\id 1CO - Sharanahua NT [mcd] -Peru 2008 (DBL -2013) 
\h 1 Corintios 
\toc1 Pablonun Corinto Anoafo Cunu Fomani 
\toc2 1 Corintios 
\toc3 1Co 
\mt1 Pablonun Corinto Anoafo Cunu Fomani 
\c 1  
\s1 Pablonun Jesús icoinra huafo Corinto anoafo ato cunu fomani 
\p  
\v 1-2 Uhuun yoramishtichin un mato cunu fomai. No futan Jesús tanamisi Sóstenes u futan mato cunu fomai. Upan Diosin ua catonpaiquin ua catonni Jesucristo fu rafunon ahuun tsain Jesucristohuunoa un yoifoanfafainon. Ascan Jesucristo ua nichini un ahuun tsain shara nantifi manifoti un ato yoifoanfafainon. Corinto anoafoan manfin Diospan yorafoquin. Man ichananfafainmisi Diospan tsain tapisharashquin. Diosin mato catonni Jesucristohuunoashu man ahuun yora sharafo inon. Ascacun un mato cunu fomai. Mato fustisima un futsafori cunushoni. Nocon Ifo Jesucristo Ifo huacun un atorifi na cunu un ato tapimapai. Nan nocon Ifofin aton Iforiquin. 
\p  
\v 3 Un fasi mato shinain. Diosin matohuun ramapaicain, maton nomuran shinanmasharanon. Upa Diosin futan Furun Jesucristo nanfo mato ashoni. 
\s1 Cristo ahuara sharafo noco ashotiro 
\p  
\v 4 Mun tapian Jesucristo matohuun noiquin ahuarafo mato tapimani ahuun ointi cuscara shara man inon. Nanscara tapishon un Upan Dios cufinquin isca huafafainni, —¡Aicho! Upa Diosin, min Corinto anoafo ahuara sharafo Jesucristohuunshon min ato tapimanaran, —ishon un cufifafainni.  
\v 5 Icon Cristo matofu rafuaino ahuunshon man tapisharacoian. Ascan ahuun shinanhuunshon shafacafi man yorafo Cristohuunoa yoisharatiro.  
\v 6 Non mato Jesushuunoa yoini cuscan Diosin maton ointi fiananan huaa ahuun ointi cuscara shara man inon. Ascacun man Jesús icoinra huashon man oinmana. 
\p  
\v 7 Ascashu Upa Diosin Yoshin Sharahuunshon mato imapaiyai cuscan man man iquina. Icoinra huaa futsafoan iquina cuscan marifi man man iquina maton nomuran Diosin shinansharamanon. Natianri nocon Ifo man fasi oinpai afanan oaiton.  
\v 8 Aqui nocoaitian mato cushusharayoshquin. Ahuun curushu mato inanyoshquin man tanasharanon. Ascano nocoshon ratofomain afu ipacanicain yoifain ratofomain omitsiscapanacafo muran focanicai nantifi yoipacushquin. Nantiantari mato yoishquin isca huaquin, —Un maton chaca soashoni. Ascano tsoancai “Manfofin chacaforan,” mato huatiroma. Ua cuscara shara un mato imairan, —ishon Jesús mato yoishquin.  
\v 9 Upa Diosin mato catonni Furun nocon Ifo Jesucristo fu man rafunon. Upan noco yoia cuscan man aicain. 
\s1 Jesús icoinra huaa Corinto anoafoancai anorifosi shinancanima 
\p  
\v 10 Uhuun yoramishtichin un mato yoisharapai. Nocon Ifo Jesucriston ua yonoaino un mato yoi nannorifosi man shinanon. Shinan futsacaquima Jesucristo mato shinanmapaiyai cuscan nannorifosi shinancahuun. 
\p  
\v 11 Uhuun yoramishtichin Cloé ahuun yorafo uqui fucashon ua tapimanafo man fochishmanantananfafainaiton.  
\v 12 Atirifoan yoiafo, —Nonfin Pablon tanamisifoquin non shinain cuscafin cayacaficoinquin. Futsafoancai cayacafi shinancanimaran, —ishon man yoia. Futsafoan yoiafori, —Nonfin Apolos tanamisifoquin, —ishon yoiaifono. Futsafoanri, —Nonfin Pedro tanamisifoquin, —ishon yoiaifonori. Futsafoanri, —Nonfin Cristo tanamisifoquin, —ishon man yoifafaini. 
\p  
\v 13 Uhuun yorafoan ascacai sharama. Cristocai nocon ointi rananya imapaima futsa futsa huaquin non shinanon. Cristo tsain cayacafi fusti. Mato pashcanan huaima futsa futsa huaquin man shinanon. Uncai ihui coyan iquinanhuunoashu mato nashonima. Man unu muran iquimamupacunitian Jesús tanacoinshon man futsafo ismashquin chaca shatushon Jesús Ifo huashquin. Uncai tsoa unu muran iquimanama ua tanafain ua ifo huanon.  
\v 14 Un unimai. Uncai tsoa futsa unu muran iquimanama. Crispo yafi Gayo nan rafusi un unu muran iquimani.  
\v 15 Ascacucai tsoan yoitiroma isca huaquin, —Un unu muran iquimamua Pablo tanamisi ishquiran, —ishoncai tsoan yoitiroma.  
\v 16 ¡Aira! Nantian mun shinain. Estéfanas yafi ahuun yorafori un ato unu muran iquimani. Un shinanfin un tsoa futsa unu muran iquimanamaquin.  
\v 17 Cristocai ua yononima un yorafo unu muran iquimapacunon. Ua yonoa un ahuunoa tsain shara yoinon. Ufin shinanfaincai un mato yoiama. Ufi shinanfaincai un mato Jesucristo icoinra huamatiroma. Uhuun shinanpan mato yoiaiton nancai Diosin ahuun curushma Jesucristo mato ihui coyan iquinanhuunoashu nashoni maton chaca soashoshquin. Nan tsain fustihuunshon Upa Diosin ahuun curushhuunshon mato numatiro. 
\s1 Upan Diosin nantifi tapicoian ahuara futsa apaiquin atiro Cristohuunshon noco oinmapacumisi 
\p  
\v 18 Ascashon Jesús ato nashoni nicacani a icoinra huaamafoan isca shinancani, —¿Tsoanco icoinra huatiromun Jesús ihui coyan iquinanqui noco nashoni nocon chaca soashoshquin? Na tsaincai ahuama, —ishon yoicani. Ascashu nanfo funocoincani. Omitsiscapanacafo muran focani. Ascan nonfin icoinra huaicai. Ascano noco nimapacunaca non afu ipanon. Diosin ahuun shinanhuunshon Jesús noco nashoni nocon chaca soashoshquin. Ahua futsacai noco nimapacutiroma non afu ipanon.  
\v 19 Diosin tsain cunuquin isca huani, 
\q3 “Nan ua icoinra huamafoan shinancaquin isca huacani, ‘Non tapicoian. Nocon mapon shinansharafain non ahuara huatiro nonfin tapisharaquin,’ ishon shinancani. Ascafiashon ahua tapiafoma. Unfin un ato oinmanicain. Afoan shinainfo cuscacai un ato huaimaima. Ipaitsi shinanforan,” 
\m ishon Diosin yoini. 
\p  
\v 20 Ascan cunu tapisharafiacashon Diosin shinain cuscacai huacanima. Nanfofin Diosin atoti oinmaniquin amaquiri shinainfo cuscan. —Nonfin ahuamamishti tapisharaquin, —ifiaifoan Diosin ato ismai afoancai ahuashta tapiafoma.  
\v 21 Tsoanshtacai aton shinanpan Dios onantirofoma. Diosin fustitofin nantifi tapisharacoianquin. Icoinra huamafoan yoiquin isca huafo, —Jesús icoinra huafoan ahuunoa yoiafo fasi amaquiriran, —ishon yoifiafo Diosin nocon chaca soashona non afu nipanon nonfin icoinra huaicai.  
\v 22 Ascano uhuun caifo Israelifo iscamisifo, —Diosin nai muranshon noco ahuamamishti oinmanaiton Jesushuunoa yoiafo cuscan non icoinra huatiroran, —ishon shinancani. Nan Israelimafori iscamisifo, —Noco Jesucristohuunoa yoiaifo cuscacai non tapitiroma. Ascacun non icoinra huatiroma. Nan ahuara non tapiafin non icoinra huatiroquin, —ishon yoimisifo.  
\v 23 Anori ifiainfoanno non isca huamisi, —Jesucriston ihui coyan iquinanqui noco nashoni nocon chaca soashoshquin, —ishon non yoimisi. Ascafiacun uhuun caifo Israelifoan yoiquin isca huaafo, —Ihui coyan iquinanqui mastancai nocon Cristo itiromaran, —ishon shinancani. Israelimafoan Cristohuunoa nicacani aqui cashupaicani, —Tsoancai nanscara icoinra huatiroma. Futsan noco nashoni nocon chaca noco soashoshquin, —ishon yoimisifo.  
\v 24 Ascafiainfono nan icoinra huafoti Diosin noco catonni. Israelifo yafi mani futsafo Cristohuunshon nocon chaca soashonano non afu ipanon. Non tapia Cristohuunshon Upa Diosin ahuamamishti huamisi. Ahuun curushhuunshon noco numani. Atofin nantifi tapicoianquin. Cristohuunshon noco numani non afu nipanon.  
\v 25 Icoinra huamafoan yoiqui isca huafo, —“Jesucristo noco nashoni,” ishon noco yoifiacaquin fasi amaquiricoin icoinra huafo. Yora mapo sharayatoncai anori shinantiroma, —ishon icoinra huamafoan yoimisifoquin. Anori yoifiafono Diosin ahuun shinanhuunoashu Jesucristo noco nashoni. Diospan ahuun shinancai a icoinra huamafoan aton shinan cuscarama. Atonfin fasi cayacafi shinanmisiquin. Icoinra huamafoan yoimisifo isca huaquin, —Non fasi tapicoianran, —ishon yoifiacaquicai icon yoicanima. Fasi amaquiri shinancani. —Non ahuamamishti huatiroran, —ifiamisishacaquin afocai afin numatiroma. Ascafiatan aforicai afin chaca soamutirofoma. Upa Diosin fustiton ahuamamishti huatiro. 
\p  
\v 26 Uhuun yoramishtichin shinancapon. Diosin mato catoantaima ahuu cuscaramain man iyomisiquin. Man fustirasiton man cunu tapiaino maton muranri niaifo fustirasi. Nan Jesús icoinra huamafoan yoiquin isca huafo, —Afocai ahuamaran, —ishon matohuunoa yoicani.  
\v 27 Nanfoan shinancai man ahuama. Ascafia Diosin mato catoan tapicanashu chipo rafipaitirofo. Shinanfo isca huaquin, —Nonfin ahuamamishti huatiroquin. Jesús icoinra huafoan futsa futsa huaquin shinantiroforan, —ishon shinanfo. Ascatari yoiafo isca huaquin, —Non shinantiro cuscacai afoanri shinantirofoma, —ishon yoiafo. Anori shinanfiacashon chipo tapitirofo Dioshuunshon non ahuamamishti huatiro cuscan. Tapicanashu rafipaitirofo.  
\v 28 Ascafiacatan shinancaquin isca huafo, —Afocai sharamafinquin non ato oinpaimaran, —ishon matohuunoa yoifiaifono Diosin mato catonni. Mancai ahuashtamaran mato huafiaifono Diosin mato catoan man ato oinmanon afocairoconfin ahuamaquin. 
\p  
\v 29 Ascano tsoanshtacai Diosin ointaifi, —Un tsoa cuscaramaran, —ishon yoitiroma.  
\v 30 Dioshuunoashu Jesucristo ahuun yorafo man inon. Cristohuunshon noco cayacafi tapimafain ahuun ointi cuscara noco imashquin noco nashoni nocon chaca soashoshquin non afu nipanon.  
\v 31 Ascashon non Jesús icoinra huashucai non cacapaimisi itiroma. Diosin tsain cunuquin isca huani, —Tsoancai yoitiroma isca huaquin, “Un ahuamamishti un tapiaran,” ishoncai yoitiroma. Anori itamarocon, “¡Aicho! Nocon Ifo Jesús ua numa. Ascacun natian ahuunshon un tapisharatiroran,” —ishon yoitiro. 
\c 2  
\s1 Cristo ihui coyan iquinanqui mastanifo cuscan yoinifo 
\p  
\v 1 Uhuun yoramishtichin un matoqui noco funashon Cristohuunshon Upan Diosin mato ashoni cuscan unfin shinansharafaincai un mato yoiama. Diosin ahuun shinan fustihuunshofin un mato yoiaquin. Diosin ua shinanmanaino un mato yoia.  
\v 2 Un matoqui nocoataima un shinanquin isca huani, —Uncai ahua futsa ato yoishquima. Jesucristo noco ihui coyan iquinanhuunoashu noco nashoni cuscan. Nanhuunoa fusti un ato yoishquiran, —ishon un shinanni.  
\v 3 Ascano matoqui oshon uncai shinanqui isca huama, —Unfincoin un ato cayacafi yoitiroran, —ishoncai un shinanma. Diospan Yoshin Sharahuunshon un mato yoiamaquicai un mato cayacafi yoisharacuanama. Un ahuun Yoshin Shara fasi yopacoiain cuscan un mato cayacafi yoinon. Ascano un ratuyamua ua Diosin yonoa cuscan un ayamaishafain marifi man funocuana. Uhuun nomuran un shinanchacatana un ayamai shafain.  
\v 4 Ascashon un mato Jesucristohuunoa yoimisi cuscan uhuun mapon shinanfainsi un mato yoitamarocon Diospan Yoshin Sharapan ua shinanmapaiyai cuscan un mato yoia. Un mato yoiaino ahuun curushhuunshon man icoinra huani maton ointi fianananhuashquin ahuun ointi cuscara iishquin.  
\v 5 Ascan nocofunun shinanpancai man icoinra huama. Diosin shinanhuunshon man icoinra huaa. 
\s1 Diosin Yoshin Sharahuunshon non shinansharatiro 
\p  
\v 6 Ascan Diospan tsain nicasharaifoan man tapiafo non Diospan Yoshin Sharahuunshon cayacaficoin yoiaiton. Ascan futsafoanri cunu tapisharafiashon Diosin shinain cuscacai tsoa anori shinainma. Aton shinanpancai non mato yoiama. Aton niaifofoan shinainfo cuscaricai non mato yoiama. Ascashufi afo funocaniquin. Nan shinainfo cuscan man cuyoi futsui. Ipaitsi shinancani.  
\v 7 Non mato Diosihuunshon yoimisi cuscan huafaincai tsoan tapiyopaonima. Cristo yorafotihuunoashu nashoshquiai cuscan Diosincai ato tapimayopaonima. Diosin mai onihuataima shinanquin isca huani, —Uhuun Furumun ato chipo nashoshquin nan a icoinra huafoti ato nimapacushquin, —ishon shinanyoni.  
\v 8 Un na tsain mato yoiai cuscacai niaifofoan tapiyopaonima. Ascashon Jesús rutunifo. Tapicashocai tsoan nocon Ifo Jesús Diospan furun sharacoin masta cuanifoma.  
\v 9 Ascan Diospan tsain cunuquin isca huani, 
\q3 “Tsoan Dios noicoiainton ahuamamishti shara ato ashoin, tsoan oinyomisima cuscara sharafo ato ashofain tsoan nicayomisima cuscarari ashofain. Tsoanshta aton nomuran shinanyomisifoma sharashtacoin ato itishara huashoan,” 
\m ishon Diosin tsain cununi.  
\v 10 Ascashon non Dios noiaiton ahuun Yoshin Sharapan noco tapimai. Ahuun Yoshin Sharapan nantifi tapicoian. Upa Diosin shinain cuscan ahuun Yoshin Sharapan tapicoian.  
\v 11 Yorafoan aton nomuran shinainfo cuscacai tsoa futsan tapitiroma. Arusu fusti tapitiro. Nanscarifiai Upa Diosin shinain cuscan ahuun Yoshin Shara fustiton tapicoian.  
\v 12 Nan Upa Diosin ahuun Yoshin Shara nocoqui nichini noco tapimapaiyai cuscan noco tapimanon. Nan icoinra huamafoan Diosin tsain shinancanima. Ascashori afoan shinain cuscacai Diosin noco tapimanima. 
\p  
\v 13 Ascashon yorafoan noco tapima cuscan non mato yositamarocon Diosin ahuun Yoshin Sharapan nocon nomuran noco tapimana cuscan huafain non mato tapimai. Ahuun tsain iconcoin fusti. Ascan norifi ahuunshon non mato iconcoin tapimai.  
\v 14 Ascano ratoranfon Diospan Yoshin Shara atofu iyamaino nanfoanfin Diosin Yoshin Sharapan yoia cuscan nicacasmacani. Ascashu iscatirofo, 
\q3 “Tsoantsi nan tsain icoinra huaiquin. Nan tsain fasi amaquiriran,” 
\m ishon shinancani. Diosin Yoshin Sharapan shinain cuscacai tsoan tapiama. Nanscacun atofu iyamainocai yoia cuscan tapiafoma. Diosin Yoshin Shara fustiton ato tapimatiro.  
\v 15 Ascaino ratoran futsa Diosin Yoshin Shara afu icaino Diosin ato tapimapaiyai cuscan tapitirofo. Ratocaimain chaca iyamarai sharaquin Diosin Yoshin Sharapan ato tapimai. Ascafiashu Diosin Yoshin Shara fu rafuamatocai a Jesús icoinra huaafo onantiroma.  
\v 16 Diosin tsain cunuquin isca huani, —Tsoancai nocon Ifoan ahuun nomuran shinain cuscan huafain tapitiroma. Tsoanricai Dios tapimatiroma, —ishon cununi. Ascafia nan non icoinra huafo Criston shinain cuscan huafainri noco tapimana. 
\c 3  
\s1 Nonfin Diospan oinmatifoquin 
\p  
\v 1-3 Facu rama caiantocai tsain tapiama. Yosishon tsain nicatiro. Nanscarifi aquin Jesús rama icoinra huafofin facu rama caian cuscarafoquin. Diosin aton Upafiacucai tsoan ahuun tsain atirifi tapisharataima. Manfin nanscarafoquin. Rama Jesús ifo huayamafiashu man nanscasi aamisiquin. Diosin tsain man man nicafiaicai a yoia cuscan man aama. ¡Ohuashta! Uhuun yoramishtichin manfin Diospan tsain nicamisima cuscarafoquin. Rama Jesús icoinra huafo cuscara. Nan Diospan Yoshin Shara ato iquinafoanfin ahuun tsain nicasharatirofo. Mancai ascarafoma. Ascan un mato Diosin tsain yoipaiyai cuscacai atirifi un mato yoitiroma. Facushtan shoma fusti aiyotiro namicai piyotiroma. Nanscarifiai atirifi Diosin tsain man nicafiaquicai ahuun tsain man tapiyotiroma. Nanscacun un ichapamashta mato yoiyotiro. Ahuun tsain futsafori un mato yosipaifia mancai tapisharataima. Ascano mancai itisharama paratama nicashquin. Manfin Diospan Yoshin Shara fu rafuama cuscarafoquin. Ascashu futsafo ahuaraya cuscan man ato fuchipaifain fochishmanantanainsi man ica. Nanscarafoancai Diosin tsain nicacanima. Marifi man nanscarafo. Ascashufin Diospan yorama ointsa man aaquin.  
\v 4 Atirifi isca huafo, —Nonfin Pablo tanaquin. Ascan noncai Apolos non tanama, —ishon anori yoiaifoanno. Atirifiton yoicaquin, —Nonfin Apolos tanaquin. Ascan noncai Pablo tanama, —ishon anori yoiafo. Anori yoiquin man ato oinmanaquin nan Diospan Yoshin Shara matoya rafuama cuscarafo. 
\p  
\v 5 Ahuuscaimun atirifiton man isca huaquin, —Non Pablo yafi Apolos tanairan, —man ica. Apolos fucai un ahuama. Nonfin nocon Ifo Diosin ahuun oinmatiquin. Nocohuunshonfin man Jesús icoinra huaniquin. Diosin noco catonni noco yonomapaiyai cuscan noco yonoshquin Furunhuunoa man tapinon. 
\p  
\v 6 Un mato isca huaquin yosipai. Futsan tauhuaquin shuqui fanatiro. Futsari amaqui orotiro foaisharanon. Ascafiashocai nan rafutan shuqui foaimatiroma. Diosin fustitofin shuqui foaimatiroquin. Nanscarifi aquin un mato tauhuaquin Jesucristo icoinra huamani. Chipo Apolos Cristohuunoa mato yosini ahuun tsain man tanasharacoinon. Non asca huafiaino Diosin fustitofin maton nomuran mato shinansharamatiro ahuun tsain man tanasharacoinfafainon. 
\p  
\v 7 Ascashon un mato yoiai cuscacai un Apolos fu ahuama. Diosin fustitofin yorafo aton nomuran shinanmasharatiro ahuun tsain tanasharacoinonfo.  
\v 8 Tsoaran futsan tau huaquin ato Jesús icoinra huamafin nan chipo ato yosiaitori ato tsain nannorifosi ato tanamasharanon. Nan rafutan nannori shinancani. Ato Jesushuunoa yoishcaquin a tanasharanonfo. Ascacufin Diosin a yonoshonaifo cuscan futsa paratama inanfain futsa ichapama shara inanshquin. Ahuuscamain yonoi aafoquin. 
\p  
\v 9 Manfin Diosin ahuun mau cuscaraquin. Ahuun pushu cuscararifi. Mau ifo fustifiano futsafoanrifi yonoshotirofoquin. Aafin maton ifoquin. Nonfofin ahuun yonomatifoquin a futan non mato yonoshotiro. Nanscarifiai pushu ifo fustifiano futsafoanri yonoshotirofo. Nanscarifiai manfin Diosin ahuun mau cuscaracoinquin. Ahuun pushu cuscararifi. Diosin fustifin maton Ifoquin. Nonfofin ahuun yonoshomisifoquin. Noco yonoa cuscari non maton nomuran non mato shinansharamatiro ahuun tsain man tanasharanon. 
\p  
\v 10 Pushu yonomisiton iquisi quishi mutsisipa shara fitiro. Chipo futsafoan pushu anaititiro. Nanscarifiai Diosin ua catonpai ua cashman catonni. Ascashon ua tapimashara cuscan un tau huaquin cayacaficoin un mato Jesushuunoa tapimamisi. Un mato tapimayoni cuscan futsanfoan natian nannoricoinri paratama mato yosicani. Ascaiton futsafo un yoishquin isca huaquin, —¡Oinfain! Ato cayacaficoin yosisharacahuun, —ishon un ato yoishquin.  
\v 11 Un mato yoiquin tau huani cuscacai tsoa futsan mato yositiroma isca huaquin, —Un mato tsain futsa tapimai man Dios fu ipanon, —ishocai mato icon yoitiroma. Jesucristo fustitofin noco imasharatiroquin non Dios fu ipanon. 
\p  
\v 12-15 Nocofunun ahuun pushu samamashta coatanfin amurannoashu ichocaintiroquin naashquima. Ascan ahuun pushu coaino amurannoafo ahuun cuno shara cotiroma. Ascan ahuara cunomafo coi anaitimui futsutiro. Pushu huaquin iquisi quishi curushu shara nichishon ahuun oro amuran nutafain atirifi cuno futsa oshopa sharashta non chicoin cuno mapash faca facaitsa nanfo fasi chicoin ahuun pushuhuun nutatiro. Ascafia coainocai afo cotiroma. Nanfo cotamarocon nuifutsutiro. Ascashon pushu huaquin cano mapofain shupa shuhuafain pishin nutacuano pushu coaino afo cotiro. Afo munoi futsutiro. 
\p Nanscarifiai nantifi Jesús icoinra huafo futsafo yonosharaifoanno atirifi yonosharamisima. Jesús icoinra huafoti nantifi noco ichanan huaitian noco ismaicai non ashomisi cuscan ipayamarain cuyoriscatiromainquin. A yonoshosharafocai aton yono funopacunacama. Ascan a yonoshosharafoma aton yono cuyoi anaitimui futsutiro. Tsoan yonoshoshara ato inansharacointiro. Asca nan yonoshosharama ato inainma. Afu ipatirofofiacanashu man maitsisi yonoi futsucani. Man funocani. 
\p  
\v 16 ¿Asca man tapiamamun man Diosin pushu cuscaracoin? Ahuun Yoshin Shara matofu ica.  
\v 17 Diosin icanocai ahua chaca itiroma. Mato fu ipashquin Diosin mato catonni ahuun yorafo man inon. Nan icoinra huafoti ato imasharai. Ascan futsan ato amaquiri yoiaiton Diosin copiqui ato onaintimashqui. 
\p  
\v 18 Mafiri paramuyamacahuun. Icoinra huamafoan ahuara tapiafo cuscaraca marifi man tapishara. Anori shinanyamacahuun. Icoinra huamafoan shinanqui isca huafo, —Nan Jesús icoinra huafoan fasi amaquiri shinanfo. Fasi nison cuscaracoinforan, —ishon nocohuunoa yoimisifo. Matohuunoa anori shinanfiaifoanno Diosin mato cayacafi shinansharamapaiyai cuscan man shinantiro. 
\p  
\v 19 Nan Jesús icoinra huamafoan shinanquin isca huafo, —Non cayacafi shinanshararan, —ifiaifoan Diosin yoia, —Afoancai cayacafi shinansharacanima. Ipaitsi shinanforan, —ishon Diosin atohuunoa yoini. Ascashon futsafo shinanmapaicani isca huaquin, —Afoanfin tapisharaquin, —ishon ato shinanmapai. Ascafia afoancai Dios paratiroma. Ascan aton chanihuunshon ato onaintimai funononfo.  
\v 20 Diosin tsain cunuqui isca huani, —Nonfin fasi tapisharaquin, —ifiainfoan nocon Ifo Diosin ato onancoinshon yoiquin isca huatiro, —Nafoancai ahua cayacafi shinantirofoma. Ipaitsi shinancaniran, —ishon ato yoitiro. 
\p  
\v 21 Ascacun afanan yoiquin isca huayamacahuun, —Na nocofunun nocon tapimamisi ahuun tsain fusti cayacaficoinran, —ishon afanan yoiyamacahuun. Diosin ato shinanmayamainocai tsoan cayacafi shinancuanama. Diosihuunshonfin non mato cayacafi yositiroquin. Ascan Diosin mato inan nantifi man yopai cuscan huafain.  
\v 22 Un non Apolos non Pedro nonfin Jesushuunoashu ahuun oinmatifoquin ahuun tsain non mato yosishquin man nicoinsharanon. Naashu man afu ipanon. Nantifi ahuunafin matonariquin. Ahuara icai cuscan afohuunshon Diosin mato shara huashoi. Nan chipo icaifori mato shara huashoi. Nantifi Diosin onihuani cuscan mato shara huashoshquin.  
\v 23 Manfin Cristonafoquin. Cristofin Upa Diosinaquin. 
\c 4  
\s1 Cristo fu rafumisifoan a yonoshomisifo 
\p  
\v 1 Ascashon man nocohuunoa shinanquin isca huatiro, —Nafofin Cristo oinmatifoquin, —ishon nocohuunoa shinancahuun. Tsain Cristohuunoa tsoan nicayomisima cuscara Upa Diosin nocon nomuran noco tapimana cuscan non matori tapimanon.  
\v 2 Ascan non Cristo oinmatifocun Diosin noco yononi isca huaquin, —Un mato yoiai cuscan huafain ato yoicahuun. Yoiyamacaquima, —ishon noco yononi.  
\v 3 Diosin fustitofin tapicoianquin nan ua yonoa cuscamain un aaquin. Man uhuunoa shinain cuscacai un shinainma. Futsafoanri uhuunoa shinain cuscacai un shinainma. Unricai tapiama.  
\v 4 Uhuun nomuran un shinain isca huaquin —Ua Diosin yononi cuscan un airan, —ishon un anori shinain cuscan nocon Ifo fustiton ua onancoian. Ascashon yoitiro, —Nan un yonoai cuscacoin airan, —ishon ua yoitiro. 
\p  
\v 5 Jesús icoinra huafoti Upan Diosin noco ichanan huataima. Ascan isca huaquin yoiyamacahuun —Nacai Diosin yonoa cuscan aimaran, —ishon anori shinanyamacahuun. Oinyocaquin. Nocon Ifoan noco ichanan huaitian nantifi noco puashoshquin nantifiton ointaifi ratofoanmain icoinra huaa iyamarai icoinmaran huaaquin. Ascatari nan non ichanaintian nantifiton ointaifi nocon nomuran non shinanmisi cuscan huafain nocon Ifon Jesucristo noco puashoshquin. Afanancai nantiantan non ahuashta fomantiro ishquima. Diosinmain nantifi onancoincufin. Nan non ahuara futsa shara huashopaifain onushta ahuara non chaca huafiamisi nanfori Diosin noco puashoshquin. Nantianri non shara huacun Diosin yoiquin isca huashquin, —¡Aicho! Un mia yonoa cuscan min amisi. Min shara huamisiran, —ishon noco yoishquin. 
\p  
\v 6 Uhuun yoramishtichin uhuunoa yafi Apoloshuunoa un mato tapimana ahuara futsa man tapinon. Un mato yosipai man iscanonma, —Pablonun noco tapimana cuscan Apoloscai tapiamaran iyamarai Apolos noco tapimana cuscacai Pablonun tapiamaran, —ishon yoiyamacahuun. Diosin tsain noco cunushoni non anori yoinonma. Nan tsain nicaquicai non shinanquin isca huatiroma, —Na nocon yosimisi fasi sharacoin. Futsafocai a cuscaramaran, —ishon non shinantiroma.  
\v 7 Diosinfin nantifi noco onihuaniquin. Ascanofin Diosihuunshon non ahuara huatiroquin. Ascasho —Un acai cuscacai tsoan huatiromaran, —iyamacahuun. Ascashu curafiapaimisi iyamacahuun. 
\p  
\v 8 Manfin shinanquin isca huaquin, —Non Diosin tsain tapicoian. Non futsafo fasi finoncoian. Ascan noncai tsoa futsa yopaima noco tapimanon. Nonfin niaifo cuscarafoquin, —ishon man shinan. Iconpainon. Man niaifocoin icaino nantian norifi non matofu niaifo icuana. Asca tsoatsi niaifocoin. Nonmaquian.  
\v 9 Cunu uhuapa cunu acua muran iquimanifo ato rutunonfo. Yora ichapafoan ointaifi rutumatiro oinnonfo. Nanscarifiai norifi non Jesús fu rafumisifo non ato cuscaraquin. Diosin noco yonoa non Jesushuunoashu omitsiscafiaino nantifi yorafo non ahuun oinmati afu nai muran icafoanricai oincani.  
\v 10 Nonfin Cristo fu rafumisi. Ascacun noco isca huamisi, —Nanfoanfin fasi amaquiri shinanmisifoquin. Mutsisipamaforan, —ishon nocohuunoa icoinra huamafoan yoimisifoquin. Asca matohuunoacai yoiquin asca huamisifoma. Matohuunoafin man shinanquin isca huaquin, —Non fasi tapicoian. Nofifin non isharamisiquin. Tsoan noco finontiromaran, —ishon maton nomuran man shinanmisiquin. Man non tapia non Jesús maisishocai non ahua huatiroma. Ascafia man shinanquin isca huamisi, —Ufifin un ahuara huatiroquin, —ishon man shinanmisiquin. 
\p  
\v 11 Ascan nonfin foniyanan nomicain sahuuti chocacoin sahuufain noco coshafain pushuomacainri Diosin tsain fusti yoi non cahuancacaimisi. Natianri non omitsiscai.  
\v 12 Ascashu non curushcai yonotiro non yopai cuscan ahuun rafanan fiishquin. Ascarifiatan yorafoan noco tsain chaca huafiaiton copitamarocon non isca huamisi, —Jesús mia shara huapainonran, —ishon non yoimisi. Noco omitsisca huafiaifoan non tunucointiro.  
\v 13 Ascashori noco roaifoan rahuinmafain non tsain shara ato yoitiro. Ascacun natianri noco chaca huafoquin. —Manfin nan tanama cuscarafoquin, —ishon nocohuunoa yoimisifoquin. 
\p  
\v 14 Ascacucai un matoqui cunuai cuscan un mato rafimapaima. Ascan manfin uhuun facucoin cuscarafoquin. Un matohuun fasi noi. Ascacun un mato yoi afanan man amaquiri shinanonma.  
\v 15 Yorafoan mato Cristohuunoa tapimatirofia ascan unfin tauhuaquin mato Cristohuunoa tapimaniquin. Ascanofin man Cristo icoinra huaquin. Uhuunoashuri man Diospan facufoquin. Ascatan un maton upa cuscaracoin. Futsafoan Cristohuunoa mato tapimatirofia afocai maton upa cuscara itiroma. Urus fustifin un maton upa cuscaracoinquin.  
\v 16 Ascacun un mato yoi ua cuscara icahuun. Un Dios tanashara cuscan nanscarifi acahuun.  
\v 17 Ascacun un Timoteo matoqui nichicai. Un Timoteo Cristo icoinra huamaquin tau huani. Ascafin nan uhuun facu cuscaraquin. Un fasi ahuun noi. Nocon Ifo Jesús yonoa cuscacoiain. Un Jesucristo tanai cuscan Timoteon arifi mato tapimashquin man ointiaquimanonma. Nan icoinra huafo pushufoti anoafo un ato tapimai cuscan nannori Timoteo matori tapimai. 
\p  
\v 18 Mun tapia man atirifiton shinanquin isca huaa, —Pablonun Timoteo nocoqui nichi. Ascan afinmain nocoqui musuifin. Ascashufin afincoin nocoqui oamaran, —ishon man shinan. Manfofin curafiapaimisifoquin.  
\v 19 Anori man shinanfiaino uficoin samamashta un mato ari caicain. Diosin ua yonoaino un samamashta mato ari cai. Nan un nocoaitian un tapicashquin nan curafiapaimisifoan Jesús ahuun curushhuunshon yoiyamarain afincoinmain yoicanicai. Ipaitsi yoicanimainquin.  
\v 20 Diosin nocon Ifo icaino non tsain fustimansi ipaitsi yoitamarocon ahuun curushpan non isharatiro. 
\p  
\v 21 Ascashu un nocoaitian ahuun curushpan un matoqui nocoshquin. Ascashofin man ica cuscan huafain un tapitiroquin. Man chaca shatuyamacun Diosihuunshon un mato onaintimatiro. Asca maton chaca man shatucun un matohuun fasi noiquin un oi tsii huasharafain mato yoishquin. Ascan mafi catontiroquin ratocaimain un aquicai. Maton tsainhuunshon onaintimai iyamarai oi tsii huasharafain mato yoishquin. 
\c 5  
\s1 Jesús icoinra huafiacashon chaca huafo 
\p  
\v 1 Mun nicamisi mafi ranan man fasi chaca huaa tanancun. Apa ahuin ahua futsafia afu icacaini. Nanscara chacafocai nan icoinra huamafoan tsoa ascamisima.  
\v 2 ¡Ai timafin! Nan tapifiashu man curafiapaimisi. Nan nocofunun mato muranshon chaca huai ahuun rafipaitama, —Non sharacoinran, —man ica. ¿Ahuun rafitama man man tapifiashon nan nocofunun chaca huamisi ahuuscai matofu ichanainton man potamamun? 
\p  
\v 3-5 Un matofu iyamafiashon un mato fasi shinain. Un anoyamafiano nan nocofunu ahuusca huaimancai mun tapicoian. Un mato anoshon yoiquin isca huacuana, —Afanan ichanainfoanno Jesucristo ahuun shinanhuunshon na nocofunun apa ahuin ahua futsa fu imisi matomaquinoa potacahuun. Ascacucai afanan Diosin cushuima. Satanás a amapaiyai cuscan aashquin. Man asca huaiton Satanás nan nocofunu omitsiscamatiro. Ascashon omitsiscamaiton mui ahuun chaca shatupaitiro Jesusqui nasoshquin afanan omitsiscashquima. Ahuun chaca man shatuano ahuun yoshin Jesús fu ipatiroran, —ishon un matofu ishon un mato yoicuana. 
\p  
\v 6 Timafin man iscamisi, —Non shararan, —man ifiamisi mancai na nocofunun chaca huamisi mato murannoa man potataima. ¿Man tapiamamun fustiton maton muranshon chaca huaiton man shatumayamaino nanhuunoashu nantifi man chacai futsutiro?  
\v 7 Ascaiton mato anoshon nan nocofunun chaca huai potacahuun. Ascanofin afanan Jesusqui nasotiroquin tanasharacoinshquin. Cristo Upan Diosin ahuun chashoan cahuashara cuscara noco nashoni non afanan chaca huanonma a cuscara shara non inon. 
\p  
\v 8 Ascashon non chaca huapaoni cuscacai afanan non shinantama Cristo ahuun ointi cuscara shara non iishquin. Ahuun tsain shara non shinanon. Futsaqui afanan shinanchacayamafain tsoa afanan parayamafain tsain iconcoin fusti non yoinon. 
\p  
\v 9 Ascacun un matoqui cunui tsoa ahuun ahuinma fu icain ainfofo nanscarifiaifono aton funuma fu icaino afanan ascarafo fu rafuyamacahuun.  
\v 10 Jesús icoinra huamafohuunoacai un cunuima. Nanfofin Satanás aton ifoquin. Ascashocai aton chaca shatuafoma. Chaca futsa futsatapafo huamisifoquin. Ascashon aton ahuinma fu imisifo. Ainfofo nanscarifiaifoanno aton funuma furi imisifo mafo ichapa fusti fipaifain. Atonama fipaicoinmisifo yomutsofo non nan diosicoinmafofin, —Nocon diosiran, —icafoquin. Noncai atofu pashcanantiroma. Non icoinra huamafo fu pashcananpai nan maitio non cuyofotiro. Icoinra huamafoan acai cuscacai non ato futan atiroma. Ascafiacun non atofu imisiquin. 
\p  
\v 11 No futan icoinra huafohuunoa un mato cunushoni. Tsoan yoiquin isca huai, —Urifi matofu Jesucristo ahuun yoraran, —ishon anori yoifiatan ahuun ahuinma fu icaino ainfofori nanscarifiaifoanno aton funuma fu icaifoanno mafo ichapa fusti fuchipaifain atonama fipaimisifo icain diosicoinma tanapaifain yora futsa chaca huamisi icain paunmisi icain yomutso icain. Ascarafo fu rafuyamacahuun. —Un Jesús icoinra huairan, —ifiacatan ahuara chaca huariaifo fu rafuyamacahuun. 
\p  
\v 12-13 Nan icoinra huamafo non ato yonotiroma aton chaca shatunonfo. Ascarafocai Diospan yorama. Diosifin ato onaintimashquiquin. Ascafiaino Diosin noco yonoa nan icoinra huafo futsan chaca huacun non ato yoitiro aton chaca shatunonfo. Ascashon nan nocofunun mato muranshon chaca huamisicun yoicahuun afanan matofu ichananonma ahuun chaca shatucoiaintian matofu afanan ichanantiro. 
\c 6  
\s1 Jesús icoinra huaa futsan mato chaca huaiton nahua niaifo ano iyoyamacahuun 
\p  
\v 1 Ahuuscaimun mafi ranan fochishmanantananfiashon man shara huapaimacain. Mafi ranan shara huatanantama nan icoinra huamafoan aton niaifo ano man iyopai, —Noco shara huashononran, —ishon. ¡Ai timafin! Ascaracai sharama.  
\v 2 ¿Ascan man tapiamamun nonfin Diospan yorafoquin? ¿Ascashon a futan non nantifi yora manifoti chipo yoishquin ratofoanmain chaca huamisifoquin ascashon ato onaintimanon? ¿Ascan ahuuscain ichapama man fochishmanantananfiashon mafi ranan man shara huatanantiromamun? Man nanscasi amisi.  
\v 3 Man tapiamamun non Dios futan yoishquin ahuun oinmati afu nai muran icafomain chaca huafo iyamarai shara huafoquin. Non asca huainofin nuno mai anoafo fasi mimacai yoiquin finatiro ratofomain chacafo yafi sharafoquin. Nanscacufin non fochishmanantananshon nofin ranan non arotiroquin. 
\p  
\v 4 Ascacufin man fochishmanantanain cuscan mafiranan arosharacahuun. Ascacun ratoran futsafo catoncahuun a mato futan icoinra huama aquima. Nan mato futan icoinra huaa acahuun mato arosharashonon. Nan ahua yamafiacun man catontiro mato arosharashonon.  
\v 5 ¡Ohuashta! Un mato rafimapai man afanan ascanonma. ¿Manmun ratoran futsacai shinansharatiromamun a fochishmanantanainfo cuscan arosharashononfo?  
\v 6 Ascaquimarocon mafi ranan man fochishmanantananshon man shara huatananyamacun. Ascashu ranushumuafoan aton niaifoqui man chani. Nan ahuama ointsa man aa. Nan icoinra huamafoan aton ointaifi man Jesús ahuun yora futsa man chaca huaa. ¡Ai timafin! Nan fasi chacacoin. 
\p  
\v 7 Mafin ranan man yoiti huatananshu ranushumua niaifoqui man chaniano. Man ascaifin ato ointaifi man ato oinmana mafi ranan noinantama. Ascashofin man Jesús tanasharamaquin. Man funocoiafo. Nan Jesús icoinra huaa futsan mia chaca huacun ranushumua niaifoqui chaniyamacai man puusicama shara icuana. Jesús icoinra huaa futsan ahuara mato onunshon nasocasmaiton man ranushumua niaifoquin chaniyamacain man puusicama shara icuana. Futsan mia chaca huafiacun icoinra huamafoan ointaifi min ahua chaca oinmanama.  
\v 8 Man ascaquifin mafi ranan onunonanquin man chaca huaa. Ascan matofu Diospan yorafiacun man chaca huatanan. 
\p  
\v 9 Man tapiamamun a yora chaca huamisifo Diosin niaifo ari itirofoma. Mafiri paramuyamacahuun. Nan maton ahuinma fu man icaino ainfofori aton funuma fu icaifoanno diosiyamafiacun fuchipaifain nan nocofununri afu nocofunu futsa fu icaino nanscarifiai afu ainfo fu futsa fuchinanpaiquin chaca huatananashu ainfofosi afo ranan iquinainfo icain  
\v 10 yomutsofo icain aton nama fipaifain paunmisi icain roanmitsamisi icain yoiti huamitsamisi icain ahuun ahuara futsan fiatianshon futsa sutufain. Ascarafocai Dios icano noconacafoma.  
\v 11 Atirifi man ascafiapaonishacaquin natian Jesucristo yafi Upa Diosin ahuun Yoshin Sharahuunshon maton chaca soashona. Maton chaca soashonano a cuscara shara mato ima. Ascasho ahuun ointi cuscara shara mato ima. Chaca huamisifoma cuscara man inon. 
\s1 Mafiri chaca huamuyamacahuun 
\p  
\v 12 Ascan man yoiaraca isca huaquin, —Cristo uhuun Ifono un apaiyai cuscan un huatiroquin, —ishon man yoiai. Ai. Nannori. Ahuara sharafoti non huatirofiacun ahuara futsacai ua amatiroma nan un acai fusti un atiro. Uncai ahuara futsahuunoashu aton oinmati un ishquima.  
\v 13 Man futsan raca yoiquin isca huaa, —Diosin nocon shaqui onihuashoan non tushu pinon. Ascashon tushuri onihua nocon shaqui muran non huanon, —ishon yoimisifo. Iconfiashu non piyanhuanshuni itiroma. Chipo Diosin tushu yafi nocon shaquiri cuyoi. Icon Diosin noco onihuani non afu rafupacunon. Diosicai nocon ahuinma fu non inon ishoncai noco onihuanima. Ainfofori aton funuma fu inon ishoncai ato onihuanima. Ascatama Diosin nocon caya noco onihuashoni non afu rafupacunon. 
\p  
\v 14 Nocon Ifo Jesús man nafiacun Upan Diosin ahuun curushhuunshon funimani. Nanscarifi aquin ahuun curushhuunshon nocori funimashquin.  
\v 15 ¿Man tapiamamun non Cristo icoinra huashu non ahuun yoracoin? Non Jesús ahuun yora mumacoin cuscara. Ascano non ainfo furoma chotashu Cristocai afin aca shinantsan non huamatiro. Asca huapayamacahuun.  
\v 16 Diospan tsain cunuquin isca huani, —Nocofunu ainfo fu icaino nan rafu yora fusti cuscaracoin, —ishon cununi. ¿Man tapiamamun man ainfo furoma fu icaino afu yora fusti cuscara itiro? Fusti cuscaracoin.  
\v 17 Ascafiatan tsoan nocon Ifo fu rafuaino nan rafu fusti cuscara itiro. Diosin Yoshin Shara ahuun shinanpan ahuun nomuran nanumashquin. 
\p  
\v 18 Ascacufin maton ahuinma iyamaraiyainfofori maton funuma fu ipaiyamacahuun. Ascara shinanyamacahuun. Man ascapaiyamai ichoriscatacahuun asca huashquima. Maton ahuinma fu iyamarai maton funuma fu man icun nan chacapanfin. Maton nomuran fucashuni huafain matori omitsiscamatiro. Nan chaca futsafocai un yoiai cuscarama. Man ascashufin maton yora mumacoin caya yafi maton nomuran maficoin man chaca huamuaquin. 
\p  
\v 19 ¿Man tapiamamun Diospan Yoshin Shara no fu ica? Nocon cayafi ahuun pushu cuscaracoinquin. Nanno ica. Upa Diosin ahuun Yoshin Shara matoqui nichini. Nan pushu ifofin fusticoin. Nanscarifiai Diospan Yoshin Shara fusti maton Ifo. Mafincoincai man ifohuamutiroma. Manfin ahuunafoquin.  
\v 20 Jesucristo mato nashoni maton Ifo iishquin. Ascan manfin ahuunafoquin. Ascano Diosifin nocon Ifoquin. Ascashu nocon caya ahuunari. Nan mato yoiai cuscan acahuun. Maton cayahuunshon Diosin shara huamacahuun. Man ascaiton futsafoan oincaquifin, —Diosin shararan, —huatirofoquin. 
\c 7  
\s1 Ahuuscashumain funu fu ahuin isharatirofoquin 
\p  
\v 1-2 Man ua cunu fumaita ua yocashquin. Ascacun man ua yoca cuscan nanfohuunoa un mato yoisharapai man tapinon. Nocofunun ainfo fiyamashu shara ifiatiro chaicushosi ainfo fu ipaiquin chaca huatiro. Ascashufin nan nocofunuti ahuinyatiroquin. Ainfofori funuyatirofo. Nanscafin sharaquin. 
\p  
\v 3-4 Nocofunun ainfo fiainocai afanan ahuun caya ahuuna fustima. Ahuun caya ahuinnari itiro. Nanscarifiaiyainfon fununfiainocai afanan ahuun caya ahuuna fustima. Ahuun caya fununari itiro. Ascataricai ahuinin funu afu ipaiyaitocai funu ranintiroma. Nanscarifiai funu afu ipaiyaitocai ahuinin ranintiroma.  
\v 5 Raninonanyamacahuun. Ascashon man chipo shinanquin isca huatiro, —Natian non Upa Dios cufiyonon. Shafa ranan non iyoimacai. Chipo afanan non inon, —icashu man unuyotiro. Ascafiashon chai manariyamacahuun. Man ascariaino Satanás mato chaca huamatiroquin. Funu ainfo futsa fu ipaitiro. Nanscarifiai ahuin nocofunu futsa fu ipaiquin chaca huatiroquin. 
\p  
\v 6 Un mato, —Fianancahuun, —ishon un mato yoiama. Ascan man fiananpaifin man fianantiroquin.  
\v 7 Ascatan un shinanquin isca huaa. Nantifi nocofunufo ua cuscara ahuionmafo shara icuana. Diosihuunoashu un ahuionma isharatiro. Un shinanchacaima. Un unimatiro. Ascafia Diosin ua ima cuscacai atifi ato imama. Futsafoan Diosihuunshon ahuin fitiro. Futsafori ahuionmafiashu nan un icai cuscari unimatirofo. Non yopai cuscafin Diosin tapiaquin. Ascashon noco inantiro. 
\p  
\v 8 Ascatan natian un funuomafo non ahuionmafo yafi ainfofoan aton funufo atonmaqui namisifohuunoa un mato ahuara futsa yoipai man tapinon. Ua cuscara icafo shara icuana. Nocofunun afanan ainfo fiyamainocaiyainfoanri afanan funu fiyamashu shara icuana.  
\v 9 Ascafia man fasi fiananpaimancaiyainfoanri nocofunu fipai fianansharacahuun. Man ahuionmafiashu fasi ainfo fu man ipai ascaracai sharama. Man ahuinya shara icuana. Nanscarifiai man funuomafiashu fasi nocofunu fu ipai ascaracai sharama. Ascacufin man funuya shara icuanaquin. 
\p  
\v 10-11 Ascan natian un funuyafohuunoa yafi ahuinyafori un mato yoisharapai. Ufi un mato yonoima. Nocon Ifohuunshon un mato yonoi isca huaquin, —Ainfoancai funu unutiroma. Fununricai ahuin unutiroma. Ascashon funun unuano afanan futsa fu fianantiroma. Afanan funucoin aqui nasoano shara itiroran, —ishon un mato yoi. 
\p  
\v 12 Ascacun natian un mato yoisharapai. Nan na tsain un mato yoiaifocai Diosin ua yonoyamafiacun unfi cayacaficoin shinanfain un mato yoi. Asca man Jesús icoinra huaa futsacai maton ahuinin Jesús Ifo huataiyamafiashocai funu potapaima. Ascatan rahuinmafain funu noi. Nanscarifiai fununricai ahuin potatiroma.  
\v 13 Nanscarifiaiyainfoan Jesús Ifo huafiashocai funun Ifo huayamafiacun ahuin potapaiyamainocaiyainfoanri funu potatiroma. 
\p  
\v 14 Nocofunun icoinra huayamafiano ahuinin icoinra huashon ahuinhuunshon Diosin nan nocofunu shara huamatiro. Ascashon funun ahuin oinquiraca ahuunshon Jesús icoinra huatiro. Nanscarifiaiyainfoan icoinra huayamafiano funun icoinra huashon funuhuunshori Diosin nan ainfo shara huamatiro. Ahuinin funu oinquiraca a ahuunshon Jesús icoinra huamatiro. Ascan nan rafu ununainno aton facufoancai Jesús Ifo huaima. Ascafia nan rafu ununanyamaino aton facufoanri icoinra huatiro Diospan facu sharafo iishcaquin. 
\p  
\v 15 Ascashon nocofunun Jesús icoinra huayamacun ahuinin icoinra huashon unupaicoinquin unutiro. Capaicoinyaiton ato nitu huayamacahuun. Catanon. Man nitu huaino fucashni tapitiroquin. Nanscarifiaiyainfoan Jesús icoinra huayamacun funun icoinra huashon unupaicoinquin unutiro. Capaicoiainton nitu huayamacahuun. Catanon. Man nitu huaino fucashni tapitiro. Diosin noco catonni nocon nomuran ahuashtaton fucash huatamarocon nocon ointi noco imasharacointiro.  
\v 16 Ainfoan Jesús icoinra huacun ahuun funu man Jesushuunoa yoiaitocai tapitiroma fununmain icoinra huaicai. Nanscarifiai funun Jesús icoinra huacun ahuun ahuinin man Jesushuunoa yoiaitocai tapitiroma ahuininmain icoinra huaicai. Ascan mato potapaiyaiton inonquin ishon. Shinanchacayamacahuun. 
\p  
\v 17 Nan nocon Ifo Jesús mato yononi cuscan nanscasi acahuun. Jesús mato yonoaitian Upa Diosin mato catonni. Ascantari nan icoinra huafoti Dios fu tsainti pushurasi anoafo yafi maifoti nanscaracoin un ato yononi.  
\v 18 Isca huaquin. Israelifo Diosin ato yononi cuscacoin aton furonanfacufo foshqui rupa shatupacunifo. Ascatan furonanfacu yosishon Jesús Ifo huatan chipo shinanquin isca huaraca, —Natian un Jesús Ifo huaa. Nan fusti un yopai uhuun chaca ua soashonano un ahuun yora iishquin. ¡Ohua! Un foshqui rupa shatumuyama shara icuanaran, —ishon shinanyamacahuun. Asca mia foshqui rupa shatufiani nanscanonquin. Shinanchacayamacahuun. Ascatan man Jesús Ifo huaa man foshqui rupa shatumumisima. Ascashon shinanquin isca huayamacahuun, —Un Israelifo aton shunifoan ato yononi cuscan un yopai. Un foshqui rupa shatumutiro Moisés yononi cuscan un airan, —ishon anori shinanyamacahuun. Mancai ascara yopaima. 
\p  
\v 19 Man foshqui rupa shatumisi iyamarai man shatumisima nanscara rafufinquin. Man ascaitocai mato shara huamatiroma. Man asca huayamaricai mato chaca huamatiroma. Nan Israelifo imisi cuscacai man yopaima. Ascaquimarocon Diosin mato yononi cuscan aashu nan fusti man yopacoin. 
\p  
\v 20 Nan Diosin mato catoaintian man ini cuscan nanscasicoin acahuun.  
\v 21 Diosin mato catonnitian man futsan ahuun oinmati icashu shinanchacayamacahuun. Ascafiatan maton ifoan mato nichipaiyaino amaquinoashu fotacahuun afanan tsoan oinmati ishquima.  
\v 22 Man ratoran futsa Diosin mato catoaintian futsafoan aton oinmati man iquin. Ascafiashucai afanan Satanás maton ifo itiroma mato chaca huamashquin. Atiri mato catoaintian tsoan oinmaticai man imisima. Ascanfiashu natianfin man Jesús ahuun oinmati. 
\p  
\v 23 Upa Diosin Furun Jesucristo nichini noco nashonon noco Ifo iishquin. Ascashufin manfin ahuunaquin. Nan fusti maton Ifocoin. Nan fustiton mato cayacafi shinanmatiro. Ascacun futsafoan oinmati iyamacahuun mato yonononfoma. Jesús fusti tanacahuun maton Ifo inon.  
\v 24 Ascatan uhuun yoramishtichin Diosin mato catoanno ahuara man yonopaoni cuscan nanscasi acahuun. Upa Diosin mato futan aashquiquin. 
\p  
\v 25 Ascacun natian afanan ahuara futsan un mato yoipai. Ainfofo nocofunu fu imisifomahuunoa un mato yoi. Un mato yoiai cuscan nocon Ifoan ua yonoyamafiacun uhuun ramapaicain ua yononi cuscan un amisi. Ascashon un mato yoiai cuscan man icoinra huatiro.  
\v 26 Natian ahuara ahuuscaraqui noco omitsiscamai. Nanscacun man ahuionmafo ica shara icuana. Icoinra huamafoan noco omitsiscamatirofo.  
\v 27 Ascacun ahuinyacashon mato ahuin unuyamacahuun. Ascafiacatan ahuionmashon ainfo funayamacahuun fipaiquin. Nanscanon.  
\v 28 Ascafiacaiyainfo finquin man chaca huaima. Ainfofori funuya iyamafiamisishacaquin funuyainocai ahua chaca huaima. Ascafia man funuyafo yafi ahuinyafoan manfin fucashni tapiquin. Nan funuomafo yafi ahuionmafo ica finonmafain man ahuara futsa finoin. Nanscacun un mato yoisharapai man fucashni tapinonma. 
\p  
\v 29 Ascatari uhuun yoramishtichin un mato isca huaquin yoipai. Nocon Ifo Jesús otichaima. Nocon Ifo yonoshoqui non chai huaima. Nanscacun non nocon Ifo yonoshosharacoinpai. Ascacun maton ahuin shinanfiaquin Jesuscairocon fasi finonmafain shinancahuun. Nocon Ifo yonoshosharacahuun.  
\v 30 Ascatari ahuara futsafoan mato omitsiscamafiaiton nocon Ifo yonoshoquin unuyamacahuun. Omitsiscacaquima nanscasi unimacai nocon Ifo yonoshosharacahuun. Ahuara yopayamafiacaquin nocon Ifo cachiquiri huayamacahuun. Yonoshosharacahuun.  
\v 31 Nocon Ifo Jesús otichaima. Ascacun nuno mai anoshon yonosharafafaincahuun man yopai cuscan fiishcaquin. Ascashon mafo fustisi shinancaquima. Nocon Ifocairocon finonmafain shinancahuun. Nantifi mai anoafo icai cuscan cuyoshquin. Nanscacufin Jesús shinanquin non finatiroquin noco yonopaiyai cuscan ashquin.  
\v 32-35 Un mato anori yoi maton nomuran ahuaton fucash huanonma. Un mato ahuinyacain funuyayamacahuun huaima. Un mato cayacafi imapai nocon Ifo fusti finacoinquin man shinanfafainon. Ahuaton maton nomuran fucash huanonma. 
\p Un mato yoisharapai. Un mato yoi maton nomuran omitsiscamashquimaquian. Ascaquimarocon un mato shara huapai Dios fusti man yonoshosharanon. Man ahuara futsa shinanonma. Ascashon un mato yoia cuscan nocofunun ahuionmaton ahuun Ifo unimamapaishquin. Ascan nocofunun ahuinyashon ahuinri unimamapai. Nan ahuinin ahuara yopai cuscan huafain fununri nannoricoin shinantiro. Nanscarifi aquin ahuun Ifo fustitocai shinantiroma. Ascashofin ahuun Ifo unimamapaifain nantianri ahuinri unimamapai. Ascacun ainfo funuomaton ahuun Ifo Jesús fusti yonoshosharapai. Ahua futsacai shinainma. Ahuun Ifo fusti tanashquin. Diosin imapaiyai cuscan huafain nan fusti shinainquin. Ascan ainfon funuyashon ahuun funuri unimamapaiquin ahuara futsafori shinantiro ahuun Ifo fustisima. 
\p  
\v 36 Ascatan nocofunun ainfo fu iyamafiamisishaquin fasi afu ipaiquin. Ascashu afu fianantiro. Ascaquicai chaca huacanima.  
\v 37 Ascafia nocofunu futsan shinanquin isca huai, —Uhuun Ifo Jesús un yonoshosharapaiyai cuscan un ainfo fishon un huatiroma. Nanscacucai un ainfon fiimaran, —ishon anori shinanshara. Tsoancai curushcai ascahuu huama. Afincoin nannori shinansharashu ica.  
\v 38 Ascan nan ainfo tsoacai afu iyomisima nan nocofunu finquin shara huaa. Asca aquin nan ainfo fucai tsoa afu iyomisima nocofunu fiananyamafi nanscaquirocofin fasi shara huaquin ahuun Ifo Jesús yonoshoquin finacointiro. 
\p  
\v 39 Ascatan tsain futsari un mato yoi. Ahuun funu naamanocaiyainfoan funu unutiroma futsa fu fiananshquin. Ascashu funu naano futsa fu fuchinanpai afu fianantiro. Ascafiacun ainfoan Jesús Ifo huashon nocofunun a Ifo huacuma fitiroma.  
\v 40 Ascatari un shinanquin isca huaa. Funu naano afanan futsa fiyamano nanscarafin fasi sharacoin itiro. Un shinain cuscan huafain Diosin Yoshin Sharapan a nannoricoin mato yoi. 
\c 8  
\s1 Diosicoinma onihuacashon cufipaonifo. Nanscarafo yora ointsa iyamarai ahuara futsa cuscara ramihuacashon tushu inanpaonifo. Nanfohuunoa Pablon ato yosini 
\p  
\v 1 Ascatari tsain futsa mato yoinon. Nan nocofunufoan Diosimafiacun yora ointsa iyamarai ahuara futsa cuscara ramihuacashon, —Diosiran, —icashon tushu inanfo. Ascashon piyamaiton oinquin afanan nan tushu ficashon inanmitsamisifo. Ascacun natian un mato yosi nan tushu inanmitsafo non pitiroma iyamarai non pitiroquin. —Nantifi man non tapiaran, —ishon man yoimisi. Ascan nan man icoinra huaa futsafoan man yoiquin isca huamisi, —Unfi tapiaquin. Nan un shinain cuscafin un cayacafi shinainquin, —ishon shinancani. Ascarafo shinancanifin curanfiapaimisi itirofoquin. Ascara non shinancucai noco imasharatiroma. Ascaquimarocon non yorafohuun noishonfin non ato Jesús tanamasharacointiroquin a cuscara shara inonfo. 
\p  
\v 2 Ascan tsoan shinanquin isca huai, —Unfi ahuamamishti tapisharaquin, —ishon anori yoifiaquicai atirifi ahua tapiataima.  
\v 3 Asca tsoan Dios noicoincunfin nanscarifi aquin Diosin ahuunoa yoitiroquin isca huaquin, —Un na onancoian, Nanfin uhuun yoraquin, —ishon yoitiro. 
\p  
\v 4 Ascashofin non Dios noicoiainton noco tapimatiro nan ahuara futsa ramihuacashon tushu inanfo non pitiromainquin. Ascacun man non tapia ahuara futsan ramihuafocai ahuama. Acai Diosincoinma. Nan aafin ramihuafoancai ahua tapiama. Acai ointiya iyamacain ahuun maponricai ahua shinantiroma. Nanscarafocai Dios itiroma. Diosfin nan fustiquin.  
\v 5 Jesús icoinra huamafoan yoiquin isca huamisifo, —Dios ichaparasi. Nai murannoa yafi mai ano Dios ichaparan, —ishon yoimisifo.  
\v 6 Anori yoifiamisifocai anorima. Man non tapia nocon Upa Diosifin fustiquin. Futsa yamai. Nantonfin nantifi onihuani. Nocofori onihuani non ahuun facufo inon. Ascashu non Ifo fustiya. Jesucristo fusti. Futsa yamai. Ahuunshon nantifi onihuani. Ahuunoashu non nitiro. 
\p  
\v 7 Nan un mato yoiai cuscan atirifi yorafoan tapiafoma. Shinanfofin nan ahuarafo futsa ramihuafo niaquin. Niamafiacun nannori shinanfo. Nan facushtashon nicainifoannafo nan ahuara futsa ramihuafo nicun. Ascatan isca huaquin shinanfo, —Nan tushu ahuara futsafo ramihuashon inanfo. Ascacun un na tushu piatoraca un Diosicoin chaca huairan, —ishon shinantirofo. Ascatan pishon, —Un chaca huaran, —ishon afi aton nomuran shinanchacatirofo.  
\v 8 Anori shinanfiaifonocai non ahuara piatocai Diosimaqui noco imatiroma. Nan tushu ahuara futsafo ramihuacashon inanfo non piamatocai noco imasharatiroma. Ascatari non piatocai noco chaca huamatiroma. Nanscara rafu. 
\p  
\v 9-12 Ascafia oinfain. Man shinanquiraca isca huaa, —Unfin nantifi pitiroquin. Ahuara ramihuacashon Diosicoinma tushu inanpaiafo nanfori un pitiroquin. Un piquicai un Dios chaca huaima, —ishon man shinan. Man anori shinanfiaino Jesús icoinra huaa futsafoan anori tapiataima. Nan tushu min piaiton oincaquin mihuunri caocani. —Nantori Jesús icoinra huafiashon ahuara ramihuacashon tushu inanfo pitiro. Asca urifi un pitiroquin, —ishon shinantiro. Asca man tapifiashon man piaiton oinquin arifi man acai cuscan huaquin pishon nanscarifi huatiro. Ascan man pishonfin chipo ahuun nomuran shinantiro isca huaquin, —¡Ohua! Na tushu mun pishon uhuun Ifo Jesús chaca huaran, —ishon shinantiro. Ascashonfin ahuun nomuran afin shinanchacatiroquin. Man acaiton oinquin arifi aca. Ascacufin matohuun nuuaquin. Man man tapia ahuara ramihuacashon tushu inanfo nan pishocai man chaca huama. 
\p Ascano futsafoancai tapiafoma. Afoan shinanfin nan tushu pishon man chaca huatiroquin. Jesusri ahuunoashu nafianicun. Ascan matohuunshon shinanchacaquin. Man piamainocai arifi picuanama. Shinanchacacuanama. Man man tapian piquin man chaca huai shafain futsa arifi shinantiro pishon man ahuun noicoianma shinantsain. Ascan man na tushu piyama shara icuana. Pishon man futsa chaca huamatana. Man asca huaquin Cristorifi man chaca huamai.  
\v 13 Ascacufin un tushu futsa piquiraca un Jesús tanamisi futsa un chaca huamatiro uncai na cuscara tushu afanan pinacama futsa chaca huamashquima. Un aca cuscan huaquin un tsoa chaca huamashquima. Un futan Jesús tana futsa un ahuun noiquifin un ahuara chacashta shinanmapaima. 
\c 9  
\s1 Jesús fu rafumisifoan atirofo cuscan Pablonun ato yosini 
\p  
\v 1 Dios fustifin uhuun Ifoquin. Nan ua yonopaiyai cuscan un atiro. Tsoanricai aton shinanpan ua yonotiroma. Jesús ua catonni un afu rafumisi inon. Nocon Ifo Jesús oincoinfain nan ua yonoa cuscan un mato yoimisi man Jesucristo icoinra huanon. Ascacun nocon Ifo yonoshonahuunshon man icoinra huaa. 
\p  
\v 2-3 Futsafoan shinanquiraca isca huamisifo, —Diosincai Pablo nichinima Jesushuunshon noco tapimanon, —ishon anori raca shinanfo. Anori futsafoan shinanfiamisicuncai man anori shinanyamapainon. Uhuunshon man nocon Ifo icoinra huaa. Ascacun nantifiton tapitirofo Jesús ua catonni un afu rafunon. 
\p  
\v 4 Uhuun yoramishtichin shinancapon. Unrifi Jesús fu rafumisi. Ascan Jesús fu rafumisi futsafoanri amisifo cuscan urifi asca huapaiquifin un acuanaquin. Afoan Jesús icoinra huaa futsafo ato Jesushuunoa yosiaiton nicacaquin cashman ato pimamisifo.  
\v 5 Pedro non nocon Ifo Jesús ahuun chipocufo non atirifi Jesús fu rafumisi futsafoanri ainfo Jesús icoinra huafo fu fianancashon Jesushuunoa ato yoifoanfafainaifono aton ahuinfofori atofu foanscamisifo. ¿Nanfoan ainfo Jesús icoinra huafo fu fianan cuscariai urifi ainfo Jesús icoinra huaa fu un finantiromamun unfu cahuacacainon?  
\v 6 ¿Ascan ahuuscain Bernabé futan non mato yosifain nofin yonocain ahuun rafanan non yopai cuscan non fia? Ascan atirifoan mato yosiquicai ahua yono futsa acanima. Mato yosiaifoan man yopai cuscan ato inancoian. Ascafiacun non yopai cuscacai man noco cashman inanmisima. Nan non ahuara yopaitihuunshon non yonomisi fiishquin. 
\p  
\v 7 Un iscara mato tapimapai. Ranushumua futsacai cashman yonomisima. Ahuun caifo cushucufin nan yorafoan aton pushurasihuunoa pui niaifoan ato inanmisiquin. Nanscarifi aqui mau fanamisiton ahuun mau foaisharanon afin ahuun yono pitiroquin. Chashoanfo cushumisitori ahuun chashoanfoan shoma ayatiro. 
\p  
\v 8 Un mato yoiai cuscacai nocofunufoan aton tsain fustisima. Nannorifi Diospan tsain cununiquin.  
\v 9-10 Moisés Diospan tsain cunuquin isca huani, —Moipan tarati huayacuquin mato yonosharashotiro. Shuqui roro cuscara machi acuaino atiri ahuun chacafo fuutan potaino shuqui roro cuscara ahuun shaca nanno manitiro. Ascaiton maton moi runushuyamacahuun nanno tarati huayacuquin acafiri pinon, —ishon cununiquin. ¿Diospan nannori yoiaino moihuunoa fusti yoinimun? Ma. Nan yonoshonaifohuunoa yoifain nocohuunoari yoini. Ratoranfoan mau chituquin shinantiro isca huaquin, —Un chitutan un yopai cuscan fitiroran, —ishon shinantiro. 
\p  
\v 11 Nanscarifiai non mato Jesushuunoa cashman tapimafafainaiton copiquiri non yopai cuscan man noco cashman inantiroquin.  
\v 12 Futsafoan Jesushuunoa mato yosiaiton nicaquin nan yopaifo cuscan man ato inanmisi. Ascacun un mato tau huaquin yosimisi. Nanscacufin nococaifin finonmafain iconquin man noco inantiroquin. Man noco inantirofiacuncai non mato ahua yocamisima. Ahuarafoan noco ahuuscara huafiaino non tunucoinmisi man Jesushuunoa nicasharanon. Un mato yosiain rafanan un pui fiaitonraca ua afanan nicapaicanimaquin.  
\v 13 ¿Man tapiamamun nan Dios fu tsainti pushu muran tushu fuafo nan murannoa yonomisifoan nan tushu cashman pimisifo?  
\v 14 Nanscarifi aqui Diosin yononi isca huaquin, —Tsoan uhuun tsain shara futsafo yosiaiton nicaquin nan nicafoan ato pimatiroran, —ishon Diosin yononi. 
\p  
\v 15 Diosin ua yononi cuscan urifi mato ahuara yocapaiquin un mato yocacuanaquin. Nannori Diosin yononifiacun un mato ahuashta yocamisima. Mato Diosin tsain yoifafainfiaquin, —Un ato cunu fomai ua pui inanonforan, —ishoncai un shinanmisima. Ascarifi atacai tsoan yoiquin isca huatiroma, —Pablonun aton pui fianpaiquin ato Jesucristohuunoa yoimisiran, —ishoncai tsoan uhuunoa anori yoitiroma. Ascan tsoan uhuunoa anori yoiaino un naafin shara icuanaquin. Nanscacufin tsoanshtacai uhuunoa anori yoinacama. 
\p  
\v 16 —Un mato ahua yocatama Jesushuunoa yoimisishaqui un sharaquin, —ishoncai un yoitiroma. Diosin ua catoncun ua yononi un Jesushuunoa yoifafainon. Asca un Jesushuunoa yoifafainyamaiton Diosin ua onaintimatiro.  
\v 17 Un yoiquin isca huafiacun, —Upan Diosin, min Furunhuunoa un yoipairan, —ishon un yoicun Upa Diosin ua inantiroquin. Ascafiacai anorima. Diosifin afi ua catonquin tauhuashon ua yononi Jesushuunoa un yoinon. Nanscacufin nan ua yononi cuscan un aicai. 
\p  
\v 18 ¿Asca un Diosin tsain yoimisishomun ahua un fiiquin? Ato yoishocai un ahua ato yocamisima. Ascashoricai un ato yoimisima isca huaquin, —Diosin mato yonocun Jesushuunoa un mato yoifafainaiton un yopai cuscan ua inanforan, —ishoncai un yoimisima. Nonri yoipaiquin un yoisharacuana. Ascafiacai un anori yoipaima. Jesushuunoa yoiquin un tsoa ahua yocamisimashaquin un fasi unimai. Un Diosin tsain yoiquin ahua un mato yocashma un unimai. Ahuun rafananri Diosin fasi uqui unimacoin. Nanscarifi aqui ua unimamafafaini. 
\p  
\v 19 Uncai tsoa futsan oinmatima. Jesús fustifin uhuun Ifoquin. Uhuun Ifo futsa yamai. Ascafia nantifi yorafo un ato shara huapai ato Jesús icoinra huamashquin. Nanscacufin un nantifi yorafoan aton oinmati cuscaraquin.  
\v 20 Uhuun caifofo Israelifo ya un icashu nan icafo cuscan unrifi un ato cuscara ica afoan Jesús icoinra huanonfo. Nocon shuni Moisés nocon caifo yonopaoni cuscacai natian afanan yonotiromafia Moisés yonopaoni cuscan nicamisifo fu icashuri urifi ato futan Moisés yononi cuscain ato Jesús icoinra huamashquin. 
\p  
\v 21 Nanscarifiai nan Moisés yononi cuscan tanafoma fu un atofu icaino un ato cuscararifi un Moisés yononi cuscan aima ato Jesús icoinra huamashquin. Un nanscafiamisicun Criston ua yononi cuscain un nicasharafafaini. Nan fusticai un cachiquiri huatiroma.  
\v 22 Jesús icoinra huafo atirifi Jesús yononi cuscacai tsoan tapisharataicanima. —Non Jesús tanasharaino non na cuscarafo atiromaran, —ishon shinancani. Ascafiacucai Jesús noco anori yonoama. Un atofu icashu un ato cuscarari itiro. Jesús noco tapimana cuscan paratama un ato tapimashquin. Ascano ratoran futsafo fu un icashu un aton cuscarari itiro. Nanscashon un ratoran futsafoan uhuunshon Jesús icoinra huashu nipasharacani. 
\p  
\v 23 Un asca huaquinfin un ato Jesucristohuunoa tapimasharashquincai. Icoinra huaifono urifi un atofu finacai unimacointiro. 
\p  
\v 24-25 Man man tapiari nan pushcoaifo nannorasi ichofiacaquin fustiton shonontiro. Ascaifoanfin yorahuanrasiton ato oiainfono pushcohuaifo ichocani. Shonononanpaicani. Nan shonoanfin aqui unimaqui ahuara shara futsa niaifoan inanmisi. Ascacufin nantifi curushcai ichocaniquin futsafo shononpaicani. Tsoa ichoataima taui afi ranan ichoyofafainafo fuyahuashcaquin sumu ichosharashcaquin atsanashcaquima. Nanscarifi acaquin nocon Ifo Jesús curushcai yonoshosharacahuun. Ahuara chacafo huayamafain Diosin mato yonoama cuscan ayamacahuun Jesús tanaquin fuyahuashcaquin man aqui nocoaitian mato ahuara shara inanshquiquin. 
\p Ascatari nan ichoaifoan niaifoan ato inan cuscan cuyotiro. Asca Diosin noco ahuara inancai cuyopacunacama.  
\v 26 Ascacuncai un Jesús yonoshoni un cuparamuima. Un ipaitsi cashman yonoshonima. Pushcohuaifo ichocani shonononanpaicani cayacaficoin ichotirofo. Nanscarifiai un cayacafi ica. Uhuun Ifoan ua yonoa cuscacoiain aqui nocosharashquin.  
\v 27 Ufin un apaiyai cuscacai un aama. Uhuun Ifoan ua amapaiyai cuscan un aqui. Un tunupaifiaquin un tunuima Jesús tanasharashquin. Un atsanafiaquin un tunuima Jesushuunoa yoifafainquin. Jesús fustitofin ua yonotiroquin. Nanscacufin un futsafo yoifafainicai Jesús Ifo huashon yonosharashononfo. Ascafiashon Diosin ua yonoa cuscan un ayamai ufiri un funotiro. Un afanan Dios yonoshotiroma. Diosin afanan ua yonomatiroma. Un funopaima. Nanscacufin un apaiyai cuscan un aima. Uhuun Ifoan ua amapaiyai cuscan nan fustisi un aqui. 
\c 10  
\s1 Israelifoan Dios chaca huapaoni cuscan ayamacahuun 
\p  
\v 1 Uhuun yoramishtichin tapicahuun. Nocon shunifo Egipto anoashu fonifo. Ascatari Dios atoqui nai coinmahuan cuyama shara fotomapacufoanni tapinonfo atofu ica. Nantifi nocon caifo Israelifo nai coin cai cuscan acho fonifo. Diosin nan coinhuunshon ato iyopaiyaiquiri ato iyoni. Ian mahuanun ahuun anu Oshin ano nocotoshinifo. Ascashori nantifi nocon caifo Israelifo Diosin ato ian mahuan nushmancayan rafu ocuma rafu unufiano nan nushmancayan mai muto huatanaino ahuun pocufainifo.  
\v 2 Moisés ato rucun tanashoni. Nantifi nocon caifo Israelifo Moisés acho fonifo. Nan Moisés icoinra huacashon nantififain tanacoinnifo. Nantianri taui Moisés aton niaifoanno nantififain tanacoinnifo. 
\p  
\v 3-4 Ascatari Diosin nai muranshon ato tushu potashoni nantififain pinonfo. Nannoshori unu yamacoinyaino Moisés toquirininhuan ahuun poquitinin tsacaino unu tsosia sharacoin tohuashu furani nantififain ayanonfo. Ascano Cristo ahuun Yoshin Shara atofu caino ahuunshon ayanifo.  
\v 5 Asca huafiainfoanno Upa Diosicai atifiquicai unimanima. Ahuun tsain nicapaiyamaifoan. Ascashufin tsoan istaipama foanfafaincanisi nicayosmacani nai cuyonifoquin. Nan tsoan istaipama ato mai huaquin futsanifo. Diosin ato namaquin cuyoano. 
\p  
\v 6 Ascashofin nanfoan chaca fuchipaipaonifoquin. Ascacufin nanfohuunoa Diosin Yoshin Sharapan noco tapimaniquin chacafo fuchipaipaonifo cuscan norifi non ascaran fuchipainonma inifo cuscan omitsiscashquima.  
\v 7 Afoan chaca huapaoni cuscan huayamacahuun. Ascashon nanfoanri ahuara futsan ramihuacashon, —Nocon diosiran, —ishon yoipaonifo. Asca huacashon fuusi huashofain aqui pifain ayafain icashon ahuara futsan ramihuafoan ointaifi chaca huacaquin pauncain mononifo. 
\p  
\v 8 Ascan oinfain. Ato cuscara iyamacahuun. Atirifi aton ahuinma fu inifo. Nanscarifiaiyainfofori aton funumafo fu inifo. Ascaifoan oinquin Diosin veintitres mil ato namariscatani. Nan shafatan fusti ato namariscatani.  
\v 9 Aton cuscara chaca huayamacahuun. —Diosincai nocoqui funa sinatiroma. Ascan un chaca huafiacucai ua onaintimaimaran, —ishon anori shinanyamacahuun. Nocon shunifoan Dios chaca huariainfoan Diosin afanan tunuyamacaiquin ato onaintimani. Ascashori rono paupafo ato muran nichini nanfoan ato nasano atirifi nani. Ascacun ¡Oinfain! Man Dios chaca huariaiton afanan tunuyamacaiquin matori onaintimatiro.  
\v 10 Ascashon nanfoanri tsain chipuriaifoan Diosin nai oinmatinin atirifi ato namani. Ascacun oinfain marifi tsain chipuyamacahuun matori onaintimanonma. 
\p  
\v 11 Nan nocon shuni Israelifoan chaca huapaonifo cuscan noco cunushoni norifi non aton cuscara inonma omitsiscashquima. Natianri nocon Ifo Jesús oti chaima. Ascacun non itisharanoncahuun nocon Ifo nocoaitian non aton cuscara chaca inonma. 
\p  
\v 12 Asca tsoan shinanquin isca huai, —Uncai aton cuscara chaca huatiroma. Unfi cayacafi fusti itiroquin, —ishon anori shinainno oinfain. Marifi man Jesús tanasharayamaino aton cuscara chaca man itiroquin.  
\v 13 Satanás mato chaca huamapaiyai cuscacai marus fusti man mumisima. Man muai cuscari nantifi icoinra huafoan man mumisi. Ascafiacun Diosin mato yoimisi cuscan man icoinra huatiro. Matori cushusharatiro man chaca huanonma. Satanás mato chaca huamapaiyai cuscan Dioshuunshon mato atima huatiro man chaca huanonma. Ascashori Diosin mato tapimai ahuuscashomain man chaca huanonma. 
\p  
\v 14 Ascacufin uhuun yoramishtichin ahuara futsa ramihuacashon, —Noco diosiran, —icashon icoinra huaifono atomaquinoashu pashcafaintacahuun.  
\v 15 Man shinansharatiromainquin un mato yoiai cuscan shinancahuun. Un mato iconma yoiamaraquin iconcoin un mato yoicai.  
\v 16 Man man tapia non Diospan tsain nicashquin ichananmisitian nan non ayai cuscan non shinanmisi Jesús noco nashonicun. Nan cucho fustiquinoa non ayapacumisi. Nantifiton ayaquin non shinantiro Jesús noco nashocain ahuun imi foni non afu nipanon. 
\p Ascacun non yoitiro isca huaquin, —¡Aicho! Upa Diosin, min Furunmun noco nashoni non afu min facufo inonran, —ishon non yoitiro. Nanscarifi aqui misi torupacushon nofi ranan non uhuapamashta inanonanpacumisi Jesucristo ahuun caya nocohuunshon mastanifo non afu rafupacunaca shinanshquin.  
\v 17 Misi fusti torupacushon nantifiton pimisifo cuscan. Nanscarifiai Cristo fustifiano nantifi icoinra huaafo non ahuun yora fusti cuscara ishquin. 
\p  
\v 18 Ascashon nocon caifo Israelifohuunoa shinancahuun. Nanfoan aton inafo rutucashon Dios inanmisifo aton chaca soapaiquin. Aton ichananti pushu murannoa yonoshomisifoan nan nami pimisifo. Asca huacanifin nan fusti shinantsa acaniquin. Piyanan Dios cufimisifo.  
\v 19 Ascacun un mato yoi nan ahuara futsa ramihuafocai nancai ahuama. ¿Ascatari ahuara futsa ramihuacashon tushu inanfomun ato shara huamatiro?  
\v 20 Ma. Anorima. Jesús icoinra huamafoan Diosicoin inantamarocon ahuara futsa ramihuacashon tushu inanpaicaquifin yoshin chaca inanpaicaniquin. Nanscacucai un mato yoshin chaca ya imapaima. 
\p  
\v 21 Man nocon Ifo Jesús fu rafupaicain a yoshin chacafo fu man rafutiroma. Ascashuri nan rafu man ositiroma. Man Jesús icoinra huafo fu ichanancashon man ato futan ayafain Jesús noco nashoni cuscan shinanshquin. Man asca huatacai nantianri aa Jesús icoinra huamafo fu man ichanantiroma nan yoshin chacafo shinanshquinma.  
\v 22 Nocon Ifo Jesús fu rafupaifiatan non yoshin chaca fu rafupai non asca huaquinfin nocon Ifo Jesús non sinamatiroquin. Non asca huaiton noco onaintimatiro. ¿Asca nonmun Jesús curushcai finontiromun noco onaintimanonma? Ma. Anorima. Jesús noco onaintimaitian tsoan noco numatiroma. 
\s1 Jesús icoinra huafo non noicoianshu nan fustiton yonoa cuscan non atiro 
\p  
\v 23 Icon non Jesús icoinra huashon Diosin noco yononi cuscan nantifi non pitiroquin. Nantifi nami shara non pitiro. Nan tsain iconfiacun Jesús icoinra huaa futsafoan shinantiro isca huaquin, —Un na cuscara nami pitiromaran, —ishon shinaintonfin ato ointaificai nan cuscara nami non pitiroma ahuara chaca shinanshquima. Non nantifi yorafo Jesusquiri shinanmapai. Non ato shinanmashara fustipai.  
\v 24 Ascacun man apaiyai cuscan fusti shinanyamacahuun. Futsafohuunoari shinansharacahuun. Ato shara huafafaincahuun. 
\p  
\v 25 Ratoran futsan mato nami inanpaiyaiton man fitiro piishquin. —¿Rania min fiamun? —ishon yocayamacahuun maton nomuran shinanchacashquinma. Diosin tsain yoia isca huaquin, —Nantifi man pitiroquin, —ishon noco yoini.  
\v 26 Nocon Ifoan nantifi onihuani. Nantifiri ahuuna nan onihuaniti noco inanpai norifi non unimacai non aya inon. 
\p  
\v 27 Ascan Jesús icoinra huamaton mato pimapaiyaiton a futan picahuun. Ascashon isca huaquin yocayamacahuun, —¿Rania na nami min fiamun? Ahuara ramihuacashon, “Nocon diosiran,” ishon ato nami inanfo. ¿Nan cuscara nami mian pimapaimun? —ishon yocayamacahuun. Man yocayamaiton unimacai pinon. 
\p  
\v 28-29 Ascafiashon ratoran futsafoan mato yoiquin isca huai, —Un na nami mia pimai ahuara ramihuacashon inanqui tau huafo. Un chipo fiaran, —ishon mato yoiaiton nan nami piyamacahuun. Ascashon piquin isca huaquin aton nomuran shinantiro, —¡Ajaa! Na nocofunun Jesús icoinra huafiashon ahuara ramihuacashon aton diosin nan nami inanqui tau huafo man piaran. Asca nanton Jesús tanasharamaran, —ishon ahuun nomuran shinantiro. Marifi man pishonraca ahuun nomuran shinan, —Mun chaca huaran, —ishon. Manfin tapiaquin nanfo non pitiro. Ascan futsafoancai tapiataicanima. Afoan shinanraca ascaquin non chaca huatiro.  
\v 30 Man yoiquiraca isca huaa, —Un nantifi tushu pishon Dios, “¡Aichoran!” un huatiroquin. Un asca huacun ahuuscain futsan uhuunoa shinanchacatiromun, —ishon man shinanraca.  
\v 31 Un mato tapimasharanon. Ahuara man pifain ayafain man ahuarashta futsa huai cuscari acafiri futsafoan Diosihuunoa shinansharanonfo. 
\p  
\v 32 Ascacun man acai cuscan huaquin tsoa shinanchacamayamacahuun. Nocon caifo Israelifo iyamarai mani futsafo nantifi Jesucristo icoinra huafo ato shinanchacamayamacahuun matohuunshon nocon Ifohuunoa shinanchacanonfoma.  
\v 33 Nanscarifi aquin urifi nantifi yorafo un ato shara huashopai unimanonfo. Ascacuncai un apaiyai cuscan fusti un huaima. Futsafoan apaiaifo cuscan un ato huashopai Jesucristo man icoinra huacashon chaca shatucanashu afu ipanonfo. 
\c 11  
\p  
\v 1 Un Cristo tanai cuscan marifi ufutan tanacahuun. 
\s1 —Ichananshon non Diosquiri shinainno nocofunu yafi ainfomain ahuuscatirofoquin, —ishon Pablon ato yosini 
\p  
\v 2 Man ua shinanfafaimisicun. Un mato aicho huai. Un mato yosimisi cuscan huafain man nicafafaini.  
\v 3 Natian uhuun yoramishtichin un ahuara futsa mato shinanmapai man tapinon. Cristofin nantifi yorafoan nocon Ifoquin. Ascatari ainfofoan aton ifofin aton funufoquin. Ascan Cristo ahuun Ifofin Upa Diosiquin.  
\v 4 Ascashu man icoinra huafo ichananmisitian ratoran nocofunun Dios cufifain ahuun tsain yoipaiquin iquisi ahuun maiti pucatiro. Ascashon maton fuyamisi cuscan ismashcaquin Diosihuunoa shinansharaquin. Ascacun maiti mapacumutan ismatiro Cristo fusti ahuun Ifocun. Ahuun maiti mapacumuyamacun futsafoan oinquin shinantiro, —Natocai Cristo Ifo huapaima, —ishon shinantirofo. 
\p  
\v 5 Ascatari ainfoan Dios cufipai yamaraquin ahuun tsain yoipaiquin iquisi maiti nutatiro ismashquin nocofunu ahuun ifocun. Ascaqui maton fuyamisi cuscarari ismashcaquin aton funuhuunoa shinansharashcaquin. Ahuun maiti nutancasmaquicai funu ifoancoinnama cuscara itiro.  
\v 6 Nan ainfoan Dios cufipaiquin maiti nutancasmacun nocofunu cuscara marucumutiro. Ascafiashu ainfo marucumuashu rafipaitiro. Nan yorafoan oinquin yoitirofo isca huaquin, —Na ainfoan chaca huaran, —ishon yoitirofo. Ascacufin ainfoan Dios cufipaifain ahuun tsainri yoishquin maiti nutantiroquin. 
\p  
\v 7-9 Ascafiashu nocofunun Dios cufifain ahuun tsain yoishquin maiti nutantiroma. Diosin nocofunu onihuani a cuscara inon. Ascacun uhuun yoramishtichin non Dios nicacoianshu ahuun ointi cuscara shara non itiro. Nanscarifiaiyainfofoan aton funu nicacoincanashu Diosin ointi cuscara sharari itirofoquin. Diosifin nocofunu onihuaquin tauhuaniquin. Chipofin ainfo onihuaniquin. Nocofunuhuunoa Diosin ainfo onihuani. Ainfohuunoacai Diosin nocofunu onihuanima. Nocofunuhuunoa nan ainfo onihuani afu rafucain afu yonosharapacunon unimayanan. 
\p  
\v 10 Ascacun nocofunufoan ainfo iquintiro. Ainfofoanri aton funu nicacointirofo. Ascashu icoinra huafo ichanainno ainfoan ahuun maiti nutatiro ahuun funu nicacoinshon ismashquin. Man asca huaiton Diosin oinmati afu nai muran icafoan oinquin yoitiro isca huaquin, —Diosin yononi cuscan nan na ainfoan ahuun funu nicashara. Nanfin sharacoinquin, —ishon yoitirofo. 
\p  
\v 11 Ascashon Diosin noco onihuani ainfofo yafi nocofunufo yopanonanonfo.  
\v 12 Diosin tau huaquin nocofunun ahuun anu Adán onihuani. Ascashon ahuunoari ainfoan ahuun anu Eva onihuani. Ascatannaino ahuunoashu nocofunufo yafi ainfofo cainpacumisiquin. Ascafia nan ainfofo yafi nocofunufori nantifi Diosin onihuani. 
\p  
\v 13 Nanscacun mafin shinancapon iconmainquin. ¿Ainfoan matofu ichananquin Dios cufipaiquin maiti nutashoma Dios cufia ascara sharamun? Ma. Ascaracai sharama. Man ascaquicai ato ifo nocofunufo oinmapaicanima.  
\v 14 Man man tapiari nocofunufo aton fo fasi chai huaa chaca itiro. Nannori nantififain non shinanmisi. Nanscaifin rafipaitiroquin.  
\v 15 Ascatama ainfofoan aton fo chai huafin maiti sharashta ointsa itiroquin.  
\v 16 Un na mato yoiai cuscafin ratoran icoinra huaa futsa ua fochishmapaiyaitocai un ahua futsa yoipaima. Ascashocai non ahua futsa yosimisima. Nan un mato yoimisi cuscari Jesús icoinra huaa futsafo afi ranan ichanancashon nanfori nannori fusti yoimisifoquin. 
\s1 Nocon Ifoan noco nashonihuunoa shinain ichanancashon nantianri Corinto anoafoan ahuarafo chaca huaifo cuscan Pablonun ato yosini afanan ascanonfoma 
\p  
\v 17 Ascashon ahuara futsari un mato yoipai. Un nica man atirifi ichanansharama. Ascatamarocon man fasi chaca huai.  
\v 18 Futsafo mato anoashu uqui fucashon ua yoiafo nan man ichanainticai man futsa chaima man tsaopaitiroma. Man ichananshon nocon Ifo Jesús mato nashoni shinanpaifiain mafi ranan man noinancasmatanain. Ascacufin un matohuunoa nicai cuscan un shinan atirifiracafin iconquin. 
\p  
\v 19 Man shinanraca, —Nan man fochishmanantananquin man tapitiro ratofoanmain cayacafi shinancanicai, —ishon man shinan. ¡Ohuashta! Anorima. Man fasi amaquiricoin shinan.  
\v 20 Man ichananshoncai Jesús mato nashoni man shinainma. Nan shinantamarocon man pifain ayafain nan fusti man shinain.  
\v 21 Un nica man ichananshon pifiaquincai a tushuomafori man pashcashomisima. Ato pashcashotama mafi ranancairocon ayafain ahuun man paunmisifo. ¡Ai timafin! Ascafin fasi chacaquin.  
\v 22 Pipaiquin ichananti ano man cataima iquisi maton pushu anoshon piyocahuun. Ascatamarocon Dios fu ichananti pushu ano oshon man ichapa pifafainmisi. Tushuomafo man rafimaiquin. ¡Ai timafin! ¿Unmun matohuunoa yoisharaiquin? Ma. Uncai matohuunoa yoisharatiroma. Nan mato futan icoinra huaa futsafo man chaca huacun. Ascaracai sharamafinquin. 
\s1 Jesús noco nashoni cuscan pifain ayaquin non shinantiro 
\p  
\v 23-24 Ascatari nocon Ifo Jesús afincoin ua yoini cuscan un afanan mato yoinon. Ua tapimani cuscari un mato tapimai. Nocon Ifon Jesús Judaspan ato achimanataima afu rafumisifo fu ichananni. Ascashon ato futan piquin. Misi finifoantan Apa Diosin yoini isca huaquin, —Upa Diosin min fasi sharacoin. Mirifi min nantifi tapicoian. ¡Aichoran! —huatan misi torupacushon atoti inanni. —Naafin uhuun caya cuscaracoinquin. Unfin matohuunoashu chipo naicain. Nan man ichanaintian man misi piaiti ua shinanfafaicahuun, —ato huatan. 
\p  
\v 25 Ascashon piyaifoan afanan cuchori finifoantan ato ayamapacuquin yoini, —Na ayatihuunoa ahuara funa shara un mato yoiquin isca huai. Uhuun imi foyanan un matohuunoashu nai man ufu Upa Dios ari ipanon. Nan na non acai cuscan chipo nan man ichanainti ua shinanfafaicahuun, —ishon ato yoini.  
\v 26 Ascashori man ichanancashon Jesús mato nashoni cuscan shinancahuun. Misi pifain ayafain huacashon nanscasi huacaquin, —Nocon Ifoan noco nashoniran, —ishon shinanfafaicahuun. Nan Jesús afanan oaitian nanscasi huafafaincahuun. 
\s1 Ahuuscashomain Jesushuunoa nani cuscan shinantaqui non pitiroquin 
\p  
\v 27 Ascacufin nan man ichanain anoshon misi pifain ayaiti ayafiaquicai maton chaca shatucasmafain manri chaca huaa. Nocon Ifoan noco nashoni ahuun caya fasi omitsiscacain imi foyanan noco nashoni. Nanscarafo man tapifiashocai nocon Ifohuunoa shinantamarocon chaca huaquin man afanan nocon Ifo omitsiscamai.  
\v 28-32 Ratoranfoan misi pifain ayafain nocon Ifo omitsiscacain ato nashoni cuscan shinanyamaifoan Upa Diosin ato onaintimashquin. Atirifoan nan na un yoia cuscan asca huacani. 
\p Ascashufin nanfo iramannashtafo atirifi isinin icain atirifi onihuanifotifain. Nanscacun man ichanaintian oinfain. Misi pifain man ayataimari ahuara chaca huashon iquisi Upa Dios yoiyocahuun maton chaca soashonon mato onaintimanonma. Jesús icoinra huamafo Diosin ato onaintimai cuscacai noco onaintimaima. Afocai ahuun facufoma. Ascacun nanfo ato omitsiscapanacafo muran potashquin. Ascan nonfin ahuun facufoquin. Nocon Ifoan noco oinmafiaquicai noco omitsiscapanacafo muran potatamarocon noco tapimashquin non afanan chaca huanonma. Nanscacufin man ichanaintian Jesús noco nashoni shinanshquin pifain man ayataimari iquisi maton nomuran shinancahuun manmain chaca man fomaincai. Ahuara chaca huashon shinanquin Upa Dios yoiyocahuun maton chaca mato soashonon. Ascashofin man pifain ayatiro Jesushuunoa shinansharashcaquin. 
\p  
\v 33 Ascacufin uhuun yoramishtichin man ichananshon Jesús noco nashonihuunoa shinancaquin oinyocaquin atirifi icafofiacun. Ascashon misi torumishti yafi aqui ayaquin man shinantiro Jesús noco nashonihuunoa.  
\v 34 Ratoran futsa man fonainquin iquisi maton pushu anoshon ichananshoma man piyotiro. Man ascaitocai Diosin mato onaintimaima. Ascacun un matoqui nocoshon ahuara man fucashniaiton un mato shara huashoshquin. 
\c 12  
\s1 Diosin Yoshin Sharapan icoinra huafoti ato amatiro ahuunshon icoinra huaafo futsafo shara huanonfo 
\p  
\v 1 Uhuun yoramishtichin natian ahuara futsa un afanan mato yoisharapai. Nan non ahuarafo Diosin Yoshin Sharahuunshon non atirohuunoa un mato tapimai. Nanfohuunoa iconcoin man tapinon.  
\v 2 Man manfin tapiaquin Jesús man icoinra huataima ahuarafo rami huashon man icoinra huapaoni. Ascafia afoancai ahua shinantiroma. Ascashocai ahuashta mato yoitiroma. Nanscaquin nanfohuunoa man amaquiri shinanpaoni. 
\p  
\v 3 Ascatan futsafo matoqui nocoshon yoishquin isca huaquin, —Un mato Diosin tsain yoi oaran, —ishon mato yoiquin. ¿Ahuuscashomun man tapitiroquin Diospan Yoshin Sharahuunshon mato yoiyamaraquin afin shinanfain mato yoiaiton? Nanscacun un mato tapimai ahuuscashomain man tapitiroquin. Tsoan Jesusqui tsain chaca huafin acai Diospan Yoshin Sharahuunoashu tsainquima. Ascashon, —Jesusfin uhuun Ifoquin, —ishoncai tsoanshta afin yoitiroma Diosin ahuun Yoshin Shara fustihuunshon yoitiro. 
\p  
\v 4 Upa Diosin nan icoinra huafoti ahuun Yoshin Sharapan ato amapaiyai cuscan huaquin futsa futsa huashon arusu fusti noco shinanmatiro non ahuunshon icoinra huaafo futsafo shara huanon.  
\v 5 Ahuunshon futsa futsa huaquin afiaquin nocon Ifo fusti non ashotiro.  
\v 6 Ascano Diosin nan icoinra huafoti nocon ointi muran futsa futsa huaquin noco tapimai ahuunshon non ahuara ashonon. Ascatan nan Diosin fustiton nantifi nocon nomuran noco tapimafafaini non a cuscara inon. 
\p  
\v 7 Ascano Diosin Yoshin Sharapan ahuun yono ismatiro isca huaquin. Icoinra huafoti ato amatiro futsafo shara huanonfo.  
\v 8 Futsan Diospan Yoshin Sharahuunshon tsain fasi cayacafi shara noco yoiaino futsanri Diospan Yoshin Sharahuunshon Diosihuunoa noco yoisharaino.  
\v 9 Futsanri Diospan Yoshin Sharahuunshon finonmacaifain icoinra huaquin finacoiyainno. Futsanri Diospan Yoshin Shara fustihuunshon yorafo caya huamaino.  
\v 10 Futsanri Diospan Yoshin Shara fustihuunshon tsoan atiroma cuscan atiro. Futsanri Diospan Yoshin Shara fustihuunshon nan Diosin yoiai cuscan noco yoiaino. Futsanri Diospan Yoshin Shara fustihuunshon tapitiro futsamain noco Diospan Yoshin Sharahuunshon yoiyamaraquimain yoshin chacahuunshon noco yoicain. Futsanri Diospan Yoshin Sharahuunshon nan tsain futsanman yoifain nan tsain futsaman yoiai cuscan huafain futsan nicayoyamafiamisishaqui Diospan Yoshin Sharahuunshon nan tsain yoia cuscari noco tapimatiro.  
\v 11 Nanfofin Diosin Yoshin Sharapan ahuun yonoquin. Nan icoinra huafotifin Diosin Yoshin Sharapan ato amapaiyai cuscan acaniquin. Naantofin nan noco amapaiyai cuscan noco huamatiroquin. 
\s1 Nonfin nocon caya fusti cuscaraquin 
\p  
\v 12 Nocon caya fustifiano non pashcoi futsua. Nanscarifiai Cristo fustifiano nonfin ahuun yora ichapaquin.  
\v 13 Cristo fustifiano nonfin nantifi ahuun caya cuscarafoquin. Atirifi non Israelifo non mani futsafori non nocofunufoan aton oinmatifo non atirifi nocofunufoan tsoa aton ifoma icaino. Nan non Cristo icoinra huafoti Diosin Yoshin Sharapan nocon ointi noco fianananhuano Cristo ahuun yorafo non itiroquin. Non ahuun caya cuscara. Ascafia Diosin Yoshin Sharahuunshon nan icoinra huafoti ahuun cayacoin cuscara noco ima. 
\p  
\v 14 Nocon caya fustifiano non pashcoi futsua.  
\v 15 Ascatari nocon tauncai yoiqui isca huai, —Uncai mucuma. Ascan uncai cayan pashcoi futsutiroma, —anori yoifiaino nocon cayahuu nuua.  
\v 16 Ascataricai nocon pafinquinin yoiquin isca huai, —Uncai furoma. Ascan uncai cayan pashcoi futsutiroma, —ishon yoifiai nanri nocon cayahuu nua.  
\v 17 Nocon cayahuu furo fustiacumun ahuuscashon non nicacuanaquin. Nanscarifiai nocon cayahuu pafiqui fustiacumun non ahuuscashon shutucuanaquin.  
\v 18 Ascafiacai Diosin noco ascara onihuanima. Nanfin apaiyai cuscan noco onihuaniquin. Ascashon nan noco tuchipaiyaino nocon cayahuu noco tuchiqui futsani.  
\v 19 Nocon caya ahuara fusti ya icainocai shara icuanama.  
\v 20 Nan iconcoin. Nocon caya fustifiano non pashcoi futsuaquin. 
\p  
\v 21 Ascan furoncai mucu isca huatiroma, —Uncai mia yopaima, —ishon yoitiroma. Maponricai tau isca huatiroma, —Uncai mia yopaima, —ishoncai yoitiroma. Ascan isca huaquin shinanyamacahuun, —Un mia yopaimaran, —ishon futsa yoiyamacahuun. Diosifin nan icoinra huafoti noco noicoinquin. Nanscarifiai nofi ranan non noinanoncahuun.  
\v 22 Nocon caya pashcoi futsuafo mutsisipamafiashu nanfori non fasi yopacoin.  
\v 23 Nan raniran futsan non pashcoashta nan non musu huatiro futsafoan oinonfoma. Nanfori non ihuasharatiro rafishquima. 
\p  
\v 24 Diosin nocon caya noco onihua cuscan huafain fasi non cushushara. Ascashon non yoitiro isca huaquin, —Un na yopacoinran, —ishon. Nanscarifi aqui ratoran Diosin yorafofiacun nacai ahuamaran huafiafo nancaifin Diosin ahuun fasi noiquin. Ascacun atohuunoa non yoisharafain non ato yopacoin.  
\v 25 —Diosifin noco onihuaniquin nan icoinra huafoti nantifi non yopanonancoinran, —ishon shinanonfo. Ascacun nantifi non cushunonansharatiroquin isharashquin. Nannorisi shinanshquin. Nantifi cushunonansharacani.  
\v 26 Nofiri raniran non moshaqui chachishon non mutiro nantifi nocon caya non omitsiscai nanhuun non isincointiro. Nanscarifiai Jesús icoinra huaa futsa omitsiscaiton nantifi nan non icoinra huafoan ahuunshon non mutiro afu omitsiscai shinantsa. Nanscarifiai Jesús icoinra huaa futsan futsafori shara huacun non nantifi afu icoinra huafori non afu unimacointiro. 
\p  
\v 27 Ascashufi non Cristo ahuun caya cuscaracoinquin. Nantifi non ahuun caya pashcoi futsua cuscarari. Nantifi non Diosin yoracoinfo.  
\v 28 Ascan nantifi nan Jesús icoinra huafoti Upan Diosin noco catonni ahuunshon ahuara futsa futsa huaquin non ashonon. Cristo nuno mai ano niyoatian futsafo catonni afu rafunonfo. Ascashori ato nichini ahuun tsain ato yosifoanfafainonfo. Cristo afu rafumisifo catonquin tau huani. Ascashon chipo Diosin tsain yoimisifo catonfain Diosin tsain tapimamisifo catonfain tsoan oinyomisima cuscara ahuunshon atirofo catonfain Jesushuunshon isinincaifori cayahuamafain futsafo ashofafainmisifo catonfain futsafo yonosharamatirofori catonfain futsafoan nan tsain futsaman ahuun Yoshin Sharahuunshon yoitirofo nanfori Diosin ato catonni. Nantifi catoan ahuunshon yorafo ashonsharanonfo. 
\p  
\v 29 Diosincai atifi noco yonoama non ascarasi huanon. Nantificai yonoama ahuun tsain yoifoanfafainnonfo. Ascashoricai nantifi yonoama tsoan oinyomisima cuscara ahuunshon atirofo.  
\v 30 Nantificai yonoama Jesushuunshon isinincaifo cayahuamanonfo. Nantificai yonoama nan tsain futsaman ahuun Yoshin Sharahuunshon yoinon. Nantificai yonoama nan tsain futsaman noco tapimanonfo.  
\v 31 Ascacun Diosin mato imapaiyai cuscan huafain nan icoinra huaa futsafo man shara huafafainon. Diosin Yoshin Sharapan noco amapaiyai cuscan nanfo fuchipaicahuun. Ascan nanfo sharafia un ahuara fasi shara finacaia natian un mato yoinon. Ua nicasharacahuun fasi shara finacaia Diosin noco imapaiyai cuscan huafain un mato tapimanon. 
\c 13  
\s1 Non Diosinhuunshon futsafo noiafin nancai shara finacaiaquin 
\p  
\v 1 Un mani futsafoan tsainman yoifain Diospan oinmati afu nai muran icafoan yoia huaquin un yoifiatiro Diosihuunshon un futsafo noiamashucai un ahuama. Ascashu uhuun tsain achacoin nicatsa itiro. Futsafo fucashni huai cuscara itiro.  
\v 2 Diosin futsafo yoipaiyai cuscan un tapicoinshon yorafoan ahuara tapipaifiaquicai tsoan tapiamaifoan un tapishon un fasi Dios icoinra huaquin finacoian un na machi shucucaitahuun un huaino shucucaitiro un asca huafiashocai un futsafo noiyamainocai nancai uhuuna ahuama.  
\v 3 Nantifi un aya cuscan un ahuuomafo un inancoinfiaquicai un nan futsafo noiamashu nancai uhuuna ahuama. Un Diospan tsain shara yoiaiton nanscacun nicacasmacaquin ua coaifoanno un naafiashucai un futsafo noiyamashu nancai uhuuna ahuama. Un ipaitsi natiro. 
\p  
\v 4 Non futsafohuun noicoincai non funatiroma. Non ahuun ramapaitiro. Ascatan futsafohuun non noiricai non futsafo shutiacufoanpaitiashu non sinamisi iyamacain cacapaimisi iyamacain nonricai curafiapaimisi itiroma.  
\v 5 Non futsafohuun noicoinquiricai futsafoan ahuara huapaifiaiton non ato shutiacufoantiroma. Ascaquicai non ato rafimapaima. Ascashoricai nofin apaiyai cuscan fusti non shinantiroma. Fushnuicamitsamisi iyamacain futsan noco chaca huafiacun non shinanfafaitiroma. Afo shinantamarocon rahuinmafain non ahuun noitiro.  
\v 6 Non futsafohuun noicai ahuara chaca oin non unimatiroma. Ahuara icon shara nicai non unimacointiro.  
\v 7 Ascatan ahuara ahuuscarafiaino Dios noiquicai nocon nomuran non shinanchacatiroma. Ascashon non tunucointiro. Futsahuun noicoinquicai ahuunoa ahuara chaca nicafiaquin non icoinra huatiroma. Futsafohuunoa chaca nicafiashon non tapiyoshomacai non icoinra huayotiroma. —Ascayamapainonran, —ishon non shinantiro ahuun noiquin. Non Diosin noicoinquicai ahuara ahuuscara afiaiton non tunucointiro. 
\p  
\v 8 Noinain unupacunacama. Ascafianocai Diosin tsain yoimisifoancai ratoran shafatan afanan tsoan yoishcanima. Ascashori tsoancain ascara tsain nicayomisima afanan yoipacunacama. Tapimamisifoanri afanan noco tapimapacunacama. Nanfocai nocon Ifo oaitian non afanan yopashquima.  
\v 9 Ascacun natian Diosin noco tapimapaiyai cuscacai atirifi non tapisharataima. Diosin tsain noco yoimisifoan tapiafo cuscan noco tapimasharafiatirocai atirifi tapiafoma.  
\v 10 Ascaino Jesucristo nocoaitian non a cuscara shara iishquin. Afifin nantifi tapiaquin. Afin tapia cuscan nocori tapimashquin. Ascano ahuara futsa futsa huaquin Diospan yorafoan noco ashomisi cuscan non afanan yopapacunacama. Man nanfo cuyoshquin. 
\p  
\v 11 Ascano un facuashu uhuun tsain facu tsain cuscara iyopaoni. Facufoan mutiro cuscan unrifi un muyopaoni. Facufoan shinantiro cuscan unrifi un shinanyopaoni. Ascafia un yosinishaquin facufoan shinantirofo cuscan un afanan shinainma. Facufoan ichapama tapia. Ascan un nocofunuaitian facufo itiro cuscan un afanan aama. Natian nocofunufoan shinain cuscan un aaqui. Facufo itiro cuscan mun cachiquiri huacoinna.  
\v 12 Fuisiti matacoiannocai nocon fuso cuscaracoin non ointiroma. Nanscarifiai natian Jesús icai cuscacoincai non onancoiantaima. Chipo aqui nocoshon ahuun fusocoin non oincointiro. Nantiantari aficoinmain ua onancoiaintofin urifi un onancoinyaino. 
\p  
\v 13 Ascashon non Dios icoinra huai cuscacai cuyopacunacama. A icoinra huashucai non amaqui ipanacama. Nanricai cuyopacunacama. Nan rafu sharacoinfia Dioshuunshon non futsafo noicoiainno nancaifin shara finacaiaquin. Nanricai cuyopacunacama. 
\c 14  
\s1 Diosin Yoshin Sharapan noco yonopaiyai cuscan Pablonun yoini 
\p  
\v 1 Ascan Diosin noco noiai cuscan huafairi futsafohuun noifafaincahuun. Nancairocon fuchipaicahuun ascashcaquin. Ascashon Diosin Yoshin Sharapan futsa futsa huaquin mato yonopaiyai cuscan nanfori fuchipaicahuun. Diospan Yoshin Sharahuunshon nan Diosin yoia cuscan fasi fuchipaicahuun icoinra huaa futsafo yoishcaquin.  
\v 2 Ascatan futsan tsain futsaman yoiaitocai nicatirofoma. Dios fustitofin nicatiroquin. Diosin Yoshin Sharahuunshon yoifiaitocai tsoa futsan nicatiroma.  
\v 3 Ascashon tsoan Diosihuunshon ahuun tsain shara yoiquin noco tapimasharashon Jesús cuscara noco imafain nocon ointiri noco shara huashotiro ahuuscarafiaquin nocon ointi non unimacointiro.  
\v 4 Ratoranfoan tsain futsaman yoiquin afiri nicamutiro Diosin imapaiyai cuscan aquin. Ascafia nan ratoran futsan Diosihuunshon ahuun tsain yoiaiton nantifi Jesús icoinra huafoan nicatirofo Diosin noco yoipaiyai cuscan nicasharashu Jesús cuscara shara itirofo.  
\v 5 Manmain nantifiton nan tsain futsaman Diospan Yoshin Sharahuunshon man yoipainon. Nanscara sharafiashu tsoan Diosin tsain mato tapimasharai nancaifin fasi shara finacaiaquin. Nantifimain man ascapainon. Ratoran futsa nan tsain futsaman yoiaiton. Ascashon ichananshon futsan maton tsain futsanman yoifiaitocai man nicatiroma futsan mato yoiyamaiton. Acai ahuama. Ascafiaiton yoia cuscan futsan tapimaino nantifi unimatirofo. Diosihuunoa shinancani. 
\p  
\v 6 Ascacun uhuun yoramishtichin un matoqui nocoshon tsain futsaman un mato yoiai cuscan man nicayamacai acai matona ahua itiroma. Ascacun Diosihuunshon un mato tsaincoinman un mato yoi Diosin mato yoipaiyai cuscan man nicanon. Maton tsainman un mato tapimanaiton man nicacointiro. Ascashon Diosin mato imapaiyai cuscan man tapitiro.  
\v 7 Un iscara mato tapimai. Manuti amaquiri manuaiton non nicasharatiroma ratocaimain shafacafi manuicai.  
\v 8 Ranushumua futsan aton cushumisiton ahuun manuti manutiro ato chani huaqui afu ranushumua futsafo itisharanonfo ato noicasmaifoan ato rutunonfoma. Ascafia manuti cayacafi manuyamaiton tsoancai tapitiroma itisharashcaquin ato rutunonfoma.  
\v 9 ¿Nanscarifi aqui nan tsain futsaman man futsafo yoiaino ahuuscashotsi man yoiai cuscan tapitirofo? Man ascara tsain yoiqui ipaitsi man ato yoi.  
\v 10 Icon nan maitio tsain futsa futsatapafo. Nantifi tsain shara. Ascafia nan aton caifoansi aton tsain nicacatiro.  
\v 11 Ascan uhuun caifoan ua tsain futsaman yoiaitocai un tapitiroma. Nan uhuun caifoma cuscaracoin itiro. Un ahuun tsain nicayamaino un ahuun caifoma cuscaracoin itiro.  
\v 12 Ascacun Diosin Yoshin Sharahuunshon man futsa futsa huaquin mato yonopaiyai cuscan nanfo man fasi fuchipai. Man fuchipaiyaifo nan man Diosin Yoshin Sharahuunshon icoinra huafo aton ointi fupi huamatiro Jesús fasi tanasharanonfo. Nan cuscarafo fasi fuchipaicahuun Dios yonosharashoshcaquin. 
\p  
\v 13 Ascacufin nan tsain futsaman yoiquin Upa Dios cufihuun man yoiai cuscan mafiri tapifain ichananfori ato tapimashquin shafacafi nicasharanonfo.  
\v 14 Ascashon un Upa Dios cufinquin ahuun Yoshin Sharahuunshon nan tsain futsaman uhuun nomuran cufifiaquicai un cufia cuscan un tapitiroma. 
\p  
\v 15 ¿Ascacun unmun ahuuscaicain? Un isca huai. Un tsain futsaman Diospan Yoshin Sharahuunshon Upa cufifain nan tsain nantifiton nicanonfo un cufiaiton. Ascatari un nan tsain futsaman Diospan Yoshin Sharahuunoashu urifi fanainshquin. Nan tsain nantifiton nicatirofoanri un fanainshquin.  
\v 16 Man Diospan Yoshin Sharahuunshon nan tsain futsaman Upa Diosihuunoa man yoifiaiton ahuuscashocai matofu ichananfoan yoiquin, —Ascapainon, —mato huatirofoma nicatsi huacani.  
\v 17 Man Dios, —¡Aichoran! —huasharafiaquicai futsanfo nicasharatirofoma aton ointi unimashquin. Maton tsaintsi nicaifoan. 
\p  
\v 18 Uhuun yoramishtichin un Upa Dios aicho huai. Ascashon un yoi, —Upa Diosin, min Yoshin Sharahuunshon tsain futsaman un yoia cuscan atirifiton yoifiaquicai asca huafoma cuscan. Un minhuunshon tsain futsaman un ato finoinnifoan yoimisi, —ishon un Dios yoimisi.  
\v 19 Ascafia icoinra huaa futsafoya ichananshon un aton tsainman ichapamaton ato yoiaiton nicatirofo. Nanscafin sharaquin. Un ato ichapa tsain futsaman yoiaitocai nicatirofoma. Nanscaquin nicafo. 
\p  
\v 20 Uhuun yoramishtichin, un mato tapimai cuscan tapisharacahuun. Facushtan ahua tapisharataima. Ascashon nanfoan shinain cuscan marifi shinanyamacahuun. Cayacafi shinancahuun. Ascafia iyoafoan shinanchacatiro cuscacai facufoan shinanchacayotiroma. Nanscashu ato cuscara icahuun. Chaca tapipaiyamacahuun.  
\v 21 Isaías Diospan tsain cununi isca huaquin, 
\q3 “Nan Israelifo un ato yoifiaiton ua nicacasmamisifo. Ascacun un ato ipaitsicoin yoimisi. Ascaifoan caifo futsafo un ato muran nichishquin uhuun tsain ato yoishquin nicanonfo. Ato yoifiaifoancai ua nicayoshcanimaran,” 
\m ishon Diosin yoini cuscan Isaías aqui cununi. 
\p  
\v 22 Ascashon tsainmansicai a icoinra huaafo non ato yoima Diosin ahuamamishti huatiro cuscan tapinonfo. Ascatamarocon icoinra huamafo non ato yoitiro Diosin ahuamamishti huatiro cuscan huafain tapinonfo. Ascatan ichanancashon futsan aton tsainman Diosin tsain yoiaino nanfin man icoinra huafoansi Diospan Yoshin Sharahuunshon nicasharatirofoquin. Ascan nan icoinra huamafoancai tsoan nicasharataicanima.  
\v 23 Ascashu ichanancanashu tsain futsa futsatapafoan tsaincafo man icoinra huamafo iyamarai man tapia cuscan tapiataifoma matofu ichanancashon shinantirofo isca huaquin, —¡Ohuashta! Na yorafo nisoncoinforan, —ishon yoitirofo. 
\p  
\v 24-25 Ascafiaquin man ichananshon mato tsainman Diosin tsain yoipacuaino icoinra huaama futsan iyamarai man tapia cuscan tapiataifoanmari mato nicacashon shinantirofo isca huaquin. —¡Ohua! Urifi Diosin tsain cununi cuscacai un aama. Diosin nantifi tapicoian. Nocon nomuran non ahuarashta fomanpaimisi nanfori Diosin man tapian. Chipo ua puashoshquiran, —ishon shinantirofo. Ascashon shinainfono aton nomuran nocotiro. Nannori shinancatan ratoconun mai chachitiro Upa Dios cufinquin isca huashquin, —Upa Diosin min fasi sharacoin. Min na icoinra huafo fu ica. Urifi mia yopacoinran, —ishon cufitiro. 
\s1 Man ichanainno nicatimayamacahuun 
\p  
\v 26 Uhuun yoramishtichin, un mato tapimapai isca huaquin. Man ichanainno futsan mato fanainmafain futsan mato Diosin tsain yosifain futsan Diosin ahuun nomuran yoia cuscan mato tapimafain futsari Diospan Yoshin Sharahuunshon tsain futsaman mato yoia cuscan huafain futsanri Diospan Yoshin Sharahuunshon mato tapimatiro a yoia cuscan huafain. Ascashon nan un yoiai cuscan non nansca huapaitiro nantifi nan ichananfoanno Diosin mato amapaiyai cuscan man huanon. Ascashu a cuscaracoin man inon.  
\v 27 Man ichanainno yora rafutan iyamarai rafu non fustifain tsain futsaman mato yoitirofo. Ascaiton nan futsan maton tsain futsan man yoia cuscan huafain futsan maton tsainman mato shafacafi tapimatiro Diosin mato yoipaiyai cuscan man nicasharanon.  
\v 28 Nan tsain futsaman man yoipaiqui tsoan mato tapimayamaino a ichananfo murannoashu man pusitiroma. Ascatan maton pushu anoashu marus fusti nan tsain futsaman man Upa Dios fu tsaintiro. 
\p  
\v 29 Ichananshon rafutan iyamarai rafu non fustifain Diosin aton nomuran shinanmanai cuscan huaquin mato yoitirofo. A yoiai cuscan nicacashon nan Jesús icoinra huafoan shinantirofo isca huaquin, —Diospan Yoshin Sharahuunshon noco yoiaran, —ishon shinanyamaraquin. —Afin shinanfain noco yoia. Diosicai anori noco yoiamaran, —ishon shinantirofo.  
\v 30 Ascashon futsan mato Diosin tsain yoiaino futsan ahuun nomuran Diospan Yoshin Shara nanumanaino futsan yoiai cuscan tsaoshon nicayotiro. Ascan na yoiquin tau huatan anaititiro futsan acafiri a ichananfo yoinon. 
\p  
\v 31 Asca huacashon fustirasiton Diosin Yoshin Sharapan ato shinanmanai cuscan futsan yoicun futsan yoicun huapatirofo. Nan ichananfoan nantififain tapinonfo. Ascashon aton ointi fupuanonfo.  
\v 32 Nan Diosin tsain yoimisiton ato yoipaiyai cuscan man ahuun tsain yoiquin anaitishon afin ahuun nomuran shinantiro isca huaquin, —Natian un ununon. Futsanri Diosin tsain yoipaiquin un manatiro. Aton yoiqui anaitiano unrifi ato yoitiroran, —ishon ahuun nomuran shinantiro.  
\v 33 Ascashu ichanainfo anoshon futsan ahuun tsain chai yoiriaino futsa mato tsain futsaman yoiai cuscan tsoancai mato tapimaima ipaitsi aton ointi fucash huacani. Ascaracai Diosin fuchipaima. Diosin fuchipai nan ichananfo anoshon aton ointi unimanonfo. 
\p  
\v 34 Ascatan ahuara futsari un mato tapimasharapai. Nantifi icoinra huaa futsafo ichanainfono ainfofo tsaintiroma. Diospan tsain cununi isca huaquin. Nan ichanainfotiancai Diospan tsain futsan yoiainocaiyainfofo pusitiroma. Tsaintamarocon Diosin tsain yoimisiton yoiai cuscan nicacointiro nan yoiai cuscan aashquin.  
\v 35 Nan nica cuscahuunoa yocapaiquin manatiro nan aton pushu ano nocoshon funu yocatiro funun tapimanon. Ascacun ¡Ai timafin! Man ichanaintian man tsaincacai sharama. 
\p  
\v 36 ¿Nantifi icoinra huaa futsanfoan ichanancashon amisi cuscan marifi man asca huapaimamun? ¿Man shinanmun Upa Diosin yoipaiyai cuscan mato fusti tau huaquin tapimani? ¿Ascan manraca marus fusti Diosin tsain mato fusti tapimanamun? Ma. Ascashon amaquiri shinanyamacahuun.  
\v 37 Ratoranfo man futsan yoiquin man isca huatiro, —Non Diospan tsain yoimisi ascayamarai non Diospan Yoshin Sharahuunshon icoinra huaafo non ahuara ashotiroran, —man icun. Nanscarifi aquin man tapitiro nan nafo un mato cunushonai cuscan nocon Ifoan mato yonoi.  
\v 38 Tsoan anori shinanpaiyamai afu ipaiyamacahuun. 
\p  
\v 39 Ascacufin, uhuun yoramishtichin man ichanain anoshon Diosin tsain ato yoipaicahuun. Nan fasi shara. Ascafia futsan tsain futsaman Diospan Yoshin Sharahuunshon mato yoipaiyaiton shatumayamacahuun.  
\v 40 Ascatan man ichanannoshon futsan yoicun futsan yoicun huacahuun man yoiai cuscan nicasharanonfo. Man asca huaino ato ointi fucash huatirofoma. 
\c 15  
\s1 Cristo nafianishaquin afanan funini 
\p  
\v 1-2 Uhuun yoramishtichin natian tsain shara Jesushuunoa un mato yoimisi cuscan un afanan mato shinanmapai. Un mato Jesushuunoa yoiaino man icoinra huani. Man icoinra huaiton Jesús maton chaca soashona man afu ipanon. Ascan un mato yoini cuscan mancai nan cachiquiri huamisima. Man cachiquiri huashon nanscaquin ipaitsi man icoinra huacuana. 
\p  
\v 3-7 Diospan tsain yoini cuscan Cristo noco nashoni nocon chaca soashoshquin. Yoiari Cristo osha rafu non fusti maiyoni. Ascatan afanan funini. Funiashu Pedroqui nocoi tauni. Chipo afu rafumisifo docequi noconi. Ascaiyotan chipori quinientos icoinra huafoqui noconi. Ascan natian nantificuana niyoafo. Fustirasi naino. Ascashu chipori Santiagoqui noconi. Ascashu chipo afanan afu rafumisifo doce noconi. Nannori ua tapimani cuscan urifi matori tapimayoni. 
\p  
\v 8 Ascashu ahuun unutani uqui Jesús noconi. Uncai ahuunoa ahua nicatiamano afu rafumisi futsafoan icoinra huaquin tauhuanifo. Facu cainyama cuatan caintirofo cuscan un afiaiton. Ascashon uncai icoinra huacuanima. Samamashta ua icoinra huamariscatani. 
\p  
\v 9 Icoinra huaa futsafoancai un acai cuscan chaca huacaicaimisifoma. Un Jesús icoinra huafo omitsiscamayopaoni. Un Diospan yorafo chaca huayopaonifiacun Jesús uhuun ramapaiquin ua catonni un afu rafumisi inon.  
\v 10 Diosin uhuun ramapaiyaino unrifi un afu rafumisi. Ascashon ua imapaiyai cuscacai un ayamama. Mun aca. Un nanscaquicai ua ipaitsi catonnima. Un ascashu un afu rafumisifoan yonoshonaifo cuscan uncaifin fasi yonoshoquin finacoinshonaquin. Ascafia uficai un ahuun yonoshomisi icama. Uhuun ramapaicai ua catonni un ahuun yonoshomisi inon.  
\v 11 Ascacun un iyamarai Jesús fu rafumisi futsafo futan nannorisi non mato Jesushuunoa yoimisi. Non mato yoimisi cuscan man icoinra huaa. 
\s1 Nan naafo funishquiai cuscan 
\p  
\v 12 Non mato yoimisi isca huaquin, —Cristo noco nashofianishaquin man afanan funiniran, —ishon non mato yoimisi. ¿Ascan ahuuscai atirifiton man yoimisimun? —Yora naashu afanan funitiromaran, —ishon man yoimisi.  
\v 13 Yora naashu funiyamanicuncai Cristori funicuanama.  
\v 14 Cristo funiyamanicun non mato ahuunoa ipaitsi yoicuana. Funiyamanicun marifi man ipaitsi icoinra huacuana. 
\p  
\v 15 Ascatan Cristo funiyamanicun non mato Dioshuunoa paracuamisi. Non yoimisi isca huaquin, —Upan Diosin Furun Jesús funimaniran, —ishon non mato yoimisi. Yora naashu funiyamainocai Cristoricai Upa Diosin funimacuanama.  
\v 16 A naafo funiyamainocai Cristori funicuanama.  
\v 17 Cristo funiyamainocai man ipaitsi man icoinra huacuana. Maton chaca mato soashocuanama.  
\v 18 Ascashu Cristo funiyamainocai nan icoinra huafo nacanashu funocani. Omitsiscapashcaquin.  
\v 19 Nuno mai ano niyoshon non shinanquin isca huamisi, —Un naashu Cristo funini cuscan uari Diosin funimashquiran, —ishon non shinanfiashu iconyamaino non fasi funocuana. Ascashon non ipaitsi icoinra huacuana. Cristo funini iconyamacun tsoanmamishti aca finonmafain nocohuun ramapaitiro. 
\p  
\v 20 Ascafia anorima. ¡Aicho! Iconcoin Cristo funini. Aafin funi tauniquin afanan nashquima. Ascan nantifi icoinra huafo funitirofo afu ipashcaquin.  
\v 21-22 Ascashon nocofunu Adán Diosin onihuaquin tauhuani. Adán tauhuaquin chaca huani. Ahuun chacahuunoashu nani. Ascan nan nocofunuhuunoashu nantifi napamisifo. Nanscarifiai nan nocofunu Cristohuunoashu nantifi icoinra huafo funitirofo afu nipashcaquin.  
\v 23 Ascashu Cristo funi tauni nipashquin. Afanan mai ano nasoaitian nantifi ahuun yorafo funimashquin afu nipanonfo. 
\p  
\v 24 Ascainocai ahuara chacafoan afanan noco fucash huatirofoma nantifi cuyopacunaca. Nantianri nantifi Cristo noicasmamisifo yafi Satanás yoshin chacafoan aton niaifo non nantifi yoshin chacafo ato omitsiscapanacafo muran potai afanan tsoashta yonononfoma. Ascaiton Criston Apa Dios yoiquin isca huashquin, —Upan, natian min yorafo nantifi min ato yonomatiro. Afanancai tsoan mia nicacasmapacunacama. Ato iquipacuhuun, —ishon Criston Apa yoishquin. 
\p  
\v 25 Ascashon Criston nantifi nan noicasmamisifo ato finoaintian afanancai a noicasmamisifocai ahuashta ishcanima. Nantifitsi ato iquiyamaiton.  
\v 26 Nan ahuun unutaqui a noicasmamisifo ato namaqui cuyoshquin. Ascashucai afanan tsoa nanacama.  
\v 27 Ascacufin Diosin Furun Cristo yononi cuscan nantifi ato iquinon. Apa Dios fusticai Furunmun iquinama. Apahuunshon nantifi ato iquina.  
\v 28 Man nansca huatan Furunmun Apa yoishquin isca huaquin, —Upan uarifi mian yonotiroran, —ishon. Ascaiton Apa yoiai cuscan fustisi nicapaicoin. Ascashon Apa Diosin fustiton nantifi iquinaquin. 
\p  
\v 29 ¿Ascashu yora naashu funiyamaifoannocai ahuuscain futsafo atohuunoashu unu muran iquimamumisishaquin? ¿Ascan ahuuscamun huacaniquin? ¿Ascashu yora naafo afanan funinacamanocain ahuuscain futsafoan ato unu muran iquimamisifomun?  
\v 30 Ascacun nocohuunoari natian non shinanon. ¿Naafo funiyamainocai ahuuscaimun shafatifi Cristohuunoashu non musuni tapiaquin? 
\p  
\v 31 Ascacuri un futsafo matohuunoa yoisharamisi man nocon Ifo Jesucristo tanasharaino. Uhuun yoramishtichin iconcoinri ua Cristohuunshon shafatifi rutupaicani.  
\v 32 Nocofunufo Efeso anoafoanri ua rutucuanifo. Un naashu funiyamaicai un ipaitsi nacuani. Un nuno mai ano niyoai chain Jesús ua imasharai ahua musunicai uqui nocoama. Ascatan un naashu afanan funiyamainocai acai uhuuna ahuama. Non naashu non afanan funinacama non apaiyai cuscan non huanoncahuun. Ascatacai chipo non afanan ahua ahuusca huanacama. Noncai tapiama ahuutian non naimancai. Ascashon futsafoan yoia isca huaquin, 
\q3 “Non pifain aqui ayafain non Dios shinantama non apaiyai cuscan non nataima non unimanoncahuun,” 
\m ishon shinanfo. 
\p  
\v 33 Asca anorimafinquin. Ascashon amaquiri shinanfafaiyamacahuun. Tsoa anori shinanfafainaifo fu rafuyamacahuun. Yora chacafo fu non rafuaino nocori chaca huamatiro.  
\v 34 Man amaquiri shinanmisi cuscan afanan anori shinanyamacahuun. Cayacafi shinancahuun. Chaca huaquin shatucahuun. Timafin man atirifitocai man Dios onansharataima. Ascashu man rafipaitiro. 
\s1 Non naashu afanan non funiaitianmain nocon caya ahuu cuscara ishquicain 
\p  
\v 35 Ascashon futsanraca yoishquin, —¿Ahuuscashumain man naashu non afanan funitiroquin? ¿Afanan funiashurimain ahuu cuscara yoraya non afanan iquicain? —ishon yoicaniraca.  
\v 36 Anori yocaino fasi amaquiri shinantiro. Non ushu fana payocoyotiro. Chipo ahuun ushu foaifiashuquin payocoyamashu foaitiro.  
\v 37 Non ahuara fanaquicai non ahuun cayafoya fanatiroma. Ahuun ushushta fusti non fanatiro.  
\v 38 Ascashon non ahuun ushu fanafia Diosin foaimatiro. Afi apaiyai cuscan fana futsa futsatapafo huaa. Nanscashori ahuun tashofo yafi ahuun caya cuscarafo ato onihua. 
\p  
\v 39 Nanscarifiai nocon cayacai yoinaton caya cuscarama. Nocon caya futsa cuscarafo. Yoinana futsa cuscarafono. Puiyafonari futsa cuscarafono. Shiman nafori futsa cuscarafono. Nanscarafosicai Diosin noco onihuanima. 
\p  
\v 40 Nai murannoafoan ahuun caya futsa cuscarafono. Nuno mai ano non niyoano nocon cayari sharafiacai nan nai murannoafo na cuscarama. Nanri fasi sharashta finacoiyain.  
\v 41 Nanscarifiai fari non oshu non fishifori sharashtafiashu ascarafosima. 
\p  
\v 42 Nanscarifiai yorafo naino aton caya payocotirofo. Afanan non funiashucai nocon caya payoconacama. Nanscara sharasi non ipanaca afanancai non nanacama.  
\v 43 Nocon caya maiyaino chacacoin ishquin. Ascan non funiaitian sharashtacoin ipanaca. Non nuno mai ano niyoashu non iranmannapacuashu non natiro. Non afanan funiashucai non ascara itama mutsisipa shara non ipanaca.  
\v 44 Non naanocai nocon caya nai murannoafo nan cuscara itiroma. Ascan funiashu norifi Dios fu icafoanri non iishquin. Upa Diosin Yoshin Sharapan nocon caya mutsisimafain noco iquipacusharanaca. Non nuno mai ano niyonon ishon Diosin nocon onihuani. Ascatan non aqui nocoaitian noco caya futsa cuscara onihuashofain nocon furo yoshin afu ipanon.  
\v 45 Ascan Diospan tsainhuunoa cunuquin isca huani, 
\q3 “Nocofunun Adán Diosin onihuaquin tau huani. Ahuun cayaqui Diosin ashain tanaino nocofunun ninacahuani. Arifi ninon,” 
\m ishon. Ascan Cristo arifi Adán cuscarafiacun ahuun Yoshin Sharapan noco nimapacutiro.  
\v 46 Diosin nocofunun Adán onihuaquin tau huani arifi ninon. Chipo Cristo cainmani ahuun Yoshin Sharahuunshon noco nimanon.  
\v 47 Diosin nan nocofunun Adán onihuaquin tau huani. Mai mapohuunoa onihuani. Cristori nocofunufiacun afin nai murannoashu nocoqui fotoni. Tsoancai onihuanima.  
\v 48 Nantifi nuno mai anoashu non caianshu nocon caya Adán caya cuscarari. Ratoranfoan Jesús arifi Ifo huacanashu nan cuscarari ishcani.  
\v 49 Non nuno mai anoashu caini non Adán cuscaracoinfo. Ascan Jesucristo nanton Dios icariashu fotoni non a cuscaracoin inon. 
\p  
\v 50 Uhuun yoramishtichin un mato tapimai nonmun ahuuscashquicain. Non noco yora mumacoin Diosin niaifo icano non afu itiroma. Nocon caya paiyocotiro. Ascacufin non na cuscara yora yashucai Dios fu non itiroma.  
\v 51 Tsoancai nicayomisifoma cuscara tsain shara un mato yoi. Tapipaiquin ua nicasharacahuun. Asca noncai atifi naima. Ascafia non nantifi fiananain futsushquin.  
\v 52 Ascatan non fianananriscashquin. Futso itani cafiscai non fianananriscatashquin. Nocon mai cuyoaitian Diospan nai oinmatinin ahuun manuti chaan chaan acaino Jesús icoinra huaashu namisifo funiriscatanonfo. Ascashucai afanan nanacafoma. Nantianri nantifi icoinra huafoti fianananriscatashquin.  
\v 53 Non natian naino nocon caya payocotiro. Ascafia Diosin nocon caya fiananan huashoshquin non afanan naima non afu ipanaca.  
\v 54 Diospan tsain cununi cuscan iconcoin iishquin. 
\q3 “¡Aicho! Afanancai Diospan yorafo nanacama. Cristohuunoashu non afu isharapacutiro,” 
\m ishon cununi.  
\v 55 Ascashu afanancai ahuaton noco namatiroma. Afanancai non nai omitsiscatiroma.  
\v 56 Non chaca huamisihuunoashu non nai non omitsiscatiro. Noco fiananan huatiancai afanan non chaca huatiroma. Non afanan chaca huayamafain nonricai afanan nashquima. Diospan tsainhuunshon non tapitiro non chaca huamisi. Ascantan non fianananshu Jesús cuscara shara non ishquin afanancai non chaca huatiroma. Diospan tsain afanan noco yoishquima isca huaquin, —Min chaca huaracai, —afanan noco huashquima.  
\v 57 Noco asca huaiton non yoitiro, —¡Aicho! Upa Diosin, nocon Ifo Jesucristohuunshon nocon chaca non shatutiro a cuscara shara ishquin. Ascashucai afanan non nanacama, —ishon non yoitiro. 
\p  
\v 58 Ascacun uhuun yoramishtichin futsa futsa huaquin shinanyamacahuun. Diosin noco imapaiyai cuscan nan fusti shinansharacahuun. Jesús tanasharacahuun. Nocon Ifo Jesús yonoshosharafafaincahuun. Man man tapia nocon Ifo futan yonoicai ipaitsi non yonoshotiroma. 
\c 16  
\s1 Nan icoinra huafoan pui ichanan huashon icoinra huaa futsafo fomani 
\p  
\v 1 Natian ahuara futsanhuunoa un mato yoi. Diospan yorafo Jerusalén anoafo ahuuoma. Atohuun ramapaiquin man ato inansharapai. Ascan nan icoinra huafo Galacia anoafo un ato yoia cuscan marifi nanscarifi acahuun.  
\v 2 Yonoshon ahuun rafanan pui fishon nan man fia cuscan ahuutiran Domingotifin ichananti muranshon pui huafafaincahuun. Chipo un Jerusalén ano nocoshon nan pui un ato foshotiro man ato inanon. Diosin mato inan cuscari atirifi inancahuun. Mato ichapamari inancun atirifi ichapamari man inantiro. Ascan mato ichapa inancun paratamari inancahuun. Ua manaquima pui ichahuafafaincahuun. Asca huafafainshocai un nocoaino man afanan fipaitiroma. 
\p  
\v 3 Ascashon mafin nocofunu sharafo catoncahuun aya pui fomashcaquin. Ascan un matoqui nocoshon uficoin un ato cunushoshquin man ato foshotanon. Ascano Jerusalén anoafoan man tapinon tsoan puimain mato foshoafoquin.  
\v 4 Diosin ua nichipaiyaino nan nocofunufo man catoanfo unfu fotirofo. 
\s1 Pablon cahuacacainna cuscan ato tapimani 
\p  
\v 5 Macedonia finonfaini cai un matoqui Galacia ano nocoicai.  
\v 6 Itsairaca un matofu iyotiro. Ascayamarai uraca oipacutian un mato muran iyonon. Ascashon un caiton un aya catanon un yopai cuscan man ua inanqui futsanon. Ascatan man ua nichian un casharanon.  
\v 7 Un mato atsamaiyofainnicai. Diosin ua nitumayopaiyaino un matofu iyotiro. 
\p  
\v 8 Ascafia un nuno Efeso ano iyoi nan nocon fuyamisi ahuun anu Pentecostés icaitian.  
\v 9 Nunoa yorafoan nocon Ifohuunoa nicapaicani. Ascacun un nunoshon nocon Ifohuunoa yoisharai yoi. Ascano icoinra huanonfo. Un ascafiaiton nantianri atirifiton ua shatumapaicani un Jesushuunoa yoinonma. 
\p  
\v 10 Ascano un nocon Ifo yonoshona cuscari arifi Timoteo yonoshona. Ascan matoqui nocoaiton cushusharacahuun. Nocoaino aqui unimacahuun. Man ascaiton tapinon a man fuchipaiyai.  
\v 11 —Acai ahuamaran, —huayamacahuun. Caiton nichisharacahuun unimai uqui noconon. Icoinra huaa futsafo fu uqui nocoyoi. Un afanan atofu rafusharanon. 
\p  
\v 12 Ascatari natian nocon yorahuan Apoloshuunoa un mato yoi. Un yoia isca huaquin —Corinto anoafo oinyotahuun, —un Apolos huamisi. Ascafia ua yoimisi, —Un natian cayotiroma. Diosin ua nichipaiyaitian un catiroran, —ishon ua yoia. 
\s1 Pablonun ahuun tsain unutaquin Corinto anoafo ato tsain fomani 
\p  
\v 13 Oinfain. Jesús shinanfafaicahuun chaca huacaquima. Nocon Ifo icoinra huacahuun. Cachiquiri huayamacahuun. Jesús icoinra huashu ahuara ahuuscara afiaiton oincani ratuyamacahuun. Diosihuunoashu fupuinifoancahuun.  
\v 14 Ahuarafo man acai cuscan nanfohuun noiquin ashosharacahuun. 
\p  
\v 15-16 Estéfanas ahuun yorafo Grecia mai anoafoan Jesús icoinra huaquin taucoin huanifo. Man manfin ato oinmisiquin. Man man tapia nanfoan Diosin ahuun yorafo shara huamisifo. Nan cuscarafo nicasharacahuun. Nan atofu yonoafori nicasharacahuun. 
\p  
\v 17 Un fasi unimacoin Estéfanas non Fortunato non Acaico afo uqui nocoafono. Mancai ashotiroma man fasi chaicoin ica. Man ua ashotiroma cuscan nan rafu non fustifain ua ashoanfo.  
\v 18 Nan rafu non fustifain uhuun ointi ua fupuamafo. Maton ointi man fupuaca cuscan uari fupuamafo. Ascatan atohuunoa yoisharacahuun. 
\p  
\v 19 Nan Jesús icoinra huafo ichananmisifo Asia anoafoan mato yoisharapaicani. Nocon Ifohuunshon Aquila futan ahuin Priscila mato yoisharapaicani. Fasi mato shinancani. Aton pushu muran atofu ichananfoanri mato yoisharapaicani.  
\v 20 Nantifi icoinra huafo ufu nunoafoan mato yoisharapaicani. Ascacun yoinonnansharacahuun. 
\p  
\v 21 Unfin Pabloquin uhuun tsain unutaquin rafushtacoin uhuun mucucoinnin un mato cunushoni man tapinon unfincoin un mato yoisharashquin. 
\p  
\v 22 Tsoan nocon Ifo noiyamashon afin shinantiro, —Ufin un apaiyai cuscan un aicai. Ua Diosin amapaiyai cuscan nanscanonquin, —ishon shinantirofo. Nanscarafo Diosin ato onaintimapainon. Omitsiscapanacafo muran potashquin. 
\p Ifo Jesús nocoqui ohuu.  
\v 23 Nocon Ifo Jesús matohuun noiai cuscan mafi rananri man noinanpainon. 
\p  
\v 24 Un nocon Ifo Jesucristohuunshon un nantifi matohuun noi. Nanscasi ipanon. Amen. Nanti. 
\cls Pablo