\id 2JN - Mangseng NT [mbh] -Papua New Guinea 1999 (DBL 2014) 
\h 2 Jon 
\toc1 Malueng aininga ako Jon i wat i 
\toc2 2 Jon 
\toc3 2Jn 
\mt2 Malueng aininga ako Jon i wat i  
\mt1 2 Jon  
\imt1 Ritetong nge a 2 Jon  
\ip Jon ako ini a Krais ile pakeke ako i toloku i wat malueng ake. Na nge wop lemi aken panongpolngare o esu esa a pen elonga nge Panongpolong Sivenga panongpolnga. Jon i sis ve aro toko lemioongare aro oa sagu pel, naro o nongpoo panongpolnga areken. Aveto i pator or ve aro o naktet or nge pamirealonga le apaltetonga areko o rivenga toko neneanga a Jisas ini a God Itun avele, na o rivenga mun ako ini toko ako God i ateal i ve aro i el werer ile tokokoere kene avele. Jon ini plong ve aro o nongpoo areko o venen aken, aro vene mo o opoal ole riong le apaltetonga areken.  
\c 1  
\ms1 Aro te krim engeng a God ile riong nunganga, naro te naktet it nge areko o panongpol nge riong relnga  
\p
\v 1 Tho ini tolok a Jon ako tho ini lotu a mukalinga.  
\p Tho wat malueng ake a thomu lotuongare nge, ako o ranga ve ini seng a urvet tomo nge itutun areko God i ateal or ve ini ile, na ok sagu rintet mun thomu, eneke lomumuo mun nge a God ile riong nunganga. Na ini inga engek ako ok sagu thomu avele, aveto toko alavusnga areko olemi mire mun nge a God ile riong nunganga, oa sagu mun thomu.  
\v 2 Eneke God ile riong nunganga i mimi a it nge, naro i voth tomo ol nge it ako aro ile vusonga avele.   
\p
\v 3 Na tho nong ve aro it kene aro te el themosaling, na lemi esaling, na lemi moring ako a Titemer a God tomo mun nge Itun a Jisas Krais nge, eneke ile riong nunganga i voth a it nge, make ar sagu pel.   
\s1 Aro te panes vothung ako nge tokokoere oasagunga.  
\p
\v 4 Na lemik i sivenga rintet nge ako tho nongpol ako ve, thomu pelie rongan o panes a God ile riong nunganga, ranga ve ako Titemer a God i pator it nge ve aro te panes i.  
\v 5 Na tho sis ve aro tho wat torong a thomu lotuongare nge ako ok sagu thomu ve aro ar sagu pel. Na patorong ake ini ponganga ako tho wat i a thomu nge, kene avele. Ini patorong ako te nongpol vet i nomenga ako me i patea nge ako te elo a Krais a lemir.  
\v 6 Na vothung ako nge asaguong, kene i vene: Aro te panes ile patorong alavusnga. Na patorong ako thomu o nongpol vet i nomenga ako me kene i vene: Aro thomu o panes vothung ako nge asaguong nge lomumu alavusnga.   
\s1 Aro te krim engeng a Krais ile riong.  
\p
\v 7 Naro thomu o naktet thomu venen aken, eneke toko le apaltetonga pulua o es a pen elonga ake ru a ulue mo aro o paleklek tokokoere. Na or ini areko o lela ve, “Jisas Krais i velpol ini toko nunganga avele.” Na toko e ako i venen aken ini toko le apaltetonga ako i paleklek tokokoere, na ini a Jisas Krais ile ngarang.  
\v 8 Aro thomu o naktet senu thomu, aro vene mo omu avar nge ur ako te um engeng nge. Aveto aro o mit engeng mo aro o el olongomu alavusnga.  
\v 9 Na aro ve toko e i krim engeng a Krais ile patoraling avele, na i avsa ma i panes riong relnga e, aken God i voth tomo nge i avele. Aveto aro ve toko e i krim engeng a Krais ile patoraling, aken Titemer a God tomo nge Itun o voth a i nge.  
\v 10 Na aro ve toko e i es a thomu nge na i panongpol thomu, aveto i panongpol thomu nge a Krais ile patoraling ake avele, o mothong tova o nongpoo i a lomu vel, na o mothong tova o theal i.  
\v 11 Na toko ako i nongpoo toko aken, aken i supo tomo nge i nge ile omaing kerenga aken.   
\s1 Riong patopalalnga.  
\p
\v 12 Na lek riong puluanga kene rongan i voth ako tho sis ve aro tho sungu i a thomu nge, aveto nik plong ve aro tho wat i nge malueng. Aveto tho sis ve aro tho es wot, naro te thepol pel thekir, na te leng leng, mo ako aro lemir sivenga nge pel.   
\p
\v 13 Na toko lotuongare a pen ake, ako God i ateal or ve ini ile, na o ranga ve ini lulumuere na titeumuere, na o pasungalu ole nang sivenga a thomu nge.  
\p Na i re aken. I vus.