\id ZEC - mbb OT -Philippines 2014 (DBL -2014) 
\ide 65001 - Unicode (UTF-8) 
\rem Copyright: Kermit Titrud (2012) 
\h Zacarias 
\toc1 Zacarias 
\toc2 Zacarias 
\toc3 Zac 
\mt1 Zacarias 
\c 1  
\s1 Is Tawag te Kebpelikù diyà te \sc Nengazen\sc* 
\p  
\v 1 Hein ikewalu he vulan te ikezuwa he tuig te kedhadì ni Darius diyà te Persia, duen migkaǥi te \sc Nengazen\sc* diyà te ebpeneuven he si Zacarias. Heini si Zacarias, anak ni Berekia wey apù ni Ido.  
\v 2-3 Is \sc Nengazen\sc* he Mekeǥeǥehem, midsuǥù din si Zacarias he keǥiya zin heini ziyà te menge etew te Israel: 
\p “Nepeukan ku utew is menge kepuun niw. Ne ǥuntaan likù kew kayi te kediey ne edlikù a ziyà te keniyu.  
\v 4 Kenè niw iringi is mibeelan te menge kepuun niw. Impekeǥiyan ku sikandan dengan te menge ebpeneuven he iniyuǥi zan en is mezaat he menge vaal zan, piru wazà sikandan medtuu. Wazà sikandan mebpezumazuma kedì.  
\v 5 Is menge kepuun niw wey sikan is menge ebpeneuven ne nemematey en.  
\v 6 Piru nehitavù diyà te menge kepuun niw is migkaǥi ku wey is menge petizaan he impekaǥi ku te menge suluǥuen ku he menge ebpemeneuven. Ne mid-iniyug te mezaat is menge kepuun niw he ke sikandan te, ‘Midsilutan kiw te \sc Nengazen\sc* he Mekeǥeǥehem te ereg he vales te menge vaal tew, sumalà te pelanu zin.’ ” 
\s1 Is Nelewasan Mehitenged te menge Kudà 
\p  
\v 7-8 Siak, si Zacarias, duen migkaǥi te \sc Nengazen\sc* kayi te kedì pinaaǥi te mibpelewasan din. Nehitavù heini hein mezukilem te ike-24 he andew te vulan he Shebat (he iyan ike-11 he vulan), hein ikezuwa he tuig te kedhadì ni Darius. Ne iyan heini pahayag ni Zacarias: 
\p Neehè ku is sevaha he etew he ed-untud te meriǥà he kudà. Mibpundu sikandin diyà te teliwazà te menge kayu he mirtu ziyà te suǥud. Diyà te egkehuziyanan din, duen menge etew he ebpemen-untud te meriǥà, iring te kaki, wey meputì he menge kudà.  
\v 9 Mid-insà a ziyà te velinsuǥuen he mibpekidlalag kedì te, “Datù, hengkey is ibpesavut kayi?” Midtavak sikandin te, “Egkeǥiyen ku kenikew ke hengkey is ibpesavut kayi.” 
\p  
\v 10 Ne sikan is etew he mibpundu ziyà te teliwazà te menge kayu he mirtu iyan midtavak kediey. Ke sikandin te, “Heeyan is menge pereuntud te kudà midsuǥù te \sc Nengazen\sc* te ked-elingkus te tivuuk he kelibutan.” 
\p  
\v 11 Ne migkaǥi sikan is menge pereuntud te kudà diyà te velinsuǥuen te \sc Nengazen\sc* he mibpundu ziyà te teliwazà te menge kayu he mirtu te, “Neelingkus dey en is tivuuk he kelibutan ne neehè dey he melinawen heini.” 
\p  
\v 12 Ne migkaǥi is belinsuǥuen te \sc Nengazen\sc* te, “\sc Nengazen\sc* he Mekeǥeǥehem, 70 en he tuig is kegkepeuki nu te menge tig-Jerusalem wey menge meǥinged diyà te zuma he menge inged diyà te Juda. Keenu nu pa edtepusa is kenè nu kegkehizuwi kandan?”  
\v 13 Ne midtavak te \sc Nengazen\sc* sikan is belinsuǥuen he mibpekidlalag kedì te meupiya wey ebpekelipey he menge lalag. 
\p  
\v 14 Umbe, migkaǥi haazà is belinsuǥuen kayi te kedì te edtudtulen ku heini is migkaǥi te \sc Nengazen\sc* he Mekeǥeǥehem: “Ingkeipeng ku is Jerusalem he migngezanan daan te Zion,  
\v 15 piru utew ku nepeuki is menge meǥinged diyà te menge nasyun he ebpeeyehey zà. Dengan kenè ded utew zekelà is pauk ku kandan, piru mid-unduran dan heini.  
\v 16 Umbe, edtevangan ku is menge tig-Jerusalem, ne ed-umanan ku ebenguna is Jerusalem ragkes en baley ku. Iyan a is \sc Nengazen\sc* he Mekeǥeǥehem migkaǥi kayi.” 
\p  
\v 17 Migkaǥi sikan is belinsuǥuen he tudtula ku zaan heini is migkaǥi te \sc Nengazen\sc* he Mekeǥeǥehem: “Ed-uman ed-uswag is menge inged ku ziyà te Juda. Ne ed-umanan ku edlipaya is menge tig-Zion, he iyan is menge tig-Jerusalem, ne ed-umanan ku egkilelaa heini he pinilì ku he inged.” 
\s1 Is Nelewasan Mehitenged te Heepat he Sungey wey Heepat he Pandey 
\p  
\v 18 Ne neehè ku is heepat he sungey.  
\v 19 Ne mid-insà a zuen te velinsuǥuen he nekidlalag kedì te, “Hengkey is ibpesavut kayi te menge sungey?” Midtavak e zin te, “Heini is menge sungey iyan is menge nasyun he mibpeyapat te menge etew te Israel wey Juda, ragkes en he impeyapat dan is menge etew te Jerusalem.” 
\p  
\v 20 Ne zuen heepat he pandey he impaahà kedì te \sc Nengazen\sc*.  
\v 21 Mid-insà a te, “Hengkey is ebeelan dan?” Midtavak sikandin te, “Ebpelihendeken dan wey ebengkaǥen dan is menge sungey, he iyan kehuluǥan dan is menge nasyun, su iyan heini he menge nasyun kes mibpurung medezaat te Juda wey mibpeyapat te menge meǥinged kayi.” 
\c 2  
\s1 Is Nelewasan Mehitenged te Etew he zuen Din para te Idsukud 
\p  
\v 1 Ne neehè ku is sevaha he etew he zuen din migewezan he idsukud.  
\v 2 Ne mid-insà a te, “Hendei ka ebpevayà?” Midtavak e zin te, “Diyà a te Jerusalem su edsukuzen ku ke sengemenu is keluaǥan din wey keleyatan din.”  
\v 3 Ne migenat haazà is belinsuǥuen he nekidlalag kedì, ne midsinuǥung sikandin te selakew en he velinsuǥuen  
\v 4 he migkaǥi ziyà te kandin te, “Egpas ka. Pelelaǥuy ka, ne keǥiyi nu haazà is betan-en he ed-uwit te sukud, he is Jerusalem egkehimu he inged he wazè din berengbeng su utew mahabet is menge meǥinged wey menge uyaǥen kayi.  
\v 5 Su migkaǥi is \sc Nengazen\sc* he iyan mismu sikandin egkehimu he verengbeng he hapuy he ebpekeliǥuy te inged he Jerusalem, ne iyan sikandin egkehimu he ǥehem kayi te inged.” 
\s1 Impelikù te \sc Nengazen\sc* is menge Keet-etawan Din diyà te Kandan he Lugar 
\p  
\v 6-7 Migkeǥiyan te \sc Nengazen\sc* is menge Israilihanen te, “Impeyapat ku sikiyu ziyà te minsan hendei he vahin te kelibutan. Piru ǥuntaan pemelaǥuy kew, ragkes kew en is mibihag pehendiyà te Babilonia, ne likù kew ziyà te Jerusalem.” 
\p  
\v 8 Hein nepasad is kegkaahaa ku zuen te menge nelewasan ku, midsugù a te \sc Nengazen\sc* he megkaǥi a te ebpekesuǥat diyà te menge nasyun he nenurung keniyu wey nenguwa te menge azen niw. Su is minsan hentei he ebpesipala keniyu, ebpesipelahan din is utew mahal te \sc Nengazen\sc*. Ne iyan heini kes migkaǥi te \sc Nengazen\sc* he Mekeǥeǥehem he ebpekesuǥat diyà te menge nasyun:  
\v 9 “Edsilutan ku iyan sikandan; edsurungen sikandan te menge uripen dan ne egkuwaan is menge azen dan.” 
\p Emun egkehitavù en heini egketuenan niw he iyan is \sc Nengazen\sc* he Mekeǥeǥehem midsuǥù kedì, migkaǥi si Zacarias. 
\p  
\v 10-11 Migkaǥi is \sc Nengazen\sc* te, “Ugyab kew tenged te kegkelipey, sikiyu is menge tig-Jerusalem, su ebpekeuma a ne ed-ubpà a zuma keniyu. Ne zutun he timpu, mahabet he menge nasyun is ebpesakup kedì. Ne egkehimu sikandan he menge etew ku.” 
\p Emun ekgehitavu en heini, egketuenan niw he iyan is \sc Nengazen\sc* he Mekeǥeǥehem midsuǥù kedì pehendiyà te keniyu.  
\v 12 Ed-umanan ed-engkena te \sc Nengazen\sc* is Juda he kandin he vahin te segradu he tanà te Israel. Ne ed-umanan din egkilelaa is Jerusalem he pinilì din he inged. 
\p  
\v 13 Ebmelinawen is langun he menge etew ziyà te etuvangan te \sc Nengazen\sc*, su ebpekeuma sikandin puun te segradu he ubpeey zin. 
\c 3  
\s1 Is Nelewasan Mehitenged te Lavew he Memumuhat 
\p  
\v 1 Ne impaahà te \sc Nengazen\sc* kedì is lavew he memumuhat he si Josue he edhithitindeg diyà te etuvangan te velinsuǥuen te \sc Nengazen\sc*. Midhitindeg diyà te egkekewanan din si Setanas he edsumbung kandin.  
\v 2 Piru migkeǥiyan duen te velinsuǥuen te \sc Nengazen\sc* si Setanas te, “Sayep ka, Setanas, su is Jerusalem pinilì en te \sc Nengazen\sc*. Su heini si Josue, midlibri zin puun te kegkevihag he iring te netutung he kayu he midsekelew zin puun te hapuy.” 
\p  
\v 3 Meremerik is bisti ni Josue zutun te edhithitindeg sikandin diyà te etuvangan te velinsuǥuen.  
\v 4 Umbe, migkaǥi haazà is belinsuǥuen diyà te zuma he menge velinsuǥuen he ebpemenhitindeg diyà te etuvangan ni Josue te, “Luwasa niw is meremerik he visti zin.” Ne migkeǥiyan din si Josue te, “In-awè ku en is menge salè nu. Ne ǥuntaan ebistiyan ku sikew te veǥu he visti.”  
\v 5 Ne migkaǥi a te, “Suupi niw zaan te lumpiyu he tengkulu is ulu zin.” Umbe mibpesul-uvan dan sikandin te visti wey lumpiyu he tengkulu dutun te edhithitindeg is belinsuǥuen te \sc Nengazen\sc* he ebantey. 
\p  
\v 6 Ne migkeǥiyan duen te velinsuǥuen te \sc Nengazen\sc* si Josue  
\v 7 te migkaǥi te \sc Nengazen\sc* he Mekeǥeǥehem: “Emun edsunud ka te menge paaǥi ku wey edtuman ka te ibpetuman ku, ebpekepengulu ka ziyà te valey ku wey ebpekezumala ka ziyà te lama kayi. Ne edtuǥutan ku sikew te ked-uvey ziyà te etuvangan ku iring kayi te menge velinsuǥuen he ebpemenhithitindeg kayi.  
\v 8 Guntaan pemineg ka Josue he lavew he memumuhat: Sikew wey is duma nu he memumuhat, menge tuus kew te edtelinguma he menge hitavù. Su edsuǥuen ku is suluǥuen ku he migngezanan te Subpang.  
\v 9 Josue, tengtengi nu is batu he insavuk ku ziyà te etuvangan nu, duen kayi pitu he mata. Ebpeukiran ku heini, ne id-awè ku is salà te menge etew te nasyun he Israel te senga andew zà.  
\v 10 Dutun he timpu ed-ubpè kew he melinawen. Is kada sevaha keniyu, ebpengimbita te siringan din te kebpinuu ziyà te lempek te paras din wey kayu zin he higus. Iyan a, is \sc Nengazen\sc* he Mekeǥeǥehem, is migkaǥi kayi.” 
\c 4  
\s1 Is Nelewasan Mehitenged te Bulawan he Selevukà te Sulù wey te Zezuwa he Kayu he Ulibu 
\p  
\v 1 Midlikù sikan is belinsuǥuen he nekidlalag kedì ne mibpukew e zin su henduen be te nekelipezeng a.  
\v 2 Mid-insà sikandin kayi te kedì te, “Hengkey is neehè nu?” Midtavak a te, “Neehè ku is sevaha he vulawan he selevukà te sulù. Diyà te zivavew kayi zuen yehung he itisà te lana. Ne ziyà te peliǥuy zutun te yehung duen dutun pitu he sulù ne is kada sevaha zutun duen din pitu he tuvu he veyeey te lana.  
\v 3 Duen dezuwa he kayu he ulibu ziyà te kilid kayi; is sevaha zutun ne ziyà dapit te egkekewanan ne is sevaha ziyà te egkeǥivang.” 
\p  
\v 4 Mid-insaan ku sikan is belinsuǥuen he nekidlalag kedì te, “Datù, hengkey is ibpesavut kayi te pitu he sulù?”  
\v 5 Midtavak te, “Wazè nu ve metueni ke hengkey is ibpesavut kayi?” Midtavak a te, “Wazà, datù.”  
\v 6 Ne migkaǥi sikandin kayi te kedì te, “Kenè ku pa edtevaken is insè nu, ne pemineǥa nu heini is menge lalag te \sc Nengazen\sc* he Mekeǥeǥehem diyà te ki Zerubabel: 
\p “Zerubabel, egkepasad nu is kebpehitindeg te valey te \sc Nengazen\sc* kenè pinaaǥi te zesen wey egkehimu te etew, kekenà, pinaaǥi te Mulin-ulin he ibpetavang ku kenikew.  
\v 7 Minsan iring pa kezekelà te vuntud is menge velavag he ed-etuvangen nu, ne egkepanhey heeyan. Egkepasad iyan is baley ku, ne zutun te kebpelestara te ketepusan he vatu he egkeǥamit kayi, igkulahì te menge etew is lalag te, ‘\sc Nengazen\sc*, penubtuvazi nu heini!’ ” 
\p  
\v 8 Umbe, pinaaǥi te velinsuǥuen, migkaǥi is \sc Nengazen\sc* kayi te kedì  
\v 9 he egkepasad is baley zin pinaaǥi te kedumala ni Zerubabel, iring te nehimu is ebpehitindeǥan kayi pinaaǥi ǥihapun te kandin he kedumala. Ne emun egkehitavù en heini, egketuenan niw he iyan midsuǥù kedì te kebpenudtul ziyà te keniyu is \sc Nengazen\sc* he Mekeǥeǥehem.  
\v 10 Duen menge etew he edsawey su ǥeina te zeisey pa is nehimu zuen te kebpehitindeǥa te valey te \sc Nengazen\sc*. Piru edlipey zed sikandan emun egkeehè dan en he ibpelastar en ni Zerubabel zuen te valey te \sc Nengazen\sc* is ketepusan he pinilì he vatu. 
\p Ne migkaǥi kayi te kedì sikan is belinsuǥuen te, “Iyan ibpesavut keniyan te pitu he sulù is menge mata te \sc Nengazen\sc* he edtengteng diyà te tivuuk he kelibutan.” 
\p  
\v 11 Ne mid-insaan ku haazà is belinsuǥuen te, “Hengkey is ibpesavut keniyan te zezuwa he kayu he ulibu he ziyà te egkekewanan wey egkeǥivang he lugar keniyan te impehitindeg he selevukà te sulù.  
\v 12 Wey hengkey is ibpesavut keniyan te zezuwa he subpang te kayu he ulibu he ziyà te pesikilizà te zezuwa he vulawan he tuvu he ebpeveyaan te lana?”  
\v 13 Midtavak sikandin te, “Wazè nu ve metueni ke hengkey is ibpesavut keniyan?” Midtavak a te, “Wazà, datù.”  
\v 14 Umbe, migkaǥi sikandin te, “Iyan kehuluǥan keniyan is dezuwa he etew he mibpilì para mekepenilbi te Nengazen he ebayàbayà te tivuuk he kelibutan.” 
\c 5  
\s1 Is Nelewasan Mehitenged te Linulun he Belesahan he Midlayang 
\p  
\v 1 Midlilingey a ne neehè ku is sevaha he linulun he velesahan he midlayang.  
\v 2 Mid-insà is belinsuǥuen kayi te kedì te, “Hengkey is neehè nu?” Midtavak a, “Neehè ku is linulun he velesahan he midlayang, he menge 30 he ǥiek is keleyat din ne menge 15 he ǥiek is keluag din.” 
\p  
\v 3 Ne migkaǥi haazà is belinsuǥuen kayi te kedì te, “Nekesurat keniyan te velesahan is rawak he egkehitavù diyà te tivuuk he tanà te Israel. Nekaǥi ziyà te senge vahin he id-awà puun te Israel is langun he menge tekawen, ne nekaǥi ziyà te selakew en he vahin he id-awà daan is langun he ebpenangdù te tarù.  
\v 4 Migkaǥi is \sc Nengazen\sc* he Mekeǥeǥehem, ‘Ibpaaǥi ku heini he rawak ne edseled heini ziyà te valey te tekawen wey ziyà te valey te nenangdù te tarù he migamit din is ngazan ku. Ne kenà heini egkaawà diyà te kandan taman te egkepurung egkewaǥey is menge valey zan.’ ” 
\s1 Is Nelewasan Mehitenged te Bahi ziyà te Seled te Revan 
\p  
\v 5 Mid-uman mebpaahà sikan is belinsuǥuen he nekidlalag kedì, ne migkaǥi te, “Tengtengi nu ke hengkey heeyan is edhengkayi.”  
\v 6 Mid-insà a te, “Hengkey heeyan?” Midtavak sikandin te, “Revan heeyan he para te idtakes. Iyan ibpaalung keniyan is menge salà te menge etew ziyà te tivuuk he tanà te Israel.” 
\p  
\v 7 Heeyan is revan duen din tangeb he timeǥà. Ne hein mibpuwas haazà is tangeb, neehè ku he zuen bahi he ebpimpinuu ziyà te seled dutun te revan.  
\v 8 Migkaǥi haazà is belinsuǥuen te, “Heini is bahi simbulu te kelelalung.” Ne intekenled din dutun te seled te revan sikan is bahi ne midtengevan din.  
\v 9 Ne neehè ku is dezuwa he vahi he edlayang he utew meǥaan. Meluag is menge pakpak dan iring te pakpak te dugwak ne mibitbit dan diyà te zivavew sikan is revan.  
\v 10 Ne mid-insà a zuen te velinsuǥuen he nekidlalag kedì te, “Hendei zan ed-uwita sikan is revan?”  
\v 11 Midtavak sikandin te, “Ziyà te Babilonia he zutun ebengunen is simbahan he para kayi. Emun egkepasad en is simbahan, ne ibpelastar zutun heeyan is revan su para ed-ezapen.” 
\c 6  
\s1 Is Nelewasan Mehitenged te Heepat he Kerwahi 
\p  
\v 1 Duen daan neehè ku he heepat he kerwahi he midlepew puun te pid-elangan te zezuwa he vuntud he brunsi.  
\v 2 Is nehuna he kerwahi eguyuzen te meriǥà he menge kudà, is ikezuwa eguyuzen te meitem he menge kudà,  
\v 3 is iketelu eguyuzen te meputì he menge kudà, ne is ikeepat eguyuzen te kevangan he menge kudà. Ne pudu mezesen haazà is menge kudà.  
\v 4 Mid-insà a zuen te velinsuǥuen he nekidlalag kedì te, “Datù, hengkey is ibpesavut kayi te menge kerwahi?”  
\v 5 Midtavak haazà is belinsuǥuen, “Iyan heeyan heepat he mulin-ulin diyà te langit he migawas puun te etuvangan te Nengazen te kedtuman te ebpeveelan kandan kayi te tivuuk he kelibutan.”  
\v 6 Sikan is kerwahi he eguyuzen te meitem he menge kudà, midhendiyà te zizaya. Sikan is kerwahi he eguyuzen te meputì he menge kudà, midhendiyà te edsenlepan. Ne sikan is kerwahi he eguyuzen te kevangan he menge kudà, midhendiyà te zivavà. 
\p  
\v 7 Heini is mezesen he menge kudà edsikadsikad en su egkesuat dan he ed-elingkus te tivuuk he kelibutan. Migkaǥi sikan is belinsuǥuen diyà te kandan te, “Sigi, elingkusa niw en is tivuuk he kelibutan.” Umbe mid-elingkus dan is tivuuk he kelibutan.  
\v 8 Ne mibensag is \sc Nengazen\sc* kayi te kedì te, “Tengtengi nu is menge kudà he ebpehendiyà te zizaya. Ibpehimeley zan is Mulin-ulin ku keniyan he lugar.” 
\s1 Is Kuruna he para ki Josue 
\p  
\v 9 Migkaǥi is \sc Nengazen\sc* kayi te kedì te,  
\v 10 “Kuwaa nu is menge pelata wey menge vulawan he inggasa eni Heldai, Tobia, wey Jedaya. Ne hendiyè ka diritsu te valey ni Josia he anak ni Zefanias. Sikandan is heepat, nekelikù en puun te kegkevihaǥa kandan diyà te Babilonia.  
\v 11 Ne peveeli nu he kuruna sikan is menge pelata wey menge vulawan. Ne ikuruna nu haazà diyà te ulu te lavew he memumuhat he si Josue he anak ni Jehozadak.  
\v 12-13 Ne keǥiyi nu sikandin, he siak, is \sc Nengazen\sc* he Mekeǥeǥehem, migkaǥi a te, ‘Is etew he migngezanan te Subpang ed-uswag is kebpekesavuk din ne iyan sikandin ebangun te valey ku. Ebeǥayan sikandin te zengeg pinaaǥi te kegkahadì din ne ebpengulu sikandin. Ne zuen memumuhat he edhitindeg diyà te avey te pinuuwè din te kedhadì ne egkeuyun sikandan is dezuwa.’  
\v 14 Haaza is kuruna kenà id-awà diyà te valey ku su tedeman haazà ki Heldai, ki Tobia, ki Jedaya, wey ki Josia he menge anak ni Zefanias.” 
\p  
\v 15 Is menge etew he ebpuun diyà te meziyù he menge lugar edhengkayi te Israel ne ed-uǥup dan ebangun te valey te \sc Nengazen\sc*. Emun egkeulaula en heini, ne egketuenan niw he iyan is \sc Nengazen\sc* he Mekeǥeǥehem midsuǥù kedì te kebpenudtul kayi ziyà te keniyu. Egkehitavù iyan heini emun ebpurungan niw ebpezumdumahi is \sc Nengazen\sc* he Megbevayè niw. 
\c 7  
\s1 Midrewakan te \sc Nengazen\sc* is Kenà Ebpuun diyà te Gehinawa he Kebpuasa 
\p  
\v 1 Duen migkaǥi te \sc Nengazen\sc* diyà te ki Zacarias hein ikeepat he andew te vulan he Kislev (he iyan ikesiyam he vulan te tuig), dutun te ikeepat he tuig te kedhadì ni Darius.  
\v 2 Nehitavù heini hein midsuǥù te menge etew he ziyà te Betel si Sharezer wey si Regem Melec, duma te menge etew zan.  
\v 3 Su wey zan hengyui is menge memumuhat diyà te valey te \sc Nengazen\sc* wey is menge ebpeneuven he insai zan is \sc Nengazen\sc* ke kinahanglan pe be is kedseengseeng wey kebpuasa zan dutun te ikelima he vulan he paaǥi te kedtedemi te kegkerundus te valey te \sc Nengazen\sc*, iring te layun dan ebeeli seled en te mahabet he menge tuig.  
\v 4 Ne iyan heini migkaǥi te \sc Nengazen\sc* he Mekeǥeǥehem diyà te ki Zacarias:  
\v 5 “Keǥiyi nu is langun he menge etew te Israel ragkes en is menge memumuhat, he is kebpuasa zan wey kedseengseeng dan te kada ikelima wey ikepitu he vulan seled te kepituwan en he tuig wazè dan himuwa para kediey.  
\v 6 Emun egkaan dan wey ed-inum, ne ebeelan dan heini para te keugelingen dan he kelipey.  
\v 7 Iyan daan heini menge lalag he impekaǥi ku zengan te menge ebpeneuven, dutun te timpu he meuswaǥen pa is Jerusalem wey mahabet pa is menge etew kayi ragkes is menge inged diyà te peliǥuy zin, wey ragkes is Negev wey is menge mibuntud-buntud diyà te edsenlepan.” 
\p  
\v 8 Migkaǥi en man is \sc Nengazen\sc* diyà te ki Zacarias te,  
\v 9 “Iyan heini migkaǥi ku ziyà te menge etew ku: ‘Iveǥey niw is metazeng he kukuman. Ipeehè niw is keupiya niw wey kebpekedhihizuwè niw.  
\v 10 Kenè niw dèdaaǥa is menge valu he vahi, is menge ilu, is menge lumelengyawà, wey menge pubri. Kenè kew med-isip te mezaat diyà te minsan hentei keniyu.’ 
\p  
\v 11 “Piru wazè dan medseǥipà te migkaǥi ku. Mezesen is kedsupak dan wey kenè dan ebpemineg.  
\v 12 Impemezesen dan is gehinawa zan iring te vatu, ne wazè dan mebpemineg te Kesuǥuan wey te menge lalag he impekaǥi te Mulin-ulin ku pinaaǥi te menge ebpeneuven dengan. Umbe siak, is \sc Nengazen\sc* he Mekeǥeǥehem, utew a nepauk.  
\v 13 Ne ǥeina te wazè dan mebpemineg te migkaǥi ku, ne kenà a zaan ebpemineg emun ed-umawen e zan.  
\v 14 Iring a te eribpures he mibpeyapat kandan diyà te menge lugar he wazè dan keenu meveyai. Neewaan dan is meupiya he tanè dan, ne nehimu heini he mekevulungbulung.” 
\c 8  
\s1 Midsaad is \sc Nengazen\sc* he Edtuvazan Din is Jerusalem 
\p  
\v 1-2 Migkaǥi en maan is \sc Nengazen\sc* he Mekeǥeǥehem diyà te ki Zacarias te, “Utew ku ingkeipeng is Jerusalem. Ne tenged te zekelà he ipeng ku kayi he inged, utew ku nepeuki is menge kuntada zin.  
\v 3 Edlikù a ziyà te Zion, kes inged he Jerusalem, ne ed-ubpà a ziyà. Ne egngezanan is Jerusalem te Metinumanen he Inged wey egngezanan heini is buvungan ku te Buvungan he Segradu.  
\v 4 Ed-uman en ebpememinuu ziyà te menge pelasa te Jerusalem is menge meǥurang he ebpenutuked en tenged te utew zan kegkeǥurang.  
\v 5 Ne egkeeneb te eguǥusà he menge vatà is menge pelasa.” 
\p  
\v 6 Migkaǥi pa is \sc Nengazen\sc* he Mekeǥeǥehem, “Kela ke egkeisip te nesamà he menge etew ku he mereǥen en is kegkehitevua kayi, piru kayi te kedì kenà heini mereǥen.  
\v 7 Edlibriyen ku is menge etew ku he mibihag pehendiyà te menge tanà diyà te edsilaan wey edsenlepan.  
\v 8 Ed-umanan ku sikandan ed-uwita ziyà te Jerusalem ne ibpeubpè ku zutun. Ne egkehimu en maan sikandan he menge etew ku ne egkehimu a he Megbevayè dan he metinumanen wey metazeng.” 
\p  
\v 9 Migkaǥi pa is \sc Nengazen\sc* he Mekeǥeǥehem, “Heini he menge lalag migkaǥi zengan te menge ebpeneuven hein timpu te kebeeli te pundasyun te valey ku. Ne ǥuntaan te neuman niw heini mezineg, mebpekelig-en kew su wey niw mepasad is kebangun te valey ku.  
\v 10 Hein wazè pa mepuuni is ked-umana kebenguna te valey ku, melised is kebpekesavuk niw ragkes is kepekesavuk te menge uyaǥen niw. Wazà meveyazi is menge etew he edterebahu wey menge uyaǥen he migamit te kedterebahu, wey mekulbà is kedhiphipanew ziyà te minsan hendei su midhimu ku he mekedtetebek is menge etew.  
\v 11 Piru ǥuntaan, siak is \sc Nengazen\sc* he Mekeǥeǥehem, egkaǥi a te kenè ku en heini ebeelan diyà te keniyu te nengesamà.  
\v 12 Ke ebpemula kew ne zuen kelinew. Ebpemeǥas is menge paras, duen egkeraǥun diyà te tanà, ne zuen en dehemug. Heini is langun, ibeǥey ku ziyà te keniyu te egkengesama, ne egkaangken niw heini.  
\v 13 Sikiyu is menge etew te Juda wey Israel, midrewakan kew te menge etew ziyà te zuma he menge nasyun. Piru edlibriyen ku sikiyu ne egkehimu kew he tuvad diyà te kandan. Umbe kenè kew mahandek, kekenà, pekelig-en kew.” 
\p  
\v 14 Migkaǥi pa is \sc Nengazen\sc* he Mekeǥeǥehem, “Hein midhimu te menge kepuun niw he mepauk a, nekehukum a he edsilutan ku sikandan wey kenè ku egkehizuwan.  
\v 15 Piru ǥuntaan nekehukum a he ibpelaus ku is kebaal te meupiya ziyà te Jerusalem wey Juda. Umbe kenè kew mahandek.  
\v 16 Iyan heini ereg he ebeelan niw: Keǥiya niw is tutuu ziyà te kada sevaha keniyu. Iveǥey niw is metazeng he kukuman diyà te menge hukmanan niw he para te keupiyaanan te langun.  
\v 17 Kenè kew pelanu te mezaat diyà te iring niw he etew, wey kenè kew penangdù te tarù. Su igkeepes ku is langun kayi he menge vaal.” 
\p  
\v 18-19 Migkaǥi en maan is \sc Nengazen\sc* he Mekeǥeǥehem diyà te ki Zacarias te, “Is kebpuasa ziyà te ikeepat, ikelima, ikepitu, wey ikesepulù he menge vulan, egkehimu he melipayen he timpu para te menge etew te Juda. Umbe mahala niw is tutuu wey kelinew.  
\v 20 Mahabet he menge etew he ebpemuun diyà te nekedseselekawà he menge inged is ebpemenhendiyà te Jerusalem.  
\v 21 Is menge meǥinged diyà te sevaha he inged, ebpenginggat diyà te sevaha pa he inged he egkaǥi te, ‘Edhendiyè key te kedsimba wey kedhangyu te tuvad te \sc Nengazen\sc* he Mekeǥeǥehem. Hendini kew en, duma kew kenami!’ 
\p  
\v 22 “Mahabet he menge etew he ebpemuun diyà te gehemanen he menge nasyun is edhendiyà te Jerusalem te kedsimba wey kedhangyù te tuvad.  
\v 23 Dutun he timpu, sepulù he etew he ebpuun diyà te nekedseselekawà he menge nasyun wey kineǥiyan is edhendiyà te sevaha he Judio he egkaǥi te, ‘Ipezuma key kenikew, su nezineg dey he nekiduma keniyu is Megbevayà.’ ” 
\c 9  
\s1 Edsilutan te \sc Nengazen\sc* is menge Nasyun he Kuntada te Israel 
\p  
\v 1 Iyan heini menge lalag te \sc Nengazen\sc*: 
\p Migkaǥi is \sc Nengazen\sc* he edsilutan din is menge inged he Hadrac wey Damascus, su kinahanglan he edtengteng wey edangep diyà te \sc Nengazen\sc* is langun he menge etew lavew en is menge tribu te Israel.  
\v 2 Edsilutan daan te \sc Nengazen\sc* is Hamat he sikbit he inged te Hadrac wey te Damascus, wey ziyà te menge inged he Tyre wey Sidon, minsan duen ebilidad te menge meǥinged kayi.  
\v 3 Mibangun is menge meǥinged diyà te Tyre te verengbeng, wey midtambù sikandan te pelata wey vulawan he henduen dà te midtambù sikandan te tanà su utew heini zekelà.  
\v 4 Piru egkuwaan te \sc Nengazen\sc* is menge azen dan ne idtimbag din diyà te zaǥat. Ne egkevinsulan is tivuuk he inged dan. 
\p  
\v 5 Egkaahà heini te menge meǥinged diyà te Ashkelon ne egkahandek sikandan. Utew egkesekiti is menge meǥinged diyà te Gaza, wey iring din ded daan is menge meǥinged diyà te Ekron su egkaawà is midseriǥan dan. Ebpatey is hadì diyà te Gaza, ne kenè en egkeubpaan is Ashkelon.  
\v 6 Is Ashdod, ed-ubpaan te menge etew he nekedseselekawà is kepuun. Edezeetan te \sc Nengazen\sc* is impehivantug te menge Filistihanen.  
\v 7 Kenè en sikandan egkaan te usa he zuen din pa lengesa wey menge keenen he imbandu is kegkeena zuen. Is egkesamà kandan, ed-isipen te Megbevayè tew he menge etew zin, ne egkehimu en sikandan he zuma te menge etew te Juda. Is menge meǥinged diyà te Ekron, egkehimu he zuma te menge etew te \sc Nengazen\sc* iring te menge Jebusihanen dengan.  
\v 8 Ebpengelangan te \sc Nengazen\sc* is baley zin su wey kenà mezezeeti te menge edsurung. Wazè en edaagdaag te menge etew zin, su ebentayan din sikandan. 
\s1 Is Egkehimu he Hadì diyà te Jerusalem 
\p  
\v 9 Migkaǥi is \sc Nengazen\sc* te, “Ugyab kew tenged te kegkelipey is menge meǥinged diyà te Zion, he iyan is inged he Jerusalem, su ebpekeuma is hadì niw. Metazeng sikandin wey mezeeǥen. Kenà sikandin mepelevawen ne ebpekeuma he ed-untud te nati he asnu.  
\v 10 Id-awè ku is kebpetebtebekà. Id-awè ku is para te tebek he menge kerwahi wey menge kudà te Israel wey Juda. Is menge panà he para te tebek ne ebedtien ku. Is ebpekeuma he hadì, egkaǥi ziyà te menge nasyun he engkezi zan en is kedtebek. Edhadì sikandin puun te sevaha he zaǥat taman te sevaha pa he zaǥat, wey puun te Wahig he Eufrates taman te kineziyuan he vahin te kelibutan.” 
\s1 Ibpelingkawas te \sc Nengazen\sc* is menge Israilihanen he Nevihag 
\p  
\v 11 Migkaǥi pa is \sc Nengazen\sc* te, “Mehitenged keniyu te menge Israilihanen, ibpelingkawas ku is menge nevihag keniyu. Iring sikandan te etew he in-ulug diyà te kalut he wazà duen wahig. Ibpeǥawas ku sikandan tenged te kebpekid-uyun ku keniyu he midlig-enan pinaaǥi te lengesa.  
\v 12 Sikiyu is menge nevihag he ebperateng he mekelingkawas, likù kew en diyà te melig-en he menge lugar. Ǥuntaan egkaǥi a ziyà te keniyu he idlikù diyà te keniyu he edtekepen is naawà diyà te keniyu.  
\v 13 Egemiten ku is Juda wey Israel he iring te panà. Edhimuwen ku is menge etew ziyà te Zion he iring te ispada he idsiwer ku, ne edezeetan dan is menge etew ziyà te Grecia.” 
\s1 Edtevangan te \sc Nengazen\sc* is menge Etew Zin 
\p  
\v 14 Ne ebpaahà is \sc Nengazen\sc* diyà te zivavew zan. Ne egkivelat is besut te panè din iring te kilat. Ne ibpezaǥing te Nengazen he MEGBEVAYÀ is trumpita; ne ebpekeuma sikandin duma te vagyu he ebpuun diyà te zivavà.  
\v 15 Ebpengelangan te \sc Nengazen\sc* he Mekeǥeǥehem is menge etew zin. Bà dan dà edtekutaki is menge vatu he idlempawes kandan te menge kuntada zan. Egkaan dan wey ed-inum dan te kedsilibra te kezeeǥan dan. Ed-ugyab sikandan he henduen be te egkengelangut. Egkepenù is getek dan te inumen iring te yehung he egkepenù te lengesa he ibpirik diyà te purù te menge suyuk te pemuhata.  
\v 16-17 Dutun he andew edlibriyen sikandan te \sc Nengazen\sc* he Megbevayè dan he iring te menge kerehidu zin. Mekempet wey mezagwey sikandan he edtengtengan diyà te tanè dan. Iring sikandan te mahalen he menge vatu he ed-ilak-ilak diyà te kuruna. Is dekelà he sebpet dan ebpekeveǥey te zesen diyà te menge vetan-en dan. 
\c 10  
\s1 Is Hizu te \sc Nengazen\sc* te Juda wey Israel 
\p  
\v 1 Buyù ka te uzan diyà te \sc Nengazen\sc* dutun te timpu te kedtuvù te menge pinemula su iyan sikandin mibaal te kivel. Su iyan sikandin mibeǥey te uzan diyà te menge etew wey menge pinemula ziyà te menge vevesukà. 
\p  
\v 2 Benar iyan, kenà ereg he edtuuwan is duma he menge ed-ezapen wey is menge menenagnà. Edseysey zan te sayep he kehuluǥan te menge teǥeinep. Wazà pulus te menge lalag dan he idasig. Umbe neiring is menge etew te Israel te menge kerehidu he nengetazintazin. Nerasey zan su wazè dan pengulu. 
\p  
\v 3 Migkaǥi is \sc Nengazen\sc* te, “Utew ku nepeuki is menge etew he nengulu te menge etew ku; edsilutan ku iyan sikandan. Ne edtentenuzan ku is menge kerehidu ku, he iyan is menge etew ziyà te Juda. Edhimuwen ku sikandan he iring te menge kudà he para te tebek he layun dà ebpekezaag.  
\v 4 Ebpuun diyà te kandan is menge pengulu he iring te vatu he zutun ebpuuni is kedsukud, palpal te tulda, wey panà he para te tebek.  
\v 5 Edsevaha is menge etew te Juda ne egkeiring sikandan te mezesen he menge sundaru he edaag te menge kuntada zan he henduen dà te vasak diyà te menge zalan he edtekutakan dan. Ebpekidtebek dan su ǥeina te siak is \sc Nengazen\sc*, dume e zan. Ne edaaǥen dan is menge pereuntud te kudà. 
\p  
\v 6 “Edlig-enan ku is menge etew te Juda ne edlibriyen ku is menge etew te Israel. Ibpelikù ku sikandan diyà te kandan he lugar su nehizuwan ku sikandan. Wey tenged te iyan a \sc Nengazen\sc* he Megbevayè dan, edtevaken ku is menge ked-ampù dan. Umbe iring ded te wazè ku sikandan iselikwey.  
\v 7 Is menge etew te Israel, egkeiring sikandan te mezesen he menge sundaru. Ebmelipayen sikandan he iring te etew he nekeinum te vinu. Egketenuzan te menge kevuwazan dan heini he kezeeǥan ne egkelipey zan tenged te mibeelan ku.  
\v 8 Ed-umawen ku is menge etew ku ne edtiǥumen ku sikandan. Edlibriyen ku iyan sikandan, ne ebmahabet dan iring te zengan.  
\v 9 Minsan impeyapat ku sikandan diyà te zuma he menge nasyun, egketenuzan e zan ded dutun. Ebpedayun is kegkeuyag-uyag dan ragkes is menge anak dan, ne ed-ulì sikandan diyà te kandan he lugar.  
\v 10 Ibpeulì ku sikandan puun te Ehipto wey Asiria. Ne ibpeubpè ku sikandan diyà te ubpeey zan taman te Gilead wey Lebanon. Edsubra is kezakel zan taman te kenè dan en ed-ereg diyà te tanè dan.  
\v 11 Edleyunen dan is ebpemaǥel he zaǥat piru ed-engked is menge vaǥel. Minsan is Wahig he Nilo ne egkemezahan. Is gelbuwen he Asiria ne ibpekevavà. Ne is gehem te Ehipto egkahanew.  
\v 12 Edlig-enan ku is menge etew ku su ziyè dan man te kediey, ne edsunud dan kediey. Iyan heini migkaǥi ku te \sc Nengazen\sc*.” 
\c 11  
\s1 Edsilut is \sc Nengazen\sc* diyà te Lebanon wey Bashan 
\p  
\v 1-2 Sikiyu is menge meǥinged diyà te Lebanon, puwasi niw is menge pultahan te menge inged niw su wey mekeseled is hapuy he ebpekevinsul te menge kayu niw he sidru. Egkengezeetan daan is menge kayu he sipris wey is menge kayu he ulayan diyà te Bashan.  
\v 3 Ebpemenineǥew is menge perevantey te menge kerehidu su egkengezeetan is melambeg he menge penebtavà dan. Edhiniǥer is menge erimaung su egkengezeetan is menge ketelunan diyà te Jordan he ubpeey zan. 
\s1 Is Dezuwa he Perevantey te Uyaǥen 
\p  
\v 4 Iyan heini migkaǥi te \sc Nengazen\sc* he Megbevayè ku: 
\p “Etura nu is para te edlepaan he menge kerehidu.  
\v 5 Is menge nemasa wey midlapà kayi ne wazà siluti. Is menge mibelegyà dutun, egkaǥi te, ‘Ereg he edeliǥen is \sc Nengazen\sc*! Su sepian ad!’ Minsan is menge perevantey wazè dan ikehizu haazà is menge kerehidu. 
\p  
\v 6 “Etura is menge etew ku su iyan a is \sc Nengazen\sc* egkaǥi te kenè ku en egkehizuwan is menge etew kayi te kelibutan. Kedì he ketau is kegkesekupa te kada etew te iring din he etew wey te hadì din. Ne heini is dizalem te ǥehem dan is duma, kezeetan is ed-uwiten dan kayi te kelibutan, ne kenè ku edlibriyen is menge etew puun te ǥehem dan.” 
\p  
\v 7 Umbe, mid-atur ku is menge kerehidu he para te edlepaan te ebpemelegyà te kerehidu. Migkuwa a te zezuwa he tuked; is sevaha, migngezanan ku te Keupiya ne is sevaha pa migngezanan ku te Kedsevaha. 
\p  
\v 8 Naawà is pelavey ku zuen te tetelu he menge perevantey te menge kerehidu he nepeukan e zan. Umbe impaawè ku sikandan is langun seled dà te senge vulan.  
\v 9 Ne migkeǥiyan ku is menge kerehidu te, “Kenà ad ed-atur keniyu. Belaǥad en ke ebpatey is hapit en ebpatey wey ke mezeeti is hapit en egkezeeti. Ne is egkengesamà, belaǥad en ke mebpekèkeenà is kada sevaha.” 
\p  
\v 10 Ne migkuwa ku sikan is tuked he migngezanan te Keupiya ne mibadtì ku heini he tuus te kenè en edleusen te \sc Nengazen\sc* is kebpekid-uyun din te langun he menge etew.  
\v 11 Umbe, zutun he andew wazè en bali zutun he kebpekid-uyun. Is menge ebelegyà te menge kerehidu he midtengteng kedì, netuenan dan he zuen ibpesavut te \sc Nengazen\sc* pinaaǥi kayi te mibeelan ku.  
\v 12 Ne migkeǥiyan ku sikandan te, “Emun egkeisip niw he ereg a he edsuhulan, ne iveǥey niw kedì is suhul ku. Iyan, emun kenà a ereg, ne keniyu en heeyan.” Umbe, mibeyazan e zan te 30 he vuuk he pelata he suhul zan kedì.  
\v 13 Migkaǥi is \sc Nengazen\sc* kayi te kedì te, “Itaǥù nu heeyan is selapì duen te teleǥuey te selapì diyà te valey ku.” Umbe migkuwa ku haazà is 30 he vuuk he pelata, he mid-isip dan he ereg en he suhul kedì, ne intaǥù ku zuen te teleǥuey te selapì diyà te valey te \sc Nengazen\sc*.  
\v 14 Ne mibadtì ku sikan is ikezuwa he tuked he migngezanan te Kedsevaha he tuus te netamped en is meupiya he kedepità te Juda wey Israel. 
\p  
\v 15 Mid-uman megkaǥi is \sc Nengazen\sc* kayi te kedì te, “Peuvag-uvag ka he sevaha ka he wazè din pulus he perevantey te kerehidu.  
\v 16 Su edsavuk a te pengulu ziyà te tanà te Israel he iring te perevantey te menge kerehidu he wazè din pulus: kenè din ebpen-ahaan is netazin etawa kenè din edtembaran is menge nepelian, wey kenè din ibpepenabtab is memeǥasà. Piru egkaan sikandin te usa te melambù he kerehidu ne minsan is sapù te sulu ne edwekaan din su edreǥinuten din en.  
\v 17 Mekehizuhizu heeyan is wazè din pulus he perevantey te kerehidu he mid-ewaan din is menge kerehidu! Edtibasen te ispada is belad din wey edtiyuken is kewanan he mata zin, ne wazè en pulus te velad din ne kenè en ebpekaahà is kewanan he mata zin.” 
\c 12  
\s1 Edezeetan is menge Kuntada te menge tig-Jerusalem 
\p  
\v 1 Iyan heini menge lalag te \sc Nengazen\sc* mehitenged te Israel: “Iyan a \sc Nengazen\sc* he mibaal te langit wey kelibutan, wey mibeǥey te untung diyà te etew.  
\v 2 Edhimuwen ku is Jerusalem he iring te inumen he ebpekelangut te menge nasyun diyà te peliǥuy zin. Ne emun edsurungen dan en is Jerusalem, ne egkeragkes daan is duma he menge inged diyà te Juda.  
\v 3 Dutun he andew edhimuwen ku is Jerusalem he iring te meveǥat he vatu. Ne is minsan hengkey he nasyun he ebitbit kayi ne egkesazir. Is langun he menge nasyun kayi te kelibutan edsevaha te kedsurung diyà te Jerusalem.  
\v 4 Piru ebpelihendeken ku is langun he menge kudè dan wey edterenteduwen ku is menge pereuntud dan te kudà. Iyan a, is \sc Nengazen\sc*, migkaǥi te ebentayan ku is menge etew te Juda, piru edlekapen ku is langun he menge kudà te menge nasyun.  
\v 5 Ne egkaǥi is menge pengulu te Juda ziyà te gehinawa zan te, ‘Mezesen is menge etew te Jerusalem, su ǥeina te iyan Megbevayè dan is \sc Nengazen\sc* he Mekeǥeǥehem.’ 
\p  
\v 6 “Dutun daan he andew edhimuwen ku is menge pengulu te Juda he iring te egkeregreg he vaǥa ziyà te rapug etawa vinagkes he seresag he mesiǥa. Edezeetan dan is menge nasyun diyà te peliǥuy zan. Ne kenè mulà egkemenu is menge etew ziyà te Jerusalem dutun te kandan he lugar.  
\v 7 Ketau ku he ebpekehuna ebpekezaag is duma he menge inged diyà te Juda, su para kenà medlavew is dengeg te kevuwazan ni David wey menge meǥinged te Jerusalem te zengeg te zuma he menge inged diyà te Juda.  
\v 8 Dutun he andew edlevanan te \sc Nengazen\sc* is ebpemen-ubpà diyà te Jerusalem su para minsan is utew meluya kandan ne egkeiring ki David kezesen. Is menge kevuwazan ni David egkeiring te Megbevayà, iring te velinsuǥuen te \sc Nengazen\sc* he ebpengulu kandan.  
\v 9 Dutun he andew edezeetan ku is langun he menge nasyun he edsurung te Jerusalem. 
\p  
\v 10 “Ebeǥayan ku is menge kevuwazan ni David wey is menge meǥinged diyà te Jerusalem te ǥehinawa he hihizuwen wey meinempuen. Edtengtengan e zan is midhimetayan dan, ne edsineǥew sikandan iring te ginikanan he midsineǥew tenged te kebpatey te vudtung he anak din etawa kinekekayan he anak din.  
\v 11 Dutun he andew utew subra is kedruǥur ziyà te Jerusalem, iring is sineǥawan dan te kedsineǥawi ki Hadad Rimon diyà te suǥud te Megido.  
\v 12-14 Edruǥur is kada pemilya ziyà te nasyun he Israel: is kevuwazan ni David, ni Natan, ni Levi, ni Semei, wey is duma pa he menge pemilya. Edsineǥew sikandan he ebpesivayà is menge maama wey menge vahi.” 
\c 13  
\s1 Edlumpiyuwan is menge Israilihanen te menge Salè Dan 
\p  
\v 1-2 Migkaǥi pa is \sc Nengazen\sc* he Mekeǥeǥehem te, “Dutun he andew ibpetudà is serebseb para te kevuwazan ni David wey te menge meǥinged diyà te Jerusalem, su edlumpiyuwan sikandan tenged te menge salè dan wey kegkeremeriki kandan. Id-awè ku is menge ed-ezapen diyà te tanà he Israel ne kenè en heini egketenuzan. Ibpaawè ku puun te Israel is menge etew he uvag kun ebpeneuven, wey is mezaat he menge mulin-ulin he edumala kandan.  
\v 3 Ne emun duen pa uvag ebpeneuven, iyan mismu is amey zin wey iney zin egkaǥi ziyà te kandin he kinahanglan sikandin he edhimetayan, su tarù is migkaǥi zin ne egkeǥiyen din pa he ebpuun haazà diyà te \sc Nengazen\sc*. Ne emun edsigudu pa sikandin ne iyan en mismu is amey zin wey iney zin ed-uney edhimatey kandin.  
\v 4 Dutun he timpu igkeeled en te menge ebpeneuven is migkaǥi zan he nelewasan dan. Kenè en sikandan ebivisti te bulvulen he visti te ebpeneuven he iyan egemiten dan te kedlimbung.  
\v 5 Egkaǥi en hinuun sikandan te, ‘Kenà a ebpeneuven. Perevasuk a, ne iyan heini terebahu ku puun pa te menguhed e pa.’  
\v 6 Emun duen ed-insà kandan bahin te menge palì diyà te lawa zan, ne iyan heini tavak dan: ‘Nepelian a ziyà te valey te menge emiǥu ku.’ ” 
\s1 Ebpatey is Perevantey te menge Kerehidu ne Ebpekedsusuwey is menge Kerehidu Zin 
\p  
\v 7 Migkaǥi is \sc Nengazen\sc* he Mekeǥeǥehem te, “Endama is ispada! Himetayi is perevantey ku te menge kerehidu he suluǥuen ku. Himetayi sikandin su wey mekedsusuwey is menge kerehidu, is egkaayuayu he menge etew ku. Ne edsilutan ku sikandan.  
\v 8 Ebehinen te tetelu he vahin is menge etew kayi te tivuuk he tanè he Israel. Ebpatey is dezuwa he vahin.  
\v 9 Is egkesamà he iketelu he vahin, ne edlumpiyuwan ku he iring te pelata he edhimuwen he lunsey pinaaǥi te hapuy. Ne egezaman ku sikandan iring te kegezam te kegkelunsey te vulawan he pinaaǥi te hapuy. Ed-ampù dan kayi te kedì ne ebpemineǥen ku sikandan. Egkaǥi a te, ‘Menge etew ku sikandan,’ ne egkaǥi zaan sikandan te, ‘Is \sc Nengazen\sc* iyan Megbevayè dey.’ ” 
\c 14  
\s1 Ebpekeuma is \sc Nengazen\sc* ne Edhadì 
\p  
\v 1 Egkeuma is andew he edhukum is \sc Nengazen\sc*. Ebevehinen te menge kuntada niw is menge azen niw te menge tig-Jerusalem he mid-aǥew zan, ne ebpeketetengteng kew.  
\v 2 Su edtiǥumen te \sc Nengazen\sc* is menge etew ziyà te langun he menge nasyun su wey zan mekepekidtebek diyà te Jerusalem. Ed-eǥawen dan heini he inged, egkuwaan dan is menge azen diyà te menge valey, ne edleyuǥen dan is menge vahi. Ed-uwiten dan diyà te zuma he lugar is ketengà te menge meǥinged keniyan he inged. Piru is duma, egkesamà keniyan te inged.  
\v 3 Ne edtebeken te \sc Nengazen\sc* haazà is menge etew ziyà te menge nasyun, iring te kebpekidtebek din dengan.  
\v 4 Dutun he andew, edhitindeg sikandin diyà te Buvungan te menge Olibo, he ziyà te zapit te edsilaan te Jerusalem. Egketevì heini he vuvungan ne egkeliwazà puun te edsilaan pehendiyà te edsenlepan. Is liwazà dutun te vuvungan ne ebpekeendud pehendiyà te zizaya ne is sevaha pa he liwazà, ne ebpekeendud pehendiyà te divavà. Umbe egkehimu he meluag he suǥud is diyà te teliwazà kayi.  
\v 5 Ne ebpemelaǥuy kew he ebayà kayi he suǥud, su taman man te Azel is egkeuma kayi. Ebpemelaǥuy kew iring te mibeelan te menge kepuun niw hein midlinug dutun te timpu ni Hadì Uzia he hadì te Juda. Ne ebpekeuma is \sc Nengazen\sc* he Megbevayè ku duma te langun he menge velinsuǥuen din.  
\v 6 Dutun he andew wazà meinit wey meǥenew.  
\v 7 Nekeviza haazà he timpu su wazè mezukilem, kekenà, pudu zà maandew. Iyan dà is \sc Nengazen\sc* netau ke keenu heini egkehitavù. 
\p  
\v 8 Dutun he andew edtudà is utew meupiya he wahig puun te Jerusalem. Is ketengà kayi edtudà pehendiyà te Daǥat he Minatey ne is ketengà ne ebpehendiyà te Daǥat he Mediteraneo. Ebpedayun is kedtudà kayi ke ǥulavung wey tipenguzan.  
\v 9 Iyan is \sc Nengazen\sc* egkehimu he hadì te tivuuk he kelibutan. Iyan dà sikandin egkilelaan he Megbevayà ne wazè en duma. 
\p  
\v 10-11 Egkehimu he suǥud is tivuuk he tanà puun te Geba ziyà te zizaya pehendiyà te Rimon diyà te zivavà te Jerusalem. Piru ebmetikang is Jerusalem diyà te nepelestaran din, ne ed-ubpaan heini puun te pultahan ni Benjamin pehendiyà te nepelestaran te Kezaan he Pultahan, ne pehendiyè en te Pultahan diyà te Suyuk; wey puun te Turi ni Hananel pehendiyà te keresà te paras te hadì. Kenè en ed-umanen edezeeti is Jerusalem, ne is menge meǥinged kayi ebpengungubpaan en he wazà ebpekezezaat kandan. 
\p  
\v 12 Iyan heini kezeetan he ibpaaǥi te \sc Nengazen\sc* diyà te langun he menge nasyun he nekidtebek diyà te Jerusalem: Megkeredak is menge lawa, mata, wey zilè dan minsan uuyag pa sikandan.  
\v 13-15 Iring daan kayi he kezeetan is ed-aǥi ziyà te menge uyaǥen dan diyà te menge kampu zan ragkes en is menge kudà, menge mulà, menge kemilyu, wey menge asnu. 
\p Dutun he andew edterenteduwen te \sc Nengazen\sc* heeyan he menge etew, ne is kada sevaha kandan ebpekidtebek te iring din he etew. Minsan is menge etew ziyà te zuma he menge inged diyà te Juda ne ebpekidtebek para te Jerusalem. Edtiǥumen dan is menge ketiǥeyunan te langun he menge nasyun diyà te peliǥuy zan: is utew mahabet he menge vulawan, menge pelata, wey menge visti. 
\p  
\v 16 Is langun he egkesamà diyà te menge nasyun he nenurung te Jerusalem edtekezeg diyà te Jerusalem kada tuig su ed-ezapen dan is \sc Nengazen\sc* he Mekeǥeǥehem he iyan hadì, wey edsilibra sikandan te Pista te Kebaal te menge Lawig.  
\v 17 Is menge etew he kenà edhendiyà te Jerusalem te ked-azap te \sc Nengazen\sc* he Mekeǥeǥehem he iyan hadì, kenà ebeǥayan te uzan.  
\v 18 Is menge etew ziyà te Ehipto he kenà edhendiyà te Jerusalem, ebpeeǥiyan daan te \sc Nengazen\sc* te kezeetan iring te ibpaaǥi zin diyà te menge nasyun he kenà edhendiyà te kedsilibra te Pista te Kebaal te menge Lawig.  
\v 19 Iyan heeyan idsilut diyà te Ehipto wey ziyà te langun he menge nasyun emun kenè dan edhendiyà te Jerusalem te kedsilibra te Pista te Kebaal te menge Lawig. 
\p  
\v 20 Dutun he andew te ked-ezapa te \sc Nengazen\sc* te menge etew he ebpemuun diyà te menge nasyun, id-ukir ziyà te menge seriyew te menge kudà is menge lalag he edhenduen te, “Inteǥeley para te \sc Nengazen\sc*.” Is menge kuzen diyà te valey te \sc Nengazen\sc* egkehimu he iring is kegkesegradu zan te kegkesegradu zuen te yehung he ziyà te pemuhatà.  
\v 21 Is kada kuzen diyà te Jerusalem wey te tivuuk he Juda egemiten te menge ebpemuhat he para edlutuan te menge pemuhat he para te \sc Nengazen\sc* he Mekeǥeǥehem. Dutun he timpu wazè en menge nigusyanti ziyà te valey te \sc Nengazen\sc* he Mekeǥeǥehem.