\id HEB - Sharanahua NT [mcd] -Peru 2008 (DBL -2013) \h Hebreos \toc1 Jesushuunoa Futsan Hebreofo Cunushoni \toc2 Hebreos \toc3 Heb \mt1 Jesushuunoa Futsan Hebreofo Cunushoni \c 1 \s1 Diosin Furunhuunoashu no fu tsainni \p \v 1 Uhuun yoramishtichin un mato cunu fomai man tapinon. Upa Diosin noco shunifo yoipaiyai cuscan ahuun tsain yoishomisifo yoiyopaoni ato tapimanonfo. Namapahuunshon ato yoifain namapan cuscarahuunshon ato yoifain ahuun nai oinmatihuunshon ato yoifain ahuun oicoinin ato yoipaoni. \v 2 Asca huapaonifiashu natian noco yoipaiyai cuscan Furunhuunshon noco yoia. Furunhuunshon nantifi nai murannoafo yafi mai anoafori onihuani. Furun catonni nantifi nai murannoafo yafi mai anoafoti ahuuna inon. \p \v 3 Nanton Apa Diosin cuscaracoin. Noco ismacoin ahuu cuscaramain Apa Diosiquin. Apa shara imisi cuscan arifi nanscaracoin. Furunmun ahuun tsainmansi ahuamamishti huatiroquin. Ascan ahuun curushhuunshon ahuun tsainmansi onihuafoti yonotiro afin apaiyai cuscan anonfo. Ahuun tsainmansi nantifi onihuafoti cushusharafafainmisi. Nanfin nocohuunoashu nani nocon chaca noco soashoshquin non a cuscara shara inon. Ascashu Apa ari cani a futan nantifi iquifafainshquin. \s1 Upan Diosin Furumun ahuun oinmati afu nai muran icafo finoncoian \p \v 4 Afin Apa Dios ahuun Furuncoinquin. Oinmati afu nai muran icafocai Upa Diosin furuncoinfoma. Furun Apa Dios fu niaifocoin. Oinmatifocai ascarafoma. Ascan ato finoncoian. \v 5 Upa Diosin ahuun oinmati afu nai muran icafocai yoiqui, \q3 “Man uhuun facunatoncoinforan,” \m ato huamisima. Furun fusti yoiqui isca huani, \q3 “Unfin min upaquin. Minfin uhuun facucoinquin,” \m ishon Furun yoini. Ahuun oinmati afu nai muran icafohuunoacai anori yoimisima. \v 6 Ascashon Furun mai ano nichini yoracoin inon ahuun oinmati nan afu nai muran icafo yoini isca huaquin, \q3 “Nantifi uhuun oinmati ufu nai muran icafoan, uhuun facu Jesús noicoincahuun. ‘Min uhuun Iforan,’ yoicahuun,” \m ishon anori ato yoini. \v 7 Ascatan ahuun oinmati afu nai muran icafohuunoa yoiquin isca huani, \q3 “Fuu foanriscatiro. Nanscarifiai uhuun oinmati ufu nai muran icafo un ato yoiai cuscan ua ashoriscatirofo. Nanfori chi urumanhuan cuscarafo. Un ato yonoa cuscan yorafo onaintimariscatiroran,” \m ishon Upa Diosin yoini. \v 8 Ascashon Furu yoiquin isca huani, \q3 “Minfin uhuunfin cacoinnaquin. Mirififin min Diosiquin. Min yorafo iquipacunaca. Min ato niaifocoin icainocai min unupacunacama. Min ato iconcoin yonosharapacunaca. Min icanori shara fusti ipanaca. \v 9 Ascashon minfin ahuara shara fustisi noicoinquin. Ahuara chaca min noicasmai. Ascacufin Diosin, nanrifi min Diosin, nanton mia catonni. Mia unimama cuscacai tsoa futsan ascara mumisima. Mirus fustiton min nantifi finoncoian. Min ato Niaifocoinran,” \m ishon un mia yoini. Uncai mifu rafuafo anori yoimisima. \v 10 Afanan Upa Diosin Furun yoini, \q3 “Minfin uhuunfin cacoinnaquin. Mirifi min nantififain ato Ifo. Ahuashta oniataima nan maitio yafi nai murannoafoti min onihuaquin tau huani. \v 11 Sahuuti chocanashucai afanan shara itiroma cuyotiro. Nanscarifiai nantifi maitio yafi nai murannoafori cuyoshcani. Ascafia mincai ascarama. Minfin ipanacaquin. \v 12 Sahuuti chocanacun potatirofo futsa funa fiishcaquin. Nanscarifiai maitio yafi nantifi nai murannoa afanan sharafocuma min ato cuyomatiro, afanan mai yafi nai fiananan huashquin afanan funa shara inonfo. Ascan mincai mai yafi nai cuscarama. Mincai fianananpacunacama. Nanscasi min apanacaran,” \m ishon Upan Diosin Furun yoini. \v 13 Afanan Upan Diosin Furun yoiquin isca huani, \q3 “Min ufu niaifoaitiancai nan mia noicasmafoan afanan mia ahuusca huatirofoma. Minfin nantifi ato iquiniran,” \m ishon yoini. Asca anoricai ahuun oinmati afu nai muran icafo yoimisima. Ascashon Furun fusti catonni nantifiton aton Ifo inon. \v 14 Ascano Upa Diosin nan ahuun oinmati afu nai muran icafo yononi noco cushusharanonfo. Ratoranfoan Jesús ifoancanashu afu ipatirofo. Diosin yononi nanfo ahuun oinmati afu nai muran icafoan ato cushusharanonfo. \c 2 \s1 Jesús nocohuunoashu nanishaquin noco imapacunaca. Nanhuunoa shinanfafaicahuun cachiquiri huashcaquima \p \v 1 Ascacun nan tsain icocoin shara Diospan Furunhuunoa non nicamisi cuscan noco nomuran non nanucoinfafainon cachiquiri huashquima. \v 2 ¡Shinancapon! Diosin nocon shunifo oinmatifo afu nai muran icafohuunshon ato tapimani. Ascafia ato yoini cuscan tsoan nicayamaiton Diosin ato onaintimacoinni. \v 3 Diospan nai oinmatifoan ato yoini cuscan nicacasmaifoan ato onaintimani. Nanscarifi huaquin Furun nan nocon Ifo Jesús noco yoini cuscan non nicayamacaiyaiton mimacai huaquin noco onaintimashqui. Ascan nantorifi yoini nocohuunoashu chipo nashquiai. Ascashon noco chaca soashonano non afu ipanon. Ascano yoiaiton nicacashon afu rafumisifoan nannori noco tapimani. \v 4 Ascatari nanfohuunshon Upa Diosin futsafo ato ismani nanfoan yoinifo cuscan icocoincun. Ascashon tsoan oinyomisifoma cuscara isinincai futsa futsatapafo ahuun curushhuunshon ato caya huapacuni. Ahuun Yoshin Sharapanrifi nanfo ato tapimani yonoshononfo. Ascashon afin ato catonpacuni ahuun yono futsa futsa huaquin yonoshononfo. Ratoranfo catonpai afin ato catonniquin ahuun yono anonfo. \s1 Jesucristo arifi Diosifiashu noco cuscara yoracoin ica \p \v 5 Non mato yoimisi Upa Diosin nantifi oni huanitiacai ahuun oinmatifo afu nai muran icafo yoinima isca huaquin, —Manfin nantifi mai anoafoan ato ifo ishquiran, —ishoncai ato yoinima. \v 6 Ascacun David yoini isca huaquin, \q3 “Upa Diosin, minfin nantifi yorafo onihuaniquin. Ascan noncai ahuama. ¿Ascacun ahuuscai min nocohuun noifain min noco shinanquin min noco cushusharamun? \v 7-8 Ascashon min yononi cuscacoin min oinmati mifu nai muran icafoan noco finonyoni nan min Furun afanan nocoqui nocoaitian. Ascacun min yorafo onihuasharani mia cuscarari inonfo. Ascashon nan min onihuanifotifain ato ifo non iishquin.” \m Min anori yonofianicai atirifi yorafoan aton ifo icataima. \v 9 Ascan Jesús arifi noco cuscara iyopaoni. Nantian Diospan oinmati afu nai muran icafoan Jesusri finonyopaonifo. Nocohuunoashu omitsiscacain noco nashoni. Upa Diosin nocohuun ramapaiyaino Furun Jesús nantifi manifotihuunoashu nani. Ascano noncai afanan napanacama. Upa Diosin nantifi yorafo yononi ahuunoa \p \v 10 Upa Diosin nantifi onihuani ahuunoashu nantifi ica. Ascashon yorafori onihuani ahuun facufo icain afu ipanonfo. Ascacun Furun Jesús nichini nocohuunoashu omitsiscano non afu ipanon. Furun fusti nocohuunoashu omitsiscatiro noco chaca soashoshquin. Nan iconcoin Upa Diosin yononi Furunmun noco omitsiscashoano noco Ifo sharacoin inon. Ascashon Apa Dios icari noco iyoano non afu ipanon. \v 11 Jesuscai ahua chaca huamisima. Ascashon nocori chaca soashona non a cuscara shara inon. Ascashon rafitama nocohuunoari yoiquin isca huai, —Nanfo uhuun yoraforan, —ishon yoitiro. Ascatan Jesús ahuun Apa Dios nanrifi noco Upa. \v 12 Nan icoinra huafohuunoa Jesús Apa Dios yoiquin isca huani, \q3 “Upa Diosin, mihuunoa uhuun yorafo un yoisharashquin. Un atofu mihuunoashu fanainshquinran,” \m ishon yoini. \v 13 Ascashon yoiquiri isca huani, \q3 “Uhuun Upa Dios un icoinra huairan,” \m ishon yoini. Afananri yoiquin isca huani, \q3 “Shinancapon Upa Diosin ua icoinra huafo ua inan uhuun facufo inonfo,” \m ishon Jesús yoini. \p \v 14 Ascano facufo namiyacain imiya. Nanscarifiai Jesús arifi noco cuscara yoracoin cainni. Yoracoin cainnishaquin noco naashoni afanan Satanás noco ifo iyamacain noco namapacunonma. Nocohuunoashu Jesús naitian Satanás ahuun curush shatuni afanan noco ahuusca huanonma. \v 15 Ascano nocohuunoashu nataima yorafo napaicani ratucoinfafainpaonifo. Ascafia nocohuunoashu naitian noco numani. Ascano non nashquiaihuunoa shinaincai non afanan ratuima. Ascatacai ratu afanan noco ifo itiroma. \v 16 Ascano man non tapia Jesuscai ahuun oinmati afu nai muran icafo ashoyoi onima. Ascatamarocon Abraham ahuun funafo nan icoinra huafoti ato ashoyoi oni. \p \v 17 Ascacufin Jesús noco cuscara yoracoin ini. Nan non mumisi cuscan arifi muuyopaoni. Ascacun nocohuun ramapaitiro. Nan Apa Diosin yonoa cuscacoin amisi noco numashqui. Nocohuunoashu nani noco chaca soashoshquin. Ascacun nocohuunoa Apa Dios yoitiro isca huaquin, —Upan, un ato nashoni aton chaca soashoshquin. Ascan nan ua icoinra huafo aton chaca soashofain ato rauhuahuu, —ishon Apa yoitiro. Ascashu nocohuunshon Dios cufimisi niaifocoin itiro. \v 18 Nanscarifi aquin Satanás chaca huamapaipaoni. Ascan Jesús omitsiscafiaquicai chaca huamisima. Ascacun nocorifi Satanás chaca huamapaiyaitian Jesús nocohuun ramapaitiro. Non muumisi cuscan arifi muuyopaoni. Ascashon noco numatiro non chaca huanonma. \c 3 \s1 Jesusfin Moisés finoncoianquin \p \v 1 Ascacufin uhuun yoramishtichin matorifi Upa Diosin catonni ahuun yora sharafo icain man afu ipanon. Upa Diosin Furu Jesús nichini no fu ishon ahuun tsain shara noco tapimanon. Ascatan nocon numamisi icain nocohuunshon Apa Dios cufimisicoin. Ascacun maton nomuran Jesushuunoa shinanfafaicahuun. \v 2 Upa Diosin Israelifo tapimapaiyai cuscan tau huaquin Moisés yoiyoni. Ascacun arifi Moisés ahuun caifofo nan yoiyoni cuscan ato tapimani. Ascashu nan Upa Diosin yononi cuscacoin Moisés apaoni. Nanscarifi aquin Upa Diosin Jesús catonni ahuunoa ahuun yorafo tapimanon. Ascashu nan Apa Diosin yononi cuscacoin arifi Jesús acoinmisi. \p \v 3 Pushu sharahuunoa yoisharatirofofia nan pushu huamisihuunoa finacoinquin yoisharatiro. Nanscarifiai Moiséshuunoa yoisharatirofofia nan Jesushuunoacaifin finacoinquin yoisharatirofoquin. \v 4 Pushufo ratoran futsan afin oni huatirofia Upa Diosifin nantifi onihuaniquin. \v 5 Ascan Moisésfin Upa Diospan oinmatiquin. Upa Diosin ahuun yora nan Israelifo ato yonopaiyai cuscan iquisi Moisés yoiyoni. Ascacun arifi nantifi ato yoinon. Inon pacoai ato yoipaiyai cuscan Moisés tapimayoni ahuun caifori ato yoinon. \p \v 6 Ascafia Jesuscai Upa Diospan oinmatima. Ascatama nancairocofin Furuncoinquin. Ascashu ahuun yorafoan ato Ifocoin. Nan Apa yononi cuscan ahuun yorafo cushusharacoinmisi. Ascacun Upa Diosin tapipai nonmain Jesús icoinra huashon noco yoiyotiani cuscan non ratutama manasharaicai nan Jesús afanan oaitian. Ascashu non nanscacoiashu non ahuun facufo ipatiroquin. \s1 Diospan yorafoan ahuunoashu aton ointi unimatiro afanan fucashuni inonma \p \v 7-8 Ascan Diosin Yoshin sharapan yoiquin isca huani, \q3 “Upa Diosin mato yoiai cuscan nicasharacahuun. Tsoan istaipama mato shunifo icafotian un atohuunoa tapipaoni uamain nicasharafain ua nicacasmacaniquin. Ascashon nanfoan ua nicacasmapaonifo. Ascacun ato cuscara iyamacahuun. Maton ointi mutoyamacahuun. Ascatamarocon Jesús mato yoiai cuscan fusti nicasharafafaincahuun.” \q3 \v 9 “Maton shunifo tsoan istaipamanoashu icaino yoitimafiaifoan funaquima uhuun yono un ato ismapaoni. Tsoan oinyomisima cuscara shara cuarenta fari un ato ahuamamishti ismasharapaoni.” \q3 \v 10 “Un ato ahuara ismafiaitocai ua tsoan nicapaonima. Uarocon nicacasmapaonifo. Ascaifoan oinquin un mato shunifoqui sinapaoniquin. Nantianri un yoini isca huaquin, ‘Nanfoan aton nomuran amaquiri shinanchacamisifo. Ua tanatama. Un ato shinanmapaiyai cuscacai tsoan tapipaonima.’ \v 11 Ascano atoqui sinaquin un yoini isca huaquin, ‘Nan na Israelifoan ua nicacasmacani. Un aton nomuran unimamapaiyai cuscacai un ato ashopacunacamaran,’ ” \m ishon Upa Diosin noco shunifohuunoa yoiniquin. \p \v 12 Uhuun yoramishtichin oinfain. Nocon shunifo cuscara iyamacahuun. Maton nomuran man Jesús icoinra huayamashu man chacacoin itiro. Man ascaicai nan Dios ipamisi fu man ipaima. Ascashon man cachiquiri huatiroquin. \v 13 Ascatamarocon shafatifi yoinonansharafain noco Ifohuunoa shinanmatanansharafafaincahuun. Ahuara chacafoan noco paratirofo. Ascafia non shinanmasharatanainnocai nocon ointi non mutotiroma. \v 14 Non tau huaquin Jesús icoinra huacoinni cuscan non nanscasi unuyamashu non afu ipatiroquin. \v 15 Ascano un rama mato cunushona cuscan afanan mato yoi, \q3 “Upa Diosin mato yoiai cuscan fusti nicasharafafaincahuun. Maton shunifoan Upa Dios nicacasmacani aton ointi mutopaonifo. Ascacun ato cuscara iyamacahuun. Maton ointi mutoyamacahuun. Ascashu yoitimashuni iishcaquima,” \m ishon Diospan tsain cununi. \p \v 16 ¿Ascan tsoafoanmun Dios nicacasmafain ahuun tsain cachiquiri huapaonifoquin? Nantifi nocon shunifo Moisés ato Egipto mai anoashon iyoni. Nanfoanfin Dios nicacasmapaonifoquin. \v 17 ¿Tsoafoquimun Upa Diosin cuarenta fari sinaniquin? Ascano nanfoanfin Dios nicacasmafain chaca huapaonifoquin. Ascaifoan Upa Diosin tsoa istaipamashon nantifi ato namapacuni. \v 18 Tsoacon Diosin yoinimun isca huaquin, —Un mato nomuran unimamapaiyai cuscacai un afanan asca huapanacamaran, —ishon yoini. Nan nicayosma shunifo ato yoini. \v 19 Ascan Upa Diosicai tsoan icoinra huanima. Ascashu Diosin ato iyopai anocai tsoa iquinifoma yora futsafoqui musucani. \c 4 \p \v 1 Ascano Upa Diosin ato yoini cuscan norifi non icoinra huashu non afu rafucun nocon nomuran unimamatiro. Ascacun oinfain. Marifi Diospan tsain man icoinra huayamashu mato imasharapaiyai cuscan man funotiro. \v 2 Upa Diosin nocon shunifo tsain shara yoiquin isca huani, —Un mato numai. Mato fu mai shara ano ishquin un mato iyoicai. Nannoashu man ufu rafuaitocai afanan tsoa futsan mato ahuusca huatiroma. Nannoashu man isharacoinon, —ishon ato yoini. Ato yoiai cuscan nicafiashocai icoinra huanifoma. Nanscashofin ipaitsicoin nicanifoquin. \v 3 Ascafia non Jesús icoinra huacun Upa Diosin nocon ointi imasharatiro afu rafucain non isharanon. Ascan nocon shunifocai ascanifoma. Ascacun Upa Diosin ato yoini isca huaquin, \q3 “Na Israelifoancai ua icoinra huacanima. Ascaifoanno un atoqui sinaquicai mai shara futsa ano ato imapacunacama anoashu isharanonfo,” \m ishon ato yoini. Nannori yoifianishaquin Upa Diosin nantifi onihuaquin anaitishon tununi. Nanscarifiai nantian yafi natianrifi ahuun yorafo imasharapai afu isharanonfo. \v 4 Afanan Diospan tsain cununi isca huaquin, \q3 “Siete oshatan Diosin yononi nantifi onihuaquin anaitishon tununiran,” \m ishon cununi. \v 5 Ascano Upa Diosin nocon shunifo fu rafupaini ato mai shara futsa ano imapaiquin anoashu isharanonfo. Ascafia Diospan tsain afanan cununi isca huaquin, \q3 “Un ato imapai aricai un afanan ato imapacunacama anoashu isharanonfo,” \m ishon Upa Diosin yoini. \v 6 Ascano nannori yoifiani futsafoan chipo icoinra huafoan Upa Diosin ato iquimatiro afu rafucain aton nomuran unimacain isharanonfo. Ascan nocon shunifoan icoinra huayamashucai iquinifoma. \v 7 Ascano Upa Diosinhuunshon afanan David yoini isca huaquin, \q3 “Natian Diosin tsain man nicafiai maton ointi mutoyamacahuun. Ascashu yoitimari iyamacahuun,” \m ishon David yoini. \v 8 Ascashon Josué ahuun caifofo aton mai ano iyoni nannoashu isharanonfo. Ascafia nan maicoinhuunoacai Diosin chipo noco yoima. Nan Israeli maihuunoa yoiquicai isca huacuanima, —Natian man ua nicasharaquicai afanan man shinanchacaima. Ascatamarocon maton nomuran unimacain ufu man rafucacaishquinran, —ishoncai yoi cuanima. \p \v 9 Ascacufin natiari Upa Diosin ahuun yorafo aton nomuran unimamapai isharanonfo. \v 10 Upa Diosin nantifi onihuaquin anaitishon unimayanan tununi. Nanscarifiai non Upa Dios fu rafuicai non iyopaoni cuscan non afanan ascapaitiroma. Non ipaoni cuscan nantifi non shatutiro. Ascashu non Dios fu rafuaiton nocon nomuran unimamanon. \v 11 Ascacufin non Dios nicasharashu a cuscara isharacain nocon nomuran unimai cuscan non muunon. Ascan nocon shunifo yoitimashuni. Diosin ato mai shara iquimapaifiaquicai icoinra huayamaifoan ato iquimanima. Ascan noncai ato cuscara ipaima Diosin noco imapaiyai cuscan non funoshquinma. \p \v 12 Upa Diosin nipanaca. Nanscarifiai ahuun tsaincai unupacunacama mutsisipacoin. Ahuun tsainhuunoashu non isharatiro. Nopu cunocoinnin ahuara cashcushon amuran non oincointiro. Nopu cunocoinfia Diospan tsain mimacaya fasi cunocoin cuscara. Ahuun tsainhuunshon non imisi cuscan yafi non shinanmisi cuscan nantifi noco puashotiro. Ascashon nocon nomuran onancoian. Non shara iyamarai non chaca shinanmisi cuscan ahuun tsainhuunshon noco puashotiro. \v 13 Nantifi onihuani Upa Diosin onancoian. Tsoancai otayamafain tsoanricai fomantiroma. Nantifi non amisi cuscan huafain non shinanmisi cuscamain Diosin onancoiaiton. Ascan chipo ahuun ointaifi non aqui nocoaitian nantifi non amisi cuscan huafain non shinanmisi cuscan noco puashopacushquin. \s1 Futsafoan nocon Upa Dios cufishotirofo. Ascafia Jesuscaifin ato finoncoianquin. Nantorifi noco Apa Dios cufishomisi \p \v 14 Ascacufin Jesús Diospan Furun nocohuunshon cufimisi nai muran cani. Nantofin nantifi Upa Dios cufimisifo ato finoncoianquin. Ascashon non yoimisi isca huaquin, —Jesús noco Iforan, —ishon non yoimisi cuscacai non cachiquiri huapanacama. \v 15 Nantifi finoncoian nocohuunshon Dios cufimisi Jesusfin non muai cuscan arifi muyopaoni. Ascan ahuaraton noco shinanchacamapaiyai cuscan arifi nansca huayopaoni. Ascacun nocohuun ramapaitiro. Satanás nan yoshin chacapan noco chaca huamapaiyai cuscan nanrifi chaca huamapaifiaitocai anima. Jesuscai ahua chaca huamisima. Nantifi non mutiro cuscan arifi muyopaoni. Non omitsiscamisi cuscan arifi muyopaoni. Ascacun nocohuun ramapaitiro. \p \v 16 Ascacufin Diosiqui ranoquima non yoipaiyai cuscan non yoinon. Non yoiaiton Jesushuunshon Upa Diosin nocohuun ramapaicain noco ashoshquin. \c 5 \p \v 1 Israelifoan aton caifo futsa catonnifo Upa Diosin ato yoipaiyai cuscan ahuunshon ato tapimanon. Ascacun nanfoanrifi Upa Diosin yoipaiyaifo cuscan nan nocofunuhuunshon yoinonfo. Nanrifi ato cuscara nocofunu ini. Ascashon nan catonnifo atohuunshon Diosin yoimisi niaifocoin inon. Nanrifi Diosin yoishomisi futsafoan aton niaifo inon. Moisés ato yononi cuscan Israelifoan Dios fu tsainti pushu muranshon inafo inanpacunifo. Ascashon nan Diosin yoishomisi niaifoan nan inafo ato rutushonaino ahuun imi foaiton oinquin Diosin aton chaca soashoni. \v 2 Nan Israelifoan yorafohuunshon Dios fu cufimisi niaifoan ato asca huashoaitian atohuunri ramapaitiro. Ascafia arifi ato cuscara nocofunu. Ahuun caifofoan amaquiri shinanquin Dios tanasharamisifoma cuscan arifi nansca huamisi. Ascafiashon chaca huamisifo cuscan nicai arifi atohuun ramapaitiro. \v 3 Ascashon inafo ato rutushotiro Upa Diosin aton chaca soashonon. Arifi chaca huamisi. Ascafiashon arifi ahuun ina rutuni Upa Diosin ahuun chaca soashonon. \p \v 4 Tsoacai afiri catonmutiroma ahuun caifofoan ato Dios yoishomisi niaifo iishquin. Ascano Upa Diosin Aarón catonni cuscan atorifi catontiro. \v 5 Nanscarifiai Cristocai afiri catonmunima yorafohuunshon Dios cufimisi niaifocoin iishquin. Ascatama Apa Diosin catonquin isca huani, \q3 “Min uhuun facucoin natian un mia catoan nantifiton aton Ifo min inon,” \m ishon Apa Diosin yoini. \v 6 Ascashon afanan yoiquin isca huani, \q3 “Minfin nan niaifo Melquisedec cuscaraquin. Nantofin yorafohuunshon ua yoimisi ipaoni. Ascan mirifi min nanscasi apanacaran,” \m ishon Apa Diosin furun Jesús yoini. \v 7 Jesús mai ano iyoashu omitsiscapaoni. Ascashu nocohuunoashu naitian oi ashcafinin uaiyanan Apa Dios cufinquin isca huani, —Upashtan, mian numapaiquin mian numatiro un nanonma. Ascafia un apaiyai cuscan huaima nan mian amapaiyai cuscan fusti ua huahuun, —ishon Apa Dios yoini. Ascashon nan Apa amapaiyai cuscan fustisi shinanquin cufiai cuscan nicacoinni. \p \v 8 Ascashu Diospan facucoinfiashu omitsiscani. Omitsiscafiaquin Apa nicacoinni. Ascashori arifi muyopaoni ahuara ahuuscarafiaino Apa nicacoinpaoni. \v 9 Nocohuunoashu omitsiscafiaquin Apa Diosin yoiai cuscan nicacoinni. Ascashon yorafo ismani ahua chaca huamisima. Ascashu ishara fustimisi. Ascashu nocon Numamisi sharacoin itiro. A nicasharaifoti Upa Dios fu ipatiroquin. \v 10 Ascano Upa Diosin Furun Jesús catonshon yoiquin isca huani, —Minfin nan Melquisedec cuscara iquicai. Ascashon yorafohuunoa ua cufimisi niaifocoin min ipatiro ato numashqui. Ascashon nantifi yorafohuunoa ua yoimisifo min ato finoncoianran, —ishon Apa Diosin yoini. \s1 ¡Oinfain! Man Jesús cachiquiri huaa fasi musucoin itiro \p \v 11 Ascan nan rama un mato yoia cuscan nanfohuunoa un mato paratama shafacafi tapimapaifiainocai man nicasharamisima. Ascashon man funa tapisharamisima. \v 12-13 Ascan mancai na rama Diospan tsain nicama. Man man fari ranan nicafiamisishaquicai man tapi sharataima. Man tau huaquin Jesucristohuunoa tapini cuscan man man ointiaquimamisi. Ascaquicai man futsafo tapimatiroma. Ascatama mancairocofin futsafo yopaiquin man tau huaquin Jesushuunoa tapini cuscan afanan mato tapimanonfo. Ascashufin man facufo cuscaraquin. Facushta shoma fusti ayotiro. Shoma fusti acaiton non tapitiro yosiataima. Tushucoincai piyotiroma. Nanscarifiai mancai atirifi Diospan tsain tapisharataima. \v 14 Ascan tsoan Diospan tsain shafatifi oinfafainni cununi cuscan aashquin. Nanton tapitiro ahuara shara afainmain ahuara chaca aquimaquin. Nan cuscarafoan fasi paratama Diospan tsain tapi sharatirofo. \c 6 \p \v 1-2 Ascan noncai facufo cuscarama. Facufoancai ichapa tapiama. Ascan iyoafofoan paratama tapisharafo. Nanscarifiai non tau huaquin Jesucristohuunoa tapini cuscan nan fusticai non shinafafainima. Ascasho non tapini non ahuara shara huahuunshoncai noco chaca soashotiroma Upa Dios fu non ipanon. Non tapiniri Dios icoinra huayamashucai non afu ipatiroma. \p Ascatan non unu muran iquimamua nocon chaca soashonano non Jesús ifoashon futsafo ismatirohuunoa tapifain nan icoinra huafo futsafo non ato manmanshon cufishotiro Diosin ato yonomapaiyai cuscan anonfo nanrifi tapifain yora naashu funitirohuunoari tapifain icoinra huafoma Diosin ato omitsiscapanacafo muran potashquiai nanfohuunoa man non tapiyoni. Ascan afanan noncai tapimamisi yopaima nanfohuunoa noco tapimanon. Ascano afanan ascatama noficairocon non paratama Diospan tsain shara tapinon Jesús tanasharashquin. \v 3 Ascan natian Upa Diosin ahuara futsafo noco tapimapaiyai cuscan ahuun tsainhuunoa non nicasharanon nanscacoin aashquin. \p \v 4-6 Tsoan Diospan tsain shara Jesucristohuunoa tapiyoni Furun Jesús aqui nichini ahuun ifo icaino ahuun nomuran mumisi. Ascashori Diospan Yoshin Shara fu rafucain ahuun tsain shara noco cunushoni iconcoin oinquin ahuun nomuran muumisi. Ascatan Jesús oaitian ahuun curushhuunshon ahuamamishti tsoan oinyomisima cuscara man aashquiairi man ahuun nomuran muumisi. Ascan nantifi ahuara sharafo ahuun nomuran mufiamisishaquin Jesús cachiquiri huacoinshon nocon Ifo Jesús afanan masta cafisca huai. Ascashon futsafoan Jesushuunoa shinanchacatirofo. Ascaran yorafoancai afanan shinan futsatiroma aton chaca shatushon Jesús ifoashquin. \p \v 7 Shinancapon. Diosin oi fumariaino oian mau fupuatiro yonofo foai sharanon. Ascano mau yonomisifo unimatirofo yono foaisharano pisharashcaquin. Ascacufin na mau Diosin shara huaquin. Nanscarifiai tsoan Diosin tsain nicafafaini isharatiro futsaforifi shara huashoshquin. \v 8 Ascafia mau futsan ifoan fanayamaino yono foaitamarocon totoshmoshafosi foaitiro. Nanscara mau chaca foaitiro. Ascashon afanan tsoan fipaiquima coatiro coonon. Nanscarifiai tsoan Diosin tsain nicafafaifiai yoia cuscan atama ahuun tsain cachiquiri huacoincun nanscarafo Diosin omitsiscapanacafo muran potashquin. \s1 Non tapitiro non Jesús icoinra huashucai non funotiroma \p \v 9 Uhuun yoramishtichin, un mato na rama cunushona cuscacai un anori matohuunoa shinainma. Ascan mancai ascarama. Un icoinra huai mancai nocon Numamisi Jesús cachiquiri huamisima. A tanasharashon nan mato yoia cuscacoin man amisi. \v 10 Upa Diosin icon fustisi. Amaquiri ahuashta shinantiroma. Ascashon mato shinanfafaini. Man ahuun noiquin ahuun yorafo man shara huashomisi. Ascaquin man Dios ismai man noiai cuscan. Ascashori man unutama ato shara huafafainmisi. Man ato shara huaa cuscan Upa Diosin mato oiainnocai ointi aquimapacunacama. \p \v 11 Man yorafohuun noiai cuscan unupacuyamacahuun. Ato shara huafafaincahuun tushcuicaquima. Nan Jesús oai chain natianri Dios yonosharashocoinfafaincahuun. Man ascaifin nan man manamisi cuscan Upa Diosin mato inanshquin. Ascashu man Jesús cuscara shara iishquin. \v 12 Ascacun tushcuicaquima nan Diospan yora futsafoan Jesús icoinra huacoincashon ato yoiyotiani cuscan manasharamisishacaquin man ahuun Yoshin Shara fiafo aton nomuran unimamanon. Ascan marifi atohuun caocahuun Jesús tanasharacoinshcaquin. \p \v 13-14 Nocon shuni Abrahamrifi nanscaracoin ipaoni. Ascashon Upa Diosin yoiyoni isca huaquin, —Unfi Diosicoinquin. Tsoancai ua finontiroma. Urusu fustifin un iconmisicoinquin. Uncai chanitiroma. Ascacun un mia shara huaquin ahuara yoipaiyai cuscan mian icoinra huatiro. Ascashon min funafo ichaparasi un mia ato cainmashoshquin. Ascan mincai ato tanan huatiromaran, —ishon Diosin Abraham yoiyoni. \v 15 Ascaiton nicaquin Abraham funaquima mana sharapaoni. Nan yoiyotiani cuscan furun Isaac ahua cainni. \p \v 16 Ascacufin non tapitiro Diosin nan yoiai cuscacoin huamisi. Ascan futsan noco ahuara yoiquin icoinra huamapaiyai cuscan nan futsan finoncoiaiton nannoricoinrifi noco yoiaihuunshon non icoinra huatiro. Ascan tsoancai, —Anorimaran, —ishon fochishmatiroma. \v 17 Ascacun Diosin noco tapimapai ahuun tsain iconcoin fusti noco yoiquin isca huatiro, —Un mato yoiyotiani cuscan ashofin man ua icoinra huatiroquin, —ishon Diosin yoini. Ascacun non tapitiro noco yoiyotiani cuscan nannoricoincun. Ahuun tsain fiananantiroma. Ascashon yoiyotiani cuscan afanan yoiquin isca huani, —Unfin Diosicoinquin. Tsoancai ua finontiroma. Ascacun un mato yoiai cuscan man ua icoinra huatiroran, —ishon yoini icoinra huanonfo. \v 18 Diosin nocon icoinra huamapaiquin nannoricoin noco yoiyoni. Ascacun non tapitiro nan shinain cuscan Diosin nannoricoin noco yoiaiton. Man non tapia Diosincai chanitiroma. Noco yoiyoni Furun nocoqui nichishquin noco numanon. Ascacun non icoinra huatiro nan yoiyotiani cuscan Furunmun noco numano non afu ipanon. \p \v 19 Ascashu fianananyamacain afananricai shinan futsatiroma. Ahuara ahuuscarafiaquicai noco Jesusmaqui imatiroma. Ahuunoashu fusti non nai muran Upa Dios fu ipatiroquin. \v 20 Jesús taui Apa Dios ari cani. Nannoshon nocohuunoa apa cufishofafaini noco numanon. Ascan Jesusfin nan Melquisedec cuscara noco Dios cufishomisi niaifo ipanacaquin. \c 7 \s1 Nan Dios yorafohuunshon cufimisi ahuun anu Melquisedec \p \v 1 Ascatarifi natian un Melquisedechuunoa mato yoinon. Nanfin Salem pushurasi anoafoan aton niaifo iniquin. Nanrifi nantifi yorafohuunshon Dios cufimisi futsafo finoncoian ini. Nanfin Abrahamqui noconiquin. Nan mucu fustiti niaifofo yomutso chacafo ato ichoshon ahuun piaca mafofo yafi futsafoan mafoforifi afanan ato fishotani Abraham oaino nan Melquisedec Abrahamqui fai pochinin noconi ahuun pushu ano naso curani oaino. Ascashon isca huaquin yoisharani, —Abraham, Diosin mia shara huairan, —ishon yoini. \v 2 Nannori yoiaiton Abraham ahuun mafo yafi ahuun tushuforifi atirifi Melquisedec inancoinni. Tsain futsa \it la décima parte \it* inancoinni. Nan Melquisedec ahuun anu futsafin iconcoin yoifain isharacoinmisiran huanifo. Nan Salem pushurasi murannoa aton niaifocoin ipaoni. Ascano nan Salem onicoinnin tsainmanfin aton nomuran unima sharairan huanifo. Nan Melquisedec ahuun anu futsari nomuran unima sharai niaiforan huanifo. \v 3 Naanfin uhuaomacain upaomari iniquin. Ahuun shunifohuunoacai tsoan tapiyopaonima. Tsoancai cainnitian yafi naitian tapipaonifoma. Aafin Diospan Furun cuscara Dios yorafohuunshon cufinmisi ipanaca. \p \v 4 Uhuun yoramishtichin shinancapon. Nan Melquisedec niaifocoin. Tsoa cuscarama ipaoni. Ascan nan Abrahamfin Israelifoan aton shuni iqui tauniquin. Nocofunu fasi sharacoin. Ascashon Melquisedec ahuun caifoyamafiacun ahuun mafofo yafi ahuun tushu la décima parte inancoinni. Ascacun non tapitiro Melquisedec Abraham finoncoian. \v 5 Israeli shoco futsafo Leví ahuun funafo. Nanfofin Upa Diosin catonniquin ahuun yorafohuunoa ato cufishomisi inonfo. Nan Levifoansi aton caifohuunshon Dios cufifafainmisi ipaonifo. Ascafia Dioshuunshon Moisés Israelifo yononi cuscan nantifi ato tushufo non ato ahuarafori futsa futsa huaquin nan Leví ahuun funafo la décima parte inanpacunifo. \v 6 Ascano Diosin Abraham yoiyoni ahuun funafo chipo ichapacoin ishquiain. Ascafia Melquisedec Levipan ahuun funayamafiacun Abraham nantifi ahuun ahuara futsa futsa huaquin Melquisedec la décima parte inancoinni. Ascacun Melquisedec Abraham yoini isca huaquin, —Abraham, mia Diosin shara huairan, —ishon yoini. \p \v 7 Icon nantififain man non tapicoian tsoan futsafo finoncoinshon ahuun tsainman ato shara huatiro. Ascacun non tapitiro Melquisedec Abraham finoncoian. \v 8 Ascacun ahuun caifo Israeli shoco futsafoan. Nan Leví ahuun funafo ahuarafo futsa futsa huaquin la décima parte ato inanfianifo nanfo man naamisifo. Ascano arifi Melquisedec Abrahamna futsa futsa huaquin la décima parte fiini. Ascacun Diospan tsain cununi cuscan Melquisedec natian nia. \v 9-10 Levipan ahuun funafoan aton shuni Abraham. Ascashon Abraham Melquisedec ahuarafo inaintian nantianrifi Levifoan arifi inain cafisca huanifoquin. Nan Abraham Melquisedec inaintiancai ahuun funa Leví caiantai inima. Chipo Abraham ahuun funa Leví cainni. Ascacun non tapitiro Melquisedec fustiton aton shuni Abraham yafi atorifi finoncoian. \p \v 11 Uhuun yoramishtichin shinancapon. Upan Diosinhuunshon Moisés noco yononi cuscan yafi Leví funafoan nocohuunshon Dios cufimisifoan noco numatiroanocai Diosin Furun nichicuanima nocohuunshon Apa Dios cufimisi inon. Cristocai Aarón nan Leví ahuun funa cuscarama. Aafin Melquisedec cuscaraquin. \v 12-14 Taui Leví ahuun funa Aarón. Nan Aarónfin yorafohuunshon Diosin cufimisi futsafoan aton niaifo ipaoniquin. Ascan nocon Ifo Jesuscai Leví ahuun funama shoco futsa. Ascashucai Aarón cuscarama. Nocon Ifo Jesusfin Judápan ahuun funaquin. Nan Levipan ahuun chipocu Judá. Ascano Judápan yorafoanri yorafohuunshon Diosin cufimisifo itiroforan ishoncai Moisés yoimisima. Ascacun non tapitiro Upa Diosin Furun nichini afanan ahuun yorafo yoi futsanon. Ascatarifi Moisés yononi cuscan fiananan huashquin. Ascashon yononi Judápan ahuun funa Jesús nocon cufishomisi niaifo inon. \p \v 15 Ascacun afanan un mato cayacafi yoisharapai. Natian shafacafi man non tapishara Diosin ahuara futsa yononi cuscan nocon Dios cufishomisi funa Melquisedec cuscara nocoqui noconi. \v 16 Moisés yononi cuscacoin Leví ahuun funafo fustifin Dios cufimisifo itirofoquin. Ascafia Jesuscai Moisés yononi cuscahuunoashu noco Dios cufishomisi icama. Aafin Diospan curushhuunoashu nipanacaquin. Ascashu noco Dios cufishomisi ica. \v 17 Nannori David Diospan tsain Jesucristohuunoa cunuquin isca huani, \q3 “Min Melquisedec cuscara yorafohuunshon Dios cufimisi ipanacaran,” \m ishon cununi. \v 18-19 Ascacun non tapitiro Moisés yononi cuscacai non afanan tanaima. Nanfoancai noco ahuusca huatiroma noco imasharanon non Dios cuscara isharashquin. Nanfohuunshoncai nocon chaca soashomisima non Dios fu ipanon. Ascan Jesuscai ascarama. Aafin fasi shara finacoian. Upa Diosin nocoqui nichini ahuunshon non tapinon non afu ipatiro. \p \v 20-21 Ascatari Upa Diosin Furun yoini cuscacai Levipan ahuun funafo anori yoimisima. Ascacun Furun Jesús yoiquin isca huani, \q3 “Unfi nantifiton aton ifocoinquin. Un mia yonoai cuscan min nantifi yorafo atohuunshon ua cufimisi ipashquin. Ascashon un mia yoia cuscacai un afanan shinan futsapacunacamaran,” \m ishon Furun yoini. \v 22 Ascan Apa nannori yoinicun non tapitiro Jesushuunoashu non Upa Dios fu ipatiro. Ascano Leví ahuun funafocai ascarafoma. Nanfohuunoashucai non Diospan yora itiroma. Ascan Upa Diosin Moiséshuunshon Levipan ahuun funafo yononi cuscan sharafiashu nan furun Jesús yononi cuscan fasi shara finacoianquin. \p \v 23 Nanfo ichapafofia aton caifohuunshon Dios cufimisifocai ipatirofoma. Nan futsa naitian futsarifi catontirofo arifi aton yorafohuunshon Upa Dios cufimisi inonfo. \v 24 Ascafia Jesuscai ato cuscarama. Aafin nipanacaquin. Nanrifi noco Upa Dios cufishomisi unupacuyamacain nanscasi apanaca. \v 25 Ascan non ahuunoashu Apa Dios fu ipapaiyaiton nocohuunshon Apa Dios yoifafaini isca huaquin, —Upa Diosin, un ato nashoni aton chaca soashohuun. Ascashon mi ano ato imahuu, —ishon nocohuunoa Apa yoishquin. Ascatan nocohuunoa Apa yoia cuscan nanscacoin noco huashoshquin non afu ipanon. Ascaicai non funopacunacama. \p \v 26 Ascan nan Jesusfin nocohuunoa Dios yoimisiquin. Yoimisi futsafo finoncoian. Aafin Diosin cuscara sharacoinquin. Tsoancai ahuunoa ahuashta chaca yoitiroma. Aatocai ahua chaca shinanyamafain yora chacafo cuscarama. Ascashon Apa Dios icanoafori finoncoian. Ascashon non yopai cuscarifi noco ashotiro. \v 27 Yorafohuunshon Dios cufimisi niaifo futsafofiashucai ascarafoma. Nanfoan shafatifi inafo rutupaonifo Upa Dios ismaquin ato chaca soashonon. Ascashon Upa Diosin aton chaca soashonano futsafohuunoari nanfoan inafo rutushopaonifo Upa Diosin atori chaca soashonon. Ascafia Jesuscai ato cuscarama. Ato fasi finoncoian. Atocai ina rututiroma aton chaca soashonon. Ascatamarocon nancaifin nantifi yorafohuunoashu nashoniquin nocon chaca soashoshquin. Ascano nancai afanan ahua futsa yopaima noco chaca soashoshquin. Ascashon nan fustiton nocon chaca soashonano non Upa Dios fu ipatiroquin. \p \v 28 Ascan Upa Diosihuunshon Moisés yononi cuscan yorafohuunoa Upa Dios cufimisifo non aton niaifofori catonnifo. Ascan nanfofin noco cuscarafoquin. Ascashon nanfoanri chaca huamisifo. Shara ipaifiacaquin samamashta chaca huapaonifo. Ascacun Diosin ahuun tsain yoiyoni cuscan Furun Jesús chipo catonni nocohuunshon Dios cufishomisi ipanon. Aatocai ahua chaca huamisima. Aafin shara fusti imisiquin. \c 8 \s1 Upa Diosin ahuun tsain futsancai anori noco tapimaiyopaonima cuscan natian noco tapimani Jesús fustihuunoashu non afu ipatiro \p \v 1-2 Ascan nan Jesusfin Apa Dios niaifocoin icari afu icaquin. Ascashon non yopai cuscan nocohuunoa Apa yoipacushquin. Aafin noco yoishomisi niaifocoinquin. Nan icaricai tsoa futsan onihuanima. Dios fustiton nanri onihuani. Nanriashu nocohuunoa Apa fu tsaincacaini. Nan ica ari Dios fu tsainti pushu cuscaracoin. Ascano un mato cunushona cuscan nanfo man shafacafi tapi. \p \v 3 Nan nocon yorafohuunshon Dios cufimisi niaifocoin nantifi ato catonnifo ahuarafo Dios inanfain ina rutucashon aton chaca shoashonon. Ascano nocohuunshon Dios cufimisi nan Jesús arifi ahuara futsan inanniquin. \v 4 Moisés yononi cuscan Leví ahuun funafosi Israelifoan aton Dios cufimisi itirofo. Nanfoanfin inafo rututirofo aton chaca soashonon. Ascano Jesuscai Levipan funama. Ascashu Jesús nuno mai ano icashucai nocohuunshon Apa Dios cufimisi icuanama. \v 5 Ascano nuno mai anoshon nan Leví funafoan Dios fu tsainti pano pushu muranshon yonoshopaonifo. Nannoshon ahuun caifo Israelifo tapimapaicaquin Dios icarimain ahuu cuscaraquin. Ascafia ascaracoin tsoan tapiyonima. Ascacun Upa Diosin Moisés yononi isca huaquin, —Un mia tapimanai cuscan nanscacoin ufu tsainti pano pushu huahuun. Man min shinainmun un mia machi anoshon tapima cuscan nanscacoinrifi ufu tsainti pano pushu huahuun. Ascacun yonomisifo tapimahuun nan un mia yoia cuscacoin huanonfo, —ishon Upa Diosin Moisés yononi. \p \v 6 Ascafia Diosin Furun Jesús yononi cuscan nan Moisés yononi cuscan finoncoian. Ascacun Jesús Apa icarishon nocohuunoa Apa cufifafaini nocon chaca soashonano non afu ipanon. Ascan Levipan funafoancai asca huapaonifoma. Upa Diospan Furun Jesús yoiyotiani cuscacai ato yoimisima. Ascano atorifi yoiyotiani cuscan sharafiashu nan Furun yoiyotiani cuscacaifin fasi shara finacaiaquin. \p \v 7 Upa Diosin Moisés yoiyotiani cuscahuunoashu non isharacain ahuara futsa non yopayamatirocucai nan Jesushuunoa ahuara futsa fasi shara finacaia noco yoicuanima. \v 8 Ascafia Upa Diosin yoini Moiséshuunshon ato yoifianicai tsoa ascacoinmisima. Ascashucai isharayamacain yoitimacoin imisifo. Ascacun nocon Ifo Diosin yoini isca huaquin, \q3 “Un chipo Israelifo nan Judápan ahuun funafori tsain funa shara futsa un ato yoishquin. Nan un ato sharacoin ashoai cuscan un ato tapimashquin. \v 9 Un ato shunifo Egipto anoshon iyoni. Nantianri un ato yoisharani uhuun tsain nicasharaifoan un ato cushusharafafainon. Un ato asca huafiaino uhuun tsain cachiquiri huanifo. Ascaifoan un ato potayoni. Ascacun ato shunifo un yoini cuscacai un ato funafo anori yoishquima. Ascatamarocon uhuun tsain shara futsa un ato yoishquin ua nicasharanonfo.” \q3 \v 10 “Un Israelifo yoishquiai cuscacai cunu fustihuunshon un ato tapimashquima. Ascatama aton nomuran uhuun tsain shara nanumafain aton nomuran cunui cafisca huaano. Nan un ato yonoai cuscacoin anonfo. Ascano un ato Upa Diosincoin iishquin. Nanfo uhuun yorafo iishcani. \v 11 Nantififain ua onancoinshcani. Yora ahuuamafoan ua onainfoanno niaifofoanri nansca huaquin ua onancoinshcani. Ascashon tsoa futsacai uhuunoa aton yora futsafo tapimashquicanima. Aafimain nantifiton ua onancoinyainfoan.” \q3 \v 12 “Un atohuun ramapaishquin. Chaca huafiainfoan un ato chaca soashofain un ato rau huashquin. Ascashocai chaca huafo cuscan un afanan afo shinanpacunacamaran,” \m ishon Diosin yoini. \v 13 Ascacun Diosin afanan ato yoini isca huaquin, —Un mato tsain funa shara yoiran, —ishon ato yoini. Ascan Moiséshuunshon ato yononi cuscacai tsoa afanan yopatiroma. Nan Moiséshuunshon ato yononi cuscan fasi tsain shunicoin. Tsoancai afanan afohuunoa yopaiyamaino nan tsain cuyocointiro. Ascashu nanfohuunoa shinanmaquipacunacafo. \c 9 \s1 Pano pushu cunu futsa ocu murancoin Jesús iquitamarocon Apa Dios icaricoin iquini \p \v 1 Upa Diosin Moisés tapimani ahuuscashomain ahuun yorafoan nan na mai anoshon pano pushu muranshon cufitirofoquin. \v 2 Ascan nan amuranshon Dios cufiti pano pushu cunu rafuya iniquin. Nan cunu taua muran anuqui isca huanifo, —Nuno shara fustisi itiroran, —ishon anunifo. Nan muranrifi faro nia ini. Cuno chashna faca facaitsa tushpacua ahuun shoimishti muran shuni ocapacushon otapaonifo. Nannori sapa acamaquishon piti ini. Nan sapa camaqui misi sutu huashon huafafainpaonifo. Ascashon Diosin atofu ica cuscan ato oinmashquin. \v 3 Pano cushtopan futsan fupoa cunu ocu murancoin anunifo isca huaquin, —Nuno fasi shara finacoianran, —ishon anunifo. Israelifohuunoa aton Dios cufishomisi niaifo fusti nan cunu futsa muran iquitiro ini. \p \v 4 Nan Dios cufiti cunu muran nantio cuno chashna faca facaitsa sharaishtan puraishica ini. Ascashon nan cufiti camaqui ahuara coanifo ahuun coin tipoaino nohuu inin sharayacoin inon. Nan coin tipoaino Dios ismapaonifo a cufifafaincaquin. Nannori cashon uhuapa ini. Nan ihui casho cuno chashnanpan puraishacafo faca facaitsa sharacoin ini. Nan cashon muranri tutso chashna faca facaitsa muran misi torumishti anucaquin, —Mananran, —huapaonifo. Nan casho muranri Aarón ahuun poquiti yafi toquiri sapa rafu nanunifo. Nan poquiti casho muran nanuataifoma Upa Diosin charo shachoco onihuariscatani. Ascashon nan toquiri sapa rafuqui Upa Diosin Israelifo yonopaiyai cuscan ato cunushoni. \p \v 5 Ascan nan casho camaqui Diospan nai oinmati ointsa rafu nimanifo. Ato putaon rafutan aton mapo manaon mutiquinanfo. Ascano nan nai oinmati rafuhuunshon Diosin fasi sharacoin ato cushusharamisi ato ismanon. Ascacun nanno anuquin isca huanifo, —Nunoshon Diosin nocon chaca soashonaran, —ishon nan casho anunifo. Ascafia nanfohuunoacai un mato natian paratama yoiyotiroma. \p \v 6 Ascashon nan amuranshon Dios cufiti pano pushu ocu murancoin iquisi itishara huacashon nan aton caifofohuunshon atohuunoa Dios cufimisifo cunu umainti cainifo nannoshon Upa Diosin ato yononi cuscan aashcaquin. \v 7 Ascano nan cunu futsa ocu murancoin ahuun yorafohuunshon ato Dios cufishomisifoan aton niaifocoin arus fusti nan faritifi iqui fustipaoni. Nanno iquicai moipan imimaisi iquipaonima. Ascano moipan ahuun imi foshon ahuara chaca huamisi cuscan ahuunoa afiri yoimucain ahuun yorafohuunshori yoiaiton Upa Diosin aton chaca soashoni. Ahuara chaca huafiaquin tapishoma acafo cuscan nanfori soashonon. \p \v 8 Ascacun nanfohuunshon Diosin ahuun Yoshin Sharapan noco shafacafi tapimani nan pano pushu ipaonitian ahuun caifohuunshon Dios cufimisi niaifon fusti cunu osa futsa ocu murancoin iquipaoni Dios fu tsainshquin. Ascano nan cunu ocu murancoin anunifo, —Nuno fasi shara finacoianran, —ishon. Nantiancai tsoan tapiatai inima chipo Jesushuunshon nantifi Diospan yorafo afu tsaintirofo. \v 9 Un na rama yoiai cuscarafohuunoa natianrifi noco nanscara tapimatiro. Ipaoni Moisés ato yononi cuscan Dios fu tsainti pano pushu muranshon ahuarafo Dios inanfain moifori rutushopaonifo ato chaca shoashonon. \p Ascafia afohuunshocai aton nomuran unimapaonifoma. Nanfoancai aton nomuran shinanmapaonima isca huaquin, —Natian Upa Diosin uhuunoa ahua chaca ointiroma. Un natian shara. Un natian Upa Dios fu itiro afu tsainshquin, —ishocai tsoan anori shinantiro ipaonima. \v 10 Ascan Moisés ato yononi cuscan ahuun caifofohuunshon Dios cufimisifoan ato nansca huashonifo. Ascashon ahuara futsafori ato tapimanifo. Ahua pifainmain ahuari ayatirofoquin. Ascatan ahuuscashurimain muchoquimutirofoquin Diosin ato nicacoinon. Ascafia nanfoancai aton chaca soashocointirofoma. Cristo oataima nannori Diosin ato yoiyoni. Nan Cristo naitian ahuunoashu man nantifi fianananshara. Ascanocai Moisés ato yononi cuscan afanan tsoashta yopatiroma. \p \v 11 Upa Diosin ahuara sharacoin noco yoiyotiani isca huaquin, —Un maton chaca soashoni man ufu isharacoinon, —ishon yoini. Ascano nan Israelifohuunshon Dios cufimisi niaifofoancai noco nan yoiyotiani cuscan tsoan ascacoin huatiro ipaonima. Ascafia Cristo mai ano oaitian aficoin nocohuunshon Apa Dios cufimisi niaifocoin man ica. Ascashon nantifi ahuara sharacoin noco yoiyotiani cuscan noco ashoshquin. Ascan nan naashu pano pushu ocu murancoin iquitama. Cayacafi Apa Dios icaricoinrocon iquini. Nannocai Diosin mai onihuani cuscarama. Nocofunufoan pano pushu onihuafianifo. Ascan Dios icaricaifin fasi shara finacoianquin. Ahuashtatocai ari finontiroma. \v 12 Ascan Cristocai chashoanfo futan moipan facufoan aton imi Apa Dios icari fonima. Ascatamarocon afincoin noco nashoaintian ahuun imi foni. Ascanocai Upa Dios icari ahuashta chaca iquitiroma. Ascafia Cristo noco nashoin fustini nocon chaca soashoshquin non Apa Dios fu ipanon. Ascashucai afanan nanacama. \p \v 13 Ascan ratoran futsa Diosin yoiyoni cuscan ayamashu ahuun yorafohuunshon Dios cufimisi niaifo yoitirofo ipaoni. Ascano nanfoan chashoanfo futan moipan ahuun imi fifain iquisi moipan facu coayopaonifo. Ascashon ahuun maapo yafi imi osishon yoraqui fasha fashapaonifo ahuun chaca soashonano Diospan yora shara icashu afu iishcaquin. \v 14 Nanfo iconfia fasi mimacaia Cristo noco nashonihuunshon chaca noco soashotiro. Ascashon atocai ahuashta chaca huapanacama. Ascan nan Diosin Yoshin Shara nipamisihuunshon Apa yoini isca huaquin, —Upa un atohuunoashu nai. Ascacun uhuunshon min aton chaca soashotiro min yorafo inonfo, —ishon Jesucriston Apa yoini. Ascan non chaca huamisi cuscan non unuyamashu omitsiscapanacafo muran non cacuana. Ascafia non afanan asca huatamarocon Cristo noco nashonihuunshon non afanan chaca shinanonma. Ascashu nocon nomuran chocatsa shara cuscara itiro. Ascashon Upa Dios nipanaca non yonosharashotiro. \p \v 15 Moisés ato yononi cuscan sharafiacucai tsoan nicafafainpaonima. Nantianri nantififain chaca huapaonifo. Ascano nanfoan chaca huapaonifo cuscan Cristo fustiton aton chaca soashotiro. Ascafoancai Moisés ato yononi cuscan afanan ato yonotiroma. Ascacun natian Cristo atohuunoashu nani ato chaca soashoshquin. Nanfin ato Numamisi sharaquin. Ascan Cristo icoinra huafoti Upa Diosin ato yoitiro isca huaquin, —Uqui fucahuun uhuun facuhuunoashu uhuun yorafo iishcaquin, —ishon yoitiro. Nanto noco yoiyotiani cuscan Furunhuunshon noco catontiro ahuun yorafo non inon. \p \v 16-17 Natian ahuara futsa un mato tapimapai man tapinon. Nocofunun nataima cunutiro isca huaquin, —Un naanomain tsoan uhuun ahuarafo fitiroquin un mato iquisi tapimaiyoiran, —ishon cunutiro. Ascacun ahuun ahuarafo futsa inanpaiyai cuscan nataishoma iquisi nan yoiyomisi cuscan cunushotiro. Ascan nan nocofunu niyoanocai ahuun ahuarafo tsoan fianyotiroma. \p \v 18 Nanscarifiai Diosihuunshon Moisés ahuun caifo Israelifo yononi moi yafi chashoanfo rutuaifono ahuun imi fonon. Ascan aton imi foyamainocai ato yoiyoni cuscacoin Diosin ato ashotiroma. Ascacun nan moi yafi chashoanfo rutucashon Dios ismafain tapipaonifo chipo Cristo ato nashoshquiai cuscan. Cristo atohuunoashu nataimacai Diosin aton chaca soashocoinpaonima afu ipanonfo. \v 19-20 Upa Diosin Israelifo yonoai cuscan nantificoin Moisés ato tapimafain ato yononi. Ascashon nantifi ato tapimaqui anaitishon nii uhuapamashta futsan ahuun anu hisopo ahuun ponya uhuapamashta fini. Fishon moipan facun ahuun imi yafi unu osishon nan hisopo ponyamishti pishtanufain chashoanun rani amuran pocotan Diosin yononi cuscan ahuun papio cunuaqui imin fasha fashafain Israelifoquiri imin ato fashacuni. Ascashon ato yoini isca huaquin, —Nan imihuunshon man tapitiro Upa Diosin noco yoiyotiani cuscacoin ashu non afu ipatiro. Ascashu non ahuun yorafo itiroran, —ishon Moisés ahuun caifofo yoini. \p \v 21 Nanscarifi aqui Dios cufiti pano pushuqui Moisés moipan imi fasha fashafain nantifi amurannoafoquiri imi fasha fashani. \v 22 Nan Upa Diosin Moisés yononi cuscacoin nantificuana ato imin fashacuni ato chaca soashonano isharanonfo. Ascan imi foyamainocai Diosin noco rau huacuanama nocon chaca soashoshquin. \s1 Cristo nocohuunoashu nani nocon chaca soashoshquin \p \v 23 Dios cufiti pano pushu murannoa ahuarafo nan Dios icaria cuscaracoinfo. Ascan nanfoqui Moisés imin fashacuni shara inonfo. Ascan amuran sharafia nan moifoan aton imifohuunshoncai nocon chaca soashocointiroma. Ascatamarocon nan Cristo nocohuunoashu nai fustinihuunshon nocon chaca soashotiro. Noco nansca huashoano non Dios icari catiro a cuscara shara afu ipashquin. Nannocai ahuashta chaca iquitiroma. Ascatan nannoricai Dios cufiti pano pushu cuscaracoinma. Aricairocofin fasi shara finacoianquin. \p \v 24 Ascan nan Dios fu tsainti pushufin nocofunufoan onihuaniquin. Amurannoa ahuarafo nan Diosin icaria cuscaracoin. Ascan Cristocai funinaca huatan amuran iquitama. Apa Diosin icaricoinrocon cayacafi iquini nocohuunoa Apa Dios cufishofafainshquin. \v 25 Ascan nan ahuun yorafohuunshon Dios cufimisi niaifo pano pushu cunu futsan ocumurancoin arus fusti faritifi iqui fustipaoni amuranshon Dios cufishquin. Ascashon ahuun imicoin ya a muran iquitamarocon inapan imi ya iquipaoni. Ascan Cristocai a cuscarama. Aacai faritifi noco nashofafainmisima Dios icari caashquin. \p \v 26 Ascamisicucai nan Diosin ahuarafo onihuani chain nocohuunoashu omitsiscafafainmisi icuana. Ascafiacai ascarama. Satanás ahuara chacafo aton curush cuyomanaitian Cristofin nocohuunoashu nai fustini nocon chaca soashoshquin afanan chaca nocon ifo inonma. \v 27 Ascan nantifi yorafo non nai futsushquin. Noncai nofiri yoitiroma ahuutianmain non naicain. Diosin fustiton yoitiro. Naashu nantifi non aqui nocoaiton niyoshon non amisi cuscan noco yoishquin. Noco yoiano nan Jesús icoinra huafoti afu ipasharatirofo. Nan icoinra huamisifoma ato omitsiscapanacafo muran potashquin. \p \v 28 Ascashu Cristo aafiri inanmucain noco nashoin fustini. Yora ichapafohuunoashu omitsiscacai noco nashoni. Ascafia chipo afanan ahuun yorafoqui mai ano nasoshquin. Ascanishaquin nantian afanan nocohuunoashu naima nocon chaca soashquin. Ascatamarocon ratoranfo aqui unimacai manaifoan ato numashqui afu ipanonfo. \c 10 \p \v 1 Diosin Moisés yononi cuscahuunshon non tapitiro Cristocaifin noco ahuara shara huashoshquin finacoinshquin. Ascacun Moisés ato yononi cuscacai noco ascacoin huatiroma. Nantorifi ato yononi cuscan nan faritifi atohuunshon Dios cufimisifoan moi yafi chashoanfo rutushomisifo aton chaca soanonfo. Ascano nan Moisés yononi cuscahuunshoncai ato numayamafain ato imasharamisima Dios fu ipanonfo. \v 2 Ascamisicucai Israelifohuunshon moi yafi chashoanfo ato rutushopaonifo cuscan tsoan unu cuamisima. Ascashon nan Dios tanapaicoinmisifori ato chaca soashoshquin fusti huaa cuani. Ascashon tsoancai aton nomuran shinanquin isca huaacuanama, —¡Ohuashta! Un chaca huamisiran, —ishocai tsoan anori shinancuanafoma. \v 3-4 Ascafiacai ascarama. Nan faritifi moi funufo yafi chashoanfo ato rutushonaifotian nan chaca huamisifo cuscan fasi ato shinanmapaonifo. Ascafiaquicai nan inapan imihuunshon tsoan ato chaca soashopacunacama Dios fu ipanonfo. \p \v 5 Ascacufin Criston Apa Dios icariashu mai ano fotoataima iquisi Apa yoiquin isca huani, \q3 “Upan, mincai fuchipaima moipan imihuunshon chaca soanonfo. Ascacun mian chipo yorafoan caya cuscara onihuashoin un mia ufiri inanmunon. Ascashu yorafoti un naashoshquin ato chaca soashoshquin. \v 6 Min yorafoan moifo rutucashon coafain ahuara futsafori mia inancaquin. Nan miacoin inain cafisca huamisifo aton chaca soashcaquin. Ascan miancai ascarafo fuchipaima. \v 7 Upan, un mi ariashu nuno mai ano fotoa min ua amapaiyai cuscan aashquin. Nannoricoin uhuunoa min tsain cunuyoniran,” \m ishon Cristo yoini. \v 8 Uhuun yoramishtichin, shinancapon. Cristo Apa yoiquin tau huani isca huaquin, —Upan, Moisés ahuun caifofo yononi cuscacai min afanan nanfo fuchipaima. Ascan nanton ato yonoquin isca huani, “Moi yafi chashoanfo rutuafono aton imi foaihuunshon min ato chaca soashonon,” huani. Ascashon ahuara futsafori mia inanpaifain ina futsafori rutushon coafain nan miacoin inain cafisca huamisifo aton chaca soashcaquin. Ascano nanfoancai mia unimamatirofomaran, —ishon yoiquin tau huani. \p \v 9 Ascashon afanan yoiquin isca huani, —Upan, un mi ariashu nuno mai ano fotoni min ua amapaiyai cuscan ashquin, —ishon Jesucristo yoini. Ascan Cristo noco nashoni nocon chaca soashoshquin. Ascacun Moisés ato yononi cuscacai non afanan yopaima noco chaca soashonon. Nanfo Jesús man shatumani. \v 10 Ascashu Apa amapaiyai cuscan Jesucristo afiri inanmucain noco nashoni nocon chaca soashoshquin non a cuscara shara inon. Ascacun noncai afanan ahuara futsa yopaima. Nanton noco nashoin fustini. Ascanishaquicai afanan nanacama. \p \v 11 Ascan nan atohuunshon Dios cufimisi Israelifoan shafatifi inafo rutupaonifo Upa Diosin aton chaca soashonon. Ascashon nanfoanrifi shafatifi aton yorafohuunshon ahuarafo Dios inanfafainpaonifo. Ascafiaquicai nanfoan ato chaca soashopacunacama. \v 12 Ascafiaifono nan nocohuunshon Apa Dios cufimisi nan Jesusfin afiri Apa inanmuniquin noco nashoshquin. Ascashu nai fustini. Ascanocai non afanan ahuara futsa yopapacunacama nocon chaca soashonon. Ascan nocohuunoashu naacaini Apa Dios ari cani afu nantifiton aton niaifocoin iishquin. \v 13 Ascashu nan Apa ari noconitian yafi natianrifi ato manaiyoi nan noicasmaifo Apa Diosin aton curush shatumaitian afanan ahuushta inonfoma. Ascano nantianri Jesús fusti nantifiton aton Ifocoin iishquin. \p \v 14 Ascashu afiri Apa inanmui fusticai noco nashoni nocon chaca soashoshquin. Nan icoinra huafoti non a cuscara shara inon. Ascashocai afanan Diosin nocohuunoa ahuashta chaca oinpacunacama. Manmain Furunmun noco chaca soashocun. Cristocai ahuashta chaca huamisima. Ascacun norifi non a cuscara sharacoin iishquin. \v 15-16 Nannori Diosin Yoshin Sharapan yoiquin tau huani isca huaquin, \q3 “Uhuun yorafoan ua icoinra huacun aton nomuran uhuun tsain ato nanumafain aton ointi muranri uhuun tsain cunui cafisca huashquin ua ointiaquimaiyamacai ua tanasharanonfo,” \m ishon yoini. \v 17 Ascashon afanan yoiquin isca huani, \q3 “Man ahuara chaca huamisi cuscan yafi uhuun tsainrifi man nicacasmamisi nanfocai un afanan shinanpacunacamaran,” \m ishon Diosin Yoshin Sharapan yoini. \v 18 Ascashon noco chaca soashofain nanfohuunoa afanan noco shinanshonima. Ascacucai non afanan ahuara futsa inantiroma noco chaca soashonon. \s1 Non Upa Dios fu rafucoinon \p \v 19 Dios icaricai ahuashta chaca itiroma. Ascacun Jesús noco nashoni nocon chaca soashoshquin. Ascacun uhuun yoramishtichin, Jesushuunoashu ranotama non Dios fu itiro. \v 20 Ipaoni nocohuunshon Dios cufimisifoan pano cushto pochimua fupuacufoan nan faritifi iqui fustipaonifo Dios cufishcaquin. Ascafia noncai afanan asca huapacunacama. Natian ahuara futsan funa sharacoin Jesús noco ashoni. Ascashon ahuun caya mastaifotian nan pano cushtopan fashnui cafiscani. Ascacun Jesushuunoashu non Dios icano iquisharatiro. \v 21 Nocon Ifo Jesusfin nocohuunshon Apa Dios cufimisi niaifocoinquin. Ascashu aafin nantifi Diosin yorafoan aton Ifoquin. \v 22 Ascacun non Jesús icoinra huacun nan noco nashonihuunshon nocon ointi funa sharacoin huashotiro. Ascashocai non chaca huamisi cuscan afanan non shinantiroma nocon nomuran unimacoinon. Ascashon noco nan unu tsosi sharapan nashimana cafisca noco huatiro. Non afanan ahuashta chaca nocon nomuran shinanonma. Ascan nan iconcoin Upa Dios fu rafuashu non afu tsainshquin. \p \v 23 Ascan non yoiquin isca huamisi, —Jesús uhuun Ifo. Upa Diosin noco yoiyotiani cuscan noco ashoshquiran, —ishon non yoimisi. Nan iconcoin. Ascacun ahua futsa shinanyamacahuun. Nan fustirocon shinanfafaicahuun. \v 24 Diosin noco shara huamisi. Ascacun norifi non shinanon ahuuscashumain futsafo non shinanmatiroquin noinantanancain non shara huatananshquin. \v 25 Man man tapia Jesús oti chaima. Ascacun ichanain unupaifafainyamacahuun. Dios cufiyanan ahuun tsainri nicafain fananshofafaincahuun. Jesushuunoa man shinain cuscan futsafoya yoinonancahuun maton ointi unimashcaquin. Atirificai afanan ichananfafainmisifoma. Ascacun ato cuscara iyamacahuun. \p \v 26 Ratoran futsafoan tapiafo Jesús ahuunoashu naani ahuun chaca soashoshquin. Nanscara man tapifiashon chaca huariaquin nocon Ifo Jesús cachiquiri huacoincun. Ascarafocai afanan ahuun chaca soashotiroma. Jesús fustiton nocon chaca soatirofia nanton man Jesús cachiquiri huacoinna. \v 27 Nanscarafo Diosin ato onaintimacoinshquin. A noicasmamisifocaifin fasi onaintimaquin finacoinshquin. Nantianri nan cachiquiri huamisifo fasi omitsiscapanaca. Ascashu Diosin ointaifi nococani fasi ratucoinfiaifoan Diosin ato yoiquin isca huashquin, —Umaquinoashu omitsiscapanacafo muran fotacahuun, —ishon ato yoishquin. \v 28 Ipaoni yora rafutan iyamarai rafu non fustifain nannorisi futsahuunoa tsain chaca niaifofo yoicaquin isca huapaonifo, —Natocai Moisés noco yononi cuscan acama. Fasi chaca huaran, —ishon yoiaiton niaifoan nicaquin iconcoincun ahuun ramapaitama yononi nan rutumanifo. \p \v 29 Ascano nan Moisés yononi cuscan nicacasmamisifo rutumapaonifo cuscan nanscarifi huaquin ratoranfoan Jesús nicacasmamisifocun ato onaintimaquin finacoinshquin. Ascashon nanscarafoan shinanquin isca huanmisi, —Mun nicamisi Jesús ua nashoni. Nan naino ahuun imi foni. Ascashon ua catonni ahuunoashu un Diospan facu inon. Ascan un shinan nanfocai ahuama. Ascacun uncai Jesús icoinra huapaimaran, —ishon anori shinain nantonfin Jesús nicacasmamisicoinquin. Ascara tsain yoiquin Diospan Yoshin Sharaqui tsain chaca huamisi. Ascafia nan Diosin Yoshin Sharapan yorafohuun ramapaiquin Jesushuunshon aton nomuran fianan huashotiro a cuscara shara inonfo. Ascafia nan nicaiyosmashunifocaifin fasi ato onaintimaquin finacoinshquiquin omitsiscapanonfo. \p \v 30 Ascan man non tapia Diosin aficoin yoiquin isca huani, —Tsoan futsa chaca huaiton unfin ato onaintimaiquin, —ishon yoini. Afanan Diospan tsain cununi isca huaquin, —Nocon Ifoan ahuun yorafoan chaca huaifoan nanfori Diosin ato onaintimashquiran, —ishon cununi. \v 31 Ascan ratoranfoan nocon Ifo Jesús cachiquiri huashon chaca huariaifo fasi musucoin. Ascacun nanscarafo nan Diosin nipanacaton achishon ato fasi onaintimacoinshquin. \p \v 32 Shinancapon uhuun yoramishtichin. Man tau huaquin Jesushuunoa tapifain man ifo huapaoni cuscari ointiaquimayamacahuun. Futsafoan mato Jesús tanatima huafiaino manrocon nocon Ifo Jesús man tanasharacoinpaoni. Ascashon mato omitsisca huafiainfono nanscara tunufain man nocon Ifo tanasharacoinmisi. \v 33 Ascashon man Jesús tanasharaiton futsafoan ato ointaifi mato roafain mato omitsisca huamisifo. Nanscarifiai man muumisi cuscan Jesús tanamisi futsafo arifi omitsiscaifoan oin atofu rafucain man ato tsain shara yoitiro ato ointi unimamashquin. \p \v 34 Jesús icoinra huaa futsafo cunu muran iquimanifo. Ascacun atohuun noicai man atohuunri ramapaiquin cunu muran ato oincai man cani ato shinansharamapaifain aton ointi unimamashquin. Ascan nantianri nan icoinra huamafoan maton mafo onuquin cuyocoinnifo. Mato asca huafiafocai shinanchacatamarocon man man tapini Upa Diosin nan icarishon mato ahuara shara finacoianfo mato mucushona nanfocai funopacunacama. Nanscara tapiashu man unimacoinni. \p \v 35 Ascacun man Jesús icoinra huaa cuscan cachiquiri huayamacahuun. Man cachiquiri huayamacun Upan Diosin mato fasi shara huashquin. Ascashon mato inain cuscan tsoan ascara shara oinyomisima. \v 36-37 Ascan Diospan tsain cununi isca huaquin, \q3 “Jesús oti chaima. Matoqui samamashta nocoshquin. Nantonfin afin tapiaquin ahuutianmain nocoqui ooshquicain. Ascashu oicai ichaipacushquima,” \m ishon cununi. Ascacun man Jesús tanasharai cuscan omitsiscafiaqui tunucahuun. Unupaiyamacahuun Diosin mato amapaiyai cuscan ashon nan mato yoiyotiani cuscan man fiishquin. \v 38 Ascashon afanan Diospan tsain cununi isca huaquin, \q3 “Nan un imasharaiton ua icoinra huamisi. Naantofin ua tanasharashquiquin. Ascan tsoan ua cachiquiri huacucai un aqui unimashquimaran,” \m ishon Diosin yoini. \v 39 Nanscarafoan Jesús cachiquiri huacoincanashu omitsiscapanacafo muran focani. Ascan noncai ascaima. Ascatama non Jesús icoinra huacoincun noco numa non afu ipanon. \c 11 \s1 Icoinra huamisifohuunoa \p \v 1 Ascan non Upa Dios icoinra huacoinshon noco yoiyotiani cuscan noco ashoataiyamafiacun non icoinra huai. Chipomain noco ashoaiton. Nanscarifiaquin noco yoiyoni cuscan non oiantaiyamafiaqui ahuun tsainhuunshon non icoinra huai. Non nanscara shinanquifin non icoinra huaiquin. \v 2 Ascacun nocon shunifoan Diosin ato yoini cuscan fasi icoinra huacoinpaonifo. Upa Diosin atoqui unimacoinquin atohuunoa tsain shara yoini. \p \v 3 Ascan icoinra huashon non tapitiro Diosin ahuun tsainmansi nantifi nan mai yafi nai ariafori onihuani. Non ointiro cuscarafohuunoacai Diosin ahuarafo onihuanima. Ascatama ahuun tsainmansi nantifi onihuani. \p \v 4 Nocon shuni Abel Dios icoinra huashon chashoanun facu inanquin nan Dioscoin inain cafisca huani. Ascan Diosin aqui unimacoinni. Ascan ahuun ochin Caincai ascara inima. Nan Caín icoinra huayamaitocai nantori inanpaiyai cuscan Diosin fuchipainima. Ascan ahuun ushto Abel icoinra huacoincun ahuunoa Diosin yoiquin isca huani, —Min ua inanshararan, —ishon yoini. Abel man Dios icoinra huashu man naafianicun non ahuun caoaino nocoqui Diosin unimacointiro. \p \v 5 Nocon shuni Enoc arifi Dios icoinra huacoinnashu afu rafucoinpaoni. Ascan nayamafiacun nan icari Diosin ihuiriscatani. Ahuunoa Diospan tsain cununi isca huaquin, —Un Enoc yoiai cuscan ua nicacoinmisi. Ascacun un aqui unimacoinran, —ishon Diosin yoini. \v 6 Ascan non icoinra huayamaquicai non Dios unimamatiroma. Ratoran futsan Dios fu ipaicoinquin icoinra huatiro natian Dios nia. Ascashori tsoan fasi onanpaicoinquin icoinra huaiton naanfin aqui nocoaiton Dios fasi shara huashquiquin. \p \v 7 Nocon shuni Noé arifi Dios icoinra huacoinpaoni. Ascan iquisi Diosin Noé yoiquin isca huani, —Un oihuanrasi fumai faitahuan foran fucuaino asai futsunonfo. Ascacun shashohuan pushu ya huahuun. Min non min ahuin non min facu rafu yafi min fanfanhua rafuya asashcaquima. Un mia yoiai cuscan huahuun, —ishon Diosin Noé yoini. Ascan tsoancai ascara oinyomisimafia Noén icoinra huafain shashohuan huani ahuun facufo ya asashcaquinma. Nantonfin Dios icoinra huafain isharacoinmisiquin. Ascan nan icoinra huamafocai ascanifoma. Ascatama nanfoan chaca huafafainpaonifo. Ascacun Noéhuunshon non tapitiro icoinra huamisifo isharaifonocai nan icoinra huamafo isharamisifoma. Ascashon Dios fu Noén rafuaiton a cuscara sharacoin imani. \p \v 8 Nocon shuni Abraham arifi Dios icoinra huacoinpaoni. Ascan Diosin Abraham yoiquin isca huani, —Nan un mia iyopaiyaiquiri min catiro. Ascan min cainni anoashu catahuun. Nanno un mia mai inain mina inon, —ishon Upa Diosin yoini. Ascaran tapiataima ini raquiricaimain caiquin. Ascafia nan Diosin yoia cuscacoin ani. \p \v 9 Ascashon nan Diosin yoiyotiani cuscacoin icoinra huashu nan Diosin nichian mai ano nocoashu Abraham nan mai futsa aria yora futsa ahuun caifo cuscarama iyopaoni. Nannoashuri pano pushu tapasi cuscara muran iyopaoni. Ascan ahuun facu Isaac yafi ahuun shota Jacoborifi nanscara muran iyopaonifo. Upa Diosin Abraham yoini cuscan nan rafu nannoricoini ato yoini. \v 10 Diosin Abraham yononi cuscan nan mai ano iyofiashon tapipaoni chipo Dios icari afu ipashquiain cuscan. Nanno Diosin nantifi onihuani sharashtacoinfo nanfori ahuunari ipanaca. Diosin icaricai ahuashta cuyopacunacama. Nanscasi apanaca. Ascacun Abraham manayopaoni chipo nanno afu ipashquin. \p \v 11 Diosin Abraham yoini isca huaquin, —Min ahuin Sarapan chipo furonanfacu nanushquin. Ahuunoashu min funafo ichaparasi iishquiran, —ishon yoini. Nannori yoifiano Abraham anifoshta ahuin yoshafoshta toosma ini. Ascacun Abraham ahuun nomuran shinanquin isca huani, —Upa Diosin ua yoiyoni cuscan ua ashoshquin. Nantonfin nan yoia cuscacoin huamisi, —ishon Abraham Dios icoinra huani. Ascashu ahuin Sarapan facu caianno Abraham facuya ini. \v 12 Ascano Abraham anifoshta afanancai chai nitiromafia ahuun funafo fasi ichaparasicoin. Tsoancai ato tanan huatiroma. Fishifo yafi mai furomishticai non tanan huatiroma. Nanscarifiai Abraham ahuun funafocai tsoan tanan huatiroma. \p \v 13 Nantifi na rama yorafohuunoa mato yoia cuscan afanan atohuunoa un mato yoi. Diosin ato yoiyoni cuscan fiashuma naanifo. Fiataiyamafiaquin Dios icoinra huanifoan chipo fiishcaquin. Ascacun Diosin ato yoiyoni cuscan aton nomuranshon oincoin cafiscai unimacoinnifo. Ascashon yoinifo isca huaquin, —Nunocai non ipanacama. Na mai anoashu nan mai futsa aria yora futsa cuscarafo nonran, —ishon yoinifo. \p \v 14 Ascan nannori yoiaifoan non tapitiro nanscara yorafo nuno mai ano ipaitama Diosin icari capai afu ipashcaquin. \v 15 Ascan aton mai ipaoni shinantacani nasopai ari naso cuanifo. \v 16 Ascan ari nasopaitama Dios icarirocon fasi shinannifo ari nocopaicaquin. Nanfoan tapinifo nanno fasi shara finacoian. Ascashon Upa Diosin nan icari ato itishara huashoano afu ipanonfo. Ascacufin atohuunoa ranotama yoini isca huaquin, —Unfin ato Diosiquin, —ishon yoini. \p \v 17-18 Afanan Abrahamhuunoa un mato yoinon. Upa Diosin tapipaini Abraham icoinra huafainmain nan yoia cuscacoin aiquin. Ascashon yoiquin isca huani, —Min ina ua rutushotamarocon min facu fustishta Isaac ua rutushohuun, —ishon Diosin yoini. Upa Diosin iquisi tapimani ahuun facu fusti Isaachuunshon ahuun funafo ichapa iishquiai cuscan. Ahuara sharafo Diosin Abraham yoiyoni cuscan ahuun facu Isaachuunshon nantifi ashoshquin tapimaiyoni. Nannori Upa Diosin Abraham yoiaiton ahuun facu fustishtacoinfia rutushon Dios inancuani. Ascano Dios icoinra huacoinshon nan yoini cuscacoin ani. \p \v 19 Ascashon ahuun nomuran shinanquin isca huani, —Upa Diosin ua yoia isca huaquin, “Min facu Isaac ua rutushohuun,” ua huaiton un shinan Diosintsii ahuamamishti huatiroquin. Ascan uhuun facu naafiacun Upa Diosin samamashta funimatiroquin, —ishon shinanni. Icon ahuun facu naa cuani. Ascacun Abraham shinanni, —Uhuun facu man naafiacun Diosin funimana shinantsairan, —ishon shinanni. \p \v 20 Ascan Isaac arifi Dios icoinra huacoinpaoni. Ascacun Diosin ahuun nomuran shinanmani furun rafu chipo ato shara huashononpacoai cuscan icataima yoiyoini. \p \v 21 Nanscarifiai Jacob arifi Dios icoinra huacoinpaoni. Ascacun nataima Diosin ahuun nomuran shinanmanai cuscan ahuun shota nan Josépan facu rafu Diosin ato shara huashononpacoai cuscan ato yoini. Ato yoitan ahuun poquitiqui cocusamushon Dios cufini. \p \v 22 Ascan José arifi Dios icoinra huacoinpaoni. Ascashon natichaima ahuun yorafo yoiquin isca huani, —Chipo Upa Diosin nocon funafo nan Israelifo Egipto anoshon ato iyoshqui. Focaquin uhuun shaofori foshcaquin. Nan man icaino afanan ua mai huashcaquin, —ishon ato yoiyoni. \p \v 23 Moisés apa futan ahuari Dios icoinra huacoinpaonifo. Moisés cainyaintian apa futan ahua oianfo aton facu sharashtacoin ini. Ascashori tapinifo Moisés nocofunucoiaintian Upa Diosin yonosharashoshquiai cuscan. Ascacun Egipcio niaifoan ato yononi Israelifoan aton facu yomumishti nantifi rutunonfo. Ascafiainocai nan Moisés apa futan ahua ratuquimarocon Diosin icoinra huashon oshu rafu non fustitan aton facu onunifo niaifoan ato Moisés rutumanonma. \p \v 24 Ascashon Moisés arifi Dios icoinra huacoinpaoni. Egipciofo futan ahuun caifofo atirififain shinanpaonifo Moisés Faraón ahuun chata. Ascacun Faraón facu shomayaton ahuun facuran, huapaonifo. Ascafia Moisés nocofunucoiantian Dios icoinra huashon ato yoini isca huaquin, —Uncai niaifon Faraón ahuun chatama. Ahuun facuricai uhuun uhuacoinmaran, —ishon yoini. \p \v 25 Ascan Moisés aafin tapini Egipcio niaifo icashu fasi isharacain arifi ato futan fari ranan unimacain chaca huatiro. Ascafiacai Moisés ascapainima. Ascapaitamarocon shinanquin isca huani, —Uncai Egipciofo futan chaca huapaima. Ascatama uhuun caifo nan Diospan yorafo omitsiscaifo cuscan urifi un atofu omitsiscairan, —ishon shinanni. \v 26 Ascashon tapiyopaoni chipo Cristohuunoashu omitsiscafiashu Upa Dios ari nocoaiton ahuara sharacoin inanshquin afu ipanon. Ascacun Egipciofo ato ahuara ichapa fiapaiquin ato fia cuani. Ascafiacai anori shinantama shinanquirocon isca huani, —Un Cristohuunoashu omitsiscacun ua fasi imasharatiro. Ascan un Egipto anoashu ahuara ichapayatirofia nanfocai uhuuna ahuamaran, —ishon shinanni. \p \v 27 Ascan Dios icoinra huafain Egipto anoashu ahuun caifofoya Moisés cani. Egipciofoan aton niaifo aqui sinafiainocai aqui ratutama nan niaifoan ahuun mai anoashu cani. Dios tsoan ointiromafia Moisés mupaoni Dios afu rafucoincun. Nan oincoin cafisca huapaoni. Ascashon nan Diosin yononi cuscan huaqui unupaonima. \p \v 28 Ascan Egipto anoashu Israelifo foataima iquisi Diosin Moisés yoiquin tau huani isca huaquin, —Min caifofo yoihuu chashohuanun facu rutunonfo. Ascashon ahuun imin aton pushuti ahuun caincaiti ocuma rafu yafi amanaonri raishaquin futsanonfo. Man asca huacun Diospan nai oinmatinin Egipciofoan aton facu iyoafofo namaitian mato facufo finonmanon nanonfoma, —ishon Diosin yoini. Ascacun Moisés arifi nan Diosin yoiaiton nica cuscan icoinra huashon ahuun caifo Israelifo yononi. Ascanocai Israelifoan facu iyoafofo fustishta naanima. \p \v 29 Ascacun Israelifoan Dios icoinra huanifo. Ascan nan unuhuan anunifo isca huaquin, —Unuhuan Oshinran, —ishon anunifo. Ascashon nan unuhuan oshin pocufainifo. Upa Diosin unuhuan nushmancayan mai muto sharacoin ato huashoriscatanaino Israelifoan pocufainaifoanno ato cachiori Egipciofoan ato rutupaiquin ato mufainifo. Arifi ato futan pocupaicaquin. Ascashu man nushmancayan caiyainfoan Diosin atoqui unuhuan tiiantanaino asai futsunifo. \p \v 30 Ascashon Upa Diosin Israelifo yononi pushurasi ahuun anu Jericó cachiori siete oshatan tarati huayacunonfo. Nan pushurasi cachiori toquiri cunu fasi cuyacoin masoa cunuacua ini. Ascan Israelifoan ahuun unutani cahuacuainfoanno nantifi toquiri sapa cunuacuafo paoinquiran ishon Diosin ato yoini. Ascacun nan Diosin ato yoia cuscan icoinra huafoan nanscacoiain cunufo paoinqui futsunifo. \p \v 31 Ascan nantifi Jericó anoafo nai futsunifo. Ascafia nan Rahab ainfo furoma fusti ahuun yorafoya nanima. Ahuun caifoancai Dios icoinra huanifoma. Arus fusti Dios icoinra huacoinni. Ascan Jericó anoafoan aton toquiri cunu paoincataima. Israelifoan ato niaifo Josué onanti huamisi rafu Jericó ano ato nichini atohuunoa tapishquin. Nan onanti huanmisi rafu Rahab ahuun pushu muran ato iquimani ato shara huaquin. Ascacucai ahuun caifo rutucaquin Rahab rutunifoma. \p \v 32 ¿Ascan ahua futsamun un mato yoitiroquin? Yora ichapafoanri Upa Dios icoinra huapaonifo. Nanfohuunoa un mato yoipaifiaquicai un mato yoiqui nocotiroma. Nan Gedeón non Barac non Sansón non Jefté non David non Samuel non Israelifo Dios yoia cuscan yoimisi futsafohuunoari un mato yoipanan uncai yoiquin nocotiroma. \v 33 Ascashon nanfoan Dios icoinra huacashon ahuun ranushumuafo yononifo ato noicasmaifo rutunonfo. Ascacun ato noicasmaifo rutuqui finoncoinnifo afanan ato ahuusca huanonfoma. Atirifi niaifo ishon ahuun yorafo cushusharapaoni isharanonfo. Diosin ato yoiyoni cuscan fiicoinnifo. Ascano atiri nan icoinra huamafoan ato masharofo muran potafiacun Diosin masharofo cotushcuru imano ato ahuusca huanonma. \p \v 34 Ascan atirifi niaifo chacapan futsafo yonocun ato chi uru muran potamafiafo Diosin ato cushushara coinni coononfoma. Atirifi ato nopun rutupaifiaquicai tsoan ato anima. Ascano atirifi shaca fuacai isininfiaifoan Diosin ato mutsismani. Ascanocai nan ato noicasmaifoan ahuun ranushumuafo atoqui fufiaifoan nanfoancairocon Diosin curushhuunshon ato ichonifo ato ahuusca huanonfoma. \p \v 35 Ainfofoanri Dios icoinra huacun aton yorafo man naafiacun Diosin ato funimani afanan ninonfo. Ascano futsafoanri Dios icoinra huacoinnafoan nan icoinra huamafoan ato omitsisca huanifo nan naifotian. Ascashon ato yoiquin isca huanifo, —Man Upa Dios potaiton non mato ahusca huaima man casharatanon. Asca man Dios potayamaiton non mato rutuiran, —ishon ato yoinifo. Ato asca huafiaifoancai tsoan Dios potapainima. Ascacun ato rutunifo. Ato rutuafotaima shinanquin isca huanifo, —Noco rutufiafo Upa Diosin samamashta noco funimatiro non afu ipasharanon, —ishon shinannifo. \p \v 36 Ascano icoinra huaa futsafoquiri atoqui cashu mutsamacain fichi ato coshafain atirifi cunopan munushfain onushfain ato cunu muran iquimanifo. \v 37 Ascashon atirifi toquirinin tsacaqui ato rutufain atirifi nisatinin ato shatufain nopurifi ato rutunifo. Atirifi ahuuomafoan chashoanun fichi sahuuti huasho sahuunifo. Ato omitsisca huaquin nansca huanifo. \v 38 Ascashu tsoan istaipama ano yafi machi ano non mahua quini muran non mai quini muranri iquifaifainifo. Ascan nan icoinra huafoan icoinra huamafo shara huafiashon copiquiri ato fasi chaca huafafaipaonifo. Ascan sharafo cutsi Diosin ahuun yorafoya ato ima. \p \v 39 Ascashu nanfo omitsiscafiacaquin Dios icoinra huacoinpaonifo. Ascacun Diosin atohuunoa yoiquin isca huani, —Nafoan ua icoinra huacoinnafo. Ascacun un atoqui fasi unimacoinni. Omitsiscafiacani fasi isharacoinmisiforan, —ishon Diosin atohuunoa yoini. Ascafiaquicai Diosin ato yoiyoni cuscan tsoan fiatai inima. \v 40 Ascashon Upa Diosin ato manamayopaoni. Ascacun norifi non icoinra huashu non atofu Jesús icari nocoshquin. Nantianri yora fusti cuscara non iishquin a cuscara shara noco imaino. Ascano unimaquin nanfocai no fu ahua futsa afanan yopapacunacafoma. \c 12 \s1 Non Jesushuunoa shinanfafainon \p \v 1 Ascan noco shuni ichapafohuunoa rama non nica. Nanfoan Dios icoinra huapaonifo. Ascacun norifi non atohuun caononcahuun. Ascashon ahuarashta noco nitumapaiyai cuscan nanfo non cachiquiri huacoinnon. Ascatan ahuara chacafoanri samamashta noco curushcain chaca huamapaitiro. Nanfori non cachiquiri huacoinnon Diosin noco amapaiyai cuscan fustisi huashquin. Ascacun funaquima non ashofafainon. \p \v 2 Ascacun non Jesús fusti shinanfafainoncahuun. Nanfin noco Ifocoin noco tapimamisicoinquin. Ascan nanton noco ismaquin tau huani ahuara ahuuscarafiaino non Dios icoinra huacoinnon. Ascashon Apa yoia cuscacoin huacoinpaoni. Ascacun norifi non ahuun caononcahuun. Ascashon nan mastacaquin yorafoan ointaifi rafini huanifo. Asca huafiaifoanno fasi omitsiscafiaquin tunucoinni manmain tapiashu chipo nocon Numamisi icain. Nanscara tapiashu fasi unimacoinni. \p \v 3 Yora chacafoan fasi chaca huafiainfoan tunucoinni. Ascashu nocohuunoashu omitsiscani cuscan man shinanquicai matorifi omitsisca huaifotian man shinanchacayamafain man ointi mutotiroma. Ascaquicai Diosin mato amapaiyai cuscan man unutiroma. \p \v 4 Curushcain maton nomuranshon man chaca shinanquin man potapaifafainmisi ointiaquimashon chaca huashquinma. Man asca huafafainaino Jesucristo nocohuunoashu naani noco chaca soashoshquin. Ascan mancai ascamisima. Ascatamarocon shafatifi curushcain man chaca shatufiashucai Jesús ini cuscan tsoa nataima. \p \v 5-6 Ascafia nan noco yoia cuscacoin non ayamaiton oinquin Upa Diosin nocohuun noiquin noco onaintimatiro noco tapimashquin. Ahua futsa shinantama nancairocon non tanasharanon. Ascashon nantifi ahuun yorafo ato nansca huashoan. Ascacun nanfoan tapinonfo Diospan facufocun. ¿Man man ointiaquimanamun Diosin maton nomuran unimamapai man ahuun facufocun mato tapinonfo? Ascan ahuun tsain cununi isca huaquin, \q3 “Uhuun facushtan unfin min Ifocoinquin. Ascacun un mia onaintimai min tapinon afanan mian tanasharanon. Ascacun nan mato onaintimaitian tapicahuun afanan ascashcaquima. Mato asca huaitian mato nomuran shinanchacayamacahuun. Mato cayacaficoin tapimapaiquin,” \m ishon cununi. \p \v 7 Upa Diosin mato tapimapaiyai cuscan funaquima tapicahuun. Ascashu omitsiscafiacaquin shinanchacatamarocon tunucoincahuun. Ascano omitsiscaquin man tapitiro man Diospan facufo. Apafoan ato facu tapimatirofo cuscan nanscarifiaquin Upa Diosin noco cayacafi tapimani. ¿Rato facumun apan onaintimatiromaquin tapimasharashquin? \v 8 Nantifi facufoan aton apa ato onaintimaiton man muumisifo. Nanscarifiai Upa Diosin noco tapimayamainocai non ahuun facucoin iyamacain nonricai ahuun yoracoinfo itiroma. \p \v 9 Nocon upafoan non facufocun noco onaintimapaoni. Ascacun non atohuunoa shinansharafain nonrifi ato nicacoinmisi. Ascan nocon Upa Diosin noco onaintimaiton non tunuquin finacointiro. Ascashon noco tapimapaiyai cuscain non fasi unimacain non isharatiro. \v 10 Nocon upafoan afi shinanshara cuscan aton facufo onaintimamisifo a nicasharanonfo. Ascan non yosiaitiancai afanan noco asca huamisima. Nanscarifi aqui Upa Diosin cayacafi fustisi shinanquin noco shara huapaiquin noco onaintimamisi non a cuscara shara inon. \v 11 Nan icon noco onaintimaitiancai non musharatiroma. Non isincoin mui non pashapaitiro. Ascafiashon chipo ointi nocoshon non shinantiro Diosin noco tapimasharapaiqui nocon nomuran unimamafain Furun Jesús cuscara shara noco imai. \s1 Non Dios nicacasmai fasi musucoin \p \v 12 Ascacun ahuara ahuuscarafiaino shinanchacayamacahuun. Upa Diosin mato tapimapaiyai cuscan nan fusti tapicahuun. Ascashon Jesús tanaquin unupaitama nicasharafafaincahuun. Ascatari ahuun tsain sharaquin mutoyamacahuun. \v 13 Ascashu cayacafi isharacoincahuun Jesús tanasharashcaquin. Man ascaiton oin nan icoinra huasharafoma matohuun caopaitirofo Jesús cuscara shara iisharashcaquin. \p \v 14 Ascacun fochishmanantananpaitamarocon nantifi yorafo fu isharapaifafaincahuun. Ascatari Jesús cuscara shara ipaifafaincahuun. Ascan tsoa Jesús cuscara shara iyamaino nantocai nocon Ifo oinnacama. \v 15 Upa Diosin nocohuun ramapaiquin Furunhuunshon noco shara huafafainmisi. Ascacun oinfain Diosin noco shara huapaiyai cuscan huafafaincahuun funoshcaquima. Ascatari oinfain mato ointi mutoyamacahuun. Ascan mato nomuran man mutocacaiquin futsafori man chaca huamatiro arifi nanscara inonfo. \p \v 16 Ascatan maton ahuinma fu iyamacahuun. Ainfofoan maton funuma furi iyamacahuun. Ascashon Diosin mato inanpaiyai cuscan fiicasmaquima nancairocon fiicahuun. Ascashu Esaú ini cuscan ayamacahuun. Aatocai Diosihuunoa shinanpaonima. Diosin Esaú inansharapaifiaiton fasi fonicoinquin ahuun ushto inanni ahuun rafanan tushu fiishquin. Nan piai fustihuunshon nantifi Diosin inanpaiyai cuscan funocoinni. Ascacun marifi ascayamacahuun. \v 17 Man man tapia apa inansharapaiyai cuscan fipaifiaquin finima. Ascashon apa yocaquin isca huani, —Upashta, mian inanpaiyai cuscan ua inanpun, —ishon uaishofiaitocai inannima man main chipocuton fiamacun. Ascacun oinfain Diosin mato inanpaiyai cuscan maton chaca man shatuyamashu marifi man Esaú cuscara itiro. Ascashon Diosin mato inanpaiyai cuscan man funocointiro. \p \v 18 Upa Diosin noco shunifo yononi cuscacai mato yonomisima. Ato yoini machi ahuun anu Sinaí tunanman fotanonfo. Nannoshon ahuara futsa ato yoishquin. Ascashu nan ato yoia cuscan nocoafono Upa Diosin oi uhuapacoinin ato yoinquin isca huani, —Nan machi ano mapuyamacahuun. Man mapuashu man nariscairan, —ishon ato yoini. \p Nantianri nan machi ano chi urumanhuan oinfain shafatafia nannori faquishihuancoin icain ninhuunhuan yafi cana piishicain \v 19-20 manuti fasi chaan chaan icain Diospan ahuun oi uhuapacoinin ato yoiai cuscan nicacani fasi ratucoinnifo. Ascacun Moisés yoinifo isca huaquin, —Non afanan Diospan oi nicapaima. Ipaishoma non nariscatiro. Ascan Upa Diosin noco yoiquin isca huaa, “Mato inafo machi ano mapuaifoan toquirinin tsacacahuun naanonfo,” ishon noco yoia. Ascacun Dios yoihuu noco yoipaiyai cuscan noco yoitama miarocon yoiquin tau huanon. Min chipo noco yoitiro. Aafin noco yoiaino non nariscatiroquin, —ishon Israelifoan Moisés yoinifo. \v 21 Moisés arifi oian cuscan ato yoini isca huaquin, —Urifi un fasi ratucoin taritari iquinran, —ishon yoini. \p \v 22 Ascafia mancai Dios fu tsainpai na machi Sinaí ano man oima. Ascatama nan machi Sión ano man cai. Nan Jerusalén futsa Dios icari. Ascan nan Diosin ipamisi. Nannoashu ahuun oinmati afu nai muran imisifo ichanancashon Dios shararan huafafaincani. Nan ahuun oinmatifocai tsoan ato tanan huatiroma fasi ichapacoinfo. \v 23 Nannori nantifi Jesús icoinra huafo afu icafo. Ascan nan Dios icari aton anufo cunupacua afu ipanonfo. Ascacufin marifi man Diosiqui oaquin. Ascan nanton yoishquin ratotomain icoinra huacoinnashu afu ipanaca iyamarai icoinra huamisimaquin. Ascashu icoinra huashuma afu ipanacama. Nan icoinra huafotisi ato a cuscara shara imai chaca huamisima cuscara inonfo. \p \v 24 Ascan man man Jesusqui fua. Nanton noco nashoantaimacai tsoa futsan noco nashonima. Ascacun natian ahuunoashu non Dios fu ipasharatiro. Nocon shuni Caín ahuun ushto Abel rutuni. Ascacun Upa Diosin Caín yoini isca huaquin, —Cain, ahuuscaquimun min ushto rutuaquin. Natian un mia curushcai onaintimairan, —ishon Diosin yoini. Ascafia Jesús rutuaifotiancai anori yoinima. Afimain nocohuunoashu naiton noco chaca soashoshquin. Ahuunoashu non Dios fu ipasharatiroran ishon noco yoini. \p \v 25 Ascacun ¡Oinfain! Diosin mato yoipaiyai cuscan nicatimayamacahuun. Nan mai anoshon nocon shunifo Moisés ato yoini cuscan nicayamaifoan Upa Diosin ato onaintimani. Ascashu na mai anoashu Moisés noco cuscara cainni. Ascan Jesuscai ascarama. Apa Dios icariashu nocoqui fotoni. Nanton noco yoiai cuscan non nicayamaino fasi musucoin. Ascan non Furun nicayamacaiyaiton Upa Diosin noco onaintimaquin finacoin. \v 26 Ascan Upa Diosin Moisés yafi noco shunifo machi Sinain anoshon ato yoiaitian ahuun tsainmansi mai nayanaiyaimani. Ascashori yoini isca huaquin, —Chipocai un mai fustisi nayanaiyaimaima. Un mai yafi nairifi fasi curushcai un nayanaiyaimairan, —ishon Diosin yoini. \v 27 Ascacun nan noco yoini cuscahuunshon non tapitiro nan ahuara ipatirofoma Diosin nanfo cuyoriscatashquin afanan ahua inonma. Ascan nan ahuara Diosin imapacunacafo fusti itiro. \p \v 28 Ascataricai Diosin icari mai nayanaiyaitiroma. Nannoshocai ahuashta non chaca finontiroma. Ascashu nanno non afu ipasharatiro. Ascacun non Diosin aicho huafafainon. Nantonfin ahuamamishti huatiroquin. Ascacun ahuunoa non shinansharafain non cufifafainon. Ascashon noco amapaiyai cuscan non ashoaino nocoqui Upa Diosin fasi unimacoinshquin. \v 29 Ascan man man tapiari nocon Diosin nan chi urumanhuan cuscara. Ascan tsoan ahuun tsain shara cachiquiri huacoincun Diosin ato chi urumanhuan muran potashquin amurannoashu omitsiscapanonfo. \c 13 \s1 Ahuuscashomain non Dios unimamatiroquin \p \v 1 Manfin Cristo ahuun yorafoquin. Ascashu noinanfafaincahuun. \v 2 Diospan yorafo mai futsa ariashu matoqui nococun ato shara huacahuun. Ascan futsafoan Diospan yorafo atoqui nococun oinyamafiamisishaquin ato shara huaquin tapinifoma nanfo Diospan oinmati afu nai muran icafofiacun. \p \v 3 Nan cunu muran iquiafo shinancahuun. Ascashu atohuun ramapaicoincahuun. Marifi atofu cunu muran iquimamua shinantsa acahuun. Futsafo Jesushuunoashu omitsiscacoinnafo nanfohuunri ramapaicahuun. Ascashu marifi atofu omitsiscamuai shinantsacahuun. \p \v 4 Nocofunufoan maton ahuinfofoya noinancahuun. Ascashu shinanmasharatanancahuun. Ascatari maton ahuin non maton funu fusti fu icahuun. Ascafia ratoran futsa aton ahuinma non aton funuma fu icaifoan Diosin nanscarafo ato onaintimashqui. \p \v 5 Pui noiyamacahuun. Man aya cuscan fustia unimacahuun. Upa Diosin yoini isca huaquin, \q3 “Uncai matomaqui ipayamacai uricai mato potanacamaran,” \m ishon yoini. Ascacun nan tapiashu non fasi unimacointiro. \v 6 Ascan iconcoin non yoitiro isca huaquin, \q3 “Un ahuara huaiton uhuun Ifoan uari ashomisi. Ascacufin un ratuima. ¿Upa Diosin ua cushuainocai nocofunufoan ua ahuusca huatiromun?” \m ishon non yoitiro. \p \v 7 Dios fu tsainti pushu muranshon Diosin tsain yoimisifoan mato yosinifo cuscan atohuunoa shinancahuun. Nanfoan futsafo shara huafafainmisi. Ascashon fasi noco Ifo Jesús icoinra huamisifo. Ascacun atohuun caocahuun Jesús tanasharafafainshcaquin. \p \v 8 Ascashu Jesucristo ipaoni cuscan natian icai cuscan yafi ishquiai cuscari nancai fianananpacunacama. Nanscasipacunaca. \p \v 9 Ascan atirififoan mato amaquiri yosipaicani. Tsoancai anori nicayomisima cuscarafo mato yosipaicani. Ascacun ato tanayamacahuun. Mato yosipaicani isca huaquin, —Nocon shunifoan noco yononi cuscan non nami futsafo piaino nocon nomuran noco shinanmasharatiroran, —ishon mato yoimisifo. Ascafiacai tushucai nocon nomuran noco shinanmasharatiroma. Ascatama Diosin noco noiahuunshon noco imasharatiro non a cuscara inon. \p \v 10 Ascacun nan non icoinra huamisi Jesucristo ihui coyan iquinanhuunoashu noco nashoni nocon chaca soashoshquin. Tsoan Jesuscairocon icoinra huatama nan Moisés yononi cuscan fustisi icoinra huafo. Nanfoancai no futan aton chaca soatirofoma. \p \v 11 Ascan Moisés ato yononi cuscan ahuun yorafohuunshon Dios cufimsi niaifon fusti nan cunu futsa ocu murancoin iquipaoni. Nan muran inapan imi focun nan imi oinquin Upa Diosin ato chaca soashonon. Ascashon inafoan ato caya pushurasi pasoato foshon coapaonifo. \v 12 Nanscarifiai Jesús Jerusalén pasoatonoashu noco omitsiscashocai ahuun imi focai ahuun yorafohuunoashu nani nocon chaca noco soashoshquin non a cuscara shara inon. \p \v 13 Ascan norifi Jesús ipaoni cuscan non anoncahuun. Ascashon ahuun yorafoan nan potanifo cuscan huaquin nocorifi noco yorafoan noco potatiro. Ascashon Jesús roanifo cuscan nocorifi ahuunshon noco roatirofo. Ahuunoari shinanchacamisifo cuscan nocorifi ahuunshon nocohuunoari shinanchacatirofo. \v 14 Nuno nan mai anoashu non omitsiscafiaquicai non shinanchacaima. Man nonmain tapiashu nuno nan mai ano non ipanacama. Ascatan man non tapiari chipo Dios icari nocoashu non afu ipashquin. Ascacun nan non manasharamisi. \p \v 15 Nocon shunifoan apaonifo cuscacai afanan Diosin fuchipaima. Noncai afanan inafo rutuima nocon chaca soashonano Upa Diosin nocoqui unimanon. Ascatamarocon Jesús noco nashonihuunshon non Upa Dios aicho huai. Ascan non yoiquin isca huanon, —¡Aicho! Upa Diosin, min Furun Jesús uhuun Ifo. Ahuunshon un mia aicho huairan, —ishon non yoifafainon. \v 16 Yoiquin asca huatan yora futsafohuun ointiaquimayamacahuun ato shara huashquin. Ascan Jesushuunshon man yorafo shara huafain man aya cuscan futsan yopaiton man inanquin. Asca huaquifin man Dios unimamacointiroquin. \p \v 17 Ichananti pushu anoshon maton Diosin tsain yoimisifo nicasharacoinfafaincahuun. Ascashu mato yoiaifo cuscacoin acahuun. Nanfoanfin mato cushufafainiquin man Jesús tanasharanon. ¿Ascan nanfoanri tapiafo chipo Diosqui nocoaifoan ato yoishquin isca huashquin, —Man man uhuun tsain ato tapimasharamisimun? —ishon ato yoishquin. Ascacun ato nicasharacahuun man ato nicasharaino unimanonfo. Ascan man ato nicayamaino aton ointi ihuu itiro. Ascashu marifi man funocointiro. \p \v 18 Nocori Upa Dios cufishocahuun. Diosin noco amapaiyai cuscacoin man non huamisiquin. Ascashocai nocon nomuran non ahua chaca shinainma. Non isharapai fusti. \v 19 Uarifi Dios cufishocapun matoqui ua samamashta nasomanon. \s1 Ato Dios cufishotan ahuun tsain unutaqui ato yoini \p \v 20-21 Upa Diosin nocon ointi unimamamisi nocon nomuranshon non ahuashta shinanchacanonma. Nocon Ifo Jesús nocohuunoashu man naafiacun Apa Diosin funimani. Nantifi finoanshu nocon Cushumisi shara inon. Jesús noco nashonihuunoashu non Upa Diosin ahuun yorafo ipashquin. Ascacun man ahuara shara yopai cuscan Upa Diosin mato inantiro mato amapaiyai cuscan man anon. Furun Jesucristohuunshon nocon nomuran noco shinanmasharashu nocoqui unimacoinshquin. Ascacun nantififain non Jesushuunoa yoisharapacunaca. Nanscari inon. \p \v 22 Uhuun yoramishtichin un mato cunushona maton nomuran mato shinansharamashquin. Un mato chitoshta cunushona. Ascacun funaquima un mato cunushona cuscan ua nicasharacapun. \v 23 Un mato tapimapai nocon yorashta Timoteo natian man cunu murannoashu man caian. Ascan samamashta uqui nocoashu u afu mato ari cai. \p \v 24 Nantifi ichananfo maton Diosin tsain yoimisifo non cushumisifo non nantifi Diospan yorafo ua yoisharashocahuun. Italia anoafoanri mato yoisharafo. \p \v 25 Upa Diosin matohuun noiquin nantifi mato shara huashofafainon. Nanti.