\id 2CO - Sharanahua NT [mcd] -Peru 2008 (DBL -2013) 
\h 2 Corintios 
\toc1 Pablonun Corinto Anoafo Afanan Cunu Fomani 
\toc2 2 Corintios 
\toc3 2Co 
\mt1 Pablonun Corinto Anoafo Afanan Cunu Fomani 
\c 1  
\s1 Pablonun Corinto anoafo yoisharani 
\p  
\v 1 Uhuun yoramishtichin un mato cunu fomai man tapinon. No futan Jesús tanamisi Timoteo futan un mato cunu fomai. Upan Diosin ua catonpaiquin ua catonni ahuun tsain Jesucristohuunoa un ato yoifoanfafainon. Un Jesucristo fu rafumisi. Nantori ua nichini. 
\p Icoinra huafo Corinto anoafoan yafi Diospan yorafo Acaya mai anoafori un mato nantifi yoisharai.  
\v 2 Nocon Upa Diosin futan nocon Ifo Jesucristo matohuun ramapaicain maton ointi unimamanon. 
\s1 Pablon omitsiscani cuscan 
\p  
\v 3-4 Non Upa Dios yoisharanon. Isca huaquin, —Upa Diosin, min noco shara huafafaini. ¡Aichoran! —ishon non Upa yoinon. Nanfin nocon Ifo Jesucristo apaquin. Nanrifi nocohuun ramapai. Non omitsiscafiaiton nocon nomuran shinanmasharatiro. Ascano non mua cuscan huafain futsa omitsiscaiton non ahuun ramapaiquin ahuun nomuran non shinanmasharatiro. Ahuara futsan omitsiscamai cuscan non yoisharatiro ahuun nomuran shinanmasharanon.  
\v 5 Nocon Ifon Cristo no fu rafuano nan omitsiscani cuscan norifi non omitsiscatirofiashu nanton nocon nomuran noco shinanmasharatiro.  
\v 6 Ascacun non mato yoisharapai nocon Ifo Jesús icoinra huashu afu ipanon. Ascacufin noco omitsiscamafiaifoan noco Ifo Jesús nocon nomuran shinanmasharatiro. Man manfin oinquin Diosin nocon nomuran shinanmasharamisi. Ascacun man man oian nocon nomuran non shinansharaiton. Nanscacun norifi non maton nomuran shinanmacoian. Ascan non omitsisca cuscan marifi man omitsiscafiaquin man funaquima tunucoian.  
\v 7 Man non tapia non omitsisca cuscan marifi man nofu omitsiscafiaiton Upa Diosin nocon nomuran shinanmashara cuscan matona shara huaa man shinansharanon. Ascan non matohuunoa shinanmisi cuscan nannoricoin. Man omitsiscafiaquin tunuaiton maton nomuran shinanmashara. 
\p  
\v 8-9 Uhuun yoramishtichin non Asia mai anoashu omitsisca cuscan un mato yoi man tapinon. Nocon ointi fasi ihuu ica. —Noncai tunutiroma. Non omitsiscai nairan, —ishon nocon nomuran non shinanni. —Nofincai non numatiroma. Upa Diosin fustitofin noco numatiroquin. Nantofin yora nacoinna funimatiroquin, —ishon nocon nomuran non shinanni.  
\v 10-11 Ascashu non fasi omitsiscai nacuafiaiton Upa Diosin noco numani. Afananri noco numashqui. Man non icoinra huacun noco numafafainshquin. Noco nansca huaino icoinra huaa futsafoan nocohuunoa shinanquin isca huashcani, —¡Aicho! Upa Diosin, min Pablo yafi afu rafumisifo min nica ato numashqui. Min fasi sharacoinran, —ishon ichapafoan Upa Dios cufishcani. 
\s1 Pablon shinan futsashu Corinto ano canima 
\p  
\v 12 Man non tapia manifoti iconcoin yoimisishaquin nocon nomuran non unimacoinni. Non mato murannoashu isharacoinmisi. Non Dioshuunoashu a cuscara sharacoin non imisi. Noncai mato paramisima. Icon fusti non mato yoimisi. Icoinra huamafoan shinanmisi cuscacai non mato ismamisima. Upa Diosin noco shinanmashara cuscan huafain non mato oinmana.  
\v 13-14 Un mato cayacafi icon fusti cunushomisi. Un mato cunushona cuscan nannoricoin. Uhuun tsaincai rafuma. Mancai uhuunoa atirififain tapisharataima. Ascafiashon chipo ua onancoinshon man ua shinansharapainon. Ascatan nocon Ifo Jesús nocoaitian man yoitiro isca huaquin, —¡Aicho! Pablonun noco shara huamisiran, —ishon man yoitiro. Nanscarifi aqui un matohuunoa nantianri yoisharashquin. 
\p  
\v 15-16 Un shinan man ua icoinra huaishafain Jesús ua nichini un mato tapimanon. Ascashon un shinanquin isca huani, —Un Macedonia ano un caitian un mato ano mapuyoshquin afanan un mato yoisharashquin maton ointi man unimamanon. Ascatan afanan Macedonia anoashu un nasoaitian afanan u mato ano maputiro matofu iyoshquin. Chipo ua Judea ano nichitiroforan, —ishon un shinanni.  
\v 17 Nannori un shinanfiacun man shinanquiraca isca huaa, —¿Pablonun nannori shinanfiashu asca ahuuscai noco icon yoiashuma oamamun? Noco ahuara yoifiashu ahuun nomuran man shinan futsashon ahuara huatiro. Icoinra huamafoan noco foman cuscan arifi nanscarifi huaquin noco fomain. Ointi rananyaran, —ishonraca man uhuunoa shinan. 
\p  
\v 18 Ascacun anorimafinquin. Man Upa Dios icoinra huaa cuscarifi un mato yoimisi cuscan man icoinra huatiro. Uhuun tsaincai rafuma. Un mato yoimisi cuscan cayacaficoin. Ahuacai un mato parayomisima. Uricai ointi rananyama.  
\v 19 Timoteo yafi Silas futan un mato Jesucristo Diospan Furunhuunoa un mato yoimisi. Nanton tsaincai rafuma. Ahuun tsain cayacaficoin. Icon fusti.  
\v 20 Upa Diosin noco yoiyotiani cuscan nantifi Cristo man noco ashomisi. Ascacun non nantifi yoimisi isca huaquin, —Non Jesús icoinra huashon. Noco yoia cuscan aquin non yoitiro. ¡Aicho! Nocon Ifo fasi sharacoinran, —ishon non yoimisi. 
\p  
\v 21 Ascatarifi Upa Diosin mato yafi ua mutsismana non Cristo tanasharanon. Ahuun Yoshin Shara noco ya rafumana.  
\v 22 Ratoran futsan aton mafohuun aton anu nutatirofo nanfo ahuunacun futsan tapinon. Nanscarifi aqui Upa Diosin ahuun Yoshin Shara noco ya rafumacun nanhuunshon yora futsafoan noco ointirofo non ahuun yorafocun. Nanmain nocon Ifocun. Noco yoiyotiani cuscan ahuun Yoshin Shara noco ya rafumaquin tau huani. Ascacufin non tapitiroquin ahuara futsa noco yoiyotiani cuscan iconcoin noco inanshquin. 
\p  
\v 23 Ascacun man tapitiro Upa Diosin iconmisiquin. Nanscacun urifi un Diosin oinmaticun man tapitiro un mato icon yoimisi. Un mato yoiamua cuscan mato ari un capaifiain un cataima. Upa Diosin ua onancoiainton un iconyamacun ua onaintimatiro. Un mato ari cacuana. Ascafia un shinan, —Un ato ari cashon un fasi ato asca huatiro, —ishon un shinan. Ascashon un mato ointi ihuumapaima un mato ari caama.  
\v 24 Un mato asca huapaitama urocon mato unimamapaisharai. Uncai maton ifo ipaima man mantsi a icoinra huayamacun. Icoinra huashon man man Jesús tanashara. Ascacun un mato futan Jesús yonoshopai man mimacai unimanon. 
\c 2  
\p  
\v 1-2 Ascacun uhuun nomuran shinanquin un isca huayamua, —Un Corinto ari capaifiai un caima. Un cashon, “Man chaca huai cuscan shatucahuun,” ishon un ato yoiquicai un ato unimamatiroma unrocon aton ointi ihuumatiroran, —ishon un shinanyamua. ¿Un maton ointi ihuumaiton tsoan futsancaimun ua unimamatiro? Marus fusti Corinto anoafoan man ua unimamatiroquin. Ascafia un mato ointi un ihuumaiton tsoa futsacai ua unimamatiroma. 
\p  
\v 3 Ascacun un mato cunushonai cuscan un matoqui nocoataima man chaca shatunon man afanan uhuun ointi ihuumanonma. Man ua noiquicai uhuun ointi man ihuumaima uarocon man unimamatiro. Iconcoinquin un shinan, —Un unimaino marifi man unimatiroquin, —ishon un shinan.  
\v 4 Un mato cunushonaino un muyamua uhuun ointi fasi ihuucoin. Uaiyanan un mato cunushoni. Ucai maton ointi ihuumapainima. Ascatama un mato cunushoni un fasi matohuun noicoiain cuscan man tapinon. 
\s1 Tsoan noco chaca huaiton non rau huatiro 
\p  
\v 5 Nan nocofunun chaca huatocai ua fusti uhuun ointi ua ihuunmanama. Nantifi man icoinra huafoti matori mimacai maton ointi ihuumana. Ascafia uncai nan nocofunu onaintimaquin finapaima.  
\v 6 Ascafia man nantificuanaton man tapipaima nan nocofunun a chaca huaa cuscan. Nanscacun man man onaintima. Nanscanon. Man man acaquin.  
\v 7 Ascatan man aca cuscan afanan huacaquima rau huacahuun. Ascashon yoisharacahuun. Ahuun ointi unimamashcaquin afanan omitsiscanonma. Man yoisharayamaino afanan fasi ahuun nomuran omitsiscai finacaitiro afanancai shinansharatiroma. 
\p  
\v 8 Ascashon un mato yoiai cuscan ua nicasharacahuun. —Non mia noicoinran, —ishon afanan yoicahuun tapinon.  
\v 9 Nantifi un mato cunufoma cuscamain ua nicacoincai. Tapishquin un mato cunu fomayamua.  
\v 10 Man futsa rau huacun unrifi un nan rau huatiroquin. Ua nantori chaca huaiton Cristohuunshon urifi un rau huatiro. Un asca huaino marifi man unimanon.  
\v 11 Non ascainocai Satanás noco fuparatiroma. Ascatan non asca huayamaino nocohuunoashu nan nocofunu funoi omitsiscacuana. Satanás noco amaquiri shinanmapai nan nocofunu rau huanonma. Non rau huayamaino fasi omitsiscatiro. 
\s1 Pablo pushurasi Troas ano nocofiashon ahuun ointi unimanima 
\p  
\v 12 Ascan un mato uhuunoa afanan tapimai. Un pushurasi Troas ano tsain shara Cristohuunoa ato yoicai un cani. Ahuunoa nicapaicoinnifo. Ascano nocon Ifoan nanno ua atoqui nichini un ato yoinon.  
\v 13 Ascafia no futan Jesús icoinra huaa noco yora Titocai anoa un fuchinima. Fuchiyamashu uhuun ointi un unimanima. Ascashon un fasi shinanni. Ascatan, —Mun cairan, —ishon Troas anoa icoinra huafo un ato yoita oi Macedonia ano un noconi. 
\s1 Cristohuunshon non nantifi finontiro 
\p  
\v 14 ¡Aicho! Upa Diosin, mihuushocai ahuarafoan noco shatumatiroma min noco amapaiyai cuscan non anon. Un shinanfiaquin uhuun nomuran un shinanni Upa Diosin noco iyofoanfainai cuscan non Cristo fu rafumisi. Ascatan Jesús noco Ifono ahuun curushhuunoashu non isharatiro futsafori ahuunoa yoishquin. Ascashon nocohuunshon manifotifain nocon Ifo Cristo onantirofo. 
\p  
\v 15 Upa Diosin nocohuunoa shinanquin isca huaa, —Nafo uhuun facu Cristo cuscarafo. Ascashon nanfohuunshon uhuun facu Cristo onantirofoquin, —ishon shinan. Non nantifi Cristohuunoa ato yoimisi. Atirififain nocon tsain icoinra huaifoan Jesús ato numa Dios fu nipanonfo. Atirifiton icoinra huayamashu funoshcani omitsiscapananacafo muran fooshcani.  
\v 16 Ascashon icoinra huamafoan noco nicaquin yoitirofo isca huaquin, —¡Ohuashta! Nan na tsainmun iconcati non omitsiscapanacafo muran catiro, —ishon shinancani. Ascafia nan icoinra huafoan noco nicaquin yoitirofo isca huaquin, —¡Aicho! Noco yoiaifo cuscan non icoinra huashu non Upa Dios fu nipatiroran, —ishon shinancani. ¿Ascacun tsoan Diospan tsain Jesushuunoa futsafo yoisharatiromun? 
\p  
\v 17 Futsafoan Diospan tsain yoiahuunshon puisi fipaicani. Ascan noncai ato cuscarama. Man non tapia non ahuun tsain yoiaiton Upa Diosin noco shafacafi oincoin. Nantofin afincoin noco nichiniquin. Ascan non ahuun tsain yoiquicai non tsoa fuparamisima. Non ato icon fustisi yoimisi. 
\c 3  
\s1 Jesús ato tsain funa yoiyotiani cuscan 
\p  
\v 1 ¿Ascan uhuunoacai un mato isca huaquin shinanmapaima? —Pablo fasi nocofunu shara. Fasi tapishararan, —ishoncai un mato anori shinanmapaimisima. Noncai ato cuscarama. Man manfin noco oinmisiquin non matofu itiani. Ascan nan cuscara cunucai man nocohuunoa yopaima. ¿Iconmun? Non mato anoashu caitianricai non nan cuscara cunu yopaima futsafo ismashquin.  
\v 2 Ascan manfin nocon cunu cuscarafoquin. Ascashufin matohuunoa noco nomuran cunua cuscara. Nantififain oinonfo non mato tapima cuscan man aiton.  
\v 3 Ascacun futsafoan mato ointirofo man nan Cristo aficoin cunua cuscarafo. Ascashon mato tapitirofo non mato tapima cuscan Jesús cuscara man inon. Toquiri sapaqui cunuahuunshoncai ato oinmanama. Maton nomurancai ahuaton cunuama. Upa Diosin nipamisiton ahuun Yoshin Sharapan mato imashara nantifiton mato oinonfo. 
\p  
\v 4 Cristohuunshon non Dios icoinra huashon non mato yoiai cuscacoin man ai.  
\v 5 Ascafiashon uncai mato isharamatiroma. Uncai anori shinanmisima. Upa Diosin ahuun curushhuunshonsi un futsafo tapimatiro isharanonfo.  
\v 6 Ahuun curushu noco inanno nan tsain funa Jesucristohuunoashu Dios fu nipatirofo non ato tapimatiro. Moisés cununi cuscahuunoacai non ato tapimamisima isharanonfo. Asca nonfin Diospan Yoshin Sharahuunoashu non isharatiroquin. Moisés cununi cuscan fusti tanashu non funotiro. Naashu omitsiscapanacafo muran non catiro. Ascan Diosin Yoshin Sharapan noco nimapacutiro non afu nipanon. 
\p  
\v 7-8 Shinancapon. Upa Diosin nocon caifo Israelifo ato yonopaiyai cuscan toquiri sapaqui ato cunushoni. Ato yononi cuscan nicayamacanashu natirofo omitsiscapashcaquin. Upa Diosin ato yononi cuscan Moisés ato yoiaino Diosinhuunoashu ahuun fuso fasi chashaqui nocon shuni Israelifo ointima huani. Chashafiashu funainquimashta nishmapacuni. Ascatan Upa Diosin Moisés yononi cuscan fasi sharashtacoinfiashu natianfin ahuun Yoshin Sharapan noco yonoai cuscan fasi finacaia ahuun yono sharashtacoin man noco ismaquin. 
\p  
\v 9 Ascacun Moisés yononi cuscan fasi sharafiacun nicayamacanashu natirofo. Ascan natian Furun Cristohuunshon nocon chaca soashotiro non afu isharanon. Nan fasi shara finacaia. Ahua futsacai nan cuscara sharama.  
\v 10 Upa Diosihuunshon Moisés noco yonoquin tau huani cuscan fasi sharashta. Ascafia natiancai nan ahuama. Upa Diosin Jesushuunshon noco ashoni cuscan fasi shara finacaia.  
\v 11 Upa Dioshuunshon Moisés yononi cuscan sharafiashu itiashmashtafi man cuyoa. Ascano Upa Diosin Jesushuunshon noco ashoni cuscacai cuyopacunacama. Ascan nan fasi shara finacaia. 
\p  
\v 12 Ascacufin man non tapia Upa Diosin Jesushuunoa yoini cuscacai cuyopacunacama. Ascacun ranotama non Jesushuunoa yorafo yoitiro.  
\v 13 Moisés ahuun fuso fasi chashatanaino fufopomuni nocon shuni Israelifoan oinonfoma. Ascashu fufopomuaino itiashmashtafi ahuun fuso chashai nishmapacuni. Noncai Moisés cuscarama.  
\v 14 Moisés fufopomuni cuscan uhuun caifofo nanscarafori. Ascashocai Diospan tsain oinsharatirofoma. Cristo fustitofin ato shinanmasharatiroquin afanan fufopomua cuscara inonfoma. 
\p  
\v 15 Natianri futsan ato Moisés cununi cuscan yoiaino nan fufopomua cuscarafo. Ato ointi curushu anocai tsoan shinansharatiroma. Ascashon isca huaquin shinancani, —Moisés noco yononi cuscain non Upa Dios fu nipatiroran, —ishon shinancani.  
\v 16 Ascafia tsoancai natian afanan Moisés cununi cuscan shinantama nocon Ifo icoinra huashon ahuunoa tapisharatiro. Afanan fufopomua cuscara iishquima. 
\p  
\v 17 Nanscacufin nocon Ifoan Yoshin Sharapan noco nimapacutiro. Nan nocon Ifoan ahuun Yoshin Shara no fu icanocai ahua futsa nocon ifo itiroma noco yonoshquin.  
\v 18 Ascan noncai fufopomua cuscarama. Nocon Ifoan tsain non oinsharatiro. Nonfin fuisiti cuscarafoquin. Futsafoan noco oinquin nocon Ifo Jesús fasi shara ointirofo. Ahuun Yoshin Sharapan nocon nomuran noco iquifain nocorifi fiananan huaa non nocon Ifo cuscara shara non inon. 
\c 4  
\p  
\v 1 Ascashon Upa Diosin nocohuun ramapaiquin noco yononi non ahuun tsain shara Jesucristohuunoa yoifoanfafainon. Non ascaicain nocon ointi ihuu icama.  
\v 2 Noncai tsoa fomanmisima. Ascara chacafocai non tapipaima. Diosin tsain yoia cuscan fustisi non mato yoimisi. Noncai ahuun tsain amaquiri yoimisima. Cayacaficoin non mato yoimisi. Ascan Upa Diosin noco oincoin maton nomuran non nocohuunoa mato shinanmapai isca huaquin, —Diosin tsain cununi cuscan Pablonun nantifi noco cayacaficoin yoimisiran, —ishon mato nomuran non mato shinanmapai.  
\v 3 Nan tsain shara Jesushuunoa non yoimisi cuscan tsoan nicapaiyamainocai nafoan icoinra huafoma. Nanfofin nan fufopomua cuscarafoquin. Ascashu omitsiscapanacafo muran focani. 
\p  
\v 4 Nanfofin yoshin chaca Satanás aton ifoshofin ato yonomisiquin. Ascashon aton nomuran fufopomua cuscara ato huamano tsain shara Jesushuunoa tapinonfoma. Jesús ato oinmapai arifi Apa Dios cuscaracoin icoinra huanonfo. Nan tsain fasi shara iconcoinfiacun Satanás ato fusho cuscara huama aton nomuranshonri icoinra huanonfoma. 
\p  
\v 5 Ascan noncai nofiri nocohuunoa non mato yoimisima. Ascatamarocon non mato yoimisi Jesucristo maton Ifo inon. Noco Ifocun non ahuun noishon a yonoshosharapai. Ascan nonfin maton oinmati cuscaraqui Cristohuunoa mato tapimashquin. Nannori non mato yoimisi.  
\v 6 Diosin shafa oni huataima yoiquin isca huani, —Faquishcun shafan inonran, —ishon yononi. Nanscarifiai non Jesús ifoantaimano nocon ointi nan faquish cuscara chaca ipaoni. Ascan Diosin Jesucristohuunshon nocon ointi muran chashamana non ahuunshon tapinon ahuu cuscara sharamainquin. 
\s1 Non Jesús icoinra huashu non isharatiro 
\p  
\v 7 Nan Diosin sharacoianshu no fu icaquin. Mai cuticai ahuashta ahuun nuama. Samamashta moshifiatiro amuran ahuara chicoin non nanutiro. Nanscarifiai noncai mutsisipamafia Jesús mutsisipashu no fu rafua. Nanscano Diosin ahuun curushpan futsafo ismatiro ahuamamishti huatiro cuscan. Ascan nan curushcai noconama ahuuna fustifinquin. 
\p  
\v 8 Ascashon non imisi cuscan natian un mato yoi man tapinon. Noco fucash huafafainfiaifono non unumisima. Non finoain cuscacai non tapiama ahuuscamain non aiquin. Noco asca huafiaifoancai non shinanmisima isca huaquin. —¡Ohuashta! Noncai ahuuscatiroma. Man non funoarancai, —non imisima.  
\v 9 Noco omitsisca huafiainfoancai Upa Diosin noco potapacunacama. Noco rutupaifiaifoanri Upa Diosin noco numa non nanonma. 
\p  
\v 10 Jesús niyoano rutupaipaonifo cuscan nocorifi nanscarifi rutupaifafaincani. Non ascaiton nantifiton noco ointirofo Jesús nocon muran ica.  
\v 11 Non Jesús yonoshonaiton shafatifi noco rutupaicani. Icon nanscacun non Jesushuunoashu nai. Non ascaiton ointirofo Jesús ahuun curushhuunoashu non nicun.  
\v 12 Ascacun Jesushuunoa non mato yoiaiton futsafoan noco rutupaifiaifoanno non mato yoimisi man icoinra huashu afu nipanon. 
\p  
\v 13 —Un icoinra huai. Ascashon un matori yoiran, —ishon nannori Diospan tsain cununi. Nanscarifi aqui norifi Diosin tsain icoinra huashon non matori yoimisi.  
\v 14 Ascashon man non tapia nocon Ifo Jesús man nafiacun Upan Diosin afanan funimani afu ipanon. Ascacun Apan Jesús funimani cuscan mato yafi nocori funimashquin non afu ipanon.  
\v 15 Nanscacufin norifi non omitsiscacai mato icoinra huamaicain. Man icoinra huashon paratama man tapinon Upa Diosin nocohuun ramapaicain noco numani. Non mato yoiai cuscan tapishon yoitirofo isca huaquin, —¡Aicho! Upa Diosin, min noco shara huamisiran, —ishon yoitirofo. Nanscashon Diosihuunoa shinansharatirofo. 
\p  
\v 16 Ascacun non omitsiscafiaquicai non shinanchacaima. Nocon Ifocai non cachiquiri huamisima. Icon non isinin ipashu nafiaiton nocon Ifoan nocon nomuran fiananan huafafaini ahuun ointi cuscara non inon.  
\v 17 Non natian niyoashu omitsiscai cuscan fasi curushcoinma. Samamashta finontiro. Ascan non Jesushuunoashu omitsiscaiton noco fasi sharacoin imai cuscan tsoancai ascaran shara oinyomisima. Nanfori cuyopacunacama.  
\v 18 Ascano natian noco omitsisca huai cuscan non shinantamarocon nan non oinyomisima cuscara non shinain. Diosin icanoshon noco unimamapacunon non shinain. Ahuaraton noco omitsisca huai cuscan samamashta cuyotiro. Ascan Diosin chipo noco imai cuscan noco unimamai cuscacai cuyopacunacama. 
\c 5  
\p  
\v 1 Ascano man non tapia non naashu Diosin noco caya funa onihuai. Iscara un mato tapimai. Pushu shuniaino paon icashu payocotiro. Nanscarifiai nocon caya non naino cuyotiro nocon yoshin afanan amuran itiroma. Asca tsoa futsacai noco caya funa oni huatiroma. Diosin icarishofin caya funa sharacoin afanan noco oni huashoshquin. Nan cayacai cuyopacunacama.  
\v 2 Natiancai nocon cayari fiananantaima. Nanscacun afohuunoa shinain non shacaina cahuatiro. Ascashon shinanquin non isca huatiro, —¡Ohua! Diosin ua imapaiyai cuscacai un ataima. Un fasi Dios ari capaicoin afanan omitsiscashquima caya funa sharacoin ua onihuanon, —ishon non shinantiro.  
\v 3 Non Dios ari nocoashucai non yoshin fustia ishquima. Diosin noco caya funari noco oni huashoshquin. 
\p  
\v 4 Natian non mai ano niyoashu non omitsiscatiro. Ascafia noncai noco yoshin cayaoma ipaima. Non Jesús ari nocoriscapai ahuun caya cuscara iishquin. Non niyoano nocon caya isinin itiro. Non naino nocon caya payocoi cuyoshquin. Ascafia Diosin noco caya funa shara chipo noco inanshquin. Nancai cuyopacunacama. Isharapacunaca.  
\v 5 Upa Diosin noco onihua non afu ipanon. Non caya funa yaitian Jesús cuscaracoin non inon. Noco yoiyotiani cuscan ahuun Yoshin Shara noco inan. Ascashon non tapitiro ahuara futsafori noco yoiyotiani cuscan noco chipo inanshquin. 
\p  
\v 6 Nanscacufin non shinansharafafaini non nuno mai ano niyoashu nocon Ifo Jesús icari non nocoataima. Nan man non tapia.  
\v 7 Icon Jesús icano non oiantaimafiaquin nuno mai anoshon non icoinra huafafaini. Ascashon non chipo oinshquin.  
\v 8 Man non tapia naashu nocon Ifo fu non ipashquin. Nanscaifin sharaquin. Ascacufin non naicain non ratuima. 
\p  
\v 9 Ascano nuno mai ano non niyoashu iyamarai Upa Dios icari non nocoaitian nocon Ifoan noco yonopaiyai cuscan non aiton oin nocoqui fasi unimacoinshquin. Nanfin non fasi ashopaicai. Non asca huashoaiton oinfin nocon Ifo nocoqui unimaiquin. Nanquiri fustisi non shinain.  
\v 10 Ascan nan non icoinra huafoti Cristoqui non nocoshquin. Nantianri noco yoipacushquin non mai ano niyoshon shara huayamaraquinmain non chaca huamisiquin. Non ahuara shara huamisicun ahuara sharacoin noco inanshquin. Asca non ahuarashta chaca huamisicun ahuara shara noco inanpaifiaquicai noco inantiroma. Ascashu funoshcani. 
\s1 Cristohuunoashu non Dios fu rafutiro 
\p  
\v 11 Ascacun Diosin noco yonoa cuscan non ayamashu non ratutiro. Ascatan futsafori non yoipai Diosin ato yonoa cuscan anonfo. Diosin noco onancoian nonmain cayacafi yoiaitofin. Noncai tsoa futsa fuparapaima. Marifi man man noco onancoian. Nonricai mato paramisima. Nocon tsain cayacafi fusti. Manmain nocohuunoa maton nomuran nannorifosi shinanpainon. 
\p  
\v 12 Ascan noncai afanan mato shinanmapaima isca huaquin, —Pablo yafi afu yonoafo fasi sharaforan, —ishoncai non mato nocohuunoa yoimapaima. Non mato cayacafi fusti yoimisi. Man man tapia. Futsafoancai mato yoicoianma. Mato fuparapaicani. Mato yoia cuscacai amisifoma. Ascashon aton nomuran shinanchacamisifo. Cacapaimisifo. Nonfin mato icon fusti yoimisiquin. Ascan man man noco onancoinmisi man nocohuuri noiquin man ato nocohuunoa yoisharatiro.  
\v 13 Icon Dios noiquifin un curushcai yonoshofoanfafainmisiquin ahuunoa futsafoan shinansharanonfo. 
\p Ascan futsafoan nocohuunoa yoiafo isca huaquin, —Pablon yafi afu yonoafo nison cuscaraforan, —ishon nocohuunoa yoiafo. Man manfin tapiaquin non matohuun noiquin cayacaficoin shinanfain non Diosin tsain mato yoimisiquin marifi man cayacafi shinanon.  
\v 14-15 Cristo nocohuun noiquin noco yonoi non ahuun tsain shara mato yoinon. Cristo nantifi yorafohuunoashu naani. Ascashu nantifi non afu nai cafiscai afanan non ipaoni cuscan aashquima. Cristo nafiashu afanan nocohuunoashu noco noi funinaca huani. Norifi naashu ahuunoashu non afanan funitiro a cuscara iishquin. Ascan nofin non apaiyai cuscan fustisicai afanan non shinantiroma. Cristo noco amapaiyai cuscan nan fusti non shinantiro nocoqui unimanon. Nanfo non icoinra huamisi. 
\p  
\v 16 Ascacufin icoinra huamafoan futsafohuunoa shinainfo cuscacai un afanan atohuunoa anori shinanpacunacama. Unri anori shinanpaonifiashucai un afanan ascapacunacama. Cristohuunoari un amaquiri shinanpaoni. Uncai afanan ahuunoa anori shinainma.  
\v 17 Ratoran Cristo Ifohuaashu afin fiananancoian yora funacoin ishquin. Ipaoni cuscacai afanan aima. Nantian Cristo ahuun nomuran afanan funacoin cuscara huai. 
\p  
\v 18 Ascano Upa Diosin Cristohuunshon noco fiananan huaa afanan non noicasmanonma. Ascan natian Cristohuunoashu non ahuun yorafo inon. Ascatan noco yonoa norifi ahuunshon yorafo yoiquin isca huanon, —Cristo Ifo huacahuun. Afanan Diosimaqui iyamacahuun ahuun yorafo iishcaquin, —ishon non yoitiro.  
\v 19 Upa Diosin Cristohuunshon afanan nantifi yorafo a ya rafumapai afanan amaqui inonfoma. Cristo noco nashoniano Upa Diosin nocon chaca afanan shinainma. Nocon chaca soashona non afu ipanon. Upa Diosin noco yonoa cuscan nannoricoin non mato yoimisi. 
\p  
\v 20 Nanscacun Cristo noco nichini non ahuun tsain mato yoinon. Non ahuun tsain mato yoiquifin nan Upa Diosicoinin mato yoia huaquin. Upa Diosifin nocohuunshon mato yoiquin. Cristo mato yoipaiyai cuscari non mato yoi. Ascacun noco nicacoincapun. Cristo mato nashoni chacafo mato soashoshquin. Ascacun maton chaca shatucahuun afanan Upa Dios fu rafushcaquin.  
\v 21 Cristocai ahua chaca huayamafiamisicun Apa Diosin nocon chacafo amuran cuyoimani. Ascan ahuunoashu nan cuscara shara non inon. 
\c 6  
\p  
\v 1 Ascashon non Dios fu yonoi mato shara huamashquin. Nanscacun nicacoincahuun. Diosin matohuun ramapai. Cristohuunshon man maton chaca soashoni a cuscara shara inon. Diosin matohuun noicoinfiaiton potayamacahuun funoshcaquima.  
\v 2 Nan Diosin tsain yoimisi Isaías ahuun tsain inonpacoai cuscan cunuquin isca huani, 
\q3 “‘Noco numahuu,’ ishon man ua yoia. Un mato nicafain un matohuun ramapaicai un mato numaran,” 
\m ishon Diosin yoini cuscan Isaías inonpacoai cuscan cununi. Ascacun nicasharacahuun. Diosin natian matohuun ramapaiquin. Cristohuunshon mato numanon. Natian nicasharacahuun. 
\p  
\v 3 Noncai tsoan chaca ismamisima Diosin noco yonomapaiyai cuscan shinanchacanonfoma.  
\v 4 Ascatamarocon non nantifi Dioshuunshon non aca cuscan huafain non mato oinmana nonmain ahuun oimatifoshon. Ahuara ahuuscarafiaiton non tunucoinmisi. Noco shinanchacamapai noncai tapiama ahuuscaquimain noco chaca huacanicai. Ascafiaiton non tunucoin. 
\p  
\v 5 Ascashon noco coshafain cunu muran noco iquimafain noco huamisifo nan sinamisifo nocoqui fucashon noco chaca huashcaquin nanscamisifoquin. Ascan nonrifi curushcain yonoi atsanacain yamu ichapa oshayamacai foniyanan non ascamisiquin.  
\v 6-7 Noco asca huafiaino chaca huatamarocon nocon nomuran non ahua chaca shinainma. Non Cristo fu rafuaiton noco yosimisi cuscan man non tapia. Noco chaca huafiainfoancai non atoqui sinayamacai funaquima non tunucoinmisi. 
\p Ascashon futsafohuun ramapaicain non ato shara huafafainmisi non Diospan Yoshin Sharahuunshon non ato nansca huamisi fuparatama non atohuun noicoinmisi. Non icon fusti yoimisi. Non Diospan curushhuunshon Jesús yonoshomisi. Non nanfo nansca huafafainquin non mato nantifi ismatiro nonmain Diospan oimatifoshon. Satanás noco chaca huamapaifiaiton Upa Diosin ahuun Yoshin Sharapan nan Dios cuscara noco imaino ahuun curushhuunshon non ahuara chacafo potatiro. 
\p  
\v 8 Ascashon futsafoan nocohuunoa tsain shara yoifiaino futsafoan nocohuunoa tsain chaca yoimisifo. Ascan futsafoanrifi, —Pablon nocofunu shararan, —ua huafiainfono futsafoan noco roamisifo. Un iconcoin yoifiamisicun, —Pablofin fuparamitsapaimisiran, —ishon uhuunoa futsafoan yoimisi.  
\v 9 —Pablocai ahuama. Noncai na nocofunu oinpaima, —ua huafiaifono Diosifin ua onancoinshon ua noiquin. Futsafoan ua namapaifiaifono un nia. Ua rutuquirashquifiacaqui ua tsoan rutucoianma.  
\v 10 Uhuun nomuran un omitsiscafiai uhuun Ifo Jesushuunoashu un unimamisi. Un ahuuomafiashu un Dioshuunshon futsafo un imasharamisi. Un ahuuoma shinantsa afiai nantifi Diosinari uhuunari. 
\p  
\v 11 Uhuun yoramishti Corinto anoafoan uhuun nomuran un muai cuscan un mato tapimamisi. Un mato fomanma. Nantifi uhuun nomuran un muai cuscan mato tapima man tapinon.  
\v 12 Ascacun uncai matoqui ointi mutomisima. Manfin uqui ointi mutomisiquin.  
\v 13 Nanscacun un mato yoi. Manfin uhuun facu cuscaracoinfoquin. Ascacun uqui ointi mutoyamacapun. Un mato noiai cuscan uari noicapun. 
\s1 Icoinra huafoma fu rafufafainyamacahuun 
\p  
\v 14 Icoinra huafoma fu rafufafainyamacahuun. Sharafoan shinainfo cuscacai chacafoan anorisi shinancanima. Shafa yafi faquishcai osinantiroma.  
\v 15 Nanscarifiai Cristo futan Satanascai anorisi shinantirofoma. Cristo icoinra huafoan fuchipaiyaifo cuscacai nan icoinra huamafoan fuchipaicanima.  
\v 16 Cristo icoinra huafo ichanancashon Upa Dios cufitirofo. Nantianricai icoinra huamafo atofu ichanantirofoma ahuara ramihuacashon cufishcaquin. Nan rafucai ositirofoma. Futsafoancai Upa Dioscoin cufipaicanima. Ascan nonfin Diosin pushu cuscaraquin. Nocon Diosfin natian niaquin. Diosin yoini isca huaquin, 
\q3 “Unfin atofu iquicai. Ato fu rafucacaishquin. Un aton Dios icano. Nanfo uhuun yorafo inonfo.  
\v 17 Ascano icoinra huamafo icaifo cuscan ayamacahuun. Ato fu rafufafainyamacahuun. Ahua chaca huayamacahuun. Man ascaino un matofu iishquin.  
\v 18 Ascatan un maton Upa inon. Man uhuun facu nocofunufo yafi ainfofo inon,” 
\m ishon nocon Ifo Diosin yoini. Nan onihuafoti ato iquinaquin. 
\c 7  
\p  
\v 1 Uhuun yoramishtichin Upa Diosin noco nannori yoiyotiani cuscan shara. Ascashu non isharanon. Nantifi nocon chaca non shatunon. Ahuarafoan nocon caya iyamarai nocon nomuran noco chaca huamatiro nanfo non shatucoianshu nan cuscara shara non itiro. Non Upa Dios noicoianshu a cuscara shara fusti non ipainon. 
\s1 Corinto anoafo Jesushuunoashu fiananansharafo cuscan 
\p  
\v 2 Noncai mato chaca huamisima. Ascashori non mato chaca ismamisima marifi man chaca inon. Ahuara matona fipaiquicai non mato fuparamisima. Ascan maton ointinin nocohuunoa shinansharacapun.  
\v 3 Uncai nan un mato yoiai cuscan un matoqui tsain chaca huashquin yoimisima. Urocon matohuun noicoin un matofu ipapai nan un naitian. Nannori un mato yoimisi.  
\v 4 Unfin mato icoinra huaicain nan un mato yoiai cuscatsi man ayamaiton. Un matohuunoa nantifi yorafo yoisharapai matohuunoa shinansharanonfo. Man uhuun ointi ua fupuashoan. Un omitsiscafiain matohuunoashu un unimacoinni. 
\p  
\v 5 Non Macedonian ano nocoshocai non tununima. Nannoshon noco fasi fucash huanifo. Fochishmanantanancaquin. Nocon nomuran non ratucoinni man Jesús tanasharatama man funoaiton oin.  
\v 6 Ascafia Upan Diosin nan nomuran ihuuaifo aton nomuran shinanmasharatiro. Ascacun noco Tito nichishoni nanton nocon nomuran shinanmasharanon.  
\v 7 Nocoqui nocoshon nocon nomuran shinanmashara. Noco yoia isca huaquin, —Corintofoan uhuun ointi ua unimamaran, —ishon Titopan noco tapimana. Ascara un nicaquin nocon ointi unima. Noco yoiari man uhuunoa yoia isca huaquin, —Non Pablo fasi noi. Nocoqui samamashta nocopainon. Noco cayacafi cunushoni nanton nocon chaca shatumanon. Ascashori nocon ointi non nocoa. Icon non chaca huaa. Noncai afanan asca huapaima. Non fasi Pablo shinainran, —ishon man yoia cuscan Titopan ua tapimana. Un nanscara nicaino uhuun ointi fasi finacai unimacoian. 
\p  
\v 8 Un mato cunushona cuscan maton ointi ihuumana. Un mato cunu fomaiqui tau huaa mato ointi ihuu huamapaiquima. Cahuanquisi un mato ointi ihuumana. Ascafia uhuun cunu oinquin man chaca shatua. Ascacun un mato cunu foma cuscacai un ramapaima.  
\v 9 Maton ointi ihuuaiton nicaicain uhuun ointi unimaima. Man Diosqui afanan nasoaiton nicaifin un fasi unimacoianquin. Upa Diosifin maton ointi ihuumana man chaca shatunon. Nanscacoinfin man man aaquin. Ascan un mato cunushoni cuscahuunshocai un mato funomanama. 
\p  
\v 10 Ascashon non shinanqui isca huai, —¡Ohua! Un chaca hua cuscan Diosirifi un chaca huaran, —ishon shinanquin non nocon chaca shatupaitiro Upa Diosqui nasoshquin. Non ascaiton Upa Diosin noco numatiro non afu rafupacunon. Ascashocai chipo non shinantiroma isca huaquin, —¡Ohua! Uhuun chaca un shatuyamashu shara icuana. Un Diosqui nasoyamari shara icuana, —ishoncai non anori shinanpacunacama. 
\p Ascacun icoinra huamafoan non shinain cuscacai tsoan anori shinanfoma. Isca huaquin shinanfo, —¡Ohua! Un chaca huaran, —ishon shinanfiacaquin aton ointi ihuu itirofiacai Diosquiri shinanpaicanima. Ascashu naashucai Upa Dios fu nipatirofoma. 
\p  
\v 11 Ascan mancai ascarama. Shinancapon. Man maton ointi ihuuano man Diosqui nasoshon. Shinanqui man isca huaa, —Non fasi Diosqui nasopai afanan a cuscara shara ishquin. Noncai afanan asca huaquin chaca huapaipacunacama. Ratoran no fu ichananmisiton chaca shatucasmai non potayotiro no fu afanan ichanainyononma. Non asca huayamaino Upa Diosin noco onaintimatiro. Norifi Pablo noicoin. Afanan no fu ipainon. Noco cunushoni cuscan ratoran non futsan chaca shatuataima non onaintimatiro chaca shatunon non isharashquin, —ishon man yoia. Ascan afanancai tsoan yoitiroma, —Chaca shatuafomaran, —ishon tsoanricai ahua chaca matohuun nutatiroma. 
\p  
\v 12 Ascacun man tapitiro uncai nan apa ahuin ahua futsa fu ica nan nocofunuhuunoashu ointi ihuuahuunoaricai un mato cunu fomanima. Upa Diosin ahuun ointaifi man nocohuun shinansharamisi. Nanscacun un mato cunushoni man tapinon.  
\v 13 Man nocohuun shinansharaiton nicaquin uhuun ointi un fupuasharacoinna. 
\p Nocon yorahuan Tito arifi matohuunoashu unimacoinyamua. Ascan Tito unimaiton oin norifi non unimacoinyamua.  
\v 14 Ascano Titopan tapia un matohuunoa tsain shara yoiai cuscan iconcoin. Un matohuunoa yoiai cuscan nanscacoin man huaa. Mancai ua rafimanama. Nantifi un matohuunoa yoia cuscan iconcoin afi tapitiro.  
\v 15 Tito matoqui nocoshon oian man iscaiton, —Titopan noco yoiai cuscan nan Diospan tsain. Non nicacoianmashu non omitsiscatiroran, —ishon man yoia. Yoitimashu man ratua. Man nicacoinpaiyaiton oin Tito matoqui unimacoin. Matohuun noi finacoin.  
\v 16 Urifi un matohuun noicoin. Un natian mato icoinra huacointiro nan un mato yoia cuscan man aiton. Ascano un fasi unimai. 
\c 8  
\s1 —Ahuara ashon futsafori inansharacahuun, —ishon Pablonun Corintofo yoini 
\p  
\v 1 Ascan un tsain futsari mato yoi man tapinon. Icoinra huafo Macedonia anoafo Upa Diosin aton nomuran shinanmashara futsafo inansharanonfo.  
\v 2 Nan ahuuomafo Macedonia anoafo fasi omitsiscafiacaquin Diosihuunshon unimacoincaquin nan ahuuoma futsafori ato inansharafo.  
\v 3 Nan un oian cuscan un mato yoi. Nanfoan futsafo inantiro cuscan paratamacoin ato inancoian. Nanfoanfin inanpaiquin ato inanquin.  
\v 4 Yoiafo isca huaquin, —Jesús icoinra huaa futsafo yopaifo cuscan non ato inanpai. Ascacun Judea anoafo non ato pui fomaicai noco foshocapun. Non nocon nomuran unimacoinquin non ato inainran, —ishon noco yoinifo. 
\p  
\v 5 Non shinanyamua noco pui fusti inainfoshafain non Judea anoafo foshoicanon. Ascafiacai ascara iyamuama. Noco pui inantaifoma ichanancashon noco ointaifi cufiyoiyamuafo isca huaquin, —Nocon Ifon, nonfin min yoraquin. Min noco yonopaiyai cuscan min noco yonotiro. Nonfin minaquin, —ishon yoiyamuafo. Nannori yoicatan nocori yoiyamuafo isca huaquin, —Diosin matohuunshon noco yonopaiyai cuscan noco yonotiro. Norifi non mato nicacointiro, —ishon noco yoiyamuafo.  
\v 6 Titopan tau huaquin mato yoiyoni isca huaquin, —Maton puifo ichanan huacahuun ahuuomafo Jerusalén anoafo ato inanshcaquin, —ishon yoiyoni. 
\p Ascaiton non Tito yoiyamua, —Min yoimisi cuscan afanan ato yoihuu nan ahuuomafo Jerusalén anoafo ato pui inanonfo. Man atohuun noiquin ato man inantiro. Corintofo ato yoihuu, —ishon non Tito yoiyamua.  
\v 7 Man fasi finacaiquifin Jesús icoinra huafain Diospan tsain cayacafi yoifain, ahuun tsain tapisharafain iconcoin Jesús yonoshosharafain man nocohuun noishara. Man nanscara sharafo huaa cuscan nanscarifi huaquin nan yopaifori man ato inansharatiro. Diosihuunshon man ato noicoinquin unimacain ato inansharacahuun. Asca huacaquin tapisharacahuun. 
\p  
\v 8 Uficai un mato yonoima man ahuuomafo pui inanon. ¿Un tapipai futsafoan ato fasi inanpaiyai cuscan marifi man ato inanpaimun? ¿Tsain fustiton ato inainran ishon man yoiyamaraquin atohuun noicoinquin man ato inanpaimun?  
\v 9 Man man tapiari nocon Ifo Jesucriston nai murannoashu mai ano fotoataima nantifi ahuuna ipaoni. Ahuacai yopapaonima. Ascafia nocohuun noicoinquin nantifi ahuunafo potayoni. Ascashu nocohuunoashu ahuuoma iyopaoni non ahuunoashu isharapacunon. 
\p  
\v 10 Ascan un shinain un mato shara huapaiyai cuscan nanfohuunoa un mato yoi man tapinon. Ascan manfin fari fusti finoanquin tsoa futsacai man afanan pui ichanan huashon man ato inantaima. Tau huaquin man ahuuomafo noiquin man ato fasi inanpaicoinquin ato inanqui tau huati.  
\v 11 Man tau huaquin unimacoincain ato inanqui tau huati cuscan natianri unimayanan ato inancahuun afanan yopanonfoma. Man inanpaiyaiti ato inancahuun.  
\v 12 Ascacun man ato paratama inanpaifiaiton man Diosin tapia. Man ascaino matoqui unimai man afanan ayashoma man ato inantiroma. Ahuatsi ato inanshquin. 
\p  
\v 13-14 Uncai mato isca huaquin yoima, —Ato ichapa inancahuuncai un mato huaima. Nanfocai ayaino man yopaitiro, —ishoncai un mato yoima. Ascan natianfin man ichapayaquin. Ascacun yopaifo man ato inantiroquin. Manracafin chipo yopaicain nanfo ichapayashori mato inantirofo. Man ascaifin mafiranan cushunonansharashu man ascatiroquin tsoa futsa yopanonma.  
\v 15 Nannori Diosin tsain cununi isca huaquin, —Ratoran futsan ahuun yono ichapa chitunfiacai tushushotiroma ratoran futsari yopaimain inaintonfin. Ascan futsan ichapama chitufiashocai afanan yopatiromaran, —ishon Diospan tsain cununiquin. 
\s1 Tito yafi afu rafuafo 
\p  
\v 16 Un matohuunoa shinansharai cuscari Titopan arifi ahuun nomuranshon matohuunoa shinain. Diosin ahuun nomuran shinanmana cuscan non, —¡Aicho! Upa Diosin min fasi shara min Tito shinanmashararan, —ishon non yoimisi.  
\v 17 Ascashon non yoiyamua isca huaquin, —Corintofo afanan ato oinyotahuun ato yoisharashquin, —ishon non Tito yoiyamua. Non nannori yoiaino fasi unimaiyamua. —¡Aicho! Unfin ato ari caicain. Un ato yoisharapai cairan, —ishon noco yoiyamua. Un shinain nocon tsain fustihuunoashucai caima. Afin matoqui capaisharai cai. 
\p  
\v 18 Ascacun no futan Diosin tanamisi futsan yafi Tito non matoqui nichishquin. Nan nocon yorahuan fasi shara. Jesushuunoa arifi yoipaimisi. Ahuunoa nantifi icoinra huafoan shara yoimisifo.  
\v 19 Nan icoinra huafoti ichanancashon nan nocofunu catonnifo no futan nan pui yopaifo non foshonon. Non ato ismapai pui non ato inain cuscan nocon Ifo shararan huanonfo. Non ato shara huapaiyai cuscan tapinonfo. 
\p  
\v 20-21 Nan ahuuomafo non ato pui fomasharapai. Ascacun nantifi yorafoan ointaifi non ato oinmasharapai nocoqui shinanchacanonfoma. Nan pui paratama non foshosharapai. Ascano noco isca huanonfoma, —Nocon pui atirifi noco onuanforan, —inonfoma. Ascano nocon Ifoan ointaifi nantifi yorafoan ointaifiri non ato oinmapai non cayacafi ica cuscan. 
\p  
\v 22 Ascacun nan nocon yorahuan Jesús tanamisi futsan non mato ari nichishquin. Man nonfin nan nocofunu oinmisiquin fasi Jesús icoinra huacoinnaiton. Noco futan Jesús yonoshosharamisi. Ascashon matohuunoa nicamisi man Jesús tanasharashon man ahuuomafo inansharaiton. Fasi mato ari capaimisi mato futan ato shara huashquin. 
\p  
\v 23 Man manfin Tito onancoianquin. Nantonfin u futan mato yonoshosharamisiquin. U fu rafumisi Jesús yonoshosharashquin. Nan Jesús icoinra huaa futsafori afu mato ari focani. Nan Jesús icoinra huafo ichanancashon ato catonnifo mato ari fononfo. Nan futsafoan ato oinquin yoimisifo, —¡Aicho! Nan na yoran ahuu cuscaramain Cristoquin noco oinmana. Atohuunshon man non tapia Cristo fasi shararan, —ishon yoimisifo.  
\v 24 Ascacufin matoqui nocoaifoan man ato ismatiro man atohuun noicoinquin. Man asca huaino un matohuunoa yoisharamisi cuscan iconcoin icoinra huafotifain tapitirofo. 
\c 9  
\s1 Icoinra huafo Corinto anoafoan nan icoinra huaa futsafo ahuuomafo ato pui fomanifo 
\p  
\v 1-2 Mun tapia Jesús icoinra huaa futsafo yopaifo cuscan man ato inanriscapai. Nannori un Macedonian anoafo matohuunoa yoia isca huaquin, —Corinto anoafo fari fusti iquisi itisharafo Jerusalén ano ahuuomafo ato inanshcaquin, —ishon matohuunoa un ato yoia. Man unimayanan ahuuomafo ato inanpaiyaiton nicacaquin arifi ato inanshquicaniquin. Ascacun mancai uhuun cunu fusti yopaima nan pui yopaifo ato fomashquin. 
\p  
\v 3 Ascafiacun un Tito yafi afu rafuafori matoqui nichishquin un matohuunoa un yoisharamisi cuscan iconcoin tapinonfo. Uncai matohuunoa tapinonfo ipaitsi yoimisima. Un ato yoimisi isca huaquin, —Corinto anoafo man iquisi itisharafo. Man atoqui nocoaiton mato pui inanshcani nan ahuuomafo man foshonon, —ishon un matohuunoa ato yoia. Ascacun itisharacahuun maton pui inantaifoma. 
\p  
\v 4 Ascan Macedonia anoa futsa ipaishoma ufu focaquin non mato oian man pui ichanan huayamacun un mato icoinra huashon un ato yoita cuscan man pui itishara huacuma un matohuun rafipaiyaino marifi man rafipaitiro.  
\v 5 Nanscacun un shinan Tito yafi afu rafua rafu iquisi rufofo un mato ari ato nichiqui tau huai pui ichanan huashon nan ahuuomafo fomashquin iquisi man itishara huanon. Ascan un chipo uficoin un matoqui nocoshon ufu foafoan tapitiro tsoan curushcai mato yonoama man ato pui inanno ishon. Ascatama man ato inanpaisharaquin man ato inan. 
\p  
\v 6 Ascacun ointiaquimayamacahuun. Tsoan fimi ushu fustirasi fana fustirasiri ahuun fimi fitiro. Tsoan ushu ichapa fana yono ichapari fitiro. Nanscarifiai tsoan futsafo ichapama inancun nanrifi Diosin ichapama inanshquin. Ascan tsoan unimaquin ichapa futsa inainton ichapari arifi fitiro.  
\v 7 Nantifiton aton nomuran shinainfo cuscan huafain futsafo inantirofo. Ascashocai yoitiroma isca huaquin, —¡Ohua! Un paratama inanpaiyamafiaiton ua yocariaiton un inain. 
\p Ascan un inanyamaino uqui shinanchacatiro. Un inain uhuunoa shinanchacanonfomaran, —ishon anori shinanyamacahuun. Asca huatama unimayanan inancahuun. Nan futsafo unimayanan inanmisi nanfin Diosin fasi ahuun noiquin.  
\v 8 Man ascacun nan man yopai cuscan paratama Diosin mato shara futsa futsatapafo inantiro man yopanonma. Futsafo yopaifo cuscan man ato inanon. Diosin nantishon tapiquin mato shara huafafaintiro marifi man ato shara huapanon.  
\v 9 Diospan tsain cunuquin isca huani, 
\q3 “Nocofunu sharapan ahuuomafo ichapa inansharamisi. Atohuun ramapaiyai cuscan huafain nan nocofunuhuucai Diosin ahuun ointiaquimapacunacamaran,” 
\m ishon cununi. 
\p  
\v 10 Diosin nantifi ushu onihuani. Ascacun yoran ushu fanatiro. Chipo Diosin ahuun yonofo foaimashotiro pisharanon. Nanscarifiai man yopai cuscan Diosin mato inanshquin. Paratama mato inantiro man unimaquin futsafori man shara huafafainon.  
\v 11 Icon Diosin mato ichapa inanpacui manri futsafo ichapa inanon. Ascan nan yopaifo man ato inain cuscan non ato fomashquin fasi unimaquin yoiqui isca huashcani, —¡Aicho! Upa Diosin min fasi sharacoinran, —huashcani. 
\p  
\v 12 Man ato shara huai cuscan nan ahuuomafoan fiishcani. Ficashon unimacai yoishcani, —¡Aicho! Upa Diosin min noco shara huamisiran, —ishon yoishcani.  
\v 13 Man ato shara huaa cuscan nan ahuuomafo fasi unimashcani man ato inansharano. Ascashon yoiquin isca huashcani, —¡Aicho! Upa Diosin nan noco inanfoan min tsain nicasharacoincani. “Jesús nocon Iforan,” mia huamisifo. Min ato yonoa cuscan noco inansharafo. Futsafori nanfoan ato inansharamisifo. Ascancunfin noficoin man non oian iconcoin min Furun Jesús aton Ifocoinran, —ishon nan ahuuomafoan yoishcani. 
\p  
\v 14 Ascan mato Upa Dios cufishoshcani. Man ato Dioshuunshon shara huaa cuscan. Ascashon yoiqui isca huashcani, —Upa Diosin, minhuunshon nafoan noco shara huaa. ¡Aicho! Upan non fasi atohuun noicoin. Atori shara huahuu, —ishon mato cufishoshcani.  
\v 15 ¡Aicho! Upa Diosin ahuun Furun Jesucristo noco inansharacoinni. Ascashon nocoqui nichini no fu rafupacunon. Afin fasi sharacoinquin. Paratamari ahuunoa yoipaisharafia noncai tapiama ahuuscashomain non yoisharatiroquin. 
\c 10  
\s1 Pablonun ato tapimana Diosihuunshon ato yonoshomisi Jesushuunoa yosishquin 
\p  
\v 1 Natian un tsain futsari mato yoisharapai. Uhuun yoramishtichin ua nicasharacapun. Cristocai tsain curushpan noco yoima. Nocohuun noishon funainquimashta noco yoisharai non ahuun tsain nicasharanon. Nanscarifi aqui un Cristohuunshon mato funainquimashta yoisharapai man tapinon. Man atirififain yoiquin isca huamisi, —Pablon no fu icun non oinmisi ahuun tsain shacashta noco yoimisi. Ascafia noco cunushomisi cuscan ascaracaima ratutama cayacaficoin noco curushcain cunushomisiran, —ishon uhuunoa yoimisifo.  
\v 2 Un matoqui nocoshocai curushcai mato yoipaima man ua nicanon. 
\p Atirififoan shinanqui isca huafo, —Pablonun nan icoinra huamafoan shinainfo cuscan noco yoi. Diosin ahuun shinanpacai noco yoiamaran, —ishon yoiafo. Un matoqui nocoshon un ato ismatiro nan icoinra huamafoan shinain cuscacai un mato yoimisima. Diosin shinain cuscan fusti un mato yoimisi. Nocoshon un ato tsain curushu yoishquin tapinonfo.  
\v 3 Icon nuno non mai ano ica. Ascafiashu icoinra huamafoan futsafo finonmapaiyai cuscan noncai asca huamisima noco noicasmaifo finonshquin.  
\v 4 Nan icoinra huamafo ashi futan piyan rutunancani. Ascan noncai ascara ashi non piya non ahuara futsafoyashon nan noco noicasmaifo yoshin chacafo non unumatiroma. Ascatama Diospan curushhuunshon nan noco chaca shinanmapaiyaifo non ato cuyotiro. 
\p  
\v 5 Ahuarafoan nocon nomuranshon noco amaquiri shinanmapai non Diospan curushhuunshon non afo potatiro afanan noco anori shinanmanonma. Nanfoanfin Dioshuunoa noco shinanmapaicanima. Non mato yosimisi cuscan nicacasmaifo. Nanscarafo no fu fochishmanantananpaicani. Noco Dios onanmapaicanima. Cacapaimisifoan Dios finonpaifia non Diosin curushhuunshon nanfo non potatiro afanan ascarafo inonma. Non nocon Ifo cufitiro isca huaquin, —Nocon Ifo Criston, nantifi uhuun shinanpan aton ifo ihuun. Un shinain cuscan mirus fusti ua shinanmahuu un mia tanasharanon, —ishon anori nocon Ifo Cristo non yoitiro.  
\v 6 Man Jesucristo nicacoinshon afanan ahua chaca huayamaino un afanan oaitian nan yoitimafo un ato oinmapacushquin.  
\v 7 Un mato muran imisi cuscan shinancahuun. Man futsa yoiqui isca huaa, —Pablocai ahuama. Acai mutsisipamaran, —ishon yoiafo. Yoiafori, —Nonfin Cristo ahuun yorafocoin, —ishon yoia. Iconquin shinantirofo urifi Cristo yoracoinran. 
\p  
\v 8 Nocon Ifo Jesús ua yononi cuscan un mato yonotiro mato chaca huamatama nocon Ifo un mato tanasharamafain maton ointi fupi huamanon. Un anori mato yoimisifiashucai un cacapaimisi itama un mato shara huamapai. Un mato anori yoicai un rafipaiyama.  
\v 9 Uncai uhuun cunupan mato musumapaima.  
\v 10 Atirififoan uhuunoa yoiquin isca huafo, —Pablonun nocoqui cunua cuscan fasi shafacafi mutsispacoin. Ascafia afincoin no fu icun man non oinmisi aacai ahuama. Ahuun tsain ahuamaran, —ishon uhuunoa yoimisifo. 
\p  
\v 11 Nannori uhuunoa yoimisifofiano un samamashta mato ari cashon uhuunoa un mato tapimashquin. Un mato cunushomisi cuscan nannoricoin un nocoshon un mato yoishquin. 
\p  
\v 12 Futsafoan mato yoimisifo isca huaquin, —Unfin fasi ahuara tapicoianquin. Un mato tapimasharatiroran, —ishon yoimisifo. Ascarafo ichanancanashu afi ranan yoinancani, —Tsoa futsacai noco cuscara sharama. Norus fusti non tapisharacoianquin, —ishon nan cacapaimisifo ascamisifo. Nanscashon nanfoan fasi amaquiri chaca shinanmisifo. Uncai yoitiroma un sharacoin. Ascashu un aton cuscara itiroma.  
\v 13 Noncai anori yoipaitiroma. Diosin noco yonoa cuscan nan fusti non mato yoitiro. Noco yononi non mato ahuun tsain shara yoinon. Nan fustisi non shinanmisi.  
\v 14 Non yoia cuscan iconcoin. Noncai cacapaimisima. Diosin noco yonoa cuscan nan fustisi non mato yoitiro. Diosin noco yonoqui tau huani non mato ahuun tsain shara Jesucristohuunoa yoinon. 
\p  
\v 15 Futsafoan mato yonoa cuscacai, —Non mato yonoaran, —ishon non yoimisima. Nonfin mato yoiaquin nan non mato ashomisi fustihuunoa. Futsafoan mato ashomisihuunoacai non yoimisima. Manmain paratamari Jesús icoinra huapainon. Ascan Diosin noco yonoaiton non mato paratama yositiro.  
\v 16 Man nanscaino nan tsain shara Jesucristohuunoa nan chai icafori yoitiro. Nan chai icafo man futsan ato yoianocai un ato yoiaran un itiroma. Noncai futsa yono shutipaimisima. 
\p  
\v 17 Ascan Diosin tsain cunuquin isca huani, —Ascan man ratoran futsa mafiri yoisharapaitama nocon Ifo Jesushuunoarocon yoisharacahuun, —huani.  
\v 18 Futsan afiri yoisharaicai acai ahuama. Ascaiton nocon Ifo Jesús ahuunoa yoisharaino non icoinra huatiro na nocofunu shara imisi. 
\c 11  
\s1 Pablon Jesús fu rafucoinmisi futsafoancai Jesushuunoa tapiamafiacashon ahuunoa futsafo tapimapai 
\p  
\v 1 Un mato natian yoi. Nan yoran shinansharayamaiton shinantiro cuscan nannori un mato yoifiaquicai nanscaracoin un yoima. Ascacun man ua nicamisi cuscan natianri ua nicasharacapun.  
\v 2 Nocofunun ahuin futsa fu icun fasi fashicointiro. Un Cristo yoiyoni arus fusti maton funu cuscara mato iquinon. Manfin ainfo nocofunu futsa fu imisima cuscaraquin. Cristo fusti mato Ifo itiroran ishon un yoiyoni. Man ascayamaino urifi uhuun ointi nocotiro. 
\p  
\v 3 Ascacun un matohuun musui Satanás Eva parani cuscan futsafoan matorifi maton nomuran parapaicani man Jesús afanan tanasharayamafain Cristo fusti man noinonma.  
\v 4 ¡Ohuashta! Futsafoan samamashta mato parapaicani. Non Jesushuunoa mato yoimisi cuscan futsafoan matoqui nocoshon ahuunoa yoicoianmafiaifoan mancai ato shatumapaitama manrocon ato icoinra huai. Non Diospan Yoshin Sharahuunshon tsain shara Jesushuunoa mato yoimisi cuscan nanfoan yoicoianmafiaifoan manfin ato icoinra huaquin. Jesushuunoa amaquiri mato yosifiaifoan man ato shatumanama. Man ato nicaquin yoimisi, —¡Aicho! Man nocofu ipainon, —man ato huamisi. 
\p  
\v 5 Ascacufin nanfori afiri yoisharafiai nanfoancai ua finoanfoma. Ascashon mato isca huaquin yoicani, —Diosin noco nichian non mato yosinon, —ishon ifiacashoncai ua finoanfoma.  
\v 6 ¿Man shinanmun un mato Diosin tsain yoiquin uhuun tsainman mato yoisharatiroma? Ascanfia unfin Diosin tsain tapisharaquin. Nan un mato yoiai cuscan cayacaficoin. Manfin ua onancoianquin. Man man tapian un mato Diosin tsain shafacafi yoimisi. Nanscara un mato ismafafaini. 
\p  
\v 7 Un Diosin tsain yoiai chaincai un mato ahuashta yocamisima. Uncai mato ahua fiamisima. Ucai mato pui yocama. Ascan un mato chaca huaraca. Ascafia ascaracaima. Mancai ichananshon nan Diosin tsain yoimisicai man inanqui fuya huamisima. Nanscaracai man tapiataima. Un mato Diospan tsain shara Jesushuunoa yoimisi mato shara huaquin man Diospan facufo inon. Un asca huaquicai un mato ahua yocamisima. ¿Ascan man uhuunoa shinanchacaimun? —Pablocai ahuamaran, —ishon man uhuunoa shinanraca.  
\v 8 Un matofu icai chaincai nan icoinra huafo mani futsa arishon ua inannifo ahuun rafanan un yopai cuscan un finon. Maficairocon man ua inanshara icuana. Ua inanfo rafanan un yopai cuscan un fia aiyashon un mato Diosin tsain yoishquin.  
\v 9 Un matofu ipaoni chaincai un ahuara yopafiaquin un mato fucash huapaonima. Nantianri Macedonian anoa icoinra huafo nocoqui nococashon un yopai cuscan ua inannifo. Un mato ano ica chaincai un tsoa ahua yocamisima. Uncai tsoa ahua yocapacunacama. 
\p  
\v 10 Ascacufin un mato Cristohuunshon icon fusti yoimisi. Nanscacun ahuun tsain iconcoin uhuun nomuran un nanua. Tsoa Acaya mai anoafoancai un mato yoiai cuscan ua shatumatiroma.  
\v 11 ¿Un mato anori yoiquinmun un mato noiama? Ma. Anorimafinquin. Diosin tapian un matohuun noicoin. 
\p  
\v 12 Nanscacun un mato yonoshonai chaincai un mato ahua fiapaimisima. Natianricai un mato ahua yocaima. Nanscasi huaquin un mato yonoshonicai nan paramisifo afanan man icoinra huanonma. Nan un yonoai cuscan futsafoan yoimisifo isca huaquin, —Norifi non Pablon yonoai cuscan non yonoiran, —ifiamisifo nanfocai un yonoai cuscan tsoan yonomisima. 
\p  
\v 13 Nanfoan paramisifo. Un icai cuscan apaifiacanicai tsoa ascacoianfoma. —Cristo noco yonoaran, —ishon mato shinanmapaifiacani nanfocai Cristo fu rafumisifoma.  
\v 14 Icon Satanás nocoqui nocotiro nan Diosin ahuun oinmati afu nai muran ica shara ointsa. Ascashon yoitiro, —Unfin mato shafacafi yositiroquin, —ishon noco fuparapaitiro.  
\v 15 Ascacun Satanás yonoshomisifori nan cuscara itirofo. Chacafofiacanashu Diospan yora shara ointsa itirofo. —Norifi non Dios yonosharashomisiran, —ishon noco shinanmapaicani. Ascafiaifoan ahuun unutaquin Diosin ato onaintimaquin finacoinshquin. Nanfoan chaca huacanashu omitsiscapanacafo. 
\s1 Pablon Jesús fu rafumisi omitsiscani cuscan 
\p  
\v 16 Un mato yoia cuscan afanan mato yoinon. —Pablonun ahua tapiamaran, —ishon uhuunoa shinanyamacahuun. Ascafia uhuunoa shinanpaiqui ua nicayocahuun. Nan man yora futsa ahua tapiama man nicatiro cuscan uarifi nicasharayocapun. Ufiri un ichapama yoimusharanon.  
\v 17 Un mato yoiai cuscan ufiri un yoimuishara cuscacai uhuun Ifoan ua yonoama. Un mato yoishquiai cuscan nan ahua tapiamafoan yoimisifo. 
\p  
\v 18 Icoinra huamafoan afiri yoimuishara cuscan futsafoanri mato yoimisifo. Ascacun nantian un mato yoi ufiri un yoimuisharai cuscan.  
\v 19 Mafi man shinanmun man tapicoian. Nanscashon nan ahua tapiafoma man ato nicatiro. Mato amaquiri yoifiaifoan mancai ato shatumanama. 
\p  
\v 20 Nan ratoran futsan mato curushcai yonoai cuscan man nicacointiro. Man ahuun oinmatifo cuscaracun mato nanfoan yonoa. Ascashori mato yonocani man ato cushusharanon. Mato fucash huafain mato roamisifo. Mato asca huamisifo.  
\v 21 Mato asca huariaquin shinanfo racafi, —Nofin mutsisipafoquin, —ishon shinanmisifo. ¡Ohua! Uncai anori shinanmisima. Ascan uncai icaifo cuscan ufiri yoimuisharatiroma. Man shinanracafin un mutsisipamaquin. Nanfoan mato aca cuscacai un mato asca huamisima. Ascacun un rafipaitiro. Ascafia nanfo afiri yoimushara cuscarifiai nanfoan mato ahuara yoiafo cuscahuunoari ufin un yoimuisharatiro. ¡Ohua! Nan ahua tapiafoma cuscan afanan un mato yoi. 
\p  
\v 22 ¿Nanfoan yoiafomun, —Non Hebreo sharafo, —ishon? Unrifi un Hebreoquin. ¿Nanfosimun Israelifo? Urifi un Israeliquin. ¿Nanfosimun Abraham ahuun funafo? Urifi un ahuun funaquin.  
\v 23 ¿Nanfosimun Cristo ahuun oinmatifo? Uncaifin ahuun oinmati shara finacaiaquin. ¡Ohua! Un asca huaquin yoipaiyamafiaquin un mato yoiai cuscan shinancapon. Nan paramisifoan mato yoiquin isca huacani, —Nonfi fasi curushcai Jesús yonoshonaquin, —ishon mato yoiafo. Uncaifin fasi yonoshoqui finacaiaquin. Nanfoanraca yoiqui isca huamisifo, —Jesushuunshon noco cunu muran iquimanaforan, —ifiamisifo uacaifin cunu muran iquimaquin finacaimisifoquin. Uacaifin fichin coshaquin finacoinmisifoquin. Ua coshafoticai un tanan huatiroma. Mun nari nari cuamisi. 
\p  
\v 24 Uhuun yora Israelifoanfin ua mucu fustiti coshaqui huafoquin. Nan ua coshaifotifi ua treinta nueve huafain ua coshamisifoquin.  
\v 25 Romanonfoanri ua coshaquin rafu non fusti huaafo. Ascashon uarifi uhuun caifoan toquirinin tsacaquin fusti huanifo. Shashohuanun non pocufainaino man uqui shashohuan cashcui rafu non fustiaino mun asa cuani. Man shashohuan ua ya cashcuano un yamu fusti non shafa fustiri unuhuan naquinoashu un ahuun naoti yatanni asashquima.  
\v 26 Un cahuancacainaichain manifoti Jesushuunoa yoishquin nan unu coshicoiain fasi musucoin muran icain ua yomutsofoan achicashon ua musuni tapifain uhuun caifoncoinchi ua musuni tapifain nanscarifi aquin uhuun caifomafoan ua musuni tapifain. Pushurasifo anoafoanri ua musuni tapifain tsoan istaipama anoafoanri ua musuni tapifain unuhuan musuni muran futsafoan yoiquin isca huafo, —Norifi non Jesús Ifo huaran, —ifiacashon parafo. Nanfoanri ua musuni tapifain.  
\v 27 Un isin mufiain un fasi curushcai yonomisi nan un yamu ichapa osha tunufain un foniyanan nomicain piqui tunufain fasi un matsinacain sahuutiama icain. 
\p  
\v 28 Ascatarifi nantifi Jesús icoinra huafo ichananti pushu anoshon ahuara ato fucashni huai cuscan urifi un atohuunshon uhuun ointi nocomisi. Shafatifi un ato shinanmisi.  
\v 29 Un nica futsan Jesús tanasharapaifiain ratuaino urifi un atohuun ramapaitiro. Nan futsan chaca huacun un ahuunshon urifi mutiro. Futsan futsa chaca huamacun urifi uhuun ointi atohuunshon un nocotiro. 
\p  
\v 30 Ascan un mato rama yoia cuscan un afanan yoimuisharainocai, —Un Jesusmaisi ahuara huatiromaran, —ishon man tapinon. Un omitsiscamisi cuscan un mato yoi.  
\v 31 Non isca huanon, —Upa Diosin min shararan, —non huapanon. Nan nocon Ifo Jesucristo ahuun Apa nannori non yoipacunon. Nantofin man tapiaquin. Uncai mato paraima.  
\v 32 Nan pushurasi ahuun anu Damasco ano niaifoncoinnin Aretas ahuun niaifo patashari yononi nan pushurasi Damasco ano cushushon ua achinonfo.  
\v 33 Ascacun nan Jesús icoinra huafoan ua futanmanhuan muran onucashon cunu foman cayashon ua fotomanifo un casharanon. 
\c 12  
\s1 Pablon ahuun namapan cuscara Diosin tapimani 
\p  
\v 1 Ufin un yoimuisharai. Ascara tsain uhuunoa un yoimuainocai ahuacoinma. Nanscafiacun nocon Ifo Jesús ua oinmana cuscan un mato yoinon. Ascano namapan cuscara ua oinmana. Tsoan nicayomisima cuscararifi ua tapimana. Nannori un mato yoi.  
\v 2 Catorce fari man finoan Diosin nai muran icano ua ihuiriscatani. Un Cristo fu rafuaiton oinquin ua ihuiriscatani. Uncai tapiama uhuun yoshin fusti nai muran cani iyamarai uhuun cayafoya un caniraca. Diosin fustitofin tapiaquin nan un ini cuscan. 
\p  
\v 3-4 Diosin nan icano ua ihuiriscatani. Un mato yoia cuscan afananri un mato yoi. Uhuun yora mumacoin iyamarai uhuun yoshin fustisimain caniquin uncai tapiama. Diosin fustitofin tapiaquin nan un ini cuscan Diosin icano ua ahuara nicamani cuscacai un tsoa futsa yoitiroma. Ascashon ua yoiquin isca huani, —Un icano min oian cuscan tsoashta yoiamahuu, —ishon ua Diosin yononi. 
\p  
\v 5 Un oian cuscan huafain un futsa yoitiro isca huaquin, —Diosifin ua fusti nan icari ua oinmaniquin, —ishon un yoitiro. Ascafiacucai un anori yoipaima. Asca huaquin yoiashu un cacapaimisi itiro. Uncai ufiri yoimuisharapaima. Uruscai un ahua huatiroma. Unfin Diosinhuunshon un ahuara huatiroquin. Nanscacufin nan fusti un yoimisi.  
\v 6 Ufiri un yoimuisharapaifin un yoimuitiroquin. Un anori yoiquicai yora tapiamafoan yoitiro cuscan un yoima. Un iconcoin uhuunoa yoisharatiro. Ascafia uncai ufiri yoimuisharapaima uhuunoa shinanquin finacoinnonfoma. 
\p  
\v 7 Upa Diosin icari ua ismani cuscan tsoa futsacai oinmisima. Ascano Diosin shinanni ua oinmanihuunoashu ufiri yoimuisharaino un cacapaimisi itiro. Ascacufin Diosin Satanás nitun huamayamaino yoshin chacan uqui nichini ua fucash huariamisi un cacapaimisi inonma. 
\p  
\v 8 Ascacun un cufinquin isca huani, —Ifon, ua cayahuapun, —ishon un yocaquin rafu non fusti huani.  
\v 9 Un asca huafiaiton nocon Ifoan ua cumaquin isca huani, —Un mihuun noi. Uhuun curushhuunshon nan pau min tunutiro. Un mifu rafucacaini. Nan fusti min yopai. Min mutsispamafiacun un minhuunshon un ato ismatiro un ahuamamishti huatiroran, —ishon ua cumani. Ascacufin unimaquin un yoifafainicai isca huaquin, —Un mutsisipamafiacun uhuun Ifo ahuun curushu ua inantiroran, —ishon un yoishquin. Ascano Cristo ahuun curushu ua inantiro. 
\p  
\v 10 Ascano un mutsisipamafiashu Cristohuunoashu un unimai. Ascashon ua roafain ahuara chaca finoin omitsiscamafain ahuarafoan ua fucashni huafiaino un unimaquin tunutiro. Un asca huaquifin un mutsisipamafiashon Cristohuunshon un ahuamamishti huatiroquin. 
\s1 Pablonun icoinra huafo Corinto anoafo fasi shinanni 
\p  
\v 11 Nan yora ahua tapiamafoan yoitiro cuscan un mato rama yoia. Un mato anori yoifiafin matohuun nuaquin. Asca ufiri yoimuisharatama mancairocon uhuunoa yoisharafin shara icuanaquin. Nan futsafoan mato paran. —Nonfin Jesucristo fu rafumisisharaquin, —ishon mato parafiamisifo man ato icoinra huamisi. Ascan uacaifin man icoinra huaquin finacaitiroquin. Un ahuamafiacucai afoan ua finoncoianfoma.  
\v 12 Un Jesucristo fu rafumisicoinshofin un mato ismamisiquin. Un ahuunshon mato ahuara sharafo isma man Jesús icoinra huanon. Un ahuunshon mato isma cuscan yoiafo, —¡Aira! ¡Oincapon! Diosin ahuamamishti huatiroran, —ishon yoimisifo. Ahuunshori ascapainifo un mato isma Diosin ahuamamishti huatiro tapinonfo. Funaquima un afo mato ismacoinmisi. 
\p  
\v 13 ¿Ascan ahuuscaquimun man isca huaquin shinanquin? —Pablonun icoinra huaa futsafo shara huaa cuscacai nocorifi shara huashoanmaran, —ishoncai man uhuunoa yoitiroma. Un icoinra huaa futsafo ato shara huashoan cuscan nanscarifi huaquin un mato shara huafafaini. Uncai mato ahua fianpaimisima. Unricai mato fucash huamisima. —Ua pimafain ua sahuumacahuuncai, —un mato huamisima. Ascacun ua rau huacapun. 
\p  
\v 14 Munfin mato ano cai rafuaquin. Mun itisharashu natian afanan un mato ari cai. Un amisi cuscacai afanan un mato yocaquin fucash huaima. Uncai matona fipaitama unrocon mato fuchipaicoin. Shinancapon. Facufoancai apa yafi ahua pimamisima. Ascan ahua futan apacaifin aton facufo pimamisiquin. Ascan manfin uhuun facucoinfo cuscaraquin. Ascan uncaifin mato Diospan tsain tapimasharaquin uhuunoashu man isharanon. 
\p  
\v 15 Ascancunfin nantifi un ahuara ya cuscan un mato inanfain ufiri un inanmui man Jesús tanasharanon. Ascacun un mato noiquin finacoinfiaitocai man ua noiquin finacoinma.  
\v 16 Atirifoan uhuunoa yoiquiraca isca huafo, —Icon Pablon noco ahua yocayamafiaquin noco paran. Noco ahua fianyamafiashon noco fomanran, —ishonraca man yoimisi.  
\v 17 ¿Nan nocofunufo un matoqui nichini nanfohuunshon unmun mato paran maton pui fianshquin?  
\v 18 Un Tito yoini isca huaquin, —Corintofo ano catahuun, —un huani. Noco futan icoinra huaa futsafori un matoqui nichian. ¿Titopamun mato paran matona fianshquin? Ma. Man manfin tapiaquin Titopacai matona fianpaimisima. Un matofu imisi cuscan arifi matofu ica. Non nanscara rafu matohuun noiquin. Mato shara huashopai Diospan Yoshin Sharahuunoashu noco rafu non matofu imisi. 
\p  
\v 19 —Man shinan raca un mato yoiai cuscan man uhuunoa shinansharanon, —ishon un mato yoi. Ma. Anoricaima. Upa Diosin nan un yoiai cuscafin ua nicaquin Cristo ua yoimai cuscan un mato yoiaiton. Uhuun yoramishtichin nan un mato yoia cuscan un mato shara huapai Jesús shinain cuscan huaquin marifi nannorisi man shinanon. 
\p  
\v 20 Ascacun un matoqui nocoshon oinpai man chaca shatushon Jesús tanasharanon. Un matoqui nocoshon oian man chaca shatuyamacun uhuun nomuran un omitsiscatiro. Un matoqui chipo nocoaitian manraca fochishmanantanancai futsa finonmapai aqui sinacai samamashta sinacucahuanmisifo icai asca huaquiraca, —Norus fusti tapishara. Tsoa futsafoancai non tapishara cuscan tapiafomaran, —icain. Nannori yoitiacanashu chaca huatanancain yoiti huatanancain cacapaimisi icain man nannorisi shinanquima. Man nansca huainofin un ratuicain. Man asca huaquin chaca shatuyamashu man ua oinpaiyai cuscacai un ascatiroma. Man uqui unimaquin ua oinpaifiaquin man chaca huaino un matoqui unimatamarocon un fasi mato shinain omitsiscatiro. Man nanscaiton un mato oinmanaquin. 
\p  
\v 21 Man asca huainofin un matoqui nocoaitian un ratuicain. Maton nomuran man ahuarafo shinanchacafain maton nomuranshon man chaca huapaiyai cuscan huariaino. Nocofunufoan aton ahuinma fu icaifoanno ainfofori aton funuma fu icaifoanno. Nanscara chaca futsa futsatapafo huafiain man maton chaca shatuashma Diosiqui man afanan nasoyamaino. Un matoqui nocoshon oian man asca huaino un ratutiro. Maton ointaifi uarifi Diosin matohuunshon ua rafimashquin. Man acai cuscahuunoashu un fasi omitsiscatiro. Ascacun un uaiyanan mato oinmai. 
\c 13  
\s1 Pablonun afanan chaca huanonfoma ishon ahuun unutaquin ato yoini 
\p  
\v 1 Mun mato oinqui rafu huaa. Natian un afanan mato oincai. Diospan tsain noco yoiquin isca huani, —Tsoan yoiquin isca huai, “Nanton chaca huaran,” ishon yoiaino. Rafu non fustiton nannorifosi yoiaino iyamarai rafutan nannorisi yoiaino non icoinra huatiro, —ishon Diosin tsain cununi.  
\v 2 Un matofu iyoshon un mato yoini man chaca huanonma. Natianrifi un afanan mato yoi. Un matoqui nasoshon oian tsoan aton chaca shatucunma un ato oinmashquin. Tsoashtacai un finonmashquima. 
\p  
\v 3 Manraca tapipaicai Criston uhuunshon mato yoiaiton. Iconquifin man tapicai. Man samamashta tapitiro. Un mato shafacafi ismatiro. Uncai mato ipaitsi yoima Cristohuunshon un mato yoi. Cristocai mato fuparanima tapimanama mutsisipacoincain mato tapimai man maton chaca shatunon.  
\v 4 Icon Cristo nocohuunoashu ihui coyan iquinanqui mastaifono nocofunu fupashcoin ini. Nocohuunoashu naicain afin numanima. Nafianishaquin natian Diosin ahuun curushhuunoashu man afanan nia. Nanscarifiai nonricai mutsisipama. Afin omitsiscani norifi omitsiscatirofiashu Cristo mato shara huashoan cuscan norifi Diosin curushhuunshon mato shara huafafaini. 
\p  
\v 5 Ascacun maton nomuranshon shinancahuun. ¿Iconmun man man Jesús icoinra huaa maton chaca shatucoianshu Upa Dios fu ipashcaquin? ¿Man tapicoianmun Jesucristo matofu rafua? ¿Man mumisimun? ¿Man mafiri fuparamuamun? —¿Unfin Jesús ahuun yoracoinquin, —ishon man yoifiashucai man ahuun yoracoinmamun?  
\v 6 Man manfin ua oinquin tapiaquin un Cristo ahuun yoracoincun. Nan man icoinra huapainon.  
\v 7 Un mato Upa Dios cufishomisi man chaca huanonma. Nocohuunoa shinansharanonfo ishoncai un Upa cufimisima. Isca huaquin futsafoan nocohuunoa shinantirofo, —Pablon yafi afu rafuafoancai ato yonoshosharafomaran, —ishon nocohuunoa yoifiacanashu. Ascacun marifi man Jesús tanasharaino fasi sharacoin itiro. 
\p  
\v 8 Noncai ahuara iconcoin shatumatiroma. Non asca huapaitamarocon Diospan tsain iconcoin non afohuunoa futsafo yoisharapai.  
\v 9 Ascano non ahuamaran ishon shinanfiacaquin man Jesushuunoashu isharacoiainno non fasi unimacointiro. Ascan non mato Upa Dios mato cufishona man nan cuscara sharacoin inon.  
\v 10 Ascacufin un mato isca huaquin cunushona cuscan. Un matoqui nocoshon oian man Cristo tanasharacoincun un ointoshinon. Uficoin un mato muran cayamaquin un mato cunushoquin isca huai man nicasharanon. Ascan un matoqui nocoshocai Diospan shinanhuunshocai un mato curushcain yoishquima. Diosicai un mato oimanon ua yonoama. Uroco mato Jesushuunoa shinansharamani. 
\p  
\v 11 Uhuun tsain unutaqui un mato yoisharapai. Jesús cuscara shara fusti ipaicahuun. Ua nicasharacapun. Nannorisi shinancahuun. Isharacahuun. Man ascaino Diosin matohuun noicoincain mato imasharanon. Ascashon maton ointi unimamanon matofu ishon.  
\v 12 Nantifi yoinonansharacahuun.  
\v 13 Nantifi Jesús icoinra huafo ufu icafoan mato yoisharapai.  
\v 14 Nocon Ifo Jesucristo matohuun ramapai. Nocon Diosiri matohuun noicoin. Diospan Yoshin Shara matofu rafupacunon. Nanti. 
\cls Pablo