa Dios fu ipatirofo. Iconquin ahuun yorafo ato imatiro. 
\p  
\v 27-28 Non ahuara shara huahuunshoncai nocon chaca noco soashonima. ¿Ascan tsoancai yoitiroma isca huaquin? —Upa Diosin noco yononi cuscan un nantifi amisi. Ascacufin un afu ipatiroquin, —ishon tsoancai anori yoitiroma. Ascarafo shinainno cacapaimisi itiro. Upa Diosin noco yononi cuscan non nicamisihuunshocai noco numanima. Furun icoinra huaiton noco numatiro. Nannori non mato yoimisi.  
\v 29 ¿Upa Dios nocon caifo Israelifoan nocon Dios fustimun? Ma. Caifo futsanfoanri aton Diosiri. 
\p  
\v 30 Upa Diosin noco nanscarasi huai. Nocon caifo yafi nocon caifomari Jesús icoinra huaiton nocon chaca noco soashotiro afanan noco chacahuunoa shinanonma.  
\v 31 ¿Ascano non Jesús icoinra huacun Diosin Moiséshuunshon noco yononi cuscan non yopaimamun cununi cuscan aquin? Ascatama non Jesús icoinra huaiton Upa Diosin noco yononi cuscan non atiro. Jesushuunshon fusti non atiro. 
\c 4  
\s1 Abrahamhuunoa Pablo noco ahuara futsa tapimani 
\p  
\v 1-2 Ascatan natian un nocon shuni Abrahamhuunoa mato yoi. ¿Diosin yononi cuscan aimun ahuun chaca soashoni sharacoin inon? Ma. Anorima. Abraham asca huaiton yoicuana, —Unfin Diosin yononi cuscan un amisiquin, —ishon yoicuana. Ascafiashu nanoricai yoimisima. Upa Diosin ahuun ointaificai ascatiroma.  
\v 3 Ahuunoa Diospan tsain cununi isca huaquin, —Abraham Upa Dios icoinra huamisi. Ascaino Upa Diosin ahuun chaca soashona a cuscara isharanon, —ishon cununi. 
\p  
\v 4-5 Non yonoaino ifoan noco cashman inainma. Noco nifishon noco inantiro. Nanscarifiai non ahuara shara huatiroma Upa Diosin noco nifinon nocon chaca noco soashonon non afu ipanon. Nonfin chaca huamisifoquin. Ascafiashon non Jesús icoinra huacun Upa Diosin noco yoishquin, —Un maton chaca soashona. Man uhuun facuhuunoashu isharanon, —ishon noco yoishquin.  
\v 6 Nannori nocon shuni David yoini. Noncai ahua shara huatiroma Upa Diosin noco unimamanon. Afin noco yoitiro, —Un min chaca mia soashona. Ascan min ua cuscara shara iquiran, —ishon noco yoiaino non unimatiro.  
\v 7 David isca huaquin yoini, 
\q3 “Tsoan ahuun chacafo Upan Diosin rau huaa afanan afohuunoa shinanyamaino fasi unimatiro.  
\v 8 ¡Aicho! Upa Diosin isca huaquin yoishquin, ‘Min chaca huaa cuscan un afohuunoa afanan shinanpacunacama. Natian min chaca huamisima cuscara min itiroran,’ ishon yoiaino fasi unimacointiro,” 
\m ishon David yoini. 
\p  
\v 9 ¿Upa Diosin Israelifo fusti unimamatiromun? Ma. Israelirifomari aton chaca soashotiro a cuscara shara imashquin. Abraham Diosin icoinra huacun ahuun chaca soashona a cuscara shara imashquin. Nannori non mato yoimisi.  
\v 10 Foshqui rupa shatuataima ahuun chaca soashoni a cuscara shara imashquin.  
\v 11 Abraham foshqui rupa shatuataima Upa Dios icoinra huaqui tau huani. Ascacun ahuun chaca soashoni a cuscara shara inon. 
\p Ascaino chipo fari ranan finoanno Upa Diosin Abraham yononi, —Min non min yorafori foshqui rupa shatucahuun. Nan foshqui rupa shatushonfin min shinantiro isca huaquin, “Icon Upa Dios un icoinra huacun uhuun chaca ua soashona ua shara huapanaca Upan Diosin ua yoiyoniran,” —ishon Diosin Abraham shinanmani. Ascacufin tsoafo foshqui rupa shatuataima Dios icoinra huashu Abraham ahuun upa cuscara itiro. Afin foshqui rupa shatuataima Upa Dios icoinra huaquin tau huani. Ascacun ahuun chaca soashoni a cuscara shara inon.  
\v 12 Foshqui rupa shatuafori Abraham cuscara itirofoquin. Aafin foshqui rupa shatuataima Dios icoinra huaniquin. Afoanri arifi Jesús icoinra huacanashu Diospan yora itirofoquin. Ascan Abraham aton upa cuscarari itiro. 
\s1 Abraham Diosin yoiyoni cuscan icoinra huashon ahuunoa fini 
\p  
\v 13 Upa Diosin Abraham yoini isca huaquin, —Min non min funafori nan maitio un mato inannon matonna inon, —ishon yoiyoni. Upa Diosin icoinra huacun aton chaca soashona a cuscara shara inonfo. Ascacufin ato yoiyoni cuscan ato inanshquin.  
\v 14 Futsafoan icoinra huayamafiashon shinanquin isca huaa, —Diosin yononi cuscan un aiton uqui unimatiro noco inanpaiyai cuscan ua inanshquiran, —ishon shinantirofo. Nanfo Diosin yoiyotiani cuscan fiaino non ipaitsi icoinra huaa.  
\v 15 Ascafiacai anorima. Diosin noco yonoyamaino tsoacai yoitima icuanamafinquin. Ascafia noco yononi cuscan apaifiaicai tsoa ascamisima. Diosin chacafoqui sinai yoitimamisifo onaintimashqui. 
\p  
\v 16 Ascan non ahuara shara huaacucai Upa Diosin noco yoiyotiani cuscan noco inainma. Non icoinra huaiton noco cashman inanshquin. Ascan nan Israelifo yononi cuscan tanaifo iyamarai nan tanaifoanmari Upa Dios icoinra huacanashu ahuun yorafo itirofo. Ato yoiyotiani cuscan cashman inanon. Abraham icoinra huani cuscan afoanri icoinra huashu ahuun funafo cuscara itirofo.  
\v 17 Nannori Diosin tsain cunushoni isca huaquin, —Manifoti min aton upa cuscara. Un mia imashquinran, —ishon Upa Diosin Abraham yoiyoni. Abraham tau huaquin Upa Dios icoinra huani. Ascan norifi non chipo icoinra huaashu nocon upa cuscara itiroquin. Upa Diosin noco oin non Abraham ahuun facufo cuscaracun. Diosin yora nacun funimatiro ninon. Icataima rufofo Upa Diosin yoiqui tau huani. 
\p  
\v 18 Ascano Abraham anifoshta afanan facu atiromafiashon Dios icoinra huaacun. —Min chipo facu yashquin. Min funafori ichaparasi cainshquiran, —ishon Upa Diosin yoiyoni cuscan icoinra huani. Ascan yora ichapafoan aton upa cuscara ica.  
\v 19 Tapini anifoshtacoin cien fari aqui caa. Ahuin Sararifi noventa fari aqui caa afananricai facu nanutiroma. Ascan man tapifiashon Diosin yoiyoni cuscan icoinra huani. Icoinra huaa cuscacai afanan amaqui ipainima. 
\p  
\v 20-21 —Un anifocoinno uhuun ahuinri yoshafofiashon Upa Diosin ua yoiyoni cuscan ua facu inantiroran, —ishon shinanni. Mimacaiquin icoinra huani. —¡Aicho! Upa Diosin, mian yoiyoni cuscan mian inanshquin. Min curushhuunshon mian yoiyoni cuscan mian ashotiroran, —ishon yoini.  
\v 22 Icoinra huaiton Upa Diosin ahuun chaca soashoni a cuscara shara inon.  
\v 23-24 Upa Diosin tsain yoini isca huaquin, —Abraham Upa Dios icoinra huani. Icoinra huahuunshon ahuun chaca soashoniran, —ishon cununi. Abraham fustihuunshocai cununima. Norifi nan icoinra huafoti noco cunushoni. Nocon Ifo Jesús naacoinfiacun Upa Diosin funimani nipanon. Nan non icoinra huaiton nocon chacari noco soashonon a cuscara shara non inon. 
\p  
\v 25 Nocon Ifo Jesús namani nocon chaca noco soashonon. Nantori funimani Upa Diosin noco rau huanon a cuscara shara non iishquin. 
\c 5  
\s1 Tsoan nocoqui patatiroma 
\p  
\v 1 Upa Diosin nocon Ifon Jesucristohuunshon noco rau huaa nocomaqui afanan iquima no fu ipashquin. Ascano nan icoinra huashu non afu isharapacutiro.  
\v 2 Non icoinra huacun Upa Diosin noco noiaino non afu shafatifi rafutiro. Ascano unimacoinquin non tapitiro noco imapaiyai cuscan shara non atiro. 
\p  
\v 3 Ascatari non Jesushuunoashu omitsiscafiaquin non shinanchacaquima Jesús tununi cuscan non tunucointiro. Ascatan non unimatiro.  
\v 4 Non tunuaino Upa Diosin nocoqui unimatiro non Jesús cuscara isharashquin. Non isharaquin non tapitiro non chipo afu ipasharashquin.  
\v 5 Upa Diosin ahuun Yoshin Shara nocoqui nichini. Ahuunshon non tapitiro noco fasi noicoin. Nan tapishocai non shinanchacatiroma. Noncai iscatiroma, —¡Ohuashta! Un ipaitsi Jesushuunoashu un omitsisca. Ua yoiyoni cuscan ua ashoshquimaran, —ishoncai non anori shinantiroma. 
\p  
\v 6 Shinancapon. Noncai ahuuscashon nocon chaca soatiroma Upa Dios cuscara isharashquin. Non ascara chaca icaino nantianri Cristo oni noco nashoshquin.  
\v 7 Non isharafiatiro tsoan noco nashotiroma. Itsairaca yora sharahuunoashu fustirasi noco nashotiro.  
\v 8 Ascafiacun non Diosquiri chaca huafiainton nantianri Cristo nocohuunoashu nani. Ascano Upa Diosin noco ismani fasi nocohuun noicoinquin. 
\p  
\v 9 Ahuun imi foyanan Criston noco nashoni Upa Diosin noco rau huanon a cuscara shara non inon. Ascacun icoinra huamafoqui Upa Diosin sinaquin ato onaintimaitian noco mimacai huaquin numashqui non omitsiscapanacafo muran canonma.  
\v 10 Non Upa Dios noicasmayopaonitian Furunmun noco nashoni noco numano non afu ipanon. Natian Jesús niahuunshon mima huaquin noco numanon Upa Dios fu non ipasharanon.  
\v 11 Ascano natian nocon Ifo Jesucristo noco Apa Dios ya imapacushquin non ahuunoashu unimacoinon. 
\s1 Adán yafi Cristo 
\p  
\v 12 Ascatan tapicahuun. Adán chaca huaqui tau huani. Chacahuunoashu nani. Ascacufin ahuunshon nantifi manifotifain chaca huamisifoquin. Ascano nantifi nai futsushquin.  
\v 13 Moiséshuunshon Upa Diosin yorafo yonoataima nantifi manifoti anoafoan chaca huapaonifo. Moisés yononi cuscan tapishoma Diosin nanfohuunshoncai ato onaintimanima nannonfo.  
\v 14 Ascafiaquin Adán niyopaonitian non Moiséstianri yorafoti nai futsunifo. Upa Diosin Adán yonofia nicayosmani chaca huani. Adán Dios chaca huani cuscan futsafoan huayamafiacanashu nai futsunifo. Adán onihuaquin tau huani. Chipo Cristo arifi mai ano oni Adán cuscara nocofunu ishquin. Ascafiashucai Adán cuscaracoinma. 
\p  
\v 15 Nan nocofunun Adán ahuun chacahuunoashu nantifi yorafo nai futsucani. Ascan nan nocofunun Jesucristo fusticai ascanima. Ahuunshon yorafohuun ramapaiquin Upa Diosin ato rau huatiro aton chaca soashquin.  
\v 16 Adán chaca huaahuunshon Upa Diosin nantifi namaqui futsai. Ascafia Cristohuunshon aton chaca soashotiro natamarocon afu isharapacunonfo.  
\v 17 Adán ahuun chaca fustihuunoashu nantifi namisifono mimacaiquin Jesucristo fustihuunshon Upa Diosin noco rau huatiro. Noco rauhuano non afu ipasharanon a cuscara shara iishquin. 
\p  
\v 18 Ascano Adán chaca huanihuunoashu fusti nantifi namisifo. Nanscarifiai Jesús ahuun sharahuunoashu fusti nantifi aton chaca soashotiro ato omitsisca huatamarocon ato nimapacunon.  
\v 19 Nan nocofunun Adán Diosin nicacasmaquin tau huanino ahuunshon chaca huapamisifo. Nanscarifiai nan nocofunun Jesucristo fusti Apan yoini cuscain. Ascano Apa nicacoinshon ahuunshon yora ichapa imasharatiro Apa fu ipanonfo. 
\p  
\v 20 Upa Diosin yorafo yonopaiyai cuscan Moisés cunushoni a chaca huamisifo cuscan tapinonfo. Nanhuunshon non tapitiro non fasi chaca huamisi. Mimacaiquin non tapitiro Upa Diosin nocohuun ramapaiquin noco rau huatiro nocon chaca soashoshquin.  
\v 21 Ipaoni chaca fustisi yorafoan aton ifo icaino ato namaquin futsani. Ascafiashu natian Upa Diosin nocohuun ramapaiyaino nocon Ifo itiro. Nocon Ifo Jesucristohuunshon nocon chaca noco soashotiro a cuscara shara non inon afu ipashquin. 
\c 6  
\s1 Non Cristo fu nani cuscaracoin afanan chaca nocon ifo inonma Cristo nishon nocori nimapacunon 
\p  
\v 1 Ascan atirifoanraca shinanquin isca huacaniquin, —Non chaca huafafainfiainoraca Upa Diosin nocohuun ramapaiquin. Nocon chaca noco soashonaran, —ishon amaquiri shinanmisifo.  
\v 2 ¡Ai timafin! Ascayamapacushapainonran. Jesús noco nashoni nocon chaca afanan nocon ifo inonma. Yoran nashocai afanan futsa nicatiroma a furicai afanan rafutiroma. Futsan ahuun iforicai itiroma. Nanscarifiai non Jesús fu naa cuscaracoin chaca afanan nocon ifo inonma.  
\v 3 ¿Man tapiamamun man nonfin unu muran iquimamuaquin Jesucristo ahuun yorashon ato oinmashquin? Ascacun Jesús noco nashoni nocon chaca soashoshquin. Norifi afu naa cuscaracoinshon non afanan chaca huanonma.  
\v 4 Ascano Jesús maini cuscan norifi non chaca huapaoni afu nani cuscaracoin. Ascashon Upa Diosin ahuun curushhuunshon Furun funimani afu ipasharanon. Nanscarifi aqui nocorifi funini cuscaracoin non afu ipasharanon non chaca huapaoni cuscan afanan non anonma. 
\p  
\v 5 Naino non ahuun yoracoin ini afu yora fusti cuscara iishquin. Nacun afincoin funimani isharapacunon. Norifi ahuun yoracoianshu a cuscara funa shara non itiro.  
\v 6 Jesús mastaifono norifi afu masta cuscaracoin. Non chaca huapaoni cuscan cuyonon. Non Jesús ifoataima chaca nocon ifo ipaoni. Non afu masta cuscaracoin afanan chaca nocon ifo inonma.  
\v 7 Shinancapon. Tsoan nashocai afanan chaca huapaitiroma. Marifi Jesús fu naa cuscaracoinshocai man afanan chaca huapaishquima. Afanan chacapan mato yonotiroma mato chaca huamapaiyai cuscan anonma. 
\p  
\v 8 Non Cristo fu naa cuscaracoinshon non icoinra huashu non afu ipasharatiro. Nanri non icoinra huai.  
\v 9 Man non tapia iconcoin Cristo funimani afanan nanonma. Ahuashtatocai afanan Cristo namatiroma. Ahuun ifo itiroma afanan namanonma.  
\v 10 Nai fustinishaquin nocon chaca noco soashoni afanan chaca nocon ifo inonma. Ascano natian Apa Dios fu isharapacunaca. 
\p  
\v 11 Nanscarifi aquin natian man shinantiro isca huaquin, —Un chaca ipaoni cuscan man cuyoa. Afanan ua ahuusca huatiroma. Natian un Jesucristohuunoashu Upa Dios fu rafucacaini ua amapaiyai cuscan aashquin, —ishon anori shinancahuun. 
\p  
\v 12 Ascacufin afanan chaca maton ifo imayamacahuun mato chaca huamapaiyai cuscan ayamacahuun  
\v 13 Isca huaquin shinancahuun, —Yoshin chacan, mian chaca huamapaiyai cuscacai mian amatiroma. Uhuun cayacai minama mian chaca huamapanan, —ishon yoicahuun. Man chaca ipaoni cuscan man naa cuscaracoin. Ascafiashu natian man funa cuscaracoin Upa Dios fu ipashquin. Ascano Upa Dios yoicahuun isca huaquin, —Upa Diosin, unfin minaquin. Mian shara huamapaiyai cuscan ua huamahuu. Uhuun caya non uhuun nomuranri mina mian amapaiyai cuscan ua huamahuu, —ishon yoicahuun.  
\v 14 Moisés yononi cuscacai non atiroma Upa Dios fu ipashquin. Nocon ifocai itiroma non nipanon. Ascatama Upa Diosin matohuun ramapaiquin arusu mato numatiro mato ifo iishquin. Ascano chaca afanan mato ifo itiroma. 
\s1 Upa Diosin mato shara huamapaiyai cuscan man ahuun oinmati inon 
\p  
\v 15 Moisés yononi cuscacai non atiroma noco imasharanon Upa Dios fu ipashquin. Ascan Diosin nocohuun ramapaiquin noco imashara. Nan fusti nocon ifo itiro noco numanon. ¿Ascanocai non chaca huafafaintiromun Diosin nocohuun ramapainon noco chaca soashonon? Ascayamapacupainon.  
\v 16 Man tapian mafi man catontiro ratofomain mato ifoquin. Upa Dios man nicacointiro ahuun oinmati ishquin iyamarai chaca catontiro ahuun oinmati ishquin. Chaca catoanshu man omitsiscapashquin. Ascan man Upa Dios nicacoianshu man afu isharapacunaca.  
\v 17 Man chaca catonpaoni ahuun oinmatifiashon natian Upa Diosin mato yoimisi cuscan maton nomuran man nicacoian. ¡Aicho! Upa Diosin mato imasharamisi.  
\v 18 Ascanocai chaca afanan maton ifo itiroma mato yonoshquin. Natian ahuara shara fusti maton ifo itiro. Manfin ahuun oinmatifoquin. 
\p  
\v 19 Man oinmati yafi ifohuunoa man tapicoian. Ascan atohuunoa un mato yoipaiyai cuscan un mato yoi man shafacafi tapinon. Chaca futsa futsatapafo man huapaoni. Ascacun chaca mato ifo ipaoni. —Ua chaca huamapaiyai cuscan un aashquin. Fasi finacaiari un chaca huairan, —ishon man shinanpaoni. Afanan asca huayamacahuun. Natian Upa Diosin yoicahuun man ahuun oinmatifo. Afanan chaca huatama ahuara shara fusti ahuun oinmati man itiro. 
\p  
\v 20 Ipaoni chaca maton ifo icaino mancai ahuara shara shinanpaonima maton ifo inon.  
\v 21 ¿Man ipaoni cuscan sharamun? ¿Mato imasharamun? Ma. Ipaoni cuscacai afanan afohuunoa man shinanpaima. Afohuunoa man shinainno man rafitiro. Nan chacafo shatuyamaino man naitian man omitsiscapanacafo muran man catiro.  
\v 22 Ascafia natiancai chaca afanan maton ifoma Upa Diosin maton ifo. Manfin ahuun oinmatifoquin. Man ahuun oinmatifocun mato shara huafafaini a cuscara shara man inon man afu ipanon.  
\v 23 Tsoa chaca ahuun ifono ahuunshon ato omitsiscapanacafo muran potashquin. Ascafia nocon Ifo Jesucristohuunshon Upa Diosin noco cashman numano non afu ipanon. 
\c 7  
\s1 Nocofunu fu ainfo fiananfohuunoa cuscara ahuara futsan ato tapimani 
\p  
\v 1 Uhuun yoramishtichin, un mato yoipaiyai cuscan man man tapicoian. Moisés noco yononi cuscan man man tapia. Non niyoano noco yonotiro. Non nano noco afanan yonotiroma.  
\v 2 Iscara un mato tapimapai. Ainfo funun fianocai nocon caifoan yononi cuscan funu niyoano unutiroma. Ascacun funu nanocai afanan tsoan afanan yonotiroma.  
\v 3 Funu nano futsan fitiro. Asca huaquicai chaca huatiroma. Ascafia funu niyoanocai futsa fu fianantiroma. Futsan fiaino furoma chaca itiro. Nannori nocon caifoan yononi. 
\p  
\v 4 Uhuun yoramishtichin, nanscarifi aquin Moisés yononi cuscan maton funu cuscara nan maton ifo ipaoni. Ascafia Jesús mastanifotian marifi man afu naa cuscaracoin. Naashu afanan Moisés yononi cuscan maton funu cuscara itiroma. Cristo naafiashu funini cuscan marifi afu funini cuscaracoin funa cuscara iishquin. Natianfin man Cristonaquin maton ifo inon a cuscara shara ishcaquin.  
\v 5 Jesús man Ifo huataima chaca maton ifon ipaoni. Moisés mato yonopaiyai cuscan atama yoitimacoinshon man fasi chaca huapaoni. Nan chacafohuunoashu non natiro omitsispacunacafo muran noco imatiro.  
\v 6 Non ascafiapaonishaquin non Jesús fu naa cuscaracoin. 
\p Ascanocai Moisés cununi cuscan nocon ifo afanan itiroma. Nococai shinanmatiroma isca huaquin, —Min Moisés cununi cuscan ayamashu min nipatiromaran, —ishoncai noco yonotiroma. Noncai afanan ahuun oinmatima. Natian non Diospan Yoshin Sharahuunoashu non unimacoincain non Upa Dios yonoshotiro. 
\s1 Chacapan ua ifoahuapai 
\p  
\v 7 ¿Ascano Upa Diosin Moiséshuunshon yononi cuscan chacamun? Ma. Anorima. Amaquiri shinanyamacahuun. Moisés cununi cuscan un oinyamashon un chaca huamisi un tapicuanama. Uhuun nomuran un chaca fuchipaipaoni cuscan uhuun ointi un noconi. Moisés cununi cuscan un oinyamashon uhuun ointi muran un shinancuanama.  
\v 8 Ascafia Moisés cununi cuscan oinfiaquicai un chaca shatutama un finacaipaoni. Fasi finonmafain un chaca noipaoni. Upa Diosin noco yonoyamanicai non yoitima icuanama. 
\p  
\v 9 Diosin noco yononi cuscan un tapipaonima un chaca huafiaquicai un mupaonima. Ascafia Diosin noco yononi cuscan un nicacoinshon un ahuunshon tapini unfin chaca huamisiquin. Un tapiniri chaca huamisifo omitsiscapanacafo muran focani.  
\v 10 Un shinanpaoni isca huaquin, —¡Ohuashta! Upa Diosin noco yononi cuscacai un aima. Ua yononi cuscan un aiton ua nimapacucuana. Un ascayamacun ua omitsiscapanacafo muran ua camashquinran, —ishon un shinanpaoni.  
\v 11 Chacapan ua parapaoni. —Upa Diosin noco yononi cuscan un airan, —ishon un amaquiri shinanpaonima ascafiaqui un apaonima. Ascacun un tapipaoni uhuun chacahuunoashu un nai omitsiscai.  
\v 12 Man non tapia Upa Diosin noco yononi cuscan shafacafi sharacoin. 
\p  
\v 13 Sharafiacucai un ascamisima. Ahuunshon ua tapimapaoni non chaca huamisi cuscan fasi chacacoincun. Upa Diosin yononi cuscan sharacoinfiacun ahuunshon mun tapini un ascayamashu un omitsiscacaini nai. 
\p  
\v 14 Man non tapian Moisés cununi cuscan Diosin ahuun Yoshin Sharapan shinanmani. Nan sharafianocai un sharama. Chaca uhuun ifo. Unfin ahuun oinmatiquin.  
\v 15 Ahuuscain un iscamisimun uncai tapiama. Un shara huapaiyai cuscacai un aama. Un asca huapaiyamafiaquin un amisi.  
\v 16 Un asca huafiaquin uhuun nomuranshon un shinan, —Upa Diosin Moiséshuunshon noco yononi cuscan sharacoinran, —ishon un shinain. Moisés yononi cuscan nannoricoin un shinain.  
\v 17 Nannori shinanfiaquicai un chaca huai cuscan un shatutiroma. Uficoin un apaiyamafiaquin chaca uhuun ifono uhuun nomuran ua shinanchacamamisi. 
\p  
\v 18 Mun tapia Upa Diosin ufu iyamaino un chacacoin. Diosimaisicai un ahuara shara shinantiroma. Un sharapaifiaicai un itiroma.  
\v 19 Un sharapaiyai cuscan atama un chaca huamisiquin. Un chaca huapaiyamafiaquin un amisi.  
\v 20 Ascano un tapitiro uficoin un chaca huapaiyamafiaquin chaca uhuun ifon icaino ua yonomisi cuscan un shatutiroma. 
\p  
\v 21 Ufi amisi. Un sharapaifiaiton chacapan ua amaquiri shinanmapai un shara shinanonma. Un ascamisi.  
\v 22-25 Uhuun nomuran, —¡Aicho! Upa Diosin ua yonoa cuscan shararan, —ishon shinanfiai un nicayosmamisi. Ua yonoa cuscan mun tapifiashu un nicayosmamisi. Chaca uhuun ifono ufi sharapaiyain cuscan un atiroma. Uncai chaca shatutiroma. Ascano un tapitiro uhuun nomuranshon un Upa Diosin oinmati ipai ua yononi cuscan aashquin. Ascafia un Dios ifo huayamaino un chacapan ahuun oinmati itiro ua yonomapaiyai cuscan aashquin. ¡Ohuashta! Uhuun nomuran un omitsiscai. Unfin chacaquin. ¿Tsoan ua numatiromun chaca afanan uhuun ifo inonma? Nocon Ifo Jesucristohuunshon Upa Diosin noco numani chaca afanan noco ifo inonma. ¡Aicho! Upa Diosin, min noco shara huamisi. 
\c 8  
\s1 Diospan Yoshin Sharahuunoashu non ica 
\p  
\v 1 Ascano Jesucristo nocon Ifono nonfin ahuun yoraquin. Ascacucai Upa Diosin —Min chacaquin un mia onaintimanon. Umaquinoashu omitsiscapanacafo muran catahuun, —noco huapanacama.  
\v 2 Jesucristohuunshon Diosin ahuun Yoshin Sharapan ahuun curushhuunshon noco nimashara afanan chaca nocon ifo inonma non omitsiscapanonma. 
\p  
\v 3 Moisés yononi cuscan non tapifiacai aton noco isharamatiroma nocon chaca soashquin. Ascan Upa Diosin shinanni cuscan ahuun Furun nai muranshon mai ano nichini arifi noco cuscara yora inon. Noco cuscarafiashocai non chaca huamisi cuscan huamisima. Noco nashoni afanan chaca nocon ifo inonma.  
\v 4 Ascano natian non Diospan Yoshin Shara tanashu Moisés yononi cuscan non atiro. Nocon nomuran chacapan noco shinanmapaiyai cuscan non afanan nicayamashon non Diosin tsain tanasharatiro. 
\p  
\v 5 Non chaca shatuyamashu nan chacapan noco amapaiyai cuscan nan fusti non shinantiro. Ascan Diospan Yoshin Shara noco iquinano noco amapaiyai cuscan nan fusti non shinantiro.  
\v 6-8 Diospan Yoshin Shara nocon nomuran iquinano nocon ointi fasi unimacointiro. Ascashu non Upa Dios fu ipasharatiro. Asca ratoranfo chacapan aton ifo icaino Diosihuunoa shinansharatiroma. Aton nomuran shinanchacamisifo Upa Dios noicasmaifoan. Ascan ato yonomapaiyai cuscan nicacasmamisifo. Chaca shinancaquin Diosin tsain nicatirofoma. Nicayamashu Upa Dios fu ipatamarocon omitsiscapanacafo. 
\p  
\v 9 Ascafia mancai aton cuscarama. Chaca afanan maton ifoma. Diosin ahuun Yoshin Sharafin mato fuqui. Nantofin mato yonomisiquin. Ointiaquimayamacahuun. Tsoan Jesús ahuun Yoshin Shara fu iyamaino ahuun yora itiroma.  
\v 10 Jesús matofu rafufiaino chacahuunoashu maton caya naashquin. Maton caya nafiacun maton yoshin Criston fiananan huai shara man inon afu ipashquin.  
\v 11 Jesús naafiacun Upa Diosin Yoshin Shara funimani. Nan Yoshin Shara matofu rafuaino matori funimashquin maton caya afanan nisharanon. 
\p  
\v 12 Ascacun uhuun yoramishtichin, Diospan Yoshin Shara no fu rafuaino Upa Diosinhuunoa non shinantiro noco amapaiyai cuscan aquin. Non chaca huamisi cuscacai non afanan shinanpaitiroma noco amapai cuscan aquin.  
\v 13 Chaca nocohuun nuano non omitsiscapanaca nai. Ascafia Diospan Yoshin Sharahuunshon non chaca huamisi cuscan non shatuaino afanan chaca nocohuun nutiroma non Upa Dios fu nisharapacunon. 
\p  
\v 14 Diospan Yoshin Shara ato amapaiyai cuscan nicasharamisi. Nanfofin Diospan yorafoquin.  
\v 15 Ahuun Yoshin Shara noco shinansharamapai non afanan ratunonma. Nonfin Diospan Yoshin Shara fiacun nanton ahuun facufo noco ima. Ahuunshon non yoitiro isca huaquin, —Upa Diosin min uhuun Upashtaran, —ishon non yoitiro.  
\v 16 Nocon nomuranshon Diospan Yoshin Sharapan noco yoi isca huaquin, —Min Upa Diosin facucoinran, —ishon noco yoi.  
\v 17 Non ahuun facufocun Apan ahuun facucoin inantiro cuscan nocori inanshquin. Criston ahuun Furuncoinin noco fasi omitsiscashoni. Omitsiscafianishaquin natian Apa Dios fu isharapacunaca. Nantifi Apanari ahuuna. Ascano norifi ahuunoashu natian non omitsiscafiai norifi chipo non afu Upa Dios ano isharapacunaca. Apan Cristo inan cuscari norifi non ahuun facufocun nocori inanshquin. 
\s1 Chipo norifi Upa Dios yafi Cristo fu nisharapacunaca 
\p  
\v 18 Shinancapon uhuun yoramishtichin. Natian non ahuunoashu omitsiscafiaquin non shinanchacanonma. Non aqui nocoaino a cuscara shara noco imai. Non omitsiscai cuscan cuyoshquin. Ascan noco imashara cuscacai unupacunacama.  
\v 19 Upa Diosin ahuun facufo funimashquin a cuscara sharacoin imashquin. Ascan nan onihuanifoan manacani fasi oinsharapaicaquin ahuu cuscaramain non chipo ishquicain.  
\v 20-21 Onihuanifocai payocopaiyamafiai Diosin yononi cuscan payococani. Ascafiaquicai Upa Diosin noco funimanaitiancai onihuaniti afanan payoconacafoma. Nantianri non afu isharamisi afanan ahua chaca finontama. Nanscarifiai onihuanifoti sharashtacoin icani afanan chacanatiroma. 
\p  
\v 22 Man non tapia ainfoan facu cainquin isin mui pashapaitiro. Nanscarifiai nan Diosin onihuanifo omitsiscacaini nashcani. Natianri nanscasi acani.  
\v 23 Norifi non Diospan facufo ahuun Yoshin Shara no fu rafuaino non tapitiro non chipo Dios fu isharatirofiashu natian non isinin itiro pashapaicain. Ascaquin non manasharatiro Upa Diosin icano noco ihuinon non ahuun facufocun a cuscara shara noco imanon. Natianri nocon caya funa sharacoin afanan isinin iyamacain nonricai afanan natiroma.  
\v 24 Noco a cuscara shara imai cuscacai icataima. Ascafia non icoinra huaiton noco numatiro a cuscara shara non inon. Icoinra huashon unimayanan non manasharatiro funaquinma non aqui nocoaitian. Aqui nocoshocai non afanan manatiroma. Manmain oinquifin.  
\v 25 Ascafia noco ihuiataima funaquinma non manasharayotiro. 
\p  
\v 26 Nanscarifi aquin Upa Diosin ahuun Yoshin Sharapan noco ashosharafanfainni. Ahuuscashomain non Upa Dios cufisharatiroquin noncai tapiama. Ascan ahuun Yoshin Shara nocohuunshon noco cufishotiro. Nocohuun ramapaiquin noco cufishonai cuscan sharacoin tsoancai aaton cufiai cuscan huatiroma.  
\v 27 Ahuun Yoshin Sharapan shinain cuscan Upa Diosin onancoian. Nantifi nocon nomuranri non shinain cuscan tapicoian. Upa Diosin noco amapaiyai cuscan nannori ahuun Yoshin Sharapan icoinra huafoti cufishomisi. 
\s1 Jesushuunshon non nantifi finoncointiro 
\p  
\v 28 Ascano non tapia Upa Diosin noco catonni noco amapaiyai cuscan non anon. Non Upa noiaino ahuarafo ahuuscara afiaino afohuunshon Upan noco shara huashoin. Norifi non icoinra huai.  
\v 29 Non Jesús Ifo huataima Upa Diosin tapiyoni ratofoanmain icoinra huaicain. Icoinra huaafotaima shinanni isca huaquin, —Nanfo uhuun facu cuscara un ato imashquinran, —ishon shinanyoni. Ascashon Furun Jesús funimaqui tau huani. Ascashon nocorifi funimashquin a cuscara non inon ahuun chipo facufo inon icai.  
\v 30 Onanyoni non ahuun facufo ishquinon. Ascano noco nomuranshon noco yoini, —Uhuun facu icoinra huahuu. Tsoan anori yoiaiton un ato chaca soashoni isharanonfo, —ishon Upa Diosin yoini. Aton chaca soashonano ahuun Furun sharashtacoin cuscara inonfo. 
\p  
\v 31 ¿Noco asca huasharaino non raquiri yoitiromun? ¿Upa Diosin noco shara huafafainaino futsafoan noco raquiri huatiromun?  
\v 32 Upa Diosin nocohuun noiquin Furun numanima noco nantifihuunoashu nashonon. Ascanishaquin ahuara futsa non yopai cuscan nanfori noco inanshquin.  
\v 33 Upa Diosin noco catonni nocon chaca soashonano Furun cuscara shara non inon. ¿Ascano tsoanmun, —Min chacaran, —noco huatiroquin? 
\p  
\v 34 Jesucristo noco nashocun Apan funimani. Apa Dios icano ato nantifi iquinon. Natianri Upa Dios noco cufishofafaini. Nan iconcucain tsoan, —Min chaca huamisiquin. Asca omitsiscapanacafo muran mia potanon, —noco huatiroma.  
\v 35 Tsoancai noco Cristomaqui imatiroma noco noinonma. Non omitsiscacain nocon nomuran fucash huafain non Jesushuunoa yoiaiton noco omitsiscamafain non fonicain nocon sahuuti yopacain noco musumafain noco rutupaifain noco huafiaquicai noco Cristomaqui imatirofoma noco noinonma.  
\v 36 Diosin tsain cununi isca huaquin, 
\q3 “Upa Diosin, shafatifi non itisharai mihuunoashu naashquin. Chashoanfo yosicun Ifoan ato rutumamisi. Nanscarifi aquin nocori rutupaicaniran,” 
\m ishon cununi.  
\v 37 Noco asca huafafainfiaifoan Jesús noco noiaino ahuunshon non ato finoncointiro.  
\v 38-39 Jesucriston nocon Ifonocai ahuashtaton Upa Diosmaqui noco pashcamatiroma noco noinonma. Nan un icoinra huacoinni. Upa Diosin nocohuun noiainocai ahua ahuuscatiroma nocohuun afanan noinonma. Non nafiancucai amaqui noco pashcamatiroma. Non niyo anoricai amaqui noco pashcamatiroma. Ahuun oinmatifoanricai amaqui noco pashcamatiroma. Yoshin chacafoanricai noco amaqui pashcamatirofoma. Ahuarafo natian icai cuscaricai noco amaquinoa pashcamatiroma. Inonpacoai cuscaricai noco amaqui pashcamatiroma. Ahuara chacafo aton niaifofoanri amaquinoa noco pashcamatiroma. Nan nai ariafo yafi mai anoafoanricai noco amaqui pashcamatiroma. Upa Diosin nocon Ifon Jesucristohuunshon nocohuun noi. Ascano nantifi onihuafoanricai amaqui noco pashcamatirofoma afanan noco noinon. 
\c 9  
\s1 Upa Diosin Israelifo catonni ahuun yorafo inonfo 
\p  
\v 1-3 Uhuun yoramishtichin un Cristohuunshon iconquin un mato yoi. Un muai cuscan mun tapia uncai mato paraima. Un mato iconquin yoi. Diospan Yoshin Sharan ua shinanmanai cuscan un iconquin yoicain. Uhuun caifo Israelifoancai nocon Numamisi icoinra huafoma. Ascacun uhuun nomuran un atohuunoashu omitsiscacaini. Un ato fasi shinancoinmisi. Uhuun caifo uhuun nomuran un ato shinanmisi isca huaquin, —Upa Diosin uhuun yora Israelifo un ato numapai mifu nipanonfo. Ascano ato Cristomaqui omitsiscapanacafo muran potatamarocon uacai potahuu un ato numanon, —ishon un anori shinanfiainocai Upa Diosin ascatiroma.  
\v 4 Upa Diosin ato catonni ahuun yorafo inonfo. Ato fu iyoshon ato ismapaoni ahuu cuscaramain aaquin. Ato shara huapaiyai cuscan ato yoiyoni. Ascashon ato yononi isharanonfo. Ato yosini ahuuscashomain ichananshon cufitirofoquin. Ascarifi atan ahuara sharacoin ato ashoain cuscan yoiyoni.  
\v 5 Maton shunifofoan Upa Dios tanasharafafainpaonifo. Nocon Ifo Cristo arifi Israeliri ini. Nocon shuni Abraham non Isaac non Jacobori aton funa. Aafin natian nantifiton aton ifoquin ato iquina. Ascan Upa Dios fasi shararan non huapanon. Amen. 
\p  
\v 6 Upa Diosin noco yoisharayoni cuscan uhuun caifo Israelifoan icoinra huayamafiaifoan ahuun tsain iconcoin. Ahuun yorafo yoiyoni cuscan ashquiquin. Ahuun yorafo shara huafiainocai atirifi Israelifo Diospan yorama.  
\v 7 Nanscarifi aquicain Abraham acai cuscan ahuun funa atirifoan icoinra huamisima. Afocai Diospan yorama. —Abraham ahuun facu futsafoyafiacun Diospan tsain cununi cuscan ahuun facu Isaac yafi ahuun funafo nanfosi Upa Diosin yoiyoni cuscan fitiroran, —ishon cununi. 
\p  
\v 8 Ascano non tapitiro atirifi Abraham funafocai Diospan yorama. Diosin Abraham yoiyoni ahuun facu chipo cainshquiain. Yoiyoni cuscan Abraham icoinra huani. Nan icoinra huafosi Diospan yoraquin. Abraham facu cuscarafo.  
\v 9 Abraham ahuin Sarapan facu nanuataima Upan Diosin yoiyoni isca huaquin, —Fari futsan un miqui nasoshquin. Nantianri min ahuin Sarapan facu furonanfacu cainshquiran, —ishon yoini. 
\p  
\v 10-13 Ascano man fari ichapa finontan Sarapan facu Isaac ahuin Rebeca rafanacani. Caiantaima Upa Diosin yoini isca huaquin, —Min facu Esaú cain taui. Afu rafanaca Jacob. Chipocuton oinmati cuscara iyoa ishquiran, —ishon yoini. Caiantaimacai ahua chaca huafain shara huatian inima. Ascafian Diosin yoiquin, —Jacob un noiquin un ashoin. Un iyoa Esaucai un noiquin asca huaima, —ishon Diospan tsain cununi. Ascano non tapitiro Diosin inonpacoai shinanyoni cuscan atiroquin. Esaú futan Jacob amisifo cuscacai shinanyonima. Aafin apaiyai cuscan yoiyoni. 
\p  
\v 14 ¿Ascano Upa Diosin shinancoinmamun? Ma. Anoricai non shinantiroma.  
\v 15 Upa Diosin yoini isca huaquin, 
\q3 “Nan un noipaiyaifin un noitiroquin. Nanscarifiai nan un ahuun ramapaiyaihuurifi un ramapaitiroquin,” 
\m ishon Upa Diosin Moisés yoini. 
\p  
\v 16 Ascano non tapitiro futsan shinanquin, —Diosin ua shara huashopainon, —ishon shinantiro iyamarai, —Un Upa Dios yonoshosharatiro ahuun rafanan ua inansharatiroran, —ishon non shinanfiatirocai anorima. Upa Diosin afin nocohuun ramapaiquin noco catontiro non ahuun yorafo non inon noco inansharashquin.  
\v 17 Ascano Upa Diosin Egipciofo aton niaifo yoini, —Un mia niaifo imashquin nantifi manifoti anoafoan un ahuamamishti huatiro minhuunshon tapinonfo, —ishon yoini.  
\v 18 Ascacun non tapitiro Upa Diosin futsa ahuun ramapaiyaihuunri ramapaitiroquin. Nanscarifi aquin futsan chaca huafafaina cuscan shatuamashu ointi mutocoin imatiro. 
\p  
\v 19 Man futsan ua yoiraca isca huaquin, —Ascacun non chaca huaiton noco shatumanama nocon ointi mutocoin imashquin. ¿Ascafia ahuuscain Upa Diosin nocohuun nuamun? Afin apaiyai cuscacai tsoan atima huatiroma, —itsairaca amaquiri yoiquin.  
\v 20 Ma. Asca huayamacahuun. ¿Ahuuscain min Upa Dios tafipaimun? Minfin nocofunuquin. Aafin Diosiquin. Ahuara onihuamuatocai yoiqui isca huatiroma, —¿Ahuuscain mian iscara onihuamun? —huatiroma.  
\v 21 Cutin onihuamisiton mapo nan apaiyai cuscara shara cutin huatiro. Futsa amuran ahuara chaca nanuti huafain futsa amuran ahuara shara nanuti huatiro. 
\p  
\v 22 Nanscarifiai Upa Diosin nantifi yora onihuafiacun atirifoan ahuun tsain nicacasmamisifo. Funainquimashta ato yoiyofiaiton nicayamacaiyaifoan inoncai atoqui sinaquin. Ato potatiro chacani fustisi tapiaifoan. Asca huaquin ato ismatiro ahuamamishti huatiro cuscan.  
\v 23-24 Ascafiacai non ato cuscarama. Nocohuun ramapaiquin noco tapimamisi. Ascatari noco itisharamai unimacoincai non afu ipanon. Noco Israeli fusti catonnima non afu ipanon. Mani futsafori catonni.  
\v 25 Oseas nan inonpacoai yoimisiton Diosin tsain cununi isca huaquin, 
\q3 “Futsafo Israelifomari un catonshquin uhuun yorafori inon. Tsoancai ato noiyomisimafiacun un ato yoishquin. Un mato noiran,” 
\m ishon Upa Diosin yoini cuscan Oseas cununi.  
\v 26 Afanan ato yoini iscahuaquin, 
\q3 “ ‘Mancai uhuun yoramaran,’ ishon Diosin mato yoiaran, huanifo. Ascafia chipo atohuunoa yoishcaquin, ‘Upa Diosin niaton man ahuun facuforan,’ ishon yoishquicani.” 
\m  
\v 27 Isaías nocon caifo Israelifohuunoa yoini, 
\q3 “Israelifo ichaparasi ishquicani tsoan ato tanan huatiromafiashu fustirasiton icoinra huashquicani Upa Dios fu ipashcaquin.  
\v 28 Yoini cuscan iconcoin. Yoiyoni cuscan manifoti anoafoan nan icoinra huafoma nocon Ifoan ato onaintimariscashquin. Afanan ato manashquima,” 
\m ishon Isaías cununi.  
\v 29 Ascashon Isaías afanan yoiyoni cuscan nanscacoiain. Isca huaquin, 
\q3 “Upa Diosin ahuamamishti huatiro. Nocon caifo Israelifo fustirasi numani atifi cuyononfoma. Asca huayamaino non Sodoma yafi Gomorra cuscarafo icuana. Nonrifi non cuyocuanaran,” 
\m ishon Isaías cununi. 
\s1 Israelifo yafi nan tsain shara Jesushuunoa 
\p  
\v 30 ¿Ascano afohuunoa non raquiri yoitiromun? Nan Israelifoanmacai aton chaca shatucasmamisima Upa Diosin icoinra huashquin aton chaca soashonon. Ascafia natian atirifoan Jesús icoinra huaifoan Upa Diosin aton chaca soashona a cuscara shara inonfo.  
\v 31 Ascafia uhuun caifon Israelifoan Upa Diosin Moiséshuunshon ato yononi cuscan sharapaicaquin. Ascafiacai Moisés yononi cuscahuunoashu shara inonfoma.  
\v 32 ¿Ahuuscain iscaimun? Un mato yoinon. Nanfoancai Diospan Furun Jesús icoinra huaafoma aton chaca soanon. Ascatamarocon Moisés ato yononi cuscahuunoashu isharapaiafo aton chaca soashquin. Un mato ahuara futsa nicamapai. Toquiri fasi uhuapa fai naqui raca finonpai aqui oroshcomutiro. 
\p  
\v 33 Nanscarifi aquin Jesús finonpaiyaifoancai icoinra huacanima nipashcaquin. Nannori inonpacoai cuscan Isaías Diospan tsain cunuyoni isca huaquin, 
\q3 “Un Israelifo aton fai naqui toquirininhuan ratain. Ahuunoashu yorafo pacunonfo,” 
\m ishon cununi. 
\q3 “Nanscarifi aquin Upa Diosin Jesús Israelifoqui nichini tsoan icoinra huayamashu funocoincani nipashcaquima,” 
\m ishon cununi isca huaquin, 
\q3 “Ascafia tsoan icoinra huacoinshon shinanchacanacamaran,” 
\m ishon Diospan tsain Isaías cununi. 
\c 10  
\p  
\v 1 Uhuun yoramishtichin, uhuun nomuran uhuun caifo un fasi shinain. Un atohuunshon Dios cufifafaini Jesús icoinra huanonfo Dios fu nipashcaquin.  
\v 2 Mun tapia nanfoanfin Upa Dios fusti fasi tanapaisharafiaquin amaquiri shinanfoquin.  
\v 3 —Nonfin Moisés noco yononi cuscan non aino Upa Diosin nocoqui unimatiro noco numanonran, —ishon shinanpaonifo. Ascano Upa Diosin ato Jesushuunshon imasharapaiyai cuscan afu ipashcani. Ascafia nicacasmapaonifo.  
\v 4 Moisés yononi cuscan Criston mai ano niyoshon nantifi apaoni. Ascano Moisés noco yononi cuscacai non afanan yopatiroma nocon chaca soanon Upa Dios fu ipashquin. Tsoan Cristo icoinra huaiton aton chaca soashotiro afu ipasharanon. 
\p  
\v 5 Moisés isca huaquin cununi, —Upa Diosin noco yononi cuscan nantishon tapiquin non chaca huayamashu Upa Dios fu non nipatiroquin, —ishon cununi.  
\v 6 Ascafia non Jesús icoinra huashon non isca huaquin yoitiro, —Maton nomuranshocai man isca huaima, “¿Tsoamun nai muran catiroquin Cristo fotomashquin noco numayonon?”  
\v 7 Iyamarai, “¿Tsoamun mai muran catiroquin Cristo funishquin?” —ishon yoiyamacahuun.  
\v 8 Anorimaquin. Man Cristo icoinra huaiton mato numatiro. Nannori non mato yoimisi. —Mancai raqui cayotiroma Cristo fu ishquin. Natian man Cristo yoitiro matofu rafunon. Maton nomuranri man icoinra huacun matofu rafutiroran, —ishon Moisés cununi.  
\v 9 Ascano, —Jesús uhuun Iforan, —huafain man shinanquin isca huai, —Jesús nafiacun Apa Diosin funimaniran, —ishon maton nomuran man icoinra huaiton maton chaca soashotiro afu man ipanon. 
\p  
\v 10 Ascan maton nomuranshon man icoinra huacun Upa Diosin maton chaca soashotiro man isharanon. Man futsafo, —Jesucristo uhuun Iforan —ishon yoiaiton mato imapacunaca.  
\v 11 Nannorifi Diospan tsain cununi, —Tsoan Criston Diospan Furun icoinra huaashucai rafipacunacafoma, —ishon cununi.  
\v 12 Israelifo iyamarai mani futsafoan icoinra huaifoan aton Ifo itiro. Diosinacai ahua rafuma. Nanscarafosi. Nan icoinra huafoti aton Ifon. Fasi atohuun noiquin ato ya imapacunon.  
\v 13 Ratoran nocon Ifon icoinra huashon yoiqui isca huaiton, —Ifon, ua numahuu, —huaiton afu ipatiroquin. 
\p  
\v 14 ¿Ascafia ahuuscashocon, —Jesús ua numahuu, —huatirofomun icoinra huacatama? Ahuunoa nicamisimashaquicai ahuuscashon icoinra huatiroma. ¿Futsan Jesushuunoa ato yoiamaino ahuuscashocon nicatirofomun?  
\v 15 ¿Ahuuscashocon yoifotirofomun futsan ato nichiamaino? Nannori Diosin tsain cununi isca huaquin, —Nan tsain shara futsafo yoifononfo nan fasi sharacairan, —ishon Isaías cununi.  
\v 16 Ascafia nan tsain shara atirifi Israelifoan icoinra huacanima. Nannori Isaiasin afanan cununi isca huaquin, —¿Ifon, non ato yoia cuscan tsoan icoinra huamun? —ishon yoini.  
\v 17 Ascano tsain shara nicaquin icoinra huatirofo. Nan tsain shara Jesucristohuunoa. 
\p  
\v 18 ¿Uhuun caifo Israelifoan nan tsain shara Jesushuunoa nicamisimun? Ai, man nicamisifo. 
\q3 “Manifoti anoafoan nan tsain shara man nicafo,” 
\m ishon David cununi.  
\v 19 ¿Uhuun caifoan tapinimamun nan tsain shara Cristohuunoa nicacasmaifoan Upa Diosin caifo futsafo yoitiro ato numaquin? Ai, man nicamisifo. Moisés niyoshon ato Diosin tsain yoini isca huaquin, 
\q3 “Uhuun yora Israelifoan un afanan ato uhuunoa shinanmapai. Ascan un caifo futsafo uhuunoa un shinanmai Cristohuunoa shinanonfo ato numanon. Nan oincani Israelifori uqui nasopaitiroran,” 
\m ishon Diosin yoini cuscan Moisés cununi.  
\v 20 Chipo Isaías ranotama yoini isca huaquin, 
\q3 “Mani futsafoan ua funayamafiacaquin ua icoinra huafo. Uhuunoa yocayamafiamisishaquin un ato uhuunoa onanmanaran,” 
\m ishon Diosin yoini cuscan Isaías cununi. 
\p  
\v 21 Ascafia uhuun caifohuunoa yoini, 
\q3 “Un shafatishon un ato cuna uqui fucahuun. Un ato huafiacai uqui fupaicanima. Yoitimamisiforan,” 
\m ishon Upa Diosin yoini cuscan Isaías cununi. 
\c 11  
\s1 Ascan Upa Diosin Israelifo catonni 
\p  
\v 1 Ascano un mato yocanon. ¿Upa Diosin ahuun yora Israelifo potapacunacamun? Ma. Anorima. Unrifi Israeliquin. Abraham non Benjamín uhuun shunifo.  
\v 2 Upa Diosin ahuun yora inonpacoai cuscan onanshocai ato potamisima. Shinancapon. Nocon shuni Elías Israelifohuunoa Upa Diosin yoini isca huaquin,  
\v 3 —Ifon, min tsain inonpacoai cuscan yoimisifo rutuafo. Mia a muranshon cufiti choquiaquin futsafo. Uru fusti un tushufiacun uari rutupaicaniran, —ishon Elías Upa Diosin yoini. 
\p  
\v 4 ¿Ascan Upa Diosin raquiri Elías cumanimun? Isca huaquin cumani, —Ma. Mirus fusticai min tushuama. Siete mil min yora futsafoanri ua noiafo ahua futsacai ifoanfoma. “Baalcai uhuun diosiran,” huamisifomaran, —ishon Diosin Elías cumani.  
\v 5 Nanscarifi aquin natianri Upa Diosin uhuun caifo fustirasi catoan atohuun ramapaiquin.  
\v 6 Ahuara shara huaa rafanancai ato catoanma. Atohuun noiquin ato catoan. Dios non yonoshonaitocai noco catoanma. Ahuara yonoshomacai non cashman fitiroma. Ascanfiacai non Upa Dios yonoshotiroma noco catonon. Noco cashmancoin catoan. 
\p  
\v 7 Ascano uhuun caifo Israelifo Moisés yononi cuscan apainifo aton chaca soanon Diospan yora ipaifiashucai ahuun yorafo icafoma. Diosin catoanfosi aton chaca soashona ahuun yorafo inonfo. Nan futsafoan aton ointi mutonifo.  
\v 8 Nannori Diosin tsain cununi isca huaquin, 
\q3 “Upa Dios nicacasmafo. Ascan ato oshamana cuscara shinantsa afo ahuunoa shinanonfoma. Oinfiacani fusho cuscarafo. Nicapaicoinnifoma. Ascaiton ahuun tsain shara ato tapimanima. Natianri nanscacani,” 
\m ishon Moisés cununi.  
\v 9 Nannori nocon niaifo shuni ipaoniton David yoini isca huaquin, 
\q3 “Nan nicacasmamisifo onaintimapainon. Tushu ichapayafo futan mafo ichapayafoanriraca shinanfo Upa Diosin atoqui unimai. Ascarama. Amaquiri shinanshu omitsiscapainonfo.  
\v 10 Ato fusho cuscara imapainon. Ato cacoapainon aton ointi ihuu ipainonran,” 
\m ishon David Dios nicacasmamisifohuunoa yoini. 
\s1 Israelifoanmari Jesús icoinra huacanashu afu nipanonfo 
\p  
\v 11 ¿Ascano uhuun caifo Israelifoan nicacasmamisifoquin Upa Diosin ato potapacunacamun? ¡Ma! ¡Anorima! Chaca huafoan Jesús nicacasmacani. Ascacun mani futsafo Jesushuunoa yoi icoinra huanonfo afu ipashquin. Nanfoan Jesús icoinra huaiton uhuun caifo Israelifoan oincashon shutitan ifoanpaitirofo. Nannori Upa Diosin ato shinanmapai.  
\v 12 Uhuun caifofoan chaca huapaonifo Jesús ifoanpaiquinma. Ascano Upa Diosin manifoti anoafo Jesushuunoa tapimanano icoinra huashu nipanonfo. Ascano isharafo. Diosin ato shara huashoan. Ascafia uhuun caifori chipo Jesús icoinra huacanashu nantifi manifoti anoafo mimacai unimashcani. 
\p  
\v 13 Man uhuun caifoyamafiacun Upa Diosin ua mato muran nichini Jesushuunoa un mato yoinon. Un Jesús fu rafumisi. Ascashon un ahuunoa mato yoi. Un fasi unimai Upa Diosin ua catonni un mato yoinon.  
\v 14 Uhuun caifori un yoimisi Upa Diosin ua matoqui nichini. Man unimaiton oincani afoanri mato shutipaitirofo Jesús icoinra huapaicaquin.  
\v 15 Shinancapon. Afoan Jesús ifoanpaiyamaifoan. Mani futsa anoafo Upa Diosin ato tapimani. Nicacashon Jesús ifoannifo. Nan sharafiashu uhuun caifoanri Jesús icoinra huaifoanno fasi sharacoin iishquin. Yora naashu funia cuscara itiro.  
\v 16 Uhuun caifoan Jesús icoinra huaquin tau huanifo. Ascan nocon funafori chipo Diospan yorafo iishcani. Fanafo ahuun tapo sharano ahuun poyanfori shara itiro. Nanscarifi aquin Upa Diosin Israelifo catonni ato shara huaquin. Ascano aton funafori catonshquin aforifi imasharashquin ahuun yorafo inonfo. 
\p  
\v 17 Un mato iscara tapimapai man tapinon. Israelifo ihui fana poyan cuscarafo. Abraham Dios icoinra huaquin tau huano. Ahuun funafori Diospan yorafo ipaonifo. Nanfofin ihui fana poyan cuscarafoquin. Natian Upa Diosin ihui fana poyan fimioma poshtushon potani. Nanscarifi aquin Israelifoan Jesús icoinra huayamaiton ato pota. Manfin nan ihui poyan futsa cuscarafoqui. —Ihui olivoran, —ishon anuni. Nan ihui fana olivo ahuun poyan futsaqui tuchia. Abraham fana futsa poshtushon futsaqui tuchia cuscara. Nanscarifiai uhuun caifoan man icoinra huayamaiton Diosin mato ihui ahuun facufo man inon. Diosin Abraham yoini cuscan natian marifi man ahuun yorafo inon. 
\p  
\v 18 Ihui fanacai ahuun tapomaisi nitiroma. Tsasitiro. Ihui fana ahuun poyanfo non ahuun tapohuunoashu nipatiro. Poyafoancai ahuun tapo nimatiroma. Nanscarifiai mancai Jesús nimapacutiroma. Nantocaifin mato nimapacutiroquin. —Noncai futsafo cuscarama. Nonfin Diospan yorafoquin, —iyamacahuun. Cacapaimisi iyamacahuun.  
\v 19 Man shinanraca. Fana poyan chacaran ishon man poshtushon potatiro. Nanscarifi aquin Israelifoan icoinra huayamaifoan ato potani. Ascano non ahuun yorafo inon. Ascacun, —Non shararan —ishon man shinanquin.  
\v 20 Nan iconfiashu oinfain. Nan Israelifoan icoinra huayamaifoan Upa Diosin ato potani. Man icoinra huashufin ahuun yorafo man iquicai. Ascan cacapaimisi itama, —Non Jesús icoinra huayamashu non funotiroran, —ishon shinancahuun.  
\v 21 Israelifoan icoinra huaquin tau huafianishacaquin chipo aton funafoan icoinra huayamaifoan Diosin ato potani. Manrifi man icoinra huayamaiton matori potatiro. 
\p  
\v 22 Ascacun shinancapon. Upa Diosin matohuun ramapaiquin ahuun yorafo mato imai. Israelifoan icoinra huayamaifoan ato onaintimaquin ato potani. Ascan matohuun ramapaiyai cuscan shinanfafaicahuun. Icoinra huafafaincahuun. Man ascayamaiton matori potatiroquin.  
\v 23 Uhuun caifofoan afanan chaca shinainyamaifoan Jesús icoinra huaifoan afanan ahuun yorafo Upa Diosin ato imatiro. Fana poshtushon afanan poyan tuchitiro cuscan atorifi huatiro ahuun yorafo inonfo.  
\v 24 Ifoancai ihui olivo fanamisima ahuun poyan shatushon fana futsaqui tuchini foaisharanon. Nanscarifi aquin man Diospan yora ipaonima. Ascan natian Upa Diosin mato ihuia man ahuun facufo inon. Ascacun mimacaiquin uhuun caifo afanan ihuitiro ahuun yorafo inonfo. Jesús icoinra huaifoan ahuun yorafo ato imatiro. 
\s1 Upan Diosin Israelifo numashqui ahuun yorafo inonfo 
\p  
\v 25-26 Uhuun yoramishtichin, tsain futsanhuunoa man shinanmisima un mato tapimai maton nomuran man shinanon. Nan tapianshu cacapaimisi man inonma. Icon natian uhuun caifo Israelifoan aton ointi curushu Diospan tsain shara Jesushuunoa nicacasmacani. Ascafia uhuun caifomafoan ahuun unutaqui Jesús icoinra huaifoan Upa Diosin ahuun yora imashquin. Nantianricai afanan uhuun caifoan nicacasmamisi ishcanima. Ascano nantifi Israelifoan Jesús icoinra huaifoan Upa Diosin ato numai ahuun yorafo inonfo. Nannori nocon shuni Isaías cununi isca huaquin, 
\q3 “Nocon Numamisi Sión ano icaquin. Afin Israelifo numai oi afanan chaca huanonfoma.  
\v 27 Nantianri un yoini cuscan un aton chaca soashoshquiran,” 
\m ishon Diosin yoini cuscan Isaías cununi. 
\p  
\v 28 Uhuun caifofoan tsain shara Jesushuunoa nicacasmacani. A noicasmacaquin. Ascacun Upa Diosin mato shara huashoan. Ahuun tsain shara Jesushuunoa man icoinra huanon. Mato shara huafiano uhuun caifoan nocon shunifo Abraham non Isaac non Jacob yoini cuscan ointiaquimama. Ascacun atohuunshon aton funa Israelifori ato noi.  
\v 29 Upa Diosin nocon caifo inanonpacoai cuscan yoiyonishaquin afanan shinan futsanpacunacama. 
\p  
\v 30 Mancai Upa Dios nicapaipaonima. Ascafiacun Upa Diosin uhuun caifo shara huapaiyai cuscan ato shara huatamarocon matohuun ramapaiquin mato shara huai.  
\v 31 Nan man nicacasmapaoni cuscarifi uhuun caifofo nanscarafosi. Ascafiano matohuun ramapaiyai cuscan aforifi chipo Upa Diosiqui nasoshcani atohuun ramapainon.  
\v 32 Upa Diosin yoini cuscan nantifi maniafotiton chaca huamisifo. Ascafiacun atohuun ramapaiquin ato numanon. 
\q1  
\v 33 ¡Aicho! Nocon Dios fasi sharacoin. 
\q2 Nantifi yorafohuun ramapai unupacunacama. 
\q1 Aafin apaiyai cuscan tapicoianquin. 
\q2 Nantifi tapicoian inonpacoai cuscan tapifain aafin noco ashoai cuscan tapicoian. 
\q1 Ahuun nomuran yorafohuunoa shinain cuscan non tapipaifiaquicai tsoanshta tapitiroma. 
\q2 Aaton acai cuscan tsoan tapitiroma. 
\q1  
\v 34 ¿Tsoamun nocon Ifoan shinain cuscan tapitiroquin? 
\q2 Tsoancai Dios tapimatiroma ahuun tapimamisi inon. 
\q2  
\v 35 Tsoancai Dios ahuara inantiroma ato nifinon. 
\q1  
\v 36 Arusu ahuun nomuran shinain cuscan nantifi onihuani. 
\q2 Ahuun curushhuunoashufin nantifi itiro. 
\q1 Nantifi ahuuna. 
\q2 Nantifi onihuafotiton ahuunoa yoisharapacunacafo. 
\q1 Ascacun, —Diosin sharacoinran, —huapanonfo. 
\q2 Amen. 
\c 12  
\s1 Ahuuscashumain Diospan ahuun yonomati non itiroquin 
\p  
\v 1 Uhuun yoramishtichin un mato yoisharapaiyai cuscan acapun. Upa Diosin matohuun ramapaiquin mato shara huamisi. Ascacun marifi matohuunoa inancahuun mato ifo inon ahuun yonomati ipashcaquin. Man ascaino afanan chaca maton ifo itiroma ahuunacoin man inon. Shinancapon. Man cayacafi shinansharacoinquifin matohuun noiai cuscari marifi man ahuun noitiroquin. Man ascaino Upa Diosin fasi matoqui unimacoin.  
\v 2 Ahuarafoan Upa Diosimaqui mato imapaiyaifo cuscan atama shinan futsancahuun Diosin mato imapaiyai cuscan aashquin. Man shinanpaoni cuscan afanan shinanyamacahuun. Natian Diosin maton nomuran shinan futsama sharapaiyai cuscan shinancahuun. Man ascaquin man tapitiro Upa Diosin mato imapaiyai cuscan sharacoin. Mato imapaiyai cuscan man aino matoqui unimacointiro. Ahua futsacai man yopatiroma. 
\p  
\v 3 Upa Diosin uhuun ramapaiquin ua maton muran nichini un mato tapimanon. Ascan un nantifi mato yoisharapai. Cacapaimisi iyamacahuun. Diosin mato imapaiyai cuscan fusti shinancahuun. Ahua futsa ipaiyamacahuun. Man Dios icoinra huatiro cuscan afin mato shinanmanaino cayacafi shinansharacahuun. Man icoinra huaa cuscan nan fusti Upa Dios ashocahuun.  
\v 4 Un mato ahuara futsa yoipai isca huaquin. Nocon cayan fustifiano non pashcoi futsua. Afocai ascarafosima.  
\v 5 Nanscarifiai nocon Ifon Jesús fusticoin. Nonfin ahuun yorafoquin. Non ahuun cayan cuscarafoashu non yopanonainquin. 
\p  
\v 6 Upa Diosin nocohuun noiqui cashman noco imapaiyai cuscan non ahuunshon futsafo ashosharatiro. Noco imapaiyai cuscacai non ascarafosima. Upa Diosin man atirifi catoan ahuun shinanhuunshon icoinra huaa futsafori ahuun tsain yoinon. Mato catoncun man icoinra huashon mato yoia cuscan futsafori ahuun tsain yoicahuun.  
\v 7 Ratoranfo catoncun ahuun shinanhuunshon futsafori ashosharanon ato shara huashofafaincahuun. Ratoranfo catoncun ahuun shinanhuunshon ahuun tsain ato tapimasharacahuun.  
\v 8 Ratoranfo catoncun ahuunshon futsafo ointi fupi huamafafaincahuun. Ratoranfo catoncun yopaifo inanquin ato unimacain inansharacahuun. Ratoranfo ahuun shinanhuunshon futsafo yononon Diosin shinanma cuscan ato yonosharacahuun. Nan mato catoncun ahuun shinanhuunshon omitsiscaifohuun ramapaiquin unimaquin ato ashosharacahuun. 
\s1 Futsafohuun noicoincahuun 
\p  
\v 9 —Un mato noiran, —ifiacatan parayamacahuun. Atoqui shinanchacayamacahuun. Yorafohuun noicoincahuun. Ahuara chacafo noicasmacahuun. Ahuara shara fasi noicahuun. Afo potayamacahuun.  
\v 10 Nan man icoinra huafoti noinancahuun. Maton yoracoinfo man noimisi cuscan huafainri futsafo ya noinancahuun. Yoinansharatanancahuun.  
\v 11 Nocon Ifo yonoshoni shaniyamacahuun. Diospan Yoshin Sharahuunshon unimacain yonoshosharacahuun.  
\v 12 Upa Diosin mato shara huashoshquiai cuscan shinancahuun. Nanfo shinain unimacahuun. Ascan omitsiscafiain funayamacahuun. Upa Dios cufinquin unuyamacahuun.  
\v 13 Diospan yorafo yopai cuscan ato inancahuun. Futsafo pimasharacahuun. Pushu yopaifoan maton pushu muran ato iquimacahuun. Ato cushusharacahuun. 
\p  
\v 14 Mato omitsiscamaifoan ato copiyamacahuun. Ato roayamacahuun. Asca huatama ato shara huacahuun. —Upa Diosin mia shara huairan, —ishon ato yoicahuun.  
\v 15 Unimaifo ya unimacahuun. Uaicaifo ya uaicahuun. Omitsiscaifoan ato shinancahuun.  
\v 16 Ahuu iquinan tananquima. Upan Diosin mato shinanmapaiyai cuscan nanorisi shinancahuun. Oinanmitsapaimisi iyamacahuun. Niaifofo yasi rafucaquima. Ahuuomafo yari rafucahuun. —Un tapia cuscacai futsafoan tapiafomaran, —ishon anori shinanyamacahuun. Curafiayamacahuun. 
\p  
\v 17 Mato chaca huafiainfoan ato copiyamacahuun. Aton ointaifi isharacahuun.  
\v 18 Nantifi yorafo ya rafupaisharacahuun. Man asca shara huapaifiaino futsan matofu isharapaiyamainocai matohuun nuama.  
\v 19 Uhuun yoramishtichin, futsan mato chaca huafiainton ato copiyamacahuun. Upa Diosin yoini, 
\q3 “Mato chaca huaifofin unfin ato onaintimaicai,” 
\m ishon Diosin yoini. Diosifin chacafo ato onaintimashquiquin. Mancai ato onaintimaima. 
\q3  
\v 20 “Ato copitama nan mato noicasmaifo fonaincaifoan ato piimacahuun. Nonmaincaifoan ato ayamacahuun. Man ascaiton oincani noco copimaran,” 
\m icashu rafipainonfo.  
\v 21 Ascan futsafoan mato chaca huapaiyaifoan marifi copiquiri ato chaca huayamacahuun. Chaca ifo huayamacahuun. Ascatama shara huafafaincahuun. Asca huaquin man chaca potatiro. 
\c 13  
\p  
\v 1 Upa Diosin yononi cuscan manifoti anoafo niaifofo catononfo. Ascan nantifi niaifo uhuapafo yafi patasharifori nicacoincahuun.  
\v 2 Tsoan ato nicacasmaquin Diosinri nicacasmacani. Nan nicacasmaifoan ato onaintimashqui.  
\v 3 Non isharashucai non niaifoqui musutiroma. Chaca huashufi non atoqui musutiroquin. Niaifoqui musushquinma isharacahuun. Man ascaiton mato chaca huatama matohuunoa yoisharanonfo.  
\v 4 Niaifofofin Upa Diosin oinmatifo cuscarafoquin mato shara huashcaquin. Ascafia chaca huaashu ratucahuun afocai cashman niaifoanma. Yorafo onaintimatirofo. Nanfofin Diospan oinmatifo cuscarafoquin chaca huaifoan onaintimashcaquin.  
\v 5 Asca mato yonoaifoan nicacoincahuun mato onaintimanonfoma. Maton nomuran isca huaquin shinannonfoma, —¡Ohuashta! Upa Diosin yononi cuscan un aamaran, —ishon shinanshcaquima. 
\p  
\v 6 Diospan oinmatifo cuscara mato shafatifi yonoshcaquin man isharanon. Ascacun mato pui yocaifoan ato inancahuun ahuunshon mato shara huashononfo.  
\v 7 Man ato nifian cuscan inancahuun. Atohuunoa shinansharafain yoisharacahuun. 
\p  
\v 8 Tsoa nifiyamacahuun. Ascatama noinancahuun. Noinain unuyamacahuun. Nantifi non noiquin Upa Diosin yononi cuscacoin non huatiro.  
\v 9 Noco yoiqui isca huani, —Maton ahuinmafo ya iyamacahuun. Ainfofori mato funuma furi iyamacahuun. Rutumitsapaiyamacahuun. Ahuara onuyamacahuun. Futsana fipaiyamacahuun, —ishon noco yononi. Ahuara futsafori noco yoini. —Non yorafo noifin Upa Diosin noco yononi cuscan non aicain, —ishon noco yononi.  
\v 10 Non futsafo noicoinshocai non ato chaca huatiroma. Ascan non nantifi noicoinshofin Diosin yononi cuscan non atiroquin. 
\p  
\v 11 Un mato yoiai cuscan acahuun. Nocon Ifo Jesús oti chaima. Non icoinra huaquin tau huani chain. Oshapaimisi cuscara iyamacahuun. Oshapaicai non yonosharatiroma. Nanscarifiai shanicaquima. Jesús yonoshosharacahuun itisharashcaquin.  
\v 12 Shafacuaino samamashta shafatiro. Nanscarifiai man chaca huai cuscan cuyocuanaino natianri nocon Ifo man oti chaimaquin. Ascashu faquish muran ica shinantsa ayamacahuun. Chaca shatucoincahuun. Jesús ica cuscan marifi shafacafi icahuun. Chaca huaquima. 
\p  
\v 13 Isharacoincahuun. Shafatan non oinsharatiro pacushquima. Nanscarifi aquin Jesús tanashu non isharatiro chaca huatama. Ascan futsafo monoaifo muran atoqui foyamacahuun chaca huashquima. Chaca futsa futsatapafo huayamacahuun. Paunyamacahuun. Ascatari maton ahuinma chotayamacahuun. Ainfofoanri maton funuma chotamayamacahuun. Ahuara chaca futsafo shinanyamacahuun. Fochishmanantananyamacahuun sinashquima. Futsa shutipaimisi iyamacahuun.  
\v 14 Ascatama nocon Ifo Jesucristo icai cuscan acahuun. Ahuarafoan mato chaca huamatiro afohuunoa shinanyamacahuun chaca huashcaquima. 
\c 14  
\s1 Jesús icoinra huaa futsafo tsain chaca huayamacahuun 
\p  
\v 1 Tsain futsari un mato yoi. Tsoan Jesús Ifo huafiashocai ahuun tsain shara atirifi tapisharataima matofu ichanainton, —¡Aicho! No fu ichananhuun, —huacahuun. Man shinain cuscan shinanyamaiton afu fochishmanantananyamacahuun. Aqui tsain chaca huayamacahuun.  
\v 2 Mato muran ishon futsan yoitiro isca huaquin, —Un Jesús icoinra huashon nantifi tushu shara un pitiroran, —ishon yoitiro. Ascan futsan yoiquin isca huatiro, —Unfin Jesús icoinra huaquin uncai nami pitiroma. Yonosifin un pitiroquin, —ishon yoitiroquin.  
\v 3 Man nantifi pitiroquin a yonosi pitirohuunoa shinanchacayamacahuun. Nanscarifi aquin man yonosi pimisiquin a nami pimisihuunoa isca huaquin shinanyamacahuun, —Atofin chaca huaiquin, —ishon yoiyamacahuun. Upa Diosin nantifi nanscarafosi noco imani non ahuun facufo non inon. Ascacun futsaqui tsain chaca huayamacahuun. 
\p  
\v 4 Jesús icoinra huafocai maton oinmatima. Upa Dios fustina. Ascacun atoqui tsain chaca huayamacahuun. Upa Diosin ato tapimatiro cayacafi shinanyamaraquimain amaquiri shinancaniquin. Afin ato tapimatiroquin isharanonfo. 
\p  
\v 5 —Moisés nocon caifo yononi rato shafatamain non ichanantiroquin Upa Diosihuunoa shinanshquin, —atirififain Jesús icoinra huafoan anori shinancani. Ascafia atirififain anorisi shinancanima. Shafatifi ichananfo Upahuunoa shinanshcaquin. Ascacun nantifiton maton nomuran man shinain cuscan acahuun.  
\v 6 Atirifoan shinanfo rato shafatamain ichananti shafa shara itiroquin Upa Diosihuunoa shinanshquin. Nanfoanri nocon Ifon Jesús shara huapaicani. Ascan futsafoancai anori shinancanima. —Shafatifi nanscarafosi non Diosinhuunoa shinantiro. Ascatari nan ratoran shafatafin non nami pitiroquin. ¡Aicho! Upa Diosin min noco nami inanquin non pinon, —ishon shinantirofo. Nanfoanrifi nocon Ifo Jesús shara huapaicani. Ascashon futsafoan nami piyamaifoan yonofosi pitiro. Nanfoanri noco Ifo Jesús, —¡Aicho! —huatirofo. Nan rafutan Dios shinansharapaicani. 
\p  
\v 7-8 Non niyoshocai nofin non apaiyai cuscan fusti non shinantiroma. Upa Diosin noco amapaiyai cuscan non shinantiro. Nonfin ahuunafoquin. Nanfin nocon Ifonquin. Noncai nofin catontiroma rato shafatamain non naicain. Ascan niyoshon iyamarai non naitianri non nocon Ifonna. Niyoshon non nocon Ifo tanasharapai nocoqui unimanon. Non naitian non nocon Ifo shinantiro non ahuunacoin. 
\p  
\v 9 Criston noco nashoni. Maia murannoashu funicainshquin. Ascan natian man nia. Non niano yafi non nano nocon Ifo iishquin.  
\v 10 ¿Ahuuscain icoinra huaa futsan ahuun ifo man ipaiyai chaca huayamaraquin shara huairan huashquin? ¿Ahuuscain futsahuunoa man shinanchacamun? —Aacai ahuamaran, —ishon man shinan. Ointiaquimayamacahuun nantifi non chipo Dios icano aqui nocoicaicain. Nantian noco yoishquin nonmain shara huayamaraquin non chaca huamisiquin.  
\v 11 Nannori Diosin tsain Isaías cununi isca huaquin, 
\q3 “Iconcoin un niaquin. Iconcoinri nantififain manifoanna anoafo uqui nocoshcani ua ratoconun mai chachishon yoishcani, ‘Diosin, icon min Diosinran,’ ishon nantififain ua yoishcaniquin.” 
\m  
\v 12 Ascan nantififain non Upa Diosin ointaifi non amisi cuscan noco yoifain non shinanmisi cuscari noco yoipacushquin. 
\s1 Futsafo chaca huamayamacahuun 
\p  
\v 13 Ascacun afanan icoinra huafohuunoa tsain chaca huayamacahuun. Noncai ahua chaca huaima noco oincashon arifi chaca huanonfoma. 
\p  
\v 14 Jesús uhuun Ifocun un mato yoisharapai. Mun icoinra huacoinna nantifi yonosharafo non nami sharari non picucai noco chaca huamaima. Ascafia tsoan ahuun nomuran shinanquin isca huai, —Un na tushu piquin un chaca huatiroran, —ishon shinanquin atocai tushu pitiroma. —Un pishon uhuun nomuranshon un shinanchacatiro, —ishon yoitiro.  
\v 15 Mi futan Jesús icoinra huaton ointaifi a nami min pitiroma piyamacahuun ahuun nomuran shinanchacanonma. A noishocai min ahuun ointaifi min pitiroma. Nocon Ifon Cristo ahuunoashuri nani. Ascan a pitiroma piquin min futsa shinanchacamatiro. Ascacun ahuun ointaifi piyamacahuun Jesús cachiquiri huanonma funoshquima. 
\p  
\v 16 Man acai cuscan man shinanraca sharacoin. Ascan futsafoan oinquin shinanchacanonfoma shaturiscacahuun matoqui shinanchacanonfoma.  
\v 17 Ascano shinancapon. Non pifain aqui ayafain non huatocai nocon nomuran noco shinansharamatiroma. Upa Diosin noco iquinano non ahuun Yoshin Sharahuunshon Jesús cuscara isharacain nocon ointi non unimacointiro.  
\v 18 Nocon Ifo Jesús non yonoshosharaino Upa Diosin nocoqui fasi unimasharatiro. Yorafoanri nocohuunoa shinansharatirofo. 
\p  
\v 19 Ascacun icoinra huaa futsafo ya icoinsharacahuun. Jesushuunoa shinanmatanancahuun a cuscara shara iishcaquin.  
\v 20 Icoinra huaa futsafoan tushu futsa piyamaiton aton ointaifi a tushu piyamacahuun. Diosin yoini nantifi tushu sharafiacun aton ointaifi piyamacahuun. Man piquin aton nomuran man shinanchacamatiroquin. Ascaquin man ato pacumatiroquin afanan Jesús tananonfoma.  
\v 21 Ascan icoinra huaa futsafoan shinanquin isca huaquin, —Diosin yononi cuscan un nami pitiroma. Un ahuara pauri ayatiromaran, —ishon shinanquin shatucahuun ato pacumashquima. Ahuarafoan ato pacumatiro shatucahuun pacunonfoma.  
\v 22 Ascano afohuunoa man icoinra huaa cuscan marusu maton nomuran shinancahuun. Upa Diosin fustifin man yoitiroquin. Man man tapian nantifi man acai cuscan nanfo sharacoin. Ascafiacai atirifoan tapisharataicanima. Ascano pifain ayafain huaquin mato nomuran man shinantiro man chaca huaa cuscan. Ascafia shatucoianshufin maton nomuran man unimatiroquin.  
\v 23 Ascashon tsoan ahuun nomuran shinanquin isca huai, —Afo piquiraca un chaca huaicati, —anori shinanfiaquin piriaquin chaca huatiro. Tapishoma shara iyamarai chacafiacun un pia. Ahuara futsan tapishoma aquiraca, —Un chaca huaicati, —ishon shinantiro. Tapishoma aaqui chaca huai. 
\c 15  
\s1 Mafin man apaiyai cuscan huatama futsan apaiyai cuscan huashocahuun 
\p  
\v 1-2 Non icoinra huaitin Diosin noco yoini non nantifi tushu pitiro. Ascan icoinra huafoma non ato funaiquimashta yositiro atofu fochishmanantanantama. Nofin non apaiyai cuscan fusti non atiroma. Nan icoinra huaa futsafohuuri non ramapaitiro shinansharanon nocon Ifo non ato tanamasharatiro.  
\v 3 Shinancapon. Nocon Ifon Cristo afin apaiyai cuscan fusti shinanpaonima. Ascano ahuunoa Diospan tsain cunuquin isca huani, —Upan, un mia nicacoin. Ascan mia chaca huapaicaquin uari roacaniran, —ishon cununi.  
\v 4 Nantifi Diosin tsain cunupacuni noco tapimashquin. Cununiri non icoinra huashon ahuara chaca finonfiaquin non tunucoinnon. Ahuun tsainhuunshon nocon ointi non fupi huamashon non tapitiro nocon Ifo fu nai muran chipo afu ipashquin afanan ahuara chaca finonshquima.  
\v 5 Upa Diosin non chaca finoainton noco mutsismatiro nocon ointi unimacain nocon Ifon Jesucristo man tanasharaino mato nannorisi shinanmatiro.  
\v 6 Ascano nannorisi shinanquifin non nocon Ifo Jesucristo ahuun Apa nan oi fusti nicatsa non ahuunoa yoisharatiro. 
\s1 Nan tsain shara Jesucristohuunoa Israelifoma yoini 
\p  
\v 7 Criston nocoqui unimaquin noco iquina ahuun yorafo non inon. Ascan marifi futsafo ya yorahuatanancahuun. Man ascaino Diosihuunoa futsafoan shinansharatiro.  
\v 8 Un mato yoicain Jesucristo mai ano oni Israelifoan aton oinmati cuscara iquiyoi. Ascano Upa Diosin nocon shunifo yoini cuscan iconcoincun non tapitiro.  
\v 9 Mani futsafoanri icoinra huashon yoishcani isca huaquin, —¡Aicho! Upa Diosin nocohuun ramapaiquin ahuun Furun nocoqui nichini. Noco numanon. Upa Dios shararan, —ishon mani futsanfoan yoishcani. Nannori Diosin tsain cununi isca huaquin, 
\q3 “ ‘Ascan un mani futsafo mihuunoa un yoisharashquin. ¡Aicho Dios shararan!’ ishon un mihuunoa ato yoishquin. ‘Un mihuunoashu fanainsharashquiran,’ ” 
\m ishon cununi.  
\v 10 Afanan Diosin tsain cunuquin isca huani, 
\q3 “Mani futsafoan nan Israelifo ya unimatanancahuun. Marifi man atofu Diospan yora iishquicai,” 
\m ishon cununi.  
\v 11 Afanan cununi isca huaquin, 
\q3 “Mani futsanfoan, nocon Ifohuunoa yoisharacahuun. Nantifi manifoti anoashu nanscasi aqui fanain ishocahuun,” 
\m ishon cununi.  
\v 12 Isaías arifi isca huaquin cununi, 
\q3 “Nocon shuni Isaí ahuun funapan manifoti ato iquishquin. Shinanquin isca huashquin, ‘Nan fusti nocon Numamisi inonran,’ ishon yoishquicani,” 
\m ishon Isaías cununi. 
\p  
\v 13 Ascan Upa Diosin fustiton maton nomuran imasharafain mato unimamatiro man afu ipanon icoinra huashu. Ascano ahuun Yoshin Sharapan ahuun curushhuunshon noco yoini cuscan nantifi noco ashonon, ishon man fasi icoinra huapainon. 
\p  
\v 14 Uhuun yoramishtichin, un icoinra huai un oianfin man noinantanancoianquin. Jesushuunoari tapishara futsafori ato tapimashquin.  
\v 15-16 Ascacun un ranotama afanan afohuunoa un mato shinansharamana. Diosin uhuun ramapaiquin ua catonni Jesucristo ahuun oinmati un inon nan tsain shara ahuunoa un mato tapimanon. Ascan ua nichini un mato Jesús icoinra huamanon. Diospan Yoshin Sharahuunshon maton chaca man shatua a cuscara shara iishquin. Ascano Upa Diosin matoqui unimacoinqui ahuun yorafo mato imai. 
\p  
\v 17 Ascacun un fasi unimaicai nocon Ifo Jesucristo ua catonni Upa Dios un yonoshonon ahuunoa uhuun caifomafori un ato yoinon.  
\v 18 Criston ahuun curushu ua inan uhuun caifomafoan Diosin tsain nicacoinon. Un ato yoimisi cuscan Upa Dios nicacoinmisifo. Un Cristo yonoshona cuscan fusti un tapia. Futsafoan Criston yonoshonahuunoa uncai tapiama.  
\v 19 Ahuun Yoshin Sharapan ahuun curushhuunshon tsoan oinyomisima cuscara un ato isma. Ascan un nan maitio Jerusalén anoshon yoifainquin Iliria ano un nantifi nan tsain shara Jesucristohuunoa yoiquin rupian.  
\v 20 Uncai futsan Jesushuunoa yoimisi anori un capaimisima. Tsoan Jesushuunoa nicayomisima anorifi un capaimisi ato tapimashquin.  
\v 21 Nannori Isaías Diospan tsain cununi isca huaquin, 
\q3 “Tsoan ahuunoa nicayomisima nicacaquin tapinonfo,” 
\m ishon cununi. 
\s1 Pablonun Roma ano cashquin shinanni 
\p  
\v 22 Ascacun un mato ari capaimisi. Ascafia un mato oin capaifiain un camisima. Ahuara futsan finoanshu un nituri niturimisi. 
\p  
\v 23 Ascafia natian mun cashcu futsa ato Jesushuunoa yoiqui anaitian. Ascan mun itishara mato ari cashquin. Un fari ichapa camisima. Nantishon tapiquin un mato ari capaimisi.  
\v 24 Un España ari caquin mato ano rutiacashu un matofu tsainshquin. Non yoinonansharanon. Mato anoashu un caiton ua tushu inanshcaquin un España ari nocosharanon. 
\p  
\v 25 Ascafia natian un Jerusalén ano cayoicai. Jesús icoinra huafoan ua nichini icoinra huaa futsafo un ato pui inanon.  
\v 26 Macedonia yafi Acaya anoafo unimacain icoinra huaa ahuuomafo Jerusalén anoa ato pui inanpainifo.  
\v 27 Unimacaquin ato inanpaiquin. Yoinifo isca huaquin, —Jerusalén anoa Jesushuunoa yoimisifoan nocoqui nichini. Noco nichiamacun na tsain shara non nicacuanama. Ascacun nan non aya cuscan nofiri non ato inanpai ato shara huaquin, —ishon yoiaifoan.  
\v 28 Ascan un ato inanfaini un España ari caquin un mato oinfaini cai.  
\v 29 Mun tapian un mato ano nocoshon nocon Ifohuunshon un mato yoisharashqui maton nomuran man unimanon. 
\p  
\v 30 Tsain futsari un mato yoipai. Man nocon Ifo Jesucristo noishon ahuun Yoshin Sharahuunshon uari noiquin ua Upa Dios cufishocahuun un yonosharashonon ahuaton ua nitun huanonma.  
\v 31 Ua cufishocapun Upa Diosin ua cushunon Judea anoa icoinra huamafoan ua ahuusca huanonfoma. Ua cufishocahuun un icoinra huafo Jerusalén anoafo pui un ato inainno unimacoincai finonfo.  
\v 32 Nan ato inanquin anaititan Upa Diosin ua nichiano un unimacoin matoqui nocotiro. Ascashu non yoinonansharatiro nocon ointi non unimatananon.  
\v 33 Diosin nocon ointi noco shara huashomisi matofu isharanon. Nanscarari ipainon. 
\c 16  
\s1 Pablon ato tsain shara fomani 
\p  
\v 1-2 Nocon yorahuan Febe Cencrea anoashu matoqui nococun shara huacahuun. Nan ainfoan nocon Ifo tanasharacoianquin. Cencrea anoa icoinra huaafo shara huamisiquin. Yorafo shara huamisiquin. Uari shara huamisi. Fasi nocon Ifohuunoashu yonosharamisi. Ascacun yopai cuscan ashocahuun. 
\q1  
\v 3 Priscila futan Aquila u futan Jesucristo yonoshosharamisifo. Ua ato yoisharashocahuun.  
\v 4 Futsafoan ua rutupaiyainfoan nan rafutan ua numaifoan ato rutuqui rashquinifo. Uhuun caifomari Jesús icoinra huafoan ichanancashon yoimisifo isca huaquin, —Priscila yafi Aquila non fasi atohuun noiran, —ishon yoimisifo. 
\q1  
\v 5 Ato pushu ano ichananshori ua ato yoisharashocahuun. 
\q1 Uhuun yorashta Epeneto ua yoishocahuun. Nantofin Asia anoshon Jesús icoinra huaquin tau huani. 
\q1  
\v 6 María mato yonosharashomisiri ua yoishocahuun. 
\q1  
\v 7 Uhuun yoran rafuri Andrónico yafi Junias ua yoishocahuun. Nan rafu ufu cunu muran iquinifo. Jesús fu rafumisifoan atohuunoa yoisharamisifo. Un Jesucristo icoinra huataima nan rafutan icoinra huaquin tau huanifo. 
\q1  
\v 8 Ampliatohuun un noi. Arifi nocon Ifon catonni. Ua yoisharashocahuun. 
\q1  
\v 9 Urbano u futan Jesús yonoshomisi nanrifi ua yoisharashocahuun uhuun yorashta Estaquiri ua yoisharashocahuun. 
\q1  
\v 10 Apeles fasi nocofunu shara. Upa Diosin aqui unimai. Atori Jesús yonoshosharamisi. Nanrifi ua yoisharashocahuun. 
\q1 Aristóbulo yafi ahuun yorafori ua yoisharashocahuun. 
\q1  
\v 11 Uhuun yorashta Herodión ua yoisharashocahuun. 
\q1 Narcisco yafi ahuun yorafoan nocon Ifo icoinra huaafo atorifi ua yoisharashocahuun. 
\q1  
\v 12 Trifena yafi Trifosa non nocon yorashta Pérsida ua yoisharashocahuun. Nan ainfofoan nocon Ifo fasi yonosharashomisifo. 
\q1  
\v 13 Nocon Ifoan Ruforifi catonni. Ahua uhuun uhuacoin cuscara. Ua cushusharamisi. Nan rafuri ua yoisharashocahuun. 
\q1  
\v 14 Asíncrito non Flegonte non Hermes non Patrobas non Hermas non icoinra huaa futsafo atofu icafo ua yoisharashocahuun. 
\q1  
\v 15 Filólogo non Julia non Nereo yafi ahuun poi non Olimpas non nantifi icoinra huaa futsafo atofu icafori ua yoishosharacahuun. 
\q1  
\v 16 Nantifi noinancanashu munininantanancahuun. Nantifi Jesús icoinra huafoan ichananshon maifoti anoashon mato yoisharanonfo. 
\p  
\v 17 Uhuun yoramishtichin oinfain. Mato fu ichananmisifo futsafoan mato shinanchacamapai afanan Jesushuunoa man nannorisi shinanonma. Non mato cayacafi tapima cuscan nanfoan anorima mato tapimapai. Mato amaquiri shinanmapai afanan icoinra man huanonma. Atomaqui icahuun.  
\v 18 Afoancai nocon Ifo Cristohuunshon yonomisifoma. Nanfoan ahuara fipaiyaifo fustisi shinanfo. Diosin tsain tapisharafoma aton tsain fustihuunshon ato parapaicani ato amaquiri shinanmashcaquin.  
\v 19 Nantifiton nicafo man nocon Ifo tanasharacoincun. Asca un matoqui unimacoinni. Ahuara sharafohuunoa tapicoincahuun. Manmain ahuara chacahuunoa tapiyamapainon. Afohuunoa shinanyamacahuun. 
\p  
\v 20 Upa Diosin nocon ointi isharamai cuscan nanton samamashta matomaquinoa Satanás anaiticoin mato afanan ahuusca huanonma. Nocon Ifo Jesús mato shara huashopainon. 
\p  
\v 21 Timoteo un futan Jesús yonoshomisiton mato yoisharapai. Lucio non Jasón non Sosípater nanfo uhuun yorafoan mato yoisharacani. 
\p  
\v 22 Unquian, Tercio, un natian Pablo cunushoni. Urifi nocon Ifohuunshon mato yoisharapai. 
\p  
\v 23 Un Gayo pushu muran icun ua cushumisi. Icoinra huaa futsafori ahuun pushu muran ichanamisifo. Afoanri mato yoisharafo. Erasto yorafoan aton pui cushushomisi nocon yorahuan Cuartori mato yoisharapai. 
\s1 Ahuun unutaqui Dioshuunoa yoisharani 
\p  
\v 24 Nocon Ifo Jesucristo matohuun ramapai. Nanscari ipainon.  
\v 25-26 Upan Diosin mato cushusharanon. Un Jesushuunoa mato yoimisi cuscan afi ahuun curushu mato inantiro man tanasharanon. Ipaoni tsoancai Jesucristohuunoa tapiyopaonifoma. Natian nantififain tapitirofo Upa Diosin nan nipanacaton noco nichini Furun Jesucristohuunoa non yoinon. Ishquiai cuscan Upa Diosin ato yononi cuscan nannoricoin cununifo. Manifoannatifoan Jesús icoinra huafain nicasharanonfo.  
\v 27 Nocon Diosin fustitofin nantifi tapicoianquin. Nocon Ifon Jesucristohuunshon nantififain ahuunoa yoisharapacunonfo. Nanscasi ipanon. Amen. Nanti uhuun tsain unutaqui un mato yoi. 
\cls Pablo