\id ZEP - mbb OT -Philippines 2014 (DBL -2014) 
\ide 65001 - Unicode (UTF-8) 
\rem Copyright: Kermit Titrud (2012) 
\h Zefanias 
\toc1 Zefanias 
\toc2 Zefanias 
\toc3 Zef 
\mt1 Zefanias 
\c 1  
\p  
\v 1 Iyan heini lalag te \sc Nengazen\sc* diyà te ki Zefanias dutun te timpu he si Josia he anak ni Amon iyan hadì diyà te Juda. Si Zefanias anak ni Cushi, si Cushi anak ni Gedalia, si Gedalia anak ni Amaria, ne si Amaria anak ni Hezekia. 
\s1 Is Ebpekeuma he Kezeetan 
\p  
\v 2 Migkaǥi is \sc Nengazen\sc* te, “Ebpurungan ku edezeeti is langun he ziyà te tanà–  
\v 3 is menge etew, is menge langgam ragkes en is menge tagbis wey menge isdà. Id-awè ku is menge edtukù te menge etew wey zan mekesalà ragkes en is menge mekesesalà. Edezeetan ku is langun he etew ziyà te tanà. Iyan a, is \sc Nengazen\sc*, is migkaǥi kayi. 
\p  
\v 4 “Edsilutan ku is menge meǥinged diyà te Juda ragkes en is langun he menge meǥinged diyà te Jerusalem. Edezeetan ku is nengesamà he menge ed-azap te ed-ezapen he si Baal ragkes en is menge memumuhat he ebpenilbi kayi, su wey kenè en sikandan metenuzi.  
\v 5 Edezeetan ku zaan is menge ebpemenahik diyà te atep te valey zan su ed-azap dan te andew, bulan, wey menge vituen. Edezeetan ku is menge ed-azap wey nenangdù he ebpenilbi kayi te kedì piru nenangdù daan he ebpenilbi ziyà te ed-ezapen he si Molec.  
\v 6 Edezeetan ku is menge mid-iniyug kedì wey is menge wazà medangep kayi te kedì. 
\p  
\v 7 “Pereremek kew kayi te etuvangan ku, su meǥaan en egkeuma is andew te kedsilut ku. In-andam ku en is menge etew he para ebpenhimetayan iring te uyaǥen he ibpemuhat. Insivey ku en is menge kuntada he mid-umew ku wey zan medsurung diyà te Juda.  
\v 8 Dutun he andew, ebpenhimetayan ku is menge tig-Juda he iring te uyaǥen he ibpemuhat. Edsilutan ku is menge upisyal zan wey is menge anak te hadì, wey is langun he mid-iring te mezaat he menge vetasan te ziyà te menge lumelengyawà.  
\v 9 Edsilutan ku zaan keniyan he andew is langun he midtampu te menge tulumanen te menge etew he wazà mekekilala kedì wey is menge mibpesipala wey nenlimbung su wey zan mepenù te menge azen is baley te egalen dan.” 
\p  
\v 10 Migkaǥi is \sc Nengazen\sc* te, “Zutun he andew egkezineg is kulehian te ebpekitavang diyà te pultahan he migngezanan te Pultahan te menge Isdà diyà te inged he Jerusalem wey is lendag diyà te veǥu he vahin kayi he inged. Egkezineg daan is dekelà he keǥurub te egkengerundus he menge valey ziyà te menge vuvungan.  
\v 11 Edsineǥew kew is ebpemen-ubpà diyà te alug he vahin te inged he Jerusalem su ebpemematey is langun he menge nigusyanti niw. 
\p  
\v 12 “Dutun he timpu ebpurungan ku edsusiya is menge tig-Jerusalem ne edsilutan ku is menge etew he ebpeeyehey zà he egkaǥi ziyà te gehinawa zan, ‘Wazà ebeelan te \sc Nengazen\sc* he meupiya etawa mezaat.’  
\v 13 Ed-eǥawen is menge azen dan ne ed-ewaan dan is menge valey zan. Kenà iyan sikandan ebpekeubpà diyà te menge valey he mibangun dan. Wey kenà iyan sikandan ebpekeinum te vinu he ebpuun diyà te menge pinemula zan he paras.” 
\s1 Is Mekahandekhandek he Andew te Kedsilut te \sc Nengazen\sc* 
\p  
\v 14 Meǥaan en egkeuma is mekahandekhandek he andew te kedsilut te \sc Nengazen\sc*. Hapit en heini egkehitavù ne merasey heeyan he andew, su minsan is menge sundaru ebpekepengulahì te kebuyù te tavang.  
\v 15 Keniyan he andew is kebpeǥezama te Megbevayà te pauk din. Andew haazà te kelised, kemeresayan, kezeetan, wey kepirdiyan. Merusirem wey ebpenggapun dutun he andew,  
\v 16 ne egkezineg is daǥing te menge vudyung wey kulehian te menge sundaru zutun te edsurung dan diyà te vinerengbeng he menge inged wey ziyà te metikang he menge turi kayi. 
\p  
\v 17 Migkaǥi is \sc Nengazen\sc* te, “Ibpaaǥi ku heeyan he kemeresayan diyà te menge etew, ne edhipanew sikandan he henduen be te menge lakap, su ǥeina te nekesalè dan kayi te kedì. Egkeiring te wahig he edtudà is lengesa zan, ebpekepeyapat is menge lawa zan iring te menge tai.  
\v 18 Kenà ebpekelibri kandan is menge pelata zan wey menge vulawan dutun te andew te kebpeǥezama ku te pauk ku he iring te hapuy he ebpekeepur te tivuuk he tanà. Edtik-awan ku edezeeti is langun he ed-ubpà kayi he tanà.” 
\c 2  
\s1 Is Pengumawan para te Ked-iniyug te Mezaat 
\p  
\v 1 Migkeǥiyan ni Zefanias is menge tig-Juda te, “Sikiyu is wazè dan keelezan he menge etew kayi te nasyun, tiǥum kew wey iniyuǥi niw is menge mezaat  
\v 2 te kenè pa egkeuma is midtelaan he timpu te kedsegseǥa keniyu ziyà te meziyù he iring kew te menge ukap he idlayap. Iniyuǥi niw is mezaat te kenè pa egkeuma is timpu te utew kegkepauk te \sc Nengazen\sc*.  
\v 3 Ne sikiyu is kenà mepelavawen he menge etew kayi te nasyun, he edsunud te menge suǥù te \sc Nengazen\sc*, dangep kew ziyà te kandin. Ipedayun niw is kebaal niw te metazeng wey is kenè niw kebpelavew. Su kela ke kenè kew mulà mekeizi zutun he andew te kebpeǥezama te \sc Nengazen\sc* te pauk din.” 
\s1 Is Silut diyà te Nasyun he Filistia 
\p  
\v 4 “Egkaawà is langun he menge meǥinged diyà te Gaza wey Ashkelon. Is menge meǥinged diyà te Ashdod edsegseǥen seled dà te liwazà te andew, ne is menge meǥinged diyà te Ekron edsegseǥen daan puun te inged dan.  
\v 5 Mekehizuhizu kew is menge Filistihanen he ebpemen-ubpà diyà te veyvey te zaǥat. Iyan heini migkaǥi te \sc Nengazen\sc* he ebpekesuǥat keniyu: ‘Sikiyu is menge Filistihanen diyà te Canaan, edezeetan ku sikiyu ne wazà egkesamà keniyu.’  
\v 6 Umbe, is tanè niw he uvey te zaǥat egkehimu he pepenebtavà wey tudil te menge kerehidu.  
\v 7 Is tanè niw ed-engkenen te egkesamà he menge etew te Juda. Dutun sikandan ebpemepenabtab te menge uyaǥen dan, ne emun mezukilem diyè dan edhizeǥà te menge valey ziyà te Ashkelon. Edtentenuzan sikandan te \sc Nengazen\sc* he Megbevayè dan ne idlikù din is meupiya he kebpekesavuk dan.” 
\s1 Is Silut diyà te Nasyun he Moab wey Nasyun he Ammon 
\p  
\v 8-9 Migkaǥi is \sc Nengazen\sc* he Mekeǥeǥehem, he Megbevayà te Israel te, “Nezineg ku is kebpeeled-eled wey kedsudì te menge tig-Moab wey tig-Ammon te menge etew ku. Mibpahambug dan pa he egkehimu zan kun te ed-aǥew is tanà te menge etew ku. Umbe mibpenangdù a ziyà te gehinawa ku he edezeetan ku is Moab wey is Ammon iring te Sodom wey Gomora. Heini he menge tanà ne kenè en egkepulusan taman te taman. Ed-erikubmunan dà heini te zuǥiyen he menge sagbet wey egkeeneb te menge vudsi he zutun ebeeli is timus. Ed-eǥawen heini te egkesamà he menge etew ku ne egkuwaan dan is menge azen kayi.” 
\p  
\v 10 Migkaǥi si Zefanias te, “Iyan heeyan bales te kebpelavew te menge tig-Moab wey menge tig-Ammon. Su mibpeel-elezan dan wey midsudì dan is menge etew te \sc Nengazen\sc* he Mekeǥeǥehem.  
\v 11 Utew sikandan ebpelihendeka te \sc Nengazen\sc* su edezeetan din is langun he menge ed-ezapen kayi te kelibutan. Ne ed-azap kandin is menge etew ziyà te kada nasyun diyà te keugelingen dan he lugar.” 
\s1 Is Silut diyà te Nasyun he Etiopia wey Nasyun he Asiria 
\p  
\v 12 Migkaǥi is \sc Nengazen\sc* te, “Sikiyu zaan is menge tig-Etiopia,\f + \fr 2:12 \ft tig-Etiopia: sa Hebreo, tig-Cush.\f* ibpehimetayan ku sikiyu pinaaǥi te tebek. 
\p  
\v 13 “Edsilutan daan is menge tig-Asiria he ziyà te zizaya. Egkezeetan is Nineve wey egkeiring heini kemaza te disirtu.  
\v 14 Keniyan ebpemenleku is menge vaka, menge kambing, wey is duma pa he nekedseselekawà he menge langgam. Edlatun is menge ekang diyà te nengezeetan he menge tukud, ne is kegkaǥi zan egkezineg diyà te menge sulawà. Egkengeelangan is menge veyeey ne egkengetangtang is menge kayu he sidru.  
\v 15 Iyan heeyan egkehitavù diyà te inged he Nineve he mibpahambug is menge meǥinged duen he wazà ebpekekaid kandan, ne ke sikandan diyà te gehinawa zan te, ‘Wazè en duma he ebpekerepeng te kegkemekeǥeǥehem tew!’ Piru egkepurung heini egkezeeti he inged ne egkehimu zà heini he ubpeey te leew he menge langgam. Ne edsudien heini he inged te langun he sumeseǥazà kayi.” 
\c 3  
\s1 Is Egkepaabut te menge Tig-Jerusalem 
\p  
\v 1 Migkaǥi si Zefanias te, “Mekehizuhizu is Jerusalem! Is menge meǥinged kayi nekidsukulà te Megbevayà wey mibaal te mezaat he menge vaal, ne is menge pengulu kayi midlisedlised dan is menge etew.  
\v 2 Wazà minsan hentei he ebpezumdumahan dan, ne kenè dan egkesuat he edewayen. Wazè dan medsarig wey mebpetavang diyà te \sc Nengazen\sc* he Megbevayè dan.  
\v 3 Is menge upisyal zan henduen be te edhiniǥer he erimaung. Is menge pengulu zan henduen be te zumezaas he asu, ne ebpen-ahà te egkezeesan din emun mezukilem, ne haazà ne ed-eminen din te edaas ne wazà egkesamà ke meselem.  
\v 4 Is menge ebpeneuven diyà te kandan ne menge teruen ne kenà egkeseriǥan. Midremerikan te menge memumuhat dan is baley te \sc Nengazen\sc* wey midsupak dan is Kesuǥuan te Megbevayà.  
\v 5 Piru zutun gihapun is \sc Nengazen\sc* te inged dan. Mibeelan te \sc Nengazen\sc* is hustu ne wazà sikandin mebaal te kenà hustu. Kada andew ibpeehè din ke hengkey is hustu, ne wazè din heini engkezi te ebaal. Piru heini is lalung he menge etew mibpedayun gihapun te kebaal te mezaat ne wazà sikandan meeled. 
\p  
\v 6 “Guntaan migkaǥi is \sc Nengazen\sc* te, ‘Midezeetan ku is menge nasyun; midwaǥey ku is menge inged dan ragkes is menge verengbeng wey menge turi kayi. Wazà nesamà he menge meǥinged dutun, umbe wazè en etew he egkaahà he edhiphipanew ziyà te menge zalan dan.  
\v 7 Ne tenged kayi te mibeelan ku, iyan neisip ku is: siguradu he edtehuzen ad te menge etew ku ne edewaten dan en is kedsewaya ku kandan, su wey kenà mezeeti is inged dan sumalà te migkaǥi ku ziyà te kandan. Piru nasì en med-iseg is kebaal zan te salà. 
\p  
\v 8 “ ‘Umbe, sikiyu is menge metinumanen he menge tig-Jerusalem, teǥazi niw zà is kebpeheyaǥa ku te salà te menge nasyun. Su midisisyun ad he edtiǥumen ku is menge etew ziyà te menge nasyun wey menge ginhedian su wey ku ikepeǥezami kandan is utew ku kegkepauk he iring te hapuy he ebpekeepur te tivuuk he kelibutan.  
\v 9 Ne zutun ebeg-uwen ku is menge etew su wey zan pudu medangep kayi te kedì ne egkesevaha zan is ebpenilbi kedì.  
\v 10 Is menge etew ku he nekepeyapat diyà te egkehunaan te menge wahig diyà te Etiopia ed-uwit kayi te kediey te menge pemuhat. 
\p  
\v 11 “ ‘Dutun te andew te kedsilut ku, sikiyu is menge tig-Jerusalem kenè kew egkepeel-elezan tenged te langun he salà he mibeelan niw kayi te kedì. Su id-awè ku ziyà te keniyu is menge etew he menge teruen wey mepelevawen. Ne kenè kew en ed-uman ebpehambug diyà te segradu he vuntud ku.  
\v 12 Edsemaan ku ziyà te Jerusalem is menge etew he pubri wey egkaayuayu, ne ebuyù dan te tavang kayi te kedì.  
\v 13 Heini sikandan is egkesamà he menge Israilihanen ne kenà ebaal te mezaat; kenè dan edtarùtarù wey ebpenlimbung. Egkaan dan wey edlipezeng ne wazà ebpekepelihandek kandan.’ ” 
\s1 Egkelipey is menge Israilihanen 
\p  
\v 14 Migkaǥi si Zefanias te, “Sikiyu is menge meǥinged te Israel, ugyab kew! Sikiyu is menge meǥinged diyà te Zion, he iyan is inged he Jerusalem, kanta kew wey medlipey ziyà te tivuuk he gehinawa niw!  
\v 15 Su kenè kew en edsilutan te \sc Nengazen\sc*. Edsegseǥen din is menge kuntada niw. Duma niw is \sc Nengazen\sc*, he Hadì te Israel, umbe wazè en igkahandek niw he kezeetan. 
\p  
\v 16 “Dutun he andew egkaǥi is menge etew ziyà te keniyu te menge tig-Jerusalem, ‘Sikiyu is menge meǥinged diyà te Zion, kenè kew mahandek; kenè kew mebpenluyaluya.  
\v 17 Su zuma niw is \sc Nengazen\sc* he Megbevayè niw. Iring sikandin te mekeǥeǥehem he sundaru he edlibri keniyu. Igkelipey kew zin, ne pinaaǥi te kebmahala zin keniyu ebeg-uwen din is untung niw. Egkanta sikandin wey ed-ugyab te kegkelipey tenged keniyu,  
\v 18 iring te etew he egkelipey emun andew te pista.’ 
\p “Migkaǥi is \sc Nengazen\sc* te, ‘Id-awè ku is kemeresayan niw su wey kew kenà mepeel-elezi.  
\v 19 Dutun he andew, edsilutan ku is langun he midlisedlised keniyu. Edlibriyen wey edtiǥumen ku sikiyu is iring te menge kerehidu he nengepiangan wey nekedsusuwey. Mibpeel-elezan kew zengan, piru ebeǥayan ku sikiyu te zengeg wey edhimuwen ku he mevantug kew kayi te tivuuk he kelibutan.  
\v 20 Uya, edtiǥumen ku sikiyu zutun he timpu, ne ibpeulì ku sikiyu ziyà te tanè niw. Ebeǥayan ku sikiyu te zengeg wey edhimuwen ku he mevantug kew kayi te tivuuk he kelibutan. Egkeulaula heini zutun te timpu te kebpelikua ku te meupiya he kebpekesavuk niw, ne egkeehè niw mismu. Iyan, a is \sc Nengazen\sc*, is migkaǥi kayi.’ ”