\id MIC - mbb OT -Philippines 2014 (DBL -2014) 
\ide 65001 - Unicode (UTF-8) 
\rem Copyright: Kermit Titrud (2012) 
\h Micas 
\toc1 Micas 
\toc2 Micas 
\toc3 Mic 
\mt1 Micas 
\c 1  
\p  
\v 1 Iyan heini menge lalag te \sc Nengazen\sc* bahin te Samaria wey Jerusalem. Impahayag din heini ziyà te ki Micas he tig-Moreshet dutun te timpu te kedhadì ni Jotam diyà te Juda, ne neketinundug kandin te kedhadì si Ahaz, wey si Hezekia. 
\p Migkaǥi si Micas te,  
\v 2 “Purung kew pemineg, is langun he menge etew kayi te kelibutan! Su edtistiǥus kuntra keniyu is Nengazen he MEGBEVAYÀ puun te segradu he valey zin.” 
\s1 Edsilutan is menge Tig-Israel wey menge Tig-Juda 
\p  
\v 3 Pemineg kew! Egawas is \sc Nengazen\sc* puun te mid-ubpaan din. Ebulus sikandin ne egiek diyà te metikang he menge lugar kayi te kelibutan.  
\v 4 Egketunew is menge vuntud he egkeǥiekan din iring te kendilà he egketunew te hapuy, ne egkeǥadgad is menge suǥud he egkeǥiekan din iring te ebeyaan te wahig he edtudà diyà te kelendiǥan.  
\v 5 Egkehitavù heini is langun tenged te mibaal te salà is menge etew te Israel wey Juda. Is menge tig-Samaria, iyan midtukù te zuma he menge meǥinged diyà te Israel te kebaal te salà. Is menge tig-Jerusalem, iyan midtukù te zuma he menge meǥinged diyà te Juda te ked-azap te zuma he menge ed-ezapen.  
\v 6 Umbe, migkaǥi is \sc Nengazen\sc* te, “Edezeetan ku is Samaria ne kenè en heini egkeubpaan, kekenà, ebpemulaan dà te paras. Edlilizen ku is menge vatu kayi pehendiyà te suǥud taman te ebpekelepew is menge pundasyun kayi.  
\v 7 Egkengerupet is langun he menge ledawan te menge ed-ezapen diyà te Samaria, ne egketutung is langun he imbayad te menge maama te kebpekidhilavet dan te menge vahi he ebelegyà te zengeg dan diyà te simbahan. Neketiǥum is menge tig-Samaria te menge ledawan pinaaǥi te kebeyazi te menge vahi he ebelegyà te zengeg dan diyà te simbahan. Umbe ǥuntaan, is menge kuntada zan, egkuwaan dan is menge pelata wey menge vulawan he impekaplà diyà te menge ledawan dutun su ibayad dan daan wey zan mekepekidhilavet te menge vahi ziyà te simbahan para te zuma he menge ed-ezapen diyà te kandan.” 
\p  
\v 8 Migkaǥi si Micas te, “Tenged te kegkezeeti te Samaria, ne edisineǥew a wey ebpenhulùhulù a. Edhipanew a he wazà apid te paa ku wey kenà a egkukumbalà su ibpeehè ku is kedlalew ku. Edtaul a iring te leew he asu wey ed-iringan ku is kegkaǥi te ekang.  
\v 9 Su is kegkezeeti te Samaria ne iring te palì he kenè en egkeulian, ne egkeulaula zaan heini ziyà te Juda. Ne ebpekeuma heini ziyà te Jerusalem kes kepital he inged te menge zuma ku he menge meǥinged. 
\p  
\v 10 “Sikiyu is menge tig-Juda, kenè niw tudtuli is menge kuntada tew he menge tig-Gat bahin te kezeetan he ebpekeuma ziyà te kenitew. Kenè niw ipaahà kandan he edsineǥew kew. Ne ipeehè niw mulà is kegkeseeng niw ziyà te Bet Leafra pinaaǥi te kedtelilid niw ziyà te tanà. 
\p  
\v 11 “Sikiyu is menge meǥinged diyà te Shafir, ebihaǥen kew ne edumahan he menge lelevas, umbe egkepeel-elezan kew. Is menge meǥinged diyà te Zaanan egkahandek en he egawas diyà te lugar zan te kedtavang keniyu. Is menge tig-Bet Ezel he edsineǥew tenged te kegkezeeti zan ne kenè daan ebpekelavan keniyu.  
\v 12 Benar iyan, is menge meǥinged diyà te Marot ebperateng te kegkeengked te tebek. Piru intuǥut pa ganì te \sc Nengazen\sc* he mekeuvey is menge kuntada ziyà te pultahan te Jerusalem. 
\p  
\v 13 “Sikiyu is menge meǥinged diyà te Lakish, senggari niw te menge kerwahi is menge kudè niw ne pelaǥuy kew. Mid-iringan niw is salà te menge tig-Israel, ne tenged keniyu mibaal zaan te salà is menge tig-Zion. 
\p  
\v 14 “Ne ǥuntaan sikiyu is menge tig-Juda, pemazè kew en diyà te inged he Moreshet Gat su ebihaǥen en is menge etew kayi te menge kuntada. Ebihaǥen daan is menge meǥinged diyà te inged he Aczib, umbe wazà tavang he egkekuwa te menge hadì niw he ebperateng te tavang puun keniyan he inged. 
\p  
\v 15 “Sikiyu is menge meǥinged diyà te Maresha, edsuǥuen te \sc Nengazen\sc* is menge kuntada niw pehendiyà te keniyu he ed-aǥew te inged niw. 
\p “Sikiyu is menge tig-Juda, is menge pengulu niw ed-eles diyà te surung he Adulam.  
\v 16 Is pelanggè niw he menge anak, egkuwaan diyà te keniyu ne ed-uwiten diyà te zuma he lugar, umbe idlalew niw is menge anak niw ne ibpeehè niw heini pinaaǥi te kegkiskisi niw te ulu niw iring te ulu te vanug.” 
\c 2  
\s1 Edsilutan te Megbevayà is Midlisedlised Dan is menge Pubri 
\p  
\v 1 Kehizu niw te egkepurang he ebpelanu te mezaat. Ne kegkemeselem ebeelan niw is mezaat he pelanu niw su egkehimu niw is kebaal kayi.  
\v 2 Ed-eǥawen niw is menge vevesukà wey menge valey he egkesuatan niw. Edlimbungan niw is menge etew wey niw mekuwa is baley zan wey is tanà he kevilin dan.  
\v 3 Umbe, iyan heini migkaǥi te \sc Nengazen\sc* diyà te keniyu, “Pemineg kew! Mibpelanu a he edezeetan ku sikiyu ne kenè kew ebpekelibri te keugelingen niw. Kenè kew en ebpekepahambug su zutun he timpu edezeetan ku sikiyu.  
\v 4 Dutun he andew edsudien kew te menge etew pinaaǥi te mekeseseeng he penhulùhulù he edhenduen te, ‘Mibpurungan key zezeeti! Migkuwa te \sc Nengazen\sc* is tanè dey ne imbeǥey zin diyà te menge limbungan.’ ” 
\p  
\v 5 Umbe, wazè en menge kevuwazan niw he ebpekezawat te keniyu he vahin dutun te timpu keuzemà emun ebehinen te \sc Nengazen\sc* is tanà he id-ulì diyà te kandan.  
\v 6 Iyan tavak niw kediey is: “Ereg kad; kenè key en kenikew weliyi te iring dutun su kenà egkehimu he egkepeel-elezan key.  
\v 7 Maan, mibpekezaat be te \sc Nengazen\sc* is menge kevuwazan ni Jacob? Naamin en be is pelavey zin? Buluhaten din be is kebpendezaat?” Kenà heeyan egkehimu! 
\p Iyan heini tavak te \sc Nengazen\sc* keniyu: “Angin pezem ke meupiya is mibeelan niw su siguradu he egkezawat niw is impenaad ku.  
\v 8 Piru iyan mibeelan niw is midsurung niw is pubri he menge etew ku he henduen be te menge kuntada niw. Egkeisip dan is, emun ed-ulì en sikandan diyà te lugar zan is nekidtebek ne wazè en egkevut kandan, piru heyan kew zed bes is ed-aǥew te samput dan.  
\v 9 Midsegseg niw is menge vahi zan diyà te menge valey he utew zan mibmahal. Ne migkuwa niw is menge tuvad he imbeǥey ku ziyà te menge anak dan ne kenè dan en heini egkekuwa minsan keenu.  
\v 10 Ne ǥuntaan awè kew kayi te Israel su heini he lugar kenè ne ebpekeveǥey keniyu te egkehimelayan, su midremerikan niw heini te menge salè niw. Egkezeetan heini he lugar ne kenè ne egkepulusan.  
\v 11 Is egkesuatan niw he megwewali iyan sikan is egkaǥi te wazè din pulus, limbungan, wey teruen, he iyan heini idwali zin: ‘Ed-uzaren kew te vinu wey zuma pa he inumen.’ ” 
\s1 Is Insaad he Kelibriyanan te menge Etew te Israel wey Juda 
\p  
\v 12 Migkaǥi is \sc Nengazen\sc* te, “Sikiyu is menge etew te Israel wey Juda he nengesamà he uuyag, edtiǥumen ku sikiyu iring te menge kerehidu ziyà te tudil etawa iring te grupu te menge uyaǥen diyà te pepenebtavà. Egkeeneb is tanè niw te etew.  
\v 13 Ebpuwasan ku is pultahan te inged he zutun kew zumaha is mibihag, ne ebpenguluwan ku sikiyu te kegawas puun dutun. Iyan a kes \sc Nengazen\sc* he hadì niw is ebpengulu keniyu.” 
\c 3  
\s1 Midsawey ni Micas is menge Pengulu wey menge Ebpeneuven diyà te Israel wey Juda 
\p  
\v 1 Migkaǥi si Micas te, “Sikiyu is menge pengulu te Israel wey Juda, pemineg kew! Kenè be iyan kew ereg he ebantey wey kenà maawà is hustu he kukuman?  
\v 2-3 Piru igkeepes niw is meupiya, ne mibmahal niw mulà is mezaat. Edèdaaǥen niw utew is duma ku he menge meǥinged; henduen be te mid-enisan niw sikandan, ne migkuwa niw is menge sapù dan diyà te menge tulan dan, ne mibpenggetad niw is menge tulan dan, ne mibpemisang niw is menge sapù dan, ne midhilutù niw wey migkaan.  
\v 4 Dutun te timpu te kedsiluti keniyu ebuyù kew te tavang diyà te \sc Nengazen\sc*, piru kenè kew zin edtevangan; ed-iniyuǥan kew zin tenged te mezaat he menge vaal niw. 
\p  
\v 5 “Iyan heini migkaǥi te \sc Nengazen\sc* mehitenged te menge ebpeneuven he nenazin te menge etew zin, he nenaad dan te meupiya he kebpekesavuk diyà te menge mibpekaan kandan, ne mibpahayag dan te kezeetan te menge wazà mebpekaan kandan:  
\v 6 Tenged te kedtezina niw te menge etew ku ne kenè kew en ebpekelawas, wey kenè kew en ebpekepenagnà. Henduen be te ziyè kew te utew merusirem he zutun wazè niw egkaahà.  
\v 7 Egkepeel-elezan kew utew is menge ebpeneuven wey menge menenagnà. Igkezilung niw is buked niw tenged te kegkeeled, su wazè niw en egkezawat he menge lalag he ebpuun te Megbevayà. 
\p  
\v 8 “Piru siak mulà, mibpurungan a ulini te Mulin-ulin te \sc Nengazen\sc* he iyan mibeǥey kedì te ǥehem wey mekepedayun is hustu he kukuman pinaaǥi kedì ne wey a zaan mebmevurut te kegkaǥi ziyà te menge etew ziyà te Israel wey Juda he nekesalà sikandan. 
\p  
\v 9 “Sikiyu is menge pengulu te Israel wey Juda, pemineg kew! Igkeepes niw is metazeng he kukuman ne mibulegkù niw is hustu.  
\v 10 Mibangun niw is Zion he iyan kes inged he Jerusalem pinaaǥi te mezaat he paaǥi. Andam kew he edhimatey te etew basta mevangun heini.  
\v 11 Emun edhukum kew ebpeburan niw is ebeǥey te sipsip diyà te keniyu. Ne sikiyu is menge memumuhat, ebpenurù kew su ǥeina te ebeyazan kew. Ne sikiyu zaan is menge ebpeneuven, ebpenagnè kew tenged dà te selapì. Edsarig kew pa he edtevangan kew te \sc Nengazen\sc*, su egkaǥi kew te, ‘Zuma zey is \sc Nengazen\sc*. Umbe wazà mezaat he egkehitavù kenami.’  
\v 12 Umbe, tenged keniyu edezeetan is Zion he iyan is inged he Jerusalem. Egkeiring heini te mid-eradu he bevesukà, ne egkehimu heini he egketembuan te menge nengeǥevà. Ne egkehimu heini he ketelunan is buvungan he nevengunan te valey te \sc Nengazen\sc*.” 
\c 4  
\s1 Is Kesuǥuan te Megbevayà Ebpekeveǥey te Kelinew 
\r (Isaias 2:2-4) 
\p  
\v 1 Diyà te huziyan he menge andew, sikan is buvungan he nevengunan te valey te \sc Nengazen\sc* egkehimu he lavew he impurtanti te langun he menge vuvungan. Ne ebpekeuma kayi he vuvungan is mahabet he menge etew he ebpemuun diyà te mahabet he menge nasyun.  
\v 2 Ke sikandan te, “Hendini kew en, su edtekezeg kiw ziyà te vuntud te \sc Nengazen\sc*, diyà te valey te Megbevayà ni Jacob. Su ebpenuruen kiw zin te menge paaǥi zin su wey tew metuman heini.” 
\p Umbe, ed-ulì is menge etew he ebpuun diyà te Zion, he iyan is inged he Jerusalem, ne ed-uwiten dan is kesuǥuan te \sc Nengazen\sc*.  
\v 3 Ne pinaaǥi te kesuǥuan din, edhusayen din is menge kebikilan te mahabet he menge nasyun, minsan sikan is gemhanan he menge nasyun diyà te meziyù. Umbe kenè ne ebpetebtebekà is menge etew ziyà te menge nasyun, wey kenè dan en mebpenurù te menge etew te para te kebpekidtebek. Ebeelan dan dà maan he punta te menge eradu is menge ispada zan, wey ebeelan dan dà he para te igkamet is menge vangkew zan.  
\v 4 Is kada etew ebpinuu ziyà te sihung te pinemula zin he paras wey kayu he higus he wazè din igkahandek. Egkehitavù iyan heini su iyan mismu is \sc Nengazen\sc* he Mekeǥeǥehem migkaǥi kayi.  
\v 5 Piru minsan medsunud pa is duma he menge etew te menge ed-ezapen dan, ne sikami mulà edsunud key te \sc Nengazen\sc* he Megbevayè dey taman te taman. 
\s1 Ed-ulì is menge Israilihanen diyà te Kandan he Lugar puun te Kegkevihaǥa Kandan 
\p  
\v 6-7 Migkaǥi is \sc Nengazen\sc* te, “Keuzemà te huziyan he menge andew, edtiǥumen ku is menge etew ku he midsilutan ku, he iring te menge kerehidu he nengepiangan wey nekepeyapat. Edhimuwen ku he mekeǥeǥehem he nasyun is nesamà kandan. Ne edhedian ku sikandan diyà te Buvungan he Zion puun dutun he timpu ne taman en taman.  
\v 8 Is Zion he iring te metikang he ventayà te menge uyaǥen, egkeuman egkehimu he mekeǥeǥehem. Heini he inged, is migngezanan daan te Jerusalem, egkeuman egkehimu he edhuna te langun he menge inged diyà te Israel iring te nehuna he timpu. 
\p  
\v 9-10 “Ne ǥuntaan, maan is edag-es kew is menge meǥinged diyà te Zion he iring te vahi he ebeliliten? Duen niw pe man hadì ne wazè man mebpematey is menge sumesambag din. Sigi, belvelehey kew tenged te kegkesekiti iring te vahi he ebeliliten. Su kenè en egkeuǥet ne ebpekaawè kew ziyà te inged niw ne ziyè kew ebpekeubpà te menge vevesukà, ne zutun edumahan kew ziyà te Babilonia. Piru emun diyè kew en, edlibriyen ku sikiyu wey kew kenà mezezeeti te menge kuntada niw.  
\v 11 Guntaan mahabet he menge etew ziyà te menge nasyun is midtiǥum su ebpekidtebek dan keniyu. Ke sikandan te, ‘Ebpeel-elezan tew is menge tig-Zion! Ne zutun ed-ahaan tew is mekeeled-eled he kebpekesavuk dan.’  
\v 12 Piru heini he menge etew ziyà te menge nasyun, wazè dan metueni is isip ku. Wazè dan mesavut is pelanu ku, he midtiǥum ku sikandan su wey ku mesiluti iring te menge pungu he edtiǥumen su egunasen. 
\p  
\v 13 “Sikiyu is menge meǥinged diyà te Zion, genat kew en ne zèdeeti niw is menge kuntada niw he iring te egunas kew te menge pungu. Su edhimuwen ku sikiyu he iring te tudu he vaka he putew is menge sungey zin ne brunsi is menge sulu zin. Edrunteken niw is mahabet he menge etew ziyà te menge nasyun he midtiǥum te kebpekidtebek keniyu. Ne is menge ketiǥeyunan dan he nekuwa zan pinaaǥi te kebpesipala ne idhalad niw kayi te kedì te Nengazen he iyan ebayàbayà te tivuuk he kelibutan.” 
\c 5  
\p  
\v 1 Guntaan, sikiyu is menge tig-Jerusalem, endama niw is menge sundaru niw su midliǥuyan kew te menge kuntada niw. Edlegkuten dan te tuked is buked te pengulu te Israel. 
\s1 Is Insaad he Pengulu he Ebpuun te Betlehem 
\p  
\v 2 Migkaǥi is \sc Nengazen\sc* te, “Sikew, Betlehem Efrata, sevaha ka te kinezeisayan he inged diyà te Juda. Piru ziyà ebpuun te kenikew is etew he ebpenilbi kedì he pengulu te Israel, he is menge kepuun din nevantug dengan he menge etew.” 
\p  
\v 3 Ibeǥey te \sc Nengazen\sc* is menge etew te Israel ziyà te menge kuntada zan, piru taman dà te ked-anak te vahi he ebeliliten te maama he ebpengulu te Israel.  
\v 4 Edumala heini he pengulu ne ed-elimahan din is menge etew te Israel he iring sikandin te perevantey te menge kerehidu. Edhimuwen din heini pinaaǥi te zesen wey gehem te \sc Nengazen\sc* he Megbevayè din. Ne ebpengungubpaan is menge etew zin he wazè dan igkahandek su egkilelaan te menge etew te tivuuk he kelibutan is kegkemekeǥeǥehem din.  
\v 5 Ebeǥayan din te meupiya he kebpekesavuk is menge etew zin. 
\s1 Is Kelibriyanan wey is Kezeetan 
\p Emun edsurung is menge tig-Asiria kayi te tanè tew wey edselezan dan is melig-en he menge vahin te inged tew, ebpekidtebek kiw kandan he ebpurungan ebpenguluwi te menge pengulu tew.  
\v 6 Edaaǥen dan wey egkezumala zan is Asiria he tanà ni Nimrod, pinaaǥi te menge ǥumaan dan. Umbe edlibriyen kiw zan emun edsurung is menge tig-Asiria kayi te tanè tew. 
\p  
\v 7 “Is egkesamà he menge Israilihanen, ebpekeuwit te keupiyaanan diyà te mahabet he menge nasyun. Egkeiring sikandan te mahames he keramag wey uzan he ibpaaǥi te \sc Nengazen\sc* su wey meketuvù is menge pinemula. Edsarig dan diyà te Megbevayà ne kenà diyà te etew.  
\v 8 Piru ebpekeuwit daan sikandan te kezeetan diyà te menge nasyun. Egkeiring sikandan te mevurut he erimaung he ed-etaki te menge langgam diyà te ketelunan wey menge kerehidu ziyà te penebtavà. Su emun ed-etaki heini ne edlingketawan din is ebiktimahan din wey ebpengeǥaten din ne kenè ne heini ebpekelingkawas kandin.  
\v 9 Ebpekezaag is menge Israilihanen te menge kuntada zan. Edezeetan dan sikandan is langun.” 
\s1 Edezeetan te Megbevayà is Midseriǥan te menge Israilihanen 
\p  
\v 10 Migkaǥi is \sc Nengazen\sc* te, “Ziyà te huziyan he menge andew, ebpehimetayan ku is menge kudè niw wey edweǥayen ku is menge kerwahi niw.  
\v 11 Edweǥayen ku is menge inged niw ragkes en is binerengbeng he menge inged.  
\v 12 Edezeetan ku is menge hinepetan niw ne egkaawà is menge veyilan niw.  
\v 13 Ne kenè kew en ebpekaazap te menge ledawan wey tedeman he menge vatu he mibeelan niw, su edrupeten ku heini,  
\v 14 ragkes is menge tukud he simbulu te vahi he ed-ezapen he si Ashera. Ne edezeetan ku heini is menge inged niw.  
\v 15 Tenged te utew ku kegkepauk, ebelesan ku is menge etew ziyà te menge nasyun he wazà mebpezumazuma kedì.” 
\c 6  
\s1 Is Riklamu te Megbevayà Bahin te menge Israilihanen 
\p  
\v 1 Migkaǥi si Micas te, “Pemineǥa niw is egkeǥiyen te \sc Nengazen\sc* diyà te keniyu te menge Israilihanen. Sigi en, keǥiya niw en is kasu niw; ipezineg niw te menge vuntud wey menge vuvungan is egkeǥiyen niw.  
\v 2 Ne sikiyu is menge vuntud wey melig-en he menge pundasyun te kelibutan, pemineǥa niw is riklamu te \sc Nengazen\sc* mehitenged te menge Israilihanen he menge etew zin. Iyan heini riklamu zin: 
\p  
\v 3 “Sikiyu is menge etew ku, hengkey is sayep he neveelan ku ziyà te keniyu? Mibeley ku ve sikiyu? Tevaka a keniyu.  
\v 4 Impeǥawas ku pa ganì sikiyu ziyà te Ehipto he zutun kew uripena. Ne mibpilì ku si Moises, si Aaron, wey si Miriam te kebpengulu keniyu.  
\v 5 He menge etew ku, tentenuzi niw he midsuǥù ni Hadì Balak he hadì te Moab si Balaam he anak ni Beor te kedrawak keniyu piru penuvadtuvad keniyu is impekaǥi ku ki Balaam. Tentenuzi niw zaan ke mibmenumenu ku sikiyu te edtavang hein midhipanew kew puun te Shitim pehendiyà te Gilgal. Tentenuzi niw heini he menge hitavù su wey niw meisip-isip is kedlibriya ku keniyu.” 
\p  
\v 6 Mid-insà is sevaha zuen te menge Israilihanen te, “Hengkey is hustu he ibpemuhat ku ziyà te \sc Nengazen\sc*, he Megbevayà diyà te langit, emun ed-ezapen ku sikandin? Ebpemuhat e ve te vaka he senge-tuig is keǥurang din he pemuhat he edtutungen?  
\v 7 Ebpekepenunuat e ve te \sc Nengazen\sc* emun ebpemuhat a ziyà te kandin te linibu he menge kerehidu wey utew zekelà he lana? Kinahanglan be he ibpemuhat ku ziyà te kandin is kinekekayan he anak ku he vayad te menge salè ku?” 
\p  
\v 8 Midtavak si Micas te, “Mibpenurù kiw en te \sc Nengazen\sc* ke hengkey is meupiya. Ne iyan heini egkesuatan din he tumana tew: Ebeelan tew ke hengkey is metazeng, ibpelavi tew is kegkehizu te zuma, wey edsunud kiw te Megbevayè tew duma is kenà kebpelavew.” 
\s1 Edsilutan te Megbevayà is menge Israilihanen 
\p  
\v 9 Pemineǥa niw is migkaǥi te \sc Nengazen\sc* diyà te inged he Jerusalem, su is edtahud kandin iyan duen din hustu he ketau: 
\p “Sikiyu is menge sakup te tribu te Juda, tiǥum kew ziyà te inged he Jerusalem ne pemineg kew.  
\v 10 Mezaat kew he menge etew! Kenè ku egkelipatan is menge ketiǥeyunan he netiǥum niw pinaaǥi te mezaat he paaǥi. Migamit kew te kenà hustu he tekesà he iyan kes baal he midrewakan ku.  
\v 11 Kenà egkehimu ke ebey-anan ku zà sikiyu te kedlimbung niw pinaaǥi te timbangan.  
\v 12 Mesipala is menge sepian keniyu, ne menge teruen kew.  
\v 13 Umbe, tenged te menge salè niw mibpuunan ku en is kedsilut keniyu su wey kew mezeeti.  
\v 14 Benar he ebpekekaan kew, piru kenè kew egkahantey; layun kew ǥihapun egkevitil. Ederengdeng kew te menge abut niw, piru kenè niw heini egkepulusan, su ibpekuwa ku heini te menge kuntada niw emun timpu te tebek.  
\v 15 Umbe, ebpemula kew, piru kenè kew iyan ebpekeraǥun kayi. Ebpetiǥis kew te menge ulibu, piru kenè kew iyan ebpekepulus te lana kayi. Egkeres kew te menge paras, piru kenè kew iyan ebpekeinum te vinu kayi.  
\v 16 Egkehitavù heini keniyu su ǥeina te mid-iringan niw is mezaat he menge vaal, menge sulunuzen, wey menge sambag ni Hadì Omri wey te anak din he si Hadì Ahab. Umbe, edezeetan ku sikiyu, ne ed-un-undahan kew wey edsudien te menge etew ziyà te zuma he menge nasyun.” 
\c 7  
\s1 Is Kezeetan te menge Israilihanen 
\p  
\v 1 Migkaǥi si Micas te, “Mekehizuhizu a! Iring a te etew he egkevitil he nengahà te rerawen he menge veǥas te paras etawa higus piru wazè din naahà.  
\v 2 Is ibpesavut ku iyan is, wazè en neehè ku he etew kayi te Israel he mepezumdumahan te Megbevayà. Wazè en nesamà he metazeng he etew. Is kada sevaha, edtaǥad te meupiya he timpu te kegkehimetayi zin te zuma zin he meǥinged, iring te etew he edtaǥad te kegkeutela zin te langgam he edhingutelen din.  
\v 3 Nelayam sikandan te kebaal te mezaat. Is menge pengulu wey menge meghuhukum ne edawat te sipsip. Ne ebpezumdumahan dan dà is egkesuatan te menge nekilala wey gehemanen he menge etew. Nesevaha sikandan te kebulegkù te hustu he kukuman.  
\v 4 Is kinemetezengan kandan ne iring dà te zuǥiyen he sagbet he wazè din pulus. Neume en is timpu he edsilutan te Megbevayà heini he menge etew sumalà te impetizaan din kandan pinaaǥi te menge ebpeneuven he iring te menge perevantey te turi. Umbe ǥuntaan egkengeliveǥan sikandan. 
\p  
\v 5 “Ne ǥuntaan te utew en mezaat is ulaula te menge etew, ne kenè kew en sarig te menge emiǥu niw, minsan is utew niw menge emiǥu. Ne pekeventayi niw is menge lalag niw minsan diyà te minahal niw he esawa.  
\v 6 Su kayi he timpu, is anak he maama ne kenà edtahud te amey zin, ne is anak he vahi ne edsukul te iney zin, ne is ambey edsukul te enuǥang din he vahi. Is kuntada te etew iyan mismu is sakup te keugelingen din he pemilya. 
\p  
\v 7 “Piru siak mulà, edsarig a te \sc Nengazen\sc* he Megbevayè ku. Edteǥazan ku sikandin is edlibri kedì. Ne ebpemineǥen din is ked-ampù ku.” 
\s1 Edlibriyen te Megbevayà is menge Israilihanen 
\p  
\v 8 Migkaǥi is menge Israilihanen te, “Kenà ereg he edsudì kenitew is menge kuntada tew. Su minsan nezeetan kiw ne ed-uman kiw ed-enew. Wey minsan diyè kiw te merusirem ne iyan is \sc Nengazen\sc* kerayag tew.  
\v 9 Geina te nekesalè kiw ziyà te \sc Nengazen\sc*, dait he ed-entusen tew is silut din kenitew taman te edlevanan kiw zin wey ebeǥayan te hustu he kukuman. Egkeehè tew is kedlibriya zin kenitew pinaaǥi te ked-uwit din te kerayag kayi te kenitew.  
\v 10 Egkaahà heini te menge kuntada tew ne egkepeel-elezan sikandan. Su hein aney ne edsudien kiw zan he ke sikandin te, ‘Hendei en is \sc Nengazen\sc* he Megbevayè niw?’ Kenà egkeuǥet egkeehè tew is kegkezeeti zan. Egkeiring sikandan te vasak diyà te kersada he edtekutakan.” 
\p  
\v 11 Migkeǥiyan ni Micas is menge tig-Jerusalem te, “Egkeuma is timpu he ed-umanan niw ebenguna is menge verengbeng niw ne zutun he timpu ne ebmeluag pa is tanà he egkesakup niw.  
\v 12 Dutun daan he timpu edhendiyà te keniyu is menge etew he ebpuun diyà te Asiria wey ziyà te menge inged diyà te Ehipto, wey ziyà te menge lugar he ebpuun te Ehipto pehendiyà te wahig he Eufrates, wey is ebpuun diyà te meziyù he menge lugar.  
\v 13 Egkehimu he mekevulungbulung is menge nasyun kayi te kelibutan tenged te kegkezeeti te menge meǥinged kayi.” 
\s1 Mid-ampù is menge Israilihanen he Kehizuwi Sikandan te Megbevayà 
\p  
\v 14 Mid-ampù is menge Israilihanen diyà te \sc Nengazen\sc* he ke sikandan te, “Ventayi key is menge etew nu he migaked nu, te iring te kebantey te perevantey te menge kerehidu. Is menge tanà diyà te peliǥuy zey ne zekelà is egketabtab duen, piru sikami nengungubpaan key kayi te sibsivayan he iyan key zà. Ipeuman nu ipemeluag is tanè dey taman te Bashan wey Gilead iring te nehuna he timpu.  
\v 15 Ipeehè key kenikew te menge egkein-inuwan iring te mibeelan nu zengan hein impeǥawas key kenikew puun diyà te Ehipto.  
\v 16 Ne emun egkaahà heini te menge etew ziyà te menge nasyun ne egkepeel-elezan dan minsan gemhanan sikandan. Ne kenè dan en edlalag wey ebpemineg te menge kedsudia kenami.  
\v 17 Edula zan diyà te tanà iring te uled tenged te kegkeeled dan. Egawas sikandan diyà te elesè dan is egkerkeren tenged te kegkahandek dan kenikew, te \sc Nengazen\sc* he Megbevayè dey.  
\v 18 Wazè en duma he ed-ezapen he iring kenikew. Mibpesaylu nu is menge salà te nesamà he menge etew nu he menge ǥaked nu. Wazà mebpedayun taman te taman is kegkepauk nu su ingkelipey nu is kebmahala nu kenami.  
\v 19 Egkeumanan key kenikew egkehizuwi ne id-awè nu is langun he menge salè dey. Iring dà te edtekutakan nu heini ne idtimbag nu ziyà te kezeleman te zaǥat.  
\v 20 Ibpeehè nu kenami te menge kevuwazan ni Abraham wey ni Jacob is kebmetinumanen nu wey kebmahala nu kenami sumalà te impenaad nu ziyà te kandan dengan.”