\id NAM - mbb OT -Philippines 2014 (DBL -2014) 
\ide 65001 - Unicode (UTF-8) 
\rem Copyright: Kermit Titrud (2012) 
\h Nahum 
\toc1 Nahum 
\toc2 Nahum 
\toc3 Nah 
\mt1 Nahum 
\c 1  
\p  
\v 1 Is menge lalag kayi he libru, ne mehitenged te Nineve. Impahayag heini te \sc Nengazen\sc* diyà te ki Nahum he tig-Elkosh. 
\s1 Is Kegkepeuki te \sc Nengazen\sc* te menge Tig-Asiria 
\p  
\v 2 Kenà igkesuat te \sc Nengazen\sc* he Megbevayà is ked-azap te menge etew te zuma he menge ed-ezapen. Nepeukan din is menge kuntada zin ne ebelesan din sikandan.  
\v 3 Kenè sikandin melemu he egkepauk, piru mekeǥeǥehem sikandin ne edsilutan din is nekesalà. Emun edsaǥad sikandin edselenuhug is keramag wey ebpemagyu. Is menge ǥapun henduen dà te eliyavuk diyà te menge paa zin.  
\v 4 Pinaaǥi te kebmandù din ne egkemezahan is menge zaǥat wey menge wahig, egkengeǥangu is menge pinemula ziyà te Bashan, diyà te Buntud he Carmel, wey ziyà te Lebanon.  
\v 5 Diyà te etuvangan din egkehuyung is kelibutan, ragkes is menge vuvungan, wey ragkes he egkerkeren is menge etew kayi te kelibutan.  
\v 6 Hentei is ebpekeeguwanta emun utew egkepauk is \sc Nengazen\sc*? Emun duen din egkepeukan ne henduen be te edrepu sikandin te hapuy, ne ebpememeka is menge vatu ziyà te etuvangan din. 
\p  
\v 7 Meupiya is \sc Nengazen\sc*; melig-en sikandin he eputà emun timpu te kelised, ne ed-elimahan din is edangep diyà te kandin.  
\v 8 Iring sikandin te meseleg he zalem su ed-eminen din edezeeti is menge kuntada zin. Edel-asen din is menge kuntada zin taman te egkengepatey zin sikandan.  
\v 9 Sikiyu is menge tig-Asiria, ke hengkey is mezaat he pelanu niw ziyà te menge etew te \sc Nengazen\sc*, ne id-awà heeyan te \sc Nengazen\sc*, ne kenè ne heeyan egkeuman-uman.  
\v 10 Iring kew te etew he nelangut he nesepinit diyà te zuǥiyen he zezeisey he kayu. Edezeetan kew iyan iring te ebinsulan he reǥami.  
\v 11 Is sevaha te menge pengulu niw ne mibpelanu te mezaat he idezaat din te menge etew te \sc Nengazen\sc*. Mezaat is insambag din. 
\p  
\v 12 Iyan heini migkaǥi te \sc Nengazen\sc* diyà te menge tig-Juda: “Minsan mahabet wey mezesen is kuntada niw he menge tig-Asiria, edezeetan ku sikandan taman te egkahanew sikandan. Minsan te midrasey ku sikiyu ne kenè ku en heini ed-umanan ebeeli.  
\v 13 Su ǥuntaan egeuzen ku en sikiyu puun te ǥehem te menge tig-Asiria.” 
\p  
\v 14 Iyan heini migkaǥi te \sc Nengazen\sc* diyà te menge tig-Asiria: “Id-awè ku is menge kevuwazan niw wey edezeetan ku is ledawan he kayu etawa mital ziyà te simbahan he ed-ezapan niw te menge ed-ezapen niw. Ed-endamen ku en is menge edlevengan keniyu su kenè kew ereg he egkeuyag.” 
\p  
\v 15 Tengtengi niw is menge tig-Juda! Duen menge menunudtulà he ed-abley ziyà te menge vuvungan su edtudtulan kew zan te meupiya he tudtul he zuen en kelinew ziyà te lugar niw. Umbe silibraha niw en is menge pista niw ne tumana niw is menge penaad niw ziyà te \sc Nengazen\sc*. Su is lalung he menge etew ziyà te nasyun he Asiria kenè en maan ebpekesurung keniyu, su ebpurungan ku sikandan edezeeti. 
\c 2  
\s1 Is Kegkezeeti te Nineve 
\p  
\v 1 Sikiyu is menge tig-Nineve, midsurung kew en te menge kuntada niw he ebpeyapat keniyu. Umbe ventayi niw is menge verengbeng te menge inged niw wey ventayi niw is menge zalan. Tiǥuma niw is menge sundaru niw ne purung kew pengandam te kebpekidtebek.  
\v 2 Su minsan midezeetan niw is menge tig-Israel wey menge tig-Juda he henduen be te pinemula he paras he mibpendezeetan is menge subpang kayi, idlikù te \sc Nengazen\sc* is kegkemeǥeǥehem te Israel. 
\p  
\v 3 Meriǥà is kelasag wey visti te menge sundaru he kuntada niw. Ne zutun te timpu te kedsurung dan, ed-ilak-ilak is menge mital ziyà te menge kerwahi zan ne edsikadsikad en is menge kudè dan.  
\v 4 Edseǥembet dà is menge kerwahi zan diyà te menge zalan, he edlikù-likù diyà te menge pelasa. Henduen heini te edsiǥa he sulù wey egkindab he kilat.  
\v 5 Ebmendaran te hadì is menge upisyal te menge sundaru. Ebpemekeurambak en sikandan te kegaanggaan dan te ked-uvey ziyà te menge verengbeng niw su wey zan iketaud is pengalang te menge sundaru he edrundus duen te verengbeng.  
\v 6 Egkevengkag is menge peneng te wahig ne egkaanud is turuǥan niw.  
\v 7 Ingkepahayag en he ebihaǥen kew ne edumahan diyà te zuma he lugar. Henduen be te egkuter he merepatik is sineǥawan te suluǥuen niw he menge vahi zutun te edtebpien dan is kumeng dan tenged te kedlalew zan.  
\v 8 Is menge etew he ebpemelaǥuy puun te Nineve ne henduen be te edtudà he wahig he ebpuun diyà te nevusuwangan he peneng. Is menge ebpemelaǥuy ibpelikù te menge zuma zan piru wazè en egkeluvus he edliku. 
\p  
\v 9 Pemineg kew is menge nenurung diyà te Nineve. Penguwaa niw is menge pelata wey vulawan kayi he inged su nepenù heini te ketiǥeyunan.  
\v 10 Egkezeetan, egkeǥevà, egkevengkag en is Nineve! Umbe egkulbaan en is menge meǥinged kayi; egkerkeren is tivuuk he lawa zan, egkerkeren is menge vuel zan, ne ebmemeluntak sikandan.  
\v 11-12 Is Nineve iring te surung he mid-ubpaan te senge paris he erimaung, wey menge anak dan. Kunaan dan ke wazà ebpekekaid kandan dutun te surung. Edhimetayan wey ebpitpitasen duen te meemahan he erimaung is egkezawi zin ne ibpemeǥey zin diyà te esawa zin wey menge anak dan. Ebpenuen din is surung din te sapù te egkezawi zin. Piru ǥuntaan, edezeetan en is Nineve.  
\v 13 Su migkaǥi is \sc Nengazen\sc* he Mekeǥeǥehem te, “Pemineg kew is menge tig-Nineve! Kuntada ku sikiyu! Umbe ebinsulan ku is menge kerwahi niw ne ebpematey te tebek is menge sundaru niw. Ibpeengkezan ku en keniyu is kebpendezaat niw kayi te kelibutan. Kenè kew en ebpekesuǥù te menge menunudtulà pehendiyà te zuma he menge nasyun te kegkaǥi ziyà te kandan ke hengkey is egkesuatan niw he ibpetuman kandan.” 
\c 3  
\s1 Mekehizuhizu is menge Tig-Nineve 
\p  
\v 1 Mekerurunù is inged he Nineve, is inged te menge kriminal wey menge teruen. Mahabet is menge azen dan he tinavan dan, ne layun dan en duen ebiktimahan.  
\v 2 Edsurungen sikandan te kuntada zan. Egkezineg dan is letepes te idlagkut te menge kudà, is geǥerakar te ligid te menge kerwahi, is leletepak te paa te menge kudà, wey is daǥing te ebpekeundat-undat he menge kerwahi.  
\v 3 Egkeehè dan is edsurung he menge pereuntud te kudà, ed-ilak-ilak he menge ispada wey menge vangkew, wey utew mahabet he intambù he nemematey. Egkengeseligkat is menge sundaru te lawa te menge minatey.  
\v 4 Egkehitavù heini ziyà te Nineve su ǥeina te iring sikandin te vahi he layun en ebelegyà te zengeg din, meninintal wey menlelemey. Umbe egke-iniyat din is menge nasyun he mebpesakup kandin. 
\p  
\v 5 Guntaan, migkaǥi is \sc Nengazen\sc* he Mekeǥeǥehem te, “Pemineg kew is menge tig-Nineve! Kuntada ku sikiyu! Umbe ebpeel-elezan ku sikiyu ziyà te zuma he menge nasyun. Iring te vahi he midlislisan he naahà is kegkelevasi zin.  
\v 6 Edrewakan ku sikiyu ne egkeiring kew te etew he midtimbaǥan te besura. Edtengteng keniyu is menge etew.  
\v 7 Ne edlikey is langun he ebpekaahà keniyu he ke sikandan te, ‘Newaǥey en is Nineve. Wazè en edsineǥew para kandin. Wazà edlangan kandin.’ ” 
\p  
\v 8 Edhuna ve he lavew is Nineve kenè te inged he Tebes he uvey te Wahig he Nilo? Heini he wahig, nehimu he pengalang te Tebes su nehimu heini he verengbeng he nekeliǥuy te Tebes.  
\v 9 Is Etiopia wey is tivuuk he Ehipto, iyan nehimu he zesen te Tebes, ne kunaan din ke ebpedayun heini taman te taman. Is Put wey is Libya, kezapig din heini he menge nasyun.  
\v 10 Piru minsan pa te iyan heeyan, mibihag is menge etew kayi ne miduma ziyà te zuma he lugar. Midruntek diyà te menge zalan is dezeisey pa he menge anak dan. Mibpengedinahan is dungganen he menge etew kayi ne mibahin pinaaǥi te ripa su ebpen-uripenen.  
\v 11 Iring kew zaan keniyan is menge tig-Nineve, egkeiring kew te egkelangut he kenè din egketuenan ke hengkey is egkehitavù kandin. Egkehandek kew te menge kuntada niw emun edsurungen kew zan en ne ebpen-ehè kew te egkeelesan niw he zutun kenè kew egkezekepan.  
\v 12 Is langun he vinerengbeng he menge inged niw egkeiring te kayu he higus he nelutuan en is nehuna he menge veǥas din; ne emun edhuyungen egkengeulug en ne egkehimu en he egkeenen.  
\v 13 Tengtengi niw man is menge sundaru niw–meluya he iring te menge vahi! Is menge trangka te pultahan te inged niw ne nengetutung en, umbe melemu zà heini he edselezan te menge kuntada niw. 
\p  
\v 14 Sigi, pengendami niw is kebpekeuma te menge kuntada niw. Sekezu kew su wey niw zuen meinum. Lig-eni niw pa is menge verengbeng he nekeliǥuy te inged niw; baal kew te menge brik ne purungi niw heini he menge verengbeng.  
\v 15 Piru keniyan mismu te lugar niw ebpemematey kew pinaaǥi te hapuy wey ispada, iring te menge pemuleey he mid-etaki te terapan. 
\p Mibmahabet kew iring te menge terapan!  
\v 16 Impemezakel niw is menge nigusyanti niw he henduen be te subra pa kezakel te menge vituen diyà te langit. Piru egkeiring sikandan te menge terapan he ed-eminen dan egkeena is menge pinemula ne segugunà dan edlayang.  
\v 17 Is menge vantey niw wey menge upisyal, ne henduen be te menge terapan su utew mahabet, ne ziyè edlatun te menge verengbeng emun meǥenew is timpu. Iyan, emun edsilè en is andew, ne edlayang sikandan ne wazà egketau ke hendei sikandan mebpevayà.\f + \fr 3:17 \ft \+it Is ibpesavut kayi he menge birsikulu ne iyan is menge nigusyanti, wey menge vantey, wey menge upisyal te Nineve he kenè egkeseriǥan. Timpu te edsurungen is Nineve ebpemelaǥuy zà sikandan.\+it*\f* 
\p  
\v 18 Sikew is hadì te Asiria, ebpemematey is menge pengulu nu. Ebpekepeyapat is menge etew nu ziyà te menge vuntud, ne wazè en ebpeketiǥum kandan.  
\v 19 Egkeiring ka te etew he teǥepalì he kenè en egkeulian is palì din. Is langun he ebpekezineg te tudtul mehitenged te kegkezeeti nu ebpakpak te kegkelipey, su is langun te sikandan ne layun nu ebpesipelahi.